Opinjoni tal-Kumitat Ekonomiku u Soċjali Ewropew dwar “Proposta għal Regolament tal-Parlament Ewropew u tal-Kunsill dwar il-Gwardja Ewropea tal-Fruntiera u tal-Kosta u li jħassar l-Azzjoni Konġunta tal-Kunsill Nru 98/700/ĠAI, ir-Regolament (UE) Nru 1052/2013 tal-Parlament Ewropew u tal-Kunsill u r-Regolament (UE) 2016/1624 tal-Parlament Ewropew u tal-Kunsill”

Kontribut tal-Kummissjoni Ewropea għal-Laqgħa tal-Mexxejja f’Salzburg fid-19-20 ta’ Settembru 2018

(COM(2018) 631 final — 2018/0330 (COD))

(2019/C 110/12)

Relatur ġenerali:

Antonello PEZZINI

Konsultazzjoni	Kummissjoni, 29.10.2018 Parlament Ewropew, 22.10.2018
Bażi legali	L-Artikolu 304 tat-TFUE
Sezzjoni kompetenti	Sezzjoni Speċjalizzata għax-Xogħol, l-Affarijiet Soċjali u ċ-Ċittadinanza
Adottata fil-plenarja	12.12.2018
Sessjoni plenarja Nru	539
Riżultat tal-votazzjoni (favur/kontra/astensjonijiet)	127/1/5

1.   Konklużjonijiet u rakkomandazzjonijiet

1.1.

Il-Kumitat huwa konvint li f’żona ta’ moviment liberu l-fruntieri esterni jsiru fruntieri komuni u min jidħol fi kwalunkwe parti tat-territorju tal-Unjoni jidħol fl-ispazju komuni ta’ libertà, sigurtà u ġustizzja tal-Unjoni Ewropea, bid-drittijiet u d-dmirijiet kollha li dan jinvolvi, għaċ-ċittadini u għall-istituzzjonijiet nazzjonali u Ewropej.

1.2.

Il-KESE jappella bil-qawwa għat-titjib fil-ġestjoni tal-migrazzjoni, bi sforz komuni mal-Istati Membri biex jiġu indirizzati l-kawżi fundamentali li jġiegħlu lill-persuni jfittxu ħajja aħjar, barra minn pajjiżhom.

1.3.

Il-KESE jirrakkomanda li, fin-nuqqas ta’ qafas stabbilit u kondiviż mal-Istati Membri kollha dwar politika komuni fil-qasam tal-migrazzjoni u tal-għajnuna għall-iżvilupp fil-pajjiżi ta’ emigrazzjoni, għandha titħalla barra d-delega ta’ setgħat lill-Kummissjoni biex tadotta atti ta’ definizzjoni b’mod awtonomu.

1.4.

Il-KESE jappoġġja bil-qawwa l-proposta biex l-Aġenzija tingħata fergħa operattiva permanenti tagħha stess, li tkun tikkonsisti minn 10 000 persuna, u li b’hekk f’kooperazzjoni mal-Istati Membri jkollha l-kapaċità meħtieġa biex: — tħares il-fruntieri esterni tal-UE, — tipprevjeni l-movimenti irregolari, — timmaniġġja l-migrazzjonijiet legali, — timplimenta b’mod effettiv ir-ritorn tal-migranti irregolari.

1.5.

Il-Kumitat jirrakkomanda li l-kooperazzjoni meħtieġa bejn l-Aġenzija u l-amministrazzjonijiet nazzjonali, li tradizzjonalment huma responsabbli għall-kontroll tal-fruntieri, tkun definita u organizzata fil-livell Ewropew.

1.6.

Skont il-KESE huwa daqstant ieħor importanti li definizzjoni ċara u aċċettata b’mod wiesa’ tal-missjonijiet tal-Aġenzija tkun tevita duplikazzjoni u konflitti ta’ kompetenza, u jappella biex il-katina ta’ tmexxija bejn l-uffiċjali inkarigati mill-Aġenzija u l-uffiċjali nazzjonali tkun stabbilita b’mod trasparenti u ċar.

1.7.

