31982R0948

Ir-Regolament tal-Kummissjoni (KEE) Nru 948/82

tas-26 April 1982

li jemenda r-Regolament (KEE) Nru 65/82 li jippreskrivi regoli dettaljati sabiex iz-zokkor jiġi trasferit għas-sena tas-suq ta’ wara

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ekonomika Ewropea,

Wara li kkunsidrat ir-Regolament tal-Kunsill (KEE) Nru 1785/81 tat-30 ta’ Ġunju 1981 dwar l-organizzazzjoni komuni tas-swieq fis-settur taz-zokkor [1], kif l-aħħar emendat bir-Regolament (KEE) Nru 606/82 [2], u partikolarment Artikoli 27(3), 30 (5) u 32 (3) tiegħu,

Billi Artikolu 27 tar-Regolament (KEE) Nru 1785/81 ġie emendat biex jistabbilixxi li l-bidu tal-perjodu tal-ħażna għaz-zokkor li jiġi trasferit għas-sena tas-suq ta’ wara jista’ jvarja skond meta jkun ġie prodott iz-zokkor in kwistjoni; billi, bħala konsegwenza, ir-Regolament tal-Kummissjoni (KEE) Nru 65/82 [3] għandu jiġi emendat;

Billi Artikolu 27(3) tar-Regolament (KEE) Nru 1785/81 jiddisponi li jista’ jiġi impost limitu għall-kwantitajiet ta’ zokkor li jistgħu jiġu trasferiti; billi huwa xieraq li jiġi mpost limitu bħal dan mis-sena tas-suq 1982/83 filwaqt, madankollu, li jsir provvediment biex dan il-limitu jista’ jiġi mibdul skond il-funzjoni li tirregola s-suq ta’ dan ir-reġim; billi, sabiex tkun aktar faċli l-bidla minn reġim mingħajr limiti għal wieħed aktar restrittiv, għandha tiġi stipulata miżura transitorja sabiex tkopri t-trasferiment mis-sena tas-suq 1982/83 għas-sena tas-suq 1983/84;

Billi z-zokkor trasferit jista’ jiġi affettwat bħala riżultat ta’ forza maġġuri, u d-dispożizzjonijiet għandhom għalhekk jiġu supplimentati;

Billi l-Kumitat ta’ Ġestjoni għaz-Zokkor ma tax opinjoni fit-terminu ta’ żmien stipulat mill-president tiegħu,

ADOTTAT DAN IR-REGOLAMENT:

Artikolu 1

Ir-Regolament (KEE) Nru 65/82 qiegħed b’dan jiġi emendat kif ġej:

1. Artikolu 2 qiegħed jiġi sostitwit b’dan li ġej:

"Artikolu 2

1. Impriża tista’ tiddeċiedi li tittrasferixxi z-zokkor għas-sena ta’ wara biss jekk l-Istat Membru nvolut jivverifika li dak iz-zokkor kien ġie prodott bħala zokkor B jew zokkor Ċ.

Din id-deċiżjoni ta’ l-impriża tista’ tapplika biss sa kwantità massima li ma taqbiżx l-20 % tal-kwota A tagħha applikabbli għas-sena tas-suq li matulha z-zokkor in kwistjoni jkun ġie prodott.

Madankollu, impriżi li ddeċidew matul is-sena tas-suq 1981/82 li jittrasferixxu għas-sena tas-suq 1982/83 kwantità li taqbeż il-limitu msemmi fit-tieni subparagrafu jistgħu jiddeċiedu li jittrasferixxu għas-sena tas-suq 1983/84 kwantità massima ekwivalenti għal dik il-kwantità.

Għaz-zokkor in kwistjoni il-perjodu tal-ħażna msemmi f’Artikolu 27(2) tar-Regolament (KEE) Nru 1785/81 għandu jibda fid-data notifikata mill-impriża lill-Istat Membru, sakemm dan ta’ l-aħħar ikun ivverifika li dan iz-zokkor kien ġie prodott qabel dik id-data.

