52013DC0333

KOMUNIKAZZJONI TAL-KUMMISSJONI LILL-KUNSILL

Ir-rwol tal-Unjoni Ewropea fl-Organizzazzjoni tal-Ikel u l-Agrikoltura (FAO) wara li t-Trattat ta’ Lisbona: Aġġornament tad-Dikjarazzjoni tal-Kompetenzi u arranġamenti ġodda bejn il-Kunsill u l-Kummissjoni biex jeżerċitaw id-drittijiet ta’ sħubija tal-UE u l-Istati Membri tagħha

Introduzzjoni: L-UE u l-FAO

L-Unjoni Ewropea, flimkien mal-Istati Membri tagħha, ilha membru sa mill-1991 tal-Organizzazzjoni tan-Nazzjonijiet Uniti għall-Ikel u l-Agrikoltura (FAO).

Il-FAO u ż-żewġ aġenziji l-oħra tan-NU bbażati f'Ruma[1] huma fil-qalba tal-politika internazzjonali, u għandhom rwol normattiv, tekniku u operattiv f’oqsma bħalma huma n-nutrizzjoni, il-produttività agrikola, l-iżvilupp rurali, il-prevenzjoni ta’ kriżijiet globali tal-ikel, it-theddid transkonfinali, l-immaniġġjar sostenibbli tal-foresti, is-sajd u l-akkwakultura, l-ilma u l-art, is-saħħa u l-produzzjoni tal-annimali u tal-pjanti, l-iżvilupp tal-kapaċità għal informazzjoni u l-istatistika, il-ħolqien ta’ standards globali, il-kummerċ u komoditajiet, l-iżvilupp u l-għajnuna umanitarja; oqsma li kollha huma ċentrali għall-UE.

Permezz tas-sħubija tagħha tal-FAO u l-ftehimiet strateġiċi ta’ sħubija mat-tliet aġenziji tan-NU bbażti f'Ruma, l-UE wriet ir-rieda tagħha li tipparteċipa fid-djalogu politiku fl-ogħla livell. Dan huwa kkumplimentat minn kontribuzzjonijiet finanzjarji sostanzjali lejn it-tliet organizzazzjonijiet. Meħuda flimkien, dawn it-tliet korpi jikkostitwixxu l-fora internazzjonali prinċipali ta’ politika fi kwistjonijiet ta’ politika fil-qasam tal-ikel u l-agrikoltura fejn huwa essenzjali li jkun hemm involviment b’saħħtu tal-UE.

Il-ħidma li l-FAO twettaq hija vitali għat-tmexxija 'l quddiem tal-aġenda internazzjonali tas-sigurtà tal-ikel. Il-mandat tal-FAO jolqot oqsma fil-qalba tal-politika ewlenija tal-UE u huwa essenzjali li l-UE tkun kapaċi taġixxi mal-FAO f’dawn l-oqsma kollha sabiex jiġi żgurat li l-politiki, il-linji gwida u l-prinċipji adottati fil-livell internazzjonali jkunu jirriflettu tajjeb il-politiki tal-UE. L-UE trid turi li r-rwol kritiku li għandha biex tirreaġixxi għall-isfidi tas-sigurtà globali tal-ikel, bis-saħħa tal-pożizzjoni tagħha bħala l-akbar donatur fid-dinja, hu appoġġjat minn element qawwi ta' politika. Dan se jkun partikolarment importanti hekk kif l-UE tvara inizjattivi innovattivi fejn tidħol ir-reżiljenza u n-nutrizzjoni li jikkoinċidu mal-eżerċizzju tal-ipprogrammar li jeħodna sa tmiem l-2020. Dan huwa wkoll perjodu fejn se jkun hemm intensifikazzjoni tad-diskussjonijiet ta’ wara l-2015 rigward l-Għanijiet ta' Żvilupp tal-Millennju (MDG), inklużi diskussjonijiet dwar it-tfassil ta’ Miri ta’ Żvilupp Sostenibbli (SDGs), fejn l-UE se tkun trid li jkollha rwol deċiżiv u qawwi.

Il-mandat tal-FAO ikopri oqsma li huma fil-qalba tal-politiki tal-UE u tabilħaqq tar-rwol tagħha fid-dinja. Eżempji riċenti juru l-involviment tal-UE u l-interess fil-ħidma tal-FAO. L-UE pparteċipat f'negozjati li wasslu għall-adozzjoni tal-linji gwida volontarji għal governanza responsabbli tal-pussess tal-art, il-foresti u s-sajd (VGGT), il-Ftehim dwar Miżuri tal-Istat tal-Port li jimpedixxu, jiskoraġġixxu u jeliminaw is-sajd illegali, mhux rappurtat u mhux regolat u l-linji gwida volontarji dwar il-Prestazzjoni tal-Istat tal-Bandiera. Hija attiva fid-diskussjoni li għaddejjin dwar il-prinċipji li għandhom jirregolaw l-investiment agrikolu responsabbli. L-UE tikkontribwixxi b’mod attiv għax-xogħol tat-Trattat Internazzjonali dwar ir-Riżorsi Ġenetiċi tal-Pjanti għall-Ikel u l-Agrikoltura. Bħala organizzazzjoni membru, l-UE tipprovdi wkoll id-dejta statistika neċessarja u disponibbli fl-oqsma ta’ politika koperti mill-FAO. L-UE hija spiss rappreżentata f'livell politiku meta suġġetti ta’ interess internazzjonali, bħall-każ reċenti ta’ kriżijiet tal-ikel fis-Sahel u l-Qarn tal-Afrika jew iż-żieda fil-prezzijiet tal-ikel, ikunu jirrekjedu reazzjoni internazzjonali.

L-UE hija wkoll proponent qawwi ta’ riforma fil-FAO u r-riforma tal-Kumitat dwar is-Sigurtà Alimentari Dinjija (CFS), entità intergovernattiva stabbilita mill-FAO biex tirrevedi u ssegwi politiki dwar is-sigurtà alimentari dinjija, u tappoġġa finanzjarjament u politikament iż-żewġ proċessi ta’ riforma.

Bejn l-2006 u l-2011, medja ta’ aktar minn EUR 1 biljun ġew allokati kull sena għall-iżvilupp rurali, ippjanar territorjali, l-agrikoltura u s-sigurtà alimentari. L-agrikoltura sostenibbli u s-sigurtà alimentari u nutrizzjonali huma fuq nett tal-aġenda tal-kooperazzjoni fl-iżvilupp fit-tul tal-UE u huma aspett importanti tad-djalogu tagħna ma’ gvernijiet imsieħba u organizzazzjonijiet internazzjonali bħal ma hi l-FAO. Fl-istess ħin, l-indirizzar tal-ħtiġijiet alimentari u nutrizzjonali ta’ emerġenza huwaprijorità għall-UE.

