Achomharc arna thabhairt an 20 Meán Fómhair 2024 ag VT i gcoinne bhreithiúnas na Cúirte Ginearálta (an Ceathrú Dlísheomra) a fógraíodh an 10 Iúil 2024, i gCás T-216/23, VT v an Coimisiún

(Cás C-622/24 P)

(C/2025/243)

Teanga an cháis: an Iodáilis

Páirtithe

Achomharcóir: VT (ionadaí: M. Velardo, avvocata)

Páirtí eile sna himeachtaí: An Coimisiún Eorpach

An t-ordú atá á lorg

Iarrann an t-achomharcóir ar an gCúirt:

Saincheisteanna dlí agus príomhargóintí

Mar thaca lena achomharc, maíonn an t-achomharcóir, go bunúsach, dhá shaincheist dlí.

Leis an gcéad saincheist dlí, líomhnaíonn an t-achomharcóir go ndearna an Chúirt Ghinearálta earráid dlí toisc nár chinn sí gur sáraíodh prionsabal na córa comhionainne d’iarrthóirí i gcomórtas.

Mheas an Chúirt Ghinearálta go mícheart nach sárú ar an bprionsabal sin é athdhéanamh na dtrialacha de rogha na n-iarrthóirí agus beag beann ar réaltacht na faidhbe teicniúla a sainaithníodh agus nár athraigh athdhéanamh na dtrialacha scríofa, ar dhátaí éagsúla agus do roinnt iarrthóirí amháin, na coinníollacha oibiachtúla maidir le measúnú na n-iarrthóirí.

Mheas an Chúirt Ghinearálta go bunúsach go bhféadfaí déileáil le hiarrthóirí a rinne na trialacha scríofa céanna ar an mbealach céanna uair amháin, faoi dhó nó trí huaire fiú, beag beann ar aon fhíorú ar na deacrachtaí teicniúla a bhí acu le linn na chéad trialach.

Ós rud é go raibh tionchar suntasach agus inseachanta ag na bearta a ghlac an bord roghnúcháin, a mheas an Chúirt Ghinearálta a bheith dleathach, ar dhéanamh na dtrialacha, sáraíodh prionsabal na comhréireachta freisin.

Leis an dara saincheist dlí, líomhnaíonn an t-achomharcóir go ndearna an Chúirt Ghinearálta earráid dlí agus na rialacha maidir le léiriú an fhógra comórtais á gcur i bhfeidhm aici.

Rinne an Chúirt Ghinearálta na critéir mheasúnaithe do na catagóirí éagsúla (AD7 agus AD9) a mheascadh, de shárú ar cheanglais an fhógra comórtais, inar luadh go soiléir nár ghá measúnú a dhéanamh ar acmhainneacht bhainistíochta meithle ach amháin i gcás iarrthóirí a bhí san iomaíocht do ghrád AD9, ach nár mhór measúnú a dhéanamh ar chumas ceannaireachta gach iarrthóra, cibé acu ar ghrád AD7 nó ar ghrád AD9 a bhí siad.

Dá bhrí sin, rinne an Chúirt Ghinearálta earráid dlí agus í ag léiriú na rialacha a bhaineann le fógraí comórtais agus lena gceanglaítear foclaíocht théacs an fhógra a urramú go docht, agus é mar aidhm aici freisin ionchais dhlisteanacha na n-iarrthóirí a chosaint.