52013SC0096

COMMISSION STAFF WORKING PAPER

SOMMARJU EŻEKUTTIV TAL-VALUTAZZJONI TAL-IMPATT

Dokument ta’ akkumpanjament għall-

Proposta għal REGOLAMENT TAL-PARLAMENT EWROPEW U TAL-KUNSILL li jemenda r-REGOLAMENT TAL-KUNSILL (KE) Nru 207/2009 tas-26 ta' Frar 2009 dwar it-trade mark Komunitarja u l- Proposta għal DIRETTIVA TAL-PARLAMENT EWROPEW U TAL-KUNSILL għall-approssimazzjoni tal-liġijiet tal-Istati Membri relatati mat-trade marks (tfassil mill-ġdid)

1.           kuntest

Fl-Ewropa, trade mark tista' tiġi rreġistrata fuq livell nazzjonali fl-uffiċċji tal-proprjetà industrijali (PI) tal-Istati Membri, jew f’livell tal-UE bħala trade mark Komunitarja (“CTM”) fl-Uffiċċju għall-Armonizzazzjoni fis-Suq Intern (Trade Marks u Disinji) f’Alicante (“UASI”).

Mis-snin disgħin, meta nħoloq l-acquis tat-trade mark, la d-Direttiva dwar it-TM u lanqas ir-Regolament tas-CTM ma ġew soġġetti għal tibdil prinċipali. L-ambjent tan-negozju, madanakollu, inbidel b’mod sinifikanti matul dawn l-aħħar żewġ deċennji.

2.           Definizzjoni tal-problema

Iż-żewġ problemi ewlenin identifikati jirrigwardaw l-ewwel id-disposizzjonijiet diverġenti tal-qafas regolatorju eżistenti u, it-tieni, il-livell baxx ta’ kooperazzjoni bejn l-uffiċċji tat-trade marks.

L-ewwel nett, id-Direttiva ma tkoprix l-aspetti proċedurali, il-livell ta’ armonizzazzjoni dwar il-liġi sostantiva (inklużi dispożizzjonijiet li mhumiex obbligatorji) ma jkunx biżżejjed, u hemm biss bażi legali b’mod vag għall-kooperazzjoni bejn l-UASI u l-uffiċċji nazzjonali tal-PI fir-Regolament tas-CTM.

It-tieni, sabiex tintlaħaq u tkun żgurata l-kumplimentarjetà u l-interoperabbiltà bejn is-CTM u s-sistemi nazzjonali, l-Uffiċċju għall-Armonizzazzjoni tas-Suq Intern (UASI) u l-uffiċċji nazzjonali tal-PI għandhom jikkooperaw mill-qrib. Madankollu, minbarra n-nuqqas ta' bażi legali ċara, hemm żewġ elementi oħra li jxekklu l-kooperazzjoni. Dawn l-elementi huma faċilitajiet tekniċi insuffiċjenti (it-tagħmir tal-IT) tal-uffiċċji nazzjonali, u l-fatt li m’għandhomx ir-riżorsi finanzjarji meħtieġa biex jiżviluppaw, jibdew u jmexxu, fuq perjodu fit-tul, għodod komuni, eż. bażijiet ta’ dejta għat-trade marks konġunti b’faċilitajiet ta’ tiftix onlajn.

Il-problemi msemmija hawn fuq għandhom sensiela ta’ konsegwenzi negattivi sinifikanti għall-industrija. Dawn in-nuqqasijiet mhux biss jillimitaw l-aċċessibbiltà tas-sistemi ta’ protezzjoni tat-trade marks, jinvolvu ħafna inċertezza legali, u jixħtu r-relazzjoni komplimentarja bejn is-CTM u s-sistemi nazzjonali f’riskju, iżda wkoll jgħawwġu l-kundizzjonijiet ekwi għall-kumpaniji, b’konsegwenzi negattivi ulterjuri fuq il-kompetittività tal-UE.

Mingħajr bidliet xierqa, il-kundizzjonijiet attwali, li mhumiex tal-aħjar livell għan-negozji Ewropej u għall-kumplimentarjetà sottożviluppata bejn is-sistemi tat-trade marks aktarx li se jmorru għall-agħar.

