IL-KUMMISSJONI EWROPEA

Brussell, 10.7.2018

COM(2018) 537 final

L-ABBOZZ TA’ BAĠIT EMENDATORJU Nru 5
TAL-BAĠIT ĠENERALI 2018

Kanċellazzjoni tar-riżerva relatata mas-sostenn lit-Turkija mill-Istrument għall-Assistenza ta’ Qabel l-Adeżjoni (IPA II), mat-tisħiħ tal-Istrument Ewropew tal-Viċinat (SEV) u tal-Għajnuna Umanitarja għal azzjonijiet urġenti oħra u mmodifikar tat-tabella tal-persunal tal-Aġenzija Eżekuttiva għall-Innovazzjoni u n-Netwerks (INEA) fil-kuntest tal-inizjattiva WiFi4EU

Wara li kkunsidrat:

–it-Trattat dwar il-Funzjonament tal-Unjoni Ewropea, u b’mod partikolari l-Artikolu 314 tiegħu, flimkien mat-Trattat li jistabbilixxi l-Komunità Ewropea tal-Enerġija Atomika, u b’mod partikolari l-Artikolu 106a tiegħu,

–ir-Regolament (UE, Euratom) Nru 966/2012 tal-Parlament Ewropew u tal-Kunsill tal-25 ta’ Ottubru 2012 dwar ir-regoli finanzjarji applikabbli għall-baġit ġenerali tal-Unjoni 1 , u b’mod partikolari l-Artikolu 41 tiegħu,

–il-baġit ġenerali tal-Unjoni Ewropea għas-sena finanzjarja 2018, kif adottat fit-30 ta’ Novembru 2017 2 ,

–il-baġit emendatorju Nru 1/2018 3 , adottat fit-30 ta’ Mejju 2018,

–il-baġit emendatorju Nru 2/2018 4 , adottat fl-4 ta’ Lulju 2018,

–il-baġit emendatorju Nru 3/2018 5 , adottat fl-4 ta’ Lulju 2018,

–l-abbozz ta’ baġit emendatorju Nru 4/2018 6 , adottat fil-31 ta’ Mejju 2018.

Il-Kummissjoni Ewropea b’dan tippreżenta l-abbozz ta’ baġit emendatorju Nru 5 tal-baġit ġenerali 2018 lill-Parlament Ewropew u lill-Kunsill.

BIDLIET FID-DIKJARAZZJONI TAD-DĦUL U N-NEFQA TAQSIMA B’TAQSIMA

Il-bidliet fid-dikjarazzjoni tad-dħul u n-nefqa taqsima b’taqsima huma disponibbli fil-EUR-Lex ( http://eur-lex.europa.eu/budget/www/index-mt.htm ). Il-verżjoni bl-Ingliż tal-bidliet f’din id-dikjarazzjoni hija mehmuża għall-informazzjoni bħala anness baġitarju.

WERREJ

1.    Introduzzjoni    

2.    Kanċellazzjoni tar-riżerva relatata mas-sostenn lit-Turkija mill-Istrument għall-Assistenza ta’ Qabel l-Adeżjoni (IPA II)    

3.    Tisħiħ tal-Istrument Ewropew tal-Viċinat (SEV) f’approprjazzjonijiet ta’ impenn    

4.    Tisħiħ tal-Għajnuna Umanitarja f’approprjazzjonijiet ta’ pagament    

5.    Inizjattiva WiFi4EU – Tisħiħ tat-tabella tal-persunal tal-Aġenzija Eżekuttiva għall-Innovazzjoni u n-Netwerks (INEA)    

6.    Tabella sommarja skont l-intestatura tal-QFP    

1.Introduzzjoni

L-Abbozz ta’ Baġit Emendatorju (ABE) Nru 5 għas-sena 2018 għandu l-għan:

-Li jikkanċella, kemm f’approprjazzjonijiet ta’ impenn kif ukoll f’approprjazzjonijiet ta’ pagament, ir-riżerva relatata mas-sostenn lit-Turkija mill-Istrument għall-Assistenza ta’ Qabel l-Adeżjoni (IPA II) peress li l-kundizzjoni stabbilita mill-Parlament Ewropew u mill-Kunsill għat-tneħħija tagħha ma ġietx issodisfata.

