1.   Leis an gClár Taighde, tacófar le hiomaíochas na n-earnálacha a bhaineann leis an tionscal guail agus cruach trí thacaíocht a thabhairt do thaighde comhoibríoch a bheidh dírithe ar an tionscal sna hearnálacha sin, lena n-áirítear maidir le feidhmeanna dé-úsáide.

2.   Leis an gClár Taighde, soláthrófar tacaíocht do theicneolaíochtaí ceannródaíocha maidir le cruach ghlan, lena rannchuideofar le cuspóirí na haeráidneodrachta san Aontas agus lena dtreiseofar uathriail straitéiseach an Aontais ar fud an tslabhra luacha cruach. Soláthrófar tacaíocht leis an gClár Taighde freisin do thionscadail taighde chun bainistiú a dhéanamh ar aistriú cóir mianach guail a bhíodh ag feidhmiú roimhe seo nó mianaigh ghuail atá i bpróiseas a ndúnta agus do bhonneagar gaolmhar agus do na réigiúin ina bhfuil siad lonnaithe, go háirithe iad siúd a bhfuil dúshláin shuntasacha shóisialta, eacnamaíocha nó chomhshaoil rompu a eascraíonn as aistriú na n-earnálacha guail agus cruach.

3.   Leis an gClár Taighde, cuirfear luachshocrú agus nuálaíocht chun cinn, lena n-áirítear modhanna nua a thástáil agus a phíolótú, chun ábharthacht margaidh na dtorthaí taighde a fheabhsú agus chun tacú lena n-acmhainneacht maidir le cur in úsáid inscálaithe. Cuirfidh sé réitigh atá inmharthana ó thaobh na tráchtála de agus inscálaithe go tionsclaíoch chun cinn freisin.

4.   Beidh an Clár Taighde comhsheasmhach le cuspóirí polaitiúla, eolaíocha agus teicneolaíocha an Aontais, agus comhlánóidh leis na gníomhaíochtaí a dhéantar sna Ballstáit.

5.   Leis an gClár Taighde, tacófar le sineirgí le cláir ábhartha eile agus le hionstraimí cistiúcháin darb aidhm dlús a chur leis an bhforbairt theicneolaíoch go stádas imlonnaithe.

6.   Leis an gClár Taighde, tacófar le tionscadail taighde atá dírithe ar na cuspóirí a leagtar amach in Airteagal 4 maidir le gual agus in Airteagal 5 maidir le cruach.

1.   Beidh sé d’aidhm ag tionscadail taighde dlús a chur leis an aistriú, faoi 2050, i dtreo geilleagar aeráidneodrach san Aontas, agus é mar chuspóirí leo tacú le deireadh a chur de réir a chéile le breoslaí iontaise, go háirithe gual, agus tacú le hathbheochan shóisialta, eacnamaíoch agus éiceolaíoch na réigiún guail, gníomhaíochtaí malartacha a fhorbairt ar iar-láithreáin mhianaigh agus an damáiste don chomhshaol ó mhianaigh ghuail atá i bpróiseas a ndúnta a sheachaint nó aghaidh a thabhairt air, agus mianaigh ghuail a bhíodh ag feidhmiú roimhe seo agus na réigiúin ina bhfuil mianaigh ghuail lonnaithe.

2.   Tabharfar aird ar leith ar cheannaireacht an Aontais a neartú maidir le bainistiú a dhéanamh ar aistriú, agus ar athrú cuspóra, na mianach guail a bhíodh ag feidhmiú roimhe seo agus ar aistriú bonneagair a bhaineann le gual trí réitigh theicneolaíocha agus neamhtheicneolaíocha, agus tacófar freisin le haistriú teicneolaíochta agus neamhtheicneolaíochta. Gníomhaíochtaí taighde a bhfuil na cuspóirí sin acu, cuirfear ar fáil leo tairbhí nithiúla aeráide agus comhshaoil i gcomhréir le cuspóir na haeráidneodrachta faoi 2050.

3.   Cuirfear san áireamh sna tionscadail taighde saincheisteanna a bhaineann le sábháilteacht i mianaigh ghuail atá i bpróiseas a ndúnta agus i mianaigh ghuail a bhíodh ag feidhmiú roimhe seo d’fhonn feabhas a chur ar dhálaí oibre, ar shábháilteacht agus sláinte ceirde, agus ar shaincheisteanna comhshaoil atá dochrach don tsláinte chomh maith.