Il-KESE jirrakkomanda li f’każijiet ta’ sfidi speċifiċi u sproporzjonati fil-fruntieri esterni, l-Aġenzija għandha tkun tista’ tintervjeni, fuq talba tal-Istat Membru kkonċernat, billi torganizza u tikkoordina interventi rapidi fil-fruntieri billi tibgħat – bi qbil u b’koordinazzjoni mal-Istat ikkonċernat, li għandu jżomm il-kontroll u r-responsabbiltà għall-ġestjoni – timijiet tal-korp permanenti mgħammra b’apparat modern tagħhom stess.

1.8.

Il-KESE jaqbel mar-rakkomandazzjonijiet fir-rigward tal-persunal tal-Aġenzija, kemm fir-rigward “tar-rispett għall-ħajja tal-bniedem” u l-limitazzjonijiet fuq l-użu ta’ armi tan-nar, kif ukoll fir-rigward tar-rifjut jew tal-għoti ta’ viżi fil-fruntiera, peress li t-tnejn huma prerogattivi importanti tal-amministrazzjonijiet responsabbli għall-ordni pubbliku fl-Istati Membri.

1.8.1.

F’dan ir-rigward, il-Kumitat jirrakkomanda li l-prinċipju tas-sussidjarjetà jkun jista’ jiġi invokat fiż-żewġ każijiet mill-Istati Membri u li r-Regolamenti tal-Persunal tal-Aġenzija jimponu livell għoli ta’ obbligi, speċjalment għad-dmirijiet ta’ kunfidenzjalità.

1.9.

Il-KESE jirrakkomanda bil-qawwa l-approfondiment tal-mekkaniżmi msemmija fl-Anness V, tal-Kapitolu 3 tal-proposta, f’każ ta’ nonkonformità min-naħa tal-persunal. Il-mekkaniżmi għandhom jipprevedu r-rinviju quddiem il-qrati tal-Unjoni.

1.10.

Minħabba r-rwol li se jiġu assenjat lill-Aġenzija, f’każ ta’ detenzjoni ta’ persuni u r-rimpatriju eventwali tagħhom lejn il-pajjiżi ta’ oriġini, il-Kumitat jirrakkomanda li għall-persunal statutorju jiġu żgurati moduli ta’ taħriġ immirati lejn ir-rispett tad-drittijiet fundamentali.

1.11.

Il-KESE jqis li huwa kruċjali li l-Aġenzija tiddedika proporzjon sinifikanti tal-baġit tagħha għall-immodernizzar tat-tagħmir tagħha.

1.12.

Skont il-KESE, iċ-ċiklu politiku strateġiku pluriennali għall-ġestjoni Ewropea integrata tal-fruntieri, jeħtieġ ikun ddefinit mill-PE u mill-Kunsill, wara konsultazzjoni mal-Kumitat, filwaqt li l-ippjanar annwali għandu jiġi ddelegat lill-Gwardja tal-Fruntiera u tal-Kosta, bl-obbligu li jingħata rendikont annwali dwar l-azzjonijiet konklużi, il-bilanċi impenjati u l-miżuri implimentati.

1.13.

Fir-rigward tal-kooperazzjoni internazzjonali, il-Kumitat jirrakkomanda li jkun hemm rabta mill-qrib bejn l-azzjonijiet taħt ir-Regolament propost, u l-iżvilupp ta’ politiki rilevanti oħrajn, b’mod partikolari permezz tal-Ftehim ta’ Cotonou.

1.14.

Il-Kumitat jirrakkomanda li jissaħħaħ il-Forum konsultattiv li jassisti lill-Aġenzija bil-parteċipazzjoni ta’ organizzazzjonijiet rilevanti, u jitlob li s-soċjetà ċivili organizzata tkun assoċjata mal-attivitajiet tal-Forum, permezz tal-KESE.

2.   Introduzzjoni

2.1.

Fi spazju ta’ moviment liberu, il-fruntieri esterni jsiru fruntieri komuni li llum huma itwal minn 50 000 kilometru, bil-konsegwenza li problema ta’ sigurtà fi Stat Membru jew fil-fruntieri esterni tiegħu tista’ taffettwa lill-Istati Membri kollha.

2.1.1.

Għalhekk il-fiduċja reċiproka hija l-bażi ta’ spazju komuni ta’ libertà, sigurtà u ġustizzja, speċjalment quddiem sfidi ġodda, theddid mifrux u fenomeni imprevedibbli, li jirrikjedu: kooperazzjoni akbar; interventi ta’ riżorsi kwalifikati; informazzjoni mtejba; essenzjalment, hija meħtieġa solidarjetà konkreta, li tgħaqqad u ssaħħaħ il-ġabra tal-valuri ta’ kull Stat individwali.

