52013DC0634

KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI

dwar is-Suq Uniku tat-Telekomunikazzjonijiet

1.           Il-kuntest politiku u ekonomiku

Il-progress sostanzjali lejn suq uniku Ewropew għat-telekomunikazzjoni huwa essenzjali għall-interessi strateġiċi u l-progress ekonomiku tal-Ewropa; għas-settur tat-telekomunikazzjonijiet innifsu; u għaċ-ċittadini li huma frustrati li ma għandhomx aċċess sħiħ u ġust għal servizzi tat-telekomunikazzjonijiet bħall-internet u s-servizzi tal-mowbajl.

L-importanza ta’ aċċess għall-internet affidabbli u mgħaġġel se jiżdied bil-prevalenza tal-cloud computing. Dan jeħtieġ id-disponibilità ta’ netwerks ta’ kwalità għolja, li jistgħu jiġu pprovduti biss minn settur tat-telekomunikazzjonijiet b’saħħtu, u b’hekk dan huwa interess strateġiku għall-Ewropa.

Bl-istess mod, l-interess strateġiku tal-Ewropa jkun moqdi billi jkollha l-kapaċità tagħha li tagħti servizz tal-cloud computing sikur liċ-ċittadini kif ukoll billi żżomm kapaċità sinifikanti ta’ apparat ta' produzzjoni tat-telekomunikazzjoni. It-tnejn jiddependu fuq settur tat-telekomunikazzjoni dinamiku tal-mowbajl 4G u fuq netwerks ta’ aċċess fiss u ta’ veloċità għolja.

Il-maġġoranza assoluta taċ-ċittadini, l-impriżi, il-gvern u l-intraprendituri huma dejjem iktar dipendenti fuq il-konnettività tat-telekomunikazzjoni. Illum fl-Ewropa, madankollu, aħna soġġetti għal xi forma ta’ lotterija rigward l-aċċess għal dawn is-servizzi, minkejja 26 sena ta’ progress fir-riforma tas-swieq nazzjonali tat-telekomunikazzjonijiet tal-Ewropa u fil-ħolqien ta' pedament ta’ suq uniku tat-telekomunikazzjoni.

L-ekonomija tal-internet innifisha tokkupa sehem dejjem jikber tal-PGD, filwaqt li konnettività effettiva u l-innovazzjonijiet tal-internet issa huma essenzjali għat-tkabbir tal-produttività fis-setturi ekonomiċi kollha — mill-kura tas-saħħa, għall-enerġija, għas-servizzi pubbliċi. L-iffissar tas-settur tat-telekominikazzjonijiet għalhekk m’għadux dwar dan is-settur wieħed (li jifforma biss 9 % tal-ekonomija diġitali tal-Ewropa), iżda dwar l-appoġġ tal-iżvilupp sostenibbli tas-setturi kollha.

Pass ieħor sinifikanti 'l quddiem fl-iżvilupp tas-suq uniku tat-telekomunikazzjoni jipprovdi spinta tant meħtieġa lill-ekonomija, billi jgħin jippromwovi sorsi ġodda ta’ tkabbir ekonomiku (bħall-ekonomija tal-apps, li mill-2008 ġġenerat 794,000 impjiegi ġodda — li kważi nofshom żviluppaturi tas-sofwer), jixpruna l-innovazzjoni, joħloq impjiegi ġodda u sostenibbli, u jġib lura l-kompetittività Ewropea.

Huwa fid-dawl ta’ dan li l-Kunsill Ewropew ta’ Marzu 2013 stieden lill-Kummissjoni biex tippreżenta miżuri konkreti għall-ħolqien tas-suq uniku fl-informazzjoni u t-teknoloġija tat-telekomunikazzjonijiet kemm jista’ jkun kmieni. Il-proposti tal-lum jissodisfaw dak l-impenn mill-Kummissjoni.

