(1)

Ir-Regolament (UE) 2023/956 jirrikjedi li l-Kummissjoni tistabbilixxi, fil-livell tal-Unjoni, bażi tad-data elettronika standardizzata u sigura għall-ġestjoni taċ-ċertifikati tas-CBAM, tad-dikjarazzjonijiet tas-CBAM, tl-applikazzjonijiet biex isiru dikjaranti tas-CBAM awtorizzati kif ukoll ir-reġistrazzjoni tal-operaturi u tal-installazzjonijiet fil-pajjiżi terzi (“operaturi”), u biex tipprovdi aċċess, trattament tal-każijiet filwaqt li tiżgura l-kunfidenzjalità tal-informazzjoni. Il-Kummissjoni diġà kisbet esperjenza fl-istabbiliment ta’ reġistru għall-finijiet tas-CBAM meta implimentat ir-Reġistru Tranżizzjonali tas-CBAM fil-kuntest tar-Regolament ta’ Implimentazzjoni tal-Kummissjoni (UE) 2023/1773 (2).

(2)

F’konformità mar-Regolament (UE) 2023/956, il-Kummissjoni trid tadotta regoli ta’ implimentazzjoni għall-funzjonament tar-reġistru tas-CBAM.

(3)

Ir-reġistru tas-CBAM jenħtieġ li jsir is-sistema għall-preżentazzjoni u għall-ġestjoni tad-dikjarazzjonijiet tas-CBAM, inklużi kontrolli, valutazzjonijiet indikattivi, u proċeduri ta’ korrezzjoni. Ir-reġistru tas-CBAM jenħtieġ li jkun fih data dwar id-dikjaranti awtorizzati tas-CBAM, l-applikanti li jippreżentaw talba biex jingħataw l-istatus ta’ dikjarant awtorizzat CBAM (“applikanti”), operaturi, u verifikaturi akkreditati tas-CBAM. L-informazzjoni dwar l-operaturi għandhom jinżammu fit-taqsima separata tar-reġistru tas-CBAM. Ir-reġistru tas-CBAM Ir-reġistru tas-CBAM għandu jinkludi wkoll l-infrastruttura tal-IT meħtieġa biex tippermetti l-kompiti analitiċi inerenti fil-funzjonijiet tal-analiżi tar-riskju tas-CBAM li l-Kummissjoni għandha twettaq.

(4)

Sabiex tiġi żgurata valutazzjoni akkurata tal-obbligi ta’ rapportar, biex l-awtoritajiet doganali jingħataw aċċess għad-data tas-CBAM għall-finijiet tal-verifika tal-formalitajiet tas-CBAM matul l-iżdoganar tal-merkanzija, u sabiex jiġu appoġġati l-analiżi tar-riskju u l-monitoraġġ tal-evitar, inkluż investigazzjoni f’konformità mal-Artikoli 15, 19 u 27 tar-Regolament (UE) 2023/956, ir-reġistru tas-CBAM jenħtieġ li jkun interoperabbli mas-sistemi doganali eżistenti u jenħtieġ li b’mod partikolari jiskambja d-data miġbura permezz ta’ sorveljanza f’konformità mal-Artikolu 56(5) tar-Regolament (UE) Nru 952/2013 tal-Parlament Ewropew u tal-Kunsill (3). Għalhekk, ir-reġistru tas-CBAM jenħtieġ li juża skambji standardizzati ta’ data mas-sistemi doganali eżistenti.

(5)

Sabiex tiġi żgurata sistema ta’ rapportar effettiva u uniformi, jenħtieġ li jiġu stabbiliti arranġamenti tekniċi għall-funzjonament tar-reġistru tas-CBAM. Tali arranġamenti jinkludu arranġamenti għall-iżvilupp tar-reġistru tas-CBAM, interfaċċi, protezzjoni tad-data, aġġornament tad-data, limitazzjoni tal-ipproċessar ta’ data, sjieda tas-sistema u sigurtà, kif ukoll ittestjar u użu, manutenzjoni u modifiki potenzjali. Tali arranġamenti jenħtieġ li jkunu kompatibbli mal-prinċipju tal-protezzjoni tad-data mid-disinn u b’mod prestabbilit, previsti fl-Artikolu 27 tar-Regolament (UE) 2018/1725 tal-Parlament Ewropew u tal-Kunsill (4) u l-Artikolu 25 tar-Regolament (UE) 2016/679 tal-Parlament Ewropew u tal-Kunsill (5), kif ukoll mas-sigurtà tal-ipproċessar prevista fl-Artikolu 33 tar-Regolament (UE) 2018/1725 u l-Artikolu 32 tar-Regolament (UE) 2016/679.

