This document is an excerpt from the EUR-Lex website
Document 52010XX0225(01)
Opinion of the European Data Protection Supervisor on the Communication from the Commission on an Action Plan for the Deployment of Intelligent Transport Systems in Europe and the accompanying proposal for a Directive of the European Parliament and of the Council laying down the framework for the deployment of Intelligent Transport Systems in the field of road transport and for interfaces with other transport modes
Opinjoni tal-Kontrollur Ewropew għall-Protezzjoni tad-Data dwar il-Komunikazzjoni mill-Kummissjoni dwar Pjan ta' Azzjoni biex jiġi varat l-użu ta' Sistemi Intelliġenti tat-Trasport fl-Ewropa u l-Proposta li takkumpanjaha għal Direttiva tal-Parlament Ewropew u tal-Kunsill li tistabbilixxi l-qafas biex jiġi varat l-użu ta' Sistemi Intelliġenti tat-Trasport fil-qasam tat-trasport bit-triq u għall-interfaċċji ma' modi oħra ta' trasport
Opinjoni tal-Kontrollur Ewropew għall-Protezzjoni tad-Data dwar il-Komunikazzjoni mill-Kummissjoni dwar Pjan ta' Azzjoni biex jiġi varat l-użu ta' Sistemi Intelliġenti tat-Trasport fl-Ewropa u l-Proposta li takkumpanjaha għal Direttiva tal-Parlament Ewropew u tal-Kunsill li tistabbilixxi l-qafas biex jiġi varat l-użu ta' Sistemi Intelliġenti tat-Trasport fil-qasam tat-trasport bit-triq u għall-interfaċċji ma' modi oħra ta' trasport
ĠU C 47, 25.2.2010, p. 6–15
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
25.2.2010 |
MT |
Il-Ġurnal Uffiċjali tal-Unjoni Ewropea |
C 47/6 |
Opinjoni tal-Kontrollur Ewropew għall-Protezzjoni tad-Data dwar il-Komunikazzjoni mill-Kummissjoni dwar Pjan ta' Azzjoni biex jiġi varat l-użu ta' Sistemi Intelliġenti tat-Trasport fl-Ewropa u l-Proposta li takkumpanjaha għal Direttiva tal-Parlament Ewropew u tal-Kunsill li tistabbilixxi l-qafas biex jiġi varat l-użu ta' Sistemi Intelliġenti tat-Trasport fil-qasam tat-trasport bit-triq u għall-interfaċċji ma' modi oħra ta' trasport
2010/C 47/02
IL-KONTROLLUR EWROPEW GĦALL-PROTEZZJONI TAD-DATA,
Wara li kkunsidra t-Trattat li jistabbilixxi l-Komunità Ewropea, u b'mod partikolari l-Artikolu 286 tiegħu,
Wara li kkunsidra l-Karta tad-Drittijiet Fundamentali tal-Unjoni Ewropea, u b'mod partikolari l-Artikolu 8 tagħha,
Wara li kkunsidra d-Direttiva 95/46/KE tal-Parlament Ewropew u tal-Kunsill tal-24 ta' Ottubru 1995 dwar il-protezzjoni ta' individwi fir-rigward tal-ipproċessar ta' data personali u dwar il-moviment liberu ta' dik id-data,
Wara li kkunsidra d-Direttiva 2002/58/KE tal-Parlament Ewropew u tal-Kunsill tat-12 ta' Lulju 2002 dwar l-ipproċessar tad-data personali u l-protezzjoni tal-privatezza fis-settur tal-komunikazzjoni elettronika,
Wara li kkunsidra r-Regolament (KE) Nru 45/2001 tal-Parlament Ewropew u tal-Kunsill tat-18 ta' Diċembru 2000 dwar il-protezzjoni ta' individwi fir-rigward tal-ipproċessar ta' data personali mill-istituzzjonijiet u l-korpi Komunitarji u dwar il-moviment liberu ta' dik id-data, u b’mod partikolari l-Artikolu 41 tiegħu,
Wara li kkunsidra t-talba għal opinjoni f’konformità mal-Artikolu 28(2) tar-Regolament (KE) Nru 45/2001 li waslet fil-11 ta' Frar 2009 mill-Kummissjoni Ewropea,
ADOTTA L-OPINJONI LI ĠEJJA:
I. INTRODUZZJONI
1. |
Fis-16 ta' Diċembru 2008, il-Kummissjoni adottat Komunikazzjoni li tiddefinixxi Pjan ta' Azzjoni biex jiġi varat l-użu ta' Sistemi Intelliġenti tat-Trasport fl-Ewropa (“il-Komunikazzjoni”) (1). Il-Komunikazzjoni hija akkumpanjata minn proposta għal Direttiva tal-Parlament Ewropew u tal-Kunsill li tistabbilixxi qafas biex jiġi varat l-użu ta' Sistemi Intelliġenti tat-Trasport fil-qasam tat-trasport bit-triq u għall-interfaċċji ma' modi oħra ta' trasport (“il-Proposta”) (2). Il-Komunikazzjoni u l-proposta li takkumpanjaha ntbagħtu mill-Kummissjoni lill-KEPD għall-konsultazzjoni, f'konformità mal-Artikolu 28(2) tar-Regolament (KE) Nru 45/2001 (3). |
2. |
Il-KEPD jilqa’ l-fatt li hu jiġi kkonsultat u jirrakkomanda li ssir referenza għal din il-konsultazzjoni fil-premessi tal-proposta, b'mod simili għal numru ta' testi leġiżlattivi oħra li l-KEPD kien ikkonsultat dwarhom, f'konformità mar-Regolament (KE) Nru 45/2001. |
I.1. Il-Komunikazzjoni tal-Kummissjoni dwar Pjan ta' Azzjoni biex jiġi varat l-użu tas-SIT fl-Ewropa
3. |
“Sistemi Intelliġenti tat-Trasport” (“SIT”) huma applikazzjonijiet avvanzati li jużaw Teknoloġiji tal-Informazzjoni u tal-Komunikazzjoni (ICT), li huma inkorporati f'modi differenti ta' trasport għall-interazzjoni bejniethom. Fil-qasam tat-trasport bit-triq, is-SIT ser jipprovdu servizzi innovattivi dwar il-modi ta' trasport u l-ġestjoni tat-traffiku għal diversi utenti bħal vjaġġaturi, utenti u operaturi tal-infrastruttura tat-trasport bit-triq, managers ta' flotot u operaturi tas-servizzi ta' emerġenza. |
4. |
B’kont meħud tal-varar li qed jikber ta' SIT f'diversi modi ta' trasport (4) fl-Unjoni Ewropea, il-Kummissjoni adottat pjan ta' azzjoni biex jiġu aċċellerati l-introduzzjoni u l-użu tal-applikazzjonijiet u s-servizzi tas-SIT fil-qasam tat-trasport bit-triq. Il-pjan għandu wkoll l-għan li jiżgura l-interazzjoni tagħhom ma' modi oħra ta' trasport, li ser jiffaċilitaw il-forniment ta' servizzi multimodali. Il-varar koerenti tas-SIT fl-Ewropa ser iservi diversi objettivi Komunitarji, inklużi l-effiċjenza, is-sostenibbiltà, is-sigurtà u s-sikurezza tat-trasport, waqt li jitrawmu s-suq intern u l-kompetittività tal-UE. Fid-dawl tad-diversità tal-objettivi segwiti biex jiġi varat l-użu tas-SIT, il-Komunikazzjoni tiddeskrivi sitt oqsma ta' prijorità għall-azzjoni fil-perijodu 2009-2014. Biex jiġi implimentat il-pjan, il-Kummissjoni pproponiet li qafas legali huwa ddefinit fil-livell tal-UE permezz ta' Direttiva, li taħtha ser jiġu ddefiniti numru ta' miżuri fl-oqsma ta' prijorità magħżulin. |
I.2. Proposta għal Direttiva li tistabbilixxi l-qafas biex jiġi varat l-użu tas-SIT fil-qasam tat-trasport bit-triq u għall-interfaċċji ma' modi oħra ta' trasport
5. |
