(1)

L-Artikolu 3(b) tad-Direttiva 2010/40/UE jistabbilixxi bħala azzjoni ta’ prijorità l-forniment ta’ servizzi ta’ informazzjoni dwar it-traffiku f’ħin reali fl-UE kollha għall-iżvilupp u l-użu ta’ speċifikazzjonijiet u standards.

(2)

L-Artikolu 6(1) tad-Direttiva 2010/40/UE jirrikjedi li l-Kummissjoni tadotta l-ispeċifikazzjonijiet neċessarji biex tiżgura l-kompatibbiltà, l-interoperabbiltà u l-kontinwità għall-varar u l-użu operattiv tas-Sistemi tat-Trasport Intelliġenti (STI) għall-forniment ta’ servizzi ta’ informazzjoni dwar it-traffiku f’ħin reali fl-UE kollha. Il-Kummissjoni tistabbilixxi dawn l-ispeċifikazzjonijiet fir-Regolament Delegat tal-Kummissjoni (UE) 2015/962 (2), bil-għan li ttejjeb l-aċċessibbiltà, l-iskambju, l-użu mill-ġdid u l-aġġornament tad-data meħtieġa għall-forniment ta’ servizzi ta’ kwalità għolja u kontinwi ta’ informazzjoni dwar it-traffiku f’ħin reali madwar l-Unjoni.

(3)

Id-data tkompli tipprovdi l-bażi kuntestwali għall-ġenerazzjoni ta’ informazzjoni dwar it-traffiku f’ħin reali. Peress li l-varar tal-ITS jaċċellera madwar l-Unjoni, dan jeħtieġ appoġġ kontinwu fil-forma ta’ aċċess akbar u mingħajr xkiel għal tipi ta’ data eżistenti u ġodda rilevanti għall-forniment ta’ servizzi ta’ informazzjoni dwar it-traffiku f’ħin reali, b’kopertura ġeografika akbar. Għalhekk, huwa meħtieġ aġġornament tar-rekwiżiti dwar il-forniment tad-data biex ikompli jiġi żgurat użu mill-ġdid effettiv fis-servizzi tal-informazzjoni lill-utenti finali. Dawn ir-rekwiżiti aġġornati jistgħu potenzjalment jaffettwaw il-katina kollha tad-data, mill-akkwist, l-ifformattjar u l-aggregazzjoni tad-data sad-distribuzzjoni u l-inklużjoni tagħha fis-servizzi tal-informazzjoni dwar it-traffiku.

(4)

L-Artikolu 5 tad-Direttiva 2010/40/UE jistipula li l-ispeċifikazzjonijiet adottati f’konformità mal-Artikolu 6 ta’ din id-Direttiva jenħtieġ li jiġu applikati fir-rigward tal-applikazzjonijiet u s-servizzi tal-ITS, meta dawn ikunu varati mingħajr preġudizzju għad-dritt ta’ kull Stat Membru li jiddeċiedi dwar il-varar ta’ dawn l-applikazzjonijiet u s-servizzi fit-territorju tiegħu.

(5)

Dawn l-ispeċifikazzjonijiet jenħtieġ li japplikaw għall-forniment tas-servizzi ta’ informazzjoni tat-traffiku f’ħin reali kollha mingħajr preġudizzju għal speċifikazzjonijiet partikolari adottati f’atti oħra skont id-Direttiva 2010/40/UE, b’mod partikolari r-Regolament Delegat tal-Kummissjoni (UE) Nru 885/2013 (3) u r-Regolament Delegat tal-Kummissjoni (UE) Nru 886/2013 (4).

(6)

