5.12.2012   

MT

Il-Ġurnal Uffiċjali tal-Unjoni Ewropea

L 333/7

(1)

Ir-Regolament tal-Kummissjoni (KE) Nru 474/2006 (3) tat-22 ta’ Marzu 2006 stabbilixxa l-lista Komunitarja ta’ kumpaniji tal-ajru li huma soġġetti għal projbizzjoni fuq l-operat fil-Komunità skont il-Kapitolu II tar-Regolament (KE) Nru 2111/2005.

(2)

F’konformità mal-Artikolu 4(3) tar-Regolament (KE) Nru 2111/2005, ċerti Stati Membri u l-Aġenzija Ewropea tas-Sikurezza tal-Avjazzjoni (minn issa ‘l quddiem, l-“EASA”) ikkomunikaw lill-Kummissjoni informazzjoni li hija relevanti fil-kuntest tal-aġġornar tal-lista Komunitarja. Informazzjoni relevanti kienet ikkomunikata wkoll minn pajjiżi terzi. Il-lista Komunitarja għandha tiġi aġġornata, abbażi ta’ dan.

(3)

Il-Kummissjoni infurmat lit-trasportaturi tal-ajru kollha kkonċernati b’mod dirett, jew fejn dan ma kienx prattikabbli, permezz tal-awtoritajiet responsabbli għas-sorveljanza regolatorja tagħhom, u indikat il-fatti u l-kunsiderazzjonijiet essenzjali li fuqhom għandha tkun imsejsa deċiżjoni biex timponi fuqhom projbizzjoni fuq l-operat fl-Unjoni Ewropea jew biex timmodifika l-kundizzjonijiet ta’ projbizzjoni fuq l-operat imposta fuq trasportatur tal-ajru li huwa inkluż fil-lista Komunitarja.

(4)

Il-Kummissjoni tat opportunità lit-trasportaturi tal-ajru kkonċernati li jikkonsultaw id-dokumenti pprovduti mill-Istati Membri, biex iressqu kummenti bil-miktub u biex jagħmlu preżentazzjoni orali quddiem il-Kummissjoni fi żmien 10 ijiem ta’ xogħol, u lill-Kumitat għas-Sikurezza tal-Ajru stabbilit bir-Regolament tal-Kunsill (KEE) Nru 3922/1991 tas-16 ta’ Diċembru dwar l-armonizzazzjoni tal-ħtiġijiet tekniċi u proċeduri amministrattivi fil-qasam tal-avjazzjoni ċivili (4).

(5)

Il-Kumitat għas-Sikurezza tal-Ajru waslulu aġġornamenti mill-Kummissjoni dwar il-konsultazzjonijiet konġunti li għadhom għaddejjin, li nfetħu fi ħdan il-qafas tar-Regolament (KE) Nru 2111/2005 u r-Regolament ta’ Implimentazzjoni tiegħu (KE) Nru 473/2006 (5), mal-awtoritajiet kompetenti u t-trasportaturi tal-ajru tal-Istati li ġejjin: l-Alġerija, Aruba, il-Bangladexx, Burkina Faso, il-Kamerun, ir-Repubblika Afrikana Ċentrali, iċ-Ċina, il-Komoros, Kuba, Curaçao, l-Eġittu, l-Etjopja, il-Ġeorġja, il-Ginea Bissaw, il-Lesoto, il-Lussemburgu, il-Malawi, Mali, in-Nepal, il-Pakistan, il-Federazzjoni Russa, l-Eritrea, il-Libja; l-Afganistan, l-Angola, il-Benin, il-Kongo-Brazzaville, ir-Repubblika Demokratika tal-Kongo, Ġibuti, ir-Repubblika Demokratika Popolari tal-Korea, il-Ginea Ekwatorjali, l-Indoneżja, l-Iran, il-Ġordan, il-Kazakistan, il-Liberja, il-Madagaskar, il-Mawritanja, il-Możambik, il-Filippini, ir-Rwanda, São Tomé u Príncipe, Sjerra Leone, is-Sudan, is-Surinam, is-Sważiland, il-Venezwela u ż-Żambja.

(6)

Il-Kumitat għas-Sikurezza tal-Ajru semal-preżentazzjonijiet tal-EASA dwar ir-riżultati tal-analiżi tar-rapporti ta’ verifika mwettqa mill-Organizzazzjoni tal-Avjazzjoni Ċivili Internazzjonali (minn issa ‘l quddiem “l-ICAO”) fil-qafas tal-Programm Universali ta’ Verifika tas-Sorveljanza (Universal Safety Oversight Audit Programme - USOAP). L-Istati Membri ġew mistiedna jagħtu prijorità lil spezzjonijiet fir-rampa fuq it-trasportaturi tal-ajru li huma d-detenturi ta’ liċenzji fi Stati li għalihom l-ICAO identifikat Tħassib Sinifikanti tas-Sikurezza jew li dwarhom l-EASA kkonkludiet li hemm nuqqasijiet sinifikanti fis-sistema ta’ sorveljanza tas-sikurezza. Minkejja l-konsultazzjonijiet imwettqa mill-Kummissjoni skont ir-Regolament (KE) Nru 2111/2005, dan se joffri l-possibbiltà li tinkiseb aktar informazzjoni dwar il-prestazzjoni tas-sikurezza fuq it-trasportaturi tal-ajru liċenzjati f’dawn l-Istati.

(7)

Il-Kumitat għas-Sikurezza tal-Ajru semal-preżentazzjonijiet tal-EASA dwar ir-riżultati tal-analiżi tal-ispezzjonijiet fir-rampa mwettqa taħt il-programm ta’ Valutazzjoni tas-Sikurezza tal-Inġenji tal-Ajru Barranin (SAFA) skont ir-Regolament tal-Kummissjoni (UE) Nru 965/2012 tal-5 ta’ Ottubru 2012 li jistabbilixxi rekwiżiti tekniċi u proċeduri amministrattivi relatati mal-operati bl-ajru skont ir-Regolament (KE) Nru 216/2008 tal-Parlament Ewropew u tal-Kunsill (6).

(8)

Il-Kumitat għas-Sikurezza tal-Ajru semal-preżentazzjonijiet tal-EASA dwar il-proġetti ta’ assistenza teknika mwettqa fi Stati affettwati mir-Regolament (KE) Nru 2111/2005. Il-Kumitat ġie infurmat dwar it-talbiet għal aktar għajnuna u kooperazzjoni teknika għat-titjib fil-kapaċità amministrattiva u teknika tal-awtoritajiet tal-avjazzjoni ċivili bil-għan li jiġu solvuti nuqqasijiet ta’ konformità bi standards internazzjonali applikabbli. L-Istati Membri kienu mistiedna jirrispondu għal dawn it-talbiet fuq bażi bilaterali f’koordinazzjoni mal-Kummissjoni u mal-EASA.

(9)

Ir-Regolament (KE) Nru 474/2006 għandu għalhekk jiġi emendat skont dan.

(10)

Il-miżuri stipulati f’dan ir-Regolament huma konformi mal-opinjoni tal-Kumitat għas-Sikurezza tal-Ajru.

(11)

Wara l-analiżi mill-EASA ta’ informazzjoni li tirriżulta minn spezzjonijiet fir-rampa tal-SAFA li twettqu fuq inġenji tal-ajru ta’ ċerti trasportaturi tal-ajru tal-Unjoni jew minn spezzjonijiet ta’ standardizzazzjoni mwettqa mill-EASA, kif ukoll spezzjonijiet u verifiki speċifiċi għal ċerti oqsma mwettqa mill-awtoritajiet nazzjonali tal-avjazzjoni tagħhom, uħud mill-Istati Membri ħadu ċerti miżuri ta’ infurzar. Huma infurmaw lill-Kummissjoni u lill-Kumitat għas-Sikurezza tal-Ajru b’dawn il-miżuri: Il-Greċja infurmat li ċ-Ċertifikat tal-Operatur tal-Ajru (AOC) ta’ Sky Wings twaqqaf wara s-sospensjoni tal-approvazzjoni tal-organizzazzjoni tal-ġestjoni tal-ajrunavigabbilità kontinwa tas-7 ta’ Ottubru 2012; Il-Lussemburgu informa li l-AOC ta’ Strategic Airlines ġie rrevokat fit-8 ta’ Ottubru 2012, u li t-trasportatur tal-ajru ma għadux jeżisti; Spanja infurmat li t-trasportatur tal-ajru IMD implimenta azzjonijiet korrettivi b’suċċess u jibqa’ taħt sorveljanza stretta; u l-Islovenja infurmat li l-AOC ta’ Linxair Business Airlines ġie rrevokat fit-2 ta’ Ottubru 2012.

(12)

Il-Kummissjoni, wara li kkunsidrat ir-riżultati tal-ispezzjonijiet fir-rampa li twettqu fl-2008 u l-2009 fuq inġenji tal-ajru operati mit-trasportatur tal-ajru Air Algérie fil-qafas tal-programm tas-SAFA, il-Kummissjoni bdiet konsultazzjonijiet formali mal-awtoritajiet kompetenti tal-Alġerija (DACM) f’Diċembru 2009, kif iddettaljat fir-Regolament (KE) Nru 590/2010 (7) u r-Regolament (KE) Nru 1071/2010 (8). Dawn il-konsultazzjonijiet formali rriżultaw fl-implimentazzjoni ta’ soluzzjonijiet sodisfaċenti għall-indirizzar mill-ġdid tan-nuqqasijiet tas-sikurezza identifikati fi żmien qasir kif ukoll fl-iżvilupp ta’ pjan ta’ azzjoni korrettiva u preventiva soda mid-DACM u mill-operatur tal-ajru Air Algérie għal soluzzjonijiet sostenibbli. Il-prestazzjoni tas-sikurezza tat-trasportatur tal-ajru Air Algérie kompliet tiġi vverifikata permezz tar-riżultati tal-programm tas-SAFA, flimkien mar-rapporti ta’ kull xahar mibgħuta mid-DACM lill-Kummissjoni dwar ir-riżultati tal-attivitajiet ta’ sorveljanza tagħhom fuq l-operatur tal-ajru kif ukoll dwar il-progress li sar fl-implimentazzjoni tal-pjanijiet korrettivi u preventivi li ssemmew qabel.

