52012PC0455

MEMORANDUM TA’ SPJEGAZZJONI

Il-Ftehim ta’ Djalogu Politiku u ta’ Koperazzjoni bejn, min-naħa l-waħda, il-Komunità Ewropea u l-Istati Membri tagħha u, min-naħa l-oħra, ir-Repubbliki tal-Kosta Rika, tal-El Salvador, tal-Gwatemala, tal-Ħonduras, tan-Nikaragwa u tal-Panama, ġie ffirmat fil-15 ta' Diċembru tal-2003. Dan il-ftehim issa ġie rratifikat mill-partijiet kollha.

Skont it-termini tal-Artikolu 6(2) tal-Att tal-Adeżjoni tal-Istati Membri l-ġodda mal-UE, is-sħubija tal-Istati Membri l-ġodda fil-Ftehim ta’ Djalogu Politiku u ta’ Koperazzjoni trid tiġi approvata permezz ta’ protokoll ma’ dan il-ftehim. L-istess artikolu jipprovdi għal proċedura simplifikata, li fil-qafas tagħha l-protokoll għandu jiġi konkluż mill-Kunsill, li jiddeċiedi b’unanimità f’isem l-Istati Membri, u mill-pajjiż terz ikkonċernat.

L-għaxar Stati Membri l-ġodda li daħlu fl-UE fl-2004 — ir-Repubblika Ċeka, ir-Repubblika tal-Estonja, ir-Repubblika ta’ Ċipru, l-Ungerija, ir-Repubblika tal-Latvja, ir-Repubblika tal-Litwanja, ir-Repubblika ta’ Malta, ir-Repubblika tal-Polonja, ir-Repubblika tas-Slovenja, u r-Repubblika Slovakka — u r-Repubblika tal-Bulgarija u r-Rumanija, li ssieħbu fl-2007, għandhom jidħlu fil-Ftehim ta’ Djalogu Politiku u ta’ Koperazzjoni permezz ta’ protokoll mal-ftehim.

Deċiżjoni tal-Kunsill tas-17 ta’Novembru tal-2009 awtorizzat lill-Kummissjoni tiftaħ negozjati mar-Repubbliki tal-Kosta Rika, tal-El Salvador, tal-Gwatemala, tal-Ħonduras, tan-Nikaragwa u tal-Panama, sabiex jiġi konkluż il-protokoll rilevanti.

It-test tal-protokoll li ġie nnegozjat mas-sħab fl-Amerika Ċentrali huwa mehmuż ma’ dan id-dokument. L-aktar dispożizzjoni importanti tal-protokoll għandha x’taqsam mas-sħubija tal-Istati Membri l-ġodda fil-Ftehim ta’ Djalogu Politiku u ta’ Koperazzjoni, u tipprovdi għal verżjonijiet awtentiċi tal-ftehim bil-lingwi uffiċjali l-ġodda tal-UE.

Il-proposti mehmuża huma għal (1) deċiżjoni tal-Kunsill dwar l-iffirmar u l-applikazzjoni proviżorja tal-protokoll u (2) deċiżjoni tal-Kunsill dwar il-konklużjoni tal-protokoll.

Il-Kunsill huwa mitlub jadotta d-Deċiżjonijiet tal-Kunsill proposti sabiex il-protokoll jiġi ffirmat u konkluż.

2012/0220 (NLE)

Proposta għal

DEĊIŻJONI TAL-KUNSILL

dwar l-iffirmar, f'isem l-Unjoni Ewropea, ta' protokoll dwar is-sħubija fil-Ftehim ta’ Djalogu Politiku u ta’ Koperazzjoni bejn il-Komunità Ewropea u l-Istati Membri tagħha, min-naħa l-waħda, u r-Repubbliki tal-Kosta Rika, tal-El Salvador, tal-Gwatemala, tal-Ħonduras, tan-Nikaragwa u tal-Panama, min-naħa l-oħra

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 212(3), flimkien mal-Artikolu 218(5) tiegħu,

Wara li kkunsidra t-Trattat tal-Adeżjoni tas-16 ta' April tal-2003, u b'mod partikolari l-Artikolu 2(3) tiegħu,

Wara li kkunsidra l-Att tal-Adeżjoni anness mat-Trattat tal-Adeżjoni, u b'mod partikolari l-Artikolu 6(2) tiegħu,

Wara li kkunsidra t-Trattat tal-Adeżjoni tar-Repubblika tal-Bulgarija u r-Rumanija, u b'mod partikolari l-Artikolu 4(3) tiegħu,

Wara li kkunsidra l-Att anness mat-Trattat tal-Adeżjoni tal-Bulgarija u tar-Rumanija mal-Unjoni Ewropea, u partikolarment l-Artikolu 6(2) tiegħu,

Wara li kkunsidra l-proposta tal-Kummissjoni Ewropea,

Billi:

(1)       Fis-17 ta’ Novembru tal-2009 l-Kunsill awtorizza lill-Kummissjoni tiftaħ negozjati mar-Repubbliki tal-Kosta Rika, tal-El Salvador, tal-Gwatemala, tal-Ħonduras, tan-Nikaragwa u tal-Panama għall-iffirmar ta' protokoll dwar is-sħubija mal-Ftehim ta’ Djalogu Politiku u ta’ Koperazzjoni. In-negozjati ġew konklużi b’suċċess bl-inizjalar tal-Ftehim.

