52009DC0334

[pic] | KUMMISSJONI TAL-KOMUNITAJIET EWROPEJ |

Brussel 8.7.2009

KUMM(2009) 334 finali

RAPPORT MILL-KUMMISSJONI LILL-PARLAMENT EWROPEW U LILL-KUNSILL

dwar l-applikazzjoni tar-Regolament (KE) Nru 882/2004 tal-Parlament Ewropew u tal-Kunsill tad-29 ta' April 2004 dwar il-kontrolli uffiċjali mwettqa biex tiġi żgurata l-verifikazzjoni tal-konformità mal-liġi tal-għalf u l-ikel, mas-saħħa tal-annimali u mar-regoli dwar il-welfare tal-annimali

WERREJ

1. Sinteżi eżekuttiva 3

2. L-AMBITU TAR-REGOLAMENT (KE) Nru 882/2004 4

2.1. Leġiżlazzjoni settorjali dwar kontrolli uffiċjali: residwi ta' mediċini veterinarji u ta' pestiċidi 4

2.2. Saħħa tal-Pjanti 6

3. IL-QAGĦDA ATTWALI TAL-IMPLIMENTAZZJONI 6

3.1. Linji Gwida tal-Kummissjoni 6

3.2. Pjanijiet Multiannwali Nazzjonali ta' Kontroll (MANCPs) u rapporti annwali 7

3.3. Verifiki Ġenerali 7

3.4. Kontrolli uffiċjali fuq għalf u ikel importati 7

3.5. L-Artikolu 23 dwar l-approvazzjoni ta' verifiki qabel l-esportazzjoni 9

3.6. Taħriġ Aħjar għal Ikel Aktar Sikur 10

3.7. Laboratorji ta’ Referenza Komunitarji (CRLs) 11

3.8. Aġġornamenti tekniċi 11

4. ĦLASIJIET 12

4.1. Il-Kuntest 12

4.2. L-Ambitu tal-valutazzjoni 12

4.3. Konklużjonijiet ewlenin li jirriżultaw mill-istudju 13

4.4. Xenarji għal bidla 13

1. SINTEżI EżEKUTTIVA

L-Artikolu 65 tar-Regolament (KE) Nru 882/2004 tal-Parlament Ewropew u tal-Kunsill tad-29 ta' April 2004 dwar il-kontrolli uffiċjali mwettqa biex tiġi żgurata l-verifikazzjoni tal-konformità mal-liġi tal-għalf u l-ikel, mas-saħħa tal-annimali u mar-regoli dwar il-welfare tal-annimali[1] (ir-"Regolament Uffiċjali dwar il-Kontrolli", minn hawn 'il quddiem: l-"OCR" jeħtieġ li l-Kummissjoni tippreżenta rapport lill-Parlament Ewropew u lill-Kunsill, b'mod partikolari biex tiġi analizzata l-esperjenza miksuba mill-applikazzjoni tar-Regolament.

Dan ir-rapport għandu jitratta l-kwistjonijiet li ġejjin:

"(a) il-valutazzjoni mill-ġdid tal-ambitu, fir-rigward tas-saħħa tal-annimali u tal-benessri tal-annimali;

(b) l-assigurazzjoni li setturi oħra jikkontribwixxu għall-iffinanzjar ta' kontrolli uffiċjali billi tiġi estiża l-lista ta' attivitajiet imsemmija fl-Anness IV, taqsima A u fl-Anness V, taqsima A u jiġi meqjus b'mod partikolari l-impatt tal-leġisżazzjoni Komunitarja dwar l-iġjene fl-għalf u fl-ikel wara li tiġi adottata;

(c) l-iffissar ta' rati minimi aġġornati għal ħlasijiet imsemmija fl-Anness IV, taqsima B u fl-Anness V, sezzjoni B, filwaqt li jiġu meqjusa b'mod partikari l-fatturi ta' riskju".

Fir-rigward tal-ambitu tar-Regolament, f'dak li għandu x'jaqsam mas-saħħa tal-annimali u l-benessri tal-annimali, l-esperjenza miksuba ma tagħtix lok għal analiżi tal-ambitu tar-Regolament kif definit fil-preżent fl-Artikolu 1. Min-naħa l-oħra, diskussjonijiet li għadhom għaddejjin fid-dawl tal-modernizzazzjoni u s-simplifikazzjoni taż-żewġ setturi sinifikanti jistgħu jgħinu jikkjarifikaw ir-relazzjoni bejn il-qafas ġenerali stabbilit bir-Regolament u l-leġiżlazzjoni settorjali eżistenti. B'mod partikolari dan hu l-każ fir-rigward tal-attivitajiet ta' analiżi li għaddejjin bħalissa imwettqa bħala segwitu għall-Istrateġija dwar is-Saħħa tal-Annimali (2007-2013)[2], li għandhom l-għan li, fost l-oħrajn, jistabbilixxu qafas regolatorju waħdieni għas-saħħa tal-annimali ("Liġi dwar is-Saħħa tal-Annimali"), u dawk l-attivitajiet li se jirriżultaw mill-analiżi tal-acquis eżistenti dwar is-Saħħa tal-Pjanti (Strateġija dwar is-Saħħa tal-Pjanti) li se ssir dalwaqt. Minbarra dan, għandha tingħata konsiderazzjoni għall-bżonn li jiġi żgurat li dispożizzjonijiet settorjali Komunitarji eżistenti li japplikaw għall-kontroll tal-attivitajiet f'oqsma speċifiċi (per eżempju, dwar residwi ta' mediċini veterinarji u ta' pestiċidi) jkunu konsistenti mal-prinċipji u r-rekwiżiti tar-Regolament. Taqsima 2 tar-rapport titratta din il-kwistjoni.

Taqsima 3 ta' dan ir-rapport tagħti rendikont tal-azzjonijiet ewlenin u tal-inizjattivi żviluppati fl-implimentazzjoni ta' dan ir-Regolament, filwaqt li tagħti ħarsa lejn l-esperjenza miksuba mill-1 ta' Jannar 2006. L-Istati Membri qed jiksbu progressivament esperjenza prattika fil-preparazzjoni u fl-implimentazzjoni tal-pjanijiet ta' kontroll Multi-annwali tagħhom (MANCPs), li qed jintużaw ukoll mill-Uffiċċju Alimentari u Veterinarju (FVO) fil-qafas tal-missjonijiet regolari tiegħu ta' Verifiki Ġenerali. Rapporti Nazzjonali Annwali huma wkoll karatteristika importanti tal-qafas il-ġdid għall-kontrolli uffiċjali stabbilit mill-OCR għalkemm l-esperjenza b'dawn it-tip ta' rapporti hija wisq limitata biex tippermetti li ssir analiżi fil-fond f'dan l-istadju jew li jkun hemm xi konklużjoni għalissa.