Is-settur tal-komunikazzjonijiet elettroniċi jopera fuq skala globali, bil-web (u s-servizzi li jinnegozjaw fuqu) li jmorru lil hinn mill-fruntieri tal-UE. Huwa importanti li l-inizjattivi prezenti jitqiesu fil-kuntest ta' żviluppi x’imkien ieħor; u li l-komunikazzjonijiet elettroniċi u twassil tas-servizzi diġitali jingħataw l-attenzjoni xierqa fi ftehimiet settorali speċifiċi jew fin-negozjati tal-kummerċ u tal-investiment mal-imsieħba ewlenin tagħna.

2.           26 sena ta’ riforma regolatorja tat-telekomunikazzjonijiet

Fi żmien ta’ ftit aktar minn ġenerazzjoni, bis-saħħa tal-qafas legali tal-UE, ix-xenarju tat-telekomunikazzjonijiet tal-Ewropa illiberalizza minn monopolji pubbliċi statiċi għal settur dinamiku u kompetittiv. Mis-snin tmenin 'l hawn, pakketti suċċessivi ta' leġiżlazzjoni Ewropea iddiżassoċjaw in-netwerks, ippromovew il-kompetizzjoni u l-għażla, tefgħu limitu fuq l-ispejjeż tar-roaming tal-mowbajl, taw drittijiet importanti ġodda lill-konsumatur, u ħeġġew applikazzjoni komuni u konverġenti tal-qafas komuni.

Barra minn hekk, l-applikazzjoni tal-liġi tal-kompetizzjoni tal-UE kienet strumentali fl-iżgurar li s-swieq joperaw b’mod kompetittiv, li jġibu prezzijiet irħas u kwalità ta’ servizz aħjar lill-konsumaturi mal-UE kollha.

Dawn il-bidliet fil-leġiżlazzjoni tat-telekomunikazzjonijiet tal-UE fittxew li jadattaw għal bidliet radikali enormi li seħħew fl-ICT: l-ewwel it-telefonija mobbli, u mbagħad l-internet. Illum, is-settur tat-telekomunikazzjonijiet huwa l-qofol ta’ prodotti diġitali u servizzi li għandhom il-potenzjal isostnu l-aspetti kollha ta’ ħajjitna, u kapaċi jixprunwa l-irkupru ekonomiku tal-Ewropa.

L-isforzi tal-UE biex tippromwovi ambjent regolatorju sod ilhom jirfdu l-bidliet fis-settur. Bi żviluppi bħall-istandards GSM u UMTS, l-UE wittiet it-triq biex l-Ewropa u l-atturi industrijali jkunu fuq quddiem nett fuq il-livell globali. Il-liberalizzazzjoni ġabet il-kompetizzjoni, prezzijiet iktar ġusti u għażliet reali liċ-ċittadini u lin-negozji. Hekk kif is-swieq isiru aktar kompetittivi, Ewropej u globali, il-qafas regolatorju jeħtieġ li jevolvi wkoll.

Il-qafas regolatorju eżistenti, imressaq mill-Kummissjoni fl-2007 u ffokat fuq it-tisħiħ tas-sorveljanza u l-konsistenza Ewropej tar-regolamentazzjoni tas-suq nazzjonali, serviet tajjeb l-għanijiet tagħha. Madankollu,aktar reċentement, u lil hinn mill-fruntieri tal-Ewropa, operaturi b'saħħithom bħall-Istati Uniti, il-Ġappun u l-Korea t’Isfel investew bil-kbir biex jipprovdu konnessjonijiet broadband rapidi (fissi u bla wajers); F’tali kuntest globali, huwa importanti li l-Ewropa ma tibqax lura. Barra minn hekk, il-bidliet fil-klima ekonomika u teknoloġika u l-impatt tal-kriżi ekonomika u finanzjarja wasslu għal bidliet rapidi u aċċelerati fis-settur tat-telekomunikazzjonijiet globali, inkluż ristrutturar sinifikanti. Domandi ġodda u applikazzjonijiet ġodda għal servizzi bbażati fuq id-dejta jsaħħu iktar l-imperattiv ta' suq uniku - il-pożizzjoni b’saħħitha tas-settur Ewropew tal-ICT (speċjalment tat-telekomunikazzjonijiet), u l-kopertura tal-broadband, meta mqabbla ma’ pajjiżi oħra, huma essenzjali għall-kompetittività tal-ekonomija Ewropea. Dan jinħass partikolarment f’dan il-mument meta l-Ewropa qed tfittex modi ġodda biex toħroġ mill-kriżi.

