26.1.2013   

MT

Il-Ġurnal Uffiċjali tal-Unjoni Ewropea

L 24/740

(1)

Ir-reġjun bijoġeografiku tal-Baħar l-Iswed imsemmi fl-Artikolu 1(c)(iii) tad-Direttiva 92/43/KEE huwa magħmul minn partijiet mit-territorji tal-Unjoni tal-Bulgarija u r-Rumanija, kif speċifikat fil-mappa bijoġeografika approvata fl-20 ta’ April 2005 mill-Kumitat stabbilit bl-Artikolu 20 ta’ dik id-Direttiva, minn issa ’l quddiem imsejjaħ “il-Kumitat dwar il-Ħabitats”.

(2)

Fil-kuntest ta’ proċess li nbeda fl-1995, jeħtieġ li jsir aktar progress fit-twaqqif reali tan-netwerk Natura 2000, li huwa element essenzjali tal-ħarsien tal-bijodiversità fl-Unjoni.

(3)

Il-lista inizjali tas-siti ta’ importanza Komunitarja għar-reġjun bijoġeografiku tal-Baħar l-Iswed, skont it-tifsira tad-Direttiva 92/43/KEE, ġiet adottata bid-Deċiżjoni tal-Kummissjoni 2009/92/KE (2). Abbażi tal-Artikoli 4(4) u 6(1) tad-Direttiva 92/43/KEE, l-Istat Membru kkonċernat għandu jinnomina s-siti inklużi fil-lista tas-siti ta' importanza Komunitarja għar-reġjun bijoġeografiku tal-Baħar l-Iswed bħala żoni speċjali ta' konservazzjoni, malajr kemm jista' jkun u f'perjodu li ma jaqbiżx is-sitt snin, waqt li jistabbilixxi prijoritajiet ta' konservazzjoni u l-miżuri ta' konservazzjoni meħtieġa.

(4)

Il-listi tas-siti ta’ importanza Komunitarja qed jiġu riveduti fil-kuntest tal-adattament dinamiku tan-netwerk Natura 2000. Għalhekk huwa meħtieġ aġġornament tal-lista tas-siti ta' importanza Komunitarja għar-reġjun bijoġeografiku tal-Baħar l-Iswed.

(5)

Min-naħa l-waħda, l-aġġornament tal-lista tas-siti ta’ importanza Komunitarja għar-reġjun bijoġeografiku tal-Baħar l-Iswed huwa meħtieġ sabiex jiġu inklużi s-siti addizzjonali li ġew proposti mill-Istati Membri mill-2010 sal-lum bħala siti ta’ importanza Komunitarja għar-reġjun bijoġeografiku tal-Baħar l-Iswed, skont it-tifsira tal-Artikolu 1 tad-Direttiva 92/43/KEE. Għal dawn is-siti addizzjonali, l-obbligi li jirriżultaw mill-Artikoli 4(4) u 6(1) tad-Direttiva 92/43/KEE għandhom japplikaw malajr kemm jista’ jkun u f'perjodu li ma jaqbiżx is-sitt snin mill-adozzjoni ta’ din id-Deċiżjoni.

(6)

Min-naħa l-oħra, l-aġġornament tal-lista tas-siti ta’ importanza Komunitarja għar-reġjun bijoġeografiku tal-Baħar l-Iswed huwa meħtieġ sabiex jirrifletti kwalunkwe bidla fit-tagħrif li għandu x’jaqsam mas-siti mressqa mill-Istati Membri wara l-adozzjoni tal-lista inizjali tal-Unjoni. F'dak is-sens, il-lista aġġornata tas-siti ta' importanza Komunitarja għar-reġjun bijoġeografiku tal-Baħar l-Iswed tikkostitwixxi verżjoni kkonsolidata tal-lista tas-siti ta' importanza Komunitarja għar-reġjun bijoġeografiku tal-Baħar l-Iswed. Madankollu, wieħed għandu jenfasizza li għal kwalunkwe sit inkluż fid-Deċiżjoni, l-obbligi li jirriżultaw mill-Artikoli 4(4) u 6(1) tad-Direttiva 92/43/KEE għandhom japplikaw kemm jista’ jkun malajr u f'perjodu li ma jaqbiżx is-sitt snin mill-adozzjoni tal-lista tas-siti ta' importanza Komunitarja li fiha s-sit ikun iddaħħal għall-ewwel darba.

