52015DC0032

TWEĠIBIET TAL-KUMMISSJONI GĦAR-RAPPORT SPEĊJALI TAL-QORTI EWROPEA TAL-AWDITURI

“L-APPOĠĠ TAL-UE GĦALL-PREVENZJONI U R-RESTAWR TAL-ĦSARA LILL-FORESTI KKAWŻATI MINN NIRIEN U DIŻASTRI NATURALI HUMA ĠESTITI SEW?”

Sommarju Eżekuttiv

IV. Il-Kummissjoni tqis li b’mod ġenerali l-miżuri ta’ prevenzjoni tal-foresti kkontribwew għall-objettivi tal-programmi għall-iżvilupp rurali. Inkisbu riżultati konkreti u seħħew inqas okkorrenzi ta’ nar. Barra minn hekk, ittieħdu tagħlimiet li se jiġu applikati b’rabta mal-perjodu 2014-2020, speċjalment fir-rigward tal-kamp ta’ applikazzjoni tal-miżura u gwida mtejba.

V. Ir-Regolament dwar l-Iżvilupp Rurali[1] jipprovdi li l-azzjonijiet preventivi kontra n-nirien għandhom ikopru ż-żoni li l-Istati Membri jikklassifikaw bħala żoni ta’ riskju ta’ nirien għoli jew medju skont il-pjanijiet tagħhom ta’ protezzjoni. Dawn il-pjanijiet ta’ protezzjoni tal-foresta u l-programmi nazzjonali jew subnazzjonali jew strumenti ekwivalenti tal-Istati Membri pprovdew bażi xierqa biex ikunu missielta u prijoritizzati matul l-għażla.

Il-Kummissjoni analizzat is-sitwazzjoni fis-settur tal-foresti inkluż aspetti ta’ prevenzjoni u monitoraġġ tal-foresti fid-Dokument ta’ Ħidma tal-Persunal tal-Kummissjoni tal-2005, li kien jifforma anness mal-Komunikazzjoni dwar l-implimentazzjoni tal-Istrateġija tal-Forestrija tal-UE[2]. Ir-Regolament dwar l-Iżvilupp Rurali talab sbiex il-miżuri forestali jikkontribwixxu għall-implimentazzjoni tal-Istrateġija tal-Forestrija tal-Komunità. L-Istrateġija tal-Forestrija msemmija hawn fuq tkopri l-aspetti ekonomiċi, ambjentali u soċjali ta’ ġestjoni sostenibbli tal-foresti.

Fir-rigward tal-perjodu ta’ programmazzjoni ġdid, il-Kummissjoni analizzat is-sitwazzjoni fis-settur tal-foresti fid-Dokument ta’ Ħidma tal-Persunal tal-Kummissjoni tal-2013, li kien jifforma anness mal-Komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni: "Strateġija ġdida tal-UE għall-Foresti: għall-foresti u għas-settur ibbażat fuq il-foresti".[3]

VI. Bħala parti minn prattiki ta’ ġestjoni sostenibbli tal-foresti, toroq tal-foresti (jew investimenti oħra) mibnija primarjament għal skopijiet ta’ prevenzjoni kontra n-nirien, jistgħu jintużaw ukoll għal azzjonijiet preventivi kontra riskji oħrajn kif ukoll għal xogħlijiet ta' restawr u rimedju, rikreazzjoni jew skopijiet ekonomiċi. Il-ħolqien ta’ netwerk xieraq tat-toroq tal-foresti mhux biss jikkontribwixxi għal protezzjoni aħjar tal-foresti kontra nirien, imma wkoll għal valutazzjoni ekonomika sostenibbli tar-riżorsi forestali f’ħafna reġjuni. Ta’ spiss, dawn l-azzjonijiet jeħtieġu li jsiru sabiex jiġi evitat telf komplet ta’ interess soċjoekonomiku ta’ żoni ta’ foresti li jistgħu jwasslu biex dawn jiġu abbandunati u, fl-aħħar mill-aħħar, għal żieda fir-riskju ta’ nar.

Rigward il-perjodu l-ġdid ta’ programmazzjoni, tħejjew dokumenti ta’ gwida sabiex jiġi żgurat li l-Istati Membri / ir-Reġjuni jużaw il-miżura b'mod korrett. Barra minn hekk, l-Istati Membri / ir-Reġjuni jridu jispeċifikaw il-ħtiġijiet u r-raġunijiet tagħhom aħjar, jekk jixtiequ jespandu d-densità tas-sistemi tat-toroq tagħhom.

VII. Skont il-ġestjoni kondiviża, il-Kummissjoni tadotta l-PŻR nazzjonali jew reġjonali, filwaqt li l-implimentazzjoni u l-iżgurar tal-kosteffettività u l-effiċjenza tal-appoġġ huma taħt ir-responsabbiltà tal-Istati Membri u l-Awtoritajiet ta’ Ġestjoni tagħhom.

Fir-rigward tal-użu ta’ xogħol manwali minflok makkinarju, xi kultant tali għażliet jistgħu jiġu marbuta mal-karatteristiċi tat-terren (l-orografija, l-aspetti ambjentali eċċ.) u għandu jitqies f’kuntest usa’ għall-iżvilupp rurali.

VIII. Huwa meħtieġ bilanċ bejn l-ispejjeż tal-monitoraġġ u l-valutazzjoni u l-benefiċċji potenzjali tagħhom.  B’mod speċjali, fil-każ ta’ kejl ta’ azzjonijiet preventivi huwa diffiċli u b’hekk għoli biex tiġi stabbilita katina ta’ kawżalità. Barra minn hekk, l-effettività ta’ interventi tal-forestrija partikolari tista’ tiġi evalwata biss wara diversi snin jew għexieren ta’ snin.

Fir-rigward tal-perjodu 2014-2020, sar titjib.  Pereżempju, indikatur ġdid ta' “erja appoġġata” għal azzjonijiet preventivi se jinġabru mis-CMEs (Eżerċizzju ta' Maniġġar ta' Kriżijiet). Barra minn hekk, sabiex jinkisbu riżultati ta' evalwazzjoni ta' valur, huwa previst Rapport ta’ Implimentazzjoni Annwali mtejjeb fl-2019. Fil-qafas ta’ dan ir-rapport, se ssir evalwazzjoni tal-PŻR u se jiġu pprovduti l-ewwel riżultati dwar l-effiċjenza tal-PŻR.

IX.

L-ewwel inċiż

(b) Il-Kummissjoni tikkunsidra li l-foresti Natura 2000 jirrappreżentaw valuri ambjentali għoljin u jipproduċu servizzi ta' ekosistema importanti u diversi.  Barra minn hekk, diversi dispożizzjonijiet Natura 2000 japplikaw għall-foresti kollha fl-UE, kemm fis-siti ta’ Natura 2000 kif ukoll barra minnhom u f’dan ir-rigward ir-rwol tal-foresti lil hinn min-netwerk Natura 2000 huwa rilevanti ħafna wkoll.

(c) Il-Kummissjoni tikkunsidra li r-Regolament tal-Iżvilupp Rurali l-ġdid jinkludi miżura riveduta dwar il-protezzjoni u l-irkupru tal-foresti. Il-miżura l-ġdida tista’ tipprovdi appoġġ għal azzjonijiet li jirrigwardaw il-prevenzjoni u r-restawr tal-ħsara lill-foresti minn nirien tal-foresti u diżastri naturali u avvenimenti katastrofiċi u tista’ tipprovdi wkoll appoġġ għal azzjonijiet preventivi li jikkonċernaw organiżmi li jagħmlu ħsara u mard bil-kundizzjoni li r-riskju li jseħħ diżastru rilevanti jkun appoġġat b’evidenza xjentifika u rikonoxxut minn organizzazzjonijiet xjentifiċi pubbliċi.

