15.9.2011   

MT

Il-Ġurnal Uffiċjali tal-Unjoni Ewropea

L 238/1

(1)

Il-Kummissjoni, permezz tar-Regolament (UE) Nru 258/2011 (2) (“ir-Regolament provviżorju”) imponiet dazju antidumping provviżorju fuq l-importazzjonijiet tal-madum taċ-ċeramika li joriġinaw fir-Repubblika Popolari taċ-Ċina (“iċ-Ċina”).

(2)

Ġiet ippubblikata rettifika (3) fil-31 ta’ Mejju 2011 sabiex jiġu korretti ċerti żbalji tipografiċi, b’mod partikolari l-ismijiet ta’ ċerti produtturi esportaturi Ċiniżi li ġew miktuba ħażin fl-Anness I tar-Regolament provviżorju.

(3)

Wara l-verifika ta’ ċerti pretensjonijiet riċevuti wara l-pubblikazzjoni tar-rettifika, li nstabu ġustifikati, ġie nnutat li ċerti ismijiet oħra kienu miktuba ħażin. L-ismijiet korretti għall-kumpaniji kollha soġġetti għad-dazju medju peżat huma elenkati fl-Anness I ta’ dan ir-Regolament.

(4)

Qed jiġi mfakkar li l-proċedura nbdiet bħala riżultat ta’ lment imressaq mill-Assoċjazzjoni Ewropea tal-manifatturi tal-madum taċ-ċeramika (CET) (“il-kwerelant”) f’isem produtturi li jirrappreżentaw proporzjon kbir, f’dan il-każ iżjed minn 30 % tal-produzzjoni totali tal-Unjoni tal-madum taċ-ċeramika. Kif stabbilit fil-premessa (24) tar-Regolament provviżorju, l-investigazzjoni tad-dumping u d-dannu kopriet il-perjodu mill-1 ta’ April 2009 sal-31 ta’ Marzu 2010 (“il-perjodu tal-investigazzjoni” jew “il-PI”). Rigward it-tendenzi rilevanti għall-valutazzjoni tad-dannu, il-Kummissjoni analizzat dejta li tkopri l-perjodu mill-1 ta’ Jannar 2007 sal-aħħar tal-PI (“il-perjodu kkunsidrat”).

(5)

Sussegwentement għad-divulgazzjoni tal-fatti u l-kunsiderazzjonijiet essenzjali li fuq il-bażi tagħhom ġie deċiż li jiġu imposti miżuri provviżorji (“id-divulgazzjoni provviżorja”), ħafna partijiet interessati għamlu sottomissjonijiet bil-miktub sabiex jesprimu l-fehmiet tagħhom dwar il-konklużjonijiet provviżorji. Il-partijiet li talbu dan ingħataw l-opportunità li jinstemgħu u seduti ta’ smigħ mal-Uffiċjal tas-seduta saru fuq talba ta’ żewġ partijiet interessati.

(6)

Il-Kummissjoni kompliet tfittex informazzjoni li kien jidhrilha li hija meħtieġa għall-konklużjonijiet definittivi tagħha.

(7)

Il-partijiet kollha ġew mgħarrfa bil-fatti u l-kunsiderazzjonijiet essenzjali li fuq il-bażi tagħhom kien maħsub li tiġi rakkomandata l-impożizzjoni ta’ dazju antidumping definittiv fuq l-importazzjonijiet tal-madum taċ-ċeramika li joriġina miċ-Ċina u l-ġbir definittiv tal-ammonti garantiti permezz tad-dazju provviżorju. Ingħataw ukoll perjodu ta’ żmien li fih setgħu jagħmlu rappreżentazzjonijiet sussegwenti għal din id-divulgazzjoni.

(8)

Fejn kien xieraq ġew ikkunsidrati l-kummenti verbali u bil-miktub sottomessi mill-partijiet interessati.

(9)

Waqt l-għażla tal-kampjun tal-produtturi esportaturi, ġie inkluż “grupp” applikant ta’ kumpaniji minħabba li l-volum ta’ esportazzjoni kkombinat taż-żewġ produtturi inkluż fil-grupp allegat flimkien kien jagħmilhom it-tielet l-ikbar esportatur skont il-volum lejn is-suq tal-Unjoni. Dawn il-kumpaniji ddikjaraw relazzjoni bbażata fuq l-Artikolu 143(1)(b) tar-Regolament tal-Kummissjoni (KEE) Nru 2454/93 tat-2 ta’ Lulju 1993 li jiffissa dispożizzjonijiet għall-implementazzjoni tar-Regolament tal-Kunsill (KEE) Nru 2913/92 li jistabbilixxi l-Kodiċi Doganali Komunitarju (4) li jipprovdi li l-partijiet għandhom jitqiesu relatati jekk “huma msieħba rikonoxxuti legalment fin-negozju”. Sussegwentement l-investigazzjoni żvelat li dawn il-kumpaniji ma kinux relatati f’dan is-sens u, kif imsemmi fil-premessa (35) tar-Regolament provviżorju, dawn iż-żewġ produtturi ġew trattati bħala entitajiet separati.

(10)

Ħafna produtturi esportaturi għamlu sottomissjonijiet li jsostnu li dawn il-kumpaniji kellhom jiġu esklużi mill-kampjun billi ppreżentaw informazzjoni falza jew qarrieqa. Dawn il-produtturi sostnew ukoll li, konsegwentement, il-marġni medja ta’ dumping peżat kellu jiġi kkalkulat mingħajr ma jiġu kkunsidrati ż-żewġ kumpaniji meħuda bħala kampjun.

(11)

F’dan ir-rigward, qed jiġi nnotat li l-informazzjoni pprovduta minn dawn il-partijiet qabel l-għażla tal-kampjun ġiet ikkunsidrata suffiċjenti sabiex jiġu kkunsidrati bħala relatati u b’kunsiderazzjoni tal-volum ikkombinat tal-bejgħ tal-esportazzjonijiet tagħhom lejn is-suq tal-Unjoni ġew inklużi fil-kampjun. Wara ż-żjarat ta’ verifika fuq il-post ta’ dawn iż-żewġ kumpaniji, il-kwistjoni tar-relazzjoni bejniethom ġiet eżaminata fid-dettall. L-informazzjoni pprovduta mill-kumpaniji bħala appoġġ għad-dikjarazzjoni tagħhom li kienu relatati ġiet verifikata iżda nstab li ma kinitx biżżejjed sabiex jiġu kkunsidrati bħala relatati, kuntrarjament għall-fehma tal-kumpaniji stess dwar din il-kwistjoni.Bħala riżultat ta’ dan, ġie konkluż li dawn il-kumpaniji ma setgħux jiġu kkunsidrati bħala relatati skont l-Artikolu 143(1)(b) tar-Regolament (KEE) Nru 2454/93. Billi l-kumpaniji kkooperaw fl-investigazzjoni, inkluż billi pprovdew informazzjoni rigward ir-relazzjoni allegata ta’ bejniethom, huwa kkunsidrat li ma hemm l-ebda raġuni sabiex jiġu esklużi mill-kampjun. F’dawn iċ-ċirkostanzi, din il-pretensjoni qiegħda tiġi miċħuda.

(12)

Barra dan, anki jekk issir is-suppożizzjoni li l-għażla ta’ kumpaniji oħra għall-kampjun waqt l-investigazzjoni kienet twassal għal volum konsiderevolment ikbar ta’ esportazzjonijiet lejn is-suq tal-Unjoni waqt il-PI li kien qed jiġi kopert, kien ikun diffiċli, fiż-żmien disponibbli, li tiġi investigata kwalunkwe kumpanija magħżula għall-ewwel darba. Għalhekk, minkejja li nstab li dawn il-kumpaniji mhumiex relatati, il-kampjun għadu konformi mal-kriterji previsti fir-Regolament bażiku. Finalment qed jiġi osservat li ma kien hemm l-ebda evidenza li l-kumpaniji allegaw deliberatament li kienu relatati sabiex jiġu inklużi fil-kampjun.

(13)

Fin-nuqqas ta’ kwalunkwe kumment ieħor, il-premessi (5) u (6) tar-Regolament provviżorju b’dan qegħdin jiġu kkonfermati.

(14)

Wara l-impożizzjoni tal-miżuri provviżorji parti partikolari sostniet li l-ebda wieħed mill-produtturi tal-Unjoni li qegħdin jappoġġaw l-ilment ma pprovdew tweġibiet kampjun u għalhekk għandu jiġi kkunsidrat li mhumiex qegħdin jikkooperaw mal-proċedura. Dan l-argument ġie sostnut wara d-divulgazzjoni finali.

(15)

Rigward il-pretensjoni li n-nuqqas ta’ rispons ta’ kampjun jista’ jindika li l-produtturi tal-Unjoni li qegħdin jappoġġaw l-ilment ma kkooperawx, qed jiġi mfakkar li l-CET kienet ir-rappreżentant legali tal-kumpaniji kollha li qegħdin iressqu l-ilment. Kif meħtieġ, il-CET ipprovdiet ukoll f’isem il-kwerelanti l-informazzjoni kumplimentari dwar id-dejta għall-PI. Kif imniżżel fid-dettall fl-Avviż tal-bidu, l-informazzjoni bl-għan li jintgħażel kampjun kienet meħtieġa biss għall-kumpaniji li kienu għandhom ma pprovdewx l-informazzjoni meħtieġa kollha. Dan ifisser li l-produtturi li qegħdin iressqu l-ilment kienu qegħdin jikkooperaw bis-sħiħ billi pprovdew l-informazzjoni meħtieġa kollha fl-istadju tal-ilment u billi l-aġġornamenti meħtieġa rigward id-dejta tal-PI ġew ipprovduti f’isimhom mir-rappreżentanti legali tagħhom waqt l-investigazzjoni.

(16)

Parti interessata partikolari sostniet li d-diviżjoni tal-industrija tal-Unjoni f’segmenti differenti u l-kopertura ġeografika tal-kampjun kien jimplika li ma kienx statistikament validu. F’dan ir-rigward qed jiġi mfakkar li l-industrija tal-madum taċ-ċeramika tal-Unjoni hija frammentata ħafna b’iżjed minn 500 produtturi. Instab ukoll li l-industrija kienet irrappreżentata fit-tliet segmenti kollha tal-industrija, jiġifieri l-kumpaniji l-kbar, dawk medji u dawk żgħar. Sabiex jiġi żgurat li r-riżultati tal-kumpaniji l-kbar ma jiddominawx l-analiżi tad-dannu iżda li s-sitwazzjoni tal-kumpaniji ż-żgħar, li meħuda flimkien jagħmlu l-ikbar sehem tal-produzzjoni tal-Unjoni, tiġi riflessa tajjeb, ġie kkunsidrat li s-segmenti kollha, jiġifieri l-kumpaniji żgħar, ta’ daqs medju u dawk kbar għandhom jiġu rrappreżentati fil-kampjun. F’kull wieħed mis-segmenti, intgħażlu l-ikbar kumpaniji, bil-kundizzjoni li setgħet tiġi garantita r-rappreżentattività ġeografika.

(17)

Parti interessata partikolari sostniet ukoll li l-Kummissjoni kienet naqset milli turi li l-kampjun kien għadu rappreżentattiv wara li l-produttur Pollakk kien irtira u li fi kwalunkwe eventwalità ma kienx rappreżentattiv biżżejjed f’termini ta’ volum ta’ bejgħ fis-suq tal-Unjoni.

(18)

Huwa korrett li produttur Pollakk partikolari ddeċieda li jwaqqaf il-kooperazzjoni tiegħu u għalhekk kellu jiġi eskluż mill-kampjun. Madankollu, mhuwiex neċessarju li kampjun jirrifletti l-firxa ġeografika u l-piż eżatti tal-Istati Membri li jipproduċu sabiex ikun rappreżentattiv. Billi l-firxa ġeografika hija biss waħda mill-fatturi li għandhom jiġu kkunsidrati sabiex tiġi żgurata r-rappreżentattività, approċċ bħal dan ma kienx ikun prattikabbli mil-lat amministrattiv. Pjuttost, huwa biżżejjed li fil-parti l-kbira l-kampjun jirrifletti proporzjonijiet tal-pajjiżi l-kbar li jimmanifatturaw involuti. B’valutazzjoni skont dan il-kriterju, instab li l-irtirar tal-kumpanija Pollakka ma affettwax ir-rappreżenattività ġenerali tal-kampjun. Fuq din il-bażi, huwa kkonfermat li l-kampjun tal-produtturi tal-Unjoni kien rappreżentattiv biżżejjed skont l-Artikolu 17 tar-Regolament bażiku.

(19)

Rigward l-affermazzjoni tar-rappreżentattività ġenerali tal-kampjun qed jiġi mfakkar li minħabba li l-industrija tal-Unjoni hija frammentata ħafna, huwa inevitabbli li l-kumpaniji fil-kampjun ikopru parti relattivament żgħira tal-produzzjoni ġenerali tal-Unjoni. Fi kwalunkwe eventwalità l-Artikolu 17 tar-Regolament bażiku jistabbilixxi li l-investigazzjonijiet jistgħu jiġu limitati għal kampjuni li jew huma statistikament validi, jew li jikkostitwixxu l-ikbar volum rappreżentattiv ta’ produzzjoni, bejgħ, jew esportazzjonijiet li jista’ jiġi investigat b’mod raġjonevoli, mingħajr, madankollu, ma jiġi indikat l-ebda limitu kwantitattiv dwar il-livell ta’ volum rappreżentattiv bħal dan. Fid-dawl ta’ dan ta’ hawn fuq huwa kkonfermat li l-kampjun magħżul kien rappreżentattiv skont it-tifsira tal-Artikolu 17 tar-Regolament bażiku.

(20)

Parti interessata partikolari sostniet li l-Kummissjoni naqset milli tinkludi fil-kampjun produtturi tal-Unjoni li joffru prezzijiet baxxi tal-bejgħ u li jinsabu f’pajjiżi bħall-Polonja u r-Repubblika Ċeka; għalhekk, il-kampjun miksub b’dan il-mod ma jistax ikun rappreżentattiv tal-prezzijiet medji tal-bejgħ tal-produtturi tal-Unjoni.

(21)

Bħala tweġiba għall-affermazzjoni ta’ hawn fuq, il-Kummissjoni skopriet li l-prezzijiet medji tal-bejgħ tal-kampjun tal-industrija tal-Unjoni kienu fl-istess firxa tal-prezzijiet medji tal-bejgħ fl-istatistika disponibbli pubblikament. Fi kwalunkwe eventwalità, u kif spjegat fil-premessa (125), l-investigazzjoni wriet li anki jekk jiġu kkunsidrati l-prezzijiet disponibbli pubblikament għal dawk il-pajjiżi, il-konklużjonijiet finali ma għandhom jinbidlu bl-ebda mod sinifikanti.

(22)

Numru ta’ partijiet għamlu kummenti dwar il-metodoloġija użata għall-għażla tal-kampjun tal-industrija tal-Unjoni meta mqabbla mal-għażla tal-kampjun tal-esportaturi Ċiniżi, li kienet ibbażata biss fuq il-volum tal-esportazzjoni.

