This document is an excerpt from the EUR-Lex website
Document 32004R0436
Council Regulation (EC) No 436/2004 of 8 March 2004 amending Regulation (EC) No 1784/2000 imposing a definitive anti-dumping duty and collecting definitively the provisional duty imposed on imports of certain malleable cast iron tube or pipe fittings originating in Brazil, the Czech Republic, Japan, the People's Republic of China, the Republic of Korea and Thailand
Ir-Regolament tal-Kunsill (KE) Nru 436/2004 tat-8 ta' Marzu 2004 li jemenda r-Regolament (KE) Nru 1784/2000 li jimponi dazju definittiv kontra d-dumping u li jirregola l-ġbir definittiv tad-dazju proviżorju impost fuq l-importazzjoni ta' ċerti aċċessorji ta' tubi jew pajpijiet tal-ħadid fondut malleabbli li jkunu ġejjin mill-Brażil, ir-Repubblika Ċeka, il-Ġappun, ir-Repubblika tal-Poplu taċ-Ċina, ir-Repubblika tal-Korea u t-Tajlandja
Ir-Regolament tal-Kunsill (KE) Nru 436/2004 tat-8 ta' Marzu 2004 li jemenda r-Regolament (KE) Nru 1784/2000 li jimponi dazju definittiv kontra d-dumping u li jirregola l-ġbir definittiv tad-dazju proviżorju impost fuq l-importazzjoni ta' ċerti aċċessorji ta' tubi jew pajpijiet tal-ħadid fondut malleabbli li jkunu ġejjin mill-Brażil, ir-Repubblika Ċeka, il-Ġappun, ir-Repubblika tal-Poplu taċ-Ċina, ir-Repubblika tal-Korea u t-Tajlandja
ĠU L 72, 11.3.2004, p. 15–22
(ES, DA, DE, EL, EN, FR, IT, NL, PT, FI, SV) Dan id-dokument ġie ppubblikat f’edizzjoni(jiet) speċjali
(CS, ET, LV, LT, HU, MT, PL, SK, SL)
No longer in force, Date of end of validity: 19/08/2005
Relation | Act | Comment | Subdivision concerned | From | To |
---|---|---|---|---|---|
Modifies | 32000R1784 | Emenda | artikolu 1.2 | 12/03/2004 |
Official Journal L 072 , 11/03/2004 P. 0015 - 0022
Ir-Regolament tal-Kunsill (KE) Nru 436/2004 tat-8 ta' Marzu 2004 li jemenda r-Regolament (KE) Nru 1784/2000 li jimponi dazju definittiv kontra d-dumping u li jirregola l-ġbir definittiv tad-dazju proviżorju impost fuq l-importazzjoni ta' ċerti aċċessorji ta' tubi jew pajpijiet tal-ħadid fondut malleabbli li jkunu ġejjin mill-Brażil, ir-Repubblika Ċeka, il-Ġappun, ir-Repubblika tal-Poplu taċ-Ċina, ir-Repubblika tal-Korea u t-Tajlandja IL-KUNSILL TA' L-UNJONI EWROPEA, Wara li kkunsidra t-Trattat li jistabbilixxi l-Komunità Ewropea, u b'mod partikolari l-Artikolu 133 tiegħu, Wara li kkunsidra r-Regolament tal-Kunsill (KE) Nru 1515/2001 tat-23 ta' Lulju 2001, dwar il-miżuri li jistgħu jittieħdu mill-Komunità fuq rapport li kien ġie adottat mill-Korp ta' Konċiljazzjoni tal-WTO li għandu x'jaqsam ma' kwistjonijiet ta' kontra d-dumping u kontra s-sussidji [1], Wara li kkunsidra r-Regolament tal-Kunsill (KE) Nru 384/96 tat-22 ta' Diċembru 1995 dwar il-protezzjoni kontra l-importazzjoni bl-iskop ta' dumping minn pajjiżi li mhumiex Membri tal-Komunità Ewropea (ir-"Regolament Bażi") [2], Wara li kkunsidra l-proposta li għamlet il-Kummissjoni fuq parir tal-Kumitat Konsultattiv, Billi: A. MIŻURI EŻISTENTI (1) Il-Kunsill, bir-Regolament (KE) Nru 1784/2000 tal-11 ta' Awissu 2000 impona dazju definittiv kontra d-dumping fuq l-importazzjoni ta' ċerti aċċessorji ta' tubi jew pajpijiet tal-ħadid fondut malleabbli li jkunu ġejjin mill-Brażil, ir-Repubblika Ċeka, il-Ġappun, ir-Repubblika tal-Poplu taċ-Ċina, ir-Repubblika tal-Korea u t-Tajlandja (ir-"Regolament Definittiv") [3]. Ir-Regolament Definittiv kien ippreċedut mir-Regolament tal-Kummissjoni (KE) Nru 449/2000 tat-28 ta' Frar 2000 li jimponi dazju proviżorju kontra d-dumping fuq l-importazzjoni ta' ċerti aċċessorji ta' tubi jew pajpijiet tal-ħadid fondut malleabbli