2.2.

Fit-Trattat ta’ Lisbona, ir-regolamentazzjoni tal-fruntieri hija pprevista fit-Tielet Parti tat-Titolu V tat-TFUE, fil-Kapitolu dwar il-politiki dwar il-viżi, l-asil u l-immigrazzjoni, bl-għan li tinħoloq “sistema integrata ta’ ġestjoni għall-fruntieri esterni”, kif previst mill-Artikolu 77(1)(c) tat-TFUE u din ir-regolamentazzjoni għandha l-għan li toħloq “Spazju ta’ libertà, sigurtà u ġustizzja”.

2.3.

Mill-istess qari tat-Trattati, huwa ċar li l-moviment liberu taċ-ċittadini fl-Unjoni, jeħtieġ ikun akkumpanjat minn politika komuni dwar il-ġestjoni u l-kontroll tal-persuni li jkunu ġejjin minn pajjiżi terzi.

2.3.1.

Estensjoni ulterjuri tal-kontrolli attwali u li mhumiex suffiċjenti fil-fruntieri esterni, jew l-introduzzjoni mill-ġdid ta’ kontrolli interni ġodda oħrajn, joħolqu spejjeż ekonomiċi kbar għall-UE kollha, li jagħmlu ħsara serja lis-suq uniku, li jirrappreżenta wieħed mill-aqwa suċċessi tal-integrazzjoni Ewropea.

2.4.

Il-ġestjoni Ewropea integrata tal-fruntieri, ibbażata fuq il-mudell ta’ kontroll tal-aċċess fuq erba’ livelli, tinkludi: — miżuri fil-pajjiżi terzi, bħal dawk previsti taħt il-politika komuni tal-viżi, — miżuri ma’ pajjiżi terzi ġirien, — miżuri għal kontroll akbar u aħjar fil-fruntieri esterni, — analiżi tar-riskji u l-miżuri fiż-żona Schengen u r-rimpatriju.

2.5.

Wara li l-ewwel nħoloq netwerk magħmul minn esperti nazzjonali, taħt il-patroċinju ta’ korp komuni ta’ esperti msejjaħ SCIFA (1) fl-2002-2003, ġiet stabbilita l-Aġenzija Ewropea ta’ Koordinazzjoni għall-kontroll fil-fruntieri, jiġifieri l-Frontex (2).

2.6.

L-Aġenzija ta’ koordinazzjoni ġiet sostitwita fl-2016 (3), fuq l-esperjenza tal-Aġenzija Ewropea għall-Gwardja tal-Fruntiera u tal-Kosta, bl-għan li jittejjeb il-kontroll fil-fruntieri esterni tal-Istati Membri u taż-żona Schengen, sabiex: — tipprovdi għal valutazzjoni tal-vulnerabbiltà tal-kapaċità tal-persuni tal-Istati Membri fil-kontroll tal-fruntieri; — torganizza operazzjonijiet konġunti u interventi rapidi fil-fruntieri biex tissaħħaħ il-kapaċità tal-Istati Membri li jikkontrollaw il-fruntieri esterni, u li jindirizzaw sfidi kkawżati mill-immigrazzjoni illegali jew mill-kriminalità organizzata; — tassisti lill-Kummissjoni fil-koordinazzjoni tat-timijiet ta’ appoġġ meta Stat Membru jiffaċċja pressjonijiet migratorji sproporzjonati f’żoni partikolari fil-fruntiera esterna; — tiżgura rispons prattiku f’każijiet li jkunu jeħtieġu azzjoni urġenti fil-fruntieri esterni; — tipprovdi assistenza teknika u operattiva biex jiġu appoġġjati operazzjonijiet ta’ tiftix u salvataġġ għal persuni fil-periklu fuq il-baħar waqt operazzjonijiet ta’ sorveljanza tal-fruntieri; — tikkontribwixxi għall-ħolqien ta’ riżerva ta’ intervent rapidu ta’ mill-inqas 1 500 gwardja tal-fruntiera; — taħtar uffiċjali ta’ kollegament tal-Aġenzija fl-Istati Membri; — torganizza, tikkoordina u twettaq operazzjonijiet u interventi ta’ rimpatriju; — tippromovi l-kooperazzjoni operattiva bejn l-Istati Membri u pajjiżi terzi dwar il-ġestjoni tal-fruntiera.

