32018D0170

EUR-Lex

Access to European Union law

This document is an excerpt from the EUR-Lex website

EUROPA
EUR-Lex home
Deċiżjoni implimentattiva - 2018/170 - EN - EUR-Lex

Help

Search tips

Need more search options? Use the Advanced search

Document 32018D0170

Deċiżjoni ta' Implimentazzjoni tal-Kummissjoni (UE) 2018/170 tat-2 ta' Frar 2018 dwar l-ispeċifikazzjonijiet dettaljati uniformi għall-ġbir u għall-analiżi tad-dejta sabiex jiġi mmonitorjat u evalwat il-funzjonament tan-netwerk tal-EURES (Test b'rilevanza għaż-ŻEE. )

C/2018/0533

ĠU L 31, 3.2.2018, p. 104–113 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

Legal status of the document In force

ELI: http://data.europa.eu/eli/dec_impl/2018/170/oj

Date of document:: 02/02/2018; Data ta' adozzjoni
Date of effect:: 23/02/2018; Dħul fis-seħħ Data tal-pubblikazzjoni +20 Ara Art. 10
Date of end of validity:: No end date

Author:: Il-Kummissjoni Ewropea, Id-Direttorat Ġenerali tal-Impjiegi, l-Affarijiet Soċjali u l-Inklużjoni
Responsible body:: EMPL
Form:: Deċiżjoni implimentattiva
Additional information:: Rilevanza għaż-ŻEE

Treaty:

Trattat dwar il-Funzjonament tal-Unjoni Ewropea

Legal basis:

32016R0589 - A32P3

Link

Select all documents based on this document

Link

Select all documents mentioning this document

Modified by:

Relation	Act	Comment	Subdivision concerned	From	To
Corrected by	32018D0170R(01)	(ES, DE, LV, RO)

Instruments cited:

32017D1256

Link

EUROVOC descriptor:

Subject matter:

Directory code:

HTML

PDF

Official Journal

3.2.2018

Il-Ġurnal Uffiċjali tal-Unjoni Ewropea

L 31/104

DEĊIŻJONI TA' IMPLIMENTAZZJONI TAL-KUMMISSJONI (UE) 2018/170

tat-2 ta' Frar 2018

dwar l-ispeċifikazzjonijiet dettaljati uniformi għall-ġbir u għall-analiżi tad-dejta sabiex jiġi mmonitorjat u evalwat il-funzjonament tan-netwerk tal-EURES

(Test b'rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) 2016/589 tal-Parlament Ewropew u tal-Kunsill tat-13 ta' April 2016 dwar netwerk Ewropew ta' servizzi tal-impjiegi (EURES), aċċess tal-ħaddiema għas-servizzi ta' mobilità u integrazzjoni ulterjuri tas-swieq tax-xogħol u li jemenda Regolamenti (UE) Nru 492/2011 u (UE) Nru 1296/2013 (1), u b'mod partikolari l-Artikolu 32(3) tiegħu,

Billi:

(1)	L-Artikolu 32(1) tar-Regolament (UE) 2016/589 jeżiġi li l-Istati Membri jdaħħlu fis-seħħ proċeduri sabiex tinġabar dejta dwar l-attivitajiet tal-EURES li twettqu fil-livell nazzjonali.

(2)	Sabiex jitkejlu l-prestazzjoni u l-attivitajiet tan-netwerk tal-EURES b'mod preċiż u konsistenti, huwa neċessarju li jiġi stabbilit qafas kunċettwali u proċedurali komuni, u li jiġu ddefiniti indikaturi u d-dejta minima li trid tinġabar.

(3)	Dak il-qafas kunċettwali u proċedurali se jgħin biex jiġi evalwat il-progress li sar fir-rigward tal-objettivi stabbiliti għan-netwerk tal-EURES skont ir-Regolament (UE) 2016/589.

(4)

Sabiex titkejjel il-prestazzjoni tan-netwerk tal-EURES b'mod komprensiv u biex jiġi evalwat bl-aħjar mod il-funzjonament tiegħu, il-qafas jenħtieġ li jinkludi żewġ dimensjonijiet addizzjonali minbarra t-tliet dimensjonijiet dwar is-servizzi ta' appoġġ lill-ħaddiema individwali u lill-impjegaturi msemmija fl-Artikolu 32(1) tar-Regolament (UE) 2016/589, jiġifieri l-informazzjoni u l-gwida, il-prestazzjoni fil-qasam tal-impjiegi u s-sodisfazzjon tal-klijenti. Dawn iż-żewġ dimensjonijiet addizzjonali tal-attività tal-EURES huma l-għoti ta' appoġġ orizzontali, bħat-taħriġ, u l-attivitajiet ta' komunikazzjoni, kooperazzjoni u sensibilizzazzjoni, bħal avvenimenti ta' reklutaġġ u sforzi biex tiġi żgurata t-trasparenza tal-informazzjoni dwar is-suq tax-xogħol. L-integrazzjoni ta' dawk iż-żewġ dimensjonijiet addizzjonali fis-Sistema ta' Kejl tal-Prestazzjoni tal-EURES, tippermetti li jiġu indirizzati diversi rekwiżiti ta' informazzjoni tar-Regolament (UE) 2016/589 u tagħmel is-Sistema ta' Kejl tal-Prestazzjoni tal-EURES kompatibbli ma' mekkaniżmi tar-rappurtar oħra speċifikati fl-istess Regolament. Għalhekk, filwaqt li timmassimizza l-benefiċċji potenzjali għan-netwerk tal-EURES, tista' tgħin biex jitnaqqas il-piż tar-rappurtar tal-Istati Membri.