li jkunu ġejjin mill-Brażil, ir-Repubblika Ċeka, il-Ġappun, ir-Repubblika tal-Poplu taċ-Ċina, ir-Repubblika tal-Korea u t-Tajlandja u li jagħti għarfien lill-impenn imwiegħed minn manifattur fir-Repubblika Ċeka tal-prodott għall-esportazzjoni (ir-"Regolament Proviżorju") [4]. B. IR-RAPPORTI ADOTTATI MILL-KORP TA' KONĊILJAZZJONI TAL-WTO (2) Fit-18 ta' Awissu 2003, il-Korp ta' Konċiljazzjoni (id-"DSB") tal-WTO adotta rapport tal-Korp ta' l-Appell (l-Appellate Body Report, l-"ABR") u rapport tal-Panel (il-Panel Report, il-"PR") kif modifikat mill-ABR dwar il-każ "Il-Komunitajiet Ewropej (KE) – id-dazji kontra d-dumping fuq aċċessorji ta' tubi jew pajpijiet tal-ħadid fondut malleabbli mill-Brażil" [5] (l-ABR u l-PR hawnhekk iżjed 'il quddiem huma msejħa r-"Rapporti"). (3) Ir-Rapporti għamlu sejħa lill-Komunitajiet Ewropej biex il-miżura jġibuha konformi mal-Ftehim tal-WTO dwar l-Implimentazzjoni ta' l-Artikolu VI tal-Ftehim Ġenerali dwar it-Tariffi u l-Kummerċ 1994 (l-"ADA") fir-rigward ta' l-aspetti li ġejjin: (i) l-Artikolu 2.4.2 ta' l-ADA: fit-"tnaqqis għal żero" tal-marġni negattivi tad-dumping fir-risoluzzjoni tiegħu dwar id-dumping. (ii) l-Artikoli 12.2 u 12.2.2 ta' l-ADA: fejn fir-risoluzzjonijiet proviżorji jew definittivi ppubblikati ma tkunx ingħatat notifika tal-fatt li l-Komunitajiet Ewropej ġibdu l-attenzjoni dwar, jew spjegaw, in-nuqqas tas-sinifikat tal-fatturi inġurjużi li ġejjin, elenkati fl-Artikolu 3.4 ta' l-ADA: il-pagi, il-produttività, ir-rendiment ta' l-investiment, il-fluss ta' flus in-negozju, il-fakultà tal-ġbir ta' kapital u l-kobor tal-marġni effettiv tad-dumping. (iii) l-Artikolu 6.2 u 6.4 ta' l-ADA: fejn matul l-istħarriġ kontra d-dumping ma jkunx ġie żvelat lill-partijiet involuta t-tagħrif dwar il-fatturi inġurjużi elenkati fil-punt (ii) hawn fuq. (4) Il-Kummissjoni eżaminat mill-ġdid is-sejbiet billi qieset ir-rakkomandazzjonijiet li jidhru fir-Rapporti a bażi tat-tagħrif li nġabar fl-istħarriġ oriġinali li kien sar fl-1999/2000. Jekk ma jiġix iddikjarat mod ieħor l-eżami li sar, imsemmi fir-Regolament Definittiv, jibqa' validu. L-eżami li reġa' sar juri li d-dumping inġurjuż għadu jeżisti għalkemm f'livell kemmxejn aktar baxx. C. IL-PROĊEDURA (5) Wara l-adozzjoni ta' l-ABR mid-DSB il-partijiet involuta f'dan il-proċediment, jiġifieri l-manifattur Brażiljan tal-prodott għall-esportazzjoni u l-industrija Komunitarja (l-"IK"), irċevew l-iżvelar tal-fatti u l-kunsiderazzjonijiet tal-kalkolu tad-dumping u l-fatturi inġurjużi msemmija taħt il-premessa 3(ii). Il-partijiet kollha ġew mgħarrfa bil-fatti u l-kunsiderazzjonijiet essenzali li a bażi tagħhom il-ħsieb kien li jiġi emendat u kkonfermat ir-Regolament Definittiv. Huma ġew mogħtija wkoll perjodu li fih setgħu jagħmlu r-rappreżentazzjonijiet wara dan l-iżvelar. Il-partijiet involuta kollha ġew mogħtija l-opportunità li jinstemgħu mill-Kummissjoni. Madankollu, ħadd mill-partijiet involuta ma talab seduta għal dan is-smigħ. (6) Kull kumment li tressaq mill-partijiet involuta ġie kkunsidrat u, fejn kien xieraq, ġie rifless fl-osservazzjonijiet kif emendati. (7) Wieħed irid jiftakar li l-istħarriġ dwar id-dumping kopra l-perjodu mill-1 ta' April 1998 sal-31 ta' Marzu 1999 (il-Perjodu ta' l-Investigazzjoni, il-"PI"). L-istħarriġ irrelatat ma' l-andamenti rilevanti fil-kuntest ta' l-eżami tal-ħsarat kopra l-perjodu mill-1 ta' Jannar 1995 sa tmiem il-PI (jiġifieri l-31 ta' Marzu 1999). Dan il-perjodu sejjer jissejjaħ il-"perjodu kkunsidrat". D. OSSERVAZZJONIJIET EMENDATI U KKONFERMATI 1. IL-PRODOTT LI QED JISSEMMA HAWNHEKK U PRODOTT SIMILI (8) Il-prodott ikkonċernat jikkonsisti f'aċċessorji kkaminati ta' tubi jew pajpijiet tal-ħadid fondut malleabbli li jeħlu bil-kamin u li jinbiegħu taħt il-kodiċi tan-NM 73071910 (in-numri tal-kodiċi TARIC 7307191011 u 7307191019). Ir-Rapporti ma jeffettwawx l-osservazzjonijiet li jidhru fir-Regolament Definittiv fir-rigward tal-prodott li qed jisemma hawnhek u prodott simili. 