(1)

Permezz ta’ ittra datata t-8 ta’ Ottubru 2007 u rreġistrata mill-Kummissjoni dak inhar stess, il-Ġermanja nnotifikat b’konformità mal-Artikolu 108(3) TFUE l-għajnuna ppjanata favur Propapier PM2 GmbH (ara l-punt 2.2 “il-benefiċjarju tal-għajnuna”) għal proġett ta’ investiment kbir f’Eisenhüttenstadt (Brandenburg-Nordost, il-Ġermanja), fuq il-bażi tal-Linji Gwida għall-għajnuna reġjonali nazzjonali għall-2007-2013 (1) (minn hawn “il quddiem imsejħin il-“Linji Gwida dwar l-Għajnuna Reġjonali”). L-għajnuna ppjanata ġiet irreġistrata bin-numru N 582/07.

(2)

Wara li rċeviet aktar informazzjoni u bosta lmenti formali (2) u wara li ltaqgħet mar-rappreżentanti tal-Ġermanja u l-benefiċjarju tal-għajnuna, il-Kummissjoni adottat id-deċiżjoni tat-2 ta’ April 2008 (3) li ma tqajjem ebda oġġezzjoni għall-għajnuna notifikata.

(3)

Wara li adottat id-deċiżjoni tagħha fit-2 ta’ April 2008, il-Kummissjoni rċeviet sottomissjonijiet oħrajn mingħand l-ilmentaturi li kkontestaw il-valutazzjoni tal-Kummissjoni u d-deċiżjoni tagħha li ma tqajjem ebda oġġezzjoni għall-miżura tal-għajnuna. Smurfit Kappa Group plc (minn hawn ‘il quddiem imsejjaħ “Smurfit Kappa”) issottometta wkoll informazzjoni fl-24 ta’ Ġunju 2008 u talab li l-Kummissjoni tħassar id-deċiżjoni tagħha fuq il-bażi tar-raġuni li Propapier PM2 GmbH & Co. KG kienet irċeviet għajnuna infrastrutturali addizzjonali. Il-Kummissjoni fetħet inkjesta separata bin-numru SA.36147 (C 30/10) (4) sabiex tqis it-tali allegazzjoni.

(4)

Fil-5 ta’ Awwissu 2008, Smurfit Kappa fetaħ proċedimenti quddiem il-Qorti Ġenerali sabiex titħassar id-Deċiżjoni tal-Kummissjoni tat-2 ta’ April 2008.

(5)

Permezz ta’ ittra tas-7 ta’ Novembru 2008, il-Ġermanja għarrfet lill-Kummissjoni dwar l-implimentazzjoni tal-investiment li għandu jiġi ssusidjat. Permezz tal-ittri tat-22 ta’ Diċembru 2008 u t-13 ta’ Jannar 2010, il-Ġermanja avżat lill-Kummissjoni dwar għadd ta’ bidliet fil-proġett notifikat.

(6)

Permezz tas-sentenza tal-10 ta’ Lulju 2012 fil-kawża T-304/08 Smurfit Kappa Group plc v Il-Kummissjoni, il-Qorti ddikjarat li t-tali Deċiżjoni tal-Kummissjoni tat-2 ta’ April 2008 hija nulla u bla effett (minn hawn ‘il quddiem tissejjaħ id-“deċiżjoni annullata”). Għaldaqstant, il-Kummissjoni kellha terġa’ tikkunsidra l-miżura tal-għajnuna u tadotta deċiżjoni ġdida, jiġifieri kienet fl-istess sitwazzjoni li kienet fiha fit-2 ta’ April 2008. (5)

(7)

Ir-rappreżentanti tal-Kummissjoni u l-Ġermanja organizzaw laqgħa fl-14 ta’ Awwissu 2012 li għaliha attendew ukoll rappreżentanti tal-benefiċjarju tal-għajnuna. Il-Ġermanja ssottomettiet kummenti permezz ta’ ittri datati l-24 ta’ Awwissu 2012 u l-5 ta’ Frar 2013.

(8)

Ta’ min jinnota li l-għajnuna inkwistjoni kellha tiġi approvata mill-Kummissjoni qabel ma tingħata mill-Ġermanja. Il-Ġermanja bdiet tagħti l-għajnuna biss ladarba l-Kummissjoni kienet adottat id-deċiżjoni tagħha tat-2 ta’ April 2008, li eventwalment ġiet annullata. Madankollu, wara l-annullament mill-Qorti, hemm bżonn li kollox jitreġġa’ lura daqslikieku d-deċiżjoni annullata mill-Kummissjoni qatt ma ġiet adottata u l-għajnuna ppjanata mill-Ġermanja qatt ma ġiet approvata kif xieraq mill-Kummissjoni. Għaldaqstant, il-Kummissjoni daħħlet il-każ bin-numru SA.23827 (2012/NN-46) fir-reġistru tal-għajnuna mhux notifikata.

(9)

Permezz tal-ittra tal-15 ta’ Mejju 2013, il-Kummissjoni avżat lill-Ġermanja dwar id-deċiżjoni tagħha li tibda proċedimenti skont l-Artikolu 108(2) TFUE fir-rigward tal-għajnuna reġjonali nazzjonali mogħtija lil Propapier PM2 GmbH (minn hawn ‘il quddiem imsejħa d-“deċiżjoni ta’ ftuħ”). Id-deċiżjoni ta’ ftuħ tal-Kummissjoni ġiet ippubblikata f’Il-Ġurnal Uffiċjali tal-Unjoni Ewropea fit-8 ta’ Awwissu 2013 (6). Il-partijiet interessati ġew mistiedna jissottomettu l-kummenti tagħhom.

(10)

Il-Ġermanja ssottomettiet kummenti permezz tal-ittra tal-15 ta’ Lulju 2013 (2013/073407).

(11)

Il-Kummissjoni talbet aktar informazzjoni mingħand il-Ġermanja permezz tal-ittra elettronika tal-20 ta’ Settembru 2013 (2013/092832) u l-ittra tal-20 ta’ Novembru 2013 (2013/113552), li l-Ġermanja pprovdiet bl-ittri tas-16 ta’ Ottubru 2013 (2013/102801), id-9 ta’ Diċembru 2013 (2013/123872) u l-21 ta’ Jannar 2014 (2014/007118).

(12)

Permezz tal-ittra tas-6 ta’ Settembru 2013 (2013/090228), Smurfit Kappa ssottometta kummenti bħala parti interessata (dawn għaddew lill-Ġermanja mal-ittra tat-13 ta’ Settembru 2013 (2013/091012) u avża li jista’ jkun li jibgħat kummenti oħrajn. Permezz tal-ittra tat-30 ta’ Settembru 2013 (2013/095929), il-Kummissjoni talbet lil Smurfit Kappa sabiex jissottometti l-kummenti tiegħu sat-30 ta’ Ottubru 2013. Bl-ittra elettronika tat-30 ta’ Ottubru 2013 (2013/107610), Smurfit Kappa ddikjara li ma kellu ebda kumment ieħor u talab informazzjoni dwar il-proċedimenti. Il-Kummissjoni wieġbet bl-ittra tad-29 ta’ Novembru 2013 (2013/119741). Il-Ġermanja wieġbet għall-kummenti ta’ Smurfit Kappa bl-ittra tal-14 ta’ Ottubru 2013 (2013/101451).

(13)

Permezz tal-ittri tat-30 ta’ Settembru 2013 (2013/095932, 2013/095939 2013/095941, 2013/095942), il-Kummissjoni avżat lill-ilmentaturi ta’ qabel (Swedish Forest Industries Federation und Finnish Forest Industry Federation, Koninklijke Vereniging van Nederlandse Papier- en Kartonfabrieken und Procelpac – Groupement français des fabricants de papiers et cartons d’emballage à base de cellulose), li kienu ppreżentaw ilmenti matul l-analiżi preliminari ta’ qabel l-adozzjoni tad-deċiżjoni annullata (ara l-premessa 2), li kienet inbdiet proċedura ta’ investigazzjoni formali u stednithom jissottomettu l-kummenti. L-ebda wieħed minn dawn l-ilmentaturi ma ssottometta kummenti.

(14)

L-intenzjoni tal-Ġermanja kienet li tkompli l-iżvilupp reġjonali billi tagħti lil Propapier PM2 GmbH & Co. KG għajnuna għall-investiment reġjonali għal fabbrika tal-karti ġdida f’Eisenhüttenstadt. Eisenhüttenstadt tinsab bejn Brandenburg-Nordost, żona assistita skont it-tifsira tal-Artikolu 107(3)(a) TFUE, li fiha l-għajnuna reġjonali massima fuq il-bażi tal-mappa tal-għajnuna reġjonali tal-Ġermanja għall-1 ta’ Jannar 2007 sal-31 ta’ Diċembru 2013 hija 30 % tal-ekwivalenti tal-għotja gross (EGħG) (7).

(15)

Il-benefiċjarju tal-għajnuna msemmi fid-deċiżjoni annullata kien Propapier PM2 GmbH & Co. KG, impriża kbira li tagħmel parti minn Progroup AG (minn hawn ‘il quddiem imsejjaħ “Progroup”).

(16)

L-istruttura tal-parteċipazzjoni bejn il-benefiċjarju tal-għajnuna u l-grupp hija kif ġej: Propapier PM2 Beteiligungs GmbH għandha sehem ta’ […] (*1) % fil-kapital ta’ Propapier PM2 GmbH & Co. KG bħala sieħeb ġenerali tas-sħubija limitata. L-ishma fi Propapier PM2 Beteiligungs GmbH huma ta’ Propapier Papiererzeugung GmbH ([…] %) u tas-Sur Jürgen Heindl ([…] %). L-uniku azzjonist ta’ Propapier Papiererzeugung GmbH kien Progroup, li fih is-Sur Jürgen Heindl għandu […] % tal-ishma permezz ta’ JH-Holding GmbH. Il-[…] % tal-ishma li jifdal fi Progroup inqasmu kif ġej: żewġ azzjonisti kellhom sehem ta’ […] % kull wieħed u azzjonist ieħor kellu sehem ta’ […] %. L-ebda wieħed minn dawn l-azzjonisti ma kellu drittijiet tal-vot.

(17)

Progroup jimmanifattura materjal ikkorrugat għall-kontenituri u kartun korrugat li jqassam permezz tas-sussidjarji tiegħu. Fl-2007, meta saret in-notifika, il-kartun korrugat kien qiegħed jiġi mmanifatturat f’impjanti fl-Ewropa (minn Prowell GmbH & Co. KG u s-sussidjarji tagħha Prowell S.A. (Franza), Prowell s.r.o. (ir-Repubblika Ċeka) u, lejn tmiem l-2008, Prowell Sp. z.o.o. (Il-Polonja)). Il-materjal ikkorrugat għall-kontenituri kien qiegħed jiġi mmanifatturat minn Propapier Papiererzeugung GmbH. Il-kumpaniji l-oħrajn ta’ Progroup jipprovdu servizzi marbutin mal-bejgħ ta’ kartun korrugat.

(18)

Il-proġett, kif deskritt fin-notifika oriġinali tal-2007, kien jinvolvi l-bini ta’ impjant tal-enerġija li jforni lill-fabbrika tal-karti ġdida. Il-parti ewlenija tal-proġett ta’ investiment kienet tikkonċerna l-bini tal-fabbrika tal-karti, li kellha tinbena u titħaddem minn Propapier PM2 GmbH & Co. KG stess, filwaqt li l-impjant tal-enerġija li jforni l-fwar u l-enerġija għall-proċess tal-manifattura fil-fabbrika tal-karti kellu jinbena u jiġi ffinanzjat minn Propower GmbH (minn hawn ‘il quddiem imsejħa “Propower”), li wkoll tagħmel parti minn Progroup. Propower hija tal-istess grupp u għandha l-[…] % tal-ishma li jifdal fi Propapier PM2 GmbH & Co. KG. Liċenzja għall-impjant tal-enerġija kellha tiġi ttrasferita lil Propapier PM2 GmbH & Co. KG skont lokazzjoni eżegwita bejn il-partijiet.

(19)

Il-Ġermanja spjegat li, skont il-liġijiet fiskali tal-Ġermanja, l-assi li jappartjenu għall-assi operatorji straordinarji ta’ azzjonist (f’dan il-każ Propower) ta’ sħubija (f’dan il-każ Propapier PM2 GmbH & Co. KG) huma inklużi fl-assi tas-sħubija u mhux fl-assi tal-azzjonist għal skopijiet tat-taxxa, anki jekk l-azzjonist kien proprjetarju tal-assi skont il-liġi ċivili. Dan huwa konsegwenza tar-rekwiżiti ta’ trasparenza imposti fuq is-sħubijiet mil-liġi fiskali. B’konsegwenza ta’ dan, Propapier PM2 GmbH & Co. KG irnexxielha tapplika għall-għajnuna għall-proġett ta’ investiment sħiħ, inkluż il-bini tal-impjant tal-enerġija li ser jitħaddem minn Propower.

(20)

Wara l-adozzjoni tad-deċiżjoni annullata, il-Ġermanja avżat lill-Kummissjoni li l-impjant tal-enerġija ma kienx għadu parti mill-proġett ta’ investiment assistit u li ma kienet saret ebda applikazzjoni għal għajnuna u lanqas ma ġiet approvata xi għajnuna għall-bini tal-impjant tal-enerġija. Propower kellha tinbiegħ lil EnBW Energy Solutions GmbH (ESG), sussidjarja ta’ EnBW Energie Baden-Württemberg AG.

(21)

Skont id-dritt soċjetarju tal-Ġermanja, sħubija limitata jrid ikollha minimu ta’ żewġ azzjonisti, u wieħed minn dawn irid ikollu responsabbiltà limitata; għalhekk, Propapier PM2 GmbH & Co. KG kellha tiġi xolta ladarba tinbiegħ Propower. L-azzjonist l-ieħor, Propapier PM2 Beteiligungs GmbH, ġie kkonvertit minn kumpanija ta’ investiment għal kumpanija operatorja u ngħata l-isem il-ġdid ta’ Propapier PM2 GmbH (minn hawn ‘il quddiem imsejħa “Propapier”), u wara dan sar il-benefiċjarju tal-miżura ta’ għajnuna.

(22)

Il-Ġermanja ddikjarat li issa Propapier Papiererzeugung GmbH bdiet tinnegozja bħala Propapier PM1 GmbH u hija l-proprjetarja tal-ishma kollha fi Propapier PM 2.

(23)

Il-materjal ikkorrugat għall-kontenituri huwa l-karta użata fil-manifattura tal-kartun korrugat u jinkludi kemm inforri kif ukoll skanalatura. L-inforra tifforma saff ġewwieni/estern lixx u l-iskanalatura tintuża għas-saff immewweġ. Il-materjal ikkorrugat għall-kontenituri huwa magħmul minn fibra tal-injam naturali jew fibra rriċiklata. L-inforri li jsiru minn fibra tal-injam (minn hawn “il quddiem ‟fibra ġdida”) huma magħrufin bħala kraftliners u inforri magħmulin minn fibra rriċiklata huma magħrufin bħala testliners. Skanalatura magħmula minn fibra ġdida tissejjaħ skanalatura SC u skanalatura magħmula minn fibra rriċiklata tissejjaħ skanalatura rriċiklata. Il-materjal ikkorrugat għall-kontenituri magħmul minn karta rriċiklata jinkludi l-materjal ikkorrugat għall-kontenituri kollu magħmul minn fibra rriċiklata, jiġifieri testliners u skanalatura rriċiklata. Il-Figura 1 turi d-diversi tipi ta’ materjal ikkorrugat għall-kontenituri.

Figura 1

(24)

Il-materjal ikkorrugat għall-kontenituri jintuża bħala l-bażi għall-manifattura tal-kartun korrugat (li matulha jitwaħħlu l-inforri u l-iskanalatura). Imbagħad, il-kartun korrugat jiġi pproċessat sabiex jipproduċi kaxxi tal-kartun korrugat għall-imballaġġ.

(25)

L-impjant tfassal biex jipproduċi żewġ tipi ta’ materjali ikkorrugat għall-kontenituri: testliners li jiżnu sa 150 g/m2 u skanalatura rriċiklata.

(26)

Skont il-pjan ta’ direzzjoni tan-negozju fi żmien in-notifika, sehem kbir (madwar 75 %) mill-materjal ikkorrugat għall-kontenituri immanifatturat fl-impjant assistit kien qiegħed jintuża fil-manifattura tal-prodott downstream (kartun korrugat) fi ħdan Progroup. Progroup ibigħ kartun korrugat bħala prodott finali. Il-materjal ikkorrugat għall-kontenituri mhux użat internament kellu jinbiegħ lil parti terza. Progroup ma kienx involut fil-manifattura ta’ kaxxi tal-kartun korrugat għal klijenti finali.

(27)

Il-fabbrika tal-karti li kellha tinbena kellha tinkludi tħejjija tal-karta rriċiklata, magna tal-karti għall-manifattura tal-materjal ikkorrugat għall-kontenituri, bini tal-uffiċċji, maħżen tal-parts tal-bdil, bini għal kmamar tax-xogħol u maħżen tar-rombli tal-karti.

(28)

L-impjant tal-enerġija kellu jipproduċi l-fwar meħtieġ fil-proċess tal-produzzjoni. Sabiex isir użu effiċjenti mill-enerġija termali, l-impjant tal-enerġija kellu jipproduċi biżżejjed enerġija biex ikopri madwar [< 60] % tal-enerġija meħtieġa minn Propapier ukoll.

(29)

L-implimentazzjoni tal-proġett ta’ investiment bdiet f’Diċembru 2007 u kellha titlesta sa nofs l-2010. Il-produzzjoni sħiħa (6 15  000 tunnellata materjal ikkorrugat għall-kontenituri fis-sena) għandha tinkiseb b’mod gradwali (sal-2015).

(30)

Il-kostijiet eliġibbli ta’ investiment huma kkalkolati fuq il-bażi tal-kostijiet tal-investiment inizjali. Fin-notifika oriġinali, in-nefqa eliġibbli ġiet ikkalkolata għal EUR 64 3 8 62  500 (nominali) jew EUR 58 6 7 22  900 (skontata) (8) għal bini, impjant, tagħmir u kostijiet mixxelanji skont il-Linji Gwida dwar l-Għajnuna Reġjonali.

(31)

“Spejjeż mixxelanji” kienu jinkludu nefqa għal installazzjonijiet interni, l-informatika u liċenzji tas-software. Il-Ġermanja kkonfermat li l-liċenzji tas-software li kienu jiswew EUR […] kienu ser jintużaw biss fl-istabbiliment li jirċievi l-għajnuna u li kienu ser jiġu rrapportati bħala assi deprezzabbli mixtrijin mingħand partijiet terzi li kienu ser jibqgħu f’dak l-istabbiliment għal ħames snin.