(5)	Sabiex jiġu ffaċilitati l-ġbir u l-analiżi tad-dejta u biex jiġi evitat xogħol doppju, il-qafas jenħtieġ li jibni fuq prattika eżistenti fl-Istati Membri, b'mod partikolari l-prattika fi ħdan is-Servizzi Pubbliċi tal-Impjiegi.

(6)	Il-qafas irid ikun flessibbli biżżejjed biex jippermetti l-użu ta' sorsi ta' dejta jew metodi ta' ġbir alternattivi f'każijiet fejn ir-riżultati immedjati ta' attivitajiet speċifiċi, bħar-riżultati fil-qasam tar-reklutaġġ u tal-kollokament, jistgħu jkunu diffiċli li jitkejlu b'mod dirett.

(7)

Is-sinerġiji potenzjali kollha mal-arranġamenti u mal-proċeduri għall-ippjanar, għall-monitoraġġ u għall-evalwazzjoni annwali tal-attivitajiet tan-netwerk tal-EURES skont l-Artikolu 31 tar-Regolament (UE) 2016/589, jenħtieġ li jiġu sfruttati, b'mod partikolari biex l-analiżi tal-kejl tal-prestazzjoni tkun tista' titqies għall-programmi ta' ħidma nazzjonali sussegwenti.

(8)

Il-qafas jenħtieġ li jippermetti l-ġestjoni effettiva tal-attivitajiet tal-EURES fil-livell nazzjonali u tal-Unjoni u li jgħin biex jiġi vvalutat meta jkunu meħtieġa bidliet strateġiċi jew operattivi. Jenħtieġ li jappoġġa l-iżvilupp ta' kultura ta' kejl tal-prestazzjoni fi ħdan in-netwerk tal-EURES li jkollha bħala komponenti ewlenin l-orjentazzjoni lejn ir-riżultati, il-kosteffiċjenza u l-akkontabilità tan-nefqa.

(9)

Il-qafas jenħtieġ li jservi bħala strument biex tinġabar dejta kwantitattiva u kwalitattiva komparabbli biex jitkejlu l-attivitajiet tal-EURES koperti, iżda kull analiżi u interpretazzjoni jridu jsiru bir-reqqa filwaqt li jitqiesu l-fatturi kuntestwali fil-livell nazzjonali bħalma huma s-sitwazzjoni tas-suq tax-xogħol, l-istrutturi organizzattivi u l-approċċ ġenerali għall-mobbiltà. Għal din ir-raġuni, l-Istati Membri jenħtieġ li jkunu responsabbli għall-analiżi fil-livell nazzjonali tagħhom.

(10)	Il-miżuri previsti f'din id-Deċiżjoni huma skont l-opinjoni tal-Kumitat tal-EURES,

ADOTTAT DIN ID-DEĊIŻJONI:

Artikolu 1

Suġġett, kamp ta' applikazzjoni u definizzjonijiet

1. Din id-Deċiżjoni tistabbilixxi l-ispeċifikazzjonijiet dettaljati uniformi għall-ġbir u għall-analiżi tad-dejta sabiex jiġi mmonitorjat u evalwat il-funzjonament tan-netwerk tal-EURES – is-Sistema ta' Kejl tal-Prestazzjoni tal-EURES – billi jiġu ddefiniti d-dimensjonijiet tal-prestazzjoni li jridu jitkejlu, l-indikaturi tal-prestazzjoni, is-sorsi possibbli tad-dejta u l-proċessi għall-ġbir u għall-analiżi tad-dejta.

2. Is-Sistema ta' Kejl tal-Prestazzjoni tal-EURES għandha fost l-oħrajn tintuża għal dan li ġej:

(a)	il-ġbir, il-kondiviżjoni u l-analiżi konġunta tal-informazzjoni kif imsemmi fl-Artikolu 30 tar-Regolament (UE) 2016/589,

(b)	ir-riflessjoni dwar l-allokazzjoni tar-riżorsi u l-prijoritajiet għall-ipprogrammar tal-attivitajiet tal-EURES kif imsemmi fl-Artikolu 31 tar-Regolament (UE) 2016/589,

(c)	ir-riflessjoni dwar il-mudelli ta' negozju u l-organizzazzjoni tan-netwerk tal-EURES u dwar kontributi essenzjali oħra għar-rapporti dwar l-attività lill-istituzzjonijiet tal-Unjoni u għar-rapport ta' evalwazzjoni ex post kif imsemmi fl-Artikoli 33 u 35 tar-Regolament (UE) 2016/589 rispettivament;

3. Għall-finijiet ta' din id-Deċiżjoni, għandhom japplikaw id-definizzjonijiet li ġejjin:

(a)

“dimensjonijiet ta' prestazzjoni” tfisser l-oqsma li ġejjin ta' attivitajiet tal-EURES li jridu jitkejlu permezz tal-indikaturi:

(1)	informazzjoni u gwida,

(2)	prestazzjoni tal-impjiegi,

(3)	sodisfazzjon tal-klijenti,

(4)	komunikazzjoni, kooperazzjoni u sensibilizzazzjoni, u

(5)	appoġġ orizzontali;

(b)

“indikaturi ta' prestazzjoni” tfisser l-indikaturi li ġejjin li huma relatati direttament mal-attività u mal-kooperazzjoni tal-EURES fi ħdan in-netwerk:

(1)	“indikaturi ewlenin” li huma relatati mal-attivitajiet tal-EURES li saru fl-Istati Membri individwali fir-rigward ta' servizzi ta' appoġġ lill-ħaddiema u lill-impjegaturi skont l-Artikolu 32(1) tar-Regolament (UE) 2016/589,

(2)	“indikaturi tan-netwerk”, li huma relatati mat-tħaddim ġenerali tan-netwerk tal-EURES, inkluż id-dejta meħtieġa skont dispożizzjonijiet oħra fir-Regolament (UE) 2016/589 u dik miġbura mill-Uffiċċju Ewropew ta' Koordinazzjoni;

