23.12.2009   

MT

Il-Ġurnal Uffiċjali tal-Unjoni Ewropea

L 345/1

(1)

Bid-Deċiżjoni tat-30 t’April tal-2008 (2) il-Kummissjoni ddeċidiet li l-protezzjoni provduta lil WestLB AG fit-8 ta’ Frar tal-2008 mis-sidien tiegħu, jiġifieri, Westfälisch-Lippischer Sparkassen- und Giroverband, Rheinischer Sparkassen- und Giroverband, u — direttament u indirettament, permezz ta’ NRW. BANK — il-Land ta’ North Rhine-Westphalia, Landschaftsverband Westfalen Lippe, u Landschaftsverband Rheinland (“is-sidien”), tikkostitiwixxi għajnuna mill-Istat. Iżda l-Kummissjoni kienet tal-fehma li l-għajnuna kienet għajnuna ta’ salvataġġ kompatibbli mas-suq komuni, u awtorizzatha skont il-linji gwida tal-Komunità dwar l-għajnuna mill-Istat għas-salvataġġ u r-ristrutturar tal-kumpaniji f’diffikultà (“il-linji gwida ta’ salvataġġ u tar-ristrutturar”) (3) għal sitt xhur, jew, f’każ li jkun ġie sottomess pjan ta’ ristrutturar, sa dak iż-żmien li tkun ittieħdet deċiżjoni finali dwar il-pjan ta’ ristrutturar.

(2)

Fit-8 t’Awwissu tal-2008 il-Ġermanja nnotifikat lill-Kummissjoni b’miżura tal-għajnuna tar-ristrutturar bi pjan tar-ristrutturar għal WestLB. In-notifika kienet tinkludi impenn li sal-31 ta’ Diċembru tal-2008, tissottometti “passi konkreti” għal bidla fl-istruttura tas-sjieda.

(3)

B’ittra datata l-1 ta’ Ottubru tal-2008, il-Kummissjoni infurmat lill-Ġermanja li ddeċidiet li tagħti bidu għall-proċedura stabbilita fl-Artikolu 88(2) tat-Trattat tal-KE fir-rigward tal-miżura.

(4)

Id-deċiżjoni tal-Kummissjoni li tagħti bidu għall-proċedura ta’ investigazzjoni formali (“id-deċiżjoni tal-bidu”) ġiet pubblikata f’Il-Ġurnal Uffiċjali tal-Unjoni Ewropea  (4). Il-Kummissjoni stiednet lil kwalunkwe parti interessata biex tissottometti l-kummenti tagħha dwar il-miżura. Il-Kummissjoni ma rċeviet l-ebda kumment minn partijiet interessati oħra.

(5)

Fl-24 ta’ Novembru tal-2008 il-Ġermanja ssottomettiet il-kummenti tagħha dwar il-bidu tal-proċedura ta’ investigazzjoni formali.

(6)

Fis-16 ta’ Diċembru tal-2008 WestLB talab estensjoni tal-limitu taż-żmien għas-sottomissjoni ta’ passi konkreti għal bidla fl-istruttura tas-sjieda. Il-Kummissjoni approvat l-estensjoni għal-limitu taż-żmien sal-31 ta’ Marzu tal-2009.

(7)

Fis-27 ta’ Frar tal-2009 il-Ġermanja ssottomettiet rapport interim li jkopri l-progress sal-aħħar ta’ Frar tal-2009.

(8)

Mis-6 sat-8 t’April tal-2009, kien hemm diskussjonijiet dwar ir-ristrutturar bejn rappreżentanti tal-Kummissjoni, il-Ġermanja, is-sidien u l-WestLB.

(9)

Fis-17 t’April tal-2009 il-Ġermanja ssottomettiet iżjed informazzjoni dwar ir-ristrutturar. Fit-30 t’April tal-2009, il-Ġermanja ssottomettiet pjan ta’ ristrutturar emendat.

(10)

Fit-12 ta’ Mejju tal-2009 il-Kummissjoni adottat Deċiżjoni. Dik id-Deċiżjoni kien fiha xi żbalji żgħar, għalkemm dawn m’affetwawx is-sustanza jew ir-raġunar tagħha. Id-Deċiżjoni preżenti qed tiġi adottata għal finijiet ta’ korrettezza, u tibdel id-Deċiżjoni tat-12 ta’ Mejju tal-2009 (C(2009) 3900).

(11)

Il-benefiċjarju hu WestLB. WestLB hu bank kummerċjali Ewropew ibbażat f’North Rhine Westphalia. B’assi totali ta’ €286,5 biljun fil-31 ta’ Diċembru tal-2007, WestLB hu fornitur tas-servizzi finanzjarji ewlieni fil-Ġermanja. Hu l-istituzzjoni ċentrali għall-banek tat-tfaddil f’North Rhine-Westphalia u Brandenburg, u bħala bank kummerċjali li jopera internazzjonalment, jaġixxi bħala l-konnessjoni tagħhom fis-swieq finanzjarji globali. Peress li jaħdem fil-viċin mal-banek tat-tfaddil, WestLB joffri l-firxa sħiħa ta’ prodotti u servizzi ta’ bank universali, u jiffoka fuq self, finanzi strutturati, is-suq kapitali u prodotti ta’ ishma f’kumpaniji privati, ġestjoni tal-assi, servizzi ta’ transazzjoni u finanzi ta’ proprjetà immobbli. Fit-30 ta’ Diċembru 2007 WestLB kien iħaddem 6 147 persuna.

(12)

WestLB hu kumpanija pubblika b’responsabbiltà limitata (AG) bil-kwartieri tiegħu f’Düsseldorf u Münster. WestLB ħareġ minn dak li kien qabel Westdeutsche Landesbank Girozentrale, fit-30 t’Awwissu tal-2002, wara li l-attivitajiet tas-servizzi pubbliċi ta’ dik l-organizzazzjoni kienu ġew integrati f’Landesbank Nordrhein-Westfalen, kumpanija rregolata bil-liġi pubblika, li kienet ġiet stabbilita fl-1 t’Awwissu tal-2002.

(13)

Is-sidien attwali ta’ WestLB huma l-assoċjazzjonijiet tal-banek tat-tfaddil u tal-ġiro Westfälisch-Lippischer Sparkassen- und Giroverband (25,03 %) u Rheinischer Sparkassen- und Giroverband (25,03 %) u — direttament u indirettament, permezz ta’ NRW. BANK (dak li qabel kien Landesbank Nordrhein-Westfalen) — il-Land ta’ North Rhine Westphalia (37,74 %) u l-assoċjazzjonijiet reġjonali tal-awtoritajiet lokali Landschaftsverband Westfalen Lippe (6,09 %) u Landschaftsverband Rheinland (6,09 %).

(14)

WestLB hu wieħed mill-banek pubbliċi Ġermaniżi li sat-18 ta’ Lulju tal-2005 kien għadu jgawdi l-garanziji mhux limitati tal-Istat magħrufa bħala Anstaltslast u Gewährträgerhaftung, li tneħħew skont serje ta’ ftehim bejn il-Ġermanja u l-Kummissjoni (5).

(15)

Fl-2002, wara t-tneħħija ta’ Anstaltslast u Gewährträgerhaftung, dak li qabel kien il-WestLB ġie maqsum f’NRW. BANK u WestLB. Bejn l-2003 u l-2005 WestLB ġie ristrutturat; irċieva diversi kontribuzzjonijiet kapitali bejn l-2002 u l-2005. F’Deċiżjoni adottata fit-18 ta’ Lulju tal-2007, il-Kummissjoni ddeċidiet li dawn il-kontribuzzjonijiet kapitali ma kinux jikkostitwixxu għajnuna mill-Istat (6).

(16)

Minn nofs l-2007, it-taqlib kontinwu fis-swieq finanzjarji affetwaw l-investimenti tal-portafoll strutturat tal-WestLB, li kien jinkludi esponiment għal self subprime fuq proprjetà immobbli tal-Istati Uniti. L-istimi tar-rivalutazzjoni tal-prezzijiet kurrenti tas-suq tat-titoli marru lura, u WestLB ma kienx kapaċi jirrifinanzja l-portafoll strutturat bil-bejgħ tan-noti fuq is-suq. B’konsegwenza ta’ dan, WestLB kellu jikkonsolida l-portafolli li ma bbilanċjawx fuq il-karta tal-bilanċ tiegħu.