2. ID-DUMPING 2.1. Daħla (9) Dawn li ġejjin huma d-dettalji bbażati fuq ir-rakkomandazzjonijiet tar-Rapporti dwar l-osservazzjonijiet li reġgħu ġew eżaminati li għandhom x'jaqsmu mal-prattika tat-"tnaqqis għal żero" meta tiġi stabbilita l-medja meqjusa (li tqis il-kwantitajiet u l-valur tagħhom) tal-marġni tad-dumping. (10) Il-metodi l-oħra kollha li huma applikati biex isiru l-kalkoli huma dawk użati fl-istħarriġ oriġinali. Għal aktar dettalji, qed issir referenza għar-Regolament Proviżorju, u d-Definittiv. 2.2. Il-Brażil (11) Wieħed irid jiftakar li fiż-żmien ta' l-istħarriġ oriġinali l-Indústria de Fundição Tupy Ltda kienet il-produttur waħdieni fil-Brażil magħruf li kien qed jesporta l-prodott ikkonċernat. (12) Rigward l-osservazzjonijiet li għandhom x'jaqsmu mal-valur normali, il-prezz ta' l-esportazzjoni u l-aġġustamenti li saru skond l-Artikolu 2(10) tar-Regolament Bażi, ma kienx meħtieġ li jkun hemm bdil. Għal aktar dettalji, qed issir referenza għall-premessi 20 sa 31 u 35 sa 49 tar-Regolament Proviżorju msemmi hawn fuq u għall-premessi 24 sa 27, 30, 31, 38 sa 43, 46 sa 48 u 51 sa 54 ta' dak Definittiv. (13) Kif hemm fir-Regolamenti, il-Proviżorju u d-Definittiv, il-medja meqjusa tal-valuri normali ta' kull xorta ta' prodott ikkonċernat esportat lejn il-Komunità Ewropea kienet ipparagunata mal-medja meqjusa tal-prezz ta' l-esportazzjoni ta' kull xorta ta' prodott korrispondenti kkonċernat. B'konformità mar-rakkomandazzjonijiet tar-Rapport, ma ġiex applikat xi "tnaqqis għal żero" fil-kalkolu tal-marġni tad-dumping inġenerali. (14) Il-marġni rrivedut tad-dumping espress bħala perċentwal tal-prezz tal-cif (il-"cost, insurance, freight", l-ispiża, l-assigurazzjoni u l-ġarr) ta' l-importazzjoni fuq il-fruntiera Komunitarja hija: Indústria de Fundição Tupy Ltda: 32 %. (15) Il-livell ta' kooperazzjoni kien wieħed għoli. B'hekk, il-marġni residwu rrivedut tad-dumping huwa ffissat fl-istess livell bħal dak ta' l-Indústria de Fundição Tupy Ltda, jiġifieri 32 %. 2.3. L-iżvelar (16) L-osservazzjonijiet dwar id-dumping ta' hawn fuq li ġew irriveduti bla ħsara għall-istħarriġ ta' bħalissa ġew żvelati lill-partijiet kollha involuta li ngħataw il-possibbiltà li jressqu l-fehmiet u l-kummenti tagħhom u li jinstemgħu mill-Kummissjoni. (17) Ħadd mill-partijiet ikkonċernati ma sab oġġezzjoni għall-osservazzjonijiet tal-Kummissjoni dwar id-dumping. 3. ID-DEFINIZZJONI TA' L-INDUSTRIJA KOMUNITARJA (18) L-osservazzjonijiet li jikkonċernaw id-definizzjoni ta' l-IK, miġbura fil-qosor fil-premessi 65 sa 68 tar-Regolament Definittiv, mhumiex qed jiġu effettwati mir-rakkomandazzjonijiet u l-konklużjonijiet li jidhru fir-Rapporti. 4. IL-ĦSARA 4.1. L-importazzjoni mill-pajjiżi kkonċernati u l-kwotazzjoni ta' prezzijiet baxxi (19) L-osservazzjonijiet li jidhru fil-premessi 69 sa 94 tar-Regolament Definittiv mhux qed jiġu effettwati mir-rakkomandazzjonijiet tar-Rapporti. 