(2)       Skont it-termini tal-Artikolu 6(2) tal-Att tal-Adeżjoni tal-Istati Membri l-ġodda mal-UE, is-sħubija tal-Istati Membri l-ġodda fil-Ftehim ta’ Djalogu Politiku u ta’ Koperazzjoni trid tiġi approvata permezz ta’ protokoll ma’ dan il-ftehim. L-istess artikolu jipprovdi għal proċedura simplifikata, li permezz tagħha l-protokoll irid jiġi konkluż mill-Kunsill, li jaġixxi unanimament f’isem l-Istati Membri, u mill-pajjiżi terzi kkonċernati.

(3)       L-Artikolu X tal-protokoll li ġie nnegozjat mas-sħab fl-Amerika Ċentrali jipprovdi għall-applikazzjoni proviżorja tal-protokoll qabel id-dħul fis-seħħ tiegħu.

(4)       Għalhekk, soġġett għall-konklużjoni tiegħu aktar tard, il-protokoll għandu jiġi ffirmat f’isem l-Unjoni u jiġi applikat b’mod proviżorju,

ADOTTA DIN ID-DEĊIŻJONI:

Artikolu 1

L-iffirmar tal-protokoll dwar is-sħubija mal-Ftehim ta’ Djalogu Politiku u ta’ Koperazzjoni mar-Repubbliki tal-Kosta Rika, tal-El Salvador, tal-Gwatemala, tal-Ħonduras, tan-Nikaragwa u tal-Panama huwa b'dan approvat f'isem l-Unjoni, suġġett għall-konklużjoni tal-ftehim imsemmi.

It-test tal-ftehim li għandu jiġi ffirmat huwa mehmuż ma’ din id-deċiżjoni.

Artikolu 2

Il-president tal-Kunsill huwa b’dan awtorizzat jinnomina lill-persuna/i li se jkollha/jkollhom is-setgħa li tiffirma/jiffirmaw, f’isem l-Unjoni Ewropea u l-Istati Membri tagħha, il-protokoll ta’ mal-Ftehim ta’ Djalogu Politiku u ta’ Koperazzjoni bejn il-Komunità Ewropea u l-Istati Membri tagħha, min-naħa l-waħda, u r-Repubbliki tal-Kosta Rika, tal-El Salvador, tal-Gwatemala, tal-Ħonduras, tan-Nikaragwa u tal-Panama, min-naħa l-oħra.

Artikolu 3

Sakemm jidħol fis-seħħ, il-protokoll jiġi applikat fuq bażi proviżorja mid-data tad-dħul fis-seħħ tal-Ftehim ta’ Djalogu Politiku u ta’ Koperazzjoni bejn il-Komunità Ewropea u l-Istati Membri tagħha, min-naħa l-waħda, u r-Repubbliki tal-Kosta Rika, tal-El Salvador, tal-Gwatemala, tal-Ħonduras, tan-Nikaragwa u tal-Panama, min-naħa l-oħra.

Artikolu 4

Din id-deċiżjoni hija indirizzata lill-Istati Membri.

Magħmul fi Brussell,

                                                                       Għall-Kunsill

                                                                       Il-President

ANNESS

Protokoll

ta’ mal-Ftehim ta’ Djalogu Politiku u ta’ Koperazzjoni bejn il-Komunità Ewropea u l-Istati Membri tagħha, min-naħa l-waħda, u r-Repubbliki tal-Kosta Rika, tal-El Salvador, tal-Gwatemala, tal-Ħonduras, tan-Nikaragwa u tal-Panama, min-naħa l-oħra, sabiex jingħata kas tas-sħubija tar-Repubblika tal-Bulgarija, tar-Repubblika Ċeka, tar-Repubblika tal-Estonja, tar-Repubblika ta’ Ċipru, tal-Ungerija, tar-Repubblika tal-Latvja, tar-Repubblika tal-Litwanja, tar-Repubblika ta’ Malta, tar-Repubblika tal-Polonja, tar-Rumanija, tar-Repubblika tas-Slovenja, u tar-Repubblika Slovakka fl-Unjoni Ewropea