(17)

Fit-8 ta’ Frar tal-2008, is-sidien ta’ WestLB laħqu ftehim fuq il-prinċipji bażiċi ta’ miżura addizzjonali, li ġew stabbiliti fl-hekk imsejjaħ “Eckpunktepapier” (“karta tal-punti ewlenin”) (7). Id-diskussjonijiet kienu jinkludu r-regolatur tas-servizzi finanzjarji (Bundesanstalt für Finanzdienstleistungsaufsicht – “BaFin”) u d-Deutsche Bundesbank. Is-sidien essenzjalment qablu fuq struttura li tiddelimita r-riskji sostanzjali fil-portafolli strutturati tal-bank, li kellhom jiġu assigurati bi “protezzjoni mir-riskju” ta’ €5 biljuni (8) (din il-figura kienet tinkludi l-kontribuzzjonijiet kapitali prevvisti qabel).

(18)

Permezz ta’ dan il-ftehim is-sidien kellhom l-intenzjoni li jipproteġu l-WestLB mill-volatilità tas-swieq. Taħt l-istandards internazzjonali tal-kontabilità tal-IFRS applikati minn WestLB, il-bank għandu juża l-metodu tar-rivalutazzjoni tal-prezzijiet kurrenti tas-suq, li jfisser li parti sostanzjali mill-assi miżmuma mill-bank għandha sostanzjalment tiġi evalwata mill-ġdid. B’konsegwenza ta’ din il-kriżi subprime, id-domanda għall-portafolli tal-investiment strutturati ġiet fix-xejn. Lejn l-aħħar tal-2007, fuq portafoll ta’ madwar €23 biljun, il-karta tal-bilanċ kellha turi telf tar-rivalutazzjoni tal-prezzijiet kurrenti tas-suq ta’ madwar €[1,5-2,5] biljun (*).

(19)

Il-protezzjoni mir-riskju tipprovdi l-bażi legali għat-trasferiment tal-assi affetwati minn WestLB għal entità bi skop speċjali, Phoenix Light SF Ltd, sabiex WestLB ma jkollux jinkorpora l-impatt tal-volatilità tas-suq relatat ma’ dawn il-portafolli fil-kontijiet tiegħu. Ladarba l-assi jkunu ġew trasferiti u tkun inħarġet il-garanzija, l-effetti ta’ din il-volatilità tas-suq ikunu tneħħew għal kollox mill-kontijiet tal-WestLB. L-entità bi skop speċjali hi ekwivalenti għal “bank ħażin” li jitwaqqaf għal istituzzjoni waħda u jibbenefika minn garanzija mill-istat.

(20)

Fil-31 ta’ Marzu tal-2008 is-sidien ta’ WestLB approvaw il-miżuri, soġġetti għal approvazzjoni finali mill-Parlament reġjonali ta’ North Rhine-Westphalia. Il-bank u l-awdituri kienu sodisfatti li l-Parlament kien aktarx se jaqbel, u kkunsidraw id-deċiżjoni bħala suffiċjenti għat-trasferiment tar-riskju lis-sidien, li seħħ fil-31 ta’ Marzu tal-2008. Fil-fatt, sussegwentament, il-Parlament approva l-miżura.

(21)

Il-pjan tar-ristrutturar jipprovdi li l-protezzjoni mir-riskju mogħtija lill-entità bi skop speċjali, Phoenix Light SF Ltd, tittawwal u tiġi maqluba minn struttura provviżorja għal struttura permanenti. Madankollu, l-istruttura tal-protezzjoni ma tbidlietx.

(22)

Il-protezzjoni mir-riskju tikkonsisti f’:

(23)

It-transazzjoni twettqet kif ġej:

(24)

Rigward terzi partijiet, il-Land ta’ North Rhine-Westphalia għandha responsabbiltà esklużiva għall-ammont totali tal-garanzija ta’ €5 biljuni. Fuq l-ewwel porzjon ta’ €2 biljuni, il-Land tista’ titlob kumpens mill-erba’ sidien l-oħra fi proporzjon mal-ishma tagħhom. Għall-kumplament tal-garanzija, li tammonta għal €3 biljuni, il-Land għandha tkun hi biss responsabbli, bla ħsara għall-ishma proporzjonali tagħha. Talli qed terfa’ din ir-responsabbiltà, il-Land kisbet mis-sidien l-oħra aġġustament tad-drittijiet tal-azzjonisti tagħha u intitolament għall-kumpens, li għandha l-għażla li tirċievi jew fi flus kontanti jew permezz ta’ assenjazzjoni tal-ishma f’WestLB.

(25)

Ġie maqbul li fi kwalunkwe każ kellhom isiru bidliet fil-ftehim ta’ konsorzju, li taħtu ċertu drittijiet miżmuma mill-banek tat-tfaddil u l-assoċjazzjonijiet ġiro jiġu mitmuma jew jiġu aġġustati (10). Il-bidliet dettaljati jiġu maqbula bejn is-sidien ta’ WestLB iżjed tard.

(26)

Għandu jitħallas kumpens lil-Land jekk il-komponent sproporzjonat ta’ €3 biljun tal-garanzija jiġi mitlub: f’dak il-każ il-Land tkun intitolata li titlob li ssirilha t-trasferiment ta’ numru korrispondenti ta’ ishma WestLB li huma preżentament miżmuma mill-assoċjazzjonijiet tal-banek tat-tfaddil u l-assoċjazzjonijiet reġjonali. Il-kumpens jiġi kkalkulat fuq il-bażi ta’ prezz tal-ishma ta’ €220, b’nuqqas ta’ skont ta’ €20 għal kull sehem. Għall-assoċjazzjonijiet reġjonali, il-prezz tas-sehem ikun €220. Minflok trasferiment tal-ishma, il-partijiet jistgħu jaqblu wkoll fuq ħlas ta’ flus.

(27)

Fid-Deċiżjoni tat-30 t’April tal-2008, il-Kummissjoni ddeċidiet li l-protezzjoni mir-riskju deskritta kienet tikkostitwixxi għajnuna ta’ salvataġġ temporanju, u ddikjarat li dan kien kompatibbli mas-suq komuni taħt il-linji gwidi dwar is-salvataġġ u r-ristrutturar sat-8 t’Awwissu tal-2008. Fl-istess ħin, il-Kummissjoni talbet li l-Ġermanja tissottometti pjan ta’ ristrutturar li għandu effetti konsiderevoli u koerenti. Il-Ġermanja bagħtet pjan ta’ ristrutturar fit-8 t’Awwissu tal-2008.

(28)

In-notifika tikkonsisti fi “ftehim ta’ punti ewlenin” (“Eckpunktevereinbarung”) bejn is-sidien tal-bank, datat it-8 t’Awwissu tal-2008, u pjan ta’ ristruttar iżjed dettaljat ‘li jaħdem indipendentament’, li ġie emendat wara d-diskussjoni li ġejja mal-Kummissjoni. Il-pjan ta’ ristrutturar jista’ jitqassar kif ġej.

(29)

Element ċentrali fil-ftehim tal-punti ewlenin u l-pjan ta’ ristrutturar hu l-bidla maħsuba fis-sjieda, li l-Ġermanja u s-sidien qablu li jpoġġu f’termini definiti, pereżempju billi jipproduċu ittra ta’ intenzjoni, sal-31 ta’ Diċembru 2008. Iżda dan il-pass ma tteħidx. Għandhom jittieħdu miżuri ta’ tiċkin, tnaqqis fl-ispejjeż, tnaqqis fir-riskji u ffukar mill-ġdid sabiex jiġi ffaċilitat bejgħ. Għaldaqstant għandu jiġi offrut għall-bejgħ WestLB mingħajr piżijiet, jew fit-totalità tiegħu jew fil-forma ta’ unitajiet tan-negozju indipendenti, fi proċedura ta’ sejħa għall-offerti miftuħa, trasparenti u mhux diskriminatorja li għandha tiġi mniehdija qabel it-tmiem t’Awwissu tal-2010 u li għandha titlesta qabel it-tmiem ta’ [Ġunju–Ottubru] tal-2011, li għandha tippermetti li l-bejgħ isir effettiv fl-1 ta’ Jannar tal-2012.

