26.1.2017   

MT

Il-Ġurnal Uffiċjali tal-Unjoni Ewropea

L 21/105

(1)

Fis-16 ta' Jannar 2015, il-Kummissjoni rċeviet talba minn Flughafen Wien (l-Ajruport ta' Vjenna, minn hawn 'il quddiem, “l-Applikant”) skont l-Artikolu 30 tad-Direttiva 2004/17/KE (minn hawn 'il quddiem “it-Talba”).

(2)

It-Talba kienet tikkonċerna attivitajiet relatati mal-isfruttament ta' żona ġeografika għall-provvista tal-infrastruttura tal-ajruporti fuq it-territorju tal-Awstrija (3).

(3)

It-Talba hija akkumpanjata minn opinjoni tal-awtorità indipendenti li hija kompetenti għas-servizzi tal-ajruport fl-Awstrija, il-Ministeru Federali għat-Trasport, l-Innovazzjoni u t-Teknoloġija (minn hawn 'il quddiem “BMVIT”), datata t-22 ta' Diċembru 2014. Dik l-opinjoni (minn hawn 'il quddiem “l-Opinjoni”) tindirizza l-kwistjoni dwar jekk hemmx aċċess liberu għas-suq u jekk l-attivitajiet soġġetti għat-Talba humiex esposti direttament għall-kompetizzjoni.

(4)

Fl-2010, l-Applikant resaq għall-ewwel darba lejn il-Kummissjoni biex jiddiskuti, b'mod informali, il-possibbiltajiet għal eżenzjoni mir-regoli tal-akkwist pubbliku. L-ewwel skambji ta' fehmiet kienu bbażati fuq abbozz ta' talba li kien diskuss matul il-laqgħa tas-17 ta' Marzu 2010. Dik il-laqgħa kienet segwita minn lista bil-miktub informali tal-kummenti u l-mistoqsijiet mibgħuta mill-Kummissjoni lill-Applikant fit-12 ta' April 2010.

(5)

Fis-26 ta' Settembru 2013, l-Applikant issottometta abbozz aġġornat tat-Talba. Wara dik is-sottomissjoni, il-Kummissjoni kkummentat bil-miktub (permezz ta' ittra datata l-15 ta' Novembru 2013). L-Applikant wieġeb għall-ittra tal-Kummissjoni, fit-2 ta' April 2014, u wara segwa skambju ieħor informali ta' fehmiet f'laqgħa tas-26 ta' Ġunju 2014.

(6)

Fis-16 ta' Jannar 2015, l-Applikant issottometta formalment it-Talba għal eżenzjoni.

(7)

Fil-5 ta' Frar 2016, l-Applikant irtira t-Talba meta jkun ikkonċernat il-bejgħ bl-imnut (4).

(8)

Id-dritt Awstrijak dwar l-akkwist pubbliku (5) jippermetti li l-entitajiet kontraenti jissottomettu talbiet skont l-Artikolu 30 tad-Direttiva 2004/17/KE.

(9)

VIE huwa entità kontraenti skont l-Artikolu 4(1)(b) tad-Direttiva 2014/25/UE, billi jwettaq attività relatata mal-isfruttament ta' żona ġeografika għall-provvista tal-ajruporti skont l-Artikolu 12 tad-Direttiva 2014/25/UE u jopera abbażi ta' dritt speċjali fit = tifsira tal-Artikolu 4(3) tad-Direttiva 2014/25/UE.

(10)

Wara l-ewwel valutazzjoni, il-Kummissjoni kkunsidrat li t-Talba ma kinitx tinkludi l-informazzjoni meħtieġa biex tippermetti valutazzjoni xierqa tal-kriterji rilevanti għall-iskopijiet ta' eżenzjoni mir-regoli tal-akkwist pubbliku.