Il-Proposta tistabbilixxi qafas biex jiġi varat l-użu tranżnazzjonali tal-applikazzjonijiet tas-SIT li huwa maħsub biex jiffaċilita l-forniment ta' servizzi transkonfini armonizzati, notevolment għall-informazzjoni dwar it-traffiku u l-ivvjaġġar u l-ġestjoni tat-traffiku. Dan jeħtieġ li l-Istati Membri jieħdu diversi miżuri tekniċi biex jiġu ffaċilitati l-iskambji ta' data bejn l-utenti, l-awtoritajiet pubbliċi, il-partijiet interessati rilevanti u l-fornituri tas-servizzi tas-SIT u biex fil-vetturi u fl-infrastruttura tat-toroq jiġu integrati sistemi tas-SIT li huma relatati mas-sigurtà u s-sikurezza. L-ispeċifikazzjonijiet tekniċi għall-applikazzjonijiet u s-sistemi tas-SIT f'erba' oqsma ta' prijorità (5) elenkati fil-pjan ta' azzjoni ser jiġu ddefiniti permezz ta' proċedura ta' kumitat (6), li l-elementi ċentrali tagħha huma speċifikati f'Anness II. Madankollu l-għanijiet speċifiċi tal-użu tas-SIT f'dawn l-oqsma mhumiex ċari. Barra minn hekk, il-varar tas-SIT jista' jestendi għal ħafna aktar oqsma milli l-erba’ inizjalment magħżulin għall-iżilupp ta' speċifikazzjonijiet tekniċi armonizzati. Waqt li l-Proposta tittratta prinċipalment il-varar ta' applikazzjonijiet u servizzi futuri tas-SIT, hija għandha wkoll, fejn fattibbli, tinkludi t-teknoloġiji eżistenti jew li attwalment qed jiżviluppaw f'dak il-qasam (bħall-eCall, eToll, eċċ.). |
6. |
Il-Proposta ntbagħtet lill-Parlament Ewropew, li adotta l-pożizzjoni tiegħu fl-ewwel qari (7) fit-23 ta' April 2009. Flimkien ma' talba għall-konsultazzjoni mill-Kunsill fid-29 ta' Jannar 2009, il-Kumitat Ekonomiku u Soċjali Ewropew adotta opinjoni dwar il-Proposta fit-13 ta' Mejju 2009 (8). |
I.3. Fokus tal-opinjoni
7. |
Il-KEPD jilqa’ l-konsultazzjoni dwar il-pjan propost ta' varar tas-SIT imressaq mill-Kummissjoni. Din mhijiex l-ewwel darba li l-KEPD qed jitratta l-kwistjonijiet imqajmin fil-Pjan ta' Azzjoni tas-SIT tiegħu. Il-KEPD ta opinjoni dwar il-proposta tal-Kummissjoni dwar l-iffaċilitar tal-infurzar transkonfini fil-qasam tas-sigurtà tat-toroq (9) u kkontribwixxa għall-ħidma tal-Grupp ta' Ħidma tal-Artikolu 29 dwar dokument ta' ħidma dwar l-eCall (10). |
8. |
Is-Sistemi Intelliġenti tat-Trasport huma bbażati fuq il-ġbir, l-ipproċessar u l-iskambju ta' varjetà wiesgħa ta' data, minn sorsi pubbliċi u privati; għalhekk huma jikkostitwixxu żona ta' data intensiva. Il-varar tas-SIT ser iserraħ fil-biċċa l-kbira fuq it-teknoloġiji ta' ġeolokalizzazzjoni bħat-teknoloġiji tal-pożizzjonar bis-satellita u mingħajr kuntatt, bħar-RFID, li ser jiffaċilitaw il-forniment ta' varjetà ta' servizzi pubbliċi u/jew kummerċjali bbażati fuq il-lokalizzazzjoni (eż. l-informazzjoni dwar it-traffiku fil-ħin reali, l-eFreight, l-eCall, l-eToll, ir-riżervazzjoni tal-parkeġġ, eċċ.). Ftit mill-informazzjoni li ser tiġi proċessata permezz tas-SIT tinġabar flimkien – bħal dik dwar it-traffiku, l-inċidenti u l-opportunitajiet – u ma tiġi relatata mal-ebda individwu, waqt li informazzjoni oħra tiġi relatata ma' individwi identifikati jew identifikabbli u għalhekk tikkwalifika bħala data personali fit-tifsira tal-Artikolu 2(a) tad-Direttiva 95/46/KE. |
9. |
Il-KEPD iqis bħala essenzjali l-fatt li l-azzjonijiet ippjanati biex jiġi varat l-użu tas-SIT huma konsistenti mal-qafas legali eżistenti kif ikkwotat fil-Proposta, b'mod partikolari d-Direttiva 95/46/KE dwar il-protezzjoni tad-data (11) u d-Direttiva 2002/58/KE dwar il-privatezza elettronika (12). |
10. |
Kwistjonijiet mhux riżolti fil-protezzjoni tal-privatezza u tad-data ġew identifikati mill-Kummissjoni bħala wieħed mill-ostakoli prinċipali għall-promozzjoni tas-SIT. Dawn il-kwistjonijiet ser jiġu żviluppati kif ġej f'din l-opinjoni:
|
II. ANALIŻI TAL-QAFAS LEGALI PROPOST BIEX JIĠI VARAT L-UŻU TAS-SIT
11. |
Il-proposta tal-Kummissjoni għal Direttiva fiha żewġ dispożizzjonijiet (il-premessa 9 u l-Artikolu 6) li jittrattaw il-privatezza, is-sigurtà u l-użu mill-ġdid tal-informazzjoni. L-Artikolu 6(1) tal-proposta tal-Kummissjoni jeħtieġ li t-tħaddim tas-SIT jitwettaq f'konformità mar-regoli tal-protezzjoni tad-data stabbiliti, fost l-oħrajn, fid-Direttiva 95/46/KE u fid-Direttiva 2002/58/KE. Fil-Proposta tal-Kummissjoni, l-Artikolu 6(2) jipprevedi miżuri konkreti ta' protezzjoni tad-data prinċipalment minn perspettiva ta' sigurtà: L-Artikolu 6(2) tal-Proposta jiddikjara li “l-Istati Membri għandhom jiżguraw li d-dejta u r-reġistri tas-SIT jiġu protetti kontra l-abbuż, fosthom l-aċċess illegali, tibdil jew telf”. Finalment, l-Artikolu 6(3) tal-Proposta tal-Kummissjoni jipprovdi li “d-Direttiva 2003/98/KE għandha tapplika”. |
12. |
Il-Parlament Ewropew fl-ewwel qari ppropona emendi li jikkonċernaw l-Artikolu 6. B'mod partikolari, qed jiżdiedu tliet paragrafi ġodda fl-Artikolu 6(1), li huma relatati mal-użu ta' data anonima fejn adatt, għall-ipproċessar ta' data sensittiva malli jingħata kunsens infurmat tas-suġġett tad-data biss, u biex ikun żgurat li d-data personali tiġi pproċessata biss “sakemm l-ipproċessar ikun meħtieġ għat-twettiq tal-applikazzjoni u/jew tas-servizzi tas-SIT”. Barra minn hekk, l-Artikolu 6(2) huwa mmodifikat billi jiżdied li d-data u u r-reġistri tas-SIT “ma jistgħux jintużaw għal għanijiet oħra għajr dawk imsemmijin fid-Direttiva.” |
13. |
Il-KEPD jilqa’ l-fatt li l-protezzjoni tad-data ġiet meqjusa fl-abbozzar tal-Proposta u li hija ppreżentata bħala kondizzjoni ġenerali biex jiġi varat l-użu tajjeb tas-SIT fl-Ewropa. Il-KEPD jirrikonoxxi li hemm ħtieġa għal armonizzazzjoni koerenti tal-proċessi tad-data fil-livell tal-UE sabiex tkun żgurata l-vijabbiltà tal-applikazzjonijiet u s-servizzi tas-SIT madwar l-Ewropa. |
14. |
