52013PC0427

MEMORANDUM TA’ SPJEGAZZJONI

1.           KUNTEST TAL-PROPOSTA

L-għan ta' din il-proposta hu li tgħin lill-Groenlandja biex tipparteċipa fl-iskema ta' ċertifikazzjoni Kimberley Process dwar djamanti mhux maħduma permezz tal-kooperazzjoni tiegħu mal-Unjoni Ewropea. L-iskema stabbilita fil-proposta tippermetti l-importazzjoni u l-esportazzjoni ta’ djamanti mhux maħduma mill-Groenlandja lejn l-Unjoni kif ukoll lejn parteċipanti oħra tal-iskema ta’ ċertifikazzjoni, sakemm l-importazzjonijiet u l-esportazzjonijiet ta’ djamanti mhux maħduma jiġu vverifikati u, għall-esportazzjonijiet, iċċertifikati minn awtoritajiet tal-Unjoni skont ir-regoli stabbiliti fir-Regolament (KE) Nru 2368/2002 li jimplimenta l-iskema ta’ ċertifikazzjoni tal-Kimberley Process fil-kummerċ internazzjonali ta’ djamanti mhux maħduma.

Din l-assoċjazzjoni ssaħħaħ ir-relazzjonijiet ekonomiċi bejn l-Unjoni Ewropea u l-Groenlandja fl-industrija tad-djamanti, u b’mod partikolari dan ikun jippermetti lill-Groenlandja tesporta djamanti mhux maħduma akkumpanjati miċ-Ċertifikat tal-Unjoni Ewropea maħruġ għall-finijiet tal-iskema ta’ ċertifikazzjoni, bil-ħsieb li jiġi promoss l-iżvilupp ekonomiku tal-Groenlandja.

2.           RIŻULTATI TAL-KONSULTAZZJONIJIET MAL-PARTIJIET INTERESSATI U L-VALUTAZZJONIJIET TAL-IMPATT

Il-Groenlandja u d-Danimarka qablu mal-approċċ meħud mill-proposta u se jikkommettu ruħhom li jittrasponu u jimplimentaw fil-leġiżlazzjoni applikabbli għall-Groenlandja d-dispożizzjonijiet rilevanti tar-Regolament (KE) Nru 2368/2002 fir-rigward tal-kundizzjonijiet u l-formalitajiet għall-importazzjoni u għall-esportazzjoni ta' djamanti mhux maħduma, it-tranżitu tagħhom lil parteċipant għajr l-Unjoni, il-parteċipazzjoni tal-Unjoni, inkluża l-Groenlandja, fl-iskema ta' ċertifikazzjoni Kimberley Process, l-obbligi dwar id-diliġenza xierqa, in-nuqqas ta' ċirkomvenzjoni, l-iskambju tal-informazzjoni, u l-iżgurar tal-konformità ma’ dawn id-dispożizzjonijiet.

3.           L-ELEMENTI LEGALI TAL-PROPOSTA

Il-bażi legali tal-proposta hija l-Artikolu 207. Il-proposta testendi t-territorju tal-Unjoni biex ikopri wkoll it-territorju tal-Groenlandja għall-finijiet tal-iskema ta’ ċertifikazzjoni Kimberley Process. Għaldaqstant, il-Groenlandja se tkun ipprojbita milli taċċetta importazzjonijiet jew esportazzjonijiet tad-djamanti mhux maħduma lejn jew minn barra t-territorju tal-Unjoni mingħajr ċertifikat validu tal-Proċess Kimberley (KP). L-emendi se jippermettu l-esportazzjoni ta’ djamanti mhux maħduma mill-Groenlandja lejn pajjiżi terzi sakemm dawn ikunu akkumpanjati minn ċertifikat tal-KP tal-UE. Il-kundizzjonijiet għaċ-ċertifikazzjoni kienu qabel jeħtieġu evidenza li d-djamanti mhux maħduma kienu legalment importati lejn l-Unjoni. Għal djamanti mminati u estratti fil-Groenlandja li qatt ma ġew esportati qabel, qed tiddaħħal kundizzjoni alternattiva permezz ta' din il-proposta, notevolment li tingħata prova f’dan ir-rigward.

Barra minn hekk, il-proposta tistabbilixxi l-modalitajiet tas-sottomissjoni tad-djamanti mhux maħduma lill-awtoritajiet tal-Unjoni għal verifika, testendi r-regoli speċjali għat-tranżitu lejn il-Groenlandja, tippermetti l-parteċipazzjoni tal-Groenlandja fil-Kumitat għall-implimentazzjoni tar-Regolament u tippermetti r-rappreżentanza tal-Groenlandja fil-Proċess Kimberley u l-kooperazzjoni ma’ Stati Membri oħra permezz tal-Kummissjoni.