4.   Le tionscadail taighde féachfar le deireadh a chur le tionchar na mianach guail atá i bpróiseas a ndúnta agus tionchar na mianach a bhíodh ag feidhmiú roimhe seo ar an aeráid, ar an atmaisféar, ar uisce agus ar ithreacha.

5.   Le tionscadail taighde, déanfar an méid seo a leanas a mheas:

1.   Beidh sé d’aidhm ag tionscadail taighde próisis déanta agus bailchríche cruach ísealcharbóin a fhorbairt, a léiriú agus a fheabhsú d’fhonn cáilíocht táirgí a ardú, táirgiúlacht a mhéadú agus spleáchais straitéiseacha a laghdú.

2.   Díreofar tionscadail taighde ar tháirgí cruach ardfhorbartha, inbhuanaithe agus ísealcharbóin a fhorbairt agus ar mhargaí tosaigh gaolmhara a fhorbairt, ar táirgí agus margaí iad a chomhlíonann riachtanais na n-úsáideoirí cruach agus a laghdaíonn astaíochtaí agus tionchair ar an gcomhshaol an tráth céanna, i gcomhréir le cuspóirí Threoir 2003/87/CE (14), Threoir 2010/75/AE agus Rialachán (AE) 2024/1781 (15) ó Pharlaimint na hEorpa agus ón gComhairle.

3.   Maidir le táirgeadh cruach agus úsáid cruach araon, cumasófar leis na tionscadail taighde caomhnú acmhainní, caomhnú éiceachóras agus an t-aistriú chuig geilleagar ciorclach agus saincheisteanna sábháilteachta.

4.   Le tionscadail taighde, tabharfar aird ar leith ar fhorbairt leanúnach scileanna atá oiriúnaithe d’éabhlóid na hearnála i dtreo próisis nua ghlan-nialasacha carbóin, ar dhálaí oibre a fheabhsú agus ar ardchaighdeáin sláinte agus sábháilteachta agus slite beatha inbhuanaithe a chur chun cinn.

5.   Cuirfidh tionscadail taighde dlús le húsáid teicneolaíochtaí digiteacha, lena n-áirítear an intleacht shaorga agus an mheaisínfhoghlaim, i dtáirgeadh agus in úsáid cruach.

1.   Beidh na nithe seo a leanas in imchlúdach airgeadais an Chláir Taighde don tréimhse ón 1 Eanáir 2027 go dtí an 31 Nollaig 2034:

2.   Déanfar gealltanas maidir le himchlúdach airgeadais an Chláir Taighde ina iomláine trí cheithre chlár oibre lena gcumhdófar na blianta 2027 agus 2028, 2029 agus 2030, 2031 agus 2032, agus 2033 agus 2034. Déanfar foráil sna cláir oibre maidir le glaonna bliantúla ar thograí i gcomhréir le hAirteagal 10.

1.   Féadfaidh aon eintiteas dlítheanach atá bunaithe laistigh de chríoch Ballstáit a bheith rannpháirteach sa Chlár Taighde agus iarratas a dhéanamh ar chúnamh airgeadais.

2.   Féadfaidh aon eintiteas dlítheanach atá bunaithe i dtír is iarrthóir a bheith rannpháirteach sa Chlár Taighde gan aon ranníocaíocht airgeadais a fháil, mura bhforáiltear a mhalairt faoi na Comhaontuithe Eorpacha ábhartha agus a bPrótacail nó i gcinntí na gComhairlí Comhlachais faoi seach.

3.   Féadfaidh aon eintiteas dlítheanach atá bunaithe i dtríú tír a bheith rannpháirteach sa Chlár Taighde ar bhonn tionscadail aonair gan aon ranníocaíocht airgeadais a fháil, ar choinníoll go bhfuil an rannpháirtíocht sin chun leas an Aontais.

1.   Cuirfear an Clár Taighde chun feidhme i gcomhréir le Rialachán (AE, Euratom) 2024/2509, faoi bhainistíocht dhíreach ag an gCoimisiún, trí ghníomhaireachtaí feidhmiúcháin.