Is-settur tat-telekomunikazzjonijiet għandu jiżviluppa billi jippermetti l-ekonomija kollha biex jimxi’ l quddiem; huwa insostenibbli li s-settur ifittex li jikber billi jxekkel il-bżonnijiet ta' konnettività tal-ekonomija fuq firxa aktar wiesgħa, b’mudelli ta’ negozju li joperaw iktar fuq l-iskarsezza milli fuq il-ġid. Għalhekk issa hija meħtieġa azzjoni deċiżiva biex tippermetti r-ristrutturar tas-settur, sabiex jiġi evitat li jiffaċċja t-tnaqqis inevitabbli tiegħu. Iż-żamma tal-istatus quo mhijiex għażla.

3.           L-ostakli għas-suq uniku

Il-Kummissjoni Ewropea hija determinata li tmantni u tkompli tespandi l-benefiċċji tat-telekomunikazzjoni għan-negozju u ċ-ċittadini. Iżda minkejja l-progress kollu li sar s’issa, is-settur ikompli jiffaċċja firxa ta’ ostakl u sfidi li flimkien ifissru li l-benefiċċju sħiħ tas-suq uniku għadu 'l bogħod milli jinkiseb. Studju reċenti wera li kieku jitlesta s-suq intern għall-komunikazzzjonijiet elettroniċi, il-prodott gross domestiku tal-UE (PGD) jista’ tikber sa 110 biljuni ta’ euro fis-sena.[1]

B’mod ġenerali, is-settur tat-telekomunikazzjonijiet xorta għadu jġorr il-wirt tal-monopolji nazzjonali l-antiki, u għadu fil-biċċa l-kbira jopera fuq linji nazzjonali. Xi kumpaniji kbar tat-telekomunikazzjonijiet huma preżenti f’diversi Stati Membri; iżda l-ebda waħda minnhom ma hi preżenti fl-istati kollha. Fil-biċċa l-kbira l-operaturi tal-mowbajls joperaw biss nazzjonalment; għal ħafna operaturi fissi is-suq tagħhom huwa saħansitra aktar lokalizzat. Dawk li ma joperawx f’diversi Stati Membri għandhom jaħdmu skont regoli separati, xi kultant skont ir-rekwiżiti u r-rimedji diverġenti ta’ regolaturi differenti, u li jeħtieġu awtorizzazzjonijiet partikolari f’kull Stat Membru. Barra minn hekk, ta’ spiss operaturi attivi f’diversi Stati Membri ma jaġixxux bħala verament operaturi Ewropej, u jidhru kuntenti li jimexxu l-attivitajiet tagħhom separatament f’kull Stat Membru. Is-suq jinkludi iktar minn elf operatur ta' telefonija fissa, u bosta mijiet ta’ operaturi tal-mowbajl, li, minkejja li spiss li jappartjenu għal gruppi akbar, joperaw fuq bażi nazzjonali. Fl-istess ħin, is-settur huwa dejjem aktar ta’ natura globali u jiddependi mill-kobor biex jagħmel qliegħ.

In-nuqqas ta’ suq uniku jidher ukoll partikolarment fil-prezzijiet. Pereżempju, kemm tiswa meta ċċempel pajjiż ieħor tal-UE, jew meta tuża apparat ċellulari f’pajjiż ieħor tal-UE, spiss ikun wisq ogħla mir-rati domestiċi, minħabba tariffi tas-sejħiet roaming u tad-dejta roamingu r-rati għas-sejħiet “internazzjonali” (intra-UE). Dawn l-imposti huma meqjusa bħala inġusti minn bosta ċittadini, u wkoll jikkostitwixxi impediment prattiku għall-eżerċitar tal-libertajiet tas-suq uniku.