(e) Għadd ta’ salvagwardji ambjentali huma diġà disponibbli fir-rigward tal-azzjonijiet appoġġjati. Pereżempju f’Natura 2000 is-sistema ta’ protezzjoni skont l-Artikolu 6.2 u 6.3 tad-Direttiva dwar il-Ħabitats[4] tiggarantixxi li kwalunkwe deterjorament sinifikanti ta’ dawn iż-żoni qed jiġi evitat. F’oqsma oħra, valutazzjonijiet tal-impatt ambjentali se jikkontribwixxu wkoll għall-prevenzjoni ta' kontroeffetti ambjentali. Fl-aħħar nett, għall-azzjonijiet kollha li għandhom jiġu kofinanzjati mill-fondi tal-UE,jista’ jkun meħtieġ mill-awtoritajiet nazzjonali kompetenti  ċertifikat ta’ prattika ambjentali tajba jew ġestjoni sostenibbli tal-foresti bħala prekundizzjoni għall-kofinanzjament tal-UE.

Fil-perjodu ta’ programmazzjoni l-ġdid, il-prestazzjoni ambjentali tal-benefiċjarji hija fuq quddiem nett tal-implimentazzjoni tal-miżuri differenti.

(f) Il-Kummissjoni hija tal-fehma li, meta jiġu applikati l-ispejjeż standard fil-programmi, l-Istati Membri / ir-Reġjuni għandhom jiżguraw li l-kalkoli rilevanti jkunu xierqa u preċiżi u stabbiliti bil-quddiem b’mod ġust, ekwu u li jista’ jiġi vverifikat. Għandu jiġi maħtur korp indipendenti biex jagħmel il-kalkoli għal kull spejjeż standard jew biex jikkonferma l-adegwatezza tal-kalkoli.

(g) Dokument ta’ gwida dwar il-kontrolli u l-penalitajiet fl-iżvilupp rurali qed jitħejja u jiġi diskuss mal-Istati Membri. L-Anness I ta’ dan id-dokument jinkludi lista ta’ kontroll għall-Istati Membri għall-valutazzjoni tar-raġonevolezza tal-ispejjeż.

It-tieni inċiż

(c) Il-Kummissjoni bħalissa qiegħda timplimenta din ir-rakkomandazzjoni.

Il-ħtieġa għal deskrizzjoni xierqa ta’ azzjonijiet preventivi hija inkluża fit-taqsima tal-Analiżi tal-Ħtiġijiet fl-istrateġija fil-PŻR għall-2014-2020 u f’xi każijiet anke fil-livell tal-Ftehimiet ta’ Sħubija.

Il-Kummissjoni teżamina l-PŻRs sottomessi u tivverifika l-loġika tal-intervent u l-ħtiġijiet għal azzjonijiet ta’ prevenzjoni matul il-perjodu ta’ approvazzjoni tal-programm u titlob li azzjonijiet preventivi jkunu bbażati fuq pjan ta’ ħarsien taż-żona kkonċernata.

(b) Il-Kummissjoni taċċetta r-rakkomandazzjoni.

Il-Kummissjoni se teżamina mal-awtoritajiet nazzjonali l-possibbiltà li l-livell xieraq ta’ azzjoni fil-qasam ta’ kriterji bażiċi komuni jkun jista’ jiddistingwi bejn żoni forestali biex jiġu kklassifikati bħala baxxi, medji u għolja ta’ riskju tan-nar.

(c) Il-Kummissjoni diġà qiegħda timplimenta din ir-rakkomandazzjoni.

Il-Kummissjoni twettaq awditi ta’ konformità fl-Istati Membri sabiex tivverifika li n-nefqa mħallsa tkun konformi mar-regoli. Jekk matul l-awditi jinstabu dgħufijiet, japplikaw korrezzjonijiet finanzjarji.

Il-miżuri u l-aġenziji tal-pagamenti li għandhom jiġu awditjati huma determinati fuq il-bażi ta’ analiżi tar-riskju. L-importanza finanzjarja għandha rwol ewlieni fil-kwantifikazzjoni tal-esponiment għar-riskju. Dan ifisser li qasam ta’ awditu bi nfiq għoli għandu aktar probabbiltà li jiġi kklassifikat ogħla u soġġettat għal awditu. Il-miżura 226 ġiet awditjata fl-2014 u se tiġi awditjata fl-2015.

(d) Il-Kummissjoni bħalissa qiegħda timplimenta din ir-rakkomandazzjoni permezz tal-qafas legali tal-PŻR u gwida addizzjonali.

Il-miżura l-ġdida tkopri skala usa’ ta’ riskji u danni. Għall-perjodu 2014-2020, l-iskeda relevanti ta' miżura li isservi bħala dokument ta' gwida tinkludi rekwiżiti dettaljati u kjarifikazzjonijiet u bħala tali jistgħu jservu ta’ għodda ta’ għajnuna għall-Istat Membru għal tfassil xieraq tal-miżura.

L-attenzjoni tal-Istati Membri/Reġjuni kienet attirata li f’każ ta’ inċertezzi rigward l-iskop tal-azzjonijiet, hemm miżuri oħrajn immirati speċifikament biex iżidu l-valur ekonomiku tal-foresti.

(e) Il-Kummissjoni taċċetta r-rakkomandazzjoni.

Xi adattamenti ġew introdotti diġà: pereżempju, l-indikatur "erja appoġġata” għal azzjoni preventiva tinġabar fis-CMEs 2014-2020.

Sabiex jinkisbu riżultati tal-evalwazzjoni ta' valur qabel,  fl-2019 se jiġi introdott Rapport tal-Implimentazzjoni Annwali. Dan ir-Rapport ta' Implimentazzjoni Annwali jipprovdi valutazzjoni tar-riżultati tal-Programm u, fejn possibbli, valutazzjoni tal-impatti.

Introduzzjoni

1. Il-Kummissjoni tqis li billi l-foresti huma multifunzjonali, u jservu skopijiet ekonomiċi, soċjali u ambjentali billi jipprovdu servizzi vitali ta' ekosistemi, il-funzjonijiet tagħhom ma jistgħux jiġu kompletament separati. Għalhekk, il-miżuri tal-forestrija mmirati primarjament lejn għanijiet ekonomiċi jistgħu jservu wkoll objettivi soċjali u ambjentali. Interventi primarjament protettivi jista’ jkollhom ukoll benefiċċji soċjali, ekonomiċi u ambjentali oħra. Il-karattru speċifiku tal-proċessi tal-forestrija għandhom jiġu kkunsidrati matul l-ippjanar, il-ġestjoni u l-kontroll ta’ miżuri forestali.

4. It-tnaqqis taż-żoni maħruqa jistgħu jkunu minħabba l-implimentazzjoni tajba ta’ sistemi ta’ prevenzjoni tan-nirien fil-foresti ffaċilitat mill-miżura.

L-istatistika turi li ż-żona maħruqa hija aktar jew inqas f’livell stabbli bħalissa, li ma jfissirx li ma teżistix theddida dejjem akbar ta’ nirien fil-foresti u diżastri oħra.

5. In-nirien fil-foresti wkoll għandhom impatt soċjoekonomiku importanti, li jaffettwa l-għajxien ta' dawk li huma dipendenti fuq il-foresti u joħloq distorsjonijiet fis-swieq tal-injam u jikkawża diżgrazzji.

OSSERVAZZJONIJIET

21.

