7.12.2004   

MT

Il-Ġurnal Uffiċjali ta’ l-Unjoni Ewropea

C 302/70

1.1

Il-komunikazzjoni sottomessa għall-opinjoni tikkonċerna prinċipalment it-taxxa tad-dividendi li jirċievu individwi għat-titoli ta' investiment tagħhom.

1.2

Din hi segwitu għall-komunikazzjoni marbuta ma' l-istudju dwar it-Tassazzjoni ta' l-Intrapriżi, (1) li kien diġà qed jipproponi li jkunu ddefiniti linji gwida li jikkonċernaw l-applikazzjoni tad-deċiżjonijiet prinċipali tal-Qorti Ewropea tal-Ġustizzja) f'dan il-qasam, u fil-każ tad-dividendi li jirċievu individwi, jirreferi għad-deċiżjoni Verkooijen (2). L-inklużjoni ta' dividendi li ħerġin jew deħlin f'pajjiż taħt iċ-ċaqliq ħieles tal-kapital hi xi ħaġa ġdida, id-dividendi mhumiex imsemmija espressivament fit-Trattat jew fid-Direttiva.

1.3

Id-diverġenzi, fis-sistemi fiskali tal-pajjiżi membri, li jikkonċernaw 'it-tassazzjoni doppja fuq it-tqassim ta' biċċa mill-profitti (profit-sharing) tal-kumpaniji lill-azzjonisti taħt forma ta' dividendi (3)' jikkostitwixxu sors ta' diskriminazzjoni importanti, kif ukoll ostakolu għaċ-ċirkolazzjoni libera tal-kapitali fi ħdan is-suq uniku.

1.4

Il-linji-gwida proposti dwar ir-riperkussjoni li għandu d-dritt komunitarju fuq il-metodi ta' tassazzjoni tad-dividendi użati fl-Istati membri jimmiraw għalhekk, fid-dawl tal-ġurisprudenza tal-Qorti msemmija hawn fuq, biex ikunu eliminati r-restrizzjonijiet li jiltaqgħu magħhom l-individwi minħabba t-tassazzjoni fuq id-dħul minn ishma miżmuma bħala titoli ta' investiment. Il-proposta tfittex ukoll li jitnaqqsu rati ta' withholding tax eċċessivament għoljin fl-Istati minn fejn joriġinaw id-dividendi.

1.5

L-għan hu 'li jkunu megħjunin dawn (l-Istati membri) sabiex jissorveljaw il-kompatibilità tas-sistemi fiskali tagħhom ma' l-obbligi tas-suq intern b'konformità mal-prinċipji tat-Trattat dwar iċ-ċirkolazzjoni ħielsa tal-kapitai.

1.6

Jekk l-Istati Membri ma jaċċettawx il-metodu propost sabiex jiġu eliminati l-ostakoli għaċ-ċirkolazzjoni ħielsa ta' l-ishma tat-titoli ta' investiment, il-Kummissjoni jkolla għalhekk tirreferi għall-Artikolu 226 tat-Trattat tal-KE fir-rwol tagħha ta' għassiesa tat-trattati.

1.7

Hu meħtieġ li jiġi mfakkar li l-Qorti tista' ssib fil-kliem tal-mistoqsijiet interlokutarji magħmula minn imħallef nazzjonali, fid-dawl tal-fatti esponuti minnu, l-elementi li jiddependu fuq id-dritt komunitarju, bl-iskop li tingħata possibbiltà lil dan l-imħallef li jsolvi l-problema ġudizzjarja li fiha jkun jinsab maqbud (4).

2.1

It-tassazzjoni fuq ir-riżultati tas-soċjetà kummerċjali tinkludi t-taxxa tal-korporazzjoni, li r-rata tagħha tvarja skond il-pajjiżi bejn 12.5 u 40 % (bejn medja ta' 30 %). It-tassazzjoni tad-dividendi mqassma fuq il-profitti wara t-taxxa fuq soċjetajiet kummerċjali (IS) tista' ssir fis-sors u tkun imnaqqsa mid-dividend mqassam, iżda tkun ukoll maqbuda mill-IRPP b'rata marġinali jew skond rata distinta.

