IL-KUMMISSJONI EWROPEA

Brussell,14.9.2016

COM(2016) 605 final

2016/0282(COD)

Proposta għal

REGOLAMENT TAL-PARLAMENT EWROPEW U TAL-KUNSILL

dwar ir-regoli finanzjarji applikabbli għall-baġit ġenerali tal-Unjoni u li jemenda r-Regolament (KE) Nru 2012/2002, ir-Regolamenti (UE) Nru 1296/2013, (UE) 1301/2013, (UE) Nru 1303/2013FMT:italic, UE Nru 1304/2013, (UE) Nru 1305/2013, (UE) Nru 1306/2013, (UE) Nru 1307/2013, (UE) Nru 1308/2013, (UE) Nru 1309/2013, (UE) Nru 1316/2013FMT:italic, (UE) Nru 223/2014, (UE) Nru 283/2014FMT:italic, (UE) Nru 652/2014 tal-Parlament Ewropew u tal-Kunsill u d-Deċiżjoni Nru 541/2014/UEFMT:no
bold,font=Arial tal-Parlament Ewropew u tal-Kunsill

MEMORANDUM TA’ SPJEGAZZJONI

1.KUNTEST TAL-PROPOSTA

•Raġunijiet u għanijiet tal-proposta

Ir-Regolament Finanzjarju 1 jistabbilixxi l-prinċipji u l-proċeduri li jirregolaw l-istabbiliment u l-implimentazzjoni tal-baġit tal-UE u l-kontroll tal-fondi tal-UE. Tul l-aħħar 30 sena, l-għadd ta’ regoli finanzjarji ġenerali li jinsabu fir-Regolament Finanzjarju żdied b’ħafna 2 . Barra minn hekk, feġġew diversi regoli finanzjarji settorjali: ir-regoli għall-parteċipazzjoni fil-Programm Qafas għar-Riċerka u l-Innovazzjoni 3 , id-Dispożizzjonijiet Komuni għall-Fondi Strutturali u ta’ Investiment Ewropej 4 u r-Regoli ta’ Implimentazzjoni Komuni għall-Azzjoni Esterna 5 .

L-utenti tal-fondi tal-UE kemm-il darba lmentaw dwar il-proliferazzjoni tar-regoli kemm f’livell ġenerali kif ukoll settorjali, l-eteroġeneità tagħhom u l-kumplessità tagħhom minħabba l-fatt li jsegwu l-arkitettura tal-programm u diversi saffi ta’ kontrolli. Barra minn hekk, il-kumplessità tas-sett ta’ regoli finanzjarji żammet lura l-implimentazzjoni tal-fondi tal-UE, u żiedet l-ispiża tagħha u għamlitha suxxettibbli għal żbalji.

L-ewwel pass favur regoli finanzjarji aktar koerenti u sempliċi nkiseb fl-2012: il-Kummissjoni ressqet proposti għall-programmi koperti mill-QFP 2014-2020 li naqqsu n-numru ta’ programmi u strumenti, ġabruhom f’qafas wieħed b’regoli komuni, issimplifikaw il-proċeduri għall-applikazzjoni u għad-dikjarazzjoni tal-kostijiet mill-benefiċjarji finali, iffaċilitaw l-iskjerament ta’ strumenti finanzjarji innovattivi, awtorizzaw Fondi Fiduċjarji tal-UE u tejbu l-kosteffiċjenza tal-kontrolli. Ir-reviżjonijiet riċenti allinjaw ir-Regolament Finanzjarju fuq ir-riżultati tan-negozjati mal-QFP 2014-2020 (reviżjoni tal-2013) kif ukoll mad-Direttiva l-ġdida dwar l-Akkwist (reviżjoni tal-2015).

Madankollu, hemm lok għal iktar simplifikazzjoni. Dan huwa kkonfermat mill-esperjenza miksuba mill-2014 ’l hawn u mill-ħidma tal-Grupp ta’ Livell Għoli ta’ Esperti Indipendenti dwar is-Simplifikazzjoni tal-Monitoraġġ għall-Benefiċjarji tal-Fondi Strutturali u ta’ Investiment Ewropej 6 . Il-konsultazzjoni pubblika dwar ir-reviżjoni tar-Regolament Finanzjarju 7 turi wkoll l-aspettattivi ċari tal-partijiet ikkonċernati fil-qasam.

Għaldaqstant għandhom jissoktaw l-isforzi sabiex jitneħħew il-konġestjonijiet, jiġu żgurati sinerġiji u komplimentarjetajiet bejn il-Fondi SIE u l-fondi l-oħrajn tal-UE u titjieb l-effiċjenza tar-rekwiżiti ta’ kunsinna u ta’ kontroll. Regoli finanzjarji aktar sempliċi u flessibbli se jikkontribwixxu għall-ottimizzazzjoni tal-infiq u tal-impatt tal-QFP 2014-2020 u b'hekk jikkostitwixxu wieħed mill-elementi ewlenin tal-inizjattiva tal-Kummissjoni għal Baġit Iffokat fuq ir-Riżultati (BFOR) li għandu l-għan li jara li r-riżorsi jiġu allokati għall-prijoritajiet u li kull azzjoni tipprovdi l-aqwa prestazzjoni u valur miżjud 8 . Barra minn hekk, dan se jnaqqas il-kostijiet marbutin mal-implimentazzjoni tar-regoli tal-UE kif ukoll in-numru ta’ żbalji.

Regoli finanzjarji tal-UE aktar sempliċi u flessibbli huma fundamentali biex tissaħħaħ il-ħila tal-baġit tal-UE li jadatta għal ċirkustanzi li jinbidlu u sabiex dan iwieġeb għal żviluppi imprevisti.

Il-proposta leġislattiva attwali hija parti integrali mill-analiżi/reviżjoni ta' nofs it-terminu tal-Qafas Finanzjarju Pluriennali(QFP) 2014-2020 9 . Hija tikkontribwixxi għal tnejn mill-objettivi ewlenin tiegħu: simplifikazzjoni u flessibbiltà.

Għaldaqstant, il-Kummissjoni tipproponi f’att wieħed reviżjoni ambizzjuża tar-regoli finanzjarji ġenerali akkumpanjata minn bidliet korrispondenti fir-regoli finanzjarji settorjali stipulati fi 15-il att leġislattiv rigward il-programmi pluriennali. L-inklużjoni ta’ bidliet settorjali fl-istess proposta leġislattiva għandha l-għan li tiżgura proċess ta’ negozjar koerenti kif ukoll li tiffaċilita adozzjoni veloċi mil-leġiżlatur. Tinxteħet enfasi fuq l-oqsma ewlenin li ġejjin:

1.    Simplifikazzjoni għar-riċevituri ta’ fondi tal-UE: ħafna miżuri għandhom l-għan li jissimplifikaw il-ħajja għar-riċevituri ta’ fondi tal-UE. Huma relatati ma’ għotjiet (tneħħija tal-verifika tal-għoti mhux kumulattiv għal għotjiet ta’ valur baxx u tal-prinċipju ta’ mingħajr skop ta’ qligħ; regoli aktar sempliċi għall-valwazzjoni tal-“assistenza in natura”; rikonoxximent tax-xogħol volontarju; l-għoti ta’ għotjiet mingħajr sejħiet għal proposta b’kundizzjonijiet speċifiċi) u forom issimplifikati ta’ għotjiet (Titolu VIII).

2.    Minn diversi saffi ta’ kontrolli għal kontrodipendenza fuq l-awditjar, il-valutazzjoni jew l-awtorizzazzjoni, u l-armonizzazzjoni tal-obbligi ta’ rapportar: l-għan ta’ dawn il-miżuri huwa li jħeġġu l-akbar dipendenza possibbli fuq awditu wieħed, valutazzjoni waħda jew awtorizzazzjoni waħda (pereżempju l-konformità mal-għajnuniet mill-Istat), meta l-awditu, il-valutazzjoni jew l-awtorizzazzjoni jkunu jissodisfaw il-kundizzjonijiet neċessarji sabiex ikunu inklużi fis-sistema tal-UE. B’mod aktar ġenerali, ir-regoli għas-sħab ta’ implimentazzjoni (organizzazzjonijiet internazzjonali, BEI/FEI, banek promozzjonali nazzjonali, aġenziji nazzjonali, NGOs) ser jiġu ssimplifikati permezz ta’ dipendenza dejjem akbar fuq il-proċeduri u l-politiki tagħhom ladarba jirċievu valutazzjoni pożittiva. Il-ftehimiet qafas ta’ sħubija finanzjarja konklużi ma’ sħab fit-tul ser jippermettu li jsir progress fl-armonizzazzjoni tal-obbligi tal-awditjar, ta’ rapportar u amministrattivi oħrajn fost id-donaturi (Artikoli 122, 123 u 126 tat-Titolu V).

3.    L-awtorizzazzjoni tal-applikazzjoni ta’ sett wieħed biss ta’ regoli għal azzjonijiet ibridi jew fil-każ ta’ taħlita ta’ miżuri jew strumenti: il-proposta għandha l-għan li tikseb iktar simplifikazzjoni għal sħab l-UE permezz ta’ għadd ta’ miżuri sabiex tiġi evitata l-applikazzjoni parallela ta’ regoli u ta’ proċeduri differenti, b’mod partikolari billi tiffaċilita t-taħlita ta’ finanzjament mill-Fondi Strutturali u ta’ Investiment Ewropej (FSIE) ma’ strumenti finanzjarji u mal-Fond Ewropew għall-Investimenti Strateġiċi (Titolu V).

4.    Użu aktar effettiv tal-istrumenti finanzjarji: l-ottimizzazzjoni tal-użu tar-rimborżi minn operazzjonijiet preċedenti, l-iżgurar ta’ kundizzjonijiet ekwivalenti ta' kompetizzjoni bejn is-sħab ewlenin tal-UE fl-implimentazzjoni, it-tnaqqis ta’ rekwiżiti l-aktar ta’ piż marbutin mal-pubblikazzjoni ta’ dejta individwali tar-riċevituri finali jew mal-kriterji ta’ esklużjoni (Titolu X).

5.    Ġestjoni baġitarja aktar flessibbli: il-proposta tistabbilixxi diversi modi għal aktar flessibbiltà baġitarja, sabiex l-Unjoni tkun tista’ twieġeb għal sfidi imprevisti u kompiti ġodda b’mod aktar effettiv u sabiex tikseb immaniġġjar ta’ kriżijiet aktar veloċi - fosthom il-ħolqien ta’ “kuxin ta’ flessibbiltà” għal ħtiġijiet imprevisti u kriżijiet ġodda fil-baġit tal-istrumenti ġeografiċi għal azzjonijiet esterni, l-attivazzjoni aktar effiċjenti tal-fondi ta’ solidarjetà u ta’ aġġustament għall-globalizzazzjoni, u l-estensjoni ta’ Fondi Fiduċjarji għal politiki interni (l-Artikoli 14 u 227), il-ħolqien ta’ riżerva għall-kriżijiet tal-UE bl-użu mill-ġdid ta’ approprjazzjonijiet diżimpenjati, u għall-Qafas Finanzjarju Pluriennali li jmiss, il-possibbiltà li operazzjonijiet finanzjarji li mhumiex strumenti finanzjarji jiġġeneraw obbligazzjoni kontinġenti għall-Unjoni li tisboq l-assi finanzjarji pprovduti sabiex ikopru l-obbligazzjoni finanzjarja tal-Unjoni (l-Artikolu 203) u l-ħolqien ta’ fond ta’ proviżjonament komuni li jżomm ir-riżorsi proviżjonati għal operazzjonijiet finanzjarji (l-Artikolu 205). Inizjattivi riċenti (bħall-Fond Ewropew għall-Investimenti Strateġiċi (FEIS) jew il-Fond Ewropew għall-Iżvilupp Sostenibbli (EFSD)) tabilħaqq urew li hemm bżonn li l-ingranaġġ tal-baġit tal-UE jintuża bis-sħiħ billi jinħolqu obbligazzjonijiet kontinġenti mhux proviżjonati. It-Titolu X jistabbilixxi l-qafas għall-awtorizzazzjoni, għall-immaniġġjar u għall-kontroll ta’ dawn ir-riskji finanzjarji.

6.    Enfasi fuq ir-riżultati u s-simplifikazzjoni tar-rapportar: enfasi akbar fuq ir-riżultati permezz ta’ somom f’daqqa, ta’ premji, ta’ pagament ibbażati fuq l-eżitu u r-riżultati minflok fuq ir-rimborż ta’ kostijiet, u permezz ta’ pagament skont kundizzjonijiet li jridu jiġu ssodisfati (l-Artikolu 121, Titolu XIII). Din għandha tikkontribwixxi sabiex ikomplu jonqsu l-kostijiet marbutin mal-implimentazzjoni tal-fondi tal-UE kif ukoll in-numru ta’ żbalji. Min-naħa tar-rapportar, ir-rapporti huma raggruppati madwar l-abbozz tal-baġit u l-pakkett ta’ rapportar finanzjarju integrat, sabiex jiżdiedu l-effiċjenza u t-trasparenza kemm favur il-pubbliku ġenerali kif ukoll favur l-awtorità baġitarja (Artikoli 39 u 239-245).

7.    Amministrazzjoni tal-UE aktar sempliċi u effiċjenti: l-iffaċilitar tal-ftehimiet jew tad-delegazzjonijiet bejn l-Istituzzjonijiet jew il-korpi sabiex tiġi raggruppata l-implimentazzjoni ta’ approprjazzjonijiet amministrattivi fl-Uffiċċji Ewropej jew fi ħdan l-Aġenziji Eżekuttivi (Artikoli 57, 58, 64, 65 u 68); il-fużjoni ta’ bordijiet konsultattivi kompetenti fil-qasam tal-irregolaritajiet finanzjarji (l-Artikolu 73 (6)) mal-bord tal-EDES (l-Artikolu 139) u l-bidla tat-teħid ta’ deċiżjonijiet dwar il-finanzjament minn annwali għal pluriennali (l-Artikolu 108).

8.    L-għoti ta’ possibbiltà għall-involviment taċ-ċittadini: il-proposta tipprovdi possibbiltà sabiex iċ-ċittadini jiġu kkonsultati dwar l-implimentazzjoni tal-baġit tal-Unjoni mill-Kummissjoni, mill-Istati Membri u minn kwalunkwe entità oħra li timplimenta l-baġit tal-Unjoni (l-Artikolu 54).

Billi tissimplifika r-regoli finanzjarji tal-UE u tagħmilhom aktar flessibbli, din il-proposta twitti t-triq għat-tħejjija tal-ġenerazzjoni li jmiss tal-programmi ta’ nfiq (wara l-2020).

•Konsistenza mad-dispożizzjonijiet eżistenti fuq dan il-qasam ta’ politika

Meta fasslet regoli finanzjarji tal-UE aktar sempliċi u flessibbli, il-Kummissjoni rat li ma ddgħajjifx il-ġestjoni finanzjarja tajba li tibqa’ objettiv fundamentali. Fil-fatt, għall-kuntrarju ta’ dan, il-proposta attwali ssaħħaħ ukoll ir-regoli dwar l-evitar tat-taxxa li jridu jikkonformaw magħhom is-sħab tal-UE fl-implimentazzjoni u tiċċara li d-dmir li jiġu evitati kunflitti ta’ interess japplika bis-sħiħ għal kull xorta ta’ implimentazzjoni tal-fondi tal-UE (inkluż fil-livell tal-Istati Membri). Tikkonsolida wkoll is-sistemi fis-seħħ sabiex il-baġit tal-UE jitħares kontra l-frodi u irregolaritajiet finanzjarji (billi tiġi estiża l-kompetenza tal-uffiċjali tal-awtorizzazzjoni fit-teħid ta’ azzjoni fir-rigward tas-Sistema ta’ Individwazzjoni u Esklużjoni Bikrija u Esklużjoni fl-implimentazzjoni diretta). Is-simplifikazzjoni tar-regoli finanzjarji tal-UE ser tikkontribwixxi wkoll sabiex jonqsu l-kostijiet u ż-żmien meħtieġa għall-implimentazzjoni tal-fondi tal-UE kif ukoll sabiex jonqos in-numru ta’ żbalji. Għandha żżid ukoll l-impatt tal-politiki u r-riżultati tagħhom fil-prattika.

2.BAŻI ĠURIDIKA, SUSSIDJARJETÀ U PROPORZJONALITÀ

•Bażi ġuridika

Il-proposta hija bbażata fuq l-Artikolu 322 tat-Trattat dwar il-Funzjonament tal-Unjoni Ewropea (TFUE) għall-parti relatata mar-reviżjoni tar-Regolament Finanzjarju u fuq il-bażi ġuridika settorjali għall-atti leġislattivi mmodifikati mit-tieni parti.

•Sussidjarjetà (għall-kompetenza mhux esklużiva) 

L-adozzjoni tar-regoli finanzjarji ġenerali tal-UE u tal-modifiki proposti għall-atti leġislattivi settorjali taqa’ taħt il-kompetenza esklużiva tal-UE.

•Proporzjonalità

Din il-proposta hija ffokata fuq is-simplifikazzjoni u ma fihiex regoli li ma jkunux neċessarji sabiex jintlaħqu l-objettivi tat-Trattat. B’mod partikolari, il-modifiki fl-atti leġislattivi settorjali proposti fil-parti tal-omnibus tagħha huma limitati għal dawk neċessarji sabiex ikunu jistgħu jsiru simplifikazzjonijiet fir-Regolament Finanzjarju bil-għan li jiġi skjerat l-effett sħiħ tagħhom fil-prattika.

3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT

•Konsultazzjonijiet mal-partijiet ikkonċernati

F’April/Mejju 2016 saret konsultazzjoni pubblika dwar ir-reviżjoni tar-Regolament Finanzjarju. B’kollox daħlu 111-il kontribuzzjoni mingħand firxa wiesgħa ta’ partijiet ikkonċernati.

It-tweġibiet juru appoġġ ġenerali għall-miżuri ta’ simplifikazzjoni (65 %) u ta’ flessibbiltà (79 %) proposti. Fir-rigward tas-simplifikazzjoni tar-regoli tal-UE dwar l-għotjiet, il-partijiet ikkonċernati għadhom jippreferu r-rimborż tal-kostijiet infushom iżda mhumiex kontra r-rimborż issimplifikat permezz ta’ kostijiet unitarji, somom f’daqqa jew rati fissi jew rimborż fuq il-bażi ta’ riżultati predefiniti diment li ma jkunux obbligatorji. Dan it-tħassib huwa rifless fil-proposta. B’mod partikolari, ir-rimborż issimplifikat tal-kostijiet ser jibqa’ biss għażla addizzjonali li trid tintuża mill-uffiċjal tal-awtorizzazzjoni fir-rigward tal-għamla tal-azzjonijiet appoġġjati u tar-riċevituri. Is-sħab tal-UE ta’ implimentazzjoni (aġenziji nazzjonali tal-iżvilupp, organizzazzjonijiet internazzjonali, BEI/FEI, NGOs) jitolbu lill-Kummissjoni tiddependi aktar fuq ir-regoli u l-politiki tagħhom ladarba jirċievu valutazzjoni pożittiva. Jilmentaw dwar id-diversi valutazzjonijiet preċedenti tas-sistemi jew tal-proċeduri tagħhom jew l-awditi ripetuti tal-istess attivitajiet mill-UE u minn donaturi oħrajn, f’każijiet fejn il-kontrodipendenza fuq it-tali valutazzjonijiet u t-tali awditi tkun possibbli. Jikkritikaw ukoll l-obbligi ta’ rapportar differenti bejn id-donaturi 10 .

Fis-6 ta’ April 2016 saret Attività ta’ Sensibilizzazzjoni fi Brussell li fiha il-partijiet ikkonċernati setgħu jsemmgħu t-tħassib/is-suġġerimenti tagħhom dwar ir-Regolament Finanzjarju. Il-kummenti tagħhom huma konformi mat-tweġibiet għall-konsultazzjoni pubblika.

Il-miżuri li jinsabu f’din il-proposta jindirizzaw dan it-tħassib.

•Valutazzjoni tal-impatt

Ma saret ebda valutazzjoni tal-impatt għal din ir-reviżjoni tar-Regolament Finanzjarju. Ir-Regolament Finanzjarju minnu nnifsu għandu impatt ekonomiku, ambjentali jew soċjali limitat (jipprovdi r-regoli ġenerali għall-implimentazzjoni tal-programmi ta’ nfiq, iżda l-impatt ekonomiku jew soċjali konkret jiġġarrab meta jsiru għażliet ta’ politika li jimplimentaw il-programmi settorjali). Il-bidliet proposti fl-atti leġislattivi settorjali huma sempliċiment konsegwenza tas-simplifikazzjonijiet proposti fir-Regolament Finanzjarju

•Idoneità regolatorja u s-simplifikazzjoni

Filwaqt li r-reviżjoni tar-Regolament Finanzjarju u l-bidliet korrispondenti fl-atti leġislattivi settorjali ma jaqgħux taħt il-Programm ta’ Idoneità Regolatorja, dawn huma konformi mal-aġenda għal Regolamentazzjoni Aħjar u jikkontribwixxu b’mod sinifikanti għaliha: tabilħaqq, din il-proposta tnaqqas in-numru kumplessiv ta’ regoli finanzajrji ġenerali applikabbli għall-baġit tal-UE b’madwar 25 % u terġa’ tiġborhom f’ġabra unika ta’ regoli li ser tieħu post kemm ir-Regolament Finanzjarju kif ukoll ir-Regoli ta’ Applikazzjoni tiegħu:

·Id-dispożizzjonijiet ewlenin tar-Regoli tal-Applikazzjoni jitmexxew fir-Regolament Finanzjarju, filwaqt li, jekk ikun hemm bżonn u fuq il-bażi ta’ każ b’każ, elementi anqas importanti ser jiġu integrati fir-regoli interni tal-Kummissjoni jew fil-linji gwida li tippubblika l-Kummissjoni.

·Ir-regoli tal-akkwist dettaljati applikabbli għall-istituzzjonijiet u għall-korpi tal-UE huma kkonsolidati f’anness għar-Regolament Finanzjarju rivedut, li jista’ jiġi mmodifikat minn att delegat.

·Id-dispożizzjonijiet tat-Tieni Parti tar-Regolament Finanzjarju relatata mad-dispożizzjonijiet speċjali applikabbli għall-Fond Agrikolu Ewropew ta' Garanzija, għar-Riċerka, għall-azzjoni esterna u għal fondi tal-UE speċifiċi oħrajn jiddaħħlu fil-partijiet rilevanti tar-Regolament Finanzjarju sakemm ma jibqgħux rilevanti.

Il-proposta biex ir-Regolament Finanzjarju jiġi rivedut tisħaq ukoll fuq l-affarijiet in komuni u tnaqqas l-ispeċifiċitajiet għall-minimu sabiex ir-regoli jkunu jistgħu jiġu applikati mill-utenti b'faċilità akbar: tinxteħet enfasi fuq ir-regoli komuni applikabbli għall-metodi kollha ta’ implimentazzjoni (diretta, indiretta u kondiviża) kif ukoll għall-istrumenti legali kollha billi jinġabru f’kapitoli ddedikati. Id-dispożizzjonijiet dwar l-uffiċċji Ewropej, l-aġenziji eżekuttivi, l-aġenziji deċentralizzati u l-korpi ta’ sħubijiet pubbliċi-privati li bħalissa huma mifruxin fir-Regolament Finanzjarju jinġabru fl-istess kapitolu. Ir-regoli dwar il-fondi fiduċjarji tal-UE, l-appoġġ baġitarju u l-esperti (inklużi l-esperti tar-riċerka) huma raggruppati taħt titolu ġdid “Strumenti oħrajn ta’ implimentazzjoni tal-baġit”.

Il-proposta tiffoka ħafna wkoll fuq il-kisba ta’ simplifikazzjoni sostantiva tar-regoli finanzjarji attwali tal-UE. Kif intqal fil-punt 1 aktar ’il fuq, fiha għadd ta’ elementi li jnaqqsu l-piż amministrattiv għall-applikanti u għar-riċevituri tal-fondi tal-UE.

Il-proposta ma teżentax lill-mikrointrapriżi mill-kamp ta’ applikazzjoni tagħha. Dawn l-intrapriżi jistgħu jkunu benefiċjarji ta’ fondi tal-UE u, għalhekk, iridu jkunu soġġetti għar-regoli. Madankollu, f’ċerti oqsma, tnaqqas il-kostijiet għan-negozji li spiss ikunu SMEs (billi, fil-qasam tal-istrumenti finanzjarji, tibdel il-pubblikazzjoni ta’ dejta individwali tal-benefiċjarji ma’ statistiki aggregati) u, b’mod aktar ġenerali, id-diversi miżuri ta’ simplifikazzjoni għandhom ikunu ta’ benefiċċju għall-intrapriżi kollha.

•Drittijiet fundamentali

Il-proposta hija konformi mal-protezzjoni tad-drittijiet fundamentali.

4.IMPLIKAZZJONIJIET GĦALL-BAĠIT

Il-proposta ma għandha l-ebda implikazzjoni għall-baġit.

•Spjegazzjoni fid-dettall tad-dispożizzjonijiet speċifiċi tal-proposta

1. Simplifikazzjoni għar-riċevituri ta’ fondi tal-UE

1.1. Is-simplifikazzjoni tal-kalkoli tal-użu tal-għotjiet, tas-somom f’daqqa u tal-kostijiet

Ħafna miżuri għandhom l-għan li jissimplifikaw il-ħajja għar-riċevituri ta’ fondi tal-UE. Huma relatati mal-kontenut tal-applikazzjonijiet għal għotjiet, mal-valur tal-assistenza in natura, mar-rikonoxximent tax-xogħol ta' voluntiera, mal-kundizzjonijiet għall-għoti ta’ għotjiet mingħajr sejħa għal proposti lill-Istati Membri f’kundizzjonijiet speċifiċi, mal-prinċipju li ma jkunx hemm skop ta’ qligħ, mal-priniċpji ta’ għoti mhux kumulattiv u mal-eliminazzjoni gradwali tad-deċiżjonijiet ta’ għoti. Miżuri oħrajn juru l-mixja lejn amministrazzjoni aktar sempliċi u effiċjenti.

1.1.1. Regoli finanzjarji ġenerali

Il-proposta tippromwovi l-użu ta’ forom issimplifikati ta’ għotjiet, miftuħin għall-programmi kollha ffinanzjati mill-UE fejn in-natura tal-azzjonijiet u n-nefqa sottostanti jippermettu tali approċċ (eż. azzjonijiet ta’ taħriġ u ta’ mobilità, spejjeż tal-ivvjaġġar, eċċ.). Din tkun qiegħda ttaffi l-piż amministrattiv, issaħħaħ iċ-ċertezza fuq l-ammont rimborżat lill-benefiċjarji u tistimola l-użu ta’ forom issimplifikati ta’ għotjiet u t-taħlitiet tagħhom (l-Artikolu 175).

L-użu ta’ ġudizzju espert: l-implimentazzjoni ta’ forom issimplifikati ta’ għotjiet ġiet imxekkla min-nuqqas ta’ dejta meħtieġa sabiex tiġi stabbilita approssimazzjoni raġonevoli tal-kostijiet propji. Dan spiss ikun dovut għan-natura innovattiva tal-azzjonijiet ikkonċernati jew għall-fatt li l-azzjonijiet jiġu implimentati biss f’ċerti pajjiżi u ma jkun hemm ebda dejta disponibbli għal pajjiżi oħrajn. Sabiex tonqos din id-diskrepanza, huwa propost li jsir użu minn ġudizzju espert b’mod komplimentarju għad-dejta statistika jew storika jew bħala alternattiva għaliha, skont in-natura tal-azzjoni (l-Artikolu 175).

Is-simplifikazzjoni tal-awtorizzazzjoni ta’ somom f’daqqa, ta’ kostijiet unitarji u ta’ rati fissi: li l-proċess fit-tul u impenjattiv tal-awtorizzazzjoni (deċiżjoni tal-Kulleġġ għal ammonti akbar minn 60 000 EUR għal kull għotja) jinbidel billi l-uffiċjal tal-awtorizzazzjoni responsabbli jingħata l-awtorità li jadotta deċiżjonijiet li jawtorizzaw forom issimplifikati. Dan il-livell huwa aktar xieraq fid-dawl tal-kontenut ferm tekniku (metodoloġiji ta’ kalkolu, ħarsiet ġenerali lejn id-dejta, eċċ.) tad-deċiżjoni (l-Artikolu 175).

Is-simplifikazzjoni u l-iċċarar tal-kontenut tal-applikazzjonijiet għal għotja inklużi d-dokumenti ta' sostenn li jakkumpanjaw: ma hemm ebda obbligu li tiġi pprovduta informazzjoni li turi l-kapaċità finanzjarja u operazzjonali tal-applikanti jekk dawk mhumiex ivverifikati (eż. għal korpi pubbliċi); l-allinjament tal-obbligu sabiex jiġi pprovdut rapport tal-awditjar mal-liġi nazzjonali u tal-UE applikabbli fil-qasam tal-kontabilità (l-Artikolu 189).

Is-simplifikazzjoni tal-prinċipju ta’ għoti mhux kumulattiv: għotjiet bħal boroż ta’ studju lil persuni fiżiċi, appoġġ dirett lir-rifuġjati, lil persuni qiegħda u lil persuni oħrajn li l-aktar li għandhom bżonn ser ikunu eżentati minn din ir-regola peress li, tradizzjonalment, il-valur tagħhom ikun pjuttost baxx (l-Artikolu 185).

It-tneħħija tal-prinċipju ta’ mingħajr skop ta’ profitt: l-importanza prattika tal-prinċipju ta’ mingħajr skop ta’ profitt naqset b’mod sostanzjali: fil-prinċipju, proġetti li jiġġeneraw id-dħul huma appoġġjati permezz ta’ strumenti finanzjarji. Għal proġetti li, fil-prinċipju, ma jiġġenerawx dħul, il-prinċipju ta’ mingħajr skop ta’ profitt joħloq diżinċentivi: il-benefiċjarji mhumiex imħeġġin jiżguraw li l-proġetti tagħhom isiru sostenibbli jew profittabbli. Min-naħa tiegħu dan iħalli impatt negattiv fuq l-ekonomija.

Is-simplifikazzjoni tad-determinazzjoni tal-valur tal-assistenza in natura: dawn il-kontribuzzjonijiet ma jikkostitwixxux kostijiet eliġibbli. Għaldaqstant, il-valur eżatt tagħhom huwa irrilevanti. Madankollu, jistgħu jkomplu jiġu aċċettati bħala parti mill-kofinanzjament. Kwalunkwe valur raġonevolment stabbilit mill-uffiċjal tal-awtorizzazzjoni fiż-żmien li jiġi aċċettat il-baġit stmat jista’ juri li hemm sorsi oħrajn ta’ finanzjament tal-azzjoni, apparti mill-għotja tal-UE, u li l-prinċipju ta’ kofinanzjament huwa rrispettat (l-Artikolu 184).

Rikonoxximent tax-xogħol volontarju: Sabiex tiġi ffaċilitata l-parteċipazzjoni ta’ organizzazzjonijiet żgħar fl-implimentazzjoni tal-politiki tal-UE f’ambjent ta’ disponibilità limitata ta’ riżorsi, hemm bżonn li jiġi rikonoxxut il-valur tax-xogħol ipprovdut mill-voluntiera bħala kostijiet eliġibbli. Għaldaqstant, dawn l-organizzazzjonijiet jistgħu jiddependu sa ċertu punt akbar fuq ix-xogħol tal-voluntiera sabiex jipprovdu kofinanzjament għall-azzjoni (Artikoli 175, 180 u 184).

Is-simplifikazzjoni u l-armonizzazzjoni tal-kundizzjonijiet għall-għoti ta’ għotjiet mingħajr sejħiet għal proposti: huwa propost li tiġi estiża l-possibbiltà li jingħataw għotjiet diretti lil entitajiet b’mandat mill-Istati Membri għall-każijiet ta’ monopolju de facto jew de jure jew fejn il-benefiċjajri diretti jkunu ntgħażlu għall-kompetenzi tekniċi, il-grad għoli ta’ speċjalizzazzjoni jew is-setgħat amministrattivi tagħhom. Barra minn hekk, l-uffiċjal tal-awtorizzazzjoni jkun awtorizzat jgħaqqad ir-rapport tal-evalwazzjoni u d-deċiżjoni dwar l-għoti f’dokument wieħed. Dan ser itaffi l-piż amministrattiv u jħaffef l-għoti ta’ għotjiet diretti (l-Artikolu 188).

Iż-żamma tar-rekords aktar sempliċi: il-perjodu ta’ żamma tar-rekords għandu jkun wieħed uniformi ta’ ħames snin (tliet snin jekk il-finanzjament ikun ta’ EUR60 000 jew anqas), anki għal implimentazzjoni indiretta (l-Artikolu 128).

L-approċċ nozzjonali għall-għotjiet: fejn l-għotjiet ikunu espressi biss bħala valur assolut (mhux bħala perċentwal tal-kostijiet eliġibbli), l-eliġibbiltà tal-kostijiet għandha tiġi vverifikata sa mhux aktar tard mill-mument tal-ħlas tal-bilanċ (l-Artikolu 180). Għal din il-verifika, jista’ jintuża approċċ ("nozzjonali") simplifikat (l-Artikolu 150). L-eliminazzjoni gradwali tad-deċiżjonijiet dwar l-għoti: huwa propost li d-deċiżjonijiet dwar l-għoti jiġu eliminati b’mod gradwali u li b’mod predominanti jintużaw ftehimiet ta’ għotja, soġġetti għal reviżjoni fil-progress li jkun sar fl-għotjiet elettroniċi fi tmiem il-QFP attwali (l-Artikolu 277). 

1.1.2. Regoli settorjali

It-titjib għall-użu ta’ għażliet tal-kost issimplifikati fir-Regolament Finanzjarju huwa komplimentat minn bidliet proposti għal-leġiżlazzjoni settorjali li jestendu l-użu ta’ għażliet tal-kost issimplifikati fi:

·Ir-Regolament (UE) Nru 1303/2013 li jistabbilixxi dispożizzjonijiet komuni dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta’ Koeżjoni, il-Fond Agrikolu Ewropew għall-Iżvilupp Rurali u l-Fond Ewropew għall-Affarijiet Marittimi u s-Sajd;

·ir-Regolament dwar il-Fond Soċjali Ewropew (UE) Nru 1304/2013;

·ir-Regolament (UE) Nru 223/2014 dwar il-Fond għal Għajnuna Ewropea għall-Persuni l-Aktar fil-Bżonn.

2. Minn diversi saffi ta’ kontrolli għal kontrodipendenza fuq l-awditjar, il-valutazzjoni jew l-awtorizzazzjoni, u l-obbligi ta’ rapportar armonizzati

L-għan ta’ dawn il-miżuri huwa li jħeġġu l-akbar dipendenza possibbli fuq awditu wieħed, valutazzjoni waħda jew awtorizzazzjoni waħda (pereżempju l-konformità mal-għajnuniet mill-Istat), meta jkunu jissodisfaw il-kundizzjonijiet neċessarji sabiex ikunu inklużi fis-sistema tal-UE. Sabiex jiġu evitati diversi saffi ta’ kontrolli, il-Kummissjoni għandha tippromwovi r-rikonoxximent ta’ standards aċċettati f’livell internazzjonali jew l-aħjar prattiki internazzjonali f'dak il-qasam, kif ukoll l-obbligi ta’ rapportar komuni fost id-donaturi:

·Il-kontrodipendenza fuq il-valutazzjonijiet ex ante u l-kontrolli tar-riċevituri li diġà jkunu saru minn entitajiet (donaturi) oħrajn fir-rigward ta’ kundizzjonijiet ekwivalenti għal dawk tal-UE (l-Artikolu 122).

·Il-kontrodipendenza fuq l-awditi li jitwettqu skont standards aċċettati f’livell internazzjonali dejjem hija mħeġġa wkoll bil-għan li jiġu evitati diversi awditi tal-istess persuni/entitajiet għall-istess attivitajiet. Din tippermetti lill-Kummissjoni toqgħod fuq awditi indipendenti mwettqin dwar l-użu tal-fondi tal-UE minn sħab internazzjonali (in-NU, il-Bank Dinji, eċċ.) jew mill-Istati Membri (l-Artikolu 123).

·L-armonizzazzjoni tal-obbligi ta’ rapportar tagħha ma’ dawk ta’ donaturi oħrajn: il-Kummissjoni għandha tippromwovi l-adozzjoni ta’ obbligi ta’ rapportar komuni permezz tal-ftehimiet qafas ta’ sħubija finanzjarja konklużi mas-sħab internazzjonali ewlenin tagħha (l-Artikolu 126).

·Li jkun possibbli li l-Kummissjoni tiddependi fuq is-sistemi u l-proċeduri tas-sħab tal-UE taħt implimentazzjoni diretta jekk ikunu rċevew valutazzjoni pożittiva (l-Artikolu 149) u l-impożizzjoni ta’ rimedji jekk ċerti regoli/proċeduri ma jagħmlux biżżejjed sabiex iħarsu l-interessi finanzjarji tal-UE; meta l-Kummissjoni teħtieġ l-użu tal-proċeduri speċifiċi jew tagħha stess, ma ssir ebda valutazzjoni. Fil-każijiet kollha, il-livell ta’ superviżjoni/kontroll eżerċitati għandu jiġi adattat fuq il-bażi tal-prinċipju ta’ proporzjonalità.

·It-tisħiħ tal-ftehimiet qafas ta’ sħubija finanzjarja (l-Artikolu 126): fil-ġejjieni, dawn il-ftehimiet stabbiliti ma’ msieħba fdati għal kooperazzjoni fit-tul ser ikopru l-azzjonijiet kollha fl-implimentazzjoni diretta u indiretta u ser jirriflettu kemm il-Kummissjoni tista’ tiddependi fuq is-sistemi u l-proċeduri li rċevew valutazzjoni pożittiva kif ukoll l-applikazzjoni ta’ sett uniku ta’ regoli għall-istrumenti legali kollha. Il-ftehimiet ta’ sħubija fit-tul se joffru qafas flessibbli għall-kontrodipendenza fuq il-valutazzjonijiet u l-awditi fejn possibbli kif ukoll għall-armonizzazzjoni tar-rekwiżiti tal-awditjar, tar-rapportar u amministrattivi oħrajn fost id-donaturi.

3. L-awtorizzazzjoni tal-applikazzjoni ta’ sett wieħed biss ta’ regoli għal azzjonijiet ibridi jew fil-każ ta’ taħlita ta’ miżuri jew strumenti

Il-proposta għandha l-għan li tikseb iktar simplifikazzjoni għal sħab l-UE taħt implimentazzjoni diretta għall-firxa massima possibbli.

3.1. Regoli finanzjarji ġenerali

·L-applikazzjoni għal sieħeb ta’ implimentazzjoni tal-Kummissjoni ta’ sett wieħed biss ta’ regoli minflok tnejn tkun awtorizzata f’ċerti każijiet – indipendentement min-natura tal-azzjoni u mir-rwol tas-sieħeb bħala maniġer tal-fondi jew “eżekutur”. Fejn l-azzjonijiet ibridi jgħaqqdu l-implimentazzjoni indiretta u diretta u bħalissa jimplikaw żewġ settijiet ta’ regoli, elementi aċċessorji li bħalissa huma sottomessi għal regoli dwar l-implimentazzjoni diretta (spiss ikun il-każ għall-assistenza teknika) isegwu r-regoli tal-elementi ewlenin tal-azzjoni (eż. it-tmexxija ta’ strument finanzjarju b’garanziji jew b’xi ħaġa oħra (l-Artikolu 208(2)).

·Sabiex jiġu ffaċilitati taħlitiet bejn għotjiet u strumenti finanzjarji, għandu jkun japplika sett uniku ta’ regoli (dawk tal-istrumenti finanzjarji) għal għotjiet komplimentari għall-istrumenti finanzjarji jekk dawn ikunu kombinati f’azzjoni waħda (l-Artikolu 208(2));

·Il-perjodu għaż-żamma ta’ rekords għal għotjiet u strumenti finanzjarji għandu jiġi allinjat għal ħames snin (tliet snin għal ammonti li jaslu sa € 60 000 Artikolu 128).

3.2. Regoli settorjali

·Il-limitazzjoni tal-verifiki tal-għajnuna mill-Istat għall-verifika tal-konsistenza tal-għajnuna mill-Istat għall-istrumenti finanzjarji fil-livell tal-UE previsti taħt ir-Regolament Finanzjarju meta l-fondi SIE jikkontribwixxu għal strumenti finanzjarji fil-livell tal-UE (ebda verifika doppja): Il-kontribuzzjonijiet tal-Istati Membri għal strumenti finanzjarji fil-livell tal-UE li jsiru mingħajr ebda kundizzjoni addizzjonali dwar l-użu tal-kontribuzzjonijiet għajr b’rabta maż-żona ġeografika għall-użu tal-kontribuzzjoni ma għandhomx ikunu jeħtieġu verifika separata oħra tal-għajnuna mill-Istat peress li l-istrument finanzjarju diġà jkun konsistenti mar-regoli dwar l-għajnuna mill-Istat fuq il-bażi tar-Regolament Finanzjarju. Dan ser jiġi ċċarat permezz ta’ gwida xierqa.

·L-estensjoni tal-Inizjattiva għall-SMEs (SMEI), li tippermetti li l-Inizjattiva għall-SMEs tintuża wara l-2016, sabiex b’hekk l-Istati Membri jkunu jistgħu jimpenjaw finanzjamenti għall-SMEI sal-2020.

·L-estensjoni u l-kjarifiki tad-dispożizzjonijiet dwar is-CPR dwar taħlitiet bejn strumenti finanzjarji u għotjiet sabiex jiġi ffaċilitat l-użu kombinat tagħhom.

·L-introduzzjoni ta’ possibbiltà ġdida sabiex jiġu kombinati l-Fondi SIE/FSIE u struttura ġdida għall-kombinazzjoni tal-Fondi SIE mal-BEI u l-FEI: Il-programmi tal-Fondi SIE għandhom ikunu jistgħu jikkontribwixxu għal strumenti finanzjarji kombinati mal-finanzjament tal-BEI skont il-FEIS.

4. Użu aktar effettiv tal-istrumenti finanzjarji

4.1. Regoli finanzjarji ġenerali

L-esperjenza bl-istrumenti finanzjarji u b’mod partikolari bil-kontribut mingħand sħab importanti fl-implimentazzjoni (BEI/FEI) tindika l-possibiltajiet li ġejjin sabiex ikomplu jittejbu l-ġestjoni u l-effettività tagħhom:

·Ir-rimborżi minn operazzjonijiet preċedenti kollha (dħul + ripagamenti) ġenerati minn strument finanzjarju għandhom jintużaw għall-istess strument sabiex jinkisbu gwadanji fl-effiċjenza; hija ggarantita trasparenza sħiħa permezz tar-rapportar (l-Artikolu 202(2));

·Il-BEI/FEI jżommu l-istatus tagħhom bħala sħab importanti tal-UE fl-implimentazzjoni iżda għandhom jiġu awtorizzati negozjati diretti bejn il-Kummissjoni u numru akbar ta’ entitajiet potenzjali, sabiex jiġu żgurati kundizzjonijiet ekwivalenti ta' kompetizzjoni bejniethom (l-Artikolu 149);

·Peress li huwa impossibbli li jiġi impost ir-rispett sħiħ tar-regoli tal-UE meta l-UE tieħu sehem fi strument finanzjarju bħala azzjonist ta’ minoranza ta’ fond, huwa propost li, minflok, f’dawn il-każijiet titħalla ssir applikazzjoni proporzjonata tar-regoli tal-UE (l-Artikolu 208(4));

·Il-pubblikazzjoni tad-dejta individwali tar-riċevituri finali tiġi sostitwita b’dejta statistika, aggregata għal kull kriterju rilevanti propost għall-benefiċjajri finali li jirċievu appoġġ mill-UE ta’ anqas minn € 500 000 (qasam ta’ politika, tip ta’ appoġġ, tip ta’ benefiċjajru, distribuzzjoni ġeografika (l-Artikolu 36(5)).

·Il-benefiċjarji finali u l-intermedjarji ma għandhomx ikunu meħtieġa jipprovdu dikjarazzjoni fuq l-unur li tikkonferma li mhumiex f'waħda mis-sitwazzjonijiet ta’ esklużjoni li fihom is-sieħeb ta’ implimentazzjoni jkollu politika ta’ esklużjoni meqjusa ekwivalenti għal dik tal-UE (l-Artikolu 131).

·Huma proposti żewġ taqsimiet oħrajn biex jirregolaw strumenti oħrajn li jġibu magħhom riskju finanzjarju, bħal garanziji baġitarji u assistenza finanzjarja lill-Istati Membri jew lil pajjiżi terzi (Taqsimiet 2 u 3 tal-Kapitolu 2 tat-Titolu X).

·Ġew introdotti regoli li jawtorizzaw, jimmaniġġjaw u jikkontrollaw obbligazzjonijiet kontinġenti mhux proviżjonati (Artikoli 203 sa 206).

4.2. Regoli settorjali

Sabiex ikomplu jiġu ottimizzati l-immaniġġjar u l-użu tal-istrumenti finanzjarji fl-implimentazzjoni kondiviża, huma proposti bidliet fir-Regolament dwar id-Dispożizzjonijiet Komuni 1303/2013 (CPR):

·L-iċċarar tal-possibbiltà għall-Awtoritajiet Maniġerjali tal-Istati Membri li jagħtu kuntratt b’mod dirett, inkluża assistenza finanzjarja lill-BEI/FEI, lil Istituzzjonijiet Finanzjarji Internazzjonali oħrajn kif ukoll lil Banek Promozzjonali Nazzjonali.

·Immaniġġar ta’ flus: meta l-investiment temporanju ta’ flus tal-Fondi SIE mħallsa fi Strument Finanzjarju qabel l-investimenti f’riċevituri finali jiġġenera mgħaxijiet negattivi, għandu jkun awtorizzat il-pagament tagħhom mir-riżorsi mħallsin lura meta tal-inqas ikun twettaq ċiklu wieħed tal-investimenti.

·Għandhom jitneħħew ċerti regoli speċifiċi għall-miżuri tal-FAEŻR li xekklu l-programmazzjoni tal-istrumenti finanzjarji fl-Iżvilupp Rurali u l-implimentazzjoni tagħhom mill-maniġers tal-fondi, sabiex jiżdied l-effett ta’ ingranaġġ tal-finanzjament tal-FAEŻR permezz ta’ użu akbar tal-istrumenti finanzjarji.

5. Ġestjoni baġitarja aktar flessibbli

5.1. Regoli finanzjarji ġenerali

Il-proposta tistabbilixxi diversi modi għal aktar flessibbiltà baġitarja, sabiex l-Unjoni tkun tista’ twieġeb għal sfidi imprevisti u kompiti ġodda b’mod aktar effettiv:

·Il-possibbiltà li jiġu stabbiliti fondi fiduċjarji tal-UE anki għal azzjonijiet ta’ emerġenza, postemerġenza jew tematiċi ġewwa l-UE (u mhux biss għal pajjiżi terzi). L-avvenimenti riċenti fl-Unjoni Ewropea juru l-bżonn ta’ flessibbiltà akbar għall-finanzjament fi ħdan l-UE. Peress li qiegħed isir dejjem aktar diffiċli li tagħraf fejn tispiċċa l-politika interna u tibda l-politika esterna, dan ikun qiegħed jipprovdi wkoll għodda li twieġeb għall-isfidi li jaqsmu l-fruntieri (l-Artikolu 227).

·Żieda tar-“riżerva negattiva” minn EUR 200 miljun għal EUR 400 miljun u b’hekk jingħata segwitu wkoll lil talba tal-Kunsill sabiex jiġi limitat in-numru ta’ Abbozzi ta’ Baġits Emendatorji marbutin mal-pagamenti (l-Artikolu 48).

·Il-ħolqien ta’ kuxin ta’ flessibbiltà għal azzjoni esterna bir-riportar ta’ fondi mhux allokati għall-Istrument għall-Assistenza ta' Qabel l-Adeżjoni (IPAII), għall-Istrument Ewropew ta’ Viċinat (ENI) u għall-istrument ta' finanzjament tal-kooperazzjoni għall-iżvilupp (SKŻ) għas-sena N+1 fil-limitu ta' 10 % tal-approprjazzjonijiet inizjali ta’ kull strument (l-Artikolu 12).

·L-allokazzjoni għal flessibbiltà akbar għal sitwazzjonijiet ta’ kriżi u ta’ emerġenza u għall-għajnuna umanitarja fl-għotjiet: Il-proċeduri amministrattivi huma ssimplifikati sabiex ikun jista’ jingħata rispons veloċi u effiċjenti (eż. eliġibbiltà retroattiva qabel is-sottomissjoni tal-applikazzjoni li trid tiġi deċiża mill-uffiċjal tal-awtorizzazzjoni responsabbli, Artikolu 186).

·L-użu ta’ kontijiet għall-antiċipi fid-Delegazzjonijiet tal-Unjoni jkun awtorizzat għall-ħlas ta’ ammonti limitati minn proċeduri baġitarji. Persunal mhux statutorju fil-qasam tal-għajnuna għall-immaniġġjar ta’ kriżijiet u tal-operazzjonijiet tal-għajnuna umanitarja jista’ jamministra tali kontijiet u jiffirma impenji legali eżegwiti minnhom sa EUR 2 500 (l-Artikolu 109).

·Iż-żieda tal-flessibbiltà għal trasferimenti awtonomi mill-Kummissjoni billi jitwessa’ l-kamp ta’ applikazzjoni attwali, jiġifieri billi jitħallew isiru wkoll trasferimenti ta’ nefqa operazzjonali bejn titoli differenti jekk ikunu koperti mill-istess att bażiku, inklużi kapitoli ta’ sostenn, u mil-linji ta’ sostenn amministrattiv għal-linji operazzjonali korrispondenti (l-Artikolu 28).

·Mobilizzazzjoni eħfef tal-Fond ta’ Solidarjetà tal-UE FSUE permezz ta’ trasferiment awtonomu mir-riżerva għal-linja baġitarja ladarba l-Parlament Ewropew u l-Kunsill jadottaw deċiżjoni ta’ mobilizzazzjoni (l-Artikolu 28).

·Mobilizzazzjoni aktar sempliċi tal-Fond Ewropew għall-Aġġustament għall-Globalizzazzjoni FEG permezz ta’ approvazzjoni awtomatika tat-trasferimenti mir-riżerva għal-linja baġitarja wara l-adozzjoni mill-Awtorità tal-Baġit fuq il-mobilizzazzjoni tal-Fond (l-Artikolu 30).

·Il-kjarifika li l-ammonti korrispodnenti għall-approprjazzjonijiet ta’ impenn għar-Riżerva ta’ Għajnuna f’Emeġerenza u l-Fond ta’ Solidarjetà tal-UE FSUE jiġu riportati b’mod awtomatiku (l-Artikolu 12).

·It-tneħħija tal-obbligu li l-ewwel jintużaw l-approprjazzjonijiet awtorizzati għas-sena finanzjarja attwali sakemm jiġu eżawriti qabel ma jintużaw l-approprjazzjonijiet riportati.

·L-awtorizzazzjoni tal-użu tad-dħul assenjat intern għal skop ieħor minn dak li għalih ikun assenjat f’każ li ma jkun hemm ebda bżonn identifikat li jippermetti li t-tali dħul jintuża għall-istess skop (l-Artikolu 30(3)).

·L-awtorizzazzjoni lill-istituzzjonijiet u lill-korpi sabiex jaċċettaw sponsporizzar korporattiv in natura għal avvenimenti jew għal attivitajiet speċifiċi (jiġifieri mhux riċevimenti jew avvenimenti esklussivament soċjali oħrajn). Sabiex tiġi implimentata dik id-dispożizzjoni, l-ewwel kull istituzzjoni tawtorizza l-prinċipju ta’ aċċettazzjoni ta’ sponsers in natura u tistabbilixxi linji gwida speċifiċi li jkopru b’mod partikolari l-aspetti etiċi (l-Artikolu 24).

·Il-previżjoni li, bħala parti mill-proċedura ta’ approvazzjoni tal-bejgħ ta' bini jew ta' art, l-Awtorità tal-Baġit tista’ taċċetta, fuq bażi ta’ każ b’każ, li r-rikavat minn dak il-bejgħ jitqies bħala dħul assenjat, sabiex jitjieb l-immaniġġjar tal-faċilitajiet mill-Kummissjoni u jiġi ffaċilitat ix-xiri ta’ bini ieħor (l-Artikolu 20(3)(g)).

·Il-ħolqien ta’ riżerva tal-UE għall-kriżijiet bl-użu mill-ġdid ta’ approprjazzjonijiet diżimpenjati.

·Għall-Qafas Finanzjarju Pluriennali li jmiss, il-ħolqien tal-possibbiltà li operazzjonijiet finanzjarji li mhumiex strumenti finanzjarji jiġġeneraw obbligazzjoni kontinġenti għall-Unjoni li tisboq l-assi finanzjarji pprovduti sabiex tkun koperta l-obbligazzjoni finanzjarja tal-Unjoni (l-Artikolu 203) u fond ta’ proviżjonament komuni li jżomm ir-riżorsi proviżjonati għal operazzjonijiet finanzjarji (l-Artikolu 205).

5.2 Regoli settorjali

·Il-possibbiltà għall-Istati Membri li jgħinu wkoll fil-każ ta’ katastrofi maħluqin mill-bniedem bħall-kriżi tar-rifuġjati u li jintużaw il-fondi disponibbli minnufih (bla ma jkun hemm bżonn ta’ stennija għas-sottomissjoni ta’ emenda għall-programm) hija introdotta fir-Regolament (UE) Nru 1305/2013 dwar appoġġ għall-iżvilupp rurali mill-Fond Agrikolu Ewropew għall-Iżvilupp Rurali. Barra minn hekk, tiżdied prijorità speċifika għal investiment għall-migranti u għar-rifuġjati sabiex tissimplifika l-programmazzjoni tal-miżuri li jgħinu lill-migranti u lir-rifuġjati skont ir-Regolament dwar il-Fond Ewropew għall-Iżvilupp Reġjonali (UE) Nru 1301/2013.

·Il-Programm tal-Unjoni Ewropea għall-Impjiegi u l-Innovazzjoni Soċjali (Regolament EaSI Nru 1296/2013): sabiex tiżdied il-kapaċità ta’ aġġustament tal-EaSI għal prijoritajiet tal-kriżi u ta’ politika li jinbidlu, hemm bżonn ta’ flessibbiltà rigward il-livelli ta’ nfiq indikattivi previsti għal kull wieħed mit-tliet assi tal-programm u għal kull waħda mill-prijoritajiet tematiċi fi ħdanhom. Barra minn hekk, id-deroga li tippermetti li jintuża l-Fond Ewropew għall-Globalizzazzjoni għall-benefiċċju taż-żgħażagħ barra mill-edukazzjoni, impjieg jew taħriġ għandha tinżamm ukoll fid-dawl tal-kuntest ekonomiku attwali.

·Il-Faċilità Nikkollegaw l-Ewropa, ir-Regolament Nru 1316/2013: Fid-dawl tas-suċċess tal-Programmi ta’ Ħidma Pluriennali, hemm bżonn li tiżdied il-flessibbiltà sabiex 95 % ikunu jistgħu jintefqu fuq programmi pluriennali u iktar proġetti appoġġjati bl-aktar valur miżjud għan-Netwerk Trans-Ewropew tat-Trasport (Kurituri tan-Netwerk Ewlieni, proġetti transfruntiera u proġetti fuq it-taqsimiet l-oħrajn tan-Netwerk Ewlieni).

·Immaniġġjar tan-nefqa għall-katina alimentari, għas-saħħa tal-annimali u għat-trattament xieraq tal-annimali (ir-Regolament (UE) Nru 652/2014): fid-dawl tal-esperjenza pożittiva bl-applikazzjoni ta’ din ir-regola u t-tnaqqis sostanzjali tal-volum ta’ xogħol relatat min-naħa tal-benefiċjarji u tas-servizzi tal-Kummissjoni, huwa propost li tiġi estiża l-possibbiltà li jintużaw impenji baġitarji maqsumin fi ħlasijiet parzjali annwali.

·Fir-Regolament (UE) Nru 1305/2013 dwar l-appoġġ għall-iżvilupp rurali, għandu jkun permess li jitqiegħdu fil-mira fondi reċiproċi li jgħinu lill-bdiewa f’każ ta’ tnaqqis kbir fid-dħul f’setturi speċifiċi, u s-sussidjar tal-istokk kapitali inizjali tat-tali fondi.

6. Enfasi fuq ir-riżultati u s-simplifikazzjoni tar-rapportar

Il-proposta tinkludi sensiela ta’ miżuri li għandhom l-għan li jiffokaw il-baġit aktar fuq ir-riżultati, jistabbilixxu qafas ta’ prestazzjoni ċar, isaħħu t-trasparenza u jissimplifikaw ir-rapportar.

6.1 Enfasi fuq ir-riżultati

Numru ta’ proposti miftuħin għall-oqsma ta’ politika kollha u li jiffokaw fuq ir-riżultati minflok fuq dak li fil-fatt intefaq. Juru l-impenn tal-Kummissjoni li tipprovdi l-kundizzjonijiet neċessarji għal approċċ orjentat lejn ir-riżultati:

·Jingħata lok għal pagamenti bbażati fuq il-kundizzjonijiet issodisfati, fuq l-eżitu jew fuq il-prestazzjoni fil-modalitajiet ta’ mmaniġġjar kollha (eż. pagamenti għal kull rifuġjati risistemat fil-fondi tal-AMIF jew l-appoġġ għall-bdiewa żgħażagħ li għadhom kif jibdew, Artikolu 121). F’dawn il-każijiet, il-finanzjament tal-proġetti ma jibqax marbut mar-rimborż tal-kostijiet imġarrbin mir-riċevituri tal-fondi tal-UE: jiddependi direttament mir-riżultati miksubin fil-prattika. Dak li jgħodd huwa l-issodisfar ta’ ċerti kundizzjonijiet kif stipulati ex ante fl-att bażiku jew fid-Deċiżjonijiet tal-Kummissjoni u/jew il-kisba tar-riżultati mkejlin permezz ta’ indikaturi tal-prestazzjoni (ex-post). Sistemi bħal dawn isaħħu s-sens ta' sjieda/l-impenn mir-riċevituri tal-fondi sabiex jiksbu riżultati. Jippermettu li jonqsu b’mod sinifikanti l-piż amministrattiv u l-kost tal-kontrolli. Tabilħaqq il-kontrolli jistgħu jiġu limitati għall-verifika ta’ jekk ġewx issodisfati l-kundizzjonijiet/ir-riżultati miftehmin u tal-piż amministrattiv. Min-naħa tiegħu, dan jillimita r-riskju ta’ żbalji fil-legalità u fir-regolarità. Il-Qorti Ewropea tal-Awdituri rrakkomandat dan bl-isem “intitolamenti”.

·L-iffaċilitar tal-“Premji” (Titolu IX): it-titolu dwar il-“Premji” huwa mqassar u ssimplifikat; l-obbligu li jitħabbru premji b’valur ta’ EUR 1 miljun jew aktar fid-dikjarazzjonijiet li jakkumpanjaw l-abbozz ta' baġit huwa sostitwit minn informar minn qabel lill-Parlament Ewropew u tħabbira espliċita tat-tali premji fid-deċiżjoni ta’ finanzjament.

·Somma waħda f’daqqa (l-Artikolu 176): fil-ġejjieni “somma waħda f’daqqa” tista’ tkopri l-kostijiet kollha eliġibbli tal-azzjoni. Il-verifiki u l-kontrolli ser jiffokaw biss fuq l-eżiti/ir-riżultati. Is-somma waħda f’daqqa hija bbażata fuq il-valutazzjoni tal-baġit propost mill-applikant għall-għotja fid-dawl tal-priniċpji tal-effiċjenza, tal-ekonomija u tal-effettività inkluż b’referenza għad-dejta rilevanti u/jew il-ġudizzju espert.

·Prijorità għal forom issimplifikati ta’ għotjiet meta l-pagament ikun xkattat mill-eżitu u mir-riżultati (l-Artikolu 175): approċċ ibbażat fuq l-input għandu jiġi kkunsidrat biss jekk l-approċċ ibbażat fuq l-eżitu jkun impossibbli jew mhux xieraq. Bħalissa forom issimplifikati jintużaw l-aktar sabiex ikopru l-valur tal-inputs (eż. numru ta’ jiem tax-xogħol, numru ta’ vjaġġi, numru ta’ jiem imqatta’ fil-missjoni, eċċ.). B’mod simili hija mħeġġa l-possibbiltà li jitħallsu forom issimplifikati kontra l-kisba ta’ riżultati konkreti (eż. konferenza pprovduta, festival organizzat, prototip mibni, eċċ.).

·L-iċċarar tal-kamp ta’ applikazzjoni tal-kontrolli ta’ forom issimplifikati ta’ għotjiet u tal-konsegwenzi tagħhom jekk ma jintlaħqux ir-riżultati (l-Artikolu 177): il-kontrolli jikkonċentraw fuq l-issodisfar tal-kundizzjonijiet li jiskattaw il-pagament (eż. jekk film Ewropew appoġġjat kienx prodott bil-kwalità meħtieġa u kienx iddistribwit fil-kwantità meħtieġa, jekk student tal-Erasmus fil-fatt studjax barra l-pajjiż, eċċ.). Ma hemm bżonn ta’ ebda rapportar dwar il-kostijiet fil-fatt imġarrbin mill-benefiċjarju. Jekk il-kundizzjonijiet li jiskattaw il-pagament ma kinux issodisfati jew jekk l-attivitajiet maqbulin kienu implimentati ħażin, b’mod parzjali jew tard, il-Kummissjoni għandha tnaqqas l-ammont tal-għotja b’mod proporzjonat għan-nuqqas u tirkupra l-ammonti mħallsa indebitament.

6.2 Qafas tal-prestazzjoni ċar

Sabiex tiġi kkomplimentata l-enfasi akbar fuq ir-riżultati, huwa propost qafas tal-prestazzjoni ċar:

·L-irbit tal-prestazzjoni, tal-issettjar tal-objettivi, tal-indikaturi, tar-riżultati u tal-prinċipji ta’ ekonomija, ta’ effiċjenza u ta’ effettività fl-użu tal-approprjazzjonijiet (l-Artikolu 31).

·Jiġu pprovduti tariffi bbażati fuq il-prestazzjoni sabiex jiġu remunerati organizzazzjonijiet talli jimmaniġġjaw fondi tal-UE (l-Artikolu 150);

·Il-kunsiderazzjoni tad-dikjarazzjonijiet tal-programmi bħala s-sors ewlieni ta’ informazzjoni dwar il-prestazzjoni tal-programm (l-Artikolu 39);

·Il-fużjoni tar-rapporti ta’ “Sinteżi” u tal-“Artikolu 318 TFUE” f’“Rapport Annwali dwar il-Ġestjoni u l-Prestazzjoni għall-Baġit tal-UE” wieħed sabiex ta’ kull sena jiġi pprovdut rapport wieħed dwar il-prestazzjoni fuq il-baġit tal-UE (mis-sena finanzjarja tal-2015, Artikolu 239).

·L-allinjament tat-terminoloġija dwar l-evalwazzjoni għad-dispożizzjonijiet tal-Ftehim Interistituzzjonali tal-2016 dwar it-tfassil aħjar tal-liġijiet u l-ħolqien ta’ rabta bejn l-evalwazzjonijiet ex-ante taħt ir-Regolament Finanzjarju u l-Valutazzjonijiet tal-Impatt (l-Artikolu 32).

6.3 Is-simplifkazzjoni tar-rapportar

6.3.1. Regoli finanzjarji ġenerali

Reviżjonijiet suċċessivi tar-Regolament Finanzjarju żiedu b’mod sinifikanti n-numru ta’ rapporti u informazzjoni mitluba inkluż dwar il-kontijiet: bħalissa r-rapportar huwa pprovdut permezz ta’ dokumenti mxerrdin, forniti tul kalendarju differit. Sabiex jiżdiedu l-effiċjenza u t-trasparenza mhux biss favur l-awtorità tal-baġit iżda anki favur il-pubbliku ġenerali, mingħajr madankollu ma jkun affettwat il-livell ta’ informazzjoni li huwa pprovdut bħalissa, huwa propost:

·Li jinġabru obbligi ta’ rapportar fuq żewġ mumenti ewlenin: rapporti li jakkumpanjaw

·l-abbozz ta' baġit; ir-rapportar kollu dwar l-istrumenti finanzjarji fil-livell tal-UE jinġabar f’dokument wieħed li jakkumpanja l-abbozz ta' baġit (l-Artikolu 39).

·u dawk sottomessi bħala parti mill-proċess ta’ rilaxx: “il-pakkett ta’ rapportar finanzjajru integrat” – Kapitolu separat li jindirizza r-rapportar baġitarju u finanzjarju ieħor (Artikoli 239-245).

·It-twettiq tar-Rapport Annwali l-ġdid dwar il-Ġestjoni u l-Prestazzjoni għall-Baġit tal-UE, li jirriżulta mill-fużjoni li saret fis-sena finanzjarja tal-2015 tar-rapport ta’ Sinteżi u tar-rapport tal-Artikolu 318 TFUE, huwa element importanti tal-pakkett ta’ rapportar integrat (l-Artikolu 239).

·L-ispeċifikar li l-awditu estern mill-Qorti tal-Awdituri jieħu f’kunsiderazzjoni l-karattru pluriennali tal-programmi (l-Artikolu 247(1)).

6.3.2. Rapportar:

·L-obbligi ta’ rapportar huma ssimplifikati bl-eliminazzjoni ta’ ċerti elementi żejda (CPR).

7.    Amministrazzjoni tal-UE aktar sempliċi u effiċjenti

7.1.    Regoli finanzjarji ġenerali

Sensiela ta’ miżuri ta’ simplifikazzjoni għandha l-għan li tippermetti lill-istituzzjonijiet tal-UE jaħdmu b’effiċjenza akbar, b’mod partikolari billi jimplimentaw b’mod konġunt approprjazzjonijiet amministrattivi sabiex jiksbu ekonomiji ta’ skala:

·L-għoti ta’ bażi ġuridika espliċita għall-Ftehimiet dwar il-Livell ta’ Servizz (SLA) bejn id-dipartimenti tal-istituzzjonijiet tal-UE, il-korpi tal-UE u l-uffiċċji Ewropej u l-estensjoni għall-istituzzjonijiet kollha tal-possibbiltà li jiġu konklużi ftehimiet dwar il-livell ta’ servizz li jiffaċilitaw l-implimentazzjoni tal-approprjazzjonijiet amministrattivi. Fil-ġejjieni ser ikun possibbli wkoll li tiġi ddelegata l-implimentazzjoni tal-approprjazzjonijiet amministrattivi lil uffiċċju mwaqqaf mill-Kummissjoni.

·L-iċċarar tad-distinzjoni bejn kompiti obbligatorji u mhux obbligatorji tal-uffiċċji (l-Artikoli 64 u 65): il-kompiti obbligatorji jridu jkunu koperti minn approprjazzjonijiet imdaħħlin fis-sezzjoni tal-baġit relatata mal-uffiċċju. Il-kompiti mhux obbligatorji li uffiċċju jaqbel li jwettaq minn jeddu fuq it-talba ta’ istituzzjoni oħra jew korp ieħor huma koperti mill-baġit tal-istituzzjoni jew tal-korp rispettiv.

·L-awtorizzazzjoni tat-teħid ta’ deċiżjonijiet ta’ finanzjament pluriennali u t-tnaqqis tal-ammont ta’ elementi obbligatorji f’deċiżjoni ta’ finanzjament (l-Artikolu 108). Barra minn hekk, huwa propost li d-deċiżjoni ta’ finanzjament tikkostitwixxi fl-istess ħin il-programm ta’ ħidma annwali jew dak pluriennali. Dawn il-bidliet iħaffu l-implimentazzjoni tal-baġit fis-snin 2 u ta’ wara ta’ programm.

·L-iċċarar tar-regoli dwar l-Aġenziji Eżekuttivi (l-Artikolu 68): għandhom jirċievu kontribuzzjoni annwali; id-direttur tagħhom jaġixxi bħala uffiċjal tal-awtorizzazzjoni b’delega meta jiġu implimentati approprjazzjonijiet operazzjonali; id-delega ta’ programm operazzjonali lil aġenzija eżekuttiva tista’ tinkludi proġetti pilota u azzjonijiet preparatorji kif ukoll l-implimentazzjoni tan-nefqa amministrattiva sabiex jinkisbu sinerġiji u ekonomiji ta’ skala.

·It-tgħaqqid tal-Artikolu 139 tal-Bord tar-Regolament Finanzjarju mal-Bord dwar l-Irregolarità Finanzjarja (l-Artikolu 90): għal raġunijiet ta’ effiċjenza, il-Bord tar-Regolament Finanzjarju li jirrakkomanda l-esklużjoni u penali finanzjarji fuq atturi ekonomiċi jsir kompetenti wkoll għal irregolaritajiet finanzjarji minn membri tal-persunal tal-UE, filwaqt li l-Bord Dixxiplinari jibqa’ jiddeċiedi fuq il-konsegwenzi ta’ dawn l-irregolaritajiet skont ir-Regolamenti tal-Persunal.

7.2. Regoli settorjali

·Huma proposti diversi bidliet fir-Regolament dwar id-Dispożizzjonijiet Komuni sabiex tiġi ffaċilitata l-ġestjoni tal-programmi u programmi madwar il-pajjiżi kif ukoll Pjanijiet ta’ Azzjoni Konġunt li jinvolvu proġetti li jiffokaw fuq l-eżiti u fuq ir-riżultati.

·Fil-qasam tal-pagamenti diretti għall-bdiewa, jingħata appoġġ lill-bdiewa attivi u ċerti miżuri jiffokaw l-appoġġ fuq bdiewa żgħażagħ. Hija introdotta l-proporzjonalità għall-korrezzjonijiet finanzjarji marbutin mal-iżbalji tal-akkwist pubbliku sabiex jiġi evitat milli t-tali żbalji jitqiesu dejjem li jaffettwaw 100 % tal-għajnuna kkonċernata.

8.    Bidliet oħrajn

Operazzjonijiet ta’ dħul: huma proposti l-bidliet li ġejjin:

·Id-dispożizzjoni dwar l-aġġustamenti negattivi tar-riżorsi proprji għal finijiet kontabilistiċi hija mmodifikata għal raġunijiet ta’ trasparenza (l-Artikolu 94).

·Dispożizzjoni ġdida tistabbilixxi limitu ta’ żmien li fih għandha tintbagħat nota ta’ debitu lid-debitur (l-Artikolu 96 (2)), sabiex tirrifletti l-ġurisprudenza riċenti tal-Qorti tal-Ġustizzja.

·L-Artikolu 107 ġdid jistabbilixxi r-regoli dwar ir-rata li trid tiġi applikata għal imgħaxijiet kompensatorji f’każijiet li fihom għandu jiġi rimborżat ammont wara sentenza tal-Qorti tal-Ġustizzja tal-Unjoni Ewropew jew soluzzjoni amikevoli.

·Id-dispożizzjoni dwar multi, penali oħrajn jew sanzjonijiet hija mmodifikata sabiex tagħmilha ċara li l-ammonti msarrfin b’mod proviżorju għandhom jitħallsu lura lill-parti terza kkonċernata filwaqt li jitqies ir-redditu; u li multi imposti minn istituzzjonijiet apparti l-Kummissjoni (eż. il-Kunsill b’konformità mar-Regolament 1173/2011) ukoll huma koperti mir-Regolament Finanzjarju (bħalissa limitati għal multi imposti mill-Kummissjoni, Artikolu 106).

·It-test dwar id-dħul assenjat huwa mmodifikat sabiex jirrifletti l-kontribuzzjonijiet għal miżuri bħall-faċilità għar-rifuġjati fit-Turkija (l-Artikolu 20(2)).

