20.12.2011   

MT

Il-Ġurnal Uffiċjali tal-Unjoni Ewropea

L 336/75

(1)

Il-marda tal-ilsien u d-dwiefer hija marda virali li tittieħed malajr ħafna fl-annimali selvaġġi u domestiċi bid-dwiefer mifruqa b’impatt serju fuq il-profitabilità tat-trobbija tal-annimali, filwaqt li xxekkel il-kummerċ fl-Unjoni u l-esportazzjoni lejn pajjiżi terzi.

(2)

Fil-każ ta’ tifqigħa tal-marda tal-ilsien u d-dwiefer, hemm riskju li l-aġent tal-marda jinfirex f’azjendi oħra li jżommu l-annimali ta’ speċi suxxettibbli fl-Istat Membru milqut, iżda anki fi Stati Membri oħra u f’pajjiżi terzi permezz ta’ ċaqliq tal-annimali suxxettibbli ħajjin jew il-prodotti tagħhom.

(3)

Id-Direttiva tal-Kunsill 2003/85/KE tad-29 ta’ Settembru 2003 dwar miżuri tal-Komunità fuq il-kontroll tal-marda tal-ilsien u d-dwiefer li tirrevoka d-Direttiva 85/511/KEE u d-Deċiżjonijiet 89/531/KEE u 91/665/KEE u temenda d-Direttiva 92/46/KEE (2) tistipula miżuri li f’każ ta’ tifqigħa għandhom jiġu implimentati b’urġenza mill-Istati Membri biex jiġi evitat aktar tixrid tal-vajrus.

(4)

Id-Deċiżjoni 2009/470/KE tistabbilixxi l-proċeduri li jirregolaw il-kontribuzzjoni finanzjarja tal-Unjoni għal miżuri veterinarji speċifiċi, inklużi miżuri ta’ emerġenza. Skont l-Artikolu 14(2) ta’ dik id-Deċiżjoni, l-Istati Membri għandhom jiksbu kontribuzzjoni finanzjarja għall-ispejjeż ta’ ċerti miżuri biex tinqered il-marda tal-ilsien u d-dwiefer.

(5)

Fl-2011 kien hemm tifqigħat tal-marda tal-ilsien u d-dwiefer fil-Bulgarija u ġew individwati każijiet ta’ din il-marda f’annimali selvaġġi suxxettibbli. L-awtoritajiet tal-Bulgarija setgħu juru, permezz ta’ rappurtar regolari tat-tagħrif dwar l-iżvilupp tas-sitwazzjoni tal-marda lill-Kumitat Permanenti dwar il-Katina Alimentari u s-Saħħa tal-Annimali u preżentazzjoni kontinwa tar-rapporti lill-Kummissjoni u lill-Istati Membri, li huma implimentaw b’mod effiċjenti l-miżuri ta’ kontroll fil-qafas tad-Direttiva 2003/85/KE.

(6)

Għaldaqstant, l-awtoritajiet tal-Bulgarija ssodisfaw l-obbligi tekniċi u amministrattivi kollha tagħhom fir-rigward tal-miżuri previsti fl-Artikolu 14(2) tad-Deċiżjoni 2009/470/KE u l-Artikolu 6 tar-Regolament tal-Kummissjoni (KE) Nru 349/2005 (3).

(7)

Skont l-Artikolu 85(3) tad-Direttiva 2003/85/KE, malli l-awtorità kompetenti tal-Bulgarija kellha konferma tal-każ primarju tal-marda tal-ilsien u d-dwiefer fl-annimali selvaġġi, din applikat il-miżuri stipulati fil-Parti A tal-Anness XVIII tad-Direttiva sabiex tnaqqas it-tixrid tal-marda.

(8)

Minħabba l-okkorrenza tal-marda tal-ilsien u d-dwiefer f’żoni fejn jgħixu annimali selvaġġi kif ukoll annimali bid-dwiefer mifruqa, għall-ewwel darba Stat Membru fassal pjan għall-qerda tal-marda tal-ilsien u d-dwiefer fl-annimali selvaġġi fiż-żona definita bħala infettata u speċifika l-miżuri applikati fuq l-azjendi f’dik iż-żona skont il-Parti B tal-Anness XVIII tad-Direttiva 2003/85/KE.

(9)

Fl-4 ta’ April 2011, fi żmien 90 jum wara l-konferma tal-preżenza tal-marda tal-ilsien u d-dwiefer fl-annimali selvaġġi, il-Bulgarija ressqet pjan għall-qerda tal-marda tal-ilsien u d-dwiefer fl-annimali selvaġġi f’partijiet mir-reġjuni ta’ Burgas, Yambol u Haskovo.