(32)

Wara l-adozzjoni tad-deċiżjoni annullata, il-Ġermanja avżat lill-Kummissjoni li l-ispejjeż eliġibbli kienu naqsu sew wara l-esklużjoni tal-impjant tal-enerġija mill-proġett assistit u li l-kostijiet eliġibbli għall-proġett emendat kienu laħqu total ta’ EUR 38 5 9 44  683 (nominali) jew EUR 35 2 9 74  825 (skontati).

(33)

Skont in-notifika oriġinali tal-Ġermanja, madwar 73 % tal-ispejjeż globali tal-proġett kellhom jiġu ffinanzjati minn self bankarju mhux tal-għajnuna (mhux kopert minn garanziji tal-gvern). 14 % oħrajn mill-kostijiet ġenerali kienu jkunu koperti minn ekwità u l-bqija kellhom jiġu ffinanzjati mill-għajnuna.

(34)

Il-Ġermanja kkonfermat li, anki wara t-tnaqqis tal-investiment fl-impjant tal-enerġija, il-kundizzjoni li kienet tirrekjedi li l-benefiċjarju tal-għajnuna jagħmel kontribuzzjoni tiegħu stess mhux tal-għajnuna ta’ aktar minn 25 % tal-kostijiet eliġibbli totali xorta waħda kienet għadha ssodisfata.

(35)

Il-bażi legali li ġejja ġiet iċċitata għall-għajnuna fin-notifika oriġinali:

(36)

Il-Ġermanja avżat li wara l-adozzjoni tad-deċiżjoni annullata, l-għajnuna kollha kienet ser tingħata fuq l-unika bażi tal-Att tal-2007 dwar l-Għotjiet ta’ Investiment, jiġifieri l-għajnuna nru XR 6/07 eżentata fuq il-bażi tar-regolament ta’ eżenzjoni ta’ kategorija.

(37)

Il-benefiċjarju tal-għajnuna applika għall-għajnuna fil-15 ta’ Mejju 2007, jiġifieri qabel ma bdew ix-xogħlijiet f’Diċembru 2007, fejn il-Ġermanja kkonfermat bil-miktub, soġġetta għall-eżitu tal-verifika ddettaljata, li kienu ġew issodisfati l-prekundizzjonijiet għall-eliġibbiltà (ittra mill-Bank ta’ Investiment tal-Istat Federali ta’ Brandenburg tal-24 ta’ Mejju 2007).

(38)

L-għajnuna nnotifikata mill-Ġermanja laħqet total ta’ EUR 8 2 5 09  500 (nominali) u EUR 7 2 1 45  700 (skontati). Il-Ġermanja kkonfermat li l-għajnuna ma kinitx qiegħda tingħata flimkien ma’ xi għajnuna oħra għall-istess kostijiet eliġibbli.

(39)

Aktar tard, il-Ġermanja avżat li l-għajnuna ta’ EUR 5 0 5 59  153 (nominali) u EUR 4 4 1 72  973 (skontati) għall-proġett ta’ investiment imnaqqas kienet inħarġet għal Propapier. Il-Ġermanja ddikjarat ukoll li l-intensità tal-għajnuna mħallsa kienet taqbeż it-12,30 % EGħG stipulata fid-deċiżjoni annullata u li l-ammont skontat ibbażat fuq il-kostijiet eliġibbli mnaqqsin kien ta’ EUR 4 3 4 15  903.

(40)

Il-Ġermanja kienet qablet fil-qafas tan-notifika oriġinali li żżomm l-intensità massima tal-għajnuna għal 12,30 % EGħG. B’hekk, il-Ġermanja kkonfermat permezz ta’ ittra datata l-21 ta’ Jannar 2014 li kienet kisbet rifużjoni li tilħaq total ta’ EUR 1 0 99  539 mingħand Propapier (għajnuna addizzjonali bl-imgħax).

(41)

L-awtorità awtorizzanti għall-għotja ta’ investiment hija l-Uffiċċju tal-Finanzjament ta’ Frankfurt (Oder).

(42)

Brandenburg-Nordost kien reġjun bi problemi ekonomiċi u soċjali konsiderevoli, li fih il-PDG per capita fl-2004 kien ta’ 76,3 % tal-medja tal-EUR-27 (11) u r-rata tal-qgħad fl-2005 kienet ta’ 19,8 % (220 % tal-medja tal-UE-27 u 178 % tal-medja tal-Ġermanja).

(43)

Sabiex tippromwovi l-iżvilupp reġjonali f’din iż-żona, il-Ġermanja ddeċidiet li l-appoġġ u l-għajnuna għandhom jingħataw lill-industrija tal-manifattura u l-ipproċessar tal-karta, bħala settur promettenti tal-ekonomija ta’ Brandenburg-Nordost. Ħasbet li l-fabbrika tal-karti, li ġabet teknoloġija importanti fir-reġjun, kienet tħeġġeġ lil industriji primarji ġodda sabiex jirrilokaw u jestendu l-katina tal-valur miżjud (impjanti tal-kartun korrugat, imballaġġ eċċ.). Ħasbet ukoll li l-investiment f’fabbrika tal-karti moderna kien juri li Eisenhüttenstadt kienet ħerqana li tiddiversifika l-profil ekonomiku tagħha, u ma tiffokax biss fuq l-industrija tal-metall. Il-manifattura ta’ materjal ikkorrugat għall-kontenituri, minn fibra rriċiklata żżomm mal-pjan tal-belt ta’ Eisenhüttenstadt sabiex tistabbilixxi ekonomija ta’ riċiklaġġ fiż-żona.

(44)

Skont in-notifika oriġinali, il-proġett ta’ investiment ikun ser joħloq 150 impjieg dirett (inklużi 36 fl-impjant tal-enerġija) u madwar 450 impjieg indirett (12).

(45)

Fid-deċiżjoni annullata l-Kummissjoni kkonkludiet li ma kinux inqabżu l-limiti stabbiliti skont il-punti 68(a) u (b) tal-Linji Gwida dwar l-Għajnuna Reġjonali. Il-Kummissjoni kompliet billi ddikjarat li, skont il-punt 68 tal-Linji Gwida dwar l-Għajnuna Reġjonali, il-Kummissjoni kellha setgħa diskrezzjonali biex tagħmel verifika ddettaljata biss sabiex tara jekk il-benefiċċji tal-miżura tal-għajnuna kinux jisbqu d-distorsjoni tal-kompetizzjoni f’każijiet biss li fihom jinqabeż wieħed mil-limiti stipulati fil-punt 68(a) jew (b). Il-Kummissjoni kompliet billi qalet li l-konformità mal-limiti stabbiliti għall-ishma mis-suq u ż-żidiet tal-kapaċità u tnaqqis fl-intensità massima tal-għajnuna skont il-punt 67 tal-Linji Gwida dwar l-Għajnuna Reġjonali tiżgura li kwalunkwe effett li t-tfixkil potenzjali tal-kompetizzjoni tal-għajnuna ma jaqbiżx livell li jikkonforma mal-objettiv tal-iżvilupp reġjonali. Argumentat ukoll li l-prekundizzjonijiet tal-Linji Gwida dwar l-Għajnuna Reġjonali jiżguraw li l-għajnuna tagħmel kontribuzzjoni għall-iżvilupp reġjonali. Fid-dawl ta’ dan, il-Kummissjoni sabet li l-miżura kienet kompatibbli mal-Artikolu 87(3)(a) KE.

(46)

Fis-sentenza tagħha fil-kawża T-304/08, il-Qorti stabbilixxiet li l-issodisfar tal-kriterji rilevanti kollha tal-kompatibbiltà fil-Linji Gwida dwar l-Għajnuna Reġjonali mhijiex prova biżżejjed li l-miżura inkwistjoni ser ikollha impatt pożittiv fuq l-iżvilupp reġjonali u li mill-punt 68 tal-Linji Gwida dwar l-Għajnuna Reġjonali ma jidhirx li l-bidu tal-proċedura ta’ investigazzjoni formali huwa prekluż meta ma jkunux inqabżu l-limiti għall-ishma mis-suq u ż-żidiet tal-kapaċità (13). Il-Qorti sabet ukoll li, waħedhom, il-valutazzjonijiet li saru fid-deċiżjoni kkontestata ma setgħux jippermettu lill-Kummissjoni tneħħi kull dubju dwar il-kompatibbiltà tal-għajnuna inkwistjoni mas-suq komuni fid-dawl tad-deroga pprovduta fl-Artikolu 107(3)(a) TFUE, peress li l-applikazzjoni ta’ dik id-deroga tassumi li l-benefiċċji tal-miżura inkwistjoni jisbqu l-iżvantaġġi tagħha, limitati kemm ikunu limitati dawn tal-aħħar. B’konsegwenza ta’ dan, fis-sentenza tagħha l-Qorti tindika li l-Kummissjoni hija obbligata tibda l-proċedura ta’ investigazzjoni formali b’konformità mal-Artikolu 108(2) TFUE f’każijiet li fihom ikun hemm dubji dwar l-impatt pożittiv tal-għajnuna, anki jekk ma jkunux inqabżu l-limiti stabbiliti fil-punt 68 tal-Linji Gwida dwar l-Għajnuna Reġjonali.

(47)

Fil-paragrafi 118 u 127 tad-deċiżjoni ta’ ftuħ, il-Kummissjoni tirreferi għall-argument tal-ilmentatur li l-kapaċità maħluqa mill-proġett ta’ Propapier kienet taqbeż il-limitu ta’ 5 % stipulat fil-punt 68 tal-Linji Gwida dwar l-Għajnuna Reġjonali fis-swieq rilevanti għall-valutazzjoni u li l-għajnuna favur Propapier kienet toħloq distorsjoni serja għall-kompetizzjoni f’settur li kien qiegħed ibati minn kapaċità strutturali żejda. Skont l-ilmentatur, l-industrija kienet irreaġixxiet billi naqqset il-kapaċità, iżda l-kapaċità maħluqa minn Propapier kienet tkompli tgħarraq il-problemi settorjali eżistenti billi toħloq kapaċitajiet ġodda li kienu jieħdu post il-kapaċità tal-fabbriki tal-produzzjoni li kienu ġew dekummissjonati sabiex jerġa’ jinkiseb il-bilanċ kompetittiv fis-suq tal-materjal ikkorrugat għall-kontenituri.

(48)

Fid-deċiżjoni ta’ ftuħ tagħha, il-Kummissjoni esprimiet dubji dwar jekk kinitx teżisti sitwazzjoni ta’ kapaċità strutturali żejda fis-settur u jekk l-għajnuna lil Propapier kinitx ser tgħin sabiex tinżamm jew tissaħħaħ dik is-sitwazzjoni. Barra minn hekk, il-Kummissjoni ħalliet miftuħa għal kummenti mingħand partijiet terzi l-kwistjoni dwar jekk, fil-fatt, l-effett ta’ żieda tal-kapaċità li kellu jiġi kkunsidrat kienx jaqbeż il-5 % tal-konsum apparenti fis-suq rilevanti. Il-Kummissjoni stqarret li ma setgħetx tasserixxi bla dubju fuq il-bażi tal-informazzjoni disponibbli għaliha qabel l-adozzjoni tad-deċiżjoni annullata li l-effetti pożittivi tal-għajnuna kienu jisbqu l-effetti negattivi tagħha (id-distorsjoni tal-kompetizzjoni li tirriżulta u l-effett fuq il-kummerċ bejn l-Istati Membri) jew li ma kienx ser jinqabeż il-limitu stabbilit fil-punt 68 tal-Linji Gwida dwar l-Għajnuna Reġjonali.

(49)

Għaldaqstant, il-Kummissjoni stiednet lill-Istati Membri u lill-partijiet sabiex jikkummentaw dwar l-applikazzjoni t-tajba tat-test stabbilit fil-punt 68(b) tal-Linji Gwida dwar l-Għajnuna Reġjonali. B’mod partikolari, il-Kummissjoni talbet informazzjoni li tippermettilha tikkonkludi jekk is-suq rilevanti kellux kapaċità strutturali żejda matul il-perjodu 2001-2006, jekk l-għajnuna notifikata kinitx iżżomm jew issaħħaħ it-tali sitwazzjoni, u jekk l-effetti pożittivi tal-għajnuna lil Propapier setgħux jisbqu l-effetti negattivi tagħha f’termini ta’ distorsjoni tal-kompetizzjoni jew l-effett fuq il-kummerċ bejn l-Istati Membri.

(50)

L-ewwel nett, Smurfit Kappa jindika li l-Ġermanja trid turi li l-proġett ta’ Propapier mhuwiex ser jikkaġuna distorsjoni inaċċettabbli tal-kompetizzjoni, u mhux Smurfit Kappa.

(51)

Smurfit Kappa jinsisti li, skont is-sentenza tal-Qorti tal-Ġustizzja fil-kawża T-304/08, il-Kummissjoni hija meħtieġa tivverifika jekk il-benefiċċji antiċipati tal-għajuna jisbqux id-distorsjonijiet tal-kompetizzjoni u l-impatt fuq il-kummerċ bejn l-Istati Membri u tosserva li l-limiti stabbiliti fil-punt 68 tal-Linji Gwida dwar l-Għajnuna Reġjonali saru irrilevanti peress li nbdiet proċedura ta’ investigazzjoni formali.

(52)

Smurfit Kappa jikkummenta fuq id-definizzjoni provviżorja tas-suq tal-prodotti stipulat fid-deċiżjoni ta’ ftuħ tal-Kummissjoni (li hija l-istess bħad-definizzjoni fid-deċiżjoni annullata) u jirreferi għat-talba tiegħu lill-Qorti tal-5 ta’ Awwissu 2008 sabiex tannulla d-deċiżjoni dwar l-għajnuna oriġinali Nru 582/07 (minn hawn ‘il quddiem imsejħa t-“talba”), li fiha Smurfit Kappa argumenta li d-definizzjoni kienet żbaljata.

(53)

Skont Smurfit Kappa, ma hemmx suq għal testliners li jiżnu sa 150 g/m2 jew għal skanalatura rriċiklata u Propapier kellha l-ħsieb li tuża l-magna tal-karti l-ġdida tagħha, PM2, biex timmanifattura skanalatura u testliners III li jiżnu 70/100 g/m2 u skanalatura li tiżen 70/130 g/m2 (informazzjoni mill-istqarrijiet għall-istampa), mhux testliners li jiżnu sa 150 g/m2 jew skanalatura rriċiklata, u dan jimplika li jrid jiġi kkunsidrat suq saħansitra iċken. Għalhekk, Smurfit Kappa jistieden lill-Kummissjoni sabiex tiddefinixxi s-suq tal-prodotti rilevanti bi preċiżjoni akbar.

(54)

Smurfit Kappa jirreferi għal informazzjoni minn intervisti u stqarrijiet għall-istampa li jiddikjaraw li l-fabbrika tal-karti l-ġdida ser tkun tiflaħ timmanifattura 6 50  000 tunnellata jew saħansitra 7 50  000 tunnellata ta’ materjal ikkorrugat għall-kontenituri fis-sena, ferm aktar mill-kapaċità notifikata mill-Ġermanja. Smurfit Kappa jikkonkludi li l-Kummissjoni ma għandhiex toqgħod fuq il-figuri notifikati mill-Ġermanja u għandha tagħmel investigazzjonijiet għal rasha.

(55)

Smurfit Kappa jibbaża l-biċċa l-kbir tal-argumenti tiegħu fuq studju li sar minn London Economics (Economic analysis of State aid given to Progroup AG (14)) li sar fl-2007, ikkummissjonat minn Smurfit Kappa u li jiddikjara li l-espansjoni fil-produzzjoni ser jibdel lil Progroup minn xerrej nett tal-materjal ikkorrugat għall-kontenituri għal bejjiegħ nett ta’ madwar 2 50  000 tunnellata fis-sena. Fuq il-bażi tal-kapaċità ġenerali ta’ 6 50  000 tunnellata fis-sena tal-impjant il-ġdid PM2 (figura preżunta minn Smurfit Kappa), dan inaqqas id-domanda tal-kumpanija għall-materjal ikkorrugat għall-kontenituri mixtri xi mkien ieħor b’4 00  000 tunnellata fis-sena. Minn dan, Smurfit Kappa jikkonkludi li s-6 50  000 tunnellata sħaħ fis-sena għandhom ikunu inklużi fid-dejta dwar is-suq ħieles (jiġifieri s-suq għall-bejgħ lil partijiet terzi biss, filwaqt li jiġu injorati l-provvisti prodotti).

(56)

Smurfit Kappa jargumenta li jrid jiġi kkunsidrat l-“effett tal-qlib” (ix-“shifting effect” deskritt fl-istudju ta’ London Economics). Skont Smurfit Kappa, il-materjal ikkorrugat għall-kontenituri użat fil-grupp finalment ser isir a skapitu tal-bejgħ minn manifatturi oħrajn fis-suq ħieles, jiġifieri Progroup mhuwiex ser jibqa’ jixtri dak il-materjal ikkorrugat għall-kontenituri mis-suq ħieles. Għalhekk, iż-żieda propja tal-kapaċità tiġi daqslikieku kienet bejgħ ġdid minn Propapier fis-suq ħieles, flimkien mal-bejgħ ta’ manifatturi oħrajn “meħlusin” fis-suq ħieles. Skont Smurfit Kappa, b’dan tinkiseb il-kapaċità tal-produzzjoni globali l-ġdida propja.

(57)

Smurfit Kappa ssottometta tabella tal-Excel datata t-30 ta’ Ġunju 2008 (Anness A.10 għall-applikazzjoni) u juża ċerti figuri tagħha minn rapport ta’ Henry Poole Consulting (15) datat 2007. It-tabella turi domanda ta’ 2 40  000 tunnellata fis-sena fis-suq tal-materjal irriċiklat ikkorrugat għall-kontenituri għal Progroup fl-2008 u tbassar li Propapier ser tipproduċi u tbigħ 2 85  000 tunnellata fis-sena ta’ materjal irriċiklat ikkorrugat għall-kontenituri fis-suq fl-2010 (jiġifieri wara l-proġett tal-investiment). Smurfit Kappa huwa tal-fehma li l-impatt globali tal-proġett ta’ investiment assistit fis-suq miftuħ tal-materjal ikkorrugat għall-kontenituri huwa ekwivalenti għat-total ta’ dawn iż-żewġ figuri (5 25  000 tunnellata fis-sena = 2 85  000 tunnellata fis-sena mhux użati fil-grupp + 2 40  000 tunnellata fis-sena li Progroup ma jibqax ikollu bżonn jixtri mis-suq ħieles) u li dan għandu jintuża biex tiġi kkalkolata ż-żieda tal-kapaċità skont it-tifsira tal-punt 68(b) tal-Linji Gwida dwar l-Għajnuna Reġjonali.