Lista tal-atti settorjali mmodifikati mill-proposta:

·Ir-Regolament tal-Kunsill (KE) Nru 2012/2002 tal-11 ta' Novembru 2002 li jistabilixxi l-Fond ta' Solidarjetà tal-Unjoni Ewropea (ĠU L 311, 14.11.2002, p. 3);

·Ir-Regolament (UE) Nru 1296/2013 tal-Parlament Ewropew u tal-Kunsill tal-11 ta' Diċembru 2013 dwar Programm Ewropew għall-Impjiegi u l-Innovazzjoni Soċjali (‘EaSI’) u li jemenda d-Deċiżjoni Nru 283/2010/UE li tistabbilixxi Faċilità Ewropea ta' Mikrofinanzjament Progress għall-impjiegi u l-inklużjoni soċjali (ĠU L 347 20.12.2013, p. 238);

·Ir-Regolament (UE) Nru 1301/2013 tal-Parlament Ewropew u tal-Kunsill tas-17 ta' Diċembru 2013 dwar il-Fond Ewropew għall-Iżvilupp Reġjonali u dwar dispożizzjonijiet speċifiċi li jikkonċernaw l-Investiment li għandu fil-mira t-tkabbir ekonomiku u l-impjiegi, u li jirrevoka r-Regolament (KE) Nru 1080/2006 (ĠU L 347, 20.12.2013, p. 289–302);

·Ir-Regolament (UE) Nru 1303/2013 tal-Parlament Ewropew u tal-Kunsill tas-17 ta' Diċembru 2013 li jistabbilixxi dispożizzjonijiet komuni dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta' Koeżjoni, il-Fond Agrikolu Ewropew għall-Iżvilupp Rurali u l-Fond Marittimu u tas-Sajd Ewropew u li jistabbilixxi d-dispożizzjonijiet ġenerali dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta' Koeżjoni u l-Fond Ewropew għall-Affarijiet Marittimi u s-Sajd u li jħassar ir-Regolament tal-Kunsill (KE) Nru 1083/2006 (ĠU L 347 20.12.2013, p. 320);

·Ir-Regolament (UE) Nru 1304/2013 tal-Parlament Ewropew u tal-Kunsill tas-17 ta' Diċembru 2013 dwar il-Fond Soċjali Ewropew u li jħassar ir-Regolament tal-Kunsill (KE) Nru 1081/2006 (ĠU L 347 20.12.2013, p. 470);

·Ir-Regolament (UE) Nru 1305/2013 tal-Parlament Ewropew u tal-Kunsill tas-17 ta' Diċembru 2013 dwar appoġġ għall-iżvilupp rurali mill-Fond Agrikolu Ewropew għall-Iżvilupp Rurali (FAEŻR) u li jħassar ir-Regolament tal-Kunsill (KE) Nru 1698/2005 (ĠU L 347, 20.12.2013, p. 487–548);

·Ir-Regolament (UE) Nru 1306/2013 tal-Parlament Ewropew u tal-Kunsill tas-17 ta' Diċembru 2013 dwar il-finanzjament, il-ġestjoni u l-monitoraġġ tal-politika agrikola komuni u li jħassar ir-Regolamenti    tal-Kunsill (KEE) Nru 352/78, (KE) Nru 165/94, (KE) Nru 2799/98, (KE) Nru 814/2000, (KE) Nru 1290/2005 u (KE) Nru 485/2008 (ĠU L 347, 20.12.2013, p. 549);

·Ir-Regolament (UE) Nru 1307/2013 tal-Parlament Ewropew u tal-Kunsill tas-17 ta' Diċembru 2013 li jistabbilixxi regoli għal pagamenti diretti lill-bdiewa taħt skemi ta' appoġġ fil-qafas tal-politika agrikola komuni u li jħassar ir-Regolament tal-Kunsill (KE) Nru 637/2008 u r-Regolament tal-Kunsill (KE) Nru 73/2009 (ĠU L 347 20.12.2013, p. 608);

·Ir-Regolament (UE) Nru 1308/2013 tal-Parlament Ewropew u tal-Kunsill tas-17 ta’ Diċembru 2013 li jistabbilixxi organizzazzjoni komuni tas-swieq fi prodotti agrikoli u li jħassar ir-Regolamenti tal-Kunsill (KEE) Nru 922/72, (KEE) Nru 234/79, (KE) Nru 1037/2001 u (KE) Nru 1234/2007 (ĠU L 347, 20.12.2013, p. 671);

·Ir-Regolament (UE) Nru 1309/2013 tal-Parlament Ewropew u tal-Kunsill tas-17 ta’ Diċembru    2013 dwar il-Fond Ewropew ta’ Aġġustament għall-Globalizzazzjoni (2014-2020) u li jħassar ir-Regolament (KE) Nru    1927/2006 (ĠU L 347, 20.12.2013, p. 855–864);

·Ir-Regolament (UE) Nru 1316/2013 tal-Parlament Ewropew u tal-Kunsill tal-11 ta’ Diċembru 2013 li jistabbilixxi l-Faċilità Nikkollegaw l-Ewropa, li jemenda r-Regolament (UE) Nru 913/2010 u jħassar ir-Regolamenti (KE) Nru 680/2007 u (KE) Nru 67/2010 Test b’relevanza għaż-ŻEE (ĠU L 348, 20.12.2013, p. 129–171);

·Ir-Regolament (UE) Nru 223/2014 tal-Parlament Ewropew u tal-Kunsill tal-11 ta' Marzu 2014 dwar il-Fond għal Għajnuna Ewropea għall-Persuni l-Aktar fil-Bżonn (ĠU L 72, 12.3.2014, p. 1-41);

·Ir-Regolament (UE) Nru 283/2014 tal-Parlament Ewropew u tal-Kunsill tal-11 ta' Marzu 2014 dwar linji gwida għal netwerks trans-Ewropej fil-qasam tal-infrastruttura tat-telekomunikazzjoni u li jħassar id-Deċiżjoni Nru 1336/97/KE Test b’rilevanza għaż-ŻEE (ĠU L 86, 21.3.2014, p. 14–26);

·Ir-Regolament (UE) Nru 652/2014 tal-Parlament Ewropew u tal-    Kunsill tal-15 ta’ Mejju 2014 li jistabbilixxi dispożizzjonijiet għall-ġestjoni tan-nefqa marbuta mal-katina alimentari, mas-saħħa tal-annimali u mat-trattament xieraq tal-annimali, u marbuta mas-saħħa tal-pjanti u mal-materjal riproduttiv    tal-pjanti, li jemenda d-Direttivi tal-Kunsill 98/56/KE, 2000/29/KE u 2008/90/KE, ir-Regolamenti (KE) Nru 178/2002, (KE) Nru 882/2004     u (KE) Nru 396/2005 tal-Parlament Ewropew u tal-Kunsill, id-Direttiva 2009/128/KE tal-    Parlament Ewropew u tal-Kunsill u r-Regolament (KE) Nru 1107/2009 tal-Parlament     Ewropew u tal-Kunsill u li jħassar id-Deċiżjonijiet tal-Kunsill 66/399/KEE, 76/894/KEE u 2009/470/KE (ĠU L 189, 27.6.2014, p. 1–32);

·id-Deċiżjoni Nru 541/2014/UE tal-Parlament Ewropew u tal-Kunsill tas- 16 ta' April 2014 li tistabbilixxi Qafas għall-Appoġġ tas-Sorveljanza u l-Insegwiment fl-Ispazju (ĠU L 158, 27.5.2014, p. 227–234).

2016/0282 (COD)

Proposta għal

REGOLAMENT TAL-PARLAMENT EWROPEW U TAL-KUNSILL

dwar ir-regoli finanzjarji applikabbli għall-baġit ġenerali tal-Unjoni u li jemenda r-Regolament (KE) Nru 2012/2002, ir-Regolamenti (UE) Nru 1296/2013, (UE) 1301/2013, (UE) Nru 1303/2013, UE Nru 1304/2013, (UE) Nru 1305/2013, (UE) Nru 1306/2013, (UE) Nru 1307/2013, (UE) Nru 1308/2013, (UE) Nru 1309/2013, (UE) Nru 1316/2013, (UE) Nru 223/2014, (UE) Nru 283/2014, (UE) Nru 652/2014 tal-Parlament Ewropew u tal-Kunsill u d-Deċiżjoni Nru 541/2014/UE tal-Parlament Ewropew u tal-Kunsill

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikoli 42, 43(2), 46(d), 149, 153(2)(a), 164, 168(4)(b), 172, 175, 177, 178, 189(2), 209(1), 212(2), 322(2) u 349 tiegħu, flimkien mat-Trattat li jistabbilixxi l-Komunità Ewropea tal-Enerġija Atomika, u b’mod partikolari l-Artikolu 106a tiegħu,

Wara li kkunsidraw il-proposta tal-Kummissjoni Ewropea,

Wara li l-abbozz tal-att leġislattiv intbagħat lill-parlamenti nazzjonali,

Wara li kkunsidraw l-opinjoni tal-Kumitat Ekonomiku u Soċjali Ewropew 11 ,

Wara li kkunsidraw l-opinjoni tal-Kumitat tar-Reġjuni 12 ,

Wara li kkunsidraw l-opinjoni tal-Qorti tal-Awdituri 13 ,

Filwaqt li jaġixxu skont il-proċedura leġiżlattiva ordinarja,

Billi:

(1)Peress li wara tliet snin ta’ implimentazzjoni jridu jsiru aktar emendi għar-regoli finanzjarji applikabbli għall-baġit ġenerali tal-Unjoni sabiex jitneħħew il-konġestjonijiet fl-implimentazzjoni billi tiżdied il-flessibbiltà, sabiex tiġi ssimplifikata l-kunsinna għall-partijiet ikkonċernati u għas-servizzi u sabiex jinxteħet fokus akbar fuq ir-riżultati, ir-Regolament (UE, Euratom) Nru 966/2012 14 tal-Parlament Ewropew u tal-Kunsill għandu jitħassar u jiġi sostitwit minn dan ir-Regolament.

(2)Sabiex tonqos il-kumplessità tar-regoli finanzjarji applikabbli għall-baġit ġenerali tal-Unjoni (“il-baġit”) u r-regoli rilevanti jiġu inklużi f’regolament uniku wieħed (“ġabra unika tar-regoli”), ir-Regolament Delegat tal-Kummissjoni (UE) Nru 1268/2012 15  jinħtieġ li jitħassar. Fl-interess taċ-ċarezza, ir-regoli ewlenin mir-Regolament (UE) Nru 1268/2012 jinħtieġ li jiġu inklużi f’dan ir-Regolament, u jinħtieġ li oħrajn jiġu inklużi fil-gwida għas-servizzi.

(3)Il-prinċipji baġitarji fundamentali għandhom jinżammu. Id-derogi mill-prinċipji fundamentali għal oqsma speċifiċi bħar-riċerka, l-azzjonijiet esterni u l-fondi strutturali għandhom jiġu rieżaminati u ssimplifikati sa fejn possibbli, filwaqt li titqies ir-relevanza li għad għandhom, il-valur miżjud tagħhom għall-baġit u l-piż li jimponu fuq dawk involuti.

(4)Sa 10 % tal-fondi tal-Istrument għall-Assistenza ta' Qabel l-Adeżjoni (IPA II), l-Istrument Ewropew ta’ Viċinat u l-istrument ta’ finanzjament għall-kooperazzjoni fl-iżvilupp (SKŻ) jistgħu jinżammu mhux allokati fil-bidu tas-sena finanzjarja sabiex jitħalla finanzjament addizzjonali li jwieġeb għal ħtiġijiet kbar imprevisti, sitwazzjonijiet ta’ kriżi ġodda jew bidliet politiċi serji f’pajjiżi terzi, minbarra l-ammonti diġà pprogrammati. Dawn il-fondi mhux allokati, jekk ma jiġux impenjati matul is-sena, jinħtieġ li jiġu riportati permezz ta’ Deċiżjoni tal-Kummissjoni.

(5)Ir-regoli dwar ir-riportar għandhom ikunu ppreżentati b’mod aktar ċar, u għandha ssir distinzjoni bejn ir-riporti awtomatiċi u mhux awtomatiċi.

(6)Sabiex tiġi ottimizzata l-implimentazzjoni tal-baġit, importanti li jingħata lok għar-riportar u għall-użu ta’ dħul assenjat b’mod estern għall-programm jew għall-azzjoni li jmiss. Għandu jkun possibbli li d-dħul assenjat intern jiġi riportat għal sena waħda biss, ħlief fejn dan ir-Regolament jipprevedi mod ieħor.

(7)Ir-regoli li jirregolaw it-trasferimenti tal-approprjazzjonijiet għandhom jippermettu għal flessibbiltà akbar sabiex tiġi żgurata implimentazzjoni aħjar tal-baġit. Għal dak l-għan, importanti li l-Kummissjoni jkollha l-possibbiltà li tiddeċiedi dwar trasferimenti, li jaslu sa 10 % tal-approprjazzjonijiet operazzjonali bejn it-Titoli meta jkunu koperti mill-istess att bażiku. It-trasferimenti mil-linji ta’ sostenn amministrattiv għal-linji operazzjonali korrispondenti għandhom isiru b’mod awtonomu mill-Kummissjoni wkoll.

(8)Sabiex titjieb l-aġilità tal-implimentazzjoni ta’ strumenti speċjali, huma neċessarji proċeduri ssimplifikati ta’ mobilizzazzjoni u trasferiment għall-Fond Ewropew ta' Aġġustament għall-Globalizzazzjoni u l-Fond ta' Solidarjetà tal-Unjoni Ewropea.

(9)Rigward id-dħul assenjat intern, għandha tiġi introdotta deroga mill-prinċipju ta’ speċifikazzjoni sabiex jitħalla jsir użu ottimali mit-tipi kollha ta’ approprjazzjonijiet disponibbli. F’dan ir-rigward, f’każ li ma jkun hemm ebda ħtieġa identifikata li tippermetti li tali dħul jintuża għall-finijiet li huwa assenjat għalihom, għandu jkun awtorizzat l-użu tiegħu għal skop differenti.

(10)L-istituzzjonijiet tal-Unjoni għandhom ikunu jistgħu jaċċettaw kwalunkwe donazzjoni li ssir lill-Unjoni.

(11)Għandha tiddaħħal klawżola tal-awtorizzazzjoni sabiex tippermetti sponsorizzar in natura minn persuna ġuridka ta’ avveniment jew attività tal-UE għal skopijiet promozzjonali jew ta’ responsabbiltà soċjali korporattiva.

(12)Il-kunċett tal-prestazzjoni fir-rigward tal-baġit tal-UE għandu jiġi ċċarat. Il-prestazzjoni għandha tiġi deskritta bħala applikazzjoni diretta tal-prinċipju ta’ ġestjoni finanzjarja tajba. Għandu jkun hemm rabta bejn il-prestazzjoni, l-iffissar tal-objettivi, l-indikaturi, ir-riżultati u l-ekonomija, l-effiċjenza u l-effettività fl-użu tal-approprjazzjonijiet. Sabiex jiġu evitati kunflitti ma’ oqfsa tal-prestazzjoni eżistenti tal-programmi differenti, ir-referenzi f'termini tat-terminoloġija tal-prestazzjoni għandhom ikunu limitati għal objettivi u l-monitoraġġ tal-progress fil-kisba tagħhom.

(13)Il-leġiżlazzjoni tal-Unjoni għandha tkun ta’ kwalità għolja, tiffoka fuq oqsma fejn tipproduċi l-akbar valur miżjud għaċ-ċittadini Ewropej u tkun effettiva u effiċjenti kemm jista’ jkun fl-ilħuq tal-objettivi tal-politika komuni tal-Unjoni 16 . Is-soġġettar tal-programmi ta’ nfiq ġodda u eżistenti u tal-attivitajiet li jinvolvu nfiq sinifikanti għal evalwazzjoni jista’ jgħin sabiex jintlaħqu dawn l-objettivi.

(14)Il-prinċipju tat-trasparenza, imnaqqax fl-Artikolu 15 TFUE li jirrikjedi li l-istituzzjonijiet jaħdmu kemm jista' jkun b'mod miftuħ, jimplika li, fil-qasam tal-implimentazzjoni tal-baġit, iċ-ċittadini jkunu jistgħu jsiru jafu fejn, u għal liema skop, ikunu qed jintefqu il-fondi mill-Unjoni. Informazzjoni bħal din trawwem id-dibattitu demokratiku, tikkontribwixxi għall-partiċipazzjoni taċ-ċittadini fil-proċess tat-teħid ta’ deċiżjonijiet tal-Unjoni u ssaħħaħ il-kontroll u l-iskrutinju istituzzjonali fuq in-nefqa tal-Unjoni. Tali objettivi għandhom jinkisbu permezz tal-pubblikazzjoni, idealment bl-użu ta’ għodda moderni ta’ komunikazzjoni, ta’ informazzjoni rilevanti dwar ir-riċevituri kollha tal-fondi tal-Unjoni, li tqis tali interessi leġittimi ta’ kunfidenzjalità u ta’ sigurtà tar-riċevituri kollha u, f'dak li jikkonċerna l-persuni fiżiċi, id-dritt tagħhom għall-privatezza u l-ħarsien tad-dejta personali tagħhom. Għalhekk, l-istituzzjonijiet għandhom jadottaw approċċ selettiv fil-pubblikazzjoni tal-informazzjoni, b'konformità mal-prinċipju tal-proporzjonalità. Id-deċiżjonijiet dwar il-pubblikazzjoni għandhom ikunu bbażati fuq kriterji rilevanti sabiex jipprovdu informazzjoni sinifikanti.

(15)L-informazzjoni dwar l-użu tal-fondi tal-Unjoni implimentati b’implimentazzjoni diretta għandha tiġi ppubblikata fuq sit web tal-istituzzjonijiet u għandha tinkludi mill-inqas l-isem, il-post, l-ammont u l-għan tal-fondi. Dik l-informazzjoni għandha tikkunsidra l-kriterji rilevanti bħall-perjodiċità, it-tip u l-importanza tal-miżura.

(16)L-isem u l-post tar-riċevituri tal-fondi tal-Unjoni għandhom jiġu ppubblikati għall-premji, għall-għotjiet u għall-kuntratti mogħtija wara l-ftuħ ta’ proċedura pubblika għall-kompetizzjoni, kif inhu l-każ b’mod partikolari għall-kompetizzjonijiet, għas-sejħiet għal proposta u għas-sejħiet għall-offerti, fir-rigward tal-prinċipji tat-TFUE u b’mod partikolari fir-rigward tal-prinċipji tat-trasparenza, tal-proporzjonalità, tat-trattament ugwali u ta’ nondiskriminazzjoni. Barra minn hekk, tali pubblikazzjoni għandha tikkontribwixxi għall-kontroll tal-proċeduri tal-għażla pubblika mill-applikanti mhux magħżula tal-kompetizzjoni.

(17)Il-pubblikazzjoni tad-dejta personali li tirreferi għal persuni fiżiċi ma għandhiex taqbeż id-durata li matulha l-fondi jkunu qegħdin jintużaw mir-riċevitur u, għalhekk, għandha titneħħa wara sentejn. Jinħtieġ li l-istess għandu japplika għad-dejta personali li tirreferi għal persuni ġuridiċi li għalihom it-titolu uffiċjali jidentifika persuna fiżika waħda jew iktar.

(18)Fil-maġġoranza tal-każijiet koperti minn dan ir-Regolament, il-pubblikazzjoni tikkonċerna persuni fiżiċi.

(19)Meta jkunu kkonċernati persuni fiżiċi, tali pubblikazzjoni għandha tiġi kkunsidrata biss f’każ li din tkun tirrispetta l-prinċipju tal-proporzjonalità bejn l-importanza tal-ammont mogħti u l-ħtieġa li jiġi kkontrollat l-aħjar użu tal-fondi. F’dak li jikkonċerna l-persuni fiżiċi, il-pubblikazzjoni tar-reġjun fil-livell NUTS 2 hija konsistenti mal-objettiv tal-pubblikazzjoni tal-benefiċjarji, tiżgura trattament indaqs bejn l-Istati Membri ta’ daqs differenti filwaqt li jiġi rispettat id-dritt tar-riċevituri għal ħajja privata u b’mod partikolari l-protezzjoni tad-dejta personali tagħhom.

(20)Informazzjoni dwar il-boroż ta’ studju u appoġġ dirett ieħor imħallas lil persuni fiżiċi l-aktar fil-bżonn ma għandhiex tiġi ppubblikata.

(21)Sabiex jiġi żgurat ir-rispett għall-prinċipju tat-trattament indaqs bejn ir-riċevituri, il-pubblikazzjoni ta’ informazzjoni relatata ma’ persuni fiżiċi għandha tiġi żgurata wkoll skont l-obbligu tal-Istati Membri li jistabbilixxu trasparenza kbira fejn jidħlu kuntratti akbar mill-ammont stabbilit fid-Direttiva 2004/18/KE tal-Parlament Ewropew u tal-Kunsill tal-31 ta' Marzu 2004 fuq koordinazzjoni ta’ proċeduri għall-għoti ta’ kuntratti għal xogħlijiet pubbliċi, kuntratti ta’ provvista pubblika u kuntratti għal servizzi pubbliċi.

(22)L-isem u l-post tar-riċevitur u l-ammont u l-għan tal-fondi ma għandhomx jiġu ppubblikati jekk tali pubblikazzjoni tista’ tipperikola l-integrità tar-riċevitur kif protetta mill-Karta tad-Drittijiet Fundamentali tal-Unjoni Ewropea jew tkun ta’ dannu għall-interessi kummerċjali leġittimi tal-benefiċjarju.

(23)F’każ ta’ implimentazzjoni indiretta u kondiviża, għandu jkun f’idejn il-persuni, l-entitajiet jew il-korpi ddeżinjati li jimplimentaw il-fondi tal-Unjoni li jqiegħdu għad-dispożizzjoni l-informazzjoni dwar il-benefiċjarji u l-benefiċjarji finali. Fejn applikabbli, il-livell ta’ dettall u l-kriterji għandhom jiġu ddefiniti fir-regoli speċifiċi għas-settur rilevanti u jistgħu jkunu ddefiniti aktar fil-ftehimet qafas finanzjarji ta’ sħubija. Il-Kummissjoni għandha tqiegħed għad-dispożizzjoni referenza tas-sit web fejn tista’ tinstab informazzjoni dwar ir-riċevituri u r-riċevituri finali.

(24)Fl-interess ta’ ċarezza akbar u trasparenza tad-dejta dwar l-istrumenti finanzjarji implimentati b’implimentazzjoni diretta u indiretta, xieraq li l-obbligi ta’ rapportar kollha jinġabru f’dokument ta’ ħidma wieħed mehmuż mal-abbozz ta' baġit.

(25)Xieraq li jiġi pprovdut għal possibbiltà li l-Kummissjoni tikkonkludi ftehimiet dwar il-livell ta’ servizz ma’ istituzzjonijiet oħrajn sabiex tiffaċilita l-implimentazzjoni ta’ approprjazzjonijiet amministrattivi u wkoll għal possibbiltà espliċita ta’ konklużjoni ta’ dawn il-ftehimiet bejn id-dipartimenti tal-istituzzjonijiet, il-korpi tal-Unjoni, l-uffiċċji Ewropej, il-korpi jew il-persuni inkarigati bl-implimentazzjoni ta’ azzjonijiet speċifiċi fil-PESK skont it-Titolu V tat-TUE u l-Uffiċċju tas-Segretarju Ġenerali tal-Bord tal-Gvernaturi tal-iskejjel Ewropej għall-provvista ta’ servizzi, għall-forniment ta’ prodotti, għall-eżekuzzjoni ta’ xogħlijiet jew għall-implimentazzjoni ta’ kuntratti tal-bini.

(26)Xieraq li jiġu ddefiniti l-uffiċċji Ewropej u li ssir distinzjoni bejn il-kompiti obbligatorji u dawk mhux obbligatorji tat-tali uffiċċji. Għandha tiddaħħal il-possibbiltà għall-istituzzjonijiet tal-Unjoni, għall-korpi tal-Unjoni u għal uffiċċji Ewropej oħrajn li jiddelegaw setgħat ta’ uffiċjal tal-awtorizzazzjoni lid-direttur tal-uffiċċju Ewropew. L-uffiċċji Ewropej għandu jkollhom ukoll il-possibbiltà li jikkonkludu ftehim dwar il-livell ta’ servizz għall-provvista ta’ servizzi, għall-forniment ta’ prodotti, għall-eżekuzzjoni ta’ xogħlijiet jew għall-implimentazzjoni ta’ kuntratti tal-bini. Xieraq li jiġu stabbiliti regoli speċifiċi għall-forniment ta’ rekords kontabilistiċi, dispożizzjonijiet li jawtorizzaw lill-uffiċjal tal-kontabilità tal-Kummissjoni sabiex jiddelega wħud mill-kompiti tiegħu lill-persunal f’dawk l-uffiċċji u l-proċeduri operazzjonali għall-kontijiet tal-bank li l-uffiċċji Ewropej jistgħu jkunu awtorizzati jiftħu f’isem il-Kummissjoni.

(27)Sabiex tkompli titjieb il-kosteffiċjenza tal-aġenziji eżekuttivi u fid-dawl tal-esperjenza prattika miksuba b’korpi oħrajn tal-Unjoni, l-uffiċjal tal-kontabilità tal-Kummissjoni għandu jkun jista’ jiġi inkarigat bil-kompiti kollha jew b’parti mill-kompiti tal-uffiċjal tal-kontabilità tal-aġenzija eżekuttiva.

(28)Għal raġunijiet ta’ ċertezza legali, hemm bżonn li jiġi ċċarat li d-diretturi tal-aġenziji eżekuttivi jaġixxu bħala uffiċjal tal-awtorizzazzjoni mid-delegazzjoni meta jimmaniġġja approprjazzjonijiet operazzjonali ta’ programmi delegati lill-aġenzija tagħhom. Sabiex jinkiseb l-effett sħiħ tal-gwadanji fl-effiċjenza li jirriżultaw minn ċentralizzazzjoni globali ta’ ċerti servizzi ta’ appoġġ, għandha tissemma b’mod espliċitu l-possibbiltà li l-aġenziji eżekuttivi jimplimentaw nefqiet amministrattivi.

(29)Hemm bżonn li jiġu stabbiliti regoli dwar is-setgħat u r-responsabbiltajiet tal-atturi finanzjarji, b’mod partikolari l-uffiċjal tal-awtorizzazzjoni u l-uffiċjali tal-kontabilità.

(30)Il-Parlament Ewropew u l-Kunsill għandhom jiġu infurmati dwar il-ħatra ta’ uffiċjal tal-awtorizzazzjoni b’delega, ta’ awditur intern u ta’ uffiċjal tal-kontabilità jew dwar it-tmiem tad-dmirijiet tiegħu.

(31)L-uffiċjali tal-awtorizzazzjoni għandhom ikunu kompletament responsabbli għall-operazzjonijiet kollha ta’ dħul u ta’ nefqa eżegwiti taħt l-awtorità tagħhom, inkluż f’termini tas-sistemi ta’ kontroll intern, u għandhom jinżammu responsabbli għall-azzjonijiet tagħhom, inkluż, fejn hemm bżonn, permezz ta’ proċeduri dixxiplinari.

(32)Konsegwentement, għandhom jiġu stabbiliti wkoll il-kompiti, ir-responsabbiltajiet u l-prinċipji tal-proċeduri li jridu jiġu osservati. Hemm bżonn li jiġi pprovdut ukoll li l-uffiċjal tal-awtorizzazzjoni b’delega għandhom jaraw li l-uffiċjali tal-awtorizzazzjoni b’sottodelega u l-persunal tagħhom jirċievu informazzjoni dwar l-istandards ta’ kontroll u l-metodi u t-tekniki rispettivi u li jittieħdu miżuri sabiex jiġi żgurat il-funzjonament tas-sistema ta’ kontroll li għandha tieħu post l-obbligu li jiġi stabbilit kodiċi speċifiku ta’ standards professjonali applikabbli għal verifiki finanzjarji biss. Ir-responsabbiltajiet meħudin jingħata kont tagħhom f’rapport annwali lill-istituzzjoni u r-rapport għandu jkun fih l-informazzjoni finanzjarja u ta' ġestjoni meħtieġa sabiex jappoġġja d-dikjarazzjoni ta’ garanzija tal-uffiċjal tal-awtorizzazzjoni b’delega dwar it-twettiq ta’ dmirijietu, inkluża l-informazzjoni dwar il-prestazzjoni ġenerali tal-operazzjonijiet imwettqin. Id-dokumenti ta’ prova relatati mal-operazzjonijiet imwettqa għandhom jinżammu. Fl-aħħar nett, il-forom diversi kollha ta’ proċeduri nnegozjati għall-għoti tal-kuntratti pubbliċi għandhom, minħabba li dawk il-kuntratti jirrappreżentaw derogi mill-proċeduri normali ta’ għoti, ikunu s-suġġett ta’ rapport speċjali lill-istituzzjoni u ta’ komunikazzjoni lill-Parlament Ewropew u lill-Kunsill.

(33)Għandu jiġi kkunsidrat ir-rwol doppju tad-delega tal-Kap tal-Unjoni, u tad-deputati tagħhom fin-nuqqas tagħhom, bħala uffiċjal tal-awtorizzazzjoni b’sottodelega għas-Servizz Ewropew għall-Azzjoni Esterna (minn hawn ’il quddiem “SEAE”) u, fir-rigward ta’ approprjazzjonijiet operazzjonali, għall-Kummissjoni.

(34)Id-delega tas-setgħat tal-implimentazzjoni tal-baġit mill-Kummissjoni dwar l-approprjazzjonijiet operazzjonali tat-taqsima tagħha stess lid-deputati Kapijiet tad-Delegi hija ristretta għal sitwazzjonijiet li fihom it-twettiq ta’ dawn il-kompiti mid-deputati Kapijiet tad-Delegazzjonijiet ikun strettament neċessarju sabiex tiġi żgurata kontinwità tal-operat fin-nuqqas tal-Kapijiet tad-Delegazzjonijiet. Id-deputati Kapijiet tad-Delegazzjonijiet ma jistgħux jeżerċitaw dawn is-setgħat fuq bażi sistematika jew għal raġunijiet ta’ qsim tax-xogħol intern.

(35)L-uffiċjal tal-kontabilità jibqa reponsabbli għal-eżekuzzjoni xierqa tal-pagamenti, il-ġbir tad-dħul u l-irkupru tal-ammonti riċevibbli. Jimmaniġġja t-teżor, il-kontijiet tal-bank u l-fajls ta’ partijiet terzi, iżomm il-kontijiet u huwa responsabbli għat-tfassil tad-dikjarazzjonijiet finanzjarji tal-istituzzjoni. L-uffiċjal tal-kontabilità tal-Kummissjoni huwa l-unika persuna li hija intitolata li tiddefinixxi r-regoli tal-kontabilità u t-tabelli tal-kontijiet armonizzati, filwaqt li l-uffiċjali tal-kontabilità tal-istituzzjonijiet kollha l-oħrajn tal-Unjoni jiddefinixxu l-proċeduri tal-kontabilità applikabbli fl-istituzzjonijiet tagħhom.

(36)Għandhom jiġu stabbiliti wkoll l-arranġamenti għall-ħatra u għat-tmiem tad-dmirijiet tal-uffiċjal tal-kontabilità.

(37)Xieraq li l-uffiċjal tal-kontabilità jistabbilixxi proċeduri sabiex jiżgura li l-kontijiet miftuħin għar-rekwiżiti tal-immaniġġjar ta’ flus u l-kontijiet għall-antiċipi mhumiex f’sitwazzjoni midjuna.

(38)Għandhom jiġu stipulati wkoll il-kundizzjonijiet għall-użu tal-kontijiet għall-antiċipi, sistema ta’ ġestjoni li tikkostitwixxi eċċezzjoni għall-proċeduri baġitarji normali, filwaqt li għandhom jiġu stabbiliti l-kompiti u r-responsabbiltajiet tal-amministraturi tal-imprest, kif ukoll dawk tal-uffiċjal tal-awtorizzazzjoni u tal-uffiċjal tal-kontabilità b’rabta mal-kontroll tal-kontijiet għall-antiċipi. Il-Parlament Ewropew u l-Kunsill għandhom jiġu infurmati dwar kull ħatra jew tmiem tad-dmirijiet. Għal raġunijiet ta’ effiċjenza, għandhom jiġu stabbiliti kontijiet għall-antiċipi fid-delegazzjonijiet tal-Unjoni, għal approprjazzjonijiet kemm mill-Kummissjoni kif ukoll mit-taqsimiet tal-baġit relatati mas-SEAE. Xieraq ukoll li f’ċerti kundizzjonijiet ikun awtorizzat l-użu ta’ kontijiet għall-antiċipi fid-delegazzjoni tal-Unjoni għal ħlasijiet ta’ ammonti limitati bi proċeduri baġitarji. Rigward il-ħatra ta’ amministraturi tal-imprest, intwera li hemm bżonn li dawn jingħażlu anki minn fost il-persunal imħaddem mill-Kummissjoni fil-qasam ta’ operazzjonijiet ta’ għajnuna għall-immaniġġjar ta’ kriżijiet u ta’ għajnuna umanitarja kull meta ma jkunx hemm persunal statutorju tal-Kummissjoni disponibbli.

(39)Sabiex jittieħed kont tas-sitwazzjoni fil-qasam tal-operazzjonijiet ta’ għajnuna umanitarja kull meta ma jkun hemm ebda persunal statutorju rispettiv tal-Kummissjoni disponibbli u jkun hemm diffikultajiet tekniċi sabiex l-impenji legali kollha jiġu ffirmati mill-uffiċjal tal-awtorizzazzjoni responsabbli, għandu jkun awtorizzat li l-persunal imħaddem mill-Kummissjoni f’dak il-qasam jiffirma impenji legali ta’ valur baxx ħafna li jasal sa EUR 2 500 li jkunu marbutin ma’ pagamenti eżegwiti mill-kontijiet għall-antiċipi, u li l-Kapijiet tad-delegazzjonijiet tal-Unjoni jew id-deputati tagħhom jiffirmaw impenji legali fuq l-ordni tal-uffiċjal tal-awtorizzazzjoni responsabbli.

(40)Ladarba jkunu ġew definiti l-kompiti u r-responsabbiltajiet ta’ kull attur finanzjarju, huma jistgħu jinżammu responsabbli biss skont il-kundizzjonijiet stipulati fir-Regolamenti tal-Persunal għall-Uffiċjali u l-Kondizzjonijiet tal-Impjieg Applikabbli għall-Aġenti l-Oħra tal-Unjoni. Fl-istituzzjonijiet tal-Unjoni twaqqfu l-bordijiet speċjalizzati dwar l-irregolaritajiet finanzjarji, iżda minħabba n-numru limitat ta’ każijiet sottomessi lilhom u għal raġunijiet ta’ effiċjenza, xieraq li l-funzjonijiet tagħhom jiġu ttrasferiti għall-bord interistituzzjonali li għadu kemm twaqqaf bil-għan li jivvaluta t-talbiet u joħroġ rakkomandazzjonijiet dwar l-impożizzjoni ta’ sanzjonijiet amministrattivi (esklużjoni u penali finanzjarja) riferiti lilu mill-Kummissjoni jew minn istituzzjonijiet u korpi oħrajn tal-Unjoni. Dan it-trasferiment għandu wkoll l-għan li jevita xogħol doppju u li jimmitiga r-riskji ta’ rakkomandazzjonijiet jew opinjonijiet kontradittorji, f’każijiet li fihom ikunu involuti kemm attur ekonomiku kif ukoll membru tal-persunal tal-UE. Għandha tinżamm il-proċedura li permezz tagħha uffiċjal tal-awtorizzazzjoni jista’ jfittex konferma ta’ struzzjoni li dak l-uffiċjali jqis li tkun irregolari jew li tmur kontra l-prinċipju ta’ ġestjoni finanzjarja tajba u b’hekk jinħeles minn kull responsabbiltà. Il-kompożizzjoni ta’ dan il-bord għandha tiġi mmodifikata meta jaqdi dan ir-rwol.

(41)Rigward id-dħul, hemm bżonn li jiġu indirizzati l-aġġustamenti negattivi tar-riżorsi proprji koperti mir-Regolament tal-Kunsill dwar it-tqegħid għad-dispożizzjoni tar-riżorsi proprji tal-Unjoni Ewropea. Ħlief għall-każ speċjali ta’ riżorsi proprji, hemm bżonn li jinżammu l-kompiti u l-kontrolli li jaqgħu taħt ir-responsabbiltà tal-uffiċjali tal-awtorizzazzjoni fl-istadji differenti tal-proċedura: l-istabbiliment tal-istima tal-ammonti riċevibbli, l-ordni ta’ rkupru, il-ħruġ tan-nota ta’ debitu li tinforma lid-debitur li ġie stabbilit l-ammont riċevibbli, il-kalkolu ta’ kwalunkwe mgħax ta’ inadempjenza dovut u d-deċiżjoni, fejn meħtieġa, li jiġi rrinunzjat intitolament soġġett għall-kriterji li jiggarantixxu l-konformità mal-ġestjoni finanzjarja tajba sabiex jiġi żgurat il-ġbir effiċjenti tad-dħul.

(42)L-uffiċjal tal-awtorizzazzjoni għandu jkun jista’ jirrinunzja b’mod totali jew parzjali għall-irkupru ta’ ammont riċevibbli stabbilit meta d-debitur ikun daħal f’xi wieħed mill-proċedimenti ta’ insolvenza ddefiniti mir-Regolament (UE) 2015/848 tal-Parlament Ewropew u tal-Kunsill tal-20 ta’ Mejju 2015 dwar il-proċedimenti ta’ insolvenza, b’mod partikolari f’każijiet ta’ arranġamenti ġudizzjarji, kompożizzjonijiet u proċedimenti analogi.

(43)Għandhom jiġu applikati dispożizzjonijiet speċifiċi dwar il-proċeduri tal-aġġustament jew it-tħassir ta’ stima ta’ ammont riċevibbli.

(44)Minħabba l-iżviluppi riċenti fis-swieq finanzjarji u r-rata tal-BĊE applikata għall-operazzjonijiet ta’ rinfinanzjament ewlenin tiegħu, hemm bżonn li jiġu riveduti d-dispożizzjonijiet dwar ir-rata tal-imgħax għal multi jew għal penali oħrajn sabiex jiġi pprovdut għal regoli f’każijiet ta’ rata tal-imgħax negattiva.

(45)Sabiex tkun riflessa n-natura speċifika ta’ riċevibbli li jikkonsistu f’multi jew penali oħrajn imposti mill-Istituzzjonijiet skont it-TFUE jew it-Trattat tal-Euratom, hemm bżonn li jiddaħħlu dispożizzjonijiet speċifiċi dwar ir-rati tal-imgħax applikabbli fuq ammonti dovuti iżda li għadhom ma tħallsux, f’każ li tali ammonti jiżdiedu mill-Qorti tal-Ġustizzja tal-Unjoni Ewropea.

(46)Ir-regoli dwar l-irkupru għandhom jiġu kemm iċċarati kif ukoll imsaħħin. B’mod partikolari, għandu jiġi speċifikat li l-uffiċjal tal-kontabilità għandu jirkupra l-ammonti billi jpaċihom ukoll kontra ammonti dovuti lid-debitur minn aġenzija eżekuttiva meta jimplimenta l-baġit tal-Unjoni.

(47)Għall-fini ta’ sigurtà legali, għandhom jiġu ddefiniti r-regoli dwar meta għandha tintbagħat nota ta’ debitu.

(48)Sabiex tiġi żgurata l-ġestjoni tal-assi filwaqt li tiġi ġġenerata wkoll remunerazzjoni finanzjarja, jeħtieġ li l-ammonti jissarrfu proviżorjament, bħal multi ta’ kompetizzjonijiet li jkunu qegħdin jiġu kkontestati, investiti f’assi finanzjarji, u li tiġi ddeterminata l-assenjazzjoni tar-redditu fuqhom. Peress li l-Kummissjoni mhijiex l-unika istituzzjoni li hija intitolata timponi multi jew penali oħrajn, hemm bżonn li jiġu stabbiliti dispożizzjonijiet dwar multi jew penali oħrajn imposti minn istituzzjonijiet oħrajn u li jiġu stabbiliti regoli għall-irkupru tagħhom li għandhom ikunu ekwivalenti għall-multi jew għall-penali imposti mill-Kummissjoni.

(49)Sabiex jiġi żgurat li l-Kummissjoni jkollha l-informazzjoni kollha meħtieġa għall-adozzjoni tad-deċiżjonijiet ta’ finanzjament, jeħtieġ li jiġu stabbiliti r-rekwiżiti minimi għall-kontenut tad-deċiżjonijiet ta’ finanzjament fuq għotjiet, akkwisti, fondi fiduċjarji, premjijiet, strumenti finanzjarji, faċilitajiet ta’ taħlit u garanziji baġitarji. Fl-istess ħin, sabiex tingħata perspettiva aktar fit-tul lir-riċevituri potenzjali, hemm bżonn li jkun permess li d-deċiżjonijiet ta’ finanzjament jiġu adottati għal aktar minn sena iżda l-implimentazzjoni tkun soġġetta għad-disponibbiltà tal-approprjazzjonijiet baġitarji għas-sena rispettiva. Sabiex tiġi stabbilita perspettiva aktar fit-tul bħal din, hemm bżonn li jitnaqqas in-numru tal-elementi meħtieġa għad-deċiżjoni ta’ finanzjament. Bl-għan ta’ simplifikazzjoni, id-deċiżjoni ta’ finanzjament għandha tkun tikkostitwixxi fl-istess ħin programm annwali jew pluriennali. Peress li l-kontribuzzjoni lill-korpi msemmija fl-Artikoli 69 u 70 diġà hija stabbilita fil-baġit annwali, ma għandux ikun hemm bżonn li tiġi adottata deċiżjoni ta’ finanzjament speċifika f’dan ir-rigward.

(50)Fir-rigward tan-nefqa, għandhom jiġu definiti kemm ir-relazzjoni bejn id-deċiżjonijiet ta’ finanzjament, l-impenji globali u l-impenji individwali, kif ukoll il-kunċetti ta’ impenn baġitarju u legali tan-nefqa għandhom jiġu ċċarati sabiex jiġi stabbilit qafas ċar għall-fażijiet differenti tal-implimentazzjoni tal-baġit.

(51)Sabiex b’mod partikolari jitqies l-għadd ta’ impenji legali konklużi fid-delegazzjonijiet u fir-rappreżentazzjonijiet tal-Unjoni u ċ-ċaqliq fir-rata tal-kambju esperjenzat minnhom, l-impenji proviżorji għandhom ikunu possibbli wkoll f’każijiet li fihom ir-riċevituri finali u l-ammonti jkunu magħrufin.

(52)Sabiex isir użu aħjar mill-approprjazzjonijiet imqegħdin għad-dispożizzjoni għall-implimentazzjoni ta’ azzjonijiet esterni, il-limitu ta’ żmien li matulu jistgħu jsiru l-impenji legali individwali fuq il-bażi ta’ impenn baġitarju globali għandu jitneħħa flimkien mal-obbligu li jiġi konkluż ftehim ta’ kontribuzzjoni sal-31 ta’ Diċembru tas-sena n+1 f’każijiet li fihom ftehim ta’ finanzjament ma’ pajjiż terz jippreżenta l-impenn baġitarju globali li jkopri l-ftehim ta’ kontribuzzjoni wkoll.

(53)Rigward it-tipoloġija tal-pagmenti li jistgħu jsiru mill-uffiċjali tal-awtorizzazzjoni , għandha tiġi pprovduta kjarifika tad-diversi tipi ta’ pagamenti, skont il-prinċipju ta’ ġestjoni finanzjarja tajba. Ir-regoli għall-ikklerjar tal-pagamenti tal-prefinanzjament għandhom jiġu ċċarati aktar b’mod partikolari għal sitwazzjonijiet li fihom ma jkunx possibbli kklerjar interim. Għal dan l-għan, għandhom jiddaħħlu dispożizzjonijiet xierqa fl-impenji legali ffirmati.

(54)Jinħtieġ li dan ir-Regolament jistipula li l-pagamenti jridu jsiru fi ħdan limitu ta’ żmien speċifikat u li f’każ ta’ nuqqas ta’ rispett ta’ dan il-limitu ta’ żmien, il-kredituri se jkunu intitolati għal imgħaxijiet ta’ inadempjenza li jiġu ddebitati lill-baġit, bl-eċċezzjoni tal-Istati Membri, u l-Bank Ewropew tal-Investiment u l-Bank Ewropew tal-Investiment introdotti ġodda.

(55)Huwa kkunsidrat xieraq li jiġu integrati d-dispożizzjonijiet dwar il-validazzjoni u l-awtorizzazzjoni tan-nefqa f’artikolu wieħed u li tiddaħħal definizzjoni tad-diżimpenji. Peress li t-tranżazzjonijiet jitwettqu f’sistemi kompjuterizzati, il-kunċett ta’ “ffirmar” ta’ kupun ‘mgħoddi għall-ħlas’” ġie sostitwit minn “firma b’sigurtà elettronika” ħlief f’numru limitat ta’ każijiet. Huwa neċessarju wkoll li jiġi ċċarat li l-validazzjoni tan-nefqa tapplika għall-kostijiet kollha eliġibbli, jiġifieri anki dawk li mhumiex assoċjati ma' talba għall-ħlas, li huwa l-każ għall-ikklerjar tal-prefinanzjament.

(56)Sabiex tonqos il-kumplessità, jiġu ssimplifikati r-regoli eżistenti u titjieb iċ-ċarezza ta’ dan ir-Regolament, għandhom jiġu stabbiliti regoli komuni għal aktar minn strument ta’ implimentazzjoni tal-baġit wieħed. Għal dawk ir-raġunijiet, ċerti dispożizzjonijiet għandhom jiġu raggruppati, l-għażla tal-kliem u l-kamp ta’ applikazzjoni ta’ dispożizzjonijiet oħrajn għandhom jiġu allinjati u ripetizzjonijiet u kontroreferenzi żejda għandhom jitneħħew.

(57)Għandha tinxteħet enfasi akbar fuq il-prestazzjoni u r-riżultati. Għaldaqstant huwa xieraq li tiġi ddefinita forma addizzjonali ta’ finanzjament li mhijiex marbuta mal-kostijiet tal-operazzjonijiet rilevanti minbarra l-forom ta’ kontribuzzjoni tal-Unjoni diġà ferm stabbiliti (rimborż tal-kostijiet eliġibbli fil-fatt imġarrbin, finanzjament ta’ kostijiet unitarji, ta’ somom f’daqqa u ta’ rata fissa). Din il-forma ta’ finanzjament għandha tkun ibbażata fuq l-issodisfar ta’ ċerti kundizzjonijiet ex ante jew inkella fuq il-kisba ta’ riżultati mkejlin b'referenza għat-tragwardi stabbiliti preċedentement jew permezz ta’ indikaturi tal-prestazzjoni.

(58)Meta l-Kummissjoni twettaq valutazzjonijiet tal-kapaċità operazzjonali u finanzjarja tar-riċevituri ta’ fondi tal-UE jew tas-sistemi u tal-proċeduri tagħhom, għandha tkun kapaċi tiddependi fuq il-valutazzjonijiet diġà mwettqin minn entitajiet jew donaturi oħrajn bħal organizzazzjonijiet internazzjonali, sabiex tevita valutazzjonijiet duplikati tal-istess riċevituri. Il-possibbiltà ta’ kontrodipendenza fuq valutazzjonijiet imwettqin minn entitajiet oħrajn għandha tintuża meta dawn il-valutazzjonijiet ikunu saru fir-rigward ta’ kundizzjonijiet ekwivalenti għal dawk stipulati f’dan ir-Regolament għall-metodu ta’ implimentazzjoni applikabbli. Għaldaqstant, sabiex titrawwem kontrodipendenza fuq il-valutazzjonijiet fost id-donaturi, il-Kummissjoni għandha tippromwovi r-rikonoxximent ta’ standards aċċettati f’livell internazzjonali jew l-aħjar prattiki internazzjonali.

(59)Importanti wkoll li jiġi evitat li r-riċevituri ta’ fondi tal-UE jiġu awditjati diversi drabi minn entitajiet differenti dwar l-użu ta’ dawn il-fondi. Għaldaqstant hemm bżonn li tkun prevista l-possibbiltà ta’ dipendenza fuq awditi diġà mwettqin minn awdituri indipendenti diment li jkunu bbażati fuq standards aċċettati f’livell internazzjonali, li jipprovdu garanzija raġonevoli, u li jkunu twettqu fuq id-dikjarazzjonijiet u r-rapporti finanzjarji li jistipulaw l-użu tal-kontribuzzjoni tal-Unjoni. Imbagħad dawn l-awditi għandhom jifformaw il-bażi tal-garanzija kumplessiva fuq l-użu tal-fondi tal-UE.

(60)Huwa importanti li l-Istati Membri jkunu jistgħu jitolbu li r-riżorsi allokati lilhom permezz ta’ implimentazzjoni kondiviża jiġu ttrasferiti fil-livell tal-Unjoni u jiġu implimentati mill-Kummissjoni f’implimentazzjoni diretta jew indiretta, fejn possibbli għall-benefiċċju tal-Istat Membru kkonċernat. B'hekk jiġi ottimizzat l-użu ta’ dawn ir-riżorsi u tal-istrumenti stabbiliti skont dan ir-Regolament jew skont Regolamenti settorjali speċifiċi inkluż ir-Regolament tal-FEIS, li għalihom l-Istati Membri jitolbu t-trasferiment ta’ dawn ir-riżorsi. Sabiex tiġi ggarantita implimentazzjoni effiċjenti ta’ dawn l-istrumenti, hemm bżonn li jkun previst li meta r-riżorsi jiġu ttrasferiti lil strumenti stabbiliti skont dan ir-Regolament jew skont Regolamenti settorjali speċifiċi inkluż ir-Regolament FEIS, għandhom ikunu japplikaw ir-regoli ta’ dawk ir-regolamenti.

(61)Sabiex tipprovdi għal mekkaniżmu ta’ kooperazzjoni fit-tul mar-riċevituri tal-finanzjament tal-Unjoni, għandu jkun hemm provvediment għall-possibbiltà li jiġu ffirmati ftehimiet qafas ta’ sħubija finanzjarja. Il-ftehimiet qafas ta’ sħubija finanzjarja għandhom jiġu implimentati permezz ta’ għotjiet jew permezz ta’ ftehimiet ta’ kooperazzjoni ma’ entitajiet li jimplimentaw fondi tal-Unjoni. Għal dan il-għan, il-kontenut minimu ta' tali ftehimiet għandu jiġi speċifikat. Il-ftehimiet qafas ta’ sħubija finanzjarja ma għandhomx jillimitaw l-aċċess għall-finanzjament tal-Unjoni indebitament.

(62)Il-kundizzjonijiet u l-proċeduri għas-sospensjoni, għat-terminazzjoni u għat-tnaqqis tal-kontribuzzjoni tal-Unjoni għandhom jiġu armonizzati fl-istrumenti ta’ implimentazzjoni tal-baġit differenti (pereżempju għotjiet, akkwist, implimentazzjoni indiretta, premji, eċċ.). Għandhom jiġu ddefiniti r-raġunijiet għal tali sospensjoni, terminazzjoni jew tnaqqis.

(63)Jinħtieġ li dan ir-Regolament jistabbilixxi perjodi standard għaż-żamma mir-riċevituri ta’ dokumenti relatati mal-kontribuzzjonijiet mill-Unjoni sabiex jiġu evitati rekwiżiti kuntrattwali diverġenti jew sproporzjonati filwaqt li xorta jipprovdu biżżejjed żmien lill-Kummissjoni, lill-Uffiċċju Ewropew Kontra l-Frodi u lill-Qorti tal-Awdituri sabiex jiksbu aċċess għal tali data u dokumenti u jwettqu l-kontrolli u l-awditi ex post. Barra minn hekk, il-parteċipanti u r-riċevituri għandhom ikunu obbligati jikkooperaw fil-protezzjoni tal-interess finanzjarju tal-Unjoni.

(64)Sabiex tiġi pprovduta informazzjoni adegwata lill-parteċipanti u lir-riċevituri u sabiex jiġi żgurat li jkollhom il-possibbiltà li jeżerċitaw id-dritt ta’ difiża tagħhom, dan ir-Regolament għandu jippermetti lill-parteċipanti u lir-riċevituri jissottomettu l-osservazzjonijiet tagħhom qabel ma jadottaw xi miżura li taffettwa b’mod avvers id-drittijiet tagħhom u jkunu informati dwar il-mezzi ta’ rimedju li jistgħu jħaddmu sabiex jikkontestaw miżura bħal din.

(65)Sabiex ikunu mħarsa l-interessi finanzjarji tal-Unjoni, il-Kummissjoni għandha twaqqaf sistema unika ta’ identifikazzjoni bikrija u ta’ esklużjoni.

(66)Is-sistema ta’ identifikazzjoni bikrija u ta’ esklużjoni għandha tapplika għal parteċipanti, għal riċevituri, għal entitajiet li l-kandidat jew l-offerent biħsiebu joqgħod fuq il-kapaċità tagħhom jew għal sottokuntratturi ta’ kuntrattur, għal kwalunkwe persuna jew entità li tirċievi fondi tal-Unjoni fejn il-baġit ikun implimentat b’implimentazzjoni diretta, għal kwalunkwe persuna jew entità li tirċievi fondi tal-Unjoni permezz ta’ strumenti finanzjarji implimentati b’mod dirett u parteċipanti jew benefiċjarji ta’ entitajiet li jimplimentaw il-baġit permezz ta’ implimentazzjoni kondiviża.

(67)Għandu jiġi ċċarat li meta deċiżjoni li tiġi rreġistrata persuna jew entità fis-sistema ta’ identifikazzjoni bikrija jew ta’ esklużjoni tittieħed fuq il-bażi tas-sitwazzjonijiet ta’ esklużjoni ta’ persuna fiżika jew ġuridika li hija membru tal-korp amministrattiv, maniġerjali jew superviżorju ta’ dik il-persuna jew l-entità, jew li għandha setgħat ta’ rappreżentazzjoni, ta’ deċiżjoni jew ta’ kontroll fir-rigward ta’ dik il-persuna jew l-entità jew persuna fiżika jew ġuridika li tassumi responsabbiltà illimitata għad-djun ta’ dik il-persuna jew l-entità jew persuna fiżika li hija essenzjali għall-għoti jew għall-implimentazzjoni tal-impenn legali, l-informazzjoni rreġistrata fil-bażi ta’ dejta għandha tkun tinkludi l-informazzjoni dwar dawn il-persuni.

(68)Id-deċiżjoni ta’ esklużjoni ta’ persuna jew entità mill-parteċipazzjoni fi proċeduri ta’ għoti jew l-impożizzjoni ta' penali finanzjarja u d-deċiżjoni li tiġi ppubblikata l-informazzjoni marbuta għandha tittieħed mill-uffiċjal tal-awtorizzazzjoni responsabbli, fid-dawl tal-awtonomija tiegħu fi kwistjonijiet amministrattivi. Fin-nuqqas ta' sentenza finali jew deċiżjoni amministrattiva finali u f'każijiet marbuta ma' ksur serju tal-kuntratt, l-uffiċjali tal-awtorizzazzjoni responsabbli għandhom jieħdu d-deċiżjoni tagħhom wara li jikkunsidraw ir-rakkomandazzjoni tal-bord fuq il-bażi ta’ klassifikazzjoni preliminari fil-liġi. Il-bord għandu jivvaluta wkoll id-durata tal-esklużjoni f' każijiet fejn id-durata ma tkunx ġiet stabbilita permezz ta' sentenza finali jew permezz ta’ deċiżjoni amministrattiva finali.

(69)Ir-rwol tal-bord għandu jkun li jiżgura t-tħaddim koerenti tas-sistema ta' esklużjoni. Il-bord għandu jkun magħmul minn president permanenti, rappreżentanti tal-Kummissjoni u rappreżentant tal-uffiċjal tal-awtorizzazzjoni responsabbli.

(70)Il-klassifikazzjoni preliminari fil-liġi ma tippreġudikax il-valutazzjoni finali tal-aġir tal-persuna jew tal-entità kkonċernata mill-awtoritajiet kompetenti tal-Istati Membri skont il-liġi nazzjonali. Għalhekk, ir-rakkomandazzjoni tal-bord, kif ukoll id-deċiżjoni tal-uffiċjal tal-awtorizzazzjoni responsabbli, għandhom jiġu riveduti wara n-notifika ta' din il-valutazzjoni finali.

(71)Persuna jew entità għandha tiġi eskluża mill-uffiċjal tal-awtorizzazzjoni responsabbli meta tinqata’ sentenza finali jew tittieħed deċiżjoni amministrattiva finali f'każ ta’ mġiba professjonali ħażina serja, nonkonformità, kemm jekk intenzjonata jew le, mal-obbligi marbuta mal-ħlas tal-kontribuzzjonijiet tas-sigurtà soċjali jew il-ħlas tat-taxxi, frodi li jaffettwa l-baġit, korruzzjoni, parteċipazzjoni f'organizzazzjoni kriminali, ħasil tal-flus, finanzjament tat-terroriżmu, reati relatati mat-terroriżmu, tħaddim tat-tfal jew forom oħra ta' traffikar tal-bnedmin jew irregolarità. Għandha tiġi eskluża wkoll fil-każ ta' ksur serju ta' impenn legali jew falliment.

(72)Meta jkun qed jiddeċiedi dwar l-esklużjoni jew l-impożizzjoni ta' penali finanzjarja u dwar il-pubblikazzjoni tagħha jew dwar iċ-ċaħda ta' persuna jew ta’ entità, l-uffiċjal tal-awtorizzazzjoni responsabbli għandu jiżgura konformità mal-prinċipju tal-proporzjonalità billi jqis b'mod partikolari s-serjetà tas-sitwazzjoni, l-impatt baġitarju tagħha, iż-żmien li għadda mill-aġir rilevanti, id-durata tagħha u r-rikorrenza tagħha, l-intenzjoni jew il-livell ta' negliġenza u l-livell ta' kollaborazzjoni tal-persuna jew tal-entità mal-awtorità kompetenti rilevanti dwar l-investigazzjoni u l-kontribut tagħha għall-investigazzjoni.

(73)L-uffiċjal tal-awtorizzazzjoni responsabbli għandu jkun jista' wkoll jeskludi lil persuna jew entità meta persuna fiżika jew ġuridika li tassumi responsabbiltà illimitata għad-djun ta' dak l-attur ekonomiku tkun falluta jew f'sitwazzjoni simili ta' insolvenza jew fejn dik il-persuna fiżika jew ġuridika tonqos milli tikkonforma mal-obbligi tagħha li tħallas il-kontribuzzjonijiet tas-sigurtà soċjali jew it-taxxi, meta tali sitwazzjonijiet iħallu impatt fuq is-sitwazzjoni finanzjarja tal-attur ekonomiku.

(74)Persuna jew entità ma għandhiex tkun soġġetta għal deċiżjoni ta' esklużjoni meta tkun ħadet miżuri ta' rimedju, u b'hekk tkun uriet li tista' tiġi fdata. Dik il-possibbiltà ma għandhiex tapplika f'każ tal-aktar attivitajiet kriminali serji.

(75)Fid-dawl tal-prinċipju tal-proporzjonalità, għandhom jiġu speċifikati l-każijiet li fihom penali finanzjarja tista' tiġi imposta bħala alternattiva għall-esklużjoni u l-każijiet li fihom is-serjetà tal-aġir tal-benefiċjarju kkonċernat meta jkun ipprova indebitament jikseb fondi tal-Unjoni tiġġustifika l-impożizzjoni ta' penali finanzjarja apparti l-esklużjoni sabiex jiġi żgurat effett deterrenti. Għandha tiġi ddefinita wkoll il-penali finanzjarja minima u massima li tista' tiġi imposta mill-awtorità kontraenti.

(76)Penali finanzjarja għandha tiġi imposta biss fuq benefiċjajru u mhux fuq parteċipant peress li l-ammont tal-penali finanzjarja li ser tiġi imposta tkun ikkalkolata fuq il-bażi tal-valur tal-impenn legali inkwistjoni.

(77)Il-possibbiltà li jiġu applikati penali amministrattivi u/jew finanzjarji fuq bażi regolatorja hija indipendenti mill-possibbiltà li jiġu applikati penali kuntrattwali, bħal danni likwidati u għandha tiġi nnutata.

(78)Id-durata tal-esklużjoni għandha tkun limitata fiż-żmien, bħal fil-każ tad-Direttiva 2014/24/UE 17 u għandha tirrispetta l-prinċipju tal-proporzjonalità.

(79)Jeħtieġ li jiġu determinati d-data tal-bidu u d-durata tal-perjodu ta' limitazzjoni għall-impożizzjoni ta' sanzjonijiet amministrattivi.

(80)Huwa importanti li jkun jista' jissaħħaħ l-effett ta' deterrent miksub permezz tal-esklużjoni jew tal-penali finanzjarja. F'dak ir-rigward, l-effett ta' deterrent għandu jissaħħaħ bil-possibbiltà li tiġi ppubblikata l-informazzjoni marbuta mal-esklużjoni u/jew il-penali finanzjarja, b'rispett sħiħ tar-rekwiżiti ta' protezzjoni tad-dejta stipulati fir-Regolament (KE) Nru 45/2001 tal-Parlament Ewropew u tal-Kunsill (6) u fid-Direttiva 95/46/KE tal-Parlament Ewropew u tal-Kunsill (7). Dan għandu jikkontribwixxi sabiex jiżgura li ma jirrepetix ruħu l-istess aġir. Għal raġunijiet ta' ċertezza legali u f'konformità mal-prinċipju tal-proporzjonalità għandu jiġi speċifikat f'liema sitwazzjonijiet ma għandhiex issir pubblikazzjoni. Fl-evalwazzjoni tiegħu, l-uffiċjal tal-awtorizzazzjoni responsabbli għandu jikkunsidra kull rakkomandazzjoni tal-bord. Sa fejn huma kkonċernati l-persuni fiżiċi, id-dejta personali għandha tiġi ppubblikata biss f'każijiet eċċezzjonali ġġustifikati mis-serjetà tal-aġir jew l-impatt tiegħu fuq l-interessi finanzjarji tal-Unjoni.

(81)L-informazzjoni relatata ma’ esklużjoni jew ma’ penali finanzjarja għandha tiġi ppubblikata biss fil-każ ta' mġiba professjonali ħażina serja, frodi, nuqqasijiet sinifikanti fil-ħarsien tal-obbligi ewlenin ta' kuntratt iffinanzjat mill-baġit jew irregolarità.

(82)Il-kriterji għall-esklużjoni għandhom ikunu separati b'mod ċar mill-kriterji li jwasslu għal ċaħda possibbli minn proċedura partikolari.

(83)L-informazzjoni dwar l-identifikazzjoni bikrija ta' riskji u dwar l-impożizzjoni ta' sanzjonijiet amministrattivi fuq persuna ta’ entità għandha tiġi ċċentralizzata. Għal dak l-għan, informazzjoni relatata għandha tinħażen f'bażi ta' dejta maħluqa u mħaddma mill-Kummissjoni bħala sidt is-sistema ċentralizzata. Dik is-sistema għandha taħdem f'konformità sħiħa mad-dritt għall-privatezza u l-protezzjoni tad-dejta personali.

(84)Filwaqt li l-ħolqien u t-tħaddim tas-sistema unika ta' identifikazzjoni bikrija u ta’ esklużjoni għandha tkun ir-responsabbiltà tal-Kummissjoni, istituzzjonijiet u korpi oħrajn, kif ukoll l-entitajiet kollha li jimplimentaw il-baġit permezz ta’ implimentazzjoni diretta, kondiviża u indiretta għandhom jieħdu sehem f'dik is-sistema ċentralizzata billi jibagħtu l-informazzjoni rilevanti lill-Kummissjoni. L-uffiċjal tal-awtorizzazzjoni responsabbli u l-bord għandhom jiggarantixxu d-dritt ta' difiża tal-atturi ekonomiċi. L-istess dritt għandu jingħata lil persuna ta’ entità, fil-kuntest ta' identifikazzjoni bikrija, fejn att previst minn uffiċjal tal-awtorizzazzjoni jkun jista' jaffettwa b'mod negattiv id-drittijiet tal-persuna ta’ entità kkonċernata. Fil-każijiet ta' frodi, ta’ korruzzjoni jew ta’ kwalunkwe attività illegali oħra li taffettwa l-interessi finanzjarji tal-Unjoni li għadhom mhumiex soġġetti għal sentenza finali, l-uffiċjal tal-awtorizzazzjoni responsabbli u l-bord għandhom jingħataw il-possibbiltà li jiddifferixxu l-opportunità mogħtija lill-persuna ta’ entità li tissottometti l-osservazzjonijiet tagħha. Tali differiment għandu jiġi ġustifikat biss fejn ikun hemm raġunijiet leġittimi serji li tiġi ppreservata l-kunfidenzjalità tal-investigazzjoni.

(85)Il-Qorti tal-Ġustizzja tal-Unjoni Ewropea għandha tingħata ġurisdizzjoni illimitata fir-rigward tal-penali imposti skont dan ir-Regolament, f'konformità mal-Artikolu 261 tat-Trattat dwar il-Funzjonament tal-Unjoni Ewropea (TFUE).

(86)Sabiex jiffaċilitaw il-protezzjoni tal-interessi finanzjarji tal-Unjoni fil-mezzi kollha ta' implimentazzjoni, għandu jkun possibbli għall-entitajiet involuti fl-implimentazzjoni tal-baġit f'implimentazzjoni kondiviża u indiretta li jqisu, kif xieraq, esklużjonijiet li jiddeċiedu dwarhom l-uffiċjali tal-awtorizzazzjoni fil-livell tal-Unjoni.

(87)Dan ir-Regolament għandu jrawwem l-objettiv tal-amministrazzjoni elettronika, u b'mod partikolari l-użu tad-dejta elettronika fl-iskambju ta’ informazzjoni bejn l-istituzzjonijiet u partijiet terzi.

(88)Il-progress lejn l-iskambju elettroniku ta’ informazzjoni u s-sottomissjoni elettronika tad-dokumenti, li jikkostitwixxu miżura ewlenija ta’ simplifikazzjoni, għandu jkun akkumpanjat minn kundizzjonijiet ċari għall-aċċettazzjoni tas-sistemi li jridu jintużaw, bil-għan li jiġi stabbilit ambjent legalment b’saħħtu filwaqt li tinżamm il-flessibbiltà fil-ġestjoni tal-fondi tal-Unjoni għall-parteċipanti, għar-riċevituri u għall-uffiċċji tal-awtorizzazzjoni kif stipulat f’dan ir-Regolament.

(89)Għandhom jiġu stabbiliti regoli dwar il-kompożizzjoni u l-kompiti tal-kumitat inkarigat mill-valutazzjoni tad-dokumenti ta’ applikazzjoni fi proċeduri tal-akkwist, ta’ għoti tal-għotjiet u fil-kuntesti għal premji. Il-kumitat jista’ jkun kompost minn esperti esterni jekk dan ikun stipulat fl-att bażiku.

(90)B’konformità mal-prinċipju ta’ amministrazzjoni tajba, l-uffiċjal tal-awtorizzazzjoni għandu jitlob kjarifiki jew dokumenti neqsin filwaqt li jirrispetta l-prinċipju ta’ trattament indaqs u mingħajr ma jbiddel b’mod sostanzjali d-dokumenti tal-applikazzjoni. L-uffiċjal tal-awtorizzazzjoni jista’ jiddeċiedi li ma jagħmilx dan biss f’każijiet iġġustifikati kif xieraq. Barra minn hekk, l-uffiċjal tal-awtorizzazzjoni għandu jkun jista’ jikkoreġi żball klerikali ovvju jew jitlob lill-parteċipant jikkoreġih.

(91)Il-ġestjoni finanzjarja tajba għandha teħtieġ li l-Kummissjoni tipproteġi lilha nfisha billi titlob garanziji fi żmien il-ħlas tal-prefinanzjament. Ir-rekwiżit għall-kuntratturi u għall-benefiċjarji li jippreżentaw garanziji ma għandux ikun awtomatiku iżda għandu jkun ibbażat fuq analiżi tar-riskji. Meta matul l-implimentazzjoni l-uffiċjal tal-awtorizzazzjoni jiskopri li garanti ma għadux awtorizzat joħroġ garanziji skont il-liġi nazzjonali applikabbli, l-uffiċjal tal-awtorizzazzjoni għandu jkun jista’ jitlob li tinbidel il-garanzija.

(92)Is-settijiet ta’ regoli differenti għal implimentazzjoni diretta u indiretta, b’mod partikolari d-definizzjoni tal-kompiti ta’ implimentazzjoni tal-baġit, ħolqu konfużjoni u involvew riskju fi żbalji ta’ kwalifikazzjoni kemm għall-Kummissjoni kif ukoll għas-sħab tagħha u, b'hekk, għandhom jiġu ssimplifikati u armonizzati.

(93)Id-dispożizzjonijiet dwar il-valutazzjoni tal-pilastru ex ante għandhom jiġu riveduti sabiex il-Kummissjoni tkun tista’ tiddependi kemm jista’ jkun fuq is-sistemi u l-proċeduri tas-sħab tagħha li jitqiesu ekwivalenti għal dawk użati mill-Kummissjoni. Barra minn hekk, importanti li jiġi ċċarat li meta l-valutazzjoni ssib oqsma fejn il-proċeduri fis-seħħ ma jkunux jagħmlu biżżejjed sabiex iħarsu l-interessi finanzjarji tal-Unjoni, il-Kummissjoni tista’ tiffirma ftehimiet ta’ kontribuzzjoni filwaqt li timponi miżuri superviżorji addizzjonali. Importanti wkoll li jiġi ċċarat fejn il-Kummissjoni ma teħtieġx valutazzjoni tal-pilastru sabiex tiffirma ftehimiet ta’ kontribuzzjoni.

(94)Xieraq li jiġi indikat li r-rimunerazzjoni tal-Organizzazzjonijiet li jimplimentaw il-baġit tal-UE għandu jkollha natura bbażata fuq il-prestazzjoni, fejn rilevanti u possibbli.

(95)Il-Kummissjoni tidħol fi sħubijiet ma’ pajjiżi terzi permezz ta’ ftehimiet ta’ finanzjament. Importanti li jiġi ċċarat il-kontenut tal-ftehim ta’ finanzjament b’mod partikolari għal dawk il-partijiet li huma implimentati mill-pajjiż terz fl-implimentazzjoni indiretta.

(96)Importanti li tiġi rikonoxxuta n-natura speċifika tal-faċilitajiet ta’ tħallit fejn il-Kummissjoni tħallat il-kontribuzzjoni tagħha ma’ dik tal-Istituzzjonijiet Finanzjarji u li tiċċara l-applikazzjoni tat-Titolu X dwar l-Istrumenti Finanzjarji.

(97)Ir-regoli tal-akkwist u l-prinċipji applikabbli għall-kuntratti pubbliċi mogħtijin mill-istituzzjonijiet tal-Unjoni f’isimhom stess għandhom ikunu bbażati fuq ir-regoli li jinsabu fid-Direttiva 2014/23/UE tal-Parlament Ewropew u tal-Kunsill 18 u fid-Direttiva 2014/24/UE.

(98)Fil-każ ta’ kuntratti mħalltin, il-metodoloġija tal-awtoritajiet kontraenti għad-determinazzjoni tar-regoli applikabbli għandha tkun iċċarata.

(99)Il-miżuri ta' pubbliċità ex ante u ex post meħtieġa biex titnieda l-proċedura ta' akkwist għandhom jiġu ċċarati fil-każ ta' kuntratti 'l fuq u 'l isfel mil-livelli limitu stabbiliti fid-Direttiva 2014/24/UE u għal dawk li jaqgħu barra mill-kamp ta’ applikazzjoni ta’ dik id-Direttiva.

(100)Dan ir-Regolament għandu jinkludi lista eżawrijenti tal-proċeduri kollha ta' akkwist disponibbli għall-istituzzjonijiet tal-Unjoni irrispettivament mil-limiti.

(101)Fl-interessi ta’ simplifikazzjoni amministrattiva u sabiex titħeġġeġ il-parteċipazzjoni ta’ intrapriżi żgħar u ta’ daqs medju, għandu jiġi pprovdut għal proċeduri nnegozjati għal kuntratti b'valur medju.

(102)Bħal fil-każ tad-Direttiva 2014/24/UE, dan ir-Regolament għandu jippermetti li jiġi kkonsultat is-suq qabel it-tnedija ta' proċedura ta' akkwist. Sabiex jiġi żgurat li s-sħubija tal-innovazzjoni tintuża biss meta l-prodott mixtieq ma jkunx jeżisti fis-suq, f’dan ir-Regolament għandu jiġi stabbilit obbligu li t-tali konsultazzjoni tas-suq preliminari ssir qabel ma tintuża sħubija tal-innovazzjoni.

(103)Għandha tiġi ċċarata l-kontribuzzjoni tal-awtoritajiet kontraenti għall-ħarsien tal-ambjent u l-promozzjoni tal-iżvilupp sostenibbli, filwaqt li jiżguraw li jistgħu jiksbu l-aħjar valur għall-flus fil-kuntratti tagħhom, b'mod partikolari billi jintalbu tikketti speċifiċi jew bl-użu ta' metodi ta' għoti adegwati.

(104)Sabiex jiġi żgurat li, fl-eżekuzzjoni ta' kuntratti, l-atturi ekonomiċi jikkonformaw mal-obbligi ambjentali, soċjali u tal-liġi tax-xogħol applikabbli stabbiliti mil-liġi tal-Unjoni, mil-liġi nazzjonali, minn ftehimiet kollettivi jew il-konvenzjonijiet soċjali u ambjentali internazzjonali applikabbli elenkati fl-Anness X għad-Direttiva 2014/24/UE, dawn l-obbligi għandhom ikunu parti mir-rekwiżiti minimi definiti mill-awtorità kontraenti u għandhom jiġu integrati fil-kuntratti ffirmati mill-awtorità kontraenti.

(105)Huwa xieraq li każijiet differenti normalment magħrufa bħala sitwazzjonijiet ta' kunflitt ta' interess jiġu identifikati u ttrattati b’mod differenti. Il-kunċett ta' “kunflitt ta' interess” għandu jintuża biss għal każijiet li fihom entità jew persuna b’responsabbiltajiet għall-implimentazzjoni tal-baġit, għall-awditjar jew għall-kontroll jew uffiċjal jew aġent ta' istituzzjoni tal-Unjoni jkun jinsab f'sitwazzjoni bħal din. F'każijiet li fihom attur ekonomiku jipprova jinfluwenza proċedura b'mod mhux xieraq jew jikseb informazzjoni kunfidenzjali, dan l-aġir għandu jiġi ttrattat bħala mġiba professjonali ħażina serja. Barra minn hekk, l-atturi ekonomiċi jistgħu jkunu f'sitwazzjoni fejn m'għandhomx jintgħażlu biex jimplimentaw kuntratt minħabba interess professjonali li joħloq kunflitt. Pereżempju, kumpanija ma għandhiex tevalwa proġett li ħadet sehem fih jew awditur ma għandux ikun f'pożizzjoni li jawditja kontijiet li jkun iċċertifika fl-imgħoddi.

