13.9.2012   

MT

Il-Ġurnal Uffiċjali tal-Unjoni Ewropea

C 277/61

—

fid-dawl tal-isfidi sostanzjali li jeżistu f’dan il-qasam, jilqa’ b’sodisfazzjon żieda ferm iżjed sostanzjali f’dan il-baġit filwaqt li jirrikonoxxi li ma jistax jintlaħaq ftehim dwar iċ-ċifra eżatta qabel ma jiġu konklużi l-ftehimiet dwar il-Qafas Finanzjarju Multiannwali;

—

jappoġġja l-approċċ il-ġdid ta’ “Proġetti Integrati”, madankollu jitlob li għandhom jitħeġġu l-aċċessibbiltà u l-involviment tal-partijiet interessati f’proġetti integrati; li l-ambjent marittimu, il-ħamrija u l-istorbju bħala prijorità għandhom jiżdiedu bħala oqsma rilevanti oħra ulterjuri tal-proġetti integrati; u li jiġu implimentati mekkaniżmi adatti ta’ koordinazzjoni ta’ LIFE ma’ fondi oħra tal-UE fil-Qafas Strateġiku Komuni u ma’ Oqfsa ta’ Azzjoni ta’ Prijorità għall-finanzjament ta’ Natura 2000;

—

huwa tal-fehma li t-tneħħija tal-VAT bħala nefqa eliġibbli tista’ twaqqaf ħafna applikanti potenzjali milli jiżviluppaw proposta. Ifakkar li f’fondi oħra tal-UE, il-VAT huwa aċċettat bħala spejjeż eliġibbli jekk il-benefiċjarji jistgħu jagħtu prova li l-VAT ma jistax jiġi rkuprat;

—

jirrakkomanda li l-ispejjeż tal-persunal jibqgħu eliġibbli, bil-kundizzjoni li tingħata prova bil-miktub li l-persunal inkwistjoni jkunu ssekondati formalment għall-attivitajiet tal-proġett, fuq bażi full time jew part time;

—

jipproponi li l-ogħla rata għandha tiġi estiża għal 85 % fil-każ ta’ reġjuni inqas żviluppati (kif definit fir-Regolamenti dwar il-Fondi Strutturali) u fir-reġjuni ultraperiferiċi;

—

jitlob li l-Programm LIFE għandu jkun miftuħ għall-Pajjiżi u Territorji Extra-Ewropej tal-UE li jkunu partijiet għad-“Definizzjoni tal-Assoċjazzjoni Barranija” (Deċiżjoni tal-Kunsill 2001/822/KE), li huma responsabbli għall-maġġoranza tal-bijodversità tal-UE.

Relatur

Is-Sinjura TWITCHEN (UK/NI), Membru tal-Kunsill tal-Kontea ta’ Essex

Dokument ta’ referenza

Proposta għal Regolament tal-Parlament Ewropew u tal-Kunsill dwar l-istabiliment ta’ Programm għall-Ambjent u l-Azzjoni Klimatika (LIFE)

COM(2011) 874 final – 2011/0428 COD

1.

itenni l-fehma tiegħu li l-Programm LIFE jirrappreżenta strument importanti li jikkontribwixxi għall-finanzjament ta’ politiki u proġetti ambjentali fil-livell lokali u reġjonali b’valur miżjud Ewropew, u għen biex jimmobilizza l-isforzi tal-awtoritajiet lokali u reġjonali. Ikkontribwixxa wkoll biex joħloq sħubijiet, u b’hekk isaħħaħ l-istrutturi tal-kooperazzjoni u ġie ffaċilitat l-iskambju tal-esperjenza u tal-informazzjoni fil-livell lokali u reġjonali;

2.

jilqa’ b’sodisfazzjon l-intenzjoni li LIFE jitkompla fi ħdan il-perjodu l-ġdid ta’ finanzjament. Huwa tal-fehma li dan jiżgura intervent iżjed effettiv, joħloq sinerġiji billi jikkoordina l-attivitajiet fil-livell tal-UE u dak nazzjonali, u jżid il-viżibbiltà tal-azzjonijiet ambjentali u tal-klima;

3.