(7)

Għar-reġjun bijoġeografiku tal-Baħar l-Iswed, il-listi tas-siti proposti bħala siti ta’ importanza Komunitarja skont it-tifsira tal-Artikolu 1 tad-Direttiva 92/43/KEE ntbagħtu lill-Kummissjoni mill-Istati Membri kkonċernati bejn Marzu 2007 u Ottubru 2011, skont l-Artikolu 4(1) ta’ dik id-Direttiva.

(8)

Il-listi tas-siti proposti kienu akkumpanjati b’informazzjoni dwar kull sit, forniti fil-format stabbilit bid-Deċiżjoni tal-Kummissjoni 97/266/KE tat-18 ta' Diċembru 1996 rigward format ta' informazzjoni dwar is-sit, għas-siti proposti f’Natura 2000 (3).

(9)

Dak it-tagħrif jinkludi l-mappa tas-sit li ntbagħtet mill-Istati Membri kkonċernati, l-isem, il-post u l-firxa tas-sit, u d-dejta li nġabret bl-applikazzjoni tal-kriterji speċifikati fl-Anness III tad-Direttiva 92/43/KEE.

(10)

Abbażi tal-abbozz tal-lista mfassla mill-Kummissjoni bi qbil ma' kull wieħed mill-Istati Membri kkonċernati, li jidentifika wkoll is-siti li għandhom tipi ta' ħabitats naturali ta' prijorità jew speċijiet ta' prijorità, għandha tiġi adottata lista aġġornata tas-siti magħżulin bħala siti ta' importanza Komunitarja għar-reġjun bijoġeografiku tal-Baħar l-Iswed.

(11)

L-għarfien dwar l-eżistenza u t-tqassim tat-tipi ta’ ħabitats naturali u tal-ispeċijiet qiegħed jevolvi kontinwament minħabba s-sorveljanza skont l-Artikolu 11 tad-Direttiva 92/43/KEE. Għalhekk, l-evalwazzjoni u l-għażla tas-siti fil-livell tal-Unjoni saru bl-użu tal-aqwa tagħrif disponibbli bħalissa.

(12)

Uħud mill-Istati Membri ma pproponewwx biżżejjed siti biex jiġu ssodisfati r-rekwiżiti tad-Direttiva 92/43/KEE għal ċerti tipi ta' ħabitats u speċijiet. Għalhekk, għal dawk it-tipi ta’ ħabitats u speċijiet, ma jistax jiġi konkluż li n-netwerk Natura 2000 huwa komplut. Meta wieħed iqis id-dewmien biex jasal it-tagħrif u jintlaħaq qbil mal-Istati Membri, jeħtieġ li tiġi adottata lista aġġornata tas-siti, li se jkun meħtieġ li tiġi riveduta skont l-Artikolu 4 tad-Direttiva 92/43/KEE.

(13)

Ladarba l-għarfien dwar l-eżistenza u t-tqassim ta' xi wħud mit-tipi ta' ħabitats naturali tal-Anness I u tal-ispeċijiet tal-Anness II tad-Direttiva 92/43/KEE għadu mhux komplut, la għandu jiġi konkluż li n-netwerk huwa komplut u anqas li mhuwiex. Il-lista għandha tiġi riveduta, jekk ikun meħtieġ, skont l-Artikolu 4 tad-Direttiva 92/43/KEE.

(14)

Fl-interess taċ-ċarezza u tat-trasparenza, id-Deċiżjoni 2009/92/UE għandha tiġi rrevokata.

(15)

Il-miżuri previsti f’din id-Deċiżjoni huma skont l-opinjoni tal-Kumitat dwar il-Ħabitats,