EUR-Lex Access to European Union law
This document is an excerpt from the EUR-Lex website
Document 32014D0150
2014/150/EU: Commission Implementing Decision of 18 March 2014 on the organisation of a temporary experiment providing for certain derogations for the marketing of populations of the plant species wheat, barley, oats and maize pursuant to Council Directive 66/402/EEC (notified under document C(2014) 1681) Text with EEA relevance
2014/150/UE: Deċiżjoni ta’ Implimentazzjoni tal-Kummissjoni tat- 18 ta’ Marzu 2014 dwar l-organizzazzjoni ta’ esperiment temporanju li jistipula ċerti derogi għall-kummerċjalizzazzjoni ta’ popolazzjonijiet tal-ispeċijiet tal-pjanti qamħ, xgħir, ħafur u qamħirrum skont id-Direttiva tal-Kunsill 66/402/KEE (notifikata bid-dokument C(2014) 1681) Test b’relevanza għaż-ŻEE
2014/150/UE: Deċiżjoni ta’ Implimentazzjoni tal-Kummissjoni tat- 18 ta’ Marzu 2014 dwar l-organizzazzjoni ta’ esperiment temporanju li jistipula ċerti derogi għall-kummerċjalizzazzjoni ta’ popolazzjonijiet tal-ispeċijiet tal-pjanti qamħ, xgħir, ħafur u qamħirrum skont id-Direttiva tal-Kunsill 66/402/KEE (notifikata bid-dokument C(2014) 1681) Test b’relevanza għaż-ŻEE
ĠU L 82, 20.3.2014, p. 29–36
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
No longer in force, Date of end of validity: 28/02/2021: This act has been changed. Current consolidated version: 12/10/2018
Relation | Act | Comment | Subdivision concerned | From | To |
---|---|---|---|---|---|
Modified by | 32018D1519 | Sostituzzjoni | artikolu 3 paragrafu 1 Test | 11/10/2018 | |
Modified by | 32018D1519 | Sostituzzjoni | artikolu 19 Test | 11/10/2018 | |
Validity extended by | 32018D1519 | 11/10/2018 | 28/02/2021 |
20.3.2014 |
MT |
Il-Ġurnal Uffiċjali tal-Unjoni Ewropea |
L 82/29 |
DEĊIŻJONI TA’ IMPLIMENTAZZJONI TAL-KUMMISSJONI
tat-18 ta’ Marzu 2014
dwar l-organizzazzjoni ta’ esperiment temporanju li jistipula ċerti derogi għall-kummerċjalizzazzjoni ta’ popolazzjonijiet tal-ispeċijiet tal-pjanti qamħ, xgħir, ħafur u qamħirrum skont id-Direttiva tal-Kunsill 66/402/KEE
(notifikata bid-dokument C(2014) 1681)
(Test b’relevanza għaż-ŻEE)
(2014/150/UE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Direttiva tal-Kunsill 66/402/KEE tal-14 ta’ Ġunju 1966 dwar il-marketing taż-żerriegħa tal-ġwież (1), u b’mod partikolari l-Artikolu 13a tagħha,
Billi:
(1) |
Id-Direttiva 66/402/KEE tistabbilixxi rekwiżiti speċifiċi għall-produzzjoni u l-kummerċjalizzazzjoni taż-żerriegħa taċ-ċereali. Dawk id-dispożizzjonijiet jipprevjenu l-kummerċjalizzazzjoni ta’ żerriegħa li ma tiffurmax parti minn varjetà. |
(2) |
Madanakollu, riċerka ġdida fl-Unjoni dwar materjal riproduttiv tal-pjanti li ma jissodisfax d-definizzjoni tal-varjetà fir-rigward tal-uniformità, turi li jista’ jkun hemm benefiċċji jekk jintuża dan il-materjal divers, partikolarment fir-rigward tal-produzzjoni organika jew fl-agrikoltura b’kontribut żgħir (low input agriculture), pereżempju biex jitnaqqas it-tixrid tal-mard. |
(3) |