(11)

Fis-27 ta' Frar 2015, il-Kummissjoni talbet lill-Applikant jissupplimenta t-Talba bl-informazzjoni nieqsa u jipprovdi evidenza empirika sabiex juri d-definizzjoni tas-suq magħżul, flimkien ma' dejta aktar affidabbli dwar is-sitwazzjoni kompetittiva għal kull wieħed mis-swieq. It-tweġibiet kienu mibgħuta mill-Applikant, permezz ta' e-mails tal-4 u l-15 ta' Settembru 2015. Fil-21 ta' Settembru 2015 u fit-23 ta' Ottubru 2015 il-Kummissjoni talbet lill-Applikant jipprovdi kjarifiki ulterjuri għat-tweġiba tal-15 ta' Settembru 2015. It-tweġibiet tal-Applikant waslu fl-14 ta' Ottubru 2015, u fil-5 ta' Frar 2016. Minħabba l-fatt li t-tweġibiet ma kinux waslu sad-data tal-iskadenza stabbilita mill-Kummissjoni, il-limitu taż-żmien biex tittieħed deċiżjoni kien sospiż matul il-perjodu bejn id-data tal-iskadenza stabbilita fit-talba għall-informazzjoni (it-13 ta' Marzu 2015), u d-data li fiha waslet l-informazzjoni kompluta (il-5 ta' Frar 2016). Il-Partijiet qablu fuq estensjoni oħra taż-żmien. Id-data tal-iskadenza l-ġdida għall-adozzjoni kienet id-29 ta' Lulju 2016.

(12)

B'mod parallel, fl-20 ta' April 2015 il-Kummissjoni talbet għal informazzjoni addizzjonali mill-awtoritajiet Awstrijaċi. It-tweġibiet kienu trażmessi mill-awtoritajiet Awstrijaċi, permezz tal-posta elettronika tat-3 ta' Lulju 2015.

(13)

Sar skambju ulterjuri ta' korrispondenza fir-rigward tal-istatus ġuridiku tal-Applikant bħala parti kontraenti. Fit-22 ta' April u fid-19 ta' Mejju 2016, il-Kummissjoni talbet informazzjoni addizzjonali mingħand l-Applikant. L-Applikant wieġeb fl-4 ta' Mejju u fl-1 ta' Lulju 2016 rispettivament. Barra minn hekk, fil-11 ta' Lulju u fit-23 ta' Settembru 2016 il-Kummissjoni talbet informazzjoni addizzjonali dwar dan is-suġġett mill-Awtoritajiet Awstrijaċi. L-Awtoritajiet Awstrijaċi wieġbu fil-31 ta' Awwissu u fit-30 ta' Settembru 2016 rispettivament.

(14)

Fil-5 ta' Lulju 2016, minħabba l-ħtieġa li tinkiseb u tiġi analizzata l-informazzjoni addizzjonali, id-data tal-iskadenza għall-adozzjoni ta' Deċiżjoni tal-Kummissjoni dwar dan il-każ ġiet estiża għall-31 ta' Ottubru 2016, bi qbil mal-partijiet.

(15)

Minħabba l-fatt li t-tweġibiet għat-talba għall-informazzjoni ma kinux waslu sad-data tal-iskadenza stabbilita mill-Kummissjoni, il-limitu taż-żmien biex tittieħed deċiżjoni kien sospiż matul il-perjodu bejn id-data tal-iskadenza stabbilita fit-talba għall-informazzjoni (id-9 ta' Awwissu 2016), u d-data li fiha waslet l-informazzjoni kompluta (il-31 ta' Awwissu 2016), għalhekk id-data tal-iskadenza l-ġdida għall-adozzjoni ta' Deċiżjoni tal-Kummissjoni saret it-23 ta' Novembru 2016.

(16)

Fit-8 ta' Novembru 2016, l-Applikant irtira t-Talba billi din testendi sal-provvista tal-infrastruttura tal-ajruport għat-traffiku tal-passiġġieri, is-servizzi tal-gourndhandling u l-parkeġġ. Għalhekk it-Talba nżammet biss fir-rigward tal-provvista tal-infrastruttura tal-ajruport għall-merkanzija. Fit-18 ta' Novembru 2016, intlaħaq qbil reċiproku mill-partijiet dwar data tal-iskadenza ġdid għal Deċiżjoni tal-Kummissjoni. Din id-data tal-iskadenza ġiet stabbilita għall-31 ta' Jannar 2017.

(17)

Fit-23 ta' Settembru 2015, l-Assoċjazzjoni Internazzjonali tat-Trasport bl-Ajru — IATA, issottomettiet dokument ta' pożizzjoni dwar il-valutazzjoni tal-kompetizzjoni fis-settur tal-ajruporti fl-Awstrija fir-rigward tat-Talba għal eżenzjoni mir-regoli tal-akkwist pubbliku. F'dan il-każ, is-sottomissjoni kienet ibbażata fuq l-avviż (6) tal-ftuħ tal-proċedura. Id-dokument ta' pożizzjoni jiffoka fuq il-valutazzjoni tal-provvista tas-servizzi diretti tat-trasport bl-ajru tal-passiġġieri fil-livell internazzjonali.

