(1)

De bhun Airteagal 11 de Rialachán (CE) Uimh. 549/2004, tá na Ballstáit le pleananna a tharraingt suas, ar an leibhéal náisiúnta nó ar leibhéal na mbloc feidhme aerspáis, lena n-áirítear spriocanna feidhmíochta, le haghaidh gach tréimhse tagartha den scéim feidhmíochta agus muirearaithe le haghaidh seirbhísí aerloingseoireachta agus feidhmeanna líonra. Áireofar sna pleananna sin spriocanna feidhmíochta áitiúla atá comhsheasmhach leis na spriocanna feidhmíochta uile-Aontais le haghaidh na tréimhse tagartha lena mbaineann.

(2)

An 12 Meitheamh 2024, ghlac an Coimisiún spriocanna feidhmíochta uile-Aontais le haghaidh an cheathrú tréimhse thagartha (‘TT4’, 2025-2029). Leagadh síos na spriocanna feidhmíochta uile-Aontais sin i gCinneadh Cur Chun Feidhme (AE) 2024/1688 ón gCoimisiún (4).

(3)

An 1 Deireadh Fómhair 2024, chuir an Danmhairg dréachtphlean feidhmíochta le haghaidh TT4 faoi bhráid an Choimisiúin. Tar éis don Choimisiún iomláine an dréachtphlean feidhmíochta sin a fhíorú, chuir an Danmhairg dréachtphlean feidhmíochta cothrom le dáta (‘an dréachtphlean feidhmíochta’) isteach an 13 Nollaig 2024.

(4)

Chinn an Coimisiún maidir leis na spriocanna feidhmíochta costéifeachtúlachta atá leagtha síos ag an Danmhairg sa dréachtphlean feidhmíochta i leith a limistéir muirearaithe faoi bhealach, nach gcomhlíonann siad na critéir mheasúnaithe a leagtar síos i bpointe 1.4 d’Iarscríbhinn IV a ghabhann le Rialachán Cur Chun Feidhme (AE) 2019/317 ón gCoimisiún agus, dá bhrí sin, nach bhfuil siad comhsheasmhach leis na spriocanna feidhmíochta uile-Aontais le haghaidh TT4.

(5)

Dá bhrí sin, an 16 Bealtaine 2025 thug an Coimisiún fógra don Danmhairg faoi na torthaí maidir le neamhréireacht na spriocanna feidhmíochta dá dtagraítear in aithris 4 le Cinneadh Cur Chun Feidhme (AE) 2025/1040 ón gCoimisiún (5). Sa Chinneadh sin, d’eisigh an Coimisiún moltaí don Danmhairg d’fhonn comhsheasmhacht a spriocanna feidhmíochta leis na spriocanna feidhmíochta uile-Aontais le haghaidh TT4 a áirithiú.

(6)

An 15 Lúnasa 2025, chuir an Danmhairg dréachtphlean feidhmíochta athbhreithnithe le haghaidh TT4 isteach lena mheasúnú ag an gCoimisiún. Tar éis iomláine an phlean sin a fhíorú, chuir an Danmhairg leagan cothrom le dáta den dréachtphlean feidhmíochta athbhreithnithe (‘an dréachtphlean feidhmíochta athbhreithnithe’) isteach an 6 Deireadh Fómhair 2025.

(7)

I gcomhréir le hAirteagal 15(1) de Rialachán Cur Chun Feidhme (AE) 2019/317, rinne an Coimisiún measúnú ar chomhsheasmhacht na spriocanna feidhmíochta áitiúla atá sa dréachtphlean feidhmíochta athbhreithnithe ar bhonn na gcritéar measúnaithe a leagtar síos i bpointe 1 d’Iarscríbhinn IV a ghabhann leis an Rialachán Cur Chun Feidhme sin, agus imthosca áitiúla á gcur san áireamh i gcás inarb ábhartha.