(23)

Rigward il-metodoloġiji differenti użati għall-għażla ta’ kampjun tal-produtturi tal-Unjoni min-naħa waħda u tal-produtturi esportaturi Ċiniżi min-naħa l-oħra, għandu jiġi nnutat li l-metodoloġiji ntużaw skont l-għanijiet tal-eżerċizzju tal-kampjunar. Għal dak li jirrigwarda l-industrija tal-Unjoni, il-Kummissjoni għandha tivvaluta s-sitwazzjoni tal-industrija kollha u għalhekk, intgħażlu l-kriterji li għandhom jiggarantixxu l-istampa l-iżjed rappreżentattiva tas-settur kollu. Għal dak li jirrigwarda l-esportaturi Ċiniżi, ġie kkunsidrat xieraq li jintgħażel kampjun ibbażat fuq l-ikbar volum ta’ esportazzjonijiet tal-prodott ikkonċernat u b’hekk l-ikbar esportaturi ntgħażlu bħala kampjun. Qed jiġi nnotat ukoll li ma hemm l-ebda obbligu fl-Artikolu 17 tar-Regolament bażiku li ż-żewġ kampjuni jintgħażlu fuq il-bażi tal-istess kriterju. Barra dan, f’dan il-każ, qabel ma ġie ffinalizzat il-kampjun tal-produtturi esportaturi Ċiniżi, il-partijiet li qegħdin jikkooperaw fiċ-Ċina kif ukoll l-awtoritajiet Ċiniżi ngħataw l-opportunità li jikkummentaw fuq il-kampjun propost. Ġew riċevuti kummenti dwar il-kompożizzjoni tal-kampjun iżda mhux dwar ir-rappreżentattività tiegħu.

(24)

Wara d-divulgazzjoni finali, assoċjazzjoni tal-importaturi sostniet li l-Artikolu 17 tar-Regolament bażiku kien jimplika li l-kampjuni tal-produtturi tal-Unjoni u tal-produtturi esportaturi għandhom isiru fuq il-bażi tal-istess kriterji. Wara d-divulgazzjoni finali ħafna partijiet Ċiniżi komplew isostnu li kien hemm diskriminazzjoni bejn it-trattament tal-produtturi esportaturi Ċiniżi u l-produtturi tal-Unjoni fl-għażla tal-kampjuni rispettivi.

(25)

Bħala tweġiba għall-affermazzjoni wara d-divulgazzjoni finali li għandhom jiġu applikati l-istess kriterji fl-għażla tal-kampjuni tal-produtturi tal-Unjoni u l-produtturi esportaturi, għar-raġunijiet deskritti fil-qosor fil-premessa (23), qed jiġi kkunsidrat li dawn il-kampjuni jistgħu jsiru fuq il-bażi ta’ kriterji differenti. F’dawn iċ-ċirkostanzi, din il-pretensjoni qiegħda tiġi miċħuda.

(26)

Rigward il-fatt li, kif imsemmi fil-premessa (23), ma ġew riċevuti l-ebda kummenti dwar ir-rappreżentattività tal-kampjun dawn il-partijiet sostnew li, fiż-żmien tal-għażla tal-kampjuni, il-partijiet Ċiniżi ma ġewx mgħarrfa li kienu qegħdin jintużaw kriterji ta’ għażla differenti għall-għażla tal-kampjuni u għalhekk ma setgħux jikkummentaw dwar dan il-fatt.

(27)

Għal dak li jikkonċerna l-fatt li l-partijiet Ċiniżi ma ġewx mgħarrfa bil-kriterji differenti użati fl-għażla tal-kampjuni, hija prattika standard, f’konformità mal-Artikolu 17(2) tar-Regolamenrt bażiku, li l-partijiet jiġu kkonsultati dwar il-kompożizzjoni tal-kampjuni proposti għall-kategorija tagħhom stess, pereżempju l-produtturi esportaturi għandhom jiġu kkonsultati biss dwar il-kampjun propost tal-produtturi esportaturi. F’dawn iċ-ċirkostanzi, l-affermazzjoni ta’ dawn il-partijiet dwar in-nuqqas ta’ kapaċità li jikkummentaw dwar il-kriterji differenti tal-għażla għall-kampjuni differenti fiż-żmien tal-għażla tal-kampjuni qiegħda tiġi injorata.

(28)

Wara d-divulgazzjoni finali, parti interessata partikolari affermat li billi kkunsidrat is-segmenti differenti għall-għażla tal-kampjun, il-Kummissjoni kisret l-Artikolu 4(1) tar-Regolament bażiku li jistabbilixxi li l-analiżi għandha ssir b’relazzjoni mal-industrija tal-Unjoni ġenerali u mhux ma’ ċerti gruppi jew tipi ta’ kumpaniji.

(29)

L-affermazzjoni li l-qsim tal-kampjun fi tliet segmenti huwa ksur tal-Artikolu 4(1) tar-Regolament bażiku ma tistax tiġi sostnuta. Skont il-premessa (23), il-kampjun magħżul kien jirrappreżenta l-industrija kollha tal-Unjoni u mhux biss grupp speċifiku ta’ kumpaniji, kif allegat mill-parti kkonċernata. Barra dan, l-Artikolu 17(1) tar-Regolament bażiku jippermetti b’mod speċifiku li jintgħażel kampjun sabiex jiġi determinat id-dannu. Għalhekk din il-pretensjoni kienet mingħajr bażi u ġiet miċħuda.

(30)

Wara d-divulgazzjoni finali l-istess parti interessata kkuntestat il-fatt li l-firxa ġeografika kienet ġiet ikkunsidrata għall-għażla tal-kampjun u sostniet li l-Unjoni hija suq uniku u li l-Artikolu 17(1) tar-Regolament bażiku jista’ jippermetti biss li kampjun jintgħażel fuq bażi tal-ikbar volum rappreżentattiv.

(31)

Għal dak li jirrigwarda l-affermazzjoni dwar l-użu tal-kriterju tal-firxa ġeografika, qed jiġi osservat li din hija industrija frammentata u sabiex tiġi valutata r-rappreżentattività tal-kumpaniji magħżula, tintuża l-firxa ġeografika tal-produtturi fost l-Istati Membri, sabiex jiġu riflessi s-sitwazzjonijiet differenti li wieħed jista’ jiltaqa’ magħhom fl-Unjoni. Il-kampjun ikopri l-Istati Membri fejn madwar 90 % tal-produzzjoni tal-Unjoni tiġi manifatturata; wara l-irtirar tal-kumpanija Pollakka, dan il-livell baqa’ għoli f’madwar 80 %. Għalhekk, il-metodoloġija applikata mill-Kummissjoni żgurat li l-kampjun kien rappreżentattiv tal-produzzjoni tal-Unjoni b’mod ġenerali u li jikkonforma mal-Artikolu 17(1) tar-Regolament bażiku. Għalhekk, il-pretensjoni ġiet miċħuda.

(32)

Wara d-divulgazzjoni finali parti interessata partikolari sostniet li ntgħażlu biss il-kumpaniji ta’ daqs medju u żgħir fil-kampjun tal-produtturi tal-Unjoni li allegatament kellhom spejjeż u prezzijiet ogħla minn dawk tal-kumpaniji Ċiniżi ta’ daqs kbir.

(33)

Dan l-argument ma ġie appoġġat minn l-ebda evidenza. Qed jiġi nnotat li l-kampjun kien jinkludi kumpaniji mis-segmenti kollha. Barra dan, fatturi oħra lil hinn mid-daqs tal-kumpanija jistgħu jkollhom impatt fuq l-ispejjeż, bħall-ispejjeż tal-materja prima, id-depprezzament jew, l-użu tal-kapaċitajiet.

(34)

Parti interessata partikolari affermat li minħabba n-nuqqas ta’ informazzjoni dwar l-identità tal-kwerelant il-partijiet interessati ma setgħux jeżerċitaw kompletament id-drittijiet tagħhom ta’ difiża. Ġie affermat ukoll li billi ċerti produtturi ma kinux talbu li isimhom ma jintweriex, it-talba għall-anonimità ma kinitx ġustifikata.

(35)

Parti partikolari tenniet l-affermazzjoni tagħha li ma kienx hemm raġunijiet sabiex tiġi permessal-kunfidenzjalità għal dak li kien jikkonċerna l-ismijiet tal-parti l-kbira tal-produtturi li kienu qegħdin iressqu l-ilment kif ukoll dawk li kienu qegħdin jappoġġaw l-ilment. B’mod partikolari ġie affermat li ma kienet ġiet inkluża l-ebda evidenza bħala appoġġ għat-talbiet għall-kunfidenzjalità fil-fajl miftuħ għall-ispezzjonijiet mill-partijiet interessati. Ġie sostnut ukoll li n-nuqqas ta’ għarfien tal-identità tal-kumpaniji kampjunati fisser li partijiet interessati oħra ma setgħux jikkummentaw dwar il-korrettezza tal-valutazzjoni tal-mikroindikaturi.

(36)

Bħala tweġiba għad-divulgazzjoni finali l-istess parti qajmet dubji dwar jekk il-kumpaniji relatati kollha tal-produtturi kampjunati kinux issottomettew rispons ta’ kwestjonarju.

(37)

Qed jiġi mfakkar li l-Artikolu 19 tar-Regolament bażiku jippermetti l-protezzjoni tal-informazzjoni kunfidenzjali fiċ-ċirkostanzi fejn l-iżvelar jista’ jkun ta’ vantaġġ kompetittiv sinifikanti għal kompetitur jew jista’ jkollu effett avvers sinifikanti fuq persuna li tkun qiegħda tipprovdi informazzjoni jew fuq persuna li minnha dik il-persuna tkun kisbet l-informazzjoni. Parti kbira ħafna tal-kwerelanti riedu li l-identità tagħhom tibqa’ kunfidenzjali u pprovdew evidenza biżżejjed li turi li tabilħaqq kien hemm possibbiltà ta’ ritaljazzjoni, inter alia, fil-forma ta’ telf ta’ bejgħ għal dawn il-produtturi jekk isimhom jiġi żvelat. It-talba ta’ dawn il-kumpaniji konsegwentement ġiet aċċettata mis-servizzi tal-Kummissjoni.

(38)

Għal dak li jirrigwarda l-affermazzjoni li ċerti produtturi ma kinux talbu t-trattament kunfidenzjali ta’ isimhom, għandu jiġi nnotat li dan il-fatt ma jippreġudikax id-dritt ta’ kumpaniji oħra li jitolbu għal dan it-trattament, meta jintwerew raġunijiet biżżejjed. Il-valutazzjoni għal talbiet bħal dawn saret fuq bażi ta’ każ b’każ u għalhekk il-pretensjoni qiegħda tiġi miċħuda.

(39)

Għal dak li jirrigwarda l-fatt dwar jekk il-kumpaniji tal-produtturi kampjunati tal-Unjoni kinux issottomettew rispons għall-kwestjonarju, għandu jiġi nnutat bħala prinċipju li n-nuqqas ta’ rispons minn produttur relatat tal-Unjoni per se ma kienx neċessarjament jipprevjeni lill-Kummissjoni milli tasal għal konklużjonijiet ta’ min jorbot fuqhom dwar id-dannu sakemm it-tweġibiet tal-kwestjonarju li huma sottomessi jistgħu jiġu verifikati. Dan huwa l-każ, b’mod partikolari fejn il-kumpaniji relatati huma entitajiet legali separati b’kontabilità separata.

(40)

Parti waħda li tirrappreżenta l-interessi tal-produtturi esportaturi, affermat li l-importazzjonijiet tal-prodott ikkonċernat mit-Turkija kellhom jiġu inklużi fl-ambitu ta’ din l-investigazzjoni.

(41)

Rigward in-nuqqas ta’ inklużjoni fl-ilment ta’ importazzjonijiet li joriġinaw mit-Turkija, għandu jiġi nnotat li fl-istadju tal-bidu, ma kien hemm l-ebda evidenza ta’ dumping, dannu u kawżalità minn dan il-pajjiż sabiex jiġi ġustifikat il-bidu ta’ proċedura antidumping fuq importazzjonijiet bħal dawn. L-affermazzjoni li t-Turkija kellha tiġi nkluża fl-ambitu tal-investigazzjoni għalhekk qiegħda tiġi miċħuda.

(42)

Wara l-impożizzjoni tal-miżuri provviżorji, parti interessata partikolari indikat li kien sar tibdil fil-kodiċijiet NM li jkopru l-prodott ikkonċernat inklużi fir-Regolament li jimponi miżuri provviżorji meta mqabbla ma’ dawk tal-avviż tal-bidu u staqsiet dwar ir-raġunijiet għal dawn id-differenzi u jekk kinux jimplikaw bidla fl-ambitu tal-prodott.

(43)

F’dan il-kuntest qed jiġi enfasizzat li d-differenzi bejn il-kodiċijiet NM indikati fir-Regolament li jimponi miżuri provviżorji u dawk imsemmija fl-avviż tal-bidu mhumiex konnessi ma’ bidla fid-definizzjoni tal-prodott jew l-kamp ta’ applikazzjoni tal-investigazzjoni. L-emendi ma jibdlux it-tipi ta’ madum koperti iżda jirrigwardaw sempliċement il-ħtieġa li jiġi kkunsidrat it-tibdil ġenerali tan-Nomenklatura Magħquda, kif previst fir-Regolament tal-Kummissjoni (UE) Nru 861/2010, li sar applikabbli fl-1 ta’ Jannar 2011 (5).

(44)

Parti interessata talbet li ċertu mużajk taċ-ċeramika jiġi eskluż mill-kamp ta’ applikazzjoni tal-prodott. Il-parti allegat li, jekk jiġu imposti miżuri, din il-kategorija ta’ prodott ikkonċernat titlef il-kompetittività kontra prodotti oħra li magħhom tista’ tiġi sostitwita u li, fi kwalunkwe każ, id-dumping mhuwiex iseħħ f’dan is-segment partikolari.

(45)

Rigward dan l-ilment, l-investigazzjoni żvelat li minħabba li l-mużajk taċ-ċeramika u tipi oħra ta’ madum għandhom l-istess karatteristiċi bażiċi, fiżiċi u tekniċi, mhijiex garantita reviżjoni tal-kamp ta’ applikazzjoni tal-prodott. F’dak li għandu x’jaqsam man-nuqqas ta’ dumping f’dan is-segment, li ma ġiex appoġġat minn kwalunkwe evidenza, l-analiżi tad-dumping u d-dannu għandha tirrifletti s-sitwazzjoni għall-prodott sħiħ ikkonċernat. F’dawn iċ-ċirkostanzi, dan l-ilment huwa rifjutat.

(46)

Fid-dawl ta’ dan ta’ hawn fuq u fin-nuqqas ta’ kwalunkwe kumment ieħor dwar il-prodott ikkonċernat u l-prodott simili, il-premessi minn (25) sa (32) tar-Regolament li jimponi miżuri provviżorji qegħdin b’dan jiġu kkonfermati.

(47)

Fin-nuqqas ta’ kwalunkwe kumment jew konklużjonijiet oħrajn dwar it-Trattament tal-Ekonomija tas-Suq, il-konklużjonijiet stabbiliti fil-premessi minn (33) sa (40) tar-regolament provviżorju qegħdin b’dan jiġu kkonfermati.

(48)

Ma ġew riċevuti l-ebda kummenti rigward id-deċiżjoni dwar l-għoti jew iċ-ċaħda ta’ TI lil kumpaniji individwali.

(49)

Madankollu żewġ importaturi esprimew dubji dwar il-validità ġenerali tal-analiżi tal-Kummissjoni dwar it-TI, waqt li affermaw li l-Unjoni kull sena tqassam sussidji permezz tal-iskema tal-Fondi Strutturali.

(50)

F’dan ir-rigward, qed jiġi nnotat li l-Artikolu 9(5) tar-Regolament bażiku jistabbilixxi l-kundizzjonijiet li għandhom jintlaħqu sabiex isir benefiċċju minn stat ta’ TI. L-eżistenza allegata ta’ sussidji fl-Unjoni hija irrilevanti għall-finijiet ta’ dak l-eżami. Għalhekk, din l-affermazzjoni qiegħda tiġi miċħuda u l-konklużjonijiet kif stabbiliti fil-premessi minn (41) sa (44) tar-regolament provviżorju qegħdin jinżammu.

