52012PC0396

MEMORANDUM TA’ SPJEGAZZJONI

Il-Punt 28 tal-Ftehim Interistituzzjonali tas-17 ta' Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-ġestjoni finanzjarja soda[1] jippermetti l-mobilizzazzjoni tal-Fond Ewropew ta' Aġġustament għall-Globalizzazzjoni (FEG) permezz ta' mekkaniżmu ta' flessibbiltà, bil-limitu massimu annwali ta' EUR 500 miljun lil hinn mill-intestaturi rilevanti tal-qafas finanzjarju.

Ir-regoli applikabbli għall-kontribuzzjonijiet mill-FEG huma stipulati fir-Regolament (KE) Nru 1927/2006 tal-Parlament Ewropew u tal-Kunsill tal-20 ta' Diċembru 2006 li jistabbilixxi l-Fond Ewropew ta' Aġġustament għall-Globalizzazzjoni[2].

Fit-23 ta' Diċembru 2011, l-Isvezja ressqet applikazzjoni EGF/2011/015 SE/AstraZeneca għal kontribuzzjoni finanzjarja mill-FEG, wara li ngħataw is-sensji fl-AstraZeneca fl-Isvezja.

Wara analiżi fil-fond ta' din l-applikazzjoni, il-Kummissjoni kkonkludiet skont l-Artikolu 10 tar-Regolament (KE) Nru 1927/2006, li l-kundizzjonijiet għal kontribuzzjoni finanzjarja skont dan ir-Regolament huma ssodisfati.

TAQSIRA TAL-APPLIKAZZJONI U ANALIŻI

Dejta essenzjali: ||

Nru ta' Referenza tal-FEG || FEG/2011/015

Stat Membru || L-Isvezja

Artikolu 2 || (a)

Intrapriża primarja || AstraZeneca

Fornituri u produtturi fl-istadju aħħari ta’ produzzjoni || L-ebda

Perjodu ta’ referenza || 15.06.2011 – 15.10.2011

Data ta' bidu għas-servizzi personalizzati || 26.10.2010

Id-data tal-applikazzjoni || 23.12.2011

Sensji matul il-perjodu ta’ referenza || 543

Sensji qabel u wara l-perjodu ta' referenza || 444

Sensji totali eliġibbli || 987

Ħaddiema li ngħataw is-sensja li mistennija jipparteċipaw fil-miżuri || 700

Nefqa għas-servizzi personalizzati (EUR) || 6 396 600

Nefqa għall-implimentazzjoni tal-FEG[3] (EUR) || 258 560

Nefqa għall-implimentazzjoni tal-FEG (%) || 3,9

Baġit totali (EUR) || 6 655 160

Kontribuzzjoni tal-FEG (65 %) (EUR) || 4 325 854

1.           L-applikazzjoni tressqet quddiem il-Kummissjoni fit-23 ta’ Diċembru 2011 u kienet sostnuta b'tagħrif addizzjonali sas-16 ta’ April 2012.

2.           L-applikazzjoni tissodisfa l-kundizzjonijiet għall-użu tal-FEG kif stabbilit fl-Artikolu 2(a) tar-Regolament (KE) Nru 1927/2006, u tressqet fi żmien il-perjodu speċifikat ta’ 10 ġimgħat imsemmi fl-Artikolu 5 ta’ dak ir-Regolament.

Ir-rabta bejn is-sensji u l-bidliet strutturali ewlenin fix-xejriet tal-kummerċ dinji minħabba l-globalizzazzjoni jew il-kriżi finanzjarja u ekonomika globali

3.           Sabiex tistabbilixxi r-rabta bejn is-sensji u l-bidliet strutturali ewlenin fix-xejriet tal-kummerċ dinji minħabba l-globalizzazzjoni, l-Isvezja ssostni li s-settur farmaċewtiku kull ma jmur qed jiġi affettwat aktar mill-globalizzazzjoni. L-industrija farmaċewtika attwalment qiegħda għaddejja minn bidliet sinifikanti sabiex iżżomm il-kompetittività tagħha f'ambjent diffiċli. Bosta kumpaniji jinsabu fi stat ta' tranżizzjoni; qegħdin jiġu kkunsidrati r-riorganizzazzjoni, il-konsolidazzjoni, l-amalgamazzjonijiet u l-akkwiżizzjonijiet sabiex jinżammu ċ-ċentri ta' tkabbir. Kull ma jmur l-industrija qiegħda tfittex sinerġiji sabiex tikkontrolla l-ispejjeż li dejjem jiżdiedu tal-attivitajiet ta' riċerka u żvilupp (R&D).