(58)

Smurfit Kappa jirrifjuta wkoll il-figura ta’ 1 50  000 tunnellata fis-sena kkwotata minn Propapier għaż-żieda tal-kapaċità għall-materjal ikkorrugat għall-kontenituri fis-suq ħieles. Smurfit Kappa jiddikjara li l-impjant il-ġdid tal-kartun ikkorrugat mibni minn Progroup fi Stryków (il-Polonja) ser juża biss madwar 1 00  000 tunnellata karta rriċiklata fis-sena. Anki jekk din id-domanda addizzjonali titnaqqas mis-6 50  000 tunnellata fis-sena, il-kapaċità globali ta’ 5 50  000 tunnellata fis-sena tibqa’ xorta waħda.

(59)

Fuq dik il-bażi, Smurfit Kappa jikkonkludi li ż-żieda tal-kapaċità mill-proġett ta’ investiment assistit ta’ Propapier taqbeż il-limitu ta’ 5 % stabbilit fil-punt 68(b) tal-Linji Gwida dwar l-Għajnuna Reġjonali (imkejla fil-konfront tal-figuri għall-2006 għas-suq ħieles għal materjal ikkorrugat għall-kontenituri).

(60)

Smurfit Kappa jargumenta li s-suq tal-materjal ikkorrugat għall-kontenituri kien qiegħed ibati minn kapaċità strutturali żejda fil-ħin materjali (2001 sal-2006). Skont Smurfit Kappa, is-suq kien qiegħed iġarrab nuqqas ta’ tkabbir raġonevoli fid-domanda u ħafna mill-kapaċità l-ġdida kienet iffinanzjata bl-għajnuna mill-Istat, u b’hekk kienet qiegħda tkompli żżid il-kapaċità żejda. Għalhekk, manifatturi oħrajn tal-karti kellhom jagħlqu il-faċilitajiet ta’ produzzjoni sabiex jibqgħu kompetittivi (Smurfit Kappa għalaq14-il magna tal-karti bejn l-2001 u l-2008). Smurfit Kappa jirreferi għall-istudju ta’ London Economics, li jiddikjara li l-kapaċità l-ġdida (speċjalment il-kapaċità ġdida ffinanzjata bl-għajnuna mill-Istat) qiegħda tħalli impatt negattiv serju fuq il-kompetizzjoni. L-istudju jirreferi għal diffikultajiet kbar fis-suq Ewroprew tal-materjal ikkorrugat għall-kontenituri bejn l-2002 u l-2006 u problemi serji ta’ kapaċità żejda f’dan is-settur. Il-figuri huma bbażati fuq id-dejta mingħand il-Groupement Ondulé kif ukoll Smurfit Kappa u jikkwotaw li ntużat anqas minn 90 % tal-kapaċità bejn l-2003 u l-2005. Il-figuri għall-2006 u l-2007 huma aktar minn 90 %, għalkemm l-istudju jinkludi figuri alternattivi għal dawk is-snin li mill-ġdid jagħtu użu tal-kapaċità ta’ anqas minn 90 % “bla ebda żieda tal-kapaċità”.

(61)

F’termini tal-effetti pożittivi u negattivi tal-għajnuna f’termini tad-distorsjoni tal-kompetizzjoni f’suq li jbati minn kapaċità strutturali żejda, Smurfit Kappa jiddikjara li l-bini ta’ magna tal-karti f’post u t-trasport u l-installazzjoni tagħha f’żona oħra ma jikkontribwixxux għall-iżvilupp teknoloġija ta’ dik iż-żona per se. Smurfit Kappa jżid li, minbarra l-impjant tal-enerġija u l-impjant tat-trattament tal-ilma mormi, li t-tnejn li huma jagħmlu parti mill-proġett ta’ Propapier, il-proġett mhuwiex ser jattira xi investiment ieħor lejn iż-żona u li l-iffullar tal-fabbriki tal-karti ma jistax ikun mistenni li jiġġenera titjib fl-effiċjenza. Lanqas ma tista’ tkun mistennija xi estensjoni fil-katina tal-valur miżjud, peress li ma hemm ebda klijenti għall-kartun ikkorrugat fiż-żona u, għalhekk, ma hemm xejn x’jiġġustifika l-bini ta’ impjant tal-kartun ikkorrugat.

(62)

Smurfit Kappa jkompli jiddikjara fl-2007 diġà kien ċar li, ikunu xi jkunu n-numru u l-kwalità tal-impjiegi maħluqin mill-investiment ta’ Propapier, l-għadd ta’ impjiegi mitlufin xi mkien ieħor ikun ogħla.

(63)

Fuq il-bażi tal-figuri kkwotati fid-deċiżjoni ta’ ftuħ, Smurfit Kappa jikkalkola li kull impjieg dirett maħluq ser jiswa EUR 3 50  000 f’għajnuna. Smurfit Kappa jistaqsi kemm dawk l-impjiegi verament ser jibqgħu fir-reġjun għal dejjem u jekk jistgħux jitqiesu bħala impjiegi ta’ kwalità. Smurfit Kappa jiddubita wkoll li r-reġjun fil-fatt ser jiggwadanja minn dawn l-impjiegi, peress li wħud mill-impjegati ta’ Propapier jivvjaġġaw minn reġjuni oħrajn. Smurfit Kappa għandu dubji għaliex mhuwiex persważ jekk il-fatt li ċerti membri tat-tim ta’ produzzjoni ċentrali ġejjin mill-impjant ta’ Propapier f’Burg (Sassonja-Anħalt) jistax jitqies bħala vantaġġ li jiġġustifika l-għajnuna.

(64)

Rigward il-529 impjieg indirett, Smurfit Kappa jikkwota membru tal-bord tad-diretturi ta’ Propapier, li qal li fl-2010 kienu ser jinħolqu 329 impjieg dirett biss u li kemm kemm aktar minn 60 % (biss) tal-impjegati kienu ġejjin mir-reġjun. Smurfit Kappa huwa tal-fehma li hemm bżonn ta’ informazzjoni li tidħol fid-dettall (eż. dwar jekk l-impjiegi għax-xogħlijiet ta’ manutenzjoni jew proġetti ta’ infrastruttura ġewx inklużi u jekk l-impjiegi indiretti humiex ser ikunu permanenti) sabiex tkun tista’ ssir valutazzjoni xierqa tal-impatt fuq ir-reġjun u jissuġġerixxi li l-Kummissjoni għandha tivverifika dan kollu fid-dettall.

(65)

Smurfit Kappa jirreferi għad-deċiżjoni separata tal-Kummissjoni li tiftaħ proċedura ta’ investigazzjoni formali dwar l-għajnuna infrastrutturali lil Propapier (kawża SA.36147), u huwa tal-fehma li l-għajnuna għall-impjant tat-trattament tal-ilma mormi hija għajnuna għall-investiment li ma tistax titqies li hija separata mill-għajnuna indirizzata fid-deċiżjoni ta’ ftuħ fil-kawża SA.23827 u jsejjaħ lill-Kummissjoni sabiex teżamina ż-żewġ miżuri taħt l-istess proċedura u tispjega għaliex ma jistgħux jitqiesu bħala partijiet mill-istess proġett.

(66)

Il-Ġermanja hija tal-fehma li l-Kummissjoni ma missiex fetħet proċedura ta’ investigazzjoni formali skont l-Artikolu 108(2) TFUE wara l-annullament tad-Deċiżjoni N 582/07; minflok, missha adottat deċiżjoni skont it-tifsira tal-Artikolu 4(3) tar-Regolament tal-Kunsill (KE) Nru 659/1999 (16). Il-Ġermanja tindika li s-sentenza tal-Qorti fil-kawża T-304/08 ma rrikjeditx li l-Kummissjoni tiftaħ proċedura ta’ investigazzjoni formali. Barra minn hekk, il-Ġermanja ma tistax tifhem kif, fin-nuqqas ta’ fatti ġodda, il-Kummissjoni issa qiegħda tixħet dubji fuq jekk is-suq tal-materjal ikkorugat għall-kontenituri kienx qiegħed ibati minn kapaċità żejda qabel l-2008, wara li fid-deċiżjoni annullata kienet iddikjarat li ma kienx qiegħed ibati minn kapaċità żejda u li ma kienx inqabeż il-limitu ta’ 5 % stabbilit fil-punt 68(b) tal-Linji Gwida dwar l-Għajnuna Reġjonali u wara li ddefendiet dak l-argument quddiem il-Qorti Ġenerali.

(67)

Il-Ġermanja tosserva li s-sempliċi fatt li lmentatur daħal f’kuntatt ma jissostanzjax “diffikultajiet serji” għall-Kummissjoni f’termini tal-istabbiliment ta’ jekk l-għajnuna hijiex kompatibbli mas-suq intern u tispjega li l-għażla tal-proċedura applikabbli ma tistax tiġi stabbilita minn “operaturi tas-suq terzi”. Skont il-Ġermanja, dawn il-konklużjonijiet huma sostnuti mill-fatt li l-benefiċjarju tal-għajnuna ma għandux influwenza akbar fuq il-kompetizzjoni wara l-investiment milli kellu qabel (peress li ma għandux sehem mis-suq akbar). Il-Ġermanja tindika li, primarjament, il-fabbrika tal-karti kellha l-għan li tissodisfa d-domanda addizzjonali għal materjal ikkorugat għall-kontenituri fi Progroup.

(68)

Il-Ġermanja żżid li, jekk tiddeċiedi li tagħmel verifika ddettaljata, il-Kummissjoni għandha tieħu f’kunsiderazzjoni l-fatt li l-limiti stabbiliti fil-punt 68 tal-Linji Gwida dwar l-Għajnuna Reġjonali ma kinux inqabżu bħala indikatur importanti tal-fatt li l-għajnuna għandha impatt limitat biss fuq il-kompetizzjoni.

(69)

Il-Ġermanja ssottomettiet diversi studji:

(70)

Il-Ġermanja ssottomettiet ukoll kopji tat-talbiet u l-esibiti użati fil-kawża T-304/08.

(71)

Il-Ġermanja toġġezzjona għad-dikjarazzjonijiet ta’ Smurfit Kappa li l-magna ta’ PM2 ġiet ottimizzata għall-produzzjoni ta’ piżijiet tal-gramma ta’ bejn 70 g/m2 u 130 g/m2, iżda tista’ tiġi kkonvertita għal karta itqal jew eħfef fi kwalunwke stadju, li, minn perspettiva teknika, il-magna ta’ PM2 tista’ tipproduċi piżijiet tal-gramma li jaslu sa 150 g/m2 u li Propapier għandha wkoll interess kummerċjali fil-manifattura ta’ piżijiet tal-gramma itqal, peress li l-prezz tas-suq tagħhom qiegħed jiżdied. Il-Ġermanja żżid li l-argumenti ta’ Smurfit Kappa jikkontradixxu l-prattika stabbilita ta’ teħid tad-deċiżjonijiet tal-Kummissjoni (l-ispeċifikazzjonijiet applikati minn Smurfit Kappa jxekklu anki l-iżgħar segmentazzjoni tas-suq applikata mill-Kummissjoni għall-fini ta’ definizzjoni tas-suq f’każijiet simili).

(72)

Fil-kummenti tagħha, il-Ġermanja tiddikjara wkoll li distinzjoni bejn is-suq ħieles u s-suq globali hija irrilevanti. Is-suq ħieles mhuwiex is-suq tal-prodotti rilevanti; huwa parti mis-suq globali għall-materjal ikkorugat għall-kontenituri. Il-Ġermanja targumenta li ma hemm ebda statistika indipendenti fis-suq ħieles u li l-impatt tal-investiment assistit fuq il-kompetizzjoni u l-kummerċ jista’ jiġi vvalutat biss fuq il-bażi tas-suq globali.

(73)

Il-Ġermanja targumenta wkoll li d-distinzjoni bejn materjal ikkorugat għall-kontenituri użat f’impriża integrata vertikalment u materjal ikkorugat għall-kontenituri fornit lis-suq ħieles tidher li hija distinzjoni artifiċjali u arbitrarja, li l-karta pproċessata f’impriżi integrati vertikalment hija kważi kompletament interkambjabbli mal-karta mqiegħda għad-dispożizzjoni tas-suq ħieles (materjal bażi identiku u karatteristiċi tal-prodott simili) u li manifatturi integrati vertikalment jinnegozjaw miż-żewġ naħat tas-suq (u dan jirriżulta f’effetti tas-suq fuq il-prezz tal-provvista/domanda fis-suq globali u fil-katina tal-valur miżjud), u dan ifisser li ma hemm ebda suq ħieles indipendenti. Il-materjal ikkorugat għall-kontenituri użat fi grupp u materjal ikkorugat għall-kontenituri fornit lis-suq ħieles huma interdipendenti: manifatturi integrati vertikalment ifornu materjal ikkorugat għall-kontenituri anki direttament lil fabbriki kompetituri tal-kartun ikkorrugat u jixtru wkoll materjal ikkorugat għall-kontenituri mingħand fabbriki kompetituri oħrajn sabiex jottimizzaw il-produzzjoni u l-loġistika tagħhom. Skont il-Ġermanja, il-kwantitajiet involuti fit-tali tranżazzjonijiet ta’ ottimizzazzjoni għandhom jiġu askritti għas-suq ħieles għall-materjal tal-kaxxi mmewġin, jekk fil-fatt issir dik id-distinzjoni.

(74)

Il-Ġermanja tkompli billi targumenta li hemm suq uniku għall-materjal ikkorugat għall-kontenituri li jkopri materjal ikkorugat għall-kontenituri minn fibra rriċiklata u ġdida, indipendentement mill-piż tal-gramma tagħha, li testliners u skanalatura rriċiklata, minn naħa, u kraftliners u skanalatura SC, mill-oħra, huma interkambjabbli kemm għall-fornituri kif ukoll għall-klijenti, li kważi kull fabbrika tal-karti għandha l-kapaċità teknika li tuża l-istess magni biex timmanifattura materjal ikkorugat għall-kontenituri kemm minn fibra rriċiklata kif ukoll ġdida u li l-fabbrika ta’ Eisenhüttenstadt tkun tista’ tuża fibra ġdida wara investiment ta’ darba ta’ EUR […] miljun, li mhuwiex aktar minn […] % mill-investiment globali.

(75)

Targumenta li l-manifatturi jaqilbu l-produzzjoni tagħhom għal piżijiet tal-gramma aktar baxxi jew ogħla b’rabta mal-prezzijiet li jaqgħu għal ċerti piżijiet tal-gramma, li l-ktajjen ta’ sostituzzjoni mbagħad iġibu magħhom aġġustamenti fil-prezzijiet u l-kwantitajiet u li, min-naħa tad-domanda, il-klijenti (kumpaniji tal-imballaġġ) jistgħu jibdlu l-piżijiet tal-gramma itqal ma’ bosta saffi ta’ piżijiet tal-gramma eħfef orħos sabiex jikkumpensaw għad-differenzi sinifikanti fil-prezzijiet bejn il-materjal ikkorugat għall-kontenituri eħfef u dak itqal.

(76)

Tkompli targumenta li, min-naħa tal-provvista, l-inforri u l-iskanalatura huma kompletament interkambjabbli u li l-magni jistgħu jipproduċu t-tnejn li huma u faċilment jistgħu jiġu kkonvertiti.

(77)

Fir-rigward tas-suq ġeografiku rilevanti, il-Ġermanja tispjega li bosta fatturi jindikaw li s-suq jestendi lil hinn miż-ŻEE. Pereżempju, kunsinni kbar ta’ materjal ikkorugat għall-kontenituri huma importati fiż-ŻEE, pereżempju miċ-Ċina, u esportati miż-ŻEE, pereżempju, lejn l-Afrika, il-Lvant Nofsani, l-Asja u t-Turkija (5 85  000 tunnellata fl-2005). Fl-2007, madwar. […] % tal-materjal ikkorugat għall-kontenituri mixtri minn Progroup ġie importat minn barra ż-ŻEE ([…] tunnellata minn […]).

(78)

Finalment, il-Ġermanja tindika li hemm suq rilevanti wieħed biss għall-materjal ikkorugat għall-kontenituri, li tal-anqas ikopri ż-ŻEE u jinkludi fih il-bejgħ intragrupp, l-inforri, u l-iskanalatura, il-piżijiet kollha tal-gramma u l-materjal ikkorugat għall-kontenituri immanifatturat kemm minn fibra rriċiklata kif ukoll ġdida. Skont il-Ġermanja, din il-konklużjoni hija sostnuta mir-rabta mill-qrib bejn il-prezzijiet għat-testliners tal-piżijiet tal-gramma kollha u l-prezzijiet għat-testliners u l-kraftliners (anki wara li jitqiesu l-kostijiet tal-input għall-materja prima użata) (20).

(79)

Il-Ġermanja taqbel mal-pożizzjoni tal-Kummissjoni fid-deċiżjoni ta’ ftuħ tagħha li l-kartun ikkorrugat jirrappreżenta suq tal-prodotti rilevanti separat (kemm min-naħa tal-provvista kif ukoll tad-domanda).

(80)

Fil-kummenti tagħha l-Ġermanja tiddikjara li s-suq ġeografiku rilevanti għall-kartun ikkorrugat ikopri ż-ŻEE (kif stipulat fil-punt 70 tal-Linji Gwida dwar l-Għajnuna Reġjonali), li ma hemm ebda ostakolu għall-kummerċ, ebda differenza teknika u ebda preferenza nazzjonali, li l-kartun ikkorrugat huwa prodott bi standards uniformi u li l-prezzijiet medji fiż-ŻEE huma bejn wieħed u ieħor l-istess. Il-Ġermanja tiddikjara li l-akbar impjant ta’ Progroup (Burg) jibgħat aktar minn […] % mill-produzzjoni tal-kartun ikkorrugat tiegħu (skont il-volum) tal-anqas 400 km ‘il bogħod, aktar minn […] % tal-anqas 500 km ‘il bogħod u madwar […] % bejn 700 u 1  100 km ‘il bogħod. Il-Ġermanja tiddikjara li, jekk jitqiesu l-impjanti kollha ta’ Progroup f’daqqa, fl-2007 Progroup forna tal-anqas […] % mill-produzzjoni tiegħu lil klijenti li jinsabu tal-anqas 400 km ‘il bogħod, u ġeneralment jaqsam tal-anqas fruntiera nazzjonali waħda, li ħafna miż-żoni tal-kunsinna ta’ Progroup jidħlu ġo xulxin u jkopru sehem kbir miż-ŻEE u li l-kunsinni ta’ bejn […] % u […] % tal-kunsinni tal-kartun ikkorrugat mill-impjanti ta’ Progroup jaqsmu tal-anqas fruntiera waħda, u dan ifisser li definizzjoni tas-swieq ġeografiċi rilevanti bbażata fuq l-impjanti tirriżulta fi swieq internazzjonali.

