52013PC0140

2006/0084 (COD)

KOMUNIKAZZJONI TAL-KUMMISSJONI LILL-PARLAMENT EWROPEW skont l-Artikolu 294(6) tat-Trattat dwar il-Funzjonament tal-Unjoni Ewropea dwar

l-pożizzjoni tal-Kunsill dwar l-adozzjoni ta’ Regolament tal-Parlament Ewropew u tal-Kunsill dwar investigazzjonijiet immexxija mill-Uffiċċju Ewropew ta' Kontra l-Frodi (OLAF) u li tħassar ir-Regolament (KE) Nru 1073/1999 tal-Parlament Ewropew u tal-Kunsill u r-Regolament tal-Kunsill (Euratom) Nru 1074/1999

1.           Sfond

Data ta’ trażmissjoni tal-proposta lill-Parlament Ewropew u lill-Kunsill (dokument COM(2006) 244 finali – 2006/0084 (COD): || l-4 ta’ Lulju 2006.

Data tal-opinjoni tal-Kumitat Ekonomiku u Soċjali Ewropew: || mhux applikabbli

Data tal-pożizzjoni tal-Parlament Ewropew, l-ewwel qari: || l-20 ta’ Novembru 2008.

Data tat-trażmissjoni tal-proposta emendata: || is-17 ta' Marzu 2011.

Data tal-adozzjoni tal-pożizzjoni tal-Kunsill: || il-25 ta’ Frar 2013.

2.           L-għan tal-proposta mill-Kummissjoni

Il-proposta emendata tal-Kummissjoni li temenda r-Regolament (KE) 1073/1999 dwar investigazzjonijiet immexxija mill-Uffiċċju Ewropew ta’ Kontra l-Frodi (OLAF) tiffoka fuq il-kjarifika tad-drittijiet proċedurali ta’ persuni li jkunu s-soġġett ta’ investigazzjonijiet mill-OLAF u fuq it-tisħiħ tal-effiċjenza tal-investigazzjonijiet tiegħu, kif ukoll fuq it-titjib tal-kooperazzjoni mal-imsieħba tiegħu (istituzzjonijiet u korpi tal-UE, l-Istati Membri, l-organizzazzjonijiet internazzjonali). Il-proposta għandha wkoll l-għan li tiċċara r-rwol tal-Kumitat ta’ Superviżjoni tal-OLAF u li tistabbilixxi skambju ta’ fehmiet mal-istituzzjonijiet f’livell politiku biex jiġu diskussi l-prijoritajiet politiċi tal-Uffiċċju.

3.           Kummenti dwar il-pożizzjoni tal-Kunsill

Fl-20 ta’ Novembru 2008, il-Parlament Ewropew adotta riżoluzzjoni[1] fl-ewwel qari skont il-proċedura ta’ kodeċiżjoni. Ressaq madwar mitt emenda għall-proposta tal-Kummissjoni.

F'Marzu 2011, il-Kummissjoni adottat proposta emendata għal Regolament tal-Parlament Ewropew u tal-Kunsill li jemenda r-Regolament (KE) Nru 1073/1999 dwar investigazzjonijiet immexxija mill-Uffiċċju Ewropew ta’ Kontra l-Frodi (OLAF) u li jħassar ir-Regolament (Euratom) Nru 1074/1999.

Saru diskussjonijiet tripartitiċi informali minn Ottubru 2011 sa Ġunju 2012, bil-ħsieb li jintlaħaq ftehim fl-istadju tal-ewwel qari tal-Kunsill.

Fl-4 ta’ Diċembru 2012 il-Kunsill ikkonferma l-qbil politiku tiegħu dwar it-test miftiehem, u fil-25 ta’ Frar 2013, il-Kunsill adotta l-pożizzjoni tiegħu fl-ewwel qari. L-emendi kollha mressqa lill-proposta emendata tal-Kummissjoni ġew maqbula matul id-diskussjonijiet tripartitiċi informali.

4.           Konklużjoni

Il-Kummissjoni tista’ għalhekk taċċetta l-emendi introdotti mill-Kunsill għall-proposta tagħha.

[1]               Ir-riżoluzzjoni leġiżlattiva tal-Parlament Ewropew tal-20 ta’ Novembru 2008 dwar il-proposta għal regolament tal-Parlament Ewropew u tal-Kunsill li jemenda r-Regolament (KE) Nru 1073/1999 dwar investigazzjonijiet immexxija mill-Uffiċċju Ewropew ta’ Kontra l-Frodi (OLAF), P6_TA-PROV(2008) 553. Għar-rapport ta’ preparazzjoni ara A6-0394/2008.