Għalhekk fil-livell ta’ politika, huwa essenzjali li l-UE timpenja ruħha b’mod aktar effettiv mal-FAO. Bħala l-akbar donatur fid-dinja għas-sigurtà alimentari, l-UE għandha rwol kritiku x’taqdi biex tilħaq l-isfidi għas-sigurtà alimentari globali.

Ir-rwol tal-Unjoni Ewropea fil-FAO wara t-Trattat ta’ Lisbona:

Mindu daħal fis-seħħ it-Trattat ta’ Lisbona, ir-rappreżentanza esterna tal-Unjoni hija garantita mill-Kummissjoni fl-oqsma kollha ħlief tal-Politika Estera u ta’ Sigurtà Komuni (PESK), fejn l-Unjoni hija rrappreżentata mill-President tal-Kunsill Ewropew u mir-Rappreżentanta Għolja għall-Affarijiet Barranin u l-Politika ta’ sigurtà. Id-Delegazzjonijiet tal-Unjoni jirrappreżentaw lill-UE kemm fi kwistjonijiet tal-PESK kif ukoll f'dawk li mhumiex f’pajjiżi terzi u f’organizzazzjonijiet internazzjonali. Peress li l-FAO tittratta biss kwistjonijiet mhux tal-PESK, l-atturi rilevanti tal-UE huma għalhekk il-Kummissjoni u d-Delegazzjoni tal-UE akkreditata għall-FAO.

It-Trattati jipprovdu wkoll għal koperazzjoni sinċiera u mill-qrib bejn l-Unjoni u l-Istati Membri tagħha. Fil-FAO, bħal f’organizzazzjonijiet internazzjonali oħra, jsir kull sforz biex jiġi żgurat li l-interazzjoni bejn l-atturi tal-UE u l-Istati Membri tal-UE tkun konsistenti. Għandhom jikkoordinaw l-azzjoni tagħhom sa l-ogħla livell possibbli, fid-dawl ta’ prinċipji ċentrali bħal ma huma l-unità tar-rappreżentazzjoni, it-trasparenza u l-kooperazzjoni sinċiera.

Il-provvista lill-Unjoni u lill-Istati Membri tagħha bil-mezzi biex jaġixxu b’mod aktar effettiv u koerenti fil-FAO hija parti minn strateġija usa’ segwita mill-Kummissjoni għat-titjib progressiv tal-parteċipazzjoni tal-UE f’organizzazzjonijiet internazzjonali u f’fora oħrajn u hija konformi mar-Riżoluzzjoni tal-Parlament Ewropew tal-11 ta’ Mejju 2011: "L-UE bħala attur globali: ir-rwol tagħha f'organizzazzjonijiet multilaterali"[2].

Għall-kuntrarju ta’ bosta organizzazzjonijiet li fihom il-limitazzjonijiet tal-istaus iliġġmu l-kapaċità tal-UE li tipparteċipa b’mod effiċjenti, l-UE diġà hija organizzazzjoni membru tal-FAO. Għalhekk, m’hemm l-ebda bidla meħtieġa f’dak ir-rigward. Rappreżentanza koerenti, komprensiva u unifikata tal-UE tista’ tinkiseb, min-naħa l-waħda, billi tiġi ppreżentata lill-FAO dikjarazzjoni ġdida ta’ kompetenzi biex tieħu post l-aħħar Dikjarazzjoni tal-kompetenzi maħruġa fl-1994 u, min-naħa l-oħra, billi jinbidlu l-arranġamenti interni preżenti bejn il-Kunsill u l-Kummissjoni li ġejjin mill-1991, aġġornati fl-1992 u l-1995.

La d-dikjarazzjoni l-ġdida ta’ kompetenzi, u lanqas l-arranġamenti l-ġodda ma jaffettwaw b'xi mod it-tqassim tal-kompetenzi bejn l-UE u l-Istati Membri tagħha, kif previst taħt it-Trattati.

Id-dikjarazzjoni tal-kompetenzi

Skont l-Artikolu II, paragrafu 7, tal-Kostituzzjoni tal-FAO, l-UE hija marbuta li tippreżenta lill-FAO kull bidla rigward id-distribuzzjoni tal-kompetenzi bejn l-UE u l-Istati Membri tagħha.

L-aħħar dikjarazzjoni tal-kompetenzi tal-Komunità Ewropea lill-FAO kienet saret fl-1994[3]. Minn dakinhar, il-kompetenzi mogħtija lill-UE mit-Trattati li huma rilevanti għall-attivitajiet tal-FAO evolvew sostanzjalment. Barra minn hekk, it-Trattat ta’ Lisbona ċċara l-qafas legali applikabbli għad-diviżjoni tal-kompetenzi bejn l-UE u l-Istati Membri tagħha.

F'dan l-isfond, hu meqjus li hemm bżonn li tiġi pprezentata lill-FAO dikjarazzjoni ġdida ta’ kompetenzi.

Id-Dikjarazzjoni tal-kompetenzi għandha telenka l-kompetenzi mogħtija lill-UE mit-Trattati li huma dawk l-aktar rilevanti għall-attivitajiet tal-FAO. Minħabba l-evoluzzjonijiet possibbli fil-ġejjieni tat-tqassim tal-kompetenzi bejn l-UE u l-Istati Membri tagħha u l-karattru sempliċement dikjaratorju ta’ tali dikjarazzjoni tal-kompetenzi, id-Dikjarazzjoni għandha tinżamm fuq livell ġenerali filwaqt li tippermetti membri oħra tal-FAO li jiġu infurmati dwar l-eżerċizzju ta’ drittijiet ta’ sħubija flimkien ma’ nota ta’ informazzjoni li għandha tiġi sottomessa mill-UE lill-FAO fir-rigward tal-laqgħat speċifiċi tal-korpi tal-FAO.

Id-Dikjarazzjoni tal-kompetenzi se tieħu post dik li kienet saret fl-1994 li bħalissa tapplika għall-biċċa l-kbira tal-korpi u l-ftehimiet tal-FAO, inklużi l-korpi ċentrali tal-FAO. Għalhekk, din id-Dikjarazzjoni l-ġdida tal-kompetenzi għandha tippermetti lill-UE biex tiċċara r-relazzjonijiet tagħha ma' dawk li huma l-aktar organi importanti istituzzjonalment tal-FAO. Madankollu, huwa xieraq, f’dan l-istadju, li f'dan l-eżerċizzju ma jiġux inklużi korpi tal-FAO u l-ftehimiet li għalihom l-UE ppreżentat dikjarazzjoni speċifika ta’ kompetenzi.[4] Il-Kummissjoni tinsab fil-proċess li tevalwa dawn id-dikjarazzjonijiet speċifiċi tal-kompetenzi fid-dawl ta’ reviżjoni futura possibbli tagħhom, b’kunsiderazzjoni tal-obbligi li joħorġu mill-Kostituzzjoni tal-FAO, kif ukoll id-diskussjonijiet li għaddejjin bħalissa fi ħdan il-korpi internazzjonali kkonċernati u n-natura dejjem tevolvi tal-qafas leġiżlattiv rilevanti tal-UE. Fl-2014 mistennija li l-Kummissjoni tibda inizjattivi xierqa biex tirrevedihom.