Biex jippermettu li żerriegħa minn dawk il-popolazzjonijiet tiġi kummerċjalizzata, ikun meħtieġ li jiġu emendati l-punti E., F. u G. tal-Artikolu 2(1) tad-Direttiva 66/402/KEE billi tiżdied il-possibbiltà li tiġi kummerċjalizzata żerriegħa li ma tissodisfax ir-rekwiżiti li jikkonċernaw aspetti varjetali. Sabiex tittieħed deċiżjoni dwar tali emenda għad-Direttiva 66/402/KEE, huwa meħtieġ li tinġabar informazzjoni dwar il-kummerċjalizzazzjoni ta’ żerriegħa minn popolazzjonijiet. B’mod partikolari, jeħtieġ li jkun ivverifikat jekk l-identifikazzjoni ta’ popolazzjonijiet ta’ speċijiet partikolari tistax tiġi żgurata, b’garanziji simili għal dawk li jirriżultaw mir-rekwiżiti li jikkonċernaw aspetti varjetali, abbażi ta’ informazzjoni dwar metodi għat-tnissil u għall-produzzjoni tagħhom. Barra minn hekk, għandu jiġi evalwat, f’dan l-esperiment, jekk l-identità taż-żerriegħa kummerċjalizzata bħala parti minn dawk il-popolazzjonijiet u l-informazzjoni lill-utent jistgħux jiġu żgurati, b’garanziji simili għal dawk li jirriżultaw mill-Artikoli 3(1) u 10, abbażi tar-rekwiżiti dwar it-traċċabbiltà u l-identifikazzjoni tal-postijiet ta’ produzzjoni. |
(4) |
Minħabba l-karatteristiċi ta’ popolazzjonijiet, iċ-ċertifikazzjoni ta’ żerriegħa minn popolazzjonijiet tista’ timplika piż sproporzjonat għall-awtoritajiet u għall-operaturi. Għaldaqstant, huwa xieraq li tinġabar informazzjoni dwar il-possibbiltà li tkun stipulata sistema ta’ kontrolli tal-produzzjoni u l-kummerċjalizzazzjoni ta’ żerriegħa ta’ popolazzjonijiet li ma jeħtiġux ċertifikazzjoni. |
(5) |
Fid-dawl tal-importanza tagħhom għas-settur tas-suq ta’ ċereali, u fid-dawl tar-riżultati disponibbli tar-riċerka, l-ispeċijiet soġġetti għal dan l-esperiment għandhom ikunu l-qamħ, ix-xgħir, il-ħafur u l-qamħirrum. |
(6) |
Sabiex tkun iċċarata n-natura ta’ popolazzjonijiet meta mqabbla ma’ varjetajiet, jeħtieġ li jiġi stabbilit rekwiżit dwar l-għadd ta’ varjetajiet użati fit-taħlit biex titnissel popolazzjoni. |
(7) |
Il-korpi uffiċjali responsabbli għandhom jimmonitorjaw dan l-esperiment permezz ta’ kontrolli uffiċjali dwar il-produzzjoni u l-kummerċjalizzazzjoni ta’ żerriegħa minn popolazzjonijiet u l-kwantitajiet tagħhom, il-persuni li jżommu dawk il-popolazzjonijiet u l-prestazzjoni ta’ dawk il-popolazzjonijiet f’żoni speċifiċi. |
(8) |
Għandhom jiġu stabbiliti l-kundizzjonijiet għat-tressiq tal-applikazzjonijiet u l-awtorizzazzjoni ta’ popolazzjoni skont din id-Deċiżjoni, is-sottomissjoni ta’ kampjun ta’ referenza, id-denominazzjoni tal-popolazzjoni, u r-reġistrazzjoni ta’ persuni li jipproduċu u jikkummerċjalizzaw dawk il-popolazzjonijiet. Huwa importanti li dawk il-kundizzjonijiet jiġu vvalutati biex jiġu żgurati l-identità u t-traċċabbiltà matul il-produzzjoni u l-kummerċjalizzazzjoni ta’ tali popolazzjonijiet, kontrolli effettivi mill-korpi uffiċjali responsabbli, u l-evitar tal-ħolqien ta’ suq parallel ma’ dak stabbilit skont id-Direttiva 66/402/KEE. |
(9) |
Barra minn hekk, huwa xieraq li jiġu stipulati rekwiżiti speċifiċi għall-produzzjoni u l-kummerċjalizzazzjoni sabiex ikun żgurat li ż-żrieragħ minn popolazzjonijiet jissodisfaw l-istess rekwiżiti fl-Istati Membri parteċipanti kollha. Dawn ir-rekwiżiti għandhom ikunu bbażati fuq il-kundizzjonijiet stabbiliti f’din id-Deċiżjoni. Sabiex tiġi żgurata s-saħħa u l-kwalità taż-żerriegħa, dawk ir-rekwiżiti għandhom ikunu simili għal dawk stabbiliti għal żerriegħa ċertifikata fid-Direttiva 66/402/KEE sabiex ikun żgurat livell komparabbli ta’ kwalità. |
(10) |
Minħabba n-natura sperimentali tal-miżura stipulata f’din id-Deċiżjoni, għandha tiġi ffissata kwantità massima għall-kummerċjalizzazzjoni ta’ popolazzjonijiet ta’ żerriegħa, b’mod li titqies il-ħtieġa li jiġu ttestjati taħlitiet differenti bl-użu tal-faċilitajiet eżistenti. Il-kwantità għandha tkun tali li tippermetti riżultati affidabbli u rappreżentattivi tal-esperiment. Madanakollu, din ma għandhiex taqbeż ċertu limitu, sabiex ikun prevenut l-iżvilupp ta’ suq taż-żerriegħa parallel ma’ dak stabbilit skont id-Direttiva 66/402/KEE. |
