—

li jiġu inklużi referenzi għal din l-Opinjoni fil-preamboli tal-proposti kollha;

—

li fil-proposti kollha jiddaħħlu dispożizzjonijiet li jenfasizzaw l-applikabbiltà sħiħa tal-leġiżlazzjoni eżistenti dwar il-protezzjoni tad-dejta. Il-KEPD jissuġġerixxi wkoll li r-referenza għad-Direttiva 95/46/KE tiġi ċċarata billi jitniżżel b’mod speċifiku li d-dispożizzjonijiet se jkunu japplikaw skont ir-regoli nazzjonali li jimplimentaw id-Direttiva 95/46/KE;

—

li fil-każ tad-Direttiva tal-IM li qed tiġi proposta, l-aċċess tal-awtoritajiet kompetenti jiġi limitat għal dokumenti u informazzjoni għal ksur serju tad-Direttivi proposti, identifikat speċifikament, u għal każijiet fejn ikun hemm suspett raġonevoli (li għandu jkun imsaħħaħ b’evidenza inizjali konkreta) li twettaq xi ksur;

—

li fil-każ tad-Direttiva tal-IM li qed tiġi proposta, jiġi introdott ir-rekwiżit li l-awtoritajiet kompetenti jitolbu dokumenti u informazzjoni b’deċiżjoni formali ta’ awtorità ġuridika, li tispeċifika l-bażi legali u l-għan tat-talba u x’informazzjoni hija rikjesta, il-limitu taż-żmien li fih l-informazzjoni għandha tiġi pprovduta, kif ukoll id-dritt tal-indirizzat li jitlob ir-reviżjoni tad-deċiżjoni minn Qorti.

—

li fil-każ tad-Direttiva tal-UCITS li qed tiġi proposta, jiġi introdott r-rekwiżit li l-awtoritajiet kompetenti jitolbu r-reġistrazzjonijiet telefoniċi u t-traffiku tad-dejta b’deċiżjoni formali tal-awtorità kompetenti li tispeċifika l-bażi legali u l-għan tat-talba u x’informazzjoni hija rikjesta, il-limitu taż-żmien li fih l-informazzjoni għandha tiġi pprovduta, kif ukoll id-dritt tal-indirizzat li jitlob reviżjoni tad-deċiżjoni minn Qorti.

—

li fil-każ tad-Direttiva tal-IM li qed tiġi proposta, jiġu ċċarati l-modalitajiet tad-database tal-EIOPA billi jiġu introdotti dispożizzjonijiet aktar dettaljati tar-Regolamenti proposti. Dawn id-dispożizzjonijiet iridu jikkonformaw mal-kundizzjonijiet tar-Regolament (KE) Nru 45/2001. B’mod partikolari, id-dispożizzjoni li tistabbilixxi d-database trid (i) tidentifika l-għan tal-operazzjonijiet tal-ipproċessar u tistabbilixxi liema huma l-użi kompatibbli; (ii) tidentifika liema entitajiet (l-EIOPA, l-awtoritajiet kompetenti, il-Kummissjoni) se jkollhom aċċess għal liema dejta maħżuna fid-database u liema se jkollhom il-possibbiltà li jimmodifikaw id-dejta; (iii) tiżgura d-dritt ta’ aċċess u informazzjoni xierqa għas-suġġetti kollha tad-dejta li d-dejta personali tagħhom tista’ tinħażen u tiġi skambjata (iv) tiddefinixxi u tillimita l-perjodu ta’ żamma tad-dejta personali għall-minimu neċessarju biex jitwettaq it-tali għan;

—

li tiġi vvalutata n-neċessità tas-sistema proposta għall-pubblikazzjoni obbligatorja tas-sanzjonijiet fil-proposti kollha u li jiġi vverifikat li l-obbligu ta’ pubblikazzjoni ma jmurx lil hinn minn dak li hu meħtieġ biex jinkiseb l-objettiv ta’ interess pubbliku fil-mira, u jekk hemmx miżuri inqas restrittivi biex jintlaħaq l-istess objettiv. Soġġett għar-riżultat ta’ dan it-test tal-proporzjonalità, l-obbligu ta’ pubblikazzjoni għandu f’kwalunkwe każ jiġi appoġġat b’salvagwardji adegwati biex jiġi assigurat ir-rispett tal-preżunzjoni tal-innoċenza, id-dritt tal-persuni kkonċernati li joġġezzjonaw, is-sigurtà/il-preċiżjoni tad-dejta, u t-tħassir tagħha wara perjodu ta’ żmien adegwat.

—

li fir-rigward tar-rappurtar ta’ ksur, fil-proposti kollha (i) jiddaħħlu dispożizzjonijiet fid-Direttivi proposti li jgħidu li: “l-identità ta’ dawn il-persuni għandha tiġi garantita fl-istadji kollha tal-proċedura, sakemm l-iżvelar tagħha ma jkunx mitlub mil-liġi nazzjonali fil-kuntest ta’ investigazzjoni ulterjuri jew proċeduri ġudizzjarji sussegwenti”; (ii) jiżdied paragrafu li jitlob li l-Istati Membri jdaħħlu fis-seħħ “proċeduri xierqa li jiżguraw id-dritt tal-persuna akkużata għad-difiża u li tinstema’ qabel tiġi adottata deċiżjoni li tikkonċerna lilha u d-dritt li tfittex rimedju ġudizzjarju effettiv kontra kull deċiżjoni jew miżura li tikkonċerna lilha”; (iii) jitneħħa l-kliem “il-prinċipji stipulati” mid-dispożizzjonijiet.