1.   Sabiex jinkiseb l-objettiv ta’ politika msemmi fl-Artikolu 2, il-mandat għandu jkun li:

(a)

jipprovdi kontribut attiv u effiċjenti mill-Unjoni għal azzjonijiet u inizjattivi li jwasslu għal riżoluzzjoni finali tal-kunflitt Iżraeljan-Palestinjan abbażi tas-soluzzjoni ta’ żewġ Stati u f’konformità mal-parametri tal-Unjoni u r-Riżoluzzjonijiet tal-UNSC rilevanti, inkluż ir-Riżoluzzjoni UNSC 2334 (2016), u li jressaq proposti għal azzjoni tal-Unjoni f’dan ir-rigward;

(b)

jiffaċilita u jżomm kuntatti mill-qrib mal-partijiet kollha tal-proċess ta’ paċi, b’mod partikolari ma’ Iżrael u l-Awtorità Palestinjana, l-atturi politiċi u l-pajjiżi rilevanti tal-Lvant Nofsani, u pajjiżi rilevanti oħra, kif ukoll man-Nazzjonijiet Uniti u organizzazzjonijiet internazzjonali rilevanti oħra, inkluż il-Lega tal-Istati Għarab u l-Kunsill ta’ Kooperazzjoni tal-Golf, sabiex jaħdem magħhom biex jissaħħaħ il-proċess ta’ paċi;

(c)	jieħu vantaġġ mix-xenarju reġjonali li qed jevolvi fil-Lvant Nofsani u b’mod partikolari n-normalizzazzjoni tar-relazzjonijiet bejn Iżrael u għadd ta’ pajjiżi Għarab, sabiex ikompli jmexxi ’l quddiem il-proċess ta’ paċi u b’hekk jikkontribwixxu għall-istabbiltà reġjonali;

(d)

jagħti attenzjoni partikolari lill-fatturi li jaffettwaw id-dimensjoni reġjonali tal-proċess ta’ paċi, inkluż l-iżviluppi relatati mal-kunflitt f’Gaża u fir-reġjun wara l-attakki terroristiċi brutali u indiskriminati mill-Ħamas kontra Iżrael fis-7 ta’ Ottubru 2023, lill-ħidma mas-sħab Għarab u lill-implimentazzjoni tal-Inizjattiva Għarbija għall-Paċi;

(e)	jappoġġa u jikkontribwixxi b’mod attiv għal negozjati ta’ paċi bejn il-partijiet, anke billi jressaq proposti f’isem l-Unjoni f’konformità mal-politika konsolidata li ilha li ġiet stabbilita fil-kuntest ta’ dawk in-negozjati;

(f)	jiżgura preżenza kontinwa tal-Unjoni fil-fora internazzjonali rilevanti;

(g)	jikkontribwixxi għall-ġestjoni tal-kriżijiet u għat-twissijiet bikrija;

(h)	jikkontribwixxi għall-implimentazzjoni ta’ ftehimiet internazzjonali milħuqa bejn il-partijiet u jaħdem flimkien magħhom diplomatikament fil-każ ta’ nuqqas ta’ konformità mat-termini ta’ dawk il-ftehimiet;

(i)

jikkontribwixxi għall-isforzi politiċi għall-promozzjoni ta’ soluzzjoni sostenibbli ladarba jieqaf il-kunflitt fl-Istrixxa ta’ Gaża, li hija parti integrali minn stat Palestinjan futur, jappoġġa r-ritorn tal-Awtorità Palestinjana lejn Gaża, inkluż billi jiffaċilita d-diskussjonijiet bejn l-Iżrael u l-Awtorità Palestinjana, u jippromwovi l-isforzi umanitarji;

(j)	jaħdem b’mod kostruttiv mal-firmatarji ta’ ftehimiet fil-qafas tal-proċess ta’ paċi sabiex jippromwovi konformità man-normi bażiċi tad-demokrazija, inkluż ir-rispett lejn id-dritt umanitarju internazzjonali, id-drittijiet tal-bniedem u l-istat tad-dritt;

(k)

jagħmel proposti għal intervent tal-Unjoni fil-Proċess ta’ Paċi fil-Lvant Nofsani u dwar l-aħjar mod biex jiġu segwiti l-inizjattivi tal-Unjoni u l-isforzi kontinwi tal-Unjoni relatati mal-proċess ta’ paċi, bħall-kontribut tal-Unjoni għar-riformi Palestinjani, l-Alleanza Globali għall-Implimentazzjoni tas-Soluzzjoni ta’ Żewġ Stati u l-aspetti politiċi tal-proġetti rilevanti tal-Unjoni għall-iżvilupp;

