52014PC0203

MEMORANDUM TA’ SPJEGAZZJONI

Bħala parti mill-Politika Ewropea tal-Viċinat (PEV), il-ftuħ gradwali ta’ xi programmi u aġenziji tal-Unjoni għall-parteċipazzjoni tal-pajjiżi sħab tal-PEV jirrappreżenta waħda minn bosta miżuri maħluqa biex jippromwovu r-riforma, il-modernizzazzjoni u t-tranżizzjoni fil-viċinat tal-Unjoni Ewropea. Il-Kummissjoni ssottolineat dan l-aspett ta’ politika b’mod aktar estensiv fil-Komunikazzjoni tagħha ta’ Diċembru 2006 “dwar l-approċċ ġenerali għall-parteċipazzjoni tal-pajjiżi msieħba fil-Politika Ewropea tal-Viċinat fl-aġenziji u l-programmi Komunitarji”[1].

Il-Kunsill approva dan l-approċċ fil-konklużjonijiet tiegħu tal-5 ta’ Marzu 2007[2].

Abbażi ta' din il-Komunikazzjoni u ta' dawn il-konklużjonijiet, fit-18 ta’ Ġunju 2007, il-Kunsill ħareġ direttivi lill-Kummissjoni biex tinnegozja Ftehimiet Qafas mal-Alġerija, l-Armenja, l-Ażerbajġan, l-Eġittu, il-Ġeorġja, l-Iżrael, il-Ġordan, il-Libanu, il-Moldovja, il-Marokk, l-Awtorità tal-Palestina, it-Tuneżija u l-Ukraina, dwar il-prinċipji ġenerali għall-parteċipazzjoni tagħhom fil-programmi Komunitarji[3].

Il-Kunsill Ewropew ta’ Ġunju 2007[4] afferma mill-ġdid l-importanza suprema tal-PEV u approva Rapport tal-Presidenza dwar il-Progress miksub[5] li kien ippreżentat fil-Kunsill  fit-18 u d-19 ta’ Ġunju 2007 kif ukoll il-Konklużjonijiet tal-Kunsill relatati[6]. Dan ir-rapport fakkar id-direttivi tal-Kunsill biex jiġu nnegozjati protokolli addizzjonali relevanti.

Il-Komunikazzoni Konġunta mill-Kummissjoni u r-Rappreżentanta Għolja tal-Unjoni Ewropea għall-Affarijiet Barranin u ta’ Sigurtà Politika “Risposti ġodda għal Viċinat fi trasformazzjoni”[7], approvat mill-Konklużjonijiet tal-Kunsill tal-20 ta' Ġunju 2011, enfasizza aktar l-intenzjoni tal-UE biex tiffaċilita l-parteċipazzjoni tal-pajjiżi msieħba fil-programmi tal-UE.

Sa issa, ġew iffirmati Protokolli mal-Armenja, mal-Ġeorġja, mal-Iżrael, mal-Ġordan, mal-Moldova, mal-Marokk u mal-Ukraina.

F’Diċembru 2013, it-Tuneżija esprimiet l-interess tagħha li tipparteċipa fil-firxa wiesgħa ta’ programmi miftuħa għall-pajjiżi sħab tal-Politika Ewropea tal-Viċinat. It-test tal-protokoll li ġie nnegozjat mat-Tuneżija huwa anness hawnhekk.

Hawnhekk, il-Kummissjoni qed tippreżenta proposta għal Deċiżjoni tal-Kunsill dwar il-konklużjoni tal-Protokoll. Dan il-Protokoll fih Ftehim Qafas dwar il-prinċipji ġenerali għall-parteċipazzjoni tat-Tuneżija fil-programmi tal-Unjoni. Fih klawżoli standard li huma maħsuba li jiġu applikati għall-pajjiżi sħab kollha tal-PEV li magħhom għandhom jiġu konklużi dawn il-protokolli.

F'konformità mal-Artikolu 218(6)(a) tat-Trattat dwar il-Funzjonament tal-Unjoni Ewropea, il-Parlament Ewropew se jiġi mistoqsi biex jagħti l-kunsens tiegħu għall-kunsens tal-konklużjoni tal-Protokoll.