(8)

Chomhlánaigh an Coimisiún a mheasúnú ar an dréachtphlean feidhmíochta athbhreithnithe le hathbhreithniú ar na heilimintí a leagtar amach i bpointe 2 d’Iarscríbhinn IV a ghabhann leis an Rialachán Cur Chun Feidhme sin. Mar sin féin, tá leithdháileadh na gcostas idir seirbhísí faoi bhealach agus seirbhísí críochfoirt dá dtagraítear i bpointe 2.1(d)(vii) d’Iarscríbhinn IV a ghabhann le Rialachán Cur Chun Feidhme (AE) 2019/317 faoi réir athbhreithniú ar leithligh ón gCoimisiún bunaithe ar fhaisnéis bhreise a fuarthas ón Danmhairg i mí na Nollag 2025. Dá bhrí sin, níor tháinig an Coimisiún ar aon chonclúid, ag an gcéim seo, i leith chomhlíonadh phointí (e) agus (f) d’Airteagal 15(2) de Rialachán (CE) Uimh. 550/2004 ó Pharlaimint na hEorpa agus ón gComhairle (6) agus Airteagal 22(5) de Rialachán Cur Chun Feidhme (AE) 2019/317 ag an modheolaíocht sin maidir le leithdháileadh costas.

(9)

Chuir an Bord um Athbhreithnithe Feidhmíochta (‘BAF’), a thugann cúnamh don Choimisiún maidir le cur chun feidhme na scéimeanna feidhmíochta agus muirearaithe de bhun Airteagal 13(2) de Rialachán (AE) 2024/2803, a thuairim faoi bhráid an Choimisiúin maidir leis na spriocanna feidhmíochta atá sa dréachtphlean feidhmíochta athbhreithnithe maidir le comhsheasmhacht na spriocanna sin leis na spriocanna feidhmíochta uile-Aontais. Tá na torthaí a leagtar amach sa Chinneadh seo bunaithe ar an measúnú teicniúil mionsonraithe a leagtar amach i dtuairim BAF (7).

(10)

Maidir le príomhréimse feidhmíochta na sábháilteachta, rinneadh measúnú ar chomhsheasmhacht na spriocanna atá sa dréachtphlean feidhmíochta athbhreithnithe i gcomhréir le pointe 1.1 d’Iarscríbhinn IV a ghabhann le Rialachán Cur Chun Feidhme (AE) 2019/317.

(11)

Is iad seo a leanas na spriocanna feidhmíochta a mholann an Danmhairg i bpríomhréimse feidhmíochta na sábháilteachta i leith éifeachtacht na bainistíochta sábháilteachta, arna miondealú de réir an chuspóra bainistíochta sábháilteachta agus arna léiriú mar leibhéal cur chun feidhme:

(12)

Tá sé suite ag an gCoimisiún gurb ionann na spriocanna feidhmíochta sábháilteachta a mholann an Danmhairg le haghaidh an tsoláthraí seirbhísí aerloingseoireachta ‘NAVIAIR’ agus na spriocanna sábháilteachta uile-Aontais i leith bhliain féilire 2029.

(13)

Tugann an Coimisiún dá aire go leagtar amach sa dréachtphlean feidhmíochta athbhreithnithe bearta le haghaidh NAVIAIR chun na spriocanna sábháilteachta áitiúla a bhaint amach, amhail modhanna sonraíbhunaithe chun faireachán agus bainistiú a dhéanamh ar riosca a bhaineann le tuirse, measúnú tráthrialta ar rioscaí, clár feabhsúcháin i ndáil le cultúr sábháilteachta, beartais agus caighdeáin sábháilteachta a shainiú, agus córas a fheabhsú chun freagrachtaí agus údaruithe a bhainistiú, chomh maith le hiniúchtaí agus suirbhéanna inmheánacha agus seachtracha.