(18)

Fil-preżent hemm 6 ajruporti kummerċjali fl-Awstrija, jiġifieri l-Ajruport ta' Vjenna (minn hawn 'il quddiem imsemmi bil-kodiċi tal-IATA tiegħu, bħala “VIE”), l-Ajruport ta' Graz (minn hawn 'il quddiem “GRZ”), l-Ajruport ta' Innsbruck (minn hawn 'il quddiem “INN”), l-Ajruport ta' Klagenfurt (minn hawn 'il quddiem “KLU”), l-Ajruport ta' Linz (minn hawn 'il quddiem “LNZ”) u l-Ajruport ta' Salzburg (minn hawn 'il quddiem “SZG”).

(19)

L-operatur ta' VIE huwa kumpanija pubblika b'responsabbiltà limitata (7) elenkata fil-Borża ta' Vjenna sa mill-1992, filwaqt li l-operaturi tal-ajruporti l-oħrajn Awstrijaċi huma kollha kumpaniji pubbliċi b'responsabbiltà limitata.

(20)

Is-sitt ajruporti kummerċjali Awstrijaċi qdew total ta' 26,3 miljun passiħħieri fl-2013 (8) u madwar […] (9) tunnellati ta' merkanzija fis-sena (10).

(21)

Id-Direttiva 2014/25/UE tapplika għall-għoti ta' kuntratti għall-attivitajiet relatati mal-provvista tal-infrastruttura tal-ajruporti, sakemm din l-attività mhux eżentata skont l-Artikolu 34 ta' dik id-Direttiva.

(22)

Skont l-Artikolu 34 tad-Direttiva 2014/25/UE, il-kuntratti intiżi biex jippermettu t-twettiq ta' attività li għaliha tapplika dik id-Direttiva ma jkunux soġġetti għal dik id-Direttiva jekk, fl-Istat Membru fejn titwettaq l-attività, din tkun esposta direttament għall-kompetizzjoni fi swieq fejn l-aċċess ma jkunx ristrett. L-esponiment dirett għall-kompetizzjoni huwa vvalutat abbażi ta' kriterji oġġettivi, b'kunsiderazzjoni tal-karatteristiċi speċifiċi tas-settur ikkonċernat. L-aċċess jitqies bħala mhux ristrett jekk l-Istat Membru jkun implimenta u applika l-leġiżlazzjoni rilevanti tal-Unjoni, li tiftaħ settur partikolari jew parti minnu. Dik il-leġiżlazzjoni hija mniżżla fl-Anness III tad-Direttiva 2014/25/UE. Madankollu, għall-provvista ta' installazzjonijiet tal-ajruport, dak l-Anness ma jelenkax kwalunkwe leġiżlazzjoni rilevanti li tilliberalizza dan is-settur. Konsegwentement, l-aċċess ħieles għas-suq ma jistax ikun preżunt, u għandu jintwera de facto u de jure.

(23)

L-esponiment dirett għall-kompetizzjoni għandu jiġi evalwat abbażi ta' diversi indikaturi, li l-ebda wieħed minnhom ma huwa neċessarjament deċiżiv, per se. Fir-rigward tas-swieq konċernati minn din id-Deċiżjoni, l-ishma mis-suq jikkostitwixxu kriterju wieħed u għandhom jingħataw kunsiderazzjoni. Minħabba l-karatteristiċi tas-swieq konċernati, għandhom jiġu kkunsidrati kriterji oħra.

(24)

Din id-Deċiżjoni hija mingħajr ħsara għall-applikazzjoni tar-regoli dwar il-kompetizzjoni u oqsma oħra tad-dritt tal-Unjoni. B'mod partikolari, il-kriterji u l-metodoloġija użati biex jiġi vvalutat l-esponiment dirett għall-kompetizzjoni skont l-Artikolu 34 tad-Direttiva 2014/25/UE mhumiex neċessarjament identiċi għal dawk użati biex titwettaq valutazzjoni skont l-Artikolu 101 jew 102 tat-Trattat jew tar-Regolament tal-Kunsill (KE) Nru 139/2004 (11). Dan il-punt ġie kkonfermat ukoll mill-Qorti f'sentenza reċenti (12).