2.   Soláthrófar cistiú faoin gClár Taighde i bhfoirm deontas i gcomhréir le Rialachán (AE, Euratom) 2024/2509, cé is moite de chistiú na ngníomhaíochtaí is gá chun an Clár Taighde a bhainistiú go fónta agus go héifeachtach, amhail meastóireacht agus roghnú tograí, faireachán agus measúnú, staidéir, braisliú agus líonrú tionscadal taighde arna gcistiú.

1.   Comhlíonfaidh tionscadail taighde dé-úsáide a dhéantar faoin gClár Taighde na rialacha slándála náisiúnta is infheidhme lena n-áirítear rialacha maidir le faisnéis rúnaicmithe de chuid an Aontais a chosaint ar nochtadh neamhúdaraithe, agus comhlíonfaidh siad aon dlí ábhartha eile de chuid an Aontais agus aon dlí ábhartha náisiúnta eile.

2.   I gcás inar gá, áireofar ar thograí féinmheasúnú slándála lena sainaithneofar aon saincheisteanna slándála agus lena sonrófar an dóigh a dtabharfar aghaidh ar na saincheisteanna sin chun dlí ábhartha an Aontais agus an dlí náisiúnta ábhartha a chomhlíonadh.

3.   I gcás inar gá, déanfaidh an Coimisiún nós imeachta grinnscrúdaithe slándála a chur i gcrích maidir le tograí a bhfuil saincheisteanna slándála ag baint leo. Na heintitis dhlítheanacha atá rannpháirteach i dtionscadal taighde dé-úsáide, áiritheoidh siad go dtabharfar cosaint ar nochtadh neamhúdaraithe aon fhaisnéise rúnaicmithe de chuid an Aontais a úsáidtear leis an ngníomhaíocht nó a ghintear leis an ngníomhaíocht. Soláthróidh siad cruthúnas ar imréiteach pearsanta slándála nó imréiteach slándála saoráide ó na húdaráis slándála náisiúnta ábhartha, sula gcuirfear tús leis na gníomhaíochtaí lena mbaineann.

4.   Má bhíonn ar shaineolaithe seachtracha neamhspleácha déileáil le faisnéis rúnaicmithe de chuid an Aontais, beidh gá leis an imréiteach slándála iomchuí sula gceapfar na saineolaithe sin.

5.   I gcás inarb iomchuí, féadfaidh an Coimisiún seiceálacha slándála a dhéanamh.

6.   Tograí nó gníomhaíochtaí nach gcomhlíonfaidh na rialacha slándála faoin Airteagal seo, déanfar iad a dhiúltú nó a fhoirceannadh tráth ar bith. Cuirfear na Ballstáit ar an eolas faoi fhoirceannadh na dtionscadal taighde dé-úsáide nach gcomhlíonann na rialacha sin.

1.   Foilseofar glaonna ar thograí dhá uair sa bhliain. Beidh ábhar agus foilsiú na nglaonna ar thograí i gcomhréir le hAirteagal 197 de Rialachán (AE, Euratom) 2024/2509.

2.   Bainfidh tograí leis na cuspóirí taighde a leagtar síos in Airteagail 4 agus 5, agus i gcás inarb infheidhme, leis na cuspóirí tosaíochta a liostaítear i gcoinníollacha an ghlao ar thograí.

3.   Chun an slabhra luacha iomlán a chumhdach, dearfar na cláir oibre chun aghaidh a thabhairt ar an raon iomlán de Leibhéil na hUllmhachta Teicneolaí, ó íseal go hard, agus áireofar iontu taighde ón mbun aníos agus tionscadail ar scálaí éagsúla chun rannpháirtíocht raon leathan páirtithe leasmhara a áirithiú.

4.   Tarlóidh na nósanna imeachta roghnúcháin, dámhachtana agus meastóireachta le haghaidh tograí i gcomhréir le hAirteagail 201, 202 agus 203, faoi seach, de Rialachán (AE, Euratom) 2024/2509.

5.   Chun críocha Airteagal 153(3) de Rialachán (AE, Euratom) 2024/2509, beidh an coiste meastóireachta comhdhéanta de shaineolaithe seachtracha neamhspleácha, cé is moite de chásanna a bhfuil údar cuí leo.