(106)F'konformità mad-Direttiva 2014/24/UE, għandu jkun possibbli li jiġi vverifikat jekk attur ekonomiku huwiex eskluż, li jiġu applikati kriterji tal-għażla u tal-għoti, kif ukoll li tiġi vverifikata l-konformità mad-dokumenti ta' akkwist fi kwalunkwe ordni. Bħala riżultat, għandu jkun possibbli li offerti jiġu miċħudin fuq il-bażi tal-kriterji tal-għoti mingħajr kontroll minn qabel dwar il-kriterji ta’ esklużjoni jew tal-għażla tal-offerent korrispondenti.

(107)Il-kuntratti għandhom jingħataw fuq il-bażi tal-aktar offerta ekonomikament vantaġġuża f'konformità mal-Artikolu 67 tad-Direttiva 2014/24/UE. Għandu jiġi ċċarat li l-kriterji tal-għażla huma strettament marbuta mal-evalwazzjoni ta' kandidati jew ta’ offerenti u l-kriterji tal-għoti ta' kuntratt huma strettament marbuta mal-evalwazzjoni tal-offerti.

(108)L-akkwist pubbliku tal-Unjoni għandu jiżgura li l-fondi tal-Unjoni jintużaw b'mod effettiv, trasparenti u adegwat. B'rabta ma' dan, l-akkwist elettroniku għandu jikkontribwixxi għall-użu aħjar tal-fondi tal-Unjoni u jtejjeb l-aċċess għall-kuntratti għall-atturi ekonomiċi kollha.

(109)Għandha tiġi ċċarata l-eżistenza ta’ fażi ta’ ftuħ u evalwazzjoni għal kwalunkwe proċedura. Deċiżjoni ta' għoti għandha dejjem tkun ir-riżultat ta' evalwazzjoni.

(110)Meta jiġu nnotifikati dwar l-eżitu ta' proċedura, il-kandidati u l-offerenti għandhom jiġu mgħarrfa bir-raġunijiet li fuqhom ittieħdet id-deċiżjoni u għandhom jirċievu dikjarazzjoni dettaljata tar-raġunijiet li jkun ibbażat fuqhom il-kontenut tar-rapport ta' evalwazzjoni.

(111)Minħabba li l-kriterji jiġu applikati mingħajr ebda ordni partikolari, l-offerenti miċħuda li jkunu ppreżentaw offerti konformi għandhom jirċievu l-karatteristiċi u l-vantaġġi relattivi tal-offerta li ntgħażlet jekk huma jitolbu dan.

(112)Għal kuntratti qafas bi ftuħ mill-ġdid tal-kompetizzjoni, għandu jiġu rinunzjat l-obbligu li jiġu pprovduti l-karatteristiċi u l-vantaġġi relattivi tal-offerta ta' suċċess lill-kuntrattur li l-offerta tiegħu ma kinitx suċċess, u dan għar-raġuni li l-għoti ta' informazzjoni bħal din lill-partijiet tal-istess kuntratt qafas kull darba li terġa' tinfetaħ kompetizzjoni jista' jippreġudika l-kompetizzjoni ġusta bejniethom.

(113)Awtorità kontraenti għandha tkun tista' tikkanċella proċedura ta' akkwist qabel ma jiġi ffirmat il-kuntratt, mingħajr ma l-kandidati jew l-offerenti jkunu intitolati jitolbu kumpens. Dan għandu jkun bla ħsara għal sitwazzjonijiet li fihom l-awtorità kontraenti tkun aġixxiet b'tali mod li tista' tinżamm responsabbli għad-danni f'konformità mal-prinċipji ġenerali tal-liġi tal-Unjoni.

(114)Bħalma huwa l-każ fid-Direttiva 2014/24/UE, jeħtieġ li jiġu ċċarati l-kundizzjonijiet li fihom kuntratt jista' jiġi mmodifikat matul l-eżekuzzjoni tiegħu mingħajr proċedura ta' akkwist ġdida. B'mod partikolari, każijiet bħal bidliet amministrattivi, suċċessjoni universali u applikazzjoni ta' klawżoli ta' reviżjoni ċari u inekwivoki jew għażliet ma jibdlux ir-rekwiżiti minimi tal-proċedura inizjali. Għandha tkun meħtieġa proċedura ta' akkwist ġdida fil-każ ta' modifiki materjali għall-kuntratt inizjali, b'mod partikolari għall-ambitu u l-kontenut tad-drittijiet u l-obbligi reċiproċi tal-partijiet, inkluża d-distribuzzjoni tad-drittijiet ta' proprjetà intellettwali. Dawn il-modifiki juru l-intenzjoni tal-partijiet li jinnegozjaw mill-ġdid it-termini jew il-kundizzjonijiet essenzjali ta' dak il-kuntratt, b'mod partikolari kieku l-modifiki kellhom influwenza fuq l-eżitu tal-proċedura kieku dawn kienu parti mill-proċedura inizjali.

(115)Huwa neċessarju li tkun prevista għażla ta' garanzija ta' eżekuzzjoni fir-rigward ta' xogħlijiet, provvisti u servizzi kumplessi sabiex tiġi garantita l-konformità ma' obbligi kuntrattwali sostanzjali u sabiex jiżguraw eżekuzzjoni tajba matul id-durata kollha tal-kuntratt. Jeħtieġ ukoll li jsir provvediment għal garanzija tar-ritenzjoni ta' flus biex ikun kopert il-perjodu ta' obbligazzjoni kuntrattwali, skont il-prattika komuni f'dawn is-setturi.

(116)Sabiex jiġu determinati l-limiti u l-proċeduri applikabbli, jeħtieġ li jiġi ċċarat jekk l-istituzzjonijiet, l-aġenziji u l-korpi eżekuttivi tal-Unjoni humiex meqjusa bħala awtoritajiet kontraenti. Huma ma għandhomx jitqiesu bħala awtoritajiet kontraenti f'każijiet fejn huma jixtru minn korp ċentrali għall-akkwisti. Barra minn hekk, l-istituzzjonijiet tal-Unjoni jifformaw entità legali waħda u ma jistgħux jikkonkludu kuntratti iżda jistgħu biss jikkonkludu ftehimiet dwar il-livell ta’ servizz bejn id-dipartimenti tagħhom.

(117)Huwa xieraq li tiġi inkluża referenza f’dan ir-Regolament għaż-żewġ limiti stipulati fid-Direttiva 2014/24/UE applikabbli għal xogħlijiet, provvisti u servizzi, rispettivament. Dawk il-limiti għandhom ikunu applikabbli wkoll għal kuntratti ta' konċessjoni għal raġunijiet ta' simplifikazzjoni, kif ukoll ġestjoni finanzjarja soda, meta jitqiesu l-ispeċifiċitajiet tal-ħtiġijiet kontraenti tal-istituzzjonijiet tal-Unjoni. Għalhekk, ir-reviżjoni ta' dawk il-limiti kif stipulat fid-Direttiva 2014/24/UE għandha tiġi direttament applikabbli għall-akkwist mill-istituzzjonijiet tal-Unjoni.

(118)Għal raġunijiet ta' armonizzazzjoni u ta’ simplifikazzjoni, il-proċeduri standard applikabbli għall-akkwist pubbliku għandhom jiġu applikati wkoll għal xiri li hemm ipprovdut għalih taħt is-sistema simplifikata tad-Direttiva 2014/24/UE. Għalhekk, il-limitu minimu għal xiri bis-sistema simplifikata għandu jkun allinjat mal-limitu minimu għal kuntratti ta' servizz.

(119)Huwa neċessarju li jiġu ċċarati l-kundizzjonijiet tal-applikazzjoni tal-perjodu ta’ sospensjoni.

(120)Ir-regoli applikabbli għall-akkwist fil-qasam tal-azzjonijiet esterni għandhom ikunu konsistenti mal-prinċipji stabbiliti fid-Direttiva 2014/23/UE u fid-Direttiva 2014/24/UE.

(121)Sabiex titnaqqas il-kumplessità, jiġu ssimplifikati r-regoli eżistenti u titjieb iċ-ċarezza tar-regoli tal-akkwist, hemm bżonn li jerġgħu jiġu raggruppati d-dispożizzjonijiet ġenerali dwar l-akkwist u d-dispożizzjonijiet speċifiċi applikabbli għall-akkwist f’azzjonijiet esterni u li jitneħħew ripetizzjonijiet u kontroreferenzi żejda.

(122)Huwa meħtieġ li jiġi ċċarat liema atturi ekonomiċi għandhom aċċess għall-akkwist mill-istituzzjonijiet tal-Unjoni skont il-post ta' stabbiliment tagħhom u li jiġi pprovdut b’mod espliċitu għall-possibbiltà ta' tali aċċess ukoll għal organizzazzjonijiet internazzjonali.

(123)Sabiex jinkiseb bilanċ bejn il-bżonn ta’ trasparenza u ta’ koerenza akbar fir-regoli tal-akkwist minn naħa, u l-bżonn li tiġi pprovduta flessibbiltà fuq ċerti aspetti tekniċi ta’ dawn ir-regoli min-naħa l-oħra, ir-regoli tekniċi dwar l-akkwist għandhom jiġu aggregati fl-Anness għal dan ir-Regolament u s-setgħa li tadotta atti delegati skont l-Artikolu 290 TFUE għandha tiġi delegata lill-Kummissjoni fir-rigward tal-emendi għal dan l-Anness.

(124)Jeħtieġ li jiġi ċċarat il-kamp ta’ applikazzjoni tat-Titolu fuq l-għotjiet, b’mod partikolari fir-rigward tat-tip ta’ azzjoni jew entità eliġibbli għal għotja, kif ukoll fir-rigward tal-impenji legali li jistgħu jintużaw biex ikopru l-għotjiet. B’mod partikolari, id-deċiżjonijiet ta’ għoti għandhom jiġu eliminati b’mod gradwali minħabba l-użu limitat tagħhom u l-introduzzjoni progressiva tal-għotjiet elettroniċi. L-istruttura għandha tiġi ssimplifikata billi d-dispożizzjonijiet fuq l-istrumenti li mhumiex għotjiet jitmexxew għal partijiet oħrajn tar-Regolament. In-natura tal-korpi li jistgħu jirċievu għotjiet operazzjonali għandha tiġi ċċarata peress li l-kunċett ta’ korpi bi skop ta’ interess tal-Unjoni ġenerali huwa kopert mill-kunċett ta’ korpi li għandhom objettiv li jagħmel parti minn politika tal-Unjoni u li jsostniha. Barra minn hekk, id-definizzjoni restrittiva ta’ korp li għandu skop ta’ interessi ġenerali tal-Unjoni għandha titneħħa.

(125)Sabiex jiġu ssimplifikati l-proċeduri u titjieb iċ-ċarezza ta’ dan ir-Regolament, id-dispożizzjonijiet relatati mal-kontenut tal-applikazzjoni għall-għotja, tas-sejħa għal proposti u tal-ftehim ta’ għoti għandhom jiġu ssimplifikati u jsiru uniformi.

(126)Sabiex tiġi ffaċilitata l-implimentazzjoni ta’ azzjonijiet iffinanzjati minn diversi donaturi meta l-finanzjament ġenerali tal-azzjoni ma jkunx magħruf fi żmien l-impenn tal-kontribuzzjoni tal-Unjoni, hemm bżonn li jiġi ċċarat il-mod li bih hija ddefinita l-kontribuzzjoni tal-Unjoni u l-metodu ta’ kif jiġi vverifikat l-użu tagħha.

(127)L-esperjenza miksuba fl-użu ta’ finanzjament ta’ somom f’daqqa, ta’ kostijiet unitarji jew ta’ rati fissi uriet li tali forom ta’ finanzjament issimplifikaw il-proċeduri amministrattivi b'mod sinifikanti u naqqsu r-riskju ta’ żball b'mod sostanzjali. Is-somom f’daqqa, ir-rati fissi u l-kostijiet unitarji huma forma xierqa ta’ finanzjament indipendentement mill-qasam ta’ intervent tal-Unjoni u b’mod partikolari għal azzjonijiet standardizzati u rikorrenti, eż. il-mobilità, il-ġemellaġġ istituzzjonali, l-attivitajiet ta’ taħriġ, eċċ. F’dan il-kuntest, il-kundizzjonijiet għall-użu ta’ somom f’daqqa, ta’ kostijiet unitarji u ta’ rati fissi għandhom isiru aktar flessibbli. Hemm bżonn li jiġi pprovdut b’mod espliċitu għall-istabbiliment ta’ somom f’daqqa waħedhom li jkopru l-kostijiet eliġibbli sħaħ tal-azzjoni jew tal-programm ta’ ħidma. Barra minn hekk, sabiex titrawwem enfasi fuq ir-riżultati, għandha tingħata prijorità lil finanzjament ibbażat fuq l-eżitu. Somom f’daqqa, kostijiet unitarji u rati fissi bbażati fuq l-input għandhom jibqgħu possibbiltà meta dawk ibbażati fuq l-eżitu ma jkunux possibbli jew xierqa.

(128)Il-proċeduri amministrattivi għall-awtorizzazzjoni ta’ somom f’daqqa, ta’ kostijiet unitarji u ta’ rati fissi għandhom jiġu ssimplifikati billi tiġi vestita s-setgħa għat-tali awtorizzazzjoni fl-uffiċjal tal-awtorizzazzjoni . Fejn xieraq, din l-awtorizzazzjoni tista’ tingħata mill-Kummissjoni fid-dawl tan-natura tal-attivitajiet jew tan-nefqa jew fid-dawl tan-numru ta’ uffiċjali tal-awtorizzazzjoni kkonċernati.

(129)Sabiex titneħħa d-diskrepanza fid-disponibbiltà ta’ dejta użata sabiex jiġu stabbiliti somom f'daqqa, kostijiet unitarji u rati fissi, għandu jkun awtorizzat l-użu ta’ ġudizzju espert.

(130)Il-kamp ta’ applikazzjoni tal-verifiki u tal-kontrolli għall-kuntrarju tal-valutazzjoni perjodika ta’ somom f’daqqa, kostijiet unitarji jew rati fissi għandu jiġi ċċarat. Dawk il-verifiki u l-kontrolli għandhom jiffokaw fuq l-issodisfar tal-kundizzjonijiet li jixkattaw il-pagament ta’ somom f’daqqa, ta’ kostijiet unitarji jew ta’ rati fissi, inkluża, fejn meħtieġa, il-kisba tal-eżiti. Dawk il-kundizzjonijiet ma għandhomx jeħtieġu r-rapportar fuq il-kostijiet li fil-fatt iġarrab il-benefiċjarju. Meta l-ammonti ta’ finanzjament ta’ somom f’daqqa, ta’ kostijiet unitarji jew ta’ rata fissa jkunu ġew deċiżi ex ante mill-uffiċjal tal-awtorizzazzjoni responsabbli jew mill-Kummissjoni, dawn ma għandhomx jiġu kkontestati b’kontrolli ex ante. Il-valutazzjoni perjodika tas-somom f’daqqa, tal-kostijiet unitarji jew tar-rati fissi tista’ teħtieġ aċċess għall-kontijiet tal-benefiċjajru għal skopijiet statistiċi u metodoloġiċi. Il-valutazzjoni perjodika tista’ twassal għal aġġornamenti tas-somom f’daqqa, tal-kostijiet unitarji jew tar-rati fissi applikabbli għal ftehimiet futuri iżda ma għandhiex tintuża sabiex jinxteħet dubju fuq il-valur tas-somom f’daqqa, tal-kostijiet unitarji jew tar-rati fissi diġà miftehmin. L-aċċess għall-kontijiet tal-benefiċjarju huwa neċessarju wkoll għal skopijiet t'a prevenzjoni u detezzjoni ta’ frodi.

(131)Sabiex tiġi ffaċilitata l-parteċipazzjoni ta’ organizzazzjonijiet żgħar fl-implimentazzjoni tal-politiki tal-UE f’ambjent ta’ disponibilità limitata ta’ riżorsi, hemm bżonn li jiġi rikonoxxut il-valur tax-xogħol ipprovdut mill-voluntiera bħala kostijiet eliġibbli. Għaldaqstant, dawn l-organizzazzjonijiet jistgħu jiddependu sa ċertu punt akbar fuq ix-xogħol tal-voluntiera sabiex jipprovdu kofinanzjament għall-azzjoni. Mingħajr preġudizzju għar-rata ta’ kofinanzjament massima speċifikata fl-att bażiku, f’dawn il-każijiet l-għotja tal-Unjoni trid tkun limitata għall-kostijiet eliġibbli stmati u mhux għal dawk li jkopru x-xogħol tal-voluntiera. Peress li x-xogħol tal-voluntiera huwa xogħol ipprovdut minn partijiet terzi mingħajr ma dawn jitħallsu rimunerazzjoni mill-benefiċjarju, il-limitazzjoni tevita r-rimborż ta’ kostijiet li l-benefiċjarju ma ġarrabx.

(132)Bħala tip siewi ta’ appoġġ finanzjarju mhux relatat ma’ kostijiet prevedibbli, l-użu ta’ premji għandu jiġi ffaċilitat u r-regoli applikabbli għandhom jiġu ċċarati. Il-premji għandhom jitqiesu li huma komplimentari, u mhux sostituti, għal strumenti ta’ finanzjament oħrajn bħall-għotjiet.

(133)Sabiex il-premji jkunu jistgħu jiġu implimentati b’mod aktar flessibbli, l-obbligu li jitħabbru premji b’valur ta’ EUR 1 000 000 jew aktar fid-dikjarazzjonijiet li jakkumpanjaw l-abbozz tal-baġit għandu jiġi sostitwit minn informazzjoni minn qabel tal-Parlament Ewropew u tħabbira espliċita tat-tali premji fid-deċiżjoni ta’ finanzjament.

(134)Il-premji għandhom ikunu soġġetti għall-prinċipji ta’ trasparenza u ta’ trattament indaqs. F’dak il-kuntest, għandhom jiġu stabbiliti l-karatteristiċi minimi tal-kompetizzjonijiet, b’mod partikolari l-kundizzjonijiet għall-ħlas tal-premju lir-rebbieħa fil-każ ta’ għotjiet, u l-mezzi ta’ pubblikazzjoni xierqa. Hemm bżonn li tiġi stabbilita proċedura ta’ għotjiet iddefinita biċ-ċar ukoll, mis-sottomissjoni tal-entrati sal-informazzjoni għall-applikanti u n-notifikar lill-applikant rebbieħ, li tirrifletti l-proċedura għall-għoti tal-għotjiet.

(135)Dan ir-Regolament għandu jistabbilixxi l-prinċipji u l-kundizzjonijiet għall-istrumenti finanzjarji, garanziji baġitarji u assistenza finanzjarja u r-regoli dwar il-limitazzjoni tar-responsabilità finanzjarja tal-Unjoni, il-ġlieda kontra l-frodi u l-ħasil tal-flus, l-istralċ ta’ strumenti finanzjarji u r-rappurtar.

(136)Fl-aħħar snin l-Unjoni użat dejjem aktar strumenti finanzjarji li jippermettu ingranaġġ akbar tal-baġit tal-UE li jrid jinkiseb, iżda, fl-istess ħin, jiġġeneraw riskju finanzjarju għal dak il-baġit. Fost dawk l-istrumenti finanzjarji ma hemmx biss l-istrumenti finanzjarji diġà koperti mir-Regolament Finanzjarju, iżda anki strumenti oħrajn bħal garanziji baġitarji u assistenza finanzjarja li fl-imgħoddi kienu rregolati biss mir-regoli stabbiliti fl-atti bażiċi rispettivi tagħhom. Importanti li jiġi stabbilit qafas komuni sabiex tiġi żgurata l-omoġenità tal-prinċipji applikabbli għal dak is-sett ta’ strumenti u li jerġgħu jiġu raggruppati taħt Titolu ġdid, li jinkludi taqsimiet dwar garanziji baġitarji u dwar l-assistenza finanzjarja lill-Istati Membri jew lil pajjiżi terzi minbarra r-regoli eżistenti applikabbli għall-Istrumenti Finanzjarji.

(137)L-istrumenti finanzjarji jistgħu jkunu importanti fil-moltiplikazzjoni tal-effett tal-fondi tal-Unjoni meta dawn il-fondi jiġu raggruppati ma’ fondi oħra u jinkludu effett ta’ ingranaġġ. L-istrumenti finanzjarji għandhom ikunu implimentati biss jekk ma hemm ebda riskju ta’ distorsjoni fis-suq jew inkonsistenza mar-regoli dwar l-għajnuna mill-Istat.

(138)Fil-qafas tal-approprjazzjonijiet annwali awtorizzati mill-Parlament Ewropew u mill-Kunsill għal programm partikolari, l-istrumenti finanzjarji għandhom jintużaw abbażi ta’ valutazzjoni ex ante li turi li huma effikaċi għall-ilħiq tal-objettivi tal-politika tal-Unjoni.

(139)Strumenti finanzjarji, garanziji baġitarji u assistenza finanzjarja għandhom jiġu awtorizzati permezz ta’ att bażiku. Meta l-istrumenti finanzjarji jiġu stabbiliti mingħajr att bażiku f'każijiet debitament iġġustifikati, għandhom jiġu awtorizzati mill-Parlament Ewropew u mill-Kunsill fil-baġit.

(140)L-istrumenti li potenzjalment jaqgħu taħt it-Titolu X, bħal għoti b'self, garanziji, investimenti ta’ ekwità, investimenti ta’ kważi ekwità u strumenti għall-kondiviżjoni tar-riskji għandhom jiġu definiti. Id-definizzjoni ta’ strumenti għall-kondiviżjoni tar-riskji għandha tippermetti l-inklużjoni ta’ titjib tal-kreditu għal bonds tal-proġetti, li jkopru r-riskju tal-ħlas tad-dejn ta’ proġett u jtaffu r-riskju tal-kreditu tad-detenturi tal-bonds permezz ta’ titjib tal-kreditu fil-forma ta’ self jew garanzija.

(141)Kwalunkwe rimborż minn strument finanzjarju għandu jintuża għall-istrument li pproduċih bil-għan li tissaħħaħ l-effiċjenza tal-istrument u possibilment tonqos l-allokazzjoni ta’ riżorsi ġodda mill-baġit għal dak l-istrument, sakemm ma jkunx speċifikat mod ieħor fl-att bażiku.

(142)Xieraq li jiġi rikonoxxut l-allinjament tal-interessi fit-tiftix tal-objettivi ta’ politika tal-Unjoni u, b’mod partikolari, li l-Bank Ewropew tal-Investiment u l-Fond Ewropew tal-Investiment ikollhom il-kompetenza speċifika li jimplimentaw strumenti finanzjarji.

(143)Il-Bank Ewropew tal-Investiment u l-Fond Ewropew tal-Investiment, filwaqt li jaġixxu bħala grupp, għandu jkollhom il-possibbiltà li jittrasferixxu parti mill-implimentazzjoni lil xulxin, meta dan jista’ jkun ta’ benefiċċju għall-implimentazzjoni ta’ azzjoni partikolari u kif iddefinit aktar fil-ftehim rilevanti mal-Kummissjoni.

(144)Għandu jiġi ċċarat li, fejn l-istrumenti finanzjarji huma kombinati ma’ forom oħrajn ta’ appoġġ mill-baġit tal-Unjoni, għandhom ikunu japplikaw ir-regoli dwar l-istrumenti finanzjarji. It-tali regoli għandhom ikunu komplimentati, fejn applikabbli, minn rekwiżiti speċifiċi li jirriżultaw mil-leġiżlazzjoni speċifika għas-setturi.

(145)Barra minn hekk, l-implimentazzjoni tal-istrumenti finanzjarji u tal-garanziji baġitarji għandha tikkonforma mal-objettivi tal-politika tat-tassazzjoni tal-Unjoni u l-kisbiet tal-Unjoni rigward l-evitar tat-taxxa, b’mod partikolari l-ippjanar aggressiv tat-taxxa u l-governanza tajba fil-qasam tat-taxxa. F’dak ir-rigward, għandha tingħata attenzjoni għar-Rakkomandazzjoni tal-Kummissjoni dwar l-ippjanar aggressiv tat-taxxa (C(2012)8806), ir-Rakkomandazzjoni tal-Kummissjoni dwar miżuri li jħeġġu lil partijiet terzi japplikaw standards minimi ta’ governanza tajba fil-qasam tat-taxxa (C(2012)8805), il-Komunikazzjoni tal-Kummissjoni dwar Il-Pakkett kontra l-Evitar tat-Taxxa: Il-pass li jmiss lejn it-twettiq ta' tassazzjoni effettiva u trasparenza fiskali akbar fl-UE (COM(2016)23), inkluża b’mod partikolari l-Komunikazzjoni tal-Kummissjoni dwar Strateġija Esterna għal Tassazzjoni Effettiva (COM(2016)24), u żviluppi relatati f’livell tal-Unjoni.

(146)Il-garanziji baġitarji u l-assistenza finanzjarja għall-Istati Membri jew il-pajjiżi terzi huma operazzjonijiet li ma jidhrux fil-baġit li għandhom impatt sinifikanti fuq il-karta bilanċjali tal-Unjoni. Filwaqt li għall-operazzjonijiet li jifdal li ma jidhrux fil-baġit, l-inklużjoni tagħhom fir-Regolament Finanzjarju tipprovdi protezzjoni akbar tal-interessi finanzjarji tal-Unjoni u qafas aktar ċar għall-awtorizzazzjoni, għall-ġestjoni u għall-kontabbiltà tagħhom.

(147)Dan l-aħħar l-Unjoni nediet inizjattivi importanti fuq il-bażi tal-garanziji baġitarji bħall-Fond Ewropew għall-Investimenti Strateġiċi (FEIS) jew il-Fond Ewropew għall-Iżvilupp Sostenibbli (EFSD). Il-karatteristiċi ta’ dawk l-istrumenti huma li jiġġeneraw obbligazzjoni kontinġenti għall-Unjoni u jimplikaw il-forniment ta’ fondi sabiex jitqiegħed għad-dispożizzjoni kuxxin ta’ likwidità li jippermetti sabiex il-baġit iwieġeb fil-ħin għall-obbligi ta’ ħlas li jistgħu jirriżultaw minn dawk l-obbligazzjonijiet kontinġenti. Sabiex tiġi ggarantita l-klassifikazzjoni tal-kreditu tal-Unjoni u, b'hekk, il-kapaċità tagħha li tforni finanzjament effettiv, huwa essenzjali li l-awtorizzazzjoni, il-forniment u l-monitoraġġ tal-obbligazzjonijiet kontinġenti jsegwu sett robust ta’ regoli li għandu jiġi applikat għall-garanziji baġitarji kollha.

(148)L-obbligazzjonijiet kontinġenti li jirriżultaw mill-garanziji baġitarji jistgħu jkopru firxa wiesgħa ta’ operazzjonijiet ta’ finanzjament u ta’ investiment. Il-possibbiltà li tissejjaħ il-garanzija baġitarja ma tistax tiġi skedata b’ċertezza sħiħa fuq bażi annwali kif inhu l-każ ta’ self li ġie għandu skeda definita għar-ripagament. Għaldaqstant huwa indispensabbli li jitwaqqaf qafas għall-awtorizzazzjoni u għall-monitoraġġ ta’ obbligazzjonijiet kontinġenti li jiżguraw ir-rispett sħiħ, fi kwalunkwe waqt, tal-massimu annwali għall-pagamenti stabbiliti fid-Deċiżjoni (KE, Euratom) 2007/436 dwar is-sistema ta’ riżorsi proprji tal-Unjoni.

(149)Dak il-qafas għandu jipprovdi wkoll għall-ġestjoni u għall-kontroll, inkluż ir-rapportar regolari dwar l-iskopertura finanzjarja tal-Unjoni. Ir-rata ta’ proviżjonament tal-obbligazzjonijiet finanzjarji għandha tiġi stabbilita fuq il-bażi ta’ valutazzjoni xierqa tar-riskji finanzjarji li jirriżultaw mill-istrument relatat. Is-sostenibbiltà tal-obbligazzjonijiet kontinġenti għandha tiġi vvalutata ta’ kull sena fil-kuntest ta’ proċedura baġitarja annwali. Għandu jiġi stabbilit mekkaniżmu ta’ twissija bikrija sabiex jiġi evitat nuqqas ta’ provvedimenti li jkopru l-obbligazzjonijiet finanzjarji.

(150)L-użu dejjem akbar tal-istrumenti finanzjarji, tal-garanziji baġitarji u tal-assistenza finanzjarja jeħtieġ li jiġi mmobilizzat u pproviżjonat volum sinifikanti ta’ approprjazzjonijiet ta' pagament. Sabiex jingħata ingranaġġ filwaqt li jiġi żgurat livell adegwat ta’ protezzjoni kontra obbligazzjonijiet finanzjarji, importanti li jiġi ottimizzat l-ammont ta’ proviżjonament meħtieġ u li jinkisbu gwadanji fl-effiċjenza billi dawk il-provvedimenti jinġabru f’fond ta’ proviżjonament komuni. Barra minn hekk, l-użu aktar flessibbli ta’ dawk il-provvedimenti miġburin jippermetti rata ta’ proviżjonament globali effetiva li tforni l-protezzjoni mitluba b’ammont ottimizzat ta’ riżorsi.

(151)Ir-regoli applikabbli għall-proviżjonament u għall-fond ta’ proviżjonament komuni għandhom jipprovdu qafas ta’ kontroll intern solidu. Il-linji gwida għall-immaniġġjar ta’ assi tal-provvedimenti għandhom jiġu stabbiliti fil-livell tal-Kummissjoni wara li tikkonsulta mal-uffiċjal kontabilistiku. L-uffiċjali tal-awtorizzazzjoni għandhom jissorveljaw b’mod attiv l-obbligazzjonijiet finanzjarji taħt ir-responsabbiltà tagħhom u l-uffiċjal tal-awtorizzazzjoni għall-fond ta’ proviżjonament komuni għandu jieħu ħsieb il-flus u l-assi fil-fond skont ir-regoli u l-proċeduri stipulati mill-uffiċjal kontabilistiku.

(152)Il-garanziji baġitarji u l-assistenza finanzjarja għandhom isegwu l-istess sett ta’ prinċipji diġà stabbiliti għall-istrumenti finanzjarji. B’mod partikolari, il-garanziji baġitarji għandhom jikkonformaw mal-prinċipji li ġejjin: għandhom ikunu irrevokabbli, mhux kondizzjonati u fuq talba; għandhom ikunu implimentati b’mod indirett jew, f’każijiet eċċezzjonali biss, b’mod dirett; jistgħu jkopru biss operazzjonijiet ta’ finanzjament u ta’ investiment u l-kontropartijiet tagħhom għandhom jikkontribwixxu bir-riżorsi tagħhom stess għall-operazzjonijiet koperti.

(153)L-assistenza finanzjarja lill-Istati Membri jew lil pajjiżi terzi għandha tieħu l-forma ta’ selfa, ta’ linja ta’ kreditu jew kwalunkwe strument ieħor meqjus xieraq sabiex tiġi żgurata l-effettività tal-appoġġ. Ir-riżorsi li jridu jiġu pprovduti huma meħudin b’self mill-Kummissjoni li għandha tingħata s-setgħa sabiex, għal dak il-għan, fis-swieq kapitali jew minn istituzzjonijiet finanzjarji, tevita l-involviment tal-Unjoni fi kwalunkwe trasformazzjoni ta’ maturitajiet li tkun tesponiha għal riskju tal-imgħax jew xi riskju ieħor tas-suq.

(154)Id-dispożizzjonijiet relatati mal-istrumenti finanzjarji għandhom japplikaw mill-aktar fis possibbli u sa mhux aktar tard mill-1 ta’ Jannar 2018 sabiex jinkisbu dawn is-simplifikazzjoni u l-effettività fil-mira. Id-dispożizzjonijiet relatati mal-garanziji baġitarji u mal-assistenza finanzjarja, kif ukoll il-fond ta’ proviżjonament komuni, għandhom japplikaw mill-qafas finanzjarju pluriennali ta’ wara l-2020. Dak il-kalendarju ser jippermettu li ssir preparazzjoni dettaljata tal-għodod il-ġodda għall-ġestjoni tal-obbligazzjonijiet kontinġenti. Ser jippermetti wkoll li jsir allinjament bejn il-prinċipji stipulati fit-Titolu X u, minn naħa, il-proposta għall-qafas Finanzjarju Pluriennali wara l-2020 u, min-naħa l-oħra, il-programmi speċifiċi relatati ma’ dan tal-aħħar.

(155)Fit-22 ta’ Ottubru 2014, il-Parlament Ewropew u l-Kunsill adottaw ir-Regolament (UE, Euratom) Nru 1141/2014 (5) li jħassar ir-Regolament (KE) Nru 2004/2003 u li jistipula regoli ġodda għal, fost affarijiet oħra, il-finanzjament tal-partiti politiċi u tal-fondazzjonijiet politiċi f’livell Ewropew, b’mod partikolari fir-rigward tal-kundizzjonijiet għall-finanzjament, l-għoti u t-tqassim tal-fondi, id-donazzjonijiet u l-kontribuzzjonijiet, il-finanzjament ta’ kampanji għall-elezzjonijiet tal-Parlament Ewropew, nefqa rimborżabbli, il-projbizzjoni ta’ finanzjament, il-kontijiet, ir-rapportar u l-awditjar, l-implimentazzjoni u l-kontroll, il-penalitajiet, il-kooperazzjoni bejn l-Uffiċjal tal-awtorizzazzjoni għall-partiti u l-fondazzjonijiet politiċi Ewropej, l-uffiċjal tal-awtorizzazzjoni tal-Parlament Ewropew u l-Istati Membri, u t-trasparenza. Dan ir-Regolament japplika mill-1 ta' Jannar 2017.

(156)Għandhom ikunu inklużi regoli dwar il-kontribuzzjonijiet mill-baġit ġenerali tal-Unjoni għall-partiti politiċi Ewropej kif previst fir-Regolament (UE, Euratom) Nru 1141/2014. Dawk ir-regoli għandhom jippermettu li l-partiti politiċi f’livell Ewropew ikollhom grad usa’ ta’ flessibbiltà fir-rigward tal-limiti ta’ żmien sabiex jużaw dawn il-kontribuzzjonijiet, skont kif teħtieġ in-natura tal-attivitajiet tagħhom.

(157)L-appoġġ finanzjarju mogħti lill-partiti politiċi Ewropej għandu jieħu l-forma ta’ kontribuzzjoni speċifika, li tikkorrispondi mal-bżonnijiet speċifiċi tal-partiti politiċi Ewropej.

(158)Għalkemm l-appoġġ finanzjarju jingħata mingħajr il-ħtieġa ta’ programm annwali ta’ ħidma, il-partiti politiċi Ewropej għandhom jiġġustifikaw ex post l-użu tajjeb tal-finanzjament tal-Unjoni. B’mod partikolari, l-uffiċjal tal-awtorizzazzjoni responsabbli għandu jivverifika jekk il-finanazjament intużax sabiex titħallas in-nefqa rimborżabbli kif stabbilit fis-sejħa għal kontribuzzjonijiet fi ħdan il-limiti ta’ żmien stabbiliti f’dan ir-Regolament. Il-kontribuzzjonijiet lill-partiti politiċi Ewropej għandhom jintefqu sal-aħħar tas-sena finanzjarja ta’ wara dik meta jkunu ngħataw, wara liema, kwalunkwe finanzjament li ma jintefaqx għandu jiġi rkuprat mill-uffiċjal tal-awtorizzazzjoni responsabbli.

(159)Il-finanzjament tal-Unjoni mogħti għall-finanzjament tal-kostijiet operatorji tal-partiti politiċi Ewropej ma għandux jintuża għal skopijiet oħra għajr dawk stabbiliti fir-Regolament (UE, Euratom) Nru 1141/2014, b’mod partikolari biex jiffinanzjaw direttament jew indirettament entitajiet oħra bħall-partiti politiċi nazzjonali. Il-partiti politiċi Ewropej għandhom jużaw il-kontribuzzjonijiet biex iħallsu perċentwal tan-nefqa attwali u futura, u mhux nefqa jew dejn imġarrba qabel il-preżentazzjoni tal-applikazzjonijiet tagħhom għal kontribuzzjonijiet.

(160)L-għoti ta’ kontribuzzjonijiet għandu jkun issimplifikat u adattat għall-ispeċifiċitajiet tal-partiti politiċi Ewropej ukoll, b’mod partikolari bl-assenza ta’ kriterji tal-għażla, bl-istabbiliment ta’ pagament ta’ prefinanzjament sħiħ wieħed bħala regola ġenerali, u bil-possibbiltà li jintużaw finanzjament ta’ somom f’daqqa, finanzjament ta’ rata fissa, finanzjament ta’ kostijiet unitarji u finanzjament mhux marbut ma’ kostijiet tal-operazzjonijiet rilevanti.

(161)Il-kontribuzzjonijiet mill-baġit ġenerali tal-Unjoni għandhom jiġu sospiżi, jitnaqqsu jew jintemmu jekk il-partiti politiċi Ewropej jiksru l-obbligi stabbiliti fir-Regolament (UE, Euratom) Nru 1141/2014.

(162)Il-penali li jkunu bbażati kemm fuq ir-Regolament Finanzjarju kif ukoll fuq ir-Regolament (UE, Euratom) Nru 1141/2014, għandhom jiġu imposti b’mod koerenti u għandhom jirrispettaw il-prinċipju ta’ ne bis in idem. Bi qbil mar-Regolament (UE, Euratom) Nru 1141/2014, il-penali amministrattivi u/jew finanzjarji previsti mir-Regolament Finanzjarju ma għandhomx jiġu imposti f’xi wieħed mill-każijiet li għalihom diġà jkunu ġew imposti penali abbażi tar-Regolament (UE, Euratom) Nru 1141/2014.

(163)Dan ir-Regolament għandu jistabbilixxi qafas ġenerali li bih l-appoġġ mill-baġit jista’ jintuża bħala strument f’azzjoni esterna inkluż l-obbligu għall-pajjiż terz li jipprovdi lill-Kummissjoni b’informazzjoni adegwata u puntwali sabiex tevalwa l-issodisfar tal-kundizzjonijiet miftehmin u d-dispożizzjonijiet li jiżguraw il-protezzjoni tal-interessi finanzjarji tal-Unjoni.

(164)Il-Kummissjoni għandha tkun awtorizzata toħloq u timmaniġġja l-fondi fiduċjarji tal-Unjoni għal azzjonijiet ta’ emerġenza, ta’ postemerġenza jew tematiċi mhux biss f’azzjonijiet esterni iżda anki f’azzjonijiet interni tal-UE. L-avvenimenti riċenti fl-Unjoni Ewropea juru l-bżonn ta’ flessibbiltà akbar għall-finanzjament fi ħdan l-UE. Peress li qiegħed isir dejjem aktar diffiċli li tagħraf fejn tispiċċa l-politika interna u tibda l-politika esterna, dan ikun qiegħed jipprovdi wkoll għodda li twieġeb għall-isfidi transfruntiera. Hemm bżonn li jiġu speċifikati l-prinċipji applikabbli għall-kontribuzzjonijiet għal Fondi Fiduċjarji tal-Unjoni, sabiex jiġu ċċarati r-responsabbiltajiet tal-atturi finanzjarji u tal-Bord tal-Fond Fiduċjarju. Jeħtieġ ukoll li jiġu ddefiniti regoli li jiżguraw rappreżentanza ġusta tad-donaturi parteċipanti fil-Bord tal-Fond Fiduċjarju u vot pożittiv obbligatorju tal-Kummissjoni għall-użu tal-fondi.

(165)B’konformità mas-simplifikazzjoni tar-regoli eżistenti u sabiex tiġi evitata ripetizzjoni żejda, it-Tieni Part tar-Regolament Finanzjarju, iddedikata għal dispożizzjonijiet speċjali applikabbli għall-Fond Agrikolu Ewropew ta' Garanzija, għar-Riċerka, għall-azzjoni esterna u għal fondi speċifiċi tal-UE, għandha titneħħa. Id-dispożizzjonijiet ta’ din il-Parti tnejn għandha jew tiddaħħal fil-partijiet rilevanti tar-Regolament Finanzjarju, jew inkella, f’każ li d-dispożizzjonijiet ma jintużawx jew ma għadhomx rilevanti, sempliċiment jitneħħew.

(166)Id-dispożizzjonijiet dwar il-preżentazzjoni tal-kontijiet u tal-kontabbiltà għandhom jiġu ssimplifikati u ċċarati. Għaldaqstant, huwa rilevanti li jinġabru d-dispożizzjonijiet kollha dwar il-kontijiet annwali u rapportar finanzjarju ieħor taħt Titolu speċifiku.

(167)Il-mod li bih l-istituzzjonijiet bħalissa jirrapportaw dwar proġetti ta’ bini lill-Parlament Ewropew u lill-Kunsill għandu jinżamm. L-istituzzjonijiet għandhom ikunu jistgħu jiffinanzjaw proġetti ta’ bini ġodda bl-approprjazzjonijiet li jirċievu għal binjiet diġà mibjugħin, u għalhekk għandha tiddaħħal referenza għal dispożizzjonijiet dwar id-dħul assenjat. Dan jippermetti li jintlaħqu l-bidliet li jinbidlu fil-politika ta’ bini tal-istituzzjonijiet, filwaqt li jiġu ffrankati spejjeż u tiddaħħal flessibbiltà akbar.

(168)Sabiex jiġu adattati l-elementi tekniċi u r-regoli dettaljati dwar l-akkwist u dwar ir-regoli applikabbli għal ċerti korpi tal-Unjoni, is-setgħa li tadotta atti delegati skont l-Artikolu 290 tat-Trattat dwar il-Funzjonament tal-Unjoni Ewropea għandha tiġi delegata lill-Kummissjoni fir-rigward tal-Anness għal dan ir-Regolament, ir-Regolament Finanzjarju Qafas għal korpi mwaqqfin skont it-TFUE u t-Trattat tal-Euratom u r-Regolament Finanzjarju Mudell għal korpi ta’ sħubija pubblika-privata. Huwa ta' importanza partikolari li l-Kummissjoni twettaq konsultazzjonijiet xierqa matul il-ħidma ta' tħejjija tagħha, anke fil-livell ta' esperti, u li dawk il-konsultazzjonijiet jitwettqu f'konformità mal-prinċipji stabbiliti fil-Ftehim Interistituzzjonali dwar it-Tfassil Aħjar tal-Liġijiet tat-13 ta' April 2016. B'mod partikolari, biex tiġi żgurata parteċipazzjoni ndaqs fit-tħejjija ta' atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta' atti delegati.

(169)Sabiex titjieb l-aġilità tal-implimentazzjoni ta’ strumenti speċjali, xieraq li jiġu ssimplifikati l-proċeduri ta’ mobilizzazzjoni u ta’ trasferiment billi jintużaw it-trasferimenti interni tal-Kummissjoni għall-Fond Ewropew ta' Aġġustament għall-Globalizzazzjoni u l-Fond ta' Solidarjetà tal-Unjoni Ewropea.

(170)Sabiex jiġi żgurat li l-Programm tal-Unjoni Ewropea għall-Impjiegi u l-Innovazzjoni Soċjali (EaSI) jipprovdi riżorsi adegwati fil-pront sabiex jappoġġja prijoritajiet politiċi li jinbidlu, l-ishma indikattivi għal kull wieħed mit-tliet assi u l-perċentwali minimi għal kull waħda mill-prijoritajiet tematiċi fi ħdan l-assi indiviwali għandhom jipprovdu flessibbiltà akbar. Dan għandu jtejjeb il-ġestjoni tal-Programm u jippermetti li jiġu ffokati riżorsi baġitarji fuq azzjonijiet li jipproduċu riżultati aħjar fil-livell soċjali u ta’ impjiegi.

(171)Sabiex jiġu ffaċilitati l-investimenti fl-infrastruttura għat-turiżmu kulturali u sostenibbli, mingħajr ħsara għall-applikazzjoni sħiħa tal-leġiżlazzjoni ambjentali tal-UE, b’mod partikolari d-Direttivi dwar il-Valutazzjoni Ambjentali Strateġika u l-Valutazzjoni tal-Impatt Ambjentali kif xieraq, għandhom jitneħħew ċerti restrizzjonijiet rigward il-kamp ta’ applikazzjoni tal-appoġġ għal dawn l-investimenti.

(172)Bil-għan ta’ rispons għall-isfidi imposti mill-flussi akbar ta’ migranti u rifuġjati, għandhom jiġu spjegati l-objettivi li għalihom jista’ jikkontribwixxi l-FEŻR fl-appoġġ tiegħu tal-migranti u tar-rifuġjati.

(173)Peress li l-emenda tad-dispożizzjonijiet tar-Regolament (UE) Nru 1303/2013 tal-Parlament Ewropew u tal-Kunsill 19 tipprovdi kundizzjonijiet aktar favorevoli għal ċerti operazzjonijiet li jiġġeneraw id-dħul li għalihom l-ammonti jew ir-rati ta’ appoġġ huma ddefiniti fl-Anness II għar-Regolament tal-FEMS, hemm bżonn li tiġi stabbilita data differenti tad-dħul fis-seħħ għal dawn id-dispożizzjonijiet sabiex jiġi żgurat trattament indaqs tal-operazzjonijiet appoġġjati fuq il-bażi tar-Regolament (UE) Nru 1303/2013.

(174)Bil-għan li tiġi ffaċilitata l-implimentazzjoni tal-operazzjonijiet, għandu jitwessa’ l-kamp ta’ applikazzjoni tal-benefiċjarji potenzjali. Għaldaqstant, persuni fiżiċi għandhom ikunu eliġibbli għal appoġġ mill-politika ta’ koeżjoni.

(175)Bil-għan li tiġi żgurata ġestjoni finanzjarja tajba fil-Fondi SIE li huma ġestiti b’implimentazzjoni kondiviża, u jiġu ċċarati l-obbligi tal-Istati Membri, il-prinċipji ġenerali għandhom jirreferu b’mod espliċitu għall-prinċipji ta’ kontroll intern tal-implimentazzjoni tal-baġit u tal-evitar tal-kunflitt ta’ interessi stabbiliti fir-Regolament Finanzjarju.

(176)Sabiex jiġu massimizzati s-sinerġiji bejn il-fondi kollha tal-Unjoni sabiex jiġu indirizzati l-isfidi tal-migrazzjoni u tal-ażil b’mod effettiv, għandu jiġi żgurat li, meta l-objettivi tematiċi jiġu tradotti fi prijoritajiet fir-regoli speċifiċi għall-Fondi, dawn il-prijoritajiet ikopru l-użu xieraq ta’ kull Fond għal dawn l-oqsma.

(177)Sabiex tiġi żgurata koerenza tal-programmazzjoni, darba fis-sena għandu jsir allinjament bejn il-Ftehimiet ta’ Sħubija u l-programmi operazzjonali.

(178)Sabiex jiġi ottimizzat l-użu tar-riżorsi finanzjarji allokati lill-Istati Membri skont il-Politika ta’ koeżjoni, hemm bżonn li l-Istati Membri jitħallew jittrasferixxu l-allokazzjoni ta’ Fondi SIE lil strumenti stabbiliti skont ir-Regolament Finanzjarju jew skont Regolamenti speċifiċi għas-setturi.

(179)Sabiex jiġu ffaċilitati t-tħejjija u l-implimentazzjoni ta’ strateġiji ta’ żvilupp lokali mmexxi mill-komunità, il-fond prinċipali għandu jkun jista’ jkopri kostijiet preparatorji, operazzjonali u tal-animazzjoni.

(180)Sabiex tiġi ffaċilitata l-implimentazzjoni ta’ investimenti għal żvilupp lokali mmexxi mill-komunità u investimenti territorjali integrati, għandhom jiġu ċċarati r-rwoli u r-responsabbiltajiet tal-gruppi ta’ azzjoni lokali fil-każ ta’ strateġiji ta’ żvilupp lokali mmexxi mill-komunità u ta’ awtoritajiet lokali, ta’ korpi ta’ żvilupp reġjonali jew ta’ organizzazzjonijiet mhux governattivi fil-każ ta’ ITIs b’rabta ma’ korpi oħrajn tal-programmi. Id-deżinjazzjoni bħala korp intermedju għandha tkun meħtieġa biss f’każijiet li fihom il-korpi rilevanti jwettqu kompiti li jmorru lil hinn minn dawk deskritti fl-Artikolu rilevanti jew fejn din tkun meħtieġa mir-regoli speċifiċi għall-Fondi.

(181)Hemm bżonn li jiġi ċċarat li l-awtoritajiet maniġerjali għandu jkollhom il-possibbiltà li jimplimentaw strumenti finanzjarji permezz ta’ għoti ta’ kuntratt dirett lill-BEI u lil istituzzjonijiet finanzjarji internazzjonali (IFIs).

(182)Ħafna Stati Membri stabbilixxew banek bi sjieda pubblika jew istituzzjonijiet finanzjarji li joperaw b’mandat tal-politika pubblika sabiex jippromwovu l-iżvilupp ekonomiku. Dawn il-banek jew l-istituzzjonijiet finanzjarji għandhom karatteristiċi speċifiċi li jiddistingwuhom minn banek kummerċjali privati b’rabta mas-sjieda tagħhom, il-mandat tal-iżvilupp tagħhom u l-fatt li ma jkollhomx l-objettiv li jiksbu l-akbar profitt possibbli. Ir-rwol tat-tali banek huwa b’mod partikolari fallimenti tas-suq, fejn f’ċerti reġjuni jew għal ċerti oqsma jew setturi ta’ politika, is-servizzi finanzjarji mhumiex ipprovduti biżżejjed mill-banek kummerċjali. Dawn il-banek jew l-istituzzjonijiet finanzjarji bi sjieda pubblika jinsabu f’pożizzjoni tajba sabiex jippromwovu l-aċċess għall-fondi SIE filwaqt li jżommu newtralità kompetittiva. Ir-rwol u l-karatteristiċi speċifiċi tagħhom jistgħu jippermettu lill-Istati Membri jżidu l-użu ta’ strumenti finanzjarji għall-forniment ta’ fondi SIE sabiex jimmassimizzaw l-impatt ta’ dawn il-fondi fl-ekonomija reali. Jekk eżitu jkun konformi mal-politika tal-Kummissjoni li tiffaċilita r-rwol tat-tali banek jew istituzzjonijiet bħala maniġers ta’ fondi kemm fl-implimentazzjoni ta’ fondi SIE kif ukoll fit-tħallit tal-fondi SIE ma’ finanzjament tal-FEIS, kif stipulat b’mod partikolari fil-Pjan ta’ Investiment għall-Ewropa. Għaldaqstant huwa ġġustifikat li l-awtoritajiet maniġerjali jitħallew jagħtu kuntratti direttament lit-tali banek jew istituzzjonijiet finanzjarji pubbliċi. Minkejja dan, sabiex jiġi żgurat li din il-possibbiltà ta’ għoti dirett għadha konsistenti mal-prinċipji tas-suq intern, għandhom jiġu stabbiliti kundizzjonijiet stretti li jridu jissodisfaw il-banek jew l-istituzzjonijiet pubbliċi sabiex tkun applikabbli din id-dispożizzjoni.

(183)Sabiex tinżamm l-alternattiva tal-Inizjattiva għall-SMEs bħala strument li jgħin iżid il-kompetittività tal-SMEs, hemm bżonn li jiġi pprovdut li l-Istati Membri jistgħu jikkontribwixxu għal garanzija illimitata konġunta u strumenti finanzjarji ta’ titolizzazzjoni favur SMEs matul il-perjodu ta’ programmazzjoni sħiħ u li jiġu aġġornati d-dispożizzjonijiet rilevanti dwar din l-għażla, bħal dawk dwar valutazzjonijiet u evalwazzjonijiet ex ante.

(184)Bl-adozzjoni tar-Regolament (UE) 2015/1017 tal-Parlament Ewropew u tal-Kunsill tal-25 ta’ Ġunju 2015 dwar il-Fond Ewropew għall-Investimenti Strateġiċi, iċ-Ċentru Ewropew ta' Konsulenza għall-Investimenti u l-Portal Ewropew ta' Proġetti ta' Investiment – il-Fond Ewropew għall-Investimenti Strateġiċi (FEIS) – ix-xewqa kienet li l-Istati Membri jitħallew jużaw Fondi SIE sabiex jikkontribwixxu għall-finanzjament ta’ proġetti eliġibbli li huma appoġġjati mill-garanzija tal-UE koperta mill-FEIS. Għandha tiddaħħal dispożizzjoni speċifika sabiex tistabbilixxi l-patti u l-kundizzjonijiet li jippermettu għal interazzjoni u komplimentarjetà aħjar li ser jiffaċilitaw il-possibbiltà li l-fondi SIE jingħaqdu ma’ prodotti finanzjarji tal-BEI taħt il-Garanzija tal-Unjoni tal-FEIS.

(185)Sabiex jiġu ssimplifikati u armonizzati r-rekwiżiti ta’ kontroll u ta’ awditjar u sabiex tittejjeb ir-responsabbiltà tal-istrumenti finanzjarji implimentati mill-BEI u Istituzzjonijiet Finanzjarji Internazzjonali oħrajn, hemm bżonn li jiġu emendati d-dispożizzjonijiet dwar il-ġestjoni u l-kontroll għall-istrumenti finanzjarji sabiex jiġi ffaċilitat il-proċess ta’ garanzija.

(186)Sabiex jiġu żgurati kundizzjonijiet uniformi għall-implimentazzjoni ta’ dan ir-Regolament, għandhom jiġu konferiti setgħat ta’ implimentazzjoni lill-Kummissjoni fir-rigward tal-mudell tar-rapporti ta’ kontroll u tar-rapporti tal-awditjar annwali kif iddefiniti fl-Artikolu 40(1) ta’ dan ir-Regolament. Jinħtieġ li teżerċita dawn is-setgħat b'konformità mar-Regolament (UE) Nru 182/2011 tal-Parlament Ewropew u tal-Kunsill 20 .

(187)Sabiex tiġi żgurata konsistenza mat-trattament tal-korrezzjonijiet finanzjarji matul il-perjodu ta’ programmazzjoni 2007-2013, hemm bżonn li jiġi ċċarat li fil-każ ta’ strumenti finanzjarji, għandu jkun possibbli li irregolarità individwali tiġi sostitwita minn nefqa regolari fi ħdan l-istess operazzjoni sabiex il-korrezzjoni finanzjarja relatata ma jkollhiex il-konsegwenza ta’ telf nett għall-operazzjoni tal-istrument finanzjarju.

(188)Sabiex l-investituri privati jkunu inċentivati jikkoinvestu fi proġetti tal-politika pubblika, għandu jiġi introdott il-kunċett ta’ trattament differenzjat tal-investituri, li jippermetti taħt kundizzjonijiet speċifiċi li l-Fondi SIE jistgħu jieħdu pożizzjoni subordinata għal investitur privat u l-prodotti finanzjarji tal-BEI taħt Garanzija tal-UE tal-FEIS. Fl-istess ħin, għandhom jiġu stabbiliti l-kundizzjonijiet għall-applikazzjoni ta’ trattament differenzjat bħal dan meta jiġu implimentati l-fondi SIE.

(189)Fid-dawl tal-ambjent dejjiemi ta’ mgħax baxx u sabiex ma jiġux ippenalizzati indebitament korpi li jimplimentaw strumenti finanzjarji, hemm bżonn li, soġġett għall-immaniġġjar ta’ flus attiv u diliġenti, ikun jista’ jsir finanzjament tal-imgħax negattiv iġġenerat bħala riżultat tal-investimenti tal-Fondi SIE skont l-Artikolu 43 tar-Regolament dwar id-Dispożizzjonijiet Komuni minn riżorsi mħallsin lura fl-istrument finanzjarju.

(190)Sabiex jiġu allinjati l-obbligi ta’ rapportar mal-Artikolu 43(a) il-ġdid dwar it-trattament differenzjat tal-investituri u sabiex tiġi evitata duplikazzjoni bejn il-“valur tal-investimenti” fl-Artikolu 46(2)(h) u “investimenti ta’ ekwità” fl-Artikolu 46(2)(i), hemm bżonn li jiġi aġġornat l-Artikolu 46 tar-Regolament dwar id-Dispożizzjonijiet Komuni.

(191)Sabiex tiġi ffaċilitata l-implimentazzjoni tal-fondi SIE, hemm bżonn li l-Istati Membri jingħataw il-possibbiltà ta’ għoti dirett għal azzjonijiet ta’ assistenza teknika implimentati mill-BEI/FEI, minn IFIs oħrajn u minn banek bi sjieda pubblika jew istituzzjonijiet finanzjarji.

(192)Bil-għan li tiġi ffaċilitata l-implimentazzjoni ta’ operazzjonijiet li jiġġeneraw id-dħul, tnaqqis tar-rata ta’ kofinanzjament għandu jkun awtorizzat fi kwalunkwe ħin tal-implimentazzjoni tal-programm u għandhom jiġu pprovduti possibbiltajiet għall-istabbiliment ta’ perċentwali tad-dħul nett b’rata fissa f’livell nazzjonali.

(193)Minħabba li r-Regolament (UE) Nru 508/2014 tal-Parlament Ewropew u tal-Kunsill ġie adottat tard u l-fatt li l-livelli ta’ intensità tal-għajnuna ġew stabbiliti minn dak ir-Regolament, hemm bżonn li jiġu stipulati ċerti eżenzjonijiet għall-FEMS fir-rigward ta’ operazzjonijiet li jiġġeneraw id-dħul.

(194)Sabiex jonqos il-piż amministrattiv għall-benefiċjarji, għandu jiżdied il-limitu li jeżenta lil ċerti operazzjonijiet mill-kalkolu u t-teħid f’kunsiderazzjoni tad-dħul iġġenerat matul l-implimentazzjoni tagħhom.

(195)Sabiex jiġu ffaċilitati s-sinerġiji bejn il-Fondi SIE u strumenti oħrajn tal-Unjoni, in-nefqa mġarrba tista’ tiġi rimborżata minn Fondi SIE u minn strumenti tal-Unjoni differenti fuq il-bażi ta’ proporzjon miftiehem minn qabel.

(196)Sabiex jiġi promoss l-użu ta’ somom f’daqqa, u fid-dawl tal-fatt li s-somom f’daqqa jridu jkunu bbażati fuq metodu ta’ kalkolu ġust, ekwitabbli u verifikabbli li għandu jiżgura ġestjoni finanzjarja tajba, għandu jitneħħa l-limitu superjuri applikabbli għall-użu tagħhom.

(197)Fid-dawl tal-iskop li jonqos il-piż amministrattiv tal-implimentazzjoni tal-proġetti mill-benefiċjarji, għandha tiddaħħal forma ġdida ta’ għażla tal-kostijiet issimplifikata għall-finanzjament fuq il-bażi ta’ kundizzjonijiet li mhumiex kostijiet tal-operazzjonijiet.

(198)Minħabba l-fatt li, skont l-Artikolu 71 tar-Regolament (UE) Nru 1303/2013, l-obbligu li tiġi żgurata d-durabilità tal-operazzjonijiet ta’ investiment japplika mill-aħħar pagament lill-benefiċjajru, u li, meta l-investiment ikun jikkonsisti f’lokazzjoni b’opzjoni ta’ xiri ta’ makkinarju u tagħmir ġdid, l-aħħar pagament iseħħ fi tmiem il-perjodu tal-kuntratt, dan l-obbligu ma gaħndux japplika għal dan it-tip ta’ investiment.

(199)Sabiex tiġi żgurata applikazzjoni ġenerali tal-għażliet tal-kost issimplifikati, għandu jiġi stabbilit użu obbligatorju ta’ skali standard tal-kostijiet unitarji, tas-somom f’daqqa jew tar-rati fissi għal operazzjonijiet li jaqgħu taħt ċertu limitu għall-FEŻR u l-FSE. Fl-istess ħin, għandu jiġi introdott l-użu ta’ abbozz ta’ baġits bħala metodoloġija addizzjonali għad-determinazzjoni ta’ kostijiet issimplifikati.

(200)Sabiex tiġi ffaċilitata l-applikazzjoni aktar bikrija u aktar immirata tal-għażliet tal-kost issimplifikati, is-setgħa li tadotta atti skont l-Artikolu 290 tat-Trattat dwar il-Funzjonament tal-Unjoni Ewropea għandu jiġi delegat lill-Kummissjoni fir-rigward tad-definizzjoni tal-iskali standard tal-kostijiet unitarji jew tal-finanzjament b’rata f’issa, il-metodu ġust, ekwitabbli u verifikabbli li bih jistgħu jiġu stabbiliti, u l-finanzjament ibbażat fuq l-issodisfar tal-kundizzjonijiet relatati mat-twettiq ta’ progress fl-implimentazzjoni jew il-kisba ta’ objettivi ta’ programmi apparti milli fuq kostijiet. Hija ta' importanza partikolari li l-Kummissjoni twettaq konsultazzjonijiet xierqa matul il-ħidma ta' tħejjija tagħha, anke fil-livell ta' esperti, u li dawk il-konsultazzjonijiet jitwettqu f'konformità mal-prinċipji stabbiliti fil-Ftehim Interistituzzjonali dwar it-Tfassil Aħjar tal-Liġijiet tat-13 ta' April 2016. B'mod partikolari, biex tiġi żgurata parteċipazzjoni ugwali fit-tħejjija ta' atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta' atti delegati.

(201)Sabiex jonqos il-piż amministrattiv, għandu jiżdied l-użu ta’ rati fissi li ma jeħtieġx li tiġi stabbilita metodoloġija mill-Istati Membri. Għaldaqstant għandhom jiġu introdotti żewġ rati fissi addizzjonali; waħda għall-kalkolu tal-kostijiet diretti tal-persunal u l-oħra għall-kalkolu tal-kostijiet eliġibbli li jifdal fuq il-bażi tal-kostijiet tal-persunal. Barra minn hekk, għandha tiġi pprovduta kjarifika ulterjuri fuq il-metodi għall-kalkolu tal-kostijiet tal-persunal.

(202)Bil-għan li jitjiebu l-effettività u l-impatt tal-operazzjonijiet, l-implimentazzjoni ta’ operazzjonijiet fuq skala ta’ pajjiżi jew ta’ operazzjonijiet li jkopru oqsma tal-programmi differenti għandha tiġi ffaċilitata u għandhom jiżdiedu l-possibbiltajiet għan-nefqa barra mill-Unjoni għal ċerti investimenti.

(203)Sabiex l-Istati Membri jitħeġġu jagħmlu użu mill-valutazzjoni ta’ proġetti kbar minn esperti indipendenti, id-dikjarazzjoni tan-nefqa relatata mal-proġett kbir lill-Kummissjoni qabel il-valutazzjoni pożittiva mill-espert indipendenti għandha tkun awtorizzata ladarba l-Kummissjoni tkun ġiet informata dwar is-sottomissjoni tal-informazzjoni rilevanti lill-espert indipendenti.

(204)Sabiex jiġi promoss l-użu ta’ pjanijiet ta’ azzjoni konġunta li ser inaqqsu l-piż amministrattiv għall-benefiċjarji, hemm bżonn li jitnaqqsu r-rekwiżiti regolatorji marbutin mat-tfassil ta’ pjan ta’ azzjoni konġunta.

(205)Sabiex jiġi evitat piż amministrattiv żejjed għall-benefiċjarji, ir-regoli dwar l-informazzjoni u l-komunikazzjoni għandhom jirrispettaw il-prinċipju ta’ proporzjonalità. Kif xieraq, importanti li jiġi ċċarat il-kamp ta’ applikazzjoni tar-regoli dwar l-informazzjoni u l-komunikazzjoni.

(206)Bil-għan li jitnaqqas il-piż amministrattiv u jiġi żgurat l-użu effettiv tal-assistenza teknika bejn il-Fondi u l-kategoriji ta’ reġjuni, għandha tiżdied il-flessibbiltà għall-kalkolu u għall-monitoraġġ tal-limiti rispettivi applikabbli għall-assistenza teknika tal-Istati Membri.

(207)Bil-għan li jiġu ssimplifikati strutturi ta’ implimentazzjoni, għandu jiġi ċċarat li l-possibbiltà għall-awtorità maniġerjali, għall-awtorità taċ-ċertifikazzjoni u għall-awtorità tal-awditjar ikunu l-istess korp pubbliku tkun disponibbli wkoll għal programmi li jaqgħu taħt l-Għan ta’ Kooperazzjoni Territorjali Ewropea.

(208)Ir-responsabbiltajiet tal-awtoritajiet maniġerjali rigward il-verifika tan-nefqa meta jintużaw għażliet tal-kost issimplifikati għandhom jiġu speċifikati f’aktar dettall.

(209)Sabiex jiġi żgurat li l-benefiċjarji jistgħu jibbenefikaw bis-sħiħ mill-potenzjal ta’ simplifikazzjoni ta’ soluzzjonijiet ta’ governanza elettronika fl-implimentazzjoni tal-Fondi SIE u l-Fond għal Għajnuna Ewropea għall-Persuni l-Aktar fil-Bżonn (FEAD), b’mod partikolari bil-għan li tiġi ffaċilitata l-ġestjoni elettronika sħiħa tad-dokumenti, hemm bżonn li jiġi ċċarat li ż-żamma ta’ rekords fuq il-karta ma tkunx neċessarja jekk ikunu ssodisfati ċerti kundizzjonijiet.

(210)Sabiex jiġi żgurat trattament indaqs tal-operazzjonijiet appoġġjati fuq il-bażi ta’ dan ir-Regolament, hemm bżonn li tiġi stabbilita d-data tal-applikazzjoni ta’ ċerti emendi għar-Regolament (UE) Nru 1303/2013 tal-Parlament Ewropew u tal-Kunsill 21 .

(211)Bil-għan li jiġi ffaċilitata l-aċċess ta’ ċerti gruppi fil-mira għall-FSE, il-ġbir ta’ dejta għal ċerti indikaturi għandu jkun ibbażat fuq kampjuni rappreżentattivi u darbtejn fil-perjodu ta’ programmazzjoni.

(212)Sabiex jiġu żgurati ċertezza legali u implimentazzjoni armonizzata u nondiskriminatorja tal-appoġġ lil bdiewa żgħażagħ, hemm bżonn li fil-kuntest tal-Iżvilupp Rurali jiġi pprovdut li d-“data tal-istabbiliment”, imsemmija fir-regoli rilevanti, hija d-data meta jibda l-proċess ta’ stabbiliment permezz ta’ azzjoni li jrid iwettaq l-applikant, u li l-applikazzjoni għall-appoġġ trid tiġi sottomessa fi ħdan 24 xahar minn dik id-data. Barra minn hekk, l-esperjenza min-negozjati tal-programmi wriet li r-regoli għall-istabbiliment konġunt ta’ bdiewa żgħażagħ u l-limiti għall-aċċess għall-appoġġ meħtieġa fl-Artikolu 19(4) tar-Regolament (UE) Nru 1305/2013 għandhom jiġu ċċarati, u li d-dispożizzjonijiet dwar id-durata tal-pjan ta’ direzzjoni tan-negozju għandhom jiġu ssimplifikati.

(213)Sabiex ikunu attraenti biżżejjed għas-settur privat, hu essenzjali li l-istrumenti finanzjarji jkunu mfassla u implimentati b’mod flessibbli. Madankollu, l-esperjenza wriet li ċerti regoli dwar l-eliġibbiltà speċifiċi għall-miżuri jillimitaw l-użu ta’ strumenti finanzjarji fil-programmi ta’ żvilupp rurali, kif ukoll l-użu flessibbil tal-istrumenti finanzjarji mill-maniġers ta’ fondi. Għaldaqstant, mhuwiex xieraq li jiġi pprovdut li ċerti regoli dwar l-eliġibbiltà speċifiċi għall-miżuri ma japplikawx għal strumenti finanzjarji. Għall-istess raġuni, xieraq ukoll li jiġi pprovdut li l-appoġġ tal-bidu għall-bdiewa żgħażagħ skont l-Artikolu 19 tar-Regolament (UE) Nru 1305/2013 jista’ jiġi pprovdut ukoll fil-forma ta’ strumenti finanzjarji. Fid-dawl ta’ dawn il-bidliet, għandu jiġi pprovdut li meta l-appoġġ għall-investimenti skont l-Artikolu 17 tar-Regolament (UE) Nru 1305/2013 jingħata fil-forma ta’ strumenti finanzjarji, l-investiment irid jikkonstribwixxi għal prijorità waħda jew aktar tal-Unjoni għall-iżvilupp rurali.

(214)Illum il-ġurnata l-bdiewa huma esposti għal riskji ekonomiċi dejjem akbar bħala konsegwenza tal-iżviluppi fis-suq. Madankollu, dawk ir-riskji ekonomiċi ma jaffettwawx lis-setturi agrikoli kollha bl-istess mod. Konsegwentement, l-Istati Membri għandu jkollhom il-possibbiltà li, f’każijiet iġġustifikati kif xieraq, jgħinu lill-bdiewa b’għodod ta’ stabbilizzazzjoni tad-dħul speċifiċi għas-setturi, b’mod partikolari għal setturi milqutin minn tnaqqis qawwi fid-dħul, li jkollu impatt ekonomiku qawwi għal qasam rurali speċifiku, diment li jkunu rrispettati l-obbligi internazzjonali tal-Unjoni. Barra minn hekk, sabiex tissorvelja n-nefqa li ssir b’rabta ma’ din l-għodda l-ġdida, għandu jiġi adattat l-kontenut tal-pjan finanzjarju tal-programm. Barra minn hekkk, l-obbligu ta’ rapportar speċiifku għall-miżura ta’ mmaniġġjar tar-riskji fl-2018 imsemmi fl-Artikolu 36(5) tar-Regolament (UE) Nru 1305/2013 diġà huwa kopert mir-rapport lill-Parlament Ewropew u lill-Kunsill dwar il-monitoraġġ u l-evalwazzjoni tal-PAK imsemmi fl-Artikolu 110(5) tar-Regolament (UE) Nru 1306/2013. Għaladqstant, it-tieni subparagrafu tal-Artikolu 36(5) għandu jitħassar.

(215)Rigward il-fondi mutwi, jidher li l-projbizzjoni ta’ kwalunkwe kontribuzzjoni minn fondi pubbliċi għal stokk kapitali inizjali stabbilita fl-Artikoli 38(3) u 39(4) tar-Regolament (UE) Nru 1305/2013 ixxekkel il-funzjonament effettiv ta’ dawn il-fondi. Għaldaqstant din il-projbizzjoni għandha titħassar.

(216)L-appoġġ għall-investimenti għall-irkupru tal-potenzjal ta’ produzzjoni wara diżastri naturali u avvenimenti katastrofiċi skont l-Artikoli 18(1)(b) u 24(1)(d) tar-Regolament (UE) Nru 1305/2013 normalment jingħata lill-applikanti eliġibbli kollha. Għaldaqstant, l-Istati Membri ma għandhomx ikunu obbligati jiddefinixxu l-kriterji tal-għażla għall-operazzjonijiet ta’ rkupru. Barra minn hekk, f’każijiet iġġustifikati kif xieraq, fejn ma jkunx possibbli li jiġu ddefiniti kriterji tal-għażla minħabba l-għamla tal-operazzjonijiet, l-Istati Membri għandhom jitħallew jiddefinixxu metodi tal-għażla alternattivi.

(217)L-Artikolu 59 tar-Regolament (UE) Nru 1305/2013 jiddefinixxi r-rati massimi tal-kontribuzzjoni tal-FAEŻR. Sabiex tittaffa l-pressjoni fuq il-baġit nazzjonali ta’ ċerti Stati Membri u sabiex jiġu aċċelerati investimenti tassew meħtieġa f’Ċipru, ir-rata massima tal-kontribuzzjoni ta’ 100 % imsemmija fl-Artikolu 59(4)(f) għandha tiġi estiża sakemm jagħlaq il-programm. Barra minn hekk, referenza għar-rata ta’ kontribuzzjoni speċifika introdotta fir-Regolament (UE) Nru 1303/2013 għall-istrument finanzjarju l-ġdid imsemmi fil-punt (c) tal-Artikolu 38(1) tal-istess Regolament għandha tissemma fl-Artikolu 59(4).

(218)Skont l-Artikolu 60(1) tar-Regolament (UE) Nru 1305/2013, f’każijiet ta’ miżuri ta’ emerġenza dovuti għal diżastri naturali, l-eliġibbiltà tan-nefqa relatata mal-bidliet fil-programmi tista’ tibda mid-data li fiha seħħ id-diżastru naturali. Din il-possibbiltà li n-nefqa ssir eliġibbli qabel is-sottomissjoni ta’ emenda għall-programm għandha tiġi estiża għal ċirkustanzi oħrajn, bħal avvenimenti katastrofiċi jew bidla sinifikanti u f’daqqa fil-kundizzjonijiet soċjoekonomiċi tal-Istat Membru jew tar-reġjun, inklużi bidliet demografiċi f’daqqa u sinifikanti li jirriżultaw minn migrazzjoni jew l-akkoljenza ta’ rifuġjati.

(219)Skont it-tieni subparagrafu tal-Artikolu 60(2) tar-Regolament (UE) Nru 1305/2013, fir-rigward ta’ investimenti fis-settur agrikolu, nefqa mġarrba biss wara s-sottomissjoni ta’ applikazzjoni hija eliġibbli. L-Istati Membri għandhom jingħataw il-possibbiltà li jipprovdu fil-programmi tagħhom li, meta l-investiment ikun relatat ma’ miżuri ta’ emerġenza dovuti għal diżastri naturali, għal avvenimenti katastrofiċi jew għal avvenimenti klimatiċi avversi jew għal bidla sinifikanti u f’daqqa fil-kundizzjonijiet soċjoekonomiċi tal-Istat Membru jew tar-reġjun, in-nefqa mġarrba wara li jseħħ l-avveniment hija eliġibbli.