Madankollu, il-KEPD innota li l-qafas legali propost huwa wiesa’ u ġenerali wisq biex jindirizza b'mod adegwat it-tħassib dwar il-protezzjoni tal-privatezza u tad-data mqajjem mill-varar tas-SIT fl-Istati Membri. Mhuwiex ċar meta t-twettiq tas-servizzi tas-SIT ser iwassal għall-ġbir u l-ipproċessar ta' data personali, x'inhuma l-għanijiet li għalihom isir proċessar tad-data, lanqas x'inhi l-bażi legali li tiġġustifika tali proċessar. Barra minn hekk, l-użu ta' teknoloġiji ta' lokazzjoni biex jiġi varat l-użu tas-SIT iqajjem ir-riskju li jiġu żviluppati servizzi u intrużivi minn perspettiva ta' privatezza jekk ikunu jinkludu l-ġbir u l-iskambju ta' data personali. Barra minn hekk, il-Proposta ma tistabbilix b'mod ċar ir-rwoli u r-responsabbiltajiet tad-diversi operaturi li jintervjenu fil-katina tal-varar tas-SIT, u għalhekk huwa diffiċli li wieħed ikun jaf liema operaturi ser ikunu kontrollaturi tad-data u ser ikunu għalhekk responsabbli (13) għall-konformità mal-obbligi tal-protezzjoni tad-data. L-operaturi ser jiffaċċjaw problemi konsiderevoli jekk dawn il-kwistjonijiet kollha ma jkunux iċċarati fil-liġi, peress li fl-aħħar mill-aħħar huma ser ikunu dawk responsabbli li japplikaw il-miżuri stabbiliti fid-Direttiva proposta. |
15. |
Għalhekk hemm riskju li n-nuqqas ta' ċarezza tal-qafas legali propost ser joħloq diversità fl-implimentazzjoni tas-SIT fl-Ewropa u li, minflok inaqqas id-diverġenzi fost l-Istati Membri, għall-kuntrarju, ser iwassal għal inċertezza, frammentazzjoni u inkonsistenzi konsiderevoli, minħabba l-livelli differenti ta' protezzjoni tad-data fl-Ewropa. Dan jista' jwassal ukoll għal nuqqas ta' konformità mas-salvagwardji essenzjali għall-protezzjoni tad-data. Il-KEPD jenfasizza l-ħtieġa għal aktar armonizzazzjoni dwar dawn il-kwistjonijiet fil-livell tal-UE. B'hekk il-KEPD ser jissuġġerixxi modifiki għall-qafas legali propost minn perspettiva ta' protezzjoni tad-data. Huwa jirrakkomanda b'mod qawwi li l-Parlament u l-Kunsill idaħħlu fil-Proposta l-modifiki proposti kif ukoll, fejn fattibbli, dispożizzjonijiet addizzjonali biex jiġu ċċarati kwistjonijiet pendenti (bħad-definizzjoni u r-responsabbiltà tal-atturi tas-SIT, l-iżvilupp ta' kuntratti armonizzati għall-forniment ta' servizzi tas-SIT, eċċ). Huwa jenfasizza wkoll li l-Istati Membri ser jerfgħu wkoll ir-responsabbiltà fl-implimentazzjoni tad-Direttiva b'mod tajjeb sabiex l-operaturi jkunu jistgħu jiżviluppaw sistemi u servizzi li joffru livell adatt ta' protezzjoni tad-data madwar l-Ewropa. |
II.1. L-attivitajiet tal-ipproċessar tad-data għandhom iserrħu fuq bażi legali adatta
16. |
Mhuwiex ċar meta ser jibda l-ipproċessar ta' data personali ladarba t-tagħmir tas-SIT jiġi integrat f'vettura u fuq liema bażi legali ser jitwettaq l-ipproċessar. L-operaturi jistgħu jserrħu fuq bażijiet legali differenti għall-ipproċessar tad-data, fost l-oħrajn il-kunsens inambigwu tal-utenti, il-kuntratt jew l-obbligu legali li miegħu l-kontrollur għandu jikkonforma. Hemm ħtieġa li tiġi armonizzata l-bażi legali li fuqha l-ipproċessar tad-data permezz tas-SIT ser jitwettaq sabiex ikun żgurat li s-sistemi jaħdmu fl-Ewropa kollha u li l-utenti ma jbatux minn diverġenzi bil-mod kif iseħħ l-ipproċessar f'kull pajjiż tal-UE. |
17. |
F’numru ta' każijiet is-sistemi tas-SIT ser jiġu integrati awtomatikament fil-vetturi. Notevolment dan huwa l-każ għas-sistemi tas-SIS relatati mas-sigurtà u s-sikurezza, li għandhom jiġu integrati fil-vetturi skont il-Proposta. Madankollu l-Proposta ma tiddefinixxix x'inhuma “sistemi tas-SIS relatati mas-sigurtà u s-sikurezza”, u għalhekk għandu jiġi ċċarat aktar x'inhuma l-applikazzjonijiet u s-sistemi speċifiċi tas-SIT li għandhom jiġu inkorporati fil-vetturi. Barra minn hekk, għandu jkun iċċarat ukoll jekk l-attivazzjoni u l-użu tat-tagħmir hux ser isiru fuq bażi volontarja jew fuq bażi obbligatorja għall-utenti. L-għażla li jitwettaq proċessar tad-data fuq bażi mandatorja għandha ssir biss għal finijiet speċifiċi b'konsiderazzjoni ta' ġustifikazzjonijiet konvinċenti (eż. it-traċċar tajjeb tal-ġestjoni tal-merkanzija) u b'salvagwardji adatti fir-rigward tal-ipproċessar ta' data dwar individwi. Jekk l-użu tas-SIT isir fuq bażi volontarja, għandhom jiġu implimentati salvagwardji adatti biex jiġi evitat li minħabba s-sempliċi preżenza tas-sistema fil-vettura l-utenti jitqiesu li jkunu qablu impliċitament mal-użu tagħha. |
18. |
Il-KEPD jiffavorixxi l-għażla li s-servizzi tas-SIT jiġu fornuti fuq bażi volontarja. Dan ifisser li l-utenti għandhom ikunu jistgħu jaqblu liberament mal-użu tas-sistema u mal-għanijiet partikolari li għalihom tkun ser tintuża. Meta s-servizz fornut iserraħ fuq id-data ta' lokazzjoni, għandha tiġi pprovduta informazzjoni adatta lill-utent (notevolment f'konformità mal-Artikolu 9 tad-Direttiva 2002/58/KE), li għandu jkun f'pożizzjoni li jirtira dan il-kunsens. F'termini prattiċi, dan jeħtieġ l-introduzzjoni ta' mod sempliċi ta' diżattivazzjoni tat-tagħmir u/jew faċilità, mingħajr restrizzjoni teknika jew finanzjarja għall-utent (14), meta l-utent ma jaqbilx aktar mal-użu tas-sistema u/jew ta' faċilità partikolari. Għandhom jiġu implimentati aktar salvagwardji, sabiex l-utenti ma jiġux iddiskriminati meta jirrifjutaw l-użu ta' servizz. |
19. |
F’każijiet fejn ċerti attivitaiet tal-ipprroċessar ikunu mandatorji u oħrajn ikunu soġġetti għall-kunsens tal-utent, għandha tkun żgurata t-trasparenza dwar id-diversi operazzjonijiet tal-ipproċessar tad-data mwettqin, billi l-utenti jiġu pprovduti b'informazzjoni adatta dwar in-natura mandatorja u/jew volontarja ta' kull proċessar partikolari u l-iskop ta' tali proċessar. Barra minn hekk, ser ikun kruċjali li jiġu implimentati salvagwardji ta' sigurtà adatti, sabiex l-ebda data ma tinġabar jew tiġi pproċessata barra l-iskop ta' dak li jkun ġie legalment iddefinit u/jew maqbul b'mod volontarju. |
20. |
B’kont meħud tal-effett tranżnazzjonali tas-servizzi tas-SIT, il-KEPD ikompli jirrakkomanda l-iżvilupp ta' kuntratti standard pan-Ewropej biex ikun żgurat li s-servizzi fornuti permezz tas-SIT joffru l-istess salvagwardji tal-protezzjoni tad-data madwar l-Ewropa, u b'mod partikolari li l-informazzjoni pprovduta lill-utenti tkun ċara biżżejjed dwar il-faċilitajiet speċifiċi użati, l-impatt fuq l-użu ta' teknoloġiji speċifiċi dwar il-protezzjoni tad-data tagħhom, u kif huma jistgħu jeżerċitaw id-drittijiet tagħhom. Meta jiżdiedu faċilitajiet ġodda, għandhom jittieħdu aktar passi mill-fornituri tas-servizzi biex jipprovdu informazzjoni ċara u speċifika lill-utent fir-rigward ta' dawn il-faċilitajiet addizzjonali u biex jiksbu l-kunsens adatt tagħhom għall-użu ta' faċilitajiet ġodda. |
