(1)

Il-Komunikazzjoni tal-Kummissjoni “Il-Kumpass Diġitali tal-2030: l-approċċ Ewropew għad-Deċennju Diġitali” (2) tistabbilixxi objettivi ġodda ta’ konnettività għall-Unjoni li jridu jinkisbu permezz tal-iskjerament u l-adozzjoni mifruxa ta’ networks b’kapaċità għolja ħafna. Wieħed mill-objettivi huwa li sal-2030 l-unitajiet domestiċi kollha fl-Unjoni jkunu koperti minn network ta’ Gigabits. L-applikazzjonijiet tas-sistemi ta’ aċċess mingħajr fili inklużi n-networks ta’ żoni lokali bir-radju (WAS/RLANs) jikkontribwixxu ħafna għal dak l-objettiv ta’ kopertura.

(2)

L-aċċess għan-networks ta’ żoni lokali bir-radju huwa rregolat mill-Artikolu 56 tad-Direttiva (UE) 2018/1972 tal-Parlament Ewropew u tal-Kunsill (3). In-networks ta’ żoni lokali bir-radju huma definiti minn dik id-Direttiva bħala sistemi ta’ aċċess mingħajr fili b’potenza baxxa, li joperaw f’medda żgħira, b’riskju baxx ta’ interferenza ma’ sistemi oħra bħal dawn użati fil-qrib minn utenti oħrajn, li jużaw spettru armonizzat tar-radju b’mod mhux esklużiv.

(3)

Id-Deċiżjoni tal-Kummissjoni 2005/513/KE (4) armonizzat l-użu tal-ispettru tar-radju fil-banda ta’ frekwenzi ta’ 5 GHz (5 150-5 350 MHz u 5 470-5 725 MHz) għas-sistemi ta’ aċċess mingħajr fili inklużi n-networks ta’ żoni lokali bir-radju.

(4)

F’konformità mar-Regolamenti tar-Radju tal-Unjoni Internazzjonali tat-Telekomunikazzjoni (UIT) (5), il-baned ta’ frekwenzi 5 150-5 350 MHz u 5 470-5 725 MHz huma allokati lis-servizz mobbli ħlief is-servizz mobbli ajrunawtiku fuq bażi primarja fit-tliet Reġjuni tal-UIT, filwaqt li titqies il-ħtieġa li jiġu protetti servizzi primarji oħra f’dawk il-baned ta’ frekwenzi. Il-Konferenza Dinjija dwar ir-Radjukomunikazzjoni tal-UIT fl-2003 (WRC-03) adottat ir-Riżoluzzjoni 229 dwar “L-użu tal-baned 5 150-5 250, 5 250-5 350 MHz u 5 470-5 725 MHz mis-servizz mobbli għall-implimentazzjoni tas-Sistemi ta’ Aċċess Mingħajr Fili inklużi n-Networks ta’ Żoni Lokali bir-Radju”. Ir-Riżoluzzjoni, li ġiet riveduta fil-Konferenza Dinjija dwar ir-Radjukomunikazzjoni fl-2019 (WRC-19), estendiet il-kamp ta’ applikazzjoni tal-użu fuq ġewwa għat-treni u għall-vetturi tat-triq, stabbiliet il-potenza massima tal-emissjonijiet għad-WAS/RLANs li jużaw il-banda ta’ frekwenzi 5 150-5 250 MHz fil-vetturi tat-triq, u ppermettiet użu limitat fuq barra fil-banda ta’ frekwenzi 5 150-5 250 MHz billi tipproteġi użi eżistenti oħra f’dik il-banda.

(5)

F’diversi Stati Membri, hemm ħtieġa kritika għall-operazzjoni ta’ radars militari u meteoroloġiċi fil-baned ta’ bejn 5 250 u 5 850 MHz, li jeħtieġu protezzjoni speċifika mill-interferenza dannuża kkawżata mid-WAS/RLANs. F’dan il-kuntest, il-kundizzjonijiet tekniċi u operazzjonali għall-użu tad-WAS/RLANs jeħtieġ li jiżguraw il-protezzjoni tal-interessi pubbliċi leġittimi relatati ma’ servizzi oħra tar-radju, inklużi r-radars militari u meteoroloġiċi. Hemm ukoll il-ħtieġa li tiġi protetta l-vijabbiltà tas-sistemi relatati mas-servizz satellitari għall-esplorazzjoni tad-Dinja (attiv), is-servizz ta’ riċerka spazjali (attiv) u l-kollegamenti alimentaturi tas-servizzi mobbli satellitari, b’mod partikolari fil-banda ta’ frekwenzi 5 150-5 350 MHz.