(10)

Wara li l-Kummissjoni evalwat il-pjan imressaq mill-Bulgarija, ġiet adottata d-Deċiżjoni ta’ Implimentazzjoni tal-Kummissjoni 2011/493/UE tal-5 ta’ Awwissu 2011 li tapprova l-pjan għall-qerda tal-marda tal-ilsien u d-dwiefer fl-annimali selvaġġi fil-Bulgarija (4).

(11)

Skont l-Artikolu 75 tar-Regolament tal-Kunsill (KE, Euratom) Nru 1605/2002 tal-25 ta’ Ġunju 2002 rigward ir-Regolament Finanzjarju applikabbli għall-baġit ġenerali tal-Komunitajiet Ewropej (5) u l-Artikolu 90(1) tar-Regolament tal-Kummissjoni (KE, Euratom) Nru 2342/2002 tat-23 ta’ Diċembru 2002 li jippreskrivi regoli ddettaljati għall-implimentazzjoni tar-Regolament tal-Kunsill (KE, Euratom) Nru 1605/2002 fuq ir-Regolament Finanzjarju li jgħodd għall-baġit ġenerali tal-Komunitajiet Ewropej (6), l-impenn tan-nefqa mill-baġit tal-Unjoni għandu jsegwi deċiżjoni ta’ finanzjament adottata mill-istituzzjoni jew l-awtoritajiet li lilhom ikunu ngħataw il-poteri, filwaqt li jiġu stabbiliti l-elementi essenzjali tal-azzjoni li tinvolvi n-nefqa.

(12)

Jeħtieġ li jiġi stabbilit il-livell tal-kontribuzzjoni finanzjarja tal-Unjoni għall-ispejjeż imġarrba mill-Bulgarija għall-implimentazzjoni ta’ ċerti elementi tal-pjan ta’ qerda approvat għall-marda tal-ilsien u d-dwiefer fl-annimali selvaġġi fil-Bulgarija, filwaqt li titqies is-sitwazzjoni epidemjoloġika partikolari fir-rigward tal-marda tal-ilsien u d-dwiefer fix-Xlokk tal-Balkani.

(13)

Għandhom jiġu ffinanzjati, b’rata stabbilita skont id-Deċiżjoni preżenti, l-attivitajiet ta’ sorveljanza meħtieġa b’mod urġenti, inkluż it-titjib tal-Laboratorju ta’ Referenza Nazzjonali, wieħed mill-ftit laboratorji fir-reġjun kollu b’esperjenza biżżejjed fid-dijanjożi tal-marda tal-ilsien u d-dwiefer, u s-Sistema ta’ Informazzjoni Veterinarja biex tiġi integrata d-dejta ta’ sorveljanza mal-kontrolli ta’ moviment, il-miżuri ta’ tindif u diżinfezzjoni u l-kampanji ta’ informazzjoni għall-pubbliku. Dawn l-azzjonijiet se jżidu l-għarfien tal-Unjoni għall-ġestjoni ta’ każijiet bħal dawn fil-ġejjieni.

(14)

Għal raġunijiet ta’ kontroll finanzjarju, l-Artikoli 9, 36 u 37 tar-Regolament tal-Kunsill (KE) Nru 1290/2005 tal-21 ta’ Ġunju 2005 dwar il-finanzjament tal-Politika Agrikola Komuni (7) huma applikabbli.

(15)

Il-miżuri stipulati f’din id-Deċiżjoni huma konformi mal-opinjoni tal-Kumitat Permanenti dwar il-Katina Alimentari u s-Saħħa tal-Annimali,

(a)

timplimenta l-pjan ta’ qerda msemmi fl-Artikolu 1 b’mod effettiv u skont id-dispożizzjonijiet rilevanti tal-liġi tal-Unjoni, inkluża d-Direttiva 2003/85/KE, u r-regoli dwar il-kompetizzjoni u l-għoti ta’ kuntratti pubbliċi;

(b)

tippreżenta lill-Kummissjoni sa mhux aktar tard mill-31 ta’ Jannar 2012 rapport intermedju dwar it-twettiq tekniku tal-pjan ta’ qerda, skont il-paragrafu 5 tal-Parti B tal-Anness XVIII tad-Direttiva 2003/85/KE, akkumpanjat b’rapport finanzjarju intermedju li jkopri l-perjodu mill-4 ta’ April 2011 sal-31 ta’ Diċembru 2011;

(c)

tippreżenta lill-Kummissjoni sa mhux aktar tard mill-15 ta’ Settembru 2012 rapport aħħari dwar it-twettiq tekniku tal-pjan ta’ qerda akkumpanjat minn evidenza ta’ ġustifikazzjoni rigward l-ispejjeż imħallsa mill-Bulgarija u r-riżultati miksuba matul il-perjodu mill-4 ta’ April 2011 sat-3 ta’ April 2012;

(d)

ma tressaqx aktar talbiet għal kontribuzzjonijiet oħra mill-Unjoni għall-miżuri ddettaljati fl-Anness, u ma tkunx ressqet talbiet bħal dawn preċedentement.