(51)

Ġew sottomessi talbiet għal EI minn tmien produtturi esportaturi li qegħdin jikkooperaw taħt l-Artikolu 17(3) tar-Regolament bażiku. Ġie deċiż li ssir EI għal produttur esportatur partikolari, il-Grupp Kito, billi eżami bħal dan ma kienx jinvolvi piżijiet mhux xierqa. Dan il-grupp kien jirrappreżenta bla dubju l-ikbar volum ta’ esportazzjoni mit-tmien produtturi li talbu EI.

(52)

Dan il-grupp talab TI. Wara l-eżami ta’ din it-talba, ġie propost inizjalment li jingħata TI lill-Grupp Kito billi ma nstabet l-ebda raġuni għala dan il-grupp għandu jkollu TI.

(53)

Wara l-iżvelar finali, il-kwerelant sostna li ma kienx jidher li l-Artikolu 17(3) tar-Regolament bażiku jippermetti li numru limitat ta’ talbiet għal EI jsiru f’sitwazzjonijiet fejn kienu ġew riċevuti talbiet numerużi. Il-kwerelant sostna li din l-opinjoni kinet appoġġata minn ħafna investigazzjonijiet ta’ qabel ta’ antidumping. F’dan ir-rigward, qed jiġi nnotat li l-punt ta’ referenza fl-Artikolu 17(3) tar-Regolament bażiku dwar l-eżaminati tat-talbiet għal EI huwa jekk dawn l-eżamijiet humiex se jkunu ta’ piż mhux xieraq u humiex se jimpedixxu t-tlestija tal-investigazzjoni fil-ħin. Fl-investigazzjoni preżenti u kif imsemmi fil-premessa (51), l-eżami ta’ waħda mit-tmien pretensjonijiet għal EI ma kenitx ta’ piż mhux xieraq. Għal dak li jirrigwarda investigazzjonijiet preċedenti fejn ġew indirizzati talbiet għal EI, qed jiġi nnotat li l-limitu tan-natura tal-piż ta’ talbiet bħal dawn u l-ħtieġa għat-tkomplija fil-ħin ta’ investigazzjoni għandhom jiġu valutati fuq bażi ta’ każ b’każ. Fid-dawl ta’ dan ta’ hawn fuq, it-talbiet tal-kwerelant qegħdin jiġu miċħuda.

(54)

Wara divulgazzjoni finali, ġew riċevuti informazzjoni u evidenza li l-Kito Group seta ma żvelax il-kumpaniji kollha relatati tal-grupp b’riżultat li l-konklużjonijiet għall-grupp jistgħu ma jkunux kompleti. Il-grupp ingħata l-opportunità biex jikkummenta dwar din l-informazzjoni u ġie infurmat li l-Artikolu 18 tar-Regolament bażiku jista’ jkun li għandu jiġi applikat. Fi tweġiba, huma kkonfermaw li huma tabilħaqq ma żvelawx żewġ kumpaniji relatati fit-tweġiba tagħhom għall-kwestjonarju dwar l-antidumping iżda argumentaw li, minħabba li kienet sorveljanza ħafifa mingħajr konsegwenza minħabba li huma ma kinux involuti fil-produzzjoni u/jew kummerċjalizzazzjoni tal-prodott ikkonċernat, ma għandhux ikollu rilevanza dwar il-konklużjonijiet. Madankollu, il-fatt li l-eżistenza ta’ dawn iż-żewġ kumpaniji ma ġiet rivelata ma ppermettitx valutazzjoni u verifika xierqa tal-attivitajiet tal-grupp li huma relatati mal-prodott ikkonċernat. F’dawn iċ-ċikustanzi, ġie konkluż li l-grupp ma pprovdiex l-informazzjoni meħtieġa fil-perjodu ta’ żmien xieraq u konsegwentament il-konklużjonijiet għall-kumpanija huma magħmula fuq il-bażi tal-fatti disponibbli f’konformità mal-Artikolu 18 tar-Regolament bażiku.

(55)

Żewġ importaturi ssottomettew kummenti kontra l-għażla tal-Istati Uniti tal-Amerika (“USA”) bħala pajjiż analogu, billi affermaw li mhuwiex xieraq li l-USA jitqies bħala pajjiż analogu minħabba l-produzzjoni proprja insinifikanti, u n-nuqqas ta’ kompetittività tiegħu fis-suq dinji. Huma affermaw ukoll li l-USA ntgħażel b’mod mhux raġonevoli, billi affermaw li n-nuqqas ta’ pajjiżi analogi alternattivi ġie kkawżat minn pressjoni żejda min-naħa tal-assoċjazzjoni tal-produtturi tal-Unjoni fuq produtturi minn pajjiżi oħra analogi sabiex il-kooperazzjoni possibbli tagħhom tiġi skoraġġata. Żewġ importaturi sostnew li l-Kummissjoni injorat informazzjoni minn numru ta’ pajjiżi li setgħu jikkooperaw u li dejta li hija disponibbli għall-pubbliku minn assoċjazzjonijiet nazzjonali u transnazzjonali ta’ produtturi f’pajjiżi terzi ma ġietx ikkunsidrata.

(56)

Sabiex l-ewwel jiġi kkunsidrat dan l-argument tal-aħħar, qed jiġi mfakkar li hija meħtieġa informazzjoni speċifika dwar il-kumpanija sabiex issir l-investigazzjoni tal-livell ta’ dumping. Għalhekk dan l-argument ġie miċħud.

(57)

Għal dak li jirrigwarda l-allegazzjonijiet ta’ pressjoni żejda min-naħa tal-assoċjazzjoni tal-produtturi tal-Unjoni sabiex tiġi skoraġġata l-kooperazzjoni, qed jiġi nnotat li l-ebda evidenza ma ġiet ipprovduta. Għalhekk dawn il-kummenti kellhom jiġu injorati.

(58)

Dawn l-importaturi affermaw ukoll li, il-volum annwali tal-produzzjoni tal-madum taċ-ċeramika fil-USA kien ta’ madwar 60 miljun m2 kull sena, u mhux 600 miljun m2 kif iddikjarat fil-premessa (51) tar-Regolament provviżorju. Dan ġie verifikat u nstab li huwa korrett.

(59)

Rigward l-istabbilità tal-USA bħala pajjiż analogu fid-dawl tal-livell ta’ produzzjoni li huwa iżjed baxx b’mod konsiderevoli, għandu jiġi enfasizzat li s-suq tal-USA huwa kompetittiv ħafna – hemm ħafna kumpaniji lokali tal-produzzjoni u l-kwantitajiet tal-importazzjoni huma sinifikanti. Barra dan, kif imsemmi fil-premessa (52) tar-Regolament provviżorju, ma hemm l-ebda evidenza ta’ ostakli nontariffarji li jistgħu joħolqu tfixkil sinifikanti għall-kompetizzjoni fis-suq. F’dawn iċ-ċirkostanzi, minkejja l-volum ta’ produzzjoni iżjed baxx, il-konklużjoni ġenerali li l-USA huwa pajjiż analogu xieraq tibqa’ l-istess.

(60)

Żewġ importatui sostnew li l-prezzijiet tal-bejgħ tal-unitajiet tal-madum prodott fil-USA fis-suq domestiku tal-USA kienu ħafna iżjed ogħla minn dawk fis-suq tal-Unjoni u, meta mqabbla mal-prezzijiet tal-esportazzjoni, jagħtu lok li jsiru prattiki ta’ dumping. Dan l-argument instab li kien irrilevanti għall-fini ta’ din il-proċedura, billi kwalunkwe allegazzjoni bħal din, meta wieħed jassumi li jkun hemm evidenza għaliha prima facie, tista’ tiġi eżaminata bir-reqqa biss fi proċedura ta’ antidumping separata relatata mal-USA. Għalhekk ġie injorat.

(61)

Dawn l-importaturi sostnew ukoll li l-produttur tal-USA li kien qed jikkoopera kien il-proprjetà tal-Unjoni jew kien affiljat ma’ produtturi tagħha u għalhekk l-investigazzjoni kienet difettuża billi d-dejta miksuba ma kinitx indipendenti.

(62)

Qed jiġi mfakkar li d-dejta sottomessa mill-produttur tal-USA li qed jikkoopera ġiet verifikata fuq il-post. Għalhekk instab li din il-pretensjoni hija irrilevanti u ġiet injorata.

(63)

Dawn l-importauri affermaw ukoll li l-volumi tal-esportazzjoni tal-USA kienu limitati. Dan l-argument ġie kkunsidrat bħala irrilevanti għall-għażla tal-pajjiż analogu, billi d-dejta tal-pajjiż analogu tintuża sabiex jiġi determinat il-valur normali u mhux il-prezzijiet tal-esportazzjoni. Għalhekk ġie miċħud.

(64)

Finalment dawn l-istess importaturi affermaw li ż-żamma tal-kunfidenzjalità dwar l-identità, il-volum, il-valur u l-kwalità tal-produzzjoni tal-produttur analogu li qed jikkoopera ma kinitx ġustifikata. Qed jiġi mfakkar li l-produttur analogu li qed jikkoopera kien talab għall-kunfidenzjalità minħabba li beża’ li jkun hemm ritaljazzjoni kummerċjali, u nstab li din it-talba kienet ġustifikata. Barra dan, ma jistax jiġi eskluż li l-għoti ta’ kwalunkwe dejta mitluba mill-importaturi, anki jekk f’firxiet differenti, tista’ twassal għall-identifikazzjoni tal-produttur tal-pajjiż analogu. Għalhekk il-pretensjoni tal-importaturi ġiet injorata.

(65)

Wara l-iżvelar finali, iż-żewġ importaturi msemmija hawn fuq irrepetew numru ta’ pretensjonijiet tagħhom imsemmija hawn fuq mingħajr, madankollu, ma pprovdew l-ebda evidenza sostanzjali oħra. F’dawn iċ-ċirkostanzi, il-pretensjonijiet tagħhom jibqgħu miċħuda.

(66)

Barra dan, dawn iż-żewġ importaturi affermaw ukoll li, billi l-produttur tal-USA li qed jikkoopera huwa allegatament ikkontrollat minn produttur tal-Unjoni, l-għażla ta’ din il-kumpanija tal-USA bħala produttur adatt ta’ pajjiż analogu hija difettuża. B’mod partikolari, huma affermaw li l-kumpanija tal-USA mhijiex ekonomikament indipendenti u għalhekk ma tistax isservi bħala punt ta’ referenza għad-dumping. L-importaturi jikkwotaw it-tielet u r-raba’ paragrafi tal-Artikolu 2(1) tar-Regolament bażiku bħala ġustifikazzjoni għal din il-pretensjoni. B’risposta għal din il-pretensjoni, l-ewwel nett għandu jiġi ddikjarat li, kif imsemmi fil-premessa (23) tar-Regolament provviżorju u fil-premessa (69) ta’ hawn taħt, il-produttur tal-USA li qed jikkoopera talab l-anonimità u din it-talba ġiet mogħtija. F’dawn iċ-ċirkostanzi, ma jistax jiġi kkonfermat jew miċħud jekk teżistix relazzjoni jew le bejn il-kumpanija tal-Istati Uniti u produttur tal-Unjoni. Madankollu, qed jiġi nnotat li d-dispożizzjonijiet imsemmija hawn fuq tar-Regolament bażiku huma dwar kif għandhom jiġu ttrattati l-prezzijiet tal-bejgħ ta’ kumpanija taħt investigazzjoni meta tbigħ lil parti relatata. Dawn id-dispożizzjonijiet ma jikkonċernawx il-kwistjoni ta’ relazzjoni possibbli bejn produttur ta’ pajjiż analogu u produttur tal-Unjoni. F’dawn iċ-ċirkostanzi, il-pretensjoni qiegħda tiġi miċħuda.

(67)

Wara l-iżvelar finali, assoċjazzjoni ta’ importaturi għamlet ħafna talbiet. L-ewwel nett, affermat li l-volum baxx allegat ta’ bejgħ tal-produtturi tal-Istati Uniti fis-suq domestiku tagħhom meta mqabbel mal-esportazzjonijiet Ċiniżi lejn l-Unjoni jagħmel lill-USA suq mhux adatt bħala pajjiż analogu. F’dan ir-rigward, waqt l-eżami tal-pajjiżi analogi possibbli, il-livell ta’ kompetizzjoni f’dawk il-pajjiżi huwa, inter alia, wieħed mill-elementi eżaminati. Li jintlaħqu livelli simili ta’ bejgħ domestiku tal-industrija domestika u ta’ importazzjonijiet mill-pajjiż taħt investigazzjoni mhijiex prekundizzjoni sabiex pajjiż jitqies bħala pajjiż analogu adatt. Għal dak li jirrigwarda dawn il-pretensjonijiet, għal din l-investigazzjoni, u kif iddikjarat fil-premessa (59), instab li s-suq tal-Istati Uniti kien kompetittiv biżżejjed sabiex ikun għażla adatta. F’dawn iċ-ċirkostanzi, din il-pretensjoni qiegħda tiġi miċħuda.

(68)

L-assoċjazzjoni tal-importaturi sostniet ukoll li ma kinitx tikkunsidra li l-fatt li l-importazzjonijiet fis-suq tal-Istati Uniti huma sinifikanti kien rilevanti fl-għażla tal-Istati Uniti bħala pajjiż analogu. Għal dak li jirrigwarda din l-affermazzjoni, għandu jiġi nnotat li l-livell ta’ importazzjonijiet huwa tabilħaqq wieħed mill-fatturi importanti eżaminati fl-għażla ta’ pajjiż analogu adatt. Il-kombinazzjoni tal-produzzjoni domestika u l-volumi għoljin ta’ importazzjonijiet tikkontribwixxi għal suq kompetittiv kif imsemmi fil-premessa (59). F’dawn iċ-ċirkostanzi, din il-pretensjoni qiegħda tiġi miċħuda.

(69)

L-assoċjazzjoni tal-importaturi staqsiet ukoll liema evidenza ġiet ipprovduta mill-produttur tal-pajjiż analogu li kien qed jikkoopera sabiex juri r-riskju ta’ ritaljazzjoni kummerċjali kif imsemmi fil-premessa (64). F’dan ir-rigward, il-kumpanija tal-Istati Uniti osservat li jeżistu ħafna produtturi esportaturi Ċiniżi tal-madum taċ-ċeramika fis-suq tal-Istati Uniti li magħhom il-kumpanija tal-Istati Uniti tikkompeti għall-istess klijenti. F’dawn iċ-ċirkostanzi, il-kumpanija tal-Istati Uniti ddikjarat li kienet tibża’ minn ritaljazzjoni kummerċjali jekk l-identità tagħha tiġi żvelata. Rigward l-evidenza pprovduta sabiex jiġi ppruvat ir-riskju ta’ ritaljazzjoni, għandu jiġi nnotat li r-riskju possibbli li jinħoloq mill-fatt li l-kumpanija tal-Istati Uniti kif ukoll il-produtturi esportaturi Ċiniżi attivi fis-suq tal-Istati Uniti qegħdin jikkompetu għall-istess klijenti nstab li kien plawżibbli. F’dawn iċ-ċirkostanzi, it-talba tal-kumpanija għall-anonimità ġiet aċċettata.