(81)

Tiddikjara li l-prezzijiet medji għall-kartun ikkorrugat fil-pajjiżi ŻEE forniti jkun ivarja b’anqas minn 10 % u li din id-differenza għandha titqies bħala waħda żgħira, peress li l-prezzijiet għal tipi individwali ta’ kartun ikkorrugat jistgħu jvarjaw sa 20 % mill-medja fil-Ġermanja.

(82)

Tiddikjara li l-kostijiet tat-trasport imġarrbin fil-Progroup sħiħ għal kunsinni tal-kartun ikkorrugat ittrasportat tal-anqas 600 km huma anqas minn […] % mill-fatturat totali. Madankollu, dak il-perċentwal jiddependi b’mod sinifikanti fuq it-tip ta’ kwalità.

(83)

Il-Ġermanja tiddikjara li, minħabba s-sovrappożizzjonijiet fis-swieq lokali, effett tal-katina ta’ sostituzzjoni japplika u jaffettwa l-prezzijiet u l-kundizzjonijiet f’żona li hija ferm akbar miż-żona tal-qbid tal-bejgħ ta’ impjant wieħed u li, jekk fabbrika waħda twaqqa’ l-prezzijiet tagħha, iż-żona tal-provvista tinxtered fiż-żona tal-eqreb kompetituri, li jirreaġixxu għat-tnaqqis fid-domanda għall-produtt tagħhom u l-użu tal-kapaċità tagħhom li jonqos b’politika tal-prezzijiet aktar aggressiva, li mbagħad taffettwa żoni mhux affettwati mill-espansjoni oriġinali taż-żona tal-provvista. Aktar ma jkunu kbar is-sovrappożizzjonijiet bejn iż-żoni tal-provvista, aktar ikunu qawwijin l-effetti tal-prezz. Hemm sovrappożizzjonijiet ferm qawwijin fis-suq tal-kartun ikkorrugat.

(84)

Għalhekk, il-Ġermanja targumenta li ma hemmx bżonn li jiġi kkunsidrat suq iċken (meta mqabbel mas-suq ikkunsidrat mill-Kummissjoni fid-deċiżjoni ta’ ftuħ tagħha), li jinkludi biss il-pajjiżi ewlenin forniti minn Propapier PM2.

(85)

Il-Ġermanja tiddikjara li, fuq il-bażi tad-definizzjonijiet tas-suq proposti mill-Ġermanja, is-sehem mis-swieq rilevanti ta’ Progroup kien ferm anqas minn 25 % kemm qabel kif ukoll wara l-investiment. Il-Ġermanja tissottometti l-istess dejta dwar is-sehem mis-suq (għal materjal ikkorugat għall-kontenituriu kartun ikkorrugat) bħal fid-deċiżjoni ta’ ftuħ tal-Kummissjoni u tissottometti figuri addizzjonali għal materjal ikkorugat għall-konteniturifuq il-bażi tal-assunzjoni li s-suq ġeografiku rilevanti jkopri ż-ŻEE u l-pajjiżi tal-viċinat. Dawn il-figuri addizzjonali juru l-ishma mis-suq għall-2011, li huma ftit anqas mill-ishma kkwotati fid-deċiżjoni ta’ ftuħ tal-Kummissjoni.

(86)

Il-Ġermanja tiċħad il-figuri tal-kapaċità adottati minn Smurfit Kappa, li huma bbażati fuq kapaċità maħluqa ta’ 6 50  000 jew saħanistra 7 50  000 tunnellata fis-sena. Il-Ġermanja tispjega li l-figura ta’ 6 50  000 tunnellata kull sena kkwotata minn Smurfit Kappa b’rabta mal-kapaċità ta’ Propapier tirrifletti l-kapaċità teknika massima possibbli u mhux il-kapaċità ta’ produzzjoni propja ta’ Propapier PM2, li hija anqas peress li l-magna tal-karti użata minn Propapier PM2 aktarx ser tintuża l-aktar biex tipproduċi materjal ikkorugat għall-kontenituri ta’ piż tal-gramma eħfef (u, peress li l-manifattura tagħha hija aktar ikkumplikata, fi kwantitajiet iżgħar). Il-Ġermanja tiddikjara li, fl-2012, Propapier PM2 ipproduċiet madwar [< 6 15  000] tunnellata.

(87)

Il-Ġermanja żżid li, anki jekk wieħed jassumi produzzjoni ta’ 6 50  000 tunnellata fis-sena, iż-żieda tal-kapaċità fis-suq tal-materjal ikkorugat għall-kontenituri ma taqbiżx il-5 %. Il-Ġermanja tkompli tispjega li l-kapaċità ta’ 7 50  000 tunnellata fis-sena kkwotata minn Smurfit Kappa hija l-kapaċità teorika użata sabiex tinkiseb liċenzja skont l-Att Federali tal-Ġermanja dwar il-Kontroll tal-Emissjonijiet.

(88)

Il-Ġermanja hija tal-fehma li l-kapaċità globali ta’ 6 15  000 tunnellata fis-sena għandha tiġi injorata sabiex tiġi kkalkolata ż-żieda tal-kapaċità fis-suq ħieles peress li, minn dik il-kapaċità totali, [> 3 65  000] tunnellata fis-sena jintużaw internament u [< 2 50  000] tunnellata biss fis-sena jinbiegħu fis-suq ħieles. Il-Ġermanja tiddikjara li l-Kummissjoni kkalkolat kif suppost iż-żieda tal-kapaċità bħala proporzjon tas-suq globali fid-deċiżjoni ta’ ftuħ tagħha (21) u li d-determinazzjoni taż-żieda tal-kapaċità b’rabta mad-daqs tas-suq ħieles mhijiex adattata.

(89)

Il-Ġermanja tqis li l-figuri dwar il-kapaċità kkwotati minn Smurfit Kappa huma żbaljati, speċjalment il-figura ta’ 2 85  000 tunnellata ta’ materjal irriċiklat ikkorugat għall-kontenituri prodott minn Propapier fl-2010 bħala produzzjoni żejda għall-bejgħ fis-suq ħieles. Il-Ġermanja tiddikjara li dawn il-figuri huma bbażati fuq sors mhux magħruf.

(90)

Il-Ġermanja tirrifjuta l-metodu propost mill-ilmentatur sabiex tiġi kkalkolata ż-żieda tal-kapaċità fis-suq ħieles, li jqis l-“effett tal-qlib”. Il-Ġermanja targumenta li ż-żieda tal-kapaċità fis-suq ħieles u fis-suq globali tibqa’ l-istess ikun xi jkun is-sehem li Propapier fil-fatt tbigħ fis-suq ħieles; b’hekk, iż-żieda tal-kapaċità kkalkolata għas-suq ħieles ma tinbidilx lanqas jekk Propapier ma tkun forniet ebda materjal ikkorugat għall-kontenituri affattu fis-suq ħieles u tuża l-produzzjoni kollha l-ġdida internament. Il-Ġermanja spjegat li l-kapaċità ta’ Propapier PM2 użata internament ma żżidx il-provvista lejn is-suq ħieles; id-domanda li trid tiġi ssodisfata sempliċiment tonqos. Għaldaqstant, il-Ġermanja tinsisti li, meta tiġi kkalkolata ż-żieda tal-kapaċità fis-suq ħieles, in-numeratur għandu jinkludi biss il-[< 2 50  000] tunnellata fis-sena għall-bejgħ fis-suq ħieles u d-domanda spostata ta’ 2 40  000 tunnellata fis-sena għandha tiġi kkunsidrata fid-denominatur, sabiex jonqos il-volum globali tas-suq ħieles.

(91)

Il-Ġermanja tiddikjara li figura ta’ [< 2 50  000] tunnellata fis-sena mibjugħa esternament hija figura realistika u kienet aċċettata mill-Kummissjoni meta adottat id-deċiżjoni oriġinali u fid-deċiżjoni ta’ ftuħ, u huwa wieħed jassum li l-impjant il-ġdid tal-kartun ikkorrugat ta’ Progroup ser juża madwar [100 000-200 000] tunnellata materjal ikkorugat għall-kontenituri fis-sena u li Progroup qiegħed jippjana li jiftaħ aktar impjanti fil-Lvant tal-Ewropa, li ser ikunu jeħtieġu sehem mill-produzzjoni ta’ Propapier PM2 għal użu intern ukoll.

(92)

Il-konformità mal-punt 68(b) tal-Linji Gwida dwar l-Għajnuna Reġjonali hija vverifikata bit-tqabbil tar-rata medja ta’ tkabbir fis-sena fil-konsum apparenti tal-prodott ikkonċernat matul l-aħħar ħames snin mar-rata medja ta’ tkabbir fis-sena tal-prodott domestiku gross fiż-ŻEE.

(93)

Il-Ġermanja ma taqbilx mal-konklużjoni tal-Kummissjoni fid-deċiżjoni ta’ ftuħ tagħha li, tul il-perjodu rilevanti (2001 sal-2006), is-suq tal-materjal ikkorugat għall-kontenituri f’termini tal-volum u r-rata tat-tkabbir raeli tal-PDG taż-ŻEE żdiedu (rata tat-tkabbir ta’ 2,15 % għall-materjal ikkorugat għall-kontenituri meta mqabbla mar-rata ta’ tkabbir ta’ 1,97 % għall-PDG), filwaqt li s-suq ċkien f’termini tal-valur (rata tat-tkabbir nominali ta’ 0,02 % għas-suq tal-materjal ikkorugat għall-kontenituri, meta mqabbla ma’ rata tat-tkabbir nominali ta’ 3,98 % għall-PDG taż-ŻEE).

(94)

Il-Ġermanja tiddikjara li t-tkabbir tas-suq f’termini tal-volum biss jirrifletti ż-żieda propja fid-domanda f’dan is-suq. Il-Ġermanja tassumi li kapaċità addizzjonali f’suq li fih id-domanda tikber aktar mill-PDG malajr tista’ tiġi assorbita u, għalhekk, ftit li xejn tħalli effett fuq il-kompetizzjoni.

(95)

Il-Ġermanja tiddikjara wkoll li d-dikjarazzjoni tal-Kummissjoni fil-premessi 106 et seq. tad-deċiżjoni ta’ ftuħ, li l-PDG qiegħed jikber b’rata aktar mgħaġġla mis-suq globali għall-materjal ikkorrugat għall-kontenituri, tagħti stampa żbaljata, peress li tqabbel it-tkabbir tas-suq f’termini tal-valur mat-tkabbir tal-PDG f’termini tal-prezzijiet propji, jiġifieri b’dejta mhux ikkoreġuta għall-inflazzjoni. Il-Ġermanja hija tal-fehma li d-dejta fuq il-valur tirrifletti fatturi li jħallu impatt fuq l-ipprezzar, iżda li m’għandhom xejn x’jaqsmu mad-domanda propja (pereżempju, żieda fil-kostijiet tal-input tiġġenera tkabbir, anki jekk id-domanda propja tibqa’ kif inhi) u li n-nota f’qiegħ il-paġna 62 tal-Linji Gwida dwar l-Għajnuna Reġjonali, li tiddikjara li l-konsum apparenti jrid jiġi kkalkolat fuq il-bażi tal-“produzzjoni”, tissuġġerixxi li l-kalkoli għall-fini ta’ verifika skont il-punt 68(b) tal-Linji Gwida dwar l-Għajnuna Reġjonali għandhom isiru fuq il-bażi tal-kwantità prodotta bħala riżultat tal-proġett ta’ investiment (fuq il-bażi tal-volum).

(96)

Il-Ġermanja tirreferi għall-istudju ta’ Deutsche Bank mill-2007, li b’rabta mal-kapaċità tal-impjant ippjanat ta’ Propapier PM2 jispjega li l-kapaċitajiet il-ġodda mhumiex theddida; ifissru li hemm bżonn li tintlaħaq id-domanda (22). Il-Ġermanja tieħu l-pożizzjoni li dikjarazzjoni ċara bħal din magħmula minn esperti fl-industrija fl-2007 isserraħ l-irjus biżżejjed rigward il-kapaċità strutturali żejda.

(97)

Il-Ġermanja tiddikjara li l-kapaċità dekummissjonata fis-settur tal-materjal ikkorugat għall-kontenituri li għalih jirreferi Smurfit Kappa kienet makkinarju qadim u ineffiċjenti u li d-dekummissjonar ma kienx xprunat minn sforzi sabiex jerġa’ jinkiseb il-bilanċ fis-suq bejn il-provvista u d-domanda. Ir-raġunijiet għad-dekummissjonar kienu jinkludu 1) it-tendenza dejjem aktar spissa fost il-klijenti li jmorru għal materjal eħfef ta’ materjal ikkorugat għall-kontenituri li ma jistax jiġi mmanifatturat b’magni qodma; 2) l-ekonomiji ta’ skala iżgħar bil-magni l-qodma minħabba l-kapaċitajiet ta’ produzzjoni iżgħar tagħhom u 3) standardizzazzjoni dejjem akbar tal-wisgħa tal-prodott tal-makkinarju tal-kartun ikkorrugat għal 2,5/2,8 m, li rriżultat f’sehem kbir ta’ fdalijiet fil-prodotti ta’ magni mhux standardizzati li bihom il-materjal ikkorugat għall-kontenituri ikun fornit b’wisgħa differenti (23). Tiddikjara wkoll li Smurfit Kappa kien għalaq impjanti minn jeddu, filwaqt li fl-istess ħin investa f’kapaċitajiet ġodda fiż-ŻEE. Tirreferi għall-istudju ta’ Deutsche Bank, li kkwantifika l-konsolidazzjoni ta’ Smurfit Kappa (wara l-fużjoni mal-Jefferson Smurfit Group fl-2005) bħala tentattiv sabiex itejjeb il-kwalità tal-portafoll tal-assi tiegħu (24). Il-Ġermanja żżid li Smurfit Kappa mhux biss ma naqqasx, talli żied il-kapaċità netta tiegħu ta’ materjal ikkorugat għall-kontenituri fiż-ŻEE fi 8 mill-10 snin qabel l-2007 u matul il-perjodu kollu (25).

(98)

Mill-istudju ta’ Deutsche Bank kien jidher ċar ukoll li kien hemm bżonn ta’ tliet żidiet ippjanati magħrufin tal-kapaċità fl-Ewropa fl-2007 (Progroup, Mondi u SAICA) sabiex tiġi ssodisfata d-domanda antiċipata bejn l-2009 u l-2012 u dak l-użu tal-kapaċità ser jibqa’ għoli minkejja dawk iż-żidiet. Il-Ġermanja tosserva li l-istudju ta’ Deutsche Bank u d-dejta minn Pöyry għall-perjodu bejn l-2006 u l-2008 jikkwotaw rati ta’ użu tal-kapaċità ta’ aktar minn 90 %. L-istudju jikkwota wkoll it-tkabbir fil-PDG bħala l-fattur ewlieni tad-domanda fl-industrija tal-kartun immewweġ u l-materjal tal-kaxxi mmewġin u josserva li r-rata tat-tkabbir stmata tal-PDG ta’ 2,2 % (2007) u 2 % (2008) issostni s-CAGR li assuma għad-domanda (26) ta’ 2,9 % għall-perjodu bejn l-2006 u l-2009. Id-dejta dwar il-volum minn Pöyry, kif aċċettata fl-2007, tindika tkabbir annwali ta’ 1,5 % għall-materjal ikkorugat għall-kontenituri bejn l-2005 u l-2015 fl-Ewropa tal-Punent u 6,2 % bejn l-2005 u l-2010 fl-Ewropa tal-Lvant, li jonqos għal 3,8 % għall-perjodu bejn l-2010 u l-2015. Fil-fehma tal-Ġermanja, perjodi bi tnaqqis fil-prezzijiet, perjodi twal għal espansjoni tal-kapaċità u domanda li tvarja huma normali f’dawn is-setturi ċikliċi u ma għandhomx jitqiesu bħala indikaturi tal-kapaċità strutturali żejda.

(99)

Finalment, il-Ġermanja tosserva li l-evidenza kollha għad-dispożizzjoni meta ġiet adottata d-deċiżjoni annullata kienet tindika li s-suq tal-materjal ikkorugat għall-kontenituri kien qiegħed jikber meta ttieħdet id-deċiżjoni ta’ investiment u kien ser jibqa’ jikber wara l-2007 u li ma kien hemm xejn li jissuġġerixxi li hemm xi żbilanċ fis-suq tal-materjal ikkorugat għall-kontenituri.

(100)

Il-Ġermanja hija tal-fehma li ma hemmx bżonn li jiġi vverifikat fid-dettall jekk l-għajnuna kellhiex effett ta’ inċentiv, peress li s-sehem mis-suq u l-limiti tal-kapaċità stabbiliti fil-punt 68 tal-Linji Gwida dwar l-Għajnuna Reġjonali ma nqabżux fuq il-bażi tal-figuri tal-Ġermanja. Il-Ġermanja tindika li dan l-effett ta’ inċentiv fiż-żmien li ġiet adottata d-deċiżjoni annullata kien ivverifikat biss fuq il-bażi ta’ kriterji formali u li dawk il-kriterji formali kollha kienu ssodisfati. B’hekk, dak iż-żmien ma kienx hemm bżonn li jiġi sottomess pjan sħiħ ta’ direzzjoni tan-negozju sabiex jintwera li l-għajnuna fil-fatt kienet fattur materjali fid-deċiżjoni li jiġi implimentat l-investiment f’żona assistita, u din hija r-raġuni għaliex Progroup ma ħejja ebda pjan iddettaljat bħal dan dak iż-żmien. Madankollu, il-Ġermanja tindika li l-president tal-bord u s-sid ta’ Progroup ikkonferma li l-għajnuna lil Progroup kienet fattur materjali fl-għażla ta’ Eisenhüttenstadt bħala s-sit għall-proġett ta’ investiment ta’ Propapier PM2 u li, mingħajrha, […] kienet tingħażel bħala s-sit tal-investiment. Għalhekk, Progroup ikkummissjona lil Roland Berger Strategy Consultants biex iqabblu l-fatturi ekonomiċi ta’ sit f’[…] mal-fatturi ekonomiċi tas-sit f’Eisenhüttenstadt.

