This document is an excerpt from the EUR-Lex website
Document 52011DC0424
COMMUNICATION FROM THE COMMISSION TO THE EUROPEAN PARLIAMENT, THE COUNCIL, THE EUROPEAN ECONOMIC AND SOCIAL COMMITTEE AND THE COMMITTEE OF THE REGIONS on External Dimension of the Common Fisheries Policy
KOMUNIKAZZJONI MILL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT SOĊJALI U EKONOMIKU EWROPEW U LILL-KUMITAT TAR-REĠJUNI dwar id-Dimensjoni Esterna tal-Politika Komuni tas-Sajd
KOMUNIKAZZJONI MILL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT SOĊJALI U EKONOMIKU EWROPEW U LILL-KUMITAT TAR-REĠJUNI dwar id-Dimensjoni Esterna tal-Politika Komuni tas-Sajd
/* KUMM/2011/0424 finali */
KOMUNIKAZZJONI MILL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT SOĊJALI U EKONOMIKU EWROPEW U LILL-KUMITAT TAR-REĠJUNI dwar id-Dimensjoni Esterna tal-Politika Komuni tas-Sajd /* KUMM/2011/0424 finali */
WERREJ 1........... Introduzzjoni................................................................................................................... 5 2........... Il-kontribut lejn sostenibbiltà
fit-tul mad-dinja kollha........................................................ 5 2.1........ Trasformazzjoni tad-djalogi
tagħna f’sħubijiet ta' ħidma.................................................... 5 2.2........ Żamma u tisħiħ
tal-arkitettura globali għall-governanza tas-sajd........................................ 7 2.3........ Kontribut lejn tħaddim aktar
effettiv tal-RFMOs.............................................................. 8 3........... Lejn Ftehimiet dwar is-Sajd
Sostenibbli......................................................................... 10 3.1........ Ftehimiet ta' Sħubija dwar
is-Sajd attwali u n-nuqqasijiet tagħhom.................................. 10 3.2........ Promozzjoni aħjar
tar-riżorsi ta' konservazzjoni u tas-sostenibbiltà fit-tul......................... 11 3.3........ Rinfurzar tal-governanza ta’
ftehimiet bilaterali tas-sajd................................................... 12 3.4........ Aktar appoġġ effettiv
għas-sajd sostenibbli fil-pajjiżi msieħba......................................... 13 4........... Koerenza ma’ politiki oħrajn
tal-UE.............................................................................. 14 ANNESS I................................................................................................................................. 16 ANNESS II............................................................................................................................... 17 SOMMARJU EŻEKUTTIV Skont l-aktar valutazzjoni riċenti
magħmula mill-Organizzazzjoni tan-Nazzjonijiet Uniti
għall-Alimentazzjoni u l-Agrikoltura[1] kważi
85 % tal-istokkijiet tal-ħut fid-dinja li għalihom hemm
informazzjoni disponibbli huma rrapurtati bħala sfruttati għalkollox
jew sfruttati żżejjed. L-UE trid taħdem bis-sħiħ biex
treġġa’ lura din is-sitwazzjoni permezz ta’ inizjattivi malajr u ta'
kuraġġ. L-UE hija waħda mill-ftit partijiet ewlenin
bi preżenza qawwija fl-oċeani tad-dinja kollha permezz tal-flotot u
l-investimenti tagħha, tal-ftehimiet bilaterali ma' pajjiżi terzi u
l-parteċipazzjoni f’Organizzazzjonijiet Reġjonali tal-Ġestjoni
tas-Sajd (RFMOs) ta' rilevanza kbira. L-UE hija wkoll suq ewlieni
għall-prodotti tas-sajd f’termini ta’ konsum u importazzjonijiet. L-UE tikkonsma 11 %
tar-riżorsi tas-sajd fid-dinja f’termini ta’ volum u timporta 24 %
tal-prodotti tas-sajd f’termini ta' valur. Dan ipoġġi responsabbiltà
kbira fuq l-UE sabiex timpenja ruħha aktar fil-ħidmiet ta’ konservazzjoni
u ġestjoni sostenibbli tal-istokkijiet internazzjonali tal-ħut. Il-kontribut lejn sostenibbiltà fit-tul
mad-dinja kollha Biex tiżgura l-ġestjoni sostenibbli u
l-konservazzjoni tar-riżorsi tas-sajd u ttejjeb il-prestazzjoni tal-RFMOs,
l-UE għandha tfittex li: ·
Tmexxi ’l quddiem l-aġenda globali u
multilaterali li tippromwovi s-sajd sostenibbli mad-dinja kollha filwaqt li
twassal id-djalogi tagħha għal sħubijiet ta’ ħidma biex
tindirizza kwistjonijiet kruċjali bħall-qerda tas-sajd illegali, mhux
irrappurtat u mhux irregolat (IUU) jew it-tnaqqis tal-kapaċità żejda. ·
Tkun fuq quddiem fil-proċess
tat-tisħiħ tal-prestazzjoni tal-RFMOs biex ikunu f'pożizzjoni
aħjar biex jikkonservaw u jimmaniġġjaw ir-riżorsi
ħajjin tal-baħar taħt il-mira tagħhom permezz ta': –
L-għoti ta’ dejta aktar affidabbli u x-xjenza
biex isostnu t-teħid ta’ deċiżjonijiet; –
Żieda fil-konformità u fil-kontroll; –
Tnaqqis tal-kapaċità għal livelli
proporzjonati mar-riżorsi; –
Tħaddim aktar effettiv tal-RFMOs permezz ta’
teħid ta’ deċiżjonijiet aħjar; –
Introduzzjoni ta’ tariffi
għall-aċċess għall-ibħra miftuħa mill-membri
tal-RFMO. ·
Tintegra aħjar is-sajd, l-iżvilupp,
l-ambjent, il-kummerċ u politiki oħra għal aktar avvanz
fl-għanijiet ta' governanza sostenibbli u responsabbli. Ftehimiet bilaterali tas-sajd Ftehimiet internazzjonali bejn l-UE u pajjiżi
terzi individwali għandhom jibqgħu l-qafas għall-attivitajiet
tas-sajd tal-flotta tal-UE fl-ilmijiet ta' pajjiżi terzi. Sabiex
tippromwovi l-konservazzjoni fit-tul tar-riżorsi, il-governanza tajba ta'
relazzjonijiet bilaterali tas-sajd, u l-iżvilupp sostenibbli fis-settur
tas-sajd tal-pajjiżi msieħba, fil-ftehimiet tas-sajd futuri l-UE
għandha: ·
Tibbaża l-ftehimiet fuq l-aqwa parir
xjentifiku disponibbli u l-informazzjoni dwar l-isforz kumulattiv tas-sajd
fl-ilmijiet ikkonċernati; ·
Twettaq verifiki xjentifiċi dwar ftehimiet ta’
speċijiet diversi (“imħallta"); ·
Tqis ir-rispett tad-drittijiet tal-bniedem
bħala kundizzjoni essenzjali għall-konklużjoni u
ż-żamma ta' ftehimiet tas-sajd; ·
Timxi lejn kontribuzzjoni akbar tas-sidien tal-vapuri
għall-ispiża tad-drittijiet tal-aċċess; ·
Tiżgura li l-ftehimiet tas-sajd
jappoġġaw governanza aħjar tas-settur tas-sajd fil-pajjiż
imsieħeb, b’mod notevoli f’termini ta’ sorveljanza, spezzjoni u
kapaċità amministrattiva kif ukoll dik xjentifika; ·
Tiżgura ġestjoni finanzjarja soda u
effiċjenti tal-fondi ta’ appoġġ settorjali skont il-ftehimiet, u
tipprevedi sospensjoni tal-pagamenti jekk ma jinkisbux riżultati. Xi wħud minn dawn l-elementi għandhom
diġà jkunu integrati fi ftehimiet tranżitorji nnegozjati qabel
l-adozzjoni tar-riforma tal-PKS. Ladarba r-riforma tidħol
fis-seħħ, in-negozjati kollha se jirriflettu orjentazzjonijiet
ġodda. Fit-tmiem tal-proċess, se jkun hemm fis-seħħ
ġenerazzjoni ġdida ta' Ftehimiet Dwar is-Sajd Sostenibbli (SFAs –
Sustainable Fisheries Agreements).
