22.5.2018   

MT

Il-Ġurnal Uffiċjali tal-Unjoni Ewropea

L 125/10

(1)

F'konformità mal-Artikolu 6 tad-Deċiżjoni 2005/387/ĠAI, tfassal rapport dwar il-valutazzjoni tar-riskji għas-sustanza psikoattiva ġdida 1-(4-cyanobutyl)-N-(2-fenilpropan-2-yl)-1H-indazol-3-karbossammid (“CUMYL-4CN-BINACA”) minn sessjoni speċjali tal-Kumitat Xjentifiku estiż taċ-Ċentru Ewropew għall-Monitoraġġ tad-Droga u d-Dipendenza fuq id-Droga u r-rapport ġie ppreżentat lill-Kummissjoni u lill-Kunsill fl-14 ta' Novembru 2017.

(2)

Il-CUMYL-4CN-BINACA hija kannabinojdi sintetika. Din għandha effetti simili għal dawk tat-THC, li huwa responsabbli għall-effetti psikoattivi ewlenin tal-kannabis, iżda CUMYL-4CN-BINACA tossiċità addizzjonali ta' theddida għall-ħajja. Il-potenza għolja tal-CUMYL-4CN-BINACA minn naħa waħda, u l-fatt li tista' tirrapreżenta proporzjon varjabbli kbir jew mhux magħruf f'taħlitiet tat-tipjip min-naħa l-oħra, ifisser li din tikkostitwixxi riskju sinifikanti ta' avvelenament.

(3)

Il-CUMYL-4CN-BINACA ilha disponibbli fl-Unjoni mill-inqas minn Ottubru 2015 u ġiet individwata fi 11-il Stat Membru. Minħabba n-natura tal-CUMYL-4CN-BINACA, huwa probabbli li każijiet ta' individwazzjoni ma jiġux rappurtati kollha peress li l-CUMYL-4CN-BINACA mhijiex soġġetta għal kontrolli sistematiċi. F'ħafna każijiet, l-CUMYL-4CN-BINACA ġiet issekwestrata bħala trab jew materjal veġetali, imma kienet issekwestrata wkoll, għalkemm fuq livell aktar limitat, f'forom fiżiċi oħrajn, pereżempju fil-forma ta' assorbent. Saru aktar minn 270 sekwestru fl-Unjoni.

(4)

Zewġ Stati Membri rrapportati 11-il każ ta' mewt assoċjati mal-CUMYL-4CN-BINACA. F'mill-inqas ħames minn dawk il-każijiet ta' mewt il-CUMYL-4CN-BINACA jew kienet il-kawża tal-mewt jew inkella x'aktarx li kkontribwixxiet għall-mewt. Barra minn hekk, żewġ Stati Membri rrapportaw ħames każijiet mhux fatali ta' intossikazzjoni akuta assoċjati mal-CUMYL-4CN-BINACA. Minħabba n-natura tal-CUMYL-4CN-BINACA, kemm l-intossikazzjonijiet mhux fatali u kif ukoll l-imwiet ikkawżati mill-CUMYL-4CN-BINACA x'aktarx ma ġewx individwati kollha u ma ġewx irrapportati kollha.

(5)

Ma hemm ebda informazzjoni dwar l-involviment tal-kriminalità organizzata fil-manifattura, id-distribuzzjoni, it-traffikar u l-forniment tal-CUMYL-4CN-BINACA fl-Unjoni. Id-data disponibbli tissuġġerixxi li l-CUMYL-4CN-BINACA hija prodotta minn kumpaniji kimiċi fiċ-Ċina.

(6)

Il-CUMYL-4CN-BINACA tipikament tinbiegħ f'ammonti żgħar u bl-ingrossa fi ħwienet speċjalizzati (headshops), indikata bħala l-hekk imsejħa droga legali (legal high), bħala taħlitiet tat-tipjip jew bħala trab, kif ukoll fuq l-Internet, indikata bħala l-hekk imsejħa sostituzzjoni legali għall-kannabis. Huwa probabbli wkoll li tinbiegħ direttament fuq is-suq tad-drogi illeċiti. Billi l-imballaġġ ta' tali prodotti rarament jindikaw l-ingredjenti, ħafna mill-utenti mhumiex konxji li qegħdin jużaw il-CUMYL-4CN-BINACA, jew anke kannabinojdi sintetiċi inġenerali.