2.2

It-tassazzjoni tar-riżultati tas-soċjetajiet kummerċjali u ta' dak tad-dividendi toħloq, skond il-Kummissjoni 'tassazzjoni ekonomika doppja', u barra minn hekk l-individwi jkunu qed jissograw ukoll tassazzjoni legali intenazzjonali doppja (tassazzjoni minn żewġ pajjiżi differenti fuq dividendi li huma jkunu qed jirċievu minn barra l-pajjiż).

2.2.1

Il-mudell tal-konvenzjoni ta' l-OEDP, ipproponut biex tiġi evitata t-tassazzjoni legali internazzjonali doppja ma jittrattax it-tassazzjoni ekonomika doppja.

2.2.2

Fuq il-bażi tal-konvenzjoni mudell ta' l-OECD it-taxxa, li tkun diġà mħallsa fis-sors fuq dividendi fl-ewwel pajjiż, għandha tkun imħallsa fil-pajjiż ta' residenza fiskali ta' l-azzjonist, taħt forma ta' kreditu ordinarju limitat għal taxxa li tista' tkun li trid tingħata minnu fuq dividendi fil-pajjiż ta' residenza fiskali tiegħu.

2.2.3

Il-mudell OECD japplika, skond il-Kummissjoni, għas-sistemi ta' tassazzjoni fuq id-dividendi, taħt forma pura jew mħallta (sistema klassika, klassifikata, tassazzjoni, eżenzjoni).

3.1

Fis-sentenza tal-Qorti marbuta mal-każ Verkooijen, li kien dwar ir-rifjut li jingħata lil dan ta' l-aħħar benefiċċju ta' eżenzjoni mit-taxxa fuq id-dħul tad-dividendi ta' l-ishma mħallsa minn soċjetà kummerċjali stabbilità fi Stat membru ieħor u mhux fl-Olanda.

3.2

Din l-eżenzjoni kienet tapplika għad-dħul ta' flus minn ishma jew titoli kummerċjali li fuqhom, it-taxxa Olandiża fuq dividendi kienet diġà miżmuma fis-sors fl-Olanda, iżda li kienet teskludi dħul ta' flus minn ishma li ġew riċevuti f'pajjiżi oħra.

3.2.1

L-ewwelnett, l-eżenzjoni kienet maħsuba bħala miżura mmirata biex ittejjeb il-livell tal-valuri ta' l-ishma ta' l-intrapriżi u tqajjem l-interess ta'persuni privati fl-ishma Olandiżi; it-tieni, b'mod partikulari għall-investituri ż-żgħar, l-eżenzjoni kellha bħala objettiv li tikkumpensa sa ċertu punt it-tassazzjoni ekonomika doppja permezz ta' eżenzjoni ta' elf guldens.

3.2.1.1

Fl-istampa sħiħa ta' tassazzjoni tad-dħul tas-Sur Verkooijen, l-ispettur tat-taxxi ma applikax l-eżenzjoni tad-dividendi, billi kkalkula li s-Sur Verkooijen ma kellux dritt għaliha għaliex id-dividendi li hu kien tħallas “… ma kinux ġew sottomessi għat-taxxa Olandiża fuq id-dividendi”.

3.2.2

Mistoqsija mit-tribunal nazzjonali kompetenti f'kwistjonijiet interlokutorji, il-Qorti kkalkulat li l-introjtu ta' dividendi barranin kienu b'mod indissolubbli marbut ma' moviment ta' kapitali; għalhekk it-trattament fiskali differenti u anqas vantaġġi tad-dividendi deħlin minn barra meta mqabbla mad-dividendi domestiċi jikkostituxxi limitazzjoni li ma' tħallix iċ-ċirkulazzjoni ħielsa tal-kapital.

3.2.2.1

Il-Qorti speċifikat li provvediment leġislatiiv bħalma kien dan li dwaru nqalgħet il-kwistjoni “…għandu bħala effett li jiddisswadi liċ-ċittadini ta' Stati Membri li jkunu qed joqogħdu fl-Olanda milli jinvestu l-kapitali tagħhom f'soċjetajiet kummerċjali li għandhom il-kwartieri tagħhom fi Stat Membru ieħor”.