1.
Introduzzjoni
Din il-Komunikazzjoni tippreżenta
orjentazzjonijiet ġodda għad-dimensjoni esterna tal-Politika Komuni
tas-Sajd (PKS)[2] wara r-riforma u hija
bbażata fuq għadd kbir ta' konsultazzjonijiet u valutazzjonijiet
imwettqa mis-servizzi tal-Kummissjoni fil-kuntest tar-riforma. Ir-riforma
tal-PKS għandha l-għan li tiżgura l-isfruttar sostenibbli
tar-riżorsi ħajjin tal-baħar waqt li taħdem lejn
prestazzjoni ekonomika soda, tkabbir inklussiv u koeżjoni mtejba
fir-reġjuni kostali. L-orjentazzjonijiet ġodda għad-dimensjoni
esterna tal-PKS wara r-riforma jimmiraw lejn il-projezzjoni ta' dawn
il-prinċipji fuq livell internazzjonali u li jikkontribwixxu għal
governanza aktar responsabbli tas-sajd internazzjonali filwaqt li jwasslu għal
sfruttar sostenibbli tal-istokkijiet tal-ħut fuq livell globali billi
jinkisbu livelli ta’ mortalità kompatibbli mar-Rendiment Massimu Sostenibbli
(MSY[3]
– Maximum Sustainable Yield) sal-2015, filwaqt li jnaqqsu l-impatt
tal-attivitajiet tas-sajd fuq l-ekosistema tal-baħar. Fl-aħħar
mill-aħħar, dan ifisser futur vijabbli kemm għas-sajjieda
Ewropej kif ukoll dawk tal-pajjiżi terzi. Dawn l-orjentazzjonijiet se joffru wkoll
sinerġiji akbar mal-Politika Marittima Integrata (IMP) tal-UE, li se
tippermetti lill-UE tieħu approċċ orjentat aktar lejn
l-ekosistema għall-ġestjoni tas-sajd kif ukoll tindirizza
l-kwistjonijiet globali tal-impatt fuq l-istokkijiet internazzjonali
tal-ħut, bħat-tibdil fil-klima u t-tniġġis.
2.
Kontribut lejn sostenibbiltà fit-tul mad-dinja kollha
2.1.
Trasformazzjoni tad-djalogi tagħna
f’sħubijiet ta' ħidma
L-UE hija impenjata fi djalogi bilaterali
mal-imsieħba internazzjonali ewlenin tagħha, bħall-Istati Uniti
tal-Amerika, il-Kanada, il-Ġappun, l-Awstralja, in-New Zealand kif ukoll
ir-Russja u ċ-Ċina. L-għan ta' dawn it-tipi ta' djalogu huwa
l-iżgurar tas-sostenibbiltà tas-sajd globali, il-ħolqien ta’ alleanzi
dwar kwistjonijiet ta' governanza tas-sajd u s-soluzzjoni ta’ problemi fuq
bażi bilaterali. Tradizzjonalment hemm relazzjonijiet sodi
mal-ġirien tat-Tramuntana tal-UE, b'mod partikolari n-Norveġja, skont
l-hekk imsejħa Arranġamenti tat-Tramuntana. Dawn l-arranġamenti
jipprovdu għal ġestjoni kondiviża tar-riżorsi fl-ilmijiet
tat-Tramunatana tal-Atlantiku, l-Artiku, il-Baltiku u l-Baħar tat-Tramuntana.
Iktar riċenti, fl-2009 daħal fis-seħħ ftehim bilaterali
bejn l-UE u r-Russja għall-ġestjoni konġunta tal-Baħar
Baltiku. Fir-rigward tal-istokkijiet li jpassu ħafna u transżonali
(inklużi l-kavalli u l-istokkafixx) fil-Grigal tal-Atlantiku, l-UE
tikkoopera mal-istess ġirien tat-Tramuntana fil-forums tal-Istati Kostali.
Il-Kummissjoni se tqis l-aqwa strateġiji għat-tisħiħ ta’
din il-kooperazzjoni sabiex tqis l-iżviluppi fi proċessi
reġjonali li ser tfittex li timmaniġġja r-riżorsi fuq
il-livell tal-baċir tal-baħar. Fl-istess ħin, ir-relazzjoni tal-UE
mal-pajjiżi tal-viċinat għada ggwidata mill-prinċipji
tal-Politika Ewropea tal-Viċinat (PEV) li permezz tagħha l-UE toffri
relazzjoni privileġġata lill-ġirien tagħha filwaqt li tibni
fuq impenn reċiproku lejn valuri komuni (id-demokrazija u d-drittijiet
tal-bniedem, ir-regola tal-liġi, governanza tajba, prinċipji
tal-ekonomija tas-suq u l-iżvilupp sostenibbli).