(14)

Ar bhonn na dtorthaí a leagtar amach in aithrisí 11, 12 agus 13, agus de bhrí go bhfuil na spriocanna feidhmíochta sábháilteachta uile-Aontais a leagtar amach i gCinneadh Cur Chun Feidhme (AE) 2024/1688 le baint amach faoi bhliain dheireanach TT4, is é sin 2029, ba cheart a mheas, maidir leis na spriocanna feidhmíochta sábháilteachta áitiúla atá sa dréachtphlean feidhmíochta athbhreithnithe, go bhfuil siad comhsheasmhach leis na spriocanna feidhmíochta uile-Aontais.

(15)

Maidir le príomhréimse an chomhshaoil, rinneadh measúnú ar chomhsheasmhacht na spriocanna atá sa dréachtphlean feidhmíochta athbhreithnithe maidir le meánéifeachtúlacht chothrománach eitilte faoi bhealach an ruthaig eitilte iarbhír, ar bhonn an chritéir a leagtar síos i bpointe 1.2 d’Iarscríbhinn IV a ghabhann le Rialachán Cur Chun Feidhme (AE) 2019/317. Dá réir sin, cuireadh na spriocanna comhshaoil a mholann an Danmhairg i gcomparáid leis na luachanna tagartha ábhartha le haghaidh éifeachtúlacht chothrománach na heitilte faoi bhealach a leagtar amach i bPlean Feabhsúcháin Líonra Aerbhealaí na hEorpa, arna tharraingt suas i gcomhréir le hIarscríbhinn I a ghabhann le Rialachán Cur Chun Feidhme (AE) 2019/123 ón gCoimisiún (8) agus a bhí ar fáil tráth a glacadh na spriocanna feidhmíochta uile-Aontais le haghaidh TT4, is é sin an 2 Iúil 2024.

(16)

Is iad seo a leanas na spriocanna feidhmíochta comhshaoil a mholann an Danmhairg le haghaidh TT4 mar aon leis na luachanna tagartha náisiúnta comhfhreagracha ó Phlean Feabhsúcháin Líonra Aerbhealaí na hEorpa, arna léiriú mar mheánéifeachtúlacht chothrománach eitilte faoi bhealach an ruthaig eitilte iarbhír:

(17)

Tugann an Coimisiún faoi deara gurb ionann na spriocanna comhshaoil a mholann an Danmhairg agus na luachanna tagartha náisiúnta comhfhreagracha le haghaidh gach bliana féilire de TT4.

(18)

Tugann an Coimisiún dá aire gur chuir an Danmhairg i láthair, sa dréachtphlean feidhmíochta athbhreithnithe, bearta chun na spriocanna comhshaoil áitiúla a bhaint amach, lena gcuimsítear cur chun feidhme aerspáis saorbhealaigh trasteorann fheabhsaithe le cúig thír chomharsanacha.

(19)

Ar bhonn na dtorthaí a leagtar amach in aithrisí 16, 17 agus 18, ba cheart a mheas go bhfuil na spriocanna i bpríomhréimse feidhmíochta an chomhshaoil atá i ndréachtphlean feidhmíochta athbhreithnithe na Danmhairge comhsheasmhach leis na spriocanna feidhmíochta uile-Aontais le haghaidh TT4.

(20)

Maidir le príomhréimse feidhmíochta na hacmhainneachta, rinneadh measúnú ar chomhsheasmhacht na spriocanna atá sa dréachtphlean feidhmíochta athbhreithnithe maidir leis an meánmhoill i mbainistíocht na sreibhe aerthráchta (‘BSAT’) faoi bhealach in aghaidh na heitilte, ar bhonn an chritéir a leagtar síos i bpointe 1.3 d’Iarscríbhinn IV a ghabhann le Rialachán Cur Chun Feidhme (AE) 2019/317. Dá réir sin, cuireadh na spriocanna acmhainneachta a mholann an Danmhairg i gcomparáid leis na luachanna tagartha ábhartha a leagtar amach sa Phlean Oibríochtaí Líonra, arna tharraingt suas i gcomhréir le hAirteagal 9 de Rialachán Cur Chun Feidhme (AE) 2019/123 ón gCoimisiún agus a bhí ar fáil tráth a glacadh na spriocanna feidhmíochta uile-Aontais le haghaidh TT4, is é sin an 2 Iúil 2024.