4.           L-investimenti globali u r-riċerka bijoteknoloġika qegħdin jiżdiedu u wieħed jista' jsib kompetituri ġodda fiċ-Ċina, il-Brażil u l-Indja. Il-prospetti għall-finanzjament ta' riċerka u żvilupp ivarjaw skont ir-reġjun, bl-Istati Uniti li tistenna tkabbir, l-Ewropa li tikkontempla awsterità fiskali li tista' tillimita l-investiment għal diversi snin, u bosta pajjiżi Asjatiċi li jżommu impenni finanzjarji b'saħħithom għar-riċerka u żvilupp (sehem mill-infiq globali totali tar-riċerka u żvilupp fl-2009-2011: l-Istati Uniti (34,71 %-34,0 %), l-Asja (33,6 %-35,3 %), l-Ewropa (24,1 %-23,2 %)). Matul ir-riċessjoni, il-komunitajiet Asjatiċi ta' riċerka u żvilupp żiedu l-investiment fir-riċerka u żvilupp u l-istatura tagħhom. Fost il-komunitajiet ta' riċerka globali, l-istat tar-riċerka u żvilupp fl-UE jagħti lok għal ħafna tħassib. Li wieħed jipprova jirkupra minn riċessjoni u jiġi sfurzat li jnaqqas id-defiċit, jista min-naħa tiegħu jaffettwa l-appoġġ tal-gvern għar-riċerka u żvilupp[4]. Skont ir-rapport ta' Frost & Sullivan, Kumpanija ta' Konsultazzjoni dwar it-Tkabbir, tal-2010[5], madwar 70 % tal-kumpaniji farmaċewtiċi mistoqsija x'aktarx li jesternalizzaw il-manifattura lill-Asja. Dawk is-swieq jeħtieġu wkoll li d-drogi jkunu ttestjati fuq il-popolazzjoni lokali, biex b'hekk il-preżenza ta' riċerka u żvilupp fis-swieq Asjatiċi qiegħda tikber.

5.           Barra minn hekk, l-isfida għall-industrija farmaċewtika hija l-preżenza li dejjem tiżdied tal-ġeneriċi hekk kif il-privattivi għall-prodotti ewlenin tad-ditta jiskadu. L-industrija ġenerika riċentament għaddiet minn ristrutturar kbir. L-amalgamazzjonijiet u l-akkwiżizzjonijiet ikkonċentraw sehem li dejjem jikber tas-suq ġeneriku globali f'idejn il-protagonisti tas-settur. Ġeneralment id-drogi ġeneriċi huma mmanifatturati f'pajjiżi Asjatiċi fejn il-pagi huma baxxi u jissarrfu f'madwar 10 % tal-prezz oriġinali ġaladarba l-privattiva tiskadi. B'riżultat ta' dan, bosta kumpaniji huma affettwati u se jkollhom jagħmlu tnaqqis. Il-manifatturi Ewropew il-kbar jikkonċentraw fuq it-twettiq tal-fażijiet kliniċi għoljin, kif ukoll fuq il-kummerċjalizzazzjoni u l-proċess ta' approvazzjoni. L-attivitajiet ta' riċerka qegħdin jonqsu.

6.           Bosta pajjiżi mhux Ewropej qegħdin ifasslu strateġiji għall-bijoxjenzi u l-industrija f'oqsma ta' farmaċewtiċi, bijoteknoloġija u teknoloġija medika. Il-kumpaniji Ewropej għandhom jadattaw il-produzzjoni tagħhom għal din is-sitwazzjoni. AstraZeneca (li kellha tliet ċentri ta' riċerka u żvilupp fl-Isvezja) segwiet l-andament u fl-2010 adottat strateġija ta' riċerka u żvilupp ġdida. Dan inkluda l-bżonn li jkun hemm konċentrazzjoni fuq inqas oqsma tal-mard, l-għeluq tas-siti (inkluż dak f'Lund u Umeå) u utilizzazzjoni akbar b'mod sinifikanti tar-riżorsi esterni permezz tal-esternalizzazzjoni. B'segwitu tal-andamenti globali, AstraZeneca żiedet ukoll l-investimenti ta' riċerka u żvilupp fiċ-Ċina u r-Russja (AZ China hija l-akbar kumpanija farmaċewtika multinazzjonali fis-suq tal-preskrizzjoni fiċ-Ċina; fl-2011 AZ ħabbret ukoll il-ftuħ ta' Ċentru ta' Xjenza Predittiv f'San Pietruburgu).