(13)

Wara li qieset ix-xejra pożittiva li ilha tiġi osservata fl-ispezzjonijiet tas-SAFA min-Novembru 2010, l-assenza tan-nuqqasijiet serji tas-sikurezza u l-implimentazzjoni tal-azzjonijiet korrettivi u preventivi f’konformità mal-ippjanar, f’Lulju 2012 il-Kummissjoni iddeċidiet li tagħlaq il-konsultazzjonijiet formali mad-DACM skont ir-Regolament (KE) Nru 2111/2005.

(14)

Fi Frar 2012 l-awtorità kompetenti ta’ Aruba intrabtet li tintroduċi emendi fis-sistema legali nazzjonali, u li tieħu azzjoni amministrattiva fir-rigward ta’ Comlux Aruba biex tassigura li sal-1 ta’ Awwissu 2012 il-kontroll tal-operat ta’ dan it-trasportatur tal-ajru jkun eżerċitat minn Aruba.

(15)

Sabiex tikseb l-informazzjoni aġġornata dwar din il-kwistjoni, fil-15 ta’ Ottubru 2012, il-Kummissjoni, l-EASA u ċerti Membri tal-Kumitat għas-Sikurezza tal-Ajru wettqu konsultazzjonijiet mal-awtorità kompetenti ta’ Aruba. Dawn l-awtoritajiet infurmaw u pprovdew evidenza li l-leġiżlazzjoni tal-operati tat-titjir ġiet emendata biex issaħħaħ ir-rekwiżiti rigward l-istabbiliment tal-post prinċipali ta’ negozju f’Aruba. Dawn l-awtoritajiet ikkonfermaw ukoll li l-kontroll tal-operat Comlux Aruba N.V. twaqqaf f’Aruba b’mod li jissodisfahom. F’dan ir-rigward ġew implimentati tibdiliet fl-organizzazzjoni u r-responsabbiltajiet ta’ dan it-trasportatur. Barra minn hekk, l-AOC kien limitat għal inġenju tal-ajru wieħed tat-tip B767 u se jiġġedded kull sena biss, soġġett għal riżultati sodisfaċenti tas-sorveljanza kontinwa, biex jiġi żgurat li t-tibdiliet organizzattivi jkunu effettivi.

(16)

Il-Kummissjoni nnutat il-progress imwettaq mill-awtoritajiet kompetenti ta’ Aruba, u tħeġġiġhom ikomplu bl-isforzi tagħhom fit-tisħiħ tas-sistema ta’ sorveljanza tal-avjazzjoni ċivili tagħhom b’konformità mal-istandards internazzjonali tas-sikurezza.

(17)

It-trasportaturi tal-ajru kollha ċċertifikati fir-Repubblika Demokratika tal-Kongo ilhom elenkati fl-Anness A minn Novembru 2009. Il-Kummissjoni u l-EASA għamlu laqgħa ta’ konsultazzjoni mal-awtoritajiet kompetenti tar-Repubblika tal-Kongo (ANAC) fit-12 ta’ Ottubru 2012, li matulha l-ANAC ippreżentat il-progress li sar sa issa sabiex jittaffa t-tħassib dwar is-sikurezza identifikat mill-Organizzazzjoni tal-Avjazzjoni Ċivili Internazzjonali (ICAO) fl-okkażjoni tal-verifiki mwettqa fl-2008 fi ħdan il-qafas tal-Programm Universali ta’ Verifika tas-Sorveljanza tal-ICAO (USOAP).

(18)

L-ANAC ipprovdiet lill-Kummissjoni b’evidenza tal-iskadenza taċ-Ċertifikat tal-Operat tal-Ajru tat-trasportatur tal-ajru Société Nouvelle Air Congo u kkonfermat li t-trasportatur tal-ajru waqqaf l-attivitajiet tiegħu. Konsegwentement, abbażi tal-kriterji komuni, għandu jitneħħa mill-Anness A.

(19)

L-ANAC ipprovdiet lill-Kummissjoni informazzjoni li tindika li t-trasportaturi tal-ajru li ġejjin ingħataw AOC: Canadian Airways’ Congo, Eméraude, Equajet u Mistral Aviation. Madankollu, billi l-ANAC ma pprovdietx evidenza li s-sorveljanza tas-sikurezza ta’ dawn it-trasportaturi tal-ajru hija assigurata b’konformità mal-istandards internazzjonali tas-sikurezza, abbażi tal-kriterji komuni, huwa meqjus li dawn it-trasportaturi għandhom jiddaħħlu wkoll fl-Anness A.

(20)

Il-Kummissjoni nnutat il-progress imwettaq mill-awtoritajiet kompetenti tar-Repubblika tal-Kongo, u tħeġġiġhom ikomplu bl-isforzi tagħhom lejn it-twaqqif ta’ sistema ta’ sorveljanza tal-avjazzjoni ċivili konformi mal-istandards internazzjonali tas-sikurezza.

(21)

Trasportaturi tal-ajru ċċertifikati fir-Repubblika Demokratika tal-Kongo ilhom jiġu elenkati fl-Anness A minn Marzu 2006 (9). L-awtoritajiet kompetenti tar-Repubblika Demokratika tal-Kongo ħadu l-inizjattiva li jistabbilixxu mill-ġdid il-konsultazzjonijiet attivi mal-Kummissjoni u l-EASA, u indikaw l-intenzjoni soda tagħhom li jwettqu reviżjoni dettaljata u riforma sħiħa tal-industrija tal-avjazzjoni, kif ukoll tal-awtorità nazzjonali ta’ sorveljanza regolatorja.

(22)

L-awtoritajiet kompetenti tar-Repubblika Demokratika tal-Kongo infurmaw li ngħata AOC lit-trasportaturi tal-ajru li ġejjin: Air Fast Congo, Fly Congo, Katanga Express, Katanga Wings, Mango Airlines, u Will Airlift. Madankollu, billi l-ANAC ma pprovdietx evidenza li s-sorveljanza tas-sikurezza ta’ dawn it-trasportaturi tal-ajru hija żgurata b’konformità mal-istandards internazzjonali tas-sikurezza, abbażi tal-kriterji komuni, huwa meqjus li dawn it-trasportaturi għandhom jiddaħħlu wkoll fl-Anness A.

(23)

L-awtoritajiet kompetenti tar-Repubblika Demokratika tal-Kongo ma pprovdewx evidenza li t-trasportaturi l-oħra tal-ajru fl-Anness A waqqfu l-attivitajiet tagħhom. Konsegwentement, abbażi tal-kriterji komuni, huwa meqjus li dawn it-trasportaturi tal-ajru għandhom jibqgħu fl-Anness A.

(24)

Il-Kummissjoni nnutat il-progress imwettaq mill-awtoritajiet kompetenti tar-Repubblika Demokratika tal-Kongo, u tħeġġiġhom ikomplu bl-isforzi tagħhom lejn it-twaqqif ta’ sistema ta’ sorveljanza tal-avjazzjoni ċivili konformi mal-istandards internazzjonali tas-sikurezza.

(25)

L-ICAO wettqet verifika tal-Antilli Olandiżi (10) fl-2008 u għamlet għadd ta’ sejbiet dwar l-elementi kritiċi kollha tas-sistema ta’ sorveljanza tas-sikurezza tagħhom. B’mod partikolari, l-awtoritajiet kompetenti tal-Antilli Olandiżi ma kellhomx persunal tekniku suffiċjenti fl-oqsma tal-liċenzjar tal-persunal, l-operati tal-inġenji tal-ajru, is-servizzi tan-navigazzjoni bl-ajru u l-ajrudromi biex iwettqu l-funzjonijiet ta’ sorveljanza tas-sikurezza.

(26)

Barra minn hekk, wara valutazzjoni mill-Amministrazzjoni Federali tal-Avjazzjoni (FAA) tal-Istati Uniti skont il-programm tal-IASA f’Settembru 2011, Curaçao twaqqa’ minn Kategorija 1 għal Kategorija 2 minħabba li l-FAA tqis li Curaçao ma kkonformax biżżejjed mal-istandards internazzjonali tas-sikurezza.

(27)

Fl-aħħar nett, spezzjonijiet fir-rampa li twettqu taħt il-patroċinju tal-programm tal-Valutazzjoni tas-Sikurezza tal-Inġenji tal-Ajru Barranin (SAFA) (11) matul il-perjodu Mejju 2011 sa Mejju 2012, għamlu sejbiet li jammontaw għal medja ta’ ‘l fuq minn sejba waħda għal kull spezzjoni.

(28)

B’riżultat ta’ dan, il-Kummissjoni bdiet konsultazzjonijiet mal-awtoritajiet kompetenti ma’ Curaçao u St Maarten, u f’Lulju 2012 kitbitilhom u saqsiethom għal dettalji rigward liema azzjonijiet korrettivi kienu tqiegħdu fis-seħħ jew qed jiġu ppjanati. Dawn il-konsultazzjonijiet jibqgħu għaddejjin.

(29)

L-Awtoritajiet Kompetenti ta’ Curaçao u St. Maarten irrispondew lill-Kummissjoni u ddettaljaw l-azzjonijiet korrettivi li għaddejjin, u ppjanaw li jindirizzaw l-ICAO u s-sejbiet tal-verifiki tal-FAA.

(30)

Il-Pajjiżi l-Baxxi infurmaw lill-Kumitat għas-Sikurezza tal-Ajru li huma kienu attivi fil-provvediment tal-għajnuna teknika għal Curaçao u St Maarten biex jgħinuhom fl-isforzi tagħhom biex jistabbilixxu sistema ta’ sorveljanza ta’ sikurezza li hija konformi mal-istandards tal-ICAO.