L-ewwel punt: Il-Kummissjoni tqis li l-ħidma kontinwa tal-Grupp ta' Esperti dwar in-Nirien tal-Foresti tal-Kummissjoni Ewropea u l-Kumitat Permanenti dwar il-Foresti li jaġixxi bħala pjattaforma ta’ konsultazzjoni u informazzjoni mal-Istati Membri jipprovdi tagħrif xieraq lill-Kummissjoni dwar nirien tal-foresti u diżastri oħra, inkluż l-organiżmi li jagħmlu l-ħsara u l-mard. Il-PŻRs sottomessi jinkludu kapitolu dwar id-deskrizzjoni ta’ foresti u s-sitwazzjoni ambjentali u din l-informazzjoni tappoġġa l-valutazzjoni tal-proposti tal-programm.

Barra minn hekk, l-istabbiliment ta’ modulu ta' Disturbi fil-Foresti tas-Sistema ta' Informazzjoni Forestali għall-Ewropa (Forest Information System for Europe (FISE), wara l-Komunikazzjoni reċenti dwar l-Istrateġija tal-Foresti tal-UE, se ssaħħaħ il-ħarsa ġenerali lejn diżastri naturali relatati mal-foresti.

It-tieni punt: Il-PŻRs jinkludu l-analiżi SWOT li tiggwida lill-Istati Membri u lir-reġjuni sabiex jagħmlu għażliet strateġiċi dwar il-prijoritajiet, l-objettivi u l-miżuri li għandhom jiġu inklużi fil-programm u għandha tkun stabbilita wkoll linja bażi għall-monitoraġġ u l-evalwazzjoni tal-programm.

Tweġiba komuni 22-24:

Hemm differenzi bijoġeografiċi u klimatikament relatati sinifikanti fl-Istati Membri miċ-Ċirku Nordiku għall-Oċean Indjan (il-Gżira ta’ Reunion FR), għalhekk, il-klassifikazzjoni tan-nirien tal-foresti għandhom jirriflettu l-karatteristiċi tar-reġjun taħt riskju tan-nar.

Ir-Regolament Nru 2158/92 talab li din il-klassifikazzjoni għandha tiġi proposta mill-Istati Membri u approvata mill-Kummissjoni.

Fil-FAEŻR attwali, l-Istati Membri mhumiex mistennija li jipproponu l-klassifikazzjoni ta’ żoni b’livelli ta’ riskju differenti lill-Kummissjoni. Hija l-kompetenza tal-Istati Membri li jagħżlu żoni bħal dawn.  L-Istati Membri l-ġodda kollha huma fil-Grupp ta’ Esperti dwar in-Nirien tal-Foresti u jikkooperaw fl-attivitajiet tal-EFFIS. Tagħrif dwar in-nirien tal-foresti huwa għalhekk disponibbli. Dawn id-dispożizzjonijiet jindikaw l-intenzjoni komuni tal-Kummissjoni u tal-Istati Membri li jżommu l-miżuri ta’ prevenzjoni ta’ nirien fil-foresti mmirat u koerenti kemm jista’ jkun, filwaqt li jitqiesu d-differenzi sinifikanti bejn il-kundizzjonijiet bijoġeografiċi tal-Istati Membri.

Wieħed mill-objettivi fl-istabbiliment tas-Sistema Ewropea ta’ Informazzjoni dwar in-Nirien tal-Foresti huwa li jkun hemm informazzjoni armonizzata dwar in-nirien fil-foresti madwar l-Ewropa. Din l-informazzjoni hija essenzjali f’attivitajiet ta’ kollaborazzjoni reċiproka dwar il-prevenzjoni u l-ġlieda tan-nirien fil-foresti.

25. Is-servizzi tal-Kummissjoni huma konxji tar-riskju ġenerali ta’ Stat Membru jew reġjun fl-analiżi tal-PŻRs.

Il-Kummissjoni pproponiet metodoloġija għall-valutazzjoni tar-riskju ta’ nirien fil-foresti fil-kuntest tal-attivitajiet tal-EFFIS. Madankollu, hija meħtieġa aktar ħidma, b’kollaborazzjoni mal-Istati Membri, sabiex tinstilet mappa armonizzata tal-fattur ta’ riskju ta’ nirien fil-foresti tal-Ewropa.

26. Il-Kummissjoni stiednet lill-awtoritajiet Slovakki biex jirrevedu sostanzjalment il-metodoloġija ta’ klassifikazzjoni ta’ żoni forestali b’riskju ta’ nirien fl-Ittra ta’ Osservazzjonijiet indirizzata matul in-negozjati tal-PŻR 2014-2020. Il-Kummissjoni se teżamina mill-qrib mal-awtoritajiet Slovakki l-istabbiliment tal-ħtiġijiet għall-perjodu 2014-2020 b’kont meħud tad-dejta fit-tul dwar l-okkorrenza ta’ nirien u l-proporzjonalità tal-finanzjament mal-prevenzjoni.

27. Il-Kummissjoni tqis li għandha informazzjoni komprensiva dwar l-evoluzzjoni storika u l-evoluzzjoni pproġettata ta’ diżastri naturali u avvenimenti katastrofiċi oħra, l-iżvilupp potenzjali ta’ organiżmi ta’ ħsara u mard fil-kuntest ta’ FISE u permezz ta’ studji (eż. dwar l-adattament tal-foresti għat-tibdil fil-klima[5] jew studji oħra dwar diżastri[6]). Madankollu, dik l-informazzjoni ma ġietx armonizzata madwar l-Istati Membri. Il-Kummissjoni ssegwi wkoll it-talbiet tal-Istati Membri għal attivazzjoni ta’ Fondi ta’ Solidarjetà Ewropea wara diżastri kbar u t-talbiet tagħhom għal modifiki tal-programmi ta’ żvilupp rurali. Barra minn hekk, l-Istati Membri regolarment jinfurmaw lill-Kumitat Permanenti tal-Forestrija dwar avvenimenti estremi maġġuri.

28. Il-Kummissjoni bħalissa qed taħdem fuq l-istabbiliment ta’ Sistema ta’ Informazzjoni Forestali għall-Ewropa (Forest Information System for Europe (FISE)). Prototip tas-sistema se tkun disponibbli u tiġi ppreżentata lill-Kumitat Permanenti tal-Forestrija f’Diċembru 2014.

29. Il-Kummissjoni tqis li għandha livell xieraq ta’ għarfien dwar it-tipi ta’ diżastri naturali li jaffettwaw lill-foresti u wkoll dwar il-ħtiġijiet għall-prevenzjoni tad-diżastri għall-analiżi tal-PŻRs permezz ta’ kuntatti diretti mal-Istati Membri u r-reġjuni, laqgħat regolari tad-Diretturi tal-Foresti tal-UE u l-ħidma kontinwa tal-Kumitat Permanenti tal-Forestrija u l-FISE.

30. Meta wieħed iqis, m’hemm l-ebda definizzjoni komuni ta’ “l-aktar żoni ta’ valur tal-foresti”, il-Kummissjoni se tappoġġa t-twaqqif ta’ xi tip ta’ “qafas ta’ azzjoni ta’ prijorità” għall-kofinanzjament tal-UE, simili għal dik li diġà teżisti fl-Istati Membri kollha għall-finanzjament ta’ Natura 2000 permezz ta’ fondi differenti tal-UE. Il-prijoritajiet tal-Istati Membri kif ifformulati f’dak il-qafas imbagħad jiġi rifless fl-għażla. 

Tweġiba komuni għal 31 – 33

Wieħed mill-kriterji stabbiliti mill-Awtorità ta’ Ġestjoni għall-għażla tal-operazzjonijiet huwa l-koerenza mal-Pjan Forestali Reġjonali, u ma’ strumenti oħra ta’ ppjanar tal-foresti. Dan jiżgura ċerta kwalità tal-operazzjonijiet magħżula u tingħata prijorità għall-interventi f’żoni b’riskju ogħla ta’ nirien fil-foresti.