Is-suq għall-forniment ta’ servizzi ta’ informazzjoni dwar it-traffiku f’ħin reali diġà jeżisti fl-Unjoni u huwa fl-interess kemm tal-utenti u l-konsumaturi kif ukoll tal-fornituri ta’ dawn is-servizzi li jinħolqu l-kundizzjonijiet xierqa ta’ qafas għal dan is-suq sabiex jiġi ppreservat u jiġi żviluppat ulterjorment f’modi innovattivi. Fir-rigward tal-forniment ta’ servizzi ta’ informazzjoni dwar it-traffiku f’ħin reali, id-Direttiva (UE) 2019/1024 tal-Parlament Ewropew u tal-Kunsill (5) tistabbilixxi regoli minimi dwar l-użu mill-ġdid ta’ informazzjoni tas-settur pubbliku fl-Unjoni kollha. Fir-rigward tal-użu mill-ġdid ta’ data miżmuma mill-awtoritajiet tat-toroq u mill-operaturi tat-toroq pubbliċi, ir-regoli stabbiliti b’dan ir-Regolament, b’mod partikolari dawk dwar l-aġġornamenti tad-data, huma applikabbli bla preġudizzju għar-regoli stabbiliti bid-Direttiva (UE) 2019/1024. Fir-rigward tal-użu mill-ġdid tad-data miżmuma mid-detenturi privati tad-data, ir-regoli stabbiliti minn dan ir-Regolament ma jimponux il-kondiviżjoni tad-data mingħajr ħlas. Id-data miżmuma mid-detenturi privati tad-data tista’ tkun soġġetta għal ftehimiet ta’ liċenzja biex jiġi regolat l-użu mill-ġdid tagħhom.

(7)

Id-Direttiva 2007/2/KE tal-Parlament Ewropew u tal-Kunsill (6) toħloq infrastruttura tad-data ġeografika tal-Unjoni Ewropea sabiex tippermetti l-kondiviżjoni tal-informazzjoni ġeografika u aċċess pubbliku għaliha (inklużi t-tema tad-data ġeografika “networks tat-trasport”) fl-Unjoni kollha bil-għan li jiġu sostnuti l-politiki ambjentali tal-Unjoni, u l-politiki jew l-attivitajiet li jista’ jkollhom impatt fuq l-ambjent. L-ispeċifikazzjonijiet stipulati f’dan ir-Regolament jenħtieġ li jkunu kompatibbli mal-ispeċifikazzjonijiet stabbiliti mid-Direttiva 2007/2/KE u l-atti ta’ implimentazzjoni tagħha, b’mod partikolari r-Regolament tal-Kummissjoni (UE) Nru 1089/2010 (7). L-estensjoni tal-applikazzjoni ta’ dawn l-ispeċifikazzjonijiet għat-tipi kollha ta’ data dwar l-infrastruttura tista’ tippromwovi wkoll aktar armonizzazzjoni f’dan il-qasam.

(8)

Ir-Regolament (UE) Nru 1315/2013 tal-Parlament Ewropew u tal-Kunsill (8) jiddefinixxi l-infrastruttura tat-trasport bit-triq li tagħmel parti min-network ewlieni u min-network trans-Ewropew tat-trasport. Esternalitajiet tat-traffiku rikorrenti u diffikultajiet oħra tal-ġestjoni tat-traffiku, bħalma huma l-konġestjoni, it-tniġġis tal-arja jew l-istorbju, ma humiex limitati għan-network trans-Ewropew tat-toroq jew għall-awtostradi. Fil-fatt, sehem sinifikanti tal-konġestjoni tat-traffiku rikorrenti jseħħ f’żoni urbani. Barra minn hekk, is-servizzi ta’ informazzjoni dwar it-traffiku f’ħin reali madwar l-UE jenħtieġ li jippermettu l-ivvjaġġar minn bieb sa bieb u jenħtieġ li ma jkunux limitati għan-network komprensiv trans-Ewropew tat-toroq u għal awtostradi oħra. Għalhekk, jenħtieġ li l-Istati Membri japplikaw dawn l-ispeċifikazzjonijiet għan-network kollu tat-toroq, bl-eċċezzjoni ta’ toroq li ma jkunux proprjetà ta’ awtorità pubblika tat-toroq jew tat-trasport. It-toroq li jkunu proprjetà ta’ awtorità pubblika tat-toroq jew tat-trasport iżda li jkunu assenjati lil entità privata fil-forma ta’ konċessjoni ta’ ġestjoni jenħtieġ li ma jkunux parti minn din l-eċċezzjoni.

