(1)

An 21 Bealtaine 2003, ghlac an Coimisiún Teachtaireacht chuig an gComhairle agus chuig Parlaimint na hEorpa dar teideal Forest Law Enforcement, Governance and Trade (FLEGT) – Proposal for an EU Action Plan [Forfheidhmiú an Dlí, Rialachas agus Trádáil i dtaca le Foraoisí (FLEGT) – Togra le haghaidh Plean Gníomhaíochta AE] arb é is aidhm di rannchuidiú leis na hiarrachtaí domhanda chun dul i ngleic leis an lománaíocht neamhdhleathach agus leis an trádáil a ghabhann léi. Ghlac an Chomhairle conclúidí maidir le plean gníomhaíochta FLEGT an 13 Deireadh Fómhair 2003 agus ghlac Parlaimint na hEorpa rún ar an ábhar an 11 Iúil 2005 (2).

(2)

Gné lárnach den phlean gníomhaíochta ba ea tabhairt i gcrích comhaontuithe comhpháirtíochta deonaí le tíortha táirgthe adhmaid chun a áirithiú gur táirgeadh agus go bhfuarthas go dleathach adhmad agus táirgí adhmaid a onnmhairíodh chuig an Aontas.

(3)

I gcomhréir le Cinneadh 2011/475/AE ón gComhairle (3), síníodh an Comhaontú Comhpháirtíochta Deonaí idir an tAontas agus Poblacht na Libéire (CCD) i ndáil le forfheidhmiú an dlí agus rialachas i dtaca le foraoisí, agus trádáil táirgí adhmaid isteach san Aontas an 27 Iúil 2011.

(4)

I gcomhréir le Cinneadh 2012/373/AE ón gComhairle (4), tugadh an CCD i gcrích thar ceann an Aontais agus, tar éis do Phoblacht na Libéire é a thabhairt i gcrích, tháinig sé i bhfeidhm an 1 Nollaig 2013.

(5)

Tá tréimhse éiginnte leis an CCD, dá bhforáiltear in Airteagal 28 de. Foráiltear le hAirteagal 29, d’ainneoin Airteagal 28, gur féidir le ceachtar Páirtí an CCD a fhoirceannadh trí fhógra i scríbhinn a thabhairt don Pháirtí eile. Scoirfidh an CCD d’fheidhm a bheith aige 12 mhí tar éis dháta an fhógra sin.

(6)

D’ainneoin an iliomad síntí a beartaíodh a chur leis na hamchláir don chur chun feidhme, níor baineadh amach croíchuspóir an CCD, is é sin scéim ceadúnúcháin FLEGT a bhunú agus a oibríochtú arb é is aidhm di a fhíorú agus a fhianú, trí bhíthin ceadúnas FLEGT, go dtáirgtear nó go bhfaightear go dleathach adhmad agus táirgí díorthaithe a onnmhairítear chuig an Aontas. I bhfianaise staid agus dul chun cinn chur chun feidhme an CCD ó tháinig sé i bhfeidhm an 1 Nollaig 2013, is beag seans go ndéanfar scéim ceadúnúcháin FLEGT a bhunú agus a oibríochtú go hiomlán laistigh de thréimhse ama réasúnta. Dá bhrí sin, creideann an Coimisiún nach bhfágann an CCD go mbeidh adhmad agus táirgí adhmaid ó Phoblacht na Libéire in ann tairbhiú d’fhorálacha Airteagal 3 de Rialachán (AE) Uimh. 995/2010 ó Pharlaimint na hEorpa agus ón gComhairle (5) agus, ón 30 Nollaig 2025 ar aghaidh, d’Airteagal 10(3), i gcomhar le hAirteagal 3, pointe (b), de Rialachán (AE) 2023/1115 ó Pharlaimint na hEorpa agus ón gComhairle (6).

(7)

Is iomchuí, dá bhrí sin, an CCD le Poblacht na Libéire a fhoirceannadh. Chuige sin, i gcomhréir le hAirteagal 29 den CCD, ba cheart don Aontas Eorpach fógra i scríbhinn a thabhairt do Phoblacht na Libéire faoina chinneadh an CCD a fhoirceannadh.

(8)

Ba cheart foirceannadh an CCD a fhormheas thar ceann an Aontais,