Barra minn hekk, fir-rigward tal-programmi ta' prevenzjoni tan-nirien fil-foresti appoġġati mill-fondi tal-UE mill-1992, l-Istati Membri għandhom kompetenza konsiderevoli fil-prijoritizzazzjoni tal-proġetti.

Fil-livell reġjonali/ta' SM il-pjanijiet ta’ protezzjoni tal-foresta fihom l-informazzjoni dwar kif jiġu ttrattati nirien fil-foresti u diżastri oħra. L-informazzjoni hija disponibbli wkoll fil-livell amministrattiv ta’ provinċji (livell NUTS-3) dwar il-lokalità, id-daqs u l-kawżi ta' nirien fil-foresti. Fil-perjodu ta’ programmazzjoni l-ġdid, il-Kummissjoni talbet li fil-programmi ta’ żvilupp rurali l-prevenzjoni u l-ħtiġiet ta’ protezzjoni għandhom jiġu infurzati mil-pjan għall-protezzjoni tal-foresti.

34. L-Awstrija stabbiliet sistema għall-għażla ta’ proġetti li ġiet approvata mill-Kumitat ta’ Superviżjoni fid-19 ta’ Ġunju 2014. Is-sistema tinvolvi approċċ fuq 3 stadji mibnija fuq il-kundizzjonijiet tal-eliġibbiltà kif deskritti fil-miżuri, dispożizzjonijiet legali nazzjonali oħra u, jekk rilevanti, dwar kriterji aktar dettaljati. Din is-sistema l-ġdida għandha tiżgura livell għoli ta’ kwalità tal-operazzjonijiet magħżulin għall-perjodu ta’ programmazzjoni 2014-2020.

35. L-Istati Membri ilhom jistabbilixxu l-PAFs (Oqfsa ta’ Azzjoni ta’ Prijorità) għall-finanzjament tan-netwerk Natura 2000 tagħhom sa mill-2012. Fil-perjodu finanzjarju l-ġdid dawn il-PAFs se jirrappreżentaw għodda utli ħafna għall-prijoritizzazzjoniji tal-azzjonijiet f’siti Natura 2000. Il-Kummissjoni ser tiżgura li l-azzjonijiet proposti għal siti Natura 2000 ikunu f’konformità mal-PAFs tal-Istati Membri rispettivi, iżda wkoll azzjonijiet f’żoni li huma ambjentalment importanti oħra bħal pereżempju parks nazzjonali se jingħataw prijorità xierqa.

Il-Kummissjoni tikkunsidra li l-foresti huma multifunzjonali u valuri ambjentali għandhom jitqiesu f’kuntest xieraq. Għalhekk, il-kriterji tal-għażla żviluppati mill-programmi għandhom jinvolvu wkoll aspetti oħra ta’ ġestjoni sostenibbli tal-foresti.

Barra minn hekk, bosta dispożizzjonijiet Natura 2000 japplikaw għall-foresti kollha fl-UE, kemm fis-siti ta’ Natura 2000 kif ukoll barra minnhom.

Kaxxa 1 - Il-prijoritizzazzjoni tal-ħtiġijiet ambjentali fil-livell tal-Istati Membri

L-Awtoritajiet Slovakki pproponew l-inklużjoni ta' kriterji ambjentali fost il-kriterji tal-għażla tas-submiżuri 8.3 u 8.4 (prevenzjoni u restawr ta' ħsara fil-foresti) taħt il-PŻR 2014-2020.

Fir-rigward ta’ interventi speċifiċi fi Franza, dawn għandhom jintgħażlu skont il-kundizzjonijiet lokali. Fil-każ ta’ ħamrija tar-ramel xotta b’kontenut organiku limitat ħafna fis-saff tal-wiċċ, l-utilizzazzjoni tal-gafef jistgħu jitqiesu bħala xierqa u jista’ jipprovdi soluzzjoni malajr sabiex tiġi restawrata fiż-żona danneġġata. F’ċerti oqsma, fir-rigward tal-kundizzjonijiet bijoġeografiċi speċifiċi tagħhom, sistema xierqa ta’ reazzjoni rapida hija meħtieġa għall-prevenzjoni tal-proliferazzjoni ta’ organiżmu ta' ħsara u mard (li jista’ jkollhom effetti negattivi fuq foresti mhux danneġġati jew protetti), li jnaqqas ir-riskju tan-nirien fil-foresti u tiġi evitata d-deżertifikazzjoni għandu jkun prijorità għolja.

37. Toroq tal-foresti li jservu għanijiet ta’ prevenzjoni ta’ nirien jistgħu jintużaw wkoll għal skopijiet oħra. Huma għandhom rwol importanti fir-ristawr u l-prevenzjoni ta’ effetti negattivi ta’ diżastri. Barra minn hekk il-bini ta' żewġ tipi ta’ toroq, wieħed għall-prevenzjoni tan-nirien fil-foresti u oħra għal skopijiet oħra, jista’ jwassal għal trattament ineffettiv u bi spejjeż għolja ta’ investiment.

Fis-Slovakkja toroq tal-foresti mibnija għall-prevenzjoni tan-nirien fil-foresti fil-qafas tal-programmi għall-iżvilupp rurali ġew użati b’mod effiċjenti għal azzjonijiet ta’ restawr malajr wara l-maltempati attwali u riħ qawwi. L-aċċess imtejjeb għen biex jitnaqqas ir-riskju ta’ diżastri ulterjuri (nirien jew tifqigħat ta' organiżmi ta' ħsara) u bl-għajnuna ta’ aċċess xieraq id-disturbi tal-ħamrija ġie minimizzat li salva materji organiċi tal-ħamrija u kien ta’ benefiċċju għall-flora u l-fawna tal-ħamrija.

Ma hemm l-ebda mekkaniżmu effiċjenti għall-protezzjoni tal-foresti minn diżastri kkawżati mir-riħ jew borra. Għalhekk, l-azzjonijiet jiffukaw primarjament fuq il-prevenzjoni tan-nirien fil-foresti. L-azzjonijiet ta’ prevenzjoni qatt ma jkunu marbuta ma’ ħsarat abijotiċi li seħħew, iżda biex dawn jiġu evitati. Għalhekk, il-proporzjon ta’ appoġġ pubbliku fuq azzjonijiet ta’ prevenzjoni kontra n-nirien ma jistax jintrabat direttament mad-dannu kkawżat minn nar.

Ara wkoll ir-risposta għall-punt 50.

38. Il-valutazzjonijiet dwar ir-riskji għall-foresti huma ffinanzjati minn fondi nazzjonali u tal-UE. L-Awstrija tattribwixxi ċerti ammonti (kwoti) tal-fondi tal-UE għar-reġjuni differenti. Il-kumplament huwa ffinanzjat minn fondi nazzjonali.

Risposta komuni għal 39 - 41:

Il-baġit tal-miżura 226 huwa disponibbli għat-tipi kollha ta’ foresti, privati u pubbliċi. Għalkemm matul l-implimentazzjoni tal-programm il-foresti pubbliċi rċevew appoġġ finanzjarju akbar, dan huwa newtralizzat f’termini ta’ ettari appoġġati. Skont ir-rapport ta’ progress annwali 2013 għal Andalusia, 78 % taż-żona tal-foresta appoġġata kienet privata.

Il-Kummissjoni tqis li huwa f’idejn l-Istati Membri u l-Awtoritajiet ta’ Ġestjoni biex jintgħażlu l-aħjar proġetti filwaqt li jitqiesu l-kundizzjonijiet soċjoekonomiċi u ġeografiċi tagħhom u li jiġġustifikaw kemm hu adegwat il-kalkolu tal-ispejjeż applikati.

L-appoġġ għal attivitajiet li jirrikjedu ħafna ħaddiema jista’ jkun marbut mal-karatteristiċi tat-terren (l-orografija, l-aspetti ambjentali eċċ.) u għandu jitqies f’kuntest usa’ għall-iżvilupp rurali.