4.2. Il-qagħda ta' l-industrija Komunitarja 4.2.1. Rimarka preliminari (20) Din il-parti turi l-osservazzjonijiet li ġew eżaminati mill-ġdid a bażi tar-rakkomandazzjonijiet tar-Rapporti li jikkonċernaw l-analasi tal-ħsara. Ir-Rapporti jikkonkludu li l-Komunità aġixxiet b'mod inkonsistenti ma' l-Artikoli 12.2 u 12.2.2 ta' l-ADA billi fir-risoluzzjonijiet proviżorji jew definittivi ppubblikati ma tatx notifika tal-fatt li l-Komunitajiet Ewropej ġibdu l-attenzjoni dwar, jew spjegaw, in-nuqqas tas-sinifikat tal-fatturi inġurjużi li ġejjin, elenkati fl-Artikolu 3.4 ta' l-ADA: il-pagi, il-produttività, ir-rendiment ta' l-investiment, il-fluss ta' flus in-negozju, il-fakultà tal-ġbir ta' kapital u l-kobor tal-marġni effettiv tad-dumping. Wieħed irid jiftakar li dawn il-fatturi inġurjużi ġew eżaminati waqt l-istħarriġ oriġinali. Madankollu, peress li dak iż-żmien kienu meqjusa li mhumiex sinifikanti, u għalhekk ma ġewx inklużi fl-analasi li tressqet għad-disposizzjoni tal-pubbliku, dawn ġew stipulati biss f'nota interna mal-fajl. 4.2.2. Il-qagħda ta' l-industrija Komunitarja kif imfissra fir-Regolamenti, il-Proviżorju u d-Definittiv (21) Wieħed irid jiftakar li fil-premessi 160 sa 161 tar-Regolament Proviżorju ġie konkluż li l-IK sofriet ħsara materjali fis-sens ta' l-Artikolu 4(1) tar-Regolament Bażi. Instab li l-qagħda ta' l-IK ħżienet waqt il-PI, b'mod partikolari minħabba waqgħa fil-produzzjuni, il-kapaċità tal-produzzjoni, il-bejgħ u s-sehem fis-suq. Barra dan, l-IK sofriet telf sinifikanti ta' impjiegi u waqgħa fl-investiment, kif ukoll żieda fil-ħażniet. Għal dik li hija l-utilizzazzjoni tal-kapaċità, iż-żieda tagħha hija spjegata mit-tnaqqis fil-kapaċità tal-produzzjoni. 4.2.3. L-eżami mill-ġdid ta' l-osservazzjonijiet tal-ħsarat fid-dawl tar-rakkomandazzjonijiet u d-deċiżjoni tad-DSB (22) Barra l-fatturi inġurjużi kif murija fil-premessi 150 sa 159 tar-Regolament Proviżorju, jiġifieri l-produzzjoni, il-kapaċità tal-produzzjoni, l-utilizzazzjoni tal-kapaċità, il-volum tal-bejgħ, is-sehem fis-suq, il-prezzijiet ta' l-oġġetti mibjugħa, il-ħażniet, ir-rata tal-qligħ, l-impjiegi u l-investiment, il-fatturi inġurjużi li ġejjin ġew analizzati, u, fuq ir-rakkomandazzjonijiet tar-Rapporti, qed jiġu mfissra fid-dettal hawn taħt. 4.2.3.1. Il-pagi (23) Il-kambjament fil-pagi, espressi bħala l-ispiża annwali totali tal-fattura fil-produzzjoni ta' l-oġġett ikkonċernat, kien kif ġej: Tabella 1 Il-pagi L-għajn tat-tagħrif: Il-kontijiet annwali ta' l-IK. | 1995 | 1996 | 1997 | 1998 | Il-PI | L-ispiża annwali totali tal-fattura (EUR '000) | 44730 | 48479 | 48375 | 46995 | 47132 | Indiċi | 100 | 108 | 108 | 105 | 105 | (24) Il-pagi żdiedu b'madwar 5 % bejn l-1995 u l-PI. Meta l-1996 tittieħed bħala l-punt tat-tluq, il-pagi naqsu b'madwar 3 %. (25) Dan il-fattur ġej bejn wieħed u ieħor mill-kambjament fil-pagi inġenerali fil-qasam u miċ-ċaqliq fl-impjiegi osservat fl-IK. Bejn l-1996 u l-PI dan il-fattur waqa' bi 3 % u dan kien konformi mal-kambjamenti fl-impjiegi msemmija fil-premessa (158) tar-Regolament Proviżorju (tnaqqis ta' 6 % bejn l-1995 u l-PI, waqgħa żgħira ta' madwar 1 % bejn l-1996 u l-PI). 4.2.3.2. Il-produttività (26) Il-kambjament fil-produttività, imkejla fuq ir-rata tal-produzzjoni tal-persuni impjegati, kien kif ġej: Tabella 2 Il-produttività L-għajn tat-tagħrif: It-tweġibiet ta' kwestjonarju ta' l-IK li ġew ivverifikati. | 1995 | 1996 | 1997 | 1998 | Il-PI | Il-produzzjoni f'tunnellati metriċi kull impjegat | 21,58 | 19,47 | 19,76 | 20,84 | 20,82 | Indiċi | 100 | 90 | 92 | 97 | 96 | (27) Il-produttività telgħet u niżlet tul il-perjodu li ġie eżaminat iżda b'kollox iġġarbet waqgħa ta' 4 % tul il-perjodu ta' l-1995 u l-PI. Il-produttività żdiedet b'madwar 7 % bejn l-1996 u l-PI. Dan il-fattur huwa konformi maċ-ċifri ta' l-impjiegi u l-produzzjoni li ġa ġew imsemmija fil-premessi 150 u 158 tar-Regolament Proviżorju. 