(101)

Ir-rapport ta’ Roland Berger mill-2013 josserva li l-iskop tal-investiment kien li jtejjeb il-[…] ta’ Progroup, li […] tqies l-aħjar sit minħabba […] u li vantaġġi oħrajn tas-sit ta’ […] kienu: […] irħas, […] irħas u anqas […] u […] (27). Skont ir-rapport, id-deċiżjoni li tingħażel Eisenhüttenstadt minflok […] irriżultat f’kostijiet annwali addizzjonali ta’ bejn EUR […] miljun u EUR […] miljun u l-kostijiet addizzjonali skontati ser jilħqu bejn EUR […] miljun u EUR […] miljun. Uħud minn dawn l-ispejjeż addizzjonali ġew ikkumpensati mill-għajnuna u l-[…] antiċipati. Eisenhüttenstadt offriet ukoll potenzjal ta’ espansjoni fil-ġejjieni (anqas kostijiet tal-art, provvista ggarantita ta’ ilma ħelu, provvista ta’ fwar mill-impjant ippjanat tal-enerġija).

(102)

Il-Ġermanja ddikjarat li, jekk l-istrateġija globali ta’ […] irnexxiet, l-għajnuna għall-investiment kienet biżżejjed biex tkopri l-iżvantaġġi ta’ sit fir-reġjun żvantaġġat ta’ Brandenburg-Nordost. Skont il-Ġermanja, Progroup ħa d-deċiżjoni kummerċjali li jinvesti f’Eisenhüttenstadt fuq dik il-bażi u b’hekk l-għajnuna għall-investiment mogħtija tat lil Progroup l-inċentiv meħtieġ biex jagħżel lil Eisenhüttenstadt bħala s-sit għal Propapier PM2 minflok […].

(103)

Il-Ġermanja tispjega li l-proġett ta’ investiment ta’ Propapier PM2 jagħmel parti minn strateġija industrijali sabiex tiġi appoġġjata l-industrija tal-karta fl-istat federali ta’ Brandenburg u li l-industrija tal-karta hija waħda mill-industriji identifikati fil-ftehim ta’ koalizzjoni għar-raba’ perjodu leġiżlattiv (2004-2009) fl-istat federali ta’ Brandenburg (28).

(104)

Dokument ta’ Pöyry mill-2007 ikkummissjonat mill-Ministeru tal-Affarijiet Ekonomiċi ta’ Brandenburg (29) fih informazzjoni li, meta ġiet adottata d-deċiżjoni annullata, tbassar li l-industrija tal-karta kienet tinsab f’fażi ta’ tkabbir u li, għalkemm ma kien ġie identifikat ebda pjan speċifiku ġdid ta’ investiment għall-industrija tal-karta (minbarra Propapier PM2), żgur li kien hemm potenzjal għal żidiet tal-kapaċità, diversifikazzjoni jew prodotti addizzjonali fl-impriżi stabbiliti.

(105)

Il-Ġermanja tindika li l-investiment sar f’reġjun ferm żvantaġġat, fejn il-PDG per capita kien 76,3 % tal-medja tal-UE-27 fl-2004 u r-rata tal-qgħad kienet ta’ 19,8 % fl-2005 (220 % tal-medja tal-UE-27 u 178 % tal-medja tal-Ġermanja). Eisenhüttenstadt tagħmel parti miċ-ċentru tat-tkabbir reġjonali ta’ Frankfurt (Oder)/Eisenhüttenstadt, li rrapporta tnaqqis ta’ 15 % fl-għadd ta’ impjegati li jistgħu jirċievu l-kontribuzzjonijiet tas-sigurtà soċjali (7  573 ħaddiem) fl-2006 meta mqabblin mal-1998.

(106)

Il-Ġermanja tiddikjara li tistenna li l-proġett ta’ Propapier jikkontribwixxi b’mod importanti f’termini ta’ diversifikazzjoni tal-istruttura ekonomika monolitika tar-reġjun, li jiddependi ħafna mill-industrija tal-azzar, li hija esposta għal sforzi ta’ razzjonalizzazzjoni (Arcelor). Il-Ġermanja tirreferi għall-mijiet ta’ impjiegi li ntilfu fl-industrija tal-azzar f’Eisenhüttenstadt mill-2003.

(107)

Il-Ġermanja tirreferi wkoll għall-vantaġġi potenzjali tal-proġett ta’ investiment ta’ Propapier PM2 f’termini ta’ estensjoni tal-katina tal-valur miżjud (eż. investimenti f’fabbriki tal-kartun ikkorrugat u fl-industrija tal-imballaġġ).

(108)

Il-Ġermanja hija tal-fehma li l-ħolqien ta’ 150 impjieg dirett ta’ kwalità (li 82 % minnhom kienu stabbiliti fir-reġjun fl-2012) u ta’ madwar 450 impjieg indirett ser jikkontribwixxi b’mod importanti għat-tkabbir fir-reġjun tassew żvantaġġat ta’ Brandenburg. Il-Ġermanja tirreferi wkoll għall-attivitajiet ta’ taħriġ estensivi (30) għall-ħaddiema lokali u l-kooperazzjoni mal-Università tat-Teknoloġija ta’ Brandenburg f’Cottbus. L-attivitajiet ta’ taħriġ itejbu l-livell tal-kwalifiki tal-ħaddiema b’mod ġenerali f’reġjun milqut minn nuqqas ta’ persunal ikkwalifikat teknikament, xi ħaġa li tista’ tiġbed aktar investituri. Il-Ġermanja żżid li l-ħtieġa ta’ ħaddiema tas-sengħa inkoraġġit ukoll lill-istituzzjonijiet edukattivi fir-reġjun sabiex joffru korsijiet ta’ taħriġ speċifiku.

(109)

Il-Ġermanja tosserva li l-magna ta’ Propapier PM2 hija ferm innovattiva u kienet l-ewwel magna fid-dinja li kapaċi timmanifattura materjal ferm ħafif tal-materjal ikkorugat għall-kontenituri. Għaldaqstant, ir-reġjun ta’ Eisenhüttenstadt kiseb reputazzjoni ta’ kompetenza fl-industrija.

(110)

Il-Ġermanja tiċħad is-sottomissjonijiet minn Smurfit Kappa u tispjega li l-bini tal-fabbrika tal-karti ta’ Propapier PM2 ma ġegħilhiex tnaqqas il-forza tax-xogħol tagħha. Il-Ġermanja tikkonferma wkoll li l-magna tal-karti kienet immuntata f’Eisenhüttenstadt u li ftit partijiet biss kienu mmanifatturati barra l-Ġermanja.

(111)

Il-Ġermanja tirreferi wkoll għall-importanza fit-tul tal-investiment f’termini tal-kisba ta’ tkabbir sostenibbli fir-reġjun. Skont il-Ġermanja, l-impenn ta’ Progroup sa mill-istadji inizjali ta’ ppjanar tqis bħala proġett fit-tul fil-kuntest ta’ integrazzjoni vertikali u implimentazzjoni tal-istrateġija għall-Ewropa tal-Lvant, u dan ifisser li l-investiment ta’ Propapier PM2 ser jiggarantixxi effetti pożittivi dejjiema wkoll.

(112)

Il-Ġermanja żżid li l-investiment ta’ Propapier PM2 ser jgħin ukoll sabiex iżid l-istandard tal-għajxien fir-reġjun, li l-pagi mħallsin minn Propapier fi Brandenburg għandhom it-tendenza li jkunu ogħla mill-pagi u s-salarji gross medji fi Brandenburg (EUR 22  932 fl-2008) u li dan jgħin sabiex jiżdied il-PDG per capita u b’hekk jistimola t-tkabbir fir-reġjun. Il-Ġermanja tkompli tosserva li l-fatturat antiċipat mill-investiment ta’ Propapier u l-impjiegi maħluqin ser iżid id-dħul mit-taxxi fir-reġjun, li jista’ jintuża għal investimenti pubbliċi oħrajn sabiex jissaħħaħ it-tkabbir soċjoekonomiku fir-reġjun.

(113)

Il-Ġermanja tindika li l-għajnuna ma rriżultatx f’kapaċità żejda fl-industrija u li, wara li ġiet adottata d-deċiżjoni annullata, il-Kummissjoni kienet approvat miżuri oħrajn ta’ għajnuna mill-Istat fl-industrija tal-karti (31), li għalihom bilfors li qieset il-kapaċità maħluqa mill-investiment ta’ Propapier sabiex tivvaluta ż-żieda tal-kapaċità fis-suq rilevanti. Il-Ġermanja tiddikjara li l-Kummissjoni ma kinitx tapprova dawk il-miżuri li kieku l-industrija kienet qiegħda tbati minn kapaċità żejda sinifikanti.

(114)

Il-Ġermanja targumenta li l-impjant il-ġdid kien jinbena anki mingħajr għajnuna mill-Istat, iżda f’post differenti. Peress li l-kapaċità disponibbli fis-suq rilevanti (ŻEE) mhuwiex ser jinbidel għall-materjal ikkorugat għall-kontenituri, il-Ġermanja tassumi li l-għajnuna ma jistax ikollha impatt negattiv fuq il-kompetizzjoni u li, għalhekk, l-għajnuna ma tistax titqies bħala l-kawża għas-sensji mill-kompetituri f’postijiet oħrajn, kif iddikjarat minn Smurfit Kappa, u għandha titqies bħala l-kawża tal-ħolqien ta’ impjiegi ġodda fi Brandenburg.

(115)

Il-Ġermanja żżid li s-suq Ewropew tal-materjal ikkorugat għall-kontenituri huwa ddominat minn kompetitur wieħed (Smurfit Kappa) u bosta fornituri iżgħar, inkluż Progroup, u li Smurfit Kappa, li huwa l-akbar operatur tas-suq bil-bosta, jopera fuq il-bażi ta’ politika kummerċjali aggressiva msejsa fuq espansjoni enormi bl-akkwiżizzjoni ta’ diversi kompetituri. Min-naħa l-oħra, Progroup, huwa operatur tas-suq żgħir imsejjes fuq tkabbir organiku, u mhux ix-xiri tal-kompetituri. B’konsegwenza ta’ dan, peress li l-prodotti tal-impjant ta’ Propapier PM2 jikkompetu direttament mal-prodotti forniti minn Smurfit Kappa, il-Ġermanja tqis li l-investiment ta’ Propapier PM2 ser jgħin biex tonqos il-pożizzjoni sovrastanti ta’ dan l-operatur tas-suq dominanti u b’hekk iżid il-kompetizzjoni fis-suq tal-materjal ikkorugat għall-kontenituri inġenerali.

(116)

Il-Ġermanja tat l-għajnuna finanzjarja għall-miżura fil-forma ta’ għotja ta’ investiment imħallsa bir-riżorsi tal-Istat. Għalhekk, l-appoġġ jista’ jitqies bħala għajnuna mill-Istat mogħtija bir-riżorsi tal-Istat skont it-tifsira tal-Artikolu 107(1) TFUE.

(117)

Peress li l-għajnuna għenet biss lil impriża waħda (Propapier), din hija miżura selettiva.

(118)

L-appoġġ finanzjarju ħeles lil Propapier minn kostijiet li l-impriża normalment kien ikollha ġġarrab hija stess u b’hekk taha vantaġġ ekonomiku fuq il-kompetituri tagħha.

(119)

L-appoġġ finanzjarju mill-Ġermanja kien jikkonċerna investiment li jħaffef il-manifattura ta’ diversi tipi ta’ materjal ikkorugat għall-kontenituri. Peress li dawn il-prodotti huma nnegozjati bejn l-Istati Membri, l-għajnuna tista’ taffettwa l-kummerċ bejn l-Istati Membri u tfixkel il-kompetizzjoni.

(120)

Konsegwentement, f’din il-valutazzjoni preliminari, il-Kummissjoni ssib li l-miżura tikkostitwixxi għajnuna mill-Istat lil Propapier skont it-tifsira tal-Artikolu 107(1) TFUE.

(121)

L-Artikolu 108(3) TFUE jeħtieġ li l-Istati Membri jinnotifikaw il-miżuri ta’ għajnuna kollha minn qabel, sakemm ma jkunux koperti minn eżenzjoni ta’ kategorija. Għalkemm l-għajnuna ngħatat taħt għajnuna eżenti nru XR 6/2007 (ara l-paragrafi 35 u 36), din ma taqax taħt il-kamp ta’ applikazzjoni tar-regolament rilevanti ta’ eżenzjoni ta’ kategorija (f’dan il-każ ir-Regolament (KE) Nru 1628/2006 (32)), peress li taqbeż il-limitu ta’ notifika individwali (f’dan il-każ EUR 22.5 miljun).

(122)

Il-Ġermanja nnotifikat il-miżura ta’ għajnuna fl-2007, u b’hekk ikkonformat mal-obbligu ta’ notifika individwali skont l-Artikolu 7(e) tar-Regolament (KE) Nru 1628/2006. Peress li d-deċiżjoni oriġinali tal-Kummissjoni ġiet annullata u l-għajnuna kienet ingħatat qabel ma l-Qorti qatgħet is-sentenza dwar it-talba għal annullament ippreżentata minn Smurfit Kappa, l-għajnuna trid titqies illegali.

(123)

Peress li l-għajnuna ppjanata taqbeż il-limitu ta’ notifika individwali fl-Artikolu 7(e) tar-Regolament (KE) Nru 1628/2006, il-Kummissjoni trid tivvaluta l-miżura fuq il-bażi tal-Linji Gwida dwar l-Għajnuna Reġjonali.

(124)

Kif spjegat il-Kummissjoni fil-paragrafi 47 sa 50 tad-deċiżjoni ta’ ftuħ, trid tibbaża l-valutazzjoni provviżorja ripetuta tagħha tal-miżura ta’ għajnuna b’mod fundamentali fuq il-fatti li kienu japplikaw meta ġiet adottata d-deċiżjoni annullata sabiex tikkonforma mas-sentenza tal-Qorti fil-kawża T-304/08. Peress li l-Kummissjoni hija meħtieġa tadotta deċiżjoni ġdida mhux ivvizzjata min-nuqqas ta’ raġunijiet identifikati mill-Qorti fis-sentenza msemmija aktar ‘il fuq, il-Kummissjoni tista’ tqis biss il-fatti, ir-rapporti u dejta oħra disponibbli għaliha meta adottat id-deċiżjoni oriġinali tagħha dwar il-kompatibbiltà tal-miżura ta’ għajnuna (33).

(125)

F’dan il-każ, il-proġett ta’ investiment tnaqqaslu l-kamp ta’ applikazzjoni wara li ġiet adottata d-deċiżjoni annullata fit-2 ta’ April 2008 u b’hekk, anki l-ispejjeż eliġibbli naqsu u l-għajnuna mogħtija naqset ukoll. Anki jekk il-Kummissjoni tadotta deċiżjoni dwar il-miżura ta’ għajnuna fil-fatt implimentata, filwaqt li tqis il-fatt li kemm l-ispejjeż eliġibbli kif ukoll l-għajnuna mogħtija lil Propapier mill-Ġermanja kienu anqas minn dawk stmati fil-bidu, il-Kummissjoni trid tibbaża l-valutazzjoni tagħha fuq l-informazzjoni disponibbli meta kienet ġiet adottata d-deċiżjoni annullata u r-regoli dwar l-għajnuna mill-Unjoni li kienu applikabbli dak iż-żmien. Fil-każ ta’ għajnuna reġjonali għal proġetti ta’ investiment kbar, il-Kummissjoni normalment ikollha tadotta deċiżjoni msejsa fuq previżjonijiet u dejta tas-suq stmata qabel ma l-investiment fil-fatt jiġi implimentat. L-intensitajiet tal-għajnuna approvati mhumiex aġġustati aktar tard, anki jekk bosta snin wara jidher li s-suq ikun żviluppa b’mod differenti minn dak li kien mistenni meta l-Kummissjoni adottat id-deċiżjoni tagħha.

(126)

Il-proċedura biex tiġi adottata deċiżjoni ġdida tista’ titkompla fil-waqt preċiż li fih seħħet l-illegalità (34). B’rabta mar-regoli dwar l-għajnuna l-Qorti ddikjarat li, jekk l-investigazzjoni tal-Kummissjoni b’rabta ma’ deċiżjoni ta’ qabel kienet inkompluta u rriżultat fl-annullament ta’ dik id-deċiżjoni, il-proċedura sabiex tiġi sostitwita dik id-deċiżjoni tista’ titkompla f’dak il-waqt billi tiġi ripetuta l-analiżi diġà mwettqa (35).

(127)

Meta d-deċiżjoni annullata ġiet adottata fl-2008, ir-reġjun ta’ Brandenburg-Nordost ikkwalifika għall-għajnuna reġjonali skont l-Artikolu 107(3)(a) TFUE.

(128)

L-għajnuna nnotifikata kellha tingħata għal investiment inizjali skont it-tifsira tas-Sezzjoni 4.1 tal-Linji Gwida dwar l-Għajnuna Reġjonali u l-ispejjeż eliġibbli kienu jinkludu l-kostijiet għall-binjiet u l-impjant tal-produzzjoni (ara l-paragrafu 30), b’konformità mas-Sezzjoni 4.2 tal-Linji Gwida dwar l-Għajnuna Reġjonali. Il-Ġermanja kkonfermat li l-assi intanġibbli ser jikkonformaw mar-rekwiżiti tal-punt 56 tal-Linji Gwida dwar l-Għajnuna Reġjonali (ara l-paragrafu 30).

(129)

Il-kontribuzzjoni mhux tal-għajnuna għall-ispejjeż eliġibbli mill-benefiċjarju tal-għajnuna hija ogħla mil-limitu ta’ 25 % meħtieġ skont is-Sezzjoni 4.1 tal-Linji Gwida dwar l-Għajnuna Reġjonali (ara l-paragrafu 34).

(130)

Inżammet konformità mad-dispożizzjonijiet formali dwar l-effett ta’ inċentiv fil-punt 38 tal-Linji Gwida dwar l-Għajnuna Reġjonali: fir-rigward tal-għotja diretta oriġinarjament ippjanata, il-benefiċjarju tal-għajnuna applika għaliha fil-15 ta’ Mejju 2007 u l-Ġermanja kkonfermat bil-miktub fl-24 ta’ Mejju 2007 (qabel ma l-proġett beda f’Diċembru 2007) li, soġġetti għall-eżitu tal-verifika ddettaljata, il-prekundizzjonijiet stabbiliti fir-regola rilevanti kienu ġew issodisfati.