(220)Sabiex jiżdied l-użu tal-għażliet tal-kost issimplifikati msemmijin fil-punti (b) sa (d) tal-Artikolu 67(1) tar-Regolament (UE) Nru 1303/2013, hemm bżonn li r-regoli speċifiċi għall-FAEŻR stabbiliti fl-Artikolu 62(2) tar-Regolament (UE) Nru 1305/2013 jiġu limitati għal għajnuna mogħtija skont il-punti (a) u (b) tal-Artikolu 21(1), rigward id-dħul mitluf u l-kostijiet tal-manutenzjoni, u l-Artikoli 28 sa 31, 33 u 34 tar-Regolament (UE) Nru 1305/2013.

(221)L-Artikolu 74 tar-Regolament (UE) Nru 1305/2013 jeħtieġ li l-Istati Membri jikkonsultaw lill-Kumitat ta’ Monitoraġġ tal-programm ta’ żvilupp rurali dwar il-kriterji tal-għażla fi żmien erba’ xhur mill-approvazzjoni tal-programm. Dan joħloq obbligu indirett sabiex l-Istati Membri jkunu ddefinixxew il-kriterji tal-għażla kollha sa dik id-data anki għas-sejħiet għall-applikazzjoni li jitnedew sussegwentement. Sabiex jonqos il-piż amministrattiv żejjed, filwaqt li jiġi żgurat li r-riżorsi finanzjarji jintużaw bl-aħjar mod possibbli, l-Istati Membri għandhom jitħallew jiddefinixxu l-kriterji tal-għażla u jitolbu l-opinjoni tal-Kumitat ta’ Monitoraġġ fi kwalunkwe waqt qabel il-pubblikazzjoni tas-sejħiet għal applikazzjonijiet.

(222)Id-dixxiplina finanzjarja tintuża sabiex jiġi żgurat li l-baġit għall-Fond Agrikolu Ewropew ta' Garanzija jikkonforma mal-limiti massimi rispettivi u sabiex tiġi stabbilita r-riserva għal kriżijiet fis-settur agrikolu. Minħabba l-karattru tekniku tad-determinazzjoni tar-rata ta’ aġġustament u r-rabtiet inerenti tagħha mal-istimi tan-nefqa tal-Kummissjoni stipulati fl-Abbozz tal-Baġit annwali tagħha, il-proċedura għall-issettjar tar-rata ta’ aġġustament għandha tiġi ssimplifikata billi l-Kummissjoni tiġi awtorizzata tadottata skont il-proċedura konsultattiva. Ir-Regolament Finanzjarju l-ġdid ma jiddefinixxix il-popolazzjoni tal-benefiċjarji eliġibbli għar-rimborż tad-dixxiplina finanzjarja. Dan ir-regolament għandu jiġi adattat għal dak filwaqt li tinżamm id-definizzjoni attwali ta’ benefiċjarji eliġibbli.

(223)Sabiex jiġu armonizzati r-regoli dwar id-diżimpenn awtomatiku tal-Artikolu 87 tar-Regolament (UE) Nru 1303/2013 u l-Artikolu 38 tar-Regolament (UE) Nru 1306/2013, id-data li sa din l-Istati Membri jridu jibagħtu lill-Kummissjoni informazzjoni dwar eċċezzjonijiet għad-diżimpenn, imsemmija fl-Artikolu 38(3), għandha tiġi adattata.

(224)Sabiex jiġi pprovdut għal ċertezza legali rigward it-trattament tal-irkupri ġġenerati mit-tnaqqis temporanju skont l-Artikolu 41(2) tar-Regolament (UE) Nru 1306/2013, dan tal-aħħar għandu jkun inkluż fil-lista ta’ sorsi tad-dħul assenjat skont l-Artikolu 43 ta’ dak ir-Regolament.

(225)L-esperjenza wriet li r-regola, introdotta l-ewwel mar-Regolament (UE) Nru 1290/2005 ta’ kondiviżjoni ndaqs bejn il-baġit u l-Istati Membri r-riskju tan-nuqqas ta’ rkupru tas-somom dovuti għal irregolaritajiet meta dawn is-somom ma jkunux ġew irkuprati sa skadenzi raġonevoli (l-hekk imsejħa regola ta’ 50/50), ħadmet sew għas-salvagwardja tal-baġit. Madnakollu, sistema bħal din tinvolvi piż amministrattiv u ta’ żamma tal-kotba tqil kemm għall-Kummissjoni Ewropea kif ukoll għall-Istati Membri. Għaldaqstant jitqies xieraq li jkompli jinbidel dan l-approċċ u li s-somom relatati jiġu ddebitati kompletament lill-Istati Membri kkonċernati wara li jiskadu l-iskadenzi relatati li jawtorizzawhom, min-naħa l-oħra, li jżommu fil-baġits nazzjonali tagħhom is-somom sussegwentement irkuprati fi tmiem il-proċeduri ta’ rkupru relatati.

(226)Sabiex jiġi żgurat li ċ-ċaħda jew l-irkupru tal-pagamenti affettwati minn nuqqas ta’ konformità mar-regoli tal-akkwist pubbliku jirriflettu l-gravità ta’ nuqqas ta’ konformità bħal dan u jirrispettaw il-prinċipju ta’ proporzjonalità, tali ċaħda jew irkupru għandhom ikunu limitati għal-livelli stabbiliti mill-Kummissjoni sabiex isiru korrezzjonijiet finanzjarji għan-nefqa taħt implimentazzjoni kondiviża għan-nuqqas ta’ konformità mat-tali regoli. Huwa xieraq ukoll li jiġi ċċarat li nuqqasijiet ta’ konformità bħal dawn jaffettwaw il-legalità u r-regolarità tat-tranżazzjonijiet biss bl-istess livell.

(227)L-esperjenza miksuba sa issa turi li l-implimentazzjoni tat-tliet kriterji sabiex wieħed jitqies li huwa bidwi attiv, elenkati fit-tielet subparagrafu tal-Artikolu 9(2) tar-Regolament (UE) Nru 1307/2013 tal-Parlament Ewropew u tal-Kunsill 22 , instabet li hija diffiċli għal diversi Stati Membri. Sabiex jonqos il-piż amministrattiv assoċjat mal-implimentazzjoni tat-tliet kriterji, l-Istati Membri għandu jkollhom il-possibbiltà li jqiegħdu għad-dispożizzjoni wieħed jew tnejn minnhom biss. L-esperjenza turi wkoll li f’ċerti Stati Membri l-kostijiet amministrattivi totali għall-implimentazzjoni tal-klawżola ta’ bidwi attiv jisbqu il-benefiċċju tal-esklużjoni ta’ numru limitat ħafna ta’ benefiċjarji mhux attivi mill-iskemi ta’ appoġġ dirett. Sabiex l-Istati Membri jkunu jistgħu jindirizzaw sitwazzjonijiet bħal dawn fis-snin tal-pretensjonijiet tal-ġejjieni, l-applikazzjoni tal-Artikolu 9 sħiħ għandha ssir fakultattiva għalihom.

(228)L-esperjenza miksuba fl-ewwel sena tal-implimentazzjoni tar-Regolament (UE) Nru 1307/2013 uriet li ċerti Stati Membri li japplikaw l-iskema ta' pagament uniku skont l-erja ma użawx l-ammont sħiħ tal-fondi disponibbli skont il-limiti massimi baġitarji stabbiliti fir-Regolament ta’ Implimentazzjoni tal-Kummissjoni (UE) Nru 2015/1089. L-Istati Membri li japplikaw l-iskema ta' pagament bażiku diġà għandhom il-possibbiltà, sa ċerti limiti, li jiddistribwixxu intitolamenti għal pagamenti għal valur ogħla mill-ammont disponibbli għall-iskema ta' pagament bażiku sabiex jiżguraw użu aktar effiċjenti tal-fondi. L-Istati Membri li japplikaw l-iskema ta' pagament uniku skont l-erja għandhom jitħallew ukoll, fi ħdan l-istess limiti komuni u mingħajr ħsara għar-rispett tal-limiti massimi netti għall-pagamenti diretti, jikkalkolaw l-ammont neċessarju li bih jista’ jiżdied il-limitu massimu tal-iskema ta' pagament uniku skont l-erja tagħhom.

(229)Sabiex jiġi żgurat ilħiq massimu tal-pagament għall-bdiewa żgħażagħ skont ir-Regolament (UE) Nru 1307/2013, xieraq li l-Istati Membri jillimitaw in-numru ta’ intitolamenti għal pagamenti jew l-ettari eliġibbli iżda biss f’każijiet li fihom din il-limitazzjoni sservi sabiex jiġi żgurat ir-rispett tad-dispożizzjonijiet rilevanti dwar il-finanzajment tal-pagament għal bdiewa żgħażagħ.

(230)Skont l-Artikolu 52 tar-Regolament (UE) Nru 1307/2013, l-Istati Membri jistgħu jagħtu, b'ċerti kundizzjonijiet, appoġġ akkoppjat lill-bdiewa f'setturi agrikoli jew tipi ta' biedja speċifiċi, sal-punt meħtieġ biex jinħoloq inċentiv biex jinżammu l-livelli attwali ta' produzzjoni fis-setturi jew ir-reġjuni konċernati. Sabiex jiġi evitat milli l-livelli tal-produzzjoni jinżammu fejn mhux xieraq minħabba żbilanċi strutturali fis-suq, il-Kummissjoni għandha tingħata s-setgħa li tadotta atti delegati li jippermettu sabiex appoġġ akkoppjat volontarju jista’ jkompli jitħallas sal-2020 fuq il-bażi tal-unitajiet tal-produzzjoni li għalihom ingħata l-appoġġ f’perjodu ta’ referenza fl-imgħoddi. Fil-kuntest tal-kriżi attwali, din id-deroga temporanja għandha l-għan li tikseb fit-tul l-objettiv ta’ appoġġ akkoppjat volontarju ta’ żamma tal-livell ta’ produzzjoni fl-oqsma kkonċernati. 

(231)Wieħed mill-erba’ ostakoli għall-formazzjoni ta’ organizzazzjonijiet ta’ produtturi, l-aktar fl-Istati Membri li jinsabu lura fir-rigward tal-grad ta’ organizzazzjoni, jidher li huwa n-nuqqas ta’ fiduċja reċiproka u l-esperjenzi fl-imgħoddi. F’dan il-kuntest, l-ikkowċjar, li bih l-organizzazzjonijiet tal-produtturi li diġà qegħdin jaħdmu juru kif lil organizzazzjonijiet tal-produtturi, lill-gruppi tal-produtturi jew lill-produtturi individwali ta’ frott u ħxejjex oħrajn, jista’ jpatti għal dak l-ostakolu u b'hekk ikun inkluż fost l-objettivi tal-organizzazzjonijiet tal-produtturi fis-settur tal-frott u l-ħxejjex.

(232)Minbarra l-irtirar għad-distribuzzjoni b'xejn, xieraq ukoll li jingħataw azzjonijiet ta’ kkowċjar bil-għan li jħeġġu lill-produtturi jwaqqfu organizzazzjonijiet li jissodisfaw il-kriterji sabiex jiġu rikonoxxuti finanzjament sħiħ mill-Unjoni fi ħdan il-programmi operazzjonali tal-organizzazzjonijiet tal-produtturi eżistenti.

(233)Il-miżuri ta’ prevenzjoni u ta’ mmaniġġjar ta’ kriżijiet għandhom jiġu estiżi sabiex ikopru l-mili mill-ġdid tal-fondi mutwi li jistgħu jgħinu fil-ġlieda kontra kriżijiet bħala strumenti ġodda.

(234)Fl-Istati Membri fejn l-organizzazzjoni tal-produzzjoni fis-settur tal-frott u l-ħxejjex tkun dgħajfa, għandu jitħalla jsir l-għoti ta’ kontribuzzjonijiet finanzjarji nazzjonali addizzjonali.

(235)Sabiex jiġi żgurat appoġġ effiċjenti, immirat u sostenibbli tal-organizzazzjonijiet tal-produtturi u l-assoċjazzjonijiet tagħhom fis-settur tal-frott u l-ħxejjex, is-setgħa li tadotta ċerti atti għandha tiġi delegata lill-Kummissjoni fir-rigward tal-lista ta’ Stati Membri li jistgħu jagħtu assistenza finanzjarja nazzjonali lil organizzazzjonijiet tal-produtturi.

(236)Sabiex tiġi ssimplifikata l-proċedura attwali li l-ewwel tawtorizza lill-Istati Membri sabiex jagħtu assistenza finanzjarja nazzjonali addizzjonali lill-organizzazzjonijiet tal-produtturi f’reġjuni tal-Unjoni fejn il-grad ta’ organizzazzjoni huwa partikolarment baxx u t-tieni li tirrimborża parti mill-assistenza finanzjarja anzzjonali jekk jiġu rrispettati kundizzjonijiet ulterjuri, tista’ tiġi stabbilita sistema ġdida. L-Istati Membri fejn ir-rata ta’ organizzazzjoni hija partikolarment baxxa u kienet anqas minn 20 % f’livell nazzjonali fl-2013 jistgħu jagħtu perċentwal addizzjonali tal-valur tal-produzzjoni mqiegħda fis-suq bħala għajnuna nazzjonali b’riżultat simili għall-iskema attwali ta’ awtorizzazzjoni minn qabel u rimborż sussegwenti mill-Unjoni. Il-Kummissjoni għandha tirrevedi l-lista ta’ Stati Membri li jistgħu jagħtu assistenza nazzjonali addizzjonali b’mod regolari sabiex iżżommha aġġornata.

(237)L-esperjenza miksuba bl-applikazzjoni tal-Artikolu 188 tar-Regolament (UE) Nru 1308/2013 tal-Parlament Ewropew u tal-Kunsill 23 uriet li l-bżonn li jiġu adottati atti ta’ implimentazzjoni għall-ġestjoni ta’ proċessi sempliċi u matematiċi marbutin mal-mod kif jiġu allokati l-kwoti jeħtieġ ħafna xogħol u riżorsi mingħajr ma hemm vantaġġ speċifiku marbut mat-tali approċċ. Fil-fatt il-Kummissjoni ma għandha ebda marġni ta’ diskrezzjoni f’dan il-kuntest peress li l-formula relatata diġà hija stabbilita mid-dispożizzjonijiet tal-Artikolu 7 (2) tar-Regolament tal-Kummissjoni (KE) 1301/2006 24 . Sabiex jitnaqqas il-piż amministrattiv u jiġi ssimplifikat il-proċess, għandu jiġi pprovdut li l-Kummissjoni tippubblika r-riżultati tal-allokazzjoni tal-kwoti tariffarji tal-importazzjoni permezz ta’ pubblikazzjoni xierqa fuq il-web. Barra minn hekk, għandha tiddaħħal dispożizzjoni speċifika li tipprovdi li l-Istati Membri għandhom joħorġu biss liċenzji wara l-pubblikazzjoni tar-riżultati tal-allokazzjoni mill-Kummissjoni.

(238)Wara l-31 ta’ Diċembru 2017, il-FEG għandu jkompli jipprovdi assistenza b’mod temporanju liż-żgħażagħ barra mill-impjieg, edukazzjoni jew taħriġ (NEETs) li jgħixu f'reġjuni eliġibbli skont l-Inizjattiva favur l-Impjieg taż-Żgħażagħ, minħabba li dawk ir-reġjuni huma milquta b'mod sproporzjonat minn rata maġġuri ta’ sensji.

(239)Sabiex tiżdied l-effiċjenza tal-intervent, tista’ tiġi stabbilita faċilità tat-taħlit jew jistgħu jiġu stabbiliti faċilitajiet tat-taħlit skont il-Faċilità Nikkollegaw l-Ewropa (CEF). Tali faċilitajiet tat-taħlit għandhom jiffinanzjaw operazzjonijiet ta’ taħlit li huma azzjonijiet li jgħaqqdu forom mhux rimborżabbli ta’ appoġġ u/jew strumenti finanzjarji mill-baġit tal-Unjoni, inkluża taħlita ta’ ekwità tas-CEF u strumenti finanzjarji tad-dejn tas-CEF, u finanzjament mill-Grupp tal-BEI (inkluż il-finanzjament tal-BEI mill-FEIS), istituzzjonijiet ta’ finazjament oħrajn jew ta’ żvilupp kif ukoll investituri.

(240)Faċilità ta’ taħlit skont is-CEF għandu jkollha l-għan li ttejjeb l-effett multiplikatur tal-infiq tal-Unjoni billi tattira riżorsi addizzjonali minn investituri privati. Barra minn hekk, għandha tiżgura li l-azzjonijiet appoġġjati jsiru ekonomikament u finanzjarjament vijabbli.

(241)Sabiex tiġi appoġġjata l-implimentazzjoni ta’ proġetti bl-aktar valur miżjud għan-Netwerk tat-Trasport Trans-Ewropew rigward Kurituri tan-Netwerk Ewlieni, proġetti transfruntiera u proġetti fuq taqsimiet oħrajn tan-Netwerk Ewrliewni, hemm bżonn li tingħata flessibbiltà fl-użu tal-programm ta’ ħidma pluriennali li tippermetti li jintlaħqu sa 95 % tar-riżorsi baġitarji finanzjarji indikati fir-Regolament (UE) Nru 1316/2013.

(242)Bħalissa jistgħu jintużaw biss għotjiet u l-akkwist sabiex jappoġġjaw azzjonijiet fil-qasam tal-Infrastrutturi tas-Servizzi Diġitali. Sabiex tiġi żgurata l-akbar effiċjenza possibbli, l-istrumenti finanzjarji għandhom jitqiegħdu għad-dispożizzjoni wkoll sabiex jappoġġjaw dawn l-azzjonijiet.

(243)L-intervent fil-qasam tal-Infrastrutturi tas-Servizzi Diġitali għandu jkun ibbażat fuq prinċipji sempliċi u flessibbli sabiex l-Unjoni tkun tista’ tirreaġixxi għal prijoritajiet politiċi emerġenti u ħtiġijiet ta’ finanzjament relatati. B’mod partikolari, sabiex jintlaħqu l-objettivi ta’ intervent f’qasam partikolari jista’ jkun hemm bżonn li jiġu ffinanzjati “servizzi ta’ passarella” li jorbtu infrastruttura nazzjonali waħda jew aktar ma’ pjattaforma/i tas-servizzi ewlenin bħal elementi ta’ Infrastruttura tas-Servizzi Diġitali partikolari: kalkolu, ħżin ta’ dejta u ġestjoni, konnettività.

(244)Sabiex jiġi evitat piż amministrattiv żejjed għall-awtoritajiet maniġerjali li jista’ jxekkel l-implimentazzjoni effiċjenti tal-FEAD, xieraq li tiġi ssimplifikata u ffaċilitata l-proċedura għall-emendar ta’ elementi mhux essenzjali tal-programmi operazzjonali.

(245)Bil-għan li jkompli jiġi ssimplifikat l-użu tal-FEAD, xieraq li jiġu stabbiliti dispożizzjonijiet adidzzjonali rigward l-eliġibbiltà tan-nefqa, b’mod partikolari fir-rigward tal-użu ta’ skali standard ta’ kostijiet unitarji, ta’ somom f’daqqa u ta’ rati fissi.

(246)Sabiex jiġi evitat it-trattament inġust tal-organizzazzjonijiet sħab, irregolaritajiet li huma imputabbli biss lill-korp inkarigat mix-xiri tal-assistenza ma għandhomx jaffettwaw l-eliġibbiltà tan-nefqa tal-organizzazzjonijiet sħab.

(247)Xieraq li tiġi ċċarata d-definizzjoni ta’ “regoli ta’ eliġibbiltà” sabiex tiġi żgurata ċertezza legali f’operazzjonijiet appoġġjati mill-FEAD.

(248)Sabiex tiġi ssimplifikata l-implimentazzjoni tal-FEAD u tiġi evitata inċertezza, ċerti responsabbiltajiet tal-Istati Membri fuq il-ġestjoni u l-kontroll għandhom jiġu ċċarati.

(249)Sabiex tiġi ssimplifikata l-implimentazzjoni tal-Fondi SIE u tal-FEAD u tiġi evitata inċertezza, ċerti responsabbiltajiet tal-Istati Membri fuq il-ġestjoni u l-kontroll għandhom jiġu ċċarati.

(250)Ir-Regolament (UE) Nru 652/2014 tal-Parlament Ewropew u tal-Kunsill 25 jipprovdi għall-possibbiltà li l-impenji baġitarji jinqasmu fi ħlasijiet parzjali annwali biss f’każ ta’ approvazzjoni ta’ programmi pluriennali għall-qerda, għall-kontroll u għas-sorveljanza ta’ mardiet tal-annimali u żoonożi, għal programmi ta’ stħarriġ li jikkonċernaw il-preżenza ta’ pesti u għal programmi li jikkonċernaw il-kontroll tal-pesti fir-reġjuni ultraperiferiċi tal-Unjoni. Fl-interess tas-simplifikazzjoni u sabiex jitnaqqas il-piż amministrattiv, din il-possibbiltà għandha tiġi estiża għall-azzjonijiet l-oħrajn stipulati fir-Regolament (UE) Nru 652/2014.

(251)Il-qafas ta’ appoġġ tas-Sorveljanza u Insegwiment fl-Ispazju (SST) stabbilit bid-Deċiżjoni Nru 541/2014/UE huwa ffinanzjat mill-baġits tat-tliet programmi ta’ finanzjament tal-Unjoni, il-programm Copernicus stabbilit bir-Regolament (UE) Nru 377/2014, il-programmi ta’ navigazzjoni satellitari stabbiliti bir-Regolament (UE) Nru 1285/2013 u l-programm speċifiku li jimplimenta l-Orizzont 2020 stabbilit bid-Deċiżjoni tal-Kunsill Nru 2013/743/UE. Bħala riżultat ta’ dan, il-qafas ta’ appoġġ tal-SST kien soġġett għal tliet settijiet ta’ regoli applikabbli. Dan wassal għal implimentazzjoni subottimali tal-qafas u kkaġuna piż amministrattiv sproporzjonat għall-Kummissjoni u għall-benefiċjarji. Filwaqt li l-għanijiet, l-objettivi u l-ambitu ta’ kull wieħed mit-tliet programmi ta’ finanzjament iridu jiġu rrispettati, sabiex tiġi ssimplifikata l-implimentazzjoni tal-qafas ta’ appoġġ tal-SST fil-ġejjieni, sett ta’ regoli wieħed biss għandu jkun applikabbli għall-għoti u għall-ġestjoni tal-għotjiet fi ħdan il-qafas ta’ appoġġ tal-SST.

(252)Dan ir-Regolament Finanzjarju għandu jiġi rivedut biss meta jkun neċessarju, u mhux aktar tard minn sentejn qabel tmiem kull qafas finanzjarju pluriennali. Reviżjonijiet li huma eċċessivament frekwenti jiġġeneraw kost sproporzjonat fl-aġġustar tal-istrutturi u tal-proċeduri amministrattivi għar-regoli l-ġodda. Minbarra dan, iż-żmien jista' jkun qasir wisq biex ikun possibbli li wieħed jasal għal konklużjonijiet validi mill-applikazzjoni tar-regoli li jkunu fis-seħħ.

(253)Għandhom jiġu stabbiliti dispożizzjonijiet tranżitorji. Sabiex ma tixxekkilx l-applikazzjoni tar-regoli speċifiċi għas-setturi rilevanti li jistgħu jirreferu għal deċiżjonijiet dwar l-għoti, xieraq li jiġi speċifikat li d-deċiżjonijiet dwar l-għoti jistgħu jibqgħu jiġu adottati skont l-att bażiku tagħhom. Sabiex tiġi żgurata t-tranżizzjoni mal-mekkaniżmu tal-adozzjoni l-ġdid tad-deċiżjonijiet li jawtorizzaw l-użu tas-somma f’daqqa, ta’ kostijiet unitarji jew ta’ rati fissi, xieraq li l-uffiċjal tal-awtorizzazzjoni responsabbli jingħata permess li jemenda d-deċiżjonijiet eżistenti rilevanti.

ADOTTAW DAN IR-REGOLAMENT:

L-EWWEL PARTI
IR-REGOLAMENT FINANZJARJU

TITOLU I
SUĠĠETT, KAMP TA’ APPLIKAZZJONI U DEFINIZZJONIJIET

Artikolu 1
Suġġett

Dan ir-Regolament jistabbilixxi r-regoli għall-istabbiliment u l-implimentazzjoni tal-baġit ġenerali tal-Unjoni Ewropea u tal-Euratom u għall-preżentazzjoni u l-awditjar tal-kontijiet.

Artikolu 2
Definizzjonijiet

Għall-finijiet ta’ dan ir-Regolament, għandhom japplikaw id-definizzjonijiet li ġejjin:

1.“applikant” tfisser persuna fiżika jew entità b’personalità ġuridika jew mingħajrha li ssottomettiet applikazzjoni fi proċedura ta’ għoti ta’ għotja jew f’kompetizzjoni għal premji;

2.“dokumenti ta’ applikazzjoni” tfisser offerta, talba għal parteċipazzjoni, applikazzjoni għal għotja jew applikazzjoni f’kompetizzjoni għal premji;

3.“proċedura ta’ għoti” tfisser proċedura tal-akkwist, proċedura ta’ għoti tal-għotja, kompetizzjoni għal premji, jew proċedura għall-għażla ta’ esperti jew ta’ entitajiet li jimplimentaw il-fondi tal-Unjoni skont il-punt (c) tal-Artikolu 61 (1);

4.“att bażiku” tfisser att legali li jipprovdi bażi legali għal azzjoni u għall-implimentazzjoni tan-nefqa korrispondenti mdaħħla fil-baġit jew tal-garanzija baġitarja jew tal-assistenza finanzjarja appoġġjata mill-baġit.

Att bażiku jista' jieħu kwalunkwe waħda mill-forom li ġejjin:

(a)fl-implimentazzjoni tat-Trattat dwar il-Funzjonament tal-Unjoni Ewropea (TFUE) u t-Trattat li jistabbilixxi l-Komunità Ewropea tal-Enerġija Atomika (it-Tratatt Euratom), il-forma ta’ regolament, direttiva jew deċiżjoni skont it-tifsira tal-Artikolu 288 TFUE; jew

(b)fl-implimentazzjoni tat-Titolu V tat-Trattat dwar l-Unjoni Ewropea (TUE), waħda mill-forom speċifikati fl-Artikoli 28(1), 31(2), 33, 42(4) u 43(1) tat-TUE.

Ir-rakkomandazzjonijiet u l-opinjonijiet ma għandhomx jikkostitwixxu atti bażiċi.

5.“benefiċjarju” tfisser persuna fiżika jew entità b’personalità ġuridika jew mingħajrha li magħha ġie ffirmat ftehim ta’ għoti;

6.“operazzjoni ta’ taħlit” tfisser azzjoni mwettqa fi ħdan faċilità ta’ taħlit li tgħaqqad forom mhux ripagabbli ta’ appoġġ u/jew strumenti finanzjarji mill-baġit tal-UE u strumenti finanzjarji minn istituzzjonijiet ta’ finanzjament pubbliku oħrajn jew ta’ żvilupp kif ukoll minn istituzzjonijiet ta’ finanzjament kummerċjali u investituri. L-operazzjonijiet ta’ taħlit jistgħu jinkludu azzjoni preparatorja li twassal għal investimenti potenzjali minn istituzzjonijiet ta’ finanzjament;

7.“faċilità ta’ taħlit” tfisser faċilità stabbilita bħala qafas ta’ kooperazzjoni bejn il-Kummissjoni u istituzzjonijiet pubbliċi ta’ finanzjament oħrajn jew ta’ finanzjament tal-iżvilupp kif ukoll istituzzjonijiet ta’ finanzjament kummerċjali u investituri li għandha l-għan li tikseb ċerti objettivi u politiki ta’ prijorità tal-Unjoni bl-użu ta’ operazzjonijiet ta’ taħlit u azzjonijiet individwali oħrajn;

8.“impenn baġitarju” tfisser l-operazzjoni li biha l-uffiċjal tal-awtorizzazzjoni responsabbli jirriserva approprjazzjonijiet fil-baġit għal pagamenti sussegwenti.

9.“garanzija baġitarja” tfisser impenn legali tal-Unjoni sabiex tappoġġja programm ta’ azzjonijiet billi ddaħħal fil-baġit tal-Unjoni obbligu finanzjarju jekk iseħħ avveniment speċifikat matul l-implimentazzjoni tal-programm;

10.“kuntratti ta’ bini” tfisser kuntratt li jkopri x-xiri, il-lokazzjoni fit-tul, l-użufrutt, il-lokazzjoni, il-kiri jew il-lokazzjoni b'opzjoni ta' xiri, bil-possibbiltà jew le ta' xiri, ta' art, ta’ bini jew ta’ proprjetà immobbli oħra. Għandhom ikopru kemm bini eżistenti kif ukoll bini qabel it-tlestija diment li l-kandidat ikun kiseb permess tal-bini validu għalih, ħlief meta l-bini jkun tfassal skont l-ispeċifikazzjonijiet tal-awtorità kontraenti;

11.“kandidat” tfisser attur ekonomiku li jkun talab stedina jew li jkun ġie mistieden jieħu sehem fi proċedura ristretta, proċedura kompetittiva permezz ta' negozjar, djalogu kompetittiv, sħubija għall-innovazzjoni, kompetizzjoni dwar id-disinn jew proċedura nnegozjata;

12.“korp ċentrali għall-akkwisti” tfisser awtorità kontraenti li tipprovdi attivitajiet ċentralizzati ta' akkwist u, fejn applikabbli, attivitajiet anċillari ta' akkwist;

13.“verifika” tfisser il-verifika ta' aspett speċifiku ta' operazzjoni ta' dħul jew ta' nefqa;

14.“kuntratt ta' konċessjoni” tfisser kuntratt għal interess pekunarju konkluż bil-miktub bejn attur ekonomiku wieħed jew aktar u awtorità kontraenti waħda jew aktar skont it-tifsira tal-Artikoli 168 u 172, sabiex it-twettiq ta' xogħlijiet jew il-forniment u l-ġestjoni ta' servizzi tiġi fdata lil attur ekonomiku (il-“konċessjoni”). Ir-rimunerazzjoni għandha tikkonsisti jew biss fid-dritt li jiġu sfruttati xogħlijiet jew servizzi jew f’dak id-dritt flimkien ma’ pagament. L-għoti ta’ kuntratt ta’ konċessjoni għandu jinvolvi t-trasferiment lill-konċessjonarju ta’ riskju operattiv fl-isfruttament ta’ dawk ix-xogħlijiet jew is-servizzi, li jinkludi riskju ta’ domanda jew ta’ disponibbiltà jew tat-tnejn. Il-konċessjonarju għandu jitqies li jassumi riskju operattiv, meta, f'kundizzjonijiet ta' operazzjoni normali, ma jkunx hemm garanzija li jiġu rkuprati l-investimenti magħmula jew il-kostijiet imġarrbin fl-operat tax-xogħlijiet jew is-servizzi inkwistjoni;

15.“obbligazzjoni kontinġenti” hija obbligazzjoni finanzjarja potenzjali li tista’ tiġġarrab skont l-eżitu ta’ avveniment futur;

16.“kuntratt” tfisser kuntratt pubbliku jew kuntratt ta' konċessjoni;

17.“kuntrattur” tfisser attur ekonomiku li miegħu ġie ffirmat kuntratt ta’ akkwist;

18.“kontroll” tfisser kwalunkwe miżura meħuda biex tingħata garanzija raġonevoli rigward l-effikaċja, l-effiċjenza u l-ekonomija tal-operazzjonijiet, l-affidabilità tar-rappurtar, is-salvagwardja tal-assi u tal-informazzjoni, il-prevenzjoni, id-detezzjoni u l-korrezzjoni ta' frodi u ta’ irregolaritajiet u s-segwitu tagħhom, u l-ġestjoni adegwata tar-riskji relatati mal-legalità u mar-regolarità tat-tranżazzjonijiet sottostanti, b'kont meħud tan-natura pluriennali tal-programmi kif ukoll tan-natura tal-pagamenti kkonċernati. Il-kontrolli jistgħu jinvolvu diversi verifiki, kif ukoll l-implimentazzjoni ta' kwalunkwe politika u proċedura għall-kisba tal-objettivi deskritti fl-ewwel sentenza;

19.“ftehim ta’ kontribuzzjoni” tfisser ftehim konkluż ma’ entitajiet u persuni skont il-punti (ii) sa (viii) tal-Artikolu 61(1)(c);

20.“kontroparti” hija l-parti l-oħra li tingħata garanzija baġitarja tal-Unjoni;

21.“Sitwazzjonijiet ta’ kriżi” għandha tinftiehem bħala sitwazzjoni ta’ periklu immedjat jew imminenti b’riskju li tiżviluppa f’kunflitt bl-armi jew li tiddestabilizza pajjiż. Sitwazzjonijiet ta’ kriżi jinftiehmu wkoll bħala sitwazzjonijiet ikkawżati minn diżastri naturali, kriżijiet maħluqa mill-bniedem bħal gwerer u kunflitti oħrajn jew ċirkustanzi straordinarji b’effetti paragunabbli relatati, fost l-oħrajn, mat-tibdil fil-klima, mad-degradazzjoni tal-ambjent, maċ-ċaħda tal-aċċess għall-enerġija u mar-riżorsi naturali jew mal-faqar estrem.

22.“sistema dinamika ta' xiri” tfisser proċess kompletament elettroniku biex isir xiri użat b'mod frekwenti;

23.“attur ekonomiku” tfisser kwalunkwe persuna fiżika jew ġuridika, inkluża entità pubblika, jew grupp ta' persuni tali, li toffri l-forniment ta' prodotti, twettaq xogħlijiet jew tipprovdi servizzi jew proprjetà immobbli;

24.“investiment ta’ ekwità” tfisser il-għoti ta’ kapital lil impriża, b'investiment dirett jew indirett inkambju għall-proprjetà sħiħa jew parzjali ta’ dik l-impriża, u fejn l-investitur ta’ ekwità jista’ jassumi xi kontroll ġestjonali tal-impriża u jkun jista’ jipparteċipa fil-profitti futuri;

25.“deċiżjoni amministrattiva finali” tfisser deċiżjoni ta’ awtorità amministrattiva b’effett finali u vinkolanti skont il-liġi applikabbli;

26.“assi finanzjarju” huwa kwalunkwe assi li huwa flus, strument ta’ ekwità ta’ entità oħra jew dritt kuntrattwali li wieħed jirċievi flus jew assi finanzjarju ieħor mingħand entità oħra;

27.“strumenti finanzjarji” tfisser miżuri tal-Unjoni ta’ appoġġ finanzjarju pprovdut mill-baġit sabiex jiġi indirizzat, meta meħtieġ u debitament iġġustifikat, objettiv speċifiku ta’ politika tal-Unjoni wieħed jew aktar. Tali strumenti jista’ jkollhom il-forma ta’ self, garanziji, ta’ ekwità jew kważi ekwità, ta’ investimenti, u ta’ strumenti oħrajn ta’ qsim tar-riskju, u, fejn ikun xieraq, jistgħu jkunu kkombinati ma’ forom oħrajn ta’ appoġġ finanzarju jew ma’ fondi taħt implimentazzjoni kondiviża jew fondi tal-FEŻ;

28.“obbligazzjoni finanzjarja” hija kwalunkwe obbligazzjoni li hija obbligu kuntrattwali sabiex jiġu forniti flus jew assi finanzjarju ieħor lil entità oħra;

29.“kuntratt qafas” tfisser kuntratt pubbliku konkluż bejn attur ekonomiku wieħed jew aktar u awtorità kontraenti waħda jew aktar, li l-iskop tiegħu huwa li jistabbilixxi t-termini li jirregolaw kuntratti speċifiċi taħtu li għandhom jingħataw matul perjodu speċifiku, b'mod partikolari fir-rigward tal-prezz u, fejn xieraq, il-kwantità prevista;

30.“garanzija” tfisser impenn bil-miktub ta’ dħul għar-responsabbiltà in toto jew in parte għal debitu ta’ parti terza jew obbligu jew għat-twettiq sħiħ u tajjeb min-naħa ta’ dik il-parti terza f’każ li tiskatta tali garanzija, bħal fil-każ ta’ morożità;

31.“garanzija fuq talba” tfisser garanzija li trid tkun onorata mill-garanti fuq talba tal-kontroparti, minkejja kwalunkwe nuqqas fl-infurzabbiltà tal-obbligu sottostanti;

32.“impenn legali” tfisser l-att li bih l-uffiċjal tal-awtorizzazzjoni responsabbli jidħol f’obbligu jew jistabbilixxi obbligu li jirriżulta f’pagament jew f’pagamenti sussegwenti u r-rikonoxximent tan-nefqa ddebitata lill-baġit. Għall-finijiet tat-Titolu V tal-Parti I, bl-eċċezzjoni tal-Artikolu 134, “impenn legali” jkopri ftehimiet qafas ta’ sħubija finanzjarja u kuntratti qafas ukoll;

33.“effett ta’ ingranaġġ” tfisser l-ammont ta’ finanzjament lir-riċevituri finali eliġibbli maqsum bl-ammont tal-kontribuzzjoni tal-Unjoni;

34.“self” tfisser ftehim li jobbliga lill-mutwant li jqiegħed ammont miftiehem ta’ flus disponibbli għall-mutwatarju għal perjodu miftiehem ta’ żmien u li matulu l-mutwatarju jkun obbligat iħallas dak l-ammont fiż-żmien miftiehem;

35.“għotja ta’ valur baxx” tfisser għotja ta’ EUR 60 000 jew anqas;

36.“metodu ta’ implimentazzjoni” tfisser il-metodi ta’ implimentazzjoni tal-baġit deskritti fl-Artikoli 61, 62 jew 149, jiġifieri implimentazzjoni diretta, implimentazzjoni indiretta u implimentazzjoni kondiviża;

37.“azzjoni b’bosta donaturi” tfisser kwalunkwe azzjoni fejn il-fondi tal-Unjoni jinġabru flimkien ma’ mill-inqas donatur ieħor;

38.“effett moltiplikatur” tfisser l-investiment mir-riċevituri finali eliġibbli maqsum bl-ammont tal-kontribuzzjoni tal-Unjoni.

39.“pari passu” tfisser pretensjoni ugwali f’xi dritt;

40.“parteċipant” tfisser kandidat jew offerent fi proċedura ta’ akkwist, applikant fi proċedura ta’ għoti tal-għotja, espert fi proċedura għall-għażla ta’ esperti, applikant f’kompetizzjoni għal premji jew entità jew persuna li tieħu sehem fi proċedura għall-implimentazzjoni ta’ fondi tal-Unjoni skont il-punt (c) tal-Artikolu 61(1);

41.“dokument tal-akkwist” tfisser kwalunkwe dokument prodott jew imsemmi mill-awtorità kontraenti biex jiddeskrivi jew jiddetermina elementi tal-proċedura ta' akkwist, inklużi:

(a)il-miżuri ta' pubbliċità stipulati fl-Artikolu 157;

(b)l-istedina għall-preżentazzjoni tal-offerti;

(c)l-ispeċifikazzjonijiet tal-offerta, li għandhom jinkludu l-ispeċifikazzjonijiet tekniċi u l-kriterji rilevanti, jew id-dokumenti deskrittivi f'każ ta' djalogu kompetittiv;

(d)l-abbozz ta' kuntratt;

42.“kuntratt pubbliku” tfisser kuntratt għal interess pekunarju konkluż bil-miktub bejn attur ekonomiku wieħed jew aktar u awtorità kontraenti waħda jew aktar skont it-tifsira tal-Artikoli 168 u 172, sabiex tinkiseb, bi ħlas ta' prezz imħallas totalment jew parzjalment mill-baġit, il-provvista ta' assi mobbli jew immobbli, l-eżekuzzjoni ta' xogħlijiet jew il-provvista ta' servizzi.

43.Kuntratti pubbliċi jinkludu:

(a)kuntratti ta' bini;

(b)kuntratti ta' forniment;

(c)kuntratti ta' xogħlijiet;

(d)kuntratti ta' servizz;

44.“premju” tfisser kontribuzzjoni finanzjarja mogħtija bħala premju wara kompetizzjoni;

45.“akkwist” tfisser l-akkwist permezz ta' kuntratt ta' xogħlijiet, ta’ provvisti jew ta’ servizzi u l-akkwist jew il-kiri ta' art, ta’ bini jew ta’ proprjetà immobbli oħra, minn awtorità kontraenti waħda jew aktar mingħand atturi ekonomiċi magħżula minn dawk l-awtoritajiet kontraenti;

46.“investiment ta’ kważi ekwità” tfisser tip ta’ finanzjament li jinkwadra ruħu bejn l-ekwità u d-debitu, li għandu riskju akbar mid-dejn superjuri u riskju iżgħar mill-ekwità komuni. L-investimenti ta’ kważi ekwità jistgħu jkunu strutturati bħala debitu, tipikament mingħajr garanzija u subordinati u f’xi każijiet konvertibbli f’kapital, jew f’kapital preferut;

47.“riċevitur” tfisser benefiċjarju, kuntrattur, espert estern rimunerat, kwalunkwe persuna jew entità li tirċievi premji jew fondi minn strument finanzjarju jew li timplimenta fondi tal-Unjoni skont il-punt (c) tal-Artikolu 61(1);

48.“ftehim ta’ riakkwist” tfisser il-bejgħ ta’ titoli għal flus bi ftehim li jerġgħu jinxtraw lura f’data futura speċifikata, jew fuq talba;

49.“approprjazzjonijiet tar-riċerka u tal-iżvilupp teknoloġiku” tfisser approprjazzjonijiet li jkunu mdaħħla jew f'wieħed mit-titoli tal-baġit relatati mal-qasam ta’ politika marbutin ma’ "Riċerka indiretta" u "Riċerka diretta" jew f'kapitolu li jirrigwarda l-attivitajiet tar-riċerka f'titolu ieħor;

50.“strument ta’ qsim tar-riskju” tfisser strument finanzjarju li jippermetti l-kondiviżjoni ta’ riskju definit bejn żewġ entitajiet jew aktar, fejn ikun xieraq bi skambju ma’ remunerazzjoni li ntlaħaq qbil dwarha;

51.“kuntratti ta’ servizz” tfisser kuntratt li jkopri s-servizzi intellettwali u mhux intellettwali kollha għajr dawk li huma koperti minn kuntratti ta' provvista, kuntratti ta' xogħlijiet jew kuntratti ta' bini;

52.“Regolamenti tal-Persunal” tfisser ir-Regolamenti tal-Persunal għall-Uffiċjali u l-Kondizzjonijiet tal-Impjieg Applikabbli għall-Aġenti l-Oħra tal-Unjoni stabbiliti fir-Regolament tal-Kunsill (KEE, Euratom, KEFA) Nru 259/68;

53.“sottokuntrattur” tfisser attur ekonomiku li jkun propost minn kandidat jew offerent jew kuntrattur biex iwettaq parti minn kuntratt jew minn benefiċjarju sabiex iwettaq parti mill-kompiti kkofinanzjati mill-għotja.

54.“abbonament” tfisser somom imħallsa lill-korpi li l-Unjoni hija membru fihom, skont id-deċiżjonijiet tal-baġit u l-kundizzjonijiet ta’ ħlas stabbiliti mill-korp ikkonċernat;

55.“kuntratti ta' provvista” tfisser kuntratt li jkopri x-xiri, it-twellija, il-kiri jew il-lokazzjoni b'opzjoni ta' xiri bil-possibbiltà jew le ta' xiri. Kuntratti ta’ provvista jistgħu jinkludu, bħala aspett sekondarju, attivitajiet fuq il-post u ta’ installazzjoni.

56.“assistenza teknika” tfisser, bla ħsara għar-regoli speċifiċi għas-setturi, l-appoġġ u l-attivitajiet ta’ tisħiħ tal-kapaċitajiet li huma meħtieġa għall-implimentazzjoni ta’ programm jew azzjoni, b’mod partikolari attivitajiet ta’ preparazzjoni, ta’ ġestjoni, ta’ monitoraġġ, ta’ evalwazzjoni, ta’ awditjar u ta’ kontroll.

57.“offerent” tfisser attur ekonomiku li jkun ippreżenta offerta;

58.“Unjoni” tfisser l-Unjoni Ewropea, il-Komunità Ewropea tal-Enerġija Atomika, jew it-tnejn li huma, skont il-kuntest;

59.“istituzzjoni tal-Unjoni” tfisser il-Parlament Ewropew, il-Kunsill Ewropew, il-Kunsill, il-Kummissjoni Ewropea, il-Qorti tal-Ġustizzja tal-Unjoni Ewropea, il-Qorti tal-Awdituri, il-Kumitat Ekonomiku u Soċjali Ewropew, il-Kumitat tar-Reġjuni, l-Ombudsman Ewropew, il-Kontrollur Ewropew għall-Protezzjoni tad-Data u s-Servizz Ewropew għall-Azzjoni Esterna (is-“SEAE”); il-Bank Ċentrali Ewropew ma għandux jitqies bħala istituzzjoni tal-Unjoni;

60.“bejjiegħ” tfisser attur ekonomiku rreġistrat f'lista ta' bejjiegħa li għandhom jiġu mistiedna jippreżentaw talbiet għall-parteċipazzjoni jew għall-preżentazzjoni tal-offerti;

61.“xogħol” tfisser l-eżitu ta’ xogħlijiet ta’ bini jew ta’ inġinerija ċivili meħuda fis-sħuħija tagħhom li minnhom infushom jistgħu jaqdu funzjoni ekonomika jew teknika;

62.“kuntratti ta’ xogħlijiet” tfisser kuntratt li jkopri l-eżekuzzjoni, jew kemm l-eżekuzzjoni kif ukoll it-tfassil, tax-xogħol(ijiet) b'rabta ma’ waħda mill-attivitajiet imniżżla fl-Anness II għad-Direttiva tal-Parlament Ewropew u tal-Kunsill 2014/24/UE dwar l-akkwist pubbliku 26 jew it-twettiq, bi kwalunkwe mezz, ta’ xogħol li jikkorrispondi għar-rekwiżiti speċifikati mill-awtorità kontraenti waqt li teżerċita influwenza deċiżiva fuq it-tip jew it-tfassil tax-xogħol;

Artikolu 3
Konformità tal-leġiżlazzjoni sekondarja ma’ dan ir-Regolament

1.Dispożizzjonijiet li jikkonċernaw l-implimentazzjoni tad-dħul u tan-nefqa tal-baġit, u li jinsabu f'att bażiku, għandhom jikkonformaw mal-prinċipji tal-baġit kif elenkati fit-Titolu II.

2.Bla ħsara għall-paragrafu 1, kwalunkwe proposta jew emenda għal proposta mressqa lill-awtorità leġislattiva li jkun fiha derogi minn dispożizzjonijiet li mhumiex dawk fit-Titolu II jew mill-atti delegati adottati skont dan ir-Regolament għandha tindika b’mod ċar dawn id-derogi u tagħti r-raġunijiet speċifiċi li jiġġustifikawhom fil-premessi u fil-memorandum ta’ spjegazzjoni ta’ tali proposti.

Artikolu 4
Perjodi, dati u limiti ta' żmien

Sakemm ma jkunx previst mod ieħor, ir-Regolament tal-Kunsill (KEE, Euratom) Nru 1182/71( 27 ) għandu japplika għall-iskadenzi stabbiliti b'dan ir-Regolament.

Artikolu 5
Protezzjoni tad-dejta personali

Dejta personali miġbura skont dan ir-Regolament għandha tiġi pproċessata skont id-Direttiva 95/46/KE ( 28 ) u r-Regolament (KE) Nru 45/2001. Kandidat jew offerent fil-proċedura ta’ akkwist, applikant fi proċedura ta’ għoti ta’ għotja, espert fi proċedura għall-għażla tal-esperti, applikant f’kompetizzjoni għal premji jew entità jew persuna li tieħu sehem fi proċedura għall-implimentazzjoni ta’ fondi tal-Unjoni skont il-punt (c) tal-Artikolu 61(1) kif ukoll benefiċjarju, kuntrattur, espert estern rimunerat jew kwalunkwe persuna jew entità li tirċievi premji jew timplimenta fondi tal-Unjoni skont il-punt (c) tal-Artikolu 61(1) għandhom jiġu informati kif xieraq.

TITOLU II
IL-BAĠIT U L-PRINĊIPJI BAĠITARJI

Artikolu 6
Rispett għall-prinċipji baġitarji

Il-baġit għandu jkun stabbilit u implimentat f’konformità mal-prinċipji tal-unità, il-preċiżjoni baġitarja, l-annwalità, l-ekwilibriju, l-unità tal-kontijiet, l-universalità, l-ispeċifikazzjoni, il-ġestjoni finanzjarja tajba li titlob kontroll intern effettiv u effiċjenti, u t-trasparenza kif imniżżel f'dan ir-Regolament, sakemm ma jkunx stipulat mod ieħor f’dan ir-Regolament.

KAPITOLU 1
Prinċipji tal-unità u tal-akkuratezza baġitarja

Artikolu 7
Kamp ta’ applikazzjoni tal-baġit

1.Għal kull sena finanzjarja, il-baġit għandu jipprevedi u jawtorizza d-dħul u n-nefqa kollha meqjusin neċessarji għall-Unjoni. Għandu jinkludi:

(a)id-dħul u n-nefqa tal-Unjoni, inkluża n-nefqa amministrattiva li tirriżulta mid-dispożizzjonijiet tat-TUE li jirrigwardaw il-politika estera u ta’ sigurtà komuni, u n-nefqa operazzjonali kkaġunata mill-implimentazzjoni ta’ dawk id-dispożizzjonijiet meta tkun iddebitata lill-baġit;

(b)id-dħul u n-nefqa mill-Komunità Ewropea tal-Enerġija Atomika.

2.Il-baġit għandu jkun fih approprjazzjonijiet differenzjati, li jikkonsistu f'approprjazzjonijiet ta’ impenn u approprjazzjonijiet ta’ pagament, u approprjazzjonijiet mhux differenzjati.

L-approprjazzjonijiet awtorizzati għas-sena finanzjarja jikkonsistu minn:

(a)approprjazzjonijiet ipprovduti fil-baġit, inkluż minn baġits emendatorji;

(b)approprjazzjonijiet riportati;

(c)approprjazzjonijiet imqegħdin għad-dispożizzjoni mill-ġdid skont l-Artikolu 14;

(d)approprjazzjonijiet li jirriżultaw minn ħlasijiet ta’ prefinanzjament li jkunu tħallsu lura skont il-punt (b) tal-Artikolu 12(3);

(e)approprjazzjonijiet li ngħataw fuq id-dħul li sar matul is-sena finanzjarja jew matul is-snin finanzjarji preċedenti u li ma ntużax.

3.L-approprjazzjonijiet ta’ impenn għandhom ikopru l-kost totali tal-impenji legali li jsiru matul is-sena finanzjarja, soġġetti għall-Artikolu 112(2).

4.L-approprjazzjonijiet ta' pagament għadhom ikopru l-pagamenti mwettqa biex jiġu rispettati l-impenji legali li jsiru matul is-sena finanzjarja jew fis-snin finanzjarji preċedenti.

5.Il-paragrafi 2 u 3 ta’ dan l-Artikolu ma għandhomx jipprevjenu milli jiġu impenjati approprjazzjonijiet b’mod globali jew milli jsiru impenji baġitarji f’pagamenti akkont annwali kif stipulat b’mod rispettiv fil-punt (b) tal-Artikolu 110(1) u 110(2).

Artikolu 8
Regoli speċifiċi dwar il-prinċipji tal-unità u l-akkuratezza baġitarja

1.Id-dħul u n-nefqa kollha għandhom jiġu rreġistrati f’linja fil-baġit.

2.L-ebda nefqa ma tista' tkun impenjata jew awtorizzata b'eċċess tal-approprjazzjonijiet awtorizzati.

3.L-imgħax iġġenerat mill-ħlasijiet tal-prefinanzjament magħmulin mill-baġit ma għandux ikun dovut lill-Unjoni ħlief kif ikun stipulat mod ieħor fil-ftehimiet ta’ kontribuzzjoni jew fil-ftehimiet ta’ finanzjament.

KAPITOLU 2
Prinċipju tal-annwalità

Artikolu 9
Is-sena finanzjarja

L-approprjazzjonijiet fil-baġit għandhom ikunu awtorizzati għal sena finanzjarja li għandha tkun mill-1 ta’ Jannar sal-31 ta’ Diċembru.

Artikolu 10
Kontabilità baġitarja għad-dħul u għall-approprjazzjonijiet

1.Id-dħul ta’ sena finanzjarja għandu jkun irreġistrat fil-kontijiet għas-sena finanzjarja fuq il-bażi tal-ammonti miġbura matul dik is-sena finanzjarja. Madankollu, ir-riżorsi proprji għax-xahar ta’ Jannar tas-sena finanzjarja segwenti jistgħu jitqiegħdu għad-dispożizzjoni minn qabel skont ir-Regolament tal-Kunsill (UE, Euratom) Nru 609/2014 29 .

2.L-entrati fir-rigward tat-Taxxa fuq il-Valur Miżjud u r-riżorsi proprji bbażati fuq l-Introjtu Nazzjonali Gross jistgħu jiġu aġġutstati skont ir-Regolament (UE, Euratom) Nru 609/2014.

3.L-impenji jkunu rreġistrati fil-kontijiet fuq il-bażi tal-impenji legali li jsiru sal-31 ta’ Diċembru. Bħala eċċezzjoni, l-impenji baġitarji globali msemmija fl-Artikolu 110(4) għandhom ikunu rreġistrati fil-kontijiet fuq il-bażi tal-impenji baġitarji sal-31 ta’ Diċembru.

4.Il-pagamenti jkunu rreġistrati fil-kontijiet għal sena finanzjarja fuq il-bażi tal-pagamenti magħmulin mill-uffiċjal tal-kontabilità sal-31 ta’ Diċembru ta’ dik is-sena.

5.B'deroga mill-paragrafi 3 u 4:

(a)in-nefqa tal-Fond Agrikolu Ewropew ta' Garanzija (FAEG) għandha tiġi rreġistrata fil-kontijiet għal sena finanzjarja abbażi tar-rifużjonijiet magħmulin mill-Kummissjoni lill-Istati Membri sal-31 ta’ Diċembru ta’ dik is-sena finanzjarja, sakemm l-ordni għall-ħlas tkun waslet għand l-uffiċjal tal-kontabilità sal-31 ta’ Jannar tas-sena finanzjarja sussegwenti;

(b)in-nefqa ġestita b’implimentazzjoni kondiviża bl-eċċezzjoni tal-FAEG għandha tiġi rreġistrata fil-kontijiet għal sena finanzjarja fuq il-bażi tar-rimborżamenti magħmulin mill-Kummissjoni lill-Istati Membri sal-31 ta’ Diċembru ta’ dik is-sena finanzjarja, inkluż n-nefqa ddebitata sal-31 ta’ Jannar tas-sena finanzjarja ta’ wara kif stipulat fl-Artikoli 28 u 29.

Artikolu 11
Impenn tal-approprjazzjonijiet

1.L-approprjazzjonijiet li jinsabu fil-baġit jistgħu jiġu impenjati mill-1 ta' Jannar, malli l-baġit jiġi adottat.

2.Mill-15 ta’ Ottubru tas-sena finanzjarja, nefqa amministrattiva ta’ rutina u nefqa tal-ġestjoni ta’ rutina għall-FAEG tista’ tiġi impenjata bil-quddiem kontra l-approprjazzjonijiet previsti għas-sena finanzjarja ta’ wara.

Madankollu, dawn l-impenji ma għandhomx jaqbżu:

a)kwart mill-approprjazzjonijiet deċiżi mill-Parlament Ewropew u mill-Kunsill fil-linja baġitarja korrispondenti għas-sena finanzjarja attwali għan-nefqa amministrattiva ta’ rutina diment li din in-nefqa tkun ġiet approvata fl-aħħar baġit adottat kif xieraq;

b)tliet kwarti tal-approprjazzjonijiet korrispondenti totali deċiżi mill-Parlament Ewropew u mill-Kunsill għas-sena finanzjarja attwali għan-nefqa tal-ġestjoni ta’ rutina għall-FAEG diment li l-prinċipju ta’ din in-nefqa jkun stabbilit f’att bażiku eżistenti.

Artikolu 12
Tħassir u riport tal-approprjazzjonijiet

1.Approprjazzjonijiet li ma jkunux intużaw sa tmiem is-sena finanzjarja li għaliha jkunu ġew irreġistrati għandhom jitħassru, sakemm ma jiġux riportati skont il-paragrafi 2 u 3.

2.L-approprjazzjonijiet jistgħu jiġu riportati, iżda għas-sena finanzjarja li jmiss biss, permezz ta’ deċiżjoni meħuda fil-15 ta’ Frar mill-istituzzjoni kkonċernata fir-rigward ta’:

(a)ammonti li jikkorrispondu għall-approprjazzjonijiet ta’ impenn u approprjazzjonijiet mhux differenzjati, li għlihom il-parti l-kbira tal-istadji preparatorji tal-proċedura tal-impenn tkun tlestiet sal-31 ta’ Diċembru. Imbagħad dawn l-ammonti jistgħu jiġu impenjati sal-31 ta’ Marzu tas-sena ta’ wara, bl-eċċezzjoni tal-approprjazzjonijiet mhux differenzjati relatati mal-proġetti ta’ bini li jistgħu jiġu impenjati sal-31 ta’ Diċembru tas-sena finanzjarja ta’ wara;

(b)ammonti li huma meħtieġa meta l-awtorità leġiżlattiva tkun adottat att bażiku fil-kwart finali tas-sena finanzjarja u l-Kummissjoni ma tkunx tista' timpenja l-approprjazzjonijiet li hemm provvediment dwarhom għal dan l-iskop sal-31 ta’ Diċembru. Dawn l-ammonti jistgħu jiġu impenjati sal-31 ta’ Diċembru tas-sena finanzjarja ta’ wara;

(c)approprjazzjonijiet ta’ pagament li huma meħtieġa biex ikopru impenji eżistenti jew impenji marbuta ma’ approprjazzjonijiet ta’ impenn riportati, meta l-approprjazzjonijiet ta’ pagament li hemm provvediment dwarhom fil-linji baġitarji rilevanti għas-sena finanazjarja li jmiss ma jkunux biżżejjed biex ikopru l-ħtiġijiet;

(d)approporjazzjonijiet mhux impenjati li jirrigwardaw l-azzjonijiet imsemmijin fl-Artikolu 4(1) tar-Regolament (UE) Nru 1306/2013 tal-Parlament Ewropew u tal-Kunsill.

It-tali riport ma għandux jaqbeż, fi ħdan limitu ta’ 2 % tal-approprjazzjonijiet ivvotati mill-Awtorità tal-Baġit, l-ammont tal-aġġustament tal-pagamenti diretti applikati skont l-Artikolu 26 tar-Regolament (UE) Nru 1306/2013 matul is-sena finanzjarja ta’ qabel. L-approporjazzjonijiet li jitmexxew ’il quddiem għandhom jiġu ritornati lil-linji baġitarji li jkopru l-azzjonijiet imsemmijin fil-punt (b) tal-Artikolu 4(1) tar-Regolament (UE) Nru 1306/2013.

(e)l-approprjazzjonijiet miżmumin mhux allokati fil-bidu tas-sena finanzjarja relatati mal-fondi msemmijin fir-Regolament (UE) Nru 231/2014 tal-Parlament Ewropew u tal-Kunsill tal-11 ta’ Marzu 2014 li jistabbilixxi Strument għall-Assistenza ta' Qabel l-Adeżjoni (IPA II), fir-Regolament (UE) Nru 232/2014 tal-Parlament Ewropew u tal-Kunsill tal-11 ta’ Marzu 2014 li jistabbilixxi Strument Ewropew tal-Viċinat (ENI) u fir-Regolament (UE) Nru 233/2014 tal-Parlament Ewropew u tal-Kunsill tal-11 ta’ Marzu 2014 li jistabbilixxi strument ta' finanzjament tal-kooperazzjoni għall-iżvilupp għall-perjodu 2014-2020 (SKŻ), fi ħdan limitu ta’ 10 % tal-approprjazzjonijiet inizjali ta’ kull strument.

L-istituzzjoni kkonċernata għandha tgħarraf lill-Parlament Ewropew u lill-Kunsill sal-15 ta’ Marzu bid-deċiżjoni ta’ riport li tkun ħadet. Għandha tiddikjara wkoll, għal kull linja baġitarja, kif il-kriterji fil-punti (a), (b) u (c) applikaw għal kull riport.

3.L-approprjazzjonijiet għandhom jiġu riportati fir-rigward ta’:

(a)l-ammonti li jikkorrispondu għal approprjazzjonijiet ta’ impenn u ta' pagament għar-Riżerva ta’ Għajnuna f’Emerġenza u għar-Riżerva tal-Unjoni Ewropea għall-Kriżijiet u għal approprjazzjonijiet ta’ impenn għall-Fond ta' Solidarjetà tal-Unjoni Ewropea;

(b)l-ammonti korrispondenti għal dħul assenjat intern;

L-ammonti msemmijin fil-punti (a) u (b) jistgħu jiġu riportati biss għas-sena finanzjarja li jmiss u jistgħu jiġu impenjati sal-31 ta’ Diċembru, bl-eċċezzjoni tad-dħul assenjat intern mill-kirjiet u mill-bejgħ tal-bini u l-art imsemmijin fil-punt (g) tal-Artikolu 20(3) li jista’ jiġi riportat sakemm jintuża kollu kemm hu. L-approprjazzjonijiet ta’ impenn, imsemmijin fir-Regolament (UE) Nru 1303/2013 u fir-Regolament (UE) Nru 514/2014 30 , disponibbli fil-31 ta’ Diċembru li jiġu minn rifużjonijiet ta’ ħlasijiet prefinanzjament jistgħu jiġu trasferiti 'l quddiem sal-għeluq tal-programm u jiġu użati meta meħtieġ sakemm ma jkunx għad hemm approprjazzjonijiet għall-impenji oħra disponibbli.

(c)l-ammonti korrispondenti għal dħul assenjat estern.

Dawn l-ammonti għandhom jiġu riportati awtomatikament u għandhom jintużaw għalkollox sakemm l-operazzjonijiet kollha li jirrigwardaw il-programm jew l-azzjoni li jkunu ġew assenjati għalihom ikunu twettqu jew jistgħu jiġu riportati u jintużaw għall-programm jew għall-azzjoni sussegwenti.

Dan ma għandux ikun japplika għad-dħul imsemmi fil-punt (iii) tal-Artikolu 20(2)(g) li għalih għandhom jiġu kkanċellati l-approprjazzjonijiet mhux impenjati fi ħdan ħames snin.

It-trattament tad-dħul assenjat estern li jirriżultaw mill-parteċipazzjoni mill-Istati tal-Assoċjazzjoni Ewropea tal-Kummerċ Ħieles (EFTA) f’ċerti programmi tal-Unjoni kif imsemmi fil-punt (e) tal-Artikolu 20(2) għandu jkun konformi mal-Protokoll 32 mehmuż mal-Ftehim dwar iż-Żona Ekonomika Ewropea (Ftehim ŻEE).

(d)approprjazzjonijiet ta' pagament relatati mal-FAEG li jirriżultaw minn sospensjonijiet skont l-Artikolu 41 tar-Regolament (UE) Nru 1306/2013.

4.L-approprjazzjonijiet mhux differenzjati legalment impenjati fi tmiem is-sena finanzjarja għandhom jitħallsu sa tmiem is-sena finanzjarja ta’ wara.

5.Bla ħsara għall-paragrafu 3, approprjazzjonijiet imqiegħda f'riżerva u approprjazzjonijiet għan-nefqa tal-persunal ma għandhomx jiġu riportati. Għall-finijiet ta’ dan l-Artikolu, in-nefqa għall-persunal tinkludi r-remunerazzjoni u l-provvedimenti għall-membri u għall-persunal tal-istituzzjonijiet soġġetti għar-Regolamenti tal-Persunal.

Artikolu 13
Diżimpenjar tal-approprjazzjonijiet

1.Meta jiġu diżimpenjati approprjazzjonijiet fi kwalunkwe sena finanzjarja wara dik li fiha ġew impenjati l-approprjazzjonijiet bħala riżultat ta’ nuqqas ta’ implimentazzjoni totali jew parzjali tal-azzjonijiet li għalihom kienu allokati, l-approprjazzjonijiet ikkonċernati għandhom jitħassru, sakemm ma jkunx stipulat mod ieħor fil-paragrafu 3 u fl-Artikolu 14.

2.Fil-każ ta’ ammonti li ġew impenjati sal-31 ta’ Marzu skont l-Artikolu 12(2), meta l-approprjazzjonijiet korrispondenti jiġu diżimpenjati wara l-31 ta’ Marzu, dawn għandhom jitħassru.

3.L-approprjazzjonijiet imsemmijin fir-Regolament (UE) Nru 1303/2013 għandhom jiġu diżimpenjati b’mod awtomatiku skont dak ir-Regolament.

4.L-approprjazzjonijiet imsemmijin fir-Regolament (UE) Nru 514/2014 għandhom jiġu diżimpenjati b’mod awtomatiku skont dak ir-Regolament.

5.Il-paragrafi 1, 2 u 3 ta’ dan l-Artikolu ma għandhomx japplikaw għad-dħul assenjat estern imsemmi fl-Artikolu 20(2).

Artikolu 14
It-tqegħid tal-approprjazzjonijiet diżimpenjati għad-dispożizzjoni mill-ġdid

1.L-approprjazzjonijiet diżimpenjati msemmijin fir-Regolament (UE) Nru 1303/2013 u r-Regolament (UE) Nru 223/2014 31 jistgħu jerġgħu jitqiegħdu għad-dispożizzjoni f’każ ta’ żball evidenti attribwibbli biss lill-Kummissjoni.

Għal dak il-għan, il-Kummissjoni għandha teżamina d-diżimpenjar magħmul matul is-sena finanzjarja preċedenti u tiddeċiedi, sal-15 ta’ Frar tas-sena finanzjarja kurrenti, fuq il-bażi tal-ħtiġijiet, jekk ikunx meħtieġ li l-tagħmel l-approprjazzjonijiet korrispondenti disponibbli mill-ġdid.

2.L-approprjazzjonijiet diżimpenjati għandhom jerġgħu jitqiegħdu għad-dispożizzjoni fil-każ ta’:

(a)id-diżimpenn tal-approprjazzjonijiet minn programm skont l-arranġamenti għall-implimentazzjoni tar-riżerva tal-prestazzjoni stabbilita fl-Artikolu 20 tar-Regolament (UE) Nru 1303/2013;

(b)id-diżimpenn tal-approprjazzjonijiet minn programm iddedikat għal strument finanzjarju speċifiku favur l-SMEs wara li Stat Membru ma jkunx kompla l-parteċipazzjoni tiegħu fl-istrument finanzjarju, kif imsemmi fis-seba’ subparagrafu tal-Artikolu 39(2) tar-Regolament (UE) Nru 1303/2013.

3.Bla ħsara għall-paragrafi (1) u (2), l-approprjazzjonijiet diżimpenjati li jkunu saru fis-sena n-2 għandhom jerġgħu jitqiegħdu għad-dispożizzjoni tar-Riżerva tal-Unjoni Ewropea għall-Kriżijiet fil-qafas tal-proċedura baġitarja għas-sena n.

Meta l-Kummissjoni tqis li jkun hemm bżonn li jsir rikors għar-Riżerva, għandha tippreżenta lill-Parlament Ewropew u lill-Kunsill proposta ta’ trasferiment mir-Riżerva għal-linji baġitarji korrispondenti, skont l-Artikolu 30 (4).

4.L-approprjazzjonijiet ta’ impenn li jikkorrispondu għall-ammont tal-approprjazzjonijiet diżimpenjati bħala riżultat ta’ nonimplimentazzjoni parzjali jew totali tal-proġetti ta’ riċerka korrispondenti jistgħu jitqiegħdu għad-dispożijzzoni mill-ġdid għall-benefiċċju tal-programm ta’ riċerka li għalih jappartjenu l-proġetti jew is-suċċessur tiegħu fil-kuntest tal-proċedura baġitarja annwali.

Artikolu 15
Regoli applikabbli fil-każ ta’ adozzjoni tard tal-baġit

1.Jekk il-baġit ma jkunx ġie adottat b’mod definittiv fil-bidu tas-sena finanzjarja, għandha tapplika l-proċedura stabbilita fl-ewwel paragrafu tal-Artikolu 315 TFUE (is-sistema tal-parti minn kull tnax proviżorja). L-impenji u l-pagamenti jistgħu jsiru fil-limiti stabbiliti fil-paragrafu 2 ta’ dan l-Artikolu.

2.L-impenji jistgħu jsiru għal kull kapitolu sa massimu ta’ kwart tat-total tal-approprjazzjonijiet awtorizzati fil-kapitolu rilevanti tas-sena finanzjarja preċedenti flimkien ma’ parti minn kull tnax għal kull xhar li jkun għadda.

Il-limitu tal-approprjazzjonijiet li hemm provvediment dwaru fl-abozz tal-baġit ma għandux ikun maqbuż.

Il-pagamenti jistgħu jsiru kull xahar għal kull kapitolu sa massimu ta’ parti minn kull tnax tal-approprjazzjonijiet awtorizzati fil-kapitolu rilevanti tas-sena finanzjarja preċedenti. Madankollu, dik is-somma ma għandhiex tkun aktar minn parti minn kull tnax tal-approprjazzjonijiet previsti fl-istess kapitolu tal-abbozz tal-baġit.

3.L-approprjazzjonijiet awtorizzati fil-kapitolu rilevanti tas-sena finanzjarja preċedenti, kif speċifikat fil-paragrafi 1 u 2, għandhom jinftiehmu li jirreferu għall-approprjazzjonijiet ivvotati fil-baġit, inkluż permezz ta’ baġits emendatorji, u wara aġġustament għat-trasferimenti li jkunu saru matul dik is-sena finanzjarja.

4.Jekk il-kontinwità tal-azzjoni mill-Unjoni titlob dan, il-Kunsill, filwaqt li jaġixxi b'maġġoranza kwalifikata fuq proposta tal-Kummissjoni, jista' jawtorizza nefqa li tkun aktar minn parti waħda minn kull tnax proviżorji iżda li ma taqbiżx it-total ta’ erba’ partijiet minn kull tnax proviżorji, ħlief dik il-parti minn kull tnax imqiegħda għad-dispożizzjoni b’mod awtomatiku, ħlief f'każijiet debitament iġġustifikati, kemm għall-impenji kif ukoll għall-pagamenti apparti dawk li jsiru disponibbbli b'mod awtomatiku skont il-paragrafi 1 u 2. Huwa għandu jippreżenta d-deċiżjoni tiegħu dwar l-awtorizzazzjoni mingħajr dewmien lill-Parlament Ewropew.

Id-deċiżjoni msemmija fl-ewwel subparagrafu għandha tidħol fis-seħħ 30 jum wara l-adozzjoni tagħha sakemm il-Parlament Ewropew ma jiħux xi waħda mill-azzjonijiet li ġejjin:

(a)jaġixxi b'maġġoranza tal-Membri kollha tiegħu, ma jiddeċidix li jnaqqas dik in-nefqa sa dak il-limitu ta’ żmien, f'liema każ il-Kummissjoni għandha tressaq proposta ġdida;

(b)jinforma lill-Kunsill u lill-Kummissjoni li ma jixtieqx inaqqas dik in-nefqa, f'liema każ id-deċiżjoni tidħol fis-seħħ qabel l-iskadenza tat-30 jum.

Il-partijiet minn kull tnax addizzjonali jkunu awtorizzati b’mod sħiħ u ma għandhomx ikunu diviżibbli.

5.Jekk, għal kapitolu partikolari, l-awtorizzazzjoni ta’ erba' partijiet minn kull tnax proviżorji mogħtija skont il-paragrafu 4 ma tkunx suffiċjenti biex tiġi koperta n-nefqa meħtieġa biex tkun evitata interruzzjoni fil-kontinwità tal-azzjoni mill-Unjoni fil-qasam kopert bil-kapitolu kkonċernat, tista’ eċċezzjonalment tingħata awtorizzazzjoni biex jinqabeż l-ammont tal-approprjazzjonijiet imdaħħla fil-kapitolu korrispondenti tal-baġit tas-sena finanzjarja preċedenti. Il-Parlament Ewropew u l-Kunsill għandhom jaġixxu skont il-proċeduri previsti fil-paragrafu 4. Madankollu, it-total kumplessiv disponibbli tal-approprjazzjonijiet fil-baġit tas-sena finanzjarja preċedenti jew l-abbozz tal-baġit, kif propost, ma jista jinqabeż fl-ebda ċirkostanza.

KAPITOLU 3
Prinċipju tal-ekwilibriju

Artikolu 16
Definizzjoni u ambitu

1.Id-dħul u l-approprjazzjonijiet ta' pagament għandhom jibbilanċjaw lil xulxin.

2.L-Unjoni u l-korpi tal-Unjoni msemmija fl-Artikoli 69 u 70 ma jistgħux jidħlu għal dejn fil-qafas tal-baġit.

Artikolu 17
Bilanċ mis-sena finanzjarja

1.Il-bilanċ minn kull sena finanazjarja għandu jkun irreġistrat fil-baġit tas-sena finanzjarja segwenti bħala dħul fil-każ ta’ bilanċ pożittiv jew bħala approprjazzjoni ta’ pagament fil-każ ta’ bilanċ negattiv.