-Li jsaħħaħ, f’approprjazzjonijiet ta’ impenn, l-Istrument Ewropew tal-Viċinat (SEV) biex jiffinanzja azzjonijiet addizzjonali marbuta mar-rotta migratorja tal-Mediterran Ċentrali u biex jissodisfa parti mill-wegħda li saret fil-konferenza Brussell II tal-24 u l-25 ta’ April 2018 “Appoġġ għall-futur tas-Sirja u tar-reġjun”.

-Li jsaħħaħ, f’approprjazzjonijiet ta’ pagament, l-Għajnuna Umanitarja biex jiġu koperti l-ħtiġijiet f’pagamenti ta’ prefinanzjament bħala riżultat tat-tisħiħ f’approprjazzjonijiet ta’ pagament, li ġie deċiż fi tmiem l-2017, mir-Riżerva ta’ Għajnuna f’Emerġenza u bħala parti mit-trasferiment ta’ tmiem is-sena.

-Li jimmodifika t-tabella tal-persunal tal-Aġenzija Eżekuttiva għall-Innovazzjoni u n-Netwerks (INEA) fil-kuntest tal-inizjattiva WiFi4EU.

B’mod kumplessiv, dan il-baġit emendatorju huwa newtrali.

2.    Kanċellazzjoni tar-riżerva relatata mas-sostenn lit-Turkija mill-Istrument għall-Assistenza ta’ Qabel l-Adeżjoni (IPA II)

Fil-kuntest tal-proċedura baġitarja 2018, il-Parlament Ewropew u l-Kunsill iddeċidew li jqiegħdu f’riżerva EUR 70 miljun f’approprjazzjonijiet ta’ impenn u EUR 35 miljun f’approprjazzjonijiet ta’ pagament fuq il-partita tal-baġit 22 02 03 01 Sostenn għar-riformi politiki u allinjament progressiv relatat mal-acquis tal-Unjoni. Din il-partita tal-baġit hija relatata mas-sostenn lit-Turkija mill-Istrument għall-Assistenza ta’ Qabel l-Adeżjoni (IPA II).

Il-kundizzjoni stabbilita għar-rilaxx ta’ dawn l-ammonti hija kif ġej: “(...) meta t-Turkija tagħmel titjib suffiċjenti u kwantifikabbli fl-oqsma tal-istat tad-dritt, id-demokrazija, id-drittijiet tal-bniedem u l-libertà tal-istampa, skont ir-rapport annwali tal-Kummissjoni”.

Ir-rapport annwali tal-Kummissjoni dwar it-Turkija, li ġie ppubblikat fis-17 ta’ April 2018 7 , huwa inekwivokabbli fis-sejbiet tiegħu li ma kien hemm l-ebda titjib kwantifikabbli u li, pjuttost it-Turkija qed tkompli titbiegħed mill-Ewropa, speċjalment fir-rigward tan-nuqqas kontinwu ta’ passi ’l quddiem fil-qasam tal-istat ta’ dritt, id-demokrazija u d-drittijiet tal-bniedem. L-istat ta’ emerġenza attwali ddikjarat malli kien hemm it-tentattiv ta’ kolp ta’ stat fil-15 ta’ Lulju 2016 u l-ambitu ta’ azzjonijiet li ttieħdu f’dan l-istat wasslu għal tnaqqis qawwi tad-drittijiet ċivili u politiċi inklużi l-libertà tal-espressjoni u l-libertà tal-għaqda. L-indipendenza tal-ġudikatura u d-dritt għal proċess ġust ġew imminati ferm filwaqt li s-soċjetà ċivili kulma jmur kienet taħt pressjoni dejjem tiżdied. Mill-introduzzjoni tal-istat ta’ emerġenza ’l hawn, iktar minn 150 000 persuna ġew arrestati, inklużi iktar minn 150 ġurnalista.

Mill-pubblikazzjoni tar-rapport annwali ’l hawn, ma kien hemm l-ebda bidla fix-xejriet imsemmija hawn fuq.

Għalhekk, il-kundizzjoni stabbilita mill-Parlament Ewropew u mill-Kunsill ma ġietx issodisfata u b’konsegwenza ta’ dan ġie propost li jiġu kkanċellati għalkollox l-ammonti relatati f’riżerva, kemm f’approprjazzjonijiet ta’ impenn u kemm f’approprjazzjonijiet ta’ pagament, kif ukoll il-kummenti baġitarji relatati, u li minflok ikun hemm żieda fl-Istrument Ewropew tal-Viċinat (SEV) u fl-Għajnuna Umanitarja.