Il-PEV hija wkoll mod adattat ħafna biex titwassal il-Politika
Marittima Integrata tal-UE lill-pajjiżi msieħba ġirien tal-PEV,
filwaqt li tinkoraġġixxi l-parteċipanti fil-Baħar Baltiku,
il-Mediterran u l-Baħar l-Iswed biex jibnu u jsaħħu
mekkaniżi għal skambju bejn il-pari li għalih l-UE tista'
tipprovdi kemm l-inizjattiva kif ukoll appoġġ. Intemmu s-sajd illegali Sabiex il-problemi prinċipali tas-sajd illum
jiġu indirizzati b’mod effettiv bħall-ġlieda kontra s-sajd
illegali, mhux irregolat u mhux irrappurtat (IUU) u t-tnaqqis tal-kapaċità
żejda, l-UE għandha bżonn li tiżgura l-appoġġ
minn partijiet globali oħrajn. Il-Kummissjoni tipproponi li, sal-aħħar
tal-2013, jiġu varati diskussjonijiet ma’ Stati oħra ewlenin
tal-importazzjoni tas-sajd, b’mod partikolari l-Istati Uniti tal-Amerika u
l-Ġappun[4], biex timplimenta
approċċ komuni biex jiġi evitat dħul ta' prodotti IUU
f'dawn is-swieq. Inizjattiva bħal din tista’ titwettaq skont ir-Regolament
IUU tal-UE[5] u twitti t-triq lejn
il-qerda tas-sajd IUU matul l-għaxar snin li ġejjin, speċjalment
jekk jingħaqdu partijiet kbar oħrajn. Il-Kummissjoni tkun miftuħa
fil-futur qarib biex timplimenta mekkaniżmi konġunti
għall-iskambju tal-informazzjoni u l-armonizzazzjoni ta'
approċċi lejn il-parteċipanti fl-IUU (Stati tal-bandiera jew
flotot) mal-imsieħba tagħha. AZZJONI · Sħubija ta’ ħidma ma' kontrapartijiet ewlenin bl-għan li jiġi żviluppat approċċ komuni kontra s-sajd IUU. Kapaċità żejda – kwistjoni globali Fil-qafas tal-kisba ta’ livelli tal-mortalità
mis-sajd li huma kompatibbli ma' MSY sa mhux aktar tard mill-2015,
il-Kummissjoni biħsiebha tvara inizjattiva politika ta' livell għoli
biex jiġu diskussi modi għal tnaqqis fil-kapaċità fuq livell
globali sal-2013. Inizjattiva bħal din għandha tqis
l-aspirazzjonijiet tal-Istati li qegħdin jiżviluppaw u għandha
tkun konsistenti mar-riforma tal-PKS li se tipproponi ġestjoni
bbażata fuq id-drittijiet tas-sajd bħala waħda
mill-mekkaniżmi ewlenin biex jinkiseb it-tnaqqis fil-kapaċità. AZZJONI · L-UE se ssejjaħ konferenza ta' livell għoli li tiddiskuti modi ta’ tnaqqis tal-kapaċità sal-2013 biex twitti t-triq għal proċess immirat lejn l-indirizzar tal-kapaċità żejda fuq il-livell globali.
2.2.
Żamma u tisħiħ
tal-arkitettura globali għall-governanza tas-sajd
Fuq livell globali, l-UE tipparteċipa
fil-ħidma tan-Nazzjonijiet Uniti, bħala Parti għall-Konvenzjoni
tan-Nazzjonijiet Uniti għal-Liġi tal-Baħar[6]
kif ukoll bħala Parti għall-Ftehim tan-Nazzjonijiet Uniti dwar
l-Istokkijiet tal-Ħut[7] . L-UE hija wkoll Membru
attiv tal-Organizzazzjoni tan-Nazzjonijiet Uniti għall-Alimentazzjoni u
l-Agrikoltura (FAO) u tipparteċipa fil-ħidma tal-Organizzazzjoni
għall-Kooperazzjoni u l-Iżvilupp Ekonomiċi (OECD). Dawn huma organizzazzjonijiet ewlenin biex
javvanzaw id-diskussjonijiet dwar il-protezzjoni u l-konservazzjoni
tar-riżorsi ħajjin tal-baħar. Ladarba kienu ntlaħqu
ftehimiet f'dawn il-forums (eż. dwar il-protezzjoni ta’ Ekosistemi
tal-Baħar Vulnerabbli fin-NU), dawn l-istrumenti ġew implimentati
b’suċċess fuq livell aktar operattiv permezz tal-adozzjoni ta'
miżuri konkreti ta' konservazzjoni minn Organizzazzjonijiet Reġjonali
tal-Ġestjoni tas-Sajd (RFMOs). Għalhekk, l-involviment tal-UE f'dawn
l-ispazji għandhom ikunu ffokati u mtejba, fuq dawn il-linji: –
Tkompli tippromwovi inizjattivi li
jikkonċentraw fuq ir-rwol tal-Istati tal-port u tal-Istati tal-bandiera
fil-ġlieda kontra l-attivitajiet IUU fil-qafas tal-FAO, bħall-Ftehim
tal-Istat tal-Port tal-2009 jew konsultazzjonijiet tekniċi dwar
il-prestazzjoni tal-Istat tal-bandiera; –
Tkompli tippromwovi t-tqajjim ta’ kwistjonijiet
kbar ta’ tħassib, bħall-kapaċità żejda, il-ħut
skartat, il-qbid inċidentali jew l-impatt ta’ ċertu rkaptu tas-sajd
fuq l-ekosistemi tal-baħar, fuq il-livell tan-NU; –
Tippromwovi l-istabbiliment ta' kundizzjonijiet
ekwi għal bastimenti li jistadu f'ilmijiet ta’ RFMO jew ta’ pajjiżi
terzi, biex tiġi evitata "tellieqa sal-qiegħ" fejn qafas
aktar laxk fil-ġestjoni jista’ jiġi abbużat għad-detriment
tar-riżorsi. Tali azzjoni tkun implimentata mingħajr preġudizzju
għar-responsabbiltà primarja tal-Istati tal-bandiera għal imġiba
responsabbli tal-bastimenti tagħhom. AZZJONIJIET Il-Kummissjoni se tipproponi lill-Kunsill: · It-tkomplija tat-tressiq ta’ proposti ambizzjużi għar-Riżoluzzjoni tal-Assemblea Ġenerali annwali tan-NU dwar is-sajd sostenibbli; · It-tisħiħ tal-appoġġ għall-iżvilupp ta' strumenti internazzjonali għall-konservazzjoni u l-ġestjoni tal-istokkijiet tal-ħut fil-kuntest tal-FAO; · Il-varar ta’ inizjattiva fuq il-livell tan-NU għal Skema ta' Ċertifikazzjoni Globali biex jinqered is-sajd IUU; · Il-promozzjoni tal-ħarsien ta’ standards għolja ta’ sostenibbiltà minn partijiet terzi fl-ilmijiet tal-ibħra miftuħa u ta’ pajjiżi terzi.