42. Il-Kummissjoni tqis li l-ħruq, bħala metodu ta’ żoni tal-ikklerjar hija operazzjoni riskjuża ħafna. Dan huwa soġġett għal kundizzjonijiet amministrattivi restrittivi ħafna u mhuwiex aċċettat soċjalment.

44. Il-Kummissjoni tqis li minħabba ż-żieda fil-frekwenza u l-qawwa ta’ mewġiet ta’ sħana u nixfiet twal (“kawża primarja”), li taħt ċerti kundizzjonijiet tista’ wkoll tkun dikjarata bħala diżastri naturali, xi programmi introduċew azzjonijiet kontra “danni sekondarji” (organiżmi li jagħmlu l-ħsara u mard) li jipprevjenu skala ikbar ta’ proliferazzjoni ta’ ħsarat li jikkawżaw konsegwenzi ambjentali u soċjoekonomiċi serji. Għaldaqstant, jista’ jingħad li l-interventi appoġġati permezz ta’ miżuri għall-iżvilupp rurali kkontribwew b’suċċess għall-għan tal-miżura u tal-programmi rispettivi.

45. Il-Kummissjoni kkunsidrat il-fatt li matul il-perjodu ta’ programmazzjoni, l-Awstrija ffaċċjat problemi bl-implimentazzjoni tal-miżuri 224 u 225. Minkejja l-inkoraġġiment kostanti, dawn il-miżuri ma ġewx implimentati b’suċċess. Għal din ir-raġuni l-Awstrija approvat proġetti li għandhom l-għan li jipprevjenu l-potenzjal tal-forestrija wkoll taħt M 226.

46. Il-Kummissjoni tqis li fuq il-bażi tal-għarfien disponibbli dwar il-foresti — l-interazzjoni fil-klima, id-diversifikazzjoni tal-foresti u introduzzjoni ta’ bosta speċi ta’ siġar tista’ ttejjeb ir-reżiljenza tal-foresti kontra ħafna diżastri u nirien u tista' wkoll ittejjeb l-adattabilità għat-tibdil fil-klima. Dawn id-diversifikazzjonijiet għandhom jiġu introdotti qabel ma jseħħ diżastru, abbażi ta' opinjonijiet esperti, pjanijiet ta’ protezzjoni tal-foresta u strateġiji ta’ adattament fit-tul tal-foresti jew għall-klima.

47. Minħabba l-fatt li ż-żieda tal-frekwenza jew frekwenza ta’ avvenimenti meteoroloġiċi estremi huwa previst mir-rapport IPCC[7] il-Kummissjoni tqis li din il-miżura hija xierqa biex tipprovdi rispons f’waqtu għal diżastri futuri.

Fir-rigward tal-fagu, mhux biss insetti iżda wkoll fungi varji jistgħu jkunu ta’ ħsara għall-injam li jikkawża telf ta’ valur sinifikanti u jifirxu r-riskju ta’ organiżmi ta' ħsara u mard lill-foresti li ma jkollhomx ħsara preċedenti li huwa ta' detriment għal ekosistemi b’saħħithom.

Il-każ speċifiku identifikat mill-Qorti ser jiġi eżaminat mill-Kummissjoni.

Kaxxa 3 - Eżempji ta’ nuqqas ta’ informazzjoni jew dokumentazzjoni marbuta mal-għoti ta’ appoġġ taħt il-miżura 226

Is-sitwazzjoni ġiet irrimedjata. F’Aquitaine immaġni bis-satellita issa huma użati għat-traċċar taż-żoni bil-ħsara. Kull ġonta raba' bi ħsara għandha tiġi kkontrollata minn espert li jivverifika l-portata tagħhom, qabel ma jitlob il-kumpens. Imbagħad, is-servizzi tal-Istat jipproċessaw l-applikazzjonijiet u jwettqu verifiki fuq il-post fuq bażi ta’ kampjuni qabel ma jipprovdu kumpens.

L-awtoritajiet Slovakki ammettew żball amministrattiv u infurmaw lill-Kummissjoni li l-proċeduri interni rilevanti kienu diġà ġew aġġornati.

50. Toroq tal-foresti jistgħu jservu diversi għanijiet: jiffaċilitaw l-aċċess f’każ ta’ nirien fil-foresti, jipprovdu aċċess għal operazzjonijiet ta’ prevenzjoni kontra n-nirien, kif ukoll l-estrazzjoni tal-injam u prodotti forestali oħra.

Il-Kummissjoni hija tal-opinjoni li toroq tal-foresti mibnija għall-fini ta’ prevenzjoni tan-nar jistgħu wkoll iservu għanijiet oħra, sakemm il-funzjoni oriġinali tagħhom ma tiġix imfixkla minn użu alternattiv.

Ara wkoll ir-risposta għall-punt 51.

51. L-użu tat-toroq tal-foresti għal skopijiet ekonomiċi ma jikkompromettux r-rwol tagħhom fil-prevenzjoni tan-nirien fil-foresti. It-tħaffif u t-tneħħija tal-bijomassa huwa parti importanti ta’ miżuri ta’ prevenzjoni ta’ nirien fil-foresti. It-toroq huma wkoll użati għal trasport tal-injam bħala parti minn attivitajiet ta’ ħarsien meħtieġa. B’kollox, l-użu multiplu ta' dawn it-toroq iżid il-kosteffiċjenza mil-lat ta’ spejjeż tal-investiment.

52. L-użu tat-toroq tal-foresti għal skopijiet ekonomiċi ma jistax jikkomprometti l-kapaċità tagħhom li jservu skopijiet ta’ prevenzjoni ta' diżastri tal-foresti.

53. Il-Kummissjoni tqis li minħabba l-fatt li l-kundizzjonijiet bijoġeografiċi, ġeoloġiċi u ekoloġiċi tal-foresti lokali, ivarjaw b’mod sinifikanti madwar l-UE, l-istabbiliment ta’ kriterji dwar rekwiżiti minimi fil-livell tal-UE jista’ jkun problematiku. Dawn ir-rekwiżiti minimi għandhom jiġu stabbiliti fil-livell l-aktar xieraq.

Barra minn hekk, il-ħolqien ta’ netwerk xieraq tat-toroq tal-foresti mhux biss se jikkontribwixxi għal protezzjoni aħjar tal-foresti kontra nirien, imma wkoll fuq valutazzjoni ekonomika sostenibbli tar-riżorsi forestali f’ħafna reġjuni. Dan huwa spiss bżonnjuż biex jiġi evitat telf komplet ta’ interess soċjoekonomiku ta’ żoni forestali li jista’ jwassal għall-abbandun tagħhom u, fl-aħħar mill-aħħar, anki għal żieda fir-riskju ta’ nar.

54. Il-Kummissjoni tqis li d-densità tat-toroq tal-foresti jista’ jkun ogħla jew inqas skont il-kundizzjonijiet ġeoloġiċi u bijoġeografiċi lokali. Barra minn hekk, toroq tal-foresti jistgħu jservu diversi żoni u stabbilimenti u jista’ jagħti l-każ li xi sezzjonijiet ta’ triq forestali jkopru oqsma fejn diġà hemm livell xieraq ta’ densità tat-traffiku. Fil-PŻRs tal-2014-2020, il-Kummissjoni stiednet lill-awtoritajiet Slovakki biex jinkludu, bħala wieħed mill-kriterji tal-għażla, id-densità tat-toroq fiż-żona.

Kaxxa 5 - Eżempji ta’ nuqqas ta’ ġustifikazzjoni ta’ spejjeż standard

Rati varjabbli ta’ għajnuna ma kinux esklużi fil-perjodu ta’ programmazzjoni li għadda. Madankollu, dawn mhumiex permessi fil-perjodu ta’ programmazzjoni l-ġdid.