(11) |
Sabiex jiżguraw it-trasparenza u għażliet infurmati għall-utenti ta’ dawk il-popolazzjonijiet, u biex jiġu prevenuti prattiċi qarrieqa, għandhom jiġu adottati kundizzjonijiet speċjali dwar l-ittikkettar għall-kummerċjalizzazzjoni ta’ żerriegħa minn dawn il-popolazzjonijiet waqt dak l-esperiment. Minħabba n-natura speċjali tal-popolazzjonijiet, dawk il-kundizzjonijiet għandhom jidderogaw mid-dispożizzjonijiet tal-Anness V tad-Direttiva 66/402/KEE. Għandu jiġi ttestjat jekk tistax tiġi żgurata biżżejjed informazzjoni xierqa lill-utent tal-materjal mir-rekwiżiti li d-denominazzjoni ta’ popolazzjonijiet tindika b’mod ċar li huma popolazzjonijiet, u li t-tikketta tindika r-reġjun tal-produzzjoni. |
(12) |
Sabiex ikun determinat il-valur ekonomiku, agronomiku u ambjentali tal-alternattivi mtejba għad-dispożizzjonijiet tad–Direttiva 66/402/KEE imsemmijin hawn fuq, huwa importanti li tiġi żgurata valutazzjoni komprensiva ta’ għadd ta’ elementi u riżultati ta’ dak l-esperiment. Għal dak l-għan l-Istati Membri għandhom jirreġistraw l-informazzjoni xierqa, jiġifieri l-ispeċijiet u d-denominazzjonijiet użati għall-popolazzjonijiet li fuqhom ikun qed isir l-esperiment, it-tip ta’ popolazzjonijiet, il-modalitajiet u l-ispejjeż tal-awtorizzazzjoni tal-popolazzjonijiet, ir-riżultati tat-testijiet, ir-riżultati tal-prestazzjoni, id-daqs tal-operaturi involuti, it-tip ta’ utenti u l-esperjenza tagħhom. |
(13) |
Sabiex jippermettu lill-Istati Membri jivverifikaw li l-kwantità massima ta’ żerriegħa minn popolazzjonijiet ma tinqabiżx, l-operaturi li beħsiebhom jipproduċu tali popolazzjonijiet għandhom jikkomunikaw lill-Istati Membri kkonċernati l-kwantitajiet li beħsiebhom jipproduċu. |
(14) |
Sabiex jippermetti li l-fornituri jipproduċu u jikkummerċjalizzaw kwantità kbira biżżejjed ta’ żerriegħa, u biex jagħmilha possibbli għall-awtoritajiet kompetenti li jispezzjonaw dak il-materjal u jiġbru biżżejjed informazzjoni komparabbli biex tintuża għat-tħejjija tar-rapport, l-esperiment għandu jsir tul perjodu ta’ mill-inqas tliet staġuni kummerċjali. |
(15) |
Il-miżuri stipulati f’din id-Deċiżjoni jikkonformaw mal-opinjoni tal-Kumitat Permanenti dwar iż-Żerriegħa u l-Materjal Propagattiv għall-Agrikultura, l-Ortikultura u l-Forestrija, |
ADOTTAT DIN ID-DEĊIŻJONI:
Artikolu 1
Suġġett
1. Jiġi organizzat esperiment temporanju fil-livell tal-Unjoni bl-għan li jiġi vvalutat jekk il-produzzjoni, bil-ħsieb tal-kummerċjalizzazzjoni, u l-kummerċjalizzazzjoni, taħt ċerti kundizzjonijiet, ta’ żerriegħa minn popolazzjonijiet, kif imsemmija fl-Artikolu 2 u li tappartieni għall-ispeċijiet Avena spp., Hordeum spp., Triticum spp. u Zea mays L., jistgħux jikkostitwixxu alternattivi mtejba għall-esklużjoni tal-kummerċjalizzazzjoni ta’ żerriegħa li ma tikkonformax mar-rekwiżiti tal-Artikolu 2(1)(E), (F) u (G) tad-Direttiva 66/402/KEE dwar aspetti varjetali taż-żerriegħa ta’ ċerti speċi, u għar-rekwiżiti tal-Artikolu 3(1) dwar il-kummerċjalizzazzjoni b’ċertifikazzjoni uffiċjali bħala “żerriegħa ċċertifikata”, “żerriegħa ċċertifikata, l-ewwel ġenerazzjoni” jew “żerriegħa ċċertifikata, it-tieni ġenerazzjoni”.