(25)

Wieħed għandu jżomm f'moħħu li l-għan ta' din id-Deċiżjoni huwa li tistabbilixxi jekk is-servizzi kkonċernati mit-Talba humiex esposti għal tali livell ta' kompetizzjoni (fis-swieq li l-aċċess għalihom mhuwiex ristrett skont it-tifsira tal-Artikolu 34 tad-Direttiva 2014/25/UE) li jiżgura li, anki fin-nuqqas tad-dixxiplina miġjuba mir-regoli dettaljati tal-akkwist stabbiliti fid-Direttiva 2014/25/UE, l-akkwist għat-twettiq tal-attivitajiet ikkonċernati jsir b'mod trasparenti u mhux diskriminatorju abbażi ta' kriterji li jippermettu li x-xerrejja jidentifikaw is-soluzzjoni li b'mod ġenerali tkun l-aktar waħda vantaġġuża ekonomikament.

(26)

F'dan il-każ, l-attività rilevanti hija l-provvista tal-infrastruttura tal-ajruport għall-merkanzija.

(27)

Rigward il-provvista tal-infrastruttura tal-ajruporti, ma hemm l-ebda leġiżlazzjoni tal-Unjoni rilevanti li fuq il-bażi tagħha jista' jiġi preżunt li hemm aċċess liberu għas-suq, għalhekk huwa meħtieġ li l-valutazzjoni rilevanti ssir fuq il-bażi tal-każistika eżistenti tal-Qorti tal-Ġustizzja li tappartjeni għal-libertà tal-istabbiliment skont l-Artikolu 49 TFUE.

(28)

Skont l-Applikant, l-aċċess għas-suq mhuwiex ristrett de jure. Fl-Awstrija, it-Taqsima 71(1) tal-Luftfahrtgesetz (LFG, l-Att dwar l-Avjazzjoni) tipprovdi li operatur li japplika għal liċenzja ta' ajruport ċivili jkun intitolat li jirċievi “liċenzja ta' ajruport ċivili” jekk il-pjan li jistabbilixxi ajruport ikun adegwat mill-fehma teknika u jkun mistenni mmaniġġjar sikur, l-operatur huwa affidabbli, xieraq u għandu biżżejjed riżorsi finanzjarji, u ma hemm l-ebda “interess pubbliku ieħor” konfliġġenti. F'dan ir-rigward, skont it-Taqsima 71(2) LFG, ajruport pubbliku ppjanat huwa preżunt li ma jkunx fl-interess tal-pubbliku, jekk it-tliet kundizzjonijiet li ġejjin ma jiġux sodisfatti fl-istess ħin: (i) jekk l-ajruport huwa inqas minn 100 km 'il bogħod minn ajruport pubbliku eżistenti, (ii) l-ajruport probabbli jkun ta' xkiel għall-funzjonijiet tat-trasport ta' ajruport eżistenti, u (iii) l-ajruport eżistenti jista' jibda jopera fi żmien sitt xhur id-doveri prospettivi tal-ajruport ippjanat u lest li jagħmel dan.

(29)

Huwa pertinenti li wieħed jiftakar li hija każistika stabbilita li sistema ta' awtorizzazzjoni minn qabel ma tistax tilleġittima deċiżjonijiet diskrezzjonarji li jittieħdu mill-awtoritajiet nazzjonali li probabbilment jiċħdu l-effettività tad-dispożizzjonijiet tad-dritt tal-Unjoni (13). Sabiex sistema ta' awtorizzazzjoni minn qabel tkun ġustifikata anki jekk din tidderoga mil-libertà fundamentali li tipprovdi servizzi, din trid fi kwalunkwe każ tkun ibbażata fuq kriterji oġġettivi, mhux diskriminatorji li huma magħrufin bil-quddiem, b'mod li tillimita l-eżerċizzju tad-diskrezzjoni tal-awtoritajiet nazzjonali, sabiex ma tintużax b'mod arbitrarju (14).