(70)

L-assoċjazzjoni sostniet ukoll li, billi l-prezz medju tal-bejgħ domestiku fl-USA tal-madum taċ-ċeramika prodott domestikament allegatament kien ħafna drabi ogħla mill-prezz tal-importazzjonijiet tal-Unjoni miċ-Ċina, il-prodott tal-Istati Uniti mhuwiex “prodott simili” għall-prodott impurtat miċ-Ċina. F’dan ir-rigward, il-fatt li dawn iż-żewġ prezzijiet huma differenti mhijiex raġuni sabiex jiġi kkunsidrat li l-prodott tal-Istati Uniti mhuwiex prodott simili għall-prodott ikkonċernat. Kif iddikjarat fil-premessa (32) tar-Regolament provviżorju, instab li l-prodott ikkonċernat u, inter alia, il-prodott prodott u mibjugħ fis-suq domestiku tal-USA għandhom l-istess karatteristiċi fiżiċi u tekniċi bażiċi kif ukoll l-istess użijiet bażiċi. F’dawn iċ-ċirkostanzi jiġu kkunsidrati bħala simili skont l-Artikolu 1(4) tar-Regolament bażiku. Il-pretensjoni tal-assoċjazzjoni għalhekk qiegħda tiġi miċħuda.

(71)

Finalment, l-assoċjazzjoni staqsiet għaliex l-Unjoni ma kinitx ikkunsidrata bħala pajjiż analogu xieraq fin-nuqqas ta’ kooperazzjoni minn pajjiżi terzi minbarra l-USA. F’dan ir-rigward, billi nstab li l-USA huwa pajjiż analogu adatt, kif imsemmi fil-premessa (59), il-ħtieġa li jiġu eżaminati swieq oħra adatti ma nħolqitx. Għalhekk, il-pretensjoni tal-assoċjazzjoni qiegħda tiġi miċħuda.

(72)

Fin-nuqqas ta’ iżjed kummenti, qed jiġi kkonfermat li l-għażla tal-USA bħala pajjiż analogu kienet approprjata u raġjonevoli skont l-Artikolu 2(7)(a) tar-Regolament bażiku, u l-premessi minn (45) sa (54) tar-Regolament provviżorju qegħdin b’dan jiġu kkonfermati.

(73)

Żewġ importaturi sostnew li mingħajr informazzjoni dwar il-produzzjoni tal-produttur tal-Istati Uniti f’termini ta’ volum, il-partijiet interessati ma setgħux jivverifikaw jekk minħabba l-ekonomiji ta’ skala, jistax ikun hemm differenzi sinifikanti fl-ispejjeż tal-produzzjoni tal-produttur tal-Istati Uniti meta mqabbla mal-produtturi Ċiniżi magħżula bħala kampjun li kull sena pproduċew iżjed minn 10 miljun m2 ta’ madum taċ-ċeramika. Dawn l-importaturi affermaw ukoll li l-volumi tal-produzzjoni tal-produttur analogu u tal-produtturi Ċiniżi ma kinux paragunabbli, minħabba l-volum ta’ produzzjoni iżjed baxx tal-produttur analogu jew fil-pajjiż analogu. Qed jiġi mfakkar li l-volum tal-produzzjoni tal-produttur analogu li qed jikkoopera huwa kunfidenzjali u għalhekk ma jistax jiġi żvelat. Qed jiġi mfakkar ukoll li l-industrija Ċiniża hija frammentata ħafna u l-parti l-kbira minnha hija magħmula minn SMEs. Għalhekk, instab li dawn l-argumenti ma kinux sostanzjati biżżejjed.

(74)

Dawn l-importaturi osservaw li, billi it-tieni subparagrafu tal-Artikolu 2(1) tar-Regolament bażiku kien jeżiġi li l-valur normali jkun ibbażat fuq il-prezzijiet ta’ “bejjiegħa jew produtturi oħra”, kien żbaljat li jiġi stabbilit valur normali fuq il-bażi tad-dejta ta’ kumpanija waħda biss.

(75)

Għal dan ir-rigward, qed jiġi mfakkar li din il-proċedura tikkonċerna l-importazzjonijiet minn pajjiż b’ekonomija mhux tas-suq fejn il-valur normali jeħtieġ li jiġi stabbilit skont l-Artikolu 2(7)(a) tar-Regolament Bażiku. Għalhekk, din l-affermazzjoni ġiet miċħuda.

(76)

Wara l-iżvelar finali, assoċjazzjoni ta’ importaturi ddikjarat li hija kkunsidrat li l-valur normali f’pajjiż analogu ma setax jiġi bbażat fuq dejta pprovduta minn kumpanija waħda. Madankollu, għar-raġunijiet stabbiliti fil-premessa (75), din l-affermazzjoni qiegħda tiġi miċħuda.

(77)

Finalment, dawn l-importaturi affermaw li l-prodott tal-produttur analogu ma kellux rappreżentattività billi dan serva esklussivament is-segment bi prezz għoli. Billi t-talba għall-kunfidenzjalità tal-produttur analogu ġiet milqugħa, din l-allegazzjoni la hija kkonfermata u lanqas miċħuda. Fi kwalunkwe każ, anki jekk l-allegazzjoni kienet korretta, kif spjegat fil-premessa (61) tar-regolament provviżorju, saru aġġustamenti fejn kien meħtieġ għall-valur normali maħdum sabiex jiġu kkunsidrati t-tipi kollha ta’ madum, inkluż il-markar korporattiv għall-bejgħ mill-ġdid. Għalhekk instab li din l-affermazzjoni ma kinitx meħtieġa u għalhekk ġiet miċħuda.

(78)

Wara l-iżvelar finali, produttur esportatur partikolari afferma li l-bejgħ ta’ ċerti tipi ta’ madum taċ-ċeramika lill-Unjoni fil-PI ġie kklassifikat ħażin mis-servizzi tal-Kummissjoni u li l-marġni ta’ dumping tal-kumpanija għandu jiġi korrett kif xieraq. F’dan ir-rigward, ġie determinat waqt iż-żjara ta’ verifika fuq il-post tal-kumpanija li l-kumpanija kienet ikklassifikat ħażin ċertu madum taċ-ċeramika u l-kumpanija ġiet mgħarrfa b’dan. Wara, dawn ġew ikklassifikati mill-ġdid b’mod korrett għall-finijiet li jsir kalkolu preċiż tad-dumping. F’dawn iċ-ċirkostanzi, il-pretensjoni tal-kumpanija qiegħda tiġi miċħuda.

(79)

Wara l-iżvelar finali, l-istess produttur esportatur afferma li ċertu tranżazzjonijiet ta’ bejgħ tal-esportazzzjoni lejn l-Unjoni fil-PI ġie injorat fil-kalkolu tal-marġni tad-dumping tal-kumpanija. F’dan ir-rigward, instab li dawn it-tranżazzjonijiet kienu ġew injorati billi d-dati tal-fattura waqgħu wara t-tmiem tal-PI. F’dawn iċ-ċirkostanzi, il-pretensjoni tal-kumpanija qiegħda tiġi miċħuda.

(80)

Fin-nuqqas ta’ kwalunkwe kumment rigward il-prezzijiet tal-esportazzjoni, il-premessa (59) tar-Regolament provviżorju qiegħda b’dan tiġi kkonfermata.

(81)

Saru kummenti dwar il-paragun bejn il-valur normali u l-prezz tal-esportazzjoni.

(82)

Produttur esportatur partikolari afferma li għall-kalkolu tal-valur CIF tiegħu, il-fatt li l-bejgħ tal-esportazzjoni sar permezz ta’ kummerċjanti mhux relatati għandu jiġi kkunsidrat. Instab li din l-affermazzjoni kienet meħtieġa u sussegwentement il-valuri CIF għal dan l-esportatur ġew ikkalkulati mill-ġdid. Wara l-iżvelar finali, il-kwerelant afferma li dan il-kalkolu mill-ġdid tal-prezzijiet tal-esportazzjoni ma kellux isir billi l-informazzjoni pprovduta mill-kummerċjanti mhux relatati ma kinitx ta’ min jorbot fuqha billi allegatament xi wħud mill-kummerċjanti biss li permezz tagħhom il-produttur esportatur kien ibigħ kienu pprovdew informazzjoni. F’dan ir-rigward instab li l-kummerċjanti mhux relatati kollha li permezz tagħhom kien biegħ il-produttur esportatur kienu pprovdew informazzjoni dwar il-prezz. F’dawn iċ-ċirkostanzi, il-pretensjoni qiegħda tiġi miċħuda.

(83)

Produttur esportatur ieħor afferma li l-ispiża tal-assigurazzjoni ma ġietx ikkunsidrata kif suppost meta kien qed jiġi kkalkulat il-valur CIF tiegħu. Instab li din l-affermazzjoni kienet ġustifikata u l-valuri CIF ta’ dan l-esportatur ġew korretti kif xieraq.

(84)

Grupp wieħed partikolari ta’ kumpaniji esportaturi afferma li l-ispiża tal-assigurazzjoni inkluża fil-valuri CIF tagħhom ġiet ikkalkulata ħażin. Ġie skopert li din l-affermazzjoni kienet ġustifikata, u għalhekk il-valuri CIF ġew ikkalkulati mill-ġdid. Barra dan, instab li għall-waħda mill-kumpaniji tal-grupp l-ispiża tal-immaniġġar ma kinitx ġiet ikkunsidrata meta kien qed jiġi stabbilit il-valur ex-works. Dan ġie korrett ukoll.

(85)

Żewġ importaturi affermaw li l-kalkolu tal-prezzijiet tal-esportazzjoni kellu jikkunsidra l-iżviluppi tar-rata tal-kambju tad-dollaru Amerikan waqt il-PI. Madankollu qed jiġi mfakkar li, skont il-prattika standard tal-Kummissjoni, intużaw rati tal-kambju ta’ kull xahar għall-konverżjonijiet ta’ valuta waqt il-PI. Għalhekk, l-iżviluppi tar-rata tal-kambju waqt il-PI tabilħaqq ġew ikkunsidrati.

(86)

Wara l-iżvelar finali, produttur esportatur partikolari afferma li, billi l-valur normali kien ibbażat fuq dejta minn produttur wieħed fil-pajjiż analogu u konsegwentement dejta preċiża ma setgħetx tiġi żvelata għal raġunijiet ta’ kunfidenzjalità, kien imperattiv li jiġi żgurat li jsiru l-agġustamenti fejn xieraq sabiex tiġi garantita l-paragunabilità tal-prodott għall-finijiet tal-kalkoli tad-dumping. F’dan ir-rigward, kif imsemmi fil-premessa (61) tar-Regolament provviżorju, saru aġġustamenti fejn meħtieġ sabiex jiġi żgurat paragun ġust bejn il-valur normali u l-prezz tal-esportazzjoni.

(87)

Wara l-iżvelar finali, żewġ importaturi sostnew li l-produttur tal-Istati Uniti li qed jesporta jservi esklussivament is-settur tal-madum taċ-ċeramika ta’ prezz għoli waqt li l-produtturi esportaturi Ċiniżi jservu s-segment bi prezz baxx. F’termini li jiġi garantit paragun ġust bejn il-valur normali u l-prezz tal-esportazzjoni, dawn l-importaturi sostnu li l-aġġustamenti meħtieġa taħt l-Artikolu 2(10) tar-Regolament bażiku ma ġewx żvelati lilhom. F’dan ir-rigward, qed jiġi nnotat li l-premessa (61) tar-Regolament provviżorju tispjega l-aġġustamenti li saru sabiex jiġi garantit paragun ġust.

(88)

Il-marġini definittivi tad-dumping għall-produtturi kampjunati li qegħdin jikkooperaw, b’kunsiderazzjoni tal-kummenti kollha ta’ hawn fuq, u espressi bħala perċentwal tal-prezz CIF tal-fruntiera tal-Unjoni, id-dazju mhux imħallas, huma dawn li gejjin:

(89)

Bħala riżultat tat-tibdil fil-kalkolu tal-marġini tad-dumping kif imsemmi fil-premessa (88), il-marġni medju peżat tad-dumping tal-kampjun, li huwa bbażat fuq il-marġini tad-dumping tal-erbgħa produtturi esportaturi kampjunati li qegħdin jikkooperaw huwa ta’ 30,6 %. F’dan il-kuntest, qed jiġi nnotat li għal Heyuan Becarry Co Ltd, la ngħatat TES u lanqas TI, ġie kkalkulat marġni tad-dumping skont il-mod deskritt fil-premessa (88) tar-Regolament provviżorju. Skont l-ewwel sentenza tal-Artikolu 9(6) tar-Regolament bażiku, dan il-marġni ta’ dumping intuża għall-kalkolu tal-marġni medju ta’ dumping peżat tal-partijiet fil-kampjun, applikat għall-esportaturi li qegħdin jikkooperaw li ma ntgħażlux sabiex jagħmlu parti mill-kampjun. Barra dan, billi Heyuan Becarry Co. Ltd ma ngħatatx TES u nstab li d-deċiżjonijiet tagħha dwar il-bejgħ tal-esportazzjoni kienu suġġett għal interferenza mill-Istat, id-dazju li għandu jkun applikat għall-importazzjonijiet minn Heyuan Becarry Co. Ltd għandu jkun l-istess bħal dak applikabbli għall-importazzjonijiet mill-esportaturi li qegħdin jikkooperaw mhux magħżula sabiex jagħmlu parti mill-kampjun.

(90)

Rigward il-metodu tal-kalkolu tal-marġni tad-dumping għal Heyuan Becarry Co. Ltd, li, kif imsemmi qabel, kienet produttur esportatur li jikkoopera inkluż fil-kampjun iżda li ma ngħatax TI kif imsemmi fil-premessa (65) tar-Regolament provviżorju, ir-referenza fil-premessa (64) tar-Regolament provviżorju għandha pjuttost tkun, minflok, għall-premessa (62).

(91)

Għall-kumpanija msemmija fil-premessi minn (51) sa (54) li ġiet eżaminata individwalment, fid-dawl tal-applikazzjoni tal-Artikolu 18 tar-Regolament bażiku, il-marġni tad-dumping mal-pajjiż kollu se japplika.

(92)

Fl-assenza ta’ kwalunkwe kumment rigward il-kalkolu tal-marġni tad-dumping għall-produtturi esportaturi l-oħra kollha, il-premessi minn (66) sa (67) tar-Regolament provviżorju qegħdin b’dan jiġu kkonfermati.

(93)

B’kunsiderazzjoni tal-kummenti msemmija hawn fuq espressi fil-premessi minn (81) sa (85), il-marġni tad-dumping uniku għall-pajjiż kollu huwa stabbilit għal 69,7 %.

(94)

Numru ta’ allegazzjonijiet riċevuti ssuġġerixxa li 13 mill-produtturi esportaturi li qegħdin jibbenefikaw minn dazju medju provviżorju peżat taħt ir-Regolament provviżorju, inklużi fl-Anness tiegħu, kienu biss kummerċjanti u mhux produtturi, u konsegwentement ma kellhomx jiġu inklużi fl-Anness.

(95)

Wara aktar eżami, instab li dawn l-allegazzjonijiet kienu korretti fil-każ ta’ ħames kumpaniji. Dawn il-kumpaniji ġew mgħarrfa bl-intenzjoni li jitneħħew mill-Anness rilevanti u ngħataw l-opportunità li jikkummentaw. Tlieta minn dawn il-kumpaniji ma ssottomettewx iżjed kummenti, waqt li żewġ kumpaniji għamlu iżjed affermazzjonijiet dwar din il-kwistjoni. Dawn l-affermazzjonijiet żejda ma kinux jinkludu evidenza biżżejjed sabiex juru li dawn il-kumpaniji kienu produtturi esportaturi tal-prodott ikkonċernat u għalhekk ġew miċħuda. Dawn il-ħames kumpaniji tneħhew kif xieraq mil-lista ta’ kumpaniji li jibbenefikaw mid-dazju medju definittiv peżat.