2.3.
Kontribut lejn tħaddim aktar effettiv
tal-RFMOs
L-RFMOs huma forums ewlenin
għall-konservazzjoni u l-ġestjoni tal-istokkijiet tal-ħut
kondiviżi u li jpassu ħafna. Skont l-UNCLOS kif ukoll il-Ftehim dwar
l-Istokkijiet tal-Ħut tan-NU, l-UE impenjat ruħha biex
tipparteċipa fil-ħidmiet ta’ RFMOs varji, sakemm ikollha interess
reali[8] fis-sajd taħt
il-ġestjoni ta’ dawn l-Organizzazzjonijiet bħala nazzjon tas-sajd jew
Stat tas-suq. Ir-rwol tal-UE f’dawn il-forums kiber b’mod sinifikanti
mill-1999, meta ġiet ippubblikata l-aħħar "Komunikazzjoni
dwar il-parteċipazzjoni tal-Komunità fl-Organizzazzjonijiet Reġjonali
tas-Sajd (RFOs)"[9] [Traduzzjoni mhux
uffiċjali]. Madankollu, minkejja l-isforzi tal-RFMOs li jimmaniġġjaw
b’mod sostenibbli r-riżorsi taħt il-kompetenza tagħhom,
l-istokkijiet tal-ħut baqgħu jonqsu. Skont l-aktar stima riċenti
magħmula mill-FAO[10] kważi 85 %
tal-istokkijiet tal-ħut fid-dinja li dwarhom hemm informazzjoni
disponibbli huma rrapurtati bħala sfruttati b’mod sħiħ jew
sfruttati żżejjed. Din it-tendenza ġiet esperjenzata għal
bosta għexur ta’ snin u tirrifletti żieda fl-isfruttar
tal-istokkijiet tal-ħut, partikolarment minħabba żieda
fid-domanda tal-konsumatur għall-prodotti tas-sajd. Fuq żmien qasir sa medju, l-UE għandha
tindirizza l-isforzi tagħha biex issolvi d-diffikultajiet ewlenin li qed
ifixklu lill-RFMOs fit-twettiq tal-mandati tagħhom, billi tindirizza
l-azzjonijiet skont il-linji ta' politika li ġejjin: ·
It-tħaddim tal-RFMOs għandu jittejjeb
permezz ta’ analiżi tal-prestazzjoni mwettqa sistematikament, skont
ir-riżoluzzjonijiet tan-NU x-xierqa; ·
Għandhom ikunu disponibbli aktar dejta
xjentifika u pariri affidabbli għall-RFMOs permezz taż-żieda
fl-investiment mill-UE fil-ġbir tad-dejta, fir-riċerka applikata,
fl-għarfien xjentifiku u fl-attivitajiet xjentifiċi tal-RFMOs filwaqt
li tinkoraġġixxi Membri oħrajn tal-RFMOs biex jagħmlu
l-istess. L-UE għandha tippromovi wkoll ambitu usa’ ta' pariri
xjentifiċi, l-aktar permezz tal-implimentazzjoni ta' approċċi
ta’ prekwazjoni u ekosistemiċi u tikkumplimentahom bl-għodda ta'
analiżi soċjoekonomika; ·
Biex tiġi rrimedjata s-sitwazzjoni attwali ta’
konformità fqira ta’ xi Membri mal-miżuri ta’ konservazzjoni u
ġestjoni tal-RFMOs, l-UE għandha tippromwovi dan li ġej: –
Reviżjoni perjodika tar-rekords ta’ konformità
ta' kull Parti individwali fl-RFMOs rispettivi; –
L-identifikazzjoni ta' raġunijiet
għan-nuqqas ta' konformità (eż. in-nuqqas tal-kapaċità
f’pajjiżi li qed jiżviluppaw) u l-indirizzar tagħhom b’mod
xieraq u ffukat; –
L-iżvilupp u l-implimentazzjoni ta’
sanzjonijiet trasparenti u mhux diskriminatorji f' każi ċari ta'
nuqqas ta' konformità jew impenn politiku mill-Partijiet. Dan il-proċess
jista’ jkun akkumpanjat minn inċentivi li jippremjaw il-partijiet
"konformi" u "trasparenti" (l-Istati tal-bandiera jew
il-flotot). ·
Il-kapaċità żejda hija kwistjoni li
għandha tiġi indirizzata kemm fuq livell multilaterali (l-UE tvara
inizjattiva flimkien mal-imsieħba prinċipali tagħha) kif ukoll
fuq livell ta’ RFMO. L-UE għandha ssostni l-indirizzar tal-kapaċità
żejda permezz ta' reviżjoni tal-aqwa parir xjentifiku disponibbli fuq
livelli sostenibbli tal-qabdiet u l-kunsiderazzjoni tal-miżuri li
jindirizzaw din il-kapaċità żejda. Tali miżuri jistgħu
jinkludu l-iffriżar jew it-tnaqqis tal-kapaċità filwaqt li jitqiesu
l-aspirazzjonijiet tal-Istati li qed jiżviluppaw biex jiżviluppaw
is-settur tas-sajd tagħhom stess. ·
L-adozzjoni tad-deċiżjonijiet dwar
miżuri ta’ ġestjoni permezz ta' kunsens hija l-aħjar garanzija
għall-ogħla livell ta’ konformità. Madankollu, l-UE għandha
ssostni r-riforma tas-sistemi tat-teħid tad-deċiżjoni fl-RFMOs,
b’mod partikolari biex tipperfmetti l-votazzjoni, fejn ikun meħtieġ,
f’konformità mal-proċedura l-aktar progressiva u effiċjenti adottata
riċentement fl-RFMO tal-Konvenzjoni tan-Nofsinhar tal-Paċifiku[11].
·
Sabiex tissaħħaħ il-bażi
finanzjarja tal-RFMOs u jitħeġġeġ aktar l-użu
responsabbli tar-riżorsi mill-flotot, l-UE għandha tippromwovi
l-kunċett li operaturi li l-bastimenti tagħhom itajru l-bandiera ta'
Membru ta’ RFMO iħallsu tariffa lill-RFMOs għall-aċċess
għal sajd fl-ibħra miftuħa. Reġim maħsub tajjeb ta’
ħlas għall-aċċess żviluppat f’konformità
sħiħa ma’ UNCLOS iservi bħala fattur addizzjonali lejn
il-prevenzjoni tat-"traġedja tar-riżorsi komuni"[12].