jaqbel mal-Kummissjoni li l-azzjoni fil-qasam tal-ambjent u l-klima għandha tkun element integrali tal-biċċa l-kbira tal-politiki tal-UE. Izda, l-istrumenti prinċipali tal-UE għall-finanzjament ma jindirizzawx il-ħtiġijiet speċifiċi kollha fil-qasam tal-ambjent u l-klima. Għaldaqstant, jibqa’ l-bżonn ta’ Programm separat għall-Azzjoni fil-Qasam tal-Ambjent u l-Klima, li jibni fuq il-kisbiet tar-Regolament (KE) Nru 614/2007 dwar LIFE+ għall-perjodu 2007-2013. Għalhekk, jikkomplementa l-approċċ “standard” għall-kisba tal-għanijiet fil-qasam tal-ambjent u l-klima fi ħdan il-baġit tal-UE, permezz tal-finanzjament ta’ proġetti dwar l-ambjent u l-klima li mhumiex eliġibbli għall-finanzjament bnadi oħra;

4.

josserva li l-valutazzjoni tal-programm LIFE eżistenti enfasizzat li l-impatt tiegħu huwa limitat minħabba nuqqas ta’ enfasi strateġika. Għalhekk, il-programm ġdid ser jintroduċi approċċ flessibbli minn fuq għal isfel, u jistabbilixxi żewġ sottoprogrammi separati, li jkopru l-Azzjoni fil-qasam tal-Ambjent u l-Klima bi prijoritajiet identifikati biċ-ċar;

5.

għalhekk huwa importanti li l-flessibbiltà fil-programm tibqa’ garantita. Il-proċess ta’ prijoritizzazzjoni m’għandux iwassal għal limitazzjonijiet kbar u għal kriterji imperattivi. L-istess bħall-programm attwali, il-kejl ewlieni għandu jkun il-kwalità tal-proġetti proposti;

6.

huwa tal-fehma li r-Regolament LIFE għandu jagħmel referenza speċifika għall-bżonn li jkun hemm sinerġiji bejn l-elementi differenti, pereżempju li l-proġetti dwar il-klima ffinanzjati mill-Programm LIFE jkollhom effett pożittiv fuq il-bijodiversità, u li l-proġetti dwar l-ambjent iffinanzjati minn LIFE ikunu reżistenti għat-tibdil fil-klima. Fid-dawl tal-fatt li l-Kummissjoni indikat is-sinerġiji potenzjali bejn iż-żewġ sottoprogrammi,u sabiex il-proġetti jissodisfaw firxa sħiħa ta’ għanijiet, huwa importanti li jiġi żgurat li dan iseħħ;

7.

itenni t-talba tiegħu (1) li l-Programm LIFE jkompli jappoġġja proġetti dwar il-komunikazzjoni u l-informazzjoni, u jkun hemm iżjed enfasi fuq is-sensibilizzazzjoni, inkluża l-edukazzjoni fil-qasam tal-iżvilupp sostenibbli u l-promozzjoni ta’ proġetti li jinvolvu l-awtoritajiet lokali u reġjonali. F’dan il-kuntest, jilqa’ b’sodisfazzjon il-qasam prijoritarju propost ta’ governanza u informazzjoni f’kull wieħed miż-żewġ sottoprogrammi;

8.

jilqa’ b’sodisfazzjon il-proposta li, sabiex tiġi żgurata l-koerenza bejn iż-żewġ sottoprogrammi LIFE, ikunu fi ħdan il-qafas ta’ Programm Multiannwali ta’ Ħidma wieħed, b’sett wieħed ta’ regoli komuni ta’ implimentazzjoni u talba waħda għall-proposti; għandhom ukoll jiġu ttrattati flimkien fi ħdan l-uniku Kumitat LIFE. Il-Kumitat jinnota wkoll li ma għandux ikun hemm proċeduri u prijoritajiet differenti għal sottoprogrammi differenti;

9.

jilqa’ b’sodisfazzjon il-fatt li l-Kummissjoni Ewropea organizzat konsultazzjonijiet fuq livell wiesa’ hija u tiżviluppa din il-proposta u qieset il-bosta fehmiet tal-partijiet interessati u tal-KtR (2);

10.