(30)

Barra dan, jekk is-sistema tal-awtorizzazzjoni timponi kundizzjonijiet relatati mad-distanza minima bejn l-impriżi, tali sistema tista' titqies ġustifikata, jekk din hija ġeneralment xierqa biex jinkiseb l-għan li jiġi żgurat li l-provvista tas-servizz lill-pubbliku, bħall-provvista tal-infrastruttura tal-ajruport u s-servizzi relatati, hija affidabbli u ta' kwalità tajba (15). Skont il-każistika tal-Qorti, il-leġiżlazzjoni nazzjonali għandha tkun xierqa biex tiżgura li jinkiseb l-għan invokat biss jekk din tirrifletti ġenwinament tħassib biex jinkiseb dak l-għan b'mod konsistenti u sistematiku (16).

(31)

F'dak li għandu x'jaqsam mat-tieni kriterju li jistabbilixxi preżunzjoni ta' nuqqas ta' interess pubbliku, jiġifieri l-kundizzjoni li l-ajruport ippjanat probabbilment ifixkel il-funzjonijiet tat-trasport ta' ajruport eżistenti, l-Applikant jinvoka sentenza f'kawża li tikkonċerna l-Kodiċi Awstrijak dwar il-Linji tat-Trasport bil-Mutur (17) (Kraftfahrliniengesetz, KfLG) fejn il-Qorti Amministrattiva Suprema Awstrijaka (VwGH) iddeċidiet li t-tieni kriterju ma għandux jiġi mifhum b'mod li jipproteġi impriża eżistenti mill-kompetizzjoni. Madankollu, skont il-Qorti Amministrattiva Suprema Awstrijaka, anki jekk detentur ta' konċessjoni ġdida jista' jkun obbligat jittollera l-kompetizzjoni man-negozju tiegħu minn impriżi oħrajn, dan isib il-limiti tiegħu fejn id-detentur tal-konċessjoni eżistenti jsofri telf ta' qligħ li manifestament jixħet dubju fuq l-operazzjoni ekonomika ta' rotta eżistenti. Barra dan, skont l-istess Qorti, deterjorazzjoni fil-proporzjon tad-dħul għall-ispejjeż li hija biss ta' natura temporanja, kemm jekk minħabba flutwazzjonijiet staġjonali, fatturi esterni temporanji jew investimenti f'rotta li d-detentur tal-konċessjoni għandu l-intenzjoni li jammortizza fuq ċertu perjodu ta' żmien, ma tistax tiġġustifika ċ-ċaħda ta' konċessjoni ġdida.

(32)

Fuq il-bażi ta' dak imsemmi, jidher li t-tieni kriterju kien interpretat mill-Qorti Amministrattiva Suprema Awstrijaka bħala li mhux intiż biex jillimita l-kompetizzjoni. Dan jillimita kull lok għal deċiżjoni arbitrarja tal-awtorità li tagħti l-konċessjoni. Barra dan, jista' jiġi inferit mis-sentenza tal-Qorti Amministrattiva Suprema Awstrijaka li sistema ta' awtorizzazzjonijiet li tistabbilixxi kriterji speċifiċi għall-istabbiliment ta' preżunzjoni tan-nuqqas ta' interess pubbliku f'ajruport ġdid kienet maħluqa fuq is-suppożizzjoni li l-ajruport ġdid jipprovdi servizzi li huma affidabbli u ta' kwalità tajba. Jidher li l-leġiżlazzjoni Awstrijaka rilevanti, u l-interpretazzjoni tat-tieni kriterju msemmi mill-Qorti Amministrattiva Suprema Awstrijaka jirriflettu ġenwinament tħassib biex jinkisbu l-għanijiet tal-leġiżlazzjoni b'mod konsistenti u sistematiku. Għalhekk, għall-finijiet ta' din id-deċiżjoni, jista' jiġi konkluż li l-kundizzjonijiet biex tingħata liċenzja biex jiġi stabbilit ajruport fl-Awstrija jilħqu l-kriterji tal-oġġettività, tan-nondiskriminazzjoni u tat-trasparenza, u, skont dan, li l-aċċess għas-suq għall-provvista tal-infrastruttura tal-ajruport jista' jitqies liberu de jure.

(33)

Sa fejn hija kkonċernata l-valutazzjoni tal-aċċess liberu għas-suq de facto, l-Applikant jgħid li l-aċċess mhuwiex ristrett għaliex qed jiġu stabbiliti ajruporti kummerċjali ġodda. L-Applikant jikkwota l-ajruport ta' Berlin Branderburg u l-ajruport ta' Lublin bħala eżempji. Skont l-Applikant, l-ajruport ta' Berlin Branderburg huwa meqjus kemm mill-grupp tal-Lufthansa kif ukoll mill-grupp ta' airberlin bħala alternattiva konkreta għall-ajruport ta' Vjenna. Barra dan, l-ajruporti militari jistgħu jiġu adattati biex joperaw bħala ajruporti kummerċjali, eż. GRZ u LNZ fl-Awstrija. Barra dan, l-Applikant isostni li l-ajruporti kummerċjali eżistenti jistgħu jiġu estiżi, eż. l-ajruporti ta' Frankfurt Hahn u Weeze fil-Ġermanja.