L-Artikolu 65 jeħtieġ li tingħata attenzjoni speċjali lill-kwistjoni ta' ħlasijiet miġbura għall-iffinanzjar ta' kontrolli uffiċjali ("ħlasijiet għall-ispezzjoni"). It- Taqsima 4 ta' dan ir-rapport tagħti rendikont tal-qagħda attwali ta' diskussjonijiet u riflessjonijiet dwar din il-kwistjoni pjuttost kumplessa, abbażi tar-riżultati ta' studju riċenti li sar mill-Kummissjoni minn evalwatur estern.

L-istudju inkwistjoni jipprovdi lill-Kummissjoni b'perspettiva siewja ta' kif qed titħaddem is-sistema ta' ħlasijiet fil-preżent, jidentifika xi nuqqasijiet fil-qafas leġiżlattiv li fil-preżent japplika għall-ħlasijiet għall-ispezzjoni u fl-implimentazzjoni tiegħu mill-Istati Membri u jiddiskuti l-possibbiltà li jkun hemm bżonn li ssir analiżi ta' xi wħud mill-karatteristiċi ta' dak il-qafas. Skont l-istudju, jistgħu jiġu kkunsidrati numru ta' alternattivi possibbli għall-bidla, biex jippermettu lill-Istati Membri jiżguraw ruħhom li l-għan stipulat fl-Artikolu 26 tal-OCR jiġi attwat, skont liema " L-Istati Membri għandhom jiżguraw ruħhom li riżorsi finanzjarji xierqa jkunu disponibbli biex jipprovdu l-persunal neċessarju u riżorsi oħra għal kontrolli uffiċjali". Għal-liema jissuġġerixxi xenarji li jista' jkun hemm fil-futur, li jvarjaw minn armonizzazzjoni kompleta tal-karatteristiċi tas-sistema ta' ħlasijiet għal aktar flessibilità għall-Istati Membri fl-implimentazzjoni tas-sistema, filwaqt li jiżguraw ruħhom li jkun hemm trasparenza u ċarezza fil-mod ta' kif titħaddem is-sistema madwar l-Istati Membri.

Hija meħtieġa aktar analiżi fuq il-kwistjonijiet li semma dan l-istudju, inkluż diskussjoni pubblika ma' msieħba dwar ir-riżultati tal-valutazzjoni li saret, u evalwazzjoni tal-impatt tal-alternattivi disponibbli għal bidla. Il-Kummissjoni beħsiebha tagħti bidu għal din l-evalwazzjoni tal-impatt matul l-2009.

2. L-AMBITU TAR-REGOLAMENT (KE) NRU 882/2004

2.1. Leġiżlazzjoni settorjali dwar kontrolli uffiċjali: residwi ta' mediċini veterinarji u ta' pestiċidi

Għalkemm kontrolli uffiċjali jinkludu wkoll kontrolli fuq residwi ta' mediċini veterinarji u ta' pestiċidi, l-OCR jirreferi għan-neċessità li l-aktar regoli speċifiċi li jeżistu fil-qasam tal-għalf u tal-ikel u tas-saħħa tal-annimali jibqgħu fis-seħħ, u jistipula li b'mod partikolari għandha tinżamm id-Direttiva tal-Kunsill 96/23/KE dwar miżuri biex jimmonitorjaw ċerti sustanzi u r-residwi tagħhom[3] u d-Direttiva tal-Kunsill 86/362/KEE tal-24 ta' Lulju 1986 dwar l-iffissar tal-livelli massimi għar-residwi ta' pestiċida ġo u fuq iċ-ċereali[4], li sussegwentament ġiet irrevokata mir-Regolament (KE) Nru 396/2005 tal-Parlament Ewropew u tal-Kunsill tat-23 ta' Frar 2005 dwar il-livelli massimi ta' residwu ta' pestiċidi fi jew fuq ikel u għalf li joriġina minn pjanti u annimali[5] u jemenda d-Direttiva tal-Kunsill 91/414/KEE.

Id-Direttiva 96/23/KE teħtieġ li l-Istati Membri jimplimentaw pjanijiet nazzjonali għall-kontroll tar-residwu li jkunu ppreżentati annwalment lill-Kummissjoni flimkien mar-riżultati tal-implimentazzjoni tas-sena preċedenti u l-azzjonijiet meħuda bħala segwitu għar-riżultati li ma jkunux konformi. Tistabbilixxi wkoll in-numru minimu ta' kampjuni li se jkunu analizzati għal kull prodott tal-ikel skont il-produzzjoni nazzjonali mingħajr ma jiġu meqjusa elementi oħra li jista' jkollhom impatt fuq l-evalwazzjoni ta' riskju (eż. prattiki ta' trobbija, prodotti mediċinali awtorizzati, eċċ). Barra minn residwi ta' mediċini veterinarji u pestiċidi, l-Annessi I u II għad-Direttiva 96/23/KE jinkludu wkoll kontaminanti ambjentali[6] fost il-grupp ta' sustanzi li għandhom ikunu kkontrollati fil-qafas ta' pjanijiet għall-kontroll ta' residwu.

Kien diġa' ġie ppubblikat Dokument ta' Riflessjoni fl-2003 li nieda proċess wiesgħa ta' konsultazzjoni dwar l-aspetti tekniċi tad-Direttiva[7]. Matul dan il-proċess l-imsieħba esprimew interess kbir f'analiżi ta' din id-Direttiva u fil-kjarifika tal-linja ta’ demarkazzjoni bejn kontrolli ta' mediċini veterinarji u kontaminanti in ġenerali sabiex tiġi żgurata konformità mal-OCR.

Ir-Regolament (KE) Nru 396/2005 dwar il-pestiċidi fih għadd ta' artikoli li għandhom x'jaqsmu b'mod dirett ma' kontrolli (l-Artikoli 26-30), li għandhom l-għan li jivverifikaw b'mod każwali konformità mal-livelli massimi ta' residwi (MRLs) f'livell Komunitarju, ikkumplimentati minn miri ta' kontroll fil-livell tal-Istati Membri. Ir-Regolament (l-Artikoli 31-32) fih ukoll rekwiżiti għal rappurtaġġ annwali. Xi ftit differenzi fl-approċċ meħud bejn ir-Regolament (KE) Nru 396/2005 u d-dispożizzjonijiet tal-OCR huma r-riżultat ta' negozjati interistituzzjonali li saru fl-istess żmien b'mod separat u li wasslu għall-adozzjoni taż-żewġ atti.