jilqa’ b’sodisfazzjon l-enfasi li saret fl-Artikolu 3 tal-proposta biex jiġu definiti l-indikaturi għall-kejl tas-suċċess tal-Programm LIFE. Jirrakkomanda li jiżdiedu indikaturi li jkejlu u jippromovu l-governanza u l-komunikazzjoni tajba f’kull proġett fil-qafas tal-Programm LIFE. Il-KtR ħeġġeġ li l-Programm LIFE irawwem mezzi ta’ komunikazzjoni mmirati – u b’hekk iżjed effettivi – u attivitajiet għat-tisħiħ tal-kapaċità f’kull proġett fil-qafas tal-Programm LIFE;

11.

josserva li l-Artikolu 10 tal-proposta ma jindirizzax l-innovazzjoni fis-settur privat orjentata lejn ir-replikazzjoni tas-suq, peress li din il-kwistjoni ser tiġi koperta mill-inizjattiva Orizzont 2020. Dan jagħmila possibbli li l-Programm LIFE jiffoka fuq l-innovazzjoni ekoloġika min-naħa tal-awtoritajiet lokali u reġjonali, u li jinstabu soluzzjonijiet li ta’ spiss l-aħjar jiġu implimentati permezz tas-sħubijiet pubbliċi-privati. Għalhekk, il-KtR jilqa’ b’sodisfazzjon iċ-ċaqliqa lejn l-innovazzjoni fis-settur pubbliku u l-possibbiltà ta’ sħubijiet pubbliċi-privati;

12.

jilqa’ b’sodisfazzjon il-fatt li, kif mitlub mill-KtR (3), il-proposta fl-Artikolu 11 tippermetti attivitajiet rikorrenti, bil-kundizzjoni li l-proġetti jaħdmu abbażi ta’ proċeduri eżemplari li jistgħu jiġu applikati għal reġjuni oħrajn, u li jkunu soġġetti għal standards relatati mal-monitoraġġ tagħhom u l-komunikazzjoni tas-sejbiet lill-pubbliku;

13.

huwa tal-fehma li l-appoġġ permezz ta’ proġetti integrati għall-Oqfsa ta’ Azzjoni ta’ Prijorità għall-finanzjament ta’ Natura 2000 ser ikun element prinċipali fil-ġejjieni fil-kuntest tal-qasam prijoritarju tal-“bijodiversità” fil-programm LIFE. Il-KtR jitlob li, b’konformità mal-qafas istituzzjonali ta’ kull Stat Membru, l-awtoritajiet reġjonali jkunu inkarigati mill-iżvilupp tal-Oqfsa ta’ Azzjoni ta’ Prijorità, u jieħdu nota tal-inizjattivi reċenti mnedija mill-Kummissjoni Ewropea dwar il-finanzjament ta’ Natura 2000 (4);

14.

jilqa’ b’sodisfazzjon kbir il-fatt li l-appoġġ tal-programm LIFE għall-governanza ambjentali ssaħħaħ billi sar qasam prijoritarju fil-Proposta għal Regolament (Artikolu 12). Il-KtR huwa tal-fehma li dan isaħħaħ il-viżibbiltà ta’ proġetti potenzjali fil-qasam tal-governanza u li l-awtoritajiet lokali u reġjonali ser isiru benefiċjarji importanti ta’ dan il-qasam prijoritarju ġdid. Il-KtR ħeġġeġ li LIFE jikkontribwixxi għat-tisħiħ tal-kapaċitajiet amministrattivi tal-awtoritajiet lokali u reġjonali, u li jiffoka iżjed fuq is-sensibilizzazzjoni, inkluża l-edukazzjoni dwar l-iżvilupp sostenibbli u l-promozzjoni ta’ proġetti li jinvolvu l-awtoritajiet lokali u reġjonali u għandhom impatt sostanzjali fil-livell tal-UE (5);

15.

huwa tal-fehma li dan il-qasam prijoritarju għandu jippromovi l-iskambju tal-għarfien dwar l-implimentazzjoni u l-infurzar tal-liġi ambjentali tal-UE billi jappoġġja n-netwerks, it-taħriġ u l-proġetti dwar l-iskambju tal-aħjar prattiki, b’mod partikolari dawk tal-awtoritajiet lokali u reġjonali attivi fil-qasam, fil-livell Ewropew;

16.

