(1)

Cuireadh ocsaíd chopair (II) le hIarscríbhinn I a ghabhann le Treoir 98/8/CE ó Pharlaimint na hEorpa agus ón gComhairle (2) mar shubstaint ghníomhach lena húsáid i dtáirgí bithicídeacha de chineál táirge 8. Dá bhrí sin, de bhun Airteagal 86 de Rialachán (AE) Uimh. 528/2012, measadh an tsubstaint a bheith formheasta go dtí an 31 Eanáir 2024 faoin Rialachán sin faoi réir na gcoinníollacha a leagtar amach in Iarscríbhinn I a ghabhann le Treoir 98/8/CE.

(2)

An 27 Iúil 2022, cuireadh isteach iarratas i gcomhréir le hAirteagal 13(1) de Rialachán (AE) Uimh. 528/2012 chun athnuachan a dhéanamh ar an bhformheas maidir le hocsaíd chopair (II) lena húsáid i dtáirgí bithicídeacha de chineál táirge 8 (‘an t-iarratas’).

(3)

An 21 Márta 2023, chuir údarás inniúil meastóireachta na Fraince an Coimisiún ar an eolas go raibh cinneadh déanta aige, de bhun Airteagal 14(1) de Rialachán (AE) Uimh. 528/2012, gur ghá meastóireacht iomlán a dhéanamh ar an iarratas. De bhun Airteagal 8(1) den Rialachán sin, tá an t-údarás inniúil meastóireachta le meastóireacht iomlán a dhéanamh ar an iarratas laistigh de 365 lá tar éis a bhailíochtaithe.

(4)

Féadfaidh an t-údarás inniúil meastóireachta, de réir mar is iomchuí, é a chur de cheangal ar an iarratasóir sonraí leordhóthanacha a sholáthar chun an mheastóireacht a dhéanamh, i gcomhréir le hAirteagal 8(2) de Rialachán (AE) Uimh. 528/2012. Sa chás sin, cuirtear an tréimhse 365 lá ar fionraí ar feadh tréimhse nach faide ná 180 lá ar an iomlán ach amháin má tá údar maith le fionraí níos faide mar gheall ar chineál na sonraí a iarrtar nó mar gheall ar imthosca eisceachtúla.

(5)

Laistigh de 270 lá tar éis don Ghníomhaireacht Eorpach Ceimiceán (‘an Ghníomhaireacht’) moladh a fháil ón údarás inniúil meastóireachta, tá sí le tuairim maidir le hathnuachan fhormheas na substainte gníomhaí a ullmhú agus a chur faoi bhráid an Choimisiúin i gcomhréir le hAirteagal 14(3) de Rialachán (AE) Uimh. 528/2012.

(6)

Le Cinneadh Cur Chun Feidhme (AE) 2023/2100 ón gCoimisiún (3), cuireadh ar atráth go dtí an 31 Iúil 2026 dáta éaga an fhormheasa maidir le hocsaíd chopair (II) lena húsáid i dtáirgí bithicídeacha de chineál táirgí 8 chun go mbeadh am leordhóthanach ann scrúdú a dhéanamh ar an iarratas.

(7)

An 8 Deireadh Fómhair 2025, chuir an t-údarás inniúil meastóireachta an Coimisiún ar an eolas go bhfuil moill ar an meastóireacht. Tá coinne ag an údarás inniúil meastóireachta leis go gcuirfidh sé an tuarascáil ar an measúnú ar athnuachan faoi bhráid na Gníomhaireachta sa chéad ráithe de 2028.

(8)

Dá bhrí sin, ar chúiseanna nach bhfuil neart ag an iarratasóir orthu, is dócha go rachaidh an formheas in éag sula ndéanfar cinneadh maidir lena athnuachan. Dá bhrí sin, is iomchuí dáta éaga an fhormheasa a chur ar atráth an athuair go ceann tréimhse leordhóthanach chun gur féidir scrúdú a dhéanamh ar an iarratas. Agus aird á tabhairt ar na teorainneacha ama le haghaidh meastóireacht ag an údarás inniúil meastóireachta, le haghaidh ullmhú agus cur isteach na tuairime ón nGníomhaireacht, agus an t-am a thógfaidh sé ar an gCoimisiún cinneadh a dhéanamh an ndéanfaidh sé athnuachan ar an bhformheas maidir le hocsaíd chopair (II) lena húsáid i dtáirgí bithicídeacha de chineál táirge 8, ba cheart an dáta éaga a chur ar atráth go dtí an 31 Iúil 2029.

(9)

Tar éis dáta éaga an fhormheasa a chur ar atráth an athuair, tá ocsaíd chopair (II) formheasta go fóill lena húsáid i dtáirgí bithicídeacha de chineál táirge 8 faoi réir na gcoinníollacha a leagtar amach in Iarscríbhinn I a ghabhann le Treoir 98/8/CE,