Bil-ħsieb tal-għan li jkun hemm regolament aħjar, għandha tingħata konsiderazzjoni lill-possibbiltà li permezz tal-bdil leġiżlattiv neċessarju jkun hemm integrazzjoni tar-regoli li fil-preżent japplikaw għal kontrolli uffiċjali fuq pestiċidi, kontaminanti u residwi ta' sustanzi farmakoloġikament attivi fl-ikel mal-qafas tal-OCR, sabiex il-qafas leġiżlattiv komprensiv jiġi irrazjonalizzat u ssimplikat filwaqt li jagħti lok għall-flessibilità neċessarja sabiex tiġi żgurata l-integrazzjoni taż-żewġ setturi fil-MANCPs tal-Istati Membri.

2.2. Saħħa tal-Pjanti

Fis-settur dwar is-Saħħa tal-Pjanti, id-Direttiva tal-Kunsill 2000/29/KE dwar il-miżuri protettivi kontra l-introduzzjoni ġewwa l-Komunità ta' organiżmi ta' ħsara għall-prodotti tal-pjanti u kontra t-tixrid tagħhom ġewwa l-Komunità[8] tistabbilixxi regoli dwar kontroll settorjali. Kontrolli uffiċjali f'dak il-qasam għaldaqstant m'humiex irregolati mill-OCR għajr għad-dispożizzjonijiet li japplikaw għall-iffissar ta', u rappurtaġġ annwali fuq, MANCPs u għall-ispezzjonijiet Komunitarji fi ħdan l-Istati Membru u pajjiżi terzi (l-Artikoli 41 sa 46).

Bħala parti minn eżerċizzju aktar ġenerali li għandu l-għan li jivvaluta l-acquis eżistenti fil-qasam tas-Saħħa tal-Pjanta[9], għandha tingħata konsiderazzjoni lill-bżonn li d-dispożizzjonijiet ikunu konformi ma' kontrolli uffiċjali tad-Direttiva 2000/29/KE u dawk tal-OCR.

3. IL-QAGĦDA ATTWALI TAL-IMPLIMENTAZZJONI

3.1. Linji Gwida tal-Kummissjoni

L-OCR tintroduċi numru ta' obligazzjonijiet ġodda għall-Istati Membri dwar l-ippjanar, l-ivverifikar u r-rappurtaġġ tal-attivitajiet ta' kontroll uffiċjali tagħhom. Il-Kummissjoni b'konformità mal-Artikolu 43 tal-OCR ħejjiet linji gwida biex tgħin lill-Istati Membri jilħqu dawn ir-rekwiżiti. Id-Deċiżjonijiet tal-Kummissjoni li ġejjin kienu adottati għal dan l-iskop:

- Id-Deċiżjoni tal-Kummissjoni 2006/677/KE tad-29 ta' Settembru 2006 li tistabbilixxi linji ta' gwida li jistipulaw il-kriterji għat-twettiq tal-verifiki skont ir-Regolament (KE) Nru 882/2004 tal-Parlament Ewropew u tal-Kunsill dwar kontrolli uffiċjali mwettqa sabiex jivverifikaw konformità mal-liġi tal-għalf u tal-ikel, mas-saħħa tal-annimali u l-benessri tal-annimali[10].

- Id-Deċiżjoni tal-Kummissjoni 2007/363/KE tal-21 ta' Mejju 2007 dwar linji ta' gwida li jgħinu lill-Istati Membri jħejju l-pjan waħdieni integrat multi-annwali nazzjonali ta’ kontroll previst fir-Regolament (KE) Nru 882/2004 tal-Parlament Ewropew u tal-Kunsill[11].

- Id-Deċiżjoni tal-Kummissjoni 2008/654/KE tal-24 ta' Lulju 2008 dwar linji ta' gwida li jgħinu lill-Istati Membri jħejju r-rapport annwali dwar il-pjan waħdieni integrat multiannwali nazzjonali ta' kontroll previst fir-Regolament (KE) Nru 882/2004 tal-Parlament Ewropew u tal-Kunsill[12].

Il-Kummissjoni torganizza regolarment gruppi ta' ħidma biex tkompli tiżviluppa l-implimentazzjoni tal-linji gwida u biex tipprovdi għajnuna lill-Istati Membri fil-preparazzjoni tagħhom tal-MANCPs, rapporti u verifiki.

3.2. Pjanijiet Multiannwali Nazzjonali ta' Kontroll (MANCPs) u rapporti annwali

Skont l-Artikoli 41 u 42 tal-OCR, l-Istati Membri huma meħtieġa jippreparaw u jimplimentaw pjan multi-annwali nazzjonali ta' kontroll (MANCP) sa mhux aktar mill-1 ta' Jannar 2007 u jipprovdu lill-Kummissjoni b'kopja aġġornata meta mitluba jagħmlu dan.

L-Istati Membri kollha pprovdew lill-Kummissjoni bil-MANCPs tagħhom u qed ikunu valutati fil-qafas tal-Verifiki Ġenerali tal-Uffiċċju Alimentari u Veterinarju (FVO) (ara l-kapitolu 3.3).

Skont l-Artikolu 44, sena wara l-bidu tal-implimentazzjoni tal-MANCPs, u sussegwentament kull sena, l-Istati Membri għandhom jippreżentaw lill-Kummissjoni rapport li jindika kull emenda tal-MANCPs, ir-riżultati tal-kontrolli u tal-verifiki, it-tip u n-numru ta' każijiet li ma kkonformawx u l-azzjonijiet meħuda biex jiġi żgurat li jkun hemm operazzjoni u nfurzar effettiv. Sa issa, il-Kummissjoni rċeviet ir-rapporti annwali ta' 26 Stat Membru (il-Portugall għadu ma ppreżentax rapport annwali peress li l-ewwel MANCP ma kienx imqiegħed f'postu sal-2008 minħabba ristrutturar fis-servizzi ta' kontroll tiegħu u għaldaqstant l-ewwel rapport se jiġi magħmul fiċ-ċiklu ta' rapporti għall-2009.

3.3. Verifiki Ġenerali

L-Artikolu 45 tal-OCR jeħtieġ li l-esperti tal-Kummissjoni jwettqu verifiki ġenerali u speċifiċi fl-Istati Membri biex jivverifikaw li qed isiru kontrolli uffiċjali fl-Istati Membri b'konformità mal-MANCPs u mal-liġi Komunitarja.