Il-proposta hija marbuta mill-qrib ma' proposta għal Deċiżjoni tal-Kunsill li tistabbilixxi regoli speċifiċi għaċ-ċirkolazzjoni ta’ djamanti mhux maħduma bejn l-Unjoni u l-Groenlandja. Kif propost f’din id-Deċiżjoni, ir-rekwiżiti ewlenin għad-djamanti mhux maħduma biex jidħlu jew joħorġu mit-territorju tal-Groenlandja jew tal-Unjoni jkunu li (i) jiġu akkumpanjati minn xi forma ta’ dokument uffiċjali, jew dokument li jattesta li kienu mill-minjieri tal-Groenlandja, jew kopja ta’ ċertifikat tal-Kimberley Process kif ivvalidat minn awtorità tal-Unjoni, u (ii) jkunu f’kontenituri ssiġillati li ma jistgħux jiġu mbagħbsa.

Kif propost f’din id-Deċiżjoni, djamanti mhux maħduma mminati jew estratti fil-Groenlandja, sakemm dawn ma jkunux ġew esportati qabel lejn pajjiż terz, jistgħu jidħlu fit-territorju doganali tal-Unjoni bl-użu ta’ ċertifikat ta' attestazzjoni maħruġ mill-awtoritajiet fil-Groenlandja. Ladarba djamanti mhux maħduma mminati jew estratti fil-Groenlandja kienu ġew esportati lejn pajjiż terz, mal-wasla lura tagħhom ikunu jistgħu jiċċirkolaw bejn l-Unjoni u l-Groenlandja skont l-istess regoli li japplikaw għad-djamanti l-oħra kollha mhux maħduma importati lejn l-Unjoni.

L-applikazzjoni tad-Deċiżjoni hija proposta tiġi allinjata mad-dħul fis-seħħ ta’ din l-emenda.

2013/0198 (COD)

Proposta għal

REGOLAMENT TAL-PARLAMENT EWROPEW U TAL-KUNSILL

li jemenda r-Regolament tal-Kunsill (KE) Nru 2368/2002 fir-rigward tal-inklużjoni tal-Groenlandja fl-implimentazzjoni tal-iskema taċ-ċertifikazzjoni Kimberley Proċess.

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikolu 207 tiegħu,

Wara li kkunsidraw il-proposta mill-Kummissjoni Ewropea,

Wara t-trażmissjoni tal-abbozz tal-att leġiżlattiv lill-Parlamenti nazzjonali,

Filwaqt li jaġixxu skont il-proċedura leġiżlattiva ordinarja,

Billi:

(1)       Ir-Regolament (KE) Nru 2368/2002 li jimplimenta l-iskema ta' ċertifikazzjoni tal-Kimberley Process fil-kummerċ internazzjonali ta' djamanti mhux maħduma[1] jistabbilixxi sistema ta’ ċertifikazzjoni tal-Komunità u ta' kontrolli fuq l-importazzjonijiet u l-esportazzjonijiet għad-djamanti mhux maħduma għall-għanijiet ta’ implimentazzjoni tal-iskema ta’ ċertifikazzjoni Kimberley Process.

(2)       Il-Groenlandja mhijiex parti mit-territorju tal-Unjoni iżda hija inkluża fil-lista ta’ pajjiżi u territorji barranin stipulati fl-Anness II mat-Trattati. F’konformità mal-Artikolu 198 tat-Trattat dwar il-Funzjonament tal-Unjoni Ewropea, l-għan tal-assoċjazzjoni tal-pajjiżi u territorji estra-Ewropej mal-Unjoni huwa li jiġi promoss l-iżvilupp ekonomiku u soċjali tal-pajjiżi u t-territorji estra-Ewropej u li jiġu stabbiliti relazzjonijiet ekonomiċi mill-qrib bejnhom u l-Unjoni fl-intier tagħha.