2.7.

Minn meta ġiet stabbilita f’Ottubru 2016, l-Aġenzija Ewropea tal-Gwardja tal-Fruntiera u tal-Kosta saret ċentru tal-UE għar-rimpatriju (4) li kapaċi tappoġġja b’mod effettiv lill-Istati Membri fir-ritorn ta’ dawk li ma għandhom ebda dritt li jibqgħu fl-UE.

2.8.

Il-Parlament Ewropew tkellem dwar il-kwistjoni f’diversi riżoluzzjonijiet u esprima “tħassib kbir dwar l-implimentazzjoni tar-Regolament dwar il-Gwardja Ewropea tal-Fruntiera u tal-Kosta (UE) 2016/1624)” u tenna “li l-operazzjonijiet bi skopijiet multipli għandhom jitmexxew mill-Aġenzija Ewropea għall-Gwardja tal-Fruntiera u tal-Kosta bl-għan li jirreaġixxu għall-ħtieġa li jkunu preżenti l-assi marittimi ta’ tiftix u salvataġġ (5), kif ukoll għall-ħtieġa li tiġi żgurata l-implimentazzjoni sħiħa tal-istrateġija tal-ġestjoni integrata tal-fruntieri.

2.9.

Il-Kumitat adotta riżoluzzjoni (6) favur iż-żona Schengen fejn stieden lill-Kunsill u lill-Istati Membri jiżguraw it-tħaddim tal-libertà tal-moviment, u enfasizza, f’waħda mill-Opinjonijiet tiegħu (7), il-ħtieġa li “(Frontex) tkun akkumpanjata minn titjib fit-trasparenza fir-rigward tal-governanza tagħha, l-azzjonijiet tagħha u l-kapaċità tagħha li tagħti rendikont”.

2.10.

Il-KESE enfasizza wkoll (8) il-ħtieġa li tittejjeb “il-kooperazzjoni bejn l-Aġenzija Frontex u l-awtoritajiet nazzjonali”, “il-koordinazzjoni bejn id-diversi aġenziji u istituzzjonijiet li huma kompetenti fil-qasam tal-kontroll tal-fruntieri, tas-sorveljanza tal-kosta, tas-sigurtà marittima, tas-salvataġġ fuq il-baħar, tad-dwana u tas-sajd” u enfasizza li jkun ta’ benefiċċju jekk “il-ġestjoni tal-fruntieri esterni jekk tiġi adottata b’mod parallel ma’ reviżjoni tas-Sistema Ewropea Komuni tal-Asil”.

2.11.

“Meta persuni jkunu f’sitwazzjoni ta’ riskju għal ħajjithom jew għas-sigurtà tagħhom fil-fruntieri esterni tal-Unjoni, kemm dawk marittimi kif ukoll dawk tal-art, l-ewwel obbligu tal-gwardja tal-fruntiera u ta’ korpi oħrajn li jaħdmu fuq il-post huwa li jsalvawhom u jgħinuhom kif ikun xieraq” (9).

2.12.

Kif jidher ċar kemm fl-Aġenda tal-UE dwar il-Migrazzjoni kif ukoll fil-Global Compact for Safe, Orderly and Regular Migration (10) (Patt Globali għal Migrazzjoni Mingħajr periklu, f’Ordni u Regolari), il-KESE jenfasizza bil-qawwa l-ħtieġa li tittejjeb il-ġestjoni tal-migrazzjoni billi jiġu indirizzati l-“kawżi primarji li jħeġġu lin-nies biex ifittxu ħajja f’post ieħor”.

3.   Il-proposti tal-Kummissjoni

3.1.

Il-proposta tal-KE għandha l-għan li tirriforma l-Gwardja Ewropea tal-Fruntiera u tal-Kosta, billi tistabbilixxi l-kapaċitajiet ġodda tal-Aġenzija, b’mod partikolari billi tipprevedi korp permanenti tal-Gwardja Ewropea tal-Fruntiera u tal-Kosta u l-akkwist ta’ tagħmir li jkun tal-Aġenzija stess, biex tkun tista’ twettaq kompiti oħrajn, ġodda u potenzjali, b’mod adegwat.

3.2.