(9)

Tipi speċifiċi ta’ data meqjusa bħala kruċjali għall-iżvilupp ulterjuri ta’ servizzi affidabbli ta’ informazzjoni dwar it-traffiku u għat-titjib tas-sikurezza tat-traffiku, bħar-regolamenti tat-traffiku, ir-restrizzjonijiet u l-għeluq tat-toroq jew tal-korsija, jenħtieġ li jkunu disponibbli mill-awtoritajiet tat-toroq jew mill-operaturi tat-toroq. Minħabba l-importanza tagħhom, dawk it-tipi ta’ data jeħtieġ li jsiru aċċessibbli bħala stadju importanti aktar bikri meta mqabbla ma’ tipi oħra ta’ data.

(10)

Sabiex ikunu jistgħu jsiru l-iżviluppi meħtieġa fil-qasam tal-aċċessibbiltà u l-istandardizzazzjoni tad-data, jenħtieġ li tiġi kkunsidrata implimentazzjoni gradwali. Dan l-istadju jenħtieġ li jipprovdi żieda fattibbli u gradwali fil-kopertura ġeografika u fl-aċċessibbiltà għad-data. Għal dak il-għan, l-Istati Membri jenħtieġ li jiddefinixxu network primarju tat-toroq fit-territorju tagħhom. Sabiex jiddefinixxu dan in-network primarju tat-toroq, l-Istati Membri jistgħu jużaw mill-ġdid id-definizzjoni tan-network kif meħtieġ mill-Artikolu 1 tad-Direttiva 2008/96/KE tal-Parlament Ewropew u tal-Kunsill (9).

(11)

Minħabba d-diversità tas-sorsi tad-data li jvarjaw minn sensuri bbażati fuq l-infrastruttura għal vetturi li jaġixxu bħala sensuri, huwa importanti li l-ispeċifikazzjonijiet ikunu allinjati mal-kategoriji ta’ data rilevanti u mat-tipi ta’ data rilevanti, li jkunu jkopru diversi sorsi possibbli tad-data u t-teknoloġija li jintużaw biex tinħoloq jew tiġi aġġornata d-data.

(12)

Meta l-miżuri previsti f’dan ir-Regolament ikunu jinvolvu l-ipproċessar ta’ data personali, dawn jenħtieġ li jitwettqu f’konformità mad-dritt tal-Unjoni dwar il-protezzjoni tad-data personali u l-privatezza, b’mod partikolari r-Regolament (UE) 2016/679 (10) tal-Parlament Ewropew u tal-Kunsill, u, fejn applikabbli, id-Direttiva 2002/58/KE tal-Parlament Ewropew u tal-Kunsill (11). Partijiet mid-Direttiva 2002/58/KE japplikaw ukoll għall-ipproċessar ta’ data mhux personali.

(13)

Sabiex jiġi żviluppat forniment armonizzat u mingħajr xkiel tas-servizzi ta’ informazzjoni dwar it-traffiku f’ħin reali, l-Istati Membri jenħtieġ li jibbażaw fuq soluzzjonijiet u standards tekniċi eżistenti, provduti mill-organizzazzjonijiet tal-istandardizzazzjoni Ewropej u internazzjonali, bħalma hi d-DATEX II (CEN/TS 16157 u l-verżjonijiet aġġornati li jiġu wara) u l-istandards ISO. Għal tipi ta’ data li għalihom ma hemmx format standardizzat, l-Istati Membri u l-partijiet ikkonċernati jenħtieġ li jiġu mħeġġa li jikkooperaw sabiex jintlaħaq ftehim dwar id-definizzjoni tad-data, il-format tad-data u l-metadata.

(14)

Diġà jeżistu diversi metodi ta’ referenza dwar il-lokazzjoni dinamika fl-Unjoni u qed jiġu applikati fl-Istati Membri. L-użu ta’ metodi ta’ referenza dwar il-lokazzjoni differenti jenħtieġ li jibqgħu permessi. Madankollu, l-Istati Membri u l-partijiet ikkonċernati jenħtieġ li jiġu mħeġġa biex jikkooperaw bil-ħsieb li jintlaħaq qbil dwar il-metodi permessi ta’ referenza dwar il-lokazzjoni, jekk hemm bżonn permezz ta’ korpi ta’ standardizzazzjoni Ewropej.