(l)	jinvolvu lill-partijiet biex joqogħdu lura minn azzjonijiet unilaterali li jheddu l-vijabbiltà tas-soluzzjoni ta’ żewġ stati, b’mod partikolari fit-territorju Palestinjan okkupat, inkluż permezz ta’ politika ta’ insedjament u inċitament għall-vjolenza u d-diskors ta’ mibegħda;

(m)

jikkontribwixxi għall-implimentazzjoni tal-politika tal-Unjoni dwar id-drittijiet tal-bniedem f’kooperazzjoni mar-RSUE għad-Drittijiet tal-Bniedem, inkluż il-Linji Gwida tal-Unjoni dwar id-drittijiet tal-bniedem, b’mod partikolari l-Linji Gwida tal-Unjoni dwar it-Tfal u l-Kunflitti Armati kif ukoll dwar il-vjolenza kontra n-nisa u l-bniet u l-ġlieda kontra kull forma ta’ diskriminazzjoni kontrihom, u tal-politika tal-Unjoni rigward ir-Riżoluzzjoni UNSC 1325 (2000) dwar in-Nisa, il-Paċi u s-Sigurtà;

(n)	jikkontribwixxi għal komprensjoni u viżibbiltà aħjar tar-rwol tal-Unjoni fost l-opinjonisti ewlenin fil-Lvant Nofsani;

(o)	jaħdem flimkien mar-rappreżentanti tas-soċjetà ċivili, inkluż in-nisa u ż-żgħażagħ, kif ukoll ma’ dawk involuti f’miżuri biex tinbena l-fiduċja bejn il-partijiet.

2.   Ir-RSUE għandu jappoġġa l-ħidma tar-Rappreżentant Għoli, filwaqt li jżomm ħarsa ġenerali fuq l-attivitajiet kollha tal-Unjoni relatati mal-Proċess ta’ Paċi fil-Lvant Nofsani.

1.   Ir-RSUE għandu jkun responsabbli għall-implimentazzjoni tal-mandat, filwaqt li jaġixxi taħt l-awtorità tar-Rappreżentant Għoli.

2.   Il-KPS għandu jżomm kollegament privileġġjat mar-RSUE u għandu jkun il-punt ta’ kuntatt primarju tar-RSUE mal-Kunsill. Il-KPS għandu jipprovdi gwida strateġika u direzzjoni politika lir-RSUE fil-qafas tal-mandat, mingħajr preġudizzju għas-setgħat tar-Rappreżentant Għoli.

3.   Ir-RSUE għandu jiżgura azzjoni u kooperazzjoni regolari, sistematiċi, bir-reqqa u ċari, kif ukoll koerenti u konsistenti mas-Servizz Ewropew għall-Azzjoni Esterna (SEAE) u d-dipartimenti rilevanti tiegħu.

4.   Ir-RSUE ser jagħmel żjarat regolari fir-reġjun tal-Lvant Nofsani u ser jiżgura koordinazzjoni mill-qrib mad-Delegazzjonijiet rilevanti tal-Unjoni f’dak ir-reġjun kollu, inkluż l-Uffiċċju tar-Rappreżentant tal-Unjoni f’Ġerusalemm, id-Delegazzjoni tal-Unjoni f’Tel Aviv u, permezz tagħhom, mar-rappreżentanzi diplomatiċi tal-Istati Membri.

1.   L-ammont ta’ referenza finanzjarja maħsub biex ikopri n-nefqa relatata mal-mandat (in-“nefqa”) għall-perjodu mill-1 ta’ Marzu 2025 sal-1 ta’ Ġunju 2025 għandu jkun ta’ EUR 273 229,68.

2.   In-nefqa għandha tiġi amministrata f’konformità mal-proċeduri u r-regoli applikabbli għall-baġit ġenerali tal-Unjoni.

3.   L-amministrazzjoni tan-nefqa għandha tkun soġġetta għal kuntratt bejn ir-RSUE u l-Kummissjoni. Ir-RSUE għandu jagħti rendikont lill-Kummissjoni għal kull nefqa.

1.   Fil-limiti tal-mandat u l-mezzi finanzjarji korrispondenti li jitpoġġew għad-dispożizzjoni, ir-RSUE għandu jkun responsabbli għall-assemblaġġ ta’ tim. Dak it-tim għandu jinkludi t-tagħrif espert dwar kwistjonijiet speċifiċi ta’ politika kif meħtieġ mill-mandat. Ir-RSUE għandu jżomm lill-Kunsill u lill-Kummissjoni infurmati fil-pront dwar il-kompożizzjoni tat-tim.