1.   Beidh tionscadail atá bunaithe ar thograí roghnaithe ina n-ábhar do chomhaontú deontais. Beidh comhaontuithe deontais i gcomhréir le samhail-chomhaontuithe deontais corparáideacha arna dtarraingt suas ag an gCoimisiún, agus cineál na ngníomhaíochtaí á gcur san áireamh de réir mar is iomchuí.

2.   Cuirfidh na tairbhithe gníomhaíochtaí chun feidhme i gcomhréir leis na coinníollacha agus na hoibleagáidí a leagtar amach sa Chinneadh seo, i Rialachán (AE, Euratom) 2024/2509 agus sa chomhaontú deontais.

1.   Beidh feidhm ag ráta cistiúcháin aonair in aghaidh na gníomhaíochta maidir le gach gníomhaíocht arna cistiú ag an ngníomhaíocht sin. Socrófar an t-uasráta cistiúcháin in aghaidh na gníomhaíochta faoin gClár Taighde i gcoinníollacha an ghlao.

2.   Féadfar suas le 100 % de chostais incháilithe gníomhaíochta faoin gClár Taighde a aisíoc.

Mar sin féin, i gcás eintitis dhlítheanacha ar eintitis bhrabúsacha iad de réir a bhfoirme dlíthiúla nó a bhfuil sé mar chuspóir dlíthiúil nó reachtúil acu brabúis a dháileadh ar a scairshealbhóirí nó ar a gcomhaltaí aonair, féadfar suas le 70 % de na costais incháilithe iomlána in aghaidh na gníomhaíochta faoin gClár Taighde a aisíoc.

D’ainneoin na chéad fhomhíre agus an dara fomhír, i gcás fiontair bheaga agus mheánmhéide, féadfar suas le 100 % de na costais incháilithe iomlána in aghaidh na gníomhaíochta faoin gClár Taighde a aisíoc.

1.   Is é a bheidh i gcostais incháilithe indíreacha 25 % de na costais incháilithe dhíreacha iomlána, seachas na costais incháilithe dhíreacha le haghaidh fochonraitheoireachta, tacaíocht airgeadais do thríú páirtithe agus aon chostas aonaid nó cnapshuim a bhfuil costais indíreacha san áireamh leo.

I gcás inarb iomchuí, déanfar costais incháilithe indíreacha a áirítear i gcostais aonaid nó cnapshuimeanna a ríomh i gcomhréir leis an gcéad fhomhír.

2.   D’ainneoin mhír 1, má dhéantar foráil maidir leis i gcoinníollacha an ghlao, féadfar costais incháilithe indíreacha a dhearbhú i bhfoirm cnapshuime nó i bhfoirm costais aonaid.

1.   De mhaolú ar Airteagal 193(2) de Rialachán (AE, Euratom) 2024/2509, na costais acmhainní a chuireann tríú páirtithe ar fáil trí bhíthin ranníocaíochtaí comhchineáil, beidh siad incháilithe suas le costais incháilithe dhíreacha iomlána an tríú páirtí.

2.   De mhaolú ar Airteagal 195(2) de Rialachán (AE, Euratom) 2024/2509, ní mheasfar ioncam arna ghiniúint ag an luachshocrú a bheith ina ioncam a ghintear leis an ngníomhaíocht.

1.   Maidir le gach tionscadal taighde, déanfaidh na tairbhithe tuarascálacha teicniúla tréimhsiúla a tharraingt suas. Tabharfar tuairisc sna tuarascálacha sin ar an dul chun cinn teicniúil arna dhéanamh le linn na tréimhse tagartha. Roinnfear iad leis an lárionad nuálaíochta um chlaochlú tionsclaíoch agus um astaíochtaí tionsclaíocha arna bhunú de bhun Airteagal 27a de Threoir 2010/75/AE, chun críoch faisnéise.

2.   Nuair a bheidh an obair críochnaithe, cuirfidh na tairbhithe tuarascáil theicniúil chríochnaitheach ar fáil don Choimisiún ina mbeidh measúnú ar thionchar agus ar shaothrú an tionscadail taighde. Foilseoidh an Coimisiún an tuarascáil sin ina hiomláine nó i bhfoirm achoimrithe ag brath ar ábharthacht straitéiseach an tionscadail taighde.

