(i)

Is é EUR 100 billiún luach margaidh na hearnála, agus is fiú EUR 130 billiún a rannchuidiú le OTI an Aontais. Onnmhairíodh fíonta Eorpacha go 194 thír éagsúla in 2022, agus b’fhiú EUR 17,9 billiún a luach onnmhairiúcháin iomlán, agus bhí ról ríthábhachtach aige sin sa mhéid gur tháinig laghdú 3,7 % ar an easnamh i gcomhardú trádála an Aontais a bhuí leis na honnmhairí fíona amháin.

(ii)

Cuireann sí freisin le tacaíocht shóisialta trí 2,9 milliún post a ghiniúint, lena ndéantar athbheochan ar cheantair thuaithe atá ag tabhairt aghaidh ar dhídhaonrú. Léiríonn an earnáil sin táirgiúlacht eisceachtúil, rud a thugann breisluach níos airde in aghaidh an fhostaí i gcomparáid le gníomhaíochtaí comhchosúla in earnálacha eile ag gach céim den slabhra luacha (+ 90 % le haghaidh fás fíonchaor i gcomparáid le táirgeadh barr agus ainmhithe; + 16 % le haghaidh fíonóireachta vs monaraíocht; agus + 5 % le haghaidh tráchtálú fíona vs gníomhaíochtaí bia agus dí). Ina theannta sin, tá feirmeacha fíona 15 % níos brabúsaí ná an mheánfheirm san Aontas, rud a chuireann rogha eacnamaíoch inmharthana ar fáil do dhaoine a bhfuil cónaí orthu i gceantair thuaithe.

(iii)

Agus níos mó ná 3,1 milliún heicteár d’fhíniúnacha i limistéir nach mbíonn aon rogha eacnamaíoch eile iontu go minic, tá ról ríthábhachtach ag earnáil an fhíona maidir leis an daonra a chothabháil i gceantair thuaithe. Is oibríochtaí ar mionscála iad formhór na 2,2 milliún gabháltas fíona san Aontas ach, d’ainneoin a méide, cuireann na fíonghoirt sin go mór le geilleagair thuaithe agus le táirgeadh fíona an Aontais. Na réigiúin thuaithe ina bhfuil forás ar na fíonghoirt, is ar éigean atá athrú ar leibhéal an daonra iontu, óir níor tháinig ach laghdú beag 0,4 % orthu. I gcodarsnacht leis sin, tháinig laghdú i bhfad ní ba mhó (laghdú 2,6 %) — 6,5 oiread — ar mhéid a ndaonraí i limistéir ina bhfuil fíonghoirt ag laghdú.

(iv)

Bhí ranníocaíocht fhioscach iomlán earnáil an fhíona cothrom le beagnach EUR 52 bhilliún in 2022 agus ba ranníocaíochtaí sóisialta iad os cionn 57 % di, rud is ionann agus thart ar 0,7 % de chaiteachas rialtais ghinearálta an Aontais.

(v)

Sa bhreis ar na himpleachtaí eacnamaíocha díreacha a bhaineann léi, traidisiún cultúrtha is ea earnáil fíona na hEorpa atá fréamhaithe go domhain sa tírdhreach sochaíoch. Is léiriú í an earnáil seo ar oidhreacht éagsúil, oidhreacht atá á múnlú de thoradh na gcéadta bliain den stair agus den nuálaíocht, áit a rannchuidíonn gach terroir le fíor-mhósáic de réigiúin táirgthe a chruthú. Ní le táirgeadh fíona amháin a bhaineann an fíonsaothrú óir is léiriú é freisin ar shlí bheatha, ar fhéiniúlacht chomhchoiteann agus ar nasc le tír. Dá bhrí sin, ba cheart é a bheith d’aidhm ag pacáiste fíona an Aontais an t-iomaíochas a dhaingniú agus an infheistíocht a spreagadh, agus anuas air sin an chreatlach shóisialta agus chultúrtha seo a thugann saoránaigh le chéile a chaomhnú, trí bhéim a leagan ar na sineirgí idir an geilleagar, an comhshaol agus an cultúr. Cuideoidh sé sin le spiorad na réigiún fíona a neartú agus todhchaí inbhuanaithe a áirithiú don earnáil aitheanta sin.

—

mar gheall ar an easpa cur chuige comhchuibhithe agus an gá atá leis an Margadh Aonair a chosaint, tá géarghá le córas saor ó theanga a shainaithint bunaithe ar phicteagram nó ar shiombail chun na modhanna leictreonacha a shainaithint. Ba ríthábhachtach, dá bhrí sin, na módúlachtaí nithiúla comhchuibhithe a bhaineann le réiteach saor ó theanga a thabhairt isteach go díreach sa bhunghníomh.

—

toisc a dheacra a bhíonn sé ar chuideachtaí fíona a shainaithint cathain agus cé acu a cheadaítear nó nach gceadaítear le reachtaíocht tríú tír forálacha an Aontais maidir le liosta na gcomhábhar a léiriú agus an dearbhú cothúcháin, nó cé acu a imíonn nó nach n-imíonn reachtaíocht tríú tír ó na forálacha sin, b’fhearr deireadh a chur leis an gceanglas na sonraí sin a léiriú nuair a onnmhairítear fíonta an Aontais chuig tríú tíortha.

—

deireadh a chur le ceann de na príomhbhacainní ar éifeachtúlacht iomlán an bhirt, is é sin an teorainn ama a fhorchuirtear le haghaidh gníomhaíochtaí cur chun cinn atá dírithe ar sciar den mhargadh a chomhdhlúthú. An tréimhse tacaíochta atá beartaithe do ghníomhaíochtaí cur chun cinn atá dírithe ar asraonta margaidh i dtríú tíortha a chomhdhlúthú, tá sí fós an-sriantach; agus

—

togra a mholadh go ndéanfaí athbhreithniú ar na rialacha a fhágann go bhfuil sé casta d’oibreoirí fíona cláir chur chun cinn a chur chun feidhme.