jilqa’ b’sodisfazzjon il-ħolqien ta’ sottoprogramm ġdid dwar azzjoni fil-qasam tal-klima, li jista’ jaqdi rwol fil-promozzjoni ta’ azzjonijiet u investiment favur livell baxx ta’ emissjonijiet ta’ karbonju, effiċjenza fl-użu tar-riżorsi u reżistenti għat-tibdil fil-klima. Jilqa’ dan fid-dawl tal-impenji tal-UE fil-livell internazzjonali li tnaqqas il-gassijiet b’effett ta’ serra fil-qafas tal-Protokoll ta’ Kyoto u l-ftehim futur dwar il-klima dinjija li għandu jiġi nnegozjat sal-2015, u fil-qafas tal-għanijiet tal-UE marbuta mal-Pakkett dwar il-Klima u l-Enerġija, l-Istrateġija Ewropa 2020 u l-Pjan direzzjonali għal ekonomija kompetittiva b’livell baxx ta’ emissjonijiet tal-karbonju fl-2050 (6);

17.

iżda, josserva li l-baġit propost huwa pjuttost parti żgħira mill-Programm LIFE globali (25 %). Għalhekk LIFE – il-qasam tal-klima għandu potenzjal limitat ħafna biex inaqqas b’mod sostanzjali l-gassijiet b’effett ta’ serra. Għaldaqstant, għandu jaħdem biex jippromovi firxa wiesgħa ta’ benefiċċji ambjentali, bħal żoni naturali li huma essenzjali għall-iżgurar ta’ kwalità tajba tal-arja u li għandhom bijodiversità kbira (it-torbieri (peatlands) u l-foresti) jew il-ħolqien ta’ infrastruttura ekoloġika bħala approċċ integrat għaż-żamma tal-bijodiversità u biex jiġu kkontrollati l-impatti tat-tibdil fil-klima;

18.

jilqa’ b’sodisfazzjon il-fatt li l-Proġetti Integrati ser jiffukaw l-iżjed fuq il-mitigazzjoni tal-klima u fuq strateġiji ta’ adattament u pjani ta’ azzjoni;

19.

jilqa’ b’sodisfazzjon l-għanijiet imniżżla fil-qasam prijoritarju “governanza klimatika u informazzjoni” (Artikolu 16), u jara rwol ċar għall-KtR biex jippromovi s-sensibilizzazzjoni dwar kwistjonijiet ta’ klima;

20.

kif qal f’opinjoni preċedenti tiegħu (7), jilqa’ b’sodisfazzjon il-proposta li jiġu introdotti “Proġetti Integrati” fit-tul fuq skala territorjali wiesgħa (b’mod partikolari dik reġjonali, multireġjonali jew nazzjonali) bħala mezz biex jiġu indirizzati bosta kwistjonijiet differenti permezz ta’ relazzjoni strateġika u strutturata ma’ possibbiltajiet oħra ta’ finanzjament min-naħa tal-UE. Il-proġetti LIFE ikomplu jkollhom valur katalitiku importanti;

21.

huwa tal-fehma li l-Proġetti Integrati se jtejbu l-implementazzjoni tal-politika ambjentali u dik tal-klima u l-integrazzjoni tagħhom f’politiki oħrajn, permezz tal-applikazzjoni tal-prinċipju ta’ governanza f’diversi livelli, billi tiġi żgurata mobilizzazzjoni koordinata ta’ fondi oħra tal-UE, u dawk nazzjonali u privati lejn għanijiet ambjentali jew dawk relatati mal-klima. Ser jiffukaw fuq l-implimentazzjoni ta’ pjani u strateġiji fil-qasam tal-ambjent u l-klima fuq skala territorjali ikbar min-normal fil-każ ta’ LIFE+;

22.

jilqa’ b’sodisfazzjon il-fatt li l-lista tal-oqsma li huma l-iżjed rilevanti għall-Proġetti Integrati fl-Artikolu 18(d) tirrifletti bil-bosta rakkomandazzjonijiet preċedenti tal-KtR (ġestjoni tal-ilma, konservazzjoni tan-natura u l-bijodiversità, użu ta’ riżorsi sostenibbli u ġestjoni tal-iskart). Iżda, huwa tal-fehma li l-ambjent marittimu, il-ħamrija u l-istorbju għandhom jiżdiedu wkoll bħala oqsma rilevanti oħra;

23.