1.   Tar éis an Clár Taighde a thabhairt chun críche, déanfaidh an Coimisiún athbhreithniú deiridh ar ghníomhaíochtaí agus cuirfidh sé a thorthaí i láthair i dtuarascáil. Cuirfear an tuarascáil sin chuig an gCoiste um Ghual agus Cruach.

2.   Féadfaidh an Coimisiún saineolaithe neamhspleácha ardcháilithe a cheapadh chun cabhrú leis an athbhreithniú deiridh ar ghníomhaíochtaí.

1.   Bainisteofar na sócmhainní chun íocaíochtaí bliantúla nó leathbhliantúla a sholáthar laistigh de theorainneacha na leithdháiltí bliantúla chun taighde comhoibríoch sna hearnálacha a bhaineann leis an tionscal guail agus cruach a mhaoiniú. Maoineofar na híocaíochtaí bliantúla nó leathbhliantúla leis an nglanioncam ó na hinfheistíochtaí agus leis na méideanna airgid arna nginiúint trí chuid de na sócmhainní a dhíol, suas le méid na leithdháiltí bliantúla.

2.   Déanfaidh an Coimisiún athbhreithniú ar Airteagail 20 go 26 i gcás ina measann sé gurb iomchuí sin. Chuige sin, déanfaidh an Coimisiún athmheasúnú ar oibriú agus ar éifeachtacht na dtreoirlínte airgeadais agus molfaidh sé leasuithe orthu i gcás ina measfaidh sé gurb iomchuí sin.

1.   Úsáidfear sócmhainní CEGC faoi leachtú, lena n-áirítear a phunann iasachta agus a infheistíochtaí, de réir mar is gá chun na hoibleagáidí atá fágtha ag CEGC faoi leachtú a chomhlíonadh, ar oibleagáidí iad a bhaineann lena iasachtaí gan íoc, lena ghealltanais a eascraíonn as buiséid oibriúcháin roimhe seo, agus le haon dliteanas nárbh fhéidir a thuar.

2.   Déanfaidh an Coimisiún na sócmhainní nach bhfuil gá leo chun na hoibleagáidí atá fágtha ag CEGC faoi leachtú a chomhlíonadh a infheistiú go stuama, i gcomhréir leis an tréimhse infheistíochta ionchasach roghnaithe dá dtagraítear in Airteagal 21, agus úsáidfear iad chun taighde a chistiú in earnálacha a bhaineann leis an tionscal guail agus cruach.

1.   Déanfar na sócmhainní a infheistiú agus é mar chuspóir luach na sócmhainní sin a chaomhnú, agus i gcás inar féidir, a fheabhsú, chun na riachtanais leachtachta a eascraíonn as na glaonna cistiúcháin a chomhlíonadh (‘an cuspóir infheistíochta’). Déanfar an cuspóir infheistíochta a shaothrú thar an tréimhse infheistíochta ionchasach, agus déanfar é a chomhlíonadh le leibhéal ard muiníne.

2.   Déanfar na sócmhainní a bhainistiú i gcomhréir le rialacha stuamachta agus prionsabail na bainistíochta fónta airgeadais agus i gcomhréir leis na rialacha agus na nósanna imeachta arna leagan amach ag oifigeach cuntasaíochta an Choimisiúin agus le creat bainistíochta riosca an Choimisiúin.

3.   Saothrófar an cuspóir infheistíochta trí straitéis stuama infheistíochta a chur chun feidhme arna bunú ar éagsúlú thar chineálacha sócmhainní incháilithe, limistéir gheografacha, eisitheoirí agus aibíochtaí (‘an straitéis infheistíochta’). Cuirfear san áireamh sa straitéis infheistíochta an tréimhse infheistíochta ionchasach agus méid na sócmhainní atá fágtha agus áiritheofar léi go mbeidh na cistí is gá ar fáil i bhfoirm leachtach a dóthain de réir mar is gá agus nuair is gá.

4.   Cuirfear an straitéis infheistíochta in iúl i bhfoirm leithdháileadh straitéiseach sócmhainní, lena leagfar amach na sprioc-leithdháiltí táscacha ar chatagóirí éagsúla sócmhainní airgeadais incháilithe.

5.   Léireoidh an Coimisiún an leithdháileadh straitéiseach sócmhainní i dtagarmharc straitéiseach (‘an tagarmharc’), agus cuirfear feidhmíocht na sócmhainní i gcomparáid leis an tagarmharc sin.