4.2.3.3. Ir-rendiment ta' l-investiment (ir-return on investment, ir-"ROI") (28) Il-kambjament fir-ROI, li huwa kkalkulat billi jiġi diviż ir-riżultat finanzjarju ta' l-IK (il-qligħ jew it-telf) bl-ammont ta' l-investiment, kien kif ġej: Tabella 3 Ir-ROI L-għajn tat-tagħrif: It-tweġibiet ta' kwestjonarju ta' l-industriji komunitarji li ġew ivverifikati u l-kontijiet annwali tagħhom. | 1995 | 1996 | 1997 | 1998 | Il-PI | Ir-ROI | – 6,55 % | 3,72 % | – 2,78 % | – 0,70 % | – 2,72 % | (29) Ir-ROI inbidel minn -6,55 % għal -2,72 % bejn l-1995 u l-PI. Madankollu wieħed irid jiftakar, li, kif spjegat fil-premessa 157 tar-Regolament Proviżorju, ir-riżultat finanzjarju ta' l-IK ġie effettwat b'mod negattiv u b'manjiera eċċezzjonali mill-ispejjeż assoċjati ma' l-għeluq ta' impjant fl-1995. Barra dan, dik is-sena kienet ukoll ikaratterizzata mill-isforzi biex jiġu rristrutturati żewġ produtturi inklużi fid-definizzjoni ta' l-IK, b'mod partikolari bl-għan tar-razzjonalizzazzjoni tal-produzzjoni u ta' l-investiment meħtieġ biex tiġi implimentata l-leġislazzjoni Komunitarja dwar l-ambjent. Dan ħalla wkoll impatt negattiv fuq ir-riżultat finanzjarju ta' l-IK. A bażi ta' dan, huwa meqjus li s-sena 1995 ma kinitx rappreżentattiva tal-qagħda ta' l-IK u ma tistax titqies bħala bażi b'tifsira biex jiġu analizzati l-andamenti tar-ROI. (30) Din ir-rimarka tgħodd ukoll għal fatturi inġurjużi oħrajn li jinkludu r-riżultati finanzjarji ta' l-IK, p.e. il-fluss ta' flus in-negozju kif spjegat fil-premessa 33 hawn taħt. (31) Meta l-1996 titqabbel mal-PI, ir-ROI naqas b'6,4 fil-mija, minn 3,72 % għal -2,72 %. Il-biċċa l-kbira tal-bidla negattiva fir-ROI kienet konformi mal-bidla negattiva fir-rata tal-qligħ, li naqset bi 2,3 fil-mija matul l-istess perjodu. 4.2.3.4. Il-fluss ta' flus in-negozju (32) Il-kambjament fil-fluss ta' flus in-negozju kien kif ġej: Tabella 4 Il-fluss ta' flus in-negozju L-għajn tat-tagħrif: Il-kontijiet annwali ta' l-IK. | 1995 | 1996 | 1997 | 1998 | Il-PI | Il-fluss ta' flus in-negozju (EUR '000) | 10522 | 12799 | 19339 | 12236 | 12205 | Indiċi | 100 | 122 | 184 | 116 | 116 | Indiċi | | 100 | 151 | 96 | 96 | (33) Ta' min jinnota li l-bejgħ tal-prodott ikkonċernat dejjem kien jgħodd 'il fuq minn 50 % tal-bejgħ totali ta' l-attività kollha ta' l-IK, kif irrapportat fil-kontijiet ivverifikati. It-tabella ta' hawn fuq turi l-fluss ta' flus in-negozju għall-prodott ikkonċernat ikkalkulat a bażi ta' allokazzjoni tal-bejgħ għas-snin mill-1995 sa l-1998. Peress li l-kontijiet ivverifikati ma kinux disponibbli għall-PI, il-fluss ta' flus in-negozju ġie kkalkulat a bażi tal-bejgħ totali u l-bejgħ tal-prodott ikkonċernat li ġie ivverifikat matul l-istħarriġ. Kif spjegat fil-premessa (29), ir-riżultat finanzjarju miksub mill-IK fl-1995 ġie effetwat b'mod negattiv u b'manjiera eċċezzjonali mill-ispejjeż assoċjati ma' l-għeluq ta' impjant u r-ristrutturar u għalhekk dik is-sena ma tistax titqies bħala bażi rappreżentativa b'tifsira biex jiġu analizzati l-andamenti tal-fluss ta' flus in-negozju. Bejn l-1995 u l-1998 il-fluss ta' flus in-negozju żdiet b'madwar 16 % u baqa' stabbli matul il-PI. Meta l-1996 tittieħed bħala l-punt tat-tluq il-fluss ta' flus in-negozju naqas b'madwar 4 % sa tmiem il-PI. Instab, li l-biċċa l-kbira tal-kambjament negattiv fil-fluss ta' flus in-negozju kien konformi mal-kambjament negattiv fir-rata tal-qligħ. 