Barra minn hekk, il-konsumaturi x’aktarx iħossuhom aktar kunfidenti li jkunu jistgħu jilqgħu offerti minn operaturi stabbiliti fi Stati Membri oħra, jekk ikunu jafu li jistgħu jserrħu fuq l-istess sett ta’ regoli: pereżempju regoli dwar it-trasparenza, it-termini kuntrattwali, il-faċilitazzjoni li wieħed jaqleb minn operatur għal ieħor, u regoli biex ikun hemm prevenzjoni tal-imblukkar jew it-trażżin ta’ servizzi onlajn, bħala parti minn miżuri biex jiżguraw aċċess miftuħ għall-internet. Sforzi nazzjonali mferrxa biex jitħarsu d-drittijiet tal-konsumatur jistgħu jkunu l-kawża għal aktar frammentazzjoni tas-suq uniku.

Sadanittant id-differenzi fiż-żmien, il-kundizzjonijiet u l-ispejjeż tal-proċeduri għall-akkwist tal-ispettru jliġġmu l-investiment, u jagħmluha diffiċli li jiġu żviluppati netwerks integrati bla wajers bejn il-pajjiżi. Disponibbiltà aktar f’waqtha u prevedibbli tal-ispettru tippermetti konnessjonijiet aktar mifruxa u bi prezzijiet konvenjenti tal-broadband fl-Ewropa, iżda ħafna drabi tibqa’ limitata fi strutturi regolatorji fil-livell nazzjonali.

Ir-regolamentazzjoni diverġenti tan-netwerks fissi spiss tfisser regolamentazzjoni eċċessiva, jew inċertezza u imprevidibbiltà regolatorji, u għalhekk issir diffiċli biex wieħed jippjana l-investimenti tiegħu f'netwerks tal-broadband veloċi tal-“ġenerazzjoni li jmiss”.

B’aktar armonizzazzjoni fis-suq uniku, l-Ewropej se jibbenefikaw minn kopertura tal-broadband veloċi aktar estensiva, u servizzi diġitali ġodda aktar innovattivi. Dawn in-netwerks veloċi tat-telekomunikazzjonijiet huma wkoll inputs essenzjali għal ħafna setturi oħra, pubbliċi u privati. Settur qawwi u dinamiku tat-telekomunikazzjonijiet huwa essenzjali jekk l-Ewropa trid tisfrutta innovazzjonijiet ġodda bħall-cloud computing, għodod ġodda li jużaw "dejta kbira", karozzi konnessi, manifattura intelliġenti, l-Internet tal-Oġġetti, amministrazzjonijiet pubbliċi modernizzati, is-Saħħa elettronika, u l-Edukazzjoni elettronika, fost ħafna oħrajn. In-netwerks ta' veloċità għolja jistgħu jsiru s-sies għal ekosistema diġitali Ewropea rikka.

Fi ftit kliem, is-settur qed ibati minn frammentazzjoni tul il-fruntieri nazzjonali; nuqqas ta’ konsistenza u prevedibbiltà regolatorja madwar l-Unjoni; prezzijiet għoljin inġusti għal servizzi speċifiċi; u nuqqas ta’ investiment. L-indirizzar ta’ dawn il-problemi huwa essenzjali biex niżguraw l-impjiegi Ewropej, il-produttività u t-tkabbir. Suq uniku kompetittiv tat-telekomunikazzjonijiet jgħin biex jissolvew dawn il-problemi.

4.           Lejn suq uniku fit-telekomunikazzjoni

Suq uniku ġenwin fit-telekomunikazzjonijiet ifisser suq fejn:

- Il-konsumaturi jistgħu jiksbu servizzi minn kwalunkwe operatur fl-UE, mingħajr diskriminazzjoni, irrispettivament minn fejn huma bbażati;

- L-operaturi jkunu jistgħu kompetittivament joffru servizzi barra mill-Istat Membru ta’ domiċilju tagħhom, u s-suq jagħmlu n-negozju ma' konsumaturi bbażati madwar l-UE kollha;

- Jitneħħew it-tariffi eċċessivi għas-sejħiet intra-UE, jew meta l-mowbajl jintuża xi mkien ieħor fl-UE.