2.   L-Istati Membri, l-istituzzjonijiet tal-Unjoni u s-SEAE jistgħu jipproponu l-issekondar ta’ persunal biex jaħdem mat-tim tar-RSUE. Is-salarji ta’ tali persunal issekondat għandhom ikunu koperti mill-Istat Membru sekondant, mill-istituzzjoni tal-Unjoni kkonċernata jew mis-SEAE, kif xieraq. L-esperti ssekondati mill-Istati Membri mal-istituzzjonijiet tal-Unjoni jew s-SEAE jistgħu wkoll jiġu sekondati sabiex jaħdmu mat-tim tar-RSUE. Il-persunal internazzjonali b’kuntratt għandu jkollu ċ-ċittadinanza ta’ Stat Membru.

3.   Il-persunal kollu ssekondat għandu jibqa’ taħt l-awtorità amministrattiva tal-Istat Membru li ssekondatu, l-istituzzjoni tal-Unjoni li ssekondatu jew is-SEAE u għandu jwettaq dmirijietu u jaġixxi fl-interess tal-mandat.

4.   It-tim tar-RSUE għandu jitqiegħed fl-istess post tad-dipartiment rilevanti tas-SEAE, mad-Delegazzjoni tal-Unjoni f’Tel Aviv u mal-Uffiċċju tar-Rappreżentant tal-Unjoni f’Ġerusalemm sabiex ikunu żgurati l-koerenza u l-konsistenza tal-attivitajiet rispettivi tagħhom.

1.   L-Istati Membri, il-Kummissjoni, u s-Segretarjat Ġenerali tal-Kunsill għandhom jiżguraw li r-RSUE jingħata aċċess għal kwalunkwe informazzjoni rilevanti.

2.   Delegazzjonijiet tal-Unjoni u rappreżentanzi diplomatiċi tal-Istati Membri fil-Lvant Nofsani, skont il-każ, jipprovdu appoġġ loġistiku f’dak ir-reġjun.

1.   Ir-RSUE għandu japplika r-regoli stabbiliti fir-Regolament (KE) Nru 1049/2001 (2) tal-Parlament Ewropew u tal-Kunsill. Ir-Rappreżentant Għoli għandha tiddeċiedi dwar ir-regoli ta’ implimentazzjoni rilevanti li jikkonċernaw ir-RSUE.

2.   Ir-RSUE għandu jipproteġi lill-individwi fir-rigward tal-ipproċessar tad-data personali tagħhom f’konformità mar-regoli stabbiliti fir-Regolament (UE) 2018/1725 (3) tal-Parlament Ewropew u tal-Kunsill. Ir-Rappreżentant Għoli għandha tiddeċiedi dwar ir-regoli ta’ implimentazzjoni rilevanti li jikkonċernaw ir-RSUE.

1.   Ir-RSUE għandu jikkontribwixxi għall-unità, il-konsistenza u l-effikaċja tal-azzjoni tal-Unjoni u għandu jgħin sabiex jiġi żgurat li l-istrumenti kollha tal-Unjoni u l-azzjonijiet kollha tal-Istati Membri jiġu utilizzati konsistentement, sabiex jinkisbu l-objettivi ta’ politika tal-Unjoni. Għandu jintalab kuntatt mal-Istati Membri fejn xieraq. L-attivitajiet tar-RSUE għandhom jiġu kkoordinati ma’ dawk tas-Servizz Ewropew għall-Azzjoni Esterna u tas-servizzi tal-Kummissjoni. Ir-RSUE għandu jipprovdi sessjonijiet ta’ informazzjoni regolari lid-Delegazzjonijiet tal-Unjoni u lir-rappreżentanzi diplomatiċi tal-Istati Membri, inkluż l-Uffiċċju tar-Rappreżentant tal-Unjoni f’Ġerusalemm u d-Delegazzjoni tal-Unjoni f’Tel Aviv.

2.   Fuq il-post, għandu jinżamm kuntatt mill-qrib mal-Kapijiet tar-rappreżentanzi diplomatiċi tal-Istati Membri, mal-Kapijiet ta’ Delegazzjonijiet tal-Unjoni u mal-Kapijiet tal-missjonijiet tal-politika ta’ sigurtà u ta’ difiża komuni rilevanti. Huma għandhom jagħmlu kull sforz biex jgħinu lir-RSUE fl-implimentazzjoni tal-mandat. Ir-RSUE, f’koordinazzjoni mill-qrib mal-Kap tad-Delegazzjoni tal-Unjoni f’Tel Aviv u l-Uffiċċju tar-Rappreżentant tal-Unjoni f’Ġerusalemm, għandu jipprovdi lill-Kapijiet tal-Missjoni tal-Pulizija tal-Unjoni Ewropea għat-Territorji Palestinjani (EUPOL COPPS) u tal-Missjoni tal-Unjoni Ewropea ta’ Assistenza fil-Fruntieri għall-Punt ta’ Qsim ta’ Rafah (EUBAM Rafah) bi gwida politika lokali. Ir-RSUE għandu wkoll iżomm kuntatt ma’ atturi internazzjonali u reġjonali oħrajn fil-kamp.