(c)	“indikaturi kuntestwali” tfisser indikaturi li huma relatati mas-suq tax-xogħol, mal-politiki tal-impjieg u mal-istrutturi organizzattivi tal-EURES u li jistgħu jinkisbu minn sorsi oħra għajr dawk soġġetti għall-kontroll tal-EURES;

(d)	“kuntatt” tfisser kwalunkwe interazzjoni unika li sseħħ bejn il-persunal tal-membri u tas-sħab tal-EURES, u klijent (ħaddiem jew impjegatur) b'dimensjoni ta' mobbiltà tal-ħaddiema intra-UE;

(e)

“avveniment” tfisser kull okkażjoni ppjanata u organizzata minn Membru jew Sieħeb tal-EURES, jew bil-parteċipazzjoni tiegħu, biex tingħata informazzjoni dwar il-mobbiltà tal-ħaddiema intra-UE jew biex jiġu ffaċilitati r-reklutaġġ u l-kollokament bħal fieri tax-xogħol, konferenzi u sessjonijiet ta' informazzjoni;

(f)	“kollokament f'impjieg” hija r-riżultat tal-proċess biex jimtela post tax-xogħol battal, kif definit fl-Artikolu 3(3) tar-Regolament (UE) 2016/589, inklużi opportunitajiet ta' apprendistati u traineeships;

(g)

“applikazzjoni għax-xogħol” tfisser dokument jew sett ta' dokumenti li applikant jittrasferixxi lil impjegatur jew lil servizz tal-impjiegi bħala parti minn proċess biex impjegatur jiġi informat dwar id-disponibbiltà u x-xewqa tal-applikant li jiġi impjegat f'post tax-xogħol jew f'pożizzjoni partikolari.

Artikolu 2

Prinċipji ġenerali

1. Kull Stat Membru għandu jistabbilixxi mekkaniżmu biex tinġabar id-dejta speċifikata f'din id-Deċiżjoni mill-Membri u mis-Sħab tal-EURES nazzjonali rispettivi u minn kull sors ieħor li jista' jipprovdi d-dejta meħtieġa.

2. Id-dejta li tkun inġabret u ġiet ivverifikata għandha tiġi trażmessa lill-Uffiċċju Ewropew ta' Koordinazzjoni bl-użu ta' mudell komuni u skont il-proċessi stabbiliti fl-Artikolu 7.

3. L-Istati Membri għandhom, fejn xieraq, jiżguraw li f'każ li d-dejta ma tkunx disponibbli faċilment, jintużaw u jiġu deskritti kif xieraq, sorsi ta' dejta alternattivi.

4. L-Istati Membri għandhom jagħmlu ħilithom kollha biex jikkooperaw ma' xulxin u mal-Kummissjoni biex jiżguraw l-ogħla kwalità possibbli tal-input tad-dejta u, b'mod partikolari, meta jkunu qed jippreżentaw u janalizzaw id-dejta, jindikaw kwalunkwe għadd doppju identifikat.

5. Il-ġbir tad-dejta taħt is-Sistema ta' Kejl tal-Prestazzjoni tal-EURES għandu jiġi segwit minn analiżi tad-dejta annwali tar-riżultati fil-livell nazzjonali, b'rabta mill-qrib maċ-ċiklu tal-ipprogrammar annwali tal-attivitajiet tal-EURES fil-livell nazzjonali, kif previst fl-Artikolu 31 tar-Regolament (UE) 2016/589. Is-Sistema ta' Kejl tal-Prestazzjoni tal-EURES għandha tintuża biex jiġu identifikati r-riżultati tal-attivitajiet ipprogrammati u mwettqa fis-sena kalendarja preċedenti, li għandhom jiġu analizzati u użati biex jiġu żviluppati programmi nazzjonali ta' ħidma ġodda għas-sena kalendarja li jmiss.

6. L-analiżi tad-dejta msemmija fil-paragrafu 5 għandha tappoġġa l-preżentazzjoni tad-dejta miġbura billi jiġu deskritti l-kundizzjonijiet li skonthom inkisbu r-riżultati, kull limitazzjoni eżistenti fil-metodoloġija tal-ġbir tad-dejta u kull limitazzjoni fil-kapaċità tad-dejta biex jitkejlu l-attivitajiet li seħħew effettivament. Kull Stat Membru għandu jkun responsabbli għall-analiżi tad-dejta tiegħu stess u jiżgura li d-dejta tinftiehem u hija ppreżentata fil-kuntest domestiku xieraq.

7. L-analiżi tad-dejta msemmija fil-paragrafu 5 għandha tikkontribwixxi għal fehim aħjar tad-dejta u tar-riżultati miksuba fil-kuntest domestiku speċifiku. Barra minn hekk, l-analiżi tad-dejta għandha tikkontribwixxi biex jiġu identifikati l-punti qawwija u d-dgħufijiet maż-żmien marbuta mal-attività tal-EURES fl-Istat Membru kkonċernat u b'hekk tappoġġa l-monitoraġġ, l-evalwazzjoni u, fejn xieraq, it-teħid ta' deċiżjonijiet dwar bidliet strateġiċi u operazzjonali fil-livell nazzjonali.

8. Il-Kummissjoni għandha tappoġġa l-proċess ta' analiżi tal-Istati Membri individwali billi tikkompila d-dejta nazzjonali, tipprovdi t-totali aggregati tal-UE, tikkondividi d-dejta fi ħdan in-netwerk tal-EURES, ixxerred id-dejta skont l-Artikolu 8 u billi tiġbed l-attenzjoni għas-sinerġiji u għall-kwistjonijiet komuni.