AZZJONIJIET Il-Kummissjoni se tipproponi lill-Kunsill: · L-inkoraġġiment ta' reviżjoni tal-prestazzjoni tal-RFMOs, bl-għan li l-Organizzazzjonijiet kollha jlestu l-ewwel reviżjonijiet sa tmiem l-2013 u sussegwentement jagħmluhom f 'intervalli regolari (3 sa 5 snin); · Il-promozzjoni tal-kunċett ta reġim ta’ ħlas għall-aċċess permezz tal-introduzzjoni ta’ tariffi għat-tqegħid tal-bastimenti f’listi tal-bastimenti awtorizzati tal-RFMO f’għadd limitat ta RFMOs; · Il-promozzjoni ta' azzjonijiet deskritti f'dan il-Kapitolu b’mod koerenti u strutturat, biex jippermettu li dawn l-organizzazzjonijiet jipproduċu riżultati effettivi skont il-mandat tagħhom. Dan jiżgura livell regolat u sostenibbli ta' attivitajiet tas-sajd (abbażi tal-MSY) fuq l-istokkijiet taħt il-kompetenza tal-RFMO u l-ħarsien tal-bijodiversità tal-baħar.
3.
Lejn Ftehimiet dwar is-Sajd Sostenibbli
3.1.
Ftehimiet ta' Sħubija dwar is-Sajd
attwali u n-nuqqasijiet tagħhom
Il-Ftehimiet bilaterali dwar is-sajd bejn l-UE u
pajjiżi terzi ilhom għal żmien twil fattur tal-Politika Komuni
tas-Sajd. Ir-riforma tal-2002 tal-PKS introduċiet bidliet importanti
għall-ftehimiet bilaterali billi poġġiet enfażi fuq
l-approċċ tas-sħubija u l-iżvilupp tas-sajd sostenibbli
fil-pajjiżi msieħba. Ftehimiet ta’ Sħubija dwar is-Sajd (FPAs)
attwali għandhom l-għan li jippermettu lill-bastimenti tal-UE li
jistadu, f’ambjent regolat u sikur legalment, riżorsi żejda[13]
fiż-żoni ekonomiċi esklussivi (ŻEE) ta' għadd ta'
pajjiżi terzi[14]. L-FPAs għandhom l-għan li jappoġġaw
l-iżvilupp ta' settur tas-sajd sostenibbli fil-pajjiżi msieħba.
Permezz ta’ dan, dawn għandhom tendenza li jkollhom impatt ekonomiku u
soċjali pożittiv. B’mod partikolari, huma jikkontribwixxu pożittivament
biex l-ekonomiji lokali permezz tal-għoti ta' mpjieg lill-baħrin,
il-ħatt l-art u l-industriji tal-ipproċessar tal-ħut filwaqt li
jikkontribwixxu wkoll għall-provvista tal-ikel fil-pajjiżi
msieħba. Minkejja t-titjib varju li sar, it-tħaddim
tal-FPAs għadu affettwat minn nuqqasijiet sostanzjali, kif ġie
enfasizzat dan l-aħħar mill-konsultazzjoni dwar il-Green Paper
tal-2009[15]: ·
L-għarfien xjentifiku dwar ċerti
stokkijiet f’ilmijiet barranin huwa insuffiċjenti biex jiġi stabbilit
id-daqs globali tal-istokk żejjed; ·
It-termini u l-kundizzjonijiet tal-ftehimiet
tas-sajd konklużi minn pajjiżi msieħba ma' pajjiżi
oħra (mhux fl-UE) mhumiex normalment magħrufa lill-UE; ·
Konsegwentement ħafna drabi huwa impossibbli
li ssir valutazzjoni tal-isforz ġenerali tas-sajd immirat lejn
l-istokkijiet, u biex jiġi stabbilit is-sehem ta’ stokk żejjed li
jista’ tistad għalih il-flotta tal-UE; ·
Hemm limiti fuq il-kapaċità ta’ assorbiment
ta’ bosta pajjiżi msieħba meta jasal il-waqt biex effettivament
jintużaw il-fondi tal-FPA allokati għall-appoġġ tas-settur. Il-Kummissjoni tqis li l-FPAs attwali
għandhom jiġu ttrasformati fi Ftehimiet dwar is-Sajd Sostenibbli
(SFAs) li jiffukaw fuq il-konservazzjoni tar-riżorsi u s-sostenibbiltà
ambjentali, governanza mtejba u l-effettività tal-appoġġ settorjali.
3.2.
Promozzjoni aħjar tar-riżorsi ta'
konservazzjoni u tas-sostenibbiltà fit-tul
L-SFAs għandhom dejjem ikunu bbażati fuq
l-aqwa parir disponibbli bl-użu tal-kunċett tar-rendiment massimu
sostenibbli (MSY) bħala referenza. Il-Kummissjoni se tvara verifiki xjentifiċi
sabiex tevalwa l-ftehimiet eżistenti għal diversi speċijiet li
jikkonsistu f’reviżjonijiet minn pari indipendenti tad-dejta xjentifika
disponibbli. Abbażi ta' dawn, u f'konformità mal-approċċ
ekosistemiku, se tiddeċiedi jekk hux meħtieġ li jkun hemm
iffukar mill-ġdid ta' dawn il-ftehimiet fuq speċijiet fejn il-livell
tal-għarfien xjentifiku huwa suffiċjenti u l-isforz totali tas-sajd
huwa magħruf[16]. Fejn jidħlu
l-ftehimiet dwar it-tonn, id-dejta xjentifika mogħtija mill-RFMOs
rilevanti se tintuża b'mod aktar rigoruż. Għandu jkun hemm
konformità sħiħa mill-Istati Membri mad-dispożizzjonijiet dwar
ir-rappurtar tal-qbid. Il-Kummissjoni se tittratta allegazzjonijiet ta' nuqqas
ta' konformità malajr u b’mod ġust. Il-Kummissjoni se tagħmel li tista’ biex
l-SFAs jinkludu klawżola ta’ trasparenza, li biha l-isforz kumulattiv
tas-sajd f’pajjiż imsieħeb partikolari jkun magħruf lill-UE. AZZJONIJIET Il-Kummissjoni se: · tvara b’mod sistematiku verifiki xjentifiċi biex tivvaluta l-istokkijiet qabel ma tinnegozja protokolli ġodda għal ftehimiet għal diversi speċijiet; · tiżgura l-konformità tal-Istati Membri mar-regoli dwar ir-rappurtar tal-qbid li japplikaw fl-ilmijiet tal-pajjiżi msieħba, inkluż permezz tal-użu sħiħ ta’ strumenti legali eżistenti bħar-Regolament IUU; · issaħħaħ it-trasparenza tal-isforzi tas-sajd globali fl-ilmijiet tal-pajjiżi terzi permezz ta’ klawżoli speċifiċi fi ftehimiet u l-kuntatti bilaterali ma' pajjiżi terzi oħra.
3.3.