(96)

Sa mid-divulgazzjoni tal-konklużjonijiet provviżorji, ir-relazzjoni bejn grupp ta’ żewġ produtturi esportaturi li qegħdin jikkooperaw allegatament ġiet interrotta minħabba tibdil fl-istruttura tal-ishma fil-kumpaniji kummerċjali. Bħala riżultat ta’ dan, waħda minn dawn il-kumpaniji talbet dazju individwali indipendenti minn dak tal-kumpanija l-oħra.

(97)

Mill-informazzjoni pprovduta, jidher li l-konnessjonijiet bejn dawn iż-żewġ kumpaniji ġew interrotti wara l-PI. L-impatt ta’ din il-firda allegata fl-istruttura tal-grupp kif ukoll it-talba minn waħda mill-kumpaniji sabiex tiġi stabbilita rata ta’ dazju individwali għaliha jridu jiġu riveduti fid-dettall. F’dan ir-rigward, jekk waħda minn dawn il-kumpaniji titlob reviżjoni tas-sitwazzjoni tagħhom wara din il-firda allegata, dan jista’ jiġi kkunsidrat fiż-żmien approprjat f’konformità mar-Regolament bażiku. F’dawn iċ-ċirkostanzi, it-talba tal-kumpanija li jiġi stabbilit dazju individwali għaliha f’din l-investigazzjoni hija miċħuda.

(98)

Wara l-iżvelar finali, il-kwerelant afferma li wieħed mill-produtturi esportaturi relatati msemmija fil-premessa (97) għandu jkollu dazju separat ikkalkulat għalih bir-raġuni li kien hemm evidenza li kien dumping f’livell ogħla minn dak tal-produttur esportatur l-ieħor. F’dan ir-rigward, għandu jiġi nnotat li għall-produtturi esportaturi li jkunu relatati waqt il-PI ta’ investigazzjoni n-nuqqas ta’ kalkolu tal-marġni tad-dumping medju peżat u dazju wieħed għalihom iħalli kamp ta’ applikazzjoni għal ċirkumvenzjoni tad-dazji min-naħa tal-produttur esportatur suġġett għal dazju ogħla. Billi nstab li ż-żewġ produtturi esportaturi kkonċernati f’din l-investigazzjoni kienu relatati waqt il-PI, ma hemm l-ebda raġuni li jiġu stabbiliti dazji separati għal kull wieħed minnhom. Kif iddikjarat fil-premessa (97), jekk waħda minn dawn il-kumpaniji jew it-tnejn li huma jitolbu reviżjoni tas-sitwazzjoni tagħhom wara l-firda allegata tagħhom, dan jista’ jiġi kkunsidrat konformi mar-Regolament bażiku. F’dawn iċ-ċirkostanzi, l-affermazzjoni tal-kwerelant qiegħda tiġi miċħuda.

(99)

Fl-assenza ta’ kwalunkwe kumment jew konklużjonijiet ġodda dwar il-produzzjoni tal-Unjoni u l-industrija tal-Unjoni, il-konklużjonijiet fil-premessi minn (68) sa (70) tar-Regolament provviżorju qegħdin b’dan jiġu kkonfermati.

(100)

Fl-assenza ta’ kwalunkwe kumment jew konklużjoni ġdida dwar il-konsum tal-Unjoni, il-konklużjonijiet fil-premessi (71) u (72) tar-Regolament provviżorju qegħdin b’dan jiġu kkonfermati.

(101)

Parti interessata partikolari qajmet dubji dwar l-analiżi tal-importazzjonijiet billi affermat li kemm l-ilment kif ukoll ir-Regolament provviżorju kienu nieqsa mid-dejta li tikkonċerna l-volum tal-importazzjonijiet, u allegat li kejl f’metri kwadri huwa kejl ta’ erja u mhux ta’ volum.

(102)

Parti interessata oħra affermat li l-iżviluppi fil-prezzijiet u l-volum tal-importazzjonijiet miċ-Ċina sempliċement kienu juru l-varjazzjonijiet kummerċjali normali u għalhekk ma setgħux ikunu ta’ indikazzjoni tal-imġiba tal-esportaturi Ċiniżi f’termini ta’ dumping.

(103)

Wara d-divulgazzjoni finali, parti partikolari qajmet dubji dwar l-affidabilità tal-istatistika tal-Eurostat billi affermat li l-prezzijiet effettivi tal-importazzjonijiet Ċiniżi huma ogħla u għalhekk paragunabbli mal-prezzijiet tal-importazzjoni minn pajjiżi terzi oħra. Barra dan, ġie affermat li dan jista’ jkollu effett fuq il-marġini tad-dumping misjuba.

(104)

Parti interessata oħra affermat li l-analiżi tagħha stess tal-istatistika tal-Eurostat f’termini ta’ sehem tas-suq u prezz tal-importazzjoni kienu kemm kemm differenti minn dawk tar-Regolament provviżorju u li dawn il-konklużjonijiet għandhom jiġu emendati kif xieraq.

(105)

Parti oħra interessata affermat li s-servizzi tal-Kummissjoni naqsu milli jikkunsidraw iż-żieda fil-prezzijiet tal-importazzjonijiet Ċiniżi li seħħu wara l-PI, fl-2010.

(106)

Rigward l-affermazzjoni dwar l-unità tal-kejl użata għad-determinazzjoni tal-volumi tal-importazzjoni, it-terminu “volum” tal-Artikolu 3.2 tar-Regolament bażiku jirreferi għall-“kwantità”, pjuttost milli għall-“volum kubiku”. Għal kull prodott, għandha tintuża l-unità tal-kejl l-iżjed rappreżentattiva. Rigward il-prodott ikkonċernat, l-operaturi fis-suq dinji jużaw b’mod konsistenti l-metri kwadri (m2). Għalhekk, din l-unità ġiet ikkunsidrata bħala l-iżjed approprjata għall-finijiet ta’ din l-investigazzjoni u l-affermazzjoni rigward dan ġiet miċħuda.

(107)

Għal dak li jikkonċerna l-iżviluppi fil-prezz u l-volum tal-importazzjonijiet miċ-Ċina, huwa minnu li l-varjazzjonijiet huma limitati meta jiġu kkunsidrati f’termini assoluti. L-importazzjonijiet Ċiniżi naqsu bi 3 % fil-perjodu kkunsidrat. Madankollu, l-konklużjoni dwar il-volum tal-importazzjonijiet Ċiniżi kellha titqiegħed fil-kuntest ta’ tnaqqis ġenerali fis-suq tal-Unjoni. Huwa ċar li l-fatt li l-importazzjonijiet Ċiniżi naqsu bi 3 % biss f’dan il-perjodu meta l-konsum ġenerali naqas b’29 % kellu impatt fuq il-preżenza tagħhom fis-suq tal-Unjoni. Għalhekk iż-żamma tal-importazzjonijiet fuq livell stabbli ppermetta lill-importazzjonijiet Ċiniżi li jiggwadanjaw sehem sinifikanti mis-suq f’perjodu fejn operaturi oħra kellhom telf.

(108)

Għal dak li jirrigwarda l-evoluzzjoni tal-prezzijiet Ċiniżi, il-prezzijiet medji tal-importazzjonijiet indikati fil-premessa (73) tar-Regolament provviżorju kienu bbażati fuq l-istatistika tal-Eurostat. Tqajmu dubji dwar l-eżattezza tal-prezzijiet medji tal-importazzjoni lejn ċerti Stati Membri iżda ma ġie kkonfermat l-ebda tibdil fl-istatistika uffiċjali. Fi kwalunkwe eventwalità, qed jiġi mfakkar li d-dejta tal-Eurostat intużat biss sabiex jiġu stabbiliti t-tendenzi ġenerali u li anki jekk il-prezzijiet tal-importazzjonijiet Ċiniżi kellhom jiġu aġġustati sabiex jiżdiedu l-kwadru ġenerali tad-dannu xorta waħda jibqa’ l-istess b’marġini għolja għat-twaqqigħ fil-prezzijiet u l-bejgħ. F’dan il-kuntest għandu jiġi nnotat li għall-kalkolu tal-marġini kemm tad-dannu kif ukoll tad-dumping ma ntużatx id-dejta tal-Eurostat. Intużat biss dejta verifikata minn kumpaniji li fihom saru żjarat sabiex jiġi determinat il-livell tal-marġini. Għalhekk, anki jekk jinstabu d-diskrepanzi mal-istatistika, dan ma għandu jkollu l-ebda impatt fuq il-livell tal-marġini żvelati.

(109)

Għal dak li jirrigwarda l-affermazzjoni li s-servizzi tal-Kummissjoni naqsu milli jikkunsidraw id-dejta tal-Eurostat mill-2010 dan l-argument ma jistax jiġi sostnut billi l-figura għall-PI inkludiet l-ewwel tliet xhur tal-2010. Għal dak li jirrigwarda l-perjodu bejn it-tieni trimestru u l-aħħar trimestru tal-2010 għandu jiġi nnotat li dawn il-figuri huma konnessi mal-perjodu ta’ wara l-PI li m’għandux jiġi kkunsidrat. Barra dan, anki jekk dawn kellhom jiġu kkunsidrati, l-istatistika tal-importazzjonijiet turi li l-prezzijiet tal-importazzjonijiet mill-pajjiżi terzi żdiedu wkoll li jindika li din kienet tendenza ġenerali u mhux iżolata b’mod speċifiku għall-importazzjonijiet Ċiniżi.

(110)

Qed jiġi mfakkar li fl-istadju provviżorju kif deskritt fil-qosor fil-premessa (76) tar-Regolament provviżorju t-twaqqigħ tal-prezz kien definit bħala l-prezzijiet medji tal-bejgħ peżati tal-produtturi tal-Unjoni lill-klijenti mhux relatati fis-suq tal-Unjoni, aġġustati għal livell ex-works, imqabbla skont it-tip ta’ prodott mal-prezzijiet medji peżati korrispondenti tal-importazzjonijiet miċ-Ċina lill-ewwel klijent indipendenti fis-suq tal-Unjoni, stabbiliti fuq bażi CIF, b’aġġustamenti xierqa għad-dazji doganali eżistenti, l-ispejjeż ta’ wara l-importazzjoni u l-livell ta’ kummerċ.

(111)

Parti partikolari sostniet li l-kalkoli żvelati lill-partijiet dwar il-kalkolu tal-prezz tal-esportazzjoni ma kinux jikkorrispondu mal-ispjegazzjoni mogħtija fil-premessa (76) tar-Regolament provviżorju. Mal-verifika, ġie kkonfermat li kien hemm żball testwali f’dik il-premessa. Fl-istadju provviżorju, kien tabilħaqq sar l-aġġustament tal-livell tal-kummerċ għall-prezzijiet tal-bejgħ ex-works tal-produtturi tal-Unjoni lill-klijenti mhux relatati fis-suq tal-Unjoni u ma kien sar l-ebda aġġustament għall-ispiża ta’ wara l-importazzjoni fil-kalkolu tal-prezz medju tal-esportazzjoni. Fl-istadju definittiv, il-prezzijiet CIF tal-konfini tal-Unjoni tal-produtturi esportaturi tal-pajjiż ikkonċernat ġew aġġustati għad-dazji doganali eżistenti u għall-ispejjeż ta’ wara l-importazzjoni (spejjeż magħmula f’port tal-Unjoni minħabba spejjeż ta’ importazzjoni, trasport u ħżin li jsiru qabel il-bejgħ mill-ġdid mill-importaturi), fuq il-bażi tal-informazzjoni mogħtija mill-importaturi mhux relatati li qegħdin jikkooperaw.

(112)

Parti oħra sostniet li meta jitnaqqsu sabiex jiġu kkunsidrati l-ispejjeż tad-distribuzzjoni/kummerċjalizzazzjoni, il-prezzijiet għandhom ikunu simili għal dawk tal-esportaturi Ċiniżi. Madankollu, il-kalkolu provviżorju diġà kien jinkludi dawn l-aġġustamenti. Konsegwentement, din l-affermazzjoni ma kinitx ġustifikata u għalhekk ġiet miċħuda.

(113)

L-investigazzjoni evidenzjat livelli ta’ twaqqigħ tal-prezzijiet bejn 43,2 % u 55,7 %, li hija sitwazzjoni kemm kemm differenti minn dak li nstab b’mod provviżorju (ara l-premessa (77) tar-Regolament provviżorju). Ir-raġuni għal din il-bidla hija l-kalkolu ta’ valur CIF ġdid għall-produttur esportatur imsemmi fil-premessi minn (83) sa (85) u l-kalkolu ta’ prezz CIF individwali tal-esportazzjoni għall-produttur esportatur il-Grupp Kito, imsemmi fil-premessa (51).

(114)

Fin-nuqqas ta’ kwalunkwe kumment jew konklużjoni dwar l-importazzjonijiet minn pajjiżi terzi minbarra ċ-Ċina l-konklużjonijiet fil-premessi minn (78) sa (80) tar-Regolament provviżorju huma b’dan ikkonfermati.

(115)

Fin-nuqqas ta’ kwalunkwe kumment jew konklużjoni dwar il-produzzjoni, il-kapaċità u l-użu tal-kapaċità l-konklużjonijiet fil-premessi minn (84) sa (85) tar-Regolament provviżorju b’dan qegħdin jiġu kkonfermati.

(116)

Fin-nuqqas ta’ kwalunkwe kumment jew konklużjoni dwar il-volum tal-bejgħ u s-sehem mis-suq il-konklużjonijiet fil-premessi minn (86) sa (87) tar-Regolament provviżorju b’dan qegħdin jiġu kkonfermati.

(117)

Fin-nuqqas ta’ kwalunkwe kumment jew konklużjoni dwar l-impjieg u l-produttività l-konklużjonijiet fil-premessi minn (88) sa (89) tar-Regolament provviżorju b’dan qegħdin jiġu kkonfermati.

(118)

Il-marġini tad-dumping huma speċifikati fil-premessi minn (88) sa (93). Qed jiġi kkonfermat li l-marġini kollha stabbiliti huma ‘l fuq b’mod sinifikanti mil-livell de minimus. Għalhekk, b’kunsiderazzjoni tal-volumi u l-prezzijiet tal-importazzjonijiet li huma l-oġġett ta’ dumping, qed jiġi kkonfermat li l-impatt tal-marġni effettiv tad-dumping ma jistax jiġi kkunsidrat bħala negliġibbli.

(119)

Parti partikolari kkuntestat l-eżattezza tad-dejta pprovduta fil-premessi minn (93) sa (95) tar-Regolament provviżorju. Il-parti sostniet li l-valur tal-ħażniet bħala perċentwal tal-produzzjoni matul il-perjodu taħt kunsiderazzjoni li qed jiġi kkunsidrat kien iżjed baxx b’mod konsiderevoli minn dak elenkat fit-Tabella 10 tal-istess Regolament. Dawk il-kalkoli ġew riveduti u nstab li d-dejta tal-perċentwali għall-2009 u l-PI biss ġiet ikkalkulata ħażin, u li f’dawk il-perjodi l-perċentwal tal-ħażniet tabilħaqq kien kemm kemm ogħla minn dak li kien indikat qabel. Verżjoni korretta ta’ dan il-kalkolu tinsab fit-Tabella 1 ta’ dan ir-Regolament.

(120)

L-istess parti allegat li jekk l-industrija tal-Unjoni kellha żżid il-livell tal-ħażniet tagħha sa ma jintlaħaq il-livell ta’ sitt xhur ta’ produzzjoni, kif iddikjarat fil-premessa (94) tar-Regolament provviżorju, dak għandu jirrappreżenta perċentwal ta’ ħażniet ta’ 50 % fuq il-produzzjoni totali, pjuttost milli 59 % kif muri fit-Tabella 10 tar-Regolament provviżorju.