Eżempju 2

Ara t-tweġiba għall-punt 57

57. L-appoġġ għal attivitajiet li jirrikjedu ħafna ħaddiema jista’ jkun marbut mal-karatteristiċi tat-terren (l-orografija, l-aspetti ambjentali eċċ.) u għandu jitqies f’kuntest usa’ għall-iżvilupp rurali. L-użu ta’ ħaddiema jistgħu jimplikaw metodi li jirrispettaw aktar l-ambjent u benefiċċji soċjoekonomiċi importanti li huwa wkoll wieħed mill-għanijiet tal-politika dwar l-iżvilupp rurali.

Kaxxa 6 - Eżempju ta’ attività li tkun tiswa ħafna minħabba l-użu ta’ xogħol manwali

L-ispejjeż jistgħu jvarjaw minħabba fil-livelli varji u l-kundizzjonijiet ġeoloġiċi u ekoġeografiċi kif ukoll fatturi oħra. Jista’ jkun hemm ukoll raġunijiet li jagħmluha impossibbli għal kollox li jintuża makkinarju jew li jintuża makkinarju aktar għoli minħabba pereżempju l-eżistenza ta’ għoljiet, aċċess diffiċli, regoli ambjentali eċċ.

58. Il-Kummissjoni stiednet lill-awtoritajiet Slovakki biex jinkludu verifika tar-raġonevolezza tal-ispejjeż fil-PŻR 2014-2020.

60. F’xi oqsma hemm numru limitat ta’ fornituri tas-servizz għal ċerti kompiti speċifiċi.

61. Il-Kummissjoni tqis li l-Awtoritajiet ta’ Ġestjoni huma l-korpi responsabbli biex tiġi żgurata l-effiċjenza tal-appoġġ fuq il-livell tal-proġett.

Deadweight bħala tali għandu jiġi evitat billi jiġi żgurat li l-investiment isir biss wara li l-applikazzjoni għall-appoġġ jew l-għoti ta’ appoġġ. Inkella, il-valutazzjoni tad-deadweight tista' ssir relattivament suġġettiva u twassal għal trattament mhux ugwali bejn l-applikanti.

62. Għall-perjodu 2014-2020, fir-rigward ta’ proġetti ta’ investiment, hija biss in-nefqa magħmula wara li tkun ġiet sottomessa l-applikazzjoni mill-benefiċjarju li għandha tkun eliġibbli, skont l-Artikolu 60(2) tar-Regolament 1305/2013. L-Istati Membri jistgħu wkoll jimponu mument aktar tard bħal fid-deċiżjoni tal-għotja.

63. Il-Kummissjoni hija tal-opinjoni li r-risposta tal-benefiċjarju x’għandhiex tkun investigata aktar biex jiġi ċċarat taħt liema kundizzjonijiet u kemm b’mod effettiv kien isir dan l-investiment u jekk l-għan oriġinali setax ikun miksub mingħajr l-appoġġ permezz ta’ din il-miżura. 

64. F’ċerti limiti, “ettaru eliġibbli” għall-attivazzjoni tal-intitolamenti tal-ħlas jista’ jkun fih xi siġar, arbuxelli jew buxxijiet.

Il-limitazzjoni ta’ żvilupp eċċessiv ta’ dawk is-siġar, arbuxelli jew buxxijiet jista’ jnaqqas ir-riskju ta’ nirien fil-foresti f’żoni forestali tal-madwar.

Tweġiba komuni għal 65 – 67:

Il-Kummissjoni tqis li minħabba l-fatt li l-proċessi naturali tal-foresti huma kumplessi u li l-effetti ta’ ċerti interventi jistgħu jitkejlu biss wara diversi snin jew għexieren ta’ snin li jseħħu, miżuri ta’ prevenzjoni tal-foresti għandhom jitqiesu f’kuntest usa’ tal-iżvilupp rurali u f’medda ta’ żmien fit-tul. Inventarji tal-foresti tal-Istati Membri li jistgħu jiġu ripetuti f’10-20 sena u programmi ta’ monitoraġġ forestali oħra jistgħu jipprovdu informazzjoni dwar il-bidliet. Miżuri forestali huma mfassla u implimentati abbażi ta’ informazzjoni u esperjenzi miksuba permezz ta' mudelli ta' esperjenza dejjiema, tul 100-150 sena ta’ esperjenzi mudell ta’ ġestjoni tal-foresti ġestiti mill-istituti u universitajiet ta' selvikultura tal-Istati Membri.

68. Għal raġunijiet ta’ proporzjonalità, is-CMEF 2007-2013 kien jinkludi sett ta’ indikaturi komuni tal-produzzjoni li jiżguraw l-aggregazzjoni u t-tqabbil fil-PŻRs u li huma mfassla biex ikunu rilevanti f’maġġoranza sinifikanti ta’ każijiet. Biex juru l-ispeċifiċitajiet, indikaturi addizzjonali jistgħu jintużaw mill-Istati Membri meta jkun xieraq.

L-indikatur “erja appoġġata” għal azzjoni preventiva tinġabar fis-CMEs 2014-2020. Dan se jimla l-vojt identifikat fis-CMEF 2007-2013.

69. L-osservazzjonijiet juru li, minħabba l-kumplessità u konnessjoni trasversali eżistenti ta’ azzjonijiet differenti, f’ħafna każijiet, ma jagħmilx sens li l-indikaturi tar-riżultati jiġu kategorizzati f'livell dettaljat wisq. Għal din ir-raġuni l-Kummissjoni għażlet li tivvaluta r-riżultati fuq il-livell tal-qasam tal-attenzjoni fil-qafas ta’ monitoraġġ u evalwazzjoni għall-perjodu ta’ programmazzjoni 2014-2020.

70. Dan l-indikatur huwa wieħed mill-elementi tas-sistema ta’ valutazzjoni. Din is-sistema ġdida ta’ valutazzjoni għandha tiġi kkunsidrata globalment.

71. Il-Kummissjoni rrikonoxxiet li fil-kuntest tal-PŻR, l-evalwazzjoni ta’ nofs it-terminu kellha valur miżjud limitat.  Għalhekk ir-rekwiżit li jsir evalwazzjoni ta’ nofs it-terminu ġie abolit għall-perjodu ta’ programmazzjoni 2014-2020.

72. Ara t-tweġibiet għal 69 u 71.

73. Għalkemm il-medja ta' żoni maħruqa fl-UE mhux qed tiżdied, ħafna drabi d-danni min-nirien annwali huma kkonċentrati fi ftit pajjiżi biss. Dawn il-pajjiżi jvarjaw minn sena għal oħra (eż. il-Portugall & Spanja 2003, il-Portugall 2005, l-Italja & il-Greċja 2007, Spanja 2012, eċċ.). Kull sena, il-periklu ta’ nirien estremi minħabba temp sħun u niexef lokali flimkien ma’ rjieħ qawwija, jistgħu jseħħu f’reġjuni speċifiċi. Pajjiżi speċifiċi jistgħu għalhekk jiffaċċjaw attività tan-nar fi snin partikolari estremi, xprunati minn kundizzjonijiet meteoroloġiċi ta' periklu min-nirien predominanti f’żoni tal-baċin tal-Mediterran jew xi mkien ieħor fl-Ewropa.

Fil-livell tal-Istati Membri individwali, id-differenzi osservati fit-tendenzi huma ta' spiss minħabba kundizzjonijiet ta' periklu ta' nirien estremi li seħħew fi snin partikolari f'serje kontinwa ta' żmien eżaminati, kif huwa evidenti meta tiġi analizzata d-dejta fuq bażi ta' kull sena kontra l-indikaturi meteoroloġiċi tal-periklu min-nirien[8].