Rinfurzar tal-governanza ta’ ftehimiet
bilaterali tas-sajd
Hemm bżonn li jkun hemm riforma tal-FPAs attwali
biex ikun provdut qafas żviluppat b’mod sħiħ ta’ governanza
għall-attivitajiet tas-sajd tal-bastimenti tal-UE f’ilmijiet ta’
pajjiżi terzi. L-implimentazzjoni tal-ftehimiet trid tkun simplifikata,
dawn iridu jipprovdu mezzi aħjar ta' reazzjoni għall-ksur
tad-drittijiet tal-bniedem u l-kontribuzzjonijiet pubbliċi
għall-kostijiet tal-aċċess iridu jonqsu. L-implimentazzjoni tal-SFAs u l-konformità
magħhom iridu jkun aktar faċli. Għal dan il-għan l-SFAs
għandhom ikunu bbażati fuq "ftehimiet mudelli", u għandhom
jiġu introdotti klawżoli standard. Fir-rigward
tal-awtorizzazzjonijiet tas-sajd maħruġa u mmaniġġjati
skont il-ftehimiet, il-proċess amministrattiv għandu jsir aktar
faċli. Fl-2012 il-Kummissjoni se tagħmel proposta
għar-reviżjoni tar-Regolament dwar l-Awtorizzazzjonijiet tas-Sajd[17].
Għandha tiddaħħal klawżola
tad-drittijiet tal-bniedem fil-ftehimiet kollha futuri, kif hu diġà
l-każ mal-protokolli li ġew inizjalati riċentement, biex b’hekk
il-ksur ta' elementi essenzjali u fundamentali tad-drittijiet tal-bniedem u ta’
prinċipji demokratiċi jirriżulta, fl-aħħar
mill-aħħar, f'sospensjoni tal-protokoll għall-ftehim. Din
il-klawżola għandha ssegwi l-eżempju tad-dispożizzjonijiet
stabbiliti mill-Ftehim ta’ Cotonou[18], fejn applikabbli, jew
strumenti u ftehimiet internazzjonali oħra rilevanti. Il-klawżola ta' esklussività fl-FPAs attwali
ma tippermettix li bastimenti tal-UE jistadu barra mill-qafas regolatorju
tal-ftehim, fejn jeżisti ftehim, u tiggarantixxi li l-bastimenti kollha
tal-UE jkunu suġġetti għall-istess regoli. Biex tiġi
evitata l-evażjoni tal-klawżola tal-esklussività permezz tal-bdil
tal-bandiera, ftehimiet tas-sajd fil-futur għandhom jipprevedu li
bastiment tal-UE li jbiddel il-bandiera biex jaħrab l-obbligi tiegħu
jew biex jikseb opportunitajiet tas-sajd addizzjonali mhux se jkollu l-permess
jistad aktar fiż-ŻEE tal-pajjiż imsieħeb. L-industrija tas-sajd tal-UE għandha tħallas
sehem ġust mill-kosti tal-aċċess għar-riżorsi
żejda tal-pajjiżi terzi. Il-kontribut mill-baġit tal-UE
għandu jitnaqqas kif xieraq. AZZJONIJIET Il-Kummissjoni se: · tagħmel proposta sal-2012 biex tirrevedi r-Regolament dwar l-Awtorizzazzjonijiet tas-Sajd biex tissimplifika l-ġestjoni tal-awtorizzazzjonijiet tas-sajd; · tfittex li tistabbilixxi r-rispett tad-drittijiet tal-bniedem bħala kundizzjoni meħtieġa għall-konklużjoni ta’ SFAs għaż-żamma tal-kooperazzjoni dwar is-sajd ma' pajjiżi terzi; · tfittex li tintroduċi dispożizzjonijiet fil-ftehimiet bilaterali għall-prevenzjoni tal-abbuż tal-bdil tal-bandiera; · timmira li żżid il-kontribuzzjoni tas-sidien tal-bastimenti għall-kosti tal-aċċess għall-ilmijiet ta' pajjiżi terzi.
3.4.
Aktar appoġġ effettiv
għas-sajd sostenibbli fil-pajjiżi msieħba
L-appoġġ finanzjarju tal-UE
lill-politika settorjali tal-pajjiżi terzi għandu jirriżulta
f’benefiċċji konkreti u li jistgħu jiġu kkwantifikati
għall-pajjiżi msieħba inkluż fid-dominju tas-sajd lokali
sostenibbli. Għandu jimmira sabiex jappoġġa l-kapaċità
amministrattiva u xjentifika tagħhom u jkun indirizzat b’mod notevoli lejn
l-attivitajiet ta' monitoraġġ, kontroll u sorveljanza, inkluża
l-ġlieda kontra s-sajd IUU. It-titjib tal-pariri xjentifiċi u l-bini
tal-kapaċità għandhom ikunu prijorità ukoll
għall-appoġġ tal-UE lill-pajjiżi msieħba skont l-SFAs.
Fl-istess ħin, l-appoġġ settorjali
għandu jsir aktar effettiv, immirat aħjar u vvalutat regolarment.
Għandha tiġi mfittxija garanzija ta’ riżultati mill-pajjiżi
msieħba u l-kundizzjonalità għandha tissaħħaħ biex ma
jsir ebda pagament meta l-kundizzjonalità ma tirnexxix. Il-Kummissjoni se
tiżviluppa linji gwida ġenerali għall-monitoraġġ
tal-fondi ta’ appoġġ settorjali skont il-ftehimiet tas-sajd kollha li
wara jistgħu jiġu adattati għal ftehimiet speċifiċi. Il-Kummissjoni se tfittex ukoll li tkabbar
il-valur miżjud tal-appoġġ settorjali għall-iżvilupp
sostenibbli tas-settur tas-sajd tal-pajjiżi msieħba b’kunsiderazzjoni
aħjar tal-istrateġiji u l-prijoritajiet ġenerali ddefiniti
f'kull wieħed minnhom. AZZJONIJIET Il-Kummissjoni se: · tipproponi d-diżakkoppjar fil-każijiet kollha tal-pagamenti tal-appoġġ settorjali mill-pagamenti tad-drittijiet tal-aċċess għas-sajd u se tiddefinixxi l-appoġġ settorjali fid-dawl tal-ħtiġijiet u tal-kapaċità ta' assorbiment tal-pajjiżi msieħba; · tfittex li tintroduċi kundizzjonalità aktar b’saħħitha għall-parti settorjali, biex il-pagamenti jkunu marbuta mal-progress miksub fl-implimentazzjoni tal-appoġġ settorjali; · tappoġġa l-isforzi tal-pajjiżi msieħba biex itejbu l-ġbir tad-dejta u l-għoti ta' pariri xjentifiċi preċiżi.
4.