(30)

Il-pjan ta’ ristrutturar jistipula li għandu jkun hemm proċedura ta’ sejħa għall-offerti miftuħa, trasparenti u mhux diskriminatorja miftuħa għal kull xerrej, domestiku jew barrani. Il-bejgħ għandu jiġi pubbliċizzat b’mod adattat mill-inqas f’gazzetta jew pubblikazzjoni perjodika internazzjonali waħda disponibbli madwar il-Komunità fil-lingwa Ingliża. WestLB jaġixxi bħala istituzzjoni ċentrali għal banek tat-tfaddil fin-North Rhine-Westphalia. WestLB innifsu hu bank kummerċjali fil-forma legali ta’ kumpanija pubblika b’responsabbiltà limitata. Għaldaqstant la l-irwol preżenti ta’ WestLB bħala istituzzjoni ċentrali għal banek tat-tfaddil u lanqas l-isem ta’ WestLB ma jistgħu jintużaw sabiex jiġi evitat il-bejgħ tal-bank għal investitur privat.

(31)

L-għan primarju tal-proċedura tas-sejħa għall-offerti hu bidla fis-sjieda ta’ WestLB, i.e. it-trasferiment sħiħ tad-drittijiet tal-voti. Id-divestiment sħiħ ta’ qasam tan-negozju wieħed jew iżjed jiġi preferut minn sempliċi trasferiment tal-maġġoranza tad-drittijiet tal-voti (“50 % u sehem wieħed”). Trasferiment ta’ din ix-xorta tal-maġġoranza tad-drittijiet tal-voti lil xerrej ġdid għandu jkun ammissibbli biss jekk fil-proċedura tas-sejħa għall-offerti ma ssir l-ebda offerta għad-divestiment sħiħ ta’ qasam tan-negozju wieħed jew iżjed. Għalkemm il-prijorità hi trasferiment tat-totalità tad-drittijiet tal-voti, il-Kummissjoni qablet minħabba s-sitwazzjoni mhux previdibbli tas-swieq finanzjarji u l-falliment tal-isforzi sabiex titbiddel l-istruttura tas-sjieda tal-WestLB li jista’ jkun hemm bżonn għal xenarji alternattivi, bħal trasferiment tad-drittijiet tal-voti jew konsolidazzjoni tal-Landesbanken fil-Ġermanja. Il-Kummissjoni ma topponix pjan ta’ ristrutturar tal-banek fuq livell aggregat, u taċċetta li l-pjan ta’ ristrutturar jista’ jkollu jiġi implimentat fl-isfond ta’ ristrutturar tal-Landesbanken fil-Ġermanja. Madankollu, sabiex tiġi sorveljata l-implimentazzjoni korretta tal-pjan ta’ ristrutturar anke jekk jintgħażel xenarju għall-bidla tas-sjieda, il-Kummissjoni tqis li hu neċessarju li jiġi maħtur trustee.

(32)

Sabiex jiġi ffaċilitat il-bejgħ ta’ WestLB, kemm jekk fit-totalità tiegħu jew f’partijiet separati, il-pjan ta’ ristrutturar jipprovdi għal miżuri ta’ tnaqqis ta’ spejjeż u tiċkin. Id-divestiment taż-żamma tal-ishma u l-għeluq tal-lokazzjonijiet huma elementi ewlenin. Fir-rigward tat-tnaqqis tal-ispejjeż u tat-tiċkin, iż-żamma tal-ishma ewlenin kollha għandhom jiġu divestiti sabiex jiffinanzjaw l-attivitajiet ta’ ristrutturar. Il-proċess tal-bejgħ għandu jiġi organizzat f’żewġ porzjonijiet: L-ewwel porzjon tal-ishma miżmuma, li jinkludi Weberbank, […] u […] għandu jinbiegħ sal-aħħar ta’ [Frar–Mejju] 2010 (11), u t-tieni porzjon, li jinkludi […] u […], għandu jinbiegħ sal-aħħar ta’ [Frar-Mejju] 2011 (12).

(33)

Mill-ħdax-il lokazzjoni fil-Ġermanja, WestLB għandu jagħlaq ħamsa minnhom sa mhux iżjed tard minn […] 2010 (Bielefeld, Münster, Dortmund, Cologne u Mainz) (13). Sa mhux iżjed tard mill- […] 2010 (14) WestLB għandu jnaqqas il-lokazzjonijiet tiegħu barra l-Ġermanja minn iżjed minn tletin għal sebgħa (15).

(34)

Finalment, il-pjan ta’ ristrutturar jistabbilixxi programm ta’ miżuri ta’ tiċkin, kif ġej:

(35)

Minbarra tnaqqis fl-ispejjeż u t-tiċkin, il-pjan jinvolvi ffukar mill-ġdid u tneħħija ta’ riskji komprensivi tan-negozju kollu. B’mod partikolari, għandhom jittieħdu l-miżuri li ġejjin:

(36)

Qabel it-tmiem t’Ottubru tal-2009, bl-għan tal-formazzjoni ta’ tliet oqsma tan-negozju ewlieni separati, WestLB għandu jissepara l-proċessi tan-negozju kollha u jwaqqaf l-unitajiet li ġejjin, li għandhom jastjenu minn tkabbir estern permezz ta’ amalgamazzjonijiet jew akkwiżizzjonijiet:

(37)

Waqt li l-bejgħ tan-negozju tal-ġestjoni tal-investiment jkun għadu pendenti, WestLB għandu jieqaf milli jidħol f’negozju bil-kontijiet f’ismu u m’għandux jibqa’ jagħmel transazzjonijiet bil-valur relattiv u arbitrarji (17). In-negozju għal kontijiet tal-klijenti hu ristrett għal-lokazzjonijiet f’Düsseldorf, New York, Londra u Hong Kong.

(38)

Sakemm issir il-bidla fis-sjieda ta’ WestLB, il-volum tan-negozju tal-attivitajiet tas-suq kapitali għandu jkun ristrett kif ġej: fl-2009, sal-31 ta’ Diċembru tal-2009, għal €[70–100] biljun; fl-2010, sal-31 ta’ Diċembru 2010, għal €[60–90] biljun; u fl-2011, sal-31 ta’ Diċembru 2011, għal €[50-80] biljun.

(39)

Sakemm issir il-bidla fis-sjieda ta’ WestLB, l-assi bir-riskju kkalkulat li għandhom jiġu allokati għal negozju ta’ swieq kapitali għandhom ikunu ristretti kif ġej: sal-31 ta’ Diċembru tal-2009, għal €[10–25] biljun; sal-31 ta’ Diċembru tal-2010, għal €[5–25] biljun; u sal-31 ta’ Diċembru tal-2011, għal [5–25] biljun.

(40)

Waqt li l-bejgħ ta’ WestLB ikun pendenti, il-volum tan-negozju fil-qasam tas-servizzi bankarji bl-ingrossa u l-finanzjament strutturat (li jifforma parti mill-qasam tas-swieq kapitali, is-servizzi bankarji bl-ingrossa u l-finanzjament strutturat) għandu jkun ristrett kif ġej: fl-2009, sal-31 ta’ Diċembru tal-2009, għal €[20-40] biljun; fl-2010, sal-31 ta’ Diċembru tal-2010, għal €[15-35] biljun; u fl-2011, sal-31 ta’ Diċembru tal-2011, għal €[10-30] biljun.

(41)

Barra minn hekk, waqt li l-bejgħ ta’ WestLB ikun pendenti, l-assi bir-riskju kkalkulat li jikkorrispondu mal-volum tan-negozju fil-qasam tas-servizzi bankarji bl-ingrossa u l-finanzjament strutturat (li jifforma parti mill-qasam tas-swieq kapitali, is-servizzi bankarji bl-ingrossa u l-finanzjament strutturat) għandhom ikunu ristretti kif ġej: sal-31 ta’ Diċembru tal-2009 għal €[30-60] biljun; sal-31 ta’ Diċembru tal-2010, għal €[20-50] biljun; u sal-31 ta’ Diċembru tal-2011, għal €[20-50] biljun.