(131)

L-għajnuna kollha finalment ingħatat fil-forma ta’ għotja ta’ investiment, li titħallas b’mod awtomatiku jekk huma ssodisfati l-kriterji oġġettivi tal-bażi legali rilevanti (għajnuna eżenti nru XR 6/2007). Ma hemm bżonn tal-ebda applikazzjoni għall-għajnuna u l-ebda konferma bil-miktub li l-proġett fundamentalment jissodisfa l-kriterji tal-għajnuna għal għotja ta’ investiment. Skont in-nota f’qiegħ il-paġna 41 tal-Linji Gwida dwar l-Għajnuna Reġjonali, fil-każ ta’ skemi ta’ għajnuna fiskali approvati li fihom tingħata eżenzjoni jew tnaqqis tat-taxxa b’mod awtomatiku lin-nefqa li tikkwalifika bla ebda diskrezzjoni min-naħa tal-awtoritajiet, l-Istati Membri ma għandhomx bżonn jikkonfermaw qabel ma jibda l-proġett li, soġġett għall-eżitu tal-verifika ddettaljata, il-proġett jissodisfa l-kriterji tal-għajnuna b’mod fundamentali.

(132)

Il-Ġermanja kkonfermat li l-investiment jinżamm fir-reġjun assistit għal tal-anqas ħames snin wara li jitlesta l-proġett (Paragrafu 4.1 tal-Linji Gwida dwar l-Għajnuna Reġjonali).

(133)

Il-Ġermanja kkonfermat ukoll li tinżamm konformità mar-regoli dwar il-kumulazzjoni (Paragrafu 4.4 tal-Linji Gwida dwar l-Għajnuna Reġjonali).

(134)

Fuq il-bażi tal-informazzjoni disponibbli għaliha qabel ma ġiet adottata d-deċiżjoni annullata, il-Kummissjoni hija tal-fehma li l-miżura ta’ għajnuna tikkonforma mal-kriterji ta’ kompatibbiltà rilevanti tal-Linji Gwida dwar l-Għajnuna Reġjonali.

(135)

Peress li l-għajnuna reġjonali ngħatat għal proġett ta’ investiment kbir, il-Kummissjoni trid tivvaluta wkoll il-konformità mal-prekundizzjonijiet speċifiċi għall-għajnuna reġjonali għal proġetti ta’ investiment kbar stabbiliti fil-Paragrafu 4.3 tal-Linji Gwida dwar l-Għajnuna Reġjonali.

(136)

Peress li l-ispejjeż eliġibbli skontati notifikati jilħqu total ta’ EUR 58 6 7 22  900 u japplika limitu massimu tal-għajnuna reġjonali standard ta’ 30 % EGħG għar-reġjun ta’ Brandenburg-Nordost, l-intensità tal-għajnuna permissibbli skont il-punt 67 tal-Linji Gwida dwar l-Għajnuna Reġjonali hija ta’ 12,30 % EGħG.

(137)

Wara l-adozzjoni tad-deċiżjoni annullata, il-Ġermanja avżat lill-Kummissjoni li l-ispejjeż eliġibbli kienu naqsu b’mod proporzjonat wara l-esklużjoni tal-impjant tal-enerġija mill-proġett assistit. L-applikazzjoni tad-dispożizzjonijiet ta’ tnaqqis fil-punt 67 tal-Linji Gwida dwar l-Għajnuna Reġjonali għall-ispejjeż eliġibbli aktar baxxi kienet tirriżulta f’intensità tal-għajnuna ogħla. Madankollu, il-benefiċjarju tal-għajnuna kien beda miżuri tal-proġett f’sitwazzjoni li fiha kienet ġiet notifikata intensità tal-għajnuna ta’ 12,30 % EGħG lill-Kummissjoni li mbagħad approvatha. Għaldaqstant jista’ jiġi konkluż li l-intensità tal-għajnuna approvata oriġinarjament kienet tipprovdi inċentiv biżżejjed għad-deċiżjoni ta’ investiment u li ma hemm ebda raġuni għaliex wieħed jassumi li intensità tal-għajnuna ogħla kien ikollha effett ulterjuri ta’ inċentiv (36).

(138)

L-għajnuna ta’ EUR 5 0 5 59  153 (nominali) jew EUR 4 4 1 72  973 (valur attwali) ingħatat lil Propapier għall-proġett ta’ investiment imnaqqas. Din tikkorrispondi għal intensità tal-għajnuna ta’ 12,51 % EGħG u b’hekk taqbeż l-intensità massima permissibbli tal-għajnuna ta’ 12,30 %. Madankollu, il-Ġermanja tikkonferma li Propapier raddet lura l-għajnuna addizzjonali ta’ EUR 1 0 99  539 bl-imgħax. B’hekk, l-għajnuna li fadal miżmuma mill-benefiċjarju tal-għajnuna ma taqbiżx is-somma ta’ EUR 4 3 4 15  903, li tikkorrispondi għal intensità tal-għajnuna ta’ 12,30 % EGħG għall-ispejjeż eliġibbli mnaqqsin tal-proġett ta’ investiment. Fuq dik il-bażi, il-Kummissjoni tikkonkludi li l-ammont mogħti f’għajnuna huwa konformi mal-punt 67 tal-Linji Gwida dwar l-Għajnuna Reġjonali.

(139)

Fid-deċiżjoni ta’ ftuħ tagħha dwar il-kawża SA.36147 (C 30/2010) (37), il-Kummissjoni esprimiet it-tħassib tagħha li l-investiment fil-fabbrika tal-karti ta’ Propapier u bosta miżuri infrastrutturali oħrajn tal-gvern fiż-żona industrijali fejn kienet tinsab il-fabbrika tal-karti ppjanata ta’ Propapier jista’ jikkostitwixxi proġett ta’ investiment wieħed skont it-tifsira tal-punt 60 tal-Linji Gwida dwar l-Għajnuna Reġjonali. Għaldaqstant, fid-deċiżjoni ta’ ftuħ tagħha dwar il-kawża tal-għajnuna għall-investiment reġjonali SA.23827 (2013/C) – Il-Ġermanja – LIP – Propapier PM2 GmbH, il-Kummissjoni ddikjarat li jekk wara l-proċedura ta’ investigazzjoni formali fil-kawża SA.36147 (C 30/10) – Il-Ġermanja – Għajnuna infrastrutturali allegata għal Propapier PM2, hija tikkonkludi li l-investimenti assistiti l-oħrajn u l-investiment fil-fabbrika tal-karti ta’ Propapier isawru proġett wieħed ta’ investiment jew li Propapier irċeviet għajnuna oħra fil-forma ta’ miżuri infrastrutturali, ikollha tiġi vverifikata l-kompatibbiltà tal-pakkett sħiħ tal-għajnuna mal-punt 67 tal-Linji Gwida dwar l-Għajnuna Reġjonali.

(140)

Meta l-Kummissjoni tadotta deċiżjoni finali dwar il-kawża SA.36147 (C 30/10) (38), ser tqis l-għajnuna reġjonali mogħtija lil Propapier meta tivvaluta l-kompatibbiltà tal-miżuri tal-għajnuna infrastrutturali.

(141)

Peress li l-ammont globali fl-għajnuna minn sorsi oħrajn jaqbeż il-limitu ta’ notifika individwali, il-Kummissjoni trid tagħmel il-verifiki msemmijin fil-punt 68(a) u (b) tal-Linji Gwida dwar l-Għajnuna Reġjonali.

(142)

L-għajnuna għal proġetti ta’ investiment kbar li jaqgħu taħt il-punt 68 tal-Linji Gwida dwar l-Għajnuna Reġjonali, li fihom

tista’ tiġi approvata biss, wara t-tnedija tal-proċedura ta’ investigazzjoni formali stipulata fl-Artikolu 108(2) TFUE, wara li ssir verifika ddettaljata li l-għajnuna hija meħtieġa sabiex tipprovdi effett ta’ inċentiv u l-benefiċċji tal-miżura ta’ għajnuna jisbqu d-distorsjoni tal-kompetizzjoni li tirriżulta.

(143)

Sabiex isiru l-verifiki b’konformità mal-punti 68(a) u (b) tal-Linji Gwida dwar l-Għajnuna Reġjonali, il-Kummissjoni l-ewwel trid tiddefinixxi s-suq tal-prodotti rilevanti u s-suq ġeografiku rilevanti.

(144)

Għalkemm (kif allegat minn Smurfit Kappa) Progroup jista’ jkun qiegħed jippjana li juża l-magna ta’ Propapier PM2 biex jimmanifattura testliners li jiżnu 70/100 g/m2 u skanalatura li tiżen 70/130 g/m2, il-Kummissjoni tqis li d-definizzjoni tas-suq għandha tkun ibbażata fuq il-kapaċità ta’ produzzjoni potenzjali propja tal-magna. Għalhekk, il-Kummissjoni tikkonferma li l-proġett ta’ investiment notifikat mill-Ġermanja u deskritt fil-paragrafu 25 jikkonċerna direttament żewġ tipi ta’ materjal ikkorugat għall-kontenituri: testliners li jiżnu sa 150 g/m2 u skanalatura rriċiklata.

(145)

Huwa stmat li 75 % tal-materjal ikkorugat għall-kontenituri immanifatturat fl-impjant assistit għandu jintuża għall-manifattura tal-prodott downstream fi Progroup, il-Kummissjoni tqis li l-prodott downstream (kartun ikkorrugat) huwa prodott ikkonċernat mill-proġett ta’ investiment ukoll skont it-tifsira tal-punt 69 tal-Linji Gwida dwar l-Għajnuna Reġjonali.

(146)

Skont il-punt 69 tal-Linji Gwida dwar l-Għajnuna Reġjonali, is-suq tal-prodotti rilevanti jinkludi l-prodott ikkonċernat u s-sostituti tiegħu meqjusin bħala tali jew mill-konsumatur (minħabba l-karatteristiċi, il-prezzijiet u l-użu maħsub tal-prodott) jew mill-produttur (permezz tal-flessibbiltà tal-installazzjonijiet tal-produzzjoni).

(147)

Il-Ġermanja ddikjarat li ż-żewġ tipi ta’ materjal ikkorugat għall-kontenituri li huma mmanifatturati fl-impjant assistit jappartjenu għall-istess suq globali għall-materjal ikkorugat għall-kontenituri li, minbarra dawn iż-żewġ tipi (testliners li jiżnu sa 150 g/m2 u skanalatura rriċiklata), jinkludi anki kraftliners u skanalatura SC, jiżnu kemm jiżnu. Il-Ġermanja sostniet din l-asserzjoni b’referenza għall-fatt li dawn iż-żewġ prodotti jistgħu jissostitwixxu lil xulxin.

(148)

Il-Kummissjoni tieħu l-pożizzjoni wkoll li l-iskanalatura magħmula minn fibra rriċiklata u l-iskanalatura magħmula minn fibra ġdida jitqiesu li huma interkambjabbli min-naħa tal-provvista. L-iskanalatura magħmula minn fibra ġdida tista’ tiġi mmanifatturata f’impjant tal-iskanalaturi rriċiklati wkoll, sakemm l-impjant ikun konvertit għall-materja prima alternattiva (dan jinvolvi investiment ta’ darba ta’ EUR […] miljun, li huwa anqas minn […] % mill-kost sħiħ tal-investiment). Barra minn hekk, fil-prattika, l-iskanalatura magħmula minn fibra ġdida hija mmanifatturata minn taħlita ta’ fibra ġdida u rriċiklata li fiha sa 40-50 % fibra rriċiklata.

(149)

Skanalatura magħmula minn fibra ġdida tiswa madwar 15 % aktar minn skanalatura rriċiklata pura. Sa fejn huma kkonċernati l-klijenti tal-iskanalatura, iż-żewġ prodotti essenzjalment għandhom l-istess karatteristiċi u jaqdu l-istess skop maħsub. Il-klijenti jistgħu jibdlu skanalatura magħmula minn fibra ġdida eħfef (eż. 127 g/m2) ma’ skanalatura rriċiklata itqal (eż. 140 g/m2) Il-fatt li l-iskanalatura magħmula minn fibra ġdida eħfef tista’ tintuża minflok skanalatura rriċiklata jfisser li d-differenzi fil-prezz ma jibqgħux importanti. B’hekk, il-Kummissjoni tqis li ż-żewġ prodotti jitqiesu li huma interkambjabbli min-naħa tad-domanda wkoll.

(150)

L-istess japplika għas-sostitwibbiltà tat-testliners (magħmulin minn fibra rriċiklata) u kraftliners (magħmulin minn fibra ġdida) min-naħa tad-domanda. It-tnejn jaqdu l-istess skop maħsub u l-prezz ogħla tal-kraftliners huwa kkumpensat mill-fatt li l-kraftliners eħfef jistgħu jiħdulhom posthom testliners itqal.

(151)

Skanalatura (kemm irriċiklata kif ukoll dik magħmula minn fibra ġdida), testliners u kraftliners huma kompletament sostitwibbli min-naħa tal-provvista, peress li l-magni tal-karta moderni, inklużi l-magni li jappartjenu għall-benefiċjarju tal-għajnuna, jistgħu jipproduċu t-tnejn li huma..

(152)

Anki materjali ikkorugat għall-kontenituri li jiżnu differenti (jiġifieri anqas u aktar minn 150 g/m2) jappartjenu għall-istess suq rilevanti, peress li l-klijenti jqisuhom interkambjabbli. Il-klijenti jistgħu jibdlu saff wieħed tal-materjal itqal ikkorugat għall-kontenituri ma’ bosta saffi ta’ materjal eħfef u irħas tal-materjal ikkorugat għall-kontenituri.

(153)

Jista’ jiġi konkluż li, fuq il-bażi tar-raġunijiet spjegati hawn fuq, is-suq globali għall-materjal ikkorugat għall-kontenituri huwa s-suq tal-prodotti rilevanti għall-materjal ikkorugat għall-kontenituri. Madankollu, f’deċiżjonijiet dwar l-amalgamazzjonijiet preċedenti (39), il-Kummissjoni ħalliet il-kwistjoni tas-suq tal-prodotti rilevanti u, b’mod partikolari, is-subdiviżjoni fi prodotti li jsiru minn fibra ġdida u prodotti li jsiru minn fibra qadima miftuħa. Il-Kummissjoni tosserva li l-Ġermanja ssottomettiet anki dejta għall-aktar definizzjoni ristretta possibbli tas-suq tal-prodotti rilevanti (suq għal testliners li jiżnu sa 150 g/m2 u skanalatura rriċiklata).

(154)

Progroup huwa manifattur tal-karta integrat vertikalment li jikkompeti fis-suq globali għall-materjal ikkorugat għall-kontenituri, li fih kull manifattur integrat jista’ jiddeċiedi li jisfrutta t-termini aħjar sabiex jixtri prodotti partikolari mingħand Progroup minflok ma jimmanifatturahom hu stess. L-istħarriġijiet iddettaljati sottomessi mill-Ġermanja juru li anki l-manifatturi integrati vertikalment li huma stess jimmanifatturaw il-kwantitajiet ta’ materjal ikkorugat għall-kontenituri meħtieġa għall-produzzjoni tal-kartun ikkorrugat tagħhom (imkejla f’tunnellati), jixtru u jbigħu materjal ikkorugat għall-kontenituri mingħand u lil kompetituri sabiex iqisu r-rekwiżiti speċifiċi għal ċerti tipi ta’ materjal ikkorugat għall-kontenituri u r-rekwiżiti loġistiċi. Peress li l-manifatturi integrati vertikalment għandhom pożizzjoni dominanti fis-suq, ishma kbar mis-suq fis-suq ħieles (jiġifieri għal provvisti lil partijiet terzi biss) mhux bilfors ifissru saħħa fis-suq. Għalhekk, il-Ġermanja kkonkludiet li s-suq globali għall-materjal ikkorugat għall-kontenituri huwa s-suq tal-prodotti rilevanti u jinkludi kemm provvisti interni tal-materjal ikkorugat għall-kontenituri kif ukoll provvisti lil partijiet terzi (= suq globali). Madankollu, il-Ġermanja pprovdiet ukoll informazzjoni fis-suq ħieles biss.

(155)

Il-Kummissjoni ma tara ebda raġuni għaliex għandha titbiegħed mill-prattika tagħha fid-deċiżjonijiet preċedenti f’kawżi dwar l-għajnuna (40) u ta’ kontroll tal-amalgamazzjonijiet (41) fl-industrija tal-karti (li fihom il-Kummissjoni jew għamlet distinzjoni bejn is-swieq għall-materjali kollha ikkorugat għall-kontenituri u s-suq għall-materjal irriċiklat ikkorugat għall-kontenituri jew ħalliet id-definizzjoni miftuħa u għamlet distinzjoni bejn is-suq globali/suq ħieles jew inkella ħalliet id-definizzjoni miftuħa jew iddefiniet is-suq bħala s-suq globali għall-materjal ikkorugat għall-kontenituri iżda kkalkolat iż-żewġ xenarji). Fid-dawl tal-informazzjoni disponibbli għall-Kummissjoni qabel ma adottat id-deċiżjoni annullata u l-kummenti li rċeviet wara d-deċiżjoni ta’ ftuħ dwar il-fatti kif kienu qabel ma ġiet adottata d-deċiżjoni annullata, il-Kummissjoni ddeċidiet li twettaq il-verifiki sabiex tikkonforma mal-punt 68 tal-Linji Gwida dwar l-Għajnuna Reġjonali fil-livell tas-suq għall-materjal kollu ikkorugat għall-kontenituri u s-suq għat-testliners li jiżnu sa 150 g/m2 u skanalatura rriċiklata kemm fis-suq globali kif ukoll fis-suq ħieles.

(156)

Il-kartun ikkorrugat mhuwiex immanifatturat fl-impjant assistit, iżda huwa prodott downstream ikkonċernat mill-proġett ta’ investiment.

(157)

Il-Ġermanja ddikjarat li, mill-perspettiva tal-fornitur, il-kartun ikkorrugat jirrappreżenta suq indipendenti, peress li l-impjanti tal-kartun ikkorrugat jistgħu jiġu kkonvertiti sabiex jimmanifatturaw prodotti oħrajn b’kost konsiderevoli.

(158)

Min-naħa tad-domanda, l-aktar prodott paragunabbli għall-kartun ikkorrugat huwa l-imballaġġ tal-kartun, għalkemm l-imballaġġ tal-kartun ikkorrugat huwa eħfef, aktar stabbli u orħos. Għalhekk, il-klijenti tal-kartun ikkorrugat (manifatturi tal-imballaġġ) ma jistgħux jibdlu prodotti oħrajn mal-kartun ikkorugat għall-biċċa l-kbira tat-tipi ta’ imballaġġ.

(159)

Peress li fuq dan il-punt ma sar ebda kumment ieħor, il-Kummissjoni ma tara ebda raġuni għaliex titbiegħed mill-prattika preċedenti tagħha fid-deċiżjonijiet imsemmijin aktar ‘il fuq dwar il-kontroll tal-amalgamazzjonijiet u tikkonferma l-pożizzjoni li ħadet fid-deċiżjoni annullata u d-deċiżjoni ta’ ftuħ: il-kartun ikkorrugat huwa suq tal-prodotti rilevanti separat.

