—

treochláir agus cláir infheistíochta a fhorbairt chun spreagadh a thabhairt don chás gnó maidir leis an tionscal a aistriú ó fheithiclí ina bhfuil gnéithe cúnta tiománaí go feithiclí atá nasctha agus uathoibrithe go hiomlán;

—

comhar tionsclaíoch a eagrú (amhail an Chomhghuaillíocht Eorpach um Fheithiclí Nasctha agus Uathrialaitheacha atá beartaithe) ar fud an éiceachórais (lena n-áirítear an earnáil iartheachtach) ionas go mbeidh sé i gcomhréir le hardáin ríomhaireachta, réitigh intleachta saorga, caighdeáin agus bogearraí foinse oscailte coiteanna agus chun na nithe sin a fhorbairt, chun an spleáchas ar mhórchuideachtaí teicneolaíochta a laghdú agus chun ilroinnt chostasach a sheachaint;

—

dálaí fabhracha éilimh a chruthú le haghaidh feithiclí nasctha agus uathoibrithe. Cé go gcruthaíonn feithiclí nasctha agus uathoibrithe luach d’úsáideoirí deiridh (nascacht rianúil, cothabháil thuarthach, nuashonruithe uathoibríocha, timpistí nialasacha, faisnéis shiamsúil), tá easpa glactha ag tomhaltóirí maidir le hábhair imní sábháilteachta, iontaofacht bogearraí agus an praghas atá ar ghnéithe feithiclí nasctha agus uathoibrithe;

—

creat rialála (comhchuibhithe) a bhunú chun tacaíocht rialála a chur ar fáil chun feithiclí atá nasctha agus uathoibrithe a thástáil ar mórscála; chun deimhneacht dhlíthiúil a chruthú ar mhaithe leis na cuideachtaí, na tomhaltóirí agus an tsochaí (e.g. dliteanas a shainiú i gcás timpistí); agus chun tacú le húsáid na bhfeithiclí nasctha agus uathoibrithe a chur chun cinn;

—

measúnú a dhéanamh ar an tionchar sóisialta agus eacnamaíoch níos leithne ar chóras soghluaisteachta feithiclí nasctha agus uathoibrithe agus ar choincheapa nua soghluaisteachta (soghluaisteacht ar éileamh, soghluaisteacht mar sheirbhís, comhtháthú an ghluaisteáin san eangach, iompar comhchoiteann agus príobháideach a chomhtháthú); samhlacha gnó malartacha a chur chun cinn amhail comharchumainn ardán le haghaidh seirbhísí soghluaisteachta uirbí;

—

aird chuí a thabhairt ar thionchar na dteicneolaíochtaí digiteacha ar phróisis táirgthe agus eagrú na hoibre;

—

bonneagair dhigiteacha chriticiúla a fhorbairt/a chur chun úsáide a thuilleadh lena ndéanfar sonraí agus faisnéis fíor-ama agus ardcháilíochta a mhalartú le feithiclí chun leibhéil níos airde uathoibrithe, sábháilteachta agus éifeachtúlachta a chumasú;

—

cur chuige comhchuibhithe agus amlíne shoiléir a fhorbairt maidir le cineálcheadú feithiclí uathrialaitheacha;

—

dlús a chur le reachtaíocht shonrach lena n-osclófar rochtain ar shonraí infheithicle ar bhealach cothrom, slán agus éifeachtach do gach gníomhaí in éiceachóras na mótarfheithiclí (Gníomh um Shonraí Mótarfheithiclí);

—

infheistíocht a dhéanamh sa simpliú gan ceannródaíocht an Aontais a ghéilleadh i dtaca leis an inbhuanaitheacht.

—

Aghaidh a thabhairt ar an drogall atá ar thomhaltóirí tríd an bpréimh ghlas ar fheithiclí leictreacha a laghdú trí bhíthin dreasachtaí airgeadais agus neamhairgeadais araon, agus deimhneacht dhlíthiúil agus ráthaíochtaí dlíthiúla á dtairiscint ag an am céanna.