L-arranġamenti l-ġodda dwar l-eżerċizzju ta’ drittijiet ta’ sħubija

Il-koordinazzjoni interna għat-tħejjija u eżerċizzju ta’ drittijiet ta’ sħubija fil-FAO hija attwalment regolata b’arranġament konkluż fl-1991 bejn il-Kunsill u l-Kummissjoni[5]. Dan ġie rivedut fl-1992[6] u fl-1995[7] biex jiġu ċċarati ċerti prattiki f’termini ta’ drittijiet ta' diskors u tal-votazzjoni. Il-Qorti tal-Ġustizzja kellha l-okkażjoni li tiddeċiedi li tali arranġamenti huma legalment vinkolanti fuq l-istituzzjonijiet[8].

Dawn l-arranġamenti jirrekjedu reviżjoni għal diversi raġunijiet. Fil-prattika, l-applikazzjoni tagħhom wasslet konsistentement għal diskussjonijiet li jieħdu ħafna żmien dwar it-tqassim tal-kompetenzi. Dan ma ħalliex żmien biżżejjed biex il-korpi preparatorji rilevanti tal-Kunsill ikunu jistgħu jelaboraw dwar is-sustanza tal-pożizzjonijiet li jkollhom jittieħdu fid-dawl ta’ laqgħat tal-FAO. Barra minn hekk, huma m’għadhomx konformi mad-dispożizzjonijiet tat-Trattat ta’ Lisbona.

Kwalunkwe arranġament ġdid għandu jitqies bħala għodda li tippermetti lill-Kunsill itejjeb u jeżerċita r-rwol tiegħu b’mod sħiħ fit-tfassil tal-politika tal-UE kif ukoll biex jiġi żgurat li l-Kummissjoni u d-delegazzjonijiet tal-UE, bħala atturi esterni tal-UE, ikunu jistgħu jirrappreżentaw effettivament l-UE fil-FAO.

Huma għandhom jaraw li jkun hemm tħejjija aktar effettiva tal-laqgħat tal-FAO. B’mod partikolari, għandu jingħata żmien suffiċjenti biex il-korpi preparatorji rilevanti tal-Kunsill ikunu jistgħu jikkunsidraw linji li għandhom jieħdu jew, fejn meħtieġ, dikjarazzjonijiet proviżorji li jirriflettu l-pożizzjonijiet eżistenti tal-UE.

Fejn ma teżisti l-ebda pożizzjoni tal-UE jew fejn il-kundizzjonijiet jew iċ-ċirkostanzi ikunu nbidlu b'mod sostanzjali, irid jiġi żgurat li l-Kunsill ikun jista’ jwettaq il-funzjonijiet ta’ tfassil ta’ politika tiegħu billi jilħaq qbil fuq pożizzjoni tal-UE skont id-dispożizzjonijiet rilevanti tat-Trattati fi żmien dovut qabel laqgħat tal-FAO. Finalment, f'kull każ iridu jiġu stabbiliti pożizzjonijiet komuni tal-UE u l-Istati Membri tagħha fejn punti tal-aġenda tal-FAO jirrelataw ma' oqsma li fihom il-pożizzjonijiet tal-UE ma jkunux biżżejjed waħedhom biex ikopru l-punti kollha li jkunu fuq l-aġenda in kwistjoni.

Billi dawn l-arranġamenti l-ġodda għandhom jippermettu lill-UE u l-Istati Membri tagħha biex jiksbu rappreżentanza esterna koerenti, komprensiva u unifikata, il-pożizzjonijiet kollha tal-UE għandhom jiġu espressi bit-"timbru" tal-UE. Għaldaqstant, l-atturi tal-UE u l-Istat Membru li f’idejh ikollu l-Presidenza tal-Kunsill għandhom jikkollaboraw mill-qrib, b’mod partikolari għall-preżentazzjoni ta’ pożizzjonijiet komuni.

L-arranġamenti l-ġodda bejn il-Kunsill u l-Kummissjoni dwar l-eżerċizzju tad-drittijiet ta’ sħubija tal-UE u tal-Istati Membri tagħha, għandhom jieħdu post l-arranġamenti tal-1991/95. B’dan il-mod, jiġifieri bis-sostituzzjoni tal-arranġamenti tal-1991/95, liema arranġamenti, fil-prattika, ikkawżaw ħafna diffikultajiet u diskussjonijiet fit-tul, il-Kunsill u l-Kummissjoni jaqblu dwar mod aħjar u aktar effettiv li bih jippreparaw il-laqgħat tal-aktar korpi ċentrali tal-FAO. Minħabba n-natura ta’ dawn l-arranġamenti, jiġifieri l-eżerċizzju tad-drittijiet ta’ sħubija tal-UE u tal-Istati Membri tagħha, dawn għandhom japplikaw għall-korpi u l-ftehimiet kollha tal-FAO ħlief għal dawk li fihom l-UE biss hija membru, jew, bil-maqlub, għal dawk li fihom ikunu membri biss l-Istati Membri tal-UE jew għal korpi li għalihom japplikaw arranġamenti speċifiċi.[9] Il-Kummissjoni se tibda mill-2014 tivvaluta dawn l-arranġamenti speċifiċi fid-dawl ta’ reviżjoni possibbli tagħhom.

Miżuri ta’ akkumpanjament meħuda mill-Kummissjoni u mid-Delegazzjoni tal-UE

Il-Kummissjoni hija impenjata li tara li r-riżorsi meħtieġa biex effettivament tipparteċipaw fil-ħidma tal-FAO ikunu disponibbli. F'dan ir-rigward diġà ttieħdu għadd ta’ miżuri. Id-Delegazzjoni tal-UE f’Ruma ssaħħet permezz ta’ żewġ karigi addizzjonali li jkopru d-dikasteru umanitarju u dak agrikolu. Barra minn hekk, se jkun hemm mobilizzazzjoni sistematika ta’ kompetenza mill-kwartieri ġenerali meta jinqala’ l-bżonn, u involviment akbar fil-kontribuzzjoni għall-politika d-diskussjonijiet li qegħdin isiru fi ħdan il-FAO.