Kien hemm xi tentattivi promettenti biex jinstabu soluzzjonijiet prattiċi għal faċilità tal-kooperazzjoni bejn l-UASI u l-uffiċċji nazzjonali tal-PI, notevolment fil-kuntest tal-Fond ta' Kooperazzjoni tal-UASI. Madankollu, din l-esperjenza żvelat in-nuqqasijiet ċari tal-qafas attwali għall-kooperazzjoni, u wriet il-limiti tal-kooperazzjoni msejsa fuq arranġamenti volontarji.

Għalhekk, minkejja inizjattivi ta’ kooperazzjoni eżistenti, il-benefiċċji sostenibbli mhumiex żgurati, u l-benefiċċji tal-inizjattivi eżistenti ta’ kooperazzjoni se joħolqu kostijiet jekk is-sitwazzjoni tibqa’ kif inhi.

B’riżultat ta’ dan, l-uffiċji l-oħra tal-PI jaqgħu lura f’termini ta’ effiċjenza, inqas ma dawn isiru attraenti vis-à-vis s-sistema tas-CTM, bir-riskju li s-sidien tat-trade marks jieqfu għal kollox milli jużawhom, u jagħżlu CTM minflok. Fuq medda twila ta’ żmien, dan jista’ jhedded il-vijabilità tas-sistemi nazzjonali, kuntrarju għall-għan ta’ preservazzjoni tat-trade marks nazzjonali flimkien mas-CTMs f’sistema ta’ koeżistenza armonjuża u kumplimentari.

3.           Sussidjarjetà

L-Artikolu 118(1) tat-TFUE jippermetti l-istabbiliment ta’ miżuri għall-ħolqien ta’ drittijiet tal-PI unitarji biex jipprovdu protezzjoni madwar l-UE, inkluż l-istabbiliment ta' awtorizzazzjoni, koordinazzjoni u arranġamenti ta’ superviżjoni ċentralizzati għall-Unjoni kollha. L-adozzjoni ta’ miżuri għall-approssimazzjoni tad-dispożizzjonijiet stipulati bil-liġi, b’Regolament jew b’azzjoni amministrattiva fl-Istati Membri li għandhom bħala l-għan tagħhom l-istabbiliment u l-funzjonament tas-suq intern, hija prevista bl-Artikolu 114 tat-TFUE.

Is-CTM hija titolu awtonomu tal-proprjetà intellettwali fl-UE. Il-leġiżlatur tal-UE biss huwa intitolat li jagħmel il-modifiki meħtieġa għar-Regolament sabiex itejjeb u jissimplifika s-sistema tas-CTM. L-istess japplika għall-emendi meħtieġa tad-dispożizzjonijiet korrispondenti li huma diġà parti mid-Direttiva dwar it-TM.

Barra minn hekk, peress li l-problemi identifikati ma jippermettux kundizzjonijiet ekwi għall-kumpaniji tal-UE (b’aktar konsegwenzi negattivi fuq il-kompetittività tagħhom), huwa rakkomandabbli li jiġu adottati miżuri li jistgħu jtejbu l-funzjonament tas-Suq Intern. Dawn il-miżuri, li jimmiraw lejn l-estensjoni tal-livell attwali ta’ approssimazzjoni permezz tad-Direttiva dwar it-TM, jistgħu jittieħdu biss fil-livell tal-UE, speċjalment minħabba l-bżonn li tiġi żgurata koerenza mas-sistema tas-CTM.

Fl-aħħar nett, billi l-UASI huwa aġenzija regolatorja tal-UE, soluzzjoni għall-kundizzjonijiet tal-qafas sfavorevoli li jfixklu l-kooperazzjoni effettiva mal-uffiċċji nazzjonali jistgħu wkoll jinstabu biss fil-livell tal-UE.