3.2.2.2

“Provvediment bħal dan joħloq ukoll effett restrittiv għal soċjetajiet kummerċjali stabbiliti fi Stati membri oħra għaliex hu jikkostitwixxi fil-konfront tagħhom ostakolu għal ġabra ta' kapitali fl-Olanda.”

3.3

Fil-każ Schmid (5), l-Avukat Ġenerali nnota li d-dividendi li kienu ġejjin minn ishma ta' oriġini barranija, li fl-Awstrija mhumiex sottomessi għaż-żamma fis-sors sabiex ikunu meħlusa mit-taxxa fuq id-dħul tal-kapitali, kienu, bħala konsegwenza, kollha kemm huma sottomessi għat-taxxa tad-dħul (income tax) u ma setgħux, minħabba f'hekk jibbenefikaw mill-applikazzjoni ta' rata ta' tassazzjoni mnaqqsa bin-nofs. L-Avukat Ġenerali kkonkluda li f'dan il-każ kien hemm ksur għaċ-ċirkulazzjoni ħielsa tal-kapital.

4.1

Fi kwistjonijiet fiskali, l-Istati Membri żammew il-ġurisdizzjoni. Artikoli 56 u 58 tat-Trattat li jistabbilixxi l-Komunità Ewropea li huma attwalment applikati jiffisaw għaldaqstant il-limiti ta' din il-kompetenza nazzjonali, li ma tistax tikser libertà fundamentali u l-anqas ma tista' toqogħod iddur madwar il-liġi kommunitarja: Artikolu 56 jimpedixxi li jinħoloq ostakolu għaċ-ċirkulazzjoni ħielsa tal-kapital, filwaqt li Artikolu 58 jagħraf li jekk il-provvedimenti fiskali nazzjnonali jistgħu 'jistabbilixxu distinzjoni bejn il-kontributuri li ma jinstabux fl-istess sitwazzjoni f'dak li jirrigwardja r-residenza tagħhom jew il-post fejn il-kapitali tagħhom huma investiti ' u li l-Istati jistgħu jieħdu 'il-miżuri indispensabbli sabiex iwaqqfu il-ksur tal-liġijiet u tar-regolamenti tagħhom, notevolment f'kwistjoni fiskali jew f'dak li hu kontroll prudenti ta' l-istabbilimenti finanzjarji.... jew... jieħdu miżuri ġustifikati minn raġunijiet marbuta ma' l-ordni u mas-sigurtà pubblika', jeħtieġ xorta waħda li l-miżuri meħuda minnhom għal dawn l-għanijiet ma jkunux qed 'jikkostitwixxu mod ta' diskriminazzjoni arbitrarja jew restrizzjoni moħbija li tillimita ċ-ċirkulazzjoni ħielsa tal-kapital u tal-ħlasijiet'.

4.2

Il-ġurisprudenza tal-Qorti titlob bażikament trattament ugwali tal-persuni taxxabbli, u tikkundanna t-tassazzjoni internazzjonali doppja.

4.3

Minħabba t-tkabbir ta' l-Unjoni, u d-differenzi tar-rati li huma aktar aċċentwati f'dak li għandu x'jaqsam ma' l-IS (taxxa fuq is-soċjetajiet kummerċjali) u l-IRPP tad-dividendi, il-Kumitat hu tal-parir li hu urġenti li jkunu mħeġġa l-Istati Membri kollha, li għadhom ma għamlux arranġamenti internazzjonali kontra t-taxxa doppja, li jagħmlu dan fuq bażi minima tal-mudell propost mill-OECD, sabiex b'hekk tinħoloq ugwaljanza fit-trattatament fil-livell nazzjonali tad-dividendi riċevuti fuq titoli ta' investiment, b'mod indipendenti mill-oriġini tagħhom fi ħdan il-Komunità.

4.4

Il-Kumitat jinnota li t-Trattat jinkludi wkoll iċ-ċirkulazzjoni tal-kapital lejn u minn pajjiżi barranin, u li ċerti numri ta' arranġamenti internazzjonali bilaterali jeżistu ukoll bejn pajjiżi membri u pajjiżi barranin.