Ta' min jinnota li, bħalissa, l-UE mhix intitolata tipparteċipa fit-tliet Kumitati tal-FAO bi sħubija ristretta (il-Kumitat tal-Finanzi, il-Kumitat tal-Programm u Kumitat dwar kwistjonijiet kostituzzjonali u legali). Dan huwa minħabba l-istatus tagħha bħala organizzazzjoni membru, li jġib miegħu dawn il-limitazzjonijiet. Meta wieħed iqis il-piż finanzjarju tal-UE fil-FAO, u r-rabta qawwija bejn kwistjonijiet ta' governanza u kwistjonijiet tematiċi mindu saret ir-riforma 'l hawn, din is-sitwazzjoni tfixkel il-ħila tal-UE li tipparteċipa bis-sħiħ fl-aspetti kollha tal-ħidma tal-FAO u jeħtieġ li tiġi indirizzata. Jeħtieġ li tiġi indirizzata wkoll fil-futur qrib il-kwistjoni iktar ġenerali dwar rwol formali għall-UE fil-Kumitati (presidenza, kopresidenza) sabiex tinkiseb koerenza mat-Trattat ta’ Lisbona.

Konklużjonijiet

Minħabba dan ta’ hawn fuq, il-Kummissjoni tipproponi li:

· l-Kunsill jieħu nota tad-Dikjarazzjoni tal-kompetenzi inkluża fl-Anness 1 li għandha tiġi sottomessa lill-FAO f’konformità mal-Artikolu 221 tat-TFUE, mid-Delegazzjoni tal-UE f’Ruma bħala sostituzzjoni tad-Dikjarazzjoni tal-kompetenzi tal-1994.

· il-Kunsill u l-Kummissjoni jaqblu dwar l-arranġamenti stipulati fl-Anness 2 li għandhom jiġu applikati mid-data tal-ftehim dwar l-arranġamenti rigward l-eżerċizzju ta’ drittijiet ta’ sħubija fil-FAO.

Anness 1

dikjarazzjoni tal-kompetenzi mill-Unjoni Ewropea rigward il-materji koperti mill-kostituzzjoni tal-Organizzazzjoni tal-Ikel u l-Agrikoltura tan-Nazzjonijiet Uniti (FAO)

(Skont ir-Regoli Ġenerali tal-FAO)

Bħala organizzazzjoni membru tal-Organizzazzjoni tal-Ikel u l-Agrikoltura (FAO) l-Unjoni Ewropea (UE) tippreżenta, skont l-Artikolu II, il-paragrafu 7, tal-Kostituzzjoni tal-FAO, id-Dikjarazzjoni ta’ kompetenzi li ġejja li tispeċifika l-kategoriji u l-oqsma ta’ politika li għalihom l-Istati Membri tal-UE għaddew kompetenzi lejn l-UE fl-oqsma koperti mill-FAO.

Din id-Dikjarazzjoni tal-kompetenzi tapplika għall-korpi u l-ftehimiet tal-FAO kollha, bl-eċċezzjoni ta’ dawk li għalihom hemm dikjarazzjoni speċifika ta’ kompetenzi[10]. Hija tieħu post dik li ġiet ippreżentata lill-FAO fl-1994[11].

1.           Prinċipji ġenerali

Il-FAO diġà ġiet infurmata[12] li, mad-dħul fis-seħħ tat-Trattat ta’ Lisbona fl-1 ta’ Diċembru 2009, l-UE ssostitwiet u ssuċċediet il-Komunità Ewropea u li, minn dik id-data, id-Delegazzjoni tal-Kummissjoni Ewropea akkreditata lill-FAO saret id-Delegazzjoni tal-UE. Skont l-Artikolu 1, it-tielet paragrafu, tat-Trattat dwar l-Unjoni Ewropea (TUE), l-UE hija stabbilita fuq it-TUE kif ukoll fuq it-Trattat dwar il-Funzjonament tal-Unjoni Ewropea (TFUE).

L-oqsma ta’ kompetenza tal-UE huma mfissra fl-Artikoli 2 sa 6 tat-TFUE. Fejn il-kompetenza tinqasam bejn l-UE u l-Istati Membri tagħha u sa fejn l-UE ma teżerċitax il-kompetenza tagħha jew tkun iddeċidiet li tieqaf teżerċitaha, l-Istati Membri jeżerċitaw il-kompetenza tagħhom. Il-kompetenzi li m’humiex attribwiti lill-UE mit-Trattati jaqgħu taħt il-kompetenza tal-Istati Membri tal-UE.

Fuq il-bażi ta’ din id-Dikjarazzjoni u skont l-Artikolu II, paragrafu 8, tal-Kostituzzjoni u r-Regola XLII tar-Regoli Ġenerali tal-Organizzazzjoni (FAO), l-UE se tippreżenta lill-FAO, meta jkun meħtieġ, qabel laqgħa ta’ korp tal-FAO, nota ta’ informazzjoni relatata mal-eżerċizzju ta’ drittijiet ta’ sħubija jew mill-UE jew inkella mill-Istati Membri tagħha għar-rigward ta' kwistjonijiet koperti minn dik il-laqgħa[13].

Skont l-Artikolu II, paragrafu 10, tal-Kostituzzjoni (FAO), l-UE se teżerċita d-drittijiet ta' sħubija tagħha fl-oqsma ta’ politika li jaqgħu fil-kompetenzi tal-UE, hekk kif muri hawn taħt; f’oqsma ta’ politika fejn kemm l-UE kif ukoll l-Istati Membri tagħha għandhom kompetenzi biex jaġixxu fil-FAO, hekk kif muri hawn taħt, jew l-UE jew l-Istati Membri tagħha se jeżerċitaw id-drittijiet ta’ sħubija kemm tal-UE kif ukoll tal-Istati Membri tagħha.

Id-distribuzzjoni tal-kompetenzi bejn l-UE u l-Istati Membri tagħha, kif muri hawn taħt, hija, min-natura tagħha, soġġetta għal tibdil. Kull meta jseħħu bidliet li jaffettwaw il-lista ta’ hawn taħt, l-UE tirriżerva d-dritt li temenda din id-dikjarazzjoni f’dan is-sens, mingħajr ma dan jikkostitwixxi prerekwiżit għall-eżerċizzju tal-kompetenzi tagħha fi kwistjonijiet koperti mill-FAO.

2.           Kompetenzi tal-UE

2.1.        L-UE biss għandha l-kompetenza li taġixxi fil-FAO fl-oqsma ta' politika elenkati fl-Artikolu 3(1) tat-TFUE, jiġifieri l-Unjoni Doganali, l-istabbiliment tar-regoli tal-kompetizzjoni meħtieġa għall-funzjonament tas-suq intern, il-politika monetarja għall-Istati Membri tal-UE li l-munita tagħhom hija l-euro, il-konservazzjoni tar-riżorsi bijoloġiċi tal-baħar skont il-politika komuni tas-sajd u l-politika kummerċjali komuni.