4.           Għanijiet

L-għan ġenerali tal-analiżi huwa li tiġi mmodernizzata s-sistema tat-trade mark fl-Ewropa, biex b'hekk tissaħħaħ il-kompetittività tal-kumpaniji tal-UE permezz tat-titjib tal-aċċessibbità tas-sistemi ta’ TM (kostijiet imnaqqsa; żieda fil-veloċità u l-prevedibbiltà), tingħata ċertezza legali għan-negozji kollha fl-UE, u tkun żgurata l-koeżistenza u l-komplementarjetà bejn l-UE u s-sistemi nazzjonali.

L-għanijiet speċifiċi huma li tiżdied il-konverġenza tad-Direttiva tat-TM mar-Regolament tas-CTM, u li jiżdied il-livell ta’ kooperazzjoni bejn l-UASI u l-uffiċċji nazzjonali tal-PI.

Fl-aħħar nett, l-għanijiet operazzjonali huma li tinkiseb aktar approssimazzjoni tal-proċeduri tat-trade mark u ta’ kwistjonijiet sostantivi, li jkun ipprovdut inċentiv regolatorju xieraq għall-kooperazzjoni, li tinbena l-kapaċità ta’ kooperazzjoni teknika fil-livell nazzjonali tal-uffiċċji tat-TM, u li jiġi żgurat finanzjament fit-tul għal attivitajiet ta’ kooperazzjoni.

5.           Analiżi u tqabbil ta’ għażliet ta’ politika u l-impatti tagħhom

Kienu kkunsidrati għażliet ta’ politika għal kull wieħed mill-għanijiet operazzjonali u mkejla skont il-kriterji tal-effikaċja (l-ilħuq tal-għanijiet) u l-effiċjenza (il-ħin meħtieġ, in-nefqa totali u l-proporzjonalità).

5.1.        L-approssimazzjoni tal-liġijiet u proċeduri dwar it-trade marks

Għażla 1 (ta’ xenarju bażi): Ma jkunx hemm aktar armonizzazzjoni, minkejja l-ħtieġa apparenti għal aktar allinjament fil-qafas legali eteroġenju.

Għażla 2 (approssimazzjoni parzjali): L-approssimazzjoni tal-liġijiet nazzjonali u l-koerenza tagħhom mas-sistema tas-CTM tiġi estiża biex tiġbor (i) l-allinjament tar-regoli proċedurali prinċipali mar-Regolament tas-CTM, (ii) l-allinjament ta’ aktar aspetti tal-liġi sostantivi indirizzati fir-Regolament tas-CTM, u (iii) it-tnaqqis ta’ disposizzjonijiet mhux obbligatorji fid-Direttiva tat-TM, f’konformità mar-Regolament tas-CTM. Jitqies li dan l-eżerċizzju ta’ allinjament limitat ikun fattibbli għall-Istati Membri u jista’ jsir f’perjodu ta’ żmien raġonevoli. Billi l-kisba tal-għanijiet identifikati tkun inċerta ħafna, jekk l-approssimazzjoni titwettaq fuq bażi volontarja (subalternattiva 2a), jidher xieraq li l-armonizzazzjoni ssir minn strument legalment vinkolanti (is-subalternattiva 2b).

Għażla 3 (approssimizzazzjoni totali): L-approssimazzjoni tkun ibbażata fuq l-Għażla 2 iżda tinkludi l-aspetti kollha li jibqgħu ta’ liġi u proċeduri sostantivi dwar it-trade marks. L-approssimazzjoni tkun jew volontarja (3a) jew obbligatorja (3b). Madankollu, l-analiżi tal-problemi eżistenti ma wrietx ħtieġa ċara għal approssimazzjoni ta’ skala sħiħa tad-dispożizzjonijiet kollha tat-trade marks. Barra minn hekk, l-Istati Membri ma jidhrux li huma lesti għal ċaqlieqa daqstant estensiva. B’riżultat ta’ dan, l-Għażla 3 tkun sproporzjonata għall-ħtiġijiet attwali u l-fattibbilltà politika tagħha tkun inċerta ferm.

Għażla 4 (ġabra unika ta’ regoli): Il-liġijiet nazzjonali dwar it-trade marks jkunu mibdula kompletament minn ġabra unika ta’ regoli li tistabbilixxi regoli uniformi madwar l-UE. Bħala riżultat, l-uffiċċji nazzjonali kollha jkunu japplikaw dispożizzjonijiet identiċi. Madankollu, anki aktar mill-Għażla 3, din l-għażla tkun sproporzjonata b’mod ċar u għandha tiġi skartata mill-ewwel.