(31)

Il-Kummissjoni tinnota l-azzjonijiet mill-awtoritajiet kompetenti ta’ Curaçao u St Maarten, u tħeġġiġhom ikomplu b’determinazzjoni bl-isforzi tagħhom biex jindirizzaw in-nuqqasijiet fis-sistema tas-sorveljanza tas-sikurezza tal-avjazzjoni tagħhom, inkella l-Kummissjoni se jkollha tieħu azzjoni skont ir-Regolament (KE) Nru 2111/2005. L-Istati Membri se jkomplu jissorveljaw mill-qrib, permezz ta’ spezzjonijiet fir-rampa fil-qafas tal-programm tal-SAFA, li l-azzjonijiet korrettivi huma effettivi.

(32)

It-trasportaturi tal-ajru kollha ċċertifikati fil-Ginea Ekwatorjali huma soġġetti għal projbizzjoni fuq l-operat fi ħdan l-UE u ilhom elenkati fl-Anness A minn Marzu 2006. L-awtoritajiet kompetenti tal-Ginea Ekwatorjali (DGAC) ipprovdew lill-Kummissjoni b’informazzjoni li tindika li ngħata AOC lit-trasportatur tal-ajru Tango Airways. Minħabba li ma hemm l-ebda evidenza ta’ bidliet fil-kapaċità tad-DGAC biex jassiguraw is-sorveljanza tat-trasportaturi tal-ajru ċċertifikati f’dak l-Istat f’konformità mal-istandards ta’ sikurezza applikabbli, abbażi tal-kriterji komuni, huwa meqjus li dan it-trasportatur tal-ajru għandu jiġi inkluż ukoll fl-Anness A.

(33)

B’riżultat tas-sejbiet identifikati matul il-verifika tal-Eritrea tal-ICAO f’Novembru 2010, l-ICAO innotifikat lill-Istati Kontraenti kollha għall-Konvenzjoni ta’ Chicago bi tliet każijiet ta’ Tħassib Sinifikanti tas-Sikurezza (SSC) fl-oqsma tal-Operat, l-Ajrunavigabbilità u s-Servizzi tan-Navigazzjoni bl-Ajru. Barra minn hekk, fl-aħħar rapport ta’ verifika tagħha, l-ICAO irrappurtat li n-nuqqas ta’ implimentazzjoni effettiva tal-istandards internazzjonali tas-sikurezza ammonta għal 79,9 %.

(34)

Il-Kummissjoni, wara li kkunsidrat dawn ir-riżultati, bdiet konsultazzjonijiet formali mal-awtoritajiet kompetenti tal-Eritrea (ER-CAA) biex tfittex dettalji dwar liema azzjonijiet kienet ħadet l-ER-CAA biex tindirizza n-nuqqasijiet tas-sikurezza identifikati mill-verifika tal-ICAO.

(35)

L-ER-CAA infurmat lill-Kummissjoni b’ittra li filwaqt li żewġ każijiet ta’ Tħassib Sinifikanti tas-Sikurezza rigward l-Ajrunavigabbilità u s-Servizzi tan-Navigazzjoni bl-Ajru ġew riżolti, it-tielet Tħassib Sinifikanti tas-Sikurezza rigward il-proċess ta’ ċertifikazzjoni għall-ħruġ ta’ Ċertifikat tal-Operaturi tal-Ajru kien għadu jrid jiġi riżolt, u jkun jeħtieġ missjoni ta’ validazzjoni mill-ICAO biex jitneħħa. Madanakollu, is-sottomissjonijiet tal-ER-CAA ma kien fihom l-ebda informazzjoni rigward l-azzjonijiet korrettivi li ttieħdu biex jiġi indirizzat it-Tħassib Sinifikanti tas-Sikurezza pendenti, u lanqas informazzjoni dwar is-sorveljanza tal-operat tat-trasportaturi tal-ajru tal-Eritrea, li t-tnejn li huma huma awtorizzati mill-Eritrea biex joperaw fl-UE.

(36)

Il-Kummissjoni stiednet ripetutament lill-ER-CAA għal laqgħat ta’ konsultazzjoni biex ifittxu kjarifikazzjoni ulterjuri dwar is-sorveljanza tad-detenturi Eritrej tal-AOC. Madanakollu, l-ER-CAA irrifjutaw li jattendu dawn il-laqgħat.

(37)

Fil-21 ta’ Novembru 2012, l-ER-CAA ġiet mistiedna għall-Kumitat għas-Sikurezza tal-Ajru u għamlet preżentazzjonijiet. L-ER-CAA infurmaw li l-Pjan ta’ Azzjoni Korrettiva tagħhom ġie aċċettat mill-ICAO u, b’riżultat tal-emenda tal-leġiżlazzjoni tal-avjazzjoni ewlenija tagħhom u l-promulgazzjoni ta’ għadd ta’ regolamenti tal-avjazzjoni ċivili, min-naħa tagħhom qiesu li t-Tħassib Sinifikanti tas-Sikurezza ġie indirizzat. Ma kienx ċar jekk l-Eritrea kinitx talbet Missjoni ta’ Validazzjoni tal-ICAO, għalkemm qegħdin jirċievu appoġġ mit-Tim tas-Sikurezza tal-Uffiċċju Reġjonali tal-ICAO. Madanakollu, fil-fehma tal-Kumitat għas-Sikurezza tal-Ajru, huma naqsu milli juru b’mod adegwat li kienu ħadu azzjoni komprensiva biex jindirizzaw l-aspetti kollha tat-Tħassib Sinifikanti tas-Sikurezza. Huma ma setgħux jipprovdu ċarezza fuq l-arranġamenti ta’ sorveljanza assoċjati mal-inġenji tal-ajru elenkati fl-AOCs maħruġa mill-Eritrea, li jinkludu inġenji tal-ajru mikrija bl-ekwipaġġ mingħand trasportaturi tal-ajru barranin;, b’konsegwenza ta’ dan, dawn l-inġenji tal-ajru huma elenkati f’diversi AOCs, u dan ma jikkonformax mal-istandards internazzjonali tas-sikurezza.

(38)

Filwaqt li t-trasportaturi tal-ajru kollha liċenzjati fl-Eritrea ġew mistiedna għall-Kumitat għas-Sikurezza tal-Ajru, wieħed minnhom, l-Eritrean Airlines, għamel preżentazzjonijiet lill-Kumitat għas-Sikurezza tal-Ajru fil-21 ta’ Novembru 2012. Dan it-trasportatur tal-ajru kkonferma li jopera żewġ inġenji tal-ajru tat-tip A320 għal Ruma taħt arranġament ta’ kiri bl-ekwipaġġ, mingħajr ma jipprovdi kjarifika dwar is-sorveljanza tal-operat u l-kontroll tal-attivitajiet tiegħu għas-sodisfazzjoni tal-Kumitat għas-Sikurezza tal-Ajru.

(39)

Il-Kummissjoni u l-Kumitat għas-Sikurezza tal-Ajru jirrikonoxxu l-isforzi li qed isiru biex in-nuqqasijiet tas-sikurezza fis-sistema tal-avjazzjoni ċivili fl-Eritrea jiġu indirizzati. Madankollu, abbażi tal-kriterji komuni, sakemm jiġu tabilħaqq implimentati azzjonijiet korrettivi adegwati sabiex jinstab rimedju għan-nuqqasijiet identifikati mill-ICAO u b’mod partikolari għat-Tħassib Sinifikanti tas-Sikurezza pendenti, huwa meqjus li l-awtoritajiet kompetenti tal-Możambik, f’dan l-istadju, mhumiex kapaċi jimplimentaw u jinfurzaw l-istandards relevanti tas-sikurezza fuq it-trasportaturi tal-ajru kollha taħt il-kontroll regolatorju tagħhom. Għalhekk, it-trasportaturi tal-ajru kollha ċċertifikati fl-Eritrea għandhom ikunu soġġetti għal projbizzjoni fuq l-operat u mdaħħla fl-Anness A.

(40)

Ladarba t-Tħassib Sinifikanti tas-Sikurezza pendenti jitneħħa għas-sodisfazzjoni tal-ICAO, u s-sejbiet ewlenin tal-verifika tal-ICAO ikunu ġew indirizzati b’mod sodisfaċenti, il-Kummissjoni tkun lesta li torganizza, bl-għajnuna tal-EASA u bl-appoġġ tal-Istati Membri, valutazzjoni fuq il-post biex tivverifika l-progress miksub u tħejji reviżjoni tal-każ fil-Kumitat għas-Sikurezza tal-Ajru.

(41)

L-awtoritajiet kompetenti tal-Ħonduras f’Ġunju 2012 talbu t-tneħħija ta’ Rollins Air mil-lista ta’ sikurezza abbażi tas-sospensjoni tal-AOC tiegħu. Fil-21 ta’ Novembru 2012, huma pprovdew evidenza li l-AOC ta’ Rollins Air, li kien ġie sospiż għal sitt xhur, skada u ġie eventwalment ikkanċellat fl-24 ta’ Settembru 2012. Konsegwentement, abbażi tal-kriterji komuni, Rollins Air għandha titneħħa mill-Anness A.

(42)

Konsultazzjonijiet mal-awtoritajiet kompetenti tal-Indoneżja (id-DGCA) ikomplu bil-għan li jiġi mmonitorjat il-progress tad-DGCA fl-iżgurar tas-sorveljanza tas-sikurezza tat-trasportaturi kollha tal-ajru ċċertifikati fl-Indoneżja b’konformità mal-istandards internazzjonali tas-sikurezza.