(160)

B’rabta mal-verifiki meħtieġa skont il-punti 68(a) u (b) tal-Linji Gwida dwar l-Għajnuna Reġjonali, il-punt 70 tal-Linji Gwida dwar l-Għajnuna Reġjonali jiddikjara: “Għall-fini tal-applikazzjoni tal-punti (a) u (b), il-bejgħ u l-konsum apparenti ser jiġu ddefiniti fil-livell xieraq tal-klassifikazzjoni PRODKOM, normalment fiż-ŻEE, jew, jekk it-tali informazzjoni ma tkunx disponibbli jew rilevanti, fuq il-bażi ta’ kwalunkwe segmentazzjoni tas-suq oħra ġeneralment aċċettata li għaliha diġà jkun hemm dejta statistika disponibbli”.

(161)

Il-Ġermanja tqis li s-suq ġeografiku rilevanti għall-materjal ikkorugat għall-kontenituri tal-anqas ikopri u saħansitra jestendi lil hinn miż-ŻEE (inklużi reġjuni fil-viċinat taż-ŻEE). Madankollu, il-Kummissjoni ma tara ebda raġuni għaliex għandha titbiegħed mill-prattika tagħha fid-deċiżjonijiet preċedenti f’kawżi dwar l-għajnuna u ta’ kontroll tal-amalgamazzjonijiet, li fihom iż-ŻEE tqieset li hija s-suq ġeografiku rilevanti għall-materjal ikkorugat għall-kontenituri, u għalhekk għandha tagħmel verifika tas-suq skont it-tifsira tal-punt 68 tal-Linji Gwida dwar l-Għajnuna Reġjonali fuq il-bażi tas-segmentazzjoni tas-suq ġeneralment aċċettata tas-suq ġeografiku rilevanti għall-materjal ikkorugat għall-kontenituri u l-materjal irriċiklat ikkorugat għall-kontenituri li għalih hemm dejta disponibbli, viz. iż-ŻEE.

(162)

Il-kartun ikkorrugat huwa mmanifatturat f’impjanti oħrajn ta’ Progroup meta mqabbel mal-materjal ikkorugat għall-kontenituri immanifatturat fl-impjant ta’ Eisenhüttenstadt. Il-pjan meta ġie nnotifikat il-proġett kien li Propapier tforni l-materjal ikkorugat għall-kontenituri lil impjanti ta’ Progroup fil-Ġermanja, Franza u r-Repubblika Ċeka u, aktar tard, lill-impjant fi Stryków (il-Polonja), wara l-bini tagħha fl-2008. Dawn l-impjanti jimmanifatturaw il-prodott downstream (kartun ikkorrugat).

(163)

Il-Ġermanja tiddikjara li s-suq ġeografiku rilevanti għall-kartun ikkorrugat ma jistax jiġi ddefinit b’mod aktar ristrett miż-ŻEE; minkejja dan, issottomettiet dejta anki għar-reġjun li tinkludi l-aktar pajjiżi ta’ destinazzjoni importanti tal-kunsinni ta’ Progroup (jiġifieri r-Repubblika Ċeka, Franza, il-Ġermanja, ir-Renju Unit, in-Netherlands u l-Polonja). Filwaqt li qieset l-agħar xenarju possibbli u s-sejbiet fid-deċiżjonijiet preċedenti f’kawżi tal-kontroll tal-amalgamazzjonijiet (42) jiġifieri li l-kunsinni tal-kartun ikkorrugat huma ekonomiċi sa distanza ta’ 400 km mill-fabbrika, il-Kummissjoni beħsiebha tħalli d-definizzjoni tas-suq ġeografiku rilevanti għall-kartun ikkorrugat miftuħa u trid tikkalkola l-ishma mis-suq kemm fil-livell taż-ŻEE kif ukoll għar-reġjun li sempliċiment jinkludi l-aktar pajjiżi ta’ destinazzjoni importanti għal Progroup.

(164)

Sabiex tistabbilixxi jekk inqabiżx il-limitu stabbilit fil-punt 68(a) tal-Linji Gwida dwar l-Għajnuna Reġjonali, il-Kummissjoni trid tanalizza s-sehem mis-suq tal-benefiċjarju tal-għajnuna fil-livell tal-grupp qabel u wara l-investiment. Il-proġett ta’ investiment beda fl-2007 u tlesta sa nofs l-2010; madankollu, il-kapaċità tal-produzzjoni sħiħa ser tintlaħaq biss fl-2015. Meta nnotifikat il-proġett il-Ġermanja osservat li d-dejta minn sorsi indipendenti dwar il-konsum apparenti fis-swieq rilevanti fis-sena ta’ wara s-sena li fiha għandha tintlaħaq il-kapaċità ta’ produzzjoni sħiħa (jiġifieri fl-2016) ma kinitx disponibbli. Għalhekk, il-Kummissjoni ddeċidiet li tinvestiga l-ishma mis-suq fl-2011 (is-sena ta’ wara t-tlestija tal-investiment), li għaliha l-previżjonijiet mis-sorsi indipendenti diġà kienu disponibbli. Din hija approssimazzjoni aċċettabbli, peress li sa dak iż-żmien għandha tkun disponibbli 92 % tal-kapaċità maħluqa mill-proġett.

(165)

Sabiex jiġi stabbilit is-sehem mis-suq ta’ Progroup fil-livell tal-grupp, il-Kummissjoni qabblet il-volum u l-valur tal-provvisti kollha tagħha (lil partijiet terzi u fi ħdan il-grupp) fis-sena magħżula mal-konsum apparenti fis-swieq rilevanti. L-ishma mis-suq għas-suq ħieles għall-materjal ikkorugat għall-kontenituri (jiġifieri bbażat biss fuq il-bejgħ barra Progroup (43)) u l-volum totali tas-suq għall-provvisti lil partijiet terzi ġew ikkalkolati b’mod separat.

(166)

Id-dejta dwar il-volum u l-valur tal-konsum apparenti kollu fiż-ŻEE fis-swieq għall-materjal ikkorugat għall-kontenituri, testliners li jiżnu sa 150 g/m2 u skanalatura rriċiklata u għal kartun ikkorrugat issawret għall-fini tan-notifika minn Pöyry, ditta globali tal-inġinerija u l-konsulenza li tispeċjalizza fis-setturi tal-enerġija, il-forestrija u l-infrastruttura u l-ambjent, fuq talba tal-benefiċjarju tal-għajnuna. Pöyry bniet id-dejta mill-bażi ta’ dejta tagħha stess u minn sorsi disponibbli għall-pubbliku (eż. minn ġurnali tekniċi u assoċjazzjonijiet industrijali).

(167)

Peress li ma kien hemm ebda dejta disponibbli dwar il-volum tas-suq ħieles mingħand sorsi indipendenti, il-Ġermanja bbażat l-istimi tagħha dwar il-volum ta’ dak is-suq fuq id-dejta tal-kapaċità minn Pöyry għall-2006 u mbagħad qabblet il-kapaċità ta’ produzzjoni ta’ kull manifattur integrat għall-materjal ikkorugat għall-kontenituri mal-kapaċità ta’ produzzjoni tagħha għall-kartun ikkorrugat. Jekk il-kapaċità tal-produzzjoni għall-kartun ikkorrugat hija akbar mill-kapaċità tal-produzzjoni għall-materjal ikkorugat għall-kontenituri, teorikament dan jirriżulta f’domanda proporzjonata għal dik il-materja prima fis-suq ħieles. Id-domanda għall-materjal ikkorugat għall-kontenituri minn manifatturi mhux integrati tal-kartun ikkorrugat fis-suq ħieles tiżdied ma’ din id-domanda addizzjonali għall-materjal ikkorugat għall-kontenituri minn manifatturi integrati. Dan il-kalkolu juri li l-volum tas-suq ħieles għall-materjal ikkorugat għall-kontenituri jammonta għal madwar 37 % tas-suq globali għall-materjal ikkorugat għall-kontenituri. Dan il-proprozjon intuża wkoll bħala bażi meta ġie stmat il-volum tas-suq ħieles fl-2011 (44).

(168)

Peress li ma hemm ebda dejta separata disponibbli dwar il-kapaċitajiet ta’ produzzjoni għall-materjal ikkorrugat għall-kontenituri magħmul minn karta rriċiklata u fibra ġdida, dan il-metodu ma jistax jintuża biex jagħti stima tal-volum tas-suq ħieles għat-testliners u l-iskanalatura magħmula minn karta rriċiklata. Madankollu, materjal ikkorrugat għall-kontenituri ibbażat fuq il-karta u irriċiklat jammonta għal madwar 70-80 % tas-suq globali għall-materjal ikkorrugat għall-kontenituri u huwa ferm probabbli li dan il-perċentwal japplika għas-suq ħieles, u dan ifisser li l-ishma mis-suq ta’ Progroup fis-suq ħieles għall-materjal ikkorrugat għall-kontenituri irriċiklat ibbażat fuq il-fibri huma biss ftit ogħla minn dawk fis-suq ħieles għat-tipi kollha ta’ materjal tal-materjal ikkorrugat għall-kontenituri.

(169)

Id-dejta dwar il-volum tas-suq għall-materjal ikkorrugat għall-kontenituri fir-reġjun ewlieni fornit minn Progroup (jiġifieri r-Repubblika Ċeka, Franza, il-Ġermanja, ir-Renju Unit, in-Netherlands u l-Polonja) issawret minn statistika tal-FEFCO (45) miksuba qabel ma ġiet adottata d-deċiżjoni annullata, u skont din dak ir-reġjun jammonta għal 58 % tas-suq sħiħ taż-ŻEE.

(170)

L-ishma mis-suq ta’ Progroup fis-swieq rilevanti fis-sena ta’ qabel u s-sena ta’ wara l-investiment, li ġew ikkalkolati fuq il-bażi tad-dejta pprovduta mill-Ġermanja (permezz tad-dejta ta’ Pöyry u FEFCO) jingħataw fit-Tabella 1.

Tabella 1:

L-ishma mis-suq ta’ Progroup fis-swieq rilevanti fil-livell tal-grupp

(171)

Is-sehem mis-suq ta’ Progroup huwa ferm anqas mil-limitu ta’ 25 % stabbilit fil-punt 68(a) tal-Linji Gwida dwar l-Għajnuna Reġjonali għad-definizzjonijiet kollha tas-suq ikkunsidrati. Il-limitu ta’ 25 % għas-sehem mis-suq rilevanti ma jinqabiżx lanqas jekk is-suq ikompli jiġi segmentat skont piż tal-gramma sa 130 g/m2.

(172)

Għalhekk, il-Kummissjoni tqis li l-għajnuna vverifikata ma taqbiżx il-limitu stabbilit fil-punt 68(a) tal-Linji Gwida dwar l-Għajnuna Reġjonali.

(173)

Il-Kummissjoni trid tivverifika wkoll l-għajnuna inkwistjoni skont il-punt 68(b) tal-Linji Gwida dwar l-Għajnuna Reġjonali, jiġifieri trid tivverifika jekk il-kapaċità maħluqa mill-proġett ta’ investiment, imkejla bl-użu tad-dejta apparenti dwar il-konsum għall-prodott ikkonċernat, hijiex anqas minn 5 % tas-suq, sakemm ir-rata medja ta’ tkabbir fis-sena tal-konsum apparenti tiegħu fl-aħħar ħames snin tkun aktar mir-rata ta’ tkabbir annwali tal-PDG taż-Żona Ekonomika Ewropea.

(174)

L-ewwel nett, il-Kummissjoni trid tistabbilixxi fuq il-bażi tar-rata medja tat-tkabbir fis-sena tal-konsum apparenti tal-prodott ikkonċernat jekk is-suq għall-materjal ikkorrugat għall-kontenituri huwiex qiegħed jiċkien fiż-ŻEE (46).

(175)

L-aħħar figuri disponibbli fi żmien in-notifika kienu marbutin mal-perjodu bejn l-2001 u l-2006. Fuq il-bażi ta’ dik id-dejta, ir-rata medja ta’ tkabbir fis-sena fis-suq globali għall-materjal ikkorrugat għall-kontenituri fiż-ŻEE tul il-perjodu bejn l-2001 u l-2006 kienet ta’ 2,15 % (volum) jew 0,02 % (valur). Ir-rata medja ta’ tkabbir fis-sena tal-konsum apparenti tat-testliners li jiżnu sa 150 g/m2 u skanalatura rriċiklata fiż-ŻEE tul dak il-perjodu kienet ta’ 3,25 % (volum) u 1,22 % (valur).

(176)

Peress li r-rata medja ta’ tkabbir fis-sena tal-PDG (47) fiż-ŻEE tul il-perjodu bejn l-2001 u l-2006 kienet ta’ 1,97 % bi prezzijiet kostanti (volum) jew 3,98 % bil-prezzijiet kurrenti (valur), kemm ir-rata medja ta’ tkabbir fis-sena tal-konsum ta’ materjal ikkorrugat għall-kontenituri kif ukoll dik tat-testliners li jiżnu sa 150 g/m2 u l-iskanalatura rriċiklata kienu ogħla skont il-volum iżda anqas skont il-valur.

(177)

Il-Kummissjoni ma taqbilx mal-kumment tal-Ġermanja li r-rata medja ta’ tkabbir fis-sena għandha tiġi kkalkolata fuq il-bażi tal-volum waħdu u mhux il-valur (ara l-paragrafi 93 u 94). Għalkemm li huwa minnu li, f’dan il-każ partikolari, hemm bżonn biss li jiġi kkalkolat jekk inqabiżx il-limitu ta’ 5 % stabbilit fil-punt 68(b) fuq il-bażi ta’ kalkolu tal-valur, dipendenza ġenerali fuq il-kalkoli tal-valur tidħol f’kunflitt mal-prattika attwali tal-Kummissjoni u xxekkel l-effettività tal-verifika f’termini tal-istabbiliment tal-kapaċitajiet żejda, eż. fejn it-tkabbir fil-provvista jaqbeż dak li diġà huwa tkabbir għoli fid-domanda u l-kostijiet varjabbli medji huma baxxi meta jitqabblu. Għalhekk, il-Kummissjoni trid tivverifika jekk il-kapaċità maħluqa mill-proġett ta’ investiment taqbiżx il-5 % tad-daqs tas-suq rilevanti.

(178)

Iż-żieda tal-kapaċità hija kkalkolata skont id-dispożizzjonijiet tal-punt 68(b) tal-Linji Gwida dwar l-Għajnuna Reġjonali bħala parti mill-konsum apparenti tal-prodott ikkonċernat li, skont id-definizzjoni, jinkludi provvisti lil partijiet terzi u provvisti interni tal-materjal ikkorrugat għall-kontenituri.

(179)

L-iskop tal-verifika tal-kapaċità (punt 68(b) tal-Linji Gwida dwar l-Għajnuna Reġjonali) huwa li tipprevjeni żieda tal-kapaċità sinifikanti (jiġifieri żieda ta’ aktar minn 5 %) meta ma jkun hemm ebda żieda korrispondenti fid-domanda (jiġifieri ż-żieda fid-domanda tkun anqas mir-rata ta’ tkabbir tal-PDG taż-ŻEE), u b’hekk jitħalla impatt negattiv fuq il-kompetituri, speċjalment minħabba l-effett fuq il-prezzijiet. Żidiet tal-kapaċità huma kkwalifikati bħala “sinifikanti” b’rabta mal-volum tas-suq. Fil-każ tal-materjal ikkorrugat għall-kontenituri, il-volum tas-suq finalment jiddependi mill-volum tas-suq għall-prodott downstream, irrilevanti minn jekk huwiex immanifatturat internament jew minn partijiet terzi. Għalhekk mhuwiex rakkomandat li titkejjel il-kapaċità maħluqa unikament fuq il-bażi tal-volum tas-suq ħieles għal materjal ikkorrugat għall-kontenituri. Barra minn hekk, kif spjegat aktar ‘il fuq, roħs fil-prezz fis-suq ħieles jaffettwa d-deċiżjoni tal-manifatturi integrati dwar jekk għandhomx jimmanifatturaw internament jew ibigħux u jikkaġunaw direttament żieda fid-domanda fis-suq ħieles, minħabba l-interazzjoni bejn is-suq globali u s-suq ħieles. Għalhekk, bħala regola, il-Kummissjoni tivverifika ż-żieda tal-kapaċità b’rabta mas-suq globali (48).

(180)

Il-Ġermanja spjegat li l-proġett għandu joħloq kapaċità globali ta’ 6 15  000 tunnellata materjal ikkorrugat għall-kontenituri (testliners u skanalatura rriċiklata) fis-sena, li tikkorrispondi għal valur ta’ EUR […]. Skont il-Ġermanja, il-konsum apparenti tal-materjal ikkorrugat għall-kontenituri fiż-ŻEE kien ta’ 23  363 miljun tunnellata fl-2006 (valur: EUR 9  409,76 miljun) u l-konsum apparenti tat-testliners li jiżnu sa 150 g/m2 u l-iskanalatura rriċiklata fiż-ŻEE kienet ta’ 18  281 miljun tunnellata (valur: EUR 6  752,698 miljun).

(181)

Fuq il-bażi tad-dejta ta’ hawn fuq, il-proġett ta’ Propapier f’Eisenhüttenstadt ser joħloq kapaċità ta’ 2,6 % tas-suq globali għall-materjal ikkorrugat għall-kontenituri (valur: [< 3] % jew 3,4 % tas-suq kombinat għat-testliners li jiżnu sa 150 g/m2 u skanalatura rriċiklata (valur: [< 5] %). Dan ifisser li l-kapaċità maħluqa mill-proġett hija anqas minn 5 % tal-konsum apparenti (fiż-ŻEE).

(182)

Anki jekk iż-żieda akbar tal-kapaċità li tassumi Smurfit Kappa tittieħed bħala l-agħar xenarju possibbli (6 50  000 tunnellata fis-sena jew 7 50  000 tunnellata fis-sena), il-limitu ta’ 5 % ma jinqabiżx għas-suq globali għall-materjal ikkorrugat għall-kontenituri (ara t-Tabella 2).