(121)

F’dan ir-rigward għandu jiġi enfasizzat li l-analiżi magħmula fil-premessi (93) u (94) tar-Regolament provviżorju kienu kumplimentari iżda mhux identiċi. L-ewwel analiżi wriet il-perċentwal ta’ ħażniet tal-kumpaniji kampjunati mkejjel f’metri kwadri meta mqabbel mal-produzzjoni tal-kumpaniji kampjunati, espress ukoll f’metri kwadri (61 % għall-PI). It-tieni analiżi, li saret ukoll għall-kumpaniji kampjunati, uriet in-numru ta’ xhur ta’ produzzjoni maħżuna meta mqabbla mat-tnax-il xahar tas-sena (50 % għall-PI).

(122)

Iktar analiżi ippermettiet li jsir l-irfinar tal-valutazzjoni tal-evoluzzjoni fuq in-numru ta’ xhur ta’ produzzjoni li jkunu qegħdin jinħażnu. F’dan ir-rigward, fl-2007 il-produtturi kampjunati żammu madwar ħames xhur ta’ produzzjoni (43 %) iżda l-pressjoni tal-importazzjonijiet li huma l-oġġett ta’ dumping ġegħlithom li jżidu l-ħażniet għal iżjed minn seba’ xhur ta’ produzzjoni (li jikkorrispondu għal 61 % tal-produzzjoni totali fis-sena) waqt il-PI. It-Tabella 1 tesprimi l-volumi tal-ħażniet anki fil-forma ta’ numru ta’ xhur matul il-produzzjoni annwali.

(123)

Tabella 1

Ħażniet

(124)

Għalhekk il-konklużjoni li t-tendenza tal-ħażniet turi sitwazzjoni ta’ dannu hija kkonfermata.

(125)

Parti interessata partikolari, kif imsemmi diġà fil-premessa (20), ikkuntestat il-konklużjonijiet fil-premessi minn (96) sa (99) tar-Regolament provviżorju dwar il-prezzijiet tal-bejgħ tal-industrija tal-Unjoni, fejn sostniet li l-Kummissjoni fid-determinazjjoni tagħha tal-prezz tal-unità tal-Unjoni ma nkludietx il-produtturi fil-Polonja u fir-Repubblika Ċeka u li l-konklużjonijiet ma kinux konsistenti mad-dejta pubblika effettiva.

(126)

Rigward din l-affermazzjoni, saret simulazzjoni li inkludiet il-prezzijiet tal-bejgħ irreġistrati fil-Polonja, li tammonta għal madwar 10 % tal-produzzjoni totali tal-Unjoni. L-ebda simulazzjoni ma kienet saret għar-Repubblika Ċeka, li l-produzzjoni tagħha tammonta għal inqas minn 3 % tat-total fil-produzzjoni tal-Unjoni. Is-simulazzjoni wriet li, anki jekk jiġu kkunsidrati l-prezzijiet Pollakki, il-konklużjonijiet finali ma jinbidlux b’mod li jagħmel differenza. Finalment, f’konformità ma’ din il-metodoloġija, il-Kummissjoni kkalkulat il-prezzijiet tal-bejgħ tal-industrija tal-Unjoni wara li għamlet l-aġġustamenti rilevanti sabiex tikseb il-prezzijiet għall-ewwel klijent indipendenti, sabiex tiżgura l-paragunabilità mal-prezzijiet tal-bejgħ Ċiniżi.

(127)

Parti interessata partikolari sostniet li r-raġunament fil-premessa (97) tar-Regolament provviżorju li jispjega li l-industrija tal-Unjoni kienet sfurzata li tbigħ inqas kwantitajiet u varjetà ikbar kien ħażin billi l-industrija tal-Unjoni f’każ bħal dan allegatament kellha titlef ħafna iżjed mit-2 % tas-sehem tas-suq.

(128)

Għandu jiġi osservat li l-iffukar fuq il-bejgħ ta’ lottijiet iżjed baxxi mhux neċessarjament jimplika t-telf ta’ sehem ikbar tas-suq. L-ewwelnett, l-industrija tal-Unjoni ma tneħħietx kompletament mis-suq għal dak li jirrigwarda l-lottijiet ikbar u uniformi tal-prodott, minkejja li l-pressjoni tal-importazzjonijiet Ċiniżi ta’ prezz baxx hija partikolarment qawwija f’dak is-settur. It-tieni nett, l-industrija tal-Unjoni kellha l-ħila li żżomm il-preżenza tagħha fuq is-suq kollu permezz tal-kompressjoni tal-prezzijiet tal-bejgħ tagħha u l-produzzjoni ta’ taħlita ta’ prodotti li tiswa iżjed, li wasslu għal nuqqas fil-profitabbiltà kif imsemmi fil-premessa (100) tar-Regolament provviżorju. Għalhekk, il-fatt li l-industrija tal-Unjoni ma tilfitx porzjon ikbar mis-suq huwa spjegat bl-għażla li tinżamm preżenza fis-suq minkejja l-pressjoni tal-prezzijiet miċ-Ċina.

(129)

Parti partikolari sostniet li jeżistu differenzi kbar fil-profitabbiltà bejn il-kumpaniji l-kbar u dawk żgħar. Għal din ir-raġuni ġie sostnut li l-profitt medju kellu jiġi kkunsidrat bħala mhux rappreżentattiv billi l-kampjun kien jinkludi biss dejta minn kumpanija kbira waħda.

(130)

Parti oħra sostniet li l-produtturi l-kbar tal-Unjoni jinsabu f’kundizzjoni finanzjarja tajba. L-istess parti sostniet li billi ma kien hemm l-ebda telf anki meta jiġu miżjuda l-kumpaniji ż-żgħar fil-marġni tal-profitt medju tal-industrija tal-Unjoni kif muri fil-premessa (101) u t-Tabella 12 tar-Regolament provviżorju, ma seta’ jiġi evidenzjat l-ebda dannu ġenerali.

(131)

Għandu jiġi nnotata li sabiex tiġi garantita l-konsistenza tal-konklużjonijiet mar-rappreżentattività tat-teħid tal-kampjuni, l-indikaturi kollha tad-dannu (inkluż il-profitt) ġew peżati skont is-sehem ta’ kull segment fil-produzzjoni totali tal-Unjoni. Min-naħa l-oħra, ir-rappreżentattività tal-kumpanija l-kbira tas-sitwazzjoni tal-ikbar segment hija kkonfermata. Għalhekk, l-indikaturi ġenerali skont kif miksuba mill-analiżi tal-kumpaniji tal-kampjunar huma rappreżentattivi tas-sitwazzjoni tal-industrija kollha tal-Unjoni u l-affermazzjoni msemmija hawn fuq kellha tiġi miċħuda.

(132)

Rigward l-affermazzjoni li l-kumpaniji l-kbar ma sofrew l-ebda dannu, għandu jiġi nnotat li skont l-Artikolu 4(1) tar-Regolament bażiku l-analiżi għandha ssir rigward l-industrija tal-Unjoni b’mod ġenerali u mhux rigward ċerti gruppi jew tipi ta’ kumpaniji. Kif diġà msemmi fil-premessa (130), il-fatt li ma hemm l-ebda telf fil-PI ma jfissirx per se li ma sar l-ebda dannu.

(133)

Parti interessata partikolari kkuntestat il-konklużjoni li l-ispiża tal-produzzjoni tal-industrija tal-Unjoni kienet żdiedet b’14 % bħala konsegwenza taż-żieda fil-ħażniet u t-tibdil fit-taħlita tal-prodott. Skont din il-parti, din il-konklużjoni ma tistax tiġi sostnuta billi l-livelli tal-ħażniet kif ukoll it-taħlita tal-prodott mhumiex parti mill-ispiża tal-produzzjoni.

(134)

Din l-affermazzjoni għandha tiġi miċħuda billi livelli għolja ta’ ħażniet jirrappreżentaw spiża finanzjarja konsiderevoli, li hija inkluża fl-analiżi tal-ispiża tal-produzzjoni. Min-naħa l-oħra, it-tibdil ripetut fit-taħlita tal-prodott jimplika spejjeż addizzjonali fil-produzzjoni billi l-produttur ikollu jirrevedi ta’ spiss il-proċess tal-produzzjoni: dan l-operat jista’ jinvolvi spejjeż kbar billi joħloq perjodi li fihom ma jkun qed isir xejn u użu subottimali tal-makkinarji.

(135)

Parti interessata partikolari qajmet dubji dwar il-konklużjoni fil-premessa (107) tar-Regolament provviżorju li t-tnaqqis fil-konsum kellu effett negattiv fuq l-industrija tal-Unjoni. Skont din il-parti ma jistax ikun hemm dannu bħala konsegwenza tat-tnaqqis fil-konsum billi s-sehem ġenerali tas-suq baqa’ l-istess.

(136)

Rigward il-kumment fuq l-istabbiltà tas-sehem tas-suq tal-produtturi tal-Unjoni minkejja t-tnaqqis fil-konsum, għandu jiġi nnotat li s-sehem mis-suq mhuwiex l-uniku indikatur rilevanti ta’ dannu. Il-produtturi tal-Unjoni rnexxielhom iżommu s-sehem tagħhom tass-suq tal-Unjoni biss b’detriment tal-profitabbiltà, li waqgħet waqt il-perjodu taħt kunsiderazzjoni. Għalhekk ma jistax jiġi konkluż li l-istabbiltà tas-sehem tas-suq tal-produtturi tal-Unjoni teskludi l-preżenza ta’ dannu.

(137)

B’kunsiderazzjoni ta’ dan ta’ hawn fuq, il-konklużjonijiet dwar il-ħsara kif stabbilit fil-premessi minn (107) sa (111) tar-Regolament provviżorju qegħdin b’dan jiġu kkonfermati.

(138)

Il-Kummissjoni rċeviet kummenti dwar il-konklużjonijiet provviżorji li jikkonċernaw il-kawżalità. Dawk il-kummenti kienu ripetizzjoni ta’ kummenti diġà indirizzati fir-Regolament provviżorju fil-premessi minn (128) sa (132) dwar dannu magħmul kontra l-interessi proprji. Ma ġiet sottomessal-ebda evidenza oħra li tista’ tibdel il-konklużjonijiet provviżorji. Għalhekk, il-konklużjonijiet kif stabbiliti fil-premessi (135) u 136 tar-Regolament provviżorju qegħdin b’dan jiġu kkonfermati.

(139)

Skont l-Artikoli 3(6) u 3(7) tar-Regolament bażiku, fl-istadju provviżorju ġie eżaminat jekk l-importazzjonijiet li kienu l-oġġett ta’ dumping tal-prodott ikkonċernat li joriġina miċ-Ċina kinux ikkawżaw dannu materjali lill-industrija tal-Unjoni.

(140)

Ċerti partijiet affermaw li t-tnaqqis fil-produzzjoni u l-bejgħ tal-industrija tal-Unjoni kien riżultat ta’ tnaqqis fil-konsum. Ġie sostnut ukoll li l-effetti tal-importazzjonijiet Ċiniżi probabbilment kienu limitati billi s-sehem tas-suq Ċiniż żdied biss b’1,6 % li minnhom mhux iżjed minn 1 % setgħu kienu konnessi mas-sehem tas-suq tal-industrija tal-Unjoni.

(141)

F’dan il-kuntest qed jiġi mfakkar li l-investigazzjoni wriet koinċidenza fiż-żmien bejn iż-żieda tas-sehem tas-suq tal-importazzjonijiet Ċiniżi u t-tnaqqis tal-profitt tal-industrija tal-Unjoni u żieda fil-livelli tal-ħażniet. Barra dan, ma kinitx biss iż-żieda fis-sehem tas-suq li tefgħet pressjoni fuq l-industrija tal-Unjoni iżda effett ħafna ikbar ġie eżerċitat mill-imġiba fl-ipprezzar u l-livelli għolja ta’ twaqqigħ tal-prezzijiet tal-produtturi esportaturi Ċiniżi.

(142)

Kif ġie mfakkar fil-premessa (113), l-investigazzjoni żvelat livelli sinifikanti ta’ twaqqigħ tal-prezzijiet. Uriet ukoll li l-industrija u l-importaturi tal-Unjoni fil-maġġoranza tal-każijiet kienu qegħdin ibigħu lill-istess klijenti li kien ifisser li l-industrija tal-Unjoni kienet qiegħda tikkompeti direttament mal-importazzjonijiet li huma l-oġġett ta’ dumping għall-ordnijiet.

(143)

B’mod ġenerali dan juri li kienet il-pressjoni tal-prezzijiet u mhux biss il-volumi tal-importazzjonijiet li ħolqot it-tnaqqis fil-figuri tal-profitabbiltà tal-industrija tal-Unjoni u d-deterjorament ta’ ħafna mill-indikaturi ta’ dannu.

(144)

Bosta partijiet interessati affermaw li l-importazzjonijiet tal-madum taċ-ċeramika miċ-Ċina ma setgħux jikkawżaw dannu lill-industrija tal-Unjoni billi mhumiex paragunabbli. F’dan il-kuntest ġie sostnut li l-madum taċ-ċeramika miċ-Ċina jipprovdi s-suq għal prodotti omoġenji waqt li l-industrija tal-Unjoni tipproduċi skont ordni, f’lottijiet iżgħar. Ġie sostnut ukoll li l-industriji Ċiniżi u tal-Unjoni mhumiex f’kompetizzjoni minħabba li l-industrija Ċiniża topera bejn it-tarf tas-segment il-baxx u dak medju waqt li l-industrija tal-Unjoni topera bejn it-tarf tas-segment medju u dak għoli. It-telf limitat tas-sehem tas-suq min-naħa tal-industrija tal-Unjoni tressaq bħala evidenza f’dan ir-rigward.

(145)

Waqt li ma ġiet ipprovduta l-ebda evidenza sostantiva bħala appoġġ tal-affermazzjonijiet ta’ hawn fuq, madankollu ġie kkunsidrat b’attenzjoni jekk l-importazzjonijiet Ċiniżi kienux tabilħaqq jikkompetu mal-madum prodott fl-Unjoni.

(146)

F’dan il-kuntest għandu jiġi nnotat li l-Kummissjoni għamlet paraguni dettaljati ħafna, li għamlu distinzjoni bejn mijiet ta’ tipi differenti ta’ madum. F’dan il-każ, l-investigazzjoni wriet livell sinifikanti ta’ tipi li jaqblu bejn l-industrija tal-Unjoni u l-esportaturi. Dab juri biċ-ċar li l-industrija tal-Unjoni u l-importazzjonijiet Ċiniżi qegħdin jikkompetu f’termini ta’ tipi ta’ prodotti. Qed jiġi mfakkar ukoll li ġie stabbilit fl-investigazzjoni li l-industrija tal-Unjoni u l-produtturi esportaturi huma f’kompetizzjoni diretta billi huma jikkondividu bejniethom l-istess bażi ta’ klijenti.

(147)

Rigward l-affermazzjoni li l-madum taċ-ċeramika miċ-Ċina jipprovdi lis-suq għall-prodotti omoġenji waqt li l-industrija tal-Unjoni tipproduċi skont ordnijiet, f’lottijiet iżgħar, qed jiġi mfakkar — ara l-premessa (95) tar-Regolament provviżorju — li kienet eżattament il-pressjoni mill-importazzjonijiet Ċiniżi li ġiegħlet lill-industrija tal-Unjoni li timxi lejn lottijiet iżgħar ta’ prodotti b’iktar varjetajiet f’termini ta’ lwien u daqs. L-indusrija tal-Unjoni għad għandha preżenza fis-segmenti kollha tas-suq u kuntrarjament għal dak li ġie affermat hawn fuq, il-mudell li juri li l-industrija tal-Unjoni kellha tiffoka fuq tipi speċifiċi ta’ prodotti għandu jiġi kkunsidrat bħala indikazzjoni li kienet teżisti kompetizzjoni diretta.