Artikolu 3

Rwoli u responsabbiltajiet tal-Uffiċċji Nazzjonali ta' Koordinazzjoni

L-Uffiċċji Nazzjonali ta' Koordinazzjoni għandhom, fl-Istat Membru rispettiv tagħhom, ikunu responsabbli għal dan li ġej:

(a)	il-ġbir ta' dejta mill-Membri u mis-Sħab tal-EURES u, fejn xieraq, minn sorsi oħra;

(b)	l-iżgurar li d-dejta li tasal mingħand il-Membri u s-Sħab tal-EURES tkun konsistenti u tissodisfa l-istandards ta' kwalità miftiehma bejn l-Uffiċċju Nazzjonali ta' Koordinazzjoni u l-Membri u s-Sħab tal-EURES ikkonċernati;

(c)	it-trażmissjoni tad-dejta hekk miġbura u vverifikata lill-Uffiċċju Ewropew ta' Koordinazzjoni, skont l-Artikolu 7, bl-użu tal-indikaturi msemmija fl-Artikolu 9;

(d)	it-twettiq tal-analiżi tal-indikaturi fil-livell nazzjonali;

(e)	it-teħid ta' kull azzjoni meħtieġa u xierqa bbażata fuq l-eżitu ta' din l-analiżi.

Artikolu 4

Rwoli u responsabbiltajiet tal-Uffiċċju Ewropew ta' Koordinazzjoni

1. L-Uffiċċju Ewropew ta' Koordinazzjoni għandu jkun responsabbli li jappoġġa l-ġbir u l-analiżi tal-indikaturi tad-dejta, b'mod partikolari billi:

(a)

joħloq u jżomm taqsima ddedikata fl-Extranet tal-portal EURES biex iqiegħed għad-dispożizzjoni tal-Uffiċċji Nazzjonali ta' Koordinazzjoni:

(i)	il-verżjoni elettronika tal-lista ta' indikaturi u s-sorsi ta' dejta possibbli msemmija fl-Artikolu 9;

(ii)	il-mudell għat-trażmissjoni tad-dejta msemmija fl-Artikolu 2(2) u kull informazzjoni relatata dwar kif irid jimtela u jiġi ppreżentat;

(iii)

l-għodda, id-dokumentazzjoni u l-linji gwida meħtieġa għall-iskambju u għall-analiżi tad-dejta;

(b)	jappoġġa l-konsistenza bejn l-applikazzjoni mill-Istati Membri tal-Artikoli 31 u 32 tar-Regolament (UE) 2016/589;

(c)	jiffaċilita l-iskambju tal-aħjar prassi;

(d)	jidentifika s-sinerġiji u l-oqsma ta' azzjoni komuni;

(e)	jikkompila d-dejta nazzjonali sabiex jipprovdi dejta aggregata tal-UE;

(f)	jipprovdi indikaturi fil-livell Ewropew u informazzjoni dwar il-flussi u x-xejriet marbuta mal-mobbiltà tal-ħaddiema skont l-Artikolu 29 tar-Regolament (UE) 2016/589.

2. L-Uffiċċju Ewropew ta' Koordinazzjoni għandu jikkondividi r-riżultati tas-Sistema ta' Kejl tal-Prestazzjoni tal-EURES fi ħdan in-netwerk tal-EURES u jxerridhom b'konformità mal-Artikolu 8.

Artikolu 5

Rwoli u responsabbiltajiet tal-Membri u tas-Sħab tal-EURES

Il-Membri u s-Sħab tal-EURES għandhom jikkontribwixxu għas-Sistema ta' Kejl tal-Prestazzjoni tal-EURES billi jipprovdu dejta vverifikata dwar l-attivitajiet tagħhom fi ħdan id-dimensjonijiet tal-prestazzjoni rilevanti u bl-indikaturi u bil-perjodiċità mitluba mill-Uffiċċju Nazzjonali ta' Koordinazzjoni responsabbli.

Artikolu 6

Rwoli u responsabbiltajiet tal-Grupp ta' Koordinazzjoni

1. Il-Grupp ta' Koordinazzjoni għandu jimmonitorja mill-qrib l-applikazzjoni tal-Artikolu 32 tar-Regolament (UE) 2016/589 u jservi ta' forum għall-iskambju ta' fehmiet u tal-aħjar prassi bil-ħsieb li jtejjeb il-funzjonament tas-Sistema ta' Kejl tal-Prestazzjoni tal-EURES.

2. Il-Grupp ta' Koordinazzjoni għandu jirrieżamina, darba fis-sena, l-applikazzjoni ta' din id-Deċiżjoni. Dak ir-rieżami se jikkostitwixxi l-kontribut tal-Grupp ta' Koordinazzjoni għar-rapporti dwar l-attività u l-evalwazzjoni ex post mill-Kummissjoni b'konformità mal-Artikoli 33 u 35 tar-Regolament (UE) 2016/589.

3. Kwalunkwe modifika tal-listi, tal-għodod tal-mudelli, tad-dokumentazzjoni u tal-linji gwida msemmija fl-Artikolu 4(1)(a) għandha tiġi miftiehma mal-Grupp ta' Koordinazzjoni qabel ma tkun tista' tiġi applikata.

4. Il-Grupp ta' Koordinazzjoni għandu jiddeċiedi dwar approċċ għat-tixrid tar-riżultati tas-Sistema ta' Kejl tal-Prestazzjoni tal-EURES.