L-FVO tal-Kummissjoni jagħmel il-verifiki ġenerali tal-Istati Membri fuq ċiklu ta' tliet snin. Fl-2007 ġew imwettqa verifiki ġenerali fl-Awstrija u fl-Olanda u fl-2008 f'sitt Stati Membri oħra (l-Ġermanja, l-Estonja, l-Ungerija, l-Irlanda, l-Islovakkja u Spanja). Disa' Stati Membri se jkunu soġġetti għal Verifika Ġenerali fl-2009 (il-Belġju, Cipru, il-Finlandja, il-Greċja, il-Latvja, il-Litwanja, il-Portugall, is-Slovenja u r-Renju Unit). L-għaxar Stati Membri l-oħra se jiġu vverifikati fl-2010.

Qed jiġu ppubblikati r-rapporti finali ta' wara l-Verifika Ġenerali u jistgħu jinsabu fl-indirizz li ġej: http://ec.europa.eu/food/fvo/ir_search_en.cfm

3.4. Kontrolli uffiċjali fuq għalf u ikel importati

Għandhom jitwettqu kontrolli uffiċjali kemm fuq ikel, għalf u annimali prodotti mill-Komunità u anki fuq dawk importati biex tkun ivverifikata l-konformità mal-liġi dwar l-għalf u l-ikel u mar-regoli dwar il-benessri tal-annimali u s-saħħa tal-annimali. Id-dispożizzjonijiet stipulati f'Titolu II, Kapitolu V u Titolu VI, Kapitolu II tal-OCR joħolqu l-qafas u l-proċeduri ġenerali li japplikaw għal kontrolli uffiċjali fuq għalf u ikel importati fit-territorju tal-Komunità minn pajjiżi terzi.

It-Titolu II, Kapitolu V tar-Regolament (KE) Nru 882/2004 fih regoli uniformi li japplikaw għal:

( azzjonijiet li għandhom jittieħdu mill-awtoritajiet kompetenti wara li jkunu saru kontrolli uffiċjali fuq importazzjoni ta' għalf u ikel, bħal per eżempju, fil-każ ta' suspett jew ta' nuqqas ta' konformità li tkun ġiet stabbilita (l-Artikoli 18 sa 22);

( approvazzjoni ta' spezzjonijiet qabel l-esportazzjoni mwettqa minn pajjiżi terzi bil-ħsieb li jnaqqsu l-frekwenza tal-kontrolli fuq l-affarijiet importati (l-Artikolu 23);

( kooperazzjoni meħtieġa bejn awtoritajiet kompetenti fis-sanità u servizzi tad-dwana għall-organizzazzjoni ta' kontrolli uffiċjali (l-Artikolu 24).

L-Artikolu 25 jagħti s-setgħa lill-Kummissjoni, permezz tal-proċedura stabbilita fid-Deċiżjoni tal-Kunsill 1999/468/KE (proċedura tal-Komitoloġija)[13], biex tadotta l-miżuri neċessarji biex tiżgura ruħha li jkun hemm implimentazzjoni uniformi tal-kontrolli uffiċjali fuq għalf u ikel importati.

L-OCR tirrikonoxxi l-ispeċifitajiet ta' kontrolli li għandhom jitwettqu fuq għalf u ikel li joriġina mill-annimali (l-Artikolu 14) għal kuntrarju tal-għalf u l-ikel li ma joriġinax mill-annimali (l-Artikoli 15 sa 17). Fir-rigward ta' dan tal-ewwel, ir-Regolament jirrikonoxxi l-validità tal-qafas eżistenti ta' proċeduri armonizzati ta' importazzjoni stabbilit mid-Direttiva tal-Kunsill 97/78/KE[14] u mwettaq min-netwerk tal-Postijiet ta’ Spezzjoni fuq il-Fruntiera stabbilita madwar il-fruntieri esterni tal-Komunità. Ir-Regolament jeħtieġ li l-awtorità kompetenti maħtura skont id-Direttiva 97/78/KE twettaq ukoll kontrolli biex tivverifika konformità ma' aspetti tal-liġi dwar l-għalf u l-ikel li m'humiex koperti b'din id-Direttiva.

Il-Kummissjoni, bħala parti mill-Istrateġija l-ġdida tagħha dwar is-Saħħa tal-Annimali (2007 - 2013), fil-preżent qegħda tirrevedi l-kontrolli veterinarji tagħha fuq importazzjonijiet biex tkun tista' tipprovdi approċċ ibbażat aktar fuq riskju għal spezzjonijiet tal-fruntieri. L-analiżi se tindirizza x'inhu l-aħjar mod sabiex tiġi żgurata twissija kmieni u żvelar fil-pront ta' riskji minn prodotti li ġejjin mill-annimali biex jkunu jistgħu jiġu applikati miżuri ta' importazzjoni biex jiżguraw il-kontinwazzjoni ta' livell għoli ta' ħarsien tas-saħħa tan-nies u tal-annimali fi ħdan l-UE.

Kuntrarju ta' x'jiġri fil-preżent għall-għalf u l-ikel li joriġina mill-annimali, għalf u ikel li ma joriġinax mill-annimali m'humiex soġġetti għal kontrolli sistematiċi u armonizzati tal-UE fil-fruntieri qabel ma jiġu importati fil-Komunità (bl-eċċezzjoni ta' dawk il-prodotti għal liema diġa' hemm miżuri ta' emerġenza bbażati fuq l-Artikolu 53 (1) tar-Regolament KE Nru 178/2002[15]). Skont id-dispożizzjonijiet stipulati fl-Artikolu 15 tal-OCR għandu jkun hemm kontrolli fuq għalf u ikel li ma joriġinawx mill-annimali li huma importati f'post xieraq, inkluż il-punt tad-dħul fil-Komunità, il-punt ta' rilaxx għal ċirkulazzjoni ħielsa, imħażen, il-postijiet tal-operatur tan-negozji tal-importazzjoni tal-għalf u tal-ikel jew punti oħra tal-katina tal-għalf u tal-ikel. L-Istati Membri jiddeċiedu, abbażi tal-evalwazzjoni tar-riskju, l-aktar frekwenza xierqa u l-modalitajiet ta' kontrolli uffiċjali li għandu jkun hemm fuq prodotti importati.