Objettiv 1 — l-approssimazzjoni tal-liġijiet dwar it-trade marks[1]

||

|| Effikaċja || Effiċjenza || Totali

Approssimazzjoni akbar tal-liġijiet u l-proċeduri dwar it-TM || Żmien meħtieġ || Kost totali || Proproporzjo nalità

1. Linja bażi || 0 || 0 || 0 || 0 || 0

2. Approssimazzjoni parzjali || || || || ||

2a. Volontarja || ? || -- || - || + || -

2b. Obbligatorja || ++ || + || - || + || ++

3. Approssimizzazzjoni totali || || || || ||

3a. Volontarja || ? || -- || -- || - || -

3b. Obbligatorja || ++ || -- || -- || -- || +/-

4. Ġabra unika ta’ regoli || ++ || -- || -- || -- || +/-

L-Għażla selezzjonata 2b mistennija li jkollha effett pożittiv kbir fuq l-utenti kollha tas-sistema tat-trade marks, speċjalment l-SMEs. Fuq perjodu fit-tul, din għandha tikontribwixxi biex titjieb l-effiċjenza u l-effikaċja tal-proċeduri fl-uffiċċji nazzjonali tal-PI u eventwalment twassal għal iffrankar sinifikanti tal-ispejjeż. Fl-aħħar nett, ikun ta’ benefiċċju ċar għall-UASI, fid-dawl tal-idea li s-sistema tas-CTM tittieħed bħala punt ta’ riferiment, u għall-kompitu tal-Uffiċċju ta’ appoġġ u ta’ koordinazzjoni tal-isforzi fil-konverġenza tal-prassi u l-għodod mal-uffiċċji nazzjonali. Barra minn hekk, waħda mill-miżuri ta’ armonizzazzjoni prijoritarji, l-introduzzjoni tas-sistema “one-class-per-fee”, (klassi għal kull tariffa) se tkun akkumpanjata minn aġġustament xieraq tal-applikazzjoni tas-CTM, minn tariffa ta’ tiġdid u tariffi għal klassijiet, li addizzjonalment se jibbenefikaw minnu l-utenti.

5.2.        Bażi legali ċara nieqsa għall-kooperazzjoni

Għażla 1 (ta’ xenarju bażi): L-ebda bażi legali speċifika għall-kooperazzjoni ma tkun ipprovduta.

Għażla 2: Tiġi stabbilita bażi legali ċara li tippermetti lill-UASI u lill-uffiċċji nazzjonali li jikkooperaw (kooperazzjoni fakultattiva) bl-għan li jiġu armonizzati l-prattiki u li jiġu żviluppati għodod u bażijiet ta’ dejta komuni. Fid-dawl tan-natura mhux obbligatorja tagħha, wieħed ma jistax jippretendi li l-uffiċċji kollha jieħdu sehem.

Għażla 3: L-uffiċċji nazzjonali u l-UASI ikunu obbligati li jikkooperaw (kooperazzjoni obbligatorja). L-għanijiet ta’ kooperazzjoni jkunu speċifikati b’mod ċar biex jippermettu l-monitoraġġ tal-ksib tagħhom. Bħala riżultat, is-sehem tal-uffiċċji kollha jkun żgurat u jkun eħfef għalihom biex jiġġustifikaw, lill-awtoritajiet baġitarji tagħhom, l-allokazzjoni ta’ riżorsi għal proġetti komuni ma’ uffiċji oħra tal-PI, u aktar faċli għall-UASI li jivvalida internament in-nefqa tiegħu fuq l-attivitajiet ta’ kooperazzjoni.