(34)

Fuq il-bażi tal-informazzjoni sottomessa mill-applikant, huwa diffiċli li jiġi stabbilit b'mod konklużiv jekk l-aċċess għas-suq biex jiġu stabbiliti ajruporti ġodda huwiex ristrett de facto. Meta jiġi stabbilit ajruport ġdid, min ser jipprova jidħol ġdid ser jeħtieġ jagħmel investimenti kapitali għoljin u għalhekk ser ikun hemm riskju sinifikanti li jkunu involuti spejjeż mitlufa li jistgħu jiskoraġġixxu dawk li jipprovaw jidħlu ġodda. Madankollu, jidher li dawn l-ispejjeż huma parti mir-riskji kummerċjali normali li dawk li jidħlu ġodda jridu jħallsu meta jiddeċiedu li jistabbilixxu ajruport ġdid. Ma hemm l-ebda informazzjoni dwar ostakli fattwali eżistenti għad-dħul fis-suq konċernat ħlief mir-riskju kummerċjali normali inerenti meta jsir investiment kbir li jikkonċerna l-provvista ta' infrastruttura ta' ajruport. Għalhekk huwa meqjus, għall-finijiet ta' din id-Deċiżjoni, li l-aċċess għas-suq huwa liberu de facto.

(35)

Din it-taqsima ser tanalizza jekk it-tieni kundizzjoni għal eżenzjoni ġietx issodisfata jew le, jiġifieri li l-attività koperta mit-Talba, u li tissodisfa l-kundizzjoni tal-aċċess liberu għas-suq de jure u de facto, hija direttament esposta għall-kompetizzjoni. Għal dan l-għan, jiġu ddefiniti l-prodott rilevanti u s-suq ġeografiku rispettiv, u fuq dik il-bażi titwettaq analiżi tas-suq.

(36)

Skont deċiżjonijiet preċedenti tal-Kummissjoni (18) s-swieq tal-prodott li ġejjin kienu meqjusin bħala swieq tal-prodotti rilevanti għall-finijiet tal-applikazzjoni tad-dritt tal-kompetizzjoni tal-Unjoni għal-linji tal-ajru u l-ajruporti: (i) il-provvista ta' servizzi tal-infrastruttura tal-ajruporti (li jinkludu l-iżvilupp, il-manutenzjoni, l-użu u l-provvista ta' faċilitajiet tar-runway, taxiways u struttura oħra tal-ajruporti, kif ukoll il-koordinazzjoni u l-kontroll tal-attivitajiet imwettqin fuq dawn l-infrastrutturi); (ii) il-provvista (jew l-ikkuntrattar) tas-servizzi tal-groundhandling; u (iii) il-provvista (jew l-ikkuntrattar) ta' servizzi kummerċjali assoċjati (eż. ix-xorb u l-ikel, il-bejgħ tal-ispazju tar-reklamar) (19).

(37)

Is-servizzi ta' infrastruttura tal-ajruporti jistgħu jiġu maqsumin skont l-oġġett tat-trasport bħala traffiku tal-passiġġieri u dawk relatati mat-trasport tal-merkanzija minħabba li, minbarra r-runways, it-traffiku tal-passiġġieri u t-trasport tal-merkanzija jeħtieġu infrastruttura differenti.

(38)

Il-merkanzija normalment hija trasportata permezz ta' mezzi tat-trasport transmodali “lura minn” u “lil hinn” mill-punti tal-oriġini u tad-destinazzjoni. Barra dan, għall-kuntrarju tal-passiġġieri, il-merkanzija tista' tiġi direzzjonata b'numru ogħla ta' waqfiet. Barra dan, skont id-deċiżjonijiet preċedenti tal-Kummissjoni (20) s-swieq tat-trasport tal-merkanzija bl-ajru huma inerentement unidirezzjonali minħabba d-differenzi fid-domanda f'kull tarf tar-rotta.