Il-prova tal-għadd tas-sensji u konformità mal-kriterji tal-Artikolu 2(a)

7.           L-Isvezja ressqet din l-applikazzjoni skont il-kriterji ta’ intervent tal-Artikolu 2(a) tar-Regolament (KE) Nru 1927/2006, li jeħtieġ minn tal-inqas 500 sensja matul perjodu ta’ erba’ xhur f’intrapriża fi Stat Membru, inklużi ħaddiema li jingħataw is-sensja mill-fornituri tagħha jew mill-produtturi involuti fl-istadju aħħari ta’ produzzjoni.

8.           L-applikazzjoni tikkwota 543 sensja f'AstraZeneca matul il-perjodu ta' referenza ta' erba' xhur mill-15 ta' Ġunju 2011 sal-15 ta' Ottubru 2011. Kien hemm 444 sensja oħra (total ta' 987) qabel u wara l-perjodu ta' referenza u huma marbuta mal-istess proċedura ta' sensji kollettivi. Is-sensji ġew ikkalkolati skont it-tieni inċiż tat-tieni paragrafu tal-Artikolu 2 tar-Regolament (KE) Nru 1927/2006.

L-ispjegazzjoni tan-natura mhux prevista ta' dawk is-sensji

9.           L-awtoritajiet Svediżi jsostnu li, fid-dawl tal-fatt li l-Isvezja għandha pożizzjoni b'saħħitha fir-riċerka medika, is-sensji kollettivi f'AstraZeneca ma kinux mistennija. Filwaqt li s-sitwazzjoni li sejra għall-agħar fis-settur tal-farmaċewtika minħabba d-dominanza li dejjem tiżdied tal-ġeneriċi kienet prevista, l-impatt fuq AstraZeneca kien aktar sever milli kien antiċipat. AstraZeneca kienet ikkunsidrata kumpanija stabbli minħabba l-istorja twila u ta' suċċess tagħha, li ddominat l-industrija tax-xjenza Svediża bi kwart ta' dawk li jaħdmu fix-xjenzi tal-ħajja li huma impjegati ta' AstraZeneca. Barra minn hekk, għal żmien twil il-gvern Svediż ippromwova l-post ta' ċentru ta' riċerka interdixxiplinarja f'Lund – is-Sors Ewropew ta' Spallazzjoni – u AstraZeneca kienet mistennija li tiddedika riżorsi addizzjonali għar-riċerka f'Lund. Meta wieħed iqis il-bżonn mediku kbir fis-sistema respiratorja/il-qasam tal-infjammazzjoni, l-għeluq tas-sit ta' riċerka u żvilupp f'din il-kategorija ta' terapija f'Lund ma kienx mistenni.

L-identifikazzjoni tal-intrapriżi li taw is-sensji u l-ħaddiema li se jingħataw l-għajnuna

10.         L-applikazzjoni tirrelata ma' 987 sensja, li minnhom 543 seħħew matul il-perjodu ta' referenza u 444 seħħew warajh; dawn huma eliġibbli għall-inklużjoni skont l-Artikolu 3a(b) tar-Regolament (KE) Nru 1927/2006. L-Isvezja tikkalkula li 700 mill-ħaddiema ssensjati se jagħżlu li jirċievu l-għajnuna mill-FEG. Il-ħaddiema li jifdal huma mistennija jsibu impjieg b'inizjattiva tagħhom stess mingħajr ma jitolbu għajnuna mill-FEG jew jirtiraw.

11.         It-tqassim tal-ħaddiema fil-mira huwa kif ġej:

Kategorija || Għadd || Perċentwal

Irġiel || 255 || 36,43

Nisa || 445 || 63,57

Ċittadini tal-UE || 689 || 98,43

Ċittadini mhux tal-UE || 11 || 1,57

Minn 15 sa 24 sena || 1 || 0,14

Minn 25 sa 54 sena || 536 || 76,57

Minn 55 sa 64 sena || 163 || 23,29

Aktar minn 64 sena || 0 || 0

12.         F'dan il-grupp hemm seba' ħaddiema bi problemi tas-saħħa persistenti jew b'diżabilità.

13.         Fir-rigward ta' kategoriji ta’ xogħol, it-tqassim huwa kif ġej:

Kategorija || Għadd || Perċentwal

211 Fiżiċisti, spiżjara u professjonisti relatati || 132 || 18,86

213 Professjonisti tal-Informatika || 29 || 4,14

221 Professjonisti tax-xjenza tal-ħajja || 43 || 6,14

311 Tekniċi tax-xjenza tal-fiżika u tal-inġinerija || 84 || 12,00

343 Professjonisti assoċjati amministrattivi || 14 || 2,00

411 Segretarji || 29 || 4,14

822 Operaturi tal-magni tal-prodotti kimiċi || 51 || 7,29

Oħrajn || 318 || 45,43

14.         Skont l-Artikolu 7 tar-Regolament (KE) Nru 1927/2006, l-Isvezja kkonfermat li ġiet applikata politika ta' ugwaljanza bejn in-nisa u l-irġiel kif ukoll ta' ebda diskriminazzjoni, u li din se tkompli tapplika matul l-istadji varji tal-implimentazzjoni tal-FEG u, b'mod partikolari, fir-rigward tal-aċċess għalih.