(21)

Is iad seo a leanas na spriocanna acmhainneachta faoi bhealach a mholann an Danmhairg le haghaidh TT4, arna léiriú i nóiméid moille BSAT in aghaidh na heitilte, mar aon leis na luachanna tagartha comhfhreagracha ón bPlean Oibríochtaí Líonra:

(22)

Tugann an Coimisiún faoi deara gurb ionann na spriocanna acmhainneachta a mholann an Danmhairg agus na luachanna tagartha náisiúnta comhfhreagracha, nó níos ísle ná iad, le haghaidh gach bliana féilire de TT4.

(23)

Tugann an Coimisiún dá aire gur chuir an Danmhairg i láthair, sa dréachtphlean feidhmíochta athbhreithnithe, bearta chun na spriocanna acmhainneachta áitiúla faoi bhealach a bhaint amach, lena gcuimsítear earcú agus oiliúint leanúnach rialtóirí aerthráchta, barrfheabhsú na hearnála, cur chun feidhme ardbheart bainistíochta acmhainne agus sreafa aerthráchta agus socruithe feabhsaithe maidir le réimsí oiliúna míleata.

(24)

Ar bhonn na dtorthaí a leagtar amach in aithrisí 21, 22 agus 23, ba cheart a mheas go bhfuil na spriocanna i bpríomhréimse feidhmíochta na hacmhainneachta atá i ndréachtphlean feidhmíochta athbhreithnithe na Danmhairge comhsheasmhach leis na spriocanna feidhmíochta uile-Aontais le haghaidh TT4.

(25)

I gcomhréir le pointe 2.1(b) d’Iarscríbhinn IV a ghabhann le Rialachán Cur Chun Feidhme (AE) 2019/317, d’athbhreithnigh an Coimisiún na spriocanna feidhmíochta acmhainneachta maidir le seirbhísí aerloingseoireachta críochfoirt a leagtar amach i ndréachtphlean feidhmíochta athbhreithnithe na Danmhairge i leith na n-aerfort dá dtagraítear in Airteagal 1(3) agus (4) den Rialachán Cur Chun Feidhme sin. Fuarthas amach nach bhfuil na spriocanna sin ina gcúis imní.

(26)

Tháinig an Coimisiún ar an gconclúid i gCinneadh Cur Chun Feidhme (AE) 2025/1040 go raibh na spriocanna costéifeachtúlachta faoi bhealach atá beartaithe agus atá i ndréachtphlean feidhmíochta na Danmhairge a cuireadh isteach in 2024 ar neamhréir leis na spriocanna feidhmíochta uile-Aontais. Mhol an Danmhairg spriocanna athbhreithnithe costéifeachtúlachta faoi bhealach ina dréachtphlean feidhmíochta athbhreithnithe.

(27)

Léirítear sa tábla thíos na spriocanna feidhmíochta athbhreithnithe atá sa dréachtphlean feidhmíochta athbhreithnithe.

(28)

Tugann an Coimisiún dá aire go ndearnadh spriocanna feidhmíochta costéifeachtúlachta na Danmhairge a athbhreithniú anuas le haghaidh gach bliana den tréimhse thagartha, rud a fhágann go bhfuil costas aonaid arna shuí (‘CAAS’) bliantúil níos ísle ann i gcomparáid leis an dréachtphlean feidhmíochta a cuireadh isteach in 2024. D’eascair an feabhas sin as na toimhdí tráchta athbhreithnithe, i gcomhréir le réamhaisnéis bhonnlíne STATFOR Eurocontrol ó mhí Feabhra 2025, agus as laghdú ar na costais arna suí le haghaidh TT4.