3.    Tisħiħ tal-Istrument Ewropew tal-Viċinat (SEV) f’approprjazzjonijiet ta’ impenn

Il-Kummissjoni tipproponi li ssaħħaħ l-Istrument Ewropew tal-Viċinat (SEV) b’EUR 70 miljun f’approprjazzjonijiet ta’ impenn sabiex jiffinanzja azzjonijiet addizzjonali urġenti marbuta mar-rotta migratorja tal-Mediterran Ċentrali u biex jissodisfa parti mill-wegħda li saret fil-konferenza Brussell II tal-24 u l-25 ta’ April 2018 “Appoġġ għall-futur tas-Sirja u tar-reġjun”. Għal dan l-għan, il-fondi se jiġu allokati lit-taqsima tat-Tramuntana tal-Afrika tal-Fond Fiduċjarju tal-UE għall-Afrika u tal-Fond Fiduċjarju tal-UE Madad (għas-Sirja).

Se jiġu ttrasferiti EUR 28 miljun lit-taqsima tat-Tramuntana tal-Afrika tal-Fond Fiduċjarju tal-UE għall-Afrika sabiex jikkontribwixxu biex jagħmlu tajjeb għad-diskrepanza fil-finanzjament ta’ EUR 225 miljun li ġiet identifikata għall-2018-2019 u li ġiet ikkonfermata fl-aħħar żewġ rapporti ta’ progress dwar l-Implimentazzjoni tal-Aġenda Ewropea dwar il-Migrazzjoni 8 . Fil-każ tal-Libja, il-finanzjament addizzjonali jkun relatat b’mod prinċipali mar-ritorn volontarju ta’ migranti vulnerabbli maqbudin. Barra minn hekk, minkejja n-nuqqas kumplessiv ta’ qsim illegali tal-fruntieri fl-2018, iċ-ċaqliq mill-Marokk u mit-Tuneżija lejn l-Ewropa qed jiżdied u jeħtieġ sostenn imġedded għall-kawżi ewlenin tal-migrazzjoni irregolari fit-Tuneżija u għall-implimentazzjoni effettiva tal-istrateġija ta’ integrazzjoni tal-Marokk.

EUR 42 miljun jiġu ttrasferiti lill-Fond Fiduċjarju Reġjonali tal-UE b’Reazzjoni għall-Kriżi Sirjana, il-“Fond Fiduċjarju tal-UE Madad”, sabiex jiġi ffinanzjat parti minn pakkett ta’ azzjonijiet għar-refuġjati Sirjani fil-Ġordan relatat mal-protezzjoni soċjali, l-edukazzjoni għolja, l-għajxien u s-saħħa, li jrid jiġi adottat mill-Bord Operattiv tal-Fond Fiduċjarju f’Diċembru 2018.

Fl-2018 mhi meħtieġa l-ebda approprjazzjoni addizzjonali ta’ pagament għal dawn l-azzjonijiet.

4.Tisħiħ tal-Għajnuna Umanitarja f’approprjazzjonijiet ta’ pagament

Il-Kummissjoni tipproponi li ssaħħaħ l-Għajnuna Umanitarja b’EUR 35 miljun f’approprjazzjonijiet ta’ pagament sabiex jiġu ssodisfati l-ħtiġijiet ta’ pagament li tfaċċaw minħabba t-tisħiħ baġitarju f’approprjazzjonijiet ta’ impenn fi tmiem l-2017:

·EUR 102 miljun mir-Riżerva ta’ Għajnuna f’Emerġenza u riallokazzjonijiet oħra; u

·EUR 22,8 miljun permezz tat-trasferiment ta’ tmiem is-sena għall-Għajnuna Umanitarja skont l-Artikolu 26(2) tar-Regolament Finanzjarju.

Dan it-tisħiħ ma kinux jinkludu l-approprjazzjonijiet ta’ pagament korrispondenti peress li parti biss mill-kuntrattar kien sar fl-2017 u setgħu jiġu koperti mill-approprjazzjonijiet eżistenti ta’ pagament fl-2017. Peress li l-kumplament tal-kuntratti qed jiġu ffirmati fl-2018 u minħabba li l-livell attwali ta’ approprjazzjonijiet ta’ pagament fil-baġit 2018 mhuwiex suffiċjenti biex ikopri l-pagamenti ta’ prefinanzjament relatati, huma meħtieġa approprjazzjonijiet addizzjonali ta’ pagament.