6.   Is é an Coimisiún a chinnfidh an straitéis infheistíochta agus an tagarmharc i gcomhréir leis na rialacha maidir le tarmligean na gcumhachtaí cur chun feidhme buiséid dá dtagraítear in Airteagal 60 de Rialachán (AE, Euratom) 2024/2509. I gcás nach n-infheisteofar na sócmhainní ach i gcuntais reatha bhainc agus i dtaiscí téarma, ní bheidh gá le tagarmharc infheistíochta ná straitéis infheistíochta.

7.   Féadfaidh an Coimisiún an straitéis infheistíochta agus an tagarmharc a mhodhnú sna cásanna seo a leanas:

Beidh an nós imeachta maidir leis an straitéis infheistíochta a mhodhnú mar an gcéanna leis an nós imeachta maidir lena cinneadh tosaigh.

8.   Bunófar an straitéis infheistíochta agus an tréimhse infheistíochta ionchasach agus lamháltas riosca na sócmhainní á gcur san áireamh.

1.   Áiritheofar éagsúlú leordhóthanach i measc na gcineálacha sócmhainní ar fad agus laistigh díobh chun rioscaí infheistíochta a laghdú. I bprionsabal, dá mhéad riosca nó leachtacht a bhaineann le sócmhainn, is ea is lú dlúithe na neamhchosanta.

2.   Féadfaidh na sócmhainní neamhchosaint ar na cineálacha difriúla sócmhainní agus éagsúlú a bhaint amach trí infheistíochtaí i ngnóthais chomhinfheistíochta nó táirgí arna dtrádáil ar an malartán.

3.   Ní infheisteofar na sócmhainní ach amháin sna cineálacha sócmhainní seo a leanas, a ainmneofar in euro:

4.   Bainfidh na sócmhainní neamhchosaint amach ar na cineálacha sócmhainní dá dtagraítear i mír 3 trí infheistíocht a dhéanamh sna hionstraimí seo a leanas nó trí ghabháil do na hoibríochtaí seo a leanas:

5.   Díorthaigh, i bhfoirm conarthaí todhchaíochtaí, conarthaí réamhcheaptha agus babhtálacha, ní úsáidfear iad ach chun punanna a bhainistiú go héifeachtúil, agus ní úsáidfear iad chun críoch amhantraíochta ná chun seasaimh a ghiaráil. Féadfar na díorthaigh sin a úsáid chun an fad a choigeartú, chun creidmheas nó riosca ábhartha eile a mhaolú nó le haghaidh athruithe i leithdháileadh na sócmhainní atá comhsheasmhach leis an straitéis infheistíochta.

6.   Féadfar na sócmhainní a infheistiú i sócmhainní margaidh airgid leachtaigh agus bannaí arna n-ainmniú i ndollair na Stát Aontaithe arna n-eisiúint ag eintitis cheannasacha agus fhornáisiúnta ar choinníoll go ndéantar iad a infheistiú chun críocha éagsúlaithe agus neamhchosanta ar chuar ráta úis eile agus chun na gcríoch sin amháin. Déanfar aon riosca airgeadra a fhálú trí úsáid iomchuí a bhaint as babhtálacha nó ionstraimí eile le haghaidh fálú airgeadra eachtraigh, i gcomhréir le mír 5.

7.   Féadfaidh an Coimisiún, i gcomhréir leis na rialacha maidir le tarmligean na gcumhachtaí cur chun feidhme buiséid dá dtagraítear in Airteagal 60 de Rialachán (AE, Euratom) 2024/2509, raon feidhme na n-infheistíochtaí incháilithe a mhéadú chun cineálacha sócmhainní agus oibríochtaí infheistíochta eile a áireamh atá comhsheasmhach leis an straitéis infheistíochta agus leis na cuspóirí infheistíochta, chomh maith le hairgeadraí geilleagar sárfhorbartha eile, mar a liostaíonn an Ciste Airgeadaíochta Idirnáisiúnta iad agus faoi réir fhálú an riosca airgeadra. Aon chinneadh cineálacha nua sócmhainní nó oibríochtaí nua infheistíochta nó airgeadraí nua geilleagar sárfhorbartha a chur san áireamh, tacófar leis le réasúnú réasúnaithe de réir cineál sócmhainní, oibríochta nó airgeadra maidir leis an gcaoi a bhfeabhsóidh na féidearthachtaí leathnaithe infheistíochta feidhmíocht riosca agus toraidh na sócmhainní. Sa réasúnú sin áireofar measúnú ar na hinniúlachtaí oibríochtúla lena mbeidh gá chun tacú leis na féidearthachtaí nua infheistíochta sin.

