(1)

Ir-Regolamenti Delegati tal-Kummissjoni (UE) 2015/2205 (2), (UE) 2016/592 (3) u (UE) 2016/1178 (4) jispeċifikaw, fost l-oħrajn, id-dati effettivi tal-obbligu tal-ikklerjar għal kuntratti li jappartjenu għall-klassijiet tad-derivattivi OTC stabbiliti fl-Annessi ta’ dawk ir-Regolamenti. Dawk ir-Regolamenti jistabbilixxu d-dati differiti ta’ applikazzjoni tal-obbligu tal-ikklerjar għal kuntratti tad-derivattivi OTC konklużi bejn kontropartijiet li jkunu parti mill-istess grupp u meta kontroparti waħda tkun stabbilita f’pajjiż terz u l-kontroparti l-oħra tkun stabbilita fl-Unjoni. Dawk id-dati differiti kienu meħtieġa biex jiġi żgurat li tali kuntratti tad-derivattivi OTC ma jkunux suġġetti għall-obbligu tal-ikklerjar qabel l-adozzjoni ta’ att ta’ implimentazzjoni skont l-Artikolu 13(2) tar-Regolament (UE) Nru 648/2012.

(2)

Mill-2018, l-ebda att ta’ implimentazzjoni skont l-Artikolu 13(2) tar-Regolament (UE) Nru 648/2012 ma ġie adottat b’rabta mal-obbligu tal-ikklerjar. L-applikazzjoni tal-obbligu tal-ikklerjar għall-kuntratti tad-derivattivi OTC konklużi bejn kontropartijiet li huma parti mill-istess grupp u fejn kontroparti waħda tkun stabbilita f’pajjiż terz u l-kontroparti l-oħra tkun stabbilita fl-Unjoni għalhekk ġiet differita bir-Regolament Delegat tal-Kummissjoni (UE) 2019/667 (5), jew sal-21 ta’ Diċembru 2020 jew sal-adozzjoni ta’ dawk l-atti ta’ implimentazzjoni. Minkejja l-isforzi investiti biex jiġu analizzati ġurisdizzjonijiet ta’ pajjiżi terzi li fir-rigward tagħhom jista’ jkun meħtieġ kwalunkwe att ta’ implimentazzjoni bħal dan, għadu ma ġie adottat l-ebda att ta’ implimentazzjoni skont l-Artikolu 13(2) tar-Regolament (UE) Nru 648/2012 fir-rigward tal-obbligu tal-ikklerjar. L-applikazzjoni tal-obbligu tal-ikklerjar għal dawk il-kuntratti jenħtieġ għalhekk li tiġi differita aktar sabiex jiġi evitat l-impatt ekonomiku detrimentali mhux intenzjonat li jista’ jkollha l-iskadenza ta’ dik l-eżenzjoni fuq id-ditti tal-Unjoni.

(3)

Ir-Renju Unit sar pajjiż terz fl-1 ta’ Frar 2020 u l-liġi tal-Unjoni mhux se tibqa’ tapplika għar-Renju Unit u fih fil-31 ta’ Diċembru 2020. Madankollu, l-obbligu ta’ kklerjar stipulat fir-Regolament (UE) Nru 648/2012 ma jiħux f’kunsiderazzjoni l-eventwalità li Stat Membru joħroġ mill-Unjoni. Ir-Regolamenti Delegati (UE) 2015/2205, (UE) 2016/592 u (UE) 2016/1178 jispeċifikaw id-dati minn meta l-obbligu tal-ikklerjar jidħol fis-seħħ għal kuntratti li jappartjenu għal ċerti klassijiet ta’ derivati OTC. Barra minn hekk, dawn ir-Regolamenti jipprovdu għal dati differenti skont il-kategorija ta’ kontroparti għal dawk il-kuntratti. Il-kontropartijiet ma jistgħux ibassru x’jista’ jkun l-istatus ta’ kontroparti stabbilita fir-Renju Unit jew sa liema punt din il-kontroparti tkun tista’ tkompli tipprovdi ċerti servizzi lil kontrapartijiet stabbiliti fl-Unjoni. L-isfidi ffaċċjati mill-partijiet ta’ kuntratt ta’ derivattivi OTC li l-kontropartijiet tiegħu huma stabbiliti fir-Renju Unit, huma għalhekk konsegwenza diretta ta’ avveniment li huwa lil hinn mill-kontroll tagħhom u jista’ jpoġġihom fi żvantaġġ meta mqabbel ma’ kontropartijiet oħra fl-Unjoni.

