(a)

jadottaw pjanijiet ta’ azzjoni nazzjonali għall-koordinazzjoni ta’ l-infurzar; l-għanijiet ta’ dawn il-pjanijiet u ż-żmien li fih iridu jseħħu għandhom jiġu definiti b’mod ċar, u għandhom jiġu armonizzati u reveduti regolarment;

(b)

jiżguraw li l-aġenziji ta’ infurzar rilevanti kollha jkollhom ir-riżorsi finanzjarji u persunal xierqa għall-infurzar tar-Regolament (KE) Nru 338/97 u li jkollhom aċċess għal tagħmir speċjalizzat u għall-għarfien espert rilevanti;

(c)

jiżguraw li s-sanzjonijiet għall-ksur tar-Regolament (KE) Nru 388/97 iservu ta’ deterrent kontra reati kriminali fil-kummerċ fil-flora u fawna selvaġġ, b’konformità mal-każistika stabbilita tal-Qorti tal-Ġustizzja, li jkunu konsistenti fl-applikazzjoni tagħhom u, b’mod partikolari, li jikkunsidraw – fost affarijiet oħra – il-valur fis-suq tal-kampjuni, il-valur ta’ konservazzjoni ta’ l-ispeċijiet involuti fir-reat u l-ispejjeż li jkunu saru;

(d)

għall-fini tal-punt (c), jagħtu taħriġ jew jagħmlu attivitajiet li jżidu l-għarfien lill-aġenziji ta’ infurzar, servizzi ta’ prosekuzzjoni u lill-ġudikatura;

(e)

jiżguraw li l-aġenziji ta’ infurzar rilevanti kollha jkollhom aċċess għal taħriġ xieraq dwar ir-Regolament (KE) Nru 338/97 u dwar l-identifikazzjoni ta’ l-ispeċijiet;

(f)

jiżguraw li l-pubbliku u l-partijiet interessati jingħataw informazzjoni xierqa, b’mod partikolari, bil-ħsieb li jżidu l-għarfien dwar l-impatti negattivi li jħalli l-kummerċ illegali ta’ flora u fawna selvaġġi;

(g)

minbarra li jagħmlu l-kontrolli fil-fruntieri kif meħtieġ mir-Regolament (KE) Nru 338/97, jiżguraw l-infurzar fil-pajjiż, b’mod partikolari permezz ta’ kontrolli regolari fuq kummerċjanti u utenti bħall-ħwienet tal-pets, dawk li jnisslu u l-mixtliet;

(h)

jużaw sistematikament valutazzjonijiet tar-riskji u tagħrif sabiex jiżguraw li l-kontrolli fil-fruntieri u fil-pajjiż isiru b’reqqa;

(i)

jiżguraw li jkun hemm faċilitajiet disponibbli għaż-żamma temporanja ta’ kampjuni ħajjin li jkunu ġew maqbudin jew ikkonfiskati u li meta meħtieġ, ikun hemm proċeduri biex dawn il-kampjuni jkunu jistgħu jinżammu f’post ġdid għal żmien twil.

(a)

jistabbilixxu proċeduri biex jikkoordinaw l-infurzar fost l-awtoritajiet rilevanti nazzjonali kollha tagħhom permezz – fost affarijiet oħra – tat-twaqqif ta’ kumitati bejn l-aġenziji, kif ukoll permezz ta’ memoranda ta’ ftehim u ta’ ftehimiet oħra dwar kooperazzjoni bejn l-istituzzjonijiet;

(b)

iħaffu l-aċċess, għar-riżorsi, għodod u mezzi ta’ komunikazzjoni eżistenti għall-iskambju ta’ informazzjoni li jikkonċernaw l-infurzar tar-Regolament (KE) Nru 338/97 u tas-CITES, lill-uffiċjali ta’ infurzar rilevanti, sabiex l-informazzjoni rilevanti kollha tkun disponibbli għall-uffiċjali ta’ infurzar f’kull livell, inkluż il-persunal ta’ fuq il-front;

(c)

jaħtru punti fokali nazzjonali għall-iskambju ta’ informazzjoni u tagħrif dwar il-kummerċ fi flora u fawna selvaġġi;

(d)

jaqsmu l-informazzjoni rilevanti – dwar xejriet, każijiet ta’ qbid u tal-qorti sinifikanti – waqt il-laqgħat regolari tal-Grupp ta’ Infurzar kif ukoll bejn sessjoni u oħra;

(e)

jikkooperaw, fir-rigward ta’ investigazzjonijiet ta’ reati taħt ir-Regolament (KE) Nru 338/97, ma’ l-aġenziji ta’ infurzar rilevanti fi Stati Membri oħra;

(f)

jużaw il-mezzi ta’ komunikazzjoni, koordinazzjoni u għarfien ta’ l-Uffiċju Ewropew Kontra l-Frodi sabiex jikkoordinaw l-investigazzjonijiet fil-livell Komunitarju;

(g)

jiskambjaw informazzjoni dwar is-sanzjonijiet għal reati fil-kummerċ tal-flora u fawna selvaġġi sabiex tiġi żgurata konsistenza fl-applikazzjoni tagħhom;

(h)

jassistu fil-bini tal-kapaċità għall-applikazzjoni tar-Regolament (KE) Nru 338/97 fi Stati Membri oħra, fost l-oħrajn, permezz ta’ programmi ta’ taħriġ u bil-qsim ta’ manwali u materji tat-taħriġ;

(i)

jagħmlu disponibbli għal Stati Membri oħra, l-għodod u materji eżistenti biex il-pubbliku u l-partijiet interessati jsiru jafu aktar;

(j)

jassistu Stati Membri oħra fiż-żamma temporanja jew għal żmien twil ta’ kampjuni ħajjin li jkunu ġew maqbuda jew ikkonfiskati;

(k)

jikkollaboraw mill-qrib ma’ Awtoritajiet tal-Ġestjoni tas-CITES u ma’ aġenziji ta’ infurzar tal-liġi fil-pajjiżi (li mhumiex membri tal-Komunità) tas-sors, tranżitu u konsum, kif ukoll mas-Segretarjat tas-CITES, ma’ l-ICPO Interpol u ma’ l-Organizzazzjoni Dinjija tad-Dwana sabiex jassistu fil-qbid, skoraġġiment u prevenzjoni tal-kummerċ illegali fi flora u fawna selvaġġi permezz ta’ l-iskambju ta’ informazzjoni u għarfien;

(l)

jagħtu pariri u appoġġ lil Awtoritajiet tal-Ġestjoni tas-CITES u lil aġenziji ta’ infurzar tal-liġi fil-pajjiżi (li mhumiex membri tal-Komunità) tas-sors, tranżitu u konsum, sabiex il-kummerċ legali u sostenibbli jitħaffef permezz ta’ l-applikazzjoni korretta tal-proċeduri;

(m)

jagħtu appoġġ lil programmi ta’ bini tal-kapaċità f’pajjiżi terzi sabiex jittejbu l-implimentazzjoni u l-infurzar tas-CITES, fost l-oħrajn, permezz ta’ fondi għall-Kooperazzjoni fl-Iżvilupp u fil-qafas ta’ “Strateġija dwar Għajnuna għall-Kummerċ” (3) fil-futur;

(n)

irawmu kollaborazzjoni interreġjonali sabiex jiġġieldu kontra l-kummerċ illegali ta’ flora u fawna selvaġġi, fost l-oħrajn, billi joħolqu rabtiet ma’ inizjattivi reġjonali u sottoreġjonali oħra.