(43)

Fit-18 ta’ Ottubru 2012 saret vidjokonferenza bejn il-Kummissjoni, l-EASA u d-DGCA li matulha d-DGCA ipprovda aġġornament rigward ċerti trasportaturi tal-ajru taħt is-sorveljanza tiegħu. Huma infurmaw li ħames trasportaturi tal-ajru ġodda ġew iċċertifikati, fosthom Jayawijaya Dirantara fis-16 ta’ April 2012, Pacific Royale Airways fid-29 ta’ Mejju 2012, Citilink Indonesia fit-22 ta’ Ġunju 2012, Angkasa Super Services fis-7 ta’ Ġunju 2012, u Air Born Indonesia fis-6 ta’ Marzu 2012. Madanakollu, minħabba li d-DGCA ma pprovdiex l-evidenza li s-sorveljanza tas-sikurezza ta’ dawn it-trasportaturi tal-ajru hija assigurata f’konformità mal-istandards internazzjonali tas-sikurezza, abbażi tal-kriterji komuni, huwa meqjus li dawn it-trasportaturi għandhom jiġu inklużi fl-Anness A.

(44)

Barra minn hekk, id-DGCA informa li PT Sampoerna Air Nasantara kien bidel ismu għal PT Pegasus Air Services, u li PT Nyaman Air kien bidel ismu għal PT Heavy Lift, u li għalhekk l-ismijiet tagħhom għandhom jiġu emendati fl-Anness A.

(45)

Id-DGCA informa u pprovda wkoll konferma li l-AOC ta’ Dirgantara Air Service ġie rrevokat fit-25 ta’ Mejju 2012. Għaldaqstant, abbażi tal-kriterji komuni, huwa meqjus li dan it-trasportatur tal-ajru għandu jitneħħa mill-Anness A.

(46)

Id-DGCA ġiet mgħarrfa wkoll bir-riżultati ta’ żjara ta’ valutazzjoni tal-Amministrazzjoni Federali tal-Avjazzjoni tal-Istati Uniti tal-Amerika (FAA) fl-Indoneżja, li saret f’Settembru 2012. Filwaqt li l-FAA innotat titjib fis-sistema tas-sorveljanza tas-sikurezza tal-avjazzjoni matul is-snin li għaddew, l-FAA għamlet għadd ta’ osservazzjonijiet u rakkomandazzjonijiet fir-rigward ta’ taħriġ għall-ispetturi, is-sorveljanza ta’ attivitajiet tal-avjazzjoni barranin, l-infurzar tal-politika u l-proċeduri, partikolarment dawk li jikkonċernaw l-użu ta’ multi, u l-ħtieġa li jittejbu ċerti faċilitajiet lokali. Id-DGCA qabel li jipprovdi kopja tar-rapport formali taż-żjara ta’ valutazzjoni hekk kif ikun disponibbli.

(47)

Il-Kummissjoni u l-Kumitat għas-Sikurezza tal-Ajru nnutaw il-progress tajjeb li sar mill-awtoritajiet kompetenti tal-Indoneżja, u se jkomplu jħeġġu l-isforzi tagħhom lejn it-tlestija tax-xogħol tagħhom biex jistabbilixxu sistema tal-avjazzjoni kompletament konformi mal-Istandards tal-ICAO.

(48)

Konsultazzjonijiet mal-awtoritajiet kompetenti tal-Kazakistan ikomplu b’mod attiv. L-awtoritajiet kompetenti tal-Kazakistan għamlu diversi sottomissjonijiet, li abbażi tagħhom il-Kummissjoni, megħjuna mill-EASA, organizzat laqgħa ta’ konsultazzjoni fis-17 ta’ Ottubru 2012. L-awtoritajiet kompetenti tal-Kazakistan instemgħu mill-Kumitat għas-Sikurezza tal-Ajru fil-21 ta’ Novembru 2012, u għamlu preżentazzjonijiet f’dan ir-rigward.

(49)

L-awtoritajiet kompetenti tal-Kazakistan irrappurtaw li qed jimxu ‘l quddiem f’riforma ambizzjuża tas-settur tal-avjazzjoni li ilha li bdiet mill-2009 għat-tisħiħ tas-sikurezza tal-ajru. Wara l-adozzjoni ta’ kodiċi tal-avjazzjoni ċivili ġdida f’Lulju 2010 u l-adozzjoni ta’ aktar minn 100 regolament tal-avjazzjoni speċifiku, l-awtoritajiet kompetenti llum qed jimxu ‘l quddiem fl-implimentazzjoni tagħhom. Qed jimxu ‘l quddiem ukoll fil-bini tal-kapaċità tagħhom fit-twaqqif ta’ Ċentru għall-Valutazzjoni tas-Sikurezza tat-Titjiriet, u fir-reklutaġġ ta’ spetturi kwalifikati addizzjonali, li għandhom ikomplu fix-xhur li ġejjin. Qed jimxu ‘l quddiem ukoll fir-ratifika tal-inġenji tal-ajru u l-operaturi.

(50)

L-awtoritajiet kompetenti tal-Kazakistan infurmaw li huma komplew jieħdu azzjonijiet ta’ infurzar. B’ordni tal-Ministru tat-Trasport u l-Komunikazzjonijiet tat-3 ta’ Lulju 2011 dwar l-istabbiliment ta’ regoli tal-operat tat-titjiriet għall-avjazzjoni ċivili tar-Repubblika tal-Kazakistan, mill-1 ta’ Novembru 2012 ‘il quddiem, l-inġenji tal-ajru mibnija mis-Sovjetiċi u li mhumiex konformi mal-istandards tas-sikurezza tal-ICAO mhumiex permessi joperaw aktar fl-ispazju tal-ajru tal-Kazakistan; konsegwentement, l-awtoritajiet kompetenti tal-Kazakistan ipprojbixxew l-operati ta’ 7 inġenji tal-ajru tat-tip Yak-40, 2 inġenji tal-ajru tat-tip Antonov 12, 5 inġenji tal-ajru tat-tip Antonov 24, u (1) inġenju tal-ajru tat-tip Tu-134 (12).

(51)

L-awtoritajiet kompetenti tal-Kazakistan infurmaw ukoll lill-Kummissjoni li 5 trasportaturi tal-ajru waqqfu l-operati tagħhom u pprovdew evidenza li l-AOCs tagħhom kienu skadew u ma ġewx imġedda. Dawn it-trasportaturi tal-ajru huma: Asia Wings, Minas, Skybus, Skyjet u Sayakhat Airlines. Għalhekk, abbażi tal-kriterji komuni, dawn it-trasportaturi tal-ajru għandhom jitneħħew mill-Anness A.

(52)

L-awtoritajiet komuni tal-Kazakistan barra minn hekk infurmaw lill-Kummissjoni li 4 linji tal-ajru li qabel kienu involuti fit-trasport kummerċjali bl-ajru waqqfu din l-attività, naqqsu l-flotta tagħhom u ġew iċċertifikati mill-ġdid għall-attività ta’ xogħol fl-ajru; dawn il-linji tal-ajru huma: Aero Aircompany, AK Suncare Aircompany, Kazair West, Ust-Kamenogorsk Air division of EKA. Konsegwentement, abbażi tal-kriterji komuni, dawn it-trasportaturi tal-ajru għandhom jitneħħew mill-Anness A.

(53)

L-awtoritajiet kompetenti tal-Kazakistan infurmaw li b’ordni tal-Prim Ministru, l-ebda AOC ma jista’ jingħata sakemm l-awtoritajiet kompetenti ma jkunux f’pożizzjoni li jwettqu kompletament ir-responsabbiltajiet tagħhom lejn l-ICAO.

(54)

Fil-21 ta’ Novembru 2012, Air Astana nstema’ mill-Kumitat għas-Sikurezza tal-Ajru bil-għan li jipprovdi aġġornamenti dwar il-flotta tiegħu li bħalissa għaddejja minn tiġdid u għamel sottomissjonijiet f’dak ir-rigward. Huma infurmaw li diversi inġenji tal-ajru tneħħew gradwalment, u li inġenji tal-ajru ġodda qed jiddaħħlu fis-serje eżistenti B767, B757 A320 u flotot Fokker 50, flotot li diġà ssemmew taħt l-Anness B. Air Astana ddikjara u pprovda evidenza li l-prestazzjoni tas-sikurezza ta’ din il-flotta tjiebet. L-awtoritajiet kompetenti tal-Kazakistan iddikjaraw li l-operati tal-inġenji tal-ajru li bħalissa huma mniżżla fuq l-AOC huma soġġetti għal ċerta sorveljanza kontinwa. L-awtoritajiet kompetenti ta’ Aruba ipprovdew ukoll evidenza li l-ajrunavigabbilità tal-inġenji tal-ajru rreġistrati f’Aruba fuq l-AOC ta’ Air Astana huma soġġetti għal sorveljanza kontinwa skont l-istandards internazzjonali tas-sikurezza, u li huma sodisfatti bl-istandards tal-ajrunavigabbilità li ntwerew. Barra minn hekk, l-Istati Membri u l-EASA kkonfermaw li l-ebda tħassib speċifiku ma rriżulta mill-ispezzjonijiet fir-rampa li twettqu fl-ajruporti Ewropej fil-qafas tal-programm tal-SAFA. Konsegwentement, b’konformità mal-kriterji komuni, l-Anness B għandu jiġi emendat biex jippermetti, fil-livell attwali ta’ operati, l-operat tal-inġenji tal-ajru tat-tip serje B767, B757, A320 u Fokker 50 li huma elenkati jew li se jiġu elenkati fl-AOC ta’ Air Astana, dejjem jekk tali inġenji tal-ajru jkunu rreġistrati f’Aruba u l-AOC u t-tibdiliet kollha tiegħu jkunu sottomessi fil-ħin lill-Kummissjoni u l-Eurocontrol.

(55)

L-Istati Membri se jivverifikaw il-konformità effettiva mal-istandards relevanti tal-istandards tas-sikurezza permezz tal-prijoritizzazzjoni u l-ispezzjonijiet fir-rampa li għandhom isiru fuq l-inġenji tal-ajru ta’ Air Astana skont ir-Regolament (KE) Nru 965/2012. Fil-każ li r-riżultati ta’ tali verifiki, jew kwalunkwe informazzjoni tas-sikurezza relevanti oħra, jindikaw li l-istandards internazzjonali tas-sikurezza mhux qed jiġu ssodisfati, il-Kummissjoni jkollha tieħu azzjoni taħt l-awspiċji tar-Regolament (KE) Nru 2111/2005.