Abbażi tal-ispejjeż totali tal-mandat attwali u futur ta’ EUR 1,22 biljun, għall-perjodu 2019-2020 u ta’ EUR 11,27-il biljun għall-perjodu 2021-2027, il-Kummissjoni qed tipproponi li tistabbilixxi korp permanenti għall-Gwardja Ewropea tal-Fruntiera u tal-Kosta, b’setgħat eżekuttivi u magħmul minn persunal operattiv (11) ta’ 10 000 membru, sal-2020, biex l-Aġenzija jkollha fergħa operattiva, effikaċi u flessibbli sabiex tadatta l-impenn tal-Aġenzija skont il-ħtiġijiet operattivi.

3.3.

Il-ħolqien tal-korp permanenti għandu jsib postu f’Gwardja Ewropea tal-Fruntiera u tal-Kosta li taħdem sew u li fiha l-Istati Membri, l-Unjoni u l-aġenziji tal-UE (12), b’mod partikolari l-Aġenzija Ewropea għall-Gwardja tal-Fruntiera u tal-Kosta, għandhom ikunu kkoordinati kif xieraq u jikkontribwixxu għall-kisba ta’ għanijiet politiċi komuni u kondiviżi.

3.4.

Il-proposti jeskludu mill-kamp ta’ applikazzjoni tagħhom ir-Renju tad-Danimarka, l-Irlanda u r-Renju Unit (ħlief kooperazzjoni possibbli li għandha tiġi definita) filwaqt li l-applikazzjoni tagħhom tiġi sospiża għal Ġibiltà. Però l-proposti huma estiżi għall-Iżlanda, ir-Renju tan-Norveġja, il-Konfederazzjoni Żvizzera u l-Prinċipalità ta’ Liechtenstein, fir-rigward tal-iżvilupp tar-regoli ta’ Schengen.

4.   Kummenti ġenerali

4.1.

Il-Kumitat huwa konvint li f’żona ta’ moviment liberu l-fruntieri esterni jeħtieġ jitqiesu bħala fruntieri komuni u min jidħol fi kwalunkwe parti tat-territorju tal-Unjoni jidħol fl-ispazju komuni ta’ libertà, sigurtà u ġustizzja, bid-drittijiet u d-dmirijiet kollha li dan jinvolvi.

4.2.

Il-KESE jemmen li nħela wisq żmien għall-implimentazzjoni tas-sistema integrata ta’ ġestjoni tal-fruntieri esterni, kif previst fl-Artikolu 77(2)(d) tat-TFUE, b’mod konsistenti ma’ definizzjoni definittiva miftiehma bejn l-Istati Membri kollha.

4.3.

Il-Kumitat jaqbel mal-għan li l-UE jista’ jkollha l-kapaċitajiet meħtieġa biex tipproteġi l-fruntieri esterni, tipprevjeni l-movimenti sekondarji u twettaq b’mod effikaċi ir-rimpatriju tal-migranti irregolari, meta l-Aġenzija tingħata fergħa operattiva li tkun tagħha stess u konsistenti.

4.4.

Il-Kumitat kien l-ewwel istituzzjoni li ppropona l-ħolqien ta’ Gwardja Ewropea tal-Fruntiera u tal-Kosta (13) u jappoġġja bis-sħiħ dan l-objettiv biex il-fruntieri esterni jkunu siguri, permezz ta’ korp permanenti u ġestjoni Ewropea effettiva u integrata tal-fruntieri esterni. Fi spirtu ta’ responsabbiltà kondiviża, l-Aġenzija, għandha twettaq rwol ta’ monitoraġġ regolari tal-gestjoni tal-fruntieri esterni, mhux biss permezz tal-għarfien tas-sitwazzjoni u l-analiżi tar-riskji, iżda wkoll permezz tal-preżenza ta’ persunal espert tagħha fl-Istati Membri.

4.5.

Il-KESE jemmen li f’każijiet ta’ sfidi speċifiċi u sproporzjonati fil-fruntieri esterni, l-Aġenzija għandha tkun tista’ tintervjeni, fuq talba ta’ Stat Membru, billi torganizza u tikkoordina interventi rapidi fil-fruntieri billi tibgħat – bi qbil u b’koordinazzjoni mal-Istat Membru kkonċernat, li għandu jibqa’ responsabbli mill-ġestjoni tas-sezzjonijiet tiegħu tal-fruntieri esterni – timijiet tal-korp permanenti tal-Gwardja Ewropea tal-Fruntiera u tal-Kosta.