Devjazzjoni mir-regoli ġenerali hija msemmija f'paragrafu 5 tal-istess Artikolu 15, li jistipula li għandha ssir lista tal-għalf u tal-ikel li ma joriġinawx mill-annimali li, abbażi ta' riskju li hu magħruf jew li qed ifeġġ, għandha tkun soġġetta għal livell miżjud ta' kontrolli uffiċjali fil-punt tad-dħul fil-Komunità. Fl-x.x.2009 [għandha tiġi aġġornata qabel il-publikazzjoni] ġie adottat abbozz ta' Regolament li għandhu l-għan li jistabbilixxi dispożizzjonijiet ġenerali u tali lista għall-ewwel darba.

Ir-regoli ta' hawn fuq huma kkumplimentati b'dawk tat-Titolu VI, Kapitoli I u II tal-OCR li jistabbilixxu l-proċeduri minn liema l-Kummissjoni tiġbor tagħrif rilevanti fir-rigward il-livell ta' konformità tas-sistemi ta' pajjiżi terzi mal-istandards Komunitarji għall-għalf u l-ikel (Artikoli 46 u 47), u tiddeċiedi liema, jekk dawn jeżistu, kondizzjonijiet speċifiċi ta' importazzjoni għandhom jiġu imposti fuq għalf u ikel li huma permessi jidħlu fil-Komunità (l-Artikolu 48).

Informazzjoni rilevanti tinġabar ukoll permezz tal-missjonijiet tal-FVO f'pajjiżi terzi (l-Artikolu 46) u permezz ta' kwestjonarji ta' qabel il-missjoni mibgħuta qabel dawn il-missjonijiet imsemmija li jipprovdu b'mod partikolari tagħrif dwar l-organizazzjoni tal-pajjiż u l-ġestjoni ta' kontrolli sanitarji.

Sakemm il-kundizzjonijiet u proċeduri dettaljati għall-importazzjoni m'humiex diġa' stipulati mil-leġiżlazzjoni Komunitarja, (b'mod partikolari mir-Regolament (KE) Nru 854/2004[16]), kundizzjonijiet speċifiċi ta' importazzjoni jistgħu jiġu stabbiliti skont il-proċedura tal-Komitoloġija. Dawn jistgħu jinkludu l-iffissar ta' lista ta' pajjiżi terzi minn fejn jistgħu jiġu importati prodotti speċifiċi fil-Komunità, l-iffissar ta' mudelli ta' ċertifikati li jkunu mal-kunsinni u/jew kundizzjonijiet oħra speċjali ta' importazzjoni li jiddependi fuq it-tip ta' prodott jew annimal u r-riskji possibbli assoċjati (l-Artikolu 48).

Ir-Regoli li japplikaw għall-konklużjoni ta' ftehimijiet ekwivalenti ma' pajjiżi terzi huma stipulati fl-Artikolu 49. Dawn il-ftehimijiet jistgħu jirrikonoxxu li miżuri li pajjiżi terzi japplikaw f'oqsma speċifiċi joffru garanziji ekwivalenti għal dawk applikati fil-Komunità, sakemm pajjiżi terzi ifornu prova oġġettiva f'dan ir-rispett.

3.5. L-Artikolu 23 dwar l-approvazzjoni ta' verifiki qabel l-esportazzjoni

L-Artikolu 23 tal-OCR jagħti l-possibbiltà lill-Kummissjoni biex tapprova, b'konformità mal-proċedura msemmija fl-Artikolu 62 (3) tar-Regolament, verifiki speċifiċi qabel l-esportazzjoni mwettqa minn pajjiż terz qabel ma prodott (għalf u ikel) jiġi esportat lejn il-Komunità. Bħala konsegwenza tal-approvazzjoni ta verifiki qabel l-esportazzjoni, il-frekwenza ta' kontrolli fuq għalf jew ikel għall-importazzjoni tista' tonqos.

L-approvazzjoni ta' verifiki qabel l-esportazzjoni għal pajjiż terz tista' tingħata bil-kundizzjoni li

- verifika Komunitarja wriet li għalf jew ikel esportat lill-Komunità jissodisfa r-rekwiżiti Komunitarji jew rekwiżiti ekwivalenti

- verifiki qabel l-esportazzjoni mwettqa fil-pajjiż terz huma effettivi u effiċjenti biżżejjed biex jistgħu jieħdu post jew jippermettu t-tnaqqis tal-verifiki fuq dokumentazzjoni, fuq identità u dawk fiżiċi li jsiru abbażi tal-leġiżlazzjoni Komunitarja.

Fi kliem ieħor, verifiki qabel l-esportazzjoni li huma approvati jiggarantixxu li qed isiru kontrolli b'konformità mar-rekwiżiti rilevanti stipulati fil-liġi Komunitarja.

L-approvazzjoni ta' verifiki qabel l-esportazzjoni abbażi tal-Artikolu 23 tal-OCR ma jaffetwax id-dritt tal-awtorità kompetenti tal-Istati Membri li tagħmel kontrolli uffiċjali fuq għalf u ikel importat. Minkejja dan, l-eżistenza ta' skema approvata għal verifiki qabel l-esportazzjoni għandha tkun ikkunsidrata mill-awtoritajiet kompetenti tal-Istati Membri meta jiġu biex jiddeċiedu l-frekwenza ta' verifiki fiżiċi li għandhom jitwettqu fuq l-ikel u l-għalf. Tali frekwenza hija ddeterminata abbażi tar-riskji assoċjati mat-tipi differenti ta' għalf u ikel, il-garanziji offruti mill-pajjiż terz li jesporta, il-kontrolli li jitwettqu mill-operatur ta' negozju tal-għalf jew tal-ikel li jimporta l-prodott, l-istorja ta' konformità mar-rekwiżiti tal-pajjiż terz għall-prodott ikkonċernat u l-iffissar tal-oriġini u tal-operaturi ta' negozju tal-ikel u tal-għalf li jimportaw jew jesportaw il-prodott.

Id-Deċiżjoni tal-Kummissjoni 2008/47/KE tal-20 ta' Diċembru 2007 li tapprova l-verifiki qabel l-esportazzjoni li twettqu mill-Istati Uniti tal-Amerika fuq karawett u prodotti li ġejjin minnu fir-rigward tal-preżenza tal-aflatossini[17] hija l-unika Deċiżjoni tal-Kummissjoni li tat approvazzjoni għal skema bħal din s'issa.