(15)

L-aċċessibbiltà u l-aġġornament regolari tad-data milll-awtoritajiet tat-toroq u l-operaturi tat-toroq huma essenzjali biex jippermettu l-produzzjoni ta’ mapep diġitali aġġornati u akkurati li huma element fundamentali għal applikazzjonijiet tal-ITS affidabbli. Il-produtturi tal-mapep diġitali jenħtieġ li jiġu mħeġġa biex jintegraw l-aġġornamenti tad-data rilevanti fis-servizzi tal-mapep u fl-aġġornament tal-mapep eżistenti tagħhom fil-ħin. Sabiex jikkonformaw mal-politiki pubbliċi bħas-sikurezza fit-toroq, il-fornituri tas-servizzi u l-produtturi tal-mapep diġitali jenħtieġ li jikkollaboraw mal-awtoritajiet pubbliċi biex jikkoreġu l-ineżattezzi fid-data tagħhom.

(16)

L-aċċessibbiltà ta’ data akkurata u aġġornata hija essenzjali għall-forniment ta’ servizzi ta’ informazzjoni dwar it-traffiku f’ħin reali madwar l-Unjoni. Id-data rilevanti tinġabar u tinħażen mill-awtoritajiet tat-toroq, mill-operaturi tat-toroq, mid-detenturi tad-data ġġenerata fil-vetturi, mill-partijiet ikkonċernati relatati mal-irriċarġjar u mar-riforniment, mill-operaturi tal-pedaġġi u mill-fornituri tas-servizzi tal-informazzjoni dwar it-traffiku f’ħin reali. Sabiex jiġi ffaċilitat l-iskambju u l-użu mill-ġdid faċli ta’ din id-data għall-forniment ta’ tali servizzi, l-awtoritajiet tat-toroq, l-operaturi tat-toroq, id-detenturi ta’ data ġġenerata fil-vetturi, il-partijiet ikkonċernati relatati mal-irriċarġjar u mar-riforniment, l-operaturi tal-pedaġġi u l-fornituri tas-servizzi ta’ informazzjoni dwar it-traffiku f’ħin reali jenħtieġ li jagħmlu d-data, il-metadata u l-informazzjoni korrispondenti dwar il-kwalità tad-data aċċessibbli għal awtoritajiet tat-toroq, operaturi tat-toroq, partijiet ikkonċernati relatati mal-irriċarġjar u mar-riforniment, operaturi tal-pedaġġi, fornituri tas-servizzi tal-informazzjoni dwar it-traffiku f’ħin reali, produtturi tal-mapep diġitali oħra u joħolqu l-possibbiltà li din tkun tista’ tiġi skoperta minnhom permezz tal-punt ta’ aċċess nazzjonali jew komuni. Il-punt ta’ aċċess jista’ jieħu l-forma ta’ repożitorju, reġistru, portal tal-web jew simili skont it-tip ta’ data. Il-punti ta’ aċċess nazzjonali jew komuni jistgħu jindikaw ukoll postijiet oħra fejn tkun tista’ tiġi aċċessata d-data, mingħajr ma tiġi ospitata d-data nnifisha. L-Istati Membri jenħtieġ li jiġbru flimkien il-punti ta’ aċċess pubbliċi u privati eżistenti f’punt uniku biex jippermettu l-aċċess għat-tipi ta’ data rilevanti disponibbli li jaqgħu fl-ambitu ta’ dawn l-ispeċifikazzjonijiet. L-Istati Membri jistgħu jkomplu jużaw il-punti ta’ aċċess stabbiliti skont ir-Regolament Delegat (UE) 2015/962 u jenħtieġ li jkunu liberi li jiddeċiedu li jużaw il-punti ta’ aċċess stabbiliti skont atti delegati oħrajn adottati skont id-Direttiva 2010/40/UE bħala l-punti ta’ aċċess nazzjonali għad-data li taqa’ fil-kamp ta’ applikazzjoni ta’ dan ir-Regolament.

(17)

Sabiex l-awtoritajiet tat-toroq, l-operaturi tat-toroq, il-partijiet ikkonċernati relatati mal-irriċarġjar u mar-riforniment, l-operaturi tal-pedaġġi, il-fornituri tas-servizzi u l-produtturi tal-mapep diġitali jkunu jistgħu jiskopru u jużaw b’suċċess u b’mod kosteffiċjenti d-data rilevanti, huwa meħtieġ li l-kontenut u l-istruttura ta’ din id-data jiġu deskritti b’mod ċar permezz tal-metadata.