Artikolu 7

Proċessi

1. Jekk ma jkunx iddikjarat mod ieħor fil-lista ta' indikaturi, imsemmija fl-Artikolu 9, l-Uffiċċji Nazzjonali ta' Koordinazzjoni għandhom jittrażmettu, darbtejn fis-sena, id-dejta li tkun inġabret bi qbil ma' din id-Deċiżjoni lill-Uffiċċju Ewropew ta' Koordinazzjoni. Id-dejta għandha tiġi trażmessa f'Awwissu għall-perjodu minn Jannar sa Ġunju u fi Frar għall-perjodu minn Lulju sa Diċembru tas-sena kalendarja preċedenti.

2. L-analiżi tad-dejta għandha titwettaq kull sena matul l-ewwel tliet xhur tas-sena wara s-sena li għaliha tkun inġabret id-dejta. Is-sejbiet tal-analiżi għandhom jiġu ppreżentati b'rabta mar-rappurtar dwar l-implimentazzjoni tal-attivitajiet stabbiliti fil-programm ta' ħidma nazzjonali, kif imsemmi fl-Artikolu 3 tad-Deċiżjoni ta' Implimentazzjoni tal-Kummissjoni (UE) 2017/1256 (2).

Artikolu 8

Kondiviżjoni u tixrid tal-informazzjoni

1. Id-dejta li tinġabar u l-analiżi tagħha għandhom jitqiegħdu għad-dispożizzjoni tal-Uffiċċji Nazzjonali ta' Koordinazzjoni u tal-Membri u tas-Sħab tal-EURES fit-taqsima maħsuba apposta fuq l-Extranet tal-Portal tal-EURES.

2. L-Uffiċċju Ewropew ta' Koordinazzjoni għandu juża d-dejta xierqa minn Sistema ta' Kejl tal-Prestazzjoni tal-EURES bħala l-kontribut mill-EURES għar-rapporti tal-Kummissjoni dwar il-funzjonament tas-suq uniku.

3. Kwalunkwe tixrid ulterjuri għandu jiġi rregolat mill-approċċ ta' tixrid miftiehem mill-Grupp ta' Koordinazzjoni.

Artikolu 9

Lista tal-indikaturi

L-Uffiċċji Nazzjonali ta' Koordinazzjoni għandhom jiġbru, janalizzaw u jittrażmettu d-dejta lill-Uffiċċju Ewropew ta' Koordinazzjoni skont il-lista ta' indikaturi u s-sorsi ta' dejta possibbli riprodotti fl-Anness.

Artikolu 10

Dħul fis-seħħ

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

L-obbligu li tiġi pprovduta dejta skont din id-Deċiżjoni għandu japplika mis-sena ta' referenza 2018.

Magħmul fi Brussell, it-2 ta' Frar 2018.

Għall-Kummissjoni

Il-President

Jean-Claude JUNCKER

(1) ĠU L 107, 22.4.2016, p. 1.

(2) Id-Deċiżjoni ta' Implimentazzjoni tal-Kummissjoni (UE) 2017/1256 tal-11 ta' Lulju 2017 dwar il-mudelli u l-proċeduri għall-iskambju ta' informazzjoni dwar il-programmi ta' ħidma nazzjonali tan-netwerk EURES fil-livell tal-Unjoni (ĠU L 179, 12.7.2017, p. 24).

ANNESS

LISTA TA' INDIKATURI LI JRIDU JINTUŻAW BIEX TIĠI PPROVDUTA D-DEJTA LIS-SISTEMA TA' KEJL TAL-PRESTAZZJONI TAL-EURES

Il-verżjoni elettronika ta' din il-lista u kwalunkwe verżjoni li tiġi modifikata wara, se jkunu disponibbli għall-Uffiċċji Nazzjonali ta' Koordinazzjoni fuq l-Extranet tal-portal tal-EURES.

I. Indikaturi ewlenin

1. Applikazzjonijiet għal xogħol ittrattati u pproċessati

—

Kejl: L-għadd ta' applikazzjonijiet għax-xogħol minn ħaddiema kemm fil-pajjiż kif ukoll minn pajjiżi oħra, li jistgħu jinqasmu skont is-sess.

Dan l-indikatur ikejjel l-għadd ta' applikazzjonijiet għax-xogħol ittrattati u pproċessati mill-persunal tal-Membri u tas-Sħab tal-EURES bl-għan li jappoġġa t-tlaqqigħ u l-kollokament ta' ħaddiem individwali fl-UE.

—	Sorsi possibbli tad-dejta: Il-Membri u s-Sħab tal-EURES, l-istħarriġ, dejta amministrattiva oħra dwar l-operazzjonijiet; dejta statistika jew amministrattiva oħra.

—	Dimensjoni tal-prestazzjoni: Prestazzjoni tal-impjiegi.

—	Perjodu tal-ġbir tad-dejta: Darbtejn fis-sena.

2. Postijiet tax-xogħol battala ttrattati u pproċessati

—

Kejl: L-għadd ta' postijiet tax-xogħol battala minn impjegaturi kemm fil-pajjiż kif ukoll minn pajjiżi oħra.

Dan l-indikatur ikejjel l-għadd ta' postijiet tax-xogħol battala ttrattati u pproċessati mill-persunal tal-Membri u tas-Sħab tal-EURES bl-għan li jappoġġa l-proċess ta' tlaqqigħ u kollokament għal impjegatur individwali fl-UE.

—	Sorsi possibbli tad-dejta: Il-Membri u s-Sħab tal-EURES, l-istħarriġ, dejta amministrattiva oħra dwar l-operazzjonijiet; dejta statistika jew amministrattiva oħra.

—	Dimensjoni tal-prestazzjoni: Prestazzjoni tal-impjiegi.

—	Perjodu tal-ġbir tad-dejta: Darbtejn fis-sena.

3. Kollokamenti tax-xogħol li saru b'riżultat tal-attività ta' reklutaġġ u ta' kollokament

—

Kejl: L-għadd ta' dawk li jsibu impjieg, ħerġin u deħlin, li jistgħu jiġu mqassmin skont is-sess.