4.5

Newtralità sħiħa ma tistax tkun milħuqa b'mod ideali, billi tgħaqqad flimkien il-kondizzjonijiet magħmula mill-komunikazzjoni, u billi tillimita lilha nfisha fl-ispazju kommunitarju. Din tista' isir biss permezz ta' rata ta' taxxa komunitarja li tkun l-istess għas-soċjetajiet kummerċjali f'sistema ta' eżenzjoni, u bil-kondizzjoni li l-kondizzjonijiet tat-tassazzjoni ta'l-IRPP ikunu kullimkien l-istess ugwali fil-pajjiżi kollha konċernati u biex b'hekk ikun ġie kkonsidrat li d-dħul minn ishma jikkostitwixxi l-uniku dħul tal-kontributur li jkun qed jinvesti f'titoli ta' investiment. Il-Kummissjoni tagħraf barra minn hekk li n-newtralità fiskali b'mod sħiħ ma tistax tkun milħuqa ħlief permezz ta' armonizzazzjoni kompluta tal-fiskalità tal-pajjiżi membri.

4.6

Is-sovranità fiskali tal-Parlamenti u ta' l-Istati, li jiddeċiedu t-tassazzjoni ta' persuni fiżiċi u morali flimkien mal-budget nazzjonali, hija storikament fil-qiegħ tad-demokraziji Ewropej. L-ugwaljanza taċ-ċittadini Ewropej quddiem it-taxxi pubbliċi tikkostitwixxi prinċipju bażiku tal-valuri kostituzzjonali. L-Istati membri għad għandhom, fil-livell attwali ta' l-integrazzjoni Ewropea, raġunijiet serji li jixtiequ jżommu, kif maħsub fit-trattati, il-kompetenzi nazzjonali tagħhom fil-qasam tat-tassazzjoni. Din is-sitwazzjoni tista' ċertament tkun żviluppata fil-futur. Il-Kumitat jixtieq għaldaqstant li l-libertà li għandhom l-Istati membri ma twassalx f'sitwazzjoni ta' dumping fiskali.

4.7

Il-Kumitat jikkonsidra li l-linji-gwida proponuti, jekk huma limitati effettivament għall-kwistjonijiet trattati mill-Qorti, jitniżżlu b'din il-kondizzjoni fl-istruttura tal-kompetenzi rispettivi tal-Kummissjoni u ta' l-Istati membri. Jekk ikun deċiż hekk, il-Parlament Ewropew u l-entitajiet komunitarji konsultattivi għandhom ikunu b'mod sħiħ involuti fil-kontinwazzjoni ta' din il-proċedura.

4.8

Fl-aħħarnett il-Kumitat jistaqsi jekk it-theddida ta' referiment għall-Qorti tal-Ġustizzja hiex verament ta' natura li tiffaċilit t-tfittxija indispensabbli ta' soluzzjonijiet; xorta waħda l-Kumitat hu favur l-Istati Membri konċernati għandhom, malajr kemm jista' jkun, jadottaw dispożizzjonijiet biex jevitaw diskriminazzjoni fuq dividendi li deħlin jew ħerġin. Din tista' barra minn hekk tmur lura għax-xewqa, li tissogra li twassal għal konfużjoni ta' poteri, li l-Qorti jingħata r-rwol ta' leġislatur fiskali komunitarju, biex b'hekk hu jaqbeż il-kompetenza li għandhom l-Istati membri.

5.1

Il-Kumitat jinnota li l-mudell ta' l-analiżi relattivament sempliċi tal-Kummissjoni ma jkoprix ħlief waħda mill-ipoteżi ta' l-investiment ta' l-ishma, dik tat-titoli ta' investimenti komposti minn ishma f'soċjetajiet kummerċjali f'bosta pajjiżi membri u dawk li mhmiex.