(56)

Il-Kummissjoni tkompli tappoġġa r-riforma ambizzjuża tas-sistema tal-avjazzjoni ċivili li adottaw l-awtoritajiet tal-Kazakistan, u tistieden lil dawn l-awtoritajiet biex b’determinazzjoni jkomplu l-isforzi tagħhom lejn it-twaqqif ta’ sistema ta’ sorveljanza tal-avjazzjoni ċivili f’konformità mal-istandards internazzjonali tas-sikurezza. Għal dak il-għan, tħeġġeġ lil dawn l-awtoritajiet li jkomplu l-implimentazzjoni tal-pjan ta’ azzjoni korrettiva miftiehem mal-ICAO, tisħaq fuq livell ta’ prijorità fuq iż-żewġ każijiet ta’ Tħassib Sinifikanti tas-Sikurezza pendenti, u ċ-ċertifikazzjoni mill-ġdid tal-operaturi kollha taħt ir-responsabbiltà tagħhom. Ladarba t-Tħassib Sinifikanti tas-Sikurezza jitneħħa għas-sodisfazzjon tal-ICAO, il-Kummissjoni tkun lesta li torganizza, bl-għajnuna tal-EASA u bl-appoġġ tal-Istati Membri, valutazzjoni fuq il-post biex tivverifika l-progress miksub u tħejji reviżjoni tal-każ fil-Kumitat għas-Sikurezza tal-Ajru.

(57)

It-trasportaturi stabbiliti fir-Repubblika Kirgiża ilhom soġġetti għal projbizzjoni fuq l-operat mill-2006. Fil-5 ta’ Ottubru 2012, il-Kummissjoni, megħjuna mill-EASA, kellha laqgħa ta’ konsultazzjoni mal-awtoritajiet kompetenti tal-Kirgiżistan, li matulha dawn l-awtoritajiet indikaw li l-Kirgiżistan adotta qafas legali ġdid u li l-ħruġ mil-lista tas-sikurezza kien prijorità għall-gvern.

(58)

L-awtoritajiet kompetenti tal-Kirgiżistan ipprovdew informazzjoni li tindika li t-trasportaturi tal-ajru li ġejjin biddlu isimhom: Eastok Avia għal Air Bishkek u Dames għal State Aviation Enterprise taħt il-Ministeru tas-Sitwazzjonijiet ta’ Emerġenza (SAEMES). Għalhekk, l-Anness A għandu jiġi emendat kif xieraq.

(59)

L-awtoritajiet kompetenti tal-Kirgiżistan infurmaw li ngħata AOC lit-trasportaturi tal-ajru li ġejjin: Manas Airways, Supreme Aviation u Sky KG Airlines. Madanakollu, ma pprovdewx evidenza li s-sorveljanza tas-sikurezza ta’ dawn it-trasportaturi tal-ajru huma assigurati f’konformità mal-istandards internazzjonali tas-sikurezza. Għalhekk, abbażi tal-kriterji komuni, huwa meqjus li dawn it-trasportaturi tal-ajru għandhom jiddaħħlu wkoll fl-Anness A.

(60)

L-awtoritajiet kompetenti tal-Kirgiżistan ipprovdew evidenza lill-Kummissjoni dwar ir-revoka tal-AOCs li ġejjin: Trast Aero, Asian Air u Kyrgyzstan Airlines. Barra minn hekk, huma nfurmaw li l-AOCs ta’ Aerostan u Itek Air kienu skadew u ma ġewx imġedda. Konsegwentement, abbażi tal-kriterji komuni, dawn it-trasportaturi tal-ajru għandhom jitneħħew mill-Anness A.

(61)

Skont ftehim mal-awtoritajiet kompetenti tal-Kirgiżistan, il-Kummissjoni tibqa’ marbuta li torganizza, bl-għajnuna tal-EASA u bl-appoġġ tal-Istati Membri, missjoni ta’ valutazzjoni tas-sikurezza għall-Kirgiżistan biex tivverifika fuq il-post l-implimentazzjoni tar-regoli l-ġodda u s-sorveljanza sodisfaċenti ta’ ċerti trasportaturi tal-ajru ċċertifikati fil-Kirgiżistan.

(62)

Konsultazzjonijiet mal-awtoritajiet kompetenti tal-Libja (LCAA) għadhom għaddejjin bil-għan li jikkonfermaw li l-Libja miexja ‘l quddiem fix-xogħol tagħha biex tirriforma s-sistema tas-sikurezza tal-avjazzjoni ċivili tagħha, u b’mod partikolari biex tassigura li s-sorveljanza tas-sikurezza tat-trasportaturi tal-ajru kollha ċċertifikati fil-Libja hija konformi mal-istandards internazzjonali tas-sikurezza.

(63)

L-LCAA, u rappreżentanti ta’ Afriqiyah, Libyan Airlines u Buraq Air, iltaqgħu mal-Kummissjoni, l-EASA, u ċerti membri tal-Kumitat għas-Sikurezza tal-Ajru fil-15 ta’ Ottubru 2012 biex jagħtu tagħrif dwar il-progress li sar. L-LCAA infurmat li kienet ħadet azzjoni regolatorja billi rrevokat l-AOCs (13) ta’ 16 mis-26 trasportatur tal-ajru Libjan. Kienu impjegaw konsulenti għal perjodu qasir, u ħadu għajnuna tal-ICAO fit-tul biex jipprovdulhom għajnuna teknika, u infurmaw li jinsabu fil-proċess li jirreklutaw għadd ta’ piloti u inġiniera addizzjonali biex jaġixxu ta’ persunal għall-ispezzjonijet.

(64)

Barra minn hekk, l-LCAA infurmat li se tidħol għal proċess ta’ ċertifikazzjoni mill-ġdid ta’ ħames stadji tat-trasportaturi tal-ajru kollha Libjani, li jibda bil-Libyan Airlines u l-Afriqiyah, u se tirrapporta dwar il-progress u jipprovdu rapporti ta’ verifika meta dawn isiru disponibbli. Fl-istess ħin, se jiżviluppaw u jimplimentaw sistema ta’ sorveljanza annwali biex jassiguraw il-konformità kontinwa mal-istandards tal-ICAO mit-trasportaturi tal-ajru tagħhom.

(65)

Il-Kumitat għas-Sikurezza tal-Ajru sema’ preżentazzjonijiet mil-LCAA, il-Libyan Airlines u l-Afriqiyah fil-21 ta’ Novembru 2012. L-LCAA iddikjarat biċ-ċar li operati mhux sikuri ma jkunux ittollerati fil-Libja. Huma kkonfermaw id-dettalji pprovduti fil-laqgħa tas-16 ta’ Ottubru, b’mod partikolari li r-rapport ta’ investigazzjoni dwar l-aċċident tal-Afriqiyah A330 jkun ippubblikat qabel Frar 2013, li l-proċess ta’ ratifika huwa ppjanat li jitlesta fil-każ tal-Libyan Airlines u l-Afriqiyah sa Diċembru 2012 u għat-trasportaturi tal-ajru li jkun baqa’ sa Diċembru 2013. Huma infurmaw ukoll li se jkomplu jieħdu azzjoni ta’ infurzar fejn meħtieġ biex irażżnu r-riskji tas-sikurezza, kif għamlu fil-każ taż-żamma temporanja fuq l-art tal-A320.

(66)

Il-Libyan Airlines informa li l-proċessi ta’ ġestjoni tas-sikurezza tiegħu u t-taħriġ tal-ekwipaġġ tiegħu ttejbu.

(67)

Afriqiyah informa lill-Kumitat għas-Sikurezza tal-Ajru dwar is-sistema tal-assigurazzjoni tal-kwalità u l-użu ta’ organizzazzjonijiet esterni tat-taħriġ. It-trasportatur tal-ajru ddikjara wkoll li, b’riżultat tal-aċċident tal-A330, l-iskedi tat-titjiriet ġew immodifikati biex inaqqsu r-riskju tal-għajja tal-pilota, twettaq programm ta’ taħriġ tal-piloti dwar proċeduri “go-around”, u nġiebu esperti esterni biex jgħinu fl-iżvilupp ta’ programmi tas-sikurezza. It-trasportatur tal-ajru esprima x-xewqa li jopera fi Spanja, Franza, ir-Renju Unit, l-Italja, il-Ġermanja u l-Awstrija, ladarba l-LCAA tkun neħħiet ir-restrizzjonijiet attwali tagħhom.

(68)

Il-Kummissjoni u l-Kumitat għas-Sikurezza tal-Ajru ġew imħeġġa mill-pjan sod tal-LCAA li jindirizzaw in-nuqqasijiet tas-sikurezza fis-sistema tal-avjazzjoni tagħhom, l-iskedi taż-żmien realistiċi għall-azzjonijiet, u l-progress li sar sa issa. Huma nnutaw li l-LCAA se żżomm ir-restrizzjonijiet attwali tagħha fuq kull operat tat-trasportaturi tal-ajru fl-UE, in-Norveġja, l-Isvizzera u l-Islanda saż-żmien li fih ċertifikazzjoni mill-ġdid kompleta f’ħames stadji titlesta u tiġi konkluża kwalunkwe sejba sinifikanti, li warajha, u bi ftehim mal-Kummissjoni, trasportaturi tal-ajru individwali jkun jista’ jingħatalhom il-permess li jibdew mill-ġdid titjiriet kummerċjali lejn l-UE, in-Norveġja, l-Isvizzera u l-Islanda.