Tabella 2

Żieda tal-kapaċità fis-suq globali għall-materjal ikkorrugat għall-kontenituri (ŻEE)

(183)

Il-Kummissjoni kkalkolat iż-żieda tal-kapaċità bħala perċentwal tal-bejgħ tal-materjal ikkorrugat għall-kontenituri fis-suq ħieles ukoll, sabiex tqis l-agħar xenarju possibbli. Dak ix-xenarju jqis biss is-sehem tal-kapaċità globali maħluqa mill-investiment maħsub għall-produzzjoni għall-bejgħ fis-suq ħieles. Skont il-Ġermanja, dan huwa [< 2 50  000] tunnellata fis-sena. Is-sehem li jifdal tal-kapaċità maħluqa, jiġifieri [> 3 65  000] tunnellata fis-sena (li, mingħajr l-investiment, Progroup kien ikollu jikseb mingħand partijiet terzi u li b’hekk tissarraf f’domanda fis-suq ħieles) jintuża fi ħdan il-grupp għall-produzzjoni tal-kartun ikkorrugat u għalhekk għandu jitnaqqas mill-volum tas-suq ħieles.

(184)

Peress li l-volum tas-suq ħieles għall-materjal ikkorrugat għall-kontenituri fiż-ŻEE kien stmat għal 8  644 miljun tunnellata fl-2006 (49), il-kapaċità maħluqa mill-proġett, bħala parti mill-volum tas-suq ħieles għall-materjal ikkorrugat għall-kontenituri, kienet tammonta biss għal [< 3] % b’rabta mal-volum (50) (ara t-Tabella 3).

(185)

Il-Ġermanja ma rnexxilhiex tipprovdi stima għas-suq ħieles biss għall-materjal irriċiklat tal-materjal ikkorrugat għall-kontenituri (jiġifieri testliners u skanalatura magħmula minn karta rriċiklata) meta saret in-notifika oriġinali. Fil-kummenti tagħha dwar id-deċiżjoni ta’ ftuħ, il-Ġermanja ddikjarat li l-volum ta’ dak is-suq jista’ jiġi stmat għal 6,5 miljun tunnellata fl-2006 fuq il-bażi tad-dejta storika pprovduta minn Pöyry. Dan ifisser li ż-żieda tal-kapaċità fis-suq ħieles għall-materjal irriċiklat tal-materjal ikkorrugat għall-kontenituri hija ta’ [< 3] % b’rabta mal-volum (ara t-Tabella 3 ta’ hawn taħt).

(186)

Il-Kummissjoni għamlet ukoll il-kalkoli b’rabta mal-valur, bl-agħar xenarju possibbli bbażat fuq il-kapaċità maħluqa mill-proġett ta’ Propapier PM2 fis-suq ħieles ta’ 2 85  000 tunnellata fis-sena (figura adottata minn Smurfit Kappa). Il-limitu ta’ 5 % għas-suq ħieles għall-materjal ikkorrugat għall-kontenituri ma nqabeż fl-ebda wieħed mix-xenarji (ara t-Tabella 3 ta’ hawn taħt).

Tabella

Żieda tal-kapaċità fis-suq ħieles għall-materjal ikkorrugat għall-kontenituri (ŻEE)

(187)

Il-Kummissjoni tiċħad it-teorija tal-ilmentatur ta’ “effett tal-qlib” (ara l-paragrafi 56 u 57), li fiha l-“kapaċità meħlusa”, jiġifieri l-kapaċità li Progroup ma jibqax iżomm fis-suq ħieles, għandha tiżdied mal-kwantità tal-produzzjoni ta’ materjal ikkorrugat għall-kontenituri mibjugħin minn Progroup fis-suq ħieles sabiex tiġi kkalkolata l-kapaċità maħluqa mill-investiment ta’ Propapier fis-suq ħieles. Għalkemm li xenarju bħal dan (jekk wieħed jassumi żieda tal-kapaċità ta’ 5 25  000 tunnellata fis-sena) jirriżulta f’żieda tal-kapaċità ta’ aktar minn 5 %, approċċ bħal dan, kif tispjega l-Ġermanja wkoll, ikun jimplika li ż-żieda tal-kapaċità fis-suq ħieles u ż-żieda fis-suq globali huma l-istess. Iż-żieda tkun l-istess ukoll li kieku Propapier ma tforni ebda materjal ikkorrugat għall-kontenituri affattu fis-suq ħieles u użat il-produzzjoni l-ġdida kollha tagħha internament, f’liema każ is-suq għall-materjal ikkorrugat għall-kontenituri jista’ jiġi injorat kompletament għall-finijiet tal-verifika skont il-punt 68 tal-Linji Gwida dwar l-Għajnuna Reġjonali, peress li b’dan il-mod ma jinbiegħ l-ebda materjal ikkorrugat għall-kontenituri prodott, u l-prodott downstream (kartun ikkorrugat) biss jinbiegħ fis-suq.

(188)

Barra minn hekk, il-fajl Excel sottomess minn Smurfit Kappa huwa ta’ Ġunju 2008, filwaqt li l-Kummissjoni setgħet tuża biss fatti, rapporti u dejta oħra disponibbli għaliha qabel id-data li fiha ġiet adottata d-deċiżjoni annullata (it-2 ta’ April 2008). Anki jekk il-fajl fih għadd ta’ attributi minn studju tal-2007 (Henry Poole Consulting, ara n-nota f’qiegħ il-paġna 15), il-kalkoli huma bbażati fuq assunzjonijiet u dejta oħra li ma jidhrux li jinbtu direttament minn dak l-istudju.

(189)

Il-proġett mhuwiex ser joħloq xi kapaċità tal-produzzjoni għall-prodott downstream (kartun ikkorrugat) u huwa msejjes biss fuq il-produzzjoni tal-materjal ikkorrugat għall-kontenituri (żieda tal-kapaċità għall-kartun ikkorrugat: 0 %). B’konsegwenza ta’ dan, il-limitu ta’ 5 % stabbilit fil-punt 68(b) tal-Linji Gwida dwar l-Għajnuna Reġjonali ma jinqabiżx għall-kartun ikkorrugat.

(190)

Il-konklużjoni ġenerali tal-Kummissjoni, ibbażata fuq id-dikjarazzjonijiet ta’ hawn fuq, hija li l-kapaċità maħluqa mill-proġett ta’ Propapier PM2 hija anqas minn 5 % tas-swieq rilevanti kkonċernati u b’hekk l-għajnuna vverifikata ma toħloqx sitwazzjoni li fiha jinqabeż il-limitu stabbilit fil-punt 68(b) tal-Linji Gwida dwar l-Għajnuna Reġjonali għall-prodotti kkonċernati.

(191)

Kif spjegat fil-paragrafu 60, Smurfit Kappa jargumenta li s-suq għall-materjal ikkorrugat għall-kontenituri kien qiegħed ibati minn kapaċità strutturali żejda fil-perjodu bejn l-2001 u l-2006 u li l-għajnuna mill-Istat għal investimenti ġodda fl-industrija għarrqu dik il-kapaċità żejda. Il-Kummissjoni se tanalizza dawn l-argumenti, anki jekk l-eżitu tal-verifika skont il-punt 68(b) tal-Linji Gwida dwar l-Għajnuna Reġjonali jissuġġerixxi li ma hemmx żieda sinifikanti tal-kapaċità għal suq b’kapaċità strutturali żejda.

(192)

L-argumenti ta’ Smurfit Kappa huma bbażati fuq studju ta’ London Economics mill-2007, li jirrapporta użu tal-kapaċità ta’ anqas minn 90 % tul il-perjodu bejn l-2003 u l-2005 u jissuġġerixxi li l-figura għall-perjodu bejn l-2006 u l-2007 tibqa’ anqas mid-90 % sakemm ma tiġix dekumissjonata kapaċità fl-industrija. Min-naħa l-oħra, il-Ġermanja tgħid li l-biċċa l-kbira tal-magni dekummissjonati kienu qodma u ineffiċjenti (51). Ir-rapport ECA jiddikjara li ħafna mill-każijiet ta’ għeluq kien dovut għal bidliet naturali fid-domanda u l-istandards tekniċi u l-isforzi sabiex jinkisbu ekonomiji ta’ skala u li l-bżonn li jinbidlu l-magni kien ġej l-aktar minn 1) bidliet fit-teknoloġiji tal-produzzjoni; 2) żvilupp ulterjuri tal-proċessi ta’ standardizzazzjoni fl-industrija u 3) spejjeż iffrankati potenzjali mill-ekonomiji ta’ skala ġġenerati minn magni akbar. Għaldaqstant, il-Ġermanja ċaħdet l-argument ta’ Smurfit Kappa li l-għeluq kien deċiżjoni konxja mill-industrija sabiex jerġa’ jinkiseb il-bilanċ fis-suq bejn il-provvista u d-domanda.

(193)

Il-Kummissjoni tosserva li, skont studju indipendenti mill-2007 (studju ta’ Deutsche Bank), l-iskop tal-għeluq tal-impjanti tal-materjal ikkorrugat għall-kontenituri ta’ Smurfit Kappa kien li jtejjeb il-kwalità tal-bażi tal-assi tiegħu. Dak l-istudju ssuġġerixxa wkoll li l-kapaċitajiet il-ġodda kienu meħtieġa sabiex tiġi koperta d-domanda għall-perjodu bejn l-2009 u l-2012 (b’referenza għal investimenti ġodda minn Mondi, Progroup u SAICA) u li, minkejja żidiet tal-kapaċità fl-2009, ir-rati tal-użu kienu jibqgħu b’saħħithom (52).

(194)

Għaldaqstant, il-Kummissjoni tieħu l-pożizzjoni li ma hemm ebda evidenza konvinċenti li l-għajnuna mogħtija lil Propapier se ssaħħaħ il-kapaċitajiet strutturali żejda eżistenti fis-suq għall-materjal ikkorrugat għall-kontenituri. Il-figuri ta’ kapaċità żejda sottomessi minn Smurfit Kappa huma marbutin l-aktar mal-perjodu ta’ qabel l-investiment, filwaqt li l-previżjonijiet li kienu disponibbli meta ġiet adottata d-deċiżjoni annullata, inkluż studju indipendenti (Deutsche Bank), ibassru domanda li ser tkompli tikber mill-2007 ‘l hemm. Il-Kummissjoni xorta waħda qieset it-tnaqqis relattiv fid-domanda (u l-valur tagħha) bejn l-2001 u l-2006, billi kkalkolat il-perċentwal tal-kapaċità l-ġdida maħluqa fis-suq rilevanti skont il-punt 68(b) tal-Linji Gwida dwar l-Għajnuna Reġjonali.

(195)

Il-Linji Gwida dwar l-Għajnuna Reġjonali jistipulaw li, f’każijiet li fihom jinqabżu l-limiti stabbiliti fil-punti 68(a) u (b) tal-Linji Gwida dwar l-Għajnuna Reġjonali, il-Kummissjoni ser tapprova biss l-għajnuna għall-investiment reġjonali, wara li tiftaħ l-proċedura ta’ investigazzjoni formali stipulata fl-Artikolu 88(2) KE, wara li tagħmel verifika ddettaljata li l-għajnuna hija meħtieġa biex tipprovdi effett ta’ inċentiv u l-benefiċċji tal-miżura ta’ għajnuna jisbqu d-distorsjoni tal-kompetizzjoni li tirriżulta u l-effett fuq il-kummerċ bejn l-Istati Membri. Il-Kummissjoni tosserva li l-limiti stabbiliti fil-punt 68 tal-Linji Gwida dwar l-Għajnuna Reġjonali ma jinqabżux f’dan il-każ, jiġifieri ma hemmx bżonn li ssir verifika ddettaljata fl-applikazzjoni tal-Komunikazzjoni mill-Kummissjoni rigward il-kriterji għal valutazzjoni fil-fond tal-għajnuna reġjonali għal proġetti kbar ta’ investiment (53) (minn hawn ‘il quddiem imsejħa “IDAC”). Minkejja dan, il-Kummissjoni trid turi li l-kontribuzzjoni li saret mill-għajnuna għall-investimenti reġjonali tisboq kwalunkwe impatt avvers potenzjali fuq il-kummerċ u l-kompetizzjoni.

(196)

Il-Kummissjoni ssib li ġew issodisfati r-rekwiżiti f’termini tal-effett ta’ inċentiv imsemmi fil-punt 38 tal-Linji Gwida dwar l-Għajnuna Reġjonali. Il-Kummissjoni ssib ukoll li l-Qorti kkonfermat li l-Kummissjoni tista’ tirreferi għall-fatt li għadda ż-żmien bħala l-bażi għall-valutazzjoni tal-effett ta’ inċentiv (54). Għalhekk, il-Kummissjoni hija tal-fehma li l-għajnuna kellha effett ta’ inċentiv fuq l-investiment u kebbset il-kontribuzzjoni pożittiva tagħha lejn it-tkabbir fiż-żona assistita inkwistjoni.

(197)

Il-Linji Gwida dwar l-Għajnuna Reġjonali jistipulaw li l-għajnuna reġjonali jista’ biss ikollha rwol effettiv jekk tintuża darba kultant u b’mod proporzjonat u jekk tkun ikkonċentrata fuq l-aktar reġjuni żvantaġġati tal-Unjoni Ewropea. B’mod partikolari, il-limiti massimi permissibbli tal-għajnuna għandhom jirriflettu s-serjetà relattiva tal-problemi li jolqtu l-iżvilupp tar-reġjuni kkonċernati. Barra minn hekk, il-vantaġġi tal-għajnuna f’termini tal-iżvilupp ta’ reġjun żvantaġġat iridu jisbqu d-distorsjonijiet tal-kompetizzjoni li jirriżultaw.

(198)

It-TFUE jippermetti lill-Kummissjoni taċċetta distorsjonijiet tal-kompetizzjoni u effetti fuq il-kummerċ sabiex tippromwovi l-iżvilupp reġjonali ta’ reġjuni eliġibbli skont l-Artikolu 107(3)(a) TFUE. L-importanza askritta għall-effett pożittiv tal-investiment assistit hija akbar fil-każ ta’ reġjuni ferm żvantaġġati skont it-tifsira tal-Artikolu 107(3)(a) TFUE milli f’reġjuni li jaqgħu taħt l-Artikolu 107(3)(c) TFUE.

(199)

L-intensità massima tal-għajnuna applikabbli għall-proġett (12,30 % EGħG) kienet anqas mill-ispeċifikazzjonijiet għat-tnaqqis tal-limitu massimu standard tal-għajnuna reġjonali skont il-punt 67 tal-Linji Gwida dwar l-Għajnuna Reġjonali u ma taqbiżx il-limitu massimu applikabbli tal-għajnuna reġjonali. Għalhekk, tista’ titqies proporzjonali għall-iżvantaġġi li jridu jiġu rkuprati fir-reġjun ta’ Brandenburg, li kkwalifika għal għajnuna reġjonali skont l-Artikolu 107(3)(a) TFUE fiż-żmien materjali.

(200)

Peress li nstab li l-għajnuna għandha effett ta’ inċentiv għall-investiment fir-reġjun ikkonċernat u li hija proporzjonata, l-effetti pożittivi u negattivi tal-għajnuna jridu jiġu ponderati.

(201)

Billi ħoloq 150 impjieg dirett u 450 impjieg indirett u espanda l-bażi industrijali tar-reġjun ikkonċernat, l-investiment assistit jikkontribwixxi għall-iżvilupp reġjonali ta’ reġjun li kkwalifika għall-għajnuna reġjonali skont l-Artikolu 107(3)(a) TFUE. Il-Kummissjoni ssib li l-ammont fl-għajnuna għal kull impjieg maħluq (madwar EUR 3 00  000 għal kull impjieg dirett maħluq, iżda EUR 75  000 biss għal kull impjieg dirett u indirett maħluq), meta mqabbel ma’ każijiet simili ta’ għajnuna reġjonali għal investimenti ta’ kapital intensiv fl-industrija tal-karta soġġett għall-istess limitu massimu standard ta’ 30 % (55) għall-għajnuna reġjonali mhuwiex eċċessiv.

(202)

L-għajnuna mhijiex ser toħloq pożizzjoni dominanti ġdida fis-suq jew issaħħaħ xi waħda eżistenti għall-benefiċjarju tal-għajnuna u l-impatt tal-kapaċità maħluqa mill-investiment huwa limitat għas-swieq tal-prodotti rilevanti. Ma kien hemm ebda raġuni għaliex meta adottat id-deċiżjonijiet dwar l-investiment u l-għajnuna, il-Kummissjoni għandha ssib jew tistenna li dawn is-swieq kienu ser ibatu minn kapaċità strutturali żejda ladarba jitlesta l-investiment.

(203)

Peress li l-għajnuna tikkonforma mal-limitu massimu għall-intensità tal-għajnuna mnaqqsa għall-proġetti ta’ investiment kbar biex tibqa’ konformi mal-Linji Gwida dwar l-Għajnuna Reġjonali u mal-mappa approvata tal-għajnuna reġjonali għall-Ġermanja għall-perjodu bejn l-2007 u l-2013, il-Kummissjoni tieħu l-pożizzjoni li l-għajnuna ma taffettwax il-kummerċ tant li tkun inkompatibbli mas-suq intern. B’mod partikolari, il-Kummissjoni tosserva li ma kien hemm xejn fil-kummenti rċevuti matul il-proċedura ta’ investigazzjoni formali li jissuġġerixxi li, mingħajr l-għajnuna, il-proġett ta’ investiment kien jiġi implimentat f’reġjun ieħor tal-Unjoni Ewropea fejn kien japplika limitu massimu ogħla jew ekwivalenti tal-għajnuna. Barra minn hekk, ma hemm xejn x’jissuġġerixxi li l-għajnuna ġiegħlet lil Propapier tieħu l-attivitajiet kummerċjali tagħha f’reġjuni oħrajn jew tagħlaq siti f’reġjuni oħrajn f’sitwazzjoni soċjoekonomika paragunabbli jew agħar miż-żona assistita fejn Propapier implimentat l-investiment.

(204)

Finalment, il-Kummissjoni tinnota li l-Ġermanja wriet li l-proġett ta’ Propapier PM2 qiegħda jgħin sabiex jintlaħaq l-objettiv (ta’ interess ġenerali) ta’ koeżjoni u ġie implimentat fil-qafas ta’ strateġija koerenti ta’ żvilupp reġjonali. L-investiment assistit jagħmel kontribuzzjoni siewja għat-titjib tas-sitwazzjoni soċjoekonomika u għat-tkabbir fir-reġjun ikkonċernat, speċjalment fid-dawl tal-impatt tiegħu fuq l-impjiegi, id-dħul u l-espansjoni tal-bażi industrijali. Minħabba t-tip u d-daqs tal-proġett, il-Kummissjoni tqis li l-għajnuna mhijiex qiegħda tikkaġuna tfixkil inaċċettabbli tal-kompetizzjoni jew effetti fuq il-kummerċ.

(205)

Fid-dawl ta’ dan li ntqal hawn fuq, il-Kummissjoni ssib li l-vantaġġi tal-miżura ta’ għajnuna jisbqu d-distorsjonijiet tal-kompetizzjoni u l-effetti fuq il-kummerċ bejn l-Istati Membri.