3.6. Taħriġ Aħjar għal Ikel Aktar Sikur

L-Artikolu 51 tal-OCR jagħti s-setgħa lill-Kummissjoni biex torganizza taħriġ kemm għall-persunal tal-awtoritajiet kompetenti tal-Istati Membri u anki ta' pajjiżi terzi li jieħdu sehem fil-liġi dwar l-ikel u l-għalf, is-saħħa tal-annimali, il-benessri tal-annimali u r-regoli dwar is-saħħa tal-pjanti. B'konformità ma' dan l-artikolu, il-Kummissjoni niedet inizjattiva ta' Taħriġ Aħjar għal Ikel aktar Sikur, li issa qegħda fit-tielet sena ta' attività. Ir-riżultati tat-tieni sena kienu ppubblikati fir-rapport annwali tal-inizjattiva:http://ec.europa.eu/food/training_strategy/annual_report2007/index_en.htm.

Fl-aħħar tal-2008, kważi 7,500 parteċipant ibbenefikaw direttament minn dan it-taħriġ ipprovdut fi ħdan l-inizjattiva, minn liema 52 % ġew minn Stati Membri, 13 % minn Pajjiżi Kandidati, Pajjiżi Kandidati Potenzjali., pajjiżi ta' l-Assoċjazzjoni Ewropea tal-Kummerċ Ħieles u pajjiżi tal-Politika Ewropea tal-Viċinat u 35 % minn pajjiżi terzi oħra. Il-livelli ta' partiċipazzjoni għandhom jiżdiedu fis-snin li ġejjin, biex jilħqu medja ta' 6,000 partiċipant kull sena.

F'Settembru 2006, il-Kummissjoni adottat Komunikazzjoni lill-Kunsill u lill-Parlament Ewropew dwar Taħriġ Aħjar għal Ikel aktar Sikur[18], fejn l-ambitu u l-għan tal-inizjattiva u tal-istrateġija tagħha għal żvilupp fil-futur huma spjegati. B'konformità mal-konklużjonijiet tal-Komunikazzjoni u mar-riżultati ta' analiżi spiża/benefiċċju li twettqet minn konsulent indipendenti, il-Kummissjoni ddeċidiet li tiddelega xogħlijiet ta' implimentazzjoni tal-programm lill-"Aġenzija Eżekuttiva għas-Saħħa u l-Konsumaturi"[19].

3.7. Laboratorji ta’ Referenza Komunitarji (CRLs)

L-Anness VII mal-OCR stabbilixxa lista konsolidata ta' laboratorji Komunitarji ta' riferenza (CRLs) għall-għalf u l-ikel u s-saħħa tal-annimali, li tinkludi laboratorji li ġew maħtura qabel minn diversi atti settorjali u CRLs ġodda f'oqsma li m'humiex diġa' koperti. Minn Lulju 2005. il-Kummissjoni niedet tlett sejħiet għall-għażla u l-ħatra ta' CRLs ġodda.

Dan ippermetta ż-żieda mal-lista fl-Anness VII tal-CRLs il-ġodda li ġejjin:

- CRLs ġodda fis-setturi ta': marda tal-ilsien u d-dwiefer, Bruċellożi, Listeria monocytogenes, Istafilokokki Coagulażi-pożittivi, Escherichia coli inkluża dik li tipproduċi l-Verotoxigenic E.coli (VTEC), Campylobacter, parassiti ( b'mod partikolari Trichinella, Echinococcus, Anisakis), reżistenza antimikrobjali, proteini ta’ l-annimali pproċessati u għalf, residwi tal-pestiċidi, mikotossini fl-ikel u l-għalf, dijossini u PCBs u Idrokarboni Polikicliċi Aromatiċi (PAHs)[20].

- CRL għal mard tal-ekwini għajr għall-marda Afrikana taż-żwiemel[21].

- CRLs għal mard tal-krustaċji, l-idrofobija u t-tuberkolożi tal-ifrat, li jistipula responsabbilitajiet u ħidmiet supplimentari għal CRL għal idrofobija u t-tuberkolożi tal-ifrat[22]

3.8. Aġġornamenti tekniċi

L-istandard EN ISO/IEC 17020 jieħu post EN 45004

Skont l-Artikolu 5 tal-OCR l-awtorità kompetenti tista' tiddelega ħidmiet speċifiċi li għandhom x'jaqsmu ma' kontrolli uffiċjali lil korp ta' kontroll wieħed jew aktar skont ċerti rekwiżiti. Dawn il-korpi ta' kontroll għandhom jaħdmu u jkunu b'konformità mal-Istandards Ewropej, b'mod partikolari mal-istandard EN dwar «Kriterja ġenerali għall-operazzjoni ta' tipi varji ta' korpi li jwettqu l-ispezzjoni». L-istandards EN 45004 ta' qabel ġew mibdula bl-EN ISO/IEC 17020. L-OCR għandha għalhekk tiġi emendata skont dan. Il-Kummissjoni qegħda tipprepara emenda fil-preżent, li għandha tiġi adottata bi proċedura ta' komitoloġija, tal-OCR biex tirrifletti l-bidliet fl-istandards tal-ISO.

L-istandard EN ISO/IEC 17011 jieħu post EN 45002 u EN 45003

Skont l-Artikolu 12 (1-2) tal-OCR, l-awtorità kompetenti taħtar laboratorji li jistgħu jagħmlu analiżi tal-kampjuni meħuda matul kontrolli uffiċjali u dawn il-laboratorji kellhom jiġu akkreditati b'konformità ma' ċerti Standards Ewropej. L-EN 45002 preċedenti dwar " Kriterji Ġenerali għall-valutazzjoni ta' laboratorji għall-ittestjar " u EN 45003 dwar " Kalibrazzjoni u sistema ta' akkreditazzjoni għal-laboratorji tal-ittestjar - Rekwiżiti ġenerali għall-operazzjoni u l-għarfien " ġew mibdula bl-istess EN ISO/IEC 17011 dwar " Rekwiżiti ġenerali għall-korpi ta' akkreditazzjoni li jakkreditaw korpi ta' valutazzjoni tal-konformità ", u l-OCR ġiet emendata skont dan[23].

4. ĦLASIJIET

4.1. Il-Kuntest

L-Artikolu 65 tal-OCR jeħtieġ li r-Rapport preżenti jagħti attenzjoni speċjali lill-kwistjoni ta' ħlasijiet miġbura għall-iffinanzjar ta' kontrolli uffiċjali ("ħlasijiet għall-ispezzjoni").

