—

wara li kkunsidra l-kontijiet annwali definittivi tal-Aġenzija Ewropea għas-Saħħa u s-Sigurtà fuq il-Post tax-Xogħol għas-sena finanzjarja 2011,

—

wara li kkunsidra r-rapport tal-Qorti tal-Awdituri dwar il-kontijiet annwali tal-Aġenzija Ewropea għas-Saħħa u s-Sigurtà fuq il-Post tax-Xogħol għas-sena finanzjarja 2011, flimkien mat-tweġibiet tal-Aġenzija (1),

—

wara li kkunsidra r-rakkomandazzjoni tal-Kunsill tat-12 ta’ Frar 2013 (05753/2013 — C7-0041/2013),

—

wara li kkunsidra l-Artikolu 319 tat-Trattat dwar il-Funzjonament tal-Unjoni Ewropea,

—

wara li kkunsidra r-Regolament tal-Kunsill (KE, Euratom) Nru 1605/2002 tal-25 ta’ Ġunju 2002 dwar ir-Regolament Finanzjarju applikabbli għall-baġit ġenerali tal-Komunitajiet Ewropej (2), u b’mod partikolari l-Artikolu 185 tiegħu,

—

wara li kkunsidra r-Regolament (UE, Euratom) Nru 966/2012 tal-Parlament Ewropew u tal-Kunsill tal-25 ta’ Ottubru 2012 dwar ir-regoli finanzjarji applikabbli għall-baġit ġenerali tal-Unjoni u li jħassar ir-Regolament tal-Kunsill (KE, Euratom) Nru 1605/2002 (3), u b’mod partikolari l-Artikolu 208 tiegħu,

—

wara li kkunsidra r-Regolament tal-Kunsill (KE) Nru 2062/94 tat-18 ta’ Lulju 1994 li jistabbilixxi Aġenzija Ewropea għas-Sigurtà u s-Saħħa fuq il-Post tax-Xogħol (4), u b’mod partikolari l-Artikolu 14 tiegħu,

—

wara li kkunsidra r-Regolament tal-Kummissjoni (KE, Euratom) Nru 2343/2002 tad-19 ta’ Novembru 2002 dwar ir-Regolament Finanzjarju strutturali għall-entitajiet imsemmijin fl-Artikolu 185 tar-Regolament (KE, Euratom) Nru 1605/2002 dwar ir-Regolament Finanzjarju applikabbli għall-baġit ġenerali tal-Komunitajiet Ewropej (5), u b’mod partikolari l-Artikolu 94 tiegħu,

—

wara li kkunsidra l-Artikolu 77 u l-Anness VI tar-Regoli ta’ Procedura tiegħu,

—

wara li kkunsidra r-rapport tal-Kumitat għall-Kontroll tal-Baġit u l-opinjoni tal-Kumitat għall-Impjiegi u l-Affarijiet Soċjali (A7-0085/2013),

A.

billi l-Qorti tal-Awdituri stqarret li kisbet assigurazzjonijiet raġonevoli li l-kontijiet annwali tal-Aġenzija Ewropea għas-Saħħa u s-Sigurtà fuq il-Post tax-Xogħol (“l-Aġenzija”) għas-sena finanzjarja 2011 huma affidabbli u li t-tranżazzjonijiet sottostanti huma legali u regolari,

1.

Jistabbilixxi mir-rapport tal-Qorti tal-Awdituri li l-baġit tal-Aġenzija fl-2011 kien jammonta għal EUR 16,4 miljun, meta mqabbel ma’ EUR 15,5 miljun fl-2010, somma li tirrappreżenta żieda ta’ 5,8 %;

2.

Jiddispjaċih li fl-istess ħin, ir-rata ta’ kanċellazzjoni għall-approprjazzjonijiet irduppjat, minn 4 % fl-2010 għal 8 % (EUR 1,3 miljun) tal-baġit totali għall-2011, fattur li jindika diffikultajiet fl-implimentazzjoni tal-azzjonijiet previsti fil-programm ta’ ħidma annwali u fil-konformità mal-prinċipju baġitarju tal-annwalità; jappella sabiex fil-futur jiġi ppreżentat programm aktar realistiku u fattibbli;

3.