jesprimi t-tħassib tiegħu li jista’ jagħti l-każ li l-Proġetti Integrati jkunu kumplessi biex jitħejjew u jiġu ġestiti, b’mod partikolari fid-dawl tal-firxa tal-iskadenzi, il-kriterji tal-għażla, il-proċeduri marbuta mal-applikazzjonijiet, il-kundizzjonijiet għall-ġestjoni u l-arranġamenti għar-rappurtar. Dan ser ikun partikolarment diffiċli għall-awtoritajiet lokali ż-żgħar, u għalhekk jilqa’ b’sodisfazzjon l-għajnuna teknika prevista fil-proposta biex jitħejjew u jitressqu l-Proġetti Integrati;

24.

jitlob li jkun hemm mekkaniżmi adatti ta’ koordinazzjoni ta’ LIFE ma’ fondi oħra tal-UE fil-Qafas Strateġiku Komuni, b’mod partikolari fi ħdan il-kuntratti ta’ sħubija kif previst fl-Artikolu 14 tal-abbozz ta’ Regolament li jistabbilixxi dispożizzjonijiet ġenerali, kif ukoll mal-approċċ il-ġdid propost ta’ zvilupp lokali mmexxi mill-Komunità u strateġiji fil-qasam tal-iżvilupp lokali għall-fondi kollha tal-QSK kif previst fl-Artikoli 28 u 29 tal-abbozz ta’ Regolament li jistabbilixxi dispożizzjonijiet ġenerali;

25.

jistenna li din il-kategorija ġdida ta’ proġetti LIFE fuq skala kbira tinkludi l-qafas u l-gwida għall-iżvilupp ta’ proġetti individwali LIFE u proġetti oħra, inkluż pjan li jispjega kif finanzjament ieħor tal-UE, u dak nazzjonali, reġjonali, lokali u privat huwa kkombinat biex jiġu ffinanzjati l-attivitajiet proposti. F’ċerti każi, il-proġetti jistgħu jkunu itwal, biex ikunu jistgħu jiġu żviluppati u implimentati proġetti LIFE individwali li jkunu relatati ma’ xulxin;

26.

fl-istess ħin, jikkunsidra bħala siewja proġetti tradizzjonali żgħar li huma aċċessibbli għal awtoritajiet lokali żgħar li m’għandhomx daqstant possibbilitajiet li jiżviluppaw Proġett Integrat. Għaldaqstant, jilqa’ b’sodisfazzjon il-fatt li dawn xorta waħda jsibu posthom fil-programm il-ġdid u jitlob li l-baġits globali allokati għalihom ma jitnaqqsux;

27.

jirrikonoxxi l-bżonn ta’ bażi ġeografika approssimattiva, iżda huwa tal-fehma li dan il-bżonn ma għandux jitqies bħala xprun prinċipali li jista’ jwassal biex il-finanzjament ma jintefaqx fuq proġetti essenzjali sempliċement biex ikun hemm kwota nazzjonali nozzjonali xi mkien ieħor. Jilqa’ b’sodisfazzjon il-possibbiltà li jiġu inklużi pajjiżi ġirien f’dawn il-proġetti;

28.

huwa tal-fehma li għandu jitħeġġeġ iżjed is-sehem tal-partijiet interessati fi proġetti integrati;

29.

jirrikonoxxi li l-Kummissjoni Ewropea fittxet li twieġeb għat-talbiet li saru f’opinjoni preċedenti (8) għal żieda fis-semplifikazzjoni amministrattiva, inkluża programmazzjoni multiannwali u użu iżjed mifrux tal-għodda tal-IT. L-użu ta’ ħlasijiet b’rata fissa u ta’ somom f’daqqa jista’ jnaqqas il-burokrazija, u għalhekk nilqgħuh b’sodisfazzjon. Iżda, huwa mħasseb dwar il-fatt li l-impenn biex ikun hemm semplifikazzjoni huwa espress l-iżjed f’termini mill-iżjed wesgħin bħala aspirazzjoni fil-premessa 26;

30.

jilqa’ b’sodisfazzjon kbir l-introduzzjoni ta’ approċċ “f’żewġ fażijiet” għall-għażla tal-Proġetti Integrati, li permezz tiegħu l-applikanti potenzjali jkunu jistgħu jipprovdu nota lill-Kummissjoni dwar il-kunċett sabiex din tkun tista’ tagħti l-approvazzjoni tagħha minn qabel, li jfisser li jinħlew inqas riżorsi minn offerenti li ftit li xejn hemm ċans li jirnexxu. Dan jirrifletti wkoll rakkomandazzjoni tal-KtR (9);