(42)

L-attivitajiet, unitajiet u lokazzjonijiet kollha li jifdal fil-forma ta’ kumpaniji sussidjarji, fergħat jew uffiċċji rappreżentattivi li ma jistgħux jinbiegħu qabel it-tmiem ta’ Diċembru tal-2011 għandhom jiġu likwidati mis-sidien. L-emendi kollha li saru fil-pjan ta’ ristrutturar tat-8 t’Awwissu tal-2008 ġew diskussi mal-Kummissjoni, aċċettati mill-Ġermanja, u sottomessi lill-Kummissjoni fit-30 t’April tal-2009. Iżda l-pjan ta’ ristrutturar emendat għadu xorta soġġett għall-konferma uffiċjali minn tlieta mill-ħames sidien ta’ WestL. Għalkemm ġie aċċettat mill-Ġermanja u mis-sidien tiegħu, għaldaqstant, li il-pjan ta’ ristrutturar ma jistax jitqies li jorbot. Matul il-proċeduri l-Kummissjoni osservat li s-sidien ma kinux kapaċi jikkonformaw mal-iskeda oriġinali għal pjan ta’ ristrutturar awtorizzat, u li t-teħid tad-deċiżjonijiet waqa’ lura fl-iskeda. Għaldaqstant il-Kummissjoni tqis li hu meħtieġ li tehmeż xi kundizzjonijiet mad-Deċiżjoni tagħha.

(43)

Minħabba l-kumplessità tal-miżuri ta’ ristrutturar proposti, u l-limiti taż-żmien stretti għall-implimentazzjoni tagħhom, il-Kummissjoni tqis li l-implimentazzjoni tal-pjan tar-ristruttuar għandu jiġi sorveljat minn trustee, li għandu jżomm lill-Kummissjoni infurmata bil-passi li jkunu ttieħdu. Il-ħatra ta’ trustee hi importanti b’mod speċjali għax il-Kummissjoni hi preparata li taċċetta xi flessibbiltà fl-iskeda tal-implimentazzjoni. Bħala prinċipju, id-divestiment tal-ishma miżmuma għandu jitlesta sa [Frar–Mejju] tal-2010. Iżda jista’ jiġi pospost jekk WestLB jista’ juri li kien possibbli biss bejgħ taħt il-valur fuq il-ktieb. Din id-Deċiżjoni tipprovdi wkoll għall-possibbiltà ta’ bejgħ ristrett jew il-konsolidazzjoni tal-Landesbanken fil-Ġermanja, u għaldaqstant għal eżenzjoni mir-rekwiżit tat-tendering. It-trustee għandu jissorvelja l-implimentazzjoni tal-pjan ta’ ristrutturar, jirraporta fuq id-deċiżjonijiet meħuda fil-qafas tal-flessibbiltà permessa matul il-perjodu tal-implimentazzjoni, u jiffaċilità l-komunikazzjoni mal-Kummissjoni.

(44)

B’risposta għad-deċiżjoni tal-bidu, il-Ġermanja ssottomettiet osservazzjonijiet dwar l-evalwazzjoni tal-għajnuna.

(45)

Fir-rigward tal-iskala tal-għajnuna involuta, il-Ġermanja targumenta li, kontra għall-pożizzjoni tal-Kummissjoni, għall-kalkolu tal-ammont tal-għajnuna l-uniku żmien rilevanti hu ż-żmien li fih tniehda u tħabbar il-protezzjoni mir-riskju lill-pubbliku, u mhux dak iżjed tard li fih l-istruttura provviżorja ġiet trasformata fi struttura permanenti.

(46)

Fir-rigward tan-natura tal-protezzjoni mir-riskju, il-Ġermanja hi tal-fehma li l-konverżjoni minn struttura provviżorja għal waħda permanenti mhijiex rilevanti. It-test applikat mill-Kummissjoni għall-evalwazzjoni tal-eligibilità tal-miżura, i.e. ir-riversibbiltà tagħha, hu sodisfatt, minkejja l-fatt li l-protezzjoni mir-riskju mhijiex soġġetta għal limitu taż-żmien.

(47)

Il-Ġermanja hi tal-fehma li meta tingħata garanzija lil kumpanija f’diffikultà, il-komponent tal-għajnuna jkun ugwali għall-ammont effettivament kopert bil-garanzija biss jekk ikun hemm probabbiltà kbira ta’ telf totali. Il-kalkolu mwettaq minn WestLB li ġie preżentat lil BaFin u l-Bundesbank f’Diċembru tal-2007 u Jannar tal-2008 qiegħed it-telf mistenni tal-portafoll f’€[…] miljun nominali fit-tmiem ta’ Jannar tal-2008; il-kalkolu mwettaq minn Morgan Stanley fi Frar tal-2008 wasal għal valur konsiderevolment ogħla ta’ madwar €[…] biljun; it-tnejn li huma, huma sew taħt il-valur nominali ta’ €5 biljuni, u ma jissuġġerixxux li t-telf totali kien probabbli ħafna. Barra minn hekk, il-kalkolu mwettaq minn WestLB diġà jikkunsidra xenarju ta’ każ ħażin, għax hu bbażat fuq tnaqqis fil-valur fuq żewġ livelli addizzjonali tal-klassifikazzjonijiet riċenti tal-istrumenti kollha evalwati, filwaqt li r-rapport provdut minn Morgan Stanley kien pessimistiku żżejjed, peress li kien ibbażat, fost preżunzjonijiet oħra li jvarjaw, fuq tnaqqis fil-valur fuq erba’ livelli.

(48)

Fir-rigward tal-bażi legali, il-Ġermanja hi tal-fehma li l-għajnuna hi kompatibbli mas-suq komuni skont l-Artikolu 87(3)(b) tat-Trattat KE, peress li fiż-żmien li ngħatat l-għajnuna kien hemm taqlib serju fl-ekonomija, u l-protezzjoni mir-riskju għal WestLB, li skont il-Ġermanja hi ta’ importanza sistematika, kienet maħsuba wkoll biex tirrimedja dak it-taqlib. Il-miżura kienet xierqa, meħtieġa u proporzjonali.

(49)

Il-Ġermanja tikkontendi wkoll li l-għajnuna hi kompatibbli mas-suq komuni taħt l-Artikolu 87(3)(c), għax il-pjan ta’ ristrutturar ma jikkonsistix biss f’titjib inkrimentali, iżda jipprovdi għal tnaqqis konsiderevoli fin-negozju mwettaq minn WestLB għall-kont tiegħu stess, titjib apprezzabbli fil-profil tar-riskju tiegħu, u stabilizzazzjoni tal-prospetti tal-qliegħ tiegħu.

(50)

Finalment, il-Ġermanja hi tal-fehma li l-miżuri pjanati mmirati lejn il-limitazzjoni tad-distorsjoni potenzjali tal-kompetizzjoni mhumiex neċessarjament sabiex tiġi rrestawrata l-vijabbiltà fuq perjodu ta’ żmien twil, u li l-ispiża ġenerali ta’ dawn il-miżuri kif imqabbla mal-ammont tal-għajnuna rċevuta hi konsiderevolment ogħla milli hi f’każijiet simili bħal Crédit Lyonnais II  (18), Banco di Napoli, Crédit Foncier de France, Societé Marseillaise de Crédit, BAWAG-PSK  (19), Bankgesellschaft Berlin  (20) jew IKB  (21).

(51)

Il-Kummissjoni għandha l-ewwel tevalwa jekk il-miżura tikkostitwixxix għajnuna mill-Istat skont it-tifsir tal-Artikolu 87(1) tat-Trattat KE. Dik id-dispożizzjoni tkopri kwalunkwe għajnuna mogħtija minn Stati Membri jew permezz tar-riżorsi tal-istat fi kwalunkwe forma li tħarbat il-kompetizzjoni billi tiffavorixxi ċertu intrapriżi, safejn taffettwa l-kummerċ bejn l-Istati Membri.