(6)

Sabiex jiġi żgurat l-aċċess għar-reġistru tas-CBAM, jenħtieġ li tintuża s-sistema tal-Ġestjoni Uniformi tal-Utenti u tal-Firma Diġitali (UUM&DS, Uniform User Management and Digital Signature), kif imsemmi fl-Artikolu 16 tar-Regolament ta’ Implimentazzjoni tal-Kummissjoni (UE) 2023/1070 (6), għall-ġestjoni tal-proċess tal-awtentikazzjoni u tal-verifika tal-aċċess għall-applikanti, għad-dikjaranti awtorizzati tas-CBAM, kif ukoll għar-rappreżentanti tal-awtoritajiet kompetenti. Għal finijiet tekniċi, l-applikanti biex isiru dikjaranti awtorizzati tas-CBAM, id-dikjaranti awtorizzati tas-CBAM, jew il-persuni li għalihom ġie revokat l-istatus ta’ dikjaranti awtorizzati tas-CBAM, jenħtieġ li jitħallew jiddelegaw aċċess lil persuna li taġixxi f’isimhom filwaqt li tibqa’ responsabbli għat-twettiq tal-obbligi stabbiliti fir-Regolament (UE) 2023/956.

(7)

Sabiex id-dikjaranti awtorizzati tas-CBAM u l-applikanti jiġu identifikati bin-numri tar-Reġistrazzjoni u tal-Identifikazzjoni tal-Operaturi Ekonomiċi (EORI, Economic Operator Registration and Identification) tagħhom, ir-reġistru tas-CBAM jenħtieġ li jkun interoperabbli u jiskambja data rilevanti mas-sistema EORI, kif imsemmi fl-Artikolu 30 tar-Regolament ta’ Implimentazzjoni (UE) 2023/1070. Dik l-interoperabbiltà jenħtieġ li tiżgura wkoll valutazzjoni akkurata tal-obbligi tas-CBAM u tappoġġa li jsiru analiżi tar-riskju, rieżami u monitoraġġ taċ-ċirkomvenzjoni.

(8)

Għall-fini tal-irkupru tal-informazzjoni dwar id-Dikjarazzjonijiet Doganali tal-Importazzjonijiet għall-oġġetti elenkati fl-Anness I tar-Regolament (UE) 2023/956 u l-informazzjoni dwar dawk l-oġġetti u sabiex jitwettqu kontrolli tad-dikjarazzjonijiet tas-CBAM u konformità mal-obbligi tas-CBAM għall-fini tal-analiżi tar-riskju, ta’ rieżami u l-monitoraġġ taċ-ċirkomvenzjoni msemmija fl-Artikoli 15, 19 u 27 tar-Regolament (UE) 2023/956, ir-reġistru tas-CBAM jenħtieġ li jiġi interkonness mas-sistema ta’ Sorveljanza, żviluppata permezz tas-Sorveljanza 3 tal-KDU (SURV3, Surveillance 3), kif imsemmi fl-Artikolu 99 tar-Regolament ta’ Implimentazzjoni (UE) 2023/1070. Dik l-informazzjoni jenħtieġ li tinkludi l-każijiet imsemmija fl-Artikolu 2(2) tar-Regolament (UE) 2023/956.

(9)

Għall-fini ta’ verifika li l-oġġetti jiġu importati biss minn dikjarant awtorizzat tas-CBAM, u għall-verifika li l-obbligi ġew ssodisfati fir-rigward tal-oġġetti jew tal-prodotti proċessati msemmija fl-Artikolu 2(2) tar-Regolament (UE) 2023/956, ir-reġistru tas-CBAM jenħtieġ li jkun interkonness mal-Ambjent ta’ Tieqa Unika tal-UE, stabbilit f’konformità mal-Artikolu 3 tar-Regolament (UE) 2022/2399 tal-Parlament Ewropew u tal-Kunsill (7).

(10)

Għall-finijiet ta’ verifika u ta’ rapportar, flimkien mal-analiżi tar-riskju u l-monitoraġġ taċ-ċirkomvenzjoni, u r-rieżamijiet, f’konformità mal-Artikoli 15, 19 u 27 tar-Regolament (UE) 2023/956, is-sistemi doganali nazzjonali jenħtieġ li jipprovdu l-informazzjoni meħtieġa dwar l-importazzjonijiet u l-esportazzjonijiet mill-ġdid, kif imsemmi fid-Deċiżjoni ta’ Implimentazzjoni tal-Kummissjoni (UE) 2023/2879 (8). Meta s-sistemi doganali nazzjonali ma jkunux jistgħu jipprovdu l-informazzjoni permezz ta’ skambju awtomatiku, ir-reġistru tas-CBAM jenħtieġ li jkun jista’ jikkomunika l-informazzjoni direttament fir-reġistru tas-CBAM. Jenħtieġ li dik l-informazzjoni tinkludi informazzjoni dwar l-importazzjoni ta’ oġġetti elenkati fl-Anness I tar-Regolament (UE) 2023/956, l-informazzjoni dwar oġġetti mqiegħda taħt proċessar attiv, l-informazzjoni dwar ir-rilaxx għaċ-ċirkolazzjoni libera ta’ prodotti pproċessati bl-oġġetti tas-CBAM bħala input, u l-informazzjoni dwar l-oġġetti jew il-prodotti pproċessati msemmija fl-Artikolu 2(2) tar-Regolament (UE) 2023/956.

(11)

Għall-identifikazzjoni tal-oġġetti importati elenkati fl-Anness I tar-Regolament (UE) 2023/956, għandha tintuża l-klassifikazzjoni ta’ dawk l-oġġetti fin-Nomenklatura Magħquda (“NM”) stabbilita fir-Regolament tal-Kunsill (KEE) Nru 2658/87 (9).

(12)

Għall-fini tal-iskambju ta’ informazzjoni dwar ir-riskju u tar-riżultati tal-analiżi tar-riskju bejn l-awtoritajiet doganali u l-awtoritajiet kompetenti u l-Kummissjoni, ir-reġistru tas-CBAM jenħtieġ li jkun interkonness mas-Sistema ta’ Ġestjoni tar-Riskji Doganali (CRMS2) kif imsemmi fl-Artikolu 36 tar-Regolament ta’ Implimentazzjoni tal-Kummissjoni (UE) 2015/2447 (10) u fl-Artikolu 69 tar-Regolament ta’ Implimentazzjoni (UE) 2023/1070.

(13)

Sabiex tiġi żgurata l-kontinwità tas-sistema f’kull ħin, huwa importanti li jiġu pprovduti soluzzjonijiet alternattivi li jridu jiġu implimentati fil-każ ta’ ħsara temporanja fir-reġistru tas-CBAM. Għal dak il-għan, il-Kummissjoni jenħtieġ li tistabbilixxi pjan għall-kontinwità tal-operat tas-CBAM.

(14)

L-awtoritajiet kompetenti u l-Kummissjoni jipproċessaw id-data personali rreġistrata fir-Reġistru tas-CBAM f’konformità mal-kompiti tagħhom kif speċifikat fir-Regolament (UE) 2023/956 u bħala tali, għall-ġestjoni tar-reġistru tas-CBAM, tad-dikjarazzjonijiet u taċ-ċertifikati tas-CBAM, jaġixxu bħala kontrolluri tad-data skont it-tifsira tal-Artikolu 26 tar-Regolament (UE) 2016/679 u l-Artikolu 28 tar-Regolament (UE) 2018/1725. Id-data personali jenħtieġ li tinżamm f’forma li tippermetti l-identifikazzjoni tas-suġġetti tad-data għal mhux iktar milli meħtieġ għall-finijiet li għalihom tkun ipproċessata d-data personali. F’dan ir-rigward, il-perjodu taż-żamma tad-data għar-reġistru tas-CBAM għandu jkun limitat għal 7 snin mir-reġistrazzjoni fir-reġistru tas-CBAM biex tkun tista’ ssir analiżi tal-funzjonament tas-CBAM u b’mod partikolari l-analiżi tal-konklużjonijiet misluta mir-rieżami tad-dikjarazzjonijiet tas-CBAM.

(15)

Dan ir-Regolament jikkonċerna l-forniment ta’ servizz pubbliku biex jiffaċilita l-aċċess u l-ġestjoni transfruntieri ta’ informazzjoni rregolata mis-CBAM u se josserva r-rekwiżiti tar-Regolament dwar l-Att dwar Ewropa Interoperabbli (UE) 2024/903 tal-Parlament Ewropew u tal-Kunsill (11).

(16)

L-għażliet tal-istrateġija għall-iżvilupp u l-akkwist tal-IT se jkunu soġġetti għall-approvazzjoni minn qabel mill-Bord tat-Teknoloġija tal-Informazzjoni u taċ-Ċibersigurtà tal-Kummissjoni Ewropea.

(17)

Sabiex l-applikazzjoni tar-Regolament tkun tista’ ssir f’waqtha, jenħtieġ li jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

(18)

Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 u ta l-opinjoni tiegħu fis-27 ta’ Novembru 2024.

(19)

Il-miżuri previsti f’dan ir-Regolament huma f’konformità mal-opinjoni tal-Kumitat tas-CBAM,