Għalhekk, qed tiġi proposta żieda ta’ EUR 35 miljun f’approprjazzjonijiet ta’ pagament fl-artikolu baġitarju 23 02 01 Konsenja ta’ għajnuna umanitarja u assistenza alimentari rapidi, effikaċi u bżonnjużi.

5.Inizjattiva WiFi4EU – Tisħiħ tat-tabella tal-persunal tal-Aġenzija Eżekuttiva għall-Innovazzjoni u n-Netwerks (INEA)

L-inizjattiva WiFi4EU għandha l-għan li tippromwovi l-konnettività tal-internet fil-komunitajiet lokali 9 . Tissawwar fl-għamla ta’ skema ta’ vawċers bl-objettiv li tipprovdi aċċess għall-internet ta’ kwalità għolja, mingħajr ħlas u mingħajr kundizzjonijiet diskriminatorji, lir-residenti u lill-viżitaturi fiċ-ċentri tal-ħajja pubblika lokali. B’hekk, il-korpi tas-settur pubbliku – u b’mod iktar speċifiku l-muniċipalitajiet – se jkollhom is-setgħa li jinstallaw hotspots pubbliċi tal-Wi-Fi fi spazji pubbliċi ġewwa jew fil-beraħ, bħal fil-muniċipju, il-libreriji pubbliċi, il-mużewijiet u ċ-ċentri tas-saħħa f’madwar 6 000 sa 8 000 komunità fl-Ewropa kollha sal-2020. Se tiffaċilita wkoll l-aċċess ta’ dawn il-komunitajiet lokali għal servizzi online, bħas-Saħħa Elettronika, il-Gvern Elettroniku, it-Turiżmu Elettroniku, eċċ., u eventwalment se toffri servizz ta’ roaming bejn il-hotspots WiFi4EU għall-utenti finali.

Fir-rigward tad-Deċiżjoni tal-Kummissjoni C(2018)1281 tas-27 ta’ Frar 2018 li tiddelega l-implimentazzjoni tal-inizjattiva lill-Aġenzija Eżekuttiva għall-Innovazzjoni u n-Netwerks (INEA), jenħtieġ li l-Aġenzija jkollha livell adegwat ta’ riżorsi umani biex twettaq il-kompiti l-ġodda tagħha. Kif previst fl-analiżi tal-kostijiet u tal-benefiċċji u kif indikat 10 fid-dikjarazzjoni finanzjarja mehmuża mad-Deċiżjoni, it-tabella tal-persunal tal-2018 tal-Aġenzija jeħtieġ li tiġi emendata biex tiżdied kariga waħda ta’ aġent temporanju fi grad AD7.

Din l-emenda, li żżid l-għadd totali ta’ karigi ta’ INEA minn 71 għal 72, tista’ tiġi ffinanzjata fil-baġit tal-Aġenzija għal din is-sena. B’konsegwenza ta’ dan, mhuwiex meħtieġ tisħiħ tas-sussidju tal-UE lil din l-aġenzija eżekuttiva.

It-tabella tal-persunal aġġornata hija stabbilita fl-anness baġitarju.

6.Tabella sommarja skont l-intestatura tal-QFP

(1)      ĠU L 298, 26.10.2012, p. 1.

(2)      ĠU L 57, 28.2.2018, p. 1.

(3)      ĠU L XXX, XX.XX.2018.

(4)      ĠU L XXX, XX.XX.2018 [COM(2018) 227].

(5)      ĠU L XXX, XX.XX.2018 [COM(2018) 310].

(6)      COM(2018) 361.

(7)      COM(2018) 450, SWD(2018) 153.

(8)    COM(2018) 250, 14.3.2018 u COM(2018) 301, 16.5.2018.

(9)      Ir-Regolament (UE) 2017/1953 tal-Parlament Ewropew u tal-Kunsill tal-25 ta' Ottubru 2017 li jemenda r-Regolamenti (UE) Nru 1316/2013 u (UE) Nru 283/2014 fir-rigward tal-promozzjoni tal-konnettività tal-internet fil-komunitajiet lokali.

(10)      Id-delega ġiet aċċettata mid-Direttur tal-Aġenzija mill-1 ta’ Mejju 2018.