2.L-istimi għal dan id-dħul jew dawn l-approprjazzjonijiet ta’ pagament għandhom ikunu rreġistrati fil-baġit matul il-proċedura tal-baġit u f'ittra ta’ emenda ippreżentata skont l-Artikolu 40. L-istimi għandhom jitħejjew b'konformità mal-Artikolu 1 tar-Regolament tal-Kunsill (UE, Euratom) Nru 608/2014 32 .

3.Wara l-preżentazzjoni tal-kontijiet proviżorji għal kull sena finananzjarja, kwalunkwe diskrepanza bejn dawk il-kontijiet u l-istimi għandha tkun irreġistrata fil-baġit tas-sena finananzjarja li jmiss permezz ta’ baġit emendatorju. F'tali każ, il-Kummissjoni għandha tippreżenta l-abbozz tal-baġit emendatorju lill-Parlament Ewropew u lill-Kunsill simultanjament fi żmien 15 il-jum wara l-preżentazzjoni tal-kontijiet proviżorji.

KAPITOLU 4
Prinċipju tal-unità tal-kontijiet

Artikolu 18
L-użu tal-euro

1.Il-qafas finananzjarju pluriennali u l-baġit għandhom jitħejjew u jiġu implementati f'euro u l-kontijiet għandhom ikunu ppreżentati f'euro. Madankollu, għall-finijiet ta’ flussi tal-flus imsemmija fl-Artikolu 76, l-uffiċjal tal-kontabilità, fil-każ ta’ kontijiet għall-antiċipi, l-amministraturi tal-imprest, u, għall-ħtiġiet tal-ġestjoni amministrattiva tal-Kummissjoni u tas-Servizz Ewropew għall-Azzjoni Esterna (SEAE), l-uffiċjal tal-awtorizzazzjoni responsabbli għandhom ikunu awtorizzati jwettqu operazzjonijiet f’muniti oħrajn.

2.Mingħajr ħsara għad-dispożizzjonijiet speċifiċi li jirriżultaw mill-applikazzjoni ta’ regolamenti speċifiċi għas-setturi, jew minn kuntratti ta’ akkwist pubbliku, ftehimiet ta’ għotja, ftehimiet ta’ kontribuzzjoni u ftehimiet ta’ finanzjament, il-konverżjoni mill-uffiċjal tal-awtorizzazzjoni responsabbli għandha ssir bir-rata tal-kambju tal-euro ta’ kuljum ippubblikata fis-serje C ta’ Il-Ġurnal Uffiċjal tal-Unjoni Ewropea dakinhar li d-dipartiment tal-awtorizzazzjoni joħroġ l-ordni ta’ pagament jew l-ordni ta’ rkupru.

Jekk ma tiġi ppubblikata ebda rata ta’ kuljum bħal din, l-uffiċjal tal-awtorizzazzjoni responsabbli għandu juża dik imsemmija fil-paragrafu 3.

3.Għall-finijiet tal-kontijiet stabbiliti fl-Artikoli 80 u 81, il-konverżjoni bejn l-euro u munita oħra ssir bl-użu tar-rata tal-kontabilità ta’ kull xahar tal-euro. Dik ir-rata tal-kambju tal-kontabilità tiġi stabbilita mill-uffiċjal tal-kontabilità tal-Kummissjoni permezz ta’ kwalunkwe sors ta’ informazzjoni meqjus bħala kredibbli, fuq il-bażi tar-rata tal-kambju fil-jum ta’ qabel tal-aħħar tax-xogħol tax-xahar qabel dak li għalih tiġi stabbilita r-rata.

4.L-operazzjonijiet ta’ konverżjoni tal-munita għandhom jitwettqu b’tali mod li jiġi evitat milli jkollhom impatt sinifikanti fuq il-livell tal-kofinanzjament tal-Unjoni jew impatt detrimentali fuq il-baġit tal-Unjoni. Meta xieraq, ir-rata ta’ konverżjoni bejn l-euro u muniti oħrajn tista’ tiġi kkalkolata billi tittieħed il-medja tar-rata tal-kambju ta’ kuljum f’perjodu partikolari.

KAPITOLU 5
Prinċipju tal-universalità

Artikolu 19
Kamp ta’ applikazzjoni

Bla ħsara għall-Artikolu 20, id-dħul totali għandu jkopri l-approprjazzjonijiet ta’ pagament totali. Bla ħsara għall-Artikolu 25, id-dħul u n-nefqa kollha għandhom ikunu rreġistrati b’mod sħiħ mingħajr l-ebda aġġustament kontra xulxin.

Artikolu 20
Dħul assenjat

1.Id-dħul assenjat estern u d-dħul assenjat intern għandhom ikunu allokati sabiex jiffinanzjaw partiti speċifiċi tan-nefqa.

2.Dawn li ġejjin għandhom jikkostitwixxu dħul assenjat estern:

(a)kontribuzzjonijiet finanzjarji mingħand Stati Membri, partijiet terzi u korpi mhux imwaqqfin skont it-TFUE u t-Trattat tal-Euratom għal ċerti azzjonijiet jew programmi ffinanzjati mill-Unjoni kif ukoll għal programmi supplimentari ta’ riċerka u ta’ żvilupp teknoloġiku, u ġestiti mill-Kummissjoni għan-nom tagħhom;

(b)approprjazzjonijiet relatati mad-dħul iġġenerat mill-Fond għar-Riċerka dwar il-Faħam u l-Azzar stabbilit mill-Protokoll Nru 37 dwar il-konsegwenzi finanzjarji tal-iskadenza tat-Trattat tal-Komunità Ewropea tal-Faħam u l-Azzar (KEFA) u dwar il-Fond għar-Riċerka dwar il-Faħam u l-Azzar mehmuż għat-TUE u għat-TFUE.

(c)l-imgħax fuq id-depożiti u l-multi previsti fir-Regolament tal-Kunsill (KE) Nru 1467/97 33 ;

(d)id-dħul allokat għal skop speċifiku, bħad-dħul minn fondazzjonijiet, minn sussidji, minn rigali u minn legati, inkluż id-dħul allokat speċifiku għal kull istituzzjoni;

(e)il-kontribuzzjonijiet finanzjarji għall-attivitajiet tal-Unjoni mingħand pajjiżi terzi jew mingħand korpi mhux tal-Unjoni mhux koperti mill-punt (b);

(f)id-dħul assenjat intern imsemmi fil-paragrafu 3, sal-punt li dan ikun anċillarju għad-dħul l-ieħor skont dan il-paragrafu;

(g)id-dħul mill-attivitajiet ta’ natura kompetittiva mwettqin miċ-Ċentru Konġunt tar-Riċerka (JRC) li jikkonsistu fi kwalunkwe minn fost dawn li ġejjin:

(i)proċeduri ta’ għoti u ta’ akkwist li fihom jipparteċipa l-JRC;

(ii)attivitajiet tal-JRC f'isem partijiet terzi;

(iii)attivitajiet li saru taħt ftehim amministrattiv ma’ istituzzjonijiet oħra jew dipartimenti oħra tal-Kummissjoni, skont l-Artikolu 57, għall-għoti ta’ servizzi tekniċi-xjentifiċi.

3.Dawn li ġejjin jikkostitwixxu dħul assenjat intern:

(a)dħul minn partijiet terzi fir-rigward ta’ oġġetti, ta’ servizzi jew ta’ xogħol forniti fuq talba tagħhom;

(b)ir-rikavat mill-bejgħ ta’ vetturi, ta’ tagħmir, ta’ stallazzjonijiet, ta’ materjali u r-rikavat xjentifiku u tekniku;

(c)dħul li joriġina mir-ripagament, skont l-Artikolu 99, ta’ ammonti mħallsa indebitament;

(d)dħul li joriġina mill-imgħax fuq il-pagamenti ta’ prefinanzjament, soġġett għall-Artikolu 8(3);

(e)ir-rikavat mill-forniment ta’ oġġetti, ta’ servizzi u ta’ xogħlijiet għal dipartimenti fi ħdan istituzzjoni, istituzzjonijiet jew korpi oħrajn, inklużi rifużjonijiet minn istituzzjonijiet jew korpi oħrajn ta’ allokazzjonijiet ta’ missjonijiet imħallsa f'isimhom;

(f)il-pagamenti tal-assigurazzjoni riċevuti;

(g)id-dħul mill-kirjiet u mill-bejgħ ta’ bini u ta’ art;

(h)id-dħul minn bejgħ ta’ pubblikazzjonijiet jew ta’ films, inklużi dawk fuq mezzi elettroniċi;

(i)id-dħul u r-ripagamenti li jirriżultaw minn operazzjonijiet finanzjarji oħrajn apparti l-għoti u t-teħid b’self u l-assi tagħhom miżmumin f’fond ta’ proviżjonament komuni;

(j)dħul li jirriżulta mir-rimborż sussegwenti ta’ taxxi skont il-punt (b) tal-Artikolu 25(3). Id-dħul assenjat għandu jiġi riportat u ttrasferit skont id-dispożizzjonijiet tal-punti (b) u (c) tal-Artikolu 12(3) u tal-Artikolu 30.

4.Att bażiku jista' wkoll jassenja d-dħul li huwa jipprevedi għal partiti speċifiċi tan-nefqa. Sakemm mhux speċifikat mod ieħor fl-att bażiku, tali dħul għandu jikkostitwixxi dħul assenjat intern.

5.Il-baġit għandu jinkludi linji li jakkomodaw id-dħul assenjat estern u d-dħul assenjat intern u fejn possibbli għandu jindika l-ammont.

Artikolu 21
Struttura biex takkomoda dħul assenjat u provvediment ta’ approprjazzjonijiet korrispondenti

1.Bla ħsara għall-punt (c) tal-paragrafu 2 ta’ dan l-Artikolu u għall-Artikolu 22, l-istruttura li takkomoda dħul assenjat fil-baġit irid ikollha:

(a)fid-dikjarazzjoni tad-dħul ta’ kull taqsima tal-istituzzjoni, linja baġitarja biex tirċievi d-dħul;

(b)fid-dikjarazzjoni tan-nefqa, il-kummenti tal-baġit, inklużi kummenti ġenerali, li juru liema linji jistgħu jirċievu l-approprjazzjonijiet korrispondenti għad-dħul assenjat li jsiru disponibbli.

Fil-każ imsemmi fil-punt (a) tal-ewwel subparagrafu, trid issir entrata pro memoria, filwaqt li d-dħul stmat għandu jiddaħħal fir-kummenti għal skopijiet ta’ informazzjoni.

2.L-approprjazzjonijiet li jikkorrispondu għad-dħul assenjat isiru disponibbli awtomatikament, kemm bħala approprjazzjonijiet ta’ impenn kif ukoll bħala approprjazzjonijiet ta’ pagament, meta d-dħul jiġi riċevut mill-istituzzjoni, ħlief f’xi wieħed mill-każijiet li ġejjin:

(a)fil-każ imsemmi fil-punt (a) tal-Artikolu 20(2) għall-Istati Membri u meta l-ftehim ta’ kontribuzzjoni jkun espress f’euro, l-approprjazzjonijiet ta’ impenn jistgħu jitqiegħdu għad-dispożizzjoni meta l-Istat Membru jiffirma l-ftehim ta’ kontribuzzjoni.

(b)fil-każ imsemmi fl-Artikolu 20(2)(b) u fil-punti (i) u (iii) tal-Artikolu 20(2)(g), l-approprjazzjonijiet ta’ impenn għandhom jitqiegħdu għad-dispożizzjoni malli jiġi stmat l-ammont riċevibbli.

(c)fil-każ imsemmi fil-punt (c) tal-Artikolu 20(2), id-dħul ta’ dawk l-ammonti fid-dikjarazzjoni tad-dħul iwassal għall-provvediment, fid-dikjarazzjoni tan-nefqa, tal-approprjazzjonijiet ta’ impenn u ta’ pagament.

L-approprjazzjonijiet imsemmija fil-punt (c) ta’ dan il-paragrafu għandhom jiġu implimentati skont l-Artikolu 19.

3.L-istimi tal-ammonti riċevibbli msemmija fil-punt (b) tal-Artikolu 20(2) u fil-punt (h) tal-Artikolu 20(2) għandhom jintbagħtu lill-uffiċjal tal-kontabilità għar-reġistrazzjoni.

Artikolu 22
Dħul assenjat li jirriżulta mill-parteċipazzjoni tal-Istati tal-EFTA f’ċerti programmi tal-Unjoni

1.L-istruttura tal-budget biex takkomoda d-dħul imsemmi fl-Artikolu 20(2)(e) għandha tkun kif ġejja:

(a)fid-dikjarazzjoni tad-dħul, trid tiddaħħal entrata pro memoria sabiex takkomoda l-ammont sħiħ tal-kontribuzzjoni mill-Istati tal-EFTA għas-sena finanzjarja inkwistjoni;

(b)fid-dikjarazzjoni tan-nefqa, anness, li jifforma parti integrali mill-baġit, għandu jistabbilixxi l-linji kollha li jkopru l-attivitajiet tal-Unjoni li jieħdu sehem fihom l-Istati tal-EFTA.

2.Skont l-Artikolu 82 tal-Ftehim ŻEE, l-ammonti tal-parteċipazzjoni annwali tal-Istati tal-EFTA, kif ikkonfermati lill-Kummissjoni mill-Kumitat Konġunt taż-Żona Ekonomika Ewropea skont l-Artikolu 1(5) tal-Protokoll 32 anness mal-Ftehim ŻEE, għandhom iwasslu għad-dispożizzjoni, fil-bidu tas-sena finanzjarja, tal-ammonti sħaħ tal-approprjazzjonijiet ta’ impenn u tal-approprjazzjonijiet ta’ pagament korrispondenti.

Artikolu 23
Donazzjonijiet

1.L-istituzzjonijiet tal-Unjoni jistgħu jaċċettaw kwalunkwe donazzjoni magħmula lill-Unjoni, bħad-dħul minn fondazzjonijiet, sussidji, rigali u laxxiti.

2.L-aċċettazzjoni ta’ donazzjoni ta’ valur ta’ EUR 50 000 jew aktar li tinvolvi miżata finanzjarju, inklużi kostijiet ta’ segwitu, li taqbeż l-10 % tal-valur tad-donazzjoni mogħtija, għandha tkun soġġetta għall-awtorizzazzjoni tal-Parlament Ewropew u tal-Kunsill. Fid-dawl ta’ awtorizzazzjoni bħal din, il-Parlament Ewropew u l-Kunsill għandhom jaġixxu fuq il-kwistjoni fi żmien xahrejn mindu jirċievu t-talba mingħand il-Kummissjoni. Jekk ma ssir l-ebda oġġezzjoni matul dak il-perjodu, l-istituzzjonijiet tal-Unjoni għandhom jieħdu deċiżjoni finali fir-rigward tal-aċċettazzjoni tad-donazzjoni. L-istituzzjonijiet tal-Unjoni għandhom jispjegaw l-imposti finanzjarji involuti mill-aċċettazzjoni tad-donazzjonijiet li jsiru lill-Unjoni.

Artikolu 24
Sponsorizzar korporattiv

1.L-isponsorizzar korporattiv ifisser ftehim li bih persuna ġuridika tappoġġja in natura avveniment jew attività għal skopijiet promozzjonali jew ta’ responsabbiltà soċjali korporattiva.

2.Fuq il-bażi tar-regoli interni speċifiċi, l-istituzzjonijiet u l-korpi tal-Unjoni jistgħu f’ċerti eċċezzjonijiet jaċċettaw sponsorizzar korporattiv in natura diment li:

(a)tingħata l-kunsiderazzjoni dovuta lill-prinċipji ta’ nondiskriminazzjoni, ta’ proporzjonalità, ta’ trattament indaqs, ta’ trasparenza;

(b)jikkontribwixxi għall-immaġni pożittiva tal-Unjoni u jkollu rabta diretta mal-objettiv prinċipali ta’ avveniment jew ta’ azzjoni;

(c)ma jiġġenerax kunflitt ta’ interess u lanqas ma jikkonċerna avvenimenti esklussivament soċjali.

Artikolu 25
Regoli dwar it-tnaqqis u l-aġġustamenti minħabba r-rata tal-kambju

1.Jista’ jsir it-tnaqqis li ġej minn talbiet għal pagament, li imbagħad jingħaddew għall-pagament tal-ammont nett:

(a)penali imposti fuq partijiet għal kuntratti ta’ akkwist jew fuq benefiċjarji;

(b)skontijiet, rifużjonijiet u tnaqqis fuq fatturi individwali u dikjarazzjonijiet tal-kostijiet;

(c)imgħax iġġenerat minn pagamenti ta’ prefinanzjament;

(d)aġġustamenti għal ammonti mħallsa indebitament.

L-aġġustamenti msemmija fil-punt (d) tal-ewwel subparagrafu jistgħu jsiru, bi tnaqqis dirett, kontra ħlas ġdid interim jew kontra pagament ta’ bilanċ lill-istess prenditur li għandu jitħallas skont il-kapitolu, l-artikolu u s-sena finanzjarja li fiha sar il-ħlas żejjed.

Ir-regoli kontabilistiċi tal-Unjoni għandhom japplikaw għat-tnaqqis imsemmi fil-punti (c) u (d) tal-ewwel subparagrafu.

2.Il-kost tal-prodotti jew tas-servizzi pprovduti lill-Unjoni li jinkorporaw taxxi mroddija lura mill-Istati Membri skont il-Protokoll dwar il-Privileġġi u l-Immunitajiet tal-Unjoni Ewropea għandu jiġi ddebitat lill-baġit għall-ammont qabel it-taxxa.

3.Il-kost tal-prodotti jew tas-servizzi pprovduti lill-Unjoni li jinkorporaw taxxi mroddija lura minn pajjiżi terzi fuq il-bażi tal-ftehimiet rilevanti jista' jiġi ddebitat lill-baġit għal kwalunkwe wieħed mill-ammonti li ġejjin:

(a)l-ammont qabel it-taxxa;

(b)l-ammont li jinkludi t-taxxa. F'tali każ, taxxi rimborżati wara għandhom jiġu ttrattati bħala dħul assenjat intern.

4.Aġġustamenti jistgħu jsiru fir-rigward tad-differenzi fil-kambju li jseħħu fl-implimentazzjoni tal-baġit. Il-qligħ jew it-telf finali għandu jkun inkluż fil-bilanċ tas-sena.

KAPITOLU 6
Prinċipju ta’ speċifikazzjoni

Artikolu 26
Dispożizzjonijiet Ġenerali

1.L-approprjazzjonijiet għandhom ikunu allokati għal skopijiet speċifiċi bit-titolu u bil-kapitolu. Il-kapitoli jerġgħu jinqasmu f'artikoli u partiti.

2.Il-Kummissjoni u l-istituzzjonijiet l-oħrajn jistgħu jittrasferixxu approprjazzjonijiet fi ħdan il-baġit soġġetti għall-kundizzjonijiet speċifiċi stabbiliti fl-Artikoli 27 sa 30.

L-approprjazzjonijiet jistgħu jkunu ttrasferiti biss lejn linji baġitarji li għalihom il-baġit għandu approprjazzjonijiet awtorizzati jew li jkollhom entrata pro memoria.

Il-perċentwali msemmija fl-Artikoli 27 u 28 jiġu kkalkolati fiż-żmien li ssir it-talba għat-trasferiment u b’referenza għall-approprjazzjonijiet ipprovduti fil-baġit, inklużi baġits emendatorji.

L-ammont li jrid jiġi kkunsidrat għandu jkun is-somma tat-trasferimenti li jridu jsiru mil-linja li minnha jkunu qegħdin isiru t-trasferimenti, wara li jkun sar l-aġġustament għat-trasferimenti li saru qabel. L-ammont li jikkorrispondi għat-trasferimenti li għandhom jitwettqu b’mod awtonomu mill-Kummissjoni jew mill-istituzzjoni kkonċernata mingħajr deċiżjoni tal-Parlament Ewropew u tal-Kunsill ma jittiħidx f’kunsiderazzjoni.

Mingħajr ħsara għall-kundizzjonijiet addizzjonali għat-talbiet ta’ trasferiment stabbiliti fl-Artikolu 30, il-proposti għat-trasferimenti u l-informazzjoni kollha għall-Parlament Ewropew u l-Kunsill dwar trasferimenti magħmula skont l-Artikoli 27, 28 u 29 għandhom ikunu akkumpanjati minn dokumenti ta' sostenn xierqa u dettaljati li juru l-aktar informazzjoni riċenti disponibbli għall-implimentazzjoni tal-approprjazzjonijiet u l-estimi tal-ħtiġijiet sal-aħħar ta’ dik is-sena finanzjarja, kemm għal-linji li fihom għandhom jiġu ttrasferiti l-approprjazzjonijiet, kif ukoll għal dawk li minnhom jittieħdu l-approprjazzjonijiet.

Artikolu 27
Trasferimenti minn istituzzjonijiet għajr il-Kummissjoni

1.Kull istituzzjoni minbarra l-Kummissjoni tista’, fit-taqsima proprja tagħha tal-baġit, tittrasferixxi approprjazzjonijiet:

(a)minn titolu għal ieħor sa massimu ta’ 10 % tal-approprjazzjonijiet għas-sena murija fil-linja li minnha jsir it-trasferiment;

(b)minn kapitolu wieħed għal ieħor mingħajr limitu.

2.Tliet ġimgħat qabel ma tagħmel trasferiment, kif imsemmi fil-paragrafu 1, l-istituzzjoni għandha tinforma lill-Parlament Ewropew u lill-Kunsill bl-intenzjoni tagħha li tagħmel dan. F’każ li jitqajmu raġunijiet iġġustifikati kif xieraq fi ħdan dak il-perjodu mill-Parlament Ewropew jew mill-Kunsill, għandha tkun tapplika l-proċedura stabbilita fl-Artikolu 29.

3.Kwalunkwe istituzzjoni minbarra l-Kummissjoni tista’ tipproponi lill-Parlament Ewropew u lill-Kunsill, fit-taqsima tagħha tal-baġit, trasferimenti minn titolu għal ieħor li jeċċedu l-limitu ta’ 10 % tal-approprjazzjonijiet għas-sena murija fil-linja li minnha għandu jsir it-trasferiment. Dawk it-trasferimenti għandhom ikunu soġġetti għall-proċedura stabbilita fl-Artikolu 29.

4.Kwalunkwe istituzzjoni minbarra l-Kummissjoni tista’, fit-taqsima tagħha tal-baġit, tagħmel trasferimenti fi ħdan l-artikoli u fi ħdan kull kapitolu mingħajr ma tinforma minn qabel lill-Parlament Ewropew u lill-Kunsill. Tista’ wkoll tagħmel trasferimenti minn kapitolu wieħed għal ieħor tal-istess titolu għal sa massimu ta’ 10 % tal-approprjazzjonijiet għas-sena murija fuq il-linja li minnha jsir it-trasferiment bla ma tinforma lill-Parlament Ewropew u lill-Kunsill minn qabel.

Artikolu 28
Trasferimenti mill-Kummissjoni

1.Il-Kummissjoni tista', fit-taqsima tagħha stess tal-baġit, b'mod awtonomu:

(a)tittrasferixxi approprjazzjonijiet fi ħdan l-istess kapitolu;

(b)fir-rigward tan-nefqa fuq persunal u amministrazzjoni li hija komuni għal diversi titoli, tittrasferixxi approprjazzjonijiet minn titolu għal ieħor sa massimu ta’ 10 % tal-approprjazzjonijiet għas-sena li tidher fil-linja li minnha jsir it-trasferiment, u sa massimu ta’ 30 % tal-approprjazzjonijiet għas-sena li tidher fil-linja li lilha jsir it-trasferiment;

(c)fir-rigward tan-nefqa operazzjonali, tittrasferixxi approprjazzjonijiet bejn kapitoli fl-istess titolu jew bejn titoli differenti koperti mill-istess att bażiku, inklużi l-kapitoli tas-sostenn amministrattiv, sa total massimu ta’ 10 % tal-approprjazzjonijiet tas-sena murija fil-linja li minnha jsir it-trasferiment;

(d)fir-rigward tal-approprjazzjonijiet tar-riċerka u tal-iżvilupp teknoloġiku implimentati mill-JRC, il-Kummissjoni tista, fi ħdan it-titoli tal-baġit li jirrigwardaw il-qasam ta’ politika "Riċerka diretta", tagħmel transferimenti bejn kapitoli sa massimu ta’ 15 % tal-approprjazzjoni fil-linja li minnha jkun sar it-trasferiment;

(e)fir-rigward tal-Fond ta' Solidarjetà tal-Unjoni Ewropea (FSUE), l-approprjazzjonijiet ta’ trasferiment mir-riżerva għal-linja mal-adozzjoni mill-Parlament u mill-Kunsill tad-deċiżjoni ta’ mobilizzazzjoni tal-Fond;

(f)fir-rigward tan-nefqa operazzjonali tal-fondi ġestiti b’implimentazzjoni kondiviża, bl-eċċezzjoni tal-FAEG, l-approprjazzjonijiet ta’ trasferiment minn titolu għal ieħor, diment li l-approprjazzjonijiet ikkonċernati jkunu għall-istess objettiv skont it-tifsira tar-Regolament ikkonċernat jew ikunu nefqa tal-assistenza teknika;

(g)l-approprjazzjonijiet ta’ trasferiment mill-partita tal-baġit ta’ garanzija baġitarja għall-partita tal-baġit ta’ garanzija baġitarja oħra meta r-riżorsi proviżjonati fil-fond ta’ proviżjonament komuni ta’ din imsemmija l-aħħar ma jkunux biżżejjed sabiex iħallsu talba għal ħlas ta' garanzija.

Għall-finijiet tal-punt (c) tal-ewwel subparagrafu, għandhom jitħallew isiru trasferimenti awtonomi mil-linji ta’ sostenn amministrattivi għal-linji operazzjonali korrispondenti.

Il-Kummissjoni għandha tieħu d-deċiżjonijiet tagħha sal-31 ta’ Jannar tas-sena finanzjarja sussegwenti.

In-nefqa msemmija fil-punt (b) tal-ewwel subparagrafu ta’ dan l-Artikolu. għandha tkopri l-oġġetti msemmijin fl-Artikolu 45(3) għal kull qasam ta' politika.

Meta l-Kummissjoni tittrasferixxi approprjazzjonijiet tal-FAEG skont il-paragrafu 1 wara l-31 ta’ Diċembru, għandha tieħu d-deċiżjoni tagħha sal-31 ta’ Jannar tas-sena finanzjarja ta’ wara. Il-Kummissjoni għandha tinforma lill-Parlament Ewropew u lill-Kunsill fi żmien ġimagħtejn wara d-deċiżjoni tagħha dwar dawk it-trasferimenti.

Tliet ġimgħat qabel ma tagħmel it-trasferimenti msemmijin fil-punt (b) tal-ewwel subparagrafu ta’ dan l-Artikolu, il-Kummissjoni għandha tinforma lill-Parlament Ewropew u lill-Kunsill bl-intenzjoni tagħha li tagħmel dan. F’każ li jitqajmu raġunijiet iġġustifikati kif xieraq fi ħdan dak il-perjodu mill-Parlament Ewropew jew mill-Kunsill, għandha tkun tapplika l-proċedura stabbilita fl-Artikolu 29.

Bħala eċċezzjoni mit-tieni subparagrafu, il-Kummissjoni tista’, matul l-aħħar xahrejn tas-sena finanzjarja, b'mod awtonomu tittrasferixxi approprjazzjonijiet relatati ma’ nfiq fuq persunal, persunal estern u aġenti oħrajn minn titolu għal ieħor sa limitu totali ta’ 5 % tal-approprjazzjonijiet għas-sena. Il-Kummissjoni għandha tinforma lill-Parlament Ewropew u lill-Kunsill fi żmien ġimagħtejn wara d-deċiżjoni tagħha dwar dawk it-trasferimenti.

2.Il-Kummissjoni tista', fit-taqsima tagħha tal-baġit, tiddeċiedi dwar it-trasferimenti li ġejjin ta’ approprjazzjonijiet minn titolu għal ieħor, sakemm tinforma immedjatament lill-Parlament Ewropew u lill-Kunsill bid-deċiżjoni tagħha:

(a)trasferimenti ta’ approprjazzjonijiet mit-titolu tal-“provvedimenti” msemmi fl-Artikolu 47 ta' dan ir-Regolament, fejn l-unika kundizzjoni għat-tneħħija tar-riżerva tinsab fl-adozzjoni ta’ att bażiku skont l-Artikolu 294 TFUE;

(b)f’każijiet eċċezzjonali debitament iġġustifikati bħal diżastri umanitarji u kriżijiet internazzjonali li jseħħu wara l-1 ta’ Diċembru tas-sena finanzjarja, trasferimenti ta’ approprjazzjonijiet mhux użati għal dik is-sena finanzjarja attwali li jkunu għadhom disponibbli fit-titoli baġitarji li jaqgħu taħt l-intestatura 4 tal-qafas finanzjarju pluriennali għat-titoli baġitarji li jirrigwardaw l-operazzjonijiet ta’ għajnuna għall-ġestjoni tal-kriżijiet u ta’ għajnuna umanitarja.

Il-proposti għat-trasferimenti u l-informazzjoni kollha għall-Parlament Ewropew u l-Kunsill dwar trasferimenti magħmula skont l-Artikoli 27 u 28 ikunu akkumpanjati minn dokumenti ta’ sostenn adattati u dettaljati li juru l-implimentazzjoni tal-approprjazzjonijiet u l-estimi tal-ħtiġijiet sal-aħħar ta’ dik is-sena finanzjarja, kemm għal-linji li fihom għandhom jiġu ttrasferiti l-approprjazzjonijiet, kif ukoll għal dawk li minnhom jittieħdu l-approprjazzjonijiet.

Artikolu 29
Proposti għal trasferiment sottomessi lill-Parlament Ewropew
u lill-Kunsill mill-istituzzjonijiet

1.Kull istituzzjoni għandha tissottometti l-proposti ta’ trasferiment tagħha b’mod simultanju lill-Parlament Ewropew u lill-Kunsill.

2.Il-Kummissjoni tista’ tissottometti proposti għal trasferimenti ta’ approprjazzjonijiet ta' pagament għall-fondi ġestiti b’implimentazzjoni kondiviża bl-eċċezzjoni tal-FAEG lill-Parlament Ewropew u lill-Kunsill sal-10 ta’ Jannar tas-sena finanzjarja ta’ wara. It-trasferiment tal-approprijazzjonijiet tal-pagament jista’ jsir minn kwalunkwe partita tal-baġit. Il-perjodu ta’ sitt ġimgħat imsemmi fil-paragrafu 3 għandu jitnaqqas għal tliet ġimgħat.

Jekk it-trasferiment ma jkunx approvat jew ikun approvat biss parzjalment mill-Parlament Ewropew u mill-Kunsill, il-parti korrespondenti tan-nefqa li hemm riferiment għaliha fil-punt (b) tal-Artikolu 10(5) tgħaddi lill-approprijazzjonijiet tal-pagament fis-sena finanzjarja li jmiss.

3.Il-Parlament Ewropew u l-Kunsill għandhom jieħdu deċiżjonijiet dwar it-trasferimenti ta’ approprjazzjonijiet kif stipulat fil-paragrafi 4 sa 8.

4.Ħlief f'ċirkustanzi urġenti, il-Parlament Ewropew u l-Kunsill, b'dan tal-aħħar li jaġixxi b'maġġoranza kwalifikata, għandhom jiddeliberaw fuq kull proposta ta’ trasferiment fi żmien sitt ġimgħat mid-data li fiha ż-żewġ istituzzjonijiet ikunu rċevew il-proposta.

5.Meta l-Kummissjoni tittrasferixxi approprjazzjonijiet tal-FAEG skont dan l-Artikolu, din għandha tissottometti proposti ta’ trasferiment lill-Parlament Ewropew u lill-Kunsill sal-10 ta’ Jannar tas-sena finanzjarja li jmiss.

Il-perjodu ta’ sitt ġimgħat imsemmi fil-paragrafu 4 għandu jitnaqqas għal tliet ġimgħat.

6.Il-proposta ta’ trasferiment għandha tiġi approvata, jekk fil-perjodu ta’ sitt ġimgħat, iseħħ kwalunkwe wieħed minn dawn:

(a)il-Parlament Ewropew u l-Kunsill japprovawha;

(b)wieħed bejn il-Parlament Ewropew u l-Kunsill japprovaha u l-istituzzjoni l-oħra ma tiħux azzjoni;

(c)il-Parlament Ewropew u l-Kunsill ma jiħdux azzjoni jew ma jiħdux deċiżjoni li jemendaw jew jiċħdu l-proposta ta’ trasferiment.

7.Il-perjodu ta’ sitt ġimgħat imsemmi fil-paragrafu 4 għandu jitnaqqas għal tliet ġimgħat, sakemm il-Parlament Ewropew jew il-Kunsill ma jitlobx mod ieħor, f'wieħed minn dawn il-każijiet li ġejjin:

(a)it-trasferiment jirrappreżenta anqas minn 10 % tal-approprjazzjonijiet tal-linja li minnha jsir it-trasferiment jew ma jaqbiżx il-EUR 5 000 000;

(b)it-trasferiment jirrigwarda biss l-approprjazzjonijiet ta’ pagament u l-ammont globali tat-trasferiment ma jaqbiżx il-EUR 100 000 000.

8.Jekk il-Parlament Ewropew jew il-Kunsill ikun emenda l-ammont tat-trasferiment filwaqt li l-istituzzjoni l-oħra tkun approvatu jew ma tkunx ħadet azzjoni, jew jekk il-Parlament Ewropew u l-Kunsill ikunu t-tnejn li huma emendaw l-ammont tat-trasferiment, l-iżgħar miż-żewġ ammonti għandu jitqies bħala approvat, sakemm l-istituzzjoni kkonċernata ma tirtirax il-proposta ta’ trasferiment tagħha.

Artikolu 30
Trasferimenti soġġetti għal dispożizzjonijiet speċjali

1.L-approprjazzjonijiet korrispondenti għal dħul assenjat jistgħu jkunu ttrasferiti biss jekk dan id-dħul jintuża għall-iskop li għalih ikun assenjat.

2.Għandha tiddaħħal entrata pro memoria fuq entrata mingħajr approprjazzjonijiet awtorizzati permezz ta’ talba speċifika mingħand il-Kummissjoni. Ir-regoli għall-adozzjoni tat-talba tal-Kummissjoni għandhom ikunu dawk stabbiliti fl-Artikolu 29. 

3.Il-paragrafu 1 ma għandux japplika għal dħul assenjat intern f’każ li ma jkun hemm ebda ħtieġa identifikata li tippermetti li t-tali dħul jintuża għall-fini li huwa assenjat għalih.

4.Deċiżjonijiet dwar it-trasferimenti sabiex ikun permess l-użu tar-riżerva ta’ għajnuna f'emerġenza u tar-Riżerva tal-Unjoni Ewropea għall-Kriżijiet għandhom jittieħdu mill-Parlament Ewropew u mill-Kunsill fuq proposta mill-Kummissjoni.

Għall-iskopijiet ta’ dan il-paragrafu, għandha tapplika l-proċedura prevista fil-paragrafi 3 u 4 tal-Artikolu 29. Jekk il-Parlament Ewropew u l-Kunsill ma jaqblux mal-proposta tal-Kummissjoni u ma jistgħux jilħqu pożizzjoni komuni dwar l-użu ta’ din ir-riżerva, huma ma għandhomx jaġixxu fuq il-proposta ta’ trasferiment tal-Kummissjoni.

Il-proposti għal trasferimenti mir-riżerva ta’ għajnuna f’emerġenza u mir-Riżerva tal-Unjoni Ewropea għall-Kriżijiet għandhom ikunu akkumpanjati minn dokumenti ta' sostenn xierqa u dettaljati li juru:

(a)l-aktar informazzjoni riċenti disponibbli għall-implimentazzjoni ta’ approprjazzjonijiet u l-istima tar-rekwiżiti sa tmiem is-sena finanzjarja għal-linja li għaliha jrid isir it-trasferiment;

(b)analiżi tal-possibbiltajiet ta’ riallokazzjoni tal-approprjazzjonijiet.

5.Trasferimenti mir-riżerva għall-Fond Ewropew ta' Aġġustament għall-Globalizzazzjoni għandhom jitqiesu li huma approvati mill-Parlament Ewropew u mill-Kunsill mal-adozzjoni tad-deċiżjoni ta’ mobilizzazzjoni tal-Fond.

KAPITOLU 7
Prinċipju tal-ġestjoni finanzjarja u tal-prestazzjoni tajba

Artikolu 31
Il-prestazzjoni u l-prinċipji ta’ ekonomija, ta’ effiċjenza u ta’ effikaċja

1.L-approprjazzjonijiet għandhom jirrispettaw il-prinċipju ta’ ġestjoni finanzjarja tajba, u b’hekk għandhom jiġu implimentati skont il-prinċipji li ġejjin:

(a)il-prinċipju tal-ekonomija li jirrikjedi li r-riżorsi użati mill-istituzzjoni fit-twettiq tal-attivitajiet tagħha għandhom ikunu disponibbli f'waqt xieraq, fi kwantità u kwalità xierqa u bl-aħjar prezz

(b)il-prinċipju tal-effiċjenza li jikkonċerna l-aqwa relazzjoni bejn ir-riżorsi użati u l-ilħuq tal-objettivi.

(c)il-prinċipju tal-effikaċja li jikkonċerna kemm intlaħqu l-objettivi fil-mira.

2.B’konformità mal-prinċipju ta’ ġestjoni finanzjarja tajba, l-użu tal-approprjazzjonijiet għandu jiffoka fuq il-prestazzjoni u għal dan il-għan:

(a)l-objettivi għall-programmi u għall-attivitajiet għandhom jiġu stabbiliti ex ante;

(b)il-progress fl-ilħuq tal-objettivi għandu jiġi ssorveljati bl-indikaturi tal-prestazzjoni;

(c)il-kisbiet għandhom jiġu rrapportati lill-Parlament Ewropew u lill-Kunsill skont il-punt (h) tal-Artikolu 39(3) u skont il-punt (ii) tal-Artikolu 239(1)(b).

Artikolu 32
L-evalwazzjonijiet

1.Il-programmi u l-attivitajiet li jinvolvu nfiq sinifikanti għandhom ikunu soġġetti għal evalwazzjoni ex ante u retrospettiva (“evalwazzjoni”), li għandha tkun proporzjonata għall-objettivi u n-nefqa.

2.L-evalwazzjonijiet ex ante li jappoġġjaw it-tħejjija tal-programmi u tal-attivitajiet għandhom ikunu bbażati fuq il-prestazzjoni tal-programmi jew tal-attivitajiet relatati u għandhom jidentifikaw u janalizzaw il-kwistjonijiet li jridu jiġu indirizzati, il-valur miżjud tal-UE, l-objettivi, l-effetti mistennijin tal-alternattivi differenti u l-arranġamenti ta’ monitoraġġ u ta’ evalwazzjoni.

3.L-evalwazzjonijiet retrospettivi għandhom jivvalutaw il-prestazzjoni tal-programm jew tal-attività, inklużi aspetti bħall-effikaċja, l-effiċjenza, il-koerenza, ir-rilevanza u l-valur miżjud tal-UE. Dawn għandhom isiru kull ċertu żmien u fi ħdan biżżejjed żmien sabiex is-sejbiet ikunu jistgħu jiġu kkunsidrati fl-evalwazzjonijiet ex ante li jappoġġjaw it-tħejjija tal-programmi u tal-attivitajiet relatati.

Artikolu 33
Dikjarazzjoni finanzjarja obbligatorja

1.Kwalunkwe proposta jew inizjattiva ppreżentata lill-awtorità leġislattiva mill-Kummissjoni, mir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà (ir-“Rappreżentant Għoli”) jew minn Stat Membru, li jista’ jkollha impatt fuq il-baġit, inklużi bidliet fin-numru ta’ karigi, għandha tkun akkumpanjata minn dikjarazzjoni finanzjarja u minn evalwazzjoni ex ante kif previst fl-Artikolu 32.

Kwalunkwe emenda għal proposta jew inizjattiva sottomessa lill-awtorità leġislattiva li jista’ jkollha implikazzjonijiet konsiderevoli fuq il-baġit, inkluż tibdil fin-numru ta’ karigi, għandha tkun akkumpanjata minn dikjarazzjoni finanzjarja mħejjija mill-istituzzjoni li tkun qed tipproponi l-emenda.

Id-dikjarazzjoni finanzjarja tinkludi d-dejta finanzjarja u ekonomika għall-valutazzjoni mill-awtorità leġiżlattiva tal-ħtieġa għal azzjoni mill-Unjoni. Għandha tipprovdi informazzjoni xierqa fir-rigward tal-koerenza ma’ attivitajiet oħra tal-Unjoni u kwalunkwe sinerġija possibbli.

Fil-każ ta’ operazzjonijiet pluriennali, id-dikjarazzjoni finanzjarja tinkludi l-iskeda prevedibbli ta’ rekwiżiti annwali f’dak li għandu x’jaqsam ma’ approprjazzjonijiet u impjiegi, inkluż għall-persunal estern, kif ukoll evalwazzjoni tal-impatt finanzjarju tagħhom fuq perjodu ta’ żmien medju.

2.Matul il-proċedura baġitarja, il-Kummissjoni għandha tipprovdi l-informazzjoni meħtieġa għal paragun bejn bidliet fl-approprjazzjonijiet meħtieġa u l-previżjonijiet inizjali magħmula fid-dikjarazzjoni finanzjarja fid-dawl tal-progress tad-deliberazzjonijiet dwar il-proposta jew inizjattiva mressqa lill-awtorità leġislattiva.

3.Sabiex jitnaqqas ir-riskju ta’ frodi, ta’ irregolaritajiet u ta’ nuqqas ta’ lħuq tal-objettivi, id-dikjarazzjoni finanzjarja msemmija fil-paragrafu 1 għandha tipprovdi informazzjoni dwar is-sistema ta’ kontroll intern stabbilita, stima tal-kostijiet u tal-benefiċċji tal-kontrolli implikati b'sistema bħal din u stima tal-livell stmat ta’ riskju ta’ żbalji, kif ukoll miżuri eżistenti u ppjanati ta’ prevenzjoni tal-frodi u protezzjoni mill-frodi.

Analiżi bħal din għandha tqis il-kobor u t-tip probabbli ta’ żbalji, kif ukoll il-kundizzjonijiet speċifiċi tal-qasam tal-politika kkonċernat u r-regoli applikabbli għalih.

4.Meta jitressqu proposti ta' nfiq riveduti jew ġodda, il-Kummissjoni għandha tistma l-kostijiet u l-benefiċċji tas-sistemi ta’ verifika, kif ukoll il-livell ta’ riskju ta’ żbalji kif jingħad fil-paragrafu 3.

Artikolu 34
Kontroll intern tal-implimentazzjoni tal-baġit

1.Skont il-prinċipju ta’ ġestjoni finanzjarja tajba, il-baġit għandu jiġi implimentat f’konformità ma’ kontroll intern effettiv u effiċjenti kif xieraq f’kull metodu ta’ implimentazzjoni tal-baġit, u skont ir-regoli speċifiċi għas-settur.

2.Għall-finijiet tal-implimentazzjoni tal-baġit, il-kontroll intern huwa ddefinit bħala proċess applikabbli fil-livelli kollha tal-ġestjoni u mfassal biex jipprovdi assigurazzjoni raġonevoli għall-kisba tal-objettivi li ġejjin:

(a)l-effettività, l-effiċjenza u l-ekonomija tal-operazzjonijiet;

(b)l-affidabbiltà tar-rapportar;

(c)is-salvagwardja tal-assi u tal-informazzjoni;

(d)il-prevenzjoni, id-detezzjoni, il-korrezzjoni u s-segwitu tal-frodi u tal-irregolaritajiet;

(e)l-amministrazzjoni adegwata tar-riskji relatati mal-legalità u mar-regolarità tat-tranżazzjonijiet sottostanti, fejn jittieħed kont tan-natura pluriennali tal-programmi kif ukoll in-natura tal-pagamenti kkonċernati.

3.Il-kontroll intern effettiv għandu jkun ibbażat fuq l-aħjar prattiki internazzjonali u jinkludi b’mod partikolari:

(a)segregazzjoni tal-kompiti;

(b)strateġija xierqa ta’ ġestjoni u ta’ kontroll tar-riskju inkluż il-kontroll fil-livell tar-riċevitur;

(c)evitar ta' kunflitt ta' interess;

(d)rekord adegwat tal-awditjar u integrità tad-dejta f’sistemi tad-dejta;

(e) proċeduri għall-monitoraġġ tal-effikaċja u l-effiċjenza u għas-segwitu ta’ dgħufijiet u eċċezzjonijiet fil-kontroll intern li jkunu identifikati;

(f)valutazzjoni perjodika tal-funzjonament tajjeb tas-sistema ta’ kontroll intern.

4.Il-kontroll intern effiċjenti jkun ibbażat fuq l-elementi li ġejjin:

(a)l-implimentazzjoni ta’ strateġija xierqa għall-ġestjoni u ta’ kontroll tar-riskju kkoordinata fost parteċipanti xierqa involuti fil-katina tal-kontroll;

(b)l-aċċessibilità għall-atturi xierqa kollha fil-katina tal-kontroll tar-riżultati tal-kontrolli mwettqa;

(c)is-serħan, meta jkun xieraq, fuq dikjarazzjonijiet ta’ sħab ta’ implimentazzjoni u opinjonijiet tal-awditjar indipendenti, sakemm il-kwalità tax-xogħol sottostanti tkun adegwata u aċċettabbli u tkun saret bi qbil mal-istandards miftehma;

(d)l-applikazzjoni f’waqtha ta’ miżuri korrettivi inklużi, fejn xieraq, pieni dissważivi;

(e)leġiżlazzjoni ċara u mhux ambigwa sottostanti għall-politiki;

(f)l-eliminazzjoni ta’ kontrolli multipli;

(g)it-titjib tal-proporzjon kostijiet-benefiċċji tal-kontrolli.

5.Jekk, matul l-implimentazzjoni, il-livell ta’ żbalji jkun persistentement għoli, il-Kummissjoni għandha tidentifika d-dgħufijiet fis-sistemi ta’ kontroll, tanalizza l-kostijiet u l-benefiċċji ta’ miżuri korrettivi possibbli u tieħu jew tipproponi azzjoni xierqa, bħas-simplifikazzjoni tad-dispożizzjonijiet applikabbli, it-titjib tas-sistemi ta’ kontroll u d-disinn mill-ġdid tal-programm jew tas-sistemi ta’ kunsinna.

KAPITOLU 8
Prinċipju tat-trasparenza

Artikolu 35
Pubblikazzjoni ta’ kontijiet, baġits

1.Il-baġit għandu jkun stabbilit u implementat u l-kontijiet ippreżentati b'konformità mal-prinċipju tat-trasparenza.

2.Il-President tal-Parlament Ewropew għandu jippubblika l-baġit u kwalunkwe baġit emendatorju, kif ikunu adottati b'mod definittiv, f'Il-Ġurnal Uffiċjali tal-Unjoni Ewropea.

Il-baġits għandhom ikunu ppubblikati fi żmien tliet xhur wara d-data li fiha jkunu iddikjarat adottat b'mod definittiv.

Sakemm jinħarġu fil-pubblikazzjoni uffiċjali f’Il-Ġurnal Uffiċjali tal-Unjoni Ewropea, iċ-ċifri dettaljati finali tal-baġit għandhom jiġu ppubblikati bil-lingwi kollha fuq is-sit web tal-istituzzjonijiet, fuq l-inizjattiva tal-Kummissjoni, mill-aktar fis possibbli u mhux aktar tard minn erba’ ġimgħat wara l-adozzjoni finali tal-baġit.

Il-kontijiet annwali konsolidati għandhom jiġu ppubblikati f'Il-Ġurnal Uffiċjali tal-Unjoni Ewropea.

Artikolu 36
Pubblikazzjoni ta’ informazzjoni dwar riċevituri u informazzjoni oħra

1.Il-Kummissjoni għandha tagħmel disponibbli, b’mod xieraq u f'waqtu, l-informazzjoni dwar ir-riċevituri, kif ukoll dwar in-natura u l-iskop tal-miżura ffinanzjata mill-baġit, fejn din tal-aħħar tkun implimentata direttament skont il-punt (a) tal-Artikolu 61(1).

L-obbligu stabbilit fl-ewwel subparagrafu għandu japplika wkoll għal istituzzjonijiet oħrajn meta jimplimentaw il-baġit tal-Unjoni.

L-informazzjoni dwar ir-riċevituri ta’ fondi tal-Unjoni implimentati b’implimentazzjoni diretta tiġi ppubblikata fuq sit elettroniku tal-istituzzjonijiet tal-Unjoni sa mhux aktar tard mit-30 ta’ Ġunju tas-sena ta’ wara s-sena finanzjarja li fiha kienu impenjati legalment dawk il-fondi.

2.L-informazzjoni msemmija fil-paragrafu 1 tal-ewwel subparagrafu għandha titqiegħed għad-dispożizzjoni, filwaqt li jiġu kkunsidrati kif xieraq ir-rekwiżiti ta’ kunfidenzjalità u ta’ sigurtà, b’mod partikolari l-protezzjoni ta’ dejta personali u għandhom jinkludu dawn li ġejjin:

(a)l-isem tar-riċevitur;

(b)il-post tar-riċevitur;

(c)l-ammont impenjat legalment;

(d)in-natura u l-iskop tal-miżura.

Għall-finijiet tal-punt b) tal-ewwel subparagrafu, it-terminu “post” ifisser:

(i)l-indirizz tar-riċevitur meta dan tal-aħħar ikun persuna ġuridika;

(ii)ir-Reġjun fil-livell NUTS 2 meta r-riċevitur ikun persuna fiżika.

Din l-informazzjoni għandha tiġi ppubblikata biss għal premji, għal għotjiet u għal kuntratti li ngħataw bħala riżultat ta’ kompetizzjonijiet jew proċeduri ta’ għoti ta’ għotjiet jew proċeduri ta’ akkwist pubbliku, u għal esperti li ntgħażlu skont l-Artikolu 230(2). L-informazzjoni ma għandhiex tiġi ppubblikata għal:

(a)ammonti ta’ appoġġ għall-edukazzjoni mħallsin lil persuni fiżiċi u appoġġ dirett ieħor imħallas lil persuni fiżiċi l-aktar fil-bżonn kif imsemmijin fil-punt (b) tal-Artikolu 185(4);

(b)kuntratti ta’ valur baxx ħafna mogħtijin lil esperti magħżulin skont l-Artikolu 230(2) kif ukoll kuntratti ta’ valur baxx ħafna anqas mill-ammont imsemmi fil-punt 14.4 tal-Anness għal dan ir-Regolament.

Is-sit web tal-istituzzjonijiet tal-Unjoni jinkludi mill-inqas referenza għall-indirizz tas-sit elettroniku fejn tista’ tinstab l-informazzjoni jew inkella din l-informazzjoni jekk ma tkunx ippubblikata direttament fil-post iddedikat tas-sit elettroniku tal-istituzzjonijiet tal-Unjoni.

3.Meta jkunu kkonċernati persuni fiżiċi, il-pubblikazzjoni għandha tkun limitata għall-isem u għal-lokalità tar-riċevitur, l-ammont impenjat legalment u l-iskop tal-miżura. Id-divulgazzjoni ta’ dik id-dejta għandha tkun ibbażata fuq kriterji rilevanti bħall-perjodiċità, jew it-tip jew l-importanza tal-miżura. Fir-rigward tad-dejta personali, l-informazzjoni titneħħa sentejn wara l-għeluq tas-sena finanzjarja li matulha ġie impenjat legalment l-ammont. L-istess japplika għad-dejta personali li tirreferi għal persuni ġuridiċi li għalihom it-titolu uffiċjali jidentifika persuna fiżika waħda jew iktar.

4.Ikun hemm eżenzjoni mill-pubblikazzjoni jekk tali divulgazzjoni toħloq ir-riskju li jiġu mhedda d-drittijiet u l-libertajiet tal-individwi kkonċernati kif protetti mill-Karta tad-Drittijiet Fundamentali tal-Unjoni Ewropea jew jekk tkun ta’ ħsara għall-interessi kummerċjali tar-riċevituri.

5.Persuni jew entitajiet li jimplimentaw fondi tal-Unjoni skont il-punt (c) tal-Artikolu 61 (1) u korpi ddeżinjati skont il-paragrafu 3 tal-Artikolu 62 għandhom iqiegħdu l-informazzjoni dwar ir-riċevituri tagħhom għad-dispożizzjoni b’mod xieraq u puntwali.

L-informazzjoni dwar ir-riċevituri finali tal-fondi pprovduti permezz ta’ strumenti finanzjarji li jirċievu appoġġ mill-baġit tal-Unjoni għal ammont ta’ anqas minn EUR 500 000 għandha tkun limitata għal dejta statistika, aggregata skont il-kriterji rilevanti, bħall-pożizzjoni ġeografika, it-tipoloġija ekonomika tar-riċevituri, it-tip ta’ appoġġ riċevut u l-qasam tal-politika tal-Unjoni li skont dan ingħata t-tali appoġġ.

Fejn applikabbli, il-livell ta’ dettall u l-kriterji għandhom jiġu ddefiniti fir-regoli speċifiċi għas-settur rilevanti u jistgħu jkunu rfinati aktar fil-ftehimet qafas finanzjarji ta’ sħubija.

Il-Kummissjoni għandha tqiegħed l-informazzjoni dwar is-sit web fejn tista’ tinstab l-informazzjoni msemmija fl-ewwel subparagrafu għad-dispożizzjoni b’mod xieraq u puntwali.

TITOLU III
L-ISTABBILIMENT U L-ISTRUTTURA TAL-BAĠIT

KAPITOLU 1
Stabbiliment tal-baġit

Artikolu 37
Stimi tad-dħul u tan-nefqa

1.Kull istituzzjoni barra mill-Kummissjoni għandha tħejji stima tad-dħul u tan-nefqa tagħha, li għandha tibgħat lill-Kummissjoni u, b'mod parallel, għal skopijiet ta’ informazzjoni, lill-Parlament Ewropew u lill-Kunsill, qabel l-1 ta’ Lulju ta’ kull sena.

2.Ir-Rappreżentant Għoli għandu jkollu konsultazzjonijiet mal-Membri tal-Kummissjoni responsabbli għall-politika tal-iżvilupp, għall-politika tal-viċinat u għall-kooperazzjoni internazzjonali, għall-għajnuna umanitarja u għar-rispons f’każ ta’ kriżi, rigward ir-responsabbiltajiet rispettivi tagħhom

3.Il-Kummissjoni għandha tħejji l-istimi tagħha, li eżatt wara li tadottahom, għandha tibgħat lill-Parlament Ewropew u lill-Kunsill.

Fil-preparazzjoni tal-istimi tagħha, il-Kummissjoni għandha tuża l-informazzjoni msemmija fl-Artikolu 38.

Artikolu 38
Il-baġit stmat tal-korpi msemmija fl-Artikolu 69

Sal-31 ta’ Jannar ta’ kull sena, kull wieħed mill-korpi msemmija fl-Artikolu 69 għandu, b'konformità mal-istrument li jkun stabbilih, jibgħat lill-Kummissjoni, lill-Parlament Ewropew u lill-Kunsill l-abbozz tiegħu tad-dokument uniku ta’ programmazzjoni.

Artikolu 39
Abbozz tal-baġit

1.Il-Kummissjoni għandha tippreżenta proposta li tinkludi l-abbozz tal-baġit lill-Parlament Ewropew u lill-Kunsill sal-1 ta’ Settembru tas-sena ta’ qabel dik li fiha l-baġit għandu jiġi implimentat. Hija għandha tibgħat dik il-proposta, għal skopijiet ta’ informazzjoni, lill-parlamenti nazzjonali wkoll.

L-abbozz tal-baġit għandu jkun fih sommarju tad-dikjarazzjoni ġenerali rigward id-dħul u n-nefqa tal-Unjoni u għandu jikkonsolida l-istimi msemmija fl-Artikolu 37. Jista' jkun fih ukoll stimi differenti minn dawk imfassla mill-istituzzjonijiet.

L-abbozz tal-baġit għandu jsegwi l-istruttura u l-preżentazzjoni stabbiliti fl-Artikoli 45 sa 50.

Kull waħda mit-taqsimiet tal-abbozz tal-baġit għandha tiġi ppreċeduta minn introduzzjoni magħmula mill-istituzzjoni kkonċernata.

Il-Kummissjoni għandha tħejji l-introduzzjoni ġenerali għall-abbozz tal-baġit. L-introduzzjoni ġenerali għandha tikkonsisti f'tabelli finanzjarji li jkopru d-dejta prinċipali skont it-titoli u l-ġustifikazzjonijiet għall-bidliet fl-approprjazzjonijiet minn sena finanzjarja għal dik ta’ warajha skont il-kategoriji tan-nefqa tal-qafas finanzjarju pluriennali.

2.Sabiex jiġu pprovduti previżjonijiet aktar preċiżi u affidabbli tal-implikazzjonijiet baġitarji tal-leġislazzjoni fis-seħħ u tal-proposti leġislattivi pendenti, il-Kummissjoni għandha tehmeż mal-abbozz tal-baġit l-ipprogrammar finanzjarju indikattiv għas-snin ta’ wara strutturat skont il-kategorija tan-nefqa, il-qasam ta’ politika u l-linja baġitarja. L-ipprogrammar finanzjarju sħiħ ikopri l-kategoriji kollha ta’ nefqa bl-eċċezzjoni tal-agrikoltura, il-politika ta’ koeżjoni u l-amministrazzjoni, li għalihom għandha tiġi pprovduta biss dejta fil-qosor

L-ipprogrammar finanzjarju indikattiv għandu jiġi aġġornat wara l-adozzjoni tal-baġit, sabiex jinkorpora r-riżultati tal-proċedura tal-baġit u kull deċiżjoni relevanti oħra.

3.Il-Kummissjoni għandha wkoll tehmeż mal-abbozz tal-baġit

(a)ir-raġunijiet għalfejn l-abbozz tal-baġit fih stimi differenti minn dawk imfassla mill-istituzzjonijiet l-oħra;

(b)kwalunkwe dokument ta’ ħidma li tqis siewi b’rabta mal-pjanijiet ta’ stabbiliment tal-istituzzjonijiet. Kull dokument ta’ ħidma bħal dan, li juri l-aħħar pjan ta’ stabbiliment awtorizzat, għandu jippreżenta:

(i)il-persunal kollu impjegat mill-Unjoni, muri skont it-tip ta’ kuntratt;

(ii)dikjarazzjoni tal-politika dwar il-karigi u l-persunal estern u dwar il-bilanċ bejn is-sessi;

(iii)l-għadd ta’ karigi li jkunu mtlew fil-bidu tas-sena li fiha jkun qed jitressaq l-abbozz tal-baġit, fejn jiġi indikat it-tqassim tagħhom skont il-grad u l-unità amministrattiva;

(iv)lista tal-karigi skont il-qasam ta’ politika;

(v)għal kull kategorija ta’ persunal estern, l-istima tan-numru inizjali ta’ ekwivalenti għal full-time abbażi tal-approprjazzjonijiet awtorizzati, kif ukoll in-numru ta’ persuni effettivament imħaddmin fil-bidu tas-sena li fiha huwa ppreżentat l-abbozz tal-baġit, b'indikazzjoni tat-tqassim tagħhom skont il-grupp ta’ funzjoni u, kif ikun xieraq, skont il-grad.

(c)għall-korpi msemmijin fl-Artikoli 69 u 70, dokument ta’ ħidma li jippreżenta d-dħul u n-nefqa, kif ukoll l-informazzjoni kollha dwar il-persunal kif imsemmija fil-punti (i) sa (v) tas-subparagrafu (b).

Meta s-Sħubijiet Pubbliċi-Privati jagħmlu użu minn strumenti finanzjarji, l-informazzjoni relatata ma’ dawk l-istrumenti għandha tkun inkluża fid-dokument ta’ ħidma msemmi fil-paragrafu 4.

(d)dokument ta’ ħidma dwar l-implimentazzjoni ppjanata tal-approprjazzjonijiet għas-sena finanzjarja u dwar l-impenji pendenti;

(e)fir-rigward tal-approprjazzjonijiet għall-amministrazzjoni, dokument ta’ ħidma li jippreżenta n-nefqa amministrattiva li trid tiġi implimentata mill-Kummissjoni skont it-taqsima tagħha tal-baġit;

(f)dokument ta’ ħidma dwar il-proġetti pilota u l-azzjonijiet preparatorji li għandu jkun fihom ukoll valutazzjoni tar-riżultati u s-segwitu previst;

(g)fir-rigward tal-finanzjament għal organizzazzjonijiet internazzjonali, dokument ta’ ħidma li jkun fih:

(i)sommarju tal-kontribuzzjonijiet kollha, bl-ammonti mqassmin skont il-programm jew il-fond tal-Unjoni u skont l-organizzazzjoni internazzjonali;

(ii)dikjarazzjoni tar-raġunijiet għaliex kien aktar effiċjenti għall-Unjoni li tiffinanzja lil dawk l-organizzazzjonijiet internazzjonali minflok ma taġixxi hi direttament;

(h)dikjarazzjonijiet tal-programm jew kwalunkwe dokument rilevanti ieħor li jkun fih dan li ġej:

(i)indikazzjoni ta’ liema politiki u objettivi tal-Unjoni ser jikkontribwixxi għalihom il-programm;

(ii)motivazzjoni ċara għal intervent fil-livell tal-Unjoni li jkun konformi, fost l-oħrajn, mal-prinċipju tas-sussidjarjetà;

(iii)aġġornamenti fuq l-ilħuq tal-objettivi tal-programm;

(iv)ġustifikazzjoni sħiħa, inkluża analiżi kost-benefiċċji għall-bidliet proposti fil-livell tal-approprjazzjonijiet;

(v)informazzjoni dwar ir-rati ta' implimentazzjoni tal-programm għas-snin attwali u preċedenti;

(i)dikjarazzjoni sommarja tal-iskeda għall-ħlasijiet dovuti fi snin finanzjarji sussegwenti biex jiġu ssodisfati l-impenji baġitarji li jkunu ttieħdu fi snin baġitarji preċedenti.

4.Meta l-Kummissjoni tagħmel użu minn strumenti finanzjarji, għandha tehmeż dokument ta’ ħidma mal-abbozz tal-baġit, li għal kull strument finanzjarju għandu jipprovdi dawn li ġejjin:

(a)referenza għall-istrument finanzjarju u l-att bażiku tiegħu, flimkien ma’ deskrizzjoni ġenerali tal-istrument, l-impatt tiegħu fuq il-baġit u l-valur miżjud tal-kontribuzzjoni tal-Unjoni;

(b)l-istituzzjonijiet finanzjarji involuti fl-implementazzjoni, inkluża kwalunkwe kwistjoni relatata mal-applikazzjoni tal-Artikolu 150(2);

(c)il-kontibut tiegħu għall-kisba tal-objettivi tal-programm ikkonċernat kif miżurat bl-indikaturi stabbiliti, inkluża, fejn applikabbli, id-diversifikazzjoni ġeografika;

(d)l-operazzjonijiet previsti, inklużi l-volumi mira abbażi tal-ingranaġġ fil-mira jew, meta dan ma jkunx disponibbli, tal-proporzjon ta’ ingranaġġ li jirriżulta mill-istrumenti finanzjarji eżistenti;

(e)il-linji baġitarji li jikkorrispondu għall-operazzjonijiet rilevanti u l-impenji baġitarji aggregati u l-pagamenti mill-baġit;

(f)id-durata medja bejn l-impenn baġitarju għall-istrument finanzjarju u l-impenji legali għal proġetti individwali fil-forma ta’ ekwità jew ta’ dejn, meta d-durata tagħhom taqbeż it-tliet snin. Il-Kummissjoni għandha tispjega r-raġunijiet u tipprovdi meta jkun xieraq pjan ta’ azzjoni għat-tnaqqis tad-durata fil-qafas tal-proċedura annwali ta’ kwittanza;

(g)id-dħul u r-ripagamenti skont l-Artikolu 202(2), inkluża evalwazzjoni tal-użu tagħhom;

(h)il-valur tal-investimenti ta’ ekwità, fir-rigward tas-snin preċedenti;

(i)l-ammont totali ta’ provvedimenti għal riskji u obbligazzjonijiet, kif ukoll kwalunkwe informazzjoni dwar l-iskopertura tal-Unjoni għal riskji finanzjarji;

(j)l-indeboliment ta’ assi u talbiet għal ħlas ta’ garanzija kemm għas-sena preċedenti kif ukoll iċ-ċifri akkumulati rispettivi;

(k)il-prestazzjoni tal-istrument finanzjarju, inklużi l-investimenti mwettqin, l-effett ta’ ingranaġġ fil-mira u l-effett ta’ ingranaġġ miksub;

(l)ir-riżorsi proviżjonati fil-fond ta’ garanzija komuni u, fejn applikabbli, il-bilanċ fuq il-kont fiduċjarju.

Dan id-dokument ta’ ħidma għandu jinkludi fih ukoll ħarsa ġenerali lejn in-nefqa amministrattiva li tirriżulta mill-miżati maniġerjali u imposti finanzjarji u debiti operatorji mħallsin għall-immaniġġjar tal-istrumenti finanzjarji b’kollox u għal kull parti maniġerjali u għal kull strument finanzjarju mmaniġġjat.

5.Meta l-Kummissjoni tagħti garanzija baġitarja, għandha tehmeż mal-abbozz tal-baġit dokument ta’ ħidma li, għal kull garanzija baġitarja u għall-fond ta’ garanziji komuni, jippreżenta dawn li ġejjin:

(a)referenza għall-garanzija baġitarja u għall-att bażiku tagħha, flimkien ma’ deskrizzjoni ġenerali tal-garanzija, l-impatt tagħha fuq l-obbligazzjonijiet finanzjarji tal-baġit u l-valur miżjud tal-appoġġ tal-Unjoni;

(b)il-kontropartijiet għall-garanzija, inkluż kwalunkwe intopp relatat mal-applikazzjoni tal-Artikolu 150(2);

(c)il-kontibut tagħha għall-kisba tal-objettivi tal-garanzija baġitarja kif imkejjel bl-indikaturi stabbiliti, inklużi, fejn applikabbli, id-diversifikazzjoni ġeografika u l-mobilizzazzjoni tar-riżorsi tas-settur privat;

(d)informazzjoni dwar l-operazzjonijiet koperti mill-garanzija fuq bażi aggregata skont is-setturi, il-pajjiżi u l-istrumenti, inklużi, fejn applikabbli, portafolli u appoġġ kombinat ma’ azzjonijiet oħrajn tal-Unjoni;

(e)l-ammont finanzjarju ttrasferit lil benefiċjarji kif ukoll valutazzjoni tal-effett ta’ ingranaġġ miksub mill-proġetti appoġġjati mill-garanzija;

(f)informazzjoni aggregata fuq l-istess bażi bħal fil-punt (d) dwar talbiet għal ħlas ta’ garanzija, telf, redditi, ammonti rkuprati u kwalunkwe pagament ieħor riċevut;

(g)informazzjoni dwar il-ġestjoni finanzjarja, il-prestazzjoni u r-riskju tal-fond ta’ garanzija komuni fi tmiem is-sena kalendarja ta’ qabel;

(h)ir-rata ta’ proviżjonament effettiva tal-fond ta’ garanzija komuni u, fejn applikabbli, it-trasferimenti sussegwenti skont l-Artikolu 206(3);

(i)il-flussi finanzjarji fil-fond ta’ proviżjonament komuni matul is-sena kalendarja ta’ qabel kif ukoll it-tranżazzjonijiet sinifikanti u kwalunkwe informazzjoni rilevanti dwar l-iskopertura għar-riskju finanzjarju tal-Unjoni;

(j)skont l-Artikolu 203(3), valutazzjoni tas-sostenibbiltà tal-obbligazzjonijiet kontinġenti mġarrbin mill-baġit tal-Unjoni li jirriżultaw minn operazzjonijiet finanzjarji.

6.Meta l-Kummissjoni tagħmel użu minn Fondi Fiduċjarji tal-Unjoni, għandha tehmeż mal-abbozz tal-baġit dokument ta’ ħidma dwar l-attivitajiet appoġġjati mill-Fondi Fiduċjarji tal-Unjoni, dwar l-implimentazzjoni u l-prestazzjoni tagħhom.

7.Il-Kummissjoni għandha wkoll tehmeż mal-abbozz tal-baġit kull dokument ta’ ħidma ieħor li tqis bħala utli sabiex tappoġġja t-talbiet tal-baġit tagħha.

8.F’konformità mal-Artikolu 8(5) tad-Deċiżjoni tal-Kunsill 2010/427/UE ( 34 ) u sabiex tiġi żgurata t-trasparenza baġitarja fil-qasam tal-azzjoni esterna tal-Unjoni, il-Kummissjoni għandha tibgħat lill-Parlament Ewropew u lill-Kunsill, flimkien mal-abbozz tal-baġit, dokument ta’ ħidma li jippreżenta, b’mod komprensiv:

(a)in-nefqa amministrattiva u operazzjonali kollha relatata mal-azzjonijiet esterni tal-Unjoni, inklużi l-kompiti tal-politika estera u ta' sigurtà komuni (PESK) u tal-politika ta’ sigurtà u ta’ difiża komuni, u ffinanzjata mill-baġit;

(b)in-nefqa amministrattiva globali tas-SEAE għas-sena preċedenti, imqassma fin-nefqa skont id-delegazzjoni tal-Unjoni u n-nefqa għall-amministrazzjoni ċentrali tas-SEAE; flimkien man-nefqa operazzjonali, imqassma skont iż-żona ġeografika (reġjuni, pajjiżi), l-oqsma tematiċi, id-delegazzjoni tal-Unjoni u l-missjoni.

9.Id-dokument ta’ ħidma msemmi fil-paragrafu 6 għandu wkoll:

(a)juri n-numru ta’ karigi għal kull grad f’kull kategorija u n-numru ta’ karigi permanenti u temporanji, inkluż il-persunal kuntrattwali u lokali awtorizzat fil-limiti tal-approprjazzjonijiet f’kull delegazzjoni tal-Unjoni, kif ukoll fl-amministrazzjoni ċentrali tas-SEAE;

(b)juri kwalunkwe żieda jew tnaqqis fil-karigi skont il-grad u l-kategorija fl-amministrazzjoni ċentrali tas-SEAE u fid-delegazzjonijiet tal-Unjoni kollha kemm huma fuq il-bażi tas-sena finanzjarja preċedenti.

Artikolu 40
Ittra emendatorja għall-abbozz tal-baġit

Fuq il-bażi ta’ kwalunkwe informazzjoni ġdida li ma kinitx disponibbli fiż-żmien meta ġie stabbilit l-abbozz tal-baġit, il-Kummissjoni tista', fuq inizjattiva tagħha jew jekk mitluba minn kwalunkwe waħda mill-istituzzjonijiet l-oħra fir-rigward tat-taqsima rispettiva tagħhom, tippreżenta simultanjament lill-Parlament Ewropew u lill-Kunsill ittri emendatorji għall-abbozz tal-baġit qabel ma jitlaqqa’ l-Kumitat ta’ Konċiljazzjoni msemmi fl-Artikolu 314 TFUE. L-ittri jistgħu jinkludu ittra emendatorja li taġġorna, b'mod partikolari, l-istimi tan-nefqa għall-agrikoltura.

Artikolu 41
Obbligi tal-Istati Membri li jirriżultaw mill-adozzjoni tal-baġit

1.Il-President tal-Parlament Ewropew għandu jiddikjara l-baġit adottat b'mod definittiv f'konformità mal-proċedura prevista fl-Artikolu 314(9) TFUE u l-Artikolu 106a tat-Trattat Euratom.

2.Ladarba l-baġit ikun iddikjarat bħala adottat b'mod definittiv, kull Stat Membru għandu, mill-1 ta’ Jannar tas-sena finanzjarja segwenti jew mid-data tad-dikjarazzjoni tal-adozzjoni definittiva tal-baġit jekk din isseħħ wara l-1 ta’ Jannar, ikun marbut li jagħmel il-pagamenti dovuti lill-Unjoni kif speċifikat fir-Regolament (UE, Euratom) Nru 609/2014.

Artikolu 42
Abbozzi ta’ baġits emendatorji

1.Il-Kummissjoni tista' tippreżenta abbozzi ta’ baġits emendatorji li jkunu primarjament ibbażati fuq id-dħul fiċ-ċirkostanzi li ġejjin:

(a)biex iddaħħal fil-baġit il-bilanċ tas-sena finanzjarja preċedenti, skont il-proċedura stabbilita fl-Artikolu 17;

(b)biex tirrevedi t-tbassir tar-riżorsi proprji abbażi ta’ previżjonijiet ekonomiċi aġġornati;

(c)biex taġġorna t-tbassir rivedut tar-riżorsi proprji u ta’ dħul ieħor, kif ukoll biex teżamina mill-ġdid id-disponibilità ta’ approprjazzjonijiet ta’ pagament u l-ħtiġijiet għalihom.

Sa fejn possibbli, u fejn iġġustifikata tagħmel dan, il-Kummissjoni tista’ tipproponi l-emendi xprunati min-nefqa flimkien mal-emendi xprunati mid-dħul imsemmijin fl-ewwel subparagrafu.