II.2. L-għanijiet u l-modalitajiet tal-ipproċessar tad-data għandhom jiġu ddefiniti aktar
21. |
Il-KEPD jinnota li l-Proposta ma tiddefinix b'mod preċiż is-servizzi u l-għanijiet li għalihom jistgħu jintużaw l-applikazzjonijiet tas-SIT, li għalhekk jibqgħu miftuħin. Dan jippermetti l-flessibbiltà fil-prattika, iżda jfisser li kwistjonijiet mhux riżolti fil-privatezza u l-protezzjoni tad-data – identifikati mill-Kummissjoni bħala wieħed mill-ostakoli prinċipali għall-promozzjoni tas-SIT (ara l-punt 10) – jistgħu jibqgħu mhux riżolti u jistgħu jostakolaw implimentazzjoni bbilanċjata tal-miżuri proposti. |
22. |
Il-KEPD jenfasizza li huwa partikolarment importanti li l-operazzjonijiet tal-ipproċessar li jitwettqu għall-forniment ta' servizzi speċifiċi tas-SIT ma jsirux biss skont bażi legali adatta, iżda wkoll għal għanijiet speċifiċi, espliċiti u leġittimi, u li l-ipproċessar previst huwa proporzjonali u meħtieġ għal dawk l-għanijiet (l-Artikolu 6 tad-Direttiva 95/46/KE). Għalhekk għandha titqies il-ħtieġa possibbli għal aktar leġiżlazzjoni fil-livell tal-UE fir-rigward tal-użijiet tas-SIT sabiex tiġi pprovduta bażi legali armonizzata u adegwata għall-attivitajiet tal-ipproċessar li għandhom jitwettqu, u sabiex jiġu evitati d-diskrepanzi fil-varar tas-servizzi tas-SIT bejn l-Istati Membri. |
23. |
Skont il-qafas propost s'issa m'hemm l-ebda deċiżjoni dwar il-modalitajiet tal-ipproċessar tad-data u tal-iskambji tad-data għall-użu tas-SIT. Ħafna parametri tekniċi, li l-għażla tagħhom ser ikollha implikazzjonijiet differenti ta' protezzjoni tal-privatezza u tad-data, ser jiġu deċiżi biss fi stadju aktar tard mill-kumitat. B’kont meħud tal-protezzjoni partikolari mogħtija lill-protezzjoni tal-privatezza u tad-data bħala drittijiet fundamentali protetti fl-Artikolu 8 tal-Konvenzjoni Ewropea tad-Drittijiet tal-Bniedem u l-Libertajiet Fundamentali u fl-Artikoli 7 u 8 tal-Karta tad-Drittijiet Fundamentali tal-Unjoni Ewropea, jista jiġi kkontestat jekk u safejn id-definizzjoni tal-operazzjonijiet tal-ipproċessar tad-data għandhiex tiġi deċiża permezz tal-proċedura ta' kumitat. |
24. |
F’soċjetà demokratika, id-deċiżjonijiet dwar prinċipji u modalitajiet essenzjali li għandhom impatt fuq id-drittijiet fundamentali għandhom jittieħdu skont proċedura leġiżlattiva sħiħa, li tinkludi verifiki u bilanċi adatti. F'dan il-każ, dan ifisser li d-deċiżjonijiet li għandhom impatt maġġuri fuq il-protezzjoni tal-privatezza u tad-data tal-individwi, bħall-għanijiet u l-modalitajiet tal-attivitajiet mandatorji tal-ipproċessar tad-data u d-definizzjoni tal-modalitajiet biex jiġi varat l-użu tas-SIT f'oqsma ġodda, għandhom jiġu deċiżi mill-Parlament Ewropew u mill-Kunsill u mhux permezz tal-proċedura ta' kumitat. |
25. |
F’din il-perspettiva, il-KEPD jirrakkomanda b'mod qawwi li l-Grupp ta' Ħidma tal-Artikolu 29 u l-KEPD huma involuti, fejn rilevanti, fil-ħidma tal-Kumitat maħluq skont l-Artikolu 8 tal-Proposta u f'azzjonijiet futuri meħudin dwar il-varar tas-SIS, permezz tal-konsultazzjoni fi stadju suffiċjentement bikri qabel l-iżvilupp ta' miżuri rilevanti. |
26. |
Barra minn hekk, il-KEPD jieħu nota tal-emendi adottati mill-Parlament Ewropew fir-rigward tal-Artikolu 6 tal-Proposta. Il-KEPD l-ewwel jinnota li l-emenda relatata mal-inkoraġġiment tal-użu tad-data anonima fejn adatt, għalkemm milqugħa ħafna fil-prinċipju, mhix ser issolvi t-tħassib kollu dwar il-protezzjoni tad-data, peress li ħafna data miġbura u skambjata permezz tas-SIT tista' tikkwalifika bħala data personali. Għall-ipproċessar tad-data personali li għandu jsir fuq bażi anonima, m'għandu jkun hemm l-ebda possibbiltà għall-ebda persuna fl-ebda stadju tal-ipproċessar – b'kont meħud tal-mezzi kollha li x'aktarx huwa raġonevoli li għandhom jintużaw jew mill-kontrollur jew minn kwalunkwe persuna oħra – li torbot id-data mad-data relatata ma' individwu identifikat, inkella tali data tikkostitwixxi data personali fit-tifsira tal-Artikolu 2(a) tad-Direttiva 95/46/KE (15). Barra minn hekk, abbażi tal-emendi proposti mill-Parlament Ewropew, il-KEPD jirrakkomanda li l-Artikolu 6 tal-Proposta huwa modifikat kif ġej:
|
III. PROTEZZJONI TAD-DATA FIS-SISTEMI INTELLIĠENTI TAT-TRASPORT
27. |
Huwa partikolarmant kruċjali li r-rwoli tal-atturi differenti involuti fis-SIT jiġu ċċarati sabiex jiġi identifikat min ser jerfa’ r-responsabbiltà biex jiżgura li s-sistemi jaħdmu tajjeb minn perspettiva ta' protezzjoni tad-data. Għalhekk għandu jiġi ċċarat aktar min għandu jkun responsabbli għall-implimentazzjoni tal-applikazzjonijiet u s-sistemi li d-disinn tagħhom ser ikun speċifikat permezz tal-kumitat, u min ser ikun responsabbli fost il-katina tal-atturi għall-konformità tal-ipproċessar tad-data mal-liġi dwar il-protezzjoni tad-data (jiġifieri l-kontrolluri tad-data). Il-KEPD ser jissottolinja hawn taħt ftit mit-tħassib dwar il-protezzjoni tal-privatezza u tad-data li għandu jiġi indirizzat fil-kumitat u mill-kontrolluri tad-data meta jiġu mfasslin l-applikazzjonijiet u l-arkitettura tas-sistemi. Barra minn hekk, huwa ser jiddeskrivi xi wħud mill-kwistjonijiet tal-protezzjoni tad-data li għandhom jiġu indirizzati mil-leġiżlatur u l-kontrolluri tad-data fir-rigward tal-forniment tas-servizzi tas-SIT. |
III.1. “Privatezza fid-disinn”
28. |
L-applikazzjoni korretta tal-prinċipji tal-protezzjoni tad-data stipulati fid-Direttiva 95/46/KE hija kondizzjoni ċentrali għas-suċċess tal-varar tas-SIT fil-Komunità. Dawn il-prinċipji għandhom implikazzjonijiet għad-disinn tal-arkitettura tas-sistemi u l-applikazzjonijiet. Il-KEPD jirrakkomanda li jiġi adottat approċċ ta' “privatezza fid-disinn” fi stadju bikri tad-disinn tas-SIT, biex jiġu ddefiniti l-arkitettura, l-operazzjoni u l-ġestjoni tal-applikazzjonijiet u s-sistemi. Dan l-approċċ huwa notevolment enfasizzat fid-Direttiva 1999/5/KE (18) fir-rigward tad-disinn tar-radju u tagħmir terminali ta' telekomunikazzjonijiet. |
29. |
