(1)

Id-Direttiva 2003/87/KE ġiet riveduta u emendata bid-Direttiva (UE) 2023/959 tal-Parlament Ewropew u tal-Kunsill (2) biex tiġi allinjata mar-Regolament (UE) 2021/1119 tal-Parlament Ewropew u tal-Kunsill (3) li jistabbilixxi mira ta’ tnaqqis ta’ mill-anqas 55 % tal-emissjonijiet netti sal-2030 meta mqabbel mal-1990. Ir-reviżjoni tad-Direttiva 2003/87/KE tikkonċerna wkoll l-allokazzjoni bla ħlas tal-kwoti u tirrikjedi bidliet fir-Regolament Delegat tal-Kummissjoni (UE) 2019/331 (4).

(2)

Id-Direttiva (UE) 2023/959 tintroduċi obbligi għall-monitoraġġ u r-rapportar tal-emissjonijiet fuq operaturi ta’ installazzjonijiet għall-inċinerazzjoni tal-iskart muniċipali. Minħabba li dawk l-installazzjonijiet ma għandhomx għalfejn iċedu kwoti f’konformità mal-Artikolu 12 ta’ dik id-Direttiva, huwa xieraq li ma titqiesx is-sħana fornuta minn dawk l-installazzjonijiet lil installazzjonijiet oħrajn kif koperti mis-Sistema tal-Unjoni Ewropea għall-Iskambju ta’ Kwoti tal-Emissjonijiet (EU ETS) għall-fini ta’ allokazzjoni bla ħlas.

(3)

Sabiex tiġi inċentivata l-elettrifikazzjoni tal-proċessi industrijali bħala teknoloġija importanti biex jitnaqqsu b’mod sinifikanti l-emissjonijiet minn dawn il-proċessi u biex jiġi żgurat trattament ugwali tal-proċessi koperti mill-parametri referenzjarji tal-prodotti u l-parametri referenzjarji tas-sħana u tal-fjuwil, is-sħana li titkejjel u li ma titkejjilx prodotta mill-elettriku jenħtieġ li fil-prinċipju tkun eliġibbli għal allokazzjoni bla ħlas skont il-parametri referenzjarji tas-sħana u tal-fjuwil.

(4)

Fil-Kawża C-271/20 (5), il-Qorti tal-Ġustizzja ddeċidiet li l-enerġija kimika maħżuna fil-materja prima u rilaxxata bħala sħana matul il-proċess ta’ kombustjoni għandha tiġi ttrattata bħala fjuwil għall-fini ta’ allokazzjoni bla ħlas. Minħabba li dawn il-proċessi ta’ kombustjoni jirrilaxxaw emissjonijiet minbarra gassijiet serra, huwa xieraq li s-sħana rilaxxata matul dawn il-proċessi ta’ kombustjoni tiġi eskluża b’mod espliċitu mill-allokazzjoni bla ħlas skont il-parametru referenzjarju tal-fjuwil biex tiġi żgurata l-integrità ambjentali, b’mod partikolari fid-dawl tar-rilaxx ta’ ossidi tal-kubrit matul dawn il-proċessi ta’ kombustjoni. Għalhekk, l-użu tal-parametru referenzjarju tal-fjuwil jenħtieġ li jkun ristrett għall-proċessi ta’ kombustjoni fejn il-fini primarju jkun il-ġenerazzjoni ta’ sħana li ma titkejjilx.

(5)

L-Artikolu 10a tad-Direttiva 2003/87/KE jipprovdi lill-Kummissjoni b’mandat biex tintegra l-implimentazzjoni tal-kundizzjonalità l-ġdida dwar il-miżuri tal-effiċjenza enerġetika fiċ-ċiklu eżistenti ta’ 5 snin għall-installazzjonijiet li japplikaw għal allokazzjoni bla ħlas stabbilita minn dan ir-Regolament, sabiex tiġi żgurata l-armonizzazzjoni mal-proċeduri eżistenti u sabiex jiġi evitat piż amministrattiv żejjed.

(6)

L-awtorità kompetenti jenħtieġ li tapprova l-pjan ta’ metodoloġija ta’ monitoraġġ sabiex tiżgura konsistenza mar-regoli ta’ monitoraġġ. Minħabba restrizzjonijiet ta’ żmien, l-approvazzjoni mill-awtorità kompetenti ma kinitx meħtieġa għas-sottomissjoni tar-rapporti ta’ bażi ta’ data fl-2019, is-sena li fiha l-pjanijiet tal-metodoloġija ta’ monitoraġġ ġew introdotti mir-Regolament Delegat (UE) 2019/331. Din l-eżenzjoni ma għadhiex meħtieġa u jenħtieġ li ma tibqax tapplika.

(7)

Id-Direttiva 2003/87/KE tipprevedi li ma għandha tingħata l-ebda allokazzjoni bla ħlas fir-rigward tal-produzzjoni ta’ prodotti koperti mill-Mekkaniżmu ta’ Aġġustament tal-Karbonju fil-Fruntieri (CBAM), stabbilit bir-Regolament (UE) 2023/956 tal-Parlament Ewropew u tal-Kunsill (6), b’eliminazzjoni gradwali tal-allokazzjoni bla ħlas matul perjodu tranżizzjonali. Sabiex tiġi żgurata implimentazzjoni armonizzata ta’ din id-dispożizzjoni, jenħtieġ li l-operaturi jipprovdu informazzjoni u evidenza, b’mod partikolari abbażi tal-kodiċijiet tan-Nomenklatura Magħquda (NM) stabbiliti bir-Regolament tal-Kunsill (KEE) Nru 2658/87 (7), dwar il-merkanzija prodotta.

(8)

Sabiex jiġu ssimplifikati l-proċeduri, b’mod partikolari fir-rigward tar-rapportar annwali dwar il-livell ta’ attività u l-aġġustamenti sussegwenti għall-allokazzjoni bla ħlas f’konformità mar-Regolament ta’ Implimentazzjoni tal-Kummissjoni (UE) 2019/1842 (8), id-data għas-subinstallazzjonijiet kollha, inklużi s-subinstallazzjonijiet żgħar, jenħtieġ li tiġi rrapportata bħala bażi għal aġġustamenti aktar tard fl-allokazzjoni bla ħlas.

(9)

Sabiex tiġi inċentivata l-elettrifikazzjoni tal-proċessi industrijali biex jitnaqqsu b’mod sinifikanti l-emissjonijiet minn proċessi bħal dawn, huwa meħtieġ li jitneħħew ir-regoli għall-possibbiltà ta’ skambju tal-fjuwil u tal-elettriku. Konsegwentement, il-proċessi elettrifikati ħafna jew kompletament elettrifikati koperti mill-EU ETS jenħtieġ li jibbenefikaw minn allokazzjoni bla ħlas bl-istess mod bħall-proċessi b’emissjonijiet diretti għoljin. Għalhekk, l-ammont ta’ allokazzjoni bla ħlas jenħtieġ li jiġi ddeterminat irrispettivament mis-sehem ta’ emissjonijiet diretti u indiretti għal installazzjonijiet li jaqgħu taħt l-istess parametru referenzjarju. Għalkemm l-allokazzjoni bla ħlas għal dawk il-proċessi se tkopri wkoll l-emissjonijiet indiretti, mhux neċessarjament timplika li r-riskji ta’ rilokazzjoni tal-emissjonijiet tal-karbonju ddeterminati f’konformità mal-Artikolu 10a(6) tad-Direttiva 2003/87/KE ġew indirizzati bis-sħiħ għal dawk il-proċessi. Il-kostijiet indiretti mgħoddija lill-konsumaturi tal-elettriku jistgħu jvarjaw skont it-taħlita tal-elettriku f’żona ġeografika rilevanti. Kwalunkwe allokazzjoni bla ħlas mogħtija lil emissjonijiet indiretti ta’ proċessi elettrifikati jenħtieġ li ma tippreġudikax il-possibbiltà li jingħata kumpens għal kostijiet indiretti f’konformità mal-Artikolu 10a(6) tad-Direttiva 2003/87/KE. Min-naħa l-oħra, il-miżuri finanzjarji biex jikkumpensaw għall-kostijiet indiretti li jgħaddu fil-prezzijiet tal-elettriku jenħtieġ li ma jikkumpensawx għall-istess kostijiet indiretti koperti minn allokazzjoni bla ħlas. Għall-fini tad-determinazzjoni tal-parametri referenzjarji tal-elettriku, jixraq li tinġabar data dwar il-konsum tal-elettriku għall-parametri referenzjarji ta’ prodotti rilevanti.

(10)

Sabiex jiġi inċentivat aktar l-irkupru tas-sħana mis-subinstallazzjonijiet tal-parametru referenzjarju tal-fjuwil u mis-subinstallazzjonijiet tal-emissjonijiet ta’ proċess, jenħtieġ li din is-sħana tkun eliġibbli għal allokazzjoni bla ħlas, apparti li tkun eliġibbli wkoll għal allokazzjoni bbażata fuq il-konsum tal-fjuwil u l-emissjonijiet ta’ proċess. Ir-riskju ta’ għadd doppju jenħtieġ li jitqies bħala mmitigat mill-aġġornamenti tal-valur tal-parametru referenzjarju tal-fjuwil u tal-multiplikatur applikat għall-emissjonijiet ta’ proċess f’konformità mal-Artikolu 16(2), il-punt (e) tar-Regolament Delegat (UE) 2019/331.

(11)

Sabiex jiġi mminimizzat il-piż amministrattiv għall-operaturi, l-informazzjoni dwar il-pjanijiet tan-newtralità klimatika jenħtieġ li tiġi integrata fil-miżuri ta’ implimentazzjoni nazzjonali eżistenti li jservu bħala l-bażi għall-kalkolu tal-allokazzjoni bla ħlas.

(12)

Biex jiġu ppremjati dawk bl-aqwa prestazzjoni u innovazzjoni, id-Direttiva 2003/87/KE teżenta l-installazzjonijiet li l-livelli ta’ emissjonijiet ta’ gassijiet serra tagħhom huma taħt il-medja tal-10 % tal-aktar installazzjonijiet effiċjenti taħt parametru referenzjarju partikolari, mill-applikazzjoni tal-fattur ta’ korrezzjoni transsettorjali. Peress li l-parametri referenzjarji huma ddefiniti fil-livell ta’ subinstallazzjoni, huwa xieraq li tiġi skattata l-eżenzjoni jekk il-livelli tal-emissjonijiet ta’ gassijiet serra ta’ mill-anqas subinstallazzjoni waħda jissodisfaw il-livell limitu, dment li din is-subinstallazzjoni tikkontribwixxi b’mod sinifikanti għall-allokazzjoni bla ħlas totali għall-installazzjoni.

(13)

Sabiex tiġi ffaċilitata l-implimentazzjoni armonizzata tal-aġġustamenti tal-allokazzjoni u l-waqfiet tal-operazzjoni, jenħtieġ li l-kwoti żejda li ma jiġux irritornati kif xieraq minn operatur jitnaqqsu mill-allokazzjoni bla ħlas lill-operatur ikkonċernat.

(14)

Sabiex jiġi żgurat li l-operaturi jikkoreġu kwalunkwe nuqqas ta’ konformità jew kwalunkwe żball fir-rapporti ta’ bażi ta’ data li jkollu impatt fuq id-determinazzjoni tal-livelli storiċi ta’ attività, l-awtoritajiet kompetenti jenħtieġ li jiżguraw li dawk l-iżbalji jew in-nuqqasijiet ta’ konformità jiġu kkoreġuti u mhux biss jitolbu l-korrezzjonijiet.

(15)

Sabiex jiġi żgurat li l-livelli storiċi ta’ attività jkunu, kemm jista’ jkun, rappreżentattivi taċ-ċikli tal-industrija u biex jitnaqqas l-impatt ta’ ċirkostanzi speċjali, bħal kriżijiet ekonomiċi, dawk il-livelli jenħtieġ li jiġu kkalkulati bl-użu tal-medjan tal-livelli ta’ attività matul il-perjodu ta’ referenza.

(16)

Sabiex tiġi żgurata applikazzjoni armonizzata u korretta tar-regoli dwar l-allokazzjoni bla ħlas, jixraq li tiġi ċċarata d-determinazzjoni tal-livelli storiċi ta’ attività f’każijiet fejn subinstallazzjoni tkun bdiet biss operazzjoni normali matul il-perjodu ta’ referenza. F’dan ir-rigward, il-livelli storiċi ta’ attività jenħtieġ li jkunu bbażati fuq attivitajiet ta’ snin kalendarji sħaħ.

(17)

L-allokazzjoni bla ħlas għall-emissjonijiet ta’ proċess mhux koperti mill-parametri referenzjarji tal-prodott hija bbażata fuq l-anterjorità tal-emissjonijiet storiċi. Mill-2013, l-allokazzjoni bla ħlas ingħatat fil-livell ta’ 97 % tal-emissjonijiet storiċi. Sabiex jiġi inċentivat it-tnaqqis ta’ dawn l-emissjonijiet ta’ proċess u sabiex jiġi żgurat allinjament aħjar mal-allokazzjoni bla ħlas għall-emissjonijiet ta’ proċessi koperti mill-parametri referenzjarji tal-prodotti, huwa meħtieġ li jitnaqqas il-livell ta’ allokazzjoni bla ħlas għall-emissjonijiet ta’ proċess mhux koperti mill-parametri referenzjarji tal-prodotti għal 91 %, ekwivalenti għal tnaqqis annwali ta’ 0,3 % bħala r-rata minima ta’ aġġornament applikata għall-parametri referenzjarji tal-prodotti f’konformità mal-Artikolu 10a(2) tad-Direttiva 2003/87/KE. Il-fattur ta’ multiplikazzjoni mnaqqas jenħtieġ li japplika mill-1 ta’ Jannar 2028 biex jallinja aħjar mal-iskeda ta’ żmien għall-iskjerament ta’ soluzzjonijiet biex jitnaqqsu l-emissjonijiet ta’ proċess, bħall-qbid u l-ħżin tal-karbonju.

(18)

Sabiex tiġi żgurata t-tneħħija gradwali tal-allokazzjoni bla ħlas għall-merkanzija koperta mir-Regolament (UE) 2023/956, il-fattur CBAM rilevanti stabbilit fl-Artikolu 10a(1a), it-tieni subparagrafu tad-Direttiva 2003/87/KE, jenħtieġ li jiġi applikat għall-allokazzjoni bla ħlas preliminari għas-subinstallazzjoni kkonċernata. Il-bidliet futuri potenzjali fil-kamp ta’ applikazzjoni tas-CBAM u fil-fattur rilevanti tas-CBAM introdott fir-Regolament (UE) 2023/956 jenħtieġ li jiġu riflessi fit-tneħħija gradwali korrispondenti tal-allokazzjoni bla ħlas.

(19)

Id-Direttiva (UE) 2023/959 tneħħi l-kunċett ta’ ġeneraturi tal-elettriku mill-1 ta’ Jannar 2026 u t-trattament speċifiku tagħhom f’termini ta’ allokazzjoni bla ħlas mill-EU ETS. Għalhekk jeħtieġ li jitħassru d-dispożizzjonijiet relatati fir-Regolament Delegat (UE) 2019/331 skont dan.

(20)

Sabiex jinżammu l-kundizzjonijiet ekwi bejn l-installazzjonijiet eżistenti u l-entranti l-ġodda, jeħtieġ li jiġu riflessi l-bidliet fir-regoli rispettivi għal entranti ġodda fir-rigward tal-livelli storiċi ta’ attività u l-allokazzjoni bla ħlas tal-kwoti.

(21)

Sabiex jiġu pprovduti aktar inċentivi biex jitnaqqsu l-emissjonijiet ta’ gassijiet serra, ġiet introdotta dispożizzjoni dwar il-kundizzjonalità tal-allokazzjoni bla ħlas dwar l-implimentazzjoni ta’ miżuri għat-titjib tal-effiċjenza enerġetika fl-Artikolu 10a, it-tielet subparagrafu tad-Direttiva 2003/87/KE, li jeħtieġ li tiġi ssupplimentata. Ir-rakkomandazzjonijiet inklużi fir-rapporti tal-awditjar tal-enerġija jew fis-sistemi ċċertifikati tal-ġestjoni tal-enerġija, imsemmija fl-Artikolu 10a(1), it-tielet subparagrafu ta’ dik id-Direttiva, li huma fil-livell tal-kumpaniji, jirrikjedu traduzzjoni għal-livell tal-installazzjoni. Sabiex tiġi żgurata ċ-ċertezza legali, l-awtorità kompetenti jenħtieġ li tqis biss dawk ir-rakkomandazzjonijiet bħala implimentati meta l-implimentazzjoni tkun tlestiet u l-verifikatur ikun ikkonferma t-tlestija. Sabiex jiġi ssalvagwardjat l-inċentiv mogħti bl-introduzzjoni tal-kundizzjonalità, installazzjoni jenħtieġ li tingħata l-possibbiltà li tirkupra l-allokazzjoni bla ħlas imnaqqsa wara li tkun implimentat il-miżuri rakkomandati bħala parti mir-rapport annwali dwar il-livell ta’ attività u wara li tkun ġiet ivverifikata l-implimentazzjoni tal-miżuri rrakkomandati. Jenħtieġ li jiġi stabbilit ċiklu annwali għar-rieżami tal-kundizzjonalità tal-installazzjonijiet mhux konformi li jsegwi r-rapportar tal-livelli ta’ attività annwali. L-operaturi ta’ installazzjonijiet mhux konformi li jiffaċċaw it-tnaqqis ta’ 20 % tal-allokazzjoni bla ħlas jenħtieġ li jipprovdu evidenza vverifikata lill-awtorità kompetenti dwar l-implimentazzjoni tal-miżuri rrakkomandati kollha biex jiġi żgurat l-irkupru ta’ allokazzjoni bla ħlas imnaqqsa minħabba l-kundizzjonalità.

(22)

Wara l-introduzzjoni ta’ regoli ġodda dwar il-kundizzjonalità tal-allokazzjoni bla ħlas għall-pjanijiet tan-newtralità klimatika skont l-Artikolu 10a(1) u l-Artikolu 10b(4) tad-Direttiva 2003/87/KE, il-passi proċedurali tal-kundizzjonalità għandhom jiġu ssupplimentati. F’konformità mal-Artikolu 10a(1), il-ħames subparagrafu ta’ dik id-Direttiva, l-operaturi għandhom jistabbilixxu pjanijiet għan-newtralità klimatika sal-1 ta’ Mejju 2024. Sabiex il-kundizzjonalità tiġi allinjata mal-proċedura eżistenti ta’ applikazzjoni għal allokazzjoni bla ħlas, il-pjanijiet tan-newtralità klimatika jenħtieġ li jiġu sottomessi sat-30 ta’ Mejju 2024, jew kif xieraq skont il-limitu ta’ żmien alternattiv għas-sottomissjoni ta’ dawn l-applikazzjonijiet stabbilit mill-Istati Membri. F’konformità mal-Artikolu 10a(1) tad-Direttiva 2003/87/KE, l-installazzjonijiet ikkonċernati minn din il-kundizzjonalità huma dawk li l-livelli ta’ emissjonijiet ta’ gassijiet serra tagħhom huma ogħla mit-80 perċentil tal-livelli ta’ emissjonijiet għall-parametri referenzjarji ta’ prodotti rilevanti fis-snin 2016 u 2017. Għal dan il-fini, jenħtieġ li jintuża l-kalkolu għad-determinazzjoni tal-valuri tal-parametri referenzjarji riveduti f’konformità mar-Regolament ta’ Implimentazzjoni tal-Kummissjoni (UE) 2021/447 (9). Dik id-determinazzjoni hija bbażata fuq informazzjoni vverifikata dwar l-effiċjenza tal-gassijiet serra tal-installazzjonijiet irrapportati skont l-Artikolu 11 tad-Direttiva 2003/87/KE għas-snin 2016 u 2017. Peress li l-parametri referenzjarji huma ddefiniti fil-livell ta’ subinstallazzjoni, jixraq li jiġi introdott livell limitu għas-subinstallazzjonijiet żgħar li taħthom ma tapplikax il-kundizzjonalità, dment li s-subinstallazzjoni ma tikkontribwix għal aktar minn 20 % tal-allokazzjoni bla ħlas preliminari totali tal-installazzjoni.

(23)

Sabiex jinċentiva u jħaffef it-tnaqqis tal-emissjonijiet ta’ gassijiet serra li joriġinaw mit-tisħin distrettwali, l-Artikolu 10b(4) tad-Direttiva 2003/87/KE jistabbilixxi aktar regoli għall-kundizzjonalità dwar il-pjanijiet tan-newtralità klimatika fil-każ ta’ installazzjonijiet tat-tisħin distrettwali. B’riżultat ta’ dan, l-installazzjonijiet tal-ETS li jipprovdu sħana lil sistemi ta’ tisħin distrettwali jistgħu japplikaw għal allokazzjoni bla ħlas addizzjonali fil-perjodu mill-2026 sal-2030. Sabiex l-operaturi tas-subinstallazzjonijiet tat-tisħin distrettwali li japplikaw għal allokazzjoni bla ħlas addizzjonali jingħataw ċertezza dwar il-kundizzjonijiet ulterjuri rigward il-kisba sinifikanti ta’ tnaqqis fl-emissjonijiet ta’ gassijiet serra qabel l-2030, il-valur tal-kwoti bla ħlas addizzjonali jeħtieġ li jiġi stabbilit għad-daqs tal-investiment li għandu jsir. Sabiex ikun konsistenti, il-prezz tal-karbonju użat fid-determinazzjoni tal-valur monetarju ta’ dawk il-kwoti jenħtieġ li jintuża bl-istess mod tal-Artikolu 10c(3) tad-Direttiva 2003/87/KE. Biex tiġi pprovduta ċarezza dwar il-livell u t-tip ta’ investiment meħtieġ mill-operaturi u jiġi żgurat trattament ugwali tal-installazzjonijiet kollha kkonċernati, jenħtieġ li jiġi stabbilit tnaqqis sinifikanti fl-emissjonijiet ta’ gassijiet serra bl-użu ta’ trajettorja lineari tal-fattur medju ta’ tnaqqis lineari matul il-perjodu bejn il-punt tan-nofs tal-perjodu ta’ referenza tal-2019-2023, jiġifieri l-2021, u l-2030 f’konformità mal-Artikolu 9 tad-Direttiva 2003/87/KE. Din il-metodoloġija twassal għall-istess rekwiżit ta’ tnaqqis għall-operaturi kollha tat-tisħin distrettwali kkonċernat u ma tirrikjedix li jiġu stabbiliti rati ta’ tnaqqis speċifiċi għall-installazzjoni.

(24)

Sabiex jiġu ssalvagwardjati l-inċentivi tal-kundizzjonalità doppja u jiġu evitati konsegwenzi mhux raġonevoli, il-kundizzjonalità tal-allokazzjoni bla ħlas fuq l-implimentazzjoni tal-miżuri għat-titjib tal-effiċjenza enerġetika u l-kundizzjonalità tal-allokazzjoni bla ħlas fuq il-pjanijiet tan-newtralità klimatika jenħtieġ li ma jkunux kumulattivi. Dan ifisser li t-tnaqqis b’20 % fl-allokazzjoni bla ħlas jenħtieġ li japplika jekk waħda mill-kundizzjonalitajiet jew iż-żewġ kundizzjonalitajiet ma jiġux issodisfati skont l-Artikolu 10a(1), it-tielet u l-ħames subparagrafi tad-Direttiva 2003/87/KE.

(25)

F’konformità mal-Artikolu 10b(4) tad-Direttiva 2003/87/KE, ir-Regolament ta’ Implimentazzjoni tal-Kummissjoni (UE) 2023/2441 (10) jistabbilixxi l-kontenut u l-format minimi tal-pjanijiet tan-newtralità klimatika. Jixraq ukoll li jiġu rrieżaminati l-pjanijiet tan-newtralità klimatika f’intervalli regolari, sabiex tingħata l-possibbiltà li l-miri u l-istadji importanti jiġu riveduti u sostitwiti filwaqt li jitqiesu teknoloġiji ġodda u t-tnaqqis tal-emissjonijiet diġà miksub jew mhux miksub, kif definit għal kull perjodu ta’ verifika fl-2025 u kull 5 snin minn dakinhar, diment li jibqgħu adatti għall-objettiv tan-newtralità klimatika kif iddefinit mill-Artikolu 2 tar-Regolament (UE) 2021/1119.

(26)

Għal raġunijiet ta’ trasparenza, il-pjanijiet tan-newtralità klimatika jenħtieġ li jiġu ppubblikati mill-awtoritajiet kompetenti. Il-pubblikazzjoni ta’ pjanijiet tan-newtralità klimatika tipprevedi sensibilizzazzjoni u fehim akbar tat-tnaqqis tal-gassijiet serra fl-installazzjoni. Sabiex tiġi protetta informazzjoni kummerċjalment sensittiva, l-operaturi tal-installazzjonijiet jenħtieġ li jkunu jistgħu jitolbu t-tħassir ta’ ċerti elementi kummerċjalment sensittivi mill-verżjoni tal-pjanijiet tan-newtralità klimatika li għandhom isiru disponibbli għall-pubbliku. Dawn it-talbiet jenħtieġ li jkunu ġġustifikati kif xieraq.

(27)

Biex tiġi ffaċilitata l-implimentazzjoni tar-regoli għall-fużjonijiet u l-qsim tal-installazzjonijiet u filwaqt li jitqiesu l-ispeċifiċitajiet tal-installazzjonijiet ikkonċernati fid-dawl tar-regoli dwar l-allokazzjoni bla ħlas, jixraq li tiġi pprovduta aktar flessibbiltà biex jiġu koperti każijiet iġġustifikati ta’ livelli ta’ allokazzjoni differenti qabel u wara l-fużjoni jew il-qasma billi jitneħħa r-rekwiżit li jkun hemm l-istess livell ta’ allokazzjoni wara l-fużjoni jew il-qasma.

(28)

Sabiex tiġi evitata allokazzjoni bla ħlas mhux iġġustifikata lill-installazzjonijiet li ma għadhomx joperaw, jenħtieġ li ma tingħata l-ebda allokazzjoni bla ħlas għall-proporzjon tas-sena kalendarja wara l-jum tal-waqfien tal-operazzjonijiet.

(29)

Biex jissaħħu l-inċentivi għat-tnaqqis tal-emissjonijiet ta’ gassijiet serra u għat-titjib tal-effiċjenza enerġetika u biex jiġu żgurati kundizzjonijiet ekwi għal teknoloġiji ġodda u eżistenti, id-Direttiva 2003/87/KE tipprevedi rieżami tal-parametri referenzjarji ex ante ddeterminati għall-Unjoni kollha bl-għan li potenzjalment jiġu mmodifikati d-definizzjonijiet u l-limiti tas-sistema tal-parametri referenzjarji ta’ prodotti eżistenti. Ir-rieżami seħħ u identifika għadd ta’ parametri referenzjarji fejn jenħtieġ li jiġu introdotti modifiki fid-definizzjonijiet u fil-limiti tas-sistema biex jiġu pprovduti dawn l-inċentivi addizzjonali jew kjarifiki tekniċi.

(30)

Wara r-rieżami, biex jiġu inċentivati teknoloġiji b’livell baxx ta’ emissjonijiet tal-karbonju għall-produzzjoni ta’ prodotti tal-minerali tal-ħadid agglomerati bħala alimentazzjoni għall-produzzjoni tal-azzar primarju u biex jitqiesu l-ħtiġijiet tat-teknoloġiji tal-azzar ekoloġiċi, huwa xieraq li l-parametru referenzjarju tal-minerali sinterizzati jinfetaħ għal prodotti alternattivi. Sabiex dawk l-inċentivi jiġu mmassimizzati, jenħtieġ li t-tikketta tal-parametru referenzjarju u d-definizzjonijiet tal-prodotti koperti u tal-limiti tas-sistema jinżammu newtrali għat-teknoloġija.

(31)

Wara r-rieżami, biex jiġu inċentivati teknoloġiji b’livell baxx ta’ emissjonijiet tal-karbonju u b’livell żero ta’ emissjonijiet tal-karbonju għall-produzzjoni tal-azzar primarju u biex jinħolqu kundizzjonijiet ekwi għar-rotta eżistenti tal-forn tal-blast ibbażata fuq il-kokk u għat-teknoloġija ta’ tnaqqis dirett, il-parametru referenzjarju tal-metall sħun jenħtieġ li jiġi mmodifikat f’termini ta’ żidiet mad-definizzjonijiet ta’ prodotti koperti u tal-limiti tas-sistema.

(32)

Wara r-rieżami, biex jiġu inċentivati teknoloġiji b’livell baxx ta’ emissjonijiet tal-karbonju għall-produzzjoni ta’ leganti idrawliċi alternattivi bħala sostituti għall-klinker tas-siment abjad u griż, huwa xieraq li l-parametri referenzjarji tal-klinker tas-siment griż u tal-klinker tas-siment abjad jinfetħu għal prodotti alternattivi. Il-prodotti koperti minn parametri referenzjarji ta’ prodotti oħrajn u prodotti sekondarji jew skart li jirriżulta minn proċessi oħrajn jenħtieġ li ma jitqisux biex tiġi evitata allokazzjoni bla bżonn.

(33)

Wara r-rieżami, biex tiġi ffaċilitata l-implimentazzjoni armonizzata tar-regoli dwar l-allokazzjoni bla ħlas f’termini ta’ trattament tal-emissjonijiet minn reatturi tad-diossidu tal-karbonju, għall-parametru referenzjarju tal-irmied tas-soda, jenħtieġ li jiġi ċċarat li dawk il-proċessi huma koperti mil-limitu tas-sistema ta’ dak il-parametru referenzjarju tal-prodott.

(34)

Wara r-rieżami, biex jiġi evitat l-għadd doppju f’termini ta’ allokazzjoni bla ħlas għall-produzzjoni tal-azzar mill-isponża tal-ħadid u biex jiġi żgurat li l-parametri referenzjarji tal-prodott għall-metall sħun, l-azzar tal-karbonju EAF u l-azzar illigat ħafna EAF ma jikkoinċidux, huwa meħtieġ li l-azzar prodott mill-isponża tal-ħadid jiġi eskluż mid-definizzjoni tal-parametri referenzjarji tal-azzar tal-karbonju EAF u tal-azzar illigat ħafna EAF.

(35)

Wara r-rieżami, biex jiġu inċentivati teknoloġiji b’livell baxx ta’ emissjonijiet tal-karbonju u b’livell żero ta’ emissjonijiet tal-karbonju għall-produzzjoni tal-idroġenu u biex jinħolqu kundizzjonijiet ekwi għat-teknoloġiji eżistenti u ġodda bħall-elettroliżi tal-ilma, id-Direttiva (UE) 2023/959 estendiet id-deskrizzjoni tal-attività għall-produzzjoni tal-idroġenu biex tinkludi l-produzzjoni tal-idroġenu ekoloġiku u naqqset il-livell limitu tal-produzzjoni. Il-parametru referenzjarju tal-idroġenu jenħtieġ li jiġi mmodifikat kif xieraq. Madankollu, il-proċessi tal-elettroliżi fejn l-idroġenu huwa prodott sekondarju jenħtieġ li ma jibbenefikawx minn allokazzjoni bla ħlas skont il-parametru referenzjarju tal-idroġenu jew tal-ammonijaka peress li dawn it-teknoloġiji ma humiex ġodda u jservu fini primarju għajr il-produzzjoni tal-idroġenu. Sabiex jiġu ċċarati aktar ir-regoli dwar l-allokazzjoni bla ħlas, jixraq li l-idroġenu użat għall-produzzjoni tal-ammonijaka jiġi eskluż b’mod espliċitu mill-parametru referenzjarju tal-prodott tal-idroġenu.

(36)

Wara r-rieżami, biex tiġi armonizzata aktar l-implimentazzjoni tar-regoli dwar l-allokazzjoni bla ħlas għall-produzzjoni tal-ġir u tal-ġir dolomitiku u biex tiġi żgurata l-konsistenza mar-rapportar annwali tal-emissjonijiet, jixraq li jitħassru r-referenzi għal stimi konservattivi għall-kontenut ta’ ossidu tal-kalċju u ossidu tal-manjeżju bla ħlas.

(37)

Sabiex tiġi riflessa aħjar l-intensità enerġetika tal-produzzjoni ta’ taħlitiet ta’ ossidu tal-etilen u glikoli tal-etilen u tal-kompożizzjoni ta’ taħlitiet ta’ gass tal-idroġenu u tal-monossidu tal-karbonju, jixraq li jiġi aġġustat il-kalkolu tal-livelli storiċi ta’ attività għall-parametri referenzjarji tal-prodotti tal-ossidu tal-etilen/glikol tal-etilen u tal-idroġenu.

(38)

Sabiex jiġu riflessi l-bidliet fir-regoli tal-allokazzjoni, inkluża r-reviżjoni tal-parametri referenzjarji tal-prodotti, l-introduzzjoni tal-kundizzjonalità tal-allokazzjoni bla ħlas u t-tneħħija gradwali tal-allokazzjoni bla ħlas minħabba s-CBAM, l-ambitu għall-ġbir tad-data fil-kuntest tal-applikazzjonijiet għall-allokazzjoni bla ħlas jenħtieġ li jiġi aġġustat skont dan. Tibdiliet simili huma meħtieġa għall-kontenut minimu tal-pjanijiet ta’ metodoloġija ta’ monitoraġġ.

(39)

Għaldaqstant, jenħtieġ li r-Regolament Delegat (UE) 2019/331 jiġi emendat skont dan.

(40)

L-emendi stabbiliti f’dan ir-Regolament jenħtieġ li japplikaw għall-allokazzjonijiet relatati mal-perjodu mill-1 ta’ Jannar 2024. Madankollu, biex jitnaqqas piż amministrattiv żejjed u tiġi żgurata l-prevedibbiltà tal-livelli ta’ allokazzjoni bla ħlas, għal entranti ġodda li l-applikazzjonijiet tagħhom għal allokazzjoni bla ħlas ġew sottomessi sal-31 ta’ Diċembru 2023 lill-Kummissjoni u installazzjonijiet eżistenti, dispożizzjonijiet dwar definizzjonijiet ta’ parametri referenzjarji, inċineraturi tal-iskart, CBAM, subinstallazzjonijiet żgħar, possibbiltà ta’ skambju tal-fjuwil u tal-elettriku, irkupru tas-sħana mis-subinstallazzjonijiet tal-parametri referenzjarji tal-fjuwil u mis-subinstallazzjonijiet tal-emissjonijiet tal-proċess, livell storiku ta’ attività għall-installazzjonijiet eżistenti, allokazzjoni fil-livell tal-installazzjoni għall-installazzjonijiet eżistenti, allokazzjoni għall-emissjonijiet ta’ proċess mhux koperti mill-parametri referenzjarji tal-prodott, it-tneħħija tal-kunċett ta’ ġeneraturi tal-elettriku, u allokazzjoni fir-rigward tal-ikkrekkjar bl-istim u l-monomeru tal-klorur tal-vinil, jenħtieġ li japplikaw għal allokazzjonijiet relatati mal-perjodu mill-1 ta’ Jannar 2026. L-allokazzjoni bla ħlas għall-perjodu sal-31 ta’ Diċembru 2025 jenħtieġ li tibqa’ mhux affettwata mill-emendi. Sabiex jiġi żgurat trattament ugwali u kundizzjonijiet ekwi għal entranti ġodda b’dati differenti ta’ applikazzjonijiet għall-allokazzjonijiet, jenħtieġ li jiġu introdotti regoli speċifiċi ta’ applikazzjoni. Għal entranti ġodda li l-applikazzjonijiet tagħhom għal allokazzjoni bla ħlas jiġu sottomessi fl-1 ta’ Jannar 2024 jew wara, l-emendi għal dan ir-Regolament jenħtieġ li japplikaw għal allokazzjonijiet relatati mal-perjodu mill-1 ta’ Jannar 2024 filwaqt li għall-allokazzjonijiet relatati mal-perjodu sal-31 ta’ Diċembru 2023 japplika r-Regolament fil-verżjoni tiegħu applikabbli fil-31 ta’ Diċembru 2023.

(41)

Minħabba li l-allokazzjoni bla ħlas tiġi kkalkulata abbażi ta’ snin kalendarji sħaħ u li l-biċċa l-kbira tal-emendi għad-Direttiva 2003/87/KE introdotti bid-Direttiva (UE) 2023/959 japplikaw mill-1 ta’ Jannar 2024, dan ir-Regolament jenħtieġ li japplika mill-1 ta’ Jannar 2024.

(42)

Dan ir-Regolament jenħtieġ li jidħol fis-seħħ bħala kwistjoni ta’ urġenza peress li l-operaturi huma meħtieġa li jikkonformaw mar-regoli tiegħu dwar rapportar ta’ bażi ta’ data minn April, Mejju jew Ġunju 2024 kif meħtieġ mill-Artikolu 4(1) tar-Regolament Delegat (UE) 2019/331,

(1)

l-Artikolu 2 huwa emendat kif ġej:

(2)

fl-Artikolu 4, il-paragrafu 2 huwa emendat kif ġej:

(3)

l-Artikolu 6 huwa sostitwit b’dan li ġej:

(4)

l-Artikolu 10 huwa emendat kif ġej:

(5)

l-Artikolu 14 huwa emendat kif ġej:

(6)

l-Artikolu 15 huwa emendat kif ġej:

(7)

l-Artikolu 16 huwa emendat kif ġej:

(8)

fl-Artikolu 17, il-punti (a) sa (f) huma sostitwiti b’dan li ġej:

(9)

l-Artikolu 18(1) huwa emendat kif ġej:

(10)

l-Artikoli 19, 20 u 21 huma sostitwiti b’dan li ġej:

(11)

l-Artikolu 22 jitħassar;

(12)

jiddaħħlu l-Artikoli li ġejjin:

(*2)  Id-Direttiva 2012/27/UE tal-Parlament Ewropew u tal-Kunsill tal-25 ta’ Ottubru 2012 dwar l-effiċjenza fl-enerġija, li temenda d-Direttivi 2009/125/KE u 2010/30/UE u li tħassar id-Direttivi 2004/8/KE u 2006/32/KE (ĠU L 315, 14.11.2012, p. 1, ELI: http://data.europa.eu/eli/dir/2012/27/2023-05-04)."

(*3)  Ir-Regolament ta’ Implimentazzjoni tal-Kummissjoni (UE) 2018/2067 tad-19 ta’ Diċembru 2018 dwar il-verifika tad-data u l-akkreditament tal-verifikaturi skont id-Direttiva 2003/87/KE tal-Parlament Ewropew u tal-Kunsill (ĠU L 334, 31.12.2018, p. 94, ELI: http://data.europa.eu/eli/reg_impl/2018/2067/2021-01-01).”;"

(13)

fl-Artikolu 23, il-paragrafu 4 huwa sostitwit b’dan li ġej:

(14)

l-Artikolu 25(4) jitħassar;

(15)

L-Artikolu 26 huwa emendat kif ġej:

(16)

l-Anness I huwa emendat f’konformità mal-Anness I ta’ dan ir-Regolament;

(17)

l-Anness III huwa sostitwit bit-test tal-Anness II ta’ dan ir-Regolament;

(18)

l-Anness IV huwa emendat f’konformità mal-Anness III ta’ dan ir-Regolament;

(19)

l-Anness VI huwa emendat f’konformità mal-Anness IV ta’ dan ir-Regolament;

(20)

l-Anness VII huwa emendat f’konformità mal-Anness V ta’ dan ir-Regolament;

(21)

It-test indikat fl-Anness VI ta’ dan ir-Regolament jiżdied bħala Anness VIII.