Dan huwa l-għan finali li l-Kummissjoni Ewropea ilha taħdem lejh għal xi żmien, li jirriżulta fil-qafas regolatorju ta’ llum. Dan fl-aħħar mill-aħħar jimplika t-tneħħija gradwali tal-ostakli nazzjonali għall-kompetizzjoni transkonfinali, inkluż regolamenti differenti fis-settur nazzjonali, liġijiet nazzjonali differenti tal-konsumatur fir-rigward tal-kuntratti ta' komunikazzjoni, u kundizzjonijiet nazzjonali differenti għall-allokazzjoni u l-assenjazzjoni tal-ispettru. Jimplika wkoll qafas li huwa iktar konsistenti, stabbli u legalment ċert, kompetittiv, bi grad ogħla ta' armonizzazzjoni u li jwassal iktar għall-investiment: jiżgura li jkun hemm aktar għażla, broadband aktar veloċi, u servizzi transkonfinali aħjar għall-kumpaniji.

Il-Kummissjoni tibqa’ tal-fehma li suq uniku ġenwin konsistenti ma' din il-viżjoni se jkun jirrikjedi regolatur waħdieni tal-UE responsabbli għall-interpretazzjoni u l-implimentazzjoni ta' qafas legali armonizzat. Dan se jkun jeħtieġ ukoll sistema unika għall-impożizzjoni ta’ rimedji regolatorji, u aktar armonizzazzjoni possibbli tal-allokazzjoni u l-assenjazzjoni tal-ispettru.

Madankollu huwa ċar li l-proċess tal-bini ta’ suq uniku tat-Telekomunikazzjoni – bħal f’setturi oħra –huwa proċess gradwali li jiddependi kemm fuq l-imġiba tal-parteċipanti fis-suq daqs kemm fuq l-intervent tar-regolaturi.

Il-proposti mressqa llum jirrappreżentaw pass intermedju importanti lejn dak l-għan aħħari ta’ Suq Uniku integrat bis-sħiħ billi jindirizza wħud mill-ostakli li t-tneħħija tagħhom tista’ tgħin biex tiżgura li s-settur jaqdi r-rwol tiegħu sew fit-tiftixa urġenti għat-tkabbir ekonomiku. L-approċċ huwa bbażat fuq il-qafas eżistenti tat-telekomunikazzjoni u jiffoka fuq il-kwistjonijiet transkonfinali li jħabbtu wiċċhom magħhom l-operaturi u l-konsumaturi, u l-indirizzar tal-ostakli għall-investiment. Dan l-approċċ jinvolvi l-identifikazzjoni ta’ bidliet speċifiċi tal-qafas attwali, bħala passi intermedjarji li flimkien joħolqu “punt ta’ tibdil” biex jippermetti lis-suq jevolvi lejn suq uniku panEwropew.

Fil-prattika, dan jinvolvi:

· li jiġu indirizzati xi wħud mid-diverġenzi fl-interpretazzjoni bejn ir-regolaturi nazzjonali, żieda fil-kooperazzjoni bejniethom u l-kontinwità fil-governanza, u t-tisħiħ tar-rwol tal-Kummissjoni;

· jiġu indirizzati l-problemi li jħabbtu wiċċhom magħhom il-konsumaturi f’suq Ewropew tal-konsumatur ifframmentat billi jiġu introdotti ċerti standards komuni; it-tneħħija tal-ħlasijiet meta wieħed jirċievi telefonati bir-roaming, kif ukoll tas-soprataxxi mhux ġustifikati fuq sejħiet intra-UE; jiġu inċentivati l-kundizzjonijiet tas-suq li jistgħu jwasslu għal eliminazzjoni rapida tat-tariffi tar-roaming fl-Ewropa; u l-introduzzjoni ta’ protezzjonijiet ġodda u komuni għall-konsumaturi, inkluż sabiex jitħares l-aċċess għall-internet miftuħ.