(148)

Fid-dawl ta’ dan ta’ hawn fuq, l-argument li l-importazzjonijiet Ċiniżi ma ħolqux dannu lill-industrija tal-Unjoni billi ma kinux qegħdin jikkompetu ma jistax jiġi sostnut.

(149)

Ċerti partijiet sostnew l-argument li l-impatt tal-importazzjonijiet Torok kellu jiġi kkunsidrat bħala sinifikanti. F’termini ta’ prezzijiet parti partikolari kkontestat il-konklużjoni li ż-żieda ta 19 % fil-prezzijiet Torok kienet sostanzjali.

(150)

Dan l-argument ġie diskuss fil-premessa (118) tar-Regolament provviżorju u ma nstabet l-ebda evidenza ġdida li tista’ tinvalida l-konklużjoni magħmula fl-istadju provviżorju. F’dan il-kuntest qed jiġi kkonfermat li ż-żieda ta’ 19 % tal-prezzijiet Torok għandha tiġi kkunsidrata bħala sostanzjali. Qed jiġi mfakkar ukoll kif indikat fil-premessa (41) li ma kien hemm l-ebda evidenza ta’ importazzjonijiet dumped li kkawżaw dannu lill-industrija tal-Unjoni minn dan il-pajjiż u għalhekk dan l-argument ma jistax jiġi sostnut.

(151)

Parti partikolari sostniet li t-tnaqqis fil-konsum affettwa prinċipalment lil Spanja u l-Italja fejn allegatament sar l-iktar dannu. Għall-kuntrarju, id-destinazzjoni ewlenija tal-esportazzjonijiet Ċiniżi kienu l-Istati Membri tat-Tramuntana li ma urewx tnaqqis fil-konsum u fejn il-produtturi tal-Unjoni allegatament sofrew inqas dannu. L-istess parti sostniet ukoll li l-industrija tal-madum taċ-ċeramika Spanjola rkuprat fl-2010 li juri li ma hemm l-ebda konnessjoni bejn l-esportazzjonijiet Ċiniżi u l-figuri tal-produzzjoni u l-bejgħ tal-industrija tal-Unjoni.

(152)

Parti waħda sostniet li ż-żieda tal-ħażniet irreġistrata mill-industrija tal-Unjoni għandha tiġi attribwita għat-tnaqqis fil-konsum tal-Unjoni, u mhux għall-importazzjonijiet Ċiniżi dumped.

(153)

L-argumenti li l-Istati Membri tal-Ewropa tat-Tramuntana ma ġewx affettwati bit-tnaqqis fil-konsum u li l-importazzjonijiet miċ-Ċina kienu jiġu diretti biss lejn l-Ewropa tat-tramuntana, ma ġie sostnut bl-ebda evidenza sostanzjali. Għall-kuntrarju, id-dejta mill-produtturi esportaturi Ċiniżi magħżula bħala kampjun turi li dan il-bejgħ huwa mifrux b’mod uniformi madwar l-Unjoni. Barra dan, Spanja u l-Italja kollettivament jammontaw għal 28 % ta’ dan il-bejgħ, perċentwal li huwa biss ftit inqas mill-bejgħ tal-Ġermanja (32 %). Fuq din il-bażi, dawn l-argumenti ġew miċħuda.

(154)

Rigward l-argument li ż-żieda tal-ħażniet irreġistrata mill-industrija tal-Unjoni għandha tiġi attribwita għat-tnaqqis fil-konsum, il-Kummissjoni tfakkar ir-raġunament li jinsab fil-premessa (108) tar-Regolament provviżorju, jiġifieri li l-pressjoni tal-importazzjonijiet Ċiniżi kienet qawwija ħafna b’mod speċjali fis-settur tal-bejgħ ta’ lottijiet kbar u li dan kellu impatt ċar fuq il-ħażniet tal-produtturi tal-Unjoni. Iż-żieda tal-proporzjon tal-ħażniet matul il-perjodu taħt kunsiderazzjoni ma tistax tiġi spjegata biss bid-diffikultà li jinbigħu l-prodotti, iżda wkoll bil-ħtieġa li tinżamm varjetà estremament għolja ta’ prodotti disponibbli fil-ħażniet. Għalhekk il-konklużjoni dwar l-effett dannuż tal-importazzjonijiet Ċiniżi fuq il-ħażniet hija kkonfermata.

(155)

Bosta partijiet interessati sostnew li l-kriżi ekonomika kienet il-kawża reali tad-diffikultajiet li magħhom qiegħda tħabbat wiċċa l-industrija tal-Unjoni. Dan ġie evidenzjat bil-fatt li d-deterjoramenti ewlenin seħħu bejn l-2008 u l-2009 jiġifieri fis-sena li faqqgħet il-kriżi, waqt li t-tendenza kienet inqas qawwija fil-perjodu ta’ wara. Ġie osservat ukoll li l-perjodu li qed jiġi kkunsidrat kien jinkludi l-ogħla punt u dak l-iżjed baxx ta’ ċiklu fejn l-ogħla punt kien ikkaratterizzat bil-boom fis-settur tal-kostruzzjoni u l-punt l-iżjed baxx bil-kriżi finanzjarja u t-tnaqqis fl-esportazzjonijiet minħabba t-twaqqif ta’ postijiet ġodda ta’ produzzjoni fil-pajjiżi tat-tielet dinja.

(156)

Wara d-divulgazzjoni finali, parti partikolari sostniet li d-deterjorament ta’ numru ta’ indikaturi ta’ dannu kien minħabba l-kriżi ekonomika pjuttost milli minħabba l-importazzjonijiet. Skont din il-parti, l-effett tar-reċessjoni kien iż-żieda fid-domanda ta’ kwantitajiet kbar ta’ prodotti bi prezz baxx. Bħala riżultat ta’ dan, l-industrija tal-Unjoni kellha tiffoka iżjed fuq il-produzzjoni għal ordnijiet ta’ kwantitajiet kbar, segment fejn iċ-Ċiniżi kienu diġà qegħdin joperaw, b’żieda fil-livell tal-ħażniet bħala riżultat. Barra dan, ir-reċessjoni allegatament ħolqot inflazzjoni fl-Unjoni, li b’paragun kienet ogħla minn dik taċ-Ċina, li kkawżat iż-żieda fl-ispejjeż tal-produzzjoni tal-produtturi tal-Unjoni li allegatament wasslet lill-industrija tal-Unjoni sabiex tbigħ bi prezzijiet iżjed baxxi mill-ispiża tal-produzzjoni.

(157)

Parti oħra sostniet li l-profitt tal-industrija tal-Unjoni kien żdied b’mod sinifikanti fl-aħħar trimestru tal-PI u li dan wera li l-industrija tal-Unjoni kienet irkuprat wara l-kriżi ekonomika. Din il-parti talbet li l-profitt għall-PI għandu jingħata kull tliet xhur li għandu probabbilment jindika profittabilità ogħla b’mod sinifikanti lejn l-aħħar tal-PI.

(158)

Il-fatt li l-kriżi ekonomika kellha effett fuq il-prestazzjoni tal-industrija tal-Unjoni diġà ġie rikonoxxut fil-premessa (120) tar-Regolament li jimponi l-miżuri provviżorji. F’dan il-kuntest għandu jitfakkar li sabiex tiġi stabbilita kawżalità, l-istandard legali rilevanti jistipula li l-importazzjonijiet dumped jeħtieġ li jkunu kkawżaw id-dannu materjali lill-Industrija tal-Unjoni. Madankollu l-importazzjonijiet dumped setgħu ma kinux l-unika kawża tad-dannu.

(159)

Barra dan l-investigazzjoni wriet li t-tendenza Ċiniża taż-żieda fl-esportazzjonijiet tista’ tkompli minkejja l-kriżi ekonomika. Iċ-Ċina tabilħaqq kienet l-unika attur fis-suq li kienet kapaċi żżomm is-sehem tas-suq tagħha fis-sitwazzjoni ekonomika diffiċli.

(160)

Għal dak li jirrigwarda t-tibdil strutturali fid-domanda tal-Unjoni msemmija fil-premessa (156), ma tressqet l-ebda evidenza bħala appoġġ għal din il-pretensjoni. Għall-kuntrarju, qed jiġi mfakkar li kif ġie spjegat fil-premessa (106) tar-Regolament provviżorju l-investigazzjoni wriet li l-industrija tal-Unjoni kellha tbiddel it-taħlita tal-prodott tagħha billi tipprovdi varjetà ikbar ta’ prodotti f’termini ta’ tipi, lewn u daqs u kellha żżid il-ħażniet tagħha sabiex tkun tista’ f’qasir żmien tindirizza ordnijiet speċifiċi ferm. Għalhekk dan l-argument għandu jiġi miċħud.

(161)

Għal dak li jikkonċerna l-impatt tal-inflazzjoni fl-ispiża tal-produzzjoni, qed jiġi osservat li r-rata tal-inflazzjoni fl-Unjoni bħala medja ma kinitx ogħla minn dik fiċ-Ċina waqt il-perjodu taħt kunsiderazzjoni u li għalhekk ma tistax tispjega d-diffikultajiet tal-produtturi tal-Unjoni sabiex ibigħu bi prezzijiet sostenibbli. Barra dan, b’kunsiderazzjoni tal-livell ta’ twaqqigħ fil-prezzijiet ma jistax jiġi konkluż li pressjoni għal tnaqqis fuq il-prezzijiet tal-importazzjonijiet Ċiniżi ġiet ikkawżata mill-industrija tal-Unjoni. Fuq din il-bażi, il-pretensjoni mressqa minn din il-parti kellha tiġi miċħuda.

(162)

Min-naħa l-oħra għal dak li jirrigwarda s-sitwazzjoni tal-industrija tal-Unjoni, qed jiġi mfakkar li r-Regolament provviżorju (premessa (126)) wera li qabel ma bdiet il-kriżi ekonomika dinjija l-imġiba aggressiva fl-ipprezzar min-naħa tal-esportaturi Ċiniżi diġà kienet affettwat il-profitabbiltà tal-industrija tal-Unjoni matul il-perjodu taħt kunsiderazzjoni. Dan juri li anki fil-preżenza tal-kriżi, il-pressjoni tal-importazzjonijiet bi prezz baxx miċ-Ċina waħedha kienet biżżejjed sabiex toħloq dannu materjali lill-industrija tal-Unjoni.

(163)

Dan il-fatt, jekk jiġi kkunsidrat mal-prezzijiet dumped, isaħħaħ il-konklużjoni li l-kawżalità bejn l-esportazzjonijiet Ċiniżi u d-dannu lill-industrija tal-Unoni ma ġietx interrotta bil-kriżi ekonomika.

(164)

Għal dak li jirrigwarda t-talba li l-profitt għall-PI jingħata kull tliet xhur, dan ma ġiex ikkunsidrat bħala rilevanti fl-investigazzjoni kurrenti peress li anki jekk ikun hemm titjib iżjed konsiderevoli fil-profitt, dan ikollu jitqabbel mal-profitt immirat ta’ 3,9 %.

(165)

Parti interessata partikolari sostniet li d-dannu lill-produtturi tal-Unjoni għandu jiġi attribwit għan-nuqqas tagħhom milli jirristrutturaw billi l-kontrazzjoni tas-suq ta’ 29 % ġiet affrontata biss bi qtugħ fil-kapaċità ta’ 7 % u tnaqqis ta’ 16 % fl-impjiegi.

(166)

F’dan is-settur, it-tnaqqis tal-kapaċità ta’ produzzjoni huwa proċess diffiċli, billi l-irkupru tal-kapaċità fil-każ ta’ rkupru eventwali tas-suq jimplika spiża estremament kbira għall-produtturi. It-tnaqqis fl-impjiegi li sar fil-perjodu kkonċernat kien ekwiparabbli mal-kontrazzjoni tas-suq. It-tendenza għaż-żieda fl-impjiegi ma għandhiex għalfejn tirrifletti perfettament it-tendenza tal-produzzjoni, billi mhux l-impjiegi kollha huma konnessi direttament mal-produzzjoni effettiva. Bħala konklużjoni, il-fatt li t-tnaqqis fil-kapaċità u n-numru ta’ ħaddiema fl-industrija ma kienx eżattament ekwivalenti għall-kontrazzjoni tas-suq ma jfissirx li dan kien il-kawża ta’ nuqqas ta’ ristrutturazzjoni. Kuntrarjament għall-affermazzjonijiet u meta wieħed jikkunsidra l-istruttura tal-industrija, qtugħ ta’ 7 % tal-kapaċità u tnaqqis ta’ 16 % fin-numru ta’ impjiegi għandhom għalhekk jiġu kkunsidrati bħala sinifikanti.

(167)

Parti interessata partikolari sostniet li kienu l-prezzijiet għolja u mhux l-effett tal-esportazzjonijiet Ċiniżi li kienu kkawżaw it-tnaqqis fil-bejgħ tal-esportazzjonijiet tal-industrija tal-Unjoni.

(168)

Rigward din l-affermazzjoni qed jiġi mfakkar li l-prestazzjoni fl-esportazzjoni tal-industrija tal-Unjoni rkuprat wara l-kriżi ekonomika. Għalhekk l-affermazzjoni li l-prestazzjoni tal-esportazzjoni seta’ jkollha effett ħażin konsiderevoli fuq ir-riżultati tal-industrija tal-Unjoni ma tistax tiġi aċċettata.

(169)

L-ebda wieħed mill-argumenti sottomessi mill-partijiet interessati ma juri li l-impatt ta’ fatturi oħra minbarra l-importazzjonijiet dumped miċ-Ċina huwa tali li jinterrompi l-kawżalità bejn l-importazzjonijiet dumped u d-dannu li nstab. Il-konklużjonijiet dwar il-kawżalità fir-Regolament provviżorju qegħdin b’dan jiġu kkonfermati.

(170)

Fid-dawl tal-kummenti tal-partijiet il-Kummissjoni wettqet iżjed analiżi tal-argumenti kollha li jikkonċernaw l-interessi tal-Unjoni. Il-kwistjonijiet kollha ġew eżaminati u l-konklużjonijiet tar-Regolament provviżorju ġew ikkonfermati.

(171)

Fun-nuqqas ta’ kummenti dwar l-interess tal-industrija tal-Unjoni, il-konklużjonijiet fil-premessi minn (137) sa (141) tar-Regolament provviżorju qegħdin b’dan jiġu kkonfermati.

(172)

Parti interessata partikolari sostniet li l-impożizzjoni ta’ miżuri kienet qiegħda thedded l-eżistenza ekonomika tal-importaturi billi dawn se jkunu kapaċi li jgħaddu biss parti mill-ispejjeż żejda tad-dazji lill-klijenti tagħhom.

(173)

Wara d-divulgazzjoni finali żewġ partijiet opponew il-konklużjoni li l-importaturi jistgħu jgħaddu faċilment minn fornimenti Ċiniżi għal sorsi oħra ta’ forniment, b’mod partikolari minħabba li l-kwalitajiet u l-prezzijiet ma kinux paragunabbli.