2.2.        Barra minn hekk, f’ċerti oqsma ta’ politika, elenkati b’mod partikolari fl-Artikolu 4(2) tat-TFUE, l-UE biss tista’ taġixxi fil-FAO sakemm l-UE tkun adottat regoli komuni li jistgħu jkunu affettwati minn azzjonijiet meħuda mill-FAO jew fejn azzjoni esterna tal-UE tkun meħtieġa biex l-UE tkun tista' teżerċita l-kompetenzi interni tagħha. Dawn l-oqsma ta’ politika huma, b’mod partikolari:

– is-suq intern, inkluż miżuri bil-ħsieb li jiġi stabbilit jew li jiġi żgurat il-funzjonament tas-suq intern (l-Artikolu 26(1) tat-TFUE), l-approssimazzjoni tal-liġijiet (l-Artikoli 114 sa 118 TFUE) u l-moviment liberu tal-merkanzija, il-persuni, is-servizzi u l-kapital (l-Artikoli 28 sa 37, 45 sa 66 TFUE);

– l-agrikoltura u l-iżvilupp rurali, b’mod partikolari azzjoni biex:

· tiżdied il-produttività agrikola b’mod sostenibbli, skont l-azzjoni tal-Unjoni fil-qasam tal-politika ambjentali, it-tibdil fil-klima, il-forestrija u l-enerġija;

· jiġu stabbiliti s-swieq, tiġt kkontrollata l-volatilità tal-prezzijiet, tiġi assigurata d-disponibbiltà tal-provvista u tiġi żgurata s-sigurtà tal-ikel;

· jiġu segwiti l-għanijiet tal-politika kummerċjali komuni fir-rigward ta’ prodotti agrikoli;

· jiġi żgurat livell xieraq ta’ għajxien ġust għall-komunitajiet agrikoli;

· jiġi żgurat li l-provvisti jaslu għand il-konsumaturi bi prezzijiet raġonevoli;

· jiġi żgurat l-iżvilupp ekonomiku ta’ reġjuni agrikoli u ta' żoni rurali.

– is-sajd, minbarra l-konservazzjoni tar-riżorsi bijoloġiċi tal-baħar, kif ukoll l-akkwakultura;

– l-ambjent, inklużi miżuri biex jiġu adottati skont l-Artikolu 192 tat-TFUE sabiex jintlaħqu l-għanijiet tal-politika tal-UE imfissra fl-Artikolu 191 tat-TFUE, jiġifieri li jippreservaw, jipproteġu u jtejbu l-kwalità tal-ambjent, jipproteġu s-saħħa tal-bniedem, biex jiġi żgurat l-użu prudenti u razzjonali tar-riżorsi naturali, inklużi l-foresti u li jiġu promossi miżuri fuq livell internazzjonali li jitrattaw problemi ambjentali reġjonali jew globali, u b’mod partikolari li tiġi miġġielda l-bidla fil-klima;

– l-enerġija, inklużi miżuri biex jiġu adottati skont l-Artikoli 170 u 192 u 194(2) tat-TFUE sabiex jintlaħqu l-għanijiet tal-politika tal-UE stabbiliti fl-Artikolu 194 tat-TFUE fil-kuntest tal-istabbiliment u l-funzjonament tas-suq intern u fir-rigward tal-ħtieġa ta’ preservazzjoni u titjib tal-ambjent, jiġifieri li jiġi assigurat il-funzjonament tas-suq tal-enerġija, li tiġi żgurata s-sigurtà tal-provvista tal-enerġija fl-UE, li tiġi promossa l-effiċjenza fl-enerġija u jiġi ffrankat l-użu tal-enerġija kif ukoll li jiġu żviluppati forom ta’ enerġija ġodda u rinnovabbli u li tiġi promossa l-interkonnessjoni bejn in-netwerks tal-enerġija;

– miżuri li għandhom jittieħdu skont l-Artikolu 168(4) tat-TFUE relatati ma’ tħassib komuni dwar is-saħħa pubblika, inklużi miżuri li jistabbilixxu standards għoljin ta’ kwalità u sigurtà għar-rigward ta’ organi u sustanzi ta’ oriġini umana kif ukoll għall-prodotti mediċinali u t-tagħmir għall-użu mediku u miżuri fir-rigward ta’ ikel u għalf, fl-oqsma veterinarji u fitosanitarji.

3.           Kompetenzi tal-UE u l-Istati Membri tagħha

3.1.        F’ċerti oqsma ta’ politika, kemm l-UE kif ukoll l-Istati Membri tagħha għandhom kompetenzi biex jaġixxu fil-FAO, inkluż, b’mod partikolari:

– Ir-riċerka u l-iżvilupp u l-ispazju inklużi miżuri biex jiġu adottati skont l-Artikolu 180 TFUE sabiex jitwettqu attivitajiet rigward id-definizzjoni u l-implimentazzjoni tar-riċerka, l-iżvilupp teknoloġiku u l-programmi ta’ dimostrazzjoni billi jiġu promossi l-kooperazzjoni u d-disemminazzjoni tar-riżultati;

– Il-kooperazzjoni għall-iżvilupp inklużi miżuri biex jiġu adottati taħt l-Artikolu 209 tat-TFUE sabiex jintlaħqu l-għanijiet tal-politika tal-UE stabbiliti fl-Artikolu 208 tat-TFUE, jiġifieri t-tnaqqis u l-eliminazzjoni tal-faqar, u s-sigurtà tal-ikel u n-nutrizzjoni;

– L-għajnuna umanitarja, inklużi l-attivitajiet mwettqa mill-UE, kif ukoll miżuri legali u ta’ politika adottati minn dan tal-aħħar, maħsuba biex jinkisbu għanijiet ta' għajnuna umanitarja msemmija fl-Artikolu 214(1) tat-TFUE, jiġifieri l-għoti ta' assistenza ad hoc u protezzjoni għal nies f’pajjiżi terzi li jkunu vittma ta’ diżastri naturali jew ikkaġunati mill-bniedem, sabiex jaffrontaw il-ħtiġijiet umanitarji li jirriżultaw minn dawn is-sitwazzjonijiet differenti;

– Il-protezzjoni u t-titjib tas-saħħa tal-bniedem;

– L-industrija, inklużi miżuri li jinkoraġġixxu ambjent li jiffavorixxi l-kompetittività tal-industrija u b’mod partikolari għall-intrapiżi ta’ daqs żgħar u medju;

– It-turiżmu, inkluż l-inkoraġġiment ta’ ambjent favorevoli għall-iżvilupp tal-industrija tat-turiżmu.

3.2.        Bħala membri tal-FAO, kemm l-UE kif ukoll l-Istati Membri tagħha għandhom kompetenzi biex jaġixxu fil-FAO fir-rigward ta' materji organizzattivi u proċedurali, inklużi kwistjonijiet legali u kwistjonijiet baġitarji, l-elezzjoni tal-presidenti, l-adozzjoni ta’ aġendi u rapporti.

Anness 2

L-arranġamenti bejn il-Kunsill u l-Kummissjoni dwar l-eżerċizzju tad-drittijiet ta’ sħubija tal-Unjoni Ewropea u tal-Istati Membri tagħha fl-organizzazzjoni tal-ikel u l-agrikoltura (FAO).