Jekk ikun hemm ċirkustanzi inevitabbli, eċċezzjonali u imprevisti, il-Kummissjoni tista’ tippreżenta abbozz tal-baġits emendatorji li primarjament ikunu xprunati min-nefqa.

2.Talbiet għal baġits emendatorji, fl-istess ċirkostanzi kif imsemmi fil-paragrafu 1, minn istituzzjonijiet għajr il-Kummissjoni, għandhom jintbagħtu lill-Kummissjoni.

Qabel jippreżentaw abbozz ta’ baġit emendatorju, il-Kummissjoni u l-istituzzjonijiet l-oħra għandhom jeżaminaw il-possibilità ta’ riallokazzjoni tal-approprjazzjonijiet relevanti, b’referenza partikolari għal kwalunkwe sottoimplimentazzjoni mistennija ta’ approprjazzjonijiet.

L-Artikolu 41 għandu japplika għal baġits emendatorji. Il-baġits emendatorji għandhom ikunu sostanzjati permezz ta’ referenza għall-baġit li jkunu qed jemendaw l-istimi tiegħu.

3.Ħlief f’ċirkustanzi eċċezzjonali ġġustifikati kif xieraq, il-Kummissjoni għandha tissottometti l-abbozzi tagħha tal-baġits emendatorji b’mod simultanju lill-Parlament Ewropew u lill-Kunsill sa mhux aktar tard mill-15 ta’ Ottubru ta’ kull sena finanzjarja. Hi tista' tehmeż opinjoni mat-talbiet mill-istituzzjonijiet l-oħrajn għal baġits emendatorji.

4.L-abbozzi ta’ baġits emendatorji għandhom ikunu akkumpanjati minn dikjarazzjonijiet tal-bażi u l-informazzjoni dwar l-implimentazzjoni tal-baġit għas-snin finanzjarji preċedenti u kurrenti li kienu disponibbli meta ġew stabbiliti.

Artikolu 43
Trażmissjoni bikrija tal-istimi u tal-abbozzi tal-baġit

Il-Kummissjoni, il-Parlament Ewropew u l-Kunsill jistgħu jiftiehmu li jressqu 'l quddiem ċerti dati għat-trażmissjoni tal-istimi, u għall-adozzjoni u t-trażmissjoni tal-abbozz tal-baġit. Madankollu, tali arranġament ma jistax ikollu effett li jqassar jew jestendi l-perjodi li jkunu previsti għall-kunsiderazzjoni ta’ dawk it-testi skont l-Artikolu 314 TFUE u l-Artikolu 106a tat-Trattat Euratom.

KAPITOLU 2
Struttura u preżentazzjoni tal-baġit

Artikolu 44
Struttura tal-baġit

Il-baġit għandu jikkonsisti f'dawn li ġejjin:

(a)dikjarazzjoni ġenerali tad-dħul u tan-nefqa;

(b)taqsimiet separati għal kull istituzzjoni, ħlief il-Kunsill Ewropew u l-Kunsill li għandhom jaqsmu l-istess taqsima tal-baġit, suddiviżi f'dikjarazzjonijiet tad-dħul u tan-nefqa.

Artikolu 45
In-nomenklatura tal-baġit

1.Id-dħul tal-Kummissjoni u d-dħul u n-nefqa tal-istituzzjonijiet l-oħrajn għandhom ikunu kklassifikati mill-Parlament Ewropew u mill-Kunsill skont it-tip tagħhom jew l-użu li għalih huma assenjati f'titoli, f’kapitoli, f’artikoli u f’partiti.

2.Id-dikjarazzjoni tan-nefqa għat-taqsima tal-Kummissjoni għandha tkun stabbilita fuq il-bażi ta’ nomenklatura adottata mill-Parlament Ewropew u mill-Kunsill u kklassifikata skont l-iskop.

Kull titolu għandu jikkorrispondi għal qasam ta’ politika u kull kapitolu għandu, bħala regola, jikkorrispondi għal programm jew għal attività.

Kull titolu jista' jinkludi approprjazzjonijiet operattivi u approprjazzjonijiet amministrattivi. L-approprjazzjonijiet amministrattivi għal titolu għandhom ikunu miġbura flimkien f'kapitolu wieħed.

In-nomenklatura tal-baġit tikkonforma mal-prinċipji ta’ speċifikazzjoni, tat-trasparenza u ta’ ġestjoni finanzjarja tajba. Hija tipprovdi ċ-ċarezza u t-trasparenza meħtieġa għall-proċess baġitarju, tiffaċilita l-identifikazzjoni tal-objettivi ewlenin kif riflessi fil-bażijiet legali rilevanti, tagħmel possibbli l-għażliet dwar il-prijoritajiet politiċi u tippermetti l-implimentazzjoni effiċjenti u effettiva.

3.Meta ppreżentati skont l-iskop, l-approprjazzjonijiet amministrattivi għal titoli individwali għandhom ikunu kklassifikati kif ġej:

(a)in-nefqa fuq il-persunal awtorizzat fil-pjan ta’ stabbiliment: għandu jkun hemm ammont ta’ approprjazzjonijiet u għadd ta’ karigi fil-pjan ta’ stabbiliment li jikkorrispondu għal dik in-nefqa;

(b)in-nefqa fuq il-persunal estern u nefqa oħra msemmija fil-punt (b) tal-ewwel subparagrafu tal-Artikolu 28(1) u ffinanzjata mill-intestatura "amministrazzjoni" tal-qafas finanzjarju pluriennali;

(c)in-nefqa fuq bini u nefqa relatata oħra, inklużi tindif u manutenzjoni, kiri, telekomunikazzjonijiet, ilma, gass u elettriku;

(d)persunal estern u għajnuna teknika marbuta direttament mal-implimentazzjoni tal-programmi.

Kwalunkwe nefqa amministrattiva tal-Kummissjoni ta’ tip li jkun komuni għal bosta titoli għandha tiġi inkluża f’dikjarazzjoni sommarja separata u kklassifikata skont it-tip.

Artikolu 46
Dħul negattiv

1.Il-baġit ma għandux ikun fih dħul negattiv, ħlief meta jkun ġej minn rimunerazzjoni negattiva tad-depożiti.

2.Ir-riżorsi tagħhom imħallsa skont id-Deċiżjoni tal-Kunsill rigward is-sistema tar-riżorsi proprji tal-Unjoni Ewropea għandhom ikunu ammonti netti u għandhom jintwerew bħala tali fid-dikjarazzjoni sommarja tad-dħul fil-budget.

Artikolu 47
Dispożizzjonijiet

1.Kull taqsima tal-baġit tista' tinkludi titolu “dispożizzjonijiet”. L-approprjazzjonijiet għandhom jiddaħħlu f’dak it-titolu fi kwalunkwe mill-każijiet li ġejjin:

(a)ma jkun jeżisti l-ebda att bażiku għall-azzjoni kkonċernata meta l-baġit ikun ġie stabbilit;

(b)ikun hemm raġunijiet serji biex wieħed jiddubita mill-adegwatezza tal-approprjazzjonijiet jew mill-possibbiltà tal-implimentazzjoni, f’kundizzjonijiet konformi mal-prinċipju ta’ ġestjoni finanzjarja tajba, l-approprjazzjonijiet irreġistrati fil-linji kkonċernati.

L-approprjazzjonijiet f’dak it-titolu jistgħu jintużaw biss wara trasferiment skont il-proċedura stabbilita fil-punt (c) tal-ewwel subparagrafu tal-Artikolu 28(1) ta’ dan ir-Regolament fil-każijiet fejn l-adozzjoni tal-att bażiku hi soġġetta għall-proċedura stabbilita fl-Artikolu 294 TFUE, u skont il-proċedura stabbilita fl-Artikolu 29 ta’ dan ir-Regolament, għall-każijiet kollha l-oħrajn.

2.Fil-każ ta' diffikultajiet serji fl-implimentazzjoni, il-Kummissjoni tista' tipproponi, fil-kors ta' sena finanzjarja, li l-approprjazzjonijiet ikunu ttrassferiti lejn it-titolu “provvedimenti”. Il-Parlament Ewropew u l-Kunsill għandhom jieħdu deċiżjoni rigward dawn it-trasferimenti kif stipulat fl-Artikolu 29.

Artikolu 48
Riżerva negattiva

It-taqsima tal-Kummissjoni tal-baġit tista’ tinkludi "riżerva negattiva" limitata għal ammont massimu ta’ EUR 400 000 000. Tali riżerva, li tista' tkun irreġistrata f'titolu separat, għandha tinkludi biss approprjazzjonijiet ta’ pagament.

Din ir-riżerva negattiva għandha tkun imħejjija qabel it-tmiem tas-sena finanzjarja permezz ta’ trasferiment b'konformità mal-proċedura stabbilita fl-Artikoli 28 u 29.

Artikolu 49
Riżerva ta’ Għajnuna f’Emerġenza u Riżerva tal-Unjoni Ewropea għall-Kriżijiet

1.It-taqsima tal-baġit tal-Kummissjoni għandha tinkludi riżerva għall-għajnuna ta’ emerġenza għall-pajjiżi terzi u Riżerva tal-Unjoni Ewropea għall-Kriżijiet.

2.Ir-riżervi msemmijin fil-paragrafu 1 għandhom jintużaw qabel tmiem is-sena finanzjarja permezz ta’ trasferiment skont il-proċedura stabbilita fl-Artikoli 28 u 30.

Artikolu 50
Preżentazzjoni tal-baġit

1.Il-baġit għandu juri:

(a)fid-dikjarazzjoni ġenerali tad-dħul u n-nefqa:

(i)l-istimi tad-dħul tal-Unjoni għas-sena finanzjarja kkonċernata ("sena n");

(ii)l-istimi tad-dħul għas-sena finanzjarja preċedenti u d-dħul għas-sena n - 2;

(iii)l-appropjazzjonijiet ta’ impenn u ta’ pagament għas-sena n;

(iv)l-approprjazzjonijiet ta’ impenn u ta’ pagament għas-sena finanzjarja preċedenti;

(v)in-nefqa impenjata u n-nefqa mħallsa fis-sena n - 2, b’din tal-aħħar espressa wkoll bħala perċentwal tal-baġit tas-sena n;

(vi)kummenti xierqa dwar kull suddiviżjoni, kif stipulat fl-Artikolu 45(1). Il-kummenti tal-baġit għandhom jinkludu r-referenzi tal-att bażiku, fejn tkun teżisti waħda, kif ukoll l-ispjegazzjonijiet xierqa kollha rigward in-natura u l-iskop tal-approprjazzjonijiet;

(b)f'kull taqsima, id-dħul u n-nefqa fl-istess struttura bħal fil-punt (a);

(c)fir-rigward tal-persunal:

(i)għal kull taqsima, pjan ta’ stabbiliment li jistabbilixxi n-numru ta’ karigi għal kull grad f'kull kategorija u f'kull servizz u n-numru ta’ karigi permanenti u temporanji awtorizzati fi ħdan il-limiti tal-approprjazzjonijiet;

(ii)pjan ta’ stabbiliment għall-persunal imħallas mill-approprjazzjonijiet għar-riċerka u għall-iżvilupp teknoloġiku għal azzjoni diretta u pjan ta’ stabbiliment għall-persunal imħallas mill-istess approprjazzjonijiet għal azzjoni indiretta; il-pjanijiet ta’ stabbiliment għandhom ikunu kklassifikati skont il-kategorija u skont il-grad u għandu jkun hemm distinzjoni bejn karigi permanenti u temporanji, awtorizzati fi ħdan il-limiti tal-approprjazzjonijiet;

(iii)pjan ta’ stabbiliment li jistabbilixxi n-numru ta’ karigi skont il-grad u skont il-kategorija għal kull korp imsemmi fl-Artikolu 69 li jirċievi kontribuzzjoni ddebitata lill-baġit. Il-pjanijiet ta’ stabbiliment għandhom juru, maġenb in-numru ta’ postijiet awtorizzati għas-sena finanzjarja, in-numru awtorizzat tas-sena preċedenti. Il-persunal tal-Aġenzija Fornitriċi tal-Euratom għandu jidher separatament fil-pjan ta’ stabbiliment tal-Kummissjoni.

(d)fir-rigward tal-assistenza finanzjarja u tal-garanziji baġitarji:

(i)fid-dikjarazzjoni ġenerali tad-dħul, il-linji baġitarji li jikkorrispondu għall-operazzjonijiet rilevanti u intiżi biex jirrekordjaw kwalunwke rimborż riċevut mingħand riċevituri li inizjalment kienu inadempjenti. Dawk il-linji għandu jkollhom entrata pro memoria u jkunu akkumpanjati minn kummenti xierqa;

(ii)fit-taqsima tal-Kummissjoni:

–il-linji baġitarji li fihom il-garanziji tal-Unjoni fir-rigward tal-operazzjonijiet ikkonċernati. Dawk il-linji għandhom iġorru entrata pro memoria, diment li ma tirriżulta ebda miżata effettiva li trid tiġi rkuprata b’riżorsi definittivi;

–kummenti li jagħtu r-referenza għall-att bażiku u għall-volum tal-operazzjonijiet previsti, id-durata u l-garanzija finanzjarja mogħtija mill-Unjoni fir-rigward ta’ tali operazzjonijiet;

(iii)f'dokument mehmuż mat-taqsima tal-Kummissjoni, bħala indikazzjoni, tar-riskji korrispondenti wkoll:

–l-operazzjoni kapitali kurrenti u l-immaniġġjar tad-dejn;

–l-operazzjonijiet kapitali u l-immaniġġjar tad-dejn għas-sena n;

(e)fir-rigward tal-finanzjament implimentat mill-entitajiet skont l-Artikolu 61(1)(c):

(i)referenza għall-att bażiku tal-programm rilevanti;

(ii)il-linji baġitarji korrispondenti;

(iii)deskrizzjoni ġenerali tal-azzjoni, inklużi d-durata tagħha u l-impatt tagħha fuq il-baġit;

(f)l-ammont totali tan-nefqa tal-PESK imdaħħla f'kapitolu, intitolat “PESK”, b'artikoli speċifiċi. Dawk l-artikoli għandhom ikopru n-nefqa tal-PESK u għandhom jinkludu linji speċifiċi li jidentifikaw mill-inqas il-missjonijiet ewlenin individwali.

2.B'żieda mad-dokumenti msemmija fil-paragrafu 1, il-Parlament Ewropew u l-Kunsill jistgħu jehmżu kwalunkwe dokument rilevanti ieħor mal-baġit.

Artikolu 51
Regoli dwar il-pjanijiet ta’ stabbiliment għall-persunal

1.Il-pjanijiet ta’ stabbiliment deskritti fil-punt (c) tal-Artikolu 50(1) għandhom jikkostitwixxu limitu assolut għal kull istituzzjoni jew korp. Ma jistax ikun hemm aktar ħatriet minn dan il-limitu stabbilit.

Madankollu, apparti milli fil-każ tal-gradi AD 16, AD 15 u AD 14, kull istituzzjoni jew korp jistgħu jimmodifikaw il-pjanijiet ta’ stabbiliment tagħhom b'sa 10 % tal-karigi awtorizzati, soġġetti għall-kundizzjonijiet li ġejjin:

(a)il-volum tal-approprjazzjonijiet tal-persunal li jikkorrispondu għal sena finanzjarja sħiħa ma jkunx affettwat;

(b)il-limitu tan-numru totali ta’ karigi awtorizzati minn kull pjan ta’ stabbiliment ma jinqabiżx;

(c)l-istituzzjoni jew il-korp ikunu ħadu sehem f'eżerċizzju ta’ benchmarking ma’ istituzzjonijiet u korpi oħra tal-Unjoni kif mibdi mill-eżerċizzju ta’ eżami analitiku tal-persunal tal-Kummissjoni.

Tliet ġimgħat qabel ma tagħmel il-modifiki msemmijin fit-tieni subparagrafu, l-istituzzjoni għandha tinforma lill-Parlament Ewropew u lill-Kunsill bl-intenzjoni tagħha li tagħmel dan. F’każ li jitqajmu raġunijiet iġġustifikati kif xieraq fi ħdan dan il-perjodu mill-Parlament Ewropew jew mill-Kunsill, l-istituzzjoni għandha żżomm lura milli tagħmel il-modifiki u għandha tkun tapplika l-proċedura msemmija fl-Artikolu 42.

2.B'deroga mill-ewwel subparagrafu tal-paragrafu 1, l-effetti tax-xogħol part-time awtorizzat mill-awtorità tal-ħatra b'konformità mar-Regolamenti tal-Persunal jistgħu jkunu bbilanċjati b'ħatriet oħrajn.

KAPITOLU 3
Dixxiplina baġitarja

Artikolu 52
Konformità mal-qafas finanzjarju pluriennali.

Il-baġit għandu jikkonforma mal-qafas finanzjarju pluriennali.

Artikolu 53
Konformità tal-atti tal-Unjoni mal-baġit

Fejn l-implimentazzjoni ta’ att tal-Unjoni teċċedi l-approprjazzjonijiet disponibbli fil-baġit, dan l-att jista' jiġi implimentat f'termini finanzjarji biss wara li l-baġit ikun ġie emendat kif meħtieġ.

TITOLU IV
IMPLIMENTAZZJONI TAL-BAĠIT

KAPITOLU 1
Dispożizzjonijiet Ġenerali

Artikolu 54
Implimentazzjoni tal-baġit skont il-prinċipju ta’ ġestjoni finanzjarja tajba u l-opinjoni taċ-ċittadini

1.Il-Kummissjoni għandha timplimenta d-dħul u n-nefqa tal-baġit f'konformità ma’ dan ir-Regolament, taħt ir-responsabbiltà tagħha stess u fil-limiti tal-approprjazzjonijiet awtorizzati.

2.L-Istati Membri għandhom jikkooperaw mal-Kummissjoni hekk li l-approprjazzjonijiet jintużaw f'konformità mal-prinċipju ta’ ġestjoni finanzjarja tajba.

3.Iċ-ċittadini jistgħu jiġu kkonsultati dwar l-implimentazzjoni tal-baġit tal-Unjoni mill-Kummissjoni, mill-Istati Membri jew minn kwalunkwe entità oħra li timplimenta l-baġit tal-Unjoni.

Artikolu 55
Informazzjoni dwar it-trasferimenti ta’ dejta personali għal skopijiet ta’ awditjar

Fi kwalunkwe sejħa li ssir fil-kuntest ta’ għotjiet, ta’ akkwisti jew ta’ premji implimentati f’implimentazzjoni diretta, il-benefiċjarji potenzjali, il-kandidati, l-offerenti u l-parteċipanti, skont ir-Regolament (KE) Nru 45/2001 tal-Parlament Ewropew u tal-Kunsill ( 35 ), għandhom jiġu informati li, bl-iskop li jkunu mħarsa l-interessi finanzjarji tal-Unjoni, id-dejta personali tagħhom tista’ tiġi ttrasferita lis-servizzi ta’ awditjar intern, lill-Qorti Ewropea tal-Awdituri jew lill-Uffiċċju Ewropew Kontra l-Frodi u bejn l-uffiċjali tal-awtorizzazzjoni tal-Kummissjoni, u l-aġenziji eżekuttivi u l-korpi tal-Unjoni msemmijin fl-Artikolu 70.

Artikolu 56
Att bażiku u eċċezzjonijiet

1.Għandu jiġi adottat att bażiku qabel ma jkunu jistgħu jintużaw l-approprjazzjonijiet imdaħħla fil-baġit għal kwalunkwe azzjoni mill-Unjoni.

2.B'deroga mill-paragrafu 1 dawn li ġejjin jistgħu jkunu implimentati mingħajr att bażiku sakemm l-azzjonijiet li jkunu intenzjonati li jiffinanzjaw jaqgħu taħt il-kompetenzi tal-Unjoni

(a)approprjazzjonijiet għal proġetti pilota ta’ natura sperimentali mfasslin biex jittestjaw il-fattibbiltà ta’ azzjoni u s-siwi tagħha. L-approprjazzjonijiet ta’ impenn rilevanti jistgħu jiddaħħlu fil-baġit għal mhux aktar minn sentejn finanzjarji konsekuttivi;

L-ammont totali ta’ appropjazzjonijiet għall-proġetti pilota ma għandux jaqbeż l-EUR 40 000 000 fi kwalunkwe sena finanzjarja;

(b)approprjazzjonijiet għal azzjonijiet preparatorji fil-qasam tal-applikazzjoni tat-TFUE u tat-Trattat Euratom, imfassla għat-tħejjija ta’ proposti li jwasslu għall-adozzjoni ta’ azzjonijiet futuri. L-azzjonijiet preparatorji għandhom isegwu approċċ koerenti u jistgħu jieħdu diversi forom. L-approprjazzjonijiet ta’ impenn rilevanti jistgħu jiddaħħlu fil-baġit għal mhux aktar minn tliet snin finanzjarji konsekuttivi. Il-proċedura għall-adozzjoni tal-att bażiku rilevanti għandha tiġi konkluża qabel tmiem it-tielet sena finanzjarja. Matul dik il-proċedura, l-impenn ta’ approprjazzjonijiet għandu jikkorrispondi mal-karatteristiċi partikolari tal-azzjoni preparatorja fir-rigward tal-attivitajiet previsti, l-għanijiet mixtieqa u r-riċevituri. Konsegwentement, il-mezzi implimentati ma għandhomx jikkorrispondu fil-volum għal dawk previsti għall-iffinanzjar tal-azzjoni definittiva nnifisha;

L-ammont totali ta’ approprjazzjonijiet għal azzjonijiet preparatorji ġodda msemmija f'dan il-punt ma għandux jaqbeż il-EUR 50 000 000 fi kwalunkwe sena finanzjarja, u l-ammont totali tal-approprjazzjonijiet effettivament impenjati għall-azzjonijiet preparatorji ma għandux jaqbeż il-EUR 100 000 000.

(c)approprjazzjonijiet għal miżuri preparatorji fil-qasam tat-Titolu V tat-TUE. Tali miżuri għandhom ikunu limitati għal perjodu qasir ta’ żmien u għandhom ikunu mfasslin biex jistabbilixxu l-kundizzjonijiet għall-azzjoni tal-Unjoni fl-ilħuq tal-objettivi tal-PESK u għall-adozzjoni tal-istrumenti legali meħtieġa;

Għall-fini tal-operazzjonijiet ta’ mmaniġġjar tal-kriżijiet tal-Unjoni, il-miżuri preparatorji għandhom jitfasslu, fost l-oħrajn, biex jivvalutaw ir-rekwiżiti operazzjonali, jipprovdu għal skjerament inizjali rapidu tar-riżorsi, jew jistabbilixxu l-kundizzjonijiet fil-post għall-varar tal-operazzjoni.

Miżuri preparatorji għandhom jiġu deċiżi mill-Kunsill, fuq proposta tar-Rappreżentant Għoli.

Sabiex tkun żgurata l-implimentazzjoni rapida tal-miżuri preparatorji, ir-Rappreżentant Għoli għandu jinforma lill-Parlament Ewropew u lill-Kummissjoni kmieni kemm jista' jkun dwar l-intenzjoni tal-Kunsill li jniedi miżura preparatorja u b'mod partikolari r-riżorsi meħtieġa stmati għal dan il-għan. Il-Kummissjoni għandha tieħu l-miżuri kollha meħtieġa biex jiġi żgurat l-iżborż rapidu tal-fondi.

Il-finanzjament tal-miżuri maqbula mill-Kunsill għat-tħejjija tal-operazzjonijiet ta’ mmaniġġar tal-kriżijiet tal-Unjoni skont it-Titolu V tat-Trattat dwar l-Unjoni Ewropea għandu jkopri l-kostijiet inkrementali li jirriżultaw direttament minn skjerament speċifiku fuq il-post ta’ missjoni jew tim li jinvolvi, fost l-oħrajn, persunal mill-istituzzjonijiet tal-Unjoni, inklużi l-assigurazzjoni għal riskju għoli, l-ispejjeż tal-ivvjaġġar u tal-akkomodazzjoni u l-pagamenti għal kull jum.

(d)approprjazzjonijiet għal azzjonijiet ta’ darba, jew anke azzjonijiet ta’ durata indefinita, imwettqin mill-Kummissjoni bis-saħħa ta’ kompiti li jirriżultaw mill-prerogattivi tagħha fil-livell istituzzjonali skont it-TFUE u t-Trattat Euratom barra mid-dritt tagħha għal inizjattiva leġiżlattiva msemmi fil-punt (b), u skont setgħat speċifiċi mogħtija lilha direttament minn dawk it-Trattati, li lista tagħhom għandha tingħata fl-atti delegati skont dan ir-Regolament;

(e)approprjazzjonijiet għall-operazzjoni ta’ kull istituzzjoni skont l-awtonomija amministrattiva tagħha.

Artikolu 57
Implimentazzjoni tal-baġit minn istituzzjonijiet oħrajn għajr il-Kummissjoni

1.Il-Kummissjoni għandha tagħti lill-istituzzjonijiet l-oħrajn is-setgħat meħtieġa għall-implimentazzjoni tat-taqsimiet tal-baġit li huma relatati magħhom.

2.Il-Kummissjoni tista’ tikkonkludi ftehimiet mal-istituzzjonijiet l-oħrajn tal-Unjoni sabiex tiffaċilita l-implimentazzjoni tal-approprjazzjonijiet, b’mod partikolari dawk amministrattivi li jirregolaw il-forniment ta’ servizzi, il-provvista ta’ prodotti, l-eżekuzzjoni ta’ xogħlijiet jew l-implimentazzjoni ta’ kuntratti ta’ bini.

3.Ftehimiet dwar il-livell ta’ servizz bħal dawn jistgħu jiġu miftehmin ukoll bejn dipartimenti tal-istituzzjonijiet tal-Unjoni, korpi tal-Unjoni, uffiċċji tal-Unjoni, korpi jew persuni inkarigati bl-implimentazzjoni ta’ azzjonijiet speċifiċi fil-PESK skont it-Titolu V tat-TUE u l-Uffiċċju tas-Segretarju Ġenerali tal-Bord tal-Gvernaturi tal-Iskejjel Ewropej. Dawk il-ftehimiet għandhom jippermettu li jiġu rkuprati l-kostijiet imġarrbin minħabba l-implimentazzjoni tagħhom.

Artikolu 58
Delega tas-setgħat għall-implimentazzjoni tal-baġit

1.Il-Kummissjoni u kull waħda mill-istituzzjonijiet l-oħrajn jistgħu, fi ħdan id-dipartimenti tagħhom, jiddelegaw is-setgħat tagħhom għall-implimentazzjoni tal-baġit f'konformità mal-kundizzjonijiet stabbiliti f'dan ir-Regolament u bir-regoli interni tagħhom u fil-limiti li huma jistabbilixxu fl-istrument tad-delega. Dawk li jingħataw din is-setgħa għandhom jaġixxu biss fil-limiti tas-setgħat li jkunu ngħataw lilhom espressament.

2.Madankollu, il-Kummissjoni tista’ tiddelega s-setgħat tagħha għall-implimentazzjoni tal-baġit rigward l-approprjazzjonijiet operazzjonali tat-taqsima tagħha stess lill-Kapijiet tad-delegazzjonijiet tal-Unjoni u, sabiex tiżgura l-kontinwità tan-negozju fin-nuqqas tagħhom, lid-deputati Kapijiet tad-Delegazzjonijiet. Meta l-Kapijiet tad-delegazzjonijiet tal-Unjoni jaġixxu bħala uffiċjali tal-awtorizzazzjoni b’sottodelega tal-Kummissjoni u d-deputati tagħhom fin-nuqqas ta’ dawn tal-aħħar, huma għandhom japplikaw ir-regoli tal-Kummissjoni għall-implimentazzjoni tal-baġit u għandhom ikunu soġġetti għall-istess dmirijiet, obbligi u responsabbiltà bħal kull uffiċjal tal-awtorizzazzjoni ieħor b’sottodelega tal-Kummissjoni.

Il-Kummissjoni tista’ tirtira d-delega skont ir-regoli tagħha stess.

Għall-finijiet tal-ewwel subparagrafu, ir-Rappreżentant Għoli għandu jieħu l-miżuri meħtieġa biex jiffaċilita l-kooperazzjoni bejn id-delegazzjonijiet tal-Unjoni u d-dipartimenti tal-Kummissjoni.

3.F’ċerti eċċezzjonijiet, is-SEAE jista’ jiddelega s-setgħat tiegħu għall-implimentazzjoni tal-baġit rigward l-approprjazzjonijiet amministrattivi tat-taqsima tiegħu lill-persunal tal-Kummissjoni meta dan ikun neċessarju sabiex tiġi żgurata l-kontinwità fl-amministrazzjoni tad-Delegazzjonijiet fin-nuqqas tal-uffiċjal tal-awtorizzazzjoni kompetenti tas-SEAE. F’każijiet eċċezzjonali li fihom il-persunal tal-Kummissjoni tad-Delegazzjonijiet tal-Unjoni jaġixxi bħala uffiċjali tal-awtorizzazzjoni b’sottodelega tas-SEAE, dan għandu japplika r-regoli interni tas-SEAE għall-implimentazzjoni tal-baġit u għandu jkun soġġett għall-istess dmirijiet, obbligi u responsabbiltà bħal kull uffiċjal tal-awtorizzazzjoni ieħor b’sottodelega tas-SEAE.

Is-SEAE jista’ jirtira d-delega skont ir-regoli tiegħu stess.

Artikolu 59
Kunflitt ta' interess

1.L-atturi finanzjarji kif iddefiniti fil-Kapitolu 4 tat-Titolu IV u persuni oħrajn involuti f’implmentazzjoni diretta, indiretta u kondiviża fl-implimentazzjoni u l-ġestjoni tal-baġit, inklużi l-atti preparatorji tagħhom, l-awditu jew il-kontroll ma għandhom jieħdu ebda azzjoni li tista’ ġġib l-interessi tagħhom f’kunflitt ma’ dawk tal-Unjoni. Għandhom jieħdu wkoll miżuri xierqa sabiex jipprevjenu milli jqumu kunflitti ta’ interess fil-funzjonijiet taħt ir-responsabbiltà tagħhom u sabiex jindirizzaw sitwazzjonijiet li jistgħu jiġu perċepiti b’mod oġġettiv bħala kunflitt ta’ interess.

2.Għall-finijiet tal-paragrafu 1, kunflitt ta' interess ikun jeżisti fejn l-eżerċizzju imparzjali u oġġettiv tal-funzjonijiet ta' attur finanzjarju jew ta' persuna oħra, kif jissemma fil-paragrafu 1, ikun kompromess għal raġunijiet li jinvolvu l-familja, il-ħajja emozzjonali, l-affinità politika jew nazzjonali, l-interess ekonomiku jew kwalunkwe interess personali dirett jew indirett ieħor.

Artikolu 60
Kunflitt ta’ interess tal-membri tal-persunal

Meta r-riskju ta’ kunflitt ta’ interess imsemmi fl-Artikolu 59 jinvolvi membru tal-persunal kopert mir-Regolamenti tal-Persunal, dan għandu jirreferi l-kwistjoni lill-uffiċjal tal-awtorizzazzjoni b’delega li għandu jikkonferma bil-miktub jekk jeżistix kunflitt ta’ interess. Il-membru tal-persunal inkwistjoni għandu jinforma wkoll lis-superjur ġerarkiku tiegħu. Meta jinstab li jeżisti kunflitt ta’ interess, l-Awtorità tal-Ħatra għandha tneħħi lill-uffiċjal mir-responsabbiltà f’din il-kwistjoni. L-uffiċjal tal-awtorizzazzjoni b'delega għandu jiżgura personalment li tittieħed kwalunkwe azzjoni ulterjuri li tkun xierqa.

KAPITOLU 2
Metodi ta’ implimentazzjoni

Artikolu 61
Metodi ta’ implimentazzjoni tal-baġit

1.Il-Kummissjoni għandha timplimenta l-baġit bi kwalunkwe wieħed minn dawn il-modi:

(a)direttament ("implimentazzjoni diretta"), permezz tad-dipartimenti tagħha, inkluż persunal fid-delegazzjonijiet tal-Unjoni taħt l-awtorità tal-Kap tad-delegazzjoni rispettiv tagħhom, f'konformità mal-Artikolu 58(2), jew permezz tal-aġenziji eżekuttivi msemmija fl-Artikolu 68;

(b)b’implimentazzjoni kondiviża mal-Istati Membri ("implimentazzjoni kondiviża");

(c)indirettament ("implimentazzjoni indiretta"), fejn dan ikun previst fl-att bażiku jew fil-każijiet imsemmijin fil-punti (a) sa (d) tal-ewwel subparagrafu tal-Artikolu 56(2), ma’:

(i)pajjiżi terzi jew il-korpi nnominati minnhom;

(ii)organizzazzjonijiet internazzjonali jew l-aġenziji tagħhom, kif iddefiniti fl-Artikolu 151;

(iii)il-Bank Ewropew tal-Investiment jew il-Fond Ewropew tal-Investiment (“il-grupp tal-BEI”);

(iv)il-korpi msemmijin fl-Artikoli 69 u 70;

(v)il-korpi rregolati bil-liġi pubblika;

(vi)il-korpi rregolati bil-liġi privata b'missjoni ta’ servizz pubbliku sa fejn jipprovdu garanziji finanzjarji adegwati;

(vii)korpi rregolati bil-liġi privata ta’ Stat Membru li huma inkarigati bl-implimentazzjoni ta’ sħubija pubblika-privata u li jipprovdu garanziji finanzjarji adegwati;

(viii)korpi jew persuni fdati bl-implimentazzjoni ta’ azzjonijiet speċifiċi fil-PESK skont it-Titolu V tat-TUE, u identifikati fl-att bażiku rilevanti.

2.Il-Kummissjoni hija responsabbli għall-implimentazzjoni tal-baġit skont l-Artikolu 317 tat-TFUE u ma għandhiex tiddelega l-implimentazzjoni tal-baġit lil partijiet terzi, meta t-tali kompiti jkunu jinvolvu miżura kbira ta’ diskrezzjoni li timplika għażliet politiċi.

Il-Kummissjoni ma għandhiex, permezz ta’ kuntratti skont it-Titolu VII, testernalizza kompiti li jinvolvu l-eżerċizzju ta’ awtorità pubblika u setgħat diskrezzjonali ta’ ġudizzju.

Artikolu 62
Implimentazzjoni kondiviża mal-Istati Membri

1.Meta l-baġit jiġi implimentat b’implimentazzjoni kondiviża, il-Kummissjoni u l-Istati Membri għandhom jirrispettaw il-prinċipji ta’ ġestjoni finanzjarja tajba, ta’ trasparenza u ta’ nondiskriminazzjoni u għandhom jiżguraw il-viżibbiltà tal-azzjoni tal-Unjoni. Sabiex jintlaħaq dan il-għan, il-Kummissjoni u l-Istati Membri għandhom iwettqu l-obbligi rispettivi tagħhom tal-kontroll u l-awditjar u jassumu r-responsabbiltajiet li jirriżultaw u li huma stabbiliti f'dan ir-Regolament. Dispożizzjonijiet komplimentari għandhom jiġu stabbiliti f'regoli speċifiċi għas-setturi.

2.L-Istati Membri għandhom jieħdu l-miżuri neċessarji kollha, inklużi dawk leġislattivi, regolatorji u amministrattivi, biex iħarsu l-interessi finanzjarji tal-Unjoni, jiġiferi:

(a)jiżguraw li l-azzjonijiet iffinanzjati mill-baġit ikunu implimentati b'mod korrett u effikaċi u f'konformità mar-regoli applikabbli speċifiċi għas-settur u għal dak l-iskop jinnominaw, skont il-paragrafu 3, u jissorveljaw korpi responsabbli għall-ġestjoni u għall-kontroll tal-fondi tal-Unjoni;

(b)jipprevjenu, jidentifikaw u jikkoreġu irregolaritajiet u frodi.

Biex iħarsu l-interessi finanzjarji tal-Unjoni, l-Istati Membri, filwaqt li jirrispettaw il-prinċipju tal-proporzjonalità, u f'konformità ma’ dan l-Artikolu u mar-regoli rilevanti speċifiċi għas-settur, iwettqu kontrolli ex ante u ex post inkluż fejn meħtieġ, kontrolli fuq il-post fuq kampjuni rappreżentattivi u/jew ibbażati fuq ir-riskju tat-tranżazzjonijiet. Huma għandhom jirkupraw ukoll fondi mħallsa indebitament u jressqu proċedimenti legali fejn meħtieġ f'dan ir-rigward.

L-Istati Membri għandhom jimponu penali effettivi, dissważivi u proporzjonati fuq ir-riċevituri fejn stipulat fir-regoli speċifiċi għas-setturi u f'dispożizzjonijiet speċifiċi fil-leġiżlazzjoni nazzjonali.

Bħala parti mill-evalwazzjoni tagħha tar-riskji u f'konformità mar-regoli speċifiċi għas-settur, il-Kummissjoni għandha tissorvelja s-sistemi ta’ ġestjoni u ta’ kontroll stabbiliti fl-Istati Membri. Il-Kummissjoni, fil-ħidma tagħha ta’ awditjar, għandha tirrispetta l-prinċipju tal-proporzjonalità u għandha tqis il-livell ta’ riskju evalwat b'konformità mar-regoli speċifiċi għas-settur.

3.Skont il-kriterji u l-proċeduri stabbiliti fir-regoli speċifiċi għas-settur, l-Istati Membri għandhom jinnominaw korpi fil-livell xieraq sabiex ikunu responsabbli għall-ġestjoni u għall-kontroll tal-fondi tal-Unjoni. Dawn il-korpi jistgħu jwettqu wkoll kompiti relatati mal-ġestjoni ta’ fondi tal-Unjoni u jistgħu jinkarigaw uħud mill-kompiti tagħhom lil korpi oħrajn, inklużi l-korpi indikati fl-Artikolu 61(1) (c) (ii) u (iii).

Meta jiddeċiedu dwar in-nomina ta’ korpi, l-Istati Membri jistgħu jibbażaw id-deċiżjoni tagħhom fuq jekk is-sistemi ta’ ġestjoni u ta’ kontroll humiex essenzjalment l-istess bħal dawk li diġà qed jitħaddmu għall-perjodu preċedenti u jekk ħadmux b'mod effikaċi.

Jekk ir-riżultati tal-awditjar u tal-kontroll juru li l-korpi nnominati ma għadhomx konformi mal-kriterji stabbiliti fir-regoli speċifiċi għas-setturi, l-Istati Membri għandhom jieħdu l-miżuri neċessarji biex jiżguraw li jinstab rimedju għan-nuqqasijiet fl-implimentazzjoni tal-kompiti ta’ dawk il-korpi, inkluż billi tintemm in-nomina skont ir-regoli speċifiċi għas-setturi.

Ir-regoli speċifiċi għas-setturi għandhom jiddefinixxu r-rwol tal-Kummissjoni fil-proċess stabbilit f'dan il-paragrafu.

4.Il-korpi maħtura skont il-paragrafu 3 għandhom:

(a)jistabbilixxu sistema effettiva u effiċjenti ta’ kontroll intern u jiżguraw il-funzjonament tagħha;

(b)jużaw sistema kontabilistika li tipprovdi informazzjoni preċiża, sħiħa u affidabbli mingħajr dewmien;

(c)jipprovdu l-informazzjoni meħtieġa skont il-paragrafu 5;

(d)jiżguraw il-pubblikazzjoni ex post bi qbil mal-Artikolu 36(2). Kwalunkwe pproċessar ta’ dejta personali għandu jikkonforma mad-dispożizzjonijiet nazzjonali li jimplimentaw id-Direttiva 95/46/KE.

5.Il-korpi maħtura skont il-paragrafu 3 għandhom jipprovdu lill-Kummissjoni sal-15 ta’ Frar tas-sena finanzjarja ta’ wara:

(a)bil-kontijiet tagħhom dwar in-nefqa mġarrba, waqt il-perjodu ta’ referenza rilevanti kif iddefinit fir-regoli speċifiċi għas-settur, fl-eżekuzzjoni tal-kompiti tagħhom u li ġiet ippreżentata lill-Kummissjoni għar-rimborż. Dawk il-kontijiet għandhom jinkludu l-prefinanzjament u s-somom li fir-rigward tagħhom għaddejjin jew tlestew proċeduri ta’ rkupru. Għandhom ikunu akkumpanjati b'dikjarazzjoni dwar il-ġestjoni li tikkonferma li, fl-opinjoni ta’ dawk inkarigati mill-ġestjoni tal-fondi:

(i)l-informazzjoni hija ppreżentata kif suppost, kompluta u preċiża;

(ii)in-nefqa intużat għall-iskop li kienet maħsuba għalih, kif definit fir-regoli speċifiċi għas-settur;

(iii)il-proċeduri ta’ kontroll stabbiliti jagħtu l-garanziji neċessarji fir-rigward tal-legalità u tar-regolarità tat-tranżazzjonijiet sottostanti;

(b)b'sommarju annwali tar-rapporti finali tal-awditjar u tal-kontrolli mwettqa, inkluża analiżi tan-natura u tal-portata tal-iżbalji u tad-dgħufijiet identifikati fis-sistema, kif ukoll tal-azzjonijiet meħuda jew ippjanati.

Il-kontijiet imsemmija fil-punt (a) tal-ewwel subparagrafu u s-sommarji msemmija fil-punt (b) tal-ewwel subparagrafu għandhom ikunu akkumpanjati minn opinjoni ta’ korp tal-awditjar indipendenti, imfassla skont standards tal-awditjar aċċettati internazzjonalment. Dik l-opinjoni għandha tistabbilixxi jekk il-kontijiet jagħtux stampa ċara u ġusta, jekk in-nefqa li fir-rigward tagħha ntalab rimborż mingħand il-Kummissjoni hijiex legali u regolari, u jekk is-sistemi ta’ kontroll imħaddma jiffunzjonawx kif suppost. L-opinjoni għandha tiddikjara wkoll jekk ix-xogħol tal-awditjar iqajjimx dubju dwar l-affermazzjonijiet li saru fid-dikjarazzjoni ta’ ġestjoni msemmija fil-punt (a) tal-ewwel subparagrafu.

L-iskadenza tal-15 ta’ Frar tista' tiġi estiża b'eċċezzjoni mill-Kummissjoni sal-1 ta’ Marzu, abbażi ta’ komunikazzjoni mill-Istat Membru kkonċernat.

L-Istati Membri jistgħu, fil-livell xieraq, jippubblikaw l-informazzjoni msemmija f'dan il-paragrafu.

Barra minn hekk, l-Istati Membri jistgħu jipprovdu dikjarazzjonijiet iffirmati fil-livell xieraq dwar l-informazzjoni msemmija f'dan il-paragrafu.

6.Sabiex ikun żgurat li l-fondi tal-Unjoni jintużaw skont ir-regoli applikabbli, il-Kummissjoni għandha:

(a)tapplika proċeduri għall-eżami u l-aċċettazzjoni tal-kontijiet tal-korpi maħtura, fejn tiżgura li l-kontijiet ikunu kompluti, preċiżi u veri;

(b)teskludi mill-finanzjament tal-Unjoni in-nefqa li fir-rigward tagħha sar żborż bi ksur tal-liġi applikabbli;

(c)tinterrompi skadenzi għal ħlasijiet jew tissospendi ħlasijiet fejn dan ikun previst fir-regoli speċifiċi għas-settur.

Il-Kummissjoni għandha ttemm l-interruzzjoni tal-iskadenzi għal pagament jew is-sospensjoni tal-pagamenti, għalkollox jew parzjalment, wara li Stat Membru jkun ippreżenta l-kummenti tiegħu u hekk kif ikun ħa l-miżuri neċessarji. Ir-rapport annwali tal-attività msemmi fl-Artikolu 73(9) għandu jkopri l-obbligi kollha skont dan is-subparagrafu.

7.Ir-regoli speċifiċi għas-settur għandhom iqisu l-ħtiġijiet tal-programmi ta’ Kooperazzjoni Territorjali Ewropea partikolarment rigward il-kontenut tad-dikjarazzjoni ta’ ġestjoni, il-proċess stabbilit fil-paragrafu 3 u l-funzjoni tal-awditjar.

8.Il-Kummissjoni tiġbor reġistru ta’ entitajiet responsabbli mill-attivitajiet ta’ ġestjoni, ta’ ċertifikazzjoni u tal-awditjar skont ir-regolamenti speċifiċi għas-settur.

Sabiex tippromwovi l-aħjar prattiki fl-implimentazzjoni tal-Fondi Strutturali, tal-Fond ta’ Koeżjoni, tal-Fond Agrikolu Ewropew għall-Iżvilupp Rurali, il-FAEG u l-Fond Ewropew għas-Sajd, il-Kummissjoni tista’, għal skopijiet ta’ informazzjoni, tqiegħed għad-dispożizzjoni gwida metodoloġika li tispjega l-istrateġija u l-approċċ ta’ kontroll tagħha, inklużi l-listi ta’ kontroll, u eżempji tal-aħjar prattika għall-korpi pubbliċi responsabbli għall-attivitajiet ta’ ġestjoni u ta’ kontroll. Dik il-gwida tiġi aġġornata kull meta jkun jeħtieġ li jsir dan.

9.Ir-riżorsi allokati lill-Istati Membri b’implimentazzjoni kondiviża jistgħu jintużaw ukoll flimkien ma’ operazzjonijiet u ma’ strumenti mwettqin skont ir-Regolament 2015/1017 tal-Parlament Ewropew u tal-Kunsill tal-25 ta’ Ġunju 2015 dwar il-Fond Ewropew għall-Investimenti Strateġiċi, iċ-Ċentru Ewropew ta' Konsulenza għall-Investimenti u l-Portal Ewropew ta' Proġetti ta' Investiment u li jemenda r-Regolamenti (UE) Nru 1291/2013 u (UE) Nru 1316/2013.

KAPITOLU 3
UFFIĊĊJI EWROPEJ U KORPI TAL-UNJONI

Taqsima 1
UFFIĊĊJI EWROPEJ

Artikolu 63
Definizzjoni u kamp ta’ applikazzjoni

1.L-“uffiċċji Ewropej” huma strutturi amministrattivi mwaqqfin mill-Kummissjoni jew mill-Kummissjoni ma’ istituzzjoni waħda jew aktar sabiex iwettqu kompiti trażversali speċifiċi, diment li dan ikun jista’ jiġi ġġustifikat minn studju tal-kostijiet-benefiċċji u valutazzjoni tar-riskji assoċjati.

2.Fi ħdan l-ambitu tal-kompetenzi tagħhom, l-uffiċċji Ewropej:

(a)għandhom iwettqu kompiti obbligatorji pprovduti fl-att ta’ stabbiliment tagħhom jew f’leġiżlazzjoni oħra tal-Unjoni;

(b)jistgħu jwettqu kompiti mhux obbligatorji awtorizzati mill-Kumitati Maniġerjali tagħhom wara li jikkunsidraw il-kostijiet-benefiċċji u r-riskji assoċjati għall-partijiet involuti. Għat-twettiq ta’ dawn il-kompiti, l-uffiċċju jista’ jirċievi delegazzjoni ta’ setgħat ta’ uffiċjal tal-awtorizzazzjoni , jew jista’ jikkonkludi ftehimiet dwar il-livell ta’ servizz ad-hoc ma’ istituzzjonijiet tal-Unjoni, ma’ korpi tal-Unjoni, ma’ uffiċċji Ewropej oħrajn jew ma’ partijiet terzi.

3.Din it-Taqsima għandha tapplika għall-operat tal-Uffiċċju Ewropew Kontra l-Frodi, bl-eċċezzjoni tal-paragrafu 4 ta’ dan l-Artikolu, tal-Artikolu 65 u tal-paragrafi 1, 2 u 3 tal-Artikolu 66.

4.L-awditur intern tal-Kummissjoni għandu jeżerċita r-responsabbiltajiet kollha stabbiliti fil-Kapitolu 8 ta’ dan it-Titolu.

Artikolu 64
Approprijazzjonijiet dwar l-Uffiċċji Ewropej

1.L-approprjazzjonijiet awtorizzati għall-implimentazzjoni tal-kompiti obbligatorji għandhom ikunu mdaħħla f'linja baġitarja speċifika fit-taqsima tal-baġit li tirrigwarda l-Kummissjoni u għandhom ikunu stabbiliti fid-dettall fl-Anness ta’ dik is-sezzjoni.

L-Anness imsemmi fl-ewwel subparagrafu għandu jieħu l-għamla ta’ dikjarazzjoni tad-dħul u n-nefqa, suddiviża bl-istess mod bħat-taqsimiet tal-baġit.

L-approprjazzjonijiet imdaħħlin f’dak l-Anness:

(a)għandhom ikopru r-rekwiżiti finanzjarji kollha ta’ kull uffiċċju Ewropew fit-twettiq tal-kompiti obbligatorji stipulati fl-att ta’ stabbiliment tiegħu jew f’leġiżlazzjoni oħra tal-Unjoni;

(b)jistgħu jkopru rekwiżiti finanzjarji ta’ uffiċċju Ewropew fit-twettiq tal-kompiti mitlubin mill-istituzzjonijiet tal-Unjoni, minn korpi tal-Unjoni, minn uffiċċji Ewropej u aġenziji mwaqqfin minn jew skont it-Trattati u awtorizzati skont l-att ta’ stabbiliment tal-uffiċċju;

2.Fir-rigward tal-approprjazzjonijiet imdaħħlin fl-Anness għal kull uffiċċju Ewropew, il-Kummissjoni għandha tiddelega s-setgħat tal-uffiċjal tal-awtorizzazzjoni lid-Direttur tal-uffiċċju Ewropew ikkonċernat, skont l-Artikolu 72.

3.Il-pjan ta’ stabbiliment ta’ kull uffiċċju Ewropew għandu jkun anness ma’ dak tal-Kummissjoni.

4.Id-Direttur ta’ kull uffiċċju Ewropew għandu jieħu deċiżjonijiet dwar it-trasferimenti fi ħdan l-Annessi msemmijin fil-paragrafu 1. Il-Kummissjoni għandha tinforma lill-Parlament Ewropew u lill-Kunsill b'tali trasferimenti.

Artikolu 65
Kompiti mhux obbligatorji

Għall-kompiti mhux obbligatorji msemmijin fil-punt (b) tal-Artikolu 63(2), uffiċċju Ewropew jista’:

(a)jirċievi delega għad-Direttur tiegħu mingħand istituzzjonijiet tal-Unjoni, korpi tal-Unjoni u uffiċċji Ewropej oħrajn, flimkien ma’ delega tas-setgħat tal-uffiċjal tal-awtorizzazzjoni rigward l-approprjazzjonijiet imdaħħlin fit-taqsima tal-baġit tal-istituzzjoni tal-Unjoni, tal-korp tal-Unjoni jew ta’ uffiċċju Ewropew ieħor. L-istituzzjonijiet tal-Unjoni, il-korpi tal-Unjoni u uffiċċji Ewropej oħrajn ikkonċernati għandhom jistabbilixxu l-limiti u l-kundizzjonijiet għal din id-delega tas-setgħat. Tali delega għandha tkun maqbula skont l-att ta’ stabbiliment tal-uffiċċju Ewropew, b’mod partikolari dwar il-kundizzjonijiet u l-modalitajiet ta’ din id-delega;

(b)jikkonkludi ftehimiet dwar il-livell ta’ servizz ad hoc. F'dawn il-każijiet, id-Direttur tal-uffiċċju Ewropew għandu jadotta, skont l-att ta’ stabbiliment tiegħu, id-dispożizzjonijiet speċifiċi li jirregolaw l-implimentazzjoni ta’ dawk il-kompiti, l-irkupru tal-kostijiet imġarrbin, u ż-żamma tal-kontijiet korrispondenti. L-uffiċċju għandu jirrapporta għand l-istituzzjonijiet, il-korpi tal-Unjoni jew uffiċċji Ewropej oħrajn rigward ir-riżultati tat-tali kontijiet.

Artikolu 66
Kontijiet tal-uffiċċji Ewropej

1.Kull uffiċċju Ewropew għandu jħejji rekords kontabilistiċi tan-nefqa tiegħu, li jagħmluha possibbli li jkun iddeterminat il-proporzjon tas-servizzi tiegħu forniti lil kull istituzzjoni, korp tal-Unjoni jew uffiċċju Ewropew ieħor. Id-Direttur tal-uffiċċju Ewropew ikkonċernat għandu jadotta, wara approvazzjoni mill-Kumitat ta’ Ġestjoni, il-kriterji li fuqhom għandhom ikunu bbażati r-rekords kontabilistiċi.

2.Il-kummenti rigward il-linja baġitarja speċifika li fiha jiddaħħlu l-approprjazzjonijiet totali għal kull uffiċċju Ewropew li lilu ġew iddelegati setgħat tal-uffiċjal tal-awtorizzazzjoni skont il-punt (a) tal-Artikolu 65 għandhom juru stima tal-kostijiet tas-servizzi forniti minn dak l-uffiċċju lil kull istituzzjoni tal-Unjoni, korp tal-Unjoni u uffiċċju Ewropew ieħor ikkonċernati. Dan għandu jkun ibbażat fuq ir-rekords kontabilistiċi msemmijin fil-paragrafu 1 ta’ dan l-Artikolu.

3.Kull uffiċċju Ewropew li lilu ġew iddelegati setgħat tal-uffiċjal tal-awtorizzazzjoni skont il-punt (a) tal-Artikolu 65 għandu jinnotifika lill-istituzzjonijiet tal-Unjoni, lill-korpi tal-Unjoni u lil uffiċċji Ewropej oħrajn ikkonċernati dwar ir-riżultati tar-rekords kontabilistiċi msemmijin fil-paragrafu 1 ta’ dan l-Artikolu.

4.Il-kontijiet ta’ kull uffiċċju Ewropew għandhom jifformaw parti integrali mill-kontijiet tal-Unjoni skont l-Artikolu 234.

5.L-uffiċjal tal-kontabilità tal-Kummissjoni, filwaqt li jaġixxi fuq proposta mill-Kumitat ta’ Ġestjoni tal-uffiċċju Ewropew inkwistjoni, jista’ jiddelega lil membru tal-persunal tal-uffiċċju wħud mill-kompiti tiegħu relatati mal-ġbir tad-dħul u mal-ħlas tan-nefqa li jsiru direttament mill-uffiċċju Ewropew inkwistjoni.

6.Biex jintlaħqu r-rekwiżiti tal-flus tal-uffiċċju Ewropew, il-kontijiet tal-bank jew il-kontijiet giro tal-uffiċċju postali jistgħu jinfetħu f’ismu mill-Kummissjoni, li taġixxi fuq proposta mill-Kumitat ta’ Ġestjoni. Il-pożizzjoni tal-likwidità finali għal kull sena tiġi rrikonċiljata u aġġustata bejn l-Uffiċċju Ewropew inkwistjoni u l-Kummissjoni fi tmiem is-sena finanzjarja. 

Taqsima 2
Il-korpi tal-Unjoni

Artikolu 67
Applikabbiltà għall-Aġenzija Fornitriċi tal-Euratom

Dan ir-Regolament japplika għall-implimentazzjoni tal-baġit mill-Aġenzija Fornitriċi tal-Euratom.

Artikolu 68
Aġenziji eżekuttivi

1.Il-Kummissjoni tista’ tiddelega setgħat lill-aġenziji eżekuttivi sabiex jimplimentaw programm jew proġett sħiħ tal-Unjoni jew parti minnu, inklużi proġetti pilota u azzjonijiet preparatorji u l-implimentazzjoni ta’ nefqiet amministrattivi, għan-nom tagħha u taħt ir-responsabbiltà tagħha, skont ir-Regolament tal-Kunsill (KE) Nru 58/2003 ( 36 ). L-aġenziji eżekuttivi jinħolqu permezz ta’ Deċiżjoni tal-Kummissjoni u jkollhom personalità ġuridika skont id-dritt tal-Unjoni. Dawn għandhom jirċievu kontribuzzjoni annwali.

2.Id-diretturi tal-aġenziji eżekuttivi għandhom jaġixxu bħala uffiċjali tal-awtorizzazzjoni b'delega rigward l-implimentazzjoni tal-approprjazzjonijiet operazzjonali relatati mal-programmi tal-Unjoni li jimmaniġġjaw bis-sħiħ jew b’mod parzjali.

3.Il-kumitat ta’ tmexxija tal-aġenziji eżekuttivi jista’ jaqbel mal-Kummissjoni li l-uffiċjal tal-kontabilità tal-Kummissjoni għandu aġixxi wkoll bħala uffiċjal tal-kontabilità tal-aġenzija eżekuttiva. Il-kumitat ta’ tmexxija jista’ jinkariga lill-uffiċjal tal-kontabilità tal-Kummissjoni b’parti mill-kompiti tal-uffiċjal tal-kontabilità tal-aġenzija eżekuttiva wkoll fid-dawl ta’ kunsiderazzjonijiet kostijiet-benefiċċji. Fiż-żewġ każijiet, iridu jsiru l-arranġamenti neċessarji sabiex jevitaw kwalunkwe kunflitt ta’ interessi.

Artikolu 69
Korpi stabbiliti skont it-TFUE u t-Trattat tal-Euratom

1.Il-Kummissjoni tingħata s-setgħa tadotta atti delegati skont l-Artikolu 261 sabiex tissupplimenta r-Regolament Finanzjarju b’regolament finanzjarju qafas għal korpi li jitwaqqfu taħt it-TFUE u t-Trattat tal-Euratom u li għandhom personalità ġuridika u jirċievu kontribuzzjonijiet li jitħallsu mill-baġit.

2.Ir-regolament finanzjarju qafas għandu jkun ibbażat fuq il-prinċipji u r-regoli stabbiliti f’dan ir-Regolament.

3.Ir-regoli finanzjarji ta’ dawk il-korpi ma għandhomx imorru lil hinn mir-regolament finanzjarju ta’ qafas għajr meta l-ħtiġijiet speċifiċi tagħhom jirrikjedu dan u bil-kunsens bil-quddiem tal-Kummissjoni.

4.Il-kwittanza għall-implimentazzjoni tal-baġits tal-korpi msemmija fil-paragrafu 1, għandha tingħata mill-Parlament Ewropew fuq ir-rakkomandazzjoni tal-Kunsill. Il-korpi li hemm riferiment għalihom fil-paragrafu 1 jikkooperaw bis-sħiħ mal-istituzzjonijiet involuti fil-proċedura ta’ kwittanza u jipprovdi, kif xieraq, kwalunkwe informazzjoni addizzjonali meħtieġa, inkluż permezz tal-preżenzjar f’laqgħat tal-korpi rilevanti.

5.L-awditur intern tal-Kummissjoni għandu jeżerċita l-istess setgħat fuq il-korpi msemmija fil-paragrafu 1 bħal dawk eżerċitati fir-rigward tal-Kummissjoni.

6.Awditur indipendenti estern għandu jivverifika li l-kontijiet annwali ta’ kull korp imsemmi fil-paragrafu 1 ta’ dan l-Artikolu jippreżentaw tajjeb id-dħul, in-nefqa, u l-qagħda finanzjarja tal-korp rilevanti qabel il-konsolidazzjoni fil-kontijiet finali tal-Kummissjoni. Sakemm ma jkunx stipulat mod ieħor fl-att bażiku li hemm riferiment għalih fil-paragrafu 1 ta’ dan l-Artikolu, il-Qorti tal-Awdituri tħejji Rapport Annwali Speċifiku dwar kull korp b’konformità mar-rekwiżiti tal-Artikolu 287(1) TFUE. Hi u tħejji dan ir-rapport, il-Qorti tqis ix-xogħol tal-awditjar li jkun għamel l-awditur indipendenti estern u l-azzjoni li tkun ittieħdet b’rispons għal dak li jkun sab l-awditur.

Artikolu 70
Korpi ta’ sħubija pubblika-privata

Il-korpi li għandhom personalità ġuridika u li huma stabbiliti b'att bażiku u fdati bl-implimentazzjoni ta’ sħubija pubblika-privata għandhom jadottaw ir-regoli finanzjarji tagħhom.

Dawn ir-regoli għandhom jinkludu sett ta’ prinċipji meħtieġa sabiex tiġi żgurata ġestjoni finanzjarja tajba tal-fondi tal-Unjoni.

Il-Kummissjoni għandha s-setgħa li tadotta li tadotta atti delegati skont l-Artikolu 261 sabiex dawn jissupplimentaw ir-Regolament Finanzjarju b’regolament finanzjarju mudell li jistabbilixxi l-prinċipji neċessarji sabiex tiġi żgurata ġestjoni finanzjarja tajba tal-fondi tal-Unjoni u li għandu jkun ibbażat fuq l-Artikolu 149.

Ir-regoli finanzjarji ta’ dawk il-korpi ma għandhomx imorru lil hinn mir-regolament finanzjarju ta’ qafas għajr meta l-ħtiġijiet speċifiċi tagħhom jirrikjedu dan u bil-kunsens bil-quddiem tal-Kummissjoni.

Il-paragrafi 2, 3 u 4 tal-Artikolu 69 għandhom japplikaw għal korpi ta’ sħubija pubblika-privata.

KAPITOLU 4
Atturi finanzjarji

TAQSIMA 1
IL-PRINĊIPJU TAS-SEGREGAZZJONI TAD-DMIRIJIET

Artikolu 71
Is-segregazzjoni tad-dmirijiet

1.Id-dmirijiet tal-uffiċjal tal-awtorizzazzjoni u tal-uffiċjal tal-kontabilità għandhom ikunu segregati u esklussivi b’mod reċiproku.

2.Kull istituzzjoni tipprovdi lil kull attur finanzjarju bir-riżorsi meħtieġa sabiex ikun jista’ jaqdi dmirijietu u bi statut li jiddeskrivi l-kompiti, id-drittijiet u l-obbligi tiegħu fid-dettall.

TAQSIMA 2
UFFIĊJAL TAL-AWTORIZZAZZJONI

Artikolu 72
Uffiċjal tal-awtorizzazzjoni

1.Kull istituzzjoni għandha twettaq id-dmirijiet tal-uffiċjal tal-awtorizzazzjoni .

2.Għall-fini ta’ dan it-Titolu, it-terminu “persunal” jirreferi għal persuni koperti mir-Regolamenti tal-Persunal.

3.Kull istituzzjoni għandha tiddelega, b'konformità mal-kundizzjonijiet fir-regoli ta’ proċedura tagħha, id-dmirijiet tal-uffiċjal tal-awtorizzazzjoni lil persunal f'livell adegwat. Fir-regoli amministrattivi interni tagħha għandha tindika l-persunal li lilu tiddelega dawk id-dmirijiet, il-kamp ta’ applikazzjoni tas-setgħat delegati u jekk il-persuni delegati b'dawk is-setgħat jistgħux jissottodelegawhom.

4.Is-setgħat tal-uffiċjal tal-awtorizzazzjoni għandhom jiġu delegati jew sottodelegati biss lill-persunal.

5.L-uffiċjali tal-awtorizzazzjoni responsabbli għandhom jaġixxu fi ħdan il-limiti stabbiliti mill-istrument tad-delega jew tas-sottodelega. L-uffiċjal tal-awtorizzazzjoni kompetenti jista' jkun megħjun minn membru wieħed jew aktar tal-persunal fdat, taħt ir-responsabbiltà tiegħu, bit-twettiq ta’ ċerti operazzjonijiet neċessarji għall-implimentazzjoni tal-baġit u għall-produzzjoni ta’ informazzjoni finanzjarja u dwar il-ġestjoni.

6.Kull istituzzjoni jew kull korp imsemmijin fl-Artikolu 69 għandhom jinformaw lill-Qorti tal-Awdituri, lill-Parlament Ewropew, lill-Kunsill u lill-uffiċjali tal-kontabilità tal-Kummissjoni fi żmien ġimagħtejn dwar il-ħatra u r-rilaxx ta’ uffiċjali tal-awtorizzazzjoni b'delega, ta’ awdituri interni u ta’ uffiċjali tal-kontabilità, u bi kwalunkwe regola interna li jadottaw fir-rigward ta’ kwistjonijiet finanzjarji.

7.Kull istituzzjoni għandha tinforma lill-Qorti tal-Awdituri bil-ħatra tal-amministraturi tal-imprest u bid-deċiżjoni ta’ delega skont l-Artikolu 78 u l-Artikolu 85.

Artikolu 73
Setgħat u dmirijiet tal-uffiċjal tal-awtorizzazzjoni

1.L-uffiċjal tal-awtorizzazzjoni għandu jkun responsabbli f'kull istituzzjoni għall-implimentazzjoni tad-dħul u tan-nefqa b'konformità mal-prinċipji ta’ ġestjoni finanzjarja tajba u sabiex jiżgura l-konformità mar-rekwiżiti ta’ legalità u regolarità u ta’ trattament indaqs tar-riċevituri ta’ programm.

2.Għall-finijiet tal-paragrafu 1 ta’ dan l-Artikolu, l-uffiċjal tal-awtorizzazzjoni b'delega għandu, f'konformità mal-Artikolu 34 u mal-istandards minimi adottati minn kull istituzzjoni u b'kunsiderazzjoni xierqa għar-riskji assoċjati mal-ambjent tal-ġestjoni u għan-natura tal-azzjonijiet iffinanzjati, jistabbilixxi l-istruttura organizzazzjonali u s-sistemi ta’ kontroll intern xierqa għat-twettiq tad-dmirijiet tiegħu. L-istabbiliment ta’ din l-istruttura u ta’ dawn is-sistemi għandu jkun appoġġjat minn analiżi komprensiva tar-riskju, li tqis l-kosteffikaċja tagħhom.

3.Sabiex jimplimenta n-nefqa, l-uffiċjal tal-awtorizzazzjoni responsabbli għandu jieħu impenji baġitarji u legali, għandu jivvalida n-nefqa u jawtorizza l-pagamenti, u għandu jwettaq il-passi prelimenari għall-implimentazzjoni tal-approprjazzjonijiet.

4.L-implimentazzjoni tad-dħul għandha tinkludi l-preparazzjoni tal-istimi tal-ammonti riċevibbli, l-istabbiliment tal-intitolamenti li għandhom jiġu rkuprati u l-ħruġ tal-ordnijiet ta’ rkupru. Fejn xieraq, għandha tinkludi r-rinunzja għal intitolamenti stabbiliti.

5.Kull operazzjoni għandha tkun soġġetta mill-inqas għal kontroll ex ante relatat mal-aspetti operazzjonali u finanzjarji tal-operazzjoni, fuq il-bażi ta’ strateġija ta’ kontroll pluriennali li tqis ir-riskju. L-iskop tal-kontrolli ex ante huwa li jipprevjenu żbalji u irregolaritajiet qabel ma jiġu awtorizzati l-operazzjonijiet.

Il-firxa f’termini tal-frekwenza u tal-intensità tal-kontrolli ex ante għandha tiġi ddeterminata mill-uffiċjal tal-awtorizzazzjoni responsabbli filwaqt li jitqiesu r-riżultati tal-kontrolli preċedenti kif ukoll kunsiderazzjonijiet ibbażati fuq ir-riskji u l-kosteffettività. F’każ ta’ dubju, l-uffiċjal tal-awtorizzazzjoni responsabbli mill-validazzjoni tal-operazzjonijiet rilevanti jitlob informazzjoni komplimentari jew jagħmel kontroll fuq il-post sabiex jikseb assigurazzjoni raġonevoli bħala parti mill-kontroll ex ante.

Għal operazzjoni speċifika, il-verifika għandha ssir minn persunal għajr dak li ta bidu għall-operazzjoni. Il-persunal li jwettaq il-verifiki ma għandux ikun subordinat għall-membri tal-persunal li nedew l-operazzjoni.

6.L-uffiċjal tal-awtorizzazzjoni b’delega jista’ jimplimenta kontrolli ex post sabiex jiġu identifikati u kkoreġuti żbalji u irregolaritajiet jew operazzjonijiet wara li jkunu ġew awtorizzati. Dawn il-kontrolli jistgħu jkunu organizzati fuq bażi ta’ kampjun skont ir-riskju u għandhom iqisu r-riżultati tal-kontrolli preċedenti u kunsiderazzjonijiet dwar il-kosteffettività.

Il-kontrolli ex post għandhom jitwettqu minn membri tal-persunal għajr dawk responsabbli għall-kontrolli ex ante. Il-persunal responsabbli għall-kontrolli ex post ma għandux ikun subordinat għall-membri tal-persunal responsabbli għall-kontrolli ex ante.

Meta l-uffiċjal tal-awtorizzazzjoni b'delega jimplimenta awditjar finanzjarju tal-benefiċjarji bħala kontrolli ex post, ir-regoli tal-awditjar relatati għandhom ikunu ċari, konsistenti u trasparenti, u jirrispettaw id-drittijiet kemm tal-Kummissjoni kif ukoll tal-entitajiet awditjati.

7.L-uffiċjali tal-awtorizzazzjoni responsabbli u l-persunal responsabbli għall-implimentazzjoni tal-baġit għandu jkollhom il-ħiliet professjonali meħtieġa.

F’kull istituzzjoni, l-uffiċjal tal-awtorizzazzjoni għandu jiżgura dawn li ġejjin:

(a)li l-uffiċjali tal-awtorizzazzjoni b’sottodelega u l-persunal tiegħu jirċievu informazzjoni xierqa u aġġornata b’mod regolari dwar l-istandards ta’ kontroll u l-metodi u t-tekniki disponibbli għal dak il-għan;

(b)li ttieħdu miżuri, fejn meħtieġa, sabiex jiġi żgurat il-funzjonament effettiv u effiċjenti tas-sistemi ta’ kontroll skont il-paragrafu 2.

8.Jekk membru tal-persunal, involut fl-amministrazzjoni finanzjarja u fil-kontroll tat-tranżazzjonijiet iqis li deċiżjoni li s-superjur tiegħu jirrikjedi minnu li japplika jew li jaqbel magħha tkun irregolari jew tmur kontra l-prinċipji ta’ ġestjoni finanzjarja tajba jew kontra r-regoli professjonali li dak il-membru tal-persunal huwa obbligat josserva, għandu jinforma lis-superjur ġerarkiku tiegħu b'dan. Jekk il-membru tal-persunal jagħmel dan bil-miktub, is-superjur ġerarkiku għandu jwieġeb bil-miktub. Jekk is-superjur ġerarkiku jonqos milli jieħu azzjoni jew jikkonferma d-deċiżjoni jew l-istruzzjoni inizjali tiegħu u l-membru tal-persunal iqis li tali konferma ma tikkostitwixxix tweġiba raġonevoli għall-problema tiegħu, il-membru tal-persunal għandu jinforma lill-uffiċjal tal-awtorizzazzjoni b'delega bil-miktub. Jekk dak l-uffiċjal ma jwiġibx fi ħdan perjodu ta’ żmien raġonevoli fid-dawl taċ-ċirkustanzi tal-każ u, fi kwalunkwe każ, fi żmien mhux aktar minn xahar, il-membru tal-persunal għandu jgħarraf lill-bord rilevanti msemmi fl-Artikolu 139.

F’każ ta’ xi attività illegali, frodi jew korruzzjoni li jistgħu jkunu ta’ ħsara għall-interessi tal-Unjoni, il-membru tal-persunal għandu jinforma lill-awtoritajiet u lill-korpi nnominati fir-Regolamenti tal-Persunal u fid-deċiżjonijiet tal-istituzzjonijiet tal-Unjoni dwar il-patti u l-kundizzjonijiet għall-investigazzjonijiet interni fir-rigward tal-prevenzjoni ta’ frodi, ta’ korruzzjoni u ta’ kull attività illegali oħra ta’ detriment għall-interessi tal-Unjoni. Il-kuntratti mal-awdituri esterni li jwettqu awditjar tal-ġestjoni finanzjarja tal-Unjoni għandhom jipprevedu obbligu tal-awditur estern biex jinforma lill-uffiċjal tal-awtorizzazzjoni b'delega bi kwalunkwe suspett ta’ attività illegali, ta’ frodi jew ta’ korruzzjoni li tista' tippreġudika l-interessi tal-Unjoni.

9.L-uffiċjal tal-awtorizzazzjoni b'delega għandu jirrapporta lill-istituzzjoni tiegħu dwar it-twettiq tad-dmirijiet tiegħu fil-forma ta’ rapport tal-attività annwali, li fih informazzjoni finanzjarja u tal-ġestjoni, inklużi r-riżultati tal-kontrolli, u li jiddikjara li, minbarra kif speċifikat mod ieħor fi kwalunkwe riżerva marbuta ma’ oqsma definiti ta’ dħul u nefqa, għandu assigurazzjoni raġonevoli li:

(a)l-informazzjoni li hemm fir-rapport tippreżenta stampa vera u ġusta;

(b)ir-riżorsi assenjati lill-attivitajiet deskritti fir-rapport intużaw għall-finijiet intenzjonati tagħhom u f’konformità mal-prinċipji tal-ġestjoni finanzarja tajba;

(c)il-proċeduri ta’ kontroll implimentati jagħtu l-garanziji meħtieġa dwar il-legalità u r-regolarità tat-tranżazzjonijiet sottostanti.

Ir-rapport annwali tal-attività għandu jinkludi informazzjoni dwar l-operazzjonijiet imwettqin, b'referenza għall-objettivi stabbiliti fil-pjanijiet strateġiċi, ir-riskji assoċjati ma’ dawk l-operazzjonijiet, l-użu li sar mir-riżorsi pprovduti u l-effiċjenza u l-effettività tas-sistemi ta’ kontroll intern. Dan jinkludi valutazzjoni kumplessiva tal-kostijiet u tal-benefiċċji tal-kontrolli u tal-informazzjoni dwar kemm in-nefqa operazzjonali awtorizzata tikkontribwixxi għall-ilħuq tal-objettivi strateġiċi tal-UE u tiġġenera valur miżjud tal-UE. Il-Kummissjoni għandha tħejji sommarju tar-rapporti annwali tal-attività għas-sena preċedenti.