Koerenza ma’ politiki oħrajn tal-UE
Sabiex jintlaħqu l-għanijiet imsemmija
f’din il-Komunikazzjoni, jeħtieġ li l-vuċi tal-UE tkun aktar
qawwija f’diversi forums globali permezz ta’ sinerġiji akbar bejn
l-azzjonijiet tagħha u l-politiki fil-qasam tal-governanza internazzjonali
tas-sajd u l-oqsma tal-iżvilupp, il-kummerċ, l-ambjent,
ir-riċerka u l-innovazzjoni, il-politika barranija u oħrajn. Dan se
jsir inter alia fuq dawn il-linji: –
Il-koordinazzjoni tal-politiki tas-sajd u
tal-iżvilupp għandha tiżgura li r-rikonoxximent
tal-aspirazzjonijiet tal-Istati li qed jiżviluppaw biex jibnu s-settur
tas-sajd tagħhom stess huwa marbut mat-tqajjim tal-kuxjenza tad-dmirijiet
tagħhom lejn governanza tas-sajd sostenibbli. –
L-insegwiment ta' sinerġiji bejn il-ftehimiet
tas-sajd futuri u l-politiki u l-istrumenti ta’ żvilupp, b’mod partikolari
il-Fond Ewropew għall-Iżvilupp (EDF) u politiki oħra bħalma
huma l-politika tar-riċerka u l-innovazzjoni. –
Fil-kuntest tal-azzjoni esterna tal-Unjoni Ewropea,
l-UE se tkompli tappoġġa strateġiji u programmi ta'
appoġġ relatati mas-sajd, bħas-sikurezza marittima u
l-ġlieda kontra l-piraterija, skont l-istrateġiji ġenerali
tagħha ta' sħubija u kooperazzjoni. –
L-UE, bħala importatur ewlieni ta' prodotti
tas-sajd, diġà twaqqaf lill-prodotti IUU milli jilħqu s-suq
tagħha. Il-politika tal-kummerċ tal-UE tista’ wkoll tikkontribwixxi
għall-iżgurar ta' sajd sostenibbli madwar id-dinja permezz
tal-promozzjoni tal-aderenza ma’ konvenzjonijiet u ftehimiet internazzjonali
rilevanti rigward il-governanza tas-sajd fil-qafas tal-ftehimiet kummerċjali
preferenzjali. –
Il-koerenza tal-għanijiet ambjentali u
tas-sajd se tkun żgurata permezz tal-integrazzjoni kontinwa ta' politiki
żviluppati minn korpi u konvenzjonijiet internazzjonali ambjentali
fid-deċiżjonijiet ta’ konservazzjoni u ġestjoni tal-RFMOs. AZZJONIJIET Il-Kummissjoni se: · tiżviluppa u timplimenta strateġiji reġjonali bbażati fuq l-oċeani u l-baħar għal sajd sostenibbli, eż. fl-Oċean Paċifiku u dak Indjan kif ukoll fil-Baħar Mediterran. · sa tmiem l-2011, tadotta proposta għal qafas legali, inklużi miżuri marbutin mal-kummerċ, biex tiżgura s-sostenibbiltà tar-riżorsi tas-sajd. ANNESS I Organizazzjonijiet Reġjonali
għall-Ġestjoni tas-Sajd ANNESS II Ftehimiet Bilaterali tas-Sajd Tip ta' ftehim || pajjiż ImsieħEb || Protokoll fis-seħħ saL- || Kontribuzzjoni finanzjarja annwali tal-UE Ftehimiet dwar diversi speċijiet ("imħallta") || Il-Groenlandja || 31 ta' Diċembru 2012 || 14 307 244 € Il-Ginea Bissaw || 15 ta' Ġunju 2011 || 7 500 000 € Il-Mawritanja || 31 ta' Lulju 2012 || Minn EUR 86 000 000 (fl-ewwel sena) sa EUR 70 000 000 (fir-raba’ sena) Il-Marokk || 27 ta' Frar 2012 || 36 100 000 € Ftehimiet dwar it-tonn – Il-Punent tal-Afrikat || Il-Kap Verde || 31 ta' Awwissu 2011 || 385 000 € Il-Gabon || 2 ta’ Diċembru 2011 || 860 000 € Il-Côte d'Ivoire || 30 ta' Ġunju 2013 || 595 000 € São Tomé u Príncipe || Tmiem l-2013 || 682 500 € Ftehimiet dwar it-Tonn - l-Oċean Indjan || Il-Komoros || 31 ta' Diċembru 2013 || 615 250 € Il-Madagaskar || 31 ta' Diċembru 2012 || 1 197 000 € Il-Możambik || 31 ta' Diċembru 2011 || 900 000 € Is-Seychelles || 17 ta' Jannar 2014 || 5 600 000 € Ftehimiet dwar it-tonn – il-Paċifiku || Kiribati || 15 ta' Settembru 2012 || 478 400 € Il-Mikroneżja || 25 ta' Frar 2010 (Protokoll ġdid b’tul ta’ 5 snin fil-proċess ta’ ratifikazzjoni) || 559 000 € Il-Gżejjer Solomon || 8 ta' Ottubru 2012 || 400 000 € Ftehimiet inattivi || || || Il-Gambja || Ebda Protokoll fis-seħħ || Il-Ginea || Ebda Protokoll fis-seħħ || Il-Ginea Ekwatorjali || Ebda Protokoll fis-seħħ || il-Mawrizju || Ebda Protokoll fis-seħħ || Is-Senegal || Ebda Protokoll fis-seħħ || [1] Il-Qagħda tas-Sajd u l-Akkwakultura fid-Dinja fl-2010,
FAO, Ruma 2010, p. 35. Aktar minn nofs (53 %) tal-istokkijiet
tal-baħar immonitorjati mill-FAO kienu stmati bħala sfruttati
bis-sħiħ, 28 % bħala sfruttati żżejjed, 3 %
bħala fi stat ta’ eżawriment u 1 % bħala li qed jirkupraw
minn tnaqqis komplet 3 % tal-istokkijiet ġew stmati bħala mhux
sfruttati biżżejjed u 12 % bħala sfruttat b’mod moderat. [2] L-orjentazzjonijiet għad-dimensjoni esterna
tal-Politika Marittima Integrata ġiet stipulata fil-Komunikazzjoni
mill-Kummissjoni lill-Parlament Ewropew, lill-Kunsill, lill-Kumitat Ekonomiku u
Soċjali Ewropew u lill-Kumitat tar-Reġjuni – Niżviluppaw
id-dimensjoni internazzjonali tal-Politika Marittima Integrata
għall-Unjoni Ewropea (COM(2009)0536 finali) [3] MSY hija l-akbar