Objettiv 2 - l-istabbiliment ta' bażi legali xierqa għall-kooperazzjoni

||

|| Effikaċja || Effiċjenza || Totali

Inċentiv akbar għal kooperazzjoni || Żmien meħtieġ || Kost totali || Proporzjo nalità

1. Linja bażi || 0 || 0 || 0 || 0 || 0

2. Bażi legali għal kooperazzjoni fakultattiva || ? || + || + || ? || ?

3. Bażi legali għal kooperazzjoni obbligatorja || ++ || + || + || + || +

L-Għażla 3 selezzjonata tiżgura s-sehem sħiħ fil-proċess ta’ prattiki konverġenti u fl-iżvilupp ta’ għodod komuni, u għalhekk tissodisfa l-aspettattivi tal-utenti. Għall-uffiċċji nazzjonali, l-għażla selezzjonata tkun twassal għal kisbiet sinifikanti fl-effiċjenza u fl-ispiża fuq perjodu medju sa perjodu fit-tul. L-uffiċċji nazzjonali jkunu kapaċi jibnu fuq l-esperjenza miksuba fil-kuntest tal-Fond ta’ Kooperazzjoni tal-UASI , u jiżviluppaw aktar il-qafas eżistenti li jkun jiffaċilita tranżizzjoni bla problemi. L-UASI wera biċ-ċar il-kapaċità tiegħu biex jittratta b’mod effettiv u fi żmien qasir ma’ proġetti ta’ kooperazzjoni fuq skala kbira bħal dawn u jkun jista’ wkoll jikseb benefiċċji minn proġetti komuni.

5.3.        Il-bini tal-kapaċità ta’ kooperazzjoni fir-rigward ta' faċilitajiet tekniċi

Għażla 1: Tħalli f’idejn kull uffiċċju PI biex jakkwista u jiżviluppa l-faċilitajiet meħtieġa.

Għażla 2: Tagħmilha possibbli li l-faċilitajiet u l-għodod meħtieġa jkunu aċċessibbli lill-Uffiċji tal-PI f’qafas ta’ kooperazzjoni volontarja.

Għażla 3: Tkun tiżgura li l-faċilitajiet meħtieġa jkunu aċċessibbli permezz ta’ qafas ta’ kooperazzjoni obbligatorju. Din l-għażla biss tiggarantixxi li l-uffiċċji kollha jibbenefikaw u jimpenjaw ruħhom għall-iżvilupp ta’ għodod u ta’ bażijiet ta' dejta komuni.

Objettiv 3 - il-bini ta’ kapaċità teknika fl-uffiċċji nazzjonali tal-PI

||

|| Effikaċja || Effiċjenza || Totali

Sigurtà akbar għall-ksib tal-faċilitajiet || Żmien meħtieġ || Kost totali || Proporzjo nalità

1. Linja bażi || 0 || 0 || 0 || 0 || 0

2. Aċċess għal għodda fakultattiv || ? || ? || + || + || ?

3. Aċċess għal għodda mandatorju || ++ || + || + || + || +

Skont l-għażla 3 li saret, l-utenti jistgħu jiġu mistennija li jaffaċċaw soluzzjonijiet tal-IT konverġenti u teknoloġikament aġġornati. Dan se jirriżulta f’żieda fl-aċċessibbiltà, iktar effiċjenza u spejjeż imnaqqsa. L-Uffiċji tal-PI jistgħu jibbenefikaw minn kooperazzjoni msaħħa bis-saħħa tat-titjib fl-aċċess għall-iżvilupp fl-IT. Mill-għażla magħżula jibbenefika ukoll l-UASI.

5.4.        Il-bini ta’ kapaċità ta’ kooperazzjoni rigward il-finanzjament

5.4.1.     Finanzjament b’mod ġenerali

Għażla 1: Kull uffiċċju tal-PI u l-UASI jġorru l-kostijiet kollha tal-attivitajiet ta’ kooperazzjoni tagħhom. Dan jimpedixxi lill-Istati Membri milli jieħdu sehem fi skemi ta’ kooperazzjoni, u, għalhekk, din l-għażla ma tasalx għall-kisba tal-għan identifikat.

Għażla 2: L-attivitajiet ta’ kooperazzjoni jiġu ffinanzjati mill-baġit tal-UE. Madankollu, ikun improbabbli ħafna li tista’ tkun disponibbli kontribuzzjoni sostanzjali mill-baġit tal-UE meta wieħed iqis ir-restrizzjonijiet baġitarji attwali.