(174)

Rigward din l-affermazzjoni, qed jiġi mfakkar li parti kbira tal-importazzjonijiet mhumiex affettwati mid-dazji billi huma ta’ oriġini mhux Ċiniża. Il-karatteristiċi tal-prodott, billi qed jiġi prodott madwar id-dinja kollha fi kwalitajiet paragunabbli jissuġġerixxu li dawn il-prodotti huma interskambjabbli u li għalhekk numru ta’ sorsi alternattivi huma disponibbli, minkejja l-allegazzjonijiet magħmula. Anki għall-importaturi li jiddependu fuq l-importazzjonijiet Ċiniżi, li fl-investigazzjoni nstab li huma dumped u mibjugħa bi prezzijiet konsiderevolment iżjed baxxi mill-prodotti li joriġinaw fl-Unjoni, l-investigazzjoni sabet li l-importaturi jistgħu japplikaw mark-ups għall-prezzijiet tal-bejgħ tagħhom f’eċċess ta’ 30 %. Dan, flimkien mal-fatt li nstab li l-importaturi wettqu profitt ta’ madwar 5 % u l-possibbiltà tagħhom li mill-inqas jgħaddu parti miż-żidiet potenzjali fl-ispejjeż lill-klijenti tagħhom, jissuġġerixxi li huma qegħdin f’pożizzjoni li jiffaċċjaw l-impatt tal-miżuri.

(175)

Barra dan u kif konkluż fil-premessa (144) tar-Regolament provviżorju, l-impożizzjoni ta’ miżuri ma għandhiex tfixkel lill-importaturi tal-Unjoni milli jżidu s-sehem tal-importazzjonijiet tal-prodotti tagħhom mis-sorsi l-oħra mhux dumped disponibbli għalihom kemm fl-Unjoni kif ukoll f’pajjiżi terzi oħra.

(176)

Importatur partikolari allega li għal ċertu tip ta’ prodott, il-prezzijiet Ċiniżi attwalment għandhom ikunu ogħla minn dawk tal-industrija tal-Unjoni u li l-miżuri għalhekk ma għandhomx jippermettu l-esportazzjoni ta’ dan it-tip speċifiku fil-ġejjieni.

(177)

Din l-affermazzjoni ma ġiet appoġġata minn l-ebda evidenza. Barra dan, skont l-informazzjoni disponibbli, dan it-tip ta’ prodott kien jirrappreżenta biss proporzjon minuri tas-suq u ma għandux jaffettwa b’mod sinifikanti s-sitwazzjoni tal-provvista fis-suq tal-Unjoni. Din l-affermazzjoni għalhekk ġiet miċħuda.

(178)

Uħud mill-partijiet interessati sostnew li l-impatt fuq l-utenti għandu jkun sinifikanti. B’mod partikolari ġie sostnut li anki ż-żieda minima tal-prezz ta’ 32,3 % għandha tipprevjeni x-xiri ta’ kwalità min-naħa tal-klijenti. Ġie sostnut ukoll li waqt li jista’ jkun minnu li l-impatt fuq ħwienet diversifikati tad-Do-It-Yourself jista’ jkun limitat, il-ħwienet żgħar speċjalizzati għandhom jiġu affettwati b’mod sinifikanti.

(179)

Għal dak li jirrigwarda l-impatt fuq l-utenti finali, il-Kummissjoni tikkonferma dak li ġie konkluż b’mod provviżorju fir-regolament tal-Kummissjoni li jimponi dazji provviżorji, taħt il-premessi (152) u (153), jiġifieri li l-effett tal-prezz se jkun limitat.

(180)

Is-settur tal-bini, wieħed mill-klijenti l-kbar tal-produtturi tal-madum taċ-ċeramika, iddeċieda li ma jikkooperax fl-investigazzjoni. Wara l-impożizzjoni ta’ miżuri provviżorji, il-Federazzjoni Ewropea tal-Industrija tal-Bini – FIEC ġiet mistiedna għal darb’oħra sabiex tipprovdi statistika li turi sa liema punt, jekk effettivament huwa hekk, tista’ tiġi affettwata bl-impożizzjoni ta’ miżuri. Il-FIEC ikkonfermat li, minkejja li ma hemm l-ebda informazzjoni disponibbli direttament, l-impatt fuq l-ispiża tal-miżuri fuq in-negozju ġenerali tagħha huwa baxx ħafna. Spjegat ukoll li l-interess baxx min-naħa tal-membri tagħha għandu jiġi kkunsidrat bħala appoġġ għall-proposta tal-Kummissjoni.

(181)

Finalment, rigward il-ħwienet żgħar speċjalizzati, il-Kummissjoni ma setgħet tikseb l-ebda dejta konklużiva li setgħet tikkonferma l-kobor u l-limitu tal-impatt tal-miżura antidumping. B’mod parallel ma’ dak li jiġri lill-importaturi, għandu jiġi mfakkar li l-madum taċ-ċeramika jiġi prodott fl-Unjoni u f’ħafna pajjiżi terzi li ma jagħmlux dumping; għalhekk jista’ jiġi eskluż riskju serju ta’ nuqqas ta’ provvista għall-ħwienet li jbigħu bl-imnut.

(182)

Ġew magħmula sforzi sabiex tinkiseb valutazzjoni tal-impatt iżjed dettaljata mill-konsumaturi. L-investigazzjoni uriet li l-impatt probabbilment se jkun limitat.

(183)

L-ewwel nett, il-valur assolut tal-miżuri huwa kkalkulat fuq il-prezz tal-importazzjoni, għalhekk fuq bażi li hija ħafna iżjed baxxa mill-prezz bl-imnut finali tal-prodott ikkonċernat. Dan il-valur jista’ jiġi dilwit fl-istadji varji (importaturi, bejjiegħa bl-ingrossa u bejjiegħa bl-imnut) qabel ma jintlaħaq il-konsumatur finali. U anki jekk l-importaturi u dawk li jbigħu mill-ġdid jittrasferixxu l-piż kollu tad-dazju lill-konsumaturi, qed jiġi mfakkar li hemm offerta kbira ta’ prodotti fis-suq mhux soġġetti għal miżuri, li jiġu prodotti kemm mill-produtturi tal-Unjoni kif ukoll mill-produtturi ta’ pajjiżi terzi.

(184)

Il-Kummissjoni kkalkulat l-impatt tad-dazji antidumping fuq prezzijiet lill-kosumaturi b’valutazzjoni tal-ammont ta’ dazji li għandhom jitħallsu, skont l-importazzjonijiet effettivi miċ-Ċina, u l-allokazzjoni ta’ dan l-ammont direttament lill-konsumatur, jekk wieħed jassumi li l-importaturi, il-bejjiegħa bl-ingrossa u l-bejjiegħa bl-imnut jgħaddu l-ispiża addizzjonali kollha lill-konsumaturi finali. L-impatt tal-ispiża li jiġi kkalkulat b’dan il-mod huwa konsiderevolment iżjed baxx minn EUR 0,5 kull m2. Qed jiġi mfakkar li r-Regolament provviżorju kkonkluda li l-konsum medju fis-sena tal-konsumatur medju huwa ta’ madwar 2.2 m2 kull persuna fl-Unjoni. Għalhekk, billi l-impatt tad-dazju kull metru kwadru huwa baxx, iż-żieda fl-ispiża probabbilment se tiġi limitata anki jekk il-konsumatur ikollu jixtri kwantità konsiderevoli tal-prodott ikkonċernat għal xogħol ta’ bini jew rinnovazzjoni.

(185)

Jista’ jiġi mistenni li l-effett tal-impożizzjoni ta’ miżuri jassisti lill-industrija tal-Unjoni, b’effetti benefiċjali konsegwenti fuq il-kundizzjonijiet kompetittivi fuq is-suq tal-Unjoni u t-tnaqqis tat-theddida ta’ għeluq u tnaqqis fin-numru ta’ impjiegi.

(186)

Barra dan, jista’ jiġi mistenni li l-impożizzjoni tal-miżuri jkollha impatt limitat fuq l-utenti/importaturi, li jkollhom il-possibbiltà jakkwistaw minn firxa wiesgħa ta’ fornituri fis-suq tal-Unjoni u f’pajjiżi terzi oħra.

(187)

Fid-dawl tal-argument preċedenti, ma jistax jiġi konkluż li l-impożizzjoni ta’ miżuri tmur kontra l-interess tal-Unjoni.

(188)

Żewġ partijiet interessati sostnew li l-Kummissjoni kellha tiżvela l-marġni tal-bejgħ eċċessivament taħt il-prezz fir-Regolament provviżorju u waħda minnhom sostniet li n-nuqqas tad-divulgazzjoni ta’ din id-dejta kien ifisser li l-partijiet interessati ma kinux kapaċi jivvalutaw jekk ir-regola dwar l-inqas dazju ġietx applikata tajjeb.

(189)

Bħala tweġiba għal dan ta’ hawn fuq, il-marġini provviżorji kienu dawn li ġejjin:

(190)

Parti partikolari sostniet li l-Kummissjoni użat approċċ mhux konsistenti għad-determinazzjoni tad-dannu u kellha tibbaża l-konklużjonijiet tagħha fuq dejta medja peżata tal-industrija kollha.

(191)

Rigward din l-affermazzjoni, qed jiġi nnotat li l-konklużjonijiet dwar il-livell tal-eliminazzjoni tad-dannu huma bbażati fuq dejta speċifika verifikata tal-kumpanija li kienet ikkunsidrata l-bażi l-iktar affidabbli sabiex jiġu kkunsidrati l-fatti kollha pertinenti għall-finijiet ta’ paragun. Għalhekk din l-affermazzjoni kellha tiġi miċħuda.

(192)

Fid-dawl tal-konklużjonijiet milħuqa rigward id-dumping, id-dannu li jirriżulta, il-kawżalità u l-interess tal-Unjoni, għandom jiġu imposti miżuri sabiex jiġi prevenut li jsir iżjed dannu lill-industrija tal-Unjoni mill-importazzjonijiet dumped miċ-Ċina.

(193)

Sabiex jiġi stabbilit il-livell ta’ dawn id-dazji, ġew ikkunsidrati l-marġini tad-dumping misjuba u l-ammont ta’ dazju meħtieġ sabiex jiġi eliminat id-dannu mġarrab mill-industrija tal-Unjoni.

(194)

Għalhekk instab li kien xieraq li l-marġni tal-bejgħ eċċessivament taħt il-prezz jiġi kkalkulat fuq il-bażi tal-prezzijiet identifikati mid-dejta sottomessa mill-produtturi tal-Unjoni u l-esportaturi Ċiniżi.

(195)

Meta kien qed jiġi kkalkulat l-ammont tad-dazju antidumping meħtieġ sabiex jitneħħew l-effetti tad-dumping li kien qed jikkawża d-dannu, ġie kkunsidrat li d-dazju kellu wkoll jiġi kkalkulat sabiex l-industrija tal-Unjoni tkun tista’ tkopri l-ispejjeż tal-produzzjoni u tilħaq profitt raġjonevoli. Ġie kkunsidrat li dan il-profitt raġjonevoli, qabel it-taxxa, għandu jkun dak milħuq minn industrija ta’ dan it-tip taħt kundizzjonijiet kompetittivi normali, jiġifieri fin-nuqqas ta’ importazzjonijiet dumped, fuq il-bejgħ tal-prodott simili fl-Unjoni. Dan il-profitt ġie valutat b’referenza għall-profitabbiltà ta’ 3,9 % li l-industrija tal-Unjoni laħqet fl-2007 kif imniżżel fid-dettall fit-Tabella 12 fir-Regolament provviżorju.

(196)

Il-marġini tad-dannu stabbiliti huma dawn li ġejjin:

(197)

Qed jiġi nnotat li l-marġni tad-dannu għall-“produtturi l-oħra kollha li qegħdin jikkooperaw” ġie determinat mingħajr l-użu tad-dejta mill-Grupp Kito, billi l-Grupp Kito ma kienx jifforma parti mill-kampjun, u sabiex ikun hemm koerenza mal-mod kif il-marġni tad-dumping għall-“produtturi l-oħra kollha li qegħdin jikkopperaw” jiġi kkalkulat. (Ara l-Artikolu 9(6) l-ewwel sentenza tar-Regolament bażiku). Għall-Kito Group, fid-dawl tal-applikazzjoni tal-Artikolu 18 tar-Regolament bażiku kif imsemmi fil-premessa (54), il-marġni residwali tad-dannu tapplika.

(198)

Qed jiġi nnotat ukoll li l-marġini tal-bejgħ eċċessivament taħt il-prezz huma ogħla mill-marġini tad-dumping stabbiliti hawn fuq fil-premessi minn (88) sa (93) u għalhekk il-marġni tad-dumping għandu jservi bħala l-bażi sabiex jiġi stabbilit il-livell tad-dazju skont ir-regola dwar l-inqas dazju.

(199)

Sabiex jiġi żgurat trattament ugwali bejn kwalunkwe produttur esportatur ġdid u l-kumpaniji li qegħdin jikkooperaw mhux inklużi fil-kampjun, imsemmija fl-Anness I ta’ dan ir-Regolament, għandu jsir provvediment għal dazju medju peżat impost fuq il-kumpaniji msemmija l-aħħar li għandu jiġi applikat għal kwalunkwe produttur ġdid li b’mod ieħor ma kienx ikun intitolat għal reviżjoni skont l-Artikolu 11(4) tar-Regolament bażiku, billi l-Artikolu 11(4) ma japplikax fejn ikun ġie applikat il-kampjunar.

(200)

L-istatistika tal-prodott ikkonċernat tiġi espressa ta’ spiss f’metri kwadri. Madankollu, ma teżistix unità supplimentari bħal din għall-prodott ikkonċernat speċifikat fin-Nomenklatura Magħquda stabbilita fl-Anness I tar-Regolament tal-Kunsill (KEE) Nru 2658/87 tat-23 ta’ Lulju 1987 dwar in-nomenklatura tat-tariffi u l-istatistika u dwar it-Tariffa Doganali Komuni (6). Għalhekk huwa meħtieġ li jiġi pprovdut mhux biss il-piż f’kilogrammi jew tunnellati iżda wkoll in-numru ta’ metri kwadri tal-prodott ikkonċernat għall-importazzjonijiet għandu jiddaħħal fid-dikjarazzjoni għar-rilaxx għal ċirkolazzjoni ħielsa.

(201)

Fid-dawl tal-kobor tal-marġini tad-dumping misjuba u fid-dawl tal-livell tad-dannu kkawżat lill-industrija tal-Unjoni, qed jiġi kkunsidrat bħala meħtieġ li l-ammonti garantiti permezz tad-dazju antidumping provviżorju, impost bir-Regolament provviżorju jinġabar b’mod definittiv.

(202)

Fejn id-dazji definittivi huma ogħla mid-dazji provviżorji, l-ammonti garantiti fil-livell tad-dazji provviżorji biss għandhom jinġabru b’mod definittiv, waqt li l-ammonti żejda garantiti mir-rata definittiva tad-dazji antidumping għandhom jiġu rilaxxati.

(203)

Parti interessata partikolari ssuġġeriet li l-miżuri jieħdu l-forma ta’ prezz minimu tal-importazzjoni (il-PMI) minflok ta’ dazji ad-valorem. Madankollu, il-PMI mhuwiex adatt għall-prodott ikkonċernat billi jeżisti f’ammont kbir ta’ tipi ta’ prodott, li għalihom il-prezzijiet ivarjaw b’mod sinifikanti, u għalhekk joħolqu riskju sostanzjali ta’ kumpens trażversali. Barra dan, huwa mistenni li t-tipi ta’ prodott jevolvu iżjed fid-disinn u l-irfinar u li l-PMI ma jibqax jipprovdi l-bażi xierqa għal-livell tad-dazju. Għalhekk, it-talba li jiġu imposti miżuri taħt il-forma ta’ PMI qiegħda tiġi miċħuda.

(204)

Parti oħra talbet li l-miżuri għandhom jieħdu l-forma ta’ kwoti fuq l-importazzjonijiet. Madankollu, il-kwoti fuq l-importazzjonijiet la huma konformi mar-Regolament bażiku u lanqas mar-regoli miftiehma fuq livell internazzjonali. Għalhekk it-talba kellha tiġi miċħuda,