2. Dawn l-elementi għandhom jiġu vvalutati:
(a) |
jekk l-identifikazzjoni tal-popolazzjonijiet ta’ dawk l-ispeċijiet tistax issir abbażi ta’ informazzjoni dwar metodi għat-tnissil u għall-produzzjoni tagħhom, il-varjetajiet użati fit-taħlit, u l-karatteristiċi ewlenin ta’ dawk il-popolazzjonijiet; kif ukoll |
(b) |
jekk l-identità ta’ żrieragħ minn dawn il-popolazzjonijiet kummerċjalizzati tistax tkun ibbażata fuq ir-rekwiżiti dwar it-traċċabbiltà u l-identifikazzjoni tar-reġjun tal-produzzjoni. |
Artikolu 2
Kamp ta’ applikazzjoni
Din id-Deċiżjoni għandha tkopri gruppi tal-pjanti li jissodisfaw dawn ir-rekwiżiti:
(a) |
jirriżultaw minn kombinament determinat ta’ ġenotipi; |
(b) |
huma kkunsidrati bħala unitajiet fir-rigward ta’ kemm huma adatti biex jiġu riprodotti mingħajr ma jinbidlu ladarba jiġu stabbiliti f’reġjun partikolari tal-produzzjoni b’kundizzjonijiet agroklimatiċi speċifiċi; |
(c) |
huma ġġenerati permezz ta’ waħda mit-tekniki li ġejjin:
|
Minn hawn ‘il quddiem tali grupp ta’ xitel jissejħu “popolazzjonijiet”.
Artikolu 3
Il-parteċipazzjoni tal-Istati Membri
1. Kull Stat Membru jista’ jipparteċipa fl-esperiment. L-aħħar data li fiha jistgħu jibdew jieħdu sehem hija Jannar tal-2017.
2. L-Istati Membri li jiddeċiedu li jieħdu sehem fl-esperiment (minn hawn’ il quddiem: “Stati Membri parteċipanti”) għandhom jinfurmaw lill-Kummissjoni u lill-Istati Membri l-oħra dwar il-parteċipazzjoni tagħhom, u jindikaw l-ispeċijiet u r-reġjuni koperti bil-parteċipazzjoni tagħhom, kif ukoll il-miżuri applikati skont din id-Deċiżjoni.
3. L-Istati Membri jistgħu jtemmu l-parteċipazzjoni tagħhom f’kull mument billi jinfurmaw lill-Kummissjoni.
Artikolu 4
Ħelsien mill-obbligi
L-Istati Membri parteċipanti huma meħlusa mill-obbligi stipulati fl-Artikolu 2(1) (E), (F) u (G), fl-Artikolu 3(1) u fl-Artikolu 10 tad-Direttiva 66/402/KEE, fir-rigward tal-produzzjoni, bil-ħsieb ta-kummerċjalizzazzjoni, u l-kummerċjalizzazzjoni ta’ popolazzjonijiet.
Artikolu 5
Identifikazzjoni tal-popolazzjonijiet
Popolazzjoni għandha tkun identifikabbli abbażi tal-elementi li ġejjin:
(a) |
il-varjetajiet użati fit-taħlit għall-ħolqien tal-popolazzjoni; |
(b) |
l-iskemi tat-tnissil kif definiti permezz tal-protokolli rispettivi; |
(c) |
ir-reġjun tal-produzzjoni; |
(d) |
il-grad ta’ eteroġenejtà, b’mod partikolari fi speċijiet li jdakkru lilhom infushom; kif ukoll |
(e) |
il-karatteristiki tagħha, kif imsemmija fl-Artikolu 7(2)(f). |
Artikolu 6
Kundizzjonijiet għall-produzzjoni u l-kummerċjalizzazzjoni tal-popolazzjonijiet
Għall-finijiet ta’ dan l-esperiment, l-Istati Membri għandhom jiżguraw li ż-żerriegħa tal-popolazzjoni tista’ tiġi prodotta, bil-ħsieb li tiġi kummerċjalizzata, u kummerċjalizzata jekk jiġu ssodisfati l-kundizzjonijiet li ġejjin:
(a) |
iż-żerriegħa tkun tagħmel parti minn popolazzjoni awtorizzata; |
(b) |
iż-żerriegħa tkun konformi mal-Artikolu 9; |
(c) |
id-denominazzjoni tal-popolazzjoni tikkonforma mal-Artikolu 8; |
(d) |
il-popolazzjoni titnissel u ż-żerriegħa hija prodotta minn persuni reġistrati skont l-Artikolu 10. |