rendiment (jew qabda) li jista’jittieħed mill-istokk ta’ speċi matul
perjodu indefinit. Il-kunċett
tal-MSY huwa fundamentali għall-idea ta’ ħsad sostenibbli u jimmira
lejn iż-żamma tad-daqs tal-popolazzjoni fil-punt massimu tar-rata
tat-tkabbir billi jsir il-ħsad ta’ individwi li normalment jiġu
miżjuda mal-popolazzjoni, u b’hekk il-popolazzjoni tkun tista’ tkompli
tkun produttiva b’mod indefinit [4] Dawn
il-pajjiżi flimkien mal-UE jirrappreżentaw żewġ terzi
tas-suq dinji fil-prodotti tas-sajd,
ara Il-Qagħda tas-Sajd u l-Akkwakultura fid-Dinja fl-2010 FAO,
Ruma 2010 [5] Ir-Regolament
tal-Kunsill (KE) Nru 1005/2008 tad-29 ta’ Settembru 2008 li
jistabbilixxi sistema Komunitarja sabiex tipprevjeni, tiskoraġġixxi u
telimina sajd illegali, mhux irrappurtat u mhux irregolat, li jemenda
r-Regolament (KEE) Nru 2847/93, (KE) Nru 1936/2001 u (KE)
Nru 601/2004 u jħassar ir-Regolamenti (KE) Nru 1093/94 u (KE)
Nru 1447/1999. [6] UNCLOS,
1982, magħrufa ukoll bħala l-Konvenzjoni tal-Bajja ta’ Montego. [7] Il-Ftehim
li jimplimenta d-dispożizzjonijiet tal-UNCLOS dwar il-konservazzjoni u
l-ġestjoni ta’ stokkijiet transżonali u stokkijiet ta’ ħut li
jpassi ħafna, UNFSA, 1995, magħruf ukoll bħala il-Ftehim ta’ New
York. [8] "Interess
reali" jista’ joħroġ mill-attivitajiet tas-sajd fl-ibħra
miftuħa kemm jekk huwa Stat kostali b’ŻEE inkluża f’żona
ta’ kompetenza ta’ RFMO, kif ukoll jekk huwa importatur sinifikanti
tal-prodotti tas-sajd li jinqabdu fiż-żona taħt il-ġestjoni
ta’ RFMO. [9] COM(1999)
613 finali, 08.12.1999 [10] Il-Qagħda
tas-Sajd u l-Akkwakultura fid-Dinja fl-2010, FAO, Ruma 2010, p. 35. Aktar minn nofs (53 %) tal-istokkijiet
tal-baħar immonitorjati mill-FAO kienu stmati bħala sfruttati
għalkollox, 28 % bħala sfruttati żżejjed, 3 %
bħala fi stat ta’ eżawriment u 1 % bħala li qed jirkupraw
minn tnaqqis komplet, 3 % tal-istokkijiet ġew stmati bħala mhux
sfruttati biżżejjed u 12 % bħala sfruttat b’mod moderat. Mill-istokkijiet
ta' tonn u stokkijiet li jixbħu t-tonn fejn huwa magħruf l-istat ta’
sfruttar, possibbilment sa 60 % tal-istokkijiet huma sfruttati għalkollox,
sa 35 % tal-istokkijiet huma kklassifikati bħala sfruttati
żżejjed jew fi stat ta’ eżawriment, bi ftit jidhru li qed
jiġu sfruttati inqas milli suppost (prinċipalment il-palamit). [11] Il-Konvenzjoni
dwar il-Konservazzjoni u l-Ġestjoni ta’ Riżorsi tas-Sajd f’Ibħra
Miftuħa fin-Nofsinhar tal-Oċean Paċifiku, l-Artikoli 16 u
17. [12] It-traġedja
tar-riżorsi komuni hija dilemma li toħroġ mis-sitwazzjoni li
fiha individwi multipli, li jaġixxu indipendentment u li jikkonsultaw
l-interess tagħhom stess b'mod razzjonali, fl-aħħar nett se jeżawrixxu
risorża limitata kondiviża, anke fejn huwa ċar li dan mhu
fl-interess ta' ħadd fuq żmien twil. [13] Is-sehem
tal-qabda permessa li l-Istat Kostali ma jistax jew ma jixtieqx jisfrutta hu
stess; ara l-Artikolu 62(2)
tal-Konvenzjoni tan-Nazzjonijiet Uniti dwar il-Liġi tal-Baħar. [14] Ara
l-Anness 2 għal ħarsa ġenerali attwali tal-UE rigward
ftehimiet bilaterali tas-sajd u l-karatteristiċi ewlenin tagħhom. Biex isiru kompletament operattivi,
il-ftehimiet bilaterali tas-sajd għandhom ikunu akkumpanjati minn
Protokoll li jiddetermina l-ispeċifiċitajiet tal-opportunitajiet
tas-sajd u l-kontribuzzjoni finanzjarja. Ftehimiet mingħajr Protokoll
fis-seħħ jew fil-proċess ta’ ratifika huma magħrufa
bħala "inattivi”. [15] Sinteżi
tal-Konsultazzjoni dwar ir-Riforma tal-Politika Komuni tas-Sajd,
SEC(2010)428 finali, 16.4.2010. [16] L-FPAs
attwali jistgħu jinqasmu fi (a) dawk li jkopru esklussivament it-tonn u
speċijiet li jpassu ħafna relatati (ftehimiet dwar it-tonn), u (b)
dawk li jkopru wkoll speċijiet oħra (magħrufa wkoll bħala
ftehimiet imħallta). Minħabba
l-kopertura tagħhom minn RFMOs, l-informazzjoni xjentifika dwar
l-istokkijiet tat-tonn hija ġeneralment aħjar minn dik dwar
speċijiet oħra. [17] Regolament
tal-Kunsill (KE) Nru 1006/2008 tad-29 ta' Settembru 2008
dwar l-awtorizzazzjonijiet għall-attivitajiet tas-sajd tal-bastimenti
tas-sajd tal-Komunità barra mill-ilmijiet tal-Komunità u l-aċċess ta'
bastimenti ta' pajjiżi terzi għall-ilmijiet tal-Komunità, li jemenda
r-Regolamenti (KEE) Nru 2847/93 u (KE) Nru 1627/94 u li jħassar
ir-Regolament (KE) Nru 3317/94. [18] Il-Ftehim ta'
Cotonou huwa l-aktar ftehim komprensiv ta’ sħubija bejn il-pajjiżi li
qed jiżviluppaw u l-UE. Mill-2000,
kien il-qafas għar-relazzjonijiet tal-UE ma' 79 pajjiż
mill-Afrika, il-Karibew u l-Paċifiku (AKP).