1.           Ambitu u Prinċipji ġenerali

Dawn l-arranġamenti japplikaw għall-preparazzjoni u l-eżerċizzju ta’ drittijiet ta’ sħubija tal-Unjoni Ewropea (UE) u l-Istati Membri tagħha fil-korpi u l-ftehimiet kollha tal-FAO, inklużi l-kumitati tat-tfassil. Dawn ma japplikawx għal korpi u ftehimiet li fihom l-UE biss hija l-membru, jew bil-maqlub, għal dawk li fihom huma biss l-Istati Membri tal-UE li huma l-membri jew il-korpi li għalihom japplikaw arranġamenti speċifiċi.[14] Dawn l-arranġamenti jieħdu post l-arranġamenti konklużi fl-1991 (Doc. 10478/91, Anness II.a), aġġornat fl-1992 (doc. 9050/92, Anness II.b) u fl-1995 (ref. 8460/95, Anness II.c).

Dawn l-arranġamenti għandhom jiġu applikati f’konformità sħiħa mal-prinċipju tal-kooperazzjoni leali prevista fl-Artikoli 4(3) u 13(2) tat-TUE biex l-UE jista' jkollha rappreżentanza esterna koerenti, komprensiva u unifikata.

Dawn l-arranġamenti ma għandhomx jaffettwaw id-distribuzzjoni tal-kompetenzi bejn l-UE u l-Istati Membri tagħha jew l-allokazzjoni tas-setgħat bejn l-istituzzjonijiet taħt it-Trattati. Lanqas ma jaffettwaw il-proċeduri ta’ teħid ta’ deċiżjonijiet għall-adozzjoni ta’ pożizzjonijiet tal-UE mill-Kunsill kif stabbilit fit-Trattati. Dawn l-arranġamenti huma bla ħsara għal eżerċizzji simili fil-futur għal organizzazzjonijiet internazzjonali oħra.

Għall-iskop ta’ dawn l-arranġamenti u f'konformità mal-ġurisprudenza tal-Qorti tal-Ġustizzja[15], kwistjoni tkun koperta minn pożizzjoni tal-UE jew fejn din il-kwistjoni tkun suġġetta għal-leġiżlazzjoni tal-UE jew għal politika tal-UE stabbilita permezz ta’ mezzi oħra (bħall-gwida ġenerali, il-konklużjonijiet tal-Kunsill, l-istrateġiji tal-UE jew azzjonijiet miftiehma tal-UE) jew fejn tali pożizzjoni tal-UE tkun stabbilita għall-iskop tal-laqgħa rilevanti tal-FAO.

2.           It-Tħejjija tal-laqgħat tal-FAO

2.1.        Fora għal koordinazzjoni

Il-kwistjonijiet kollha relatati mat-tħejjija u l-eżerċizzju ta’ drittijiet ta’ sħubija fil-FAO għandhom jiġu ppreżentati lill-korpi preparatorji rilevanti tal-Kunsill (jiġifieri l-Grupp ta' Ħidma għall-Koordinazzjoni (FAO), il-Gruppi ta' Ħidma għas-Sajd, il-Foresterija jew il-Miżuri Fitosanitarji) fi Brussell.

Għandu jsir kull sforz biex jintlaħaq ftehim f’dawn il-gruppi ta’ ħidma fi spirtu ta’ kooperazzjoni leali. Fejn ma jkunx jista’ jintlaħaq ftehim fil-gruppi ta’ ħidma, il-kwistjoni għandha tiġi sottomessa lil COREPER u, fejn meħtieġ, lill-Kunsill fi żmien opportun qabel il-laqgħa rilevanti tal-FAO.

Meta meħtieġ, jistgħu jsiru laqgħat ta' koordinazzjoni lokali jew f’Ruma jew xi mkien ieħor (dan jiddependi minn fejn ikunu se jsiru l-laqgħat tal-FAO). Huma għandhom jitħejjew u jiġu ppreseduti mid-Delegazzjoni tal-UE akkreditata lill-FAO jew, f'każ li l-laqgħa tal-FAO issir barra Ruma u d-delegazzjoni tal-UE akkreditata għall-FAO ma tkunx tistax twettaq dan id-dmur, mid-Delegazzjoni tal-UE fil-pajjiż fejn tkun qed issir il-laqgħa jew, inkella, mir-Rappreżentanzai ta’ Stat Membru f’dak il-pajjiż jew il-Kummissjoni, f’kollaborazzjoni mad-Delegazzjoni tal-UE lill-FAO. L-iskop ta’ dawn il-laqgħat lokali ta’ koordinazzjoni jkun li jiġu indirizzati kwistjonijiet mhux previsti. Dawn il-laqgħat ma jistgħux ibiddlu sostanzjalment il-pożizzjonijiet tal-UE, pożizzjonijiet komuni, linji li għandhom jittieħdu jew dikjarazzjonijiet li jiġu stabbiliti skont il-punt 2.3 hawn taħt.

2.2.        “Nota informattiva” f’dak li għandu x’jaqsam mal-eżerċizzju ta’ drittijiet ta’ sħubija tal-UE u l-Istati Membri tagħha

Fejn ikun meħtieġ skont ir-regola XLII, paragrafu 2, tar-Regoli Ġenerali tal-FAO, malli tirċievi l-aġendi mill-FAO, il-Kummissjoni għandha tibgħat lis-Segretarjat Ġenerali tal-Kunsill abbozz provviżorju tan-“nota informattiva” f’dak li għandu x’jaqsam mal-eżerċizzju tad-drittijiet ta’ sħubija tal-UE u tal-Istati Membri tagħha (minn hawn’ il quddiem imsejħa l- “n-nota informattiva proviżorja”).

In-nota informattiva provviżorja għandha tfisser id-distribuzzjoni proviżorja tal-kompiti u, fejn applikabbli, it-tfiegħ ta’ voti fil-korpi tal-FAO ikkonċernati.

F’każ li Stat Membru ma jkunx jaqbel mal-abbozz tal-Kummissjoni tan-nota informattiva provviżorja, għandu jispjega r-raġunijiet tiegħu bil-miktub mill-inqas jumejn tax-xogħol qabel il-laqgħa tal-Grupp ta’ ħidma rilevanti.

Il-Kummissjoni għandha tittrażmetti n-nota informattiva proviżorja lid-Delegazzjoni tal-UE akkreditata lill-FAO f’Ruma għal trażmissjoni ulterjuri lill-FAO.

