(1)

Ir-Regolament ta’ Implimentazzjoni tal-Kummissjoni (UE) 2018/2019 (2), abbażi ta’ valutazzjoni preliminari tar-riskju, jistabbilixxi lista ta’ pjanti, prodotti tal-pjanti u oġġetti oħra ta’ riskju għoli.

(2)

Ir-Regolament ta’ Implimentazzjoni tal-Kummissjoni (UE) 2018/2018 (3) jistabbilixxi regoli speċifiċi dwar il-proċedura li trid tiġi segwita sabiex issir valutazzjoni tar-riskji fuq il-pjanti, fuq il-prodotti tal-pjanti u fuq oġġetti oħra ta’ riskju għoli msemmija fl-Artikolu 42(4) tar-Regolament (UE) 2016/2031.

(3)

Wara valutazzjoni preliminari, fl-Anness tar-Regolament ta’ Implimentazzjoni (UE) 2018/2019 iddaħħlu 34 ġeneru u speċi waħda tal-pjanti għat-tħawwil li joriġinaw mill-pajjiżi terzi kollha, bħala pjanti ta’ riskju għoli. Dak l-Anness jinkludi l-ġeneri Malus Mill. u Berberis L.

(4)

Il-lista ta’ pjanti, prodotti mill-pjanti jew oġġetti oħra, imneħħija mill-Anness tar-Regolament ta’ Implimentazzjoni (UE) 2018/2019 u li jistgħu jiġu introdotti fit-territorju tal-Unjoni jew imċaqilqa fi ħdanu biss jekk jiġu ssodisfati r-rekwiżiti speċjali, hija prevista fir-Regolament ta’ Implimentazzjoni tal-Kummissjoni (UE) 2020/1213 (4).

(5)

Ir-Regolament ta’ Implimentazzjoni (UE) 2020/1213 jistabbilixxi l-miżuri fitosanitarji għall-introduzzjoni fit-territorju tal-Unjoni ta’ ċerti pjanti, prodotti mill-pjanti u oġġetti oħra li tneħħew mill-Anness tar-Regolament ta’ Implimentazzjoni (UE) 2018/2019, iżda r-riskji fitosanitarji tagħhom għadhom ma ġewx ivvalutati bis-sħiħ. Dan għaliex wieħed jew aktar mill-pesti li jgħixu f’dawk il-pjanti għadhom mhumiex inklużi fil-lista tal-Unjoni tal-pesti tal-kwarantina tar-Regolament ta’ Implimentazzjoni tal-Kummissjoni (UE) 2019/2072 (5), iżda jistgħu jissodisfaw il-kundizzjonijiet biex jiġu inklużi wara valutazzjoni tar-riskji kompluta ulterjuri.

(6)

Fid-9 ta’ Awwissu 2019, it-Turkija ressqet talba lill-Kummissjoni għall-esportazzjoni lejn l-Unjoni tal-pjanti għat-tħawwil tal-Malus domestica li jikkonsistu minn rimja bl-għejun u brokkijiet ta’ mhux aktar minn sena mingħajr weraq, u minn salvaġġ u minn pjanti mlaqqma bl-għeruq mikxufin, inattivi, mingħajr weraq u b’dijametru taz-zokk massimu ta’ 3 cm. Dik it-talba kienet appoġġata mid-dossier tekniku rilevanti.

(7)

Fil-31 ta’ Marzu 2022, l-Awtorità Ewropea dwar is-Sigurtà fl-Ikel (“l-Awtorità”) adottat opinjoni xjentifika dwar il-valutazzjoni tar-riskju tal-komodità tal-pjanti tal-Malus domestica mit-Turkija (6). L-Awtorità identifikat lill-Anoplophora chinensis, lill-Calepitrimerus baileyi, lill-Cenopalpus irani, liċ-Cicadatra persica, lid-Diplodia bulgarica, lill-Erwinia amylovora, lill-Hoplolaimus galeatus, lil-Lopholeucaspis japonica, lill-Malacosoma parallela, lill-Pratylenchus loosi, lill-Pyrolachnus pyri u lill-virus tar-ringspot tat-tadam bħala pesti rilevanti għal dawk il-pjanti għat-tħawwil.

(8)

Fis-7 ta’ Novembru 2022, l-Awtorità emendat l-opinjoni xjentifika biex tinkludi lid-Didesmococcus unifasciatus, l-Euzophera semifuneralis, il-Maconellicoccus hirsutus, il-Pochazia shantungensis u r-Russellaspis pustulans bħala pesti rilevanti għal dawk il-pjanti għat-tħawwil.

(9)

L-Awtorità evalwat il-miżuri ta’ mitigazzjoni tar-riskju deskritti fid-dossier għall-Calepitrimerus baileyi, għall-Cenopalpus irani, għaċ-Cicadatra persica, għad-Didesmococcus unifasciatus, għad-Diplodia bulgarica, għall-Euzophera semifuneralis, għall-Hoplolaimus galeatus, għall-Lopholeucaspis japonica, għall-Maconellicoccus hirsutus, għall-Malacosoma parallela, għall-Pochazia shantungensis, għall-Pratylenchus loosi, għall-Pyrolachnus pyri u għall-virus tar-ringspot tat-tadam u stmat il-probabbiltà tal-ħelsien tal-komodità minn dawk il-pesti. L-Awtorità evalwat jekk it-Turkija tapplikax il-miżuri ta’ emerġenza, stabbiliti fir-Regolament ta’ Implimentazzjoni tal-Kummissjoni (UE) 2022/2095 (7) biex tipprevjeni tal-introduzzjoni u t-tixrid fl-Unjoni tal-Anoplophora chinensis u fir-rigward tal-Erwinia amylovora, jekk ir-rekwiżiti speċjali għall-introduzzjoni fiż-żoni protetti speċifikati u l-movimenti fi ħdanhom, elenkati fil-punt 9 tal-Anness X tar-Regolament ta’ Implimentazzjoni (UE) 2019/2072, tal-pjanti tal-Malus Mill., għajr il-frott u ż-żrieragħ, humiex issodisfati. Hija kkonkludiet li t-Turkija tapplika dawk il-miżuri ta’ emerġenza u li r-rekwiżiti elenkati fil-punt 9 tal-Anness X tar-Regolament ta’ Implimentazzjoni (UE) 2019/2072 ma ġewx issodisfati. Il-miżuri ta’ mitigazzjoni tar-riskju għar-Russellaspis pustulans ma ġewx evalwati mill-Awtorità. Madankollu, Opinjoni xjentifika dwar il-kategorizzazzjoni tal-pest tar-Russellaspis pustulans (8)ippubblikata qabel mill-Awtorità, tindika miżuri ta’ mitigazzjoni tar-riskju li huma effettivi kontra l-pest.

(10)

Fis-27 ta’ Novembru 2019, it-Turkija ressqet lill-Kummissjoni talba għall-esportazzjoni lejn l-Unjoni tal-pjanti fil-qsari ta’ bejn sentejn u 3 snin tal-Berberis thunbergii, twal bejn 20 u 40 cm. Dik it-talba kienet appoġġata mid-dossier tekniku rilevanti.

(11)

Fid-19 ta’ Mejju 2022, l-Awtorità adottat opinjoni xjentifika dwar il-valutazzjoni tar-riskju tal-komodità tal-pjanti fil-qsar i tal-Berberis thunbergii mit-Turkija (9). L-awtorità identifikat lill-Bemisia tabaci u lill-Malacosoma parallela bħala pesti rilevanti għal dawk il-pjanti għat-tħawwil, evalwat il-miżuri għat-tnaqqis tar-riskju deskritti fid-dossier u stmat il-probabbiltà tal-ħelsien tal-komodità minn dawk il-pesti.

(12)

B’segwitu tal-konferma uffiċjali dwar in-nuqqas tal-Malacosoma parallela fit-Turkija, il-pest ma għadux meqjus rilevanti għall-komoditajiet tal-Malus domestica u tal-Berberis thunbergii li joriġinaw f’dak il-pajjiż.

(13)

Abbażi ta’ dawk l-opinjonijiet, u tal-informazzjoni addizzjonali mit-Turkija fir-rigward tal-Malacosoma parallela, ir-riskju fitosanitarju mill-introduzzjoni fit-territorju tal-Unjoni tal-pjanti għat-tħawwil tal-Malus domestica li jikkonsistu minn rimja bl-għejun u minn brokkijiet ta’ mhux aktar minn sena mingħajr weraq u minn salvaġġ u minn pjanti mlaqqma bl-għeruq mikxufin, inattivi, mingħajr weraq u b’dijametru taz-zokk massimu ta’ 3 cm, li joriġinaw mit-Turkija, jitqies li jitnaqqas għal livell aċċettabbli, dment li jiġu applikati l-miżuri ta’ mitigazzjoni xierqa biex jindirizzaw ir-riskju tal-pesti relatati ma’ dawk il-pjanti għat-tħawwil, u li jkun hemm konformità mar-rekwiżiti tar-Regolament ta’ Implimentazzjoni (UE) 2022/2095, u mar-rekwiżiti speċjali elenkati fil-punt 9 tal-Anness X tar-Regolament ta’ Implimentazzjoni (UE) 2019/2072 u mar-rekwiżiti speċjali korrispondenti fl-Anness VII tar-Regolament ta’ Implimentazzjoni (UE) 2019/2072.

(14)

Barra minn hekk, ir-riskju fitosanitarju li jirriżulta mill-introduzzjoni fit-territorju tal-Unjoni ta’ pjanti fil-qsari ta’ mhux aktar minn tliet snin tal-Berberis thunbergii b’tul massimu ta’ 40 cm, li joriġinaw mit-Turkija, jitqies aċċettabbli, dment li jkun hemm konformità mar-rekwiżiti speċjali korrispondenti stabbiliti fl-Anness VII tar-Regolament ta’ Implimentazzjoni (UE) 2019/2072, filwaqt li ma jitqies meħtieġ l-ebda rekwiżit ieħor.

(15)

B’konsegwenza ta’ dan, jenħtieġ li l-pjanti għat-tħawwil tal-Malus domestica li jikkonsistu minn rimja bl-għejun u minn brokkijiet ta’ mhux aktar minn sena mingħajr weraq u minn salvaġġ u minn pjanti mlaqqma bl-għeruq mikxufin, inattivi, mingħajr weraq u b’dijametru taz-zokk massimu ta’ 3 cm, li joriġinaw mit-Turkija, ma jibqgħux jitqiesu bħala pjanti ta’ riskju għoli.

(16)

Bl-istess mod, jenħtieġ li pjanti fil-qsari ta’ mhux aktar minn tliet snin tal-Berberis thunbergii twal massimu ta’ 40 cm, li joriġinaw mit-Turkija, ma jibqgħux jitqiesu bħala pjanti ta’ riskju għoli.

(17)

Għalhekk, jenħtieġ li l-Anness tar-Regolament ta’ Implimentazzjoni (UE) 2018/2019 jiġi emendat kif xieraq.

(18)

Il-miżuri deskritti mit-Turkija fid-dossier li jikkonċerna l-Malus domestica huma meqjusa suffiċjenti biex inaqqsu r-riskju mill-introduzzjoni fit-territorju tal-Unjoni ta’ dik il-komodità għal livell aċċettabbli. Għalhekk, jenħtieġ li dawk il-miżuri jiġu adottati bħala rekwiżiti fitosanitarji għall-importazzjoni biex tiġi żgurata l-protezzjoni fitosanitarja tat-territorju tal-Unjoni mill-introduzzjoni ta’ dawk il-pjanti fih.

(19)

L-Anoplophora chinensis, il-Bemisia tabaci, il-Lopholeucapsis japonica u l-virus tar-ringspot tat-tadam huma elenkati bħala pesti ta’ kwarantina fl-Unjoni fl-Anness II tar-Regolament ta’ Implimentazzjoni (UE) 2019/2072. L-Erwinia amylovora hija elenkata bħala pest ta’ kwarantina fiż-żoni protetti fl-Anness III ta’ dak ir-Regolament ta’ Implimentazzjoni, u bħala pest irregolat mhux ta’ kwarantina fl-Unjoni fl-Anness IV ta’ dak ir-Regolament ta’ Implimentazzjoni. Huma stabbiliti rekwiżiti speċjali fil-punt 9 tal-Anness X ta’ dak ir-Regolament ta’ Implimentazzjoni, biex jipprevjenu d-dħul u t-tixrid ta’ dak il-pest fiż-żoni protetti speċifikati.

(20)

B’kuntrast ma’ dan, il-Calepitrimerus baileyi, iċ-Cenopalpus irani, id-Didesmococcus unifasciatus, id-Diplodia bulgarica, l-Euzophera semifuneralis, il-Hoplolaimus galeatus, il-Maconellicoccus hirsutus, il-Pochazia shantungensis u l-Pratylenchus loosi għadhom mhumiex inklużi fil-lista stabbilita fl-Anness II tar-Regolament ta’ Implimentazzjoni (UE) 2019/2072, iżda jistgħu jissodisfaw il-kundizzjonijiet biex jiġu inklużi ladarba titwettaq valutazzjoni tar-riskji kompluta. Għalhekk, fir-rigward ta’ dawk il-pesti hemm bżonn ta’ miżuri fitosanitarji sakemm titwettaq valutazzjoni tar-riskju kompluta. Il-kategorizzazzjoni tal-pest tar-Russellaspis pustulans tindika li l-pest jissodisfa l-kundizzjonijiet biex jiġi elenkat bħala pest ta’ kwarantina fl-Unjoni. Għalhekk, huma meħtieġa miżuri fitosanitarji dwar dak il-pest sakemm jiġi elenkat fl-Anness II tar-Regolament ta’ Implimentazzjoni (UE) 2019/2072.

(21)

Għalhekk, jenħtieġ li l-Anness tar-Regolament ta’ Implimentazzjoni (UE) 2020/1213 jiġi emendat kif xieraq.

(22)

Iċ-Cicadatra persica u l-Pyrolachnus pyri għadhom mhumiex inklużi fil-lista tal-pesti ta’ kwarantina fl-Unjoni. Madankollu, minħabba li ma ġie osservat l-ebda impatt sinifikanti fuq il-pjanti ospitanti infettati minn dawk il-pesti fl-Unjoni, ma huwa meħtieġ l-ebda rekwiżit tal-importazzjoni fir-rigward ta’ dawk il-pesti.

(23)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,