(52)

Il-protezzjoni mir-riskju hi kontinwazzjoni tal-għajnuna ta’ salvataġġ mogħtija mis-sidien. Kif iddeċidiet il-Kummissjoni fid-Deċiżjoni tagħha tat-30 t’April tal-2008, il-protezzjoni mir-riskju tikkostitwixxi għajnuna mill-Istat. Il-Ġermanja ma tinnegax dan.

(53)

Il-Kummissjoni ma taqbilx mal-Ġermanja li l-ammont tal-għajnuna għandu jiġi kkalkulat fuq il-bażi tat-telf mistenni.

(54)

L-ewwel nett, fir-rigward tal-metodoloġija, il-Kummissjoni tikkonferma li l-protezzjoni mir-riskju ġiet approvata bħala għajnuna tas-salvataġġ minħabba r-riversibbiltà tagħha. Il-protezzjoni tar-riskju issa għandha tinqaleb f’arranġament permanenti, u l-ammont tal-għajnuna għaldaqstant jista’ jiġi evalwat mill-ġdid fl-istadju tar-ristrutturar. Intalbet valutazzjoni mill-ġdid tat-telf mistenni fid-deċiżjoni tal-bidu, iżda ma ġiet sottomessal-ebda evalwazzjoni ta’ din ix-xorta, għalkemm jeżistu figuri iżjed aġġornati u li setgħu ġew provduti mill-benefiċjarju. Ir-rapport ta’ Morgan Stanley, li jasal għall-valur konsidervolment ogħla ta’ madwar €[…] biljun, juri s-sensittività ta’ dawn il-kalkoli, skont il-preżunzjonijiet magħmula u l-metodoloġija adottata.

(55)

Il-Kummissjoni tindika li fid-Deċiżjoni tagħha f’Sachsen LB, iddeċidiet li fl-evalwazzjoni tat-telf mistenni fiċ-ċirkostanzi mhux previdibbli fil-preżent tas-swieq finanzjarji, investitur tal-ekonomija tas-suq kien mill-inqas jikkunsidra x-xenarju ta’ każ ħażin (22). Il-Kummissjoni ma taqbilx li l-preżunzjonijiet differenti fir-rapport Morgan Stanley huma pessimistiċi żżejjed, u lanqas li WestLB diġà kkunsidra xenarju ta’ każ ħażin, għax ikun hemm effett notevoli fuq it-telf mistenni biss jekk jintgħażlu gradi iżjed baxxi fuq l-iskala tal-klassifikazzjoni. Din il-konklużjoni tikkonforma mar-raġunar fid-Deċiżjoni Bankgesellschaft Berlin  (23).

(56)

Barra minn hekk, il-Kummissjoni tqis li fil-każ preżenti l-effett u n-natura tal-garanzija ta’ €5 biljuni, li tippermetti li l-bank li jeħles il-karta tal-bilanċ tiegħu minn portafoll ta’ € 23 biljun, huma simili għal dawk ta’ injezzjoni kapitali. L-ammont tal-għajnuna hu għaldaqstant komparabbli mal-kapital li kien ikun rikjest sabiex tinkiseb l-istess stabilizzazzjoni tal-portafoll (24).

(57)

Skont il-prassi stabbilita tal-Kummissjoni (25), is-sejbiet konsisteni tal-qrati, u n-Notifika tal-Kummissjoni dwar l-applikazzjoni tal-Artikoli 87 u 88 tat-Trattat tal-KE għall-għajnuna mill-Istat fil-forma ta’ garanziji (26), il-komponent tal-għajnuna bħala garanzija lil kumpanija f’diffikultà jista’ jkun għoli daqs l-ammont effettivament kopert mill-garanzija (hawn €5 biljuni).

(58)

Skont il-Komunikazzjoni mill-Kummissjoni dwar it-trattament tal-assi indeboliti fis-settur bankarju tal-Komunità (27) (paragrafu 39), l-ammont ta’ għajnuna hu daqs id-differenza bejn il-valur tat-trasferiment tal-assi (ibbażat fuq il-valur ekonomiku reali tagħhom) u l-prezz tas-suq. Għal din ir-raġuni l-assi għandhom jiġu evalwati fuq il-bażi tal-valur tas-suq preżenti tagħhom meta dan ikun possibbli. Skont l-informazzjoni provduta mill-awtoritajiet Ġermaniżi, is-suq għall-assi fil-portafoll sfuma kważi għal kollox, biex b’hekk ma jibqax possibbli li jiġi stabbilit prezz tas-suq għall-iskopijiet tal-Komunikazzjoni fuq l-assi indeboliti, peress li m’hemmx suq li għalih tista’ ssir referenza. Għandu jiġi konkluż, għaldaqstant, li l-ammont ta’ għajnuna hi daqs l-ammont tal-garanzija, i.e. €5 biljuni.

(59)

Barra minn hekk, il-kummissjoni li għandha titħallas, f’[0,2–1,0] %, hi b’mod konsiderevoli taħt il-prezz li investitur fis-suq jistenna skont il-Komunikazzjoni dwar l-assi indeboliti (28).

(60)

Il-valur ekonomiku tal-għajnuna hu għaldaqstant sostanzjalment ogħla kemm mill-evalwazzjoni tal-Ġermanja tat-telf mistenni u l-€[…] biljun ikkalkulat minn Morgan Stanley. F’kull probabbiltà, għaldaqstant, l-għajnuna hi daqs il-valur nominali ta’ €5 biljuni.

(61)

Fid-deċiżjoni tal-bidu l-Kummissjoni qalet li l-bażi legali għall-evalwazzjoni tal-kompatibilità tal-miżura tal-għajnuna kien l-Artikolu 87(3)(c) tat-Trattat tal-KE. Il-Kummissjoni kkunsidrat ukoll jekk il-miżura għandhiex tiġi evalwata fuq il-bażi tal-Artikolu 87(3)(b). Dik id-dispożizzjoni tgħid li l-għajnuna tista’ titqies li hi kompatibbli mas-suq komuni jekk tkun intiża bħala rimedju għal disturbanza serja fl-ekonomija ta’ Stat Membru. Il-Kummissjoni indikat li fiż-żmien meta ngħatat l-għajnuna lil WestLB, il-kriżi fuq is-suq subprime kienet għadha ma wasslitx għal disturbanza serja fl-ekonomija Ġermaniża skont it-tifsir tal-Artikolu 87(3)(b). Il-Kummissjoni lanqas ma kienet irċeviet provi mill-awtoritajiet Ġermaniżi li juru li n-nuqqas tal-għajnuna lil WestLB kien se jwassal għal disturbanza serja ta’ din ix-xorta.

(62)

Sadanittant, il-Kummissjoni rrikonoxxiet fi tliet Komunikazzjonijiet (29) u fl-approvazzjoni tagħha tal-pakkett tas-salvataġġ tal-banek Ġermaniżi (30) li hemm theddida ta’ disturbanza serja fl-ekonomija Ġermaniża, u li l-miżuri ta’ appoġġ għall-banek aktarx li jirrimedjaw dik id-disturbanza. Il-bażi legali għall-evalwazzjoni tal-miżura tal-għajnuna għandha għaldaqstant tkun l-Artikolu 87(3)(b) tat-Trattat tal-KE.