(18)

Is-servizzi ta’ informazzjoni dwar it-traffiku f’ħin reali jeħtieġ li jkunu akkurati sabiex jipprovdu l-aħjar informazzjoni possibbli lill-utenti finali f’termini ta’ affidabbiltà u puntwalità. Sabiex jittejbu l-benefiċċji għall-utenti tat-toroq f’dak li jirrigwarda sikurezza akbar fit-toroq u inqas konġestjoni tat-traffiku, dawn is-servizzi jenħtieġ li jirriflettu wkoll il-prijoritajiet tal-awtoritajiet tat-toroq, kif espressi pereżempju permezz ta’ pjanijiet ta’ ċirkolazzjoni tat-traffiku aċċessibbli b’mod diġitali.

(19)

Dawn l-ispeċifikazzjonijiet jenħtieġ li ma jobbligaw lill-ebda parti kkonċernata biex tibda tiġbor kwalunkwe data li ma hijiex tiġbor diġà jew li tiddiġitalizza kwalunkwe data li mhix diġà disponibbli f’format li tinqara minn magna. Ir-rekwiżiti speċifiċi dwar l-aġġornamenti tad-data jenħtieġ li japplikaw biss għad-data li fil-fatt tinġabar u tkun disponibbli f’format diġitali li jinqara minn magna. Fl-istess ħin, l-Istati Membri jenħtieġ li jiġu mħeġġa biex ifittxu modi kosteffettivi li huma adatti għall-ħtiġijiet tagħhom biex jiddiġitalizzaw id-data eżistenti dwar l-infrastruttura u d-data dwar ir-regolamenti u r-restrizzjonijiet.

(20)

Dawn l-ispeċifikazzjonijiet jenħtieġ li ma jobbligawx lill-awtoritajiet tat-toroq jew lill-operaturi tat-toroq biex jiddefinixxu jew jimplimentaw il-pjanijiet taċ-ċirkolazzjoni tat-traffiku u miżuri temporanji għall-ġestjoni tat-traffiku. Jenħtieġ li dawn ma jobbligawx lill-fornituri tas-servizz jikkondividu kwalunkwe data minn tagħhom ma’ fornituri oħrajn tas-servizz. Il-fornituri tas-servizz jenħtieġ li jkunu liberi li jikkonkludu ftehimiet kummerċjali bejniethom għall-użu mill-ġdid tad-data rilevanti.

(21)

L-Istati Membri u l-partijiet ikkonċernati tal-ITS jenħtieġ li jiġu mħeġġa biex jikkooperaw sabiex jinkiseb qbil dwar definizzjonijiet komuni tal-kwalità tad-data bil-għan li jintużaw indikaturi komuni għall-kwalità tad-data fil-katina kollha tal-valur tad-data dwar it-traffiku, bħalma huma l-kompletezza, il-preċiżjoni u l-aġġornament tad-data, il-metodu tal-akkwiżizzjoni u l-metodu ta’ referenza dwar il-lokazzjoni użati, kif ukoll il-verifiki tal-kwalità applikati. Jenħtieġ li jiġu mħeġġa wkoll ikomplu jaħdmu biex jistabbilixxu l-metodi tal-kejl tal-kwalità assoċjati u l-monitoraġġ tat-tipi differenti ta’ data. L-Istati Membri jenħtieġ li jiġu mħeġġin jaqsmu ma’ xulxin l-għarfien, l-esperjenza u l-aħjar prattiki tagħhom f’dan il-qasam fil-proġetti ta’ koordinazzjoni li għaddejjin u futuri.