(7)

Il-CUMYL-4CN-BINACA ma għandha ebda użu mediku għall-bniedem jew użu mediku veterinarju rikonoxxut la fl-Unjoni u lanqas apparentament f'xi imkien ieħor. Ma hemm l-ebda indikazzjoni li l-CUMYL-4CN-BINACA tista' tintuża għal xi skop ieħor minbarra bħala standard analitiku ta' referenza u fir-riċerka xjentifika.

(8)

Ir-rapport dwar il-valutazzjoni tar-riskju juri li ħafna mil-mistoqsijiet relatati mal-CUMYL-4CN-BINACA li jqumu minħabba n-nuqqas ta' data dwar ir-riskji għas-saħħa individwali, ir-riskji għas-saħħa pubblika, u r-riskji soċjali, jista' jkollhom risposta permezz ta' iktar riċerka. Madankollu, l-evidenza u l-informazzjoni disponibbli dwar ir-riskji għas-saħħa u soċjali li toħloq is-sustanza jipprovdu raġunijiet suffiċjenti biex il-CUMYL-4CN-BINACA tiġi sottoposta għal miżuri ta' kontroll fl-Unjoni kollha.

(9)

Il-CUMYL-4CN-BINACA mhijiex elenkata għall-kontroll taħt il-Konvenzjoni Unika tan-Nazzjonijiet Uniti tal-1961 dwar id-Drogi Narkotiċi jew skont il-Konvenzjoni tan-Nazzjonijiet Uniti tal-1971 dwar Sustanzi Psikotropiċi. Il-CUMYL-4CN-BINACA bħalissa mhijiex qed tiġi vvalutata mis-sistema tan-Nazzjonijiet Uniti.

(10)

Billi disa' Stati Membri jikkontrollaw il-CUMYL-4CN-BINACA fil-leġiżlazzjoni nazzjonali għall-kontroll tad-drogi u ħames Stati Membri jikkontrollaw il-CUMYL-4CN-BINACA taħt leġiżlazzjoni oħra, il-fatt li CUMYL-4CN-BINACA tkun sottoposta għal miżuri ta' kontroll fl-Unjoni kollha jgħin biex jiġi evitat li jfeġġu ostakli fl-infurzar tal-liġi u l-kooperazzjoni ġudizzjarja transfruntieri, u jgħin fil-protezzjoni mir-riskji li d-disponibbiltà u l-użu tagħha joħolqu.

(11)

Id-Deċiżjoni 2005/387/ĠAI tikkonferixxi setgħat ta' implimentazzjoni lill-Kunsill bil-ħsieb li jkun hemm reazzjoni rapida u bbażata fuq kompetenza esperta fil-livell tal-Unjoni fil-każ li jfiġġu sustanzi psikoattivi ġodda individwati u rrappurtati mill-Istati Membri, billi tissottoponi dawk is-sustanzi għal miżuri ta' kontroll fl-Unjoni kollha. Billi l-kondizzjonijiet u l-proċedura biex jiġi attivat l-eżerċizzju ta' tali setgħat ta' implimentazzjoni ġew issodisfati, jenħtieġ li tiġi adottata deċiżjoni ta' implimentazzjoni sabiex il-CUMYL-4CN-BINACA tkun sottoposta għal miżuri ta' kontroll fl-Unjoni kollha.

(12)

Id-Danimarka hija marbuta bid-Deċiżjoni 2005/387/ĠAI u għalhekk qed tieħu sehem fl-adozzjoni u fl-applikazzjoni ta' din id-Deċiżjoni, li timplimenta d-Deċiżjoni 2005/387/ĠAI.

(13)

L-Irlanda hija marbuta bid-Deċiżjoni 2005/387/ĠAI u għalhekk qed tieħu sehem fl-adozzjoni u fl-applikazzjoni ta' din id-Deċiżjoni, li timplimenta d-Deċiżjoni 2005/387/ĠAI.

(14)

Ir-Renju Unit mhuwiex marbut bid-Deċiżjoni 2005/387/ĠAI u għalhekk mhux qed jieħu sehem fl-adozzjoni u fl-applikazzjoni ta' din id-Deċiżjoni u mhuwiex marbut biha jew soġġett għall-applikazzjoni tagħha,