(3)       Id-Deċiżjoni tal-Kunsill [...] tistabbilixxi r-regoli u l-proċeduri li jippermettu s-sehem tal-Groenlandja fl-iskema ta' ċertifikazzjoni Kimberley Process fir-rigward ta' djamanti mhux maħduma permezz tal-kooperazzjoni tagħha mal-Unjoni Ewropea. Din l-assoċjazzjoni ssaħħaħ ir-relazzjonijiet ekonomiċi bejn l-Unjoni Ewropea u l-Groenlandja fl-industrija tad-djamanti, u b’mod partikolari dan ikun jippermetti lill-Groenlandja tesporta djamanti mhux maħduma akkumpanjati miċ-Ċertifikat tal-Unjoni Ewropea maħruġ għall-finijiet tal-iskema ta’ ċertifikazzjoni, bil-ħsieb li jiġi promoss l-iżvilupp ekonomiku tal-Groenlandja.

(4)       Ir-Regolament (KE) Nru 2368/2002 għandu jiġi emendat biex jippermetti li din id-Deċiżjoni tidħol fis-seħħ u b’mod partikolari biex jipprovdi għall-inklużjoni tal-Groenlandja fl-iskema ta’ ċertifikazzjoni.

(5)       Għaldaqstant, il-Groenlandja se tkun ipprojbita milli taċċetta importazzjonijiet jew esportazzjonijiet tad-djamanti mhux maħduma lejn jew minn parteċipant barra t-territorju tal-Unjoni mingħajr ċertifikat validu tal-Proċess Kimberley. L-emendi se jippermettu l-esportazzjoni ta’ djamanti mhux maħduma mill-Groenlandja lejn pajjiżi terzi sakemm dawn ikunu akkumpanjati minn ċertifikat tal-Proċess Kimberley tal-Unjoni Ewropea.

(6)       Flimkien mal-kundizzjoni eżistenti għaċ-ċertifikazzjoni li teħtieġ l-evidenza li d-djamanti mhux maħduma kienu importati legalment lejn l-Unjoni, għandha tiġi introdotta kundizzjoni alternattiva għal djamanti mminati u estratti fil-Groenlandja li qatt ma ġew esportati qabel, notevolment biex isservi ta' prova f’dan ir-rigward.

(7)       Barra minn hekk, għandhom isiru emendi lill-modalitajiet tas-sottomissjoni tad-djamanti mhux maħduma lill-awtoritajiet tal-Unjoni għal verifika, waqt li jiġu estiżi r-regoli speċjali għat-tranżitu lejn il-Groenlandja, li jippermettu l-parteċipazzjoni tal-Groenlandja fil-Kumitat għall-implimentazzjoni tar-Regolament u jipprovdu għar-rappreżentanza tal-Groenlandja fil-Proċess Kimberley u l-kooperazzjoni ma’ Stati Membri oħra permezz tal-Kummissjoni.

(8)       Ir-Regolament (KE) Nru 2368/2002 għandu għalhekk jiġi emendat skont dan,

ADOTTAW DAN IR-REGOLAMENT:

Artikolu 1

Ir-Regolament (KE) Nru 2368/2002 huwa emendat kif ġej:

(1) L-Artikolu 1 huwa sostitwit b'dan li ġej:

“Artikolu 1

Dan ir-Regolament jistabbilixxi sistema ta' ċertifikazzjoni tal-Unjoni u ta' kontrolli fuq l-importazzjonijiet u l-esportazzjonijiet fir-rigward ta' djamanti mhux maħduma għall-għanijiet ta' implimentazzjoni tal-iskema ta' ċertifikazzjoni Kimberley Process.

Għall-għanijiet tal-iskema ta' ċertifikazzjoni, it-territorju tal-Unjoni u dak tal-Groenlandja għandhom jitqiesu bħala entità waħda mingħajr fruntieri interni.

Dan ir-Regolament ma jippreġudikax jew jibdel xi dispożizzjonijiet li huma fis-seħħ li jirrelataw mal-formalitajiet prattiċi u mal-kontrolli. "

(2) Fl-Artikolu 3, il-frażi ta’ introduzzjoni hija sostitwita b'dan li ġej:

"L-importazzjoni ta' djamanti mhux maħduma lejn it-territorji tal-Unjoni jew tal-Groenlandja għandha tkun ipprojbita kemm-il darba l-kondizzjonijiet kollha li ġejjin ma jkunux sodisfatti:"

(3) Fl-Artikolu 4, il-paragrafu 1 huwa sostitwit b’dan li ġej:

“1. Il-kontenituri u ċ-ċertifikati li jikkorrispondu magħhom għandhom jiġu sottomessi għall-verifikazzjoni flimkien, u mill-aktar fis possibli, lil awtorità tal-Unjoni jew tal-Istat Membru fejn ikunu qed jiġu importati jew ta' dak l-Istat Membru li għalih ikunu destinati, skont kif indikat fid-dokumenti ta' akkompanjament. Kontenituri maħsubin għall-Groenlandja għandhom jitressqu għal verifika lil waħda mill-awtoritajiet tal-Unjoni, jew fl-Istat Membru fejn ikunu qed jiġu importati, jew f’wieħed mill-Istati Membri l-oħra fejn tkun stabbilita awtorità tal-Unjoni.”