· L-offerta ta' opportunitajiet ġodda ta’ negozju lis-settur tat-telekomunikazzjoni, sabiex tkun ħaġa inqas kumplessa li wieħed jinvesti fin-netwerks u jipprovdi u jiggarantixxi servizzi bejn il-fruntieri; u l-armonizzazzjoni ta' “inputs” tekniċi essenzjali (eż. l-ispettru għal netwerks bla wajers, l-aċċess għan-netwerks għall-broadband fiss);

· It-tisħiħ tad-dimensjoni Ewropea tas-sistema attwali ta’ regolaturi nazzjonali. Il-Kummissjoni tipproponi bħala pass intermedju t-tisħiħ tar-rwol tal-President tal-Korp tar-Regolaturi Ewropej (BEREC), bil-ħolqien ta’ post b'impjieġ sħiħ għal tliet snin li jiżgura aktar ippjanar strateġiku u kontinwità akbar.

Fl-aħħar tan-negozjati dwar l-analiżi tal-2009 tal-qafas regolatorju, il-Kummissjoni għamlet impenn formali li tieħu azzjoni fil-qasam tal-aċċess miftuħ għall-internet. Anki minn dak iż-żmien 'l hawn, u ċertament sa miż-żmien meta tfassal oriġinarjament il-qafas, kibret sew l-importanza tal-aċċess għall-internet, sal-punt li sar parti ewlenija tal-attività soċjali u kulturali. Bħala tali, sar ukoll l-aktar servizz ċentrali u prezzjuż mogħti mill-operaturi tan-netwerks u l-fornituri tas-servizzi tal-internet. Hemm erba' raġunijiet għaliex l-azzjoni fuq l-aċċess tal-internet huwa meħtieġ issa. L-ewwel nett jidher li bħalissa, m’hemmx garanziji effettivi fl-UE kollha ta’ aċċess miftuħ; u hemm ħafna evidenza ċara ta' servizzi li qed jiġu mblukkati jew imrażżna, b'konsegwenza li dan jolqot ħażin l-interessi tal-konsumaturi u tal-fornituri tal-kontenut u tal-applikazzjonijiet li jiffaċċjaw ir-riskju li jisfaw imblukkati. It-tieni nett, l-operaturi tat-telekom u l-fornituri tal-kontenut u tal-aplikazzjonijiet qed jiżviluppaw "servizzi speċjalizzati" lil-valur soċjali u ekonomiku tagħhom jiddependi fuq il-kwalita ggarantita - għall-IPTV, għal applikazzjonijiet tas-Saħħa-e bħal immaġini mediku ta' riżoluzzjoni għolja, għall-vidjokonferenzi, u għal applikazzjonijiet tal-cloud kritiċi għall-kummerċ u intensivi fid-dejta. Dawn l-innovazzjonijiet joffru opportunitajiet għal attivitajiet ekonomiċi ġodda, iżda jeħtieġu qafas regolatorju Ewropew li jipprovdi kundizzjonijet ċari għall-iżvilupp ta' danw is-servizzi, flimkien ma ekosistema tal-internet b'saħħitha. It-tielet nett, ir-regolaturi nazzjonali bħalissa m'għandhomx biżżejjed poteri permezz tal-qafas Ewropew tat-telekomunikazzjonijiet biex jintervjenu biex japprovaw l-imblukkar jew il-prattiki ta' ġestjoni tat-traffiku mhux raġonevoli, jew biex iżommu l-vitalità tal-Internet miftuħ. Ir-raba' nett, dawk li jfasslu l-politika qed jibdew jindirizzaw din il-kwistjoni b'firxa ta' approċċi diverġenti, u b'hekk qed jiftħu r-riskju ta' frammentazzjoni fi ħdan is-suq waħdieni u sfida ġdida għal ġestjoni ta' netwerk integrat. Ir-Regolament abbozz ifittex li jindirizza dawn il-kwistjonijet b'mod effettiv u bbilanċjat.