Dan l-indikatur ikejjel ir-riżultati li jinkisbu permezz tal-attivitajiet ta' reklutaġġ u ta' kollokament imwettqa min-netwerk tal-EURES fuq il-bażi tal-għadd ta' kollokamenti f'impjieg li saru b'riżultat tas-servizzi ta' appoġġ ipprovduti mill-persunal tal-Membri u tas-Sħab tal-EURES.

Dan l-indikatur irid jiġi analizzat b'rabta mill-qrib mal-indikaturi ewlenin tal-output 1 u 2 relatati mal-għadd ta' postijiet tax-xogħol battala u ta' applikazzjonijiet għax-xogħol, ittrattati u pproċessati rispettivament.

Sabiex tiġi evitata l-possibbiltà ta' għadd doppju f'kontribuzzjonijiet differenti, l-għadd ta' kollokamenti li saru permezz ta' proġetti mmirati ta' reklutaġġ transnazzjonali jenħtieġ li jiġi pprovdut separatament.

—	Sorsi possibbli tad-dejta: Il-Membri u s-Sħab tal-EURES, l-istħarriġ, dejta amministrattiva oħra dwar l-operazzjonijiet; dejta statistika jew amministrattiva oħra.

—	Dimensjoni tal-prestazzjoni: Prestazzjoni tal-impjiegi.

—	Perjodu tal-ġbir tad-dejta: Darbtejn fis-sena.

4. Informazzjoni u gwida li tingħata lill-ħaddiema u lill-impjegaturi

—

Kejl:

(a)	Għadd ta' kuntatti individwali mal-ħaddiema;

(b)	Għadd ta' kuntatti individwali mal-impjegaturi.

Dawn l-indikaturi jkejlu l-volum u n-natura tal-interazzjoni mal-klijenti u għalhekk l-intensità tar-relazzjoni bejn il-persunal tal-Membri u tas-Sħab tal-EURES u l-ħaddiema u l-impjegaturi rispettivament.

Għall-ħaddiema u għall-impjegaturi, l-għadd ta' kuntatti individwali jenħtieġ li jinqasam skont l-oriġini u skont is-suġġett diskuss: “informazzjoni ġenerali dwar l-EURES”, “ir-reklutaġġ/il-kollokament”, “il-kundizzjonijiet tal-ħajja u tax-xogħol/is-sigurtà soċjali/l-edukazzjoni u t-taħriġ” jew “l-attivitajiet transkonfinali”.

—	Sorsi possibbli tad-dejta: Il-Membri u s-Sħab tal-EURES, l-istħarriġ, dejta amministrattiva oħra dwar l-operazzjonijiet; dejta statistika jew amministrattiva oħra.

—	Dimensjoni tal-prestazzjoni: Informazzjoni u gwida.

—	Perjodu tal-ġbir tad-dejta: Darbtejn fis-sena.

5. Sodisfazzjon tal-klijenti fir-rigward tas-servizzi ta' appoġġ

—	Kejl: Dan l-indikatur ikejjel ir-rati ta' sodisfazzjon tal-klijenti f'dak li għandu x'jaqsam mas-servizzi ta' informazzjoni u ta' gwida, ta' reklutaġġ u ta' tfittix ta' xogħol offruti lill-ħaddiema u lill-impjegaturi mill-persunal tal-Membri u tas-Sħab tal-EURES.

—	Sorsi possibbli tad-dejta: Il-Membri u s-Sħab tal-EURES, dejta amministrattiva oħra dwar l-operazzjonijiet, stħarriġ mill-Uffiċċji Nazzjonali ta' Koordinazzjoni jew mill-Membri u mis-Sħab tal-EURES.

—	Dimensjoni tal-prestazzjoni: Sodisfazzjon tal-klijenti.

—	Perjodu tal-ġbir tad-dejta: Kull sena.

II. Indikaturi tan-netwerk

1. Attivitajiet ta' taħriġ li jassistu lill-persunal li jopera fl-organizzazzjonijiet li jieħdu sehem fin-netwerk tal-EURES

—

Kejl:

(a)	L-għadd ta' persuni li jitħarrġu minn qabel dwar l-EURES fil-livell nazzjonali;

(b)	L-għadd ta' persuni li jitħarrġu minn qabel dwar l-EURES fil-livell Ewropew.

Dawn l-indikaturi jkejlu t-tagħlim fin-netwerk kollu tal-EURES u l-impenn biex tiġi żgurata l-kwalità meħtieġa tal-persunal. It-taħriġ minn qabel jikkonċerna l-attivitajiet kollha biex il-persunal tal-Membri u tas-Sħab tal-EURES jitħejja biex joffri s-servizzi ta' appoġġ tal-EURES (skont l-Artikolu 9(3) tar-Regolament (UE) 2016/589) filwaqt li t-taħriġ fil-livell Ewropew jikkonċerna s-sessjonijiet ta' taħriġ u l-avvenimenti tal-EURES ikkoordinati mill-Uffiċċju Ewropew ta' Koordinazzjoni (skont l-Artikolu 8(1) tar-Regolament (UE) 2016/589).

—	Sorsi possibbli tad-dejta: Uffiċċji Nazzjonali ta' Koordinazzjoni għal taħriġ minn qabel, l-Uffiċċju Ewropew ta' Koordinazzjoni għal taħriġ fil-livell Ewropew.

—	Dimensjoni tal-prestazzjoni: Appoġġ orizzontali.

—	Perjodu tal-ġbir tad-dejta: Darbtejn fis-sena.