(29)

Léirítear sa tábla thíos na costais athbhreithnithe arna suí arna sloinneadh in EUR i dtéarmaí réadacha de réir phraghsanna 2022 (‘EUR2022’) agus an réamhaisnéis tráchta cothrom le dáta le haghaidh an limistéir muirearaithe, mar a chuirtear i láthair sa dréachtphlean feidhmíochta athbhreithnithe:

(30)

Rinne an Coimisiún measúnú ar chomhsheasmhacht na spriocanna costéifeachtúlachta athbhreithnithe le haghaidh limistéar muirearaithe faoi bhealach na Danmhairge, bunaithe ar na critéir a leagtar síos i bpointí 1.4(a), (b) agus (c) d’Iarscríbhinn IV a ghabhann le Rialachán Cur Chun Feidhme (AE) 2019/317.

(31)

Maidir leis an gcritéar a leagtar síos i bpointe 1.4(a) d’Iarscríbhinn IV a ghabhann le Rialachán Cur Chun Feidhme (AE) 2019/317, tugann an Coimisiún faoi deara go sáraíonn an treocht CAAS faoi bhealach ar leibhéal an limistéir muirearaithe le linn TT4, mar atá, -2,1 %, an treocht ar fud an Aontais le linn na tréimhse céanna, mar atá, -1,2 %.

(32)

Maidir leis an gcritéar a leagtar síos i bpointe 1.4(b) d’Iarscríbhinn IV a ghabhann le Rialachán Cur Chun Feidhme (AE) 2019/317, tugann an Coimisiún faoi deara gur measa an treocht fhadtéarmach CAAS faoi bhealach le linn na tríú tréimhse thagartha (‘TT3’) agus TT4, mar atá +0,4 %, ná an treocht fhadtéarmach ar fud an Aontais le linn na tréimhse céanna, mar atá -1,0 %.

(33)

D’iarr an Danmhairg ar an gCoimisiún tionchar na n-athruithe tráchta a d’eascair as an gcogadh foghach atá an Rúis a chur ar an Úcráin a mheas mar chuid de ríomh na treochta fadtéarmaí CAAS faoi bhealach. De réir na Danmhairge, tá laghdú struchtúrach tagtha ar thraseitiltí in aerspás na Danmhairge mar thoradh ar na hathruithe tráchta a d’eascair as an gcogadh san Úcráin. Sholáthair an Danmhairg faisnéis bhreise, sa dréachtphlean feidhmíochta athbhreithnithe, chun bunús a thabhairt lena maíomh maidir le tábhacht na n-athruithe tráchta sin.

(34)

Ar bhonn na faisnéise breise a chuir an Danmhairg isteach mar chuid den dréachtphlean feidhmíochta athbhreithnithe, measann BAF gur 12 % d’aonaid seirbhíse iomlána limistéar muirearaithe faoi bhealach na Danmhairge atá i gceist le caillteanas traseitiltí mar gheall ar thionchar an chogaidh san Úcráin. Thug BAF dá aire go bhfuil an Danmhairg sa limistéar geografach a ndéanann na hathruithe tráchta sin difear dó agus gur laghdú struchtúrach tráchta a leanann de thionchar a imirt ar chostéifeachtúlacht na seirbhísí aerloingseoireachta in TT4 in aerspás na Danmhairge é an tionchar a eascraíonn as sin.

(35)

Dá bhrí sin, is gá agus is iomchuí scrúdú a dhéanamh, chun críoch an chritéir measúnaithe dá dtagraítear in aithris 32, an gcomhlíonfadh an Danmhairg an treocht fhadtéarmach CAAS ar fud an Aontais in éagmais na n-imthosca dá dtagraítear in aithrisí 33 agus 34.