Id-deskrizzjoni tat-territorju kkonċernat u l-awtoritajiet u l-partijiet interessati tiegħu

15.         L-intrapriżi affettwati jinsabu f'erbgħa mill-290 muniċipalitajiet Svediżi. Il-maġġoranza tal-persunal ingħatat is-sensja f'Lund fin-naħa t'isfel tal-Isvezja, imma s-sensji affettwaw ukoll Umeå fin-naħa ta' fuq tal-Isvezja, Södertälje fiż-żona metropolitana u sa ċertu punt Mölndal fil-punent tal-Isvezja. Il-Kontea ta' Skåne, fejn jinsab Lund, huwa wieħed mis-swieq tax-xogħol l-aktar dinamiċi fl-Isvezja. Madankollu, l-impjieg fis-settur industrijali se jibqa' kif inhu u ż-żieda mbassra se sseħħ biss fis-settur tas-servizzi privati. Fil-Kontea ta' Västerbotten, fejn tinsab Umeå, l-istruttura tan-negozju qiegħda tiffaċċja problema ta' differenza ġenerazzjonali u l-kumpaniji se jkollhom bżonn ta' forza tax-xogħol b'ħiliet speċjalizzati. Is-suq tax-xogħol lokali f'Umeå ġarrab għadd ta' għeluq ta' kumpaniji. Fir-reġjun ta' Stokkolma (li jinsab fil-Kontea ta' Södermanland), huwa s-settur privat li huwa dominanti. Hemm domanda kbira għall-ħaddiema b'ħiliet speċjalizzati. Madankollu, Sodertalje hija l-muniċipalità li għandha l-ogħla rata ta' qgħad fil-kontea u għandha struttura soċjoekonomika problematika fir-rigward tas-suq tax-xogħol. Is-suq tax-xogħol f'Mölndal (fil-Kontea ta' Västergötland) jiddependi mill-viċinanza ta' Gothenburg, fejn l-industrija tal-karozzi hija orjentata lejn l-esportazzjoni u l-industrija hija waħda ta' importanza nazzjonali. F'Mölndal stess, hemm diversi kumpaniji li jiffokaw fuq il-farmaċewtiċi u t-teknoloġija medika.

16.         Il-partijiet interessati ewlenin huma s-Servizzi Svediżi ta' Impjieg Pubbliku fil-muniċipalitajiet affettwati kollha, kif ukoll it-trejdjunjins (Unionen, SACO, IF Metall), l-entitajiet ta' konverżjoni (Trygghetsradet) u l-Università ta' Lund. L-entitajiet ta' konverżjoni huma l-proprjetà tal-impjegaturi u t-trejdjunjins.

L-impatt mistenni tas-sensji fir-rigward tal-impjiegi lokali, reġjonali jew nazzjonali

17.         L-awtoritajiet Svediżi jsostnu li l-għeluq tas-sit ta' AstraZeneca huwa piż kbir għal Lund u jaffettwa wkoll is-settur farmaċewtiku kollu. Dan l-iżvilupp probabbilment se jikkawża żbilanċ fis-suq tax-xogħol fir-reġjun. Is-sitwazzjoni għal min ifittex impjieg fis-settur farmaċewtiku diġà marret għall-agħar matul il-perjodu 2008-2010. Il-qgħad żdied fil-muniċipalitajiet affettwati kollha minn Jannar 2009 sa Novembru2011: f'Lund minn 2 467 għal 3 025, f'Umeå minn 3 725 għal 4 539, f'Sodertalje minn 3 100 għal 5 555 u f'Mölndal minn 1 458 għal 1 663.