2. Sodisfazzjon tal-klijenti bl-assistenza online offruta lill-utenti tal-Portal tal-EURES

—

Kejl: Dan l-indikatur ikejjel is-sodisfazzjon tal-klijenti fir-rigward ta' talbiet ipproċessati permezz tal-assistenza relatata mal-funzjonament tekniku tal-Portal tal-EURES u mal-fehim ġenerali tan-netwerk tal-EURES u tal-Portal tal-EURES. L-utenti fuq il-Portal tal-EURES jinkludu ħaddiema, impjegaturi, l-Uffiċċji Nazzjonali ta' Koordinazzjoni, il-Membri u s-Sħab tal-EURES.

—	Sors ewlieni indikattiv tad-dejta: Uffiċċju Ewropew ta' Koordinazzjoni.

—	Dimensjoni tal-prestazzjoni: Appoġġ orizzontali/Sodisfazzjon tal-klijenti.

—	Perjodu tal-ġbir tad-dejta: Kull sena.

3. Prestazzjoni tal-midja soċjali

—	Kejl: L-għadd ta' posts, l-għadd ta' fans/ta' dawk li jsegwu, l-influwenza/l-impressjonijiet, u l-parteċipazzjoni għal kull mezz tal-midja soċjali. Dawn l-indikaturi jkejlu l-preżenza fil-midja soċjali tan-netwerk tal-EURES u l-prestazzjoni tad-diversi mezzi tal-midja soċjali.

—	Sorsi possibbli tad-dejta: Il-Membri u s-Sħab tal-EURES, l-Uffiċċju Ewropew ta' Koordinazzjoni.

—	Dimensjoni tal-prestazzjoni: Komunikazzjoni, kooperazzjoni u sensibilizzazzjoni.

—	Perjodu tal-ġbir tad-dejta: Darbtejn fis-sena.

4. Il-postijiet tax-xogħol battala, li huma disponibbli għall-pubbliku u li ttellgħu fuq il-portal tal-EURES mill-Membri u mis-Sħab tal-EURES

—

Kejl:

(a)	L-għadd totali ta' postijiet tax-xogħol battala li hemm fil-Membri u fis-Sħab tal-EURES;

(b)	L-għadd totali ta' postijiet tax-xogħol battala li tqiegħdu għad-dispożizzjoni tal-pubbliku mill-Membri u mis-Sħab tal-EURES;

(c)	L-għadd ta' postijiet tax-xogħol battala li tqiegħdu għad-dispożizzjoni permezz tal-mezz ikkoordinat uniku fuq il-Portal tal-EURES.

Dawn l-indikaturi jkejlu l-għadd ta' postijiet tax-xogħol battala li tqiegħdu għad-dispożizzjoni mill-Membri tal-EURES u, fejn rilevanti, mis-Sħab tal-EURES, fuq il-Portal tal-EURES b'paragun mal-għadd ta' postijiet tax-xogħol battala li tqiegħdu għad-dispożizzjoni u mal-għadd ta' postijiet tax-xogħol battala li hemm f'dawk l-organizzazzjonijiet. Fil-prinċipju, il-postijiet tax-xogħol battala kollha disponibbli għall-pubbliku jenħtieġ li jkunu disponibbli. Madankollu, xi esklużjonijiet huma possibbli skont l-Artikolu 17 tar-Regolament (UE) 2016/589.

—	Sorsi possibbli tad-dejta: Il-Membri u s-Sħab tal-EURES, l-Uffiċċju Ewropew ta' Koordinazzjoni, dejta statistika jew amministrattiva oħra.

—	Dimensjoni tal-prestazzjoni: Komunikazzjoni, kooperazzjoni u sensibilizzazzjoni/Prestazzjoni fil-qasam tal-impjiegi.

—	Perjodu tal-ġbir tad-dejta: Kull sena.

5. Is-sehem mis-suq tal-Membri tal-EURES u, fejn rilevanti, tas-Sħab tal-EURES fis-suq tal-postijiet tax-xogħol battala fil-livell nazzjonali

—

Kejl:

(a)	L-għadd ta' postijiet tax-xogħol battala li tqiegħdu għad-dispożizzjoni permezz tal-mezz ikkoordinat uniku fuq il-Portal tal-EURES;

(b)	L-għadd totali ta' postijiet tax-xogħol battala fil-livell tal-Istati Membri.

Dawn l-indikaturi jqabblu l-għadd ta' postijiet tax-xogħol battala disponibbli fuq il-Portal tal-EURES mal-għadd totali ta' postijiet tax-xogħol battala disponibbli fil-pajjiż. Jagħti indikazzjoni dwar il-parti koperta mill-EURES fis-suq tax-xogħol kollu kemm hu u sa liema punt l-EURES jipprovdi trasparenza dwar is-suq tax-xogħol.

L-indikaturi jindirizzaw id-dispożizzjoni tal-Artikolu 9(2)(c) tar-Regolament (UE) 2016/589.

—	Sorsi possibbli tad-dejta: Il-Membri u s-Sħab tal-EURES, l-Eurostat, l-Uffiċċju Ewropew ta' Koordinazzjoni, dejta statistika jew amministrattiva oħra

—	Dimensjoni tal-prestazzjoni: Komunikazzjoni, kooperazzjoni u sensibilizzazzjoni/Prestazzjoni fil-qasam tal-impjiegi.

—	Perjodu tal-ġbir tad-dejta: Kull sena.

6. Avvenimenti li attendew għalihom u individwi li ġew ikkuntattjati fl-avvenimenti

—	Kejl: Dawn l-indikaturi jipprovdu informazzjoni dwar l-għadd ta' avvenimenti ta' reklutaġġ jew ta' informazzjoni li għalihom attendew il-Membri u s-Sħab tal-EURES, kif ukoll dwar l-għadd ta' individwi li ġew ikkuntattjati fl-okkażjoni ta' dawk l-avvenimenti.