Għażla 3: Il-finanzjament ikun mill-baġit tal-UASI, bl-użu ta’ parti mid-dħul annwali tal-UASI. Ikun identifikat mekkaniżmu ta’ finanzjament xieraq, inkluż mekkaniżmi ta’ kontroll li jiggarantixxu li l-fondi jintużaw biss għal skopijiet speċifiċi identifikati, u suġġetti għall-kriterji ta' konformità. L-UASI akkumula bilanċ pożittiv sostanzjali li huwa diġà użat parzjalment għal proġetti tal-Fond ta’ Kooperazzjoni. Barra minn hekk, ir-riżultati baġitarji annwali tal-UASI dejjem jaqbżu n-nefqa operazzjonali tal-Uffiċċju. Għalhekk, l-attivitajiet il-ġodda ta’ kooperazzjoni jistgħu jew jiġu ffinanzjati minn introjtu annwali u/jew minn bilanċ pożittiv eżistenti, u b’hekk tkun żgurata d-disponibbiltà ta’ finanzi suffiċjenti. Il-kost ta’ attivitajiet ta’ kooperazzjoni bejn l-UASI u l-uffiċċji nazzjonali jkun jammonta minn EUR 17-il miljun sa EUR 20 miljun fis-sena, li jikkorrispondu għal madwar 10 % tal-introjtu operazzjonali tal-UASI. Il-previżjonijiet tal-baġit juru li l-għażla 3 ma tkunx tikkawża żbilanċ fil-baġit tal-UASI.

Objettiv 4 — L-iżgurar ta’ finanzjament fit-tul

Għażliet || Kriterji ta’ valutazzjoni

Żgurar ta’ finanzjament fit-tul || Effikaċja (ilħuq tal-objettivi) || Effiċjenza || Evalwazzjoni ġenerali

Sigurtà akbar ta’ finanzjament || Żmien meħtieġ || Kost totali

1. Finanzjament mill-SM || 0 || 0 || 0 || 0

2. Finanzjament mill-baġit tal-UE || ? || ? || 0 || -

3. Finanzjament mill-baġit tal-UASI || ++ || ++ || 0 || ++

5.4.2.     Finanzjament mill-baġit tal-UASI — il-mekkaniżmu ta’ finanzjament

Ir-rapport janalizza żewġ mudelli possibbli ta’ finanzjament: finanzjament permezz ta’ somom f’daqqa fuq il-bażi ta’ kriterji ta’ allokazzjoni miftiehma (3.1a) u finanzjament stimulat mill-proġetti bbażat fuq għotjiet (3.2a). Abbażi ta’ dik il-valutazzjoni, ir-rapport sab li l-għażla tal-aħħar tkun aktar adattata biex jinkisbu l-għanijiet identifikati.

l-użu tal-baġit tal-UASI — il-mekkaniżmu ta’ finanzjament

L-għażliet marbuta mal-finanzjament mill-baġit tal-UASI Il-mekkaniżmu ta’ finanzjament || Effikaċja:(objettiv l-iżgurar ta’ finanzjament fit-tul) || Effiċjenza || Valutazzjoni ġenerali

Il-preċiżjoni tal-finanzjament || Il-kumplessità u t-trasparenza

1a. Somom f’daqqa bbażati fuq l-allokazzjoni || +/- || - || - || -

2a. Finanzjament stimulat mill-proġetti bbażat fuq l-għotjiet || ++ || ++ || + || ++

5.4.3.     Finanzjament mill-baġit tal-UASI — sors ta’ finanzjament

Wara analiżi tal-għażliet, b’mod partikolari l-iffinanzjar mill-baġit operattiv tal-UASI (3.1b), minn introjtu speċifiku tal-UASI (3.2b) u bl-użu ulterjuri tar-riżerva finanzjarja akkumulata (3.3b), jidher tabilħaqq xieraq li l-attivitajiet ta’ kooperazzjoni jiġu ffinanzjati mill-introjtu annwali tal-UASI b’mod ġenerali.