2. Għall-iskopijiet tal-verifika msemmija fil-paragrafu 1 l-Istat Membru għandu:

(a) jgħodd il-kwantitajiet ta’ zokkor ġa trasferiti mis-sena tas-suq preċedenti mal-kwantitajiet ta’ zokkor prodotti matul is-sena tas-suq kurrenti sad-data tad-deċiżjoni rilevanti li jsir it-trasferiment għas-sena ta’ wara; u

(b) inaqqas mit-total imsemmi taħt (a) il-kwantitajiet kollha ta’ zokkor C esportati qabel id-data tad-deċiżjoni rilevanti biex isir it-trasferiment għas-sena ta’ wara u l-kwantitajiet kollha suġġetti għal deċiżjoni biex isir it-trasferiment li tkun ittieħdet fis-sena tas-suq kurrenti.

3. Il-kwantitajiet ta’ zokkor trasferiti għas-sena ta’ wara għandhom jiġu meqjusa bħala l-ewwel zokkor A li jkun ġie prodott matul is-sena tas-suq li għaliha jkunu ġew trasferiti.

4. Meta Stat Membru jieħu azzjoni skond Artikolu 2(6) tar-Regolament tal-Kunsill (KEE) Nru 193/82 [4] jista’, sabiex jilħaq l-għan imsemmi f’dak il-paragrafu, jiddisponi li l-limitu stipulat fit-tieni subparagrafu tal-paragrafu 1 m’għandux japplika għall-impriża li tipproduċi z-zokkor matul is-sena jew snin tas-suq li għalihom parti mill-kwoti tagħha jkunu ġew riallokati lil xi impriża jew impriżi oħra li jipproduċu z-zokkor.

Barra dan, jekk l-impriża li tipproduċi z-zokkor, li parti mill-kwoti tagħha jkunu ġew riallokati lil xi impriza jew impriżi oħra li jipproduċu z-zokkor b’effett minn xi sena tas-suq partikolari skond Artikolu 2(6) tar-Regolament (KEE) Nru 193/82, tkun iddeċidiet qabel dik ir-riallokazzjoni li tittrasferixxi kwantità ta’ zokkor għall-istess sena tas-suq, dik id-deċiżjoni għandha tiġi meqjusa bħala li ttieħdet mill-impriża jew impriżi li jipproduċu z-zokkor u li jkunu bbenefikaw mir-riallokazzjoni tal-kwoti sal-limitu ta’ dawk il-kwoti riallokati."

2. Artikolu 3 qiegħed jiġi sostitwit b’dan li ġej:

"Artikolu 3

1. Bla ħsara għall-paragrafu 3, u fir-rigward tax-xtieli tal-pitravi ħelwin li jkunu ġew ipproċessati fiz-zokkor li ġie trasferit għas-sena ta’ wara, l-impriża nvoluta għandha tħallas prezz mill-inqas ekwivalenti għall-prezz minimu tax-xtieli tal-pitravi ħelwin A fis-seħħ fid-data li jagħlaq il-perjodu obbligatorju ta’ ħażna taz-zokkor in kwistjoni. Dan il-prezz għandu jiġi aġġustat biż-żidiet jew tnaqqis li jikkorrispondu għad-differenzi fil-kwalità mill-kwalità standard.

2. Meta impriża li tkun ħadet deċiżjoni biex tittrasferixxi għas-sena ta’ wara iżda ma tkunx għamlet dan, fir-rigward tax-xtieli tal-pitravi ħelwin proċessati fiz-zokkor trasferit, tkun għamlet ħlas proviżorju li jikkorrispondi għall-prezz minimu tax-xtieli tal-pitravi ħelwinA fis-seħħ matul is-sena tas-suq li fiha jkunu ġew prodotti, dik l-impriża tkun marbuta li taqsam mal-produttur tax-xtieli tal-pitravi ħelwin il-ħlas lura tal-ħażna għall-perjodu msemmi f’Artikolu 27 tar-Regolament (KEE) Nru 1785/81.