It-trażmissjoni tan-nota informattiva proviżorja ssir bla ħsara għall-possibilità ta' modifiki sussegwenti li għandhom jiġu trażmessi lill-FAO. Dan jista’ jkun il-każ, b’mod partikolari, meta l-pożizzjonijiet jew il-pożizzjonijiet komuni tal-UE (li jistgħu jieħdu l-forma ta’ linji li għandhom jittieħdu jew ta' dikjarazzjonijiet) ikunu stabbiliti biss wara li tiġi trażmessa n-nota informattiva proviżorja, u/jew minħabba lwasla tard ta' dokumenti ta’ sfond min-naħa tal-FAO.

2.3.        Tħejjija u adozzjoni ta’ linji li għandhom jittieħdu u tal-intenzjonijiet tal-vot

2.3.1.     Il-pożizzjonijiet li għandhom jittieħdu mill-UE jew mill-UE u l-Istati Membri tagħha fil-FAO għandhom, fil-prinċipju, jieħdu l-forma ta’ linji li għandhom jittieħdu, waqt li l-atturi esterni titħallielhom biżżejjed flessibbiltà biex jirrappreżentaw l-interessi tal-UE u/jew tal-Istati Membri tagħha bl-aktar mod effiċjenti. Ikun biss meta jitqies meħtieġ li l-pożizzjonijiet jiġu mfissra bis-sħiħ fid-dikjarazzjonijiet. Is-setgħa ta' aġir abbażi ta’ linji li għandhom jittieħdu jew li jsiru dikjarazzjonijiet għandha tkopri wkoll t-tfiegħ ta’ voti.

2.3.2.     Għal punti fuq l-aġenda koperti minn pożizzjonijiet eżistenti tal-UE[16], il-Kummissjoni għandha tinforma lill-Kunsill b'abbozzi ta’ linji tal-UE li għandhom jittieħdu li jirreflettu dawn il-pożizzjonijiet eżistenti tal-UE. Skont il-prinċipju ta’ kooperazzjoni sinċiera u sabiex il-Kummissjoni tkun tista' tgawdi mill-kompetenza kollha disponibbli, l-Istati Membri jistgħu jissottomettu osservazzjonijiet li l-Kummissjoni għandha tqis, meta tkun qiegħda tiffinalizza l-linji tal-UE li għandhom jittieħdu.

2.3.3.     Fil-każ ta' punti fl-aġenda li ma jkunux koperti minn pożizzjonijiet eżistenti tal-UE[17], iżda fejn ikun meħtieġ jew jitqies xieraq li tiġi stabbilita pożizzjoni tal-UE għal dak l-iskop, il-Kummissjoni għandha tippreżenta lill-Kunsill għall-approvazzjoni tiegħu abbozz ta' pożizzjoni tal-UE (li tista' tieħu l-forma ta' linji li għandhom jittieħdu jew ta' dikjarazzjonijiet; ara l-punt 2.3.1).

L-istess prinċipji għandhom japplikaw fejn jeżistu pożizzjonijiet tal-UE li jridu jiġu sostanzjalment addattat biex tkun tista' tittieħed pożizzjoni fil-FAO.

Fit-tħejjija tal-abbozzi tiegħu, il-Kummissjoni se tibbaża ruħha fuq l-għarfien espert mill-Istati Membri meta jkun xieraq.

2.3.4.     Linji komuni li għandhom jittieħdu mill-UE u mill-Istati Membri tagħha għandhom jiġu stabbiliti għal punti fuq l-aġenda li:

2.3.4.1.  jkopru l-oqsma ta’ politika ta’ kooperazzjoni ma' pajjiżi terzi u l-għajnuna umanitarja (Parti V, Titolu III tat-TFUE) u li għalihom ikun meqjus xieraq li l-UE u l-Istati Membri tagħha jagħtu dikjarazzjonijiet konġunti li jirreferu għal azzjonijiet rispettivi tagħhom f’dawn l-oqsma; jew

2.3.4.2.  jkunu parzjalment koperti minn pożizzjoni tal-UE iżda, fl-istess ħin, ikunu intrinsikament marbuta ma’ kwistjonijiet li għalihom l-adozzjoni ta’ pożizzjoni tal-UE tkun eskluża; jew

2.3.4.3.  ikunu jkopru kwistjonijiet organizzattivi u proċedurali, bħall-elezzjoni ta’ presidenti, adozzjonijiet ta’ aġendi u rapporti.

Abbozzi għall-istabbiliment ta’ dawn linji komuni li għandhom jittieħdu għandhom jiġu sottomessi mill-Kummissjoni għall-każijiet imsemmija f’2.3.4.1. u 2.3.4.2. u mill-Istat Membru li jkollu l-Presidenza rotatorja tal-Kunsill għall-każijiet imsemmija f’ 2.3.4.3.

2.3.5.     Għal punti fuq l-aġenda li mhumiex koperti mill-UE jew minn pożizzjonijiet komuni, l-Istati Membri jinfurmaw lil xulxin kif ukoll lid-Delegazzjoni tal-UE u lill-Kummissjoni dwar l-abbozzi tal-pożizzjonijiet u dwar l-intenzjonijiet tal-vot tagħhom.

2.3.6.     Kwalunkwe abbozz għandu jiġi sottomess lill-korpi preparatorji rilevanti tal-Kunsill kull fejn possibbli ħamest (5) ijiem tax-xogħol qabel il-laqgħa ta’ dak il-korp.

3.           Interventi u t-tfiegħ ta’ voti f’korpi tal-FAO

3.1.        Id-Delegazzjoni tal-UE u/jew il-Kummissjoni taġixxi fuq il-bażi ta’ linji tal-UE li għandhom jittieħdu jew tippreżenta dikjarazzjonijiet tal-UE "f’isem l-UE" (u, fejn applikabbli, titfa’ l-vot rispettivi).

3.2.        Id-Delegazzjoni tal-UE u/jew il-Kummissjoni taġixxi fuq il-bażi ta’ linji tal-UE li għandhom jittieħdu jew tippreżenta dikjarazzjonijiet komuni "f'isem l-UE u l-Istati Membri tagħha" (u, fejn applikabbli, titfa’ l-vot rispettiv).

3.3.        Madankollu, fil-każijiet li ġejjin, Stat Membru inkarigat jaġixxi abbażi ta' linji komuni li għandhom jittieħdu jew jippreżenta dikjarazzjonijiet komuni "f'isem l-UE u l-Istati Membri tagħha" (u, fejn applikabbli, jitfa’ l-vot rispettiv).

– F’każijiet taħt 2.3.4.2, fejn il-pożizzjoni komuni primarjament ikun fiha elementi mhux koperti minn pożizzjoni tal-UE. Dan it-tqassim tal-kompiti għandu jsir abbażi tal-impatt ewlieni mistenni tal-politika segwita fi ħdan il-FAO fuq l-UE jew fuq l-Istati Membri tagħha.

– F'każ ta' kwistjonijiet organizzattivi u proċedurali, bħall-elezzjoni ta’ presidenti, adozzjonijiet ta’ aġendi u rapporti.