31.

jilqa’ b’sodisfazzjon il-programmi multiannwali ta’ ħidma li jtawlu ta’ mill-inqas sentejn kif propost fl-Artikolu 24. Huwa tal-fehma li dawn il-programmi annwali ta’ ħidma jistgħu jiżguraw li l-Programm LIFE jirrifletti l-prijoritajiet tal-UE b’mod iżjed strateġiku u politiku. Il-KtR jitlob lill-Kummissjoni biex tinvolvi lill-awtoritajiet lokali u reġjonali fit-tfassil tal-programmi ta’ ħidma sabiex dawn ikunu jirriflettu sew il-prattika;

32.

iżda, huwa mħasseb dwar il-fatt li l-possibbiltà li ssir reviżjoni ta’ nofs it-term tal-programmi multiannwali kif previst fl-Artikoli 24(3) tista’ twassal għal sens ta’ imprevidibbiltà fil-konfront tal-benefiċjarji. Għalhekk, it-tibdil li jsir f’din ir-revizjoni għandu jkun mill-inqas possibbli;

33.

jirrikonoxxi li fil-programm attwali, il-prestazzjoni tal-punti ta’ kuntatt nazzjonali ma kinitx uniformi u, f’ċerti każi, kienet dgħajfa tant li ma sarx l-aqwa użu possibbli mill-allokazzjonijiet nazzjonali (f’opinjoni preċedenti, il-KtR talab taħriġ aħjar għall-punti ta’ kuntatt nazzjonali (10));

34.

jisħaq li l-proċedura tal-analiżi u l-Kumitat LIFE (Artikolu 29) għandhom joperaw b’mod trasparenti u inklużiv;

35.

josserva li l-abbozz ta’ Regolament jipprevedi atti delegati dwar l-indikaturi ta’ prestazzjoni li japplikaw għal prijoritajiet tematiċi speċifiċi (Artikolu 3), dwar l-applikazzjoni tal-kriterji “li jkunu ta’ interess Komunitarju” (Artikolu 19(1)) u dwar l-applikazzjoni ta’ kriterji għall-“applikazzjoni ta’ bilanċ ġeografiku” fil-każ tal-proġetti integrati (Artikolu 19(3)). Il-KtR ħa pożizzjoni kritika dwar iż-żieda fl-użu tal-komitoloġija fil-politika ambjentali, peress li hija nieqsa mit-trasparenza fil-proċess tal-UE għat-teħid tad-deċiżjonijiet u fil-proċess operattiv għall-awtoritajiet lokali u reġjonali (11). Għalhekk, jirrakkomanda li l-Kummissjoni Ewropea tagħmel konsultazzjonijiet adatti mal-awtoritajiet lokali u reġjonali matul il-ħidma preparatorja tagħha fil-qafas tal-atti delegati;

36.

jirrikonoxxi li l-Kummissjoni Ewropea wieġbet it-talbiet li saru f’opinjoni preċedenti (12) biex ir-rata massima ta’ kofinanzjament togħla minn massimu ta’ 50 %, kif inhi attwalment, għal massimu ta’ 70 % (u sa massimu ta’ 80 % għal proġetti integrati u preparatorji);

37.

jipproponi li l-ogħla rata tiġi estiża għal 85 % fil-każ ta’ reġjuni inqas żviluppati (kif definit fir-Regolamenti dwar il-Fondi Strutturali (13)) u r-reġjuni ultraperiferiċi. Dawn ir-reġjuni ta’ spiss huma vitali biex jintlaħaq l-għan li jitwaqqaf it-telf tal-bijodiversità;

38.

jiddispjaċih li l-Kummissjoni Ewropea ma weġbitx għat-talbiet li sarulha f’opinjoni preċedenti (14) li l-awtoritajiet lokali u reġjonali għandhom ikomplu jqisu l-ispejjeż relatati mal-persunal permanenti bħala riżorsi proprji. L-esklużjoni tal-ispejjeż relatati mal-persunal permanenti jkollha impatt negattiv fundamentali fuq il-kwalità u l-fattibbiltà tal-proġetti, b’mod partikolari ta’ gvernijiet iżgħar u organizzazzjonijiet mhux governattivi, li jiddependu mill-kontinwità tal-persunal permanenti u l-għarfien espert tagħhom, u li l-membri tal-persunal tagħhom ta’ spiss jaħdmu fuq bażi part-time f’għadd ta’ proġetti fl-istess ħin;