—

Cur chuige aontaithe a chruthú i leith na leictrea-shoghluaisteachta chun aghaidh a thabhairt ar an deighilt atá ag dul i méid idir margaí atá ag gluaiseacht go tapa agus margaí atá ag titim ar gcúl. Má dhéantar na dreasachtaí éilimh a chomhordú, ba cheart gur shoiléire don earnáil cén t-éileamh a bheidh ann amach anseo.

—

Deighilt a sheachaint idir na saoránaigh sin a bhfuil sé d’acmhainn acu gluaisteán leictreach a thiomáint/a shealbhú agus iad siúd a mbeidh orthu cloí le hinneall dócháin inmheánaigh atá ag dul in aois agus a ngearrfar pionós agus cáin níos mó air. D’fhéadfaí aghaidh a thabhairt air sin trí úsáid a bhaint as an ioncam ón gCiste Aeráide Sóisialta agus as córas trádála astaíochtaí nua an Aontais (CTA2) chun scéimeanna léasaithe shóisialta a fhorbairt.

—

Réiteach eile is ea ardán um fheithiclí leictreacha inacmhainne de chuid an Aontais a fhorbairt chun an t-éileamh ar fheithiclí leictreacha beaga de dhéantús an Aontais a chomhiomlánú.

—

Infheistíocht ollmhór a dhéanamh i mbonneagar luchtaithe. Leis an gcéad Phlean Infheistíochta um Iompar Inbhuanaithe eile, ba cheart gníomhaíocht chinntitheach a dhéanamh chun an maoiniú le haghaidh bonneagar luchtaithe a uas-scálú. Le cur chun feidhme tapa an Rialacháin maidir le Bonneagar Breoslaí Malartacha, ní mór an uaillmhian a bhaint amach maidir le stáisiúin mhearluchtaithe a shuiteáil do thrucailí gach 60 km feadh phríomhchonairí iompair an Aontais.

—

Trí fhlíteanna corparáideacha a dhícharbónú, tugtar deis mhear chun dlús a chur le glacadh feithiclí leictreacha, ós rud é gur feithiclí leictreacha atá i 60 % de na gluaisteáin nua a chláraítear san Eoraip.

—

Córais phraghsála atá cothrom, trédhearcach agus léirithe go soiléir a fhorbairt do stáisiúin athluchtaithe phoiblí agus a n-idir-inoibritheacht a fheabhsú ag an am céanna.

—

Bonneagar eangaí (eangacha cliste) a threisiú agus a dhigitiú chun maolú a dhéanamh ar an riosca a bhaineann leis an lód méadaitheach ó athluchtú feithiclí leictreacha atá iomarcach don bhonneagar fuinnimh atá ann cheana, lena n-áirítear teicneolaíochtaí athluchtaithe chliste (V1G) agus teicneolaíochtaí ‘ó fheithicil go heangach’ (V2G).

—

An geilleagar ciorclach a fhorbairt mar cholún lárnach den aistriú mótarfheithiclí. Áirítear leis sin feithiclí agus comhpháirteanna a dhearadh lena n-athúsáid, lena ndeisiú agus lena n-athchúrsáil (éicidhearthóireacht), an lúb éiceolaíoch a dhúnadh (athchúrsáil) agus measúnú saolré (MSR) a phríomhshruthú i scéimeanna soláthair phoiblí agus dreasachta.

—

Cuidiú le tomhaltóirí cinntí eolasacha a dhéanamh, e.g. trí éiceaphas gluaisteáin nó innéacs indeisitheachta a thabhairt isteach le haghaidh gluaisteán, agus an ‘ceart chun deisiúcháin’ a aithint.

—

Measúnú saolré iomlán a dhéanamh ar thionchar comhshaoil feithiclí leictreacha agus na bpróiseas tionsclaíoch atá nasctha lena dtáirgeadh, chun a áirithiú go gcomhlíonfar spriocanna dícharbónaithe gan dochar níos mó a dhéanamh don chomhshaol áiteanna eile sa slabhra luacha, lena n-áirítear lasmuigh den Aontas.