Il-pakkett ikkoordinat ta' servizzi personalizzati li għandhom jiġu ffinanzjati u t-tqassim tal-ispejjeż stmati tiegħu, inkluża l-komplementarjetà tiegħu mal-azzjonijiet iffinanzjati mill-Fondi Strutturali

18.         L-Isvezja żviluppat pakkett ta' miżuri b'appoġġ għall-ħaddiema ta' AstraZeneca li ngħataw is-sensja li ma kienx ikun possibbli li jiġi implimentat fin-nuqqas tal-appoġġ disponibbli. Peress li l-ħaddiema li ngħataw is-sensja fil-biċċa l-kbira tagħhom għandhom livell ta' edukazzjoni għoli, huma ma jingħatawx il-prijorità fi ħdan il-qafas tal-politika Svediża regolari dwar is-suq tax-xogħol.

Il-pakkett tal-miżuri propost mill-Isvezja għall-finanzjament tal-FEG huwa dan li ġej:

- Għajnuna għat-tfittix ta’ impjieg. Din il-miżura tikkonsisti f'laqgħat individwali li l-ħaddiem li ngħata s-sensja jkollu mas-servizz pubbliku dwar l-impjiegi (PES) lokali sabiex jiżviluppa pjan ta' azzjoni personali u jippreżenta CV kompluta. Il-ħaddiem jista' jkun appoġġat ukoll minn kowċ personali. Huwa stmat li l-ħaddiema kollha fil-mira se jipparteċipaw f'din l-azzjoni.

- Pariri dwar ix-xogħol. Din l-attività hija mmirata għal persuni li qegħdin ifittxu impjieg li jixtiequ jbiddlu x-xogħol u tinvolvi pariri dwar ix-xogħlijiet disponibbli, il-ħiliet u t-taħriġ meħtieġa, il-programmi ta' apprendistat u għotjiet għall-mobilità. Huwa stmat li 300 ħaddiem fil-mira se jipparteċipaw f'din l-azzjoni.

- Taħriġ u taħriġ mill-ġdid. Din il-miżura se tipprovdi edukazzjoni u taħriġ fuq bażi individwali f'ħiliet ġodda għal impjiegi ġodda. Il-ħaddiema fil-mira se jkollhom bżonn ibiddlu l-impjieg tagħhom ma' impjieg li hemm domanda għalih. Se tiġi offruta firxa wiesgħa ta' taħriġ. It-tul tal-korsijiet ta' taħriġ ivarja minn xahar għal 24 xahar b'medja ta' sitt xhur. Huwa stmat li 350 ħaddiem fil-mira se jipparteċipaw f'din l-azzjoni.

- Għajnuna għal dawk li jaħdmu għal rashom. Din il-miżura hija mmirata għall-ħaddiema li jixtiequ jibdew in-negozju tagħhom. Huma se jirċievu pariri speċifiċi dwar kif għandhom ifasslu l-pjanijiet tan-negozju u japplikaw għall-finanzjamenti neċessarji biex jibdew in-negozju tagħhom. Dawk li jiddeċiedu jibdew negozju se jirċievu taħriġ dwar il-leġiżlazzjoni tal-liġijiet tat-taxxa, il-kontabbiltà, il-liġi dwar l-impjiegi, is-saħħa u s-sikurezza okkupazzjonali u kwistjonijiet ambjentali. Huwa stmat li 70 ħaddiem fil-mira se jipparteċipaw f'din l-azzjoni.

- Il-benefiċċji għal meta wieħed ikun qed ifittex impjieg se jiġu offruti lill-ħaddiema li jipparteċipaw f'miżuri attivi. Il-benefiċċji huma kkalkulati fuq bażi ta' "għal kull ġurnata ta' attività" għal medja ta' parteċipazzjoni ta' sitt xhur. Huwa stmat li 300 ħaddiem fil-mira se jiġu offruti dawn il-benefiċċji.

- Il-benefiċċji għall-mobilità se jkopru l-ispejjeż tal-ivvjaġġar ta' kuljum u se jingħataw flimkien ma' benefiċċji oħra. Huwa stmat li 150 ħaddiem fil-mira se jiġu offruti dawn il-benefiċċji.

- Miżuri biex jistimulaw ħaddiema kbar fl-età. Dawn l-attivitajiet se jinkludu t-twaqqif ta' pjattaforma ta' kompetenza għall-ħaddiema kbar fl-età flimkien mal-Kunsill tal-Kontea u l-Università ta' Lund. Il-persuni interessati li jibdew negozju se jirċievu appoġġ f'dak li jirrigwarda taħriġ u kummerċjalizzazzjoni estensivi. Huwa stmat li 100 ħaddiem fil-mira se jipparteċipaw f'din l-azzjoni.