74. Il-Kummissjoni tqis li hemm esperjenza sinifikanti f’relazzjoni man-natura tal-miżuri ta’ prevenzjoni inkluż l-għarfien dwar l-effiċjenza u l-effettività tagħhom għal kull settur tal-programm. Għadd ta’ proġetti u programmi ta’ prevenzjoni tal-foresti ġew appoġġati mill-fondi tal-UE u diversi studji u proġetti ta’ riċerka ġew imwettqa matul l-aħħar 20 snin.

Konklużjonijiet u rakkomandazzjonijiet

76. Il-Kummissjoni tqis li b’mod ġenerali l-miżuri ta’ prevenzjoni tal-foresti kkontribwew għall-objettivi tal-programmi għall-iżvilupp rurali. Inkisbu riżultati konkreti u seħħew inqas okkorrenzi ta’ nar. Barra minn hekk, ittieħdu tagħlimiet li se jiġu applikati b’rabta mal-perjodu 2014-2020, speċjalment fir-rigward tal-kamp ta’ applikazzjoni tal-miżura u gwida mtejba.

78. Ir-Regolament dwar l-Iżvilupp Rurali[9] jipprovdi li l-azzjonijiet preventivi kontra n-nirien għandhom ikopru ż-żoni li l-Istati Membri jikklassifikaw bħala żoni ta’ riskju ta’ nirien għoli jew medju skont il-pjanijiet tagħhom ta’ protezzjoni. Dawn il-pjanijiet ta’ protezzjoni tal-foresta u l-programmi nazzjonali jew subnazzjonali jew strumenti ekwivalenti tal-Istati Membri pprovdew bażi xierqa biex ikunu missielta u prijoritizzati matul l-għażla.

Il-Kummissjoni analizzat is-sitwazzjoni fis-settur tal-foresti inkluż aspetti ta’ prevenzjoni u monitoraġġ tal-foresti fid-Dokument ta’ Ħidma tal-Persunal tal-Kummissjoni tal-2005, li kien jifforma anness mal-Komunikazzjoni dwar l-implimentazzjoni tal-Istrateġija tal-Forestrija tal-UE. Ir-Regolament dwar l-Iżvilupp Rurali talab sabiex il-miżuri forestali jikkontribwixxu għall-implimentazzjoni tal-Istrateġija tal-Forestrija tal-Komunità. L-Istrateġija tal-Forestrija msemmija hawn fuq tkopri l-aspetti ekonomiċi, ambjentali u soċjali ta’ ġestjoni sostenibbli tal-foresti.

Fir-rigward tal-perjodu ta’ programmazzjoni ġdid, il-Kummissjoni analizzat is-sitwazzjoni fis-settur tal-foresti fid-Dokument ta’ Ħidma tal-Persunal tal-Kummissjoni tal-2013, li kien jifforma anness mal-Komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni: "Strateġija ġdida tal-UE għall-Foresti: għall-foresti u għas-settur ibbażat fuq il-foresti".[10]

Rakkomandazzjoni 1

L-Istati Membri għandhom:

It-tieni inċiż: Il-Kummissjoni tikkunsidra li l-foresti Natura 2000 jirrappreżentaw valuri ambjentali għoljin u jipproduċu servizzi ekosistemiċi importanti u diversi.  Barra minn hekk, diversi dispożizzjonijiet Natura 2000 japplikaw għall-foresti kollha fl-UE, kemm fis-siti ta’ Natura 2000 kif ukoll barra minnhom u f’dan ir-rigward, ir-rwol tal-foresti lil hinn min-netwerk Natura 2000 huwa rilevanti ħafna wkoll.

Il-Kummissjoni għandha:

L-ewwel inċiż: Il-Kummissjoni diġa qiegħda timplimenta din ir-rakkomandazzjoni.

Il-ħtieġa għal deskrizzjoni xierqa ta’ azzjonijiet preventivi hija inkluża fit-taqsima tal-Analiżi tal-Ħtiġijiet fl-istrateġija fil-PŻR għall-2014-2020 u f’xi każijiet anke fil-livell tal-Ftehimiet ta’ Sħubija.

Il-Kummissjoni teżamina l-PŻRs sottomessi u tivverifika l-loġika tal-intervent u l-ħtiġijiet għal azzjonijiet ta’ prevenzjoni matul il-perjodu ta’ approvazzjoni tal-programm u titlob li azzjonijiet preventivi jkunu bbażati fuq pjan ta’ ħarsien taż-żona kkonċernata.

It-tieni inċiż: il-Kummissjoni taċċetta r-rakkomandazzjoni.

Il-Kummissjoni se teżamina mal-awtoritajiet nazzjonali kompetenti l-possibbiltà li l-livell xieraq ta’ azzjoni fil-qasam ta’ kriterji bażiċi komuni jkun jista’ jiddistingwi bejn żoni forestali biex jiġu kklassifikati bħala baxxi, medji u għolja ta’ riskju tan-nar.

79. Bħala parti minn prattiki ta’ ġestjoni sostenibbli tal-foresti, toroq tal-foresti (jew investimenti oħra) mibnija primarjament għal skopijiet ta’ prevenzjoni kontra n-nirien, jistgħu jintużaw ukoll għal azzjonijiet preventivi kontra riskji oħrajn kif ukoll għal xogħlijiet ta' restawr u rimedju, rikreazzjoni jew skopijiet ekonomiċi. Il-ħolqien ta’ netwerk xieraq tat-toroq tal-foresti mhux biss jikkontribwixxi għal protezzjoni aħjar tal-foresti kontra nirien, iżda wkoll biex jagħmlu valutazzjoni ekonomika sostenibbli tar-riżorsi forestali f’ħafna reġjuni. Ta’ spiss, dawn l-azzjonijiet jeħtieġu li jsiru sabiex jiġi evitat telf komplet ta’ interess soċjoekonomiku ta’ żoni ta’ foresti li jistgħu jwasslu biex dawn jiġu abbandunati u, fl-aħħar mill-aħħar, għal żieda fir-riskju ta’ nar.

Rigward il-perjodu l-ġdid ta’ programmazzjoni, tħejjew dokumenti ta’ gwida sabiex jiġi żgurat li l-Istati Membri / ir-Reġjuni jużaw il-miżura b'mod korrett. Barra minn hekk, l-Istati Membri / ir-Reġjuni jridu jispeċifikaw il-ħtiġijiet u r-raġunijiet tagħhom aħjar, jekk jixtiequ jespandu d-densità tas-sistemi tat-toroq tagħhom.

Rakkomandazzjoni 2

L-Istati Membri għandhom:

L-ewwel inċiż: Il-Kummissjoni tikkunsidra li r-Regolament tal-Iżvilupp Rurali l-ġdid jinkludi miżura riveduta dwar il-protezzjoni u l-irkupru tal-foresti. Il-miżura l-ġdida tista’ tipprovdi appoġġ għal azzjonijiet li jirrigwardaw il-prevenzjoni u r-restawr tal-ħsara lill-foresti minn nirien tal-foresti u diżastri naturali u avvenimenti katastrofiċi u tista’ tipprovdi wkoll appoġġ għal azzjonijiet preventivi li jikkonċernaw organiżmi li jagħmlu ħsara u mard bil-kundizzjoni li r-riskju li jseħħ diżastru rilevanti jkun appoġġat b’evidenza xjentifika u rikonoxxut minn organizzazzjonijiet xjentifiċi pubbliċi.