(69)

Barra minn hekk, għal kull trasportatur tal-ajru ċċertifikat mill-ġdid, l-LCAA intrabtet li tissottometti lill-Kummissjoni informazzjoni dettaljata dwar il-proċess ta’ ċertifikazzjoni mill-ġdid, kif ukoll li tiltaqa’ mal-Kummissjoni u l-Istati Membri biex tiddiskuti fid-dettall il-verifiki relevanti, is-sejbiet, l-azzjonijiet ta’ rimedju meħuda u l-azzjonijiet ta’ għeluq, flimkien ma’ dettalji tal-pjanijiet biex titkompla s-sorveljanza qabel ma jsir qbil dwar l-illaxkar ta’ restrizzjonijiet. Jekk din l-informazzjoni tonqos milli turi, b’mod illi jissodisfa lill-Kummissjoni u lill-Istati Membri, li l-proċess ta’ ċertifikazzjoni mill-ġdid intemm effettivament u li sorveljanza kontinwa sostenibbli qiegħda fis-seħħ skont l-istandards tal-ICAO, il-Kummissjoni ikollha tieħu miżuri biex tevita li t-trasportaturi tal-ajru joperaw fl-ispazju tal-ajru tal-UE, in-Norveġja, l-Isvizzera u l-Islanda. Jekk ikunu meħtieġa iktar kjarifiki, il-Kummissjoni tista’ tiddeċiedi li twettaq żjara fuq il-post qabel l-illaxkar ta’ kwalunkwe restrizzjonijiet.

(70)

Għat-trasportaturi tal-ajru li sussegwentement jiġu permessi li joperaw fl-UE, l-Istati Membri se jivverifikaw il-konformità effettiva mal-istandards relevanti tas-sikurezza permezz tal-prijoritizzazzjoni tal-ispezzjonijiet fir-rampa li għandhom jitwettqu fuq l-inġenji tal-ajru ta’ dawn it-trasportaturi skont ir-Regolament (KE) Nru 965/2012. Fil-każ li r-riżultati ta’ tali verifiki, jew kwalunkwe informazzjoni tas-sikurezza relevanti oħra, jindikaw li l-istandards internazzjonali tas-sikurezza mhux qed jiġu ssodisfati, il-Kummissjoni jkollha tieħu azzjoni taħt l-awspiċji tar-Regolament (KE) Nru 2111/2005.

(71)

It-trasportaturi tal-ajru ċċertifikati fil-Mawritanja ilhom elenkati fl-Anness A minn Novembru 2010 (14). L-awtoritajiet kompetenti tal-Mawritanja (ANAC) minn dak iż-żmien ‘l hawn impenjaw ruħhom f’konsultazzjonijiet attivi mal-Kummissjoni bil-għan li jaġġornaw ruħhom dwar il-progress li sar fir-riforma tar-regolament tal-avjazzjoni ċivili, u għamlu għadd kbir ta’ sottomissjonijiet f’dak ir-rigward. Saru żewġ laqgħat mal-ANAC u Mauritania Airlines fl-24 ta’ Settembru u fl-10 ta’ Ottubru 2012. L-ANAC u Mauritania Airlines International instemgħu wkoll mill-Kumitat għas-Sikurezza tal-Ajru fil-21 ta’ Novembru 2012.

(72)

L-ANAC infurmat li ttieħdu azzjonijiet deċiżivi biex jirriformaw is-sistema ta’ sorveljanza tas-sikurezza, u li diġà saru għadd ta’ kisbiet: b’mod partikolari, it-tfassil ta’ kodiċi tal-ajru ċivili ġdida, l-emenda tal-leġiżlazzjoni tal-avjazzjoni ċivili biex tallinjaha mal-Anness għall-Konvenzjoni ta’ Chicago, tibdiliet għall-ġestjoni, l-istruttura u l-persunal tal-ANAC, u l-istabbiliment ta’ sett sħiħ ta’ proċeduri għaċ-ċertifikazzjoni u s-sorveljanza kontinwa tat-trasportaturi tal-ajru.

(73)

L-ANAC infurmat li ħadu azzjoniijet ta’ infurzar effettivi. L-ANAC infurmat ukoll li l-AOC ta’ Mauritania Airways skada fil-15 ta’ Diċembru 2010, u ma ġiex imġedded billi t-trasportatur tal-ajru waqqaf l-attività tiegħu. L-ANAC infurmat ukoll li ċ-ċertifikati u d-derogi miżmuma mit-trasportatur tal-ajru Class Aviation ġew irrevokati f’Jannar 2011.

(74)

L-ICAO wettqet żewġ missjonijiet ta’ koordinazzjoni u validazzjoni (ICVM) fil-Mawritanja f’April u Settembru 2012 biex tivvalida l-progress li sar mill-Istat. Ir-rapporti finali ta’ dawn il-missjonijiet jikkonfermaw li nkiseb progress kbir, b’titjib ta’ 47 % fil-konformità ġenerali mal-istandards internazzjonali tas-sikurezza. Fl-1 ta’ Ottubru 2012, l-ICAO ikkonfermat lill-Kummissjoni l-progress eċċezzjonali li sar mill-ANAC. Madanakollu, dawn il-missjonijiet ikkonkludew ukoll dwar il-ħtieġa ta’ implimentazzjoni effettiva tal-azzjonijiet korrettivi kollha, b’mod partikolari fir-rigward tal-obbligi ta’ sorveljanza u r-reżoluzzjoni tal-każijiet indikati ta’ tħassib tas-sikurezza, fejn l-ICAO tirrapporta li n-nuqqas ta’ implimentazzjoni effettiva tal-istandards internazzjonali tas-sikurezza tilħaq il-51 % u l-58 % rispettivament. L-ANAC indikat li beħsiebha twettaq l-azzjonijiet tagħha b’determinazzjoni biex ittejjeb aktar il-konformità mal-istandards tal-ICAO.

(75)

Fil-konsultazzjonijiet tagħha mal-ANAC, il-Kummissjoni ivvalutat speċifikament ir-reqqa tas-sorveljanza tas-sikurezza tal-Mauritania Airlines International. In-nuqqasijiet ġew identifikati fiċ-ċertifikazzjoni inizjali ta’ Mauritania Airlines International minħabba li l-AOC tiegħu nħareġ fit-8 ta’ Mejju 2011 mingħajr ma pprovda evidenza li n-nuqqas ta’ konformità identifikat matul iċ-ċertifikazzjoni inizjali tal-linja tal-ajru, b’mod partikolari l-awtorizzazzjonijiet tal-RVSM (reduced vertical separation minima), in-nuqqas ta’ monitoraġġ tad-dejta tat-titjiriet, u n-nuqqas ta’ persunal ta’ fuq l-art, ġie effettivament rrettifikat qabel il-ħruġ tal-AOC. Madanakollu, l-ANAC u Mauritania Airlines International irrappurtaw u pprovdew evidenza li n-nuqqasijiet kollha ssolvew fil-25 ta’ Ottubru 2012. L-ANAC ddikjarat u pprovdiet evidenza li t-trasportatur tal-ajru issa huwa soġġett għal sorveljanza kontinwa skont l-istandards internazzjonali tas-sikurezza.

(76)

Il-Kumitat għas-Sikurezza tal-Ajru jilqa’ l-progress kbir irrappurtat mill-awtoritajiet kompetenti tal-Mawritanja fir-rettifika tan-nuqqasijiet identifikati mill-ICAO u r-reżoluzzjoni tan-nuqqasijiet identifikati fiċ-ċertifikazzjoni inizjali ta’ Mauritania Airlines International. Waqt li jitqiesu l-azzjonijiet ta’ infurzar effettiv li ġew deċiżi u implimentati mill-ANAC fir-rigward tat-trasportaturi tal-ajru l-oħra li ma għadhomx jeżistu, abbażi tal-kriterja komuni, huwa meqjus li t-trasportaturi tal-ajru kollha ċċertifikati fil-Mawritanja għandhom jitneħħew mill-Anness A.

(77)

L-ANAC ddikjarat u kkonfermat bil-kitba li Mauritania Airlines International mhux beħsiebu jerġa’ jopera t-titjiriet għall-UE fi żmien qasir, ħlief għal Las Palmas de Gran Canaria (Spanja) u mhux qabel Frar 2013.

(78)

L-awtoritajiet kompetenti ta’ Spanja indikaw li huma pprovdew għajnuna teknika lill-ANAC u kkonfermaw li kienu ssodisfati bit-titjiriet li se jerġgħu jibdew joperaw għal Las Palmas de Gran Canaria.

(79)

L-Istati Membri se jivverifikaw il-konformità effettiva mal-istandards relevanti tas-sikurezza permezz tal-prijoritizzazzjoni tal-ispezzjonijiet fir-rampa li għandhom jitwettqu fuq l-inġenji tal-ajru ta’ trasportaturi tal-ajru lliċenzjati fil-Mawritanja skont ir-Regolament (KE) Nru 965/2012.

(80)

Il-Kummissjoni, bl-għajnuna tal-EASA u bl-appoġġ tal-Istati Membri, beħsiebha tagħmel żjara ta’ valutazzjoni tas-sikurezza fuq il-post biex tikkonferma l-implimentazzjoni sodisfaċenti tal-miżuri meħuda mill-ANAC.

(81)

Fil-każ li r-riżultati ta’ tali verifiki, jew kwalunkwe informazzjoni tas-sikurezza relevanti oħra, jindikaw li l-istandards tas-sikurezza internazzjonali mhux qed jiġu ssodisfati, il-Kummissjoni jkollha tieħu azzjoni taħt l-awspiċji tar-Regolament (KE) Nru 2111/2005.

(82)

It-trasportaturi tal-ajru ċċertifikati fil-Filippini ilhom elenkati fl-Anness A mill-31 ta’ Marzu 2010 (15). Konsultazzjonijiet mal-awtoritajiet kompetenti tal-Filippini (CAAP) minn dak iż-żmien ‘l hawn ġew segwiti bil-għan li jinkisbu aġġornamenti dwar il-progress li sar fir-riforma tar-regolamenti tal-avjazzjoni ċivili. Saru diversi sottomissjonijiet u saret vidjokonferenza fit-18 ta’ Novembru 2012 bejn il-Kummissjoni, megħjuna mill-EASA, u s-CAAP.