L-użu tal-baġit tal-UASI — sors ta’ finanzjament

L-għażliet marbuta mal-finanzjament mill-baġit tal-UASI Sors ta’ finanzjament || Effikaċja:(objettiv: l-iżgurar ta’ finanzjament fit-tul) || Effiċjenza || Valutazzjoni ġenerali

Preċiżjoni tal-finanzjament || Rilevanza (sors vs. l-għan) || Riskju għall-baġit tal-UASI

1b. Finanzjament mill-baġit operattiv || ++ || + || 0 || +/- || +

2b. Finanzjament minn introjtu speċifiku (tariffi ta’ tiġdid) || ++ || - || - || 0 || 0

3b. L-użu tas-surplus (żieda fl-allokazzjoni lill-Fond ta’ Kooperazzjoni) || -- || + || 0 || 0 || -

5.4.4.     Impatti tal-għażla magħżula

L-utenti jibbenefikaw b’mod ċar mir-riżultati tal-iskema l-ġdida ta’ kooperazzjoni. Barra minn hekk, ma jkun hemm l-ebda impatt fuqhom minħabba l-użu tal-baġit tal-UASI biex jiffinanzja proġetti komuni flimkien mal-uffiċċji nazzjonali tal-PI. Il-fatt li jiġu pprovduti fondi suffiċjenti biex jiffinanzjaw l-attivitajiet ta’ kooperazzjoni jkun jippermetti lill-uffiċċji nazzjonali tal-PI li jieħdu sehem u jimpenjaw ruħhom għal proġetti ta’ kooperazzjoni komuni fuq bażi fit-tul. Il-finanzjament tal-attivitajiet ta’ kooperazzjoni mill-UASI ikollu impatt sinifikanti fuq il-baġit tiegħu. Jista’ jiġi konkluż li l-baġit tal-UASI jkun jista’ jieħu n-nefqa addizzjonali relatata mal-finanzjament ta’ proġetti ta’ kooperazzjoni mal-uffiċċji nazzjonali mir-riżultati operazzjonali annwali tiegħu, filwaqt li jitqies l-impatt tal-aġġustament tat-tariffi tal-UASI minħabba l-introduzzjoni tas-sistema “one-class-per-fee”(klassi għal kull tariffa). Għaldaqstant, l-għażla magħżula ma tikkawżax żbilanċ fil-baġit tal-UASI.

6.           Monitoraġġ u Evalwazzjoni

Tliet snin wara l-iskadenza tad-data tal-għeluq tat-traspożizzjoni, l-Istati Membri jistgħu jippreżentaw lill-Kummissjoni rapport dwar l-implimentazzjoni tad-dispożizzjonijiet il-ġodda tad-Direttiva. Fuq il-bażi ta’ dawn l-inputs, il-Kummissjoni tista’ tfassal rapport, inkluża evalwazzjoni tal-effettività tal-miżuri meħuda. Barra minn hekk, l-attivitajiet ta’ kooperazzjoni ffinanzjati mill-baġit tal-UASI jkunu kontrollati u monitorjati f’konformità mar-regoli finanzjarji applikabbli għall-Uffiċċju, notevolment fir-rigward tal-proċeduri tal-għoti. Il-progress f’termini ta’ konverġenza tal-prattiki u tal-għodod jista’ jitkejjel kull sena, fuq il-bażi ta’ rapporti sommarji tal-UASI. Ħames snin wara d-dħul fis-seħħ tal-emendi għar-Regolament tas-CTM (u, jekk ikun japplika, anki tad-Direttiva tat-TM), il-Kummissjoni tkun tista’ tanalizza l-qafas legali l-ġdid għall-kooperazzjoni, b’attenzjoni partikolari fuq il-mekkaniżmu ta’ finanzjament għall-kooperazzjoni. L-analiżi għandha tkun ibbażata fuq rapporti sommarji annwali mħejja mill-UASI.

[1]               Sistema ta’ punteġġ: effett pożittiv: minn kemmxejn pożittiv (+) sa pożittiv ħafna (++); effett negattiv: minn kemmxejn negattiv (−) għal negattiv ħafna (--); Riżultat inċert: (?); l-ebda impatt: 0.