Sabiex tkun tista' tirrapporta fuq din il-kwistjoni kumplessa, il-Kummissjoni talbet għal valutazzjoni esterna bil-għan li tipprovdi għarfien aħjar tal-iffunzjonar tas-sistemi ta' ħlasijiet għall-ispezzjoni kif implimentati fil-preżent mill-Istati Membri abbażi tad-dispożizzjonijiet rilevanti tal-OCR (l-Artikoli 26 sa 29).

Il-valutazzjoni ("l-istudju") kienet imwettqa minn kuntrattur fil-perjodu ta' April-Novembru 2008 permezz ta' stħarriġ indirizzat lill-awtoritajiet kompetenti fl-Istati Membri kollha, analiżi fil-fond (analiżi ta' każijiet) fir-rigward ta' sitt Stati Membri li jirrapreżentaw varjetà ta' reġimi ta' ħlasijiet, intervisti ma' esperti ewlenin u imsieħba fil-livell tal-UE, analiżi estensiva ta' litteratura eżistenti u analiżi ta' dejta (inkluż rapporti ta' FVO rilevanti u leġiżlazzjoni nazzjonali).

Ir-riżultati tal-istudju kienu finalizzati u saru disponibbli għall-Kummissjoni fi Frar 2009.

4.2. L-Ambitu tal-valutazzjoni

L-għanijiet tal-istudju kienu doppji:

(a) biex jivvaluta s-sitwazzjoni preżenti fir-rigward tal-applikazzjoni ta' dispożizzjonijiet eżistenti fuq ħlasijiet, b'mod partikolari l-mod ta' kif is-sistema topera fil-prattika;

(b) biex jevalwa l-vantaġġi u l-iżvantaġġi ta' medda ta' alternattivi politiċi (fir-rigward tal-ambitu tar-regoli attwali u l-mekkaniżmu li jistabbilixxi l-ħlas).

Il-valutaturi kienu mitluba wkoll biex jidentifikaw s-saħħiet u d-dgħjufija ewlenin tas-sistema fil-preżent, kif ukoll problemi u nuqqasijiet ewlenin li għandhom jiġu indirizzati fil-futur. Huma ħarsu b'mod partikolari lejn kif l-Artikoli 26 sa 29 tal-OCR huma implimentati fil-preżent u kif is-sistema ta' ħlas, kif inhi applikata fil-preżent, tikkontribwixxi għall-kisba tal-għanijiet tal-OCR.

4.3. Konklużjonijiet ewlenin li jirriżultaw mill-istudju

L-istudju stabbilixxa li hemm grad sinifikanti ta' varjazzjoni fl-infurzar tad-dispożizzjonijiet ta' iffinanzjar tal-OCR mill-Istati Membri u nuqqas sinifikanti ta' ċarezza u trasparenza tas-sistemi varji nazzjonali ta' ħlas kif implimentati fil-preżent. Bħala riżultat ta' dan, tqabbil dirett tal-livelli ta' ħlasijiet attwali madwar l-UE (u bejn is-setturi) hija estremament diffiċli.

Ir-riżultati tal-istudju jissuġġerixxu li, minħabba d-definizzjoni wiesgħa ta' kategoriji ta' spiża fl-Anness VI mar-Regolament u n-nuqqas irrappurtat ta' trasparenza tal-metodi ta' kalkolazzjoni, mhux daqstant ċar jekk ħlasijiet ibbażati fuq l-ispiża verament jirriflettux l-ispejjeż attwali li jkunu saru mill-awtoritajiet kompetenti tal-Istati Membri għall-prestazzjoni tal-ispezzjonijiet li għalihom ikunu qed jinġabru l-ħlasijiet.

F'termini aktar ġenerali, l-istudju investiga jekk l-għan ewlieni tas-sistema għall-ħlasijiet għall-ispezzjoni kienx f'postu fil-mument meta sar, jiġifieri jiżgura ruħu li l-Istati Membri għandhom riżorsi finanzjarji biżżejjed biex iwettqu kontrolli uffiċċjali (l-Artikolu 26 tar-Regolament). L-istudju jissuġġerixxi li l-għan ewlieni għadu ma ntlaħaqx kompletament fil-preżent għall-UE kollha.

4.4. Xenarji għal bidla

Abbażi tas-sejbiet irrappurtati, l-istudju jevalwa l-vantaġġi u l-iżvantaġġi ta' medda ta' alternattivi politiċi u jqabbel alternattivi possibbli mar-regoli fil-preżent.

Bħala ipoteżi ta' ħidma, l-istudju jikkunsidra iż-żewġ xenarji estremi li ġejjin:

- "sussidjarjetà sħiħa", li tkun timplika r-revoka ta' ħafna mil-limitazzjonijiet stabbiliti fil-qafas legal eżistenti, fir-rigward b'mod partikolari tal-kalkolazzjoni tal-ħlasijiet u l-ambitu tal-ħlasijiet mandatorji; l-Istati Membri jkunu ħielsa biex jiddeċiedu fuq l-aħjar mod ta' kif jiffinanzjaw is-servizzi tagħhom ta' kontrolli uffiċjali;

- "armonizzazzjoni sħiħa", bi ħlasijiet stabbiliti fl-istess livell madwar l-Unjoni Ewropea kollha u għas-setturi kollha kkonċernati (identifikati mil-leġiżlazzjoni Komunitarja).

L-istudju imbagħad jevalwa l-vantaġġi u l-iżvantaġġi ta' xenarji intermedjarji, li jirriżultaw miż-żieda ta' elementi ta' mitigazzjoni mal-aktar żewġ alternattivi radikali. L-analiżi issir b'mod partikolari meta wieħed iqis kif il-komponenti ewlenin ta' qafas leġiżlattiv fuq ħlasijiet ta' spezzjoni jkunu kkaratterizzati fuq skala minn "sussidjarjetà sħiħa" għal "armonizzazzjoni sħiħa". Tali komponenti ewlenin huma b'mod partikolari:

( natura mandatorja/mhux mandatorja tal-ħlas

( livell armonizzat/mhux armonizzat tar-rati ta' ħlas

( metodu ta' kalkolu ta' ħlas armonizzat/mhux armonizzat

( tnaqqis fil-ħlas u penali għal nuqqas ta' konformità armonizzat /mhux armonizzat

( lista' ta' attivitajiet koperti mill-ħlasijiet (ambitu tas-sistema).

Tingħata konsiderazzjoni wkoll għall-possibbiltà li tinżamm is-sistema kif inhi imma b'xi ftit titjib biex jindirizzaw, sa kemm hu possibbli, in-nuqqasijiet irrappurtati.