(83)

Is-CAAP infurmat li l-ICAO wettqet missjoni ta’ koordinazzjoni u validazzjoni fuq il-post (ICVM) f’Ottubru 2012, u tat il-fehma tagħha dwar ir-riżultati preliminari, li jiżvelaw titjib ta’ 7 % fil-konformità ġenerali mal-istandards tal-ICAO. Madanakollu, it-Tħassib Sinifikanti tas-Sikurezza nnotifikat mill-ICAO lill-Partijiet Kontraenti kollha tal-Konvenzjoni ta’ Chicago fir-rigward tas-sorveljanza tas-sikurezza tat-trasportaturi tal-ajru jibqa’ miftuħ, u l-ICAO qajmet aktar tħassib tas-sikurezza rigward ir-reġistru tal-inġenju tal-ajru.

(84)

Is-CAAP ikkonfermat li AviaTour Fly’In kienet involuta f’inċident fatali fit-18 ta’ Awwissu 2012, it-tieni inċident fatali wara dak li seħħ f’Marzu 2012 (16). Is-CAAP ma weġbitx b’mod adegwat għat-talbiet għall-informazzjoni mill-Kummissjoni, u b’mod partikolari naqset milli tipprovdi informazzjoni dwar il-validità tal-AOC ta’ dan it-trasportatur tal-ajru li, skont is-sottomissjonijiet preċedenti, kellu jiskadi fl-14 ta’ Awwissu 2012, u dwar ir-riżultati li għadhom ħerġin tal-investigazzjonijiet dwar iż-żewġ inċidenti.

(85)

Filwaqt li l-Kummissjoni rċeviet informazzjoni li t-trasportaturi tal-ajru South West Air Corporation, Airgurus u Skyjet bdew transport kummerċjali bl-ajru, is-CAAP ma weġbitx b’mod adegwat għat-talbiet għall-informazzjoni mill-Kummissjoni, u b’mod partikolari naqset milli tipprovdi l-AOCs ta’ dawn it-trasportaturi tal-ajru flimkien mal-ispeċifikazzjonijiet kollha tal-operat; is-CAAP naqset ukoll milli turi li ċ-ċertifikazzjoni u s-sorveljanza kontinwa ta’ dawn it-trasportaturi tal-ajru jikkonformaw bis-sħiħ mal-istandards tas-sikurezza internazzjonali applikabbli. Għalhekk, abbażi tal-kriterji komuni, huwa meqjus li dawn it-trasportaturi tal-ajru għandhom jiddaħħlu wkoll fl-Anness A.

(86)

Il-Kummissjoni tkompli tappoġġa r-riforma ambizzjuża tas-sistema tal-avjazzjoni ċivili li adottaw l-awtoritajiet tal-Filippini, u tistieden lil dawn l-awtoritajiet li jkomplu b’determinazzjoni l-isforzi tagħhom lejn it-twaqqif ta’ sistema ta’ sorveljanza tal-avjazzjoni ċivili f’konformità mal-istandards tas-sikurezza internazzjonali. Għal dak il-għan, tħeġġeġ lil dawn l-awtoritajiet li jkomplu l-implimentazzjoni tal-pjan ta’ azzjoni korrettiva li ġie miftiehem mal-FAA u l-ICAO, tiffoka bi prijorità fuq it-Tħassib Sinifikanti tas-Sikurezza, iċ-ċertifikazzjoni mill-ġdid tal-operaturi kollha taħt ir-responsabbiltà tagħhom, u azzjonijiet ta’ infurzar effettiv fil-każ tat-tħassib tas-sikurezza jew il-ksur tal-leġiżlazzjoni applikabbli. Ladarba l-FAA tkun immodifikat il-valutazzjoni tagħha tal-konformità tal-Filippini mal-istandards ta’ valutazzjoni internazzjonali u kull Tħassib Sinifikanti tas-Sikurezza jitneħħa għas-sodisfazzjon tal-ICAO, il-Kummissjoni tkun lesta li torganizza, bl-għajnuna tal-EASA u bl-appoġġ tal-Istati Membri, valutazzjoni fuq il-post biex tivverifika l-progress miksub u tħejji reviżjoni tal-każ fil-Kumitat għas-Sikurezza tal-Ajru.

(87)

Il-Kummissjoni, megħjuna mill-EASA, wettqet żjara ta’ valutazzjoni tas-sikurezza għar-Renju Ħaxemita tal-Ġordan bejn it-30 ta’ Settembru u l-4 ta’ Ottubru 2012, sabiex tivverifika l-implimentazzjoni sodisfaċenti tal-miżuri meħuda mill-awtoritajiet kompetenti għall-avjazzjoni ċivili (Il-Kummissjoni Regolatorja tal-Avjazzjoni Ċivili – CARC) u t-trasportatur tal-ajru Jordan Aviation (PSC) biex tindirizza t-tħassib tas-sikurezza deskritt fir-Regolament (KE) Nru 1197/2011.

(88)

Matul iż-żjara, is-CARC ipprovdiet lit-tim ta’ valutazzjoni evidenza tal-effettività tal-pjan ta’ azzjoni preventiva u korrettiva tagħha żviluppat u implimentat wara l-impożizzjoni tar-restrizzjonijiet operattivi tal-UE fuq it-trasportatur tal-ajru Jordan Aviation. Uriet ukoll li issa kapaċi twettaq l-obbligi tagħha skont l-istandards tal-ICAO għas-sorveljanza tal-operaturi li għalihom ħarġet AOC. It-tim ta’ valutazzjoni rrapporta impenn kredibbli mis-CARC biex timplimenta l-pjan ta’ azzjoni korrettiva u preventiva tiegħu, titjib sinifikanti li nkiseb sal-lum il-ġurnata kif ukoll l-approċċ miftuħ, kooperattiv u kostruttiv tiegħu fl-indirizzar tan-nuqqasijiet identifikati fil-proċeduri tagħhom. Filwaqt li tirċievi konferma li l-proċeduri eżistenti għas-sorveljanza jistgħu jiggarantixxu li t-trasportaturi tal-ajru jwettqu azzjonijiet korrettivi effettivi fil-ħin fil-każ li jiġu identifikati nuqqasijiet ta’ sikurezza, it-tim ta’ valutazzjoni madanakollu identifika oqsma għal titjib, b’mod partikolari fir-rigward tal-proċedura relatata mal-approvazzjoni tal-Lista tat-Tagħmir Minimu (MEL), kif ukoll dik relatata mal-approvazzjoni tat-trasport ta’ oġġetti perikolużi.

(89)

Minn Novembru 2011, it-trasportatur tal-ajru Jordan Aviation kien soġġett għal sorveljanza stretta mis-CARC permess ta’ enfasi fuq l-ispezzjonijiet fir-rampa, spezzjonijiet fir-rotta, reviżjonijiet tal-ajrunavigabbilità tal-inġenji tal-ajru, u reviżjonijiet tal-Organizzazzjoni tal-Ġestjoni tal-Ajrunavigabbilità Kontinwa. Jordan Aviation ġiet ivvalutata wkoll għall-konformità mir-Regolamenti tal-Avjazzjoni Ċivili tal-Ġordan matul verifika annwali. Ir-riżultati ta’ dawn il-verifiki mmiraw lejn titjib sinifikanti fil-qasam tal-ġestjoni tal-ajrunavigabbilità kontinwa. Barra minn hekk, barra mit-talba tal-operatur tal-ajru biex iżid tip ta’ inġenju tal-ajru ġdid (l-Airbus A330-200) mal-flotta tiegħu, is-CARC ipproċediet b’valutazzjoni tal-kapaċità tal-Jordan Aviation għad-dħul ta’ tip ta’ inġenju tal-ajru ġdid. Il-varjazzjoni tal-AOC tlestiet fid-9 ta’ Mejju 2012 u l-Airbus A330-200 ġie miżjud mal-Ispeċifikazzjonijiet tal-Operat tal-AOC ta’ Jordan Aviation.

(90)

Matul iż-żjara, it-tim ta’ valutazzjoni ġie pprovdut b’evidenza dwar l-effettività tal-pjan ta’ azzjoni korrettiva u preventiva żviluppat u implimentat minn Jordan Aviation. Filwaqt li t-trasportatur tal-ajru kien kapaċi juri li s-sistema mqiegħda fis-seħħ għall-ġestjoni tal-ajrunavigabbilità kontinwa issa hija adegwata biex tassigura li l-inġenji tal-ajru tat-trasportatur tal-ajru jibqgħu ajrunavigabbli, madanakollu t-tim identifika oqsma għat-titjib, b’mod partikolari fir-rigward tal-proċeduri għall-operat ta’ rotta ġdida u l-ippjanar tal-ekwipaġġ.

(91)

Wara talba li saret mis-CARC u Jordan Aviation għal valutazzjoni mill-ġdid tar-restrizzjonijiet operattivi imposti mir-Regolament (KE) Nru 1197/2011, u meta wieħed iqis li għalhekk il-kundizzjonijiet intlaħqu, is-CARC u Jordan Aviation ġew mistiedna biex jagħmlu preżentazzjonijiet lill-Kumitat għas-Sikurezza tal-Ajru. Is-smigħ seħħ fil-21 ta’ Novembru 2012. Matul il-laqgħa, is-CARC u Jordan Aviation ipprovdew ukoll id-dettalji tal-pjan ta’ azzjoni korrettiva stabbilit biex jindirizza l-osservazzjonijiet li saru matul iż-żjara fuq il-post.