Artikolu 7
Awtorizzazzjoni tal-popolazzjonijiet
1. L-Istati Membri għandhom jawtorizzaw il-popolazzjonijiet skont il-paragrafi 2, 3 u 4.
2. Għandha titressaq applikazzjoni għal awtorizzazzjoni lill-awtorità ta’ ċertifikazzjoni taż-żrieragħ. Dik l-applikazzjoni għandha tinkludi l-elementi li ġejjin:
(a) |
l-isem u l-indirizz tal-applikant; |
(b) |
l-ispeċi u d-denominazzjoni tal-popolazzjoni; |
(c) |
deskrizzjoni tat-tip ta’ teknika użata biex tiġi ġġenerata l-popolazzjoni, b’referenza, kif japplika, għall-Artikolu 2(c)(i), (ii) jew (iii); |
(d) |
l-għanijiet tal-programm ta’ tnissil; |
(e) |
il-metodu ta’ tnissil u produzzjoni: skema ta’ tnissil kif definita mill-protokolli rispettivi, il-varjetajiet użati biex titnissel u tiġi prodotta l-popolazzjoni, u programmi tal-kontroll tal-produzzjoni proprji użati mill-operatur inkwistjoni; |
(f) |
deskrizzjoni tal-karatteristiki tagħha:
|
(g) |
ir-reġjun tal-produzzjoni; |
(h) |
dikjarazzjoni tal-applikant dwar il-verità tal-elementi msemmija fl-Artikolu 5(1); |
(i) |
kampjun rappreżentattiv tal-popolazzjoni; |
(j) |
l-isem u l-indirizz tal-persuna responsabbli għat-tnissil, il-produzzjoni u ż-żamma. |
3. L-awtorità ta’ ċertifikazzjoni taż-żrieragħ għandha tivverifika l-elementi li ġejjin:
(a) |
il-konformità tal-applikazzjoni mal-paragrafu 2; kif ukoll |
(b) |
il-konformità tal-popolazzjoni mar-rekwiżiti ta’ identifikazzjoni tal-Artikolu 5. |
Il-konformità mar-rekwiżiti ta’ identifikazzjoni tal-Artikolu 5 għandha tiġi konkluża abbażi tad-dokumentazzjoni mressqa u l-ispezzjonijiet imwettqa fil-post fejn tiġi prodotta l-popolazzjoni.
4. L-awtorizzazzjoni ta’ popolazzjoni, u l-elementi stabbiliti fil-paragrafu 2, għandhom jiġu nnotifikati lill-Istati Membri l-oħra u lill-Kummissjoni.
Artikolu 8
Denominazzjoni tal-popolazzjonijiet
1. Il-popolazzjonijiet għandu jkollhom denominazzjoni. Ir-regoli dwar id-denominazzjoni tal-varjetajiet, kif stabbilit fl-Artikolu 9(6) tad-Direttiva tal-Kunsill 2002/53/KE (2), għandhom japplikaw għad-denominazzjoni ta’ popolazzjonijiet.
2. Il-kelma “popolazzjoni” għandha tiżdied fl-aħħar ta’ kull denominazzjoni.
Artikolu 9
Rekwiżiti fir-rigward tal-għelejjel, iż-żerriegħa u l-piżijiet ta’ lottijiet u kampjuni
1. Għandhom japplikaw il-punti 1 u 6 tal-Anness I tad-Direttiva 66/402/KEE.
2. Matul il-produzzjoni u l-kummerċjalizzazzjoni ta’ żerriegħa li tagħmel parti minn popolazzjonijiet, iż-żerriegħa għandha tikkonforma mal-punti 2 u 3 tal-Anness II tad-Direttiva 66/402/KEE fir-rigward tat-tieni ġenerazzjoni ta’ żerriegħa ċċertifikata fil-każ ta’ popolazzjonijiet ta’ Avena nuda L., Avena sativa L., Avena strigosa Schreb., Hordeum vulgare L., Triticum aestivum L., Triticum durum L. u Triticum spelta L. u żerriegħa ċertifikata fil-każ ta’ popolazzjonijiet ta’ Zea mays L.
3. Matul il-produzzjoni u l-kummerċjalizzazzjoni ta’ żerriegħa li tagħmel parti minn popolazzjonijiet, il-piżijiet ta’ lottijiet u kampjuni għandhom jikkonformaw mal-Anness III tad-Direttiva 66/402/KEE, u, fil-każ taż-Zea mays L., mad-dispożizzjonijiet ta’ dak l-Anness fir-rigward taż-żerriegħa ċċertifikata ta’ dik l-ispeċi.
Artikolu 10
Ir-reġistrazzjoni ta’ nissiela, produtturi u dawk responsabbli għaż-żamma tal-popolazzjonijiet
1. Kull Stat Membru għandu jniżżel f’reġistru l-persuni li jnisslu l-popolazzjonijiet jew jipproduċu jew iżommu żerriegħa ta’ popolazzjonijiet fit-territorju tiegħu, dejjem jekk jikkonformaw mar-rekwiżiti tal-paragrafu 2.