4.2.3.5. Il-fakultà tal-ġbir ta' kapital (34) Matul l-istħarriġ oriġinali ma kienx hemm xi pretensjoni mill-IK (lanqas xi indikazzjoni), li ltaqgħet ma' xi problemi biex tiġbor il-kapital meħtieġ għall-attività tagħha. Madankollu, jidher biċ-ċar li d-deterjorament sinifikanti fil-qagħda finanzjarja ta' l-IK (ara b'mod partikolari r-rata tal-qligħ, il-fluss ta' flus in-negozju u r-ROI), jista' jeffettwa b'mod negattiv il-fakultà tal-ġbir ta' kapital fil-futur qarib. 4.2.3.6. Il-kobor tal-marġni effettiv tad-dumping (35) Għal dak li għandu x'jaqsam ma' l-impatt fuq l-IK tal-kobor tal-marġni effettiv tad-dumping, meta jitqiesu l-volum u l-prezzijiet ta' l-importazzjoni mill-pajjiżi kkonċernati, dan l-impatt ma jistax jingħadd li huwa negliġibbli. Din l-osservazzjoni għadha tgħodd minkejja t-tnaqqis fil-marġni tad-dumping għal wieħed mill-esportaturi kif spjegat fil-premessa 14. (36) Il-manifattur Brażiljan tal-prodott għall-esportazzjoni oġġezzjona għall-osservazzjoni tal-Kummissjoni li l-impatt tal-kobor tal-marġni effettiv tad-dumping ma kienx negliġibbli. Skond il-produttur Brażiljan, id-differenza ta' kważi 50 % bejn il-marġni tad-dumping u l-marġni tal-bejgħ bi prezz imraħħas kien prova ta' differenza kbira ħafna f'kemm jiġi jqum ix-xogħol tal-produtturi tal-Komunità minn banda u dak ta' l-esportatur Brażiljan mill-banda l-oħra. Għalhekk, saret il-pretensjoni li anka jekk id-dumping jiġi eliminat totalment l-importazzjoni mill-Brażil xorta tibqa' b'mod sostanzjali taħt il-prezz mhux inġurjuż ta' l-industrija Komunitarja. Il-manifattur Brażiljan tal-prodott għall-esportazzjoni fl-aħħar sostna li fil-kuntest ta' suq sensittiv ħafna għall-prezzijiet, jidher bic-ċar li l-impatt tal-marġni effettiv tad-dumping huwa għaldaqstant negliġibbli, kuntrarju għall-osservazzjonijiet tal-Kummissjoni. (37) Wieħed irid jiftakar li skond l-Artikolu 3(5) tar-Regolament Bażi, il-fattur tal-"kobor tal-marġini effettiv tad-dumping" jiġi eżaminat fil-kwadru ta' l-analasi ta' l-istat li tkun fih l-industrija tal-pajjiż. F'dan il-kuntest, hija l-prattika konsistenti tal-Komunità li tiffissa l-marġni effettiv tad-dumping skond l-istat li tkun fih l-industrija tal-pajjiż wara li jitqiesu l-volum u l-prezzijiet ta' l-importazzjoni mill-pajjiż ikkonċernat. Analasi bħal dak ipproponut mill-esportatur Brażiljan, jiġifieri paragun tal-marġni tad-dumping mal-marġni tal-bejgħ bi prezz imraħħas li jwassal għal konklużjonijiet dwar id-differenza f'kemm tiġi tqum il-produzzjoni bejn il-produtturi li jesportaw u l-industrija Komunitarja joħroġ bil-bosta 'il barra mill-kwadru stabbilit mill-Artikolu 3(5) tar-Regolament Bażi u jdaħħal element ta' rabta kawżali f'dan l-analasi. Jidher biċ-ċar li dan mhux meħtieġ mill-Artikolu 3(5) tar-Regolament Bażi u jxejjen id-distinzjoni bejn l-analasi ta' l-istat li tkun fih l-industrija Komunitarja minn banda u r-rabta kawżali bejn id-dumping u l-ħsara mill-banda l-oħra, fejn kull każ għandu jiġi kkunsidrat separatament. F'dan il-kuntest għandu jingħad ukoll li l-marġni tal-bejgħ bi prezz imraħħas jiġi kkalkulat għall-fini ta' l-applikazzjoni tar-"regola ta' l-anqas dazju" li fuqha jiġi ffissat id-dazju kontra d-dumping fil-livell jew tal-marġni tad-dumping jew tal-marġni inġurjuż skond liema minnhom ikun l-aktar baxx. Irid jiġi enfasizzat li l-applikazzjoni tar-"regola ta' l-anqas dazju" u għaldaqstant il-kalkolu tal-marġni tal-bejgħ bi prezz imraħħas mhuwiex xi obbligu tal-WTO. Anka jekk wieħed jassumi - għall-grazzja ta' l-argument u bla ma jingħata għarfien lis-sustanza tal-pretensjoni ta' l-esportatur Brażiljan - li paragun bejn kemm jiġi jqum ix-xogħol tal-produttur li jesporta u l-produtturi tal-Komunitàhuwa possibbli f'dan il-kuntest, dan l-analasi seta' jissejjes biss fuq paragun tal-marġni tad-dumping mal-marġni tal-kwotazzjonjiet ta' prezzijiet baxxi (mhux dak tal-bejgħ bi prezzijiet imraħħsa). Madankollu l-livelli taż-żewġ marġni huma paragunabbli. Għalhekk, mingħajr id-dumping, id-differenza fil-prezzijiet bejn l-importazzjoni mill-Brażil u l-bejgħ ta' l-industrija Komunitarja hija waħda minimali. (38) Għalhekk, l-argument kellu jitwarrab. 