Għall-għanijiet ta’ dan it-taqsim għandhom jiġu kkunsidrati dawn li ġejjin:

(a) l-ispejjeż tal-finanzjament li jkun ittieħed kont tagħhom meta ġie stabbilit l-ammont tal-ħlas lura tal-ħażna rilevanti msemmi f’Artikolu 8 tar-Regolament (KEE) Nru 1785/81;

(b) il-perċentwal imsemmi f’Artikolu 29(2) ta’ dak ir-Regolament;

(ċ) il-ġabra li ssir riferenza għaliha f’Artikolu 4(2) ta’ dak ir-Regolament.

3. Bi qbil mal-Istat Membru nvolut, tista’ ssir deroga mid-dispożizzjonijiet tal-paragrafu 1 taħt ftehim ta’ kummerċ flimkien.

Meta jiġi applikat Artikolu 30(3) tar-Regolament (KEE) Nru 1785/81 deroga minn paragrafu 1 ma tistax twassal biex id-dħul totali ta’ xi produttur tax-xtieli tal-pitravi ħelwin ikun inqas minn dak li jirriżulta mill-applikazzjoni ta’ Artikoli 6 u 32 ta’ dak ir-Regolament."

3. Artikolu 4 qiegħed jiġi sostitwit b’dan li ġej:

"Artikolu 4

In-notifika msemmija f’Artikolu 27(2) tar-Regolament (KEE) Nru 1785/81 għandha tinkludi:

(a) dikjarazzjoni mill-impriża nvoluta li z-zokkor li għandu jiġi trasferit għas-sena ta’ wara huwa zokkor B jew Ċ u jkun ser jinħażen fit-tifsira ta’ l-imsemmi Artikolu 27 għall-perjodu li jkun jibda fid-data msemmija taħt (ċ);

(b) il-kwantità, espressa bħala zokkor abjad, ta’ zokkor B jew Ċ li għandha tiġi trasferita għas-sena ta’ wara;

(ċ) id-data li fiha jibda l-perjodu obbligatorju ta’ ħażna;

(d) l-informazzjoni meħtieġa għall-verifika msemmija f’Artikolu 2 ta’ dan ir-Regolament.

L-Istati Membri jistgħu jkunu jeħtieġu aktar informazzjoni."

4. Is- subparagrafu li ġej qed jiġi miżjud ma’ Artikolu 5(2):

"Meta l-Istat Membru nvolut jirrikonoxxi każ ta’ forza maġġuri, il-kwantitajiet ta’ zokkor B u Ċ trasferiti għas-sena ta’ wara li jkunu ġew meqruda jew tħassru għal kollox għandhom, ma’ l-applikazzjoni ta’ l-impriża nvoluta, jiġu meqjusa bħala li ma ġewx trasferiti għas-sena ta’ wara. Fir-rigward ta’ xi zokkor Ċ hekk meqjus, l-Istat Membru għandu jitlob il-ħlas lura ta’ l-ammonti ġà mħallsa bħala rimbors ta’ l-ispejjeż tal-ħażna."

Artikolu 2

Dan ir-Regolament għandu jidħol fis-seħħ fit-tielet jum wara l-pubblikazzjoni tiegħu fil-Ġurnal Uffiċjali tal-Komunitajiet Ewropej.

Għandu japplika b’effett mill-1 Lulju 1982. Dan ir-Regolament għandu jorbot fl-intier tiegħu u jkun direttament applikabbli fl-Istati Membri kollha.

Magħmul fi Brussel,

fis-26 ta’ April 1982.

Għall-Kummissjoni

Poul Dalsager

Membru tal-Kummissjoni

[1] ĠU L 177, ta’ l-1.7.1981, p. 4.

[2] ĠU L 74, tat-18.3.1982, p. 1.

[3] ĠU L 9, ta’ l-14.1.1982, p. 14.

[4] ĠU L 21, tad-29.1.1982, p. 3.

--------------------------------------------------