—

Sócmhainní tréigthe a sheachaint (lena n-áirítear caipiteal daonna agus cumais theicneolaíocha) trí chláir a fhorbairt (lena n-áirítear tacaíocht a chur ar fáil do cheannach thar barr amach ag oibrithe) le haghaidh an aistrithe chuig teicneolaíochtaí glana an iliomad soláthróirí atá ag brath ar oibríochtaí atá dírithe ar innill dócháin inmheánaigh, go háirithe i réigiúin atá leochaileach ó thaobh an gheilleagair de.

—

athruithe a thuar agus a bhainistiú go tráthúil (e.g. tríd an bhFaireachlann Eorpach um Aistriú Cóir atá beartaithe agus na hathruithe ar CED);

—

cláir athscilithe agus uas-scilithe trasearnála uile-Aontais a bhunú agus béim ar leith á leagan ar réigiúin atá ag brath go mór ar thionscal na mótarfheithiclí (tríd an gCiste Aeráide Sóisialta, tionscnamh de chineál an Ghnímh um an Tionscal Glan-nialasachta le haghaidh ceallraí, nó Ciste um Aistriú Cóir 2.0 don tionscal mótarfheithiclí). Méadófar éifeachtúlacht na gclár oiliúna trí dhea-chomhordú na n-iarrachtaí athscilithe uile ar fud shlabhra soláthair na mótarfheithiclí, comhar le tionscail eile agus na margaí saothair náisiúnta éagsúla. Tá gá le hobair leantach a dhéanamh ar thionscnaimh amhail DRIVES, an Comhaontas Scileanna in Earnáil na Mótarfheithiclí agus Aontas na Scileanna a fógraíodh le déanaí chun tacú le forbairt ghairmiúil leanúnach;

—

aghaidh a thabhairt ar an nganntanas oibrithe a bhfuil scileanna digiteacha oiriúnacha acu (agus béim ar leith á leagan ar mhíchothromaíochtaí inscne) trí, mar shampla, sineirgí níos fearr a fhorbairt idir an tionscal agus ollscoileanna teicniúla, oideachas/oiliúint a bhaineann le ETIM a chur chun cinn, scéimeanna oiliúna san obair a leathnú agus foghlaim ar feadh an tsaoil a chur chun cinn;

—

aird ar leith a thabhairt ar an iliomad FBManna neamhspleácha sna hearnálacha iartheachtacha trí uirlisí oiliúna atá cothrom le dáta a chur ar fáil agus trí thacú le córais phrintíseachta, ina bhfuil traidisiún fada ag an earnáil;

—

pas scileanna AE a fhorbairt agus scéimeanna deimhniúcháin an Aontais a chomhchuibhiú (lena n-áirítear micridhintiúir agus inniúlachtaí a fuarthas go neamhfhoirmiúil) chun a áirithiú go ndéanfar scileanna a dhoiciméadú agus a aistriú go cuí laistigh den Aontas;

—

idirphlé sóisialta fóinteach agus faisnéis/comhairliúchán tráthúil a bhunú ar gach leibhéal chun aghaidh a thabhairt ar dhúshláin an aistrithe agus chun teacht ar réitigh chuiditheacha;

—

aghaidh a thabhairt ar an ngné réigiúnach trí na páirtithe leasmhara uile a shlógadh ar bhealach comhordaithe (na comhpháirtithe sóisialta, institiúidí taighde, gníomhaireachtaí forbartha réigiúnaí, soláthraithe oiliúna, braislí mótarfheithiclí, srl.);

—

aghaidh a thabhairt ar rioscaí nua sláinte agus sábháilteachta ag an obair mar gheall ar ghuaiseacha leictreacha agus truailleáin nua;

—

Ciste SURE 2.0 a chruthú chun tacú le scéimeanna scoir shealadaigh chun oibrithe a choinneáil ar bord le linn tréimhsí neamhfhónaimh.

