52013PC0778

MEMORANDUM TA’ SPJEGAZZJONI

Fl-24 ta’ Settembru 2012 il-Kunsill awtorizza lill-Kummissjoni biex tiftaħ negozjati, f’isem l-Unjoni Ewropea u l-Istati Membri tagħha, u r-Repubblika tal-Kroazja, mal-ex Repubblika Jugoslava tal-Maċedonja sabiex tikkonkludi Protokoll mal-Ftehim ta' Stabbilizzazzjoni u Assoċjazzjoni (FSA) bejn il-Komunitajiet Ewropej u l-Istati Membri tagħhom, minn naħa, u l-ex Repubblika tal-Maċedonja min-naħa l-oħra, sabiex titqies l-adeżjoni tar-Repubblika tal-Kroazja mal-Unjoni Ewropea.

Dawn in-negozjati bdew fit-18 ta' Diċembru 2012 wara konsultazzjonijiet tekniċi mal- ex-Repubblika Jugoslava tal-Maċedonja dwar il-kwistjoni. Aktar ċikli ta' negozjati saru fil-25 ta' Jannar u fl-10 ta' April 2013. Il-Gvern tal- ex Repubblika Jugoslava tal-Maċedonja kkonferma l-qbil tiegħu mal-protokoll fil-25 ta' Ottubru 2013. Il-Protokoll huwa aġġornat biex jirrifletti t-Tariffa Doganali tal-UE għall-2013 u l-abolizzjoni gradwali tad-dazji taħt l-FSA. It-test tal-Protokoll hu mehmuż..

Il-Kummissjoni tipproponi li l-Kunsill jiddeċiedi dwar l-iffirmar u l-applikazzjoni provviżorja tal-Protokoll f’isem l-Unjoni Ewropea u jikkonkludi l-Protokoll f’isem l-Unjoni Ewropea u l-Istati Membri tagħha. Il-Komunità Ewropea għall-Enerġija Atomika (KEEA) hija wkoll parti għall-Ftehim ta’ Stabbilizzazzjoni u Assoċjazzjoni. Għall-konklużjoni tal-Protokoll f’isem il-Komunità Ewropea għall-Enerġija Atomika, il-Kummissjoni tipproponi li l-Kunsill jagħti l-approvazzjoni tiegħu, skont it-tieni paragrafu tal-Artikolu 101 tat-Trattat li jistabbilixxi l-KEEA.

F'konformità mal-Artikolu 101 tat-Trattat tal-KEEA, id-deċiżjoni li jiġi ffirmat il-Ftehim tiġi adottata mill-Kummissjoni u d-deċiżjoni li jiġi konkluż il-ftehim tiġi adottata mill-Kummissjoni bl-approvazzjoni tal-Kunsill. Huwa għalhekk neċessarju li jiġu adottati deċiżjonijiet separati għall-iffirmar u l-konklużjoni tal-Protokoll mill-UE u mill-KEEA.

Għall-konklużjoni tal-Protokoll f’isem il-Komunità Ewropea għall-Enerġija Atomika, il-Kummissjoni tipproponi li l-Kunsill:

– jagħti l-approvazzjoni tiegħu, skont it-tieni paragrafu tal-Artikolu 101 tat-Trattat li jistabbilixxi l-KEEA.

Rakkomandazzjoni għal

DEĊIŻJONI TAL-KUNSILL

dwar l-approvazzjoni tal-konklużjoni mill-Kummissjoni, f'isem il-Komunità Ewropea għall-Enerġija Atomika, ta' Protokoll mal-Ftehim ta’ Stabbilizzazzjoni u Assoċjazzjoni bejn il-Komunitajiet Ewropej u l-Istati Membri tagħhom, minn naħa u l-ex Repubblika Jugoslava tal-Maċedonja, min-naħa l-oħra, sabiex titqies l-adeżjoni tar-Repubblika tal-Kroazja mal-Unjoni Ewropea

IL-KUNSILL TAL-UNJONI EWROPEA,

Wara li kkunsidra t-Trattat li jistabbilixxi l-Komunità Ewropea għall-Enerġija Atomika, u b’mod partikolari t-tieni paragrafu tal-Artikolu 101 tiegħu,

Wara li kkunsidra r-rakkomandazzjoni mill-Kummissjoni,

Billi:

(1) Fl-24 ta’ Settembru 2012 il-Kunsill awtorizza lill-Kummissjoni tiftaħ negozjati mal-ex Repubblika Jugoslava tal-Maċedonja sabiex tikkonkludi Protokoll għall-Ftehim ta' Stabbilizzazzjoni u Assoċjazzjoni bejn il-Komunitajiet Ewropej u l-Istati Membri tagħhom, minn naħa, u l-ex Repubblika Jugoslava tal-Maċedonja, min-naħa l-oħra, sabiex titqies l-adeżjoni tar-Repubblika tal-Kroazja mal-Unjoni Ewropea.

(2) Dawn in-negozjati tlestew b’suċċess.

(3) Il-konklużjoni, mill-Kummissjoni, tal-Protokoll għandha tiġi approvata f'dak li għandu x’jaqsam ma’ kwistjonijiet li jaqgħu fi ħdan il-kompetenza tal-Komunità Ewropea dwar l-Enerġija Atomika.

(4) L-iffirmar u l-konklużjoni tal-Protokoll huma soġġetti għal proċedura separata fir-rigward ta’ kwistjonijiet li jaqgħu taħt il-kompetenza tal-Unjoni Ewropea.

IDDEĊIEDA KIF ĠEJ:

Artikolu Uniku

Il-konklużjoni mill-Kummissjoni, f'isem il-Komunità Ewropea għall-Enerġija Atomika, tal-Protokoll għall-Ftehim ta’ Stabbilizzazzjoni u Assoċjazzjoni bejn il-Komunitajiet Ewropej u l-Istati Membri tagħhom, minn naħa u l-ex Repubblika Jugoslava tal-Maċedonja, min-naħa l-oħra, sabiex titqies l-adeżjoni tar-Repubblika tal-Kroazja mal-Unjoni Ewropea ("il-Protokol") hija b'dan approvata.

It-test tal-Protokol huwa mehmuż mad-Deċiżjoni tal-Kunsill dwar l-iffirmar u l-applikazzjoni provviżorja ta' Protokoll għall-Ftehim ta' Stabbilizzazzjoni u Assoċjazzjoni bejn il-Komunitajiet Ewropej u l-Istati Membri tagħhom, minn naħa, u l-ex Repubblika Jugoslava tal-Maċedonja min-naħa l-oħra, biex titqies l-adeżjoni tar-Repubblika tal-Kroazja mal-Unjoni Ewropea.

Magħmul fi Brussell,

                                                                       Għall-Kunsill

                                                                       Il-President