(63)

Fit-tliet Komunikazzjonijiet li adottat f’rabta mal-kriżi finanzjarja preżenti (31), il-Kummissjoni qalet li l-għajnuna mogħtija lill-banek fil-kuntest tal-kriżi għandha tiġi evalwata skont il-linji gwida tas-salvataġġ u tar-ristrutturar, wara li tikkunsidra l-aspetti partikolari ta’ kriżi sistematika fis-swieq finanzjarji (32). Taħt il-linji gwida tas-salvataġġ u tar-ristrutturar, l-għajnuna mill-istat tista’ tiġi awtorizzata biss jekk tkun akkompanjata minn ristrutturar estensiv sabiex tiġi restawrata l-vijabbiltà, b’kontribuzzjoni xierqa għall-ispiża tar-ristrutturar min-naħa tal-benefiċjarju, u b’miżuri li jirrimedjaw id-distorsjoni potenzjali tal-kompetizzjoni. Il-linji gwida għaldaqstant joffru l-qafas xieraq ta’ kif jiġi trattat ir-ristruttar ta’ WestLB fil-kuntest tal-kriżi. Madankollu, meta wieħed iqis in-natura u l-iskala tal-kriżi preżenti, għandu jittieħed kont ta’ fatturi speċifiċi oħra relatati mal-kundizzjonijiet tas-suq preżenti. Meta jiġu applikati għar-ristrutturar ta’ WestLB fil-kriżi preżenti, għaldaqstant, il-prinċipji tas-salvataġġ u r-ristrutturar għandhom jiġu modulati. Għandha tingħata attenzjoni speċjali għar-regoli stabbiliti fil-linji gwida tas-salvataġġ u tar-ristrutturar dwar il-kontribuzzjoni li għandha ssir lill-benefiċjarju. Peress li l-finanzjament estern għal WestLB […], il-mira ta’ 50 % stabbilita fil-linji gwida tas-salvataġġ u r-ristrutturar jidher li hija diffiċli ħafna li tinkiseb, u l-Kummissjoni aċċettat li waqt il-kriżi sistematika fis-swieq finanzjarji jista’ ma jkunx xieraq li tintalab kwantifikazzjoni preċiża tal-kontribuzzjoni mill-benefiċjarju stess. Barra minn hekk, id-disinn u l-implimentazzjoni ta’ miżuri li jillimitaw id-distorsjoni tal-kompetizzjoni jistgħu jiġu kkunsidrati mill-ġdid, safejn WestLB ikollu bżonn iżjed żmien għall-implimentazzjoni tagħhom, skont iċ-ċirkostanzi tas-suq.

(64)

Kif indikat il-Kummissjoni fi tnejn mill-Komunikazzjonijiet adottati b’rabta mal-kriżi finanzjarja preżenti, l-ammont ta’ ristrutturar meħtieġ biex ikun hemm ritorn għall-vijabbiltà aktarx li jkun fi proporzjon dirett mal-ambitu u l-volum tal-għajnuna provduti lil WestLB min-naħa l-waħda u mas-solidità tal-mudell tan-negozju tiegħu min-naħa l-oħra (33).

(65)

Sabiex tiġi evalwata l-kompatibilità tal-għajnuna mas-suq komuni taħt l-Artikolu 87(3)(b) tat-Trattat tal-KE, il-Kummissjoni għandha tiddetermina jekk tilħaqx il-kundizzjonijiet li ġejjin għall-għajnuna tar-ristrutturar stabbilita fil-linji gwida tas-salvataġġ u r-ristrutturar: (i) l-għajnuna għandha tkun ibbażata fuq pjan ta’ ristrutturar, li għandu juri li l-kumpanija hi kapaċi terġa’ lura għall-vijabilità tagħha fuq perjodu taż-żmien twil; (ii) l-għajnuna għandha tkun limitata għall-minimu meħtieġ bħala żmien u ammont, u l-benefiċjarju għandu jagħti kontribuzzjoni konsiderevoli għall-ispejjeż tar-ristrutturar; u (iii) l-għajnuna m’għandhiex tħarbat il-kompetizzjoni b’mod li jmur kontra l-interess komuni; u f’dan ir-rigward il-Kummissjoni tista’ timponi kundizzjonijiet fuq il-benefiċjarju.

(66)

Il-Paragrafu 34 tal-linji gwida tas-salvataġġ u r-ristrutturar jgħid li l-għoti tal-għajnuna għandu jkun dipendenti fuq l-implimentazzjoni tal-pjan tar-ristrutturar, li għandu jiġi endorsjat mill-Kummissjoni fil-każijiet kollha ta’ għajnuna individwali. Il-Kummissjoni għandha tistabbilixxi li l-pjan ta’ ristrutturar jista’ jkun mistenni li jirrestawra l-vijabilità fuq perjodu taż-żmien twil tal-kumpanija fi żmien raġonevoli. Il-pjan ta’ ristrutturar għandu jkollu żmien limitat u jkun ibbażat fuq preżunzjonijiet realistiċi. Għandu jiddeskrivi ċ-ċirkostanzi li wasslu għad-diffikultajiet tal-kumpanija, biex b’hekk jipprovdi bażi għall-evalwazzjoni ta’ jekk il-miżuri proposti humiex adattati. Għandu jippermetti li l-kumpanija tgħaddi għal struttura ġdida li toffrielha prospetti għal vijabilità fuq perjodu taż-żmien twil u li jippermettilha li tqum fuq saqajha. Dan ifisser li għandu jippermetti li l-kumpanija tkopri l-ispejjeż kollha tagħha, inklużi dawk ta’ depprezzament u finanzjarji, u li tikseb ritorn fuq il-kapital tagħha li jkun biżżejjed għaliha biex tikkompeti fis-suq bil-merti tagħha stess.

(67)

Il-Kummissjoni bbażat l-evalwazzjoni tagħha fuq informazzjoni provduta mill-Ġermanja, u b’mod partikolari l-pjan ta’ ristrutturar flimkien ma’ modifiki konsiderevoli għall-pjan sottomess fl-istadju ta’ wara tal-proċedura tal-investigazzjoni wara diskussjonijiet mal-Kummissjoni, li jinkludu l-iskedar dettaljat tal-bejgħ tal-assi speċifiċi.

(68)

Fid-deċiżjoni tal-bidu tagħha, il-Kummissjoni esprimiet dubji li d-dokumenti li ġew sottomessi mill-Ġermanja fil-bidu jistgħu jitqiesu li huma pjan ta’ ristrutturar xieraq li jilħaq il-kundizzjonijiet fil-paragrafi 32–51 tal-linji gwida tas-salvataġġ u tar-ristrutturar. Fid-deċiżjoni tal-bidu tagħha, il-Kummissjoni esprimiet ukoll il-fehma li s-sitwazzjoni diffiċli ta’ WestLB ġiet parzjalment minħabba l-istruttura tas-sjieda tal-bank u l-interessi differenti tas-sidien rispettivi. Il-Kummissjoni għaldaqstant tqis li l-bidla fis-sjieda, li għandha tinkiseb sal-aħħar tal-2011 permezz ta’ proċedura ta’ sejħa għall-offteri miftuħa, trasparenti u mhux diskriminatorja, hi pass importanti sabiex jissolvew id-diffikultajiet u għandha tiffaċilità l-iżvilupp ekonomiku pożittiv tal-bank.

(69)

WestLB jew is-sidien tiegħu aċċettaw dan il-punt, u obbligaw ruħhom li jwettqu l-bidla fis-sjieda f’termini definiti sal-31 ta’ Diċembru tal-2008, pereżempju billi jipproduċu ittra ta’ intenzjoni. Fuq rikjesta mill-Ġermanja, il-limitu taż-żmien ġie estiż sal-31 ta’ Marzu tal-2009. Rapport interim sottomess mill-Ġermanja fis-27 ta’ Frar tal-2009 analizza l-progress miksub sal-aħħar ta’ Frar tal-2009 (34). L-istrateġija preferuta kienet li jinħoloq grupp konsolidat supra-reġjonali (imsejjaħ “Landesbank Mitte”) permezz tal-amalgamazzjoni ta’ żewġ Landesbanken, WestLB u Landesbank Hessen-Thüringen (“Helaba”). L-integrazzjoni ta’ DeKaBank Deutsche Girozentrale ġiet proposta bħala miżura kumplimentari. L-ebda miż-żewġ possibiltajiet ma kellhom suċċess, għal ħafna raġunijiet. Raġuni waħda kienet il-kunflitt ta’ interessi fost is-sidien ta’ WestLB. L-interessi tal-banek tat-tfaddil u l-Land huma xi kultant direttament opposti, li tikkonferma li l-fehma espressa mill-Kummissjoni fid-deċiżjoni tal-bidu kienet korretta, u li bidla fis-sjieda hi ta’ importanza kbira sabiex tkun tista’ tiġi restawrata l-vijabilità ta’ WestLB fuq perjodu taż-żmien twil.