4.6.

Filwaqt li l-Kumitat jikkunsidra li l-interventi individwali tal-Aġenzija, fuq deċiżjoni tal-KE, huma utli, “f’sitwazzjonijiet ta’ emerġenza u skont proċedura trasparenti li tipprevedi li l-leġislaturi Ewropej (il-Parlament u l-Kunsill) jiġu infurmati minnufih” (14), iqis li huwa prematur li, fin-nuqqas ta’ qafas definit u kondiviż mill-Istati Membri kollha dwar politika dwar il-migrazzjoni tal-UE u ta’ għajnuna għall-iżvilupp fil-pajjiżi tal-emigrazzjoni, il-Kummissjoni tingħata d-delega permanenti ta’ setgħa li tadotta atti ta’ definizzjoni awtonoma tal-prijoritajiet politiċi u ta’ linji gwida strateġiċi għall-ġestjoni integrata tal-fruntieri.

4.7.

Min-naħa l-oħra l-Kumitat jaqbel li l-Kummissjoni għandha tingħata setgħat ta’ implimentazzjoni għall-manwali EUROSUR u FADO, ir-regoli komuni għall-oqfsa tas-sitwazzjonijiet u għall-ġestjoni tar-riskju, kif ukoll għall-appoġġ finanzjarju lill-korp permanenti.

4.8.

Skont il-KESE, iċ-ċiklu politiku strateġiku pluriennali għall-ġestjoni Ewropea integrata tal-fruntieri, għandu jkun ddefinit mill-PE u mill-Kunsill, wara konsultazzjoni mal-Kumitat, filwaqt li l-ippjanar annwali jiġi delegat lill-Gwardja tal-Fruntiera u tal-Kosta, skont pjan direzzjonali ddefinit mill-Bord ta’ Tmexxija tal-Aġenzija bil-kundizzjoni li jingħata rendikont annwali dwar l-azzjonijiet konklużi, il-bilanċi impenjati u l-missjonijiet mwettqa.

4.9.

Il-Kumitat iqis li huwa importanti li jissaħħaħ il-Forum konsultattiv li jgħin lid-Direttur Eżekuttiv u lill-Bord ta’ Tmexxija tal-Aġenzija fi kwistjonijiet relatati mad-drittijiet fundamentali u mal-implimentazzjoni taċ-ċiklu politiku strateġiku pluriennali, bil-parteċipazzjoni tal-Uffiċċju Ewropew ta’ Appoġġ fil-qasam tal-Asil-EASO, l-Aġenzija għad-Drittijiet Fundamentali tal-UE, tal-Kummissarju Għoli tan-NU għar-Refuġjati u ta’ organizzazzjonijiet rilevanti oħrajn u jitlob li s-soċjetà ċivili organizzata tkun assoċjata mal-attivitajiet tal-Forum, permezz tal-KESE.

5.   Kummenti speċifiċi

5.1.

Il-KESE jirrakkomanda bil-qawwa li jiġu approfonditi l-mekkaniżmi ta’ kontroll msemmija fl-Anness V b’rabta mal-użu ta’ armi tan-nar, fir-rigward tar-rifjut jew tal-għoti ta’ viżi fil-fruntiera, peress li t-tnejn huma prerogattivi importanti għall-amministrazzjonijiet responsabbli għall-ordni pubbliku fl-Istati Membri.

5.1.1.

Għandha tingħata attenzjoni simili għall-Anness III u l-Anness V biex tiġi żgurata l-koerenza bejn ir-regolamenti nazzjonali u dawk Ewropej għall-prevenzjoni ta’ mġiba differenti fost persuni li jaħdmu fl-istess post, bl-istess ħiliet u kwalifiki, iżda b’regoli differenti ta’ reklutaġġ.

5.2.

Il-livell ta’ obbligi previst fl-Istati Membri, b’mod partikolari fir-rigward tal-privatezza, għandu jkun garantit b’mod espliċitu.

5.3.