10.L-uffiċjal tal-awtorizzazzjoni b'delega għandu jirreġistra, għal kull sena finanzjarja, il-kuntratti konklużi permezz tal-proċeduri nnegozjati msemmija fil-punti minn (a) sa (f) tal-punt 11.1 u l-punt 39 tal-Anness għal dan ir-Regolament. Jekk il-proporzjon ta' proċeduri nnegozjati fir-rigward tal-għadd ta' kuntratti mogħtija mill-istess uffiċjal tal-awtorizzazzjoni b'delega jiżdied b'mod sinifikanti meta mqabbel mas-snin ta' qabel jew jekk dak il-proporzjon ikun ogħla sew mill-medja rrekordjata għal dik l-istituzzjoni, l-uffiċjal tal-awtorizzazzjoni responsabbli għandu jirrapporta lill-istituzzjoni u jistabbilixxi miżuri meħudin sabiex ireġġa’ lura dik ix-xejra. Kull istituzzjoni tibgħat rapport dwar il-proċeduri nnegozjati lill-Parlament Ewropew u lill-Kunsill. Fil-każ tal-Kummissjoni, dak ir-rapport għandu jkun mehmuż mas-sommarju tar-rapporti annwali tal-attività msemmija fil-paragrafu 9 ta’ dan l-Artikolu.

Artikolu 74
Iż-żamma ta’ dokumenti ta’ sostenn mill-uffiċjali tal-awtorizzazzjoni

L-uffiċjal tal-awtorizzazzjoni għandu jistabbilixxi sistemi elettroniċi jew ibbażati fuq karta għaż-żamma ta’ dokumenti ta’ sostenn oriġinali relatati ma’ u sussegwenti għall-implimentazzjoni tal-baġit u miżuri għall-implimentazzjoni tal-baġit. Tali dokumenti għandhom jinżammu għal mill-inqas ħames snin minn meta l-Parlament Ewropew jagħti l-kwittanza għas-sena baġitarja marbuta mad-dokumenti.

Id-dokumenti relatati ma’ operazzjonijiet li jkunu għadhom mhumiex magħluqin għal kollox jinżammu sal-aħħar tas-sena ta’ wara dik li fiha jingħalqu l-operazzjonijiet.

Id-dejta personali inkluża fid-dokumenti ta’ sostenn għandha titħassar, fejn possibbli, meta dik id-dejta ma tkunx neċessarja għall-finijiet ta’ kwittanza baġitarja, ta’ kontroll u ta’ awditjar. L-Artikolu 37(2) tar-Regolament (KE) Nru 45/2001 japplika għall-konservazzjoni tad-dejta dwar it-traffiku.

Artikolu 75
Setgħet u dmirijiet tal-Kapijiet tad-Delegazzjonijiet tal-Unjoni

1.Meta l-Kapijiet tad-delegazzjonijiet tal-Unjoni jaġixxu bħala uffiċjali tal-awtorizzazzjoni b'sottodelega skont l-Artikolu 58(2) , huma għandhom ikunu soġġetti għall-Kummissjoni bħala l-istituzzjoni responsabbli għad-definizzjoni, għall-eżerċizzju, għall-monitoraġġ u għall-valutazzjoni tad-dmirijiet u tar-responsabbiltajiet tagħhom bħala uffiċjali tal-awtorizzazzjoni b’sottodelega u jikkooperaw mill-qrib mal-Kummissjoni fir-rigward tal-implimentazzjoni xierqa tal-fondi, sabiex tiġi żgurata b'mod partikolari l-legalità u r-regolarità tat-tranżazzjonijiet finanzjarji, ir-rispett għall-prinċipju tal-ġestjoni finanzjarja tajba fil-ġestjoni tal-fondi u l-ħarsien effettiv tal-interessi finanzjarji tal-Unjoni. Għandhom ikunu soġġetti għar-Regoli Interni tal-Kummissjoni u għall-Istatut tal-Kummissjoni għall-implimentazzjoni tal-kompiti ta’ ġestjoni finanzajrja sottodelegati lilhom. Huma jistgħu jkunu assistiti fi dmirijiethom mill-persunal tal-Kummissjoni.

Għal dan il-għan, huma għandhom jieħdu l-miżuri meħtieġa sabiex jipprevjenu kwalunkwe sitwazzjoni li tista' tqiegħed fil-periklu r-responsabbiltà tal-Kummissjoni għall-implimentazzjoni tal-baġit sottodelegat lilhom kif ukoll kwalunkwe kunflitt ta’ prijoritajiet li x'aktarx ikollu impatt fuq l-implimentazzjoni tal-kompiti tal-ġestjoni finanzjarja sottodelegati lilhom.

Meta jinqalgħu sitwazzjoni jew kunflitt tat-tip imsemmi fit-tieni subparagrafu, il-Kapijiet tad-delegazzjonijiet tal-Unjoni għandhom jgħarrfu b'dan mingħajr dewmien lid-Diretturi Ġenerali responsabbli tal-Kummissjoni u tas-SEAE. Dawk id-Diretturi Ġenerali għandhom jieħdu passi xierqa biex isibu soluzzjoni għas-sitwazzjoni.

2.Meta Kapijiet tad-delegazzjonijiet tal-Unjoni jsibu rwieħhom f'sitwazzjoni kif imsemmija fl-Artikolu 73(8), huma għandhom jirreferu l-kwistjoni lill-bord imsemmi fl-Artikolu 139. Fil-każ ta’ kwalunkwe attività illegali, frodi jew korruzzjoni li tista' tkun ta’ ħsara għall-interessi tal-Unjoni, huma għandhom jinfurmaw lill-awtoritajiet u lill-korpi nnominati mil-leġislazzjoni applikabbli.

3.Kapijiet tad-delegazzjonijiet tal-Unjoni li jkunu qed jaġixxu bħala uffiċjali tal-awtorizzazzjoni b'sottodelega skont l-Artikolu 58(2) għandhom jagħmlu rapporti lill-uffiċjal tal-awtorizzazzjoni b'delega tagħhom sabiex dan ikun jista' jintegra r-rapporti tagħhom fir-rapport annwali ta’ attività tiegħu msemmi fl-Artikolu 73(9). Ir-rapporti tal-Kapijiet tad-delegazzjonijiet tal-Unjoni għandhom jinkludu informazzjoni dwar l-effiċjenza u l-effikaċja tas-sistemi ta’ kontroll interni stabbiliti fid-delegazzjoni tagħhom, kif ukoll dwar il-ġestjoni ta’ operazzjonijiet sottodelegati lilhom, u jipprovdu l-assigurazzjoni msemmija fit-tielet subparagrafu tal- Artikolu 89(5) . Dawk ir-rapporti għandhom jiġu mehmuża bħala annessi mar-rapport annwali tal-attività tal-uffiċjal tal-awtorizzazzjoni b'delega, u għandhom ikunu disponibbli għall-Parlament Ewropew u l-Kunsill b'kont dovut meħud, fejn ikun xieraq, tal-kunfidenzjalità tagħhom.

Il-Kapijiet tad-delegazzjonijiet tal-Unjoni għandhom jikkoperaw b'mod sħiħ mal-istituzzjonijiet involuti fil-proċedura ta’ kwittanza u jipprovdu, kif xieraq, kwalunkwe informazzjoni addizzjonali neċessarja. F'dan il-kuntest, jistgħu jintalbu jattendu laqgħat tal-korpi rilevanti u jassistu lill-uffiċjal tal-awtorizzazzjoni responsabbli b'delega.

Kapijiet tad-delegazzjonijiet tal-Unjoni li jaġixxu bħala uffiċjali tal-awtorizzazzjoni b'sottodelega skont l- Artikolu 58 għandhom iwieġbu għal kwalunkwe talba mill-uffiċjal tal-awtorizzazzjoni b'delega tal-Kummissjoni fuq talba tagħha stess jew, fil-kuntest tal-kwittanza, fuq talba mill-Parlament Ewropew.

Il-Kummissjoni għandha tiżgura li s-setgħat sottodelegati mhumiex ta’ detriment għall-proċedura ta’ kwittanza, skont l-Artikolu 319 TFUE .

4.Il-paragrafi 1, 2 u 3 għandhom japplikaw ukoll għad-deputati Kapijiet tad-delegazzjonijiet tal-Unjoni meta jaġixxu bħala uffiċjali tal-awtorizzazzjoni b’sottodelega fin-nuqqas tal-Kapijiet tad-delegazzjonijiet tal-Unjoni.

TAQSIMA 3
UFFIĊJAL TAL-KONTABILITÀ

Artikolu 76
Setgħat u dmirijiet tal-uffiċjal tal-kontabilità

Kull istituzzjoni għandha tappunta uffiċjal tal-kontabilità li għandu jkun responsabbli f'kull istituzzjoni għal dan li ġej:

(a)l-implimentazzjoni adegwata tal-pagamenti, il-ġbir tad-dħul u l-irkupru tal-ammonti stabbiliti bħala riċevibbli;

(b)il-preparazzjoni u l-preżentazzjoni tal-kontijiet skont it-Titolu XIII;

(c)iż-żamma tal-kontijiet skont l-Artikoli 80 u 81;

(d)l-istabbiliment tar-regoli kontabilistiċi, tal-proċeduri u tat-tabella tal-kontijiet skont l-Artikoli 79 sa 81;

(e)l-istabbiliment u l-validazzjoni tas-sistemi kontabilistiċi u, fejn xieraq, il-validazzjoni tas-sistemi stabbiliti mill-uffiċjal tal-awtorizzazzjoni maħsuba sabiex ifornu jew jiġġustifikaw l-informazzjoni kontabilistika; f'dan ir-rigward l-uffiċjal tal-kontabilità jingħata s-setgħa li fi kwalunkwe waqt jivverifika r-rispett tal-kriterji ta’ validazzjoni;

(f)l-immaniġġjar ta’ flus.

Ir-responsabbiltajiet tal-uffiċjal tal-kontabilità tas-SEAE għandhom jikkonċernaw biss it-taqsima tas-SEAE tal-baġit kif implimentat mis-SEAE. L-uffiċjal tal-kontabilità tal-Kummissjoni għandu jibqa' responsabbli għat-taqsima tal-Kummissjoni tal-baġit kollha kemm hi, inklużi l-operazzjonijiet ta’ kontabilità li jirrigwardaw l-approprjazzjonijiet mgħoddija b'sottodelega lill-Kapijiet tad-delegazzjonijiet tal-Unjoni.

L-uffiċjal tal-kontabilità tal-Kummissjoni għandu jaġixxi wkoll bħala l-uffiċjal tal-kontabilità tas-SEAE fir-rigward tal-implimentazzjoni tat-taqsima tas-SEAE tal-baġit.

Artikolu 77
Il-ħatra u t-terminazzjoni tad-dmirijiet tal-uffiċjal tal-kontabilità

1.Kull istituzzjoni għandha taħtar uffiċjal tal-kontabilità mill-uffiċjali soġġetti għar-Regolamenti tal-Persunal għall-Uffiċjali tal-Unjoni Ewropea.

L-uffiċjal tal-kontabilità jintgħażel mill-istituzzjoni fuq il-bażi tal-kompetenza partikolari tiegħu kif murija minn diplomi jew minn esperjenza professjonali ekwivalenti.

2.Jista’ jkun hemm żewġ istituzzjonijiet jew korpi jew aktar li jaħtru l-istess uffiċjal tal-kontabilità.

F’każ bħal dan, huma jagħmlu l-arranġamenti meħtieġa sabiex jevitaw kwalunkwe kunflitt ta’ interess.

3.Irid jitħejja bilanċ ta’ tqabbil preliminari mingħajr dewmien f’każ ta’ tmiem tad-dmirijiet tal-uffiċjal tal-kontabilità.

4.Il-bilanċ ta’ tqabbil preliminari akkumpanjat minn rapport tat-trażmissjoni tal-inkarigu jintbagħat mill-uffiċjal tal-kontabilità li jkun qiegħed itemm id-dmirijiet tiegħu jew, jekk dan ma jkunx possibbli, minn uffiċjal fid-dipartiment tiegħu lill-uffiċjal tal-kontabilità l-ġdid.

L-uffiċjal tal-kontabilità l-ġdid għandu jiffirma l-bilanċ ta’ tqabbil preliminari b’aċċettazzjoni fi żmien xahar mid-data tat-trażmissjoni u dan jista’ jagħmel riservi.

Ir-rapport tat-trażmissjoni tal-inkarigu għandu jinkludi wkoll ir-riżultat tal-bilanċ ta’ tqabbil preliminari u kull riserva li ssir.

Artikolu 78
Setgħat li jistgħu jiġi ddelegati mill-uffiċjal tal-kontabilità

L-uffiċjal tal-kontabilità jista', fit-twettiq tad-doveri tiegħu, jiddelega ċerti kompiti lil persunal subordinat u lil amministraturi tal-imprest maħturin skont l-Artikolu 86(1).

L-istrument tad-delega għandu jistabbilixxi dawk il-kompiti.

Artikolu 79
Regoli kontabilistiċi

1.Ir-regoli kontabilistiċi li jridu jiġu applikati mill-istituzzjonijiet kollha tal-Unjoni, mill-uffiċċji Ewropej imsemmijin fit-Taqsima 1 tal-Kapitolu 3 ta’ dan it-Titolu u mill-korpi tal-Unjoni msemmijin fl-Artikolu 234 għandhom ikunu bbażati fuq standards kontabilistiċi aċċettati f’livell internazzjonali għas-settur pubbliku. Dawk ir-regoli għandhom jiġu adottati mill-uffiċjal tal-kontabilità tal-Kummissjoni wara konsultazzjoni mal-uffiċjali tal-kontabilità ta’ istituzzjonijiet tal-Unjoni, ta’ uffiċċji Ewropej u ta’ korpi tal-Unjoni oħrajn.

2.L-uffiċjal tal-kontabilità jista’ jiddevja minn dawk l-istandards jekk iqis li dan ikun meħtieġ għal preżentazzjoni ġusta tal-assi u tal-obbligazzjonijiet, tal-miżati, tad-dħul u tal-fluss tal-flus. Meta regola kontabilistika tiddevja materjalment minn dawk l-istandards, in-noti għad-dikjarazzjonijiet finanzjarji għandhom jiżvelaw dan il-fatt u r-raġunijiet għal dan.

3.Ir-regoli kontabilistiċi msemmijin fil-paragrafu 1 għandhom jistabbilixxu l-istruttura u l-kontenut tad-dikjarazzjonijiet finanzjarji, kif ukoll il-prinċipji kontabilistiċi sottostanti għall-kontijiet.

4.Il-kontijiet baġitarji msemmijin fl-Artikolu 234 għandhom jikkonformaw mal-prinċipji tal-baġit stipulati f'dan ir-Regolament. Għandhom jipprovdu rekord dettaljat tal-implimentazzjoni tal-baġit. Għandhom jirrekordjaw l-operazzjonijiet baġitarji kollha tad-dħul u n-nefqa stipulati f’dan it-Titolu u jagħtu preżentazzjoni ġusta tagħhom.

Artikolu 80
Iż-żamma tal-kontijiet

1.L-uffiċjal tal-kontabilità tal-Kummissjoni għandu jkun responsabbli sabiex jistabbilixxi t-tabelli armonizzati tal-kontijiet li jridu jiġu applikati mill-istituzzjonijiet kollha tal-Unjoni, mill-uffiċċji Ewropej imsemmijin fit-Taqsima 1 tal-Kapitolu 3 ta’ dan it-Titolu u mill-korpi tal-Unjoni msemmijin fl-Artikolu 234.

2.L-uffiċjali tal-kontabilità għandu jikseb mingħand l-uffiċjali tal-awtorizzazzjoni li l-informazzjoni kollha meħtieġa għall-produzzjoni ta’ kontijiet li jagħtu preżentazzjoni ġusta tas-sitwazzjoni finanzjarja tal-istituzzjonijiet u tal-implimentazzjoni baġitarja. L-uffiċjali tal-awtorizzazzjoni għandu jiggarantixxi l-affidabbiltà ta’ tali informazzjoni.

3.Qabel l-adozzjoni tal-kontijiet mill-istituzzjoni, jew korp imsemmi fl- Artikolu 69, l-uffiċjal tal-kontabilità għandu jiffirmahom u b'hekk jiċċertifika li huwa għandu assigurazzjoni raġonevoli li l-kontijiet jagħtu preżentazzjoni ġusta tas-sitwazzjoni finanzjarja tal-istituzzjoni jew tal-korp imsemmijin fl- Artikolu 69.

Għal dak il-fini, l-uffiċjal tal-kontabilità għandu jivverifika li l-kontijiet tħejjew skont ir-regoli msemmija fl- Artikolu 79 u l-proċeduri kontabilistiċi, imsemmija fil-punt (d) tal-ewwel subparagrafu tal-Artikolu 76, u li d-dħul u n-nefqa kollha jkunu ddaħħlu fil-kontijiet.

4.L-uffiċjal tal-awtorizzazzjoni b’delega għandu jibgħat lill-uffiċjal tal-kontabilità, skont ir-regoli adottati minn dan tal-aħħar, kwalunkwe informazzjoni finanzjarja u dwar il-ġestjoni li tkun meħtieġa għall-qadi tad-dmirijiet tal-uffiċjal tal-kontabilità.

L-uffiċjal tal-kontabilità għandu jiġi informat mill-uffiċjal tal-awtorizzazzjoni , regolarment u mill-inqas għall-għeluq tal-kontijiet, dwar id-dejta finanzjarja rilevanti tal-kontijiet bankarji fiduċjarji sabiex jippermetti li l-użu tal-fondi tal-Unjoni jkun rifless fil-kontijiet tal-Unjoni.

L-uffiċjali tal-awtorizzazzjoni għandhom jibqgħu totalment responsabbli għall-użu xieraq tal-fondi li jamministraw, il-legalità u r-regolarità tan-nefqa taħt il-kontroll tagħhom u l-kompletezza u l-akkuratezza tal-informazzjoni mgħoddija lill-uffiċjal tal-kontabilità.

5.L-uffiċjal tal-awtorizzazzjoni responsabbli għandu jinnotifika lill-uffiċjal tal-kontabilità dwar l-iżviluppi jew il-modifiki sinifikanti kollha ta’ sistema ta’ ġestjoni finanzjarja, ta’ sistema ta’ inventarju jew ta’ sistema għall-valutazzjoni tal-assi u tal-obbligazzjonijiet, jekk din tipprovdi dejta għall-kontijiet tal-istituzzjoni jew tintuża biex tissostanzja d-dejta tagħha, sabiex l-uffiċjal tal-kontabilità jkun jista’ jivverifika l-konformità mal-kriterji tal-validazzjoni.

Fi kwalunkwe waqt, l-uffiċjal tal-kontabilità jista’ jerġa’ jeżamina sistema ta’ ġestjoni finanzjarja diġà vvalidata u jista’ jitlob li l-uffiċjal tal-awtorizzazzjoni responsabbli jistabbilixxi pjan ta’ azzjoni sabiex jikkoreġi, b’mod puntwali, id-dgħjufijiet possibbli.

L-uffiċjal tal-awtorizzazzjoni responsabbli għandu jkun responsabbli għall-kompletezza tal-informazzjoni trażmessa lill-uffiċjal tal-kontabilità.

6.L-uffiċjal tal-kontabilità għandu jingħata s-setgħa jikkontrolla l-informazzjoni li jirċievi kif ukoll li jwettaq kwalunkwe kontroll ieħor li jqis neċessarju sabiex jiffirma l-kontijiet.

L-uffiċjal tal-kontabilità għandu jagħmel riżervi, jekk ikunu meħtieġa, li jispjegaw eżattament in-natura u l-ambitu ta' tali riżervi.

7.Is-sistema kontabilistika ta’ istituzzjoni għandha sservi għall-organizzazzjoni tal-informazzjoni tal-baġit u tal-finanzi b'tali mod li ċ-ċifri jkunu jistgħu jiddaħlu, jinħażnu u jiġu rreġistrati.

8.Is-sistema kontabilistika għandha tikkonsisti fil-kontijiet ġenerali u fil-kontijiet baġitarji. Il-kontijiet jinżammu f'euro fuq il-bażi tas-sena kalendarja.

9.L-uffiċjal tal-awtorizzazzjoni b’delega jista’ jżomm ukoll kontijiet tal-ġestjoni dettaljati.

10.Id-dokumenti ta’ sostenn għas-sistema kontabilistika u għat-tħejjija tal-kontijiet imsemmija fl- Artikolu 234 għandhom jinżammu għal mill-anqas ħames snin minn meta l-Parlament Ewropew jagħti l-kwittanza għas-sena baġitarja li dwarha jkunu d-dokumenti.

Madankollu, id-dokumenti relatati ma’ operazzjonijiet li jkunu għadhom mhumiex magħluqin għalkollox għandhom jinżammu sal-aħħar tas-sena ta’ wara dik li fiha jingħalqu l-operazzjonijiet. L-Artikolu 37(2) tar-Regolament (KE) Nru 45/2001 għandu japplika għall-konservazzjoni tad-dejta dwar it-traffiku.

Artikolu 81
Kontijiet ġenerali

1.Il-kontijiet ġenerali għandhom jirreġistraw, fl-ordni kronoloġika, bl-użu tal-metodu tal-kontroentrati, l-avvenimenti u l-operazzjonijiet kollha li jaffettwaw is-sitwazzjoni ekonomika u finanzjarja u l-assi u l-obbligazzjonijiet tal-istituzzjonijiet u tal-korpi msemmija fl-Artikolu 234.

2.Il-bilanċi u ċ-ċaqliq fil-kontijiet ġenerali għandhom jiddaħħlu fil-kotba tal-kontijiet.

3.L-entrati kontabilistiċi kollha, inklużi l-aġġustamenti għall-kontijiet, għandhom ikunu bbażati fuq id-dokumenti ta’ sostenn, li għandhom jirreferu għalihom l-entrati.

4.Is-sistema kontabilistika għandha tkun tali li tħalli rekord tal-awditjar ċar għall-entrati kontabilistiċi kollha.

Artikolu 82
Kontijiet bankarji

1.Għall-ħtiġijiet tal-immaniġġar ta’ flus, l-uffiċjal tal-kontabilità jista’ jiftaħ kontijiet f’isem l-istituzzjoni ma’ istituzzjonijiet finanzjarji jew ma’ banek ċentrali nazzjonali jew jara li jinfetħu kontijiet bħal dawn. L-uffiċjal tal-kontabilità għandu jkun responsabbli wkoll għall-għeluq ta’ dawk il-kontijiet jew għall-iżgurar li jingħalqu.

2.It-termini li jirregolaw il-ftuħ, l-operat u l-użu tal-kontijiet għandhom jistabbilixxu li, skont il-ħtiġijiet tal-kontroll intern, ċekkijiet, ordnijiet ta’ trasferiment ta’ kreditu bankarju u kwalunkwe operazzjoni bankarja oħra, iridu jiġu ffirmati minn membru wieħed jew aktar tal-persunal awtorizzat. L-istruzzjonijiet manwali jiġu ffirmati minn tal-anqas żewġ membri tal-persunal li jkunu awtorizzati biex jiffirmaw, jew mill-uffiċjal tal-kontabilità nnifsu.

3.Fi ħdan l-implimentazzjoni tal-programm jew azzjoni, jistgħu jinfetħu kontijiet fiduċjarji għan-nom tal-Kummissjoni sabiex tkun possibbli l-ġestjoni tagħhom minn entità skont il-punti (ii), (iii), (v) jew (vi) tal- Artikolu 61(1)(c) .

Tali kontijiet għandhom jinfetħu taħt ir-responsabbiltà tal-uffiċjal tal-awtorizzazzjoni responsabbli mill-implimentazzjoni tal-programm jew azzjoni bi qbil mal-uffiċjal tal-kontabilità tal-Kummissjoni.

Tali kontijiet huma ġestiti taħt ir-responsabbiltà tal-uffiċjal tal-awtorizzazzjoni .

4.L-uffiċjal tal-kontabilità tal-Kummissjoni għandu jistabbilixxi r-regoli għall-ftuħ, il-ġestjoni u l-għeluq tal-kontijiet fiduċjarji u l-użu tagħhom.

Artikolu 83
Immaniġġar ta’ flus

1.Sakemm ma jkunx stipulat mod ieħor f'dan ir-Regolament, l-uffiċjal tal-kontabilità biss għandu jkollu s-setgħa li jamministra l-flus kontanti u l-ekwivalenti għall-flus kontanti. L-uffiċjal tal-kontabilità għandu jkun responsabbli għall-kustodja tagħhom.

2.L-uffiċjal tal-kontabilità għandu jara li l-istituzzjoni tiegħu għandha għad-dispożizzjoni tagħha biżżejjed fondi sabiex tkopri r-rekwiżiti ta’ flus li jirriżultaw mill-implimentazzjoni baġitarja fi ħdan id-dispożizzjonijiet tal-qafas regolatorju applikabbli u għandu jistabbilixxi proċeduri sabiex jiżgura li l-ebda wieħed mill-kontijiet miftuħin skont l-Artikolu 82(1) u l-Artikolu 86(2) ma jkun midjun.

3.Il-pagamenti għandhom isiru bi trasferiment ta’ kreditu bankarju, b’ċekk jew minn kontijiet għall-antiċipi, jew jekk dan ikun awtorizzat b’mod speċifikat mill-Uffiċjal tal-Kontabilità, b’karta ta’ debitu, b’debitu dirett jew inkella b’mezzi oħrajn ta’ ħlas, skont ir-regoli stabbiliti mill-uffiċjal tal-kontabilità.

4.L-uffiċjal tal-kontabilità jista’ jagħmel ħlasijiet biss jekk l-ewwel l-entità legali u d-dettalji tal-ħlas tal-benefiċjarju jkunu ddaħħlu f’fajl komuni minn istituzzjoni li huwa responsabbli għaliha.

Qabel ma jidħol f’impenn ma’ parti terza, l-uffiċjal tal-awtorizzazzjoni għandu jistabbilixxi l-entità legali u d-dettalji tal-ħlas tal-benefiċjarji u jdaħħalhom fil-fajl komuni tal-istituzzjoni li l-uffiċjal tal-kontabilità huwa responsabbli għaliha sabiex jiġu żgurati trasparenza, responsabbiltà u implimentazzjoni korretta tal-ħlas.

L-uffiċjali tal-awtorizzazzjoni għandhom jinformaw lill-uffiċjal tal-kontabilità dwar kwalunkwe bidla fid-dettalji legali u tal-ħlas ikkomunikati lilhom mill-benefiċjarju u għandhom jiċċekkjaw li dawn id-dettalji jkunu għadhom validi qabel ma jawtorizzaw xi ħlas.

Artikolu 84
L-inventarju tal-assi

1.L-istituzzjonijiet u l-korpi tal-Unjoni kollha msemmijin fl-Artikolu 234 għandhom iżommu inventarji li juru l-kwantità u l-valur tal-assi kollha tal-Unjoni, tanġibbli, mhux tanġibbli u finanzjarji, b'konformità ma’ mudell imħejji mill-uffiċjal tal-kontabilità tal-Kummissjoni.

L-istituzzjonijiet u l-korpi tal-Unjoni kollha msemmijin fl-Artikolu 234 għandhom jivverifikaw li l-entrati fl-inventarju jikkorrispondu għas-sitwazzjoni attwali.

L-oġġetti kollha miksuba b’perjodu ta’ użu ta’ aktar minn sena, li mhumiex konsumabbli, u li l-prezz tax-xiri jew il-kost tal-produzzjoni tagħhom ikun ogħla minn dak indikat fil-proċeduri kontabilistiċi msemmijin fl-Artikolu 76 għandhom jiddaħħlu fl-inventarju u jiġu rrekordjati fil-kontijiet tal-assi fissi.

2.Il-bejgħ tal-assi tanġibbli tal-Unjoni għandu jkun reklamat kif xieraq.

3.Kull istituzzjoni u korp tal-Unjoni msemmijin fl-Artikolu 234 għandhom jadottaw dispożizzjonijiet dwar is-salvagwardja tal-assi inklużi fil-karti tal-bilanċ rispettivi tagħhom u jiddeċiedu liema dipartimenti amministrattivi huma responsabbli għas-sistema tal-inventarji.

TAQSIMA 4
AMMINISTRATUR TAL-IMPREST

Artikolu 85
Kontijiet għall-antiċipi

1.Il-kontijiet għall-antiċipi jistgħu jitwaqqfu għall-ġbir ta’ dħul għajr riżorsi proprji u għall-ħlas tan-nefqa fejn, minħabba l-ammonti limitati involuti, ikun materjalment impossibbli jew ineffiċjenti li jitwettqu operazzjonijiet ta’ ħlas bi proċeduri baġitarji.

Madankollu, fil-qasam tal-għajnuna għall-immaniġġjar ta’ kriżijiet u tal-operazzjonijiet ta’ għajnuna umanitarja, il-kontijiet għall-antiċipi jistgħu jintużaw mingħajr ebda limitu fuq l-ammont waqt li jirrispettaw il-livell ta’ approprjazzjonijiet deċiż mill-Parlament Ewropew u mill-Kunsill dwar il-linja baġitarja li tikkorrispondi għas-sena finanzjarja attwali u skont ir-regoli interni tal-Kummissjoni.

Fid-delegazzjonijiet tal-Unjoni, il-kontijiet għall-antiċipi jistgħu jintużaw ukoll sabiex jiġu eżegwiti ħlasijiet, ta’ ammonti limitati, bi proċeduri baġitarji, jekk tali użu jkun effiċjenti u effettiv minħabba l-ħtieġa lokali.

2.Fid-delegazzjonijiet tal-Unjoni, għandhom jiġu stabbiliti kontijiet għall-antiċipi għall-ħlas tan-nefqa kemm mit-taqsima tal-baġit tal-Kummissjoni kif ukoll mit-taqsima tal-baġit tas-SEAE, sabiex tiġi żgurata t-traċċabilità sħiħa tan-nefqa.

Artikolu 86
Il-ħolqien u l-amministrazzjoni tal-kontijiet għall-antiċipi

1.Il-ħolqien ta’ kont għall-antiċipi u l-ħatra ta’ amministratur tal-imprest għandhom ikunu soġġetti għal deċiżjoni mill-uffiċjal tal-kontabilità tal-istituzzjoni, fuq proposta debitament issostanzjata mill-uffiċjal tal-awtorizzazzjoni responsabbli. Dik id-deċiżjoni tistabbilixxi r-responsabbiltajiet u l-obbligi rispettivi tal-amministratur tal-imprest u tal-uffiċjal tal-awtorizzazzjoni .

L-amministraturi tal-imprest għandhom jintgħażlu minn uffiċjali jew, jekk ikun hemm bżonn u f’każijiet issostanzjati kif xieraq biss, minn membri oħrajn tal-persunal jew soġġetti għal-limiti stabbiliti fir-regoli interni tal-Kummissjoni minn persunal imħaddem mill-Kummissjoni fil-qasam ta’ operazzjonijiet ta’ għajnuna għall-immaniġġjar ta’ kriżijiet u ta’ għajnuna umanitarja diment li l-kuntratt ta’ impjieg tiegħu ikun jiggarantixxi livell ekwivalenti ta’ protezzjoni f’termini ta’ responsabbiltà bħal dak applikabbli għall-persunal skont l-Artikolu 93. L-amministraturi tal-imprest għandhom jintgħażlu fuq il-bażi tal-għarfien, tal-ħiliet u tal-kwalifiki partikolari tagħhom kif murija minn diplomi jew minn esperjenza professjonali xierqa, jew wara li jattendu programm ta’ taħriġ xieraq.

Meta jiddeċiedi li joħloq kont għall-antiċipi, uffiċjal tal-kontabilità għandu jispeċifika l-patti operazzjonali u l-kundizzjonijiet għall-użu tal-kont għall-antiċipi.

L-emendar tal-patti operazzjonali għal kont għall-antiċipi għandu jkun soġġett ukoll għal deċiżjoni mill-uffiċjal tal-kontabilità fuq proposta ssostanzjata kif xieraq mill-uffiċjal tal-awtorizzazzjoni responsabbli.

2.Il-kontijiet tal-bank għall-impest għandhom jinfetħu mill-uffiċjal tal-kontabilità, li għandu jawtorizza wkoll firem delegati fuqhom fuq il-bażi ta’ proposta ġġustifikata mill-uffiċjal tal-awtorizzazzjoni .

3.Il-kontijiet għall-antiċipi għandhom ikunu dotati mill-uffiċjal tal-kontabilità tal-istituzzjoni u għandhom jitpoġġew taħt ir-responsabbiltà ta’ amministraturi tal-imprest.

4.Il-pagamenti li jsiru jiġu segwiti minn deċiżjonijiet formali ta’ validazzjoni finali u/jew minn ordnijiet ta’ pagament iffirmati mill-uffiċjal tal-awtorizzazzjoni responsabbli.

It-tranżazzjonijiet tal-imprest għandhom jiġu saldati mill-uffiċjal tal-awtorizzazzjoni sa mhux aktar tard mill-aħħar tax-xahar ta’ wara, sabiex b’hekk ikunu jistgħu jiġu rikonċiljati l-bilanċ tal-kontijiet u l-bilanċ fil-bank.

5.L-uffiċjal tal-kontabilità għandu jwettaq, jew iqabbad lil membru tal-persunal fid-dipartiment tiegħu jew fid-dipartiment tal-awtorizzazzjoni mogħti setgħat speċjali għal dak il-għan sabiex iwettaq, kontrolli, li bħala regola ġenerali għandhom isiru fuq il-post u, fejn xieraq, mingħajr ebda twissija, sabiex tiġi vverifikata l-eżistenza tal-fondi allokati lill-amministraturi tal-imprest u ż-żamma tal-kotba u sabiex jiġi vverifikat li t-tranżazzjonijiet tal-imprest ikunu saru saż-żmien stipulat. L-uffiċjal tal-kontabilità għandu jikkomunika s-sejbiet ta’ dawk il-kontrolli lill-uffiċjal tal-awtorizzazzjoni responsabbli.

KAPITOLU 5
Responsabbiltà tal-atturi finanzjarji

TAQSIMA 1
REGOLI ĠENERALI

Artikolu 87
Irtirar ta’ delegi u sospensjoni tal-kompiti mogħtija lill-atturi finanzjarji

1.Fi kwalunkwe waqt, l-awtorità li taħtar lill-uffiċjali tal-awtorizzazzjoni responsabbli tista’ tneħħi d-delega jew is-sottodelega ta’ dawn b’mod temporanju jew definittiv.

2.L-uffiċjal tal-kontabilità jew l-amministraturi tal-imprest, jew it-tnejn, jistgħu fi kwalunkwe waqt ikunu sospiżi temporanjament jew definittivament mid-dmirijiet tagħhom mill-awtorità li tkun ħatret lill-uffiċjal tal-kontabilità.

3.Il-paragrafi 1 u 2 għandhom ikunu bla ħsara għal kwalunkwe azzjoni dixxiplinari meħuda fir-rigward tal-atturi finanzjarji msemmija f’dawk il-paragrafi.

Artikolu 88
Responsabbiltà tal-atturi finanzjarji għal attività illegali, għal frodi jew għal korruzzjoni

1.Dan il-Kapitolu huma bla ħsara għal kwalunkwe responsabbiltà skont id-dritt kriminali, li l-atturi finanzjarji msemmijin fl-Artikolu 87 jistgħu jġarrbu kif previst fid-dritt nazzjonali applikabbli u fid-dispożizzjonijiet fis-seħħ dwar il-protezzjoni tal-interessi finanzjarji tal-Unjoni u dwar il-ġlieda kontra l-korruzzjoni li tinvolvi uffiċjali tal-Unjoni jew uffiċjali tal-Istati Membri.

2.Bla ħsara għall-Artikoli 89, 92 u 93 ta’ dan ir-Regolament, kull wieħed mill-uffiċjali tal-awtorizzazzjoni responsabbli, mill-uffiċjali tal-kontabilità jew mill-amministraturi tal-imprest għandu jkun soġġett għal azzjoni dixxiplinari u pagament ta’ kumpens kif stabbilit fir-Regolamenti tal-Persunal jew għall-persunal imsemmi fl-Artikolu 86 fil-kuntratti ta’ impjieg tiegħu. Fil-każ ta’ attività illegali, ta’ frodi jew ta’ korruzzjoni li jistgħu jkunu ta’ ħsara għall-interessi tal-Unjoni, il-kwistjoni għandha tiġi ppreżentata lill-awtoritajiet u lill-korpi nnominati bil-leġislazzjoni applikabbli, b’mod partikolari lill-Uffiċċju Ewropew Kontra l-Frodi.

TAQSIMA 2
REGOLI APPLIKABBLI GĦALL-UFFIĊJALI TAL-AWTORIZZAZZJONI RESPONSABBLI

Artikolu 89
Regoli applikabbli għall-uffiċjali tal-awtorizzazzjoni

1.L-uffiċjal tal-awtorizzazzjoni responsabbli għandu jkun soġġett għall-ħlas ta’ kumpens kif stipulat fir-Regolamenti tal-Persunal.

2.L-obbligu li jitħallas kumpens għandu japplika b’mod partikolari jekk l-uffiċjal tal-awtorizzazzjoni responsabbli, jew b'mod intenzjonat jew minħabba traskuraġni serja min-naħa tiegħu:

(a)jiddetermina li għandhom jiġu rkuprati intitolamenti jew joħroġ ordnijiet ta’ rkupru, jimpenja nefqa jew jiffirma ordni ta’ ħlas mingħajr ma jkun konformi ma’ dan ir-Regolament;

(b)jonqos milli jfassal dokument li jistabbilixxi ammont riċevibbli, jittraskura milli joħroġ ordni ta’ rkupru jew jittardja l-ħruġ tagħha jew jittardja l-ħruġ ta’ ordni għal ħlas, u b'hekk jesponi lill-istituzzjoni għal kawża ċivili minn partijiet terzi.

3.Uffiċjal tal-awtorizzazzjoni b’delega jew b’sottodelega li jikkonsidra li deċiżjoni li tkun fir-responsabilità tiegħu li jieħu tkun irregolari jew tmur kontra l-prinċipju ta’ ġestjoni finanzjarja tajba, għandu jinforma b’dan bil-miktub lill-awtorità tad-delega. Jekk imbagħad l-awtorità tad-delega tagħti bil-miktub struzzjoni motivata lill-uffiċjal tal-awtorizzazzjoni b’delega jew b’sottodelega biex jieħu dik id-deċiżjoni, dak l-uffiċjal tal-awtorizzazzjoni ma għandux jinżamm responsabbli.

4.Fil-każ ta’ sottodelega fl-ambitu tas-servizzi tiegħu, l-uffiċjal tal-awtorizzazzjoni b'delega għandu jibqa' responsabbli għall-effiċjenza u għall-effikaċja tas-sistemi tal-ġestjoni u ta’ kontroll interni stabbiliti u għall-għażla tal-uffiċjal tal-awtorizzazzjoni b'sottodelega.

5.Fil-każ ta’ sottodelega lill-Kapijiet tad-delegazzjonijiet tal-Unjoni u d-deputati tagħhom, l-uffiċjali tal-awtorizzazzjoni b'delega għandhom ikunu responsabbli għad-definizzjoni tas-sistemi tal-ġestjoni u l-kontroll interni fis-seħħ, kif ukoll l-effiċjenza u l-effikaċja tagħhom. Il-Kapijiet tad-delegazzjonijiet tal-Unjoni għandhom ikunu responsabbli għat-twaqqif u għall-funzjonament adegwat ta’ dawk is-sistemi, skont l-istruzzjonijiet tal-uffiċjal tal-awtorizzazzjoni b'delega, u għall-ġestjoni tal-fondi u l-operazzjonijiet li dawn jeżegwixxu fid-delegazzjoni tal-Unjoni taħt ir-responsabilità tagħhom. Qabel ma jibdew jaqdu dmirijiethom, huma għandhom isegwu korsijiet speċifiċi ta’ taħriġ dwar il-kompiti u r-responsabilitajiet tal-uffiċjali tal-awtorizzazzjoni u dwar l-implimentazzjoni tal-baġit.

Il-Kapijiet tad-delegazzjonijiet tal-Unjoni għandhom jirrapportaw dwar ir-responsabbiltajiet tagħhom skont l-ewwel subparagrafu ta’ dan il-paragrafu f'konformità mal-Artikolu 75(3).

Kull sena, il-Kapijiet tad-delegazzjonijiet tal-Unjoni għandhom jipprovdu lill-uffiċjal tal-awtorizzazzjoni b'delega tal-Kummissjoni l-assigurazzjoni dwar is-sistemi tal-ġestjoni u l-kontroll interni stabbiliti fid-delegazzjoni tagħhom, kif ukoll dwar il-ġestjoni tal-operazzjonijiet sottodelegati lilhom, u r-riżultati tagħhom, sabiex jippermettu lill-uffiċjal tal-awtorizzazzjoni jifformula d-dikjarazzjoni ta’ assigurazzjoni kif previst fl-Artikolu 73(9).

Dan l-paragrafu għandu japplika wkoll għad-deputati Kapijiet tad-delegazzjonijiet tal-Unjoni meta jaġixxu bħala uffiċjali tal-awtorizzazzjoni b’sottodelega fin-nuqqas tal-Kapijiet tad-delegazzjonijiet tal-Unjoni.

Artikolu 90
It-trattament tal-irregolaritajiet finanzjarji min-naħa ta’ membru tal-persunal

1.Bla ħsara għas-setgħat tal-Uffiċċju Ewropew Kontra l-Frodi, kwalunkwe ksur ta’ dispożizzjoni tar-Regolament Finanzjarju jew ta’ dispożizzjoni relatata mal-ġestjoni finanzjarja jew mal-kontroll tal-operazzjonijiet li jirriżulta minn att jew omissjoni ta’ membru tal-persunal għandu jiġi riferit lill-bord imsemmi fl-Artikolu 139 ta’ dan ir-Regolament għal opinjoni minn kwalunkwe wieħed/waħda minn dawn li ġejjin:

(a)l-awtorità tal-ħatra inkarigata minn kwistjonijiet dixxiplinari;

(b)membru tal-persunal skont l-Artikolu 73(8). F’dan il-każ, il-bord għandu jibgħat il-fajl lill-awtorità tal-ħatra u għandu jinforma lill-membru tal-persunal dwar dan. L-awtorità tal-ħatra tista’ titlob l-opinjoni tal-bord dwar il-każ;

(c)l-uffiċjal tal-awtorizzazzjoni responsabbli, inklużi l-Kapijiet tad-delegazzjonijiet tal-Unjoni u d-deputati tagħhom fin-nuqqas tagħhom li jaġixxu bħala uffiċjali tal-awtorizzazzjoni skont l-Artikolu 58(2) ta’ dan ir-Regolament.

2.Fil-każijiet imsemmijin fil-paragrafu 1, il-bord imsemmi fl-Artikolu 139 ta’ dan ir-Regolament għandu jkun kompetenti sabiex jiddetermina jekk seħħitx irregolarità finanzjarja. Fuq il-bażi tal-opinjoni tal-grupp imsemmi fl-Artikolu 139 għall-każijiet imsemmijin fil-paragrafu 1, l-istituzzjoni kkonċernata għandha tiddeċiedi jekk tagħtix bidu għal proċedimenti għal azzjoni dixxiplinari jew tal-ħlas ta’ kumpens. Jekk il-grupp jintebaħ bi problemi sistemiċi, dan għandu jagħmel rakkomandazzjoni lill-uffiċjal tal-awtorizzazzjoni u lill-uffiċjal tal-awtorizzazzjoni b'delega, sakemm dan tal-aħħar ma jkunx il-membru tal-persunal involut, kif ukoll lill-awditur intern.

3.Qabel ma jadotta kwalunkwe opinjoni fil-każijiet ta’ irregolaritajiet imsemmijin fil-paragrafu 1 ta’ dan l-Artikolu, il-bord għandu jagħti lill-membru tal-persunal involut l-opportunità li jissottometti l-osservazzjonijiet tiegħu.

4.Meta l-bord jagħti l-opinjoni msemmija fil-paragrafu 1, għandu jkollu l-kompożizzjoni stabbilita fl-Artikolu 139(2) u żewġ membri addizzjonali:

(a)rappreżentant tal-awtorità tal-ħatra inkarigata minn kwistjonijiet dixxiplinari tal-istituzzjoni jew tal-korp ikkonċernat, u

(b)membru ieħor maħtur mill-kumitat tal-persunal tal-istituzzjoni jew tal-korp ikkonċernati. Il-ħatra ta’ dawk il-membri addizzjonali għandha ssir fid-dawl tal-bżonn li jiġi evitat kwalunkwe kunflitt ta’ interessi.

5.Meta l-bord jagħti l-opinjoni msemmija fil-paragrafu 1 tal-Artikolu, din għandha tkun indirizzata lill-Bord dixxiplinari mwaqqaf minn kull istituzzjoni jew korp skont ir-regoli interni tagħhom.

6.L-Istati Membri għandhom jappoġġaw b'mod sħiħ lill-Unjoni fl-infurzar ta’ kwalunkwe responsabbiltà skont l-Artikolu 22 tar-Regolamenti tal-Persunal għall-Uffiċjali tal-Unjoni Ewropea, ta’ persunal temporanju li għalih japplika l-punt (e) tal-Artikolu 2 tal-Kundizzjonijiet tal-Impjieg Applikabbli għall-Aġenti l-Oħra tal-Unjoni Ewropea.

Artikolu 91
Konferma tal-istruzzjonijiet

1.Uffiċjal tal-awtorizzazzjoni b’delega jew b’sottodelega li jirċievi struzzjoni vinkolanti u li huwa jqis bħala irregolari jew li tmur kontra l-prinċipju ta’ ġestjoni finanzjarja tajba, b’mod partikolari minħabba li l-istruzzjoni ma tkunx tista’ tiġi eżegwita bir-riżorsi allokati lilu, għandu jinforma b’dan bil-miktub lill-awtorità li mingħandha jkun irċieva d-delega jew is-sottodelega. Jekk l-istruzzjoni tiġi kkonfermata bil-miktub u dik il-konferma tasal fil-ħin u tkun ċara biżżejjed, fis-sens li tkun tirreferi espliċitament għall-punti li jkunu ġew ikkontestati mill-uffiċjal tal-awtorizzazzjoni b’delega jew b’sottodelega, l-uffiċjal tal-awtorizzazzjoni b'delega jew b’sottodelega ma jkunx jista’ jinżamm responsabbli. Huwa jeżegwixxi l-istruzzjoni, sakemm din ma tkunx manifestament illegali jew tikkostitwixxi ksur tal-istandards tas-sigurtà rilevanti.

2.Il-paragrafu 1 għandu japplika wkoll f’każijiet fejn uffiċjal tal-awtorizzazzjoni jsir jaf, waqt li jkun qiegħed jeżegwixxi struzzjoni vinkolanti, li ċ-ċirkostanzi tal-każ jistgħu jagħtu lok għal sitwazzjoni irregolari.

Kull struzzjoni li tiġi kkonfermata fiċ-ċirkostanzi deskritti fl-Artikolu 89(3) għandha tiġi rreġistrata mill-uffiċjal tal-awtorizzazzjoni b’delega responsabbli u tissemma fir-rapport annwali tal-attività tiegħu.

TAQSIMA 3
IR-REGOLI APPLIKABBLI GĦALL-UFFIĊJALI TAL-KONTABILITÀ U GĦALL-AMMINISTRATURI TAL-IMPREST

Artikolu 92
Regoli applikabbli għall-uffiċjali tal-kontabilità

Uffiċjal tal-kontabilità jista' jkun soġġett għal azzjoni dixxiplari u ħlas ta’ kumpens, kif stabbilit fi u skont il-proċeduri fir-Regolamenti tal-Persunal. Uffiċjal tal-kontabilità jista’, b’mod partikolari, isir soġġett għal dan b’riżultat ta’ kwalunkwe waħda mill-forom li ġejjin ta’ kondotta ħażina min-naħa tiegħu:

(a)telf jew ikkawżar ta’ danni lil fondi, assi jew dokumenti li jkun qiegħed jieħu ħsieb;

(b)bdil ta’ kontijiet bankarji jew kontijiet giro postali b’mod żbaljat;

(c)irkuprar jew ħlas ta’ ammonti li ma jkunux konformi mal-ordnijiet ta’ rkupru jew ordnijiet ta’ ħlas korrispondenti;

(d)huwa jonqos milli jiġbor id-dħul dovut.

Artikolu 93
Regoli applikabbli għall-amministraturi tal-imprest

Mingħajr ħsara għall-Artikolu 88(2), b’mod partikolari, amministratur tal-imprest jista’ jagħmel lilu nnifsu soġġett għal dan b’riżultat ta’ kwalunkwe waħda mill-forom li ġejjin ta’ kondotta ħażina minn naħa tiegħu:

(a)telf jew ikkawżar ta’ danni lil fondi, assi jew dokumenti li jkun qiegħed jieħu ħsieb;

(b)nuqqas ta’ dokumenti ta' sostenn adegwati għall-pagamenti li jkun għamel;

(c)pagamenti magħmula lil persuni li mhumiex intitolati għal tali pagamenti;

(d)huwa jonqos milli jiġbor id-dħul dovut.

KAPITOLU 6
Operazzjonijiet ta’ dħul

TAQSIMA 1
TQEGĦID GĦAD-DISPOŻIZZJONI TAR-RIŻORSI PROPRJI

Artikolu 94
Riżorsi proprji

1.Stima tad-dħul ikkostitwit mir-riżorsi proprji, kif imsemmi fid-Deċiżjoni tal-Kunsill rigward is-sistema tar-riżorsi proprji tal-Unjoni Ewropea, għandha tiddaħħal fil-baġit f'euro. Dan għandu jkun disponibbli b'konformità mar-Regolament (KE, Euratom) Nru 609/2014.

2.L-uffiċjal tal-awtorizzazzjoni jħejji skeda li tindika meta r-riżorsi proprji definiti fid-Deċiżjoni dwar is-sistema tar-riżorsi proprji tal-Unjoni Ewropea se jitqiegħdu għad-dispożizzjoni tal-Kummissjoni.

Ir-riżorsi proprji għandhom jiġu stabbiliti u rkuprati b’konformità mar-regoli adottati skont id-Deċiżjoni msemmija fl-ewwel paragrafu.

Għal skopijiet kontabilistiċi, l-uffiċjal tal-awtorizzazzjoni għandu joħroġ ordni ta’ rkupru għal krediti u debiti għall-kont għal riżorsi proprji msemmijin fir-Regolament (UE, Euratom) Nru 609/2014.

TAQSIMA 2
STIMA TAL-AMMONTI RIĊEVIBBLI

Artikolu 95
Stima tal-ammonti riċevibbli

1.Meta l-uffiċjal tal-awtorizzazzjoni responsabbli jkollu informazzjoni suffiċjenti u affidabbli fir-rigward ta’ kwalunkwe miżura jew sitwazzjoni li jistgħu jwasslu biex ikun hemm ammont dovut lill-Unjoni, l-uffiċjal tal-awtorizzazzjoni responsabbli għandu jagħmel stima tal-ammont riċevibbli.

2.L-istima tal-ammont riċevibbli għandha tkun aġġustata mill-uffiċjal tal-awtorizzazzjoni responsabbli malli dan isir jaf b'avveniment li jimmodifika l-miżura jew is-sitwazzjoni li wasslet li ssir l-istima.

Meta jistabbilixxi l-ordni ta’ rkupru dwar miżura jew sitwazzjoni li qabel kienet wasslet fi stima tal-ammonti riċevibbli, tali stima għandha tiġi aġġustata skont dan mill-uffiċjal tal-awtorizzazzjoni responsabbli.

Jekk l-ordni ta’ rkupru ssir għall-istess ammont bħall-istima oriġinali tal-ammonti riċevibbli, dik l-istima għandha titnaqqas għal żero.

3.Bħala deroga mill-paragrafu 1, ma għandha ssir l-ebda stima tal-ammont riċevibbli qabel ma l-Istati Membri jqiegħdu għad-dispożizzjoni tal-Kummissjoni l-ammonti ta’ riżorsi proprji ddefiniti fid-Deċiżjoni tal-Kunsill rigward is-sistema tar-riżorsi proprji tal-Unjoni Ewropea, li huma mħallsin f'intervalli fissi stabbiliti mill-Istati Membri. L-uffiċjal tal-awtorizzazzjoni responsabbli għandu joħroġ ordni ta’ rkupru fir-rigward ta’ dawk l-ammonti.

TAQSIMA 3
STABBILIMENT TAL-AMMONTI RIĊEVIBBLI

Artikolu 96
Stabbiliment tal-ammonti riċevibbli

1.L-istabbiliment ta’ ammont riċevibbli huwa l-att li bih l-uffiċjal tal-awtorizzazzjoni responsabbli:

(a)jivverifika li d-dejn jeżisti;

(b)jiddetermina jew jivverifika r-realtà u l-ammont tad-dejn;

(c)jivverifika l-kundizzjonijiet li fihom ikun dovut id-dejn.

Dan għandu jikkostitwixxi r-rikonoxximent tad-dritt tal-Unjoni fir-rigward ta’ debitur u l-istabbiliment tal-intitolament li d-debitur jintalab iħallas id-dejn.

2.Kwalunkwe ammont riċevibbli li huwa identifikat bħala ammont fiss, ċert u dovut għandu jiġi stabbilit b’ordni ta’ rkupru lill-uffiċjal tal-kontabilità. Għandu jiġi segwit minn nota ta’ debitu mibgħuta lid-debitur, ħlief f’każijiet li fihom titwettaq proċedura ta’ rinunzja minnufih. Kemm l-ordni ta’ rkupru kif ukoll in-nota ta’ debitu għandhom jitfasslu mill-uffiċjal tal-awtorizzazzjoni responsabbli.

L-uffiċjal tal-awtorizzazzjoni għandu jibgħat in-nota ta’ debitu minnufih wara li jistabbilixxi l-ammont riċevibbli u mhux aktar tard minn fi żmien perjodu ta’ ħames snin minn meta l-istituzzjoni kienet, f’ċirkustanzi normali, f’pożizzjoni li tagħmel pretensjoni għad-dejn tagħha. Dan il-perjodu ma għandux ikun japplika meta l-uffiċjal tal-awtorizzazzjoni responsabbli jistabbilixxi li, minkejja l-isforzi għamlet li l-istituzzjoni, id-dewmien fit-teħid ta’ azzjoni kkaġunat mill-kondotta tad-debitur, b’mod partikolari manuvri ta’ ħela ta’ żmien jew mala fede.

L-ordni ta’ rkupru għandha tkun l-operazzjoni li biha l-uffiċjal tal-awtorizzazzjoni responsabbli jagħti struzzjoni lill-uffiċjal tal-kontabilità biex jirkupra l-ammont stabbilit.

3.Sabiex jistabbilixxi ammont riċevibbli, l-uffiċjal tal-awtorizzazzjoni responsabbli għandu jiżgura li:

(a)ir-riċevibbli jkun ċert, jiġifieri ma jkun soġġett għall-ebda kundizzjoni;

(b)ir-riċevibbli jkun ta’ ammont fiss, espress preċiżament f’termini ta’ flus kontanti;

(c)ir-riċevibbli jkun dovut u ma jkun soġġett għall-ebda żmien ta’ ħlas;

(d)id-dettalji tad-debitur ikunu korretti;

(e)l-ammont li jrid jiġi rkuprat ikun imniżżel fil-partita korretta tal-baġit;

(f)id-dokumenti ta' sostenn huma kif suppost; kif ukoll

(g)ikun irrispettat il-prinċipju ta’ ġestjoni finanzjarja tajba, b’mod partikolari fir-rigward tal-kriterji msemmijin fil-punt (a) jew (b) tal-Artikolu 99(2).

4.In-nota ta’ debitu tinforma lid-debitur li

(a)l-Unjoni stabbilixxiet l-ammont riċevibbli;

(b)jekk il-ħlas tad-debitu jsir qabel id-data tal-għeluq, kif speċifikata fin-nota ta’ debitu, ma jkun dovut l-ebda imgħax ta’ inadempjenza;

(c)jekk ir-rimborż ma jsirx sad-data tal-għeluq imsemmija fil-punt (b), id-dejn għandu jipproduċi mgħax bir-rata msemmija fl-Artikolu 97, bla l-ebda ħsara għal kwalunkwe regolament speċifiku applikabbli;

(d)jekk ir-rimborż ma jsirx sad-data tal-għeluq imsemmija fil-punt (b), l-istituzzjoni għandha teffettwa l-irkupru permezz ta’ tpaċija jew permezz ta’ infurzar ta’ kwalunkwe garanzija ddepożitata bil-quddiem;

(e)f'ċirkustanzi eċċezzjonali l-uffiċjal tal-kontabilità jista’ jeffettwa l-irkupru permezz ta’ tpaċija qabel id-data tal-għeluq imsemmija fil-punt (b), fejn dan ikun meħtieġ sabiex jiġu mħarsa l-interessi finanzjarji tal-Unjoni meta huwa jkollu raġunijiet ġustifikati biex jemmen li l-ammont dovut lill-Kummissjoni jkun se jintilef, wara li d-debitur ikun ġie mgħarraf bir-raġunijiet u d-data tal-irkupru permezz ta’ tpaċija;

(f)jekk, wara li jittieħdu l-passi kollha stipulati fil-punti minn (a) sa (e) ta’ dan is-subparagrafu, l-ammont ikun għadu ma ġiex irkuprat kollu, l-istituzzjoni teffettwa l-irkupru bl-infurzar ta’ deċiżjoni skont l-Artikolu 98(2) jew b’azzjoni legali.

Meta wara l-verifika tad-dettalji tad-debitur jew fuq il-bażi ta’ informazzjoni rilevanti oħra disponibbli dak iż-żmien, ikun ċar li d-dejn jaqa’ taħt il-każijiet imsemmijin fil-punt (a) jew (b) tat-tieni subparagrafu tal-Artikolu 99(2), jew li n-nota ta’ debitu ma tkunx intbagħtet skont il-paragrafu 2 ta’ dan l-Artikolu, l-uffiċjal tal-awtorizzazzjoni jista’, wara li jistabbilixxi l-ammont riċevibbli, jiddeċiedi li jipproċedi direttament għar-rinunzja skont id-dispożizzjonijiet stabbiliti fl-Artikolu 99 mingħajr ma jibgħat nota ta’ debitu, bi qbil mal-uffiċjal tal-kontabilità.

Fil-każijiet kollha l-oħrajn, l-uffiċjal tal-awtorizzazzjoni jistampa n-nota ta’ debitu u jibgħatha lid-debitur. L-uffiċjal tal-kontabilità jiġi mgħarraf li ntbagħtet permezz tas-sistema ta’ informazzjoni finanzjarja.

5.L-ammonti mħallsa indebitament għandhom jiġu rkuprati.

Artikolu 97
L-imgħax ta' inadempjenza

1.Bla ħsara għal kwalunkwe dispożizzjoni speċifika li tirriżulta mill-applikazzjoni ta’ regolamenti speċifiċi, kwalunkwe ammont riċevibbli li ma jitħallasx lura fid-data tal-għeluq imsemmija fil-punt (b) tal-ewwel subparagrafu tal-Artikolu 96(4) għandu jeħel imgħax skont il-paragrafi 2 u 3 ta’ dan l-Artikolu.

2.Ħlief fil-każ imsemmi fil-paragrafu 4 ta’ dan l-Artikolu, ir-rata tal-imgħax għall-ammonti riċevibbli li ma jitħallsux lura fid-data tal-għeluq imsemmija fil-punt (b) tal-ewwel subparagrafu tal-Artikolu 96(4) għandha tkun ir-rata applikata mill-Bank Ċentrali Ewropew għall-operazzjonijiet ta’ rifinanzjament ewlenin tiegħu, kif ippubblikata fis-serje C ta’ Il-Ġurnal Uffiċjali tal-Unjoni Ewropea, fis-seħħ fl-ewwel jum kalendarju tax-xahar li fih tkun id-data tal-għeluq, u miżjuda hekk:

(a)bi tmien punti perċentwali meta l-avveniment li jobbliga jkun kuntratt ta’ provvista u servizz pubbliku msemmi fit-Titolu V;

(b)bi tliet punti perċentwali u nofs fil-każijiet l-oħrajn kollha.

3.L-imgħax għandu jiġi kkalkolat mill-jum kalendarju ta’ wara d-data tal-għeluq imsemmija fil-punt (b) tal-ewwel subparagrafu tal-Artikolu 96(4) u speċifikata fin-nota ta’ debitu sal-jum kalendarju meta d-dejn jitħallas kollu.

L-ordni ta’ rkupru li tikkorrispondi għall-ammont tal-imgħax awtomatiku tinħareġ meta dan l-imgħax fil-fatt jitħallas.

4.Fil-każ ta’ multi jew penali oħrajn, ir-rata tal-imgħax għall-ammonti riċevibbli mhux imħallsin sad-data tal-għeluq imsemmija fil-punt (b) tal-ewwel subparagrafu tal-Artikolu 96(4) għandha tkun ir-rata applikata mill-Bank Ċentrali Ewropew għall-operazzjonijiet ta’ rifinanzjament ewlenin tiegħu, kif ippubblikata fis-serje C ta’ Il-Ġurnal Uffiċjali tal-Unjoni Ewropea, fis-seħħ fl-ewwel jum kalendarju tax-xahar li fih tkun id-data tal-għeluq, u miżjuda hekk:

(a)b’punt perċentwali u nofs meta d-debitur jipprovdi garanzija finanzjarja li hija aċċettata mill-uffiċjal tal-kontabilità minflok pagament;

(b)bi tliet punti perċentwali u nofs fil-każijiet l-oħrajn kollha.

Meta l-Qorti tal-Ġustizzja tal-Unjoni Ewropea, fl-eżerċizzju tal-kompetenza tagħha skont l-Artikolu 261 tat-TFUE, iżżid l-ammont ta’ multa jew penali oħra, l-imgħax fuq l-ammont taż-żieda għandu jibda mid-data tas-sentenza tal-Qorti.

F’każijiet li fihom ir-rata tal-imgħax ġenerali tkun negattiva, din se tiġi stabbilita għal żero punti perċentwali.

TAQSIMA 4
AWTORIZZAZZJONI TAL-IRKUPRU

Artikolu 98
Awtorizzazzjoni tal-irkupru

1.L-awtorizzazzjoni tal-irkupru hija att li permezz tiegħu l-uffiċjal tal-awtorizzazzjoni responsabbli jagħti struzzjonijiet lill-uffiċjal tal-kontabilità, bil-ħruġ ta’ ordni ta’ rkupru, sabiex jirkupra ammont riċevibbli li l-uffiċjal tal-awtorizzazzjoni responsabbli jkun stabbilixxa.

2.L-istituzzjoni tista' formalment tistabbilixxi ammont bħala riċevibbli minn persuni għajr Stati Membri permezz ta’ deċiżjoni li għandha tkun inforzabbli skont it-tifsira tal-Artikolu 299 TFUE.

Jekk il-protezzjoni effiċjenti u f'waqtha tal-interessi finanzjarji tal-Unjoni teħtieġ hekk, il-Kummissjoni tista' wkoll, f'ċirkostanzi eċċezzjonali, tadotta tali deċiżjoni infurzabbli għall-ġid tal-istituzzjonijiet l-oħra fuq talba tagħhom fir-rigward tal-pretensjonijiet dwar il-persunal li għalih japplikaw ir-Regolamenti tal-Persunal jew b’rabta ma’ Membri jew eks Membri ta’ istituzzjoni tal-Unjoni.

Iċ-ċirkostanzi eċċezzjonali jintlaħqu meta l-possibbiltà li jsir ħlas volontarju u li jiġi rkuprat id-dejn permezz ta’ tpaċija kif previst fl-Artikolu 99(1) ta' dan ir-Regolament tkun ġiet eżawrita mill-istituzzjoni kkonċernata u d-dejn ikun jirrappreżenta ammont sinifikanti. F’dan il-każ, l-istituzzjonijiet ikkonċernati għajr dawk imsemmija fl-Artikolu 299 tat-TFUE jistgħu jitolbu lill-Kummissjoni sabiex tadotta deċiżjoni infurzabbli.

Fil-każijiet kollha, id-deċiżjoni infurzabbli għandha tispeċifika li l-ammonti mitlubin jiddaħħlu fit-taqsima tal-baġit li tikkorrispondi għall-istituzzjoni kkonċernata, li għandha taġixxi bħala uffiċjal tal-awtorizzazzjoni . Id-dħul għandu jiddaħħal bħala dħul ġenerali għajr jekk ikun jaqa’ taħt il-każijiet speċifikati ta’ dħul assenjat previsti fl-Artikolu 20(3).

L-istituzzjoni li tagħmel it-talba għandha tinforma lill-Kummissjoni dwar kwalunkwe avveniment li jista’ jbiddel l-irkupru u tintervjeni biex tappoġġa lill-Kummissjoni f’każ ta’ appell kontra d-deċiżjoni infurzabbli.

Il-Kummissjoni u l-istituzzjoni kkonċernata jridu jaqblu fuq il-modalitajiet prattiċi għall-implimentazzjoni ta’ dan l-Artikolu.

TAQSIMA 5
IRKUPRU

Artikolu 99
Regoli dwar l-irkupru

1.L-uffiċjal tal-kontabilità għandu jaġixxi fuq ordnijiet għall-irkupru għal ammonti riċevibbli li jkunu ġew iddeterminati b'mod xieraq mill-uffiċjal tal-awtorizzazzjoni responsabbli. L-uffiċjal tal-kontabilità għandu jeżerċita diliġenza dovuta sabiex jiżgura li l-Unjoni tirċievi d-dħul tagħha u għandu jara li d-drittijiet tagħha jkunu ssalvagwardjati.

Rimborż parzjali minn debitur soġġett għal diversi ordnijiet ta’ rkupru jrid l-ewwel jitħallas fuq l-aktar intitolament antik sakemm ma jkunx speċifikat mod ieħor mid-debitur. Kwalunkwe pagament parzjali l-ewwel irid ikopri l-imgħax.

L-uffiċjal tal-kontabilità għandu jirkupra l-ammonti dovuti lill-baġit tal-Unjoni billi jpaċihom kontra ammonti dovuti lid-debitur mill-Unjoni jew minn aġenzija eżekuttiva li teżegwixxi l-baġit tal-Unjoni. Il-pretensjonijiet relatati ma’ dawk l-ammonti għandhom jkunu ċerti, ta’ ammont fiss u eżegwibbli.

2.Fejn l-uffiċjal tal-awtorizzazzjoni responsabbli jkun qiegħed jippjana li jirrinunzja bi sħiħ jew parzjalment għal irkupru ta’ xi ammont riċevibbli stabbilit, huwa għandu jiżgura li r-rinunzja ssir sewwa u li tkun konformi mal-prinċipji tal-ġestjoni finanzjarja tajba u tal-proporzjonalità. Id-deċiżjoni ta' rinunzja għandha tiġi ssostanzjata. L-uffiċjal tal-awtorizzazzjoni jista' jiddelega d-deċiżjoni tar-rinunzja.

L-uffiċjal tal-awtorizzazzjoni responsabbli jista’ jirrinunzja parti mill-ammont riċevibbli stabbilit jew l-ammont kollu f’dawn il-każijiet biss:

(a)meta l-kost imbassar tal-irkupru jkun akbar mill-ammont li għandu jiġi rkuprat u r-rinunzja ma tkunx ta’ ħsara għall-immaġini tal-Unjoni;

(b)meta l-ammont riċevibbli ma jistax jiġi rkuprat fid-dawl taż-żmien tiegħu, dewmien fid-dispaċċ tan-nota ta’ debitu fit-termini ddefiniti fl-Artikolu 96(2), jew l-insolvenza tad-debitur, jew bħala riżultat ta’ xi proċediment ieħor ta’ insolvenza;

(c)meta l-irkupru ma jkunx konsistenti mal-prinċipju tal-proporzjonalità.

3.Fil-każ imsemmi fil-punt (c) tal-paragrafu 2, l-uffiċjal tal-awtorizzazzjoni responsabbli għandu jaġixxi skont il-proċeduri ddeterminati minn qabel stabbiliti f’kull istituzzjoni u japplika l-kriterji li ġejjin li huma obbligatorji u applikabbli fiċ-ċirkostanzi kollha:

(a)il-fatti, billi titqies il-gravità tal-irregolarità li twassal għall-istabbiliment tal-ammont riċevibbli (frodi, reat ripetut, intenzjoni, diliġenza, bona fede, żball ċar);

(b)l-impatt li r-rinunzja tal-irkupru jkollha fuq l-operazzjonijiet tal-Unjoni u l-interessi finanzjarji tagħha (l-ammont involut, ir-riskju li jinħoloq preċedent, imminar tal-awtorità tal-liġi).

4.Skont iċ-ċirkostanzi tal-każ, l-uffiċjal tal-awtorizzazzjoni responsabbli jista’ jkollu bżonn jikkunsidra wkoll il-kriterji addizzjonali li ġejjin:

(a)kwalunkwe distorsjoni tal-kompetizzjoni li tiġi kkawżata mir-rinunzja tal-irkupru;

(b)id-danni ekonomiċi u soċjali li jistgħu jinħolqu li kieku d-dejn kellu jiġi rkuprat kollu.

5.Kull istituzzjoni tibgħat lill-Parlament Ewropew u lill-Kunsill rapport annwali dwar ir-rinunzji msemmija f'dan il-paragrafu li jinvolvu EUR 100 000 jew aktar. Fil-każ tal-Kummissjoni, dak ir-rapport għandu jkun mehmuż mas-sommarju tar-rapporti annwali tal-attività msemmija fl-Artikolu 73(9).

6.L-uffiċjal tal-awtorizzazzjoni responsabbli jista' jħassar ammont riċevibbli stabbilit b'mod sħiħ jew parzjali. Il-kanċellazzjoni parzjali ta’ ammont riċevibbli stabbilit ma timplikax ir-rinunzja tal-intitolament stabbilit li jifdal tal-Unjoni.

Fil-każ ta’ żball, l-uffiċjal tal-awtorizzazzjoni responsabbli għandu jħassar totalment jew parzjalment l-ammont riċevibbli stabbilit u jagħti raġunijiet adegwati.

Kull istituzzjoni tistabbilixxi fir-regoli interni tagħha l-kundizzjonijiet u l-proċeduri biex tiddelega s-setgħat ta’ tħassir ta’ ammont riċevibbli stabbilit.

7.Fl-ewwel lok, l-Istati Membri għandhom ikunu responsabbli għat-twettiq tal-kontrolli u tal-awditi u għall-irkupru tal-ammonti minfuqa indebitament, kif previst fir-regoli speċifiċi għas-setturi. Jekk l-Istati Membri jidentifikaw u jikkoreġu l-irregolaritajiet huma stess, dawn għandhom ikunu eżentati mill-korrezzjonijiet finanzjarji min-naħa tal-Kummissjoni fir-rigward ta’ dawn l-irregolaritajiet.

8.Il-Kummissjoni għandha tapplika korrezzjonijiet finanzjarji għall-Istati Membri sabiex teskludi mill-finanzjamenti tal-Unjoni n-nefqa mġarrba bi ksur tal-liġi applikabbli. Il-Kummissjoni għandha ssejjes il-korrezzjonijiet finanzjarji tagħha fuq l-identifikazzjoni tal-ammonti minfuqa indebitament, u l-implikazzjonijiet finanzjarji għall-baġit. Meta dawn l-ammonti ma jistgħux jiġu identifikati b'mod preċiż, il-Kummissjoni tista' tapplika korrezzjonijiet estrapolati jew b'rata fissa skont ir-regoli speċifiċi għas-setturi.

Il-Kummissjoni għandha, fid-deċiżjoni tagħha dwar l-ammont ta’ korrezzjoni finanzjarja, tqis in-natura u l-gravità tal-ksur tad-dritt applikabbli kif ukoll l-implikazzjonijiet finanzjarji għall-baġit, inkluż fil-każ tan-nuqqasijiet fis-sistemi ta’ ġestjoni u kontroll.

Il-kriterji biex jiġu definiti l-korrezzjonijiet finanzjarji u l-proċedura li għandha tkun applikata jistgħu jkunu stabbiliti fir-regoli speċifiċi għas-setturi.

9.Il-metodoloġija għall-applikazzjoni tal-korrezzjonijiet estrapolati jew b'rata fissa għandha tkun stabbilita skont ir-regoli speċifiċi għas-setturi bil-għan li l-Kummissjoni tkun tista' tħares l-interessi finanzjarji tal-Unjoni.

Artikolu 100
Irkupru bi tpaċija

1.Meta d-debitur ikollu pretensjoni fuq l-Unjoni jew fuq l-aġenzija eżekuttiva meta timplimenta l-baġit tal-Unjoni li tkun ċerta, kif definit fil-punt (a) tal-Artikolu 96(3), ta’ ammont fiss u dovuta, fir-rigward ta’ somma stabbilita permezz ta’ ordni ta’ ħlas, l-uffiċjal tal-kontabilità, wara d-data tal-għeluq imsemmija fil-punt (b) tal-ewwel subparagrafu tal-Artikolu 96(4), huwa għandu jirkupra l-ammonti riċevibbli stabbiliti permezz ta’ tpaċija.

F’ċirkostanzi eċċezzjonali, fejn ikun meħtieġ li jiġu mħarsa l-interessi finanzjarji tal-Unjoni u meta l-uffiċjal tal-kontabilità jkollu raġunijiet ġustifikati biex jemmen li l-ammont dovut lill-Unjoni jkun se jintilef, l-uffiċjal tal-kontabilità jista’ jikseb l-irkupru permezz ta’ tpaċija qabel id-data tal-għeluq imsemmija fil-punt (b) tal-ewwel subparagrafu tal-Artikolu 96(4).