(4) Fl-Artikolu 8, il-paragrafu 1 huwa sostitwit b’dan li ġej:

“1. Il-Kummissjoni għandha tikkonsulta mal-parteċipanti dwar arranġamenti prattiċi biex l-awtorità kompetenti tal-parteċipant esportatur li kkonvalida xi ċertifikat tiġi pprovduta bil-konfermazzjoni tal-importazzjonijiet fit-territorju tal-Komunità jew tal-Groenlandja."

(5) Fl-Artikolu 11, il-frażi ta’ introduzzjoni hija sostitwita b'dan li ġej:

"L-esportazzjoni mit-territorji tal-Unjoni jew tal-Groenlandja ta' djamanti mhux maħduma għandha tkun projbita sakemm dawn iż-żewġ kondizzjonijiet li ġejjin ma jiġux sodisfatti:"

(6) Fl-Artikolu 12(1), il-punt (a) huwa sostitwit b’dan li ġej:

“(a) l-esportatur ipprovda xhieda konklużiva li:

(i) id-djamanti mhux maħduma li għalihom qed jintalab iċ-ċertifikat kienu importati skont il-liġi skont id-dispożizzjonijiet tal-Artikolu 3; jew

(ii) id-djamanti mhux maħduma li għalihom qed jintalab iċ-ċertifikat kienu mminati jew estratti fil-Groenlandja f’każ li d-djamanti mhux maħduma ma kinux preċedentement esportati lil parteċipant għajr l-Unjoni.”

(7) L-Artikolu 18 huwa sostitwit b'dan li ġej:

“Artikolu 18

L-Artikoli 4, 11, 12, u 14 ma għandhomx jgħoddu għad-djamanti mhux maħduma li jidħlu fit-territorju tal-Unjoni jew tal-Groenlandja għall-għanijiet ta' transitu biss għal parteċipant barra dawk it-territorji, bil-kondizzjoni li la l-kontenitur oriġinali fejn ikunu qedgħin jinġarru d-djamanti mhux maħduma u lanqas iċ-ċertifikat oriġinali ta' akkumpanjament maħruġ minn awtorità kompetenti ta' parteċipant ma jkunu ġew imbagħbsa fid-dħul u l-ħruġ mit-territorji tal-Unjoni jew tal-Groenlandja u l-għan ta' transitu jkun jaqbel ċar maċ-ċertifikat ta' akkumpanjament."

(8) L-Artikolu 21 huwa sostitwit b'dan li ġej:

“Artikolu 21

1. L-Unjoni, inkluża l-Groenlandja, għandha tkun parteċipant fl-iskema ta’ ċertifikazzjoni KP.

2. Il-Kummissjoni, li tirrappreżenta l-Unjoni, flimkien mal-Groenlandja, fl-iskema ta' ċertifikazzjoni Kimberley Process, għandha timmira li tiżgura l-aqwa implimentazzjoni tal-iskema ta' ċertifikazzjoni KP, b'mod partikolari permezz tal-kooperazzjoni bejn il-parteċipanti. Għal dan l-għan, il-Kummissjoni għandha, b'mod partikolari, tiskambja l-informazzjoni mal-parteċipanti dwar il-kummerċ internazzjonali tad-djamanti mhux maħduma u, fejn xieraq, tikkoopera fil-monitoraġġ tal-attivitajiet u ssib soluzzjoni għat-tilwim li jista' jinqala'."

(9) L-Artikolu 23 huwa sostitwit b'dan li ġej:

“Artikolu 23

Il-Kumitat imsemmi fl-Artikolu 22 jista' jeżamina kull mistoqsija li tikkonċerna l-applikazzjoni ta' dan ir-Regolament. Dawn il-mistoqsijiet jistgħu jitqajmu jew mill-President jew minn rappreżentant ta' Stat Membru jew tal-Groenlandja."

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell,

Għall-Parlament Ewropew                           Għall-Kunsill

Il-President                                                    Il-President

[1]               ĠU L 358, 31.12.2002, p. 28.