4.2.4. Il-kummenti tal-manifattur tal-prodott għall-esportazzjoni fuq ċerti fatturi inġurjużi (39) Saret pretensjoni mill-manifattur Brażiljan tal-prodott għall-esportazzjoni li għal ċerti fatturi inġurjużi (ir-rata tal-qligħ, ir-ROI, il-fluss ta' flus in-negozju, il-fakultà tal-ġbir tal-kapital) is-sena 1995 ma ġietx ikkunsidrata fl-analasi ta' l-andamenti. Il-pretensjoni kienet tgħid li ma ngħatax kas ta' l-1995 għal dawk il-fatturi li b'mod ieħor kienu juri kambjament pożittiv. Skond il-manifattur Brażiljan tal-prodott għall-esportazzjoni dan kollu jikkostitwixxi teknika inkonsistenti u diskriminatorja u ma jissodisfax il-ħtieġa ta' xi skop u huwa eżami preġudikat kuntrarju għall-Artikoli 3.1 u 17.6 (i) ta' l-ADA. (40) L-ewwelnett irid jingħad, li fir-rigward tar-rata tal-qligħ, ma kinitx saret xi risoluzzjoni ġdida għall-fini ta' l-implimentazzjoni tar-Rapporti. Wieħed irid jiftakar li fl-ambitu tal-proċeduri ta' konċiljazzjoni, il-Brażil ippreżenta preċiżament l-istess argumenti bħal dawk imsemmija hawn fuq għal dik li hija r-rata tal-qligħ. L-argumenti ma kinux intlaqgħu mill-Panel u ma saret l-ebda rakkomandazzjoni fir-rigward ta' dan il-fattur. Il-fattur tar-"rata tal-qligħ" kien għalhekk ma reġax ġie eżaminat. (41) It-tieni, irid jingħad li - b'konformità ma' l-istħarriġ oriġinali - l-andamenti fir-rigward ta' l-indikaturi inġurjużi li ġew analizzati imma li ma tħabbrux pubblikament matul l-istħarriġ oriġinali, ġew analizzati sa mill-1995. Dan jgħodd ukoll għall-fattur tal-"fakultà tal-ġbir ta' kapital". B'mod partikolari għal żewġ fatturi inġurjużi (ir-ROI u l-fluss ta' flus in-negozju) ġie kkunsidrat li s-sena 1995 kienet sena eċċezzjonali u għaldaqstant ma setgħetx titqies li għandha xi tifsira għar-raġunijiet li ngħataw fid-dettal fil-premessi 29 u 33. Fill-fatt bosta rapporti tal-Panel u tal-Korp ta' l-Appell jirrikonoxxu li l-eżami tal-fatturi inġurjużi mhux ristrett għal xi paragun riġidu ta' bidu u ta' tmiem snin il-perjodu kkunsidrat. Irid jingħad ukoll li l-manifattur Brażiljan tal-prodott għall-esportazzjoni ma kkontestax is-sustanza tar-raġunament imfisser fil-premessa 29. (42) Dwar l-allegata inkonsistenza fit-teknika, irid jingħad dan li ġej. Huwa proprju għal raġunijiet ta' konsistenza ma' l-analasi ta' l-istħarriġ oriġinali, li huwa meħtieġ - għall-fini ta' l-implimentazzjoni tar-Rapporti – li l-fluss ta' flus in-negozju u r-ROI, li jinħarġu direttament mir-rata tal-qligħ, jiġu analizzati fuq l-istess bażi bħar-rata tal-qligħ ta' l-istħarriġ oriġinali li għalihom l-1995 tista' bir-raġun tiġi eskluża mill-analasi ta' l-andamenti skond il-konklużjonijiet tar-Rapporti. It-teknika magħżula mill-awtoritajiet tal-KE kienet għalhekk konsistenti u oġġettiva (43) Għalhekk, l-argumenti kellhom jitwarrbu. 