Il-KESE jemmen li minħabba l-kopreżenza ta’ korpi differenti ta’ aġenti tal-fruntiera – doganali, fitosanitarji, ta’ sigurtà, tal-finanzi, tal-immigrazzjoni u tar-rimpatriju, ta’ medjazzjoni kulturali, uffiċjali għad-drittijiet fundamentali, persunal tal-EASO, aġenti tal-ETIAS, analisti tal-EUROSUR, uffiċjali ta’ kollegament, minbarra persunal nazzjonali tal-fruntiera u dak tal-Aġenzija – huwa essenzjali li jiġu garantiti pakketti tal-UE ta’ taħriġ kontinwu bejn il-korpi u bejn l-aġenziji tal-UE (15).

5.4.

Jeħtieġ ikun żgurat ukoll li ma jkunx hemm diskriminazzjoni fit-trattament u l-kundizzjonijiet tax-xogħol bejn il-korp tal-Aġenzija u l-korpi nazzjonali, bl-istess taħriġ, ħiliet u kwalifiki, li jkunu jwettqu l-istess dmirijiet.

5.5.

Fir-rigward tal-kooperazzjoni internazzjonali, il-Kumitat jirrakkomanda rabta mill-qrib bejn l-azzjonijiet previsti mir-Regolament propost u l-politiki rilevanti oħra, kif ukoll mal-azzjonijiet dwar Ftehimiet kummerċjali u ekonomiċi u, b’mod partikolari, fl-ambitu tad-djalogu bejn l-UE u l-pajjiżi tal-AKP skont il-Ftehim ta’ Cotonou.

---

(1)  Kumitat Strateġiku dwar l-Immigrazzjoni, il-Fruntieri u l-Asil (SCIFA)

(2)  Stabbilit bir-Regolament tal-Kunsill (KE) Nru 2007/2004 (ĠU L 349, 25.11.2004, p. 1), imbagħad emendat mir-Regolamenti (KE) Nru 863/2007 tal-Parlament Ewropew u tal-Kunsill (ĠU L 199, 31.7.2007, p. 30), (UE) Nru 1168/2001 (ĠU L 304, 22.11.2011, p. 1) u (UE) Nru 1052/2013 (ĠU L 295, 6.11.2013, p. 11).

(3)  Bir-Regolament (UE) 2016/1624 tal-Parlament Ewropew u tal-Kunsill (ĠU L 251, 16.9.2016, p. 1) li daħal fis-seħħ fis-6 ta’ Ottubru 2016.

(4)  S’issa l-UE kkonkludiet 17-il ftehim ta’ riammissjoni. Il-Ftehim ta’ Cotonou, (il-qafas tal-UE ma’ 79 pajjiż tal-AKP), jinkludi wkoll dispożizzjonijiet dwar ir-rimpatriju ta’ migranti irregolari lejn il-pajjiż ta’ oriġini tagħhom.

(5)  Ir-Regolament (UE) Nru 656/2014 tal-Parlament Ewropew u tal-Kunsill (ĠU L 189, 27.6.2014, p. 93).

(6)  ĠU C 133, 14.4.2016, p. 1

(7)  ĠU C 303, 19.8.2016, p. 109

(8)  Ara n-nota 7 f’qiegħ il-paġna.

(9)  Ibidem.

(10)  Https://www.iom.int/global-compact-migration.

(11)  Il-Gwardja Ewropea tal-Fruntiera u tal-Kosta.

(12)  Ara fost l-oħrajn, l-Aġenzija Ewropea għas-Sigurtà Marittima (EMSA), l-Aġenzija Ewropea għall-Kontroll tas-Sajd (EFCA) u ċ-Ċentru Satellitari tal-Unjoni Ewropea, il-EUROPOL jew l-Aġenzija Ewropea għat-Tmexxija Operattiva tas-Sistemi tal-IT Fuq Skala Kbira fl-Ispazju ta’ Libertà, Sigurtà u Ġustizzja (EU LISA).

(13)  ĠU C 128, 18.5.2010, p. 29; ĠU C 303, 19.8.2016, p. 109; l-Opinjoni tal-KESE dwar “Fond għall-Migrazzjoni u l-Ażil (AMF) u Fond għall-Ġestjoni Integrata tal-Fruntieri” (SOC/600, ĠU C 62, 15.2.2019, p. 184).

(14)  Ara n-nota 7 f’qiegħ il-paġna.

(15)  L-Artikolu 69 jistabbilixxi il-kooperazzjoni tal-Aġenzija tal-Gwardja Ewropea tal-Fruntiera u tal-Kosta ma’ tnax-il aġenzija u servizz oħrajn tal-Unjoni.