(70)

Minħabba l-falliment tal-ewwel tentattiv ta’ privatizzazzjoni ta’ WestLB, il-Kummissjoni pruvat tistabbilixxi b’livell suffiċjenti ta’ ċertezza li l-pjan ta’ ristrutturar sottomess hu kapaċi jirrestawra l-vijabilità tal-bank.

(71)

Il-pjan emendat mhux biss jipprovdi informazzjoni iżjed dettaljata dwar il-miżuri pjanati, iżda jinkludi wkoll firxa ta’ miżuri importanti, bħal tnaqqis fil-karta tal-bilanċ u l-assi bir-riskju kkalkulat bi kważi 50 %, il-bejgħ tal-bank fit-totalità tiegħu jew f’unitajiet separati permezz ta’ proċedura ta’ sejħa għall-offerti miftuħa, il-bejgħ ta’ kważi l-kumpaniji sussidjarji kollha inkluż il-Westdeutsche ImmobilienBank, u l-għeluq tal-maġġoranza tal-lokazzjonijiet tal-bank.

(72)

Il-bejgħ tal-bank għandu jitlesta sal-31 ta’ Diċembru tal-2011. Is-sidien ta’ WestLB għandhom jiftħu proċedura ta’ sejħa għall-offerti miftuħa, trasparenti u mhux diskriminatorja sal-31 t’Awwissu tal-2010, u jiffirmaw kuntratt ma’ xerrej sa [Ġunju–Ottubru] tal-2011, sabiex il-bejgħ ikun jista’ jseħħ sal-1 ta’ Jannar tal-2012. L-għan ewlieni hu trasferiment sħiħ tad-drittijiet tal-voti. Iżda peress li s-sitwazzjoni fis-swieq finanzjarji mhijiex prevedibbli, u peress li t-tentattivi għal bidla fl-istruttura tas-sjieda ta’ WestLB ma kellhomx suċċess, il-Kummissjoni qablet li jista’ jkun hemm bżonn għal xenarji alternattivi, bħal trasferiment tal-maġġoranza tad-drittijiet tal-voti. Għalkemm il-konsolidizzazzjoni ta’ Landesbanken fil-Ġermanja ma kellhiex suċċess s’issa, il-Kummissjoni ma topponix ir-ristrutturar aggregat tal-banek u l-implimentazzjoni tal-pjan ta’ ristrutturar fil-kuntest usa’ tas-settur tal-Landesbanken kollu fil-Ġermanja. L-implimentazzjoni tal-bidla fis-sjieda għandha tiġi sorveljata minn trustee approvat mill-Kummissjoni u maħtur minn WestLB.

(73)

Il-bejgħ tal-bank għandu jkun iffaċilitat bis-separazzjoni preċedenti tal-attivitajiet tan-negozju u l-iggruppar tagħhom fi tliet oqsma tan-negozju ewlenin, li jiġu offruti għall-bejgħ fi proċedura ta’ sejħa għall-offerti, kemm b’mod separat u kif ukoll fit-totalità tagħhom, u bit-tiċkin preċedenti tal-karta tal-bilanċ u l-assi bir-riskju kkalkulat b’25 % sal-aħħar ta’ Marzu tal-2010 u b’50 % sal-aħħar ta’ Marzu tal-2011, b’referenza għar-rendikont finanzjarju fl-aħħar tas-sena għall-2007.

(74)

Barra minn hekk, l-investigazzjoni kkonfermat li WestLB dawwar l-attivitajiet tiegħu. Abbanduna negozju li minnu kien qed jagħmel telf bħal ġestjoni tal-investiment u negozjar proprjetarju, li wasslu għall-kriżi, u qed jerġa’ jiffoka mill-ġdid fuq negozju bbażat fuq il-klijenti. Il-pjan ta’ ristrutturar emendat jipprovdi li l-bank għandu jikkonċentra għal darb’oħra l-attivitajiet tiegħu fuq in-North Rhine-Westphalia u l-Ġermanja, fil-waqt li joħroġ minn 20 lokazzjoni u kumpaniji sussidjarji, u fuq servizzi bankarji transazzjonali, is-sħubija bejn il-kumpaniji ta’ daqs medju u l-banek tat-tfaddil, u s-servizzi bankarji bl-ingrossa, swieq kapitali u finanzjament strutturat. L-attenzjoni mill-ġdid minn attivitajiet riskjużi għal negozju inqas volatili bħal servizzi bankarji transazzjonali u kooperazzjoni ma’ banek tat-tfaddil, klijenti bankarji privati, u korporazzjonijiet ta’ daqs medju għandha żżid il-parti sostenibbli tal-attivitajiet ta’ WestLB u għaldaqstant tikkontribwixxi għar-restawr tal-vijabilità tal-bank. Il-Kummissjoni tosserva li taħt il-pjan ta’ ristrutturar emendat, WestLB għandu javvanza sew mill-mudell ta’ negozju li kellu qabel. Il-pjan ta’ ristrutturar għaldaqstant jikkostitwixxi bidla konsiderevoli fl-approċċ tan-negozju li ma kienx sostenibbli fil-passat.

(75)

Il-Kummissjoni tosserva wkoll il-miżuri ta’ tnaqqis fl-ispejjeż li għandhom jiġu implimentati sal-aħħar tal-2010. Barra minn hekk, WestLB ħa miżuri sabiex itejjeb il-ġestjoni tar-riskju tiegħu, u diġà naqqas l-espożizzjoni tiegħu għar-riskju. Il-Kummissjoni analizzat il-preżunzjonijiet li jinsabu wara l-pjan tar-ristrutturar u m’għandha l-ebda raġuni għalxiex tiddubita li dawn huma realistiċi. Għaldaqstant il-Kummissjoni tqis li l-pjan ta’ ristrutturar emendat juri l-kapaċità ta’ WestLB li jirrestawra l-vijabilità tiegħu fuq perjodu ta’ żmien twil.

(76)

Id-dubji tal-Kummissjoni li l-għajnuna tista’ ma tkunx limitata għall-minimu ġew imserrħa Il-Kummissjoni tista’ issa tikkonkludi li l-għajnuna hi fil-fatt limitata għall-minimu meħtieġ, u li għandu jkun hemm kontribuzzjoni konsiderevoli min-naħa tal-benefiċjarju. Il-Kummissjoni tirrikonoxxi li l-mira ta’ 50 % indikata fil-paragrafu 44 tal-linji gwida tas-salvataġġ u r-ristrutturar għandha tkun modulata meta applikata għar-ristrutturar ta’ WestLB fil-kriżi preżenti.

(77)

Il-Kummissjoni tqis li l-ispejjeż tar-ristrutturar għandhom jitħallsu mill-bank innifsu sal-ikbar limitu possibbli fiċ-ċirkostanżi, permezz tat-tneħħija tal-assi u l-kumpaniji sussidjarji. L-effett ta’ dawn id-divestimenti hu doppju. Min-naħa waħda, id-divestimenti jnaqqsu l-volum tal-assi bir-riskju kkalkulat, biex b’hekk jinħeles il-kapital u jiżdiedu l-proporzjonijiet tal-kapital. Min-naħa l-oħra, id-divestimenti jiġġeneraw likwidità li tista’ tintuża għall-finanzjament tar-ristrutturar jew għat-tisħiħ tal-bażi tal-likwidità (35). Parti minn dan il-fluss mistenni tal-fondi diġà twettqet, u parti oħra għandha titwettaq fil-futur qarib. Għalhekk, anke jekk wieħed iħalli barra l-flussi ta’ fondi mistennija li jistgħu jitwettqu biss fl-2011, u għall-finijiet tal-prekawzjoni jassumi li l-qliegħ prevvist jista’ jkun li ma jimmaterjalizzax b’mod sħiħ għal dawn id-divestimenti kollha, il-Kummissjoni tikkonkludi li l-kontribuzzjoni tal-benefiċjarju stess tista’ titqies li hi konsiderevoli.

