1.

An bhfuil forálacha Airteagal 55(1), Airteagal 56(1), Airteagal 57(1), Airteagail 58(1) agus (2) agus Airteagal 60 den Rialachán Ginearálta maidir le Cosaint Sonraí (1) (‘RGCS’) le léiriú sa chaoi go gcuirtear cosc leo ar chleachtas Ballstáit ar dá réir nach féidir le húdarás maoirseachta cinneadh a ghlacadh a thuilleadh ar ghearán a bhaineann le próiseáil trasteorann agus/nó na bearta ceartaitheacha dá bhforáiltear in Airteagal 58(2) de RGCS a fhorchur ar an bhforas amháin go bhfuil an tréimhse theorann 2 bhliain a leagtar síos sa dlí náisiúnta maidir le fíneáil riaracháin a fhorchur imithe in éag?

2.

An bhfuil Airteagal 57(1)(f) agus Airteagail 58(1) agus (2) de RGCS le léiriú sa chaoi go bhféadfaidh (nó nach mór) d’údarás maoirseachta cinneadh a dhéanamh maidir le sáruithe eile ar RGCS a bhaineann leis an bpróiseáil sonraí chéanna a aimsíodh le linn imscrúdú an ghearáin, agus imscrúdú á dhéanamh aige ar ghearán ábhair sonraí maidir le sárú sonrach a luaitear sa ghearán, nó an gá dó é féin a theorannú d’ábhar an ghearáin?

3.

An bhfuil Airteagal 57(1)(f) de RGCS le léiriú sa chaoi go gceanglaítear ar an údarás maoirseachta, nuair a fhaigheann sé gearán ó ábhar sonraí, raon feidhme an imscrúdaithe a shainiú go soiléir agus an fhaisnéis bheacht is gá a shonrú don rialaitheoir chun a áirithiú go ndéanfar an gearán a imscrúdú i gceart?

4.

An bhfuil Airteagail 5(2) agus 24 de RGCS le léiriú sa chaoi, i gcomhréir le prionsabal na cuntasachta, go gceanglaítear ar an rialaitheoir sonraí na sonraí go léir atá ar fáil a bhaineann leis an ábhar sonraí a thaisc an gearán a choinneáil ar feadh thréimhse iomlán an imscrúdaithe ar an ngearán, fiú mura bhfuil baint dhíreach ag na sonraí sin le raon feidhme an ghearáin arna imscrúdú ag an údarás maoirseachta, agus go bhfuil stóráil den sórt sin ag luí le prionsabal an íoslaghdaithe sonraí a leagtar síos in Airteagal 5(1)(c) de RGCS agus le prionsabal an teorannaithe stórála a leagtar síos i mír (e) de?

5.

An bhfuil Airteagal 5(1)(a) agus Airteagail 12(1) agus (4) de RGCS le léiriú sa chaoi, i gcás ina gcuireann ábhar sonraí iarraidh neamhshonraithe isteach go ndéanfaí a shonraí pearsanta a scriosadh de bhun Airteagal 17 de RGCS, gan na forais leis an scriosadh a lua, go bhféadfaidh an rialaitheoir diúltú na sonraí a scriosadh agus nach gceanglaítear air an t-ábhar sonraí a chur ar an eolas go bhfuil measúnú déanta aige, ar a thionscnamh féin, an ann do cheann amháin ar a laghad de na forais leis an scriosadh dá dtagraítear in Airteagal 17(1) de RGCS? Chomh maith leis sin, i gcás diúltú sonraí pearsanta a scriosadh bunaithe ar iarraidh faoi Airteagal 17 de RGCS, an gcaithfear prionsabal na trédhearcachta a chumhdaítear in Airteagal 5(1)(a) agus Airteagal 12(1) de RGCS, arna léamh i gcomhar le hAirteagal 12(4), a léiriú sa chaoi go gceanglaítear ar an rialaitheoir faisnéis a sholáthar don ábhar sonraí maidir leis na cúiseanna go léir ar a bpróiseálfar na sonraí pearsanta, lena n-áirítear cuspóirí na n-oibríochtaí próiseála atá fágtha, catagóirí na sonraí, na hoibríochtaí próiseála agus an bunús dlí?

6.

An bhfuil Airteagal 5(1)(a), Airteagal 6(1)(f), Airteagal 13(1)(d), Airteagal 14(3)(a) agus Airteagal 14(5) den RGCS le léiriú sa chaoi go measfar oibleagáid an rialaitheora faisnéis a thabhairt don ábhar sonraí maidir le próiseáil sonraí pearsanta a dhéantar i ndáil le cosc faoi choim a bheith comhlíonta agus go gcomhlíonann sé prionsabal na trédhearcachta nuair a dearbhaíonn an rialaitheoir ina bheartas príobháideachais go dtarlóidh cosc nuair a sháraítear rialacha an ardáin (gan na cineálacha féideartha coisc, cosc faoi choim san áireamh, a shonrú), agus go ndéanfar na sonraí pearsanta (lena n-áirítear an chúis leis an gcosc, an fad agus sonraí próifíle) a phróiseáil ar bhonn an leasa dhlisteanaigh chun slándáil an ardáin, a úsáideoirí agus a bhaill a chosaint agus a chinntiú, ach nach gcuirtear an t-ábhar sonraí ar an eolas go hindibhidiúil faoin bpróiseáil sonraí pearsanta a dhéantar i ndáil le cosc faoi choim, ag tús na próiseála sin ná ina dhiaidh sin, ach amháin tar éis don tréimhse cosc faoi choim (nach mairfidh níos mó ná 30 lá) a bheith thart agus cosc iomlán a bheith curtha i bhfeidhm, tráth a chuirtear faisnéis ar fáil don ábhar sonraí maidir le próiseáil sonraí pearsanta de bharr an choisc (cosc iomlán, ní cosc faoi choim)? Más diúltach an freagra ar an gceist dheireanach, an bhfuil Airteagal 14(5)(b) den RGCS le léiriú sa chaoi go bhféadfaidh an rialaitheoir brath ar an eisceacht ón oibleagáid faisnéis a sholáthar atá leagtha síos sa fhoráil sin, nuair a dhéantar an phróiseáil chun críocha an choisc faoi choim?

7.

An bhfuil Airteagal 5(1)(a) agus Airteagal 6(1)(f) de RGCS le léiriú sa chaoi go bhféadfar a mheas go bhfuil gníomhaíochtaí rialaitheora sonraí a phróiseálann sonraí pearsanta úsáideora chun críche cosc faoi choim a chur ar an ábhar sonraí gan an t-ábhar sonraí a chur ar an eolas faoi phróiseáil den sórt sin, ach d’fhonn an t-ardán, a úsáideoirí agus a chomhaltaí a chosaint, i gcomhréir leis na ceanglais dleathachta a leagtar síos in RGCS?