IR-RENJU TAL-BELĠJU,

IR-REPUBBLIKA TAL-BULGARIJA,

IR-REPUBBLIKA ĊEKA,

IR-RENJU TAD-DANIMARKA,

IR-REPUBBLIKA FEDERALI TAL-ĠERMANJA,

IR-REPUBBLIKA TAL-ESTONJA,

L-IRLANDA,

IR-REPUBBLIKA ELLENIKA,

IR-RENJU TA' SPANJA,

IR-REPUBBLIKA FRANĊIŻA,

IR-REPUBBLIKA TALJANA,

IR-REPUBBLIKA TA' ĊIPRU,

IR-REPUBBLIKA TAL-LATVJA,

IR-REPUBBLIKA TAL-LITWANJA,

IL-GRAN DUKAT TAL-LUSSEMBURGU,

L-UNGERIJA,

IR-REPUBBLIKA TA’ MALTA,

IR-RENJU TAL-PAJJIŻI L-BAXXI,

IR-REPUBBLIKA TAL-AWSTRIJA,

IR-REPUBBLIKA TAL-POLONJA,

IR-REPUBBLIKA PORTUGIŻA,

IR-RUMANIJA,

IR-REPUBBLIKA TAS-SLOVENJA,

IR-REPUBBLIKA SLOVAKKA,

IR-REPUBBLIKA TAL-FINLANDJA,

IR-RENJU TAL-ISVEZJA,

IR-RENJU UNIT TAL-GRAN BRITTANJA U TAL-IRLANDA TA’ FUQ,

u

L-UNJONI EWROPEA,

min-naħa l-waħda, u

IR-REPUBBLIKA TAL-KOSTA RIKA

IR-REPUBBLIKA TAL-EL SALVADOR,

IR-REPUBBLIKA TAL-GWATEMALA,

IR-REPUBBLIKA TAL-ĦONDURAS,

IR-REPUBBLIKA TAN-NIKARAGWA,

IR-REPUBBLIKA TAL-PANAMA,

                                                                                     min-naħa l-oħra,

BILLI l-Ftehim ta’ Djalogu Politiku u ta’ Koperazzjoni bejn il-Komunità Ewropea u l-Istati Membri tagħha, min-naħa l-waħda, u r-Repubbliki tal-Kosta Rika, tal-El Salvador, tal-Gwatemala, tal-Ħonduras, tan-Nikaragwa u tal-Panama, min-naħa l-oħra, minn issa 'l quddiem imsejjaħ "il-ftehim", ġie ffirmat fil-15 ta' Diċembru tal-2003;

BILLI t-Trattat li jikkonċerna l-adeżjoni tar-Repubblika Ċeka, tar-Repubblika tal-Estonja, tar-Repubblika ta’ Ċipru, tar-Repubblika tal-Latvja, tar-Repubblika tal-Litwanja, tar-Repubblika tal-Ungerija, tar-Repubblika ta’ Malta, tar-Repubblika tal-Polonja, tar-Repubblika tas-Slovenja u tar-Repubblika Slovakka mal-Unjoni Ewropea (minn hawn ’il quddiem imsejjaħ t-“it-trattat tal-adeżjoni”) ġie iffirmat f’Ateni fis-16 ta’ April tal-2003;

BILLI, skont l-Artikolu 6(2) tal-Att tal-Adeżjoni, l-inkorporazzjoni ta' dawn l-Istati Membri fil-ftehim għandha tiġi formalizzata bil-konklużjoni ta' protokoll mal-ftehim;

BILLI t-Trattat dwar l-adeżjoni tar-Repubblika tal-Bulgarija u tar-Rumanija mal-Unjoni Ewropea (minn issa 'l quddiem imsejjaħ "it-tieni trattat tal-adeżjoni") ġie ffirmat fil-Lussemburgu fil-25 ta' April tal-2005;

BILLI, skont it-tieni Trattat tal-Adeżjoni, u b'mod partikolari l-Artikolu 6(2) tal-protokoll dwar il-kundizzjonijiet u l-arranġamenti għall-ammissjoni tar-Repubblika tal-Bulgarija u tar-Rumanija, l-inkorporazzjoni tal-Istati Membri l-ġodda fil-ftehim għandha tiġi formalizzata permezz tal-konklużjoni ta' protokoll mal-ftehim;

BILLI l-Artikolu 53 tal-ftehim jgħid: "Għall-finijiet ta' dan il-ftehim, "il-partijiet" tirreferi għall-Komunità, l-Istati Membri tagħha jew il-Komunità u l-Istati Membri tagħha, fl-oqsma ta' kompetenza rispettivi tagħhom, kif joħroġ mit-Trattat li jistabbilixxi l-Komunità Ewropea, min-naħa l-waħda, u r-Repubbliki tal-Kosta Rika, tal-El Salvador, tal-Gwatemala, tal-Ħonduras, tan-Nikaragwa u tal-Panama, min-naħa l-oħra, b'konformità mal-isferi ta’ kompetenza rispettivi tagħhom. Il-ftehim japplika wkoll għal miżuri meħudin minn kwalunkwe awtoritajiet Statali, reġjonali jew lokali fit-territorji tal-partijiet.";