5.2

Il-Kumitat jirrimarka wkoll li d-dħul ta' l-ishma (stocks u shares) jistgħu wkoll ikunu ġejjin minn soċjetajiet kummerċjali ta' investiment kollettiv jew minn fondi ta' pensjonijiet, taħt forom li ma jippermettux li tkun magħrufa l-oriġini nazzjonali tad-diversi komponenti tad-dividendi tagħhom u tal-prifitti kapitali mogħtija. Barra minn hekk, regoli fiskali distinti qed jintużgħu kultant għall-profitti kapitali ta' dawn il-forom ta' investimenti u għad-dħul ta' flus mogħtija, meta mqabbla ma' dawk li għandhom x'jaqsmu mad-dħul dirett minn dividendi ta' persuna fiżika li għandha l-ishma propji tagħha. Il-Kummissjoni mhix qed tittratta dawn il-każijiet.

5.3

Il-Kumitat jistqarr li l-anqas mhi trattata fil-komunikazzjoni l-kwistjoni tat-tassazzjoni tal-profitti kapitali li tirriżulta minn profitti ta' titoli ta' investiment fil-Borża. Id-dħul mid-dividendi mhux l-uniku għan ta' l-investiment f'titoli għal individwu. Iż-żieda fil-valur tat-titoli ta' investiment fil-Borża sabiex eventwalment jinkisbu profitti tikkostitwixxi raġuni oħra kultant aktar bażika ta' l-investiment, u tipparteċipa b'mod sħiħ fl-immaniġġar ta' titoli u tad-dħul minnhom. Din il-kwistjoni trid bla dubju ta'xejn tkun ukoll studjata.

5.4

Rigward id-dibattitu dwar it-taxxa doppja, il-Kumitat jikkalkula li mhux illegali li tiddistingwi bejn persuni fiżiċi u persuni morali, indipendentament mill-metodi u mir-rati ta' tassazzjoni mħaddma fir-rigward tagħhom. Il-parti tal-qliegħ imqassam lill-azzjonisti jikkostitwixxi għal dawn ta' l-aħħar dħul ta' flus disponibbli iżda t-totalità tal-profitti ma tkunx neċessarjament il-mira ta' tqassim. Parti minnhom isservi għall-finanzjament awtonomu tas-soċjetà kummerċjali, li jagħti aktar valur lit-titoli u aktar akkwist ta' ġid lill-azzjonisti, din il-parti tal-profitti mhiex maqbuda mill-IS u l-anqas mill-IRPP fl-ipoteżi kkonsidrati mill-Kummissjoni. Għalhekk hu meħtieġ li jkun magħruf jekk dawn il-profitti kapitali humiex taxxati jew le meta jsiru l-porfitti tagħhom u f'liema kundizzjonijiet, il-komunikazzjoni ma tittrattax din il-kwistjoni li għaldaqstant hija importanti f'għajnejn il-Kumitat.

6.1

Il-Kumitat jikkalkula li t-trattament ta' tassazzjoni doppja u tat-tassazzjoni tad-dħul individwali fis-sors li jikkonċernaw d-dividendi domestiċi u d-dividendi deħlin jew ħerġin minn barra bi ħsieb li jkun qed jassiguralhom trattament mhux diskriminatorju, jikkostitwixxi għan importanti mingħajr ma jfisser li titfa' dubju fuq il-prinċipju fundamentali ta' l-ugwaljanza tal-persuni fiżiċi quddiem it-taxxi pubbliċi fil-livell nazzjonali. L-Istati membri jistgħu wkoll jikkonsidraw kooperazzjonijiet bejn il-pajjiżi li għandhom prattiċi fiskali simili, biex ikunu studjati l-aqwa prattiċi fiskali.

6.2

Il-kwistjonijiet imqajma mill-Kumitat fl-osservazzjonijiet individwali tiegħu jista' jkunu eżaminati aktar 'il quddiem, bl-iskop ta' armonizzazzjoni fiskali akbar tat-taxxa fuq kumpaniji u ta' taxxi fuq id-dħul fuq bl-għan partikolari li s-suq intern jitħaddem aħjar.

6.3

Il-Kumitat jikkalkula finalment li l-komunikazzjoni tal-Kummissjoni tiftaħ perspettiva sabiex ikunu solvuti l-problemi li huma s-suġġett ta' ħafna riferimenti għall-Qorti tal-Ġustizzja, hu jirrikkomanda li dawn ikunu evitati fil-futur, sabiex jevitaw li l-Qorti tkun mgħobbija żżejjed b'rikorsi f'dan il-qasam.