—

aghaidh a thabhairt ar chleachtais éagóracha trádála trí úsáid láidir réamhghníomhach a bhaint as ionstraimí cosanta trádála. Tá gá freisin le seiceálacha níos déine ar allmhairí comhpháirteanna mótarfheithiclí chun a mheas an gcomhlíonann siad caighdeáin Eorpacha amhail REACH (an Rialachán maidir le Clárú, Meastóireacht, Údarú agus Srianadh Ceimiceán);

—

éiceachórais thionsclaíocha réigiúnacha a neartú le haghaidh príomhtheicneolaíochtaí (e.g. ceallraí, sliseanna, bogearraí, an intleacht shaorga);

—

úsáid a bhaint as ionstraimí amhail Tionscadail Thábhachtacha ar mhaithe le Leas na hEorpa i gCoitinne, an tArdán um Theicneolaíochtaí Straitéiseacha don Eoraip (STEP), agus an Banc Eorpach Infheistíochta chun tacú le hinfheistíochtaí mórscála uile-Eorpacha i nuálaíocht mótarfheithiclí agus i gcur chun úsáide tionsclaíoch;

—

an beartas iomaíochta a athchóiriú chun comhghuaillíochtaí agus cumaisc straitéiseacha a cheadú, ar comhghuaillíochtaí agus cumaisc iad lena gcruthófar gníomhaithe Eorpacha ar scála leordhóthanach chun dul san iomaíocht ar fud an domhain, go háirithe i dteicneolaíochtaí digiteacha agus glasa mótarfheithiclí;

—

onnmhairí a chur chun cinn. Ní mór comhaontuithe trádála nua a thabhairt i gcrích, agus ní mór dlús a chur leis an gcaibidlíocht atá ann cheana, lena n-áirítear an comhaontú idir an tAontas agus Mercosur a dhaingniú (agus caibidlí láidre inbhuanaitheachta mar chuid de);

—

an bhearna chostais leis an tSín a laghdú trí ardáin chaighdeánaithe crua-earraí agus bogearraí agus pacáistí ceallraí atá caighdeánaithe go mór a úsáid, chomh maith le costais fuinnimh a chur i gcomhréir lenár bpríomhiomaitheoirí;

—

trí infheistíocht dhíreach choigríche a mhealladh, is féidir rannchuidiú le héiceachóras na mótarfheithiclí a neartú. Mar sin féin, ní mór na hinfheistíochtaí sin a bheith faoi choinníoll aistriú teicneolaíochta, comhtháthú i slabhraí luacha áitiúla, agus cruthú T&F nó ionad dearthóireachta;

—

feabhas a chur ar an éifeachtúlacht agus an simpliú riaracháin, agus aird ar leith a thabhairt ar na FBManna. Agaí tionscanta a chur ar fáil le haghaidh rialacháin nua atá i gcomhréir le timthriall táirgí gluaisteán nua. Thairis sin, tá sé ríthábhachtach feabhas a chur ar chomhordú rialála laistigh den Aontas ós rud é go bhfuil neamhéifeachtúlachtaí agus rialachas níos casta mar thoradh ar chastacht phróisis chinnteoireachta an Aontais;

—

tacú le straitéisí chun poist san earnáil a chur ar bun sa bhaile an athuair agus le straitéisí um chomharbhunú le haghaidh slabhraí soláthair criticiúla, e.g. trí bheartas cuimsitheach maidir le hábhar áitiúil a fhorbairt don earnáil mótarfheithiclí agus dá comhpháirteanna straitéiseacha. Le creat na rialacha tionscnaimh, cuirtear ionstraim láidir ar fáil lena húsáid ní hamháin sna beartais trádála ach freisin sa soláthar poiblí, i scéimeanna dreasachta (léasú sóisialta), agus sa scagadh a dhéantar ar infheistíocht dhíreach choigríche (IDC). Ba cheart go bhfágfadh na rialacha maidir le hábhair logánta nárbh fhéidir dul timpeall ar tharaifí trí mhonarchana a chur ar bun nach ndéantar iontu ach comhpháirteanna a cruthaíodh cheana féin a chur le chéile.