Il-livelli tal-implimentazzjoni tal-baġit għas-sena finanzjarja 2011 kienu ġeneralment aħjar mis-sena preċedenti, b’mod partikolari fir-rigward tal-kanċellazzjonijiet ta’ approprjazzjonijiet ta’ C8 u tnaqqis ta’ ammonti riportati ta’ approprjazzjonijiet ta’ C1 għat-Titolu III — “Attivitajiet operattivi”; jinnota li r-rata ta’ kanċellazzjoni ogħla għall-approprjazzjonijiet tal-2011 hija parzjalment ikkawżata minn xi pożizzjonijiet vakanti u l-ħtieġa biex ma jkunx hemm impenn f’attività kbira (il-proġett OSHwiki: enċiklopedija onlajn dwar is-saħħa u s-sigurtà fuq il-post tax-xogħol) sakemm ġiet żgurata l-kooperazzjoni internazzjonali; jitlob lill-Aġenzija tindirizza s-sitwazzjoni u tirrapporta lill-awtorità tal-kwittanza dwar l-azzjonijiet meħuda;

4.

Jinnota bi tħassib li filwaqt li r-Regolament Finanzjarju tal-Aġenzija u r-Regoli ta’ Implimentazzjoni jipprovdu inventarju fiżiku tal-anqas darba kull tliet snin, fil-waqt tal-awditu tal-Qorti tal-Awdituri l-aħħar inventarju fiżiku kien twettaq fl-2006;

5.

Jirrikonoxxi mill-Aġenzija li l-inventarju fiżiku twettaq fl-2012;

6.

Jinnota bi tħassib is-sejba tal-Qorti tal-Awdituri li l-Aġenzija ma kkonkludietx ftehim dwar is-sede;

7.

Jinnota t-tweġiba tal-Aġenzija li n-negozjati rigward il-ftehim dwar is-sede tal-Aġenzija għadhom għaddejjin u li l-abbozz ta’ ftehim li ġie nnegozjat qabel reġa’ kien soġġett għal konsultazzjonijiet li jinvolvu ministeri differenti; jitlob lill-Aġenzija tinforma kif xieraq lill-awtorità tal-kwittanza dwar il-progress miksub fin-negozjati u jistieden lill-Istat Membru li jospita lill-Aġenzija jieħu passi biex iħaffef il-pass tan-negozjati u jikkonkludi l-ftehim dwar is-sede fil-futur qarib;

8.

Jistieden lill-Kummissjoni sabiex, flimkien mal-Fondazzjoni Ewropea għat-Taħriġ, iċ-Ċentru Ewropew għall-Iżvilupp ta’ Taħriġ Vokazzjonali, il-Fondazzjoni Ewropea għat-Titjib tal-Kondizzjonijiet tal-Ħajja u tax-Xogħol u l-Aġenzija Ewropea għas-Saħħa u s-Sigurtà fuq il-Post tax-Xogħol, tkompli tesplora s-sinerġiji li jeżistu bejn dawn l-aġenziji u tirrapporta lill-awtorità tal-kwittanza, qabel ma tiġi kkunsidrata kwalunkwe deċiżjoni dwar tibdil possibbli fir-responsabbiltajiet u/jew il-metodi ta’ ħidma rispettivi ta’ dawn l-aġenziji, fir-rigward tal-possibbiltà ta’ integrazzjoni aktar profonda ta’ dawn l-erba’ aġenziji; jistieden lil dawn l-aġenziji u lill-Kummissjoni jevalwaw jekk kooperazzjoni aktar mill-qrib tistax twassal għal ekonomiji ta’ skala u għall-ottimizzazzjoni tal-prestazzjoni tagħhom;

9.

Jinnota li fl-2011, is-Servizz tal-Awditjar Intern tal-Aġenzija ħareġ rapport ta’ awditjar intitolat “Website and external communications in the EU-OSHA” li ma kien jinkludi l-ebda rakkomandazzjoni kritika, filwaqt li kien fih żewġ rakkomandazzjonijiet “importanti ħafna” u ħames rakkomandazzjonijiet “importanti”; jinnota li s-seba’ rakkomandazzjonijiet kollha kemm huma ġew aċċettati mill-bord amministrattiv u diġà ġew implimentati (sitta minn sebgħa fl-2011 u l-aħħar waħda fl-2012); jinnota li l-Aġenzija wettqet valutazzjoni tal-kompiti relatati mal-IT fi ħdanha u ħarġet rapport dwar dan is-suġġett, kif ukoll wettqet rieżami tal-istatus tar-rakkomandazzjonijiet tal-awditi preċedenti;

10.

Jirreferi, fir-rigward tal-osservazzjonijiet l-oħra li jakkumpanjaw din id-deċiżjoni ta’ kwittanza, li huma ta’ natura orizzontali, għar-riżoluzzjoni tiegħu tas-17 ta’ April 2013 (6) dwar il-prestazzjoni, il-ġestjoni finanzjarja u l-kontroll tal-aġenziji.