Id-disinn tal-applikazzjonijiet u s-sistemi tas-SIT ser isir f'diversi stadji, minn diversi atturi, li għandhom ilkoll jieħdu kont tal-protezzjoni tal-privatezza u tad-data. Il-Kummissjoni u l-Kumitat tas-SIT ser jerfgħu responsabbiltà inizjali speċifika fid-definizzjoni, permezz tal-proċedura ta' kumitat, ta' miżuri, inizjattivi ta' standardizzazzjoni, proċeduri u l-aħjar prattiki li għandhom jippromwovu l-“privatezza fid-disinn”. |
30. |
Il-“privatezza fid-disinn” għandha tiġi inkoraġġuta fl-istadji kollha u fil-forom kollha tal-proċessi:
|
31. |
IL-KEPD jiddeskrivi xi wħud mill-kwistjonijiet li għandhom jiġu indirizzati speċifikament fid-disinn tal-applikazzjonijiet u l-arkitettura tas-sistemi t'hawn taħt. Dawn huma relatati mad-data miġbura, mal-interoperabbiltà tas-sistemi, u mas-sigurtà tad-data. |
III.1.a) Minimizzazzjoni u anonimità tad-data
32. |
F’konformità mal-Artikolu 6(1)(c) tad-Direttiva 95/46/KE, tista' tinġabar u tiġi proċessata d-data personali biss li hija meħtieġa u rilevanti għal għanijiet speċifiċi. |
33. |
Il-KEPD jisħaq dwar l-importanza li ssir klassifikazzjoni adatta tal-informazzoni u d-data li għandhom jiġu proċessati permezz tas-SIT qabel jitfasslu l-applikazzjonijiet u s-sistemi, sabiex jiġi evitat ġbir massiv u inadatt ta' data personali. F'dan ir-rigward, għandu jittieħed kont ta’:
|
34. |
Il-faċilitajiet uniċi għandhom jiġu analizzati bir-reqqa skont l-għanijiet imwettqin sabiex tiġi vvalutata l-ħtieġa li tinġabar id-data personali. Il-KEPD jisħaq dwar l-importanza li jinħoloq bilanċ adatt bejn id-drittijiet fundamentali tas-suġġetti tad-data u l-interessi tal-atturi differenti involuti, u dan jimplika li d-data personali tiġi proċessata kemm jista' jkun mill-inqas. Safejn hu l-aktar possibbli, l-arkitettura tal-applikazzjonijiet u s-sistemi għandha tkun imfassla b'tali mod li tinħġabar biss id-data personali li tkun strettament meħtieġa biex jiġu sodisfatti l-għanijiet li jkunu jridu jinkisbu. |
35. |
Jekk id-data personali ma tkunx meħtieġa jew tkun meħtieġa biss fi stadju bikri tal-ipproċessar, hija m'għandhiex tinġabar jew għandha tiġi anonimizzata malajr kemm jista' jkun. Għalhekk huwa partikolarment importanti mhux biss li tiġi vvalutata l-ħtieġa għall-ġbir tad-data, iżda wkoll għaż-żamma tagħha fis-sistemi differenti. Għandhom jiġu ddefiniti limiti ta' żmien speċifiċi għall-ħażna ta' data personali għall-atturi differenti kollha fil-katina tas-servizz, li għandhom ikunu ddifferenzjati skont it-tip ta' data u l-għan li għalih tkun inġabret (20). Bħala riżultat, meta ma jkunx aktar meħtieġ li tinżamm data personali biex jinkisbu l-għanijiet li għalihom kienet inġabret jew ġiet aktar proċessata, għandha tingħata b'mod anonimu, jiġifieri ma tkunx aktar relatata ma' individwu identifikat jew identifikabbli. |
36. |
Id-disinn tal-arkitettura tas-sistemi u l-proċeduri tal-iskambju tad-data għandhom jappoġġaw l-ipproċessar ta' kemm jista' jkun data personali mill-inqas. F'dan ir-rigward għandu jittieħed kont tal-istadji kollha tal-ipproċessar u l-atturi kollha fil-katina tal-forniment tas-servizzi tas-SIT. Waqt li xi ftit mid-data tista' tiġi skambjata u proċessata fuq bażi anonima, data oħra, anki jekk tkun skambjata fuq bażi mhux identifikata, tista' tiġi marbuta ma' data relatata ma' individwi identifikati u għalhekk ser tikkostitwixxi data personali fit-tifsira tal-Artikolu 2(a) tad-Direttiva 95/46/KE (21). Minħabba l-għanijiet li għalihom ser tintuża s-SIT, jidher li hu diffiċli li jiġi żgurat li ammont kbir ta' data miġbura permezz tas-SIT ser jiġi proċessat fuq bażi anonima, peress li l-identità tal-individwu ser tkun meħtieġa f'xi ħin għal għanijiet speċifiċi, bħall-fatturazzjoni. Bħala riżultat, mill-inqas ser ikunu meħtieġa miżuri tekniċi, organizzattivi u legali speċjali biex tkun żgurata l-anonimità f'ċerti oqsma. |
III.1.b) L-interoperabbiltà, il-kwalità tad-data u l-limitazzjoni tal-għanijiet
37. |
L-interoperabbiltà tal-applikazzjonijiet u s-sistemi hija element ċentrali biex jiġi varat l-użu b'suċċess tas-SIT. Ser issir ħidma ta' armonizzazzjoni li permezz tagħha ser jiġu ddefiniti l-ispeċifikazzjonijiet tekniċi tal-interfaċċji li għandhom jiġu integrati fl-applikazzjonijiet u s-sistemi, sabiex jitħallew joperaw flimkien ma' applikazzjonijiet oħra inkorporati f'modi u/jew sistemi oħra ta' trasport. Waqt li l-interoperabbiltà tas-sistemi ser tgħin biex jiġi ffaċilitat il-forniment ta' varjetà ta' servizzi u ser tikkontribwixxi għall-iżgurar tal-kontinwità tagħhom fl-Ewropa kollha, hija toħloq ċertu numru ta' riskji minn perspettiva ta' data tal-protezzjoni, bħar-riskji tal-użu ħażin jew l-abbuż mid-data. Kwlunkwe interfaċċja tal-bażijiet tad-data għandha ssir b'rispett dovut għall-prinċipji tal-protezzjoni tad-data (22) u s-salvagwardji prattiċi dwar is-sigurtà (ara wkoll it-taqsima III.1.c). |
38. |
Il-prinċipju tal-kwalità tad-data msemmi fl-Artikolu 6(d) tad-Direttiva 95/46/KE huwa partikolarment kruċjali fil-kuntest tal-interoperabbiltà tal-applikazzjonijiet u s-sistemi. L-ispeċifikazzjonijiet tekniċi li għandhom jiġu ddefiniti għad-disinn tal-interfaċċji għandhom jiżguraw l-akkuratezza tad-data li għandha tinkiseb bħala riżultat tal-interfaċċja tal-applikazzjonijiet u s-sistemi. |
39. |
Peress li l-interoperabbiltà tas-sistemi ser tiffaċilita l-interfaċċja tal-bażijiet tad-data u t-tqabbil tad-data għal aktar għanijiet, il-KEPD jenfasizza li kwalunkwe interfaċċja għandha ssir b'kunsiderazzjoni bir-reqqa tal-prinċipju tal-limitazzjoni tal-għanijiet stabbilit fl-Artikolu 6(1)(b) tad-Direttiva 95/46/KE. Huwa partikolarment importanti li d-disinn tal-arkitettura tas-sistemi tas-SIT jimpedixxi kwalunkwe użu ulterjuri tad-data għal finijiet oħrajn barra dawk li għalihom kienet inġabret. Fis-sistema għandhom jinbnew protezzjonijiet ta' sigurtà adatti biex jimpedixxu l-abbuż, il-kxif jew l-aċċess mhux awtorizzat, kif ukoll l-effetti kollaterali tat-tagħmir. Pereżempju, għandhom jiġu implimentati protezzjonijiet suffiċjenti sabiex it-tagħmir nomadiku ma jiġix aċċessat minn partijiet terzi mhux awtorizzati u ma jintużax biex jiġu identifikati u ttraċċati nies lil hinn mill-finijiet tas-sistema. |
40. |