4.2.5. Il-konklużjoni fuq il-ħsara (44) A bażi ta' l-analasi ta' hawn fuq, qed jiġi konkluż li l-osservazzjonijiet dwar il-pagi, il-produttività, ir-rendiment ta' l-investiment u l-fluss ta' flus in-negozju kienu konformi ma' ċerti fatturi oħra li ġew analizzati u tħabbru pubblikament matul l-istħarriġ oriġinali. Fir-rigward tal-fakultà tal-ġbir ta' kapital, ma kinitx saret xi pretensjoni li l-IK iltaqgħet ma' xi diffikultà biex tiġbor il-kapital meħtieġ għall-attività tagħha. Madankollu, wieħed għandu jħares lejn dan il-fattur fid-dawl tad-degradazzjoni kontinwa fil-qagħda finanzjarja ta' l-IK. Fir-rigward tal-marġni tad-dumping, qed jiġi konkluż li, meta jitqiesu l-volum u l-prezzijiet ta' l-importazzjoni mill-pajjiżi kkonċernati, l-impatt tiegħu ma jistax jingħadd li huwa negliġibbli. (45) A bażi ta' dak li ngħad hawn fuq, qed jiġi kkonfermat li l-industrija Komunitarja sofriet ħsara materjali matul il-perjodu li ġie kkunsidrat. 5. IL-KAWŻALITÀ (46) Il-kontenut u l-konklużjnijiet milħuqa fil-premessi 101 sa 114 tar-Regolament Definittiv mhumiex qed jiġu effettwati mir-Rapporti u mill-analisi tal-ħsara li reġgħet ġiet eżaminata. (47) L-esportatur Brażiljan jikkontendi li l-ħsara lill-industrija Komunitarja ma ġietx ikkaġunati mill-importazzjoni bl-iskop ta' dumping, imma min-nuqqas ta' produttività fl-industrija Komunitarja kif tixhed id-differenza ta' kważi 50 % bejn il-marġni tad-dumping u l-marġni tal-bejgħ bi prezz baxx u mill-fatt li saru sforzi fl-1995 biex l-industrija Komunitarja tgħaddi minn ristrutturazzjoni bl-għan li tiġi rrazzjonalizzata l-produzzjoni. Ix-xebh ta' dan l-argument ma' dak li sar fir-rigward tal-kobor tal-marġni effettiv tad-dumping imsemmi hawn fuq fil-premessa 36 huwa evidenti. Barra minn hekk saret il-pretensjoni mill-esportatur Brażiljan li fil-waqt li l-Kummissjoni analizzat id-differenza f'kemm tiġi tqum il-produzzjoni, madankollu rristrinġiet dan l-analasi għad-differenzi li għandhom x'jaqsmu mal-konsum ta' l-enerġija marbuta mad-differenza fil-kwalità u l-proċessi tal-produzzjoni bejn l-aċċessorji ta' qalba sewda u qalba bajda. (48) Wieħed irid jiftakar li fl-ambitu tal-proċeduri ta' konċiljazzjoni, il-Brażil ippreżenta preċiżament l-istess argumenti bħal dawk imsemmija hawn fuq. L-argumenti ma ntlaqgħux mill-Panel u mill-Korp ta' l-Appell u l-ebda rakkomandazzjoni ma saret fir-rigward ta' l-analasi tar-rabta kawżali. (49) Għalhekk, l-argumenti msemmija fil-premessa 47 kellhom jitwarrbu. 6. L-INTERESS TAL-KOMUNITÀ (50) Il-kontenut u l-konklużjonijiet milħuqa fil-premessi 178 sa 186 tar-Regolament Proviżorju u 115 sa 117 tar-Regolament Definittiv mhumiex qed jiġu effettwati mir-Rapporti u mill-analisi tal-ħsara li reġgħet ġiet eżaminata. 7. MIŻURI EMENDATI (51) Kif intwera hawn fuq, verifika sħiħa tal-fatti stabbiliti u l-konklużjonijiet milħuqa fl-istħarriġ oriġinali, wara li tqiesu ir-rakkomandazzjonijiet u d-deċiżjonijiet li dehru fir-Rapporti, tagħti prova li għadu qed isir dumping b'mod inġurjuż b'importazzjoni mill-Brażil, minkejja li f'livell kemmxejn aktar baxx, ADOTTA DAN IR-REGOLAMENT: Artikolu 1 It-tabella fl-Artikolu 1(2) tar-Regolament (KE) Nru 1784/2000 hawnhekk qed tiġi emendata kif ġej għall-prodotti li jkunu ġejjin mill-Brażil: Pajjiż | Dazju definittiv (%) | Il-kodiċi addizzjonali TARIC | Il-Brażil | 32,0 | — | Artikolu 2 Dan ir-Regolament għandu jidħol fis-seħħ l-għada ta' meta ssir il-pubblikazzjoni tiegħu fil-Ġurnal Uffiċjali ta' l-Unjoni Ewropea. Dan ir-Regolament għandu jorbot fl-intier tiegħu u japplika direttament fl-Istati Membri kollha. Magħmul fi Brussel, fit-8 ta' Marzu 2004. F'isem il-Kunsill Il-President D. Ahern [1] ĠU L 201, 26.07.01, p. 10. [2] ĠU L 56, 06.03.96, p. 1. Ir-Regolament kif emendat l-aħħar mir-Regolament (KE) Nru 1972/2002 (ĠU L 305, 07.11.02, p. 1). [3] ĠU L 208, 18.08.00, p. 8. [4] ĠU L 55, 29.02.00, p. 3. [5] Id-Dokument WT/DS219/10 tas-27 ta' Awissu 2003. --------------------------------------------------