5.           Nindirizzaw l-investiment u l-kompetizzjoni

Ir-Rakkomandazzjoni dwar il-metodoloġiji tal-ikkostjar u n-nondiskriminazzjoni hija t-tieni element ta’ dan il-pakkett, li jikkomplementa r-regolament propost u li huwa intrinsikament marbut miegħu. Din tiffoka aktar direttament fuq l-investiment, u fuq aktar armonizzazzjoni tal-metodoloġiji tal-ikkalkular tal-ispejjeż. L-għan huwa li l-Ewropa żżid l-investimenti tagħha fil-broadband. Dan l-għan huwa essenzjali biex tinżamm il-kompetittività globali, iżda l-investiment u l-kompetizzjoni qed jinżammu lura mlll-inċertezza legali u d-diverġenzi bejn ir-regolaturi. Regolamentazzjoni aktar konsistenti u prevedibbli u ambjent regolatorju aktar stabbli jista’ jintlaħaq billi (1) jiġu ċċarati aktar il-kosti li l-operaturi storiċi jistgħu jżommu biex jagħtu aċċess lil oħrajn għal netwerks tar-ram tagħhom; u (2) l-iżgurar li min qed ifittex l-aċċess ikollu aċċess verament ekwivalenti għan-netwerks. Fejn dawn ir-restrizzjonijiet kompetittivi u n-nondiskriminazzjoni huma żgurati, il-prezzijiet għall-prodotti tal-“ġenerazzjoni li jmiss” ikunu determinat mis-suq aktar milli jkunu regolati; filwaqt li l-prezzijiet għall-aċċess għal netwerks tar-ram kieku jibqgħu ftit jew wisq stabbli, u ma jwaqqgħux artifiċjalment il-prezzijiet għan-netwerks tal-ġejjieni.

Kif inhi, l-applikazzjoni inkonsistenti tar-regoli toħloq inċertezza legali għal-atturi kollha tas-suq, u ostakli lis-suq intern. Iċ-ċertezza legali hija partikolarment importanti minħabba li l-investiment f’netwerks tal-broadband veloċi jġarrbu spejjeż sinifikanti, tant li d-domanda għall-prodott finali tibqa’ inċerta.

Il-kjarifiki pprovduti fir-Rakkomandazzjoni għalhekk se jkunu kruċjali biex titneħħa l-inċertezza: l-operaturi tradizzjonali u dawk li jfittxu l-aċċess it-tnejn se jkollhom iċ-ċarezza dwar il-prezzijiet imposti fuq l-aċċess għan-netwerk.

6.         Pjan direzzjonali għat-tlestija tas-suq uniku tat-telekomunikazzjoni fit-terminu medju

Huwa mistenni li l-effetti fit-terminu medju tar-regolament propost se jkunu libertà akbar u iżjed opportunitajiet għall-parteċipanti tas-suq, u tendenza lejn konsolidazzjoni akbar tas-settur. Kompetizzjoni intensifikata waqt li l-Ewropa tersaq aktar lejn suq uniku reali tista’ tkun mistennija li twassal, maż-żmien, għal tnaqqis fir-regoalmentazzjoni speċifika għas-settur skont l-analiżi tas-suq. Fil-fatt, wieħed mir-riżultati tal-iżvilupp tas-Suq Uniku għandu jkun tendenza akbar lejn kompetizzjoni effettiva fis-swieq rilevanti, b’applikazzjoni ex post tal-leġiżlazzjoni dwar il-kompetizzjoni li dejjem aktar qed titqies bħala biżżejjed biex tiżgura l-funzjonament tas-suq. Matul iż-żmien, hekk kif suq komuni ġenwin għall-komunikazzjonijiet elettroniċi jbida jfeġġ, l-ambitu ġeografiku tas-swieq ikollu bżonn jevolvi wkoll, għall-finijiet sew tar-regolamentazzjoni speċifika għas-settur ibbażata fuq il-prinċipji tal-kompetizzjoni sew tal-applikazzjoni tal-liġi tal-kompetizzjoni innifisha.