3.4.        L-Istati Membri jippreżentaw dikjarazzjonijiet f’isimhom stess (u, fejn applikabbli, jitfgħu l-vot rispettiv).

3.5.        Fir-rigward tat-tliet Kumitati tal-FAO bi sħubija ristretta (il-Kumitat tal-Finanzi, il-Kumitat tal-Programm u l-Kumitat dwar kwistjonijiet kostituzzjonali u legali), li s’issa ma jkoprux l-UE, il-membru/i nominat/i mill-Istat/i Membru/i tal-UE li jkollu/jkollhom post f’dawn il-kumitati għandu/hom ikun/u fdat/i, fejn applikabbli, sabiex jippreżenta(w) dikjarazzjonijiet tal-UE jew dikjarazzjonijiet komuni, u jixħtu l-vot, jekk ikun hemm bżonn.

4.           Materji prattiċi

4.1.        Dikjarazzjonijiet jew dikjarazzjonijiet komuni tal-UE isiru bl-isem tal-UE. Dikjarazzjonijiet tal-UE jsiru "f’isem l-UE”. Dikjarazzjonijiet komuni jsiru “f’isem l-UE u l-Istati Membri tagħha”.

4.2.        Sabiex jinkiseb l-aqwa għarfien espert disponibbli u jissaħħu, fejn meħtieġ, ir-riżorsi tagħhom, id-Delegazzjoni tal-UE u/jew il-Kummissjoni jistgħu jiddeċiedu fil-każ ta' laqgħat speċifiċi tal-FAO, li jistrieħu fuq esperti mill-Istati Membri li jistgħu jiġu mitluba jitkellmu fil-laqgha biex ikomplu jiżvolġu d-dikjarazzjonijiet, u jitkellmu wara l-plakka tal-isem tal-UE.

4.3.        Kwestjonarji Il-kwestjonarji li l-FAO tibgħat lill-UE jitwieġbu mill-Kummissjoni. Qabel ma l-Kummissjoni tirritorna l-kwestjonarji kompluti lill-FAO, hija tibgħathom lill-Kunsill għall-kummenti. L-Istati Membri ikollhom għaxart (10) ijiem biex jirreaġixxu.

[1]         Il-Programm Dinji tal-Ikel (WFP) u l-Fond Internazzjonali għall-Iżvilupp Agrikolu (IFAD)

[2]         P7_TA-PROV(2011)0229

[3]         Ittra tal-President tal-Kunsill tal-Unjoni Ewropea tal-4 ta’ Ottubru 1994 (8406)

[4]         Il-Kummissjoni Ġenerali tas-Sajd għall-Mediterran (GFCM), Il-Ftehim dwar Miżuri tal-Istat tal-Port li Jimpedixxu, Jiskoraġġixxu u Jeliminaw is-Sajd Illegali, Mhux Rappurtat u Mhux Regolat (PSM); Il-Kummissjoni Codex Alimentarius; Il-Konvenzjoni Internazzjonali għall-Ħarsien tal-Pjanti (IPPC)

[5]         Dokument tal-Kunsill 10478/91 tal-18/12/1991.

[6]         Dokument tal-Kunsill 9050/92 tas-7 ta' Ottubru 1992.

[7]         Dokument tal-Kunsill 8460/95 tas-26 ta' Ġunju 1995.

[8]         Il-Kawża C-25/94 tad-19.3.1996

[9]         Il-Ftehim tal-FAO tal-1993 biex jippromwovi l-osservanza tal-miżuri internazzjonali ta' konservazzjoni u ta' ġestjoni minn bastimenti tas-sajd f'ibħra internazzjonali; Il-Ftehim tal-2009 dwar Miżuri tal-Istat tal-Port li Jimpedixxu, Jiskoraġġixxu u Jeliminaw is-Sajd Illegali, Mhux Rappurtat u Mhux Regolat (PSM); Il-Kummissjoni Ġenerali tas-Sajd għall-Mediterran (GFCM); Il-Kummissjoni tat-Tonn tal-Oċean Indjan (IOTC); Il-Kummissjoni Codex Alimentarius; Il-Kummissjoni Ewropea għall-Kontroll tal-Marda tal-Ilsien u d-Dwiefer (EuFMD); Il-Konvenzjoni Internazzjonali għall-Ħarsien tal-Pjanti (IPPC);

[10]         Il-Kummissjoni Ġenerali tas-Sajd għall-Mediterran (GFCM); Il-Ftehim dwar Miżuri tal-Istat tal-Port li Jimpedixxu, Jiskoraġġixxu u Jeliminaw is-Sajd Illegali, Mhux Rappurtat u Mhux Regolat(PSM); Il-Kummissjoni Codex Alimentarius; Il-Konvenzjoni Internazzjonali għall-Ħarsien tal-Pjanti (IPPC)

[11]         Ittra tal-President tal-Kunsill tal-Unjoni Ewropea tal-4 ta’ Ottubru 1994 (8406)

[12]         Nota verbali ddatata s-27 ta’ Novembru 2009.

[13]         L-UE tqis li l-preżentazzjoni sistematika ta' tali nota informattiva mhux rikjesta fil-każ ta' laqgħat jew ta' punti speċifiċi fuq l-aġenda tagħhom meta jew ma jkunx hemm il-ħsieb li jittieħed vot jew inkella meta t-tqassim tal-kompetenza bejn l-UE u l-Istati Membri tagħha jirriżulta direttament mid-dikjarazzjoni ta' kompetenzi preżenti.

[14]        Il-Ftehim tal-FAO tal-1993 biex jippromwovi l-osservanza tal-miżuri internazzjonali ta' konservazzjoni u ta' ġestjoni minn bastimenti tas-sajd f'ibħra internazzjonali; Il-Ftehim tal-2009 dwar Miżuri tal-Istat tal-Port li Jimpedixxu, Jiskoraġġixxu u Jeliminaw is-Sajd Illegali, Mhux Rappurtat u Mhux Regolat(PSM); Il-Kummissjoni Ġenerali tas-Sajd għall-Mediterran (GFCM); Il-Kummissjoni tat-Tonn tal-Oċean Indjan (IOTC); Il-Kummissjoni Codex Alimentarius; Il-Kummissjoni Ewropea għall-Kontroll tal-Marda tal-Ilsien u d-Dwiefer (EuFMD); Il-Konvenzjoni Internazzjonali għall-Ħarsien tal-Pjanti (IPPC);

[15]        Il-Kawża C-246/07 il-Kummissjoni vs l-Isvezja [2010] Ġabra I-3317.

[16]        Inkluż il-punti tal-aġenda li jkun fihom ukoll elementi anċillari li ma jkunux koperti minn pożizzjoni tal-UE.

[17]        Inkluż il-punti tal-aġenda li jkun fihom ukoll elementi anċillari li ma jkunux koperti minn pożizzjoni tal-UE.