2. In-nissiela, il-produtturi u dawk responsabbli għaż-żamma tal-popolazzjonijiet għandhom iressqu applikazzjoni lill-awtorità ta’ ċertifikazzjoni taż-żrieragħ għall-inklużjoni tagħhom fir-reġistru. Dik l-applikazzjoni għandha tinkludi dawn l-elementi:
(a) |
isimhom, l-indirizz tagħhom u d-dettalji ta’ kuntatt; |
(b) |
id-denominazzjoni tal-popolazzjoni inkwistjoni. |
3. Ir-reġistru għandu jkun fih dawn l-elementi:
(a) |
l-isem, l-indirizz u d-dettalji ta’ kuntatt kif stabbilit fil-paragrafu 2(a); |
(b) |
id-denominazzjoni tal-popolazzjoni msemmija fil-paragrafu 2(b) li għandha tiġi prodotta jew miżmuma. |
Artikolu 11
It-tikkettar
Pakketti jew kontenituri ta’ żerriegħa għandu jkollhom tikketta li titwaħħal mill-produttur. Dak it-tabella għandha tinkludi l-informazzjoni stabbilita fl-Anness I.
Artikolu 12
Restrizzjonijiet kwantitattivi
1. Il-kwantitajiet ta’ żerriegħa kummerċjalizzata tal-popolazzjoni awtorizzata ta’ kull speċi, għal kull Stat Membru parteċipant għal kull sena, ma għandhomx jaqbżu ż-0,1 % ta’ żerriegħa tal-istess speċi prodotta f’dik is-sena fl-Istat Membru parteċipant:
2. Kull produttur għandu jiddikjara lill-awtorità ta’ ċertifikazzjoni taż-żerriegħa l-kwantità ta’ kull popolazzjoni li beħsiebu jipproduċi għal kull sena.
3. Stat Membru parteċipant jista’ jipprojbixxi l-kummerċjalizzazzjoni ta’ żerriegħa ta’ popolazzjoni jekk iqis li, fid-dawl tal-għan tal-esperiment, mhux xieraq li jiġu kummerċjalizzati kwantitajiet addizzjonali taż-żerriegħa inkwistjoni. Dan għandu jinforma mill-ewwel lill-produttur jew produtturi inkwistjoni.
Artikolu 13
Traċċabbiltà
1. Kull persuna li tikkummerċjalizza żrieragħ ta’ popolazzjonijiet għandha tiżgura t-traċċabbiltà ta’ dawk iż-żrieragħ.
2. Persuna li tikkummerċjalizza żrieragħ ta’ popolazzjonijiet għandha kont tal-informazzjoni li tippermettilha tidentifika l-persuni li jkunu fornewhom, u li lilhom ikunu fornew, biż-żrieragħ ta’ popolazzjoni.
3. L-informazzjoni għandha tkun disponibbli meta titlobha l-awtorità ta’ ċertifikazzjoni taż-żrieragħ.
Artikolu 14
Kontrolli uffiċjali
L-awtoritajiet ta’ ċertifikazzjoni taż-żerriegħa tal-Istati Membri parteċipanti għandhom uffiċjalment jikkontrollaw il-produzzjoni u l-kummerċjalizzazzjoni taż-żrieragħ ta’ popolazzjonijiet. Il-kontrolli uffiċjali għandhom jinkludu minn tal-inqas:
(a) |
l-ispezzjoni fuq il-post, it-teħid ta’ kampjuni u l-kontrolli ta’ popolazzjonijiet, kif stabbilit fil-punt (1) tal-Anness II; |
(b) |
is-superviżjoni ta’ organizzazzjoni ta’ provi komparattivi fuq il-post għal dan l-għan, kif stipulat fil-punt (2) tal-Anness II; |
(c) |
il-kwantitajiet prodotti u l-kwantitajiet kummerċjalizzati; |
(d) |
il-konformità tal-produttur u kwalunkwe persuna li tikkummerċjalizza ż-żerriegħa skont din id-Deċiżjoni. |
Il-kontroll imsemmi fil-punt (d) għandu jsir minn tal-inqas darba fis-sena. Dan għandu jinkludi spezzjonijiet tal-proprjetajiet tal-persuni inkwistjoni u tar-raba’ użat għall-produzzjoni tal-popolazzjonijiet.
Artikolu 15
Iż-żamma tal-popolazzjonijiet
1. Il-persuna responsabbli għaż-żamma tal-popolazzjoni għandha żżomm il-popolazzjoni għat-tul ta’ dan l-esperiment.
Iż-żamma għandha tkun skont il-prattiċi aċċettati għall-ispeċijiet inkwistjoni.