Il-Kummissjoni issa se twettaq Evalwazzjoni tal-Impatt biex tivvaluta l-alternattivi disponibbli u l-bżonn biex tipprepara proposta leġiżlattiva. Din se tinkludi konsultazzjoni ta' msieħba u partijiet oħra interessati.

Dettalji kompluti tar-riżultati tal-istudju dwar ħlasijiet huma ppubblikati fl-indirizz li ġej: [biex timtela].[pic][pic][pic][pic][pic][pic]

[1] ĠU L 165, 30.4.2004, p. 1.

[2] Strateġija ġdida dwar is-Saħħa tal-Annimali għall-Unjoni Ewropea (2007-2013) fejn “Il-prevenzjoni hija aqwa mill-kura”. Komunikazzjoni mill-Kummissjoni lill-Kunsill, lill-Parlament Ewropew, lill-Kumitat Ekonomiku u soċjali Ewropew u lill-Kumitat tar-Reġjuni COM 539 (2007) finali.

[3] ĠU L 125, 23.5.2006, p. 10.

[4] ĠU L 221, 7.8.1986, p. 37.

[5] ĠU L 70, 16.3.2005, p. 1.

[6] Ir-Regolament (KEE) Nru 315/93 tat-8 ta' Frar 1993 li jistabbilixxi l-proċeduri Komunitarji għall-kontaminanti fl-ikel jiddefinixxi kontaminant bħala kwalunkwe sustanza li hi miżjuda mal-ikel mhux b'mod intenzjonali li hi preżenti f'dan it-tali ikel bħala riżultat tal-produzzjoni (inklużi l-operazzjonijiet imwettqa fl-agrikoltura tal-uċuħ tar-raba’, trobbija tal-annimali u mediċina veterinarja), tal-manifattura, tal-ipproċessar, tal-preparazzjoni, tat-trattament, tal-ippakkjar, tal-imballaġġ, tat-trasport jew ta' żamm ta’ tali ikel, jew bħala riżultat ta' kontaminazzjoni ambjentali. Monitoraġġ ta' kontaminanti oħra għajr dawk inklużi fl-annessi mad-Direttiva 96/23/KE huwa organizzat fil-qafas tal-leġislazzjoni dwar kontaminanti.

[7] Bħala riżultat ta' dan ir-Regolament (KE) Nru 2377/90 ġie emendat mir-Regolament (KE) Nru xxx/2009 tal-Parlament Ewropew u tal-Kunsill li jistabbilixxi Proċeduri Komunitarji għall-iffissar ta' limiti ta' residwi ta' sustanzi farmakoloġikament attivi fl-oġġetti tal-ikel li joriġinaw mill-annimali (COD 2007/0064).

[8] ĠU L 169, 10.7.2000, p. 1 .

[9] Il-Kunsill talab lill-Kummissjoni biex tivvaluta l-acquis dwar is-saħħa tal-pjanti fil-preżent u biex tikkunsidra tibdil possibbli fih, u sussegwentament biex tippreżenta proposta għal strateġija Komunitarja dwar is-saħħa tal-pjanti. Il-Kummissjoni niedet il-valutazzjoni, u għandu jinbeda studju sa nofs l-2009.

[10] ĠU L 278, 10.10.2006, p. 15.

[11] ĠU L 138, 30.5.2007, p. 24.

[12] ĠU L 214, 9.8.2008, p. 56.

[13] Id-Deċiżjoni tal-Kunsill 1999/468/KE tat-28 ta' Ġunju 1999 li tistipula l-proċeduri għall-eżerċizzju tas-setgħat tal-implimentazzjoni konferiti fuq il-Kummissjoni, ĠU L 184, 17.7.1999, p. 23 .

[14] Id-Direttiva tal-Kunsill 97/78/KE tat-18 ta' Diċembru 1997 li tistabbilixxi l-prinċipji li jirregolaw l- organizzazzjoni ta' verifiki veterinarji fuq prodotti deħlin fil-Komunità minn pajjiżi terzi - ĠU L 24, 30.1.1998, p. 9.

[15] Ir-Regolament tal-Parlament Ewropew u tal-Kunsill (KE) Nru 178/2002 tat-28 ta' Jannar 2002 li jistabbilixxi l-prinċipji ġenerali u l-ħtiġijiet tal-liġi dwar l-ikel, li jistabbilixxi l-Awtorità Ewropea dwar is-Sigurtà fl-Ikel u jistabbilixxi l-proċeduri fi kwistjonijiet ta' sigurtà tal-ikel, ĠU L 31, 1.2.2002, p 1 .

[16] Ir-Regolament (KE) Nruº854/2004 tal-Parlament Ewropew u tal-Kunsill tad-29ºta’ºAprilº2004 li jistabbilixxi regoli speċifiċi għall-organizzazzjoni ta' kontrolli uffiċjali fuq prodotti li joriġinaw mill-annimali maħsuba għall-konsum uman – ĠU L 139, 30.4.2004, p. 206 ikkoreġut u ppubblikat mill-ġdid fil-ĠU L 226, 25.6.2004, p. 83.

[17] ĠU L 11, 15.1.2008, p. 12.

[18] COM (2006) 519, 20.09.2006, disponibbli onlajn f': http://ec.europa.eu/food/training/communication_final_report_en.pdf

[19] Deċiżjoni tal-Kummissjoni 2008/544/KE tal-20 ta’ Ġunju 2008 li temenda d-Deċiżjoni 2004/858/KE sabiex tbiddel "L-Aġenzija Eżekuttiva għall-Programm ta' Saħħa Pubblika" f’ "L-Aġenzija Eżekuttiva għas-Saħħa u l-Konsumaturi", ĠU L 173, 3.7.2008, p. 27.

[20] Ir-Regolament tal-Kummissjoni (KE) Nru 776/2006 tal-23 ta' Mejju 2006. ĠU L 136, 24.5.2006, p. 3.

[21] ir-Regolament tal-Kummissjoni (KE) Nru 180/2008 tat-28 ta’ Frar 2008. ĠU L 56, 29.2.2008, p. 4.

[22] ir-Regolament tal-Kummissjoni (KE) Nru 737/2008 tat-28 ta’ Lulju 2008. ĠU L 201, 30.7.2008, p. 29.

[23] Ir-Regolament tal-Kummissjoni (KE) Nru 1029/2008 tal-20 ta' Ottubru 2008 jemenda r-Regolament (KE) Nru 882/2004 tal-Parlament Ewropew u tal-Kunsill biex jaġġorna riferenza għal ċerti standards Ewropej. ĠU L 278, 21.10 . 2008, p. 6 .