(36)

Chuige sin, rinne an Coimisiún treocht fhadtéarmach CAAS na Danmhairge a athríomh i bhfianaise an chaillteanais struchtúraigh tráchta a mheastar a bheidh ann don Danmhairg mar thoradh ar an gcogadh san Úcráin, arna thomhas in aonaid seirbhíse faoi bhealach. Is é an toradh atá ar an athríomh sin treocht fhadtéarmach choigeartaithe CAAS le haghaidh na Danmhairge de -1,0 %, rud atá i gcomhréir leis an treocht fhadtéarmach CAAS ar fud an Aontais de -1,0 %. Dá bhrí sin, thángthas ar an gconclúid go gcomhlíonann an Danmhairg an critéar measúnaithe dá dtagraítear in aithris 32 tar éis éifeacht an laghdaithe shuntasaigh tráchta mar thoradh ar an gcogadh san Úcráin a chur san áireamh.

(37)

Maidir leis an gcritéar a leagtar síos i bpointe 1.4(c) d’Iarscríbhinn IV a ghabhann le Rialachán Cur Chun Feidhme (AE) 2019/317, tugann an Coimisiún faoi deara go bhfuil an luach bonnlíne EUR 72,32 le haghaidh CAAS na Danmhairge in EUR2022 18,7 % níos airde ná meánluach bonnlíne an ghrúpa comparáide ábhartha, is é sin EUR 60,92 in EUR2022, a leagtar amach in Airteagal 7, pointe (f), de Chinneadh Cur Chun Feidhme (AE) 2024/1688.

(38)

Mar a leagtar amach in aithris 31, is léir go sáraíonn CAAS na Danmhairge le linn TT4 an treocht chomhfhreagrach ar fud an Aontais faoi chorrlach suntasach. Thairis sin, mar a léirítear in aithrisí 33 agus 36, agus tionchar diúltach na n-athruithe tráchta a d’eascair as an gcogadh foghach atá an Rúis a chur ar an Úcráin á chur as an áireamh, comhlíonann an Danmhairg an treocht fhadtéarmach CAAS ar fud an Aontais. Dá bhrí sin, measann an Coimisiún nach bac é an diall ó mheánluach bonnlíne CAAS 2024 dá dtagraítear in aithris 37 ar spriocanna feidhmíochta costéifeachtúlachta na Danmhairge a bheith comhsheasmhach leis na spriocanna feidhmíochta costéifeachtúlachta uile-Aontais.

(39)

Ar bhonn na dtorthaí a leagtar amach in aithrisí 27 go 38 measann an Coimisiún gur thug an Danmhairg aghaidh leordhóthanach ar na moltaí a leagtar amach in Airteagal 3 de Chinneadh Cur Chun Feidhme (AE) 2025/1040 maidir leis an athbhreithniú ar a spriocanna feidhmíochta costéifeachtúlachta áitiúla. Dá bhrí sin, is é conclúid an Choimisiúin gur cheart a mheas go bhfuil na spriocanna costéifeachtúlachta athbhreithnithe a chuir an Danmhairg sa dréachtphlean feidhmíochta athbhreithnithe comhsheasmhach leis na spriocanna feidhmíochta uile-Aontais le haghaidh TT4.

(40)

I gcomhréir le pointe 2.1(c) d’Iarscríbhinn IV a ghabhann le Rialachán Cur Chun Feidhme (AE) 2019/317, d’athbhreithnigh an Coimisiún na spriocanna feidhmíochta costéifeachtúla maidir le seirbhísí aerloingseoireachta críochfoirt a leagtar amach i ndréachtphlean feidhmíochta athbhreithnithe na Danmhairge i leith na n-aerfort dá dtagraítear in Airteagal 1(3) agus (4) den Rialachán Cur Chun Feidhme sin. Fuarthas amach nach bhfuil na spriocanna sin ina gcúis imní.

(41)

I bhfianaise a bhfuil thuas, chinn an Coimisiún go bhfuil na spriocanna feidhmíochta atá i ndréachtphlean feidhmíochta athbhreithnithe na Danmhairge comhsheasmhach leis na spriocanna feidhmíochta uile-Aontais le haghaidh TT4,