2. Il-persuna responsabbli għaż-żamma tal-popolazzjoni għandu jkollha reġistri fir-rigward taż-żamma tal-popolazzjonijiet, u tagħmel dawk ir-reġistri disponibbli għall-ispezzjoni mill-korp uffiċjali responsabbli fi kwalunkwe żmien.
3. Il-korp uffiċjali responsabbli għandu jwettaq kontrollital-mod li bih jinżammu l-popolazzjonijiet, u jista’, għal dan l-għan, jieħu kampjuni taż-żerriegħa tal-popolazzjonijiet inkwistjoni.
Artikolu 16
Obbligi ta’ notifika tal-produtturi
Il-produtturi għandhom jinnotifikaw kull sena lill-awtoritajiet ta’ ċertifikazzjoni taż-żerriegħa bl-informazzjoni stabbilita fil-punti (a), (b), (c), (f), (g), (h) u (i) tal-Anness III.
Artikolu 17
Ir-reġistrazzjoni tal-informazzjoni
L-Istati Membri parteċipanti għandhom jirreġistraw l-informazzjoni, kif indikat fl-Anness III, fir-rigward tal-produzzjoni u l-kummerċjalizzazzjoni ta’ popolazzjonijiet. Fuq talba, l-Istati Membri għandhom jassistu lil xulxin fir-reġistrazzjoni ta’ dik l-informazzjoni.
Artikolu 18
Obbligi ta’ rappurtar
1. L-Istati Membri parteċipanti għandhom jippreżentaw lill-Kummissjoni u lill-Istati Membri l-oħra, għal kull sena u sal-31 ta’ Marzu tas-sena ta’ wara, rapport annwali li jinkludi l-elementi li ġejjin:
(a) |
informazzjoni dwar it-tipi u l-għadd ta’ popolazzjonijiet awtorizzati għal kull speċi, prodotti u kummerċjalizzati fil-qafas tal-esperiment; kif ukoll |
(b) |
il-kwantitajiet prodotti u kummerċjalizzati għal kull popolazzjoni u speċi, u, fejn ikun applikabbli, l-Istat Membru li għalih kienet maħsuba ż-żerriegħa. |
L-Istati Membri parteċipanti jistgħu jiddeċiedu li jinkludu fir-rapport kwalunkwe informazzjoni relevanti oħra.
2. L-Istati Membri parteċipanti għandhom jippreżentaw lill-Kummissjoni u lill-Istati Membri l-oħra, sal-31 ta’ Marzu 2018, rapport li jistabbilixxi l-informazzjoni msemmija fl-Anness III. Dak ir-rapport għandu jinkludi valutazzjoni tal-kundizzjonijiet tal-esperiment u tal-interess tat-tiġdid taż-żmien tiegħu, jekk dan ikun f’loku, b’referenza għal kull speċi. Ir-rapport jista’ jinkludi informazzjoni oħra li l-Istati Membru jqis rilevanti fid-dawl tal-iskop tal-esperiment.
3. Stat Membru li jtemm il-parteċipazzjoni tiegħu qabel il-31 ta’ Diċembru 2017 għandu jressaq ir-rapport tiegħu sal-31 ta’ Marzu tas-sena li tiġi wara t-tmiem tal-parteċipazzjoni tiegħu.
Artikolu 19
Il-perjodu taż-żmien
L-esperiment għandu jibda fl-1 ta’ Marzu 2014 u jintemm fil-31 ta’ Diċembru 2018.
Artikolu 20
Destinatarji
Din id-Deċiżjoni hija indirizzata lill-Istati Membri.
Magħmul fi Brussell, it-18 ta’ Marzu 2014.
Għall-Kummissjoni
Tonio BORG
Membru tal-Kummissjoni
(1) ĠU 125, 11.7.1966, p. 2309/66.
(2) Direttiva tal-Kunsill 2002/53/KE tat-13 ta’ Ġunju 2002 dwar il-varjetajiet komuni ta’ katalgi ta’ speċi ta’ pjanti agrikoli (ĠU L 193, 20.7.2002, p. 1).