(92)

Il-Kumitat għas-Sikurezza tal-Ajru laqa’ it-titjib miksub mis-CARC u Jordan Aviation fl-implimentazzjoni tal-istandards tas-sikurezza internazzjonali u qies li limitazzjonijiet ulterjuri ta’ dan it-trasportatur tal-ajru ma għadhomx meħtieġa aktar. Għaldaqstant, abbażi tal-kriterji komuni, huwa meqjus li dan it-trasportatur tal-ajru għandu jitneħħa mill-Anness B.

(93)

L-Istati Membri se jivverifikaw il-konformità effettiva mal-istandards relevanti tas-sikurezza permezz tal-prijoritizzazzjoni tal-ispezzjonijiet fir-rampa li għandhom jitwettqu fuq l-inġenji tal-ajru skont ir-Regolament (UE) Nru 965/2012.

(94)

It-trasportatur tal-ajru Air Madagascar huwa soġġett għal restrizzjonijiet operattivi u huwa elenkat fl-Anness B skont ir-Regolament (KE) Nru 390/2011. Sa minn dak iż-żmien twettqu konsultazzjonijiet mal-awtoritajiet kompetenti tal-Madagaskar (ACM) u l-Air Madagascar bil-għan li jikseb aġġornamenti dwar l-implimentazzjoni tal-azzjonijiet korrettivi.

(95)

L-ICAO wettqet Missjoni ta’ Validazzjoni Koordinata (ICVM) mill-21 sal-25 ta’ Mejju 2012, li kkonfermat progress żgħir minħabba li n-nuqqas ta’ implimentazzjoni effettiva tal-istandards tal-ICAO kien ivvalutat għal 44,4 %, li niżel minn 70,7 %. Madanakollu, il-missjoni kkonkludiet ukoll dwar il-ħtieġa li l-implimentazzjoni effettiva tal-azzjonijiet korrettivi kollha titkompla, b’mod partikolari fir-rigward tad-dispożizzjonijiet għat-taħriġ u l-kwalifikazzjoni tal-persunal tekniku, l-obbligi tas-sorveljanza u r-reżoluzzjonijiet tat-tħassib tas-sikurezza fejn 67 %, 58 % u 86 % tal-istandards tal-ICAO rispettivament ma ġewx implimentati b’mod effettiv.

(96)

L-ACM u t-trasportatur tal-ajru Air Madagascar talbu li jinstemgħu mill-Kumitat għas-Sikurezza tal-Ajru u għamlu dan fl-20 ta’ Novembru 2012. Huma ppreżentaw il-progress li sar fl-implimentazzjoni tal-pjanijiet ta’ azzjoni rispettivi tagħhom. L-ACM infurmaw ukoll li daħlu għal kuntratt ta’ sentejn biex jiksbu għajnuna teknika esterna biex isostnu s-sorveljanza tas-sikurezza tagħhom. Il-Kumitat għas-Sikurezza tal-Ajru ħa nota tal-progress irrappurtat u laqa’ l-isforzi li saru mill-ACM biex itejbu l-kapaċità li jissodisfaw l-obbligi tiegħu fir-rigward tar-rekwiżiti tal-ICAO.

(97)

Il-Kumitat għas-Sikurezza tal-Ajru jħeġġeġ lill-ACM biex tkompli l-isforzi tagħha lejn ir-reżoluzzjoni tas-sejbiet tan-nuqqas ta’ konformità identifikati matul il-verifika tal-ICVM li twettqet mill-ICAO u speċjalment fil-qasam tas-sorveljanza tal-operaturi tal-ajru ċċertifikati fil-Madagaskar. Il-Kummissjoni Ewropea, megħjuna mill-EASA u bl-appoġġ tal-Istati Membri, hija lesta li twettaq valutazzjoni fuq il-post ladarba l-implimentazzjoni tal-pjanijiet ta’ azzjoni imressqa quddiem l-ACM u l-Air Madagascar tkun waslet fi stat avvanzat biżżejjed.

(98)

Il-Kummissjoni, megħjuna mill-EASA u ċerti Stati Membri, wettqet żjara ta’ valutazzjoni tas-sikurezza għall-Federazzjoni Russa mill-4 sat-8 ta’ Ġunju 2012 sabiex tivverifika l-implimentazzjoni sodisfaċenti tal-miżuri meħuda mill-awtoritajiet kompetenti tal-Federazzjoni Russa (FATA) u t-trasportatur tal-ajru VIM AVIA iċċertifikat fil-Federazzjoni Russa biex jindirizzaw it-tħassib tas-sikurezza deskritt fir-Regolament (KE) Nri 1197/2011 (17) u 295/2012 (18). Ir-riżultati ta’ din il-valutazzjoni żvelaw li VIM AVIA mexa ‘l quddiem bit-twaqqif ta’ sistema ta’ ġestjoni tas-sikurezza. Fir-rigward tal-pjanijiet ta’ azzjoni korrettivi ta’ VIMA AVIA, madanakollu, kien jidher li tlieta mit-12-il azzjoni korrettiva ma setgħux jitqiesu li ġew implimentati b’mod effettiv. VIM AVIA ġie mistieden biex jirrevedi u jlesti l-pjan ta’ azzjoni tiegħu kif xieraq qabel ikompli jopera t-titjiriet tiegħu għall-UE.

(99)

FL-20 ta’ Ġunju 2012, FATA infurmat lill-Kummissjoni li t-trasportatur tal-ajru ġie awtorizzat mill-ġdid b’effett minn dik id-data, biex itir lejn u mill-UE minħabba li kienet wettqet b’suċċess azzjonijiet korrettivi addizzjonali relatati ma’ dawn it-tliet oqsma.

(100)

Il-Kummissjoni, wara li rrevediet il-miżuri addizzjonali rrappurtati, esprimiet tħassib dwar kif il-kumpanija setgħet wettqithom b’mod effettiv fi żmien daqshekk qasir. L-attenzjoni tal-awtoritajiet kompetenti Russi inġibdet ukoll lejn ir-riżultati mhux sodisfaċenti ta’ spezzjoni fir-rampa mwettqa fi Spanja fis-26 ta’ Ġunju 2012 (19), li indikat nuqqasijiet fl-ajrunavigabbilità kontinwa u d-dipartimenti ta’ manutenzjoni ta’ VIM AVIA. L-awtoritajiet kompetenti Russi ġew mistiedna wkoll biex jipprovdu informazzjoni dwar inċident serju li sar lil VIM AVIA fl-24 ta’ Ġunju 2012.

(101)

Fid-dawl ta’ dak li ntqal aktar ‘il fuq, fid-19 ta’ Ottubru 2012 il-Kummissjoni, l-EASA u ċerti Membri tal-Kumitat għas-Sikurezza tal-Ajru għamlu laqgħa mal-awtoritajiet kompetenti Russi u VIM AVIA. VIM AVIA rrapporta li miżuri korrettivi ttieħdu u ingħalqu fir-rigward tal-kwistjonijiet miftuħa kollha identifikati fir-rapport finali tal-missjoni ta’ valutazzjoni tas-sikurezza fir-Russja li twettqet f’Ġunju 2012 u wara l-laqgħa pprovda evidenza għal azzjonijiet ta’ għeluq. FATA infurmat li wara inċident serju li seħħ lil VIM AVIA fl-24 ta’ Ġunju 2012, kienu nfetħu żewġ investigazzjonijiet u pprovdiet sommarju tal-konklużjonijiet tagħhom.

(102)

Spanja kkonfermat lill-Kumitat għas-Sikurezza tal-Ajru li s-sejbiet kollha tal-aħħar spezzjonijiet fir-rampa mwettqa fi Spanja għal VIM AVIA ingħalqu. Spanja infurmat ukoll dwar il-laqgħa li saret f’Madrid ma’ rappreżentanti ta’ VIM AVIA, u nnotat l-attitudni ta’ kooperazzjoni ta’ din il-kumpanija.

(103)

L-Istati Membri se jivverifikaw il-konformità effettiva mal-istandards relevanti tas-sikurezza permezz tal-prijoritizzazzjoni tal-ispezzjonijiet fir-rampa li għandhom jitwettqu fuq l-inġenji tal-ajru ta’ dan it-trasportatur tal-ajru fl-ajruporti Ewropej. Jekk ir-riżultati ta’ dawn l-ispezzjonijiet fir-rampa juru repetizzjoni tat-tħassib tas-sikurezza rigward l-operati ta’ VIM AVIA, il-Kummissjoni se jkollha tieħud azzjoni fil-qafas tar-Regolament (KE) Nru 2111/2005.

(104)

Fid-9 ta’ Mejju 2012 l-Awtoritajiet Kompetenti tar-Rwanda kitbu lill-Kummissjoni u pprovdew evidenza li l-AOC ta’ Silverback Cargo Freighters ġie rrevokat fit-30 ta’ Ottubru 2009. Għaldaqstant, abbażi tal-kriterji komuni, huwa meqjus li Silverback Cargo Freighters għandu jitneħħa mill-Anness A.

(105)

Il-Kummissjoni u l-Kumitat għas-Sikurezza tal-Ajru, madanakollu, innutaw li r-Rwanda tibqa’ soġġetta għal Tħassib Sinifikanti tas-Sikurezza maħruġ wara l-verifika tal-USOAP tal-ICAO fl-2007 u nnotifikat mill-ICAO lill-Istati kollha li jiffurmaw parti mill-Konvenzjoni ta’ Chicago. Il-Kummissjoni għalhekk tħeġġeġ l-awtoritajiet kompetenti tar-Rwanda biex ikomplu l-isforzi tagħhom biex jindirizzaw il-kwistjonijiet tas-sikurezza u se jkomplu jimmoniterjaw mill-qrib is-sitwazzjoni tas-sikurezza fl-avjazzjoni fir-Rwanda biex jassiguraw li kwalunkwe tħassib li għad baqa’ dwar is-sikurezza jiġi indirizzat b’mod effettiv.

1.

L-Anness A għandu jinbidel bit-test stipulat fl-Anness A ta’ dan ir-Regolament.

2.

L-Anness B għandu jinbidel bit-test stipulat fl-Anness B ta’ dan ir-Regolament.