(22)

Huwa rikonoxxut li l-użu tad-data u tas-servizzi ta’ informazzjoni dwar it-traffiku f’ħin reali ġġenerati mill-fornituri privati tas-servizzi u d-detenturi ta’ data ġġenerata fil-vettura jistgħu jirrappreżentaw mod kosteffettiv għall-awtoritajiet tat-toroq u l-operaturi tat-toroq biex itejbu l-ġestjoni tat-traffiku, is-sikurezza fit-toroq kif ukoll il-ġestjoni u l-manutenzjoni tal-infrastruttura. It-termini FRAND komuni jenħtieġ li jintużaw mill-awtoritajiet pubbliċi meta jirċievu dawn id-data jew is-servizzi għall-kompiti msemmija hawn fuq, sabiex jitnaqqsu l-ostakli għall-aċċess u tinħoloq trasparenza dwar il-kundizzjonijiet għall-użu mill-ġdid. L-Istati Membri u l-partijiet ikkonċernati rilevanti huma mħeġġa jiddefinixxu t-termini FRAND komuni applikabbli għall-użu mill-ġdid tat-tipi ta’ data rilevanti għall-eżekuzzjoni ta’ dawn il-kompiti pubbliċi.

(23)

Il-fornituri privati tas-servizzi jistgħu jużaw id-data miġbura mill-awtoritajiet tat-toroq u mill-operaturi tat-toroq bħala data tal-input għas-servizzi ta’ informazzjoni dwar it-traffiku f’ħin reali tagħhom stess. It-termini u l-kundizzjonijiet speċifiċi applikabbli għal tali użu mill-ġdid ta’ din id-data jenħtieġ li jitħallew f’idejn il-partijiet ikkonċernati mingħajr preġudizzju għad-dispożizzjonijiet tad-Direttiva (UE) 2019/1024 (12). Ċerti tipi ta’ data pprovduti mill-awtoritajiet tat-toroq u mill-operaturi tat-toroq, bħall-pjanijiet taċ-ċirkolazzjoni tat-traffiku, ir-regolamenti u r-restrizzjonijiet tat-traffiku u l-miżuri temporanji għall-ġestjoni tat-traffiku, jenħtieġ li jerġgħu jintużaw mill-fornituri privati tas-servizzi sabiex tiġi żgurata l-aċċessibbiltà għall-utenti tat-toroq għall-informazzjoni rilevanti permezz ta’ servizzi ta’ informazzjoni dwar it-traffiku f’ħin reali.

(24)

Sabiex jiġi żgurat li dawn l-ispeċifikazzjonijiet jiġu implimentati b’mod korrett, jenħtieġ li l-Istati Membri jivvalutaw il-konformità mar-rekwiżiti dwar l-aċċessibbiltà, l-iskambju, l-użu mill-ġdid u l-aġġornament tad-data mill-awtoritajiet tat-toroq, mill-operaturi tat-toroq, mill-produtturi tal-mapep diġitali, mill-operaturi tal-pedaġġi, mill-partijiet ikkonċernati relatati mal-irriċarġjar u mar-riforniment, mid-detenturi ta’ data ġġenerata fil-vettura u mill-fornituri tas-servizzi. Għal dak il-għan, jenħtieġ li l-awtoritajiet kompetenti jkunu liberi li jibbażaw fuq dikjarazzjonijiet ta’ konformità bbażati fuq l-evidenza ppreżentati mill-awtoritajiet tat-toroq, mill-operaturi tat-toroq, mill-produtturi tal-mapep diġitali, mill-operaturi tal-pedaġġi, mill-partijiet ikkonċernati relatati mal-irriċarġjar u mar-riforniment, mid-detenturi ta’ data ġġenerata fil-vettura u mill-fornituri tas-servizzi. L-Istati Membri jenħtieġ li jaħdmu flimkien biex jarmonizzaw l-approċċ tagħhom lejn il-valutazzjoni tal-konformità fil-proġetti ta’ koordinazzjoni li għaddejjin u futuri, li jgħinu fl-implimentazzjoni tal-ispeċifikazzjonijiet ta’ dan ir-Regolament.

(25)

Dawn l-ispeċifikazzjonijiet ma jillimitawx il-libertà tal-espressjoni tax-xandara tar-radju sakemm ma jobbligawhomx jieħdu kwalunkwe pożizzjoni speċifika fir-rigward tal-informazzjoni li trid tinxtered, u jħallu biżżejjed spazju għall-Istati Membri biex iqisu t-tradizzjonijiet kostituzzjonali nazzjonali tagħhom fir-rigward tal-libertà tal-espressjoni tax-xandara tar-radju.

(26)

Filwaqt li titqies il-firxa tal-bidliet meħtieġa, jenħtieġ li r-Regolament Delegat (UE) 2015/962 jitħassar.