(4)

Biex jindirizzaw din is-sitwazzjoni, il-kontropartijiet jistgħu jkunu jridu jissostitwixxu l-kuntratt billi kontroparti stabbilita fi Stat Membru tieħu post il-kontroparti stabbilita fir-Renju Unit. Jekk, minħabba l-ħruġ tar-Renju Unit mill-Unjoni, jiġi deċiż li l-kontroparti stabbilita fir-Renju Unit tiġi sostitwita b’kontroparti ġdida stabbilita fl-Unjoni, is-sostituzzjoni tista’ tiskatta l-obbligu tal-ikklerjar jekk isseħħ fi jew wara d-data li fiha jidħol fis-seħħ l-obbligu tal-ikklerjar għal dak it-tip ta’ kuntratt. Bħala riżultat, il-partijiet jista’ jkollhom jikklerjaw dak il-kuntratt f’CCP awtorizzata jew rikonoxxuta. Peress li kuntratti kklerjati ċentralment huma suġġetti għal reġim kollaterali differenti minn kuntratti kklerjati mhux ċentralment, l-iskattar tal-obbligu tal-ikklerjar jista’ jobbliga lil ċerti kontropartijiet li ma jkomplux it-tranżazzjonijiet tagħhom, b’mod li ċerti riskji jibqgħu mhux iħħeġġjati. Sabiex ikun żgurat il-funzjonament bla xkiel tas-suq u li jkun hemm kundizzjonijiet ekwi bejn il-kontropartijiet stabbiliti fl-Unjoni, jenħtieġ li l-kontropartijiet ikunu jistgħu jissostitwixxu l-kontropartijiet stabbiliti fir-Renju Unit b’ kontropartijiet stabbiliti f’xi Stat Membru mingħajr ma jiskatta l-obbligu tal-ikklerjar.

(5)

Barra minn hekk, il-kontropartijiet jenħtieġ li jingħataw biżżejjed żmien biex jissostitwixxu l-kontropartijiet tagħhom stabbiliti fir-Renju Unit. Għalhekk jenħtieġ li d-data li minnha jista’ jiskatta l-obbligu tal-ikklerjar għan-novazzjoni ta’ dawk il-kuntratti tiġi differita.

(6)

Ir-Regolament (UE) Nru 648/2012 ġie emendat bir-Regolament (UE) 2019/834 tal-Parlament Ewropew u tal-Kunsill (6). Minħabba dik l-emenda, ma għadux meħtieġ li jiġu kklerjati ċerti kuntratti tad-derivattivi OTC konklużi qabel ma jidħol fis-seħħ l-obbligu tal-ikklerjar. Lanqas mhuwa aktar meħtieġ li jiġu speċifikati l-maturitajiet minimi li jifdal tal-kuntratti tad-derivattivi OTC imsemmija fl-Artikolu 4 tar-Regolament (UE) Nru 648/2012. Għalhekk, jenħtieġ li r-Regolamenti Delegati (UE) 2015/2205, (UE) 2016/592 u (UE) 2016/1178 ma jibqgħux jispeċifikaw il-maturitajiet minimi li jifdal.

(7)

Jenħtieġ li r-Regolamenti Delegati (UE) 2015/2205, (UE) 2016/592 u (UE) 2016/1178 jiġu emendati skont dan.

(8)

Dan ir-Regolament huwa bbażat fuq l-abbozz tal-istandards tekniċi regolatorji ppreżentati lill-Kummissjoni mill-Awtorità Ewropea tat-Titoli u s-Swieq.

(9)

L-emendi tar-Regolamenti Delegati (UE) 2015/2205, (UE) 2016/592 u (UE) 2016/1178 huma aġġustamenti limitati tal-qafas regolatorju eżistenti. Minħabba l-kamp ta’ applikazzjoni limitat tal-emendi u l-urġenza tal-kwistjoni, ikun sproporzjonat ħafna għall-ESMA li twettaq konsultazzjonijiet pubbliċi miftuħa jew analiżi tal-kostijiet u l-benefiċċji potenzjali relatati. Għall-istess raġunijiet, l-ESMA ma kkonsultatx lill-Grupp tal-Partijiet Interessati tat-Titoli u s-Swieq stabbilit bl-Artikolu 37 tar-Regolament (UE) Nru 1095/2010 tal-Parlament Ewropew u tal-Kunsill (7) li dwaru ġiet infurmata kif xieraq.

(10)

Huwa meħtieġ li tingħata ċertezza legali lill-parteċipanti fis-suq malajr kemm jista’ jkun sabiex ikunu jistgħu jippreparaw b’mod adegwat biex jikkonformaw mar-rekwiżiti skont ir-Regolament (UE) Nru 648/2012, li l-applikazzjoni tiegħu se tkun affettwata minn dan ir-Regolament, b’mod partikolari fir-rigward tar-rekwiżiti li għalihom qed toqrob malajr l-iskadenza applikabbli attwali. Għaldaqstant jenħtieġ li dan ir-Regolament jidħol fis-seħħ b’urġenza,