Fil-każ tal-legalità tal-interfaċċja nnifisha, dan ser jeħtieġ li jiġi vvalutat fuq bażi ta' każ b'każ, b'kont meħud tan-natura tad-data li tkun saret disponibbli u li ġiet skambjata permezz tas-sistemi u tal-finijiet li għalihom tkun oriġinarjament maħsuba biex tintuża. |
III.1.c) Sigurtà tad-data
41. |
Is-sigurtà tad-data personali hija element prinċipali biex jiġi varat l-użu tas-SIT. Il-KEPD jilqa’ l-fatt li s-sigurtà hija espliċitament imsemmija fil-pjan ta' azzjoni u fil-proposta għal Direttiva. Is-sigurtà għandha tiġi prevista mhux biss matul il-funzjonament tat-tagħmir tas-SIT (fis-sistema abbord vettura u fil-protokoll ta' komunikazzjoni tat-trasport), iżda wkoll wara l-funzjonament tat-tagħmir - fil-bażijiet tad-data fejn id-data tiġi pproċessata u/jew maħżuna. Għandhom jiġu ddefiniti rekwiżiti tekniċi, amministrattivi u organizzattivi adatti għall-istadji kollha tal-ipproċessar li jiżguraw livell adegwat ta' sigurtà f’konformità mal-Artikoli 16 u 17 tad-Direttiva 95/46/KE (kif ukoll l-Artikolu 4 u 5 tad-Direttiva 2002/58/KE, fejn rilevanti). |
42. |
Id-definizzjoni tal-miżuri ta' sigurtà adatti għandha ssir biss wara valutazzjoni bir-reqqa tal-għanijiet speċifiċi li għalihom is-SIT tkun ser tintuża u tal-modalitajiet tal-ipproċessar li jkun sar. F'dan ir-rigward, il-KEPD jirrakkomanda li l-valutazzjonijiet tal-impatt tal-privatezza u l-protezzjoni tad-data jitwettqu fir-rigward ta' setturi u/jew għanijiet partikolari tal-użu (eż. għal sistemi tas-SIT relatati mas-sigurtà, għal sistemi tal-ġestjoni tal-merkanzija, eċċ.). It-twettiq ta' valutazzjoni tal-impatt tal-privatezza u l-protezzjoni tad-data u l-użu tal-BATs għall-privatezza u l-protezzjoni tad-data ser jikkontribwixxu għad-definizzjoni tal-aktar miżuri ta' sigurtà adatti rilevanti għall-ipproċessar speċifiku mwettaq. |
III.2. Kunsiderazzjonijiet ulterjuri tal-protezzjoni tad-data u tal-privatezza għall-forniment ta' servizzi tas-SIT
43. |
L-armonizzazzjoni ulterjuri tal-modalitajiet tal-varar tas-servizzi tas-SIT hija meħtieġa fil-livell tal-UE sabiex jiġu evitati d-diskrepanzi fil-varar tas-servizzi tas-SIT. F'dan ir-rigward, il-KEPD jixtieq jindika żewġ kwistjonijiet li notevolment ser jinħtieġu kunsiderazzjoni ulterjuri minn perspettiva ta' privatezza u protezzjoni tad-data hawn taħt:
|
III.2.a) Salvagwardji għall-użu ta' għodod ta' lokazzjoni għall-forniment ta' servizzi tas-SIT ibbażati fuq il-lokazzjoni
44. |
Il-varar tas-SIT ser jappoġġa l-iżvilupp tal-applikazzjonijiet għall-“insegwiment u t-traċċar” ta' merkanzija u ser jippermetti l-varar ta' servizzi pubbliċi u kummerċjali bbażati fuq il-lokazzjoni. Tali servizzi ser iserrħu fuq l-użu ta' teknoloġiji bħall-pożizzjonar ibbażat fuq is-satelliti u bħat-tikketti RFID (23). Is-sistemi ta' navigazzjoni, insegwiment u traċċar huma maħsubin biex jintużaw għal varjetà ta' għanijiet bħall-monitoraġġ remot fuq ir-rotta ta' vetturi u merkanzija (eż. għat-trasport ta' merkanzija perikoluża jew ta' annimali ħajjin), il-fatturazzjoni tal-vetturi fuq varjetà ta' parametri inklużi d-distanza vvjaġġata u l-ħin tal-ġurnata (eż. l-ipprezzar tat-toroq, sistemi elettroniċi dwar taxxi tat-toroq), u l-monitoraġġ tas-sewwieqa għall-finijiet tal-infurzar bħall-ikkontrollar tal-ħinijiet tas-sewqan (permezz ta' takografi diġitali) u l-impożizzjoni ta' sanzjonijiet (permezz tal-identifikazzjoni elettronika tal-vettura). |
45. |
L-użu ta' teknoloġiji tal-lokazzjoni huwa partikolarment intrużiv minn perspettiva ta' privatezza peress li jippermetti l-insegwiment tas-sewwieqa u l-ġbir ta' varjetà wiesgħa ta' data relatata mal-użanzi tagħhom tas-sewqan. Kif ġie enfasizzat mill-Grupp ta' Ħidma tal-Artikolu 29 (24), l-ipproċessar tad-data ta' lokazzjoni huwa materja partikolarment sensittiva li tinvolvi l-kwistjoni prinċipali tal-libertà taċ-ċaqliq b'mod anonimu, u li teħtieġ l-implimentazzjoni ta' salvagwardji speċifiċi sabiex jiġu evitati s-sorveljanza tal-individwi u l-użu ħażin tad-data. |
46. |
Il-KEPD jenfasizza li l-użu ta' għodod ta' lokazzjoni għandu jkun legali, jiġifieri bbażat fuq raġuni legali adatta, għal finijiet espliċiti u leġittimi, u proporzjonali għall-għanijiet li għandhom jintlaħqu. Il-legalità tal-ipproċessar tad-data mwettaq ser jiddependi ħafna fuq il-mod li fih ser jintużaw l-għodod ta' lokazzjoni u fuq l-għanijiet li għalihom dawn ser jintużaw. Kif il-Grupp ta' Ħidma tal-Artikolu 29 issottolinja fl-opinjoni tiegħu dwar l-eCall, “ma jkunx aċċettabbli, minn perspettiva ta' protezzjoni tad-data, li jkun hemm tali tagħmir konness b'mod permanenti, u għalhekk il-vetturi jkunu ttraċċati b'mod permanenti minħabba l-attivazzjoni possibbli tat-tagħmir tal-eCall (25)” [traduzzjoni mhux uffiċjali]. Għalhekk huwa importanti li jiġu ċċarati aktar iċ-ċirkostanzi speċifiċi li fihom vettura ser tiġi ttraċċata u l-impatt tagħha fuq l-utent. Fi kwalunkwe każ, l-użu ta' tagħmir ta' lokazzjoni għandu jiġi ġġustifikat minn ħtieġa leġittima (eż. l-monitoraġġ tat-trasport tal-merkanzija) u strettament illimitat għal dak li hu meħtieġ għal dak l-għan. Għalhekk, huwa importanti li jiġi ddefinit b'mod preċiż liema data ta' lokazzjoni nġabret, fejn hi maħżuna u kemm ser tinżamm, ma' min u għal liema għanijiet tiġi skambjata, u li jittieħdu l-passi kollha meħtieġa biex jiġu evitati l-użu ħażin jew l-abbuż mid-data. |
47. |
Barra minn hekk, l-ipproċessar tad-data ta' lokazzjoni relatata mal-utenti tan-networks pubbliċi tal-komunikazzjoni jew servizzi ta' komunikazzjoni elettronika disponibbli għall-pubbliku huwa strettament irregolat fl-Artikolu 9 tad-Direttiva 2002/58/KE. Notevolment dan jeħtieġ li l-ipproċessar tad-data ta' lokazzjoni għandu jsir fuq bażi anonima, jew inkella bil-kunsens informat tal-utent. Dan ifisser li l-utenti għandhom, qabel ma jaqblu dwar l-użu tal-għodda ta' lokazzjoni, jingħataw informazzjoni adatta, inklużi t-tip ta' data ta' lokazzjoni pproċessata, l-għanijiet u t-terminu tal-ipproċessar, u jekk id-data hijiex ser tiġi ttrasmessa lil parti terza sabiex jiġi pprovdut is-servizz tal-valur miżjud. Għandu jkun hemm mezz sempliċi, mingħajr ħlas, għall-utenti biex jirrifjutaw temporanjament l-ipproċessar tad-data ta' lokazzjoni għal kull konnessjoni man-netwerk jew għal kull trasmissjoni ta' komunikazzjoni. L-ipproċessar tad-data ta' lokazzjoni għandu jkun strettament illimitat għal persuni li jaġixxu taħt l-awtorità tal-fornitur tan-netwerk ta' komunikazzjonijiet pubbliċi jew ta' servizz ta' komunikazzjoni disponibbli għall-pubbliku jew ta' parti terza li tipprovdi s-servizz tal-valur miżjud. |