(6)

Fl-14 ta’ April 2020, biex timplimenta r-riżultati tad-WRC-19 li rrevediet ir-Riżoluzzjoni 229, il-Kummissjoni ħarġet, skont l-Artikolu 4(2) tad-Deċiżjoni 676/2002/KE, mandat lill-Konferenza Ewropea tal-Amministrazzjonijiet Postali u tat-Telekomunikazzjoni (CEPT) biex temenda d-Deċiżjoni 2005/513/KE dwar l-użu armonizzat tal-ispettru tar-radju fil-banda ta’ frekwenzi ta’ 5 GHz għall-implimentazzjoni tad-WAS/RLANs. Skont il-mandat, is-CEPT ingħatat żewġ kompiti. L-ewwel kompitu kien li tipproponi kundizzjonijiet tekniċi sabiex tiġi emendata d-Deċiżjoni 2005/513/KE abbażi tal-eżitu tad-WRC-19 (reviżjoni tar-Riżoluzzjoni 229) għall-banda ta’ frekwenzi 5 150-5 250 MHz. It-tieni kompitu kien li tipproponi aġġornamenti korrispondenti tal-kundizzjonijiet tekniċi armonizzati għad-WAS/RLANs fil-baned 5 150-5 350 MHz u 5 470-5 725 MHz, kif xieraq. L-iskop tal-aġġornamenti jkun li jiġu kkunsidrati possibbiltajiet għall-użu ta’ dawn id-WAS/RLANs abbord il-vejikoli (inġenji tal-ajru, vetturi tat-triq (karozzi, karozzi tal-linja), treni, eċċ.) u tiġi vvalutata l-fattibbiltà tal-użu tad-WAS/RLAN fil-radjukollegamenti għas-sistemi tal-ajru mingħajr ekwipaġġ (UAS).

(7)

F’konformità ma’ dak il-mandat, is-CEPT ippubblikat ir-Rapport 79 dwar l-użu armonizzat tal-ispettru tar-radju fil-banda ta’ 5 GHz għall-implimentazzjoni tad-WAS/RLANs wara d-WRC-19. Ir-Rapport 79 tas-CEPT fih kundizzjonijiet tekniċi riveduti għad-WAS/RLANs fil-banda 5 150-5 250 MHz għall-każijiet tal-użu fuq ġewwa li ġejjin: ġewwa l-binjiet u installazzjonijiet fil-vetturi tat-triq, fit-treni u fl-inġenji tal-ajru, u użu limitat fuq barra. L-operazzjoni tal-UAS huwa permess biss fil-banda 5 170-5 250 MHz bħala każ speċifiku ta’ użu fuq barra. Il-kundizzjonijiet tekniċi proposti għall-banda 5 250-5 350 MHz jippermettu l-użu fuq ġewwa fil-binjiet biss. L-użu tal-banda 5 470-5 725 MHz huwa possibbli ġewwa u barra, iżda esklużi l-installazzjonijiet fil-vetturi tat-triq, fit-treni u fl-inġenji tal-ajru u l-użu għall-UAS. Ir-riżultati tal-mandat li jinsabu fir-Rapport 79 tas-CEPT intużaw bħala bażi għal din id-Deċiżjoni.

(8)

Fir-Rapport 79 tagħha, is-CEPT ikkonfermat fehim komuni dwar l-importanza li tissolva l-kwistjoni tal-interferenza dannuża għar-radars meteoroloġiċi fil-banda 5 600-5 650 MHz. Sabiex tikkontribwixxi għat-tnaqqis tal-interferenza dannuża għar-radars meteoroloġiċi, jenħtieġ li din id-Deċiżjoni tistabbilixxi kundizzjonijiet tekniċi għall-installazzjonijiet tad-WAS/RLAN fil-vetturi tat-triq, fit-treni u fl-inġenji tal-ajru u għall-użu minn sistemi tal-ajru mingħajr ekwipaġġ (UAS) u tiċċara r-rekwiżiti applikabbli għall-għażla dinamika tal-frekwenzi (DFS). Din id-Deċiżjoni tista’ tiġi rieżaminata fil-futur biex tiġi vvalutata l-effettività ta’ dawk il-miżuri.

(9)

Meta użu ieħor minbarra d-WAS/RLANs ikun ġeografikament limitat u magħruf mill-awtoritajiet regolatorji nazzjonali, jenħtieġ li l-Istati Membri jkunu intitolati li jawtorizzaw fil-livell nazzjonali l-installazzjonijiet fuq ġewwa fit-treni bl-użu tal-baned ta’ frekwenzi 5 250-5 350 MHz u 5 470-5 725 MHz, fejn l-użu tad-WAS/RLAN jista’ jiġi kkontrollat u ristrett ġeografikament.

(10)

Din id-Deċiżjoni hija bbażata fuq il-prinċipji u d-dispożizzjonijiet stabbiliti fid-Deċiżjoni 2005/513/KE u tiżviluppahom. Għal raġunijiet ta’ ċertezza legali, id-Deċiżjoni 2005/513/KE jenħtieġ titħassar.

(11)

Il-miżuri previsti f’din id-Deċiżjoni huma skont l-opinjoni tal-Kumitat dwar l-Ispettru tar-Radju,