(39)

L-Applikant jaqbel mad-definizzjoni tas-suq tal-prodott kif stabbilita mill-prattika tal-Kummissjoni u struttura t-Talba skont dan.

(40)

Fl-isfond tal-fatturi eżaminati fil-premessi 36 sa 39, għall-finijiet tal-valutazzjoni dwar jekk il-kundizzjonijiet stipulati fl-Artikolu 34 tad-Direttiva 2014/25/UE humiex issodisfati, u mingħajr ħsara għall-applikazzjoni tar-regoli dwar il-kompetizzjoni f'oqsma oħra tad-dritt tal-Unjoni, is-suq tal-prodotti rilevanti huwa l-provvista tal-infrastruttura tal-ajruport għall-merkanzija.

(41)

Din it-taqsima tħares lejn id-definizzjoni tas-suq ġeografiku rilevanti li jikkorrispondi għas-suq tal-prodotti ddefinit, telenka l-argumenti tal-applikant u tagħti l-osservazzjonijiet u l-konklużjonijiet tal-Kummissjoni dwarhom, u tivvaluta s-sitwazzjoni kompetittiva.

(42)

Skont l-Applikant (21) id-definizzjoni eżatta tas-suq għall-merkanzija tista' titħalla miftuħa, għall-finijiet tat-Talba. Barra dan, l-Applikant jargumenta li s-suq ġeografiku jidher li huwa l-Ewropa kollha.

(43)

Filwaqt li f'deċiżjonijiet preċedenti (22), il-Kummissjoni sabet li s-suq rilevanti fir-rotot intra-Ewropej tat-trasport tal-merkanzija bl-ajru jista' jiġi definit bħala l-Ewropa kollha u għandu jinkludi modalitajiet alternattivi ta' trasport, notevolment it-trasport bit-triq u bil-ferrovija, ta' min wieħed jiftakar li s-suq tal-prodotti għall-finijiet tad-deċiżjoni preżenti mhuwiex it-trasport tal-merkanzija bl-ajru, iżda il-provvista tal-infrastruttura tal-ajruport għall-merkanzija.

(44)

Għall-finijiet tal-evalwazzjoni tal-kundizzjonijiet stabbiliti fl-Artikolu 34 tad-Direttiva 2014/25/UE, u mingħajr ħsara għad-dritt tal-kompetizzjoni, jew kwalunkwe qasam tad-dritt tal-Unjoni, il-Kummissjoni tqis li d-dimenzjoni ġeografika eżatta tas-suq tal-prodott rilevanti tista' titħalla miftuħa, billi s-sehem mis-suq tal-Applikant fl-iktar definizzjoni ristretta xorta waħda se jkun żgħir.

(45)

Skont l-informazzjoni pprovduta mill-Applikant (23), dwar is-suppożizzjoni li s-suq ġeografiku rilevanti huwa fl-Ewropa kollha, l-ishma mis-suq ta' VIE (24) fir-rigward tal-merkanzija kienu […] % fl-2010, […] % fl-2011 u […] % fl-2012, filwaqt li l-ajruporti l-oħra għandhom ishma mis-suq aktar baxxi minn 1 % fit-tliet snin kollha. Permezz ta' approċċ aktar konservattiv meta jitqies li s-suq ġeografiku jinkludi biss il-hubs tal-Lufthansa, l-ishma mis-suq ta' VIE kienu ta' […] % fl-2010; […] % fl-2011 u […] fl-2012, filwaqt li l-ajruporti Awstrijaċi l-oħra kellhom inqas minn 1 % fit-tliet snin kollha. Dawn il-fatturi għalhekk għandhom jittieħdu bħala indikazzjoni ta' esponiment dirett għall-kompetizzjoni fir-rigward ta' din l-attività.

(46)

Għall-finijiet ta' din id-Deċiżjoni u mingħajr ħsara għad-dritt tal-kompetizzjoni, il-fatturi elenkati fil-premessa (45) għandhom jitqiesu bħala indikazzjoni ta' esponiment għall-kompetizzjoni, ta' din l-attività fl-Awstrija. Konsegwentement, minħabba li l-kundizzjonijiet stipulati fl-Artikolu 34 tad-Direttiva 2014/25/UE huma ssodisfati, għandu jiġi stabbilit li d-Direttiva 2014/25/UE ma tapplikax għall-kuntratti intiżi biex jippermettu t-twettiq ta' din l-attività fl-Awstrija.