—	Sorsi possibbli tad-dejta: Il-Membri u s-Sħab tal-EURES, dejta amministrattiva oħra dwar l-operazzjonijiet.

—	Dimensjoni tal-prestazzjoni: Komunikazzjoni, kooperazzjoni u sensibilizzazzjoni.

—	Perjodu tal-ġbir tad-dejta: Darbtejn fis-sena.

7. Grad ta' interazzjoni ma' pajjiżi oħra fin-netwerk kollu kemm hu

—

Kejl:

(a)	L-għadd ta' pajjiżi li magħhom ikkooperaw il-Membri u s-Sħab tal-EURES għal attivitajiet ta' reklutaġġ tal-EURES;

(b)	L-għadd ta' proġetti ta' kooperazzjoni li twettqu fil-qasam tar-reklutaġġ.

Dawn l-indikaturi jkejlu l-grad ta' interazzjoni tan-netwerk fi ħdan il-EURES billi jiġbru informazzjoni dwar l-inċidenza ta' kooperazzjoni transnazzjonali bejn il-Membri u s-Sħab tal-EURES (l-għadd ta' proġetti ta' reklutaġġ ma' organizzazzjonijiet f'pajjiżi oħra).

—	Sorsi possibbli tad-dejta: Il-Membri u s-Sħab tal-EURES, iċ-ċiklu tal-Ipprogrammar, is-Sħubiji Transkonfinali u l-benefiċjarji tal-proġetti tal-Iskemi ta' Mobbiltà Mmirati.

—	Dimensjoni tal-prestazzjoni: Komunikazzjoni, kooperazzjoni u sensibilizzazzjoni.

—	Perjodu tal-ġbir tad-dejta: Darbtejn fis-sena.

8. Viżitaturi uniċi fil-Portal tal-EURES

—	Kejl: Dan l-indikatur ikejjel l-għadd ta' viżitaturi uniċi fil-Portal tal-EURES u jagħti indikazzjoni dwar l-adegwatezza tal-għodod ta' servizzi online disponibbli fil-Portal tal-EURES.

—	Sors ewlieni indikattiv tad-dejta: Uffiċċju Ewropew ta' Koordinazzjoni.

—	Dimensjoni tal-prestazzjoni: Komunikazzjoni, kooperazzjoni u sensibilizzazzjoni.

—	Perjodu tal-ġbir tad-dejta: Darbtejn fis-sena.

9. Profili ta' persuni li qed ifittxu xogħol irreġistrati fuq il-Portal tal-EURES

—

Kejl:

(a)	L-għadd ta' profili ta' persuni li qed ifittxu xogħol irreġistrati permezz tal-funzjoni ta' self-service fil-Portal tal-EURES;

(b)	L-għadd ta' profili ta' persuni li qed ifittxu xogħol ittrasferiti permezz tal-mezz ikkoordinat uniku fil-Portal tal-EURES.

Dawn l-indikaturi jkejlu l-għadd ta' ħaddiema li jew għażlu attivament li joħolqu profil għalihom fuq il-Portal tal-EURES u jużaw direttament il-funzjoni ta' self-service tal-portal jew taw il-kunsens tagħhom biex id-dejta tal-profil tagħhom tkun disponibbli fuq il-portali nazzjonali jew sistemi oħra tal-IT skont l-Artikolu 17(1) u (3) tar-Regolament (UE) 2016/589. L-għadd ta' profili attivi miksuba b'dan il-mod jagħti indikazzjoni dwar l-adegwatezza tal-Portal tal-EURES bħala għodda ta' tlaqqigħ/kollokament u d-domanda minn ħaddiema individwali għal servizzi ta' appoġġ tal-EURES.

—	Sors ewlieni indikattiv tad-dejta: Uffiċċju Ewropew ta' Koordinazzjoni.

—	Dimensjoni tal-prestazzjoni: Komunikazzjoni, kooperazzjoni u sensibilizzazzjoni.

—	Perjodu tal-ġbir tad-dejta: Darbtejn fis-sena.

10. Impjegaturi rreġistrati fuq il-Portal tal-EURES

—

Kejl: Dan l-indikatur ikejjel l-għadd ta' impjegaturi li jużaw il-funzjoni ta' self-service fil-Portal tal-EURES. Dan jipprovdi indikazzjoni tad-domanda għall-ħaddiema li tista' potenzjalment tiġi indirizzata permezz tal-mobbiltà tal-ħaddiema intra-UE u s-sodisfazzjon tal-klijenti bil-funzjonalitajiet u bl-informazzjoni li jinsabu fil-Portal tal-EURES.

—	Sors ewlieni indikattiv tad-dejta: Uffiċċju Ewropew ta' Koordinazzjoni.

—	Dimensjoni tal-prestazzjoni: Komunikazzjoni, kooperazzjoni u sensibilizzazzjoni.

—	Perjodu tal-ġbir tad-dejta: Darbtejn fis-sena.

11. Is-sodisfazzjon tal-klijenti bil-funzjonalitajiet u bl-informazzjoni li jinsabu fil-Portal tal-EURES

—	Kejl: Dan l-indikatur ikejjel is-sodifazzjon tal-klijenti bil-ħaddiema u bl-impjegaturi f'mumenti differenti waqt l-użu tal-Portal tal-EURES.

—	Sors ewlieni indikattiv tad-dejta: Uffiċċju Ewropew ta' Koordinazzjoni.

—	Dimensjoni tal-prestazzjoni: Komunikazzjoni, kooperazzjoni u sensibilizzazzjoni/Sodisfazzjoni tal-klijenti.

—	Perjodu tal-ġbir tad-dejta: Kull sena.

Top

All

Choose the experimental features you want to try