Bħala kontribut ulterjuri, il-Kummissjoni se tressaq is-sena d-dieħla analiżi tar-Rakkomandazzjoni dwar swieq relevanti sabiex tiżgura li, waqt li tiżviluppa l-kompetizzjoni, il-piż regolatorju ex-ante fuq l-operaturi jonqos b’mod xieraq.

Se jkunu meħtieġa passi ulterjuri biex jitkompla s-suq uniku tat-telekomunikazzjoni, b’mod partikolari permezz ta’ koordinazzjoni aħjar ta’ rimedji regolatorji. Għal dan l-għan, il-Kummissjoni se tieħu l-passi meħtieġa biex tħejji t-triq għall-mandat li jmiss tal-Kummissjoni, kemm bl-użu ta’ għodod ipprovduti mill-qafas regolatorju, kif ukoll billi tħejji analiżi ta’ kif il-mekkaniżmi eżistenti jistgħu jissaħħu aktar biex jiżguraw il-konsistenza regolatorja. Din ir-reviżjoni, li se tinvolvi konsultazzjoni pubblika wiesgħa fi żmien xieraq, għandha teżamina wkoll l-utilità ta’ regolatur Uniku tal-Telekomunikazzjonijiet fl-UE. L-analiżi tista' tindirizza wkoll il-livell ekwu bejn ir-regoli li japplikaw għal servizzi online “over-the-top” meta mqabbla ma’ servizzi tat-telekomunikazzjoni; u kwistjonijiet emerġenti dwar il-konverġenza bejn is-servizzi u s-swieq tas-servizzi awdjoviżivi u tat-telekomunikazzjoni.

7.           Konklużjoni

Il-ħsieb tal-Kummissjoni huwa li l-UE tgawdi settur tat-telekomunikazzjonijiet dinamiku u kompetittiv. Dan ikun jinkludi għadd kbir ta’ operaturi, attivi f’diversi Stati Membri u wkoll barra l-UE, flimkien ma’ numru akbar ta’ kumpanji iżgħar, aktar lokali: kollha kemm huma joffru infrastruttura jew servizzi avvanzati. Jiġu pprovduti l-infrastruttura u s-servizzi meħtieġa għal ekonomija diġitali miftuħa ħajja, li tagħti spinta lit-tkabbir ekonomiku, l-impjiegi u l-opportunitajiet fl-Ewropa.

B’dan is-sett ta’ miżuri, il-Kummissjoni ttenni l-impenn tagħha għall-miri broadband tal-Aġenda Diġitali għall-Ewropa, li jistgħu jiġu provduti minn taħlita ta’ operaturi alternattivi (stabbiliti u alternattivi, telefonija fissa u bla wajers), li joffru firxa wiesgħa u kompetittiva ta' servizzi u kontenut ta' kwalita għolja. Tali kopertura tal-broadband hija essenzjali biex servizzi online ġodda jiksbu massa kritika: mis-sistemi elettriċi intelliġenti għall-bliet intelliġenti u cloud computing universali, jew l-Internet tal-Oġġetti. Għandha wkoll tqiegħed lill-Ewropa fuq quddiem fil-qasam diġitali, bl-aktar infrastruttura diġitali moderna biex iċ-ċittadini tagħha jisfruttaw il-potenzjal sħiħ tal-internet biex in-negozji tagħha jikkompetu globalment.

Fid-dawl ta' dan il-kuntest, il-Kummissjoni tappella lill-Parlament Ewropew u l-Kunsill biex jeżaminaw u jadottaw ir-Regolament propost b'għan ċar bħala kwistjoni tal-ogħla prijorità politika.

[1]               Ecorys, TU Delft et al., Steps Towards a Truly Internal Market for e-Communications, 2013.