48. |
Is-salvagwardji addizzjonali għandhom jiġu adottati meta d-data ta' lokazzjoni tinġabar minn vetturi li jkunu qed jintużaw waqt attività professjonali, biex jiġi evitat li t-teknoloġija ta' lokazzjoni tintuża għall-monitoraġġ indebitu tal-impjegati. Fi kwalunkwe każ, l-ipproċessar għandu jkun illimitat għad-data ta' lokazzjoni miġbura waqt il-ħin tax-xogħol - għalhekk l-impjegati għandhom ikunu jistgħu jitfgħu l-funzjoni ta' lokazzjoni barra l-ħinijiet tax-xogħol u/jew meta jużaw il-vettura għal għanijiet privati. |
49. |
Hemm riskju li l-partijiet terzi (bħall-kumpaniji tal-assigurazzjoni, min iħaddem, u l-awtoritajiet tal-infurzar tal-liġi) jkunu jeħtieġu aċċess għad-data miġbura permezz ta' sistemi ta' navigazzjoni u traċċar għal finijiet leġittimi u speċifiċi (bħat-traċċar ta' merkanzija, il-ħlas elettroniku tat-taxxi, eċċ.) sabiex jintużaw għal finijiet sekondarji, bħall-ikkontrollar tal-ħinijiet tas-sewqan u l-perijodi ta' mistrieħ jew l-ivverifikar tal-osservanza tar-regolamenti tat-triq u l-impożizzjoni tas-sanzjonijiet. Bħala prinċipju, l-aċċess għad-data għal finijiet sekondarji mhuwiex permess jekk dan l-aċċess iservi għal finijiet li huma inkompatibbli ma' dawk li għalihom inġabret. L-aċċess jista' jkun permess biss b'deroga għal dan il-prinċipju jekk il-kondizzjonijiet għal tali aċċess jissodisfaw ir-rekwiżiti stretti tal-Artikolu 13 tad-Direttiva 95/46/KE. Bħala konsegwenza, kwalunkwe aċċess għal-data ta' lokazzjoni minn partijiet terzi għandu jkun ipprovdut biss f'konformità mal-liġi u b'mod trasparenti, abbażi ta' miżura legali li tistabbilixxi proċeduri u modalitajiet adatti għall-aċċess għad-data għal finijiet speċifiċi, u li tipprovdi salvagwardji adegwati għall-individwi f'konformità mal-finijiet ulterjuri li għalihom tista' tintuża d-data tagħhom. |
III.2.b) Rwoli u responsabbiltajiet tal-atturi tas-SIT
50. |
Għadu mhuwiex ċar min ser ikun il-kontrollur tad-data fir-rigward ta' kull parti tal-ipproċessar. F'ħafna każijiet, probabbli l-fornituri tas-servizzi tas-SIT ser ikunu l-kontrolluri tad-data, jew waħedhom fir-rigward tad-data personali pproċessata għall-forniment tas-servizzi tas-SIT proprji tagħhom jew konġuntament fil-każijiet fejn l-ipproċessar jitwettaq flimkien ma' kontrolluri tad-data oħrajn. L-operaturi involuti fis-SIT f'kapaċitajiet differenti għandu jkollhom ir-rwol u r-responsabbiltajiet tagħhom, bħala kontrollur tad-data jew proċessur tad-data, speċifikati b'mod ċar fir-rigward ta' kull parti tal-ipproċessar (eż. operaturi tat-telekomunikazzjoni li jipprovdu servizzi ta' komunikazzjoni kif ukoll servizzi tas-SIT). |
51. |
Dawk il-persuni li jaġixxu bħala kontrolluri tad-data ser ikunu responsabbli (26) għall-iżgurar tal-osservanza tas-sistemi u s-servizzi tal-obbligi kollha dwar il-protezzjoni tad-data, u b'mod partikolari għall-implimentazzjoni ta' sistemi li jinvolvu l-“privatezza fid-disinn”, li jirrispettaw il-kwalità tad-data u l-prinċipji tal-limitazzjoni tal-għanijiet, u li jiggarantixxu livell adatt ta' sigurtà tad-data, kif deskritt fi III.1). |
52. |
Il-kontrolluri tad-data ser ikunu jeħtieġu li jiżguraw li jiġu stabbiliti salvagwardji adatti fil-livelli kollha tal-katina tal-atturi involuti fil-varar tas-SIT. Notevolment dan ser ikun jeħtieġ li huma jidħlu fi skemi kuntrattwali adatti mal-partijiet interessati kollha involuti fl-iskambju u l-ipproċessar tad-data, li għandhom jipprovdu salvagwardji għall-protezzjoni tad-data (b’mod partikolari fir-rigward tal-Artikoli 16 u 17 tad-Direttiva 95/46/KE, u l-Artikoli 4 u 5 tad-Direttiva 2002/58/KE). Huwa importanti li wieħed jinnota li minn perspettiva ta' protezzjoni tad-data, filwaqt li l-kontrolluri tad-data għandhom jiżguraw li l-protezzjoni tad-data tkun żgurata fl-istadji kollha tal-ipproċessar, huma jibqgħu responsabbli għall-ipproċessar u ma jistgħux jeskludu r-responsabbiltà tagħhom b'kuntratt. |
IV. KONKLUŻJONIJIET
53. |
Il-KEPD jilqa’ l-pjan ta' varar tas-SIT propost ippreżentat mill-Kummissjoni li għandu l-għan li jarmonizza l-proċessi tad-data fl-Ewropa kollha sabiex jiġi ffaċilitat il-forniment tas-servizzi tas-SIT, u li fih il-protezzjoni tad-data tiġi ppreżentata bħala kondizzjoni ċentrali biex jiġi varat l-użu adatt tas-SIT fl-Ewropa. |
54. |
Il-KEPD jinnota li d-Direttiva proposta tistabbilixxi qafas ġenerali li jqajjem numru ta' kwistjonijiet dwar il-privatezza u l-protezzjoni tad-data li jeħtieġu li jiġu indirizzati aktar fil-livell tal-UE u f'dak nazzjonali:
|
55. |
Il-KEPD jirrakkomanda li l-Artikolu 6 tal-Proposta jiġi emendat, f'konformità mad-Direttiva 95/46/KE, kif ġej:
|
56. |
Il-KEPD jirrakkomanda wkoll li ssir referenza għal din il-konsultazzjoni fil-premessi tal-Proposta. |
57. |
Fid-dawl ta’ dak ta’ hawn fuq, il-KEPD jirrakkomanda li l-awtoritajiet tal-protezzjoni tad-data, b'mod partikolari permezz tal-Grupp ta' Ħidma tal-Artikolu 29, u l-KEPD huma involuti mill-qrib f'inizjattivi relatati mal-varar tas-SIT, permezz ta' konsultazzjoni fi stadju suffiċjentement bikri qabel l-iżvilupp ta' miżuri rilevanti. |
Magħmul fi Brussell, 22 ta’ Lulju 2009.
Peter HUSTINX
Kontrollur Ewropew għall-Protezzjoni tad-Data
(1) COM(2008) 886 finali. Il-Kunsill adotta konklużjonijiet dwar il-Komunikazzjoni fl-2935 laqgħa tal-Kunsill dwar it-Trasport, it-Telekomunikazzjoni u l-Enerġija fit-30 u l-31 ta' Marzu 2009.
(2) COM(2008) 887 finali.
(3) Ir-Regolament (KE) Nru 45/2001 tal-Parlament Ewropew u tal-Kunsill tat-18 ta' Diċembru 2000 dwar il-protezzjoni ta' individwu fir-rigward tal-ipproċessar ta' data personali mill-istituzzjonijiet u l-korpi tal-Komunità u dwar il-moviment liberu ta' din id-data, ĠU L 8, 12.1.2001, p. 1.