(47)

Minħabba l-fatturi eżaminati fil-premessi 1 sa 46, il-kundizzjoni tal-esponiment dirett għall-kompetizzjoni stabbilita fl-Artikolu 34 tad-Direttiva 2014/25/UE għandha titqies li ġiet issodisfata fl-Awstrija fir-rigward tal-provvista tal-infrastruttura tal-ajruporti għall-merkanzija,

(48)

Minħabba li l-kundizzjoni ta' aċċess mhux ristrett għas-suq titqies issodisfata, id-Direttiva 2014/25/UE la għandha tapplika meta l-entitajiet kontraenti jagħtu kuntratti intiżi biex jippermettu t-twettiq ta' dawk is-servizzi fl-Awstrija, u lanqas meta jiġu organizzati konkorsi tad-disinn għat-twettiq ta' tali attività f'dak il-pajjiż.

(49)

Din id-Deċiżjoni hija bbażata fuq is-sitwazzjoni legali u fattwali minn Jannar 2015 sa Novembru 2016 kif jidher mill-informazzjoni mogħtija mill-Applikant u mill-Awtoritajiet Awstrijaċi. Din tista' tiġi riveduta, f'każ li l-kundizzjonijiet għall-applikabbiltà tal-Artikolu 34 tad-Direttiva 2014/25/UE ma jibqgħux jiġu ssodisfati, wara bidliet sinifikanti fis-sitwazzjoni legali jew fattwali.

(50)

Billi xi servizzi fir-rigward tal-provvista tal-infrastuttura tal-ajruport lil-linji tal-ajru (bħall-infrastruttura tal-ajruport għas-servizzi tat-traffiku tal-passiġġieri, tal-groundhandling u s-servizzi mhux ajrunawtiċi) jibqgħu jkunu soġġetti għad-Direttiva 2014/25/UE, ta' min wieħed ifakkar li l-kuntratti ta' akkwist li jkopru bosta attivitajiet għandhom jiġu ttrattati skont l-Artikolu 6 ta' dik id-Direttiva. Dan ifisser li, meta entità kontraenti tkun involuta f'akkwist “imħallat”, jiġifieri akkwist użat biex jingħata sostenn għall-prestazzjoni kemm tal-attivitajiet eżentati mill-applikazzjoni tad-Direttiva 2014/25/UE kif ukoll tal-attivitajiet li mhumiex eżentati, għandhom jitqiesu l-attivitajiet li għalihom huwa intenzjonat prinċipalment il-kuntratt. F'każ ta' akkwist imħallat bħal dan, meta l-iskop ikun prinċipalment is-sostenn ta' attivitajiet li mhumiex eżentati, għandhom japplikaw id-dispożizzjonijiet tad-Direttiva 2014/25/UE. Jekk ikun oġġettivament impossibbli li jiġi determinat għal liema attività jkun primarjament intiż il-kuntratt, il-kuntratt għandu jingħata skont ir-regoli msemmija fl-Artikolu 6(3) tad-Direttiva 2014/25/UE (25).

(51)

Huwa mfakkar li l-Artikolu 16 tad-Direttiva 2014/23/UE tal-Parlament Ewropew u tal-Kunsill (26) dwar l-għoti ta' kuntratti ta' konċessjoni jipprovdi għal eżenzjoni mill-applikazzjoni ta' dik id-Direttiva għal konċessjonijiet mogħtija minn entitajiet kontraenti fejn, għall-Istat Membru li fih ser jitwettqu l-konċessjonijiet, ikun ġie stabbilit skont l-Artikolu 34 tad-Direttiva 2014/25/UE li l-attività hija esposta direttament għall-kompetizzjoni. Billi ġie konkluż li l-attività tal-provvista tal-infrastruttura tal-ajruport lil-linji tal-ajru għat-trasport tal-merkanzija hija soġġetta għall-kompetizzjoni, il-kuntratti tal-konċessjoni intiżi biex jippermettu t-twettiq ta' dawk l-attivitajiet fir-Repubblika tal-Awstrija mhux ser ikunu esklużi mill-qasam ta' applikazzjoni tad-Direttiva 2014/23/UE.

(52)

Il-miżuri previsti f'din id-Deċiżjoni huma skont l-opinjoni tal-Kumitat Konsultattiv għall-Kuntratti Pubbliċi,