BILLI l-Artikolu 59 tal-ftehim jgħid: “Dan il-ftehim ikun applikabbli, min-naħa l-waħda, għat-territorji li fihom huwa applikat it-Trattat li jistabbilixxi l-Komunità Ewropea u bil-kundizzjonijiet stabbiliti f'dak it-Trattat u, min-naħa l-oħra, għat-territorji tar-Repubbliki tal-Kosta Rika, tal-El Salvador, tal-Gwatemala, tal-Ħonduras, tan-Nikaragwa u tal-Panama";

BILLI l-Artikolu 60 tal-ftehim jgħid: "Ta’ dan il-ftehim jitħejjew kopji bid-Daniż, bl-Olandiż, bl-Ingliż, bil-Finlandiż, bil-Franċiż, bil-Ġermaniż, bil-Grieg, bit-Taljan, bil-Portugiż, bl-Ispanjol u bl-Isvediż, u kull wieħed minn dawn it-testi jkun awtentiku bl-istess mod";

FTEHMU KIF ĠEJ:

Artikolu 1

Ir-Repubblika tal-Bulgarija, ir-Repubblika Ċeka, ir-Repubblika tal-Estonja, ir-Repubblika ta' Ċipru, ir-Repubblika tal-Latvja, ir-Repubblika tal-Litwanja, l-Ungerija, ir-Repubblika ta' Malta, ir-Repubblika tal-Polonja, ir-Rumanija, ir-Repubblika tas-Slovenja, u r-Repubblika tas-Slovakkja huma b'dan inkorporati bħala partijiet għall-Ftehim ta’ Djalogu Politiku u ta’ Koperazzjoni bejn il-Komunità Ewropea u l-Istati Membri tagħha, min-naħa l-waħda, u r-Repubbliki tal-Kosta Rika, tal-El Salvador, tal-Gwatemala, tal-Ħonduras, tan-Nikaragwa u tal-Panama, min-naħa l-oħra.

Artikolu 2

Fi żmien sitt xhur minn meta jiġi inizjalat dan il-protokoll, l-Unjoni Ewropea tgħaddi lill-Istati Membri tagħha u lir-Repubbliki tal-Kosta Rika, tal-El Salvador, tal-Gwatemala, tal-Ħonduras, tan-Nikaragwa u tal-Panama l-verżjonijiet tal-ftehim bil-Bulgaru, biċ-Ċek, bl-Estonjan, bl-Ungeriż, bil-Latvjan, bil-Litwan, bil-Malti, bil-Pollakk, bir-Rumen, bis-Slovakk u bis-Sloven. Soġġett għad-dħul fis-seħħ ta' dan il-protokoll, il-verżjonijiet bil-lingwi l-ġodda jsiru awtentiċi bl-istess kundizzjonijiet bħall-verżjonijiet imfasslin bil-lingwi preżenti tal-ftehim.

Artikolu 3

Dan il-protokoll jifforma parti integrali mill-Ftehim ta’ Djalogu Politiku u ta’ Koperazzjoni.

Artikolu 4

Ta’ dan il-protokoll jitħejjew kopji bil-Bulgaru, biċ-Ċek, bid-Daniż, bl-Olandiż, bl-Ingliż, bl-Estonjan, bil-Finlandiż, bil-Franċiża, bil-Ġermaniż, bil-Grieg, bl-Ungeriż, bit-Taljan, bil-Latvjan, bil-Litwan, bil-Malti, bil-Pollakk, bil-Portugiż, bir-Rumen, bis-Slovakk, bis-Sloven, bl-Ispanjol u bl-Isvediż, u kull wieħed minn dawn it-testi jkun awtentiku bl-istess mod.

Artikolu 5

1.           Dan il-protokoll jiġi approvat mill-Unjoni Ewropea u l-Istati Membri tagħha, u mir-Repubbliki tal-Kosta Rika, tal-El Salvador, tal-Gwatemala, tal-Ħonduras, tan-Nikaragwa u tal-Panama, b'konformità mal-proċeduri tagħhom stess.

2.           Dan il-protokoll jidħol fis-seħħ fl-ewwel jum tax-xahar ta' wara d-data li fiha l-partijiet kollha jkunu nnotifikaw lil xulxin dwar it-tlestija tal-proċeduri meħtieġa għal dan il-għan.

Magħmul fi Brussell,

Għall-Kunsill

Il-President