32003R1822

Ir-Regolament tal-Kummissjoni (KE) Nru 1822/2003

tas-16 ta' Ottubru 2003

li jemenda r-Regolament (KE) Nru 2760/98 li jikkonċerna l-implimentazzjoni ta' programm ta' kooperazzjoni bejn il-fruntieri fil-qafas tal-programm Phare.

IL-KUMMISSJONI TAL-KOMUNITAJIET EWROPEJ

Wara li kkunsidrat it-Trattat li jistabbilixxi il-Kommunità Ewropea,

Wara li kkunsidrat ir-Regolament tal-Kunsill (KEE) Nru 3906/89 tat-18 ta' Diċembru 1989 dwar għajnuna ekonomika lil ċerti pajjiżi ta' l-Ewropa [1] ċentrali u tal-lvant, kif l-aħħar emendat mir-Regolament (KE) Nru 807/2003 [2], u partikolarment l-Artikolu 8 tiegħu,

Billi:

(1) Il-Kunsill Ewropew ta' Copenhagen tat-12 u 13 ta' Diċembru 2002 ikkonkluda in-negozjati ta' l-adeżjoni ta' Ċipru, ir-Repubblika Ċeka, l-Estonja, l-Ungerija, il-Latvja, il-Lituwanja, Malta, Polonja, l-Islovakkja u l-Islovenja u ffissa d-data ta' l-adeżjoni bħala 1 ta' Mejju 2004. Għalhekk dawk il-pajjiżi li għandhom jissieħbu għandhom jiġu mneħħija mil-lista ta' fruntieri eliġibbli għall-programm Phare ta' kooperazzjoni bejn il-fruntieri.

(2) Il-Kunsill Ewropew ta' Copenhagen adotta pjanijiet imfasslin għall-Bulgarija u r-Rumanija biex jappoġġa l-isforzi ta' dawn iż-żewġ pajjiżi applikanti biex jiksbu l-għanijiet li jissieħbu fl-Unjoni Ewropea fl-2007.

(3) Il-Komunikazzjoni tal-Kummisjoni ta' l-1 ta' Lulju 2003 biex titwitta t-triq għal Mezz ta' Viċinanza [3] ġdid tipproponi, għall-perjodu 2004 sa 2006, l-introduzzjoni ta' programmi ta' viċinanza li jkopru l-fruntieri esterni ta' l-Unjoni kif imkabbra. Konsegwentement il-fruntieri tar-Rumanija u l-Bulgarija ma' pajjiżi ġirien mhux applikanti għandhom jiġu inklużi fil-lista tal-fruntieri eliġibbli.

(4) Ir-Regolament tal-Kunsill (KEE) Nru 2760/98 [4], kif emendat bir-Regolament (KE) Nru 1596/2002 [5], jipprevedi l-estensjoni tal-programm ta' koperazzjoni bejn il-fruntieri għal ma' pajjiżi ġirien oħra li jkunu qegħdin jibbenifikaw minn programmi oħra ta' għajnuna tal-Komunità; huwa xieraq li jiġi estiż il-programm Phare ta' koperazzjoni bejn il-fruntieri biex ikopri wkoll il-fruntiera Bulgara mat-Turkija.

(5) Ir-Regolament (KE) Nru 2760/98 għandu, għalhekk, jiġi emendat kif ġej.

(6) Il-miżuri li hemm provvediment dwarhom f'dan ir-Regolament huma konformi ma' l-opinjoni tal-Kumitat għar-Ristrutturar Ekonomiku f'ċerti pajjiżi ta' l-Ewropa ċentrali u tal-lvant,

ADOTTAT DAN IR-REGOLAMENT:

Artikolu 1

L-Artikolu 2(1) tar-Regolament (KE) Nru 2760/98 jiġi mibdul b' dan li ġej:

"1. Il-fruntieri eliġibbli huma dawk bejn

(a) ir-Rumanija u l-Ungerija, ir-Rumanija u l-Bulgarija, ir-Rumanija u l-Ukrajna, ir-Rumanija u l-Moldova, ir-Rumanija u s-Serbja u Montenegro;

(b) il-Bulgarija u l-Greċja, il-Bulgarija u r-Rumanija, il-Bulgarija u t-Turkija, il-Bulgarija u dik li kienet ir-Repubblika Yugoslava tal-Maċedonja, il-Bulgarija u s-Serbja u Montenegro."

Artikolu 2

Dan ir-Regolament għandu jidħol fis-seħħ fl-1 ta' Jannar 2004.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussel,fis-16 ta' Ottubru 2003.

Għall-Kummissjoni

Günter Verheugen

Membru tal-Kummissjoni

[1] ĠU L 375, 23.12.89, p. 11.

[2] ĠU L 122, 16.05.03, p. 36.

[3] KUM(2003) 393 finali.

[4] ĠU L 345, 19.12.98, p. 49.

[5] ĠU L 240, 07.09.02, p. 33.

--------------------------------------------------