(4) Hemm ħafna inizjattivi fil-livell tal-UE li jintegraw is-SIT ma' diversi modi ta' trasport li jinkludu t-trasport bl-ajru (SESAR), in-navigazzjoni (RIS), il-ferrovija (ERTMS, TAF-TSI), it-tbaħħir (VTMIS, AIS, LRIT), u t-trasport bit-triq (eToll, eCall), ara COM(2008) 886 finali p.3.
(5) L-Artikolu 4 tal-Proposta jipprevedi d-definizzjoni tal-miżuri tekniċi fl-oqsma li ġejjin: (i) l-aħjar użu ta' data dwar it-toroq, it-traffiku u l-ivvjaġġar, (ii) il-kontinwità ta' servizzi tas-SIT tal-ġestjoni tat-traffiku u tal-merkanzija fuq kurituri Ewropej u fil-konurbazzjonijiet, (iii) is-sigurtà u s-sikurezza tat-toroq, u (iv) l-integrazzjoni tal-vettura fl-infrastruttura tat-trasport.
(6) Il-Proposta tipprevedi proċedura regolatorja bi skrutinju, f’konformità mal-Artikolu 5(a)(1) sa (4) u l-Artikolu 7 tad-Deċiżjoni 1999/468/KE.
(7) Ir-riżoluzzjoni leġiżlattiva tal-Parlament Ewropew tat-23 ta' April 2009 dwar il-proposta għal Direttiva tal-Parlament Ewropew u tal-Kunsill li tistabbilixxi l-qafas biex jiġi varat l-użu ta' Sistemi Intelliġenti tat-Trasport fil-qasam tat-trasport bit-triq u għall-interfaċċji ma' modi oħra ta' trasport, T6-0283/2009.
(8) Opinjoni tal-Kumitat Ekonomiku u Soċjali Ewropew dwar il-Proposta għal Direttiva tal-Parlament Ewropew u tal-Kunsill li tistabbilixxi qafas biex jiġi varat l-użu ta' Sistemi Intelliġenti tat-Trasport fil-qasam tat-trasport bit-triq u għall-interfaċċji ma’ modi oħra ta’ trasport, TEN/382, 13 ta' Mejju 2009.
(9) Opinjoni tal-Kontrollur Ewropew għall-Protezzjoni tad-Data dwar il-Proposta għal Direttiva tal-Parlament Ewropew u tal-Kunsill li tiffaċilita l-infurzar transkonfini fil-qasam tas-sigurtà tat-toroq, 2008/C 310/02, ĠU C 310, 5.12.2008, p. 9.
(10) Id-dokument ta' ħidma tal-Grupp ta' Ħidma tal-Artikolu 29 dwar il-protezzjoni tad-data u l-implikazzjonijiet tal-privatezza fl-inizjattiva tal-eCall, Grupp ta' Ħidma 125, 26 ta' Settembru 2006. http://ec.europa.eu/justice_home/fsj/privacy/docs/wpdocs/2006/wp125_en.pdf
(11) Direttiva 95/46/KE tal-Parlament Ewropew u tal-Kunsill tal-24 ta’ Ottubru 1995 dwar il-protezzjoni ta’ individwi fir-rigward tal-ipproċessar ta’ data personali u dwar il-moviment liberu ta’ dik id-data, ĠU L 281, 23.11.1995, p. 31.
(12) Direttiva 2002/58/KE tal-Parlament Ewropew u tal-Kunsill tat-12 ta' Lulju 2002 dwar l-ipproċessar tad-data personali u l-protezzjoni tal-privatezza fis-settur tal-komunikazzjoni elettronika (Direttiva dwar il-privatezza u l-komunikazzjoni elettronika), ĠU L 201,31.7.2002, p. 37.
(13) F’konformità mal-Artikoli 2(d), 6(2) u 23 tad-Direttiva 95/46/KE, imsemmija fin-nota 11 f'qiegħ il-paġna.
(14) Ara l-Grupp ta' Ħidma 125 dwar l-eCall, p. 4, imsemmi fin-nota 10 f'qiegħ il-paġna.
(15) Kif imniżżel fil-premessa 26 tad-Direttiva 95/46/KE, “biex jiġi ddeterminat jekk persuna hijiex identifikabbli, għandu jittieħed kont tal-mezzi kollha li x'aktarx huwa raġenevoli li għandhom jintużaw jew mill-kontrollur jew minn kwalunkwe persuna oħra biex tiġi identifikata l-persuna msemmija.”
(16) L-emenda 34 li tintroduċi Artikolu ġdid 6(1)(b) tipprovdi: “Id-data personali għandha tiġi pproċessata biss sakemm l-ipproċessar ikun meħtieġ għat-twettiq tal-applikazzjoni u/jew is-servizz tas-SIT. ”
(17) L-emenda 36 iżżid mal-Artikolu 6(2) t-test li ġej: “u ma jistgħux jintużaw għal għanijiet oħra barra dawk imsemmijin f'din id-Direttiva. ”
(18) Prinċipalment l-Artikolu 3.3 (c) tad-Direttiva 1999/5/KE tal-Parlament Ewropew u tal-Kunsill tad-9 ta’ Marzu 1999 dwar it-tagħmir tar-radju u tagħmir terminali ta’ telekomunikazzjonijiet u r-rikonoxximent reċiproku tal-konformità tagħhom.
(19) L-Aqwa Tekniki Disponibbli għandhom ifissru l-istadju l-aktar effettiv u avvanzat fl-iżvilupp tal-attivitajiet u l-metodi ta' operazzjoni tagħhom li jindikaw l-adattabbiltà prattika ta' tekniki partikolari biex fil-prinċipju tiġi pprovduta l-bażi għall-applikazzjonijiet u s-sistemi tas-SIT biex ikunu konformi mar-rekwiżit tal-privatezza, il-protezzjoni tad-data u s-sigurtà fil-qafas regolatorju tal-UE.
(20) Pereżempju, iż-żamma tad-data dwar it-traffiku u d-data dwar il-lokazzjoni proċessata b'konnessjoni mal-provvista ta' servizzi pubblikament disponibbli ta' komunikazzjoni elettronika fin-netwerks ta' komunikazzjoni pubblika hija rregolata fid-Direttiva 2006/24/KE tal-Parlament Ewropew u tal-Kunsill tal-15 ta' Marzu 2006 dwar iż-żamma ta' data ġenerata jew proċessata b'konnessjoni mal-provvista ta' servizzi pubblikament disponibbli ta' komunikazzjoni elettronika jew ta' networks ta' komunikazzjoni pubblika u li temenda d-Direttiva 2002/58/KE.
(21) Ara n-nota 15 f'qiegħ il-paġna.
(22) Ara wkoll il-kummenti tal-KEPD dwar il-Komunikazzjoni tal-Kummissjoni dwar l-interoperabbiltà tal-bażijiet tad-data Ewropej, 10 ta' Marzu 2006. http://www.edps.europa.eu/EDPSWEB/webdav/site/mySite/shared/Documents/Consultation/Comments/2006/06-03-10_Interoperability_EN.pdf
(23) Ara l-kwistjonijiet dwar il-privatezza u l-protezzjoni tad-data mqajmin mill-użu tar-RFID fl-Opinjoni tal-Kontrollur Ewropew għall-Protezzjoni tad-Data dwar il-komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali u lill-Kumitat tar-Reġjuni dwar “l-identifikazzjoni bil-frekwenza tar-radju (RFID) fl-Ewropa: passi lejn qafas ta' politika” COM(2007) 96, ĠU C 101, 23.4.2008, p.1. http://www.edps.europa.eu/EDPSWEB/webdav/site/mySite/shared/Documents/Consultation/Opinions/2007/07-12-20_RFID_EN.pdf
(24) Il-Grupp ta' Ħidma tal-Artikolu 29, Opinjoni dwar l-użu tad-data tal-lokazzjoni bil-ħsieb tal-forniment ta' servizzi b'valur miżjud, Grupp ta' Ħidma 115, Novembru 2005. http://ec.europa.eu/justice_home/fsj/privacy/docs/wpdocs/2005/wp115_en.pdf
(25) Ara l-Grupp ta' Ħidma 125 dwar l-eCall, p.5, imsemmi fin-nota 10 f'qiegħ il-paġna.
(26) Ara n-nota 13 f'qiegħ il-paġna.