19.         In-nefqa għall-implimentazzjoni tal-FEG, li hija inkluża fl-applikazzjoni skont l-Artikolu 3 tar-Regolament (KE) Nru 1927/2006, tkopri l-miżuri ta' tħejjija, il-ġestjoni, it-tagħrif u l-pubbliċità u l-miżuri ta' kontroll. L-Isvezja għandha l-ħsieb li tipproduċi kartelluni u materjali ta' informazzjoni oħra u li torganizza konferenza ta' informazzjoni dwar l-attivitajiet.

20.         Is-servizzi personalizzati ppreżentati mill-awtoritajiet Svediżi huma miżuri attivi tas-suq tax-xogħol fi ħdan l-azzjonijiet eliġibbli definiti fl-Artikolu 3 tar-Regolament (KE) Nru 1927/2006. L-awtoritajiet Svediżi jistmaw li l-ispejjeż totali ta’ dawn is-servizzi huma ta’ EUR 6 396 600 u li n-nefqa għall-implimentazzjoni tal-FEG hija ta' EUR 258 560 (3,9 % tal-ammont totali). Il-kontribuzzjoni totali mitluba mill-FEG hija EUR 4 325 854 (65 % tal-ispejjeż totali).

Azzjonijiet || Għadd stmat ta’ ħaddiema fil-mira || Spiża stmata għal kull ħaddiem fil-mira (EUR) || Spejjeż totali (l-FEG u l-kofinanzjament nazzjonali) (EUR)

Servizzi personalizzati (l-ewwel paragrafu tal-Artikolu 3 tar-Regolament (KE) Nru 1927/2006)

Għajnuna għat-tfittix ta’ impjieg || 700 || 81 || 56 700

Pariri dwar ix-xogħol || 300 || 540 || 162 000

Taħriġ u taħriġ mill-ġdid || 350 || 9 000 || 3 150 000

Għajnuna għal dawk li jaħdmu għal rashom || 70 || 7 170 || 501 900

Benefiċċji għal meta wieħed ikun qed ifittex impjieg || 300 || 7 170 || 2 151 000

Benefiċċji għall-mobilità || 150 || 500 || 75 000

Miżuri biex jistimulaw ħaddiema kbar fl-età || 100 || 3 000 || 300 000

Subtotal tas-servizzi personalizzati || || 6 396 600

Nefqa għall-implimentazzjoni tal-FEG (it-tielet paragrafu tal-Artikolu 3 tar-Regolament (KE) Nru 1927/2006)

Attivitajiet ta' tħejjija || || 91 803

Ġestjoni || || 91 190

Tagħrif u pubbliċità || || 50 000

Attivitajiet ta’ kontroll || || 25 567

Subtotal tan-nefqa għall-implimentazzjoni tal-FEG || || 258 560

Total tal-ispejjeż stmati || || 6 655 160

Kontribuzzjoni tal-FEG (65 % tal-ispejjeż totali) || || 4 325 854

21.         L-Isvezja tikkonferma li l-miżuri deskritti hawn fuq huma kumplimentari għall-azzjonijiet iffinanzjati mill-Fondi Strutturali u li l-miżuri qegħdin hemm biex jipprevjenu l-finanzjament doppju.

Id-data/dati meta bdew jew meta huwa maħsub li jibdew is-servizzi personalizzati għall-ħaddiema affettwati

22.         L-Isvezja bdiet toffri s-servizzi personalizzati għall-ħaddiema affettwati inklużi fil-pakkett koordinat propost lill-FEG għall-kofinanzjament fis-26 ta' Ottubru 2010. Din id-data, għalhekk, tirrappreżenta l-bidu tal-perjodu ta' eliġibbiltà għal kwalunkwe għajnuna li tista' tingħata mill-FEG.

Il-proċeduri għall-konsultazzjoni mal-imsieħba soċjali

23.         Is-Servizz Pubbliku dwar l-Impjiegi (PES) Svediż għandu fil-pussess tiegħu t-tagħrif dwar is-sensji ppjanati, u għaldaqstant qed jinżamm kuntatt kontinwu mal-impjegatur, it-trejdjunjins u partijiet interessati oħrajn. L-organizzazzjoni 'Invest in Skåne' bdiet l-applikazzjoni u kienet involuta fil-preparazzjoni tal-proġett. Is-Servizz Pubbliku dwar l-Impjiegi f'Lund kellu kuntatti regolari ma' netwerk intraprenditorjali f'AtraZeneca. Tliet trejdjunjins ewlenin ipparteċipaw fid-diskussjonijiet dwar l-applikazzjoni. L-organizzazzjoni TRR għall-ġestjoni korporattiva u t-trejdjunjins se jipparteċipaw fil-grupp ta' tmexxija.