1.   Cuirfear an straitéis infheistíochta chun feidhme trí thús áite a thabhairt d’infheistíochtaí comhshaoil, sóisialta agus rialachais nuair a bheidh siad ar fáil agus nuair is féidir, ar choinníoll go mbeidh siad i gcomhréir le critéir bainistithe riosca.

2.   Féadfaidh an Coimisiún na treoirlínte mionsonraithe is infheidhme maidir le hinfheistíochtaí comhshaoil, sóisialta agus rialachais a leagan amach, i gcomhréir leis na rialacha maidir le tarmligean cumhachtaí cur chun feidhme buiséid dá dtagraítear in Airteagal 60 de Rialachán (AE, Euratom) 2024/2509.

1.   Cuirfear bainistiú na gcistí san áireamh sna cuntais bhliantúla do CEGC faoi leachtú agus, ar an leachtú a bheith críochnaithe, sna cuntais bhliantúla le haghaidh shócmhainní an Chiste Taighde um Ghual agus Cruach. Bunófar na cuntais sin ar na rialacha cuntasaíochta arna nglacadh ag oifigeach cuntasaíochta an Choimisiúin i gcomhréir le hAirteagal 80 de Rialachán (AE, Euratom) 2024/2509, agus cuirfear i láthair iad i gcomhréir leis na rialacha cuntasaíochta sin, agus cineál sonrach CEGC faoi leachtú agus, ar an leachtú a bheith críochnaithe, sócmhainní an Chiste Taighde um Ghual agus Cruach á gcur san áireamh. Déanfaidh an Coimisiún na cuntais a fhormheas agus déanfaidh an Chúirt Iniúchóirí scrúdú orthu. Fostóidh an Coimisiún gnólachtaí seachtracha chun iniúchadh bliantúil a dhéanamh ar a chuntais.

2.   I ndáil le CEGC faoi leachtú agus, ar an leachtú a bheith críochnaithe, sócmhainní an Chiste Taighde um Ghual agus Cruach, déanfaidh an Coimisiún na hoibríochtaí bainistíochta dá dtagraítear in Airteagail 20 go 26 faoi rialacha agus nósanna imeachta inmheánacha an Choimisiúin.

3.   Dréachtóidh an Coimisiún tuarascáil mhionsonraithe bhliantúil ar na hoibríochtaí bainistíochta a dhéanfar faoi Airteagal 20 go hAirteagal 26 agus seolfaidh sé chuig na Ballstáit í. Sa tuarascáil bhliantúil sin, áireoidh an Coimisiún faisnéis faoi úsáid na gcineálacha éagsúla sócmhainní, na cúiseanna leis an rogha infheistíocht a dhéanamh i gcineálacha sonracha sócmhainní agus feidhmíocht bhreathnaithe gach cineál sócmhainní.

1.   Déanfaidh an Coimisiún an Clár Taighde a bhainistiú. Tabharfaidh grúpaí teicniúla agus comhairleacha a bhfuil an saineolas ábhartha acu, arna mbunú le cinneadh ón gCoimisiún, cúnamh dó.

2.   Tabharfaidh an Coiste um Ghual agus Cruach cúnamh don Choimisiún. Beidh an coiste sin ina choiste de réir bhrí Rialachán (AE) Uimh. 182/2011.

3.   I gcás ina ndéantar tagairt don mhír seo, beidh feidhm ag Airteagal 5 de Rialachán (AE) Uimh. 182/2011.

4.   I gcás ina bhfuiltear chun tuairim an choiste a fháil trí nós imeachta i scríbhinn, déanfar an nós imeachta sin a fhoirceannadh gan toradh más rud é, laistigh den teorainn ama leis an tuairim sin a thabhairt, go gcinneann cathaoirleach an choiste amhlaidh nó go n-iarrann tromlach simplí de chomhaltaí an choiste amhlaidh.