L-uffiċjal tal-kontabilità jikseb ukoll l-irkupru permezz ta’ tpaċija qabel id-data tal-għeluq imsemmija fil-punt (b) tal-ewwel subparagrafu tal-Artikolu 96(4) meta jaqbel id-debitur.

2.Qabel jipproċedi bi kwalunkwe rkupru skont il-paragrafu 1, l-uffiċjal tal-kontabilità għandu jikkonsulta mal-uffiċjal tal-awtorizzazzjoni responsabbli u jinforma lid-debituri kkonċernati, inklużi l-mezzi ta’ rimedju skont l-Artikolu 129.

Meta d-debitur ikun awtorità nazzjonali jew waħda mill-entitajiet amministrattivi tagħha, l-uffiċjal tal-kontabilità jinforma wkoll lill-Istat Membru kkonċernat mill-anqas 10 ijiem qabel dwar l-intenzjoni tiegħu li jirrikorri għall-irkupru permezz ta’ tpaċija. Madankollu, bi qbil mal-Istat Membru jew mal-entità amministrattiva kkonċernata, l-uffiċjal tal-kontabilità jista’ jipproċedi bl-irkupru permezz ta’ tpaċija qabel tgħaddi dik id-data tal-għeluq.

3.It-tpaċija msemmija fil-paragrafu 1 għandu jkollha l-istess effett daqs ħlas u għandha teħles lill-Unjoni mill-ammont tad-dejn u, fejn xieraq, mill-imgħax dovut.

Artikolu 101
Il-proċedura ta’ rkupru meta ma jsirx ħlas volontarju

1.Bla ħsara għall-Artikolu 100, jekk l-ammont sħiħ ma jkunx ġie rkuprat sad-data tal-għeluq imsemmija fil-punt (b) tal-ewwel subparagrafu tal-Artikolu 96(4) u speċifikata fin-nota ta’ debitu, l-uffiċjal tal-kontabilità għandu jinforma lill-uffiċjal tal-awtorizzazzjoni responsabbli u mingħajr dewmien għandu jibda l-proċedura sabiex isir irkupru b’kull mod previst mil-liġi, inkluż, fejn ikun xieraq, bl-infurzar ta’ kwalunkwe garanzija mogħtija bil-quddiem.

2.Bla ħsara għall-Artikolu 100, meta ma jkunx jista’ jintuża l-metodu ta’ rkupru msemmi fil-paragrafu 1 ta’ dan l-Artikolu u d-debitur ikun naqas milli jħallas b’reazzjoni għall-ittra ta’ avviż formali mibgħuta mill-uffiċjal tal-kontabilità, l-uffiċjal tal-kontabilità jinforza deċiżjoni ta’ rkupru skont l-Artikolu 98(2) jew b’azzjoni legali.

Artikolu 102
Żmien addizzjonali għal pagament

L-uffiċjal tal-kontabilità, f’kollaborazzjoni mal-uffiċjal tal-awtorizzazzjoni responsabbli, jista’ jagħti aktar żmien biex isir il-ħlas biss b’talba bil-miktub mid-debitur, bir-raġunijiet għaliex għandu jagħmel dan, u bil-kundizzjoni li jiġu ssodisfati ż-żewġ kundizzjonijiet li ġejjin:

(a)id-debitur jieħu impenn li jħallas imgħax bir-rata speċifikata fl-Artikolu 97 għall-perjodu addizzjonali kollu miżjud, li jibda mid-data tal-għeluq imsemmija fil-punt (b) tal-ewwel subparagrafu tal-Artikolu 96(4);

(b)sabiex ikunu mħarsa d-drittijiet tal-Unjoni, id-debitur jagħti garanzija finanzjarja li tagħmel tajjeb għas-somma prinċipali u għall-imgħax, li tkun aċċettata mill-uffiċjal tal-kontabilità tal-istituzzjoni.

Il-garanzija msemmija fil-punt (b) tal-ewwel subparagrafu tista’ tiġi sostitwita ma’ garanzija konġunta u separata minn parti terza approvata mill-uffiċjal tal-kontabilità tal-istituzzjoni.

F’ċirkostanzi eċċezzjonali, wara talba mid-debitur, l-uffiċjal tal-kontabilità jista’ jirrinunzja għall-ħtieġa ta’ garanzija msemmija fil-punt (b) tal-ewwel subparagrafu meta, fuq il-bażi tal-valutazzjoni tiegħu, id-debitur ikun irid u jkun jista’ jagħmel il-ħlas fil-perjodu ta’ żmien addizzjonali, iżda ma jkunx jista’ jipprovdi tali garanzija u jkun jinsab f’sitwazzjoni diffiċli.

Artikolu 103
Perjodu ta’ limitazzjoni

1.Bla ħsara għad-dispożizzjonijiet ta’ regolamenti speċifiċi u l-applikazzjoni tad-Deċiżjoni tal-Kunsill dwar is-sistema tar-riżorsi proprji tal-Unjoni Ewropea, l-intitolamenti tal-Unjoni fir-rigward ta’ partijiet terzi u d-drittijiet ta’ partijiet terzi fir-rigward tal-Unjoni għandhom ikunu soġġetti għal perjodu ta’ limitazzjoni ta’ ħames snin.

2.Il-perjodu ta’ limitazzjoni għall-intitolamenti tal-Unjoni fir-rigward ta’ partijiet terzi jibda jiddekorri malli tinqabeż l-iskadenza kkomunikata lid-debitur fin-nota ta’ debitu kif speċifikat fil-punt (b) tal-ewwel subparagrafu tal-Artikolu 96(4).

Il-perjodu ta’ limitazzjoni għall-intitolamenti ta’ partijiet terzi fir-rigward tal-Unjoni għandu jibda mill-ġurnata li fiha jkun dovut il-ħlas tal-intitolamenti lill-parti terza skont l-impenn legali korrispondenti.

3.Il-perjodu ta’ limitazzjoni għall-intitolamenti tal-Unjoni fir-rigward ta’ partijiet terzi għandu jiġi interrott bi kwalunkwe att ta’ istituzzjoni, jew ta’ Stat Membru li jaġixxi fuq it-talba ta’ istituzzjoni, innotifikat lill-parti terza u bil-għan li jiġi rkuprat id-dejn.

Il-perjodu ta’ limitazzjoni għall-intitolamenti ta’ partijiet terzi fir-rigward tal-Unjoni għandu jiġi interrott bi kwalunkwe att innotifikat lill-Unjoni mill-kredituri tagħha jew f’isem il-kredituri tagħha bil-għan li jiġi rkuprat id-dejn.

4.Perjodu ta’ limitazzjoni ġdid ta’ ħames snin għandu jibda mill-ġurnata ta’ wara l-interruzzjonijiet imsemmijin fil-paragrafu 3.

5.Kwalunkwe azzjoni legali li tirrigwarda ammont riċevibbli kif imsemmi fil-paragrafu 2, inklużi azzjonijiet miġjuba quddiem qorti li aktar tard tiddikjara lilha nnifisha bħala li ma għandhiex ġurisdizzjoni, għandha tinterrompi l-perjodu ta’ limitazzjoni. Il-perjodu ta’ limitazzjoni ġdid ta’ ħames snin ma għandux jibda sakemm tinqata’ sentenza li jkollha s-saħħa ta’ res judicata jew sakemm tinstab soluzzjoni extraġudizzjarja bejn l-istess partijiet fuq l-istess azzjoni.

6.Meta l-uffiċjal tal-kontabilità jagħti lid-debitur żmien addizzjonali għall-ħlas skont l-Artikolu 102, dan għandu jitqies bħala interruzzjoni tal-perjodu ta’ limitazzjoni. Il-perjodu ta’ limitazzjoni ġdid ta’ ħames snin għandu jibda mill-ġurnata ta’ wara l-iskadenza taż-żmien estiż għall-ħlas.

7.Ma għandhomx jiġu rkuprati intitolamenti tal-Unjoni wara l-iskadenza tal-perjodu ta’ limitazzjoni, kif stabbilit fil-paragrafi 2 sa 6.

Artikolu 104
Trattament nazzjonali għall-intitolamenti tal-Unjoni

Fil-każ ta’ proċedimenti ta’ insolvenza, l-intitolamenti tal-Unjoni għandhom jingħataw l-istess trattament preferenzjali bħall-intitolamenti tal-istess natura dovuti lil korpi pubbliċi fl-Istati Membri fejn ikunu qed isiru l-proċedimenti ta’ rkupru.

Artikolu 105
Multi, penali, sanzjonijiet u mgħax dovut imposti mill-istituzzjonijiet

1.Ammonti riċevuti bħala multi, penali u sanzjonijiet, u kull imgħax jew dħul ieħor iġġenerat minnhom ma għandhomx ikunu rreġistrati bħala dħul tal-baġit sakemm id-deċiżjonijiet li jimponuhom jistgħu jkunu mħassra mill-Qorti tal-Ġustizzja tal-Unjoni Ewropea.

2.L-ammonti msemmijin fil-paragrafu 1 għandhom jiġu rreġistrati bħala dħul tal-baġit mill-aktar fis possibbli u mhux aktar tard mis-sena ta’ wara l-eżawriment tar-rimedji kollha legali. L-ammonti li għandhom ikunu rritornati lill-entità li ħallsithom, b'segwitu għal sentenza tal-Qorti tal-Ġustizzja tal-Unjoni Ewropa, ma għandhomx jiġu rreġistrati bħala dħul tal-baġit.

3.Il-paragrafu 1 ma għandux japplika għad-deċiżjonijiet rigward l-approvazzjoni ta’ kontijiet jew korrezzjonijiet finanzjarji.

Artikolu 106
L-irkupru ta’ multi, ta’ penali oħrajn jew ta’ sanzjonijiet imposti mill-istituzzjonijiet

1.Meta tittieħed azzjoni quddiem il-Qorti tal-Ġustizzja tal-Unjoni Ewropea kontra deċiżjoni ta’ istituzzjoni li timponi multa jew piena oħra skont it-TFUE jew it-Trattat tal-Euratom u sa dak iż-żmien li jkunu ġew eżawriti r-rimedji legali kollha, id-debitur għandu jħallas proviżorjament l-ammonti kkonċernati fil-kont tal-bank magħżul mill-uffiċjal tal-kontabilità tal-Kummissjoni jew inkella għandu jipprovdi garanzija finanzjarja li tkun aċċettabbli għall-uffiċjal tal-kontabilità tal-Kummissjoni. Il-garanzija għandha tkun indipendenti mill-obbligu ta’ ħlas tal-multa jew tal-pieni jew ta’ penali oħra u għandha tkun infurzabbli mal-ewwel talba. Hija għandha tkopri l-pretensjoni fir-rigward tal-kapital u tal-imgħax dovut kif speċifikat fl-Artikolu 97(4).

2.Il-Kummissjoni tiżgura l-ammonti mħallsa proviżorjament billi tara li dawn jiġu investiti f’assi finanzjarji sabiex b’hekk jiġu żgurati s-sigurtà u l-likwidità tal-flejjes, filwaqt li timmira wkoll li tipproduċi redditu pożittiv.

3.Wara li jkunu ġew eżawriti r-rimedji legali kollha u jkunu ġew ikkonfermati l-multi jew il-pieni, tittieħed kwalunkwe waħda mill-miżuri li ġejjin:

(a)l-ammonti miġbura proviżorjament u r-redditu fuqhom għandhom jiddaħħlu fil-baġit skont l-Artikolu 105 mhux aktar tard milli matul is-sena finanzjarja wara dik li fiha jkunu ġew eżawriti r-rimedji legali kollha;

(b)meta tkun ġiet ipprovduta garanzija finanzjarja, din tal-aħħar għandha tiġi infurzata u l-ammonti korrispondenti għandhom jiddaħħlu fil-baġit.

Meta l-ammont tal-multa jew tal-penali jkun ġie miżjud mill-Qorti tal-Ġustizzja tal-Unjoni Ewropea, il-punti (a) u (b) tal-ewwel subparagrafu ta’ dan il-paragrafu għandhom japplikaw sal-ammonti tad-deċiżjoni oriġinali tal-istituzzjoni jew, jekk applikabbli, sal-ammont iddefinit f’sentenza preċedenti mill-Qorti tal-Ġustizzja tal-Unjoni Ewropea fl-istess proċedimenti. L-uffiċjal tal-kontabilità tal-Kummissjoni għandu jiġbor l-ammont korrispondenti għaż-żieda u l-imgħax dovut kif stipulat fl-Artikolu 97(4), li ser jiddaħħal fil-baġit.

4.Wara li jkunu ġew eżawriti r-rimedji legali kollha u l-multi jew il-pieni jkunu tħassru jew tnaqqsu, tittieħed kwalunkwe waħda mill-miżuri li ġejjin:

(a)l-ammonti msarrfin b’mod proviżorju, jew parti minnhom, filwaqt li jitqies kwalunkwe redditu, għandhom jitħallsu lura lill-parti terza kkonċernata;

(b)meta tkun ġiet ipprovduta garanzija finanzjarja, din għandha tiġi rilaxxata kif xieraq.

Artikolu 107
Imgħaxijiet kompensatorji

Bla ħsara għall-Artikolu 97(2) u għal każijiet apparti dawk imsemmijin fl-Artikolu 105, meta ammont irid jiġi rimborżat wara sentenza tal-Qorti tal-Ġustizzja tal-Unjoni Ewropea jew f’soluzzjoni amikevoli, ir-rata tal-imgħax għandha tkun ir-rata applikata mill-Bank Ċentrali Ewropew għall-operazzjonijiet ta’ rinfinanzjament ewlenin tiegħu, kif ippubblikata fis-serje C ta’ Il-Ġurnal Uffiċjali tal-Unjoni Ewropea, fis-seħħ fl-ewwel jum kalendarju tax-xahar, mid-data tal-ħlas ta’ dan l-ammont sad-data li fiha jkun dovut ir-rimborż, miżjuda b’żero punti perċentwali.

F’każijiet li fihom ir-rata tal-imgħax ġenerali tkun negattiva, din se tiġi stabbilita għal żero punti perċentwali.

KAPITOLU 7
Operazzjonijiet ta’ nefqa

Artikolu 108
Deċiżjonijiet ta' finanzjament

1.L-impenn baġitarju għandu jkun preċedut minn deċiżjoni ta’ finanzjament adottata mill-istituzzjoni jew mill-awtoritajiet li lilhom l-istituzzjoni ddelegat is-setgħat. Dan ma għandux japplika fil-każ ta’ approprjazzjonijiet għall-operazzjonijiet ta’ kull istituzzjoni taħt l-awtonomija amminsitrattiva tagħha li tista’ tiġi implimentata mingħajr att bażiku skont il-punt (e) tal-ewwel subparagrafu tal-Artikolu 56(2), tan-nefqa għas-sostenn amministrattiv u tal-kontribuzzjonijiet għall-korpi msemmijin fl-Artikoli 69 u 70. Id-deċiżjonijiet ta’ finanzjament għandhom ikunu annwali jew pluriennali.

2.Fl-istess ħin, id-deċiżjoni ta’ finanzjament għandha tikkostitwixxi wkoll programm ta’ ħidma annwali jew pluriennali u għandha tiġi adottata mill-aktar fis possibbli wara l-adozzjoni tal-abbozz tal-baġit u fil-prinċipju qatt wara l-31 ta’ Marzu tas-sena ta’ implimentazzjoni. Il-parti li fiha l-programm ta’ ħidma għandha tiġi ppubblikata fuq is-sit web tal-istituzzjoni kkonċernata minnufih wara l-adozzjoni tagħha u qabel l-implimentazzjoni tagħha. Id-deċiżjoni ta’ finanzjament għandha tindika l-ammont totali kopert mid-deċiżjoni ta’ finanzjament u jkun fiha deskrizzjoni tal-azzjonijiet li jridu jiġu ffinanzjati. Din għandha tispeċifika:

(a)l-att bażiku u l-linja baġitarja;

(b)l-għanijiet fil-mira u r-riżultati mistennijin;

(c)il-metodi ta’ implimentazzjoni;

(d)kwalunkwe informazzjoni addizzjonali meħtieġa mill-att bażiku għall-programm ta’ ħidma.

Barra minn hekk, għandha tistabbilixxi dawn li ġejjin:

(a)għall-għotjiet: it-tip ta’ applikanti fil-mira tas-sejħa għal proposti jew l-għotja diretta; il-pakkett baġitarju globali riżervat għall-għotjiet;

(b)għall-akkwisti: il-pakkett baġitarju globali riżervat għall-akkwisti;

(c)għall-kontribuzzjonijiet għall-fondi fiduċjarji msemmijin fl-Artikolu 227, l-approprjazzjonijiet riżervati għall-fond fiduċjarju għas-sena flimkien mal-ammonti ppjanati matul id-durata tiegħu;

(d)għall-premji: it-tip ta’ parteċipanti fil-mira tal-kompetizzjoni, il-pakkett baġitarju globali riżervat għall-kompetizzjoni u referenza speċifika għall-premji b’valur unitarju ta’ EUR 1 000 000 jew aktar;

(e)għall-istrumenti finanzjarji: l-ammont allokat għall-istrument finanzjarju;

(f)fil-każ ta’ implimentazzjoni diretta: l-entità jew il-persuna skont il-punt (c) tal-Artikolu 61(1) jew, il-kriterji li jridu jintużaw sabiex tingħażel l-entità jew il-persuna;

(g)għall-kontribuzzjonijiet għall-faċilitajiet ta’ taħlit: l-ammont allokat għall-faċilità ta’ taħlit u l-lista tal-entitajiet li jieħdu sehem fil-faċilità ta’ taħlit;

(h)għall-garanziji baġitarji: l-ammont ta’ proviżjonament annwali u, fejn applikabbli, l-ammont tal-garanzija baġitarji li se jiġi rilaxxat.

L-uffiċjal tal-awtorizzazzjoni b'delega jista’ jżid kwalunkwe informazzjoni addizzjonali meqjusa xierqa jew fid-deċiżjoni ta’ finanzjament rispettiva li tikkostitwixxi l-programm ta’ ħidma jew fi kwalunkwe dokument ieħor ippubblikat fuq is-sit web tal-istituzzjoni.

Deċiżjoni ta’ finanzjament pluriennali għandha tkun konsistenti mal-ipprogrammar finanzjarju msemmi fl-Artikolu 39(2) u għandha tispeċifika li l-implimentazzjoni tad-deċiżjoni hija soġġetta għad-disponibbiltà tal-approprjazzjonijiet tal-baġit għas-snin finanzjarji rispettivi wara l-adozzjoni tal-baġit annwali jew kif stipulat fis-sistema ta’ parti minn kull tnax proviżorja, sakemm ma tkunx il-bażi għall-impenji baġitarji mqassmin fi ħlasijiet parzjali annwali kif imsemmi fl-Artikolu 110(2).

3.Mingħajr ħsara għal kwalunkwe dispożizzjoni ta’ att bażiku, kwalunkwe bidla sostanzjali f’deċiżjoni ta’ finanzjament diġà adottata għandha ssegwi l-istess proċedura bħad-deċiżjoni iniżjali.

Artikolu 109
Operazzjonijiet ta’ nefqa

1.Kull partita tan-nefqa għandha tiġi impenjata, ivvalidata, awtorizzata u titħallas.

Fi tmiem il-perjodi msemmijin fl-Artikolu 112, il-bilanċ mhux użat tal-impenji baġitarji għandu jkun soġġett għal diżimpenn.

Meta jeżegwixxi operazzjonijiet, l-uffiċjal tal-awtorizzazzjoni responsabbli għandu jara li n-nefqa hija konformi mat-Trattati, mal-baġit, ma’ dan ir-Regolament u ma’ atti u regolamenti oħrajn adottati skont it-Trattati kif ukoll mal-prinċipju ta’ ġestjoni finanzjarja tajba.

2.Impenji baġitarji u impenji legali għandhom jiġu adottati mill-istess uffiċjal tal-awtorizzazzjoni , ħlief f'każijiet iġġustifikati kif xieraq. B’mod partikolari, fil-qasam ta’ operazzjonijiet ta’ għajnuna għall-immaniġġjar ta’ kriżijiet u ta’ għajnuna operazzjonali, l-impenji legali jistgħu jiġu ffirmati mill-Kapijiet tad-delegazzjonijiet tal-Unjoni, jew fin-nuqqas tagħhom mid-deputati tagħhom, fuq ordni tal-uffiċjal tal-awtorizzazzjoni responsabbli tal-Kummissjoni li, però, jibqa’ responsabbli għalkollox għat-tranżazzjoni sottostanti. Il-persunal impjegat mill-Kummissjoni fil-qasam ta’ operazzjonijiet ta’ mmaniġġjar ta’ kriżijiet u ta’ għajnuna umanitarja jista’ jiffirma impenji legali marbutin mal-ħlas eżegwit mill-kontijiet għall-antiċipi b’valur li ma jaqbiżx l-EUR 2 500.

L-uffiċjal tal-awtorizzazzjoni responsabbli għandu jagħmel impenn baġitarju qabel ma jidħol f’impenn legali ma’ partijiet terzi jew jittrasferixxi fondi f’fond fiduċjarju msemmi fl-Artikolu 227.

Dan l-obbligu ma għandux ikun applikabbli għal:

(a)impenji legali konklużi wara dikjarazzjoni ta’ sitwazzjoni ta’ kriżi fil-qafas tal-pjan tal-kontinwità tan-negozju, f'konformità mal-proċeduri adottati mill-Kummissjoni jew minn kwalunkwe istituzzjoni oħra taħt l-awtonomija amministrattiva tagħha;

(b)fil-każ ta’ operazzjonijiet ta’ għajnuna umanitarja, ta’ operazzjonijiet tal-protezzjoni ċivili u ta’ għajnuna għall-immaniġġar ta’ kriżijiet, jekk l-eżekuzzjoni effiċjenti tal-intervent tal-Unjoni teħtieġ li l-Unjoni tidħol f' impenn legali ma’ partijiet terzi immedjatament u ma jkunx possibbli li impenn baġitarju jiġi riżervat minn qabel. L-impenn baġitarju għandu jiġi rreġistrat vat mingħajr dewmien wara t-teħid ta’ impenn legali ma’ partijiet terzi.

3.Il-validazzjoni tan-nefqa hija l-att li bih l-uffiċjal tal-awtorizzazzjoni responsabbli jaċċetta li jiddebita partita tan-nefqa, wara li jivverifika d-dokumenti ta' sostenn li jikkonfermaw l-intitolament tal-kreditur skont il-kundizzjonijiet stipulati fl-impenn legali fejn ikun hemm impenn legali. Għal dan il-għan, l-uffiċjal tal-awtorizzazzjoni responsabbli għandu:

(a)jivverifika l-eżistenza tal-intitolament tal-kreditur;

(b)jiddetermina jew jivverifika r-realtà u l-ammont tal-pretensjoni permezz tal-ġira “[i]ċċertifikat korrett”;

(c)jivverifika l-kundizzjonijiet li fihom huwa dovut il-ħlas.

Minkejja dan li ntqal hawn fuq, il-validazzjoni tan-nefqa ma għandhiex tkun limitata għan-nefqa li hija ddebitata lill-baġit. Għandha tapplika wkoll għal rapporti interim jew finali mhux assoċjati ma’ talba għall-ħlas, f’liema każ l-impatt fuq is-sistema kontabilistika se jkun limitat għall-kontijiet ġenerali. Id-deċiżjoni ta’ validazzjoni għandha tiġi espressa permezz ta’ firma b’sigurtà elettronika kif imsemmi fl-Artikolu 141 mill-uffiċjal tal-awtorizzazzjoni jew minn membru tal-persunal teknikament kompetenti, mogħti s-setgħa kif xieraq b’deċiżjoni formali tal-uffiċjal tal-awtorizzazzjoni jew, f’eċċezzjonijiet, għall-fluss tax-xogħol fuq il-karta, fil-forma ta’ timbru li jinkorpora l-firma.

Bil-ġira “[i]ċċertifikat korrett”, l-uffiċjal tal-awtorizzazzjoni responsabbli jew membru tal-persunal teknikament kompetenti, mogħti s-setgħa kif xieraq mill-uffiċjal tal-awtorizzazzjoni responsabbli għandu jiċċertifika li:

(a)għall-prefinanzjament, il-kundizzjonijiet meħtieġa fl-impenn legali għall-ħlas għall-prefinanzjament huma ssodisfati;

(b)għall-pagamenti interim u tal-bilanċ f’kuntratti, is-servizzi stipulati fil-kuntratt ġew ipprovduti kif xieraq, il-provvisti ġew forniti kif xieraq jew li x-xogħol twettaq kif xieraq;

(c)għall-pagamenti interim u tal-bilanċ f’għotjiet, l-azzjoni jew il-progrmam ta’ ħidma mwettqin mill-benefiċjarju huma f’kull aspett konformi mal-ftehim ta’ għotja, inkluż, fejn applikabbli, li l-kostijiet iddikjarati mill-benefiċjajru huma eliġibbli. L-istess prinċipju huwa validu wkoll għal rapporti interim u finali mhux assoċjati ma’ talba ta’ ħlas.

4.L-awtorizzazzjoni tan-nefqa hija l-att li permezz tiegħu l-uffiċjal tal-awtorizzazzjoni responsabbli, wara li jkun ivverifika li l-approprjazzjonijiet ikunu disponibbli, jagħti struzzjoni lill-uffiċjal tal-kontabilità billi joħroġ ordni għall-ħlas, sabiex iħallas ammont tan-nefqa li jkun ġie vvalidat preċedentement.

Fejn isiru ħlasijiet perjodiċi fir-rigward tas-servizzi mogħtija, inklużi s-servizzi ta’ kiri jew ta’ merkanzija konsenjata, u bla ħsara għall-analiżi tar-riskju tal-uffiċjal tal-awtorizzazzjoni, l-uffiċjal tal-awtorizzazzjoni jista' jordna l-applikazzjoni ta’ sistema ta’ debitu dirett minn kont għall-antiċipi, jew jekk awtorizzat b’mod speċifiku mill-uffiċjal tal-kontabilità skont l-Artikolu 83(3).

5.Id-diżimpenn huwa l-operazzjoni li biha l-uffiċjal tal-awtorizzazzjoni responsabbli jħassar ir-riżerva kollha tal-approprjazzjonijiet jew parti mit-tali riżerva li qabel tkun saret b’impenn baġitarju.

Artikolu 110
Tipi ta’ impenji baġitarji

1.L-impenji baġitarji għandhom jidħlu f'waħda minn dawn il-kategoriji li ġejjin:

(a)individwali: meta r-riċevitur u l-ammont tan-nefqa jkunu magħrufin;

(b)globali: meta għall-anqas wieħed mill-elementi meħtieġa biex ikun identifikat l-impenn individwali jkun għadu mhux magħruf;

(c)proviżorji: sabiex ikopru n-nefqa tal-immaniġġjar ta’ rutina għall-FAEG kif imsemmi fl-Artikolu 11(2) u n-nefqa amministrattiva ta’ rutina meta l-ammont jew il-benefiċjarji finali ma jkunux magħrufin b’mod definittiv.

Madankollu, in-nefqa amministrattiva ta’ rutina relatata mad-delegazzjonijiet tal-Unjoni u mar-Rappreżentanti tal-Unjoni tista’ tkun koperta minn impenji proviżorji anki meta l-ammont u l-benefiċjarju finali jkunu magħrufin.

2.L-impenji baġitarji għal azzjonijiet li jestendu għal aktar minn sena finanzjarja jistgħu jitqassmu f'pagamenti annwali fuq diversi snin biss meta l-att bażiku jipprevedi dan jew meta jkunu għan-nefqa amministrattiva.

3.Impenn baġitarju globali għandu jittieħed fuq il-bażi ta’ deċiżjoni ta’ finanzjament.

L-aktar tard li jista’ jsir l-impenn baġitarju globali huwa qabel ma tittieħed id-deċiżjoni dwar ir-riċevituri u l-ammonti u, meta l-implimentazzjoni tal-approprjazzjonijiet ikkonċernati tkun tinvolvi l-adozzjoni ta’ programm ta’ ħidma, kmieni kemm jista’ jkun wara l-adozzjoni ta’ dak il-programm.

4.L-impenn baġitarju globali għandu jiġi implimentat billi jintlaħaq ftehim ta’ finanzjament, li fih innifsu jwassal għall-konklużjoni sussegwenti ta’ impenn legali wieħed jew aktar, jew inkella bil-konklużjoni ta’ impenn legali wieħed jew aktar.

Il-ftehimiet ta’ finanzjament fil-qasam tal-għajnuna finanzjarja diretta lil pajjiżi terzi, inkluż l-appoġġ baġitarju, li jikkostitwixxu impenji legali, jistgħu jagħtu lok għal ħlasijiet mingħajr il-konklużjoni ta’ impenji legali oħra.

Meta l-impenn globali jiġi implimentat bil-konklużjoni ta’ ftehim ta’ finanzjament, ma għandux ikun japplika t-tieni subparagrafu tal-paragrafu 3.

5.Kull impenn legali individwali adottat wara impenn baġitarju globali għandu, qabel jiġi ffirmat, ikun irreġistrat mill-uffiċjal tal-awtorizzazzjoni responsabbli fil-kontijiet tal-baġit ċentrali u jiġi rreġistrat fl-impenn baġitarju globali.

6.L-impenji baġitarji proviżorji għandhom jiġu implimentati bil-konklużjoni ta’ impenn legali wieħed jew aktar li jwassal għal intitolament għal pagamenti sussegwenti. Madankollu, f’każijiet relatati man-nefqa fuq l-immaniġġjar tal-persunal jew relatati man-nefqiet fuq il-komunikazzjoni li jsiru mill-istituzzjonijiet għall-kopertura ta’ avvenimenti tal-Unjoni jew fil-każijiet imsemmijin fil-punt 14.5 tal-Anness għal dan ir-Regolament, dawn jistgħu jiġu implimentati b’mod dirett b’pagamenti.

Artikolu 111
Impenji għall-approprjazzjonijiet tal-FAEG

1.Għal kull sena finanzjarja, l-approprjazzjonijiet tal-FAEG għandhom jinkludu approporjazzjonijiet mhux differenzjati, bl-eċċezzjoni għan-nefqa dwar il-miżuri msemmijin fl-Artikolu 4(2) u fl-Artikolu 6 tar-Regolament (KE) Nru 1306/2013, bl-eċċezzjoni tal-miżuri ffinanzjati minn assistenza teknika mhux operazzjonali u kontribuzzjonijiet lil aġenziji eżekuttivi, li għandhom ikunu koperti minn approprjazzjonijiet differenzjati.

2.Id-deċiżjonijiet tal-Kummissjoni li jistabbilixxu l-ammonti tar-rimborż ta’ dawn il-ħlasijiet għandhom jikkostitwixxu impenji proviżorji globali, li ma jistgħux jeċċedu l-approporjazzjonijiet totali mdaħħlin għall-FAEG.

3.L-impenji proviżorji globali għall-FAEG li jkunu saru għal sena finanzjarja u li ma jwasslux għal impenn fuq linji speċifiċi fin-nomeniklatura tal-baġit sal-1 ta’ Frar tas-sena finanzjarja segwenti għandhom ikunu kkanċellati fir-rigward tas-sena finanzjarja kkonċernata.

4.Nefqa effettwata mill-awtoritajiet u mill-korpi msemmija fir-regoli dwar il-FAEG għandha, fi żmien xahrejn mir-riċevuta tad-dikjarazzjonijiet mibgħutin mill-Istati Membri, tkun is-soġġett ta’ impenn skont il-kapitolu, l-artikolu u l-partita. Tali

5.impenji jistgħu jsiru wara li jgħaddi l-perjodu ta’ xahrejn meta hija meħtieġa proċedura għal trasferiment ta’ approporjazzjonijiet dwar il-linji tal-baġit relevanti. Ħlief meta ma jkunx għadu sar pagament mill-Istati Membri jew meta hemm dubju dwar l-eliġibilità, l-ammonti għandhom ikunu rreġistrati bħala ħlasijiet fl-istess perjodu ta’ xahrejn.

L-impenni li hemm riferiment għalihom fl-ewwel subparagrafu għandhom jitnaqqsu mill-impenn proviżorju globali msemmi fil-paragrafu 1.

6.Il-paragrafi 2 u 3 għandhom japplikaw soġġett għall-eżami u l-aċċettazzjoni tal-kontijiet.

Artikolu 112
Limiti ta’ żmien għall-impenji

1.Soġġetti għall-Artikoli 109(2) u 256(3), l-impenji legali li jirrigwardaw impenji individwali jew proviżorji tal-baġit għandhom ikunu konklużi sal-31 ta’ Diċembru tas-sena n.

2.L-impenji baġitarji globali għandhom ikopru l-kost totali tal-impenji legali korrispondenti konklużi sal-31 ta' Diċembru tas-sena n + 1.

Meta l-impenn baġitarju globali jwassal għall-għoti ta’ premju msemmi fit-Titolu IX, l-impenn legali msemmi fl-Artikolu 200(4) għandu jkun konkluż sal-31 ta’ Diċembru tas-sena n+3.

F’azzjonijiet esterni, meta l-impenn baġitarju globali jwassal għal ftehim ta’ finanzjament konkluż ma’ pajjiż terz, il-ftehimiet ta’ finanzjament għandhom ikunu konklużi sal-31 ta’ Diċembru tas-sena n+1, bis-sena n li hija dik li fiha sar l-impenn baġitarju. F’dan il-każ, l-impenn baġitarju globali għandu jkopri l-kostijiet tal-impenji legali li jimplimentaw il-ftehim ta’ finanzjament konkluż sa tmiem il-perjodu ta’ implimentazzjoni tal-ftehim ta’ finanzjament.

3.L-impenji baġitarji individwali u proviżorji għal azzjonijiet li jestendu għal aktar minn sena finanzjarja waħda, ħlief fil-każ ta’ nefqa fuq il-persunal, għandu jkollhom data finali għal-implimentazzjoni stabbilita, b'konformità mal-kundizzjonijiet fl-impenji legali li jirreferu għalihom, u filwaqt li jiġi kkunsidrat il-prinċipju ta’ ġestjoni finanzjarja tajba.

4.Xi partijiet tal-impenji baġitarji li ma jkunux ġew effettwati bi ħlasijiet fi żmien sitt xhur wara d-data finali għall-implimentazzjoni għandhom ikunu diżimpenjati f'konformità mal-Artikolu 13.

5.L-ammont ta’ impenn baġitarju li għalih ma sar l-ebda ħlas skont it-tifsira tal-Artikolu 113 f'perjodu ta’ sentejn wara l-iffirmar tal-impenn legali għandu jkun diżimpenjat, ħlief fejn dak ammont ikun relatat ma’ każi f'litigazzjoni quddiem qrati ġudizzjarji jew korpi arbitrali, fejn l-impenn legali jieħu l-forma ta’ ftehim ta’ finanzjament ma’ pajjiż terz jew fejn jeżistu dispożizzjonijiet speċjali stipulati fir-regoli speċifiċi għas-setturi.

Artikolu 113
Tipi ta’ pagamenti

1.Il-pagament tan-nefqa għandu jsir mill-uffiċjal tal-kontabilità fil-limiti tal-fondi disponibbli.

2.Il-pagament għandu jkopri operazzjoni waħda jew aktar minn dawn li ġejjin:

(a)il-pagament tal-ammont kollu dovut;

(b)il-pagament tal-ammont dovut bi kwalunkwe wieħed mill-modi li ġejjin:

(i)il-prefinanzjament li jipprovdi float, li jista’ jinqasam f’għadd ta’ pagamenti skont il-ġestjoni finanzjarja tajba u jitħallas fuq il-bażi tal-kuntratt, tal-ftehim jew tal-att bażiku, jew fuq il-bażi ta’ dokumenti ta’ sostenn li jagħmluha possibbli li jiġi vverifikat li l-patti tal-kuntratt jew tal-ftehim inkwistjoni jkunu qed jiġu rrispettati;

(ii)pagament interim wieħed jew aktar bħala kontroparti għat-twettiq parzjali tal-azzjoni jew tal-eżekuzzjoni tal-kuntratt. Huwa jista’ jikklerja l-prefinanzjament kollu jew parti minnu, bla ħsara għad-dispożizzjonijiet tal-att bażiku;

(iii)il-pagament tal-bilanċ tal-ammonti dovuti meta l-azzjoni jew il-kuntratt jiġu eżegwiti b’mod sħiħ.

(c)il-pagament ta’ provvediment fil-fond ta’ proviżjonament komuni stabbilit skont l-Artikolu 205.

Il-ħlas tal-bilanċ ma jistax jiġi ripetut u għandu jikklerja n-nefqa preċedenti kollha, għandha tinħareġ ordni ta’ rkupru sabiex jiġu rkuprati ammonti mhux użati.

3.Għandha ssir distinzjoni fil-kontabilità baġitarja bejn it-tipi differenti ta’ pagament imsemmija fil-paragrafu 2 fil-waqt li fih isir kull ħlas.

4.Ir-regoli tal-kontabilità msemmija fl-Artikolu 79 għandhom jinkludu r-regoli għall-approvazzjoni tal-prefinanzjament fil-kontijiet u għar-rikonoxximent tal-eliġibbiltà tal-kostijiet.

5.Il-pagamenti ta’ prefinanzjament għandhom ikunu approvati b'mod regolari mill-uffiċjal tal-awtorizzazzjoni responsabbli, skont in-natura ekonomika u mhux aktar tard minn tmiem il-proġett. L-ikklerjar ser isir fuq il-bażi tal-informazzjoni dwar il-kostijiet imġarrbin jew tal-konferma ta’ lħuq tal-kundizzjonijiet għall-ħlas skont l-Artikolu 121 kif ivvalidati mill-uffiċjal tal-awtorizzazzjoni skont l-Artikolu 109(3).

Għal ftehimiet ta’ għotja, għal kuntratti jew għal ftehimiet ta’ kontribuzzjoni ta’ aktar minn EUR 5 000 000, l-uffiċjal tal-awtorizzazzjoni għandu jikseb f’kull tmiem is-sena tal-anqas l-informazzjoni meħtieġa sabiex jikkalkola stima raġonevoli ta’ dawk il-kostijiet. Għad li din l-informazzjoni ma tistax tintuża għall-ikklerjar tal-prefinanzjament, ser tippermetti li kemm l-uffiċjal tal-awtorizzazzjoni kif ukoll l-uffiċjal tal-kontabilità jikkonformaw mal-obbligi stipulati fl-Artikolu 80(2).

Għall-finijiet tat-tieni subparagrafu, għandhom jiddaħħlu dispożizzjonijiet xierqa fl-impenji legali ffirmati.

Artikolu 114
Limiti ta' żmien għall-pagamenti

1.Il-pagamenti għandhom isiru f' perjodu ta':

(a)90 jum kalendarju għall-ftehimiet ta’ kontribuzzjoni, għall-kuntratti u għall-ftehimiet ta’ għotja li jinvolvu servizzi tekniċi jew azzjonijiet li huma partikolarment kumplessi biex jiġu evalwati u li għalihom il-pagament jiddependi fuq l-approvazzjoni ta’ rapport jew ta’ ċertifikat;

(b)60 jum kalendarju għall-ftehimiet ta’ kontribuzzjoni, għall-kuntratti u għall-ftehimiet ta’ għotja kollha l-oħrajn li għalihom il-pagament jiddependi fuq l-approvazzjoni ta’ rapport jew ta’ ċertifikat;

(c)30 jum kalendarju għall-ftehimiet ta’ kontribuzzjoni kollha l-oħrajn, għall-kuntratti u għall-ftehimiet ta’ għotja.

2.Iż-żmien permess sabiex isiru l-ħlasijiet jinftiehem bħala li jinkludi l-approvazzjoni, l-awtorizzazzjoni u l-ħlas tan-nefqa.

Huwa jibda minn dakinhar li tasal it-talba għal pagament.

Talba għal pagament tiġi rreġistrata mid-dipartiment awtorizzat tal-uffiċjal tal-awtorizzazzjoni responsabbli mill-aktar fis possibbli u titqies li ġiet riċevuta mid-data meta tiġi rreġistrata.

Id-data tal-pagament titqies li hija d-data meta jiġi ddebitat il-kont tal-istituzzjoni.

Talba għal pagament tinkludi l-elementi essenzjali li ġejjin:

(a)l-identifikazzjoni tal-kreditur;

(b)l-ammont;

(c)il-munita;

(d)id-data.

Fejn ikun hemm mill-anqas element essenzjali wieħed nieqes, it-talba għall-ħlas għandha tiġi rifjutata.

Il-kreditur għandu jiġi mgħarraf bil-miktub dwar iċ-ċaħda u r-raġunijiet għalih mill-aktar fis possibbli u fi kwalunkwe każ fi żmien 30 jum kalendarju mid-data tal-wasla tat-talba tal-ħlas.

3.L-uffiċjal tal-awtorizzazzjoni responsabbli jista' jissospendi l-limitu ta’ żmien għall-ħlas fejn:

(a)l-ammont tat-talba għal pagament mhuwiex dovut; jew

(b)ma ġewx ipprovduti d-dokumenti ta’ sostenn xierqa.

Jekk l-uffiċjal tal-awtorizzazzjoni responsabbli isir jaf b'informazzjoni li tqiegħed f'dubju l-eliġibbiltà tan-nefqa f'talba għal ħlas, huwa jista' jissospendi l-limitu ta’ żmien għal ħlas sabiex jivverifika, inkluż permezz ta’ kontrolli fuq il-post, li n-nefqa hija fil-fatt eliġibbli. Il-bqija taż-żmien li jifdal għall-ħlas għandu jibda mid-data li fiha jiġu riċevuti l-informazzjoni mitluba jew id-dokumenti riveduti jew titwettaq il-verifika ulterjuri meħtieġa, inklużi kontrolli fuq il-post.

Il-kredituri kkonċernati għandhom jiġu informati bil-miktub dwar ir-raġunijiet ta’ dik is-sospensjoni.

4.Ħlief fil-każ ta’ Stati Membri, il-Bank Ewropew tal-Investiment u l-Fond Ewropew tal-Investiment, malli jiskadu l-limiti ta’ żmien stabbiliti fil-paragrafu 1, il-kreditur għandu jkun intitolat għall-imgħax skont il-kundizzjonijiet li ġejjin:

(a)ir-rati tal-imgħax għandhom ikunu dawk imsemmija fl-Artikolu 97(2);

(b)l-imgħax għandu jkun jista’ jitħallas għall-perjodu bejn il-jum kalendarju wara li jiskadi l-limitu ta' żmien għall-pagament stabbilit fil-paragrafu 1 sal-jum tal-pagament.

Madankollu, f’każ li l-imgħax ikkalkolat skont l-ewwel subparagrafu jkun ta’ EUR 200 jew anqas, dan għandu jitħallas lill-kreditur biss wara talba li tiġi sottomessa fi żmien xahrejn mill-wasla tal-pagament tard.

5.Kull istituzzjoni għandha tibgħat lill-Parlament Ewropew u lill-Kunsill rapport dwar il-konformità mal-limiti ta’ żmien u dwar is-sospensjoni tal-limiti ta’ żmien stipulati fil-paragrafi 1 sa 4 ta’ dan l-Artikolu. Ir-rapport tal-Kummissjoni jkun mehmuż mas-sommarju tar-rapporti annwali tal-attività msemmijin fl-Artikolu 73(9).

Kapitolu 8
Awditur intern

Artikolu 115
Il-ħatra tal-awditur intern

1.Kull istituzzjoni għandha tistabbilixxi uffiċċju tal-awditjar intern li għandu jaħdem f'konformità man-normi internazzjonali relevanti. L-awditur intern maħtur mill-istituzzjoni għandu jwieġeb għal din tal-aħħar dwar il-verifika tal-operat xieraq tas-sistemi u l-proċeduri tal-implimentazzjoni tal-baġit. L-awditur intern la jista’ jkun uffiċjal tal-awtorizzazzjoni u lanqas uffiċjal tal-kontabilità.

2.Għall-iskopijiet tal-awditjar intern tas-SEAE, il-Kapijiet tad-delegazzjonijiet tal-Unjoni, li jkunu qed jaġixxu bħala uffiċjali tal-awtorizzazzjoni b'sottodelega skont l-Artikolu 58(2), għandhom ikunu soġġetti għas-setgħat ta’ verifika tal-awditur intern tal-Kummissjoni għall-ġestjoni finanzjarja sottodelegata lilhom.

L-awditur intern tal-Kummissjoni għandu jaġixxi wkoll bħala l-awditur intern tas-SEAE fir-rigward tal-implimentazzjoni tat-taqsima tas-SEAE tal-baġit.

3.Kull istituzzjoni għandha taħtar l-awditur intern tagħha skont l-arranġamenti adattati għall-karatteristiċi u għar-rekwiżiti speċifiċi tagħha. L-istituzzjoni għandha tinforma lill-Parlament Ewropew u lill-Kunsill dwar il-ħatra tal-awditur intern.

4.Skont il-karatteristiċi u r-rekwiżiti speċifiċi tagħha, kull istituzzjoni għandha tiddetermina l-ambitu tal-missjoni tal-awditur intern u tistabbilixxi fid-dettall l-objettivi u l-proċeduri għall-eżerċizzju tal-funzjoni ta’ awditjar intern b’rispett xieraq għall-istandards internazzjonali tal-awditjar intern.

5.L-istituzzjoni tista’ taħtar bħala awditur intern, minħabba l-kompetenza partikolari tiegħu, uffiċjal jew impjegat ieħor kopert mir-Regolamenti tal-Persunal magħżul minn fost iċ-ċittadini tal-Istati Membri.

6.Jekk ikun hemm żewġ istituzzjonijiet jew aktar li jaħtru l-istess awditur intern, dawn għandhom jagħmlu l-arranġamenti meħtieġa għalih sabiex jiġi ddikjarat bħala responsabbli għall-azzjonijiet tiegħu kif stipulat fl-Artikolu 119.

7.L-istituzzjoni għandha tinforma lill-Parlament Ewropew u lill-Kunsill meta jintemmu d-dmirijiet tal-awditur intern.

Artikolu 116
Setgħat u dmirijiet tal-awditur intern

1.L-awditur intern għandu jagħti pariri lill-istituzzjoni tiegħu dwar it-trattar tar-riskji, billi jippreżenta opinjonijiet indipendenti rigward il-kwalità ta’ sistemi ta’ ġestjoni u ta’ kontroll u billi jippreżenta rakkomandazzjonijiet għat-titjib fil-kundizzjonijiet tal-implimentazzjoni tal-operazzjonijiet u l-promozzjoni tal-ġestjoni finanzjarja tajba.

L-awditur intern għandu jkun responsabbli b'mod partikolari sabiex:

(a)jivvaluta l-adattabilità u l-effikaċja tas-sistemi interni tal-ġestjoni u l-prestazzjoni tat-dipartimenti fl-implimentazzjoni tal-politiki, tal-programmi u tal-azzjonijiet b'referenza għar-riskji assoċjati magħhom;

(b)jivvaluta l-effiċjenza u l-effikaċja tas-sistemi tal-kontroll intern u tal-awditjar applikabbli għal kull operazzjoni ta’ implimentazzjoni baġitarja.

2.L-awditur intern għandu jwettaq id-doveri tiegħu fir-rigward tal-attivitajiet u d-dipartimenti kollha tal-istituzzjoni. Hu għandu jgawdi aċċess sħiħ u mingħajr limitu għall-informazzjoni kollha meħtieġa biex iwettaq id-doveri tiegħu, jekk meħtieġ fuq il-post, inklużi fl-Istati Membri u f'pajjiżi terzi.

L-awditur intern għandu jieħu nota tar-rapport annwali tal-uffiċjali tal-awtorizzazzjoni u ta’ kwalunkwe biċċa informazzjoni oħra identifikata.

3.L-awditur intern għandu jirrapporta lill-istituzzjoni dwar dak li jsib u dwar ir-rakkomandazzjonijiet tiegħu. L-istituzzjoni għandha tassigura li tittieħed azzjoni fir-rigward tar-rakkomandazzjonijiet li jirriżultaw mill-awditjar. L-awditur intern għandu wkoll jippreżenta lill-istituzzjoni rapport annwali tal-awditjar intern li fih jindika n-numru u t-tip ta’ awditi interni li hu jkun wettaq, ir-rakkomandazzjonijiet magħmula u l-azzjoni meħuda fir-rigward ta’ dawk ir-rakkomandazzjonijiet.

Kull istituzzjoni tikkunsidra jekk ir-rakkomandazzjonijiet magħmula fir-rapporti tal-awditur intern tagħha humiex adatti għal skambju tal-aħjar prattiki ma’ istituzzjonijiet oħra.

4.L-awditur intern għandu jippreżenta wkoll lill-istituzzjoni rapport annwali tal-awditjar intern li fih jindika n-numru u t-tip ta’ awditi interni li hu jkun wettaq, ir-rakkomandazzjonijiet ewlenin magħmula u l-azzjoni meħuda fir-rigward ta’ dawk ir-rakkomandazzjonijiet.

Dak ir-rapport annwali jsemmi wkoll kwalunkwe problema sistemika li tiġi osservata mill-grupp imwaqqaf skont l-Artikolu 139 fejn jagħti l-opinjoni msemmija fl-Artikolu 90.

5.L-awditur intern għandu, matul l-elaborazzjoni tar-rapport tiegħu, jiffoka partikolarment fuq il-konformità globali mal-prinċipju tal-ġestjoni finanzjarja tajba u għandu jiżgura li jkunu ttieħdu l-miżuri xierqa sabiex konsistentement tittejjeb l-applikazzjoni tagħha.

6.Kull sena, il-Kummissjoni għandha, fil-kuntest tal-proċedura ta' kwittanza u f'konformità mal-Artikolu 319 tat-TFUE, tibgħat, fuq talba, ir-rapport annwali tal-awditjar intern tagħha skont it-tifsira tal-paragrafu 3 ta' dan l-Artikolu b'kunsiderazzjoni xierqa għar-rekwiżiti ta' kunfidenzjalità.

7.L-istituzzjoni għandha tagħmel disponibbli d-dettalji ta’ kuntatt tal-awditur intern għal kull persuna fiżika jew ġuridika involuta f'operazzjonijiet ta’ nefqa, għall-finijiet ta’ kuntattar kunfidenzjali tal-awditur intern.

8.Kull sena, l-istituzzjoni għandha tabbozza rapport li fih sommarju tan-numru u tat-tip ta’ awditi interni mwettqin, ir-rakkomandazzjonijiet magħmulin u l-azzjoni meħuda fuq dawk ir-rakkomandazzjonijiet u tgħaddih lill-Parlament Ewropew u lill-Kunsill kif stipulat fl-Artikolu 239.

9.Ir-rapporti u s-sejbiet tal-awditur intern, kif ukoll ir-rapport tal-istituzzjoni, għandhom ikunu aċċessibbli għall-pubbliku biss wara validazzjoni mill-awditur intern tal-azzjoni meħuda għall-implimentazzjoni tagħhom.

10.L-istituzzjoni għandha tipprovdi r-riżorsi meħtieġa biex l-awditur intern ikun jista’ jaqdi sew il-funzjoni tiegħu ta’ awditjar intern, kif ukoll karta tal-missjoni li tiddeskrivi fid-dettall il-kompiti, id-dmirijiet u l-obbligi tiegħu.

Artikolu 117
Programm ta’ ħidma tal-awditur intern

1.L-awditur intern jadotta l-programm ta’ ħidma tiegħu u jissottomettih lill-istituzzjoni.

2.L-istituzzjoni tista’ titlob lill-awditur intern biex iwettaq awditi li ma jkunux inklużi fil-programm ta’ ħidma msemmi fil-paragrafu 1.

Artikolu 118
Indipendenza tal-awditur intern

1.L-awditur intern igawdi minn indipendenza totali fit-twettiq tal-awditi tiegħu. Regoli speċjali applikabbli għall-awditur intern għandhom ikunu stabbiliti mill-istituzzjoni u għandhom ikunu tali li jiggarantixxu li l-awditur intern ikun kompletament indipendenti fit-twettiq tad-doveri tiegħu, u jistabbilixxu r-responsabbilità tal-awditur intern.

2.Huwa ma jistax jingħata struzzjonijiet u ma jistax ikun ristrett b’xi mod fir-rigward tal-funzjonijiet li, minħabba l-ħatra tiegħu, huma mogħtija lilu skont ir-Regolament Finanzjarju.

3.Jekk l-awditur intern hu membru tal-persunal, huwa għandu jeżerċita l-funzjonijiet esklużivi ta’ awditur b'indipendenza totali u jassumi r-responsabbiltà kif stabbilit fir-Regolamenti tal-Persunal u stabbilit fl-atti delegati adottati skont dan ir-Regolament.

Artikolu 119
Ir-responsabbiltà tal-awditur intern

L-istituzzjoni weħidha, billi timxi skont dan l-Artikolu, tista’ taġixxi biex l-awditur intern, bħala uffiċjal jew impjegat ieħor soġġett għar-Regolamenti tal-Persunal, ikun iddikjarat bħala responsabbli għall-azzjonijiet tiegħu.

L-istituzzjoni għandha tieħu deċiżjoni motivata biex tibda investigazzjoni. Dik id-deċiżjoni għandha tiġi kkomunikata lill-parti interessata. Taħt ir-responsabbiltà diretta tagħha, l-istituzzjoni tista’ tgħaddi l-investigazzjoni f’idejn uffiċjal wieħed jew aktar, ta’ grad ugwali jew ogħla minn dak tal-membru tal-persunal ikkonċernat. Il-fehmiet tal-parti interessata għandhom jinstemgħu matul l-investigazzjoni.

Ir-rapport tal-investigazzjoni għandu jintbagħat lill-parti interessata, li mbagħad għandha tinstema’ mill-istituzzjoni fuq is-suġġett ta’ dak ir-rapport.

Abbażi tar-rapport u tas-smigħ, l-istituzzjoni għandha tadotta deċiżjoni motivata li ttemm il-proċeduri jew deċiżjoni motivata skont l-Artikoli 22, 86 u l-Anness IX tar-Regolamenti tal-Persunal. Id-deċiżjonijiet li jimponu miżuri dixxiplinarji jew penali finanzjarji għandhom jiġu nnotifikati lill-parti interessata u jintbagħtu, għall-finijiet ta’ informazzjoni, lill-istituzzjonijiet l-oħra u lill-Qorti tal-Awdituri.

Il-parti interessata tista’ tiftaħ kawża fir-rigward ta’ tali deċiżjonijiet quddiem il-Qorti tal-Ġustizzja tal-Unjoni Ewropea, kif previst fir-Regolamenti tal-Persunal.

Artikolu 120
Kawża quddiem il-Qorti tal-Ġustizzja tal-Unjoni Ewropea

Bla ħsara għar-rimedji permessi mir-Regolamenti tal-Persunal, l-awditur intern jista’ jiftaħ kawża direttament quddiem il-Qorti tal-Ġustizzja tal-Unjoni Ewropea għal kull att relatat mal-qadi ta’ dmirijietu bħala awditur intern. Kawża bħal din għandha tiġi ppreżentata fi żmien tliet xhur mill-jum kalendarju li fih ikun innotifikat l-att inkwistjoni.

Tali kawżi għandhom jiġu investigati u jinstemgħu kif stipulat fl-Artikolu 91(5) tar-Regolamenti tal-Persunal għall-Uffiċjali tal-Unjoni Ewropea.

TITOLU V
REGOLI KOMUNI

KAPITOLU 1
REGOLI APPLIKABBLI GĦAL IMPLIMENTAZZJONI DIRETTA, INDIRETTA U KONDIVIŻA

Artikolu 121
Forom ta’ kontribuzzjoni tal-Unjoni

1.Il-kontribuzzjonijiet tal-Unjoni f’implimentazzjoni diretta, kondiviża u indiretta għandhom jgħinu sabiex jinkisbu objettiv tal-politika tal-Unjoni u r-riżultati speċifikati u jistgħu jieħdu kwaulnkwe forma minn dawn li ġejjin:

(a)rimborż ta’ spejjeż eliġibbli verament imġarrba;

(b)kostijiet unitarji li jkopru kull kategorija speċifika tal-kostijiet eliġibbli jew uħud minnhom li jkunu identifikati b’mod ċar minn qabel b’referenza għal ammont għal kull unità;

(c)somom f’daqqa li jkopru f’termini globali l-kategoriji speċifiċi kollha tal-kostijiet eliġibbli jew uħud minnhom li jkunu identifikati b’mod ċar minn qabel;

(d)finanzjament b’rata fissa, li jkopri kategoriji speċifiċi ta’ kostijiet eliġibbli, li huma identifikati b’mod ċar minn qabel, billi jiġi applikat perċentwal;

(e)finanzjament mhux marbut ma’ kostijiet tal-operazzjonijiet rilevanti fuq il-bażi ta’:

i)l-issodsfar tal-kundizzjonijiet stipulati fil-leġiżlazzjoni speċifika għas-settur jew Deċiżjonijiet tal-Kummissjoni jew

ii)il-kisba tar-riżultati mkejla b’referenza għat-tragwardi stabbiliti preċedentement jew permezz ta’ indikaturi tal-prestazzjoni;

(f) taħlita tal-forom imsemmijin fil-punti (a) sa (e).

Il-kontribuzzjonijiet tal-Unjoni skont il-punti (b), (c) u (d) għandhom ikunu stabbiliti skont l-Artikolu 175 jew leġiżlazzjoni speċifika għas-settur. Il-kontribuzzjonijiet tal-Unjoni skont il-punt (e) għandhom ikunu stabbiliti skont l-Artikolu 175, leġiżlazzjoni speċifika għas-settur jew deċiżjoni tal-Kummissjoni.

2.Meta tkun qed tiġi ddeterminata l-forma xierqa ta’ kontribuzzjoni, l-interessi tar-riċevituri potenzjali u l-metodi ta’ kontabilità għandhom jitqiesu kemm jista' jkun.

Artikolu 122
Kontrodipendenza fuq il-valutazzjoni

Il-Kummissjoni tista’ tiddependi bis-sħiħ jew b’mod parzjali fuq valutazzjonijiet magħmulin minnha stess jew minn entitajiet oħrajn, inklużi d-donaturi, diment li dawn il-valutazzjonijiet ikunu saru fir-rigward ta’ kundizzjonijiet ekwivalenti għal dawk stipulati f’dan ir-Regolament għall-metodu ta’ implimentazzjoni tal-baġit applikabbli. Għal dan il-għan, il-Kummissjoni għandha tippromwovi r-rikonoxximent ta’ standards aċċettati internazzjonalment jew l-aħjar prattiki internazzjonali.

Artikolu 123
Kontrodipendenza fuq l-awditi

Meta awditur indipendenti jkun għamel awditu bbażat fuq standards aċċettati internazzjonalment li jipprovdu garanzija raġonevoli fuq id-dikjarazzjonijiet finanzjarji u r-rapporti li juru l-użu tal-kontribuzzjoni tal-Unjoni, dak l-awditu għandu jifforma l-bażi tal-garanzija kumplessiva, kif speċifikata aktar, fejn xieraq, fir-regoli speċifiċi għas-settur.

Artikolu 124
Kooperazzjoni għall-ħarsien tal-interessi finanzjarji tal-Unjoni

1.Kwalunkwe persuna jew entità li tirċievi fondi tal-Unjoni għandha tikkoopera bis-sħiħ fil-protezzjoni tal-interessi finanzjarji tal-Unjoni u, bħala kundizzjoni għar-riċevuta tal-fondi, tagħti d-drittijiet neċessarji u l-aċċess meħtieġ lill-uffiċjal tal-awtorizzazzjoni responsabbli, lill-Uffiċċju Ewropew Kontra l-Frodi (OLAF) u lill-Qorti Ewropea tal-Awdituri (QEA), u fejn xieraq lill-awtoritajiet nazzjonali rilevanti, sabiex jeżerċitaw il-kompetenzi rispettivi tagħhom b’mod komprensiv. Fil-każ tal-OLAF, dan għandu jinkludi d-dritt li jwettaq investigazzjonijiet, inklużi verifiki u spezzjonijiet fuq il-post.

2.Kwalunkwe persuna jew entità li tirċievi fondi tal-Unjoni b’implimentazzjoni diretta u indiretta għandha taqbel bil-miktub li tagħti d-drittijiet neċessarji msemmijin fil-paragrafu 1. Dan jinkludi l-obbligu għal kwalunkwe parti terza involuta fl-implimentazzjoni tal-fondi tal-Unjoni sabiex jiżguraw drittijiet ekwivalenti.

Artikolu 125
It-trasferiment ta’ riżorsi għal strumenti stabbiliti skont dan ir-Regolament jew Regolamenti speċifiċi għas-settur

Ir-riżorsi allokati lill-Istati Membri b’implimentazzjoni kondiviża jistgħu, fuq it-talba tagħhom, jiġu ttrasferiti lil strumenti stabbiliti skont dan ir-Regolament jew Regolamenti speċifiċi għas-settur. Il-Kummissjoni għandha timplimenta dawn ir-riżorsi skont il-punt (a) jew (c) tal-Artikolu 61(1), fejn possibbli għall-benefiċċju tal-Istat Membru kkonċernat. Barra minn hekk, riżorsi allokati lill-Istati Membri b’implimentazzjoni kondiviża jistgħu fuq it-talba tagħhom jintużaw sabiex isaħħu l-kapaċità ta’ rfigħ tar-riskji tal-FEIS. F'dawn il-każijiet, għandhom ikunu japplikaw ir-regoli tal-FEIS.

KAPITOLU 2
REGOLI APPLIKABBLI GĦAL IMPLIMENTAZZJONI INDIRETTA

Taqsima 1
REGOLI DWAR IL-PROĊEDURI U L-IMPLIMENTAZZJONI

Artikolu 126
Sħubijiet finanzjarji qafas

1.Il-Kummissjoni tista’ tistabbilixxi ftehimiet qafas ta’ sħubija finanzjarja għal kooperazzjoni fit-tul ma’ persuni u ma’ entitajiet li jimplimentaw il-fondi tal-Unjoni skont il-punt (c) tal-Artikolu 61(1) jew benefiċjarji. Il-ftehimiet qafas ta’ sħubija finanzjarja għandhom jiġu riveduti mill-anqas darba kull qafas Finanzjarju Pluriennali bla ħsara għall-punt (c) tal-paragrafu 4. Ftehimiet ta’ kontribuzzjoni jew ftehimiet ta’ għotja jistgħu jiġu ffirmati skont dawn il-ftehimiet.

2.Il-ftehim qafas ta’ sħubija finanzjarja għandu jispeċifika l-forom ta’ kooperazzjoni finanzjarja, l-objettivi komuni tal-kooperazzjoni kif ukoll il-prinċipji li jirregolaw tali kooperazzjoni bejn il-Kummissjoni u persuni u entitajiet li jimplimentaw fondi tal-Unjoni skont il-punt (c) tal-Artikolu 61(1) jew benefiċjarji. Dawn il-ftehimiet għandhom jirriflettu wkoll kemm il-Kummissjoni tista’ tiddependi fuq is-sistemi u l-proċeduri tal-persuni jew tal-entitajiet li jimplimentaw il-fondi tal-Unjoni skont il-punt (c) tal-Artikolu 61(1) jew tal-benefiċjarji, inklużi l-proċeduri tal-awditjar.

3.Sabiex jiġu ottimizzati l-kostijiet u l-benefiċċji tal-awditi u tiġi ffaċilitata l-koordinazzjoni, jistgħu jiġu konklużi ftehimiet ta’ awditjar jew verifika ma’ persuni u entitajiet li jimplimentaw fondi skont il-punt (c) tal-Artikolu 61(1) jew ma’ benefiċjarji tal-għotjiet. Fil-każ tal-Bank Ewropew tal-Investiment, għandu jkun japplika l-ftehim tripartitiku konkluż mal-Kummissjoni u mal-Qorti Ewropea tal-Awdituri.

4.Fil-każ ta’ sħubijiet finanzjarji qafas implimentati permezz ta’ għotjiet speċifiċi:

(a)il-ftehim għandu, minbarra l-paragrafu 2, jispeċifika:

(i)in-natura tal-azzjonijiet jew il-programmi ta’ ħidma previsti;

(ii)il-proċedura għall-għoti ta’ għotjiet speċifiċi, f’konformità mal-prinċipji u r-regoli proċedurali fit-Titolu VIII;

(b)id-dispożizzjonijiet tal-ftehim qafas ta’ sħubija finanzjarja u l-ftehim ta’ għoti speċifiku għandhom, flimkien, jikkonformaw mar-rekwiżiti tal-Artikolu 194;

(c)id-durata tas-sħubija ma tistax taqbeż l-erba’ snin ħlief f’każijiet iġġustifikati kif xieraq;

(d)is-sħubija finanzjarja qafas għandha tintuża skont il-prinċipji ta’ trasparenza u trattament indaqs tal-applikanti;

(e)is-sħubija finanzjarja qafas għandha tiġi ttrattata bħala għotja fir-rigward tal-programmazzjoni, il-pubblikazzjoni ex ante u l-għoti;

(f)għotjiet speċifiċi bbażati fuq it-tali sħubija għandhom ikunu soġġetti għall-proċeduri ta’ pubblikazzjoni ex ante msemmijin fil-paragrafu 2 tal-Artikolu 183.

5.Il-ftehim qafas ta’ sħubija finanzjarja implimentat permezz ta’ għotjiet speċifiċi jista’ jipprovdi għad-dipendenza fuq is-sistemi u l-proċeduri tal-benefiċjarju skont il-paragrafu 2 meta dawk is-sistemi u l-proċeduri jkunu ġew ivvalutati skont il-paragrafi 2, 3 u 4 tal-Artikolu 149. F’dan il-każ, ma għandux ikun japplika l-punt (d) tal-Artikolu 189(1). Meta l-proċeduri tal-benefiċjarju għall-forniment ta’ finanzjament lil partijiet terzi msemmijin fil-punt (d) tal-Artikolu 149(4) ikunu ġew ivvalutati b’mod pożittiv, ma għandhomx ikunu japplikaw l-Artikolu 197 u l-Artikolu 198.

6.Fil-każ ta’ ftehim qafas ta’ sħubija finanzjarja implimentat permezz ta’ għotjiet speċifiċi, il-verifika tal-kapaċità operazzjonali u finanzjarja msemmija fl-Artikolu 191 għandha ssir qabel l-iffirmar tal-ftehim qafas ta’ sħubija finanzjarja. Il-Kummissjoni tista’ tiddependi fuq verifika ekwivalenti tal-kapaċità finanzjarja u operazzjonali mwettqa minn donaturi oħrajn.

7.Fil-każ ta’ sħubijiet finanzjarji qafas implimentati permezz ta’ ftehimiet ta’ kontribuzzjoni, id-dispożizzjonijiet tal-ftehim qafas ta’ sħubija finanzjarja u l-ftehim ta’ kontribuzzjoni għandhom, flimkien, jikkonformaw mar-rekwiżiti tal-Artikolu 150(4) u tal-Artikolu 124.

8.Il-Kummissjoni għandha tieħu impenn li tarmonizza l-obbligi ta’ rapportar tagħha ma’ dawk ta’ donaturi oħrajn.

Artikolu 127
Sospensjoni, terminazzjoni u tnaqqis

1.Meta l-proċedura ta’ aġġudikazzjoni tkun ġiet soġġetta għal irregolaritajiet jew frodi, l-uffiċjal tal-awtorizzazzjoni responsabbli għandu jissospendi l-proċedura u jkun jista' jieħu kwalunkwe miżuri li jkunu meħtieġa, inkluża l-kanċellazzjoni tal-proċedura. L-uffiċjal tal-awtorizzazzjoni responsabbli minnufih jinforma lill-Uffiċċju Ewropew Kontra l-Frodi dwar suspett ta’ każi ta’ frodi.

2.Meta, wara l-għoti, jintwera bil-provi li l-proċedura ta’ għoti kienet soġġetta għal irregolaritajet jew frodi, l-uffiċjal tal-awtorizzazzjoni responsabbli jista’:

(a)jiċħad milli jiffirma l-impenn legali jew iħassar l-għoti ta’ premju;

(b)jissospendi l-pagamenti;

(c)jissospendi l-implimentazzjoni tal-impenn legali;

(d)fejn xieraq, jittermina l-impenn legali sħiħ jew fir-rigward ta’ riċevitur wieħed.

3.L-uffiċjal tal-awtorizzazzjoni responsabbli jista’ jissospendi wkoll il-pagamenti jew l-implimentazzjoni tal-impenn legali fejn:

(a)jintwera bil-provi li l-implimentazzjoni tal-impenn legali kienet soġġetta għal irregolaritajiet, frodi jew ksur tal-obbligi;

(b)hemm bżonn li jiġi vverifikat jekk fil-fatt seħħewx l-irregolaritajiet, il-frodi jew il-ksur ta’ obbligi preżunti;

(c)irregolaritajiet, frodi jew ksur tal-obbligi jixħtu dubju fuq l-affidabbiltà jew l-effettività tas-sistemi ta’ kontroll intern ta’ entità jew persuna li timplimenta l-fondi tal-Unjoni skont il-punt (c) tal-Artikolu 61(1) jew il-legalità u r-regolarità tat-tranżazzjonijiet sottostanti.

Meta l-irregolaritajiet, il-frodi jew il-ksur ta’ obbligi preżunti msemmijin fil-punt (b) tal-ewwel subparagrafu ma jkunux ikkonfermati, l-implmentazzjoni jew il-pagamenti għandhom jissoktaw mill-aktar fis possibbli.

L-uffiċjal tal-awtorizzazzjoni responsabbli jista’ jittermina l-impenn legali sħiħ jew fir-rigward ta’ riċevitur wieħed fil-każijiet imsemmijin fil-punti (a) u (c) tal-ewwel subparagrafu.

4.Minbarra l-miżuri msemmijin fil-paragrafi 2 jew 3, l-uffiċjal tal-awtorizzazzjoni responsabbli jista’ jnaqqas l-għotja, il-premju, il-kontribuzzjoni skont il-ftehim ta’ kontribuzzjoni jew il-premju skont kuntratt b’mod proporzjonat għas-serjetà tal-irregolaritajiet, tal-frodi jew tal-ksur ta’ obbligi, inkluż fejn l-attivitajiet ikkonċernati ma jkunux ġew implimentati jew ikunu ġew implimentati ħażin, b’mod parzjali biss jew tard.

Fil-każ tal-finanzjament imsemmi fil-punt (e) tal-Artikolu 121(1), l-uffiċjal tal-awtorizzazzjoni responsabbli jista’ jnaqqas il-kontribuzzjoni b’mod proporzjonat jekk ir-riżultati nkisbu b’mod ħażin, b’mod parzjali biss jew tard jew jekk ma jkunux ġew issodisfati l-kundizzjonijiet.

5.Il-punti (b), (c) u (d) tal-paragrafu 2 u l-paragrafu 3 ma għandhomx japplikaw għal applikanti f’kompetizzjoni għal premji.

Artikolu 128
Żamma tar-rekords

1.Ir-riċevituri għandhom iżommu rekords, dokumenti ta' prova, rekords statistiċi u rekords oħrajn li jappartjenu għall-finanzjament, inklużi rekords u dokumenti f’format elettroniku, għal ħames snin wara l-pagament tal-bilanċ jew, fin-nuqqas tat-tali pagament, it-tranżazzjoni. Dan il-perjodu għandu jkun ta’ tliet snin meta l-finanzjament ikun jammonta għal 60 000 EUR jew anqas.

2.Rekords u dokumenti li jappartjenu għal awditi, appelli, tilwima, it-tiftix ta’ pretensjonijiet relatati mal-impenn legali jew ma’ investigazzjonijiet tal-Uffiċċju Ewropew Kontra l-Frodi jekk innotifikati lir-riċevitur, għandhom jinżammu sakemm tali awditi, appelli, tilwim, pretensjonijiet jew investigazzjonijiet ikunu ngħalqu.

3.Ir-rekords u d-dokumenti għandhom jinżammu jew fil-forma oriġinali tagħhom, jew bħala kopji awtentifikati tal-oriġinali, jew fuq mezzi tal-ħażna tad-dejta aċċettati b’mod komuni inklużi verżjonijiet elettroniċi ta’ dokumenti oriġinali jew dokumenti li jeżistu f’verżjoni elettronika biss. F’dan l-aħħar każ, ma għandu jkun meħtieġ ebda oriġinal meta dawn id-dokumenti jissodisfaw ir-rekwiżiti legali applikabbli sabiex jitqiesu konformi mal-oriġinali u sabiex wieħed ikun jista’ jiddependi fuqhom għal finijiet tal-awditjar.

Artikolu 129
Proċedura kontradittorja u mezzi ta’ rimedju

1.Qabel ma jadotta xi miżura li taffettwa b’mod avvers id-drittijiet ta’ parteċipant jew ta’ riċevitur, l-uffiċjal tal-awtorizzazzjoni responsabbli għandu jara li l-parteċipant jew ir-riċevitur ingħata l-opportunità li jissottometti osservazzjonijiet.

2.Meta miżura ta’ uffiċjal tal-awtorizzazzjoni tolqot b'mod avvers id-drittijiet ta’ parteċipant jew ta’ riċevitur l-att li jistabbilixxi dik il-miżura għandu jkun fih indikazzjoni tal-mezzi disponibbli ta’ rimedju amministrattiv u/jew ġudizzjarju għall-kontestazzjoni tiegħu.

Artikolu 130
Tnaqqisiet tar-rata tal-imgħax u sussidji għat-tariffa ta’ garanzija