24.         L-awtoritajiet Svediżi kkonfermaw li kien hemm konformità mar-rekwiżiti stipulati fil-leġiżlazzjoni nazzjonali u tal-UE dwar is-sensji kollettivi.

It-tagħrif dwar azzjonijiet li huma obbligatorji skont il-liġi nazzjonali jew skont il-ftehimiet kollettivi

25.         Fir-rigward tal-kriterji li jinsabu fl-Artikolu 6 tar-Regolament (KE) Nru 1927/2006, l-awtoritajiet Svediżi fl-applikazzjoni tagħhom:

· ikkonfermaw li l-kontribuzzjoni finanzjarja mill-FEG ma tissostitwixxix miżuri li huma r-responsabbiltà ta' kumpaniji bis-saħħa tal-liġi nazzjonali jew ftehimiet kollettivi;

· urew bil-provi li l-azzjonijiet jipprovdu appoġġ għall-ħaddiema individwali u mhumiex se jintużaw għar-ristrutturar tal-kumpaniji jew ta' setturi;

· ikkonfermaw li l-azzjonijiet eliġibbli msemmija hawn fuq ma jirċevux assistenza minn strumenti finanzjarji oħra tal-UE.

Is-sistemi ta' ġestjoni u kontroll

26.         L-Isvezja infurmat lill-Kummissjoni li l-kontribuzzjoni finanzjarja se tiġi ġestita mis-Servizz Pubbliku għall-Impjiegi (PES) Svediż li nħatar bħala l-awtorità ta' ġestjoni u ħlas. Il-kontijiet tal-proġett se jiġu eżaminati mill-Unità tal-Verifika Interna li hija entità separata marbuta mal-Bord tas-Servizz Pubbliku għall-Impjiegi (PES).

Il-finanzjament

27.         Fuq il-bażi tal-applikazzjoni mill-Isvezja, il-kontribuzzjoni proposta mill-FEG għall-pakkett ikkoordinat ta' servizzi personalizzati (inkluża n-nefqa għall-implimentazzjoni tal-FEG) hija ta' EUR 4 325 854, li tirrappreżenta 65 % tal-ispiża totali. L-allokazzjoni proposta mill-Kummissjoni minn dan il-Fond hija bbażata fuq it-tagħrif li ngħata mill-Isvezja.

28.         B'kunsiderazzjoni tal-ammont massimu possibbli ta' kontribuzzjoni finanzjarja mill-FEG skont l-Artikolu 10(1) tar-Regolament (KE) Nru 1927/2006, kif ukoll tal-kamp ta' applikazzjoni tal-allokazzjoni mill-ġdid ta' approprjazzjonijiet, il-Kummissjoni tipproponi li timmobilizza l-FEG għall-ammont totali msemmi hawn fuq, li għandu jiġi allokat skont l-intestatura 1a tal-qafas finanzjarju.

29.         L-ammont propost ta' kontribuzzjoni finanzjarja jippermetti li aktar minn 25 % tal-ammont annwali massimu allokat għall-FEG jibqa' disponibbli biex ikun allokat matul l-aħħar erba' xhur tas-sena, kif stipulat fl-Artikolu 12(6) tar-Regolament (KE) Nru 1927/2006.

30.         Permezz tal-preżentazzjoni ta' din il-proposta sabiex timmobilizza l-FEG, il-Kummissjoni qiegħda tniedi l-proċedura ssimplifikata ta' trijalogu, kif mitlub mill-Punt 28 tal-Ftehim Interistituzzjonali tas-17 ta' Mejju 2006, sabiex tikseb il-qbil taż-żewġ fergħat tal-awtorità baġitarja dwar il-ħtieġa li jintuża l-FEG u l-ammont meħtieġ. Il-Kummissjoni tistieden lill-ewwel waħda miż-żewġ fergħat tal-awtorità baġitarja li tilħaq ftehim dwar l-abbozz tal-proposta għall-mobilizzazzjoni biex, f'livell politiku xieraq, tgħarraf lill-fergħa l-oħra u lill-Kummissjoni bl-intenzjonijiet tagħha. F'każ ta' nuqqas ta' qbil minn xi waħda miż-żewġ fergħat tal-awtorità baġitarja, għandha tissejjaħ laqgħa formali ta' trijalogu.

31.         B’mod separat, il-Kummissjoni tippreżenta talba ta' trasferiment sabiex fil-baġit għall-2012 iddaħħal approprjazzjonijiet speċifiċi għall-impenji, kif mitlub mill-Punt 28 tal-Ftehim Interistituzzjonali tas-17 ta' Mejju 2006.