ANNESS I
INFORMAZZJONI LI GĦANDHA TITNIŻŻEL FUQ IT-TIKKETTA STIPULATA FL-ARTIKOLU 11
It-tikketta fuq il-pakketti jew il-kontenituri li jkun fihom iż-żrieragħ għandha tinkludi dan li ġej:
(1) |
il-kliem “Esperiment temporanju skont ir-regoli u l-istandards tal-UE”; |
(2) |
l-awtorità taċ-ċertifikazzjoni taż-żrieragħ u l-Istat Membru, jew l-inizjali tagħhom; |
(3) |
l-isem u l-indirizz tal-produttur responsabbli mit-twaħħil tat-tikketta, jew il-kodiċi ta’ reġistrazzjoni tiegħu; |
(4) |
ir-reġjun tal-produzzjoni; |
(5) |
in-numru ta’ referenza tal-lott; |
(6) |
ix-xahar u s-sena tal-issiġillar, miktuba hekk: “issiġillati…” (ix-xahar u s-sena) jew ix-xahar u s-sena ta’ meta ttieħed l-aħħar kampjun uffiċjali għal skopijiet ta’ kontroll, miktuba hekk: “il-kampjun ittieħed …” (ix-xahar u s-sena); |
(7) |
l-ispeċi, indikata minn tal-inqas bl-isem botaniku tagħha, li jista’ jingħata f’forma mqassra u mingħajr l-ismijiet tal-awturi, f’karattri Rumani; |
(8) |
id-denominazzjoni tal-popolazzjoni; |
(9) |
l-Istat Membru tal-produzzjoni, jekk differenti mill-punt 2; |
(10) |
il-piż iddikjarat nett jew gross, jew l-għadd iddikjarat ta’ żrieragħ; |
(11) |
meta jkun indikat il-piż u jintużaw pestiċidi granulati, sustanzi ta’ tgerbib (pelleting), jew addittivi solidi oħrajn, in-natura tal-addittiv kif ukoll il-proporzjon approssimattiv bejn il-piż taż-żerriegħa pura u l-piż totali; |
(12) |
meta minn tal-inqas tkun ġiet ittestjata mill-ġdid il-ġerminazzjoni, id-dikjarazzjoni tal-livell tal-ġerminazzjoni fuq it-tikketta. Din l-informazzjoni tista’ tkun fuq stiker imwaħħla mat-tikketta. |
ANNESS II
IL-KAMPJUNAR U L-KONTROLLI MSEMMIJA FL-ARTIKOLU 14
Għandhom jitwettqu l-kampjunar u l-eżaminazzjoni li ġejjin:
(1) |
Kull sena l-għelieqi tal-produzzjoni għandhom jiġu spezzjonati u għandhom jittieħdu kampjuni aleatorji taż-żrieragħ, ta’ minn tal-inqas 5 % tal-lottijiet kollha taż-żrieragħ tal-popolazzjonijiet u tal-għelieqi tal-produzzjoni li qed isir l-esperiment fuqhom mill-persuni uffiċjali inkarigati mill-kampjunar taż-żrieragħ. Matul l-esperiment temporanju kull għalqa tal-produzzjoni għandha tiġi kkontrollata uffiċjalment minn tal-inqas darbtejn. Dawn il-kampjuni għandhom jintużaw biex jikkontrollaw il-konformità mal-Artikolu 5, f’dak li jikkonċerna l-identità, u mal-Artikolu 9, f’dak li jikkonċerna l-kwalità taż-żerriegħa. |
(2) |
Għandhom jitwettqu provi komparattivi fuq il-post fuq kull popolazzjoni awtorizzata u kkummerċjalizzata fil-qafas tal-esperiment. Il-provi fuq il-post għandhom jitwettqu minn awtoritajiet kompetenti, mill-istituzzjonijiet ta’ riċerka, min-nissiela jew mill-produtturi. Fil-każ tan-nissiela u l-produtturi, l-Istati Membri għandhom jissorveljaw il-provi. |
ANNESS III
INFORMAZZJONI LI GĦANDHA TIĠI RREĠISTRATA KIF IMSEMMI FL-ARTIKOLU 17
Għandha tiġi rreġistrata l-informazzjoni li ġejja:
(a) |
l-isem tal-ispeċi u d-denominazzjoni użata għal kull popolazzjoni awtorizzata fil-qafas tal-esperiment; |
(b) |
it-tip ta’ popolazzjonijiet kif imsemmi fl-Artikolu 2(c); |
(c) |
il-kwantitajiet prodotti u kkummerċjalizzati għal kull popolazzjoni u speċi u l-Istat Membru li għalih kienet maħsuba ż-żerriegħa; |
(d) |
il-modalitajiet ta’ awtorizzazzjoni tal-popolazzjonijiet mill-Istati Membri u l-ispejjeż relatati għall-applikant; |
(e) |
id-deskrizzjoni u r-riżultati tat-testijiet imwettqa skont il-punt (1) tal-Anness II; |
(f) |
ir-riżultati tal-provi komparattivi fuq il-post kif imsemmi fil-punt (2) tal-Anness II; |
(g) |
id-daqs tan-nissiela u tal-produtturi li jkunu qegħdin jipparteċipaw: mikrointrapriża, intrapriża żgħira, intrapriża medja jew intrapriża kbira; |
(h) |
il-valutazzjoni tal-popolazzjonijiet mill-utenti fir-rigward tal-karatteristiċi skont l-Artikolu 7(2)(f). |