It-tielet inċiż: Il-Kummissjoni hija tal-opinjoni li għadd ta’ salvagwardji ambjentali huma diġà disponibbli fir-rigward tal-azzjonijiet appoġġjati. Pereżempju f’Natura 2000 is-sistema ta’ protezzjoni skont l-Artikolu 6.2 u 6.3 tad-Direttiva dwar il-Ħabitats[1] tiggarantixxi li kwalunkwe deterjorament sinifikanti ta’ dawn iż-żoni qed jiġi evitat. F’oqsma oħra, valutazzjonijiet tal-impatt ambjentali se jikkontribwixxu wkoll għall-prevenzjoni ta' kontroeffetti ambjentali. Fl-aħħar nett, għall-azzjonijiet kollha li għandhom jiġu kofinanzjati mill-fondi tal-UE,jista’ jkun meħtieġ mill-awtoritajiet nazzjonali kompetenti  ċertifikat ta’ prattika ambjentali tajba jew ġestjoni sostenibbli tal-foresti bħala prekundizzjoni għall-kofinanzjament tal-UE.

Fil-perjodu ta’ programmazzjoni l-ġdid, il-prestazzjoni ambjentali tal-benefiċjarji hija fuq quddiem nett tal-implimentazzjoni tal-miżuri differenti.

Il-Kummissjoni għandha:

L-ewwel inċiż: Il-Kummissjoni diġa qiegħda timplimenta din ir-rakkomandazzjoni.

Il-Kummissjoni twettaq awditi ta’ konformità fl-Istati Membri sabiex tivverifika li n-nefqa mħallsa tkun konformi mar-regoli. Jekk matul l-awditi jinstabu dgħufijiet, japplikaw korrezzjonijiet finanzjarji.

Il-miżuri u l-aġenziji tal-pagamenti li għandhom jiġu awditjati huma determinati fuq il-bażi ta’ analiżi tar-riskju. L-importanza finanzjarja għandha rwol ewlieni fil-kwantifikazzjoni tal-esponiment għar-riskju. Dan jimplika li qasam ta’ awditu bi nfiq għoli għandu aktar probabbiltà li jiġi kklassifikat ogħla u soġġett għal awditu. Il-miżura 226 ġiet awditjata fl-2014 u se tiġi awditjata fl-2015.

It-tieni inċiż: Il-Kummissjoni bħalissa qiegħda timplimenta din ir-rakkomandazzjoni permezz tal-qafas legali għall-PŻR u gwida addizzjonali.

Il-miżura l-ġdida tkopri skala usa’ ta’ riskji u danni. Għall-perjodu 2014-2020, l-iskeda relevanti ta' miżura li isservi bħala dokument ta' gwida tinkludi rekwiżiti dettaljati u kjarifikazzjonijiet u bħala tali jistgħu jservu ta’ għodda ta’ għajnuna għall-Istat Membru għal tfassil xieraq tal-miżura.

L-attenzjoni tal-Istati Membri / ir-Reġjuni kienet attirata li f’każ ta’ inċertezzi rigward l-iskop tal-azzjonijiet, hemm miżuri oħrajn immirati speċifikament biex iżidu l-valur ekonomiku tal-foresti.

80. Skont is-sehem ta’ ġestjoni, il-Kummissjoni tadotta l-PŻRs nazzjonali jew reġjonali, filwaqt li l-implimentazzjoni u l-iżgurar tal-kosteffettività u l-effiċjenza tal-appoġġ huma taħt ir-responsabbiltà tal-Istati Membri u l-Awtoritajiet ta’ Ġestjoni tagħhom.

Fir-rigward tal-użu ta’ xogħol manwali minflok makkinarju, xi kultant tali għażliet jistgħu jiġu marbuta mal-karatteristiċi tat-terren (l-orografija, l-aspetti ambjentali eċċ.) u għandu jitqies f’kuntest usa’ għall-iżvilupp rurali.

Rakkomandazzjoni 3

L-Istati Membri għandhom:

L-ewwel inċiż: Il-Kummissjoni hija tal-fehma li, meta jiġu applikati l-ispejjeż standard fil-programmi, l-Istati Membri / ir-Reġjuni għandhom jiżguraw li l-kalkoli rilevanti jkunu xierqa u preċiżi u stabbiliti bil-quddiem b’mod ġust, ekwu u li jista’ jiġi vverifikat. Għandu jiġi maħtur korp indipendenti biex jagħmel il-kalkoli għal kull spejjeż standard jew biex jikkonferma l-adegwatezza tal-kalkoli.

It-tieni inċiż: Dokument ta’ gwida dwar il-kontrolli u l-penalitajiet fl-iżvilupp rurali qed jitħejja u jiġi diskuss mal-Istati Membri. L-Anness I ta’ dan id-dokument jinkludi lista ta’ kontroll għall-Istati Membri għall-valutazzjoni tar-raġonevolezza tal-ispejjeż.

81. Huwa meħtieġ bilanċ bejn l-ispejjeż tal-monitoraġġ u l-valutazzjoni u l-benefiċċji potenzjali tagħhom.  B’mod speċjali, fil-każ ta’ kejl ta’ azzjonijiet preventivi huwa diffiċli li tiġi stabbilita l-katina tal-kawżalità. Barra minn hekk, l-effettività ta’ interventi tal-forestrija partikolari tista’ tiġi evalwata biss wara diversi snin jew għexieren ta’ snin.

Fir-rigward tal-perjodu 2014-2020, sar titjib.  Pereżempju, indikatur ġdid ta' “erja appoġġata” għal azzjonijiet preventivi se jinġabru mis-CMEs (Eżerċizzju ta' Maniġġar ta' Kriżijiet). Barra minn hekk, sabiex jinkisbu riżultati ta' evalwazzjoni ta' valur, huwa previst Rapport ta’ Implimentazzjoni Annwali mtejjeb fl-2019. Fil-qafas ta’ dan ir-rapport, evalwazzjoni tal-PŻR se titwettaq u l-ewwel riżultati dwar l-effiċjenza tal-PŻR se jiġu pprovduti.

Rakkomandazzjoni 4

Il-Kummissjoni għandha:

Il-Kummissjoni taċċetta r-rakkomandazzjoni.

Xi adattamenti ġew introdotti diġà: pereżempju, l-indikatur !erja appoġġata” għal azzjoni preventiva se jinġabar mis-CMEs 2014-2020. Dan se jimla l-vojt identifikat fis- 2007-2013 CMEF.

Sabiex jinkisbu riżultati tal-evalwazzjoni ta' valur qabel,  fl-2019 se jiġi introdott Rapport tal-Implimentazzjoni Annwali. Dan ir-Rapport tal-Implimentazzjoni Annwali jipprovdi valutazzjoni tar-riżultati tal-programm u, fejn possibbli, valutazzjoni tal-impatti.

[1]          Ir-Regolament tal-Kunsill (KE) Nru 1698/2005)

[2]         Commission staff working document - Annex to the Communication on the implementation of the EU Forestry Strategy {COM(2005) 84 final} /* SEC/2005/0333 */ http://ec.europa.eu/agriculture/forest/1998-strategy-2006-action-plan/sec-2005-333_en.pdf

[3]          COM(2013) 659 finali: http://ec.europa.eu/agriculture/forest/strategy/index_en.htm

[4]         Direttiva tal-Kunsill 92/43/KEE

[5]         Impacts of Climate Change on European Forests and Options for Adaptation http://ec.europa.eu/agriculture/analysis/external/euro_forests/index_en.htm

[6]         http://ec.europa.eu/environment/forests/studies.htm

[7]         https://www.ipcc.ch/pdf/special-reports/srex/SREX_FD_SPM_final.pdf

[8]         San-Miguel-Ayanz, J., Moreno, J.M., Camia, A. (2013) Analysis of large fires in European Mediterranean landscapes: Lessons learned and perspectives. Forest Ecology and Management, 294, pp. 11-22

[9]         Ir-Regolament tal-Kunsill (KE) Nru 1698/2005)

[10]       COM(2013) 659 finali: http://ec.europa.eu/agriculture/forest/strategy/index_en.htm