Sors tal-approprjazzjonijiet għall-ħlas

32.         Se jintużaw approprjazzjonijiet mil-linja baġitarja tal-FEG biex ikopru l-ammont ta' EUR 4 325 854 meħtieġ għal din l-applikazzjoni.

Proposta għal

DEĊIŻJONI TAL-PARLAMENT EWROPEW U TAL-KUNSILL

dwar il-mobilizzazzjoni tal-Fond Ewropew ta' Aġġustament għall-Globalizzazzjoni, skont il-punt 28 tal-Ftehim Interistituzzjonali tas-17 ta' Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-ġestjoni finanzjarja soda (applikazzjoni EGF/2011/015/SE/AstraZeneca mill-Isvezja)

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea,

Wara li kkunsidraw il-Ftehim Interistituzzjonali tas-17 ta' Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-ġestjoni finanzjarja soda[6], u b'mod partikolari l-punt 28 tiegħu,

Wara li kkunsidraw ir-Regolament (KE) Nru 1927/2006 tal-Parlament Ewropew u tal-Kunsill tal-20 ta' Diċembru 2006 li jistabbilixxi l-Fond Ewropew ta' Aġġustament għall-Globalizzazzjoni[7], u b'mod partikulari l-Artikolu 12(3) tiegħu,

Wara li kkunsidraw il-proposta mill-Kummissjoni Ewropea[8],

Billi:

(1)       Il-Fond Ewropew ta’ Aġġustament għall-Globalizzazzjoni (FEG) twaqqaf biex jipprovdi appoġġ addizzjonali għall-ħaddiema li ngħataw is-sensja minħabba bidliet strutturali kbar fl-andament tal-kummerċ dinji minħabba l-globalizzazzjoni u sabiex jgħinhom fir-riintegrazzjoni tagħhom fis-suq tax-xogħol.

(2)       Il-kamp ta' applikazzjoni tal-FEG twessa’ għall-applikazzjonijiet imressqa mill-1 ta’ Mejju 2009 sat-30 ta' Diċembru 2011 biex jinkludi appoġġ għall-ħaddiema li jingħataw is-sensja bħala riżultat dirett tal-kriżi finanzjarja u ekonomika globali.

(3)       Il-Ftehim Interistituzzjonali tas-17 ta’ Mejju 2006 jippermetti l-mobilizzazzjoni tal-FEG fil-limitu massimu annwali ta’ EUR 500 miljun.

(4)       L-Isvezja ressqet applikazzjoni biex timmobilizza l-FEG, fir-rigward ta' sensji fl-intrapriża AstraZeneca, fit-23 ta' Diċembru 2011 u ssupplimentatha b'informazzjoni addizzjonali sas-16 ta' April 2012. Din l-applikazzjoni hija konformi mar-rekwiżiti għad-determinazzjoni tal-kontribuzzjonijiet finanzjarji kif stabbilit fl-Artikolu 10 tar-Regolament (KE) Nru 1927/2006. Il-Kummissjoni għalhekk tipproponi li timmobilizza l-ammont ta' EUR 4 325 854.

(5)       Il-FEG għandu, għalhekk, jiġi mobilizzat sabiex jipprovdi kontribuzzjoni finanzjarja għall-applikazzjoni mressqa mill-Isvezja.

ADOTTAW DIN ID-DEĊIŻJONI:

Artikolu 1

Għall-baġit ġenerali tal-Unjoni Ewropea għas-sena finanzjarja 2012, il-Fond Ewropew ta' Aġġustament għall-Globalizzazzjoni (FEG) għandu jiġi mmobilizzat biex jipprovdi s-somma ta' EUR 4 325 854 f'approprjazzjonijiet għall-impenji u għall-ħlas.

Artikolu 2

Din id-Deċiżjoni għandha tiġi ppubblikata f’Il-Ġurnal Uffiċjali tal-Unjoni Ewropea.

Magħmul fi Brussell,

Għall-Parlament Ewropew,                          Għall-Kunsill,

Il-President                                                    Il-President

[1]               ĠU C 139, 14.6.2006, p. 1.

[2]               ĠU L 406, 30.12.2006, p. 1.

[3]               B'konformità mat-tielet paragrafu tal-Artikolu 3 tar-Regolament (KE) Nru 1927/2006.

[4]               It-Tbassir Għall-Finanzjament Globali għar-Riċerka u Żvilupp tal-2011, www.rdmag.com

[5]               "Dynamics in the Pharma and Biotech Industry", Frost & Sullivan, 2010, www.frost.com

[6]               ĠU C 139, 14.6.2006, p. 1.

[7]               ĠU L 406, 30.12.2006, p. 1.

[8]               ĠU C […], […], p. […].