B'mod parallel, il-Kummissjoni tressaq proposta għal Deċiżjoni tal-Kunsill dwar  l-iffirmar u l-applikazzjoni provviżorja tal-Protokoll.

Il-Kunsill huwa mistieden biex jadotta d-Deċiżjoni proposta li ġejja.

2014/0118 (NLE)

Proposta għal

DEĊIŻJONI TAL-KUNSILL

dwar il-konklużjoni għall-Ftehim Ewro-Mediterranju li jistabilixxi assoċazzjoni bejn il-Komunitajiet Ewropej u l-Istati Membri tagħhom, minn naħa l-waħda, u r-Repubblika tat-Tuneżija, min-naħa l-oħra, dwar Ftehim Qafas bejn l-Unjoni Ewropea u r-Repubblika tat-Tuneżija dwar il-prinċipji ġenerali għall-parteċipazzjoni tar-Repubblika tat-Tuneżija fil-programmi tal-Unjoni

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-Artikolu 212 flimkien mal-Artikolu 218(6)(a) tiegħu,

Wara li kkunsidra l-proposta mill-Kummissjoni Ewropea,

Wara li kkunsidra l-opinjoni tal-Parlament Ewropew[8],

Billi:

(1)       Il-Protokoll għall-Ftehim Ewro-Mediterranju li jistabilixxi assoċazzjoni bejn il-Komunitajiet Ewropej u l-Istati Membri tagħhom, min-naħa l-waħda, u r-Repubblika tat-Tuneżija, min-naħa l-oħra, li jikkonċerna Ftehim Qafas bejn l-Unjoni Ewropea u r-Repubblika tat-Tuneżija, dwar il-prinċipji ġenerali għall-parteċipazzjoni tar-Repubblika tat-Tuneżija fil-programmi tal-Unjoni (minn hawn 'il quddiem imsejjaħ "il-Protokoll") ġie ffirmat f'isem l-Unjoni fi...

(2)       L-objettiv tal-Protokoll huwa li jistabbilixxi r-regoli finanzjarji u tekniċi li jippermettu lit-Tuneżija tipparteċipa f'ċerti programmi tal-Unjoni. Il-qafas orizzontali stabbilit mill-Protokoll jikkostitwixxi miżura ta' kooperazzjoni ekonomika, finanzjarja u teknika li tippermetti li l-aċċess għall-għajnuna, b'mod partikolari għajnuna finanzjarja, jiġi pprovdut mill-Unjoni skont il-programmi tal-Unjoni. Dan il-qafas japplika biss għal dawk il-programmi tal-Unjoni li għalihom l-atti legali rilevanti kostituttivi jipprevedu l-possibbiltà ta' parteċipazzjoni tat-Tuneżija. L-iffirmar u l-applikazzjoni provviżorja tal-Protokoll għalhekk ma jinvolvux l-eżerċizzju tas-setgħat taħt id-diversi politiki settorjali segwiti mill-programmi, li huma eżerċitati meta jiġu stabbiliti l-programmi.

(3)       Il-Protokoll għandu jiġi approvat,

ADOTTA DIN ID-DEĊIŻJONI:

Artikolu 1

Il-Protokoll għall-Ftehim Ewro-Mediterranju li jistabilixxi assoċazzjoni bejn il-Komunitajiet Ewropej u l-Istati Membri tagħhom, min-naħa l-waħda, u r-Repubblika tat-Tuneżija, min-naħa l-oħra, li jikkonċerna Ftehim Qafas bejn l-Unjoni Ewropea u r-Repubblika tat-Tuneżija, dwar il-prinċipji ġenerali għall-parteċipazzjoni tar-Repubblika tat-Tuneżija fil-programmi tal-Unjoni ("il-Protokoll") huwa b'hekk approvat f'isem l-Unjoni[9].

Artikolu 2

Il-President tal-Kunsill jinnomina l-persuna awtorizzata biex tipproċedi, f'isem l-Unjoni Ewropea u l-Istati Membri tagħha, in-notifika prevista fl-Artikolu 10 tal-Protokoll, sabiex jesprimi l-kunsens tal-Unjoni Ewropea u l-membri tagħha li jkunu marbuta b'dan il-Protokoll.