39.

huwa tal-fehma li dan, flimkien mat-tneħħija tal-VAT bħala nfiq eliġibbli, kif propost fl-Artikolu 20, probabbli jwaqqaf bosta kandidati potenzjali milli jiżviluppaw proposta. Ifakkar li f’fondi oħra tal-UE, il-VAT huwa aċċettat bħala spejjeż eliġibbli jekk il-benefiċjarji jistgħu jagħtu prova li l-VAT ma jistax jiġi rkuprat;

40.

iżda, jiġbed l-attenzjoni għas-sejbiet ta’ studju li jidher li qed jixhdu li l-effett tar-rati estremament ogħla ta’ finanzjament proposti mill-Kummissjoni ser jikkumpensaw għat-tneħħija ta’ xi wħud mill-elementi tal-fondi eliġibbli għall-biċċa l-kbira tal-proġetti. Barra minn hekk, huwa konxju mill-fatt li l-kwistjoni tal-ħin ta’ ħidma tal-persunal hija l-kaġun ta’ ħafna argumenti bejn l-awdituri tal-Kummissjioni u l-benefiċjarji u twassal għall-irkuprar ta’ somom kbar min-naħa tal-Kummissjoni, xi drabi żmien twil wara li l-proġett jintemm;

41.

madankollu, jirrakkomanda li l-ispejjeż tal-persunal jibqgħu eliġibbli, bil-kundizzjoni li tingħata prova bil-miktub li l-persunal inkwistjoni jkunu ssekondati formalment għall-attivitajiet tal-proġett;

42.

josserva ż-żieda proposta fil-baġit għall-programm LIFE minn EUR 2 100 miljun għal EUR 3 600 miljun li, għalkemm hija żieda sostanzjali għall-Programm, għadha komparattivament modesta peress li tirrappreżenta 0,3 % biss tal-baġit kumplessiv tal-UE;

43.

iżda, fid-dawl tal-isfidi sostanzjali li jeżistu f’dan il-qasam, il-KtR jilqa’ b’sodisfazzjon żieda ferm iżjed sostanzjali f’dan il-baġit. Jirrikonoxxi li ma jistax jintlaħaq ftehim dwar iċ-ċifra eżatta qabel ma jiġu konklużi l-ftehimiet dwar il-Qafas Finanzjarju Multiannwali;

44.

għalkemm nilqgħu b’sodisfazzjon koerenza u komplementarjetà ma’ tipi oħra ta’ finanzjament, il-finanzjament tal-programm LIFE ma għandux ikollu impatt fuq dawn il-fondi (pereżempju, il-fondi strutturali);

45.

jilqa’ b’sodisfazzjon il-fatt li 50 % tas-sottoprogramm Ambjent għandu jkun iddedikat għall-bijodiversità: dan jissodisfa talba li saret mill-KtR (15);

46.

jilqa’ b’sodisfazzjon id-dispożizzjoni ġdida fl-Artikolu 17 li l-programm LIFE jista’ jkun ikkombinat ma’ strumenti finanzjarji innovattivi. Huwa tal-fehma li dan huwa ta’ rilevanza partikolari għall-qasam prijoritarju Ambjent u Effiċjenza fl-Użu tar-Riżorsi. Itenni li dawn l-istrumenti għandhom jintużaw biss flimkien mal-għotjiet ta’ azzjoni (action grants) u mhux minflokhom;

47.

jafferma mill-ġdid li l-politika ambjentali hija qasam fejn il-kompetenzi jinqasmu bejn l-Unjoni Ewropea u l-Istati Membri. Għaldaqstant, japplika l-prinċipju tas-sussidjarjetà. Huwa tal-fehma, madankollu, li peress li l-Proposta għal Regolament hija essenzjalment tkomplija tal-programm LIFE, li ilu jeżisti sa mill-1992, ma hemmx bżonn ta’ valutazzjoni dettaljata tal-konformità tiegħu mal-prinċipju tas-sussidjarjetà u l-proporzjonalità. Is-sussidjarjetà u l-proporzjonalità huma affermati mill-ġdid fil-premessa 34 tal-abbozz ta’ Regolament;

48.

Madankollu: