(1)

Id-Direttiva 2003/87/KE ġiet emendata aktar reċentement mid-Direttiva (UE) 2023/959 tal-Parlament Ewropew u tal-Kunsill (2) biex tinkludi l-emissjonijiet tat-trasport marittimu fis-sistema għall-iskambju ta’ kwoti tal-emissjonijiet ta’ gassijiet serra ġewwa l-Unjoni (l-“EU ETS”).

(2)

Sabiex tiġi żgurata l-konnettività ta’ ċerti gżejjer, l-EU ETS tipprevedi żewġ tipi ta’ derogi temporanji mill-obbligu li jiġu ċeduti l-kwoti skont l-Artikolu 12(3-d) u (3-c) tad-Direttiva 2003/87/KE. Peress li dawk id-derogi temporanji t-tnejn jikkonċernaw il-konnettività, jenħtieġ li l-lista tal-gżejjer u l-portijiet u l-lista ta’ kuntratti tas-servizz pubbliku tranżnazzjonali u l-obbligi tas-servizz pubbliku tranżnazzjonali jiġu stabbiliti fl-istess att.

(3)

F’konformità mal-ewwel subparagrafu tal-Artikolu 12(3-d), tad-Direttiva 2003/87/KE, port li jrid jiġi identifikat bħala port ikkonċernat mid-deroga temporanja jrid ikun jinsab fi gżira mingħajr konnessjoni bit-triq jew bil-ferrovija mal-kontinent u b’popolazzjoni ta’ inqas minn 200 000 resident permanenti. Għalhekk, bħala segwitu tat-talbiet mid-Danimarka, il-Greċja, Spanja, il-Kroazja, l-Italja, Malta u l-Iżvezja, jenħtieġ li bosta portijiet jiġu identifikati bħala portijiet ikkonċernati mid-deroga temporanja skont l-Artikolu 12(3-d) tad-Direttiva 2003/87/KE.

(4)

F’konformità mal-Artikolu 12(3-c) tad-Direttiva 2003/87/KE, il-kuntratti tas-servizz pubbliku tranżnazzjonali jew l-obbligi tas-servizz pubbliku tranżnazzjonali għandhom jgħaqqdu żewġ Stati Membri, fejn wieħed minnhom ma jkollux fruntiera tal-art ma’ Stat Membru ieħor u l-Istat Membru l-ieħor huwa l-eqreb Stat Membru ġeografikament għal dak l-Istat Membru mingħajr fruntiera tal-art. Ċipru ma għandu l-ebda fruntiera tal-art ma’ Stat Membru ieħor u l-Greċja hija ġeografikament l-eqreb Stat Membru għal Ċipru. Għalhekk, bħala segwitu tat-talba konġunta minn Ċipru u l-Greċja, il-kuntratt tas-servizz pubbliku li jgħaqqad lil Ċipru mal-Greċja jenħtieġ li jiġi identifikat bħala kuntratt ta’ servizz pubbliku tranżnazzjonali skont it-tifsira tal-Artikolu 12(3-c) tad-Direttiva 2003/87/KE.

(5)

Biex jiġi żgurat il-funzjonament effettiv tal-EU ETS, li għandha tkun tinkludi l-emissjonijiet mit-trasport marittimu rilaxxati mill-1 ta’ Jannar 2024, din id-Deċiżjoni jenħtieġ li tapplika minn dik id-data,

(a)

vjaġġi mwettqa minn vapuri tal-passiġġieri, minbarra bastimenti tal-kruċieri, u minn vapuri ro-ro tal-passiġġieri, bejn port ta’ gżira kif elenkat fl-Anness I ta’ din id-Deċiżjoni u port taħt il-ġuriżdizzjoni tal-istess Stat Membru, jew mill-attivitajiet, f’port, ta’ tali vapuri fir-rigward ta’ tali vjaġġi;

(b)

vjaġġi mwettqa minn vapuri tal-passiġġieri jew vapuri ro-ro fil-qafas ta’ kuntratt tas-servizz pubbliku tranżnazzjonali jew obbligu tas-servizz pubbliku tranżnazzjonali li jgħaqqdu żewġ Stati Membri, kif elenkati fl-Anness II ta’ din id-Deċiżjoni, jew mill-attivitajiet, f’port, ta’ tali vapuri fir-rigward ta’ tali vjaġġi.