(78)

Minkejja l-modulazzjoni tal-mira ta’ 50 % għall-kontribuzzjoni mill-benefiċjarju stess, il-Kummissjoni għandha tkompli tirrikjedi li d-detenturi tal-ishma jagħmlu kontribuzzjoni sostanzjali kif ikun possibbli (i.e. huma għandhom jaqsmu l-piż). Dan ifisser li l-investituri fil-kapital ibridu għandhom jipparteċipaw fir-ristrutturar tal-bank. Il-Kummissjoni tqis li l-aġġustament tar-riservi tal-kapital sabiex ikun jista’ jitħallas ritorn fuq kapital ibridu u sabiex tiġi evitata l-parteċipazzjoni f’telf f’każijiet fejn tkun ingħatat l-għajnuna mill-Istat, hu problematiku, għal żewġ raġunijiet. L-ewwelnett, l-għajnuna mill-Istat tiġi tidher li mhijiex limitata għall-minimu neċessarju. Il-prinċipju li l-għajnuna mill-Istat għandha tkun limitata għall-minimu neċessarju hu prinċipju ġenerali ta’ politika tal-għajnuna mill-istat. L-aġġustament ta’ fondi ta’ riserva sabiex jitħallsu interessi fuq il-kapital ibridu direttament ineħħi kapital regolatorju mill-bank, li jżid l-ammont meħtieġ għar-rikapitalizzazzjoni u għaldaqstant l-ammont ta’ għajnuna mill-Istat. It-tieni nett, dan imur kontra l-prinċipji tal-qsim tal-piż, u jżid il-periklu morali. Il-ħlas ta’ ritorn, avolja ma jkunx hemm obbligu legali, jipproteġi s-sidien tal-kapital ibridu mill-konsegwenzi tat-telf u minn espożizzjoni sħiħa għar-riskju li jkunu ddeċiedew li jieħdu meta jkunu nvestew f’tip ta’ strument li hu riskjuż fin-natura tiegħu u li għandu remunerazzjoni ogħla preċiżament minħabba dan ir-riskju. Barra minn hekk, l-istrumenti ibridi għandhom jipparteċipaw fit-telf. Il-Kummissjoni għaldaqstant titlob li l-ħlas tal-interessi fuq dawn l-istrumenti jkun projbit sakemm isir il-bejgħ ta’ WestLB, u li l-istrumenti jipparteċipaw fit-telf jekk fin-nuqqas ta’ aġġustament tar-riservi, il-bank juri telf fil-karta tal-bilanċ. Dan japplika b’mod speċjali għal WestLB, peress li WestLB se jinbiegħ, u l-kunfidenza tal-investitur fis-sidien attwali m’għandix rilevanza kbira (36).

(79)

B’konklużjoni, anke jekk il-mira ta’ 50 % aktarx li ma tinkisibx, il-Kummissjoni hi tal-fehma li l-kontribuzzjoni li WestLB obbliga ruħu li jagħmel għar-ristrutturar hi kbira kemm jista’ jkun possibbli.

(80)

Il-Paragrafi 35 sa 39 tal-linji gwida tas-salvataġġ u tar-ristrutturar jgħidu li għandhom jittieħdu miżuri sabiex jitnaqqsu kemm jista’ jkun possibbli kwalunkwe effetti negattivi li l-għajnuna jista’ jkollha fuq il-kompetituri. Dan normalment jinvolvi l-limitazzjoni jew it-tnaqqis tal-preżenza tal-kumpanija fuq is-swieq tal-prodotti rilevanti permezz tal-bejgħ tal-kapaċità tal-produzzjoni jew il-kumpaniji sussidjarji jew it-tnaqqis tal-attivitajiet. Il-limitazzjoni jew it-tnaqqis għandhom isiru fi proporzjon mal-effetti distortivi tal-għajnuna.

(81)

Fi tmiem l-investigazzjoni tagħha l-Kummissjoni hija sodisfatta li fil-fatt ittieħdu miżuri suffiċjenti sabiex jitnaqqsu kemm jista’ jkun possibbli kwalunkwe effetti negattivi tal-għajnuna fuq il-kompetizzjoni.

(82)

WestLB qed joħroġ mill-ġestjoni tal-investiment u jnaqqas konsiderevolment il-volum tan-negozju tiegħu fil-qasam tal-finanzi strutturati u s-swieq kapitali, tnejn mill-oqsma tan-negozju li minnhom l-iżjed li kien jagħmel profitt.

(83)

Iżda l-Kummissjoni hi tal-fehma li l-ħruġ mill-ġestjoni tal-investiment u madwar nofs il-volum tat-tiċkin totali huma meħtieġa sabiex tiġi rrestawrata l-vijabilità. Skont il-paragrafu 40 tal-linji gwida dwar is-salvataġġ u r-ristrutturar, dawn il-miżuri ma jikkwalifikawx bħala miżuri li jillimitaw id-distorsjoni tal-kompetizzjoni. Fil-waqt li l-ħruġ min-negozju tal-ġestjoni tal-investiment ma jistax jiġi aċċettat bħala miżura li tnaqqas id-distorsjoni tal-kompetizzjoni, xorta waħda għandu impatt fuq id-daqs tal-bank u l-attivitajiet tiegħu.

(84)

In ġenerali, it-total tal-karta tal-bilanċ ta’ WestLB għandu jitnaqqas b’25 % sal-aħħar ta’ Marzu tal-2010 u b’50 % sal-aħħar ta’ Marzu tal-2011. Fl-istess żmien, il-volum tal-assi bir-riskju kkalkulat għandu jitnaqqas b’25 % sal-aħħar ta’ Marzu tal-2010 u b’50 % sal-aħħar ta’ Marzu tal-2011.

(85)

Il-Kummissjoni tqis li t-tnaqqis fin-netwerk tal-fergħat għal ħames fergħat fil-Ġermanja u seba’ lokazzjonijiet barra l-Ġermanja, l-abbandun tal-kummerċ proprjetarju u r-restrizzjonijiet fuq il-kummerċ għal kontijiet tal-klijenti jirrapreżentaw miżuri xierqa għat-tnaqqis tad-distorsjoni tal-kompetizzjoni.

(86)

Il-pjan tar-ristrutturar jipprovdi wkoll għal miżuri ta’ tnaqqis ta’ spejjeż u tiċkin. Kważi ż-żammiet tal-ishma kollha f’kumpaniji sussidjarji għandhom jiġu divestiti. Il-proċess tal-bejgħ ta’ dawn iż-żammiet tal-ishma għandu jiġi organizzat f’żewġ porzjonijiet; l-ewwel porzjon ta’ ishma, li jinkludi 16-il kumpanija sussidjarja, għandu jinbiegħ sal-aħħar ta’ [Frar–Mejju] tal-2010 (37), u t-tieni porzjon, li jinkludi tliet kumpaniji sussidjarji, għandu jinbiegħ sal-aħħar ta’ [Frar–Mejju] tal-2011.

(87)

Barra minn hekk, l-iżvilupp tan-negozju fl-oqsma tan-negozju ewlenin ta’ WestLB — finanzi strutturati, servizzi bankarji bl-ingrossa, u swieq kapitali — għandu jiġi limitat f’termini ta’ negozju ġdid u volum tal-karta tal-bilanċ (assi bir-riskju kkalkulat).

(88)

B’konklużjoni, il-Kummissjoni tikkunsidra li l-miżuri li jikkumpensaw huma proporzjonali għall-effetti distortivi tal-għajnuna mogħtija lil WestLB u jiżguraw li l-effetti negattivi fuq il-kundizzjonijiet tal-kummerċ huma minimizzati safejn hu possibbli.

(89)

Il-miżura tikkostitwixxi għajnuna għar-ristrutturar li tista’ titqies li hi kompatibbli mas-suq komuni skont l-Artikolu 87(3)(b) tat-Trattat tal-KE sakemm il-kundizzjonijiet imposti jiġu osservati,

(a)

tippermetti estensjoni tal-limiti taż-żmien stabbiliti fl-Anness, jew

(b)

f’ċirkostanzi eċċezzjonali, teżenta, temenda jew tibdel waħda jew iżjed mill-kundizzjonijiet stabbiliti fl-Anness.