Id-data tad-dħul fis-seħħ tal-Protokoll ser tiġi ppubblikata f'Il Ġurnal Uffiċjali tal-Unjoni Ewropea mis-Segretarjat Ġenerali tal-Kunsill.

Artikolu 3

Il-Kummissjoni hija awtorizzata li tistabbilixxi, f'isem l-Unjoni, it-termini u l-kondizzjonijiet speċifiċi applikabbli għall-parteċipazzjoni tat-Tuneżija fi kwalunkwe programm partikolari, inkluż il-kontribut finanzjarju pagabbli. Il-Kummissjoni se taġġorna l-grupp ta' ħidma rilevanti tal-Kunsill.

Artikolu 4

Din id-Deċiżjoni tidħol fis-seħħ fid-data tal-adozzjoni tagħha.

Magħmul fi Brussell,

                                                                       Għall-Kunsill

                                                                       Il-President

[1]               COM(2006) 724 final tal-4 ta’ Diċembru 2006.

[2]               Il-Konklużjonijiet tal-KAĠRE tal-5 ta’ Marzu 2007.

[3]               Id-Deċiżjoni tal-Kunsill (ristretta) li tawtorizza lill-Kummissjoni biex tinnegozja l-protokolli […], Dok 10412/07.

[4]               Il-Konklużjonijiet tal-Presidenza – Brussell, il-21 u t-22 ta’ Ġunju 2007, Dok 11177/07.

[5]               Ir-Rapport tal-Presidenza dwar il-Progress dwar “Insaħħu l-Politika Ewropea tal-Viċinat”, Dok 10874/07.

[6]               Il-Konklużjonijiet dwar it-Tisħiħ tal-Politika Ewropea tal-Viċinat, adottati mill-Kunsill (Affarijiet Ġenerali u Relazzjonijiet Esterni) fit-18 ta’ Ġunju 2007, Dok 11016/07.

[7]               COM (2011) 303 final, tal-25 ta’ Mejju 2011.

[8]               ĠU C […] tal-[…], p. […].

[9]              

ANNESS PROTOKOLL għall-Ftehim Ewro-Mediterranju li jistabbilixxi Assoċjazzjoni bejn il-Komunitajiet Ewropej u l-Istati Membri tagħhom, min-naħa l-waħda, u r-Repubblika tat-Tuneżija, min-naħa l-oħra, li jikkonċerna Ftehim Qafas bejn l-Unjoni Ewropea u r-Repubblika tat-Tuneżija dwar il-prinċipji ġenerali għall-parteċipazzjoni tar-Repubblika tat-Tuneżija fil-programmi tal-Unjoni

L-UNJONI EWROPEA, minn hawn 'il quddiem imsejħa “l-Unjoni”,

min-naħa l-waħda,

u

r-REPUBBLIKA TAT-TUNEŻIJA, minn issa msejħa "it-Tuneżija"

min-naħa l-oħra,

minn hawn 'il quddiem imsejħa konġuntament “il-Partijiet”

Billi:

(1)          It-Tuneżija kkonkludiet Ftehim Ewro-Mediterranju li jistabbilixxi Assoċjazzjoni bejn il-Komunitajiet Ewropej u l-Istati Membri tagħhom, min naħa, u t-Tuneżija, min-naħa l-oħra (minn issa msejjaħ “il-Ftehim”), li daħal fis-seħħ fl-1 ta’ Marzu 1998.

(2)          Il-Kunsill Ewropew ta’ Brussell tas-17/18 ta’ Ġunju 2004 laqa’ b'mod favorevoli l-proposti tal-Kummissjoni għal Politika Ewropea tal-Viċinat (PEV) u aċċetta l-konklużjonijiet tal-Kunsill tal-14 ta’ Ġunju 2004;

(3)          Il-Kunsill, f’bosta okkażjonijiet oħrajn, ikkonkluda ripetutament favur din il-politika.

(4)          Il-Kunsill, fil-5 ta’ Marzu 2007, esprima l-appoġġ tiegħu għall-approċċ ġenerali u globali deskritt fil-Komunikazzjoni tal-Kummissjoni tal-4 ta’ Diċembru 2006, COM(2006) 724 finali, sabiex l-isħab tal-politika Ewropea tal-viċinat ikunu jistgħu jipparteċipaw fil-ħidma tal-aġenziji Komunitarji u l-programmi Komunitarji fuq il-merti tagħhom u fejn l-bażijiet legali jippermettu;

(5)          It-Tuneżija esprimiet x-xewqa tagħha li tipparteċipa f’għadd ta’ programmi tal-Unjoni.

(6)          It-termini u l-kondizzjonijiet speċifiċi applikabbli għall-parteċipazzjoni f'kull programm partikolati, notevolment il-kontribuzzjoni finanzjarja u l-proċeduri ta’ rapportar u tal-evalwazzjoni, iridu jiġu stabbiliti bi ftehim bejn il-Kummissjoni Ewropea, li taġixxi f’isem l-Unjoni, u t-Tuneżija,

FTIEHMU KIF ĠEJ:

Artikolu 1

It-Tuneżija titħalla tipparteċipa fil-programmi kollha tal-Unjoni attwali u futuri miftuħa għall-parteċipazzjoni tat-Tuneżija f'konformità mad-dispożizzjonijiet relevanti li jadottaw dawn il-programmi.

Artikolu 2

It-Tuneżija tikkontribwixxi finanzjarjament għall-baġit ġenerali tal-Unjoni Ewropea li jikkorrispondi għall-programmi speċifiċi li fihom tipparteċipa t-Tuneżija.

Artikolu 3

Ir-rappreżentanti tat-Tuneżija jitħallew jieħdu sehem bħala osservaturi u, għall-punti li jikkonċernaw lit-Tuneżija, jitħallew jipparteċipaw fil-kumitati tal-ġestjoni responsabbli mill-monitoraġġ tal-programmi li t-Tuneżija tikkontribwixxi finanzjarjament għalihom.

Artikolu 4

Il-proġetti u inizjattivi mressqa minn parteċipanti mit-Tuneżija, kemm jista’ jkun, ikunu suġġetti għall-istess kundizzjonijiet, regoli u proċeduri li għandhom x’jaqsmu mal-programmi kkonċernati kif huma applikati lill-Istati Membri.

Artikolu 5

It-termini u l-kondizzjonijiet speċifiċi rigward il-parteċipazzjoni tat-Tuneżija f’kull program partikolari, b’mod partikolari l-kontribuzzjoni finanzjarja pagabbli u l-proċeduri tar-rapportar u tal-evalwazzjoni, jiġu determinati bi ftehim bejn il-Kummissjoni Ewropea u l-awtoritajiet Tuneżini kompetenti fuq il-bażi tal-kriterji stabbiliti permezz tal-programmi kkonċernati.

Jekk it-Tuneżija tapplika għall-assistenza esterna tal-Unjoni biex tipparteċipa fi programm partikolari tal-Unjoni abbażi tal-Artikolu 3 tar-Regolament (KE) Nru 232/2014 tal-Parlament Ewropew u tal-Kunsill tal-11 ta' Marzu 2014 li jistabbilixxi dispożizzjonijiet ġenerali għat-twaqqif ta' Strument Ewropew ta' Viċinat u Sħubija jew skont kwalunkwe Regolament simili li jipprovdi għall-assistenza esterna tal-Unjoni lit-Tuneżija li tista' tiġi adottata fil-ġejjieni, il-kondizzjonijiet li jirregolaw l-użu mit-Tuneżija tal-assistenza tal-Unjoni jiġu deċiżi fi ftehim ta' ffinanzjar.

Artikolu 6

F'konformità mar-Regolament (UE, Euratom) Nru 966/2012 tal-Parlament Ewropew u tal-Kunsill tal-25 ta’ Ottubru 2012 dwar ir-regoli finanzjarji applikabbli għall-baġit ġenerali tal-Unjoni u li jħassar ir-Regolament tal-Kunsill (KE, Euratom) Nru 1605/2002, kull ftehim konkluż bis-saħħa tal-Artikolu 5 jistipula li l-kontrolli, l-awditi finanzjarji jew verifiki oħra, inklużi l-investigazzjonijiet amministrattivi, isiru mill-Kummissjoni Ewropea, mill-Uffiċċju Ewropew ta’ Kontra l-Frodi u mill-Qorti tal-Awdituri, jew taħt l-awtorità tagħhom.

Isiru dispożizzjonijiet dettaljati dwar kontroll u verifika finanzjarja, miżuri amministrattivi, penali u rkupru li jippermettu lill-Kummissjoni Ewropea, l-Uffiċċju Ewropew ta' Kontra l-Frodi u l-Qorti tal-Awdituri li jiġu mogħtija setgħat li jkunu ekwivalenti għas-setgħat tagħhom fir-rigward tal-benefiċjarji jew il-kuntratturi stabbiliti fl-Unjoni.

Artikolu 7

Dan il-Protokoll dwar ftehim qafas japplika għall-perjodu li fih ikun fis-seħħ il-Ftehim Ewro-Mediterranju.

Dan il-Protokoll jiġi ffirmat u approvat mill-Partijiet f'konformità mal-proċeduri rispettivi tagħhom.

Kull Parti tista’ tiddenunzja dan il-Protokoll b’notifika bil-miktub lill-Parti Kontraenti l-oħra. Dan il-Protokoll jintemm sitt xhur wara d-data ta’ din in-notifika.

It-tmiem ta' dan il-Protokoll li jiġi wara denunzja minn kwalunkwe waħda mill-partijiet ma jkollu l-ebda influwenza fuq l-ispezzjonijiet u l-kontrolli li jitwettqu taħt id-dispożizzjonijiet stipulati fl-Artikoli 5 u 6 fejn xieraq.

Artikolu 8

Mhux aktar tard minn tliet snin wara d-dħul fis-seħħ ta’ dan il-Protokoll, u kull tliet snin wara dan, iż-żewġ Partijiet jistgħu jirrevedu l-implimentazzjoni ta’ dan il-Protokoll abbażi tal-parteċipazzjoni effettiva tat-Tuneżija fil-programmi tal-Unjoni.

Artikolu 9

Dan il-Protokoll jgħodd, min-naħa, għat-territorju li fih japplikaw it-Trattati dwar l-Unjoni Ewropea u t-Trattat dwar il-Funzjonament tal-Unjoni Ewropea skont il-kundizzjonijiet stipulati f’dawn it-Trattati, u, min-naħa l-oħra, għat-territorju tat-Tuneżija.

Artikolu 10

Sakemm jidħol fis-seħħ, il-Partijiet jaqblu li japplikaw provviżorjament dan il-Protokoll mid-data meta jiġi ffirmat, bil-kundizzjoni li l-proċeduri neċessarji jitlestew aktar tard.

Dan il-Protokoll jidħol fis-seħħ fl-ewwel jum tax-xahar wara d-data li fiha l-Partijiet jinnotifikaw lil xulxin permezz ta’ mezzi diplomatiċi dwar it-tlestija tal-proċeduri tagħhom meħtieġa biex jidħol fis-seħħ.

Artikolu 11

Dan il-Protokoll jifforma parti integrali mill-Ftehim Ewro-Mediterranju li jistabbilixxi assoċjazzjoni bejn il-Komunitajiet Ewropej u l-Istati Membri tagħhom, min-naħa l-waħda, u r-Repubblika Tuneżina min-naħa l-oħra.

Artikolu 12

Dan il-Protokoll jiġi kkompilat f’żewġ kopji bil-Ġermaniż, bl-Ingliż, bl-Għarbi, bil-Bulgaru, bil-Kroat, bid-Daniż, bl-Ispanjol, bl-Estonjan, bil-Finlandiż, bil-Franċiż, bil-Grieg, bl-Ungeriż, bit-Taljan, bil-Latvjan, bil-Litwan, bil-Malti, bl-Olandiż, bil-Pollakk, bil-Portugiż, bir-Rumen, bis-Slovakk, bis-Sloven, bl-Isvediż, biċ-Ċek u kull wieħed minn dawn it-testi huwa awtentiku bl-istess